I NGHILH ZAWK ANG (CH - 5) by Ahmangaihi violette Khiangte

I NGHILH ZAWK ANG

by Ahmangaihi violette khiangte

Chapter - 5

"Apa, anu ka be duh e..... Hostel-a kan awm loh chuan duh duh hunah kan hmu thei dawn i ti sia, kal i phal leh bawk si lo," Williama'n a tih laichuan ka inher a, "Nia, in duh hunah in leng thei ang, i nu pawh a lo kal thei ang i ti sia," Sangsangi'n a lo ti ve bawk. 

"Rei lo te chauh bia ang che u, Willie...i damdawi ei a hun.." ka pasalin a tih zawm a, an ṭawng chu ngaithla zui tawh loin inchung pindan lam ka pan a, kan nupa pindan ka thlen chuan ka ruak huai mai hian ka hria. Rampuii call ka tum uk a, sawi tur em em pawh ka nei chuang lo, inchhungkhura thil thleng zawng zawng mi dang hnena sawi leh hi a ṭha ber lo bawkin ka hria. Phone chu ka dah a, khum lu lamah tukverh pawn lam hawiin ka ṭhu vang a, kawngpui chu ka melh vang vang bawk.

Ka hma ka sial viau em mawni tiin ka inngaihtuah a, ka indem phal meuh lo thung, fa ka awt ringawt a ni a, chu pawh ka pasal nena kan inkar a lo ngheh zual nan a ni, ka pa min fuihna kha ka hre reng a, chhungkua dina nghet taka zung kaih turin min chah kha a ni a, nupa fa nei lo ka hriat te ka han ngaihtuah zel a, tawpna chhe tak tak nei, hlim zui ta lo hriat ka nei nual a, miten fa nei lo hmeichhiate an sawi dan lah ka hai lo.

Naupang ho leh Alana inbiak dan ngawt kha ka rilruah a cham, fa chu lo nei ta ila a unau te hian an en hrang bik mai lo ang maw tih thlengin a ni ka ngaihtuah. Ka pai hma hawtin an huphurh lawk chu a ni si a, heti hian min dah hrang reng mai dawn em ni ang? Ka pasal chhanna lah kha aw, a rilru diktak a nih loh ka beisei, a fate ngaihṭhat nana sawi anih chu ka ring a, ngaihdan dang ka nei tel bawk, kei nena fa neih hi a lo duh ve reng em, 'Nei lo mahila a pawi lo' tiin  ka bulah a sawi mai zel kha a nia, khang thute kha min hnem nan nge a sawi a, fa neih a lo duh tak tak lo zawk le?

Darkar khat dawn a liam hnuah Alana chu a lo chho a, kei intifai turin bathroom-ah ka lut zui a, ka va chhuah leh chuan mutna a lo siam fel diam tawh. "Naktukah kal hma deuh ka ngai dawn a, zanin chu mu hma teh ang," tih pahin a phone a bih a, chhang lem lo chuan ka inthlak a, zep loah chuan ka lungawi zan lo a ni, sawi chhuah phei chu ka duh lem lo thung.

Ka va mu tur chu lukham min lo siamremsak vat a, ka lamah chuan a rawn tawlh phei bawk a, "I va rimtui ve," tih paha min kuah mai a tum chu ka lo che sawn a, "Mu hma rawh," ka ti tawl. Min rawn hnaih leh sauh a, a phur hmel aṭang chuan a beisei chu ka hai lo; mahse, a mood-ah ka awm lo a ni. 

"Engtizia nge?" 

"Ka nuamsam vak lo,"

"Ka chau"

"Chhunah eng nge i tih a?" ka va melh deuh ram a, ka hnar tih a hrethiam lo nge ni min lo kuahin ka fawh a tum zui a, a awmah ka lo nam chawt chawt.

"Thawh hma i ngaih kha," ka ti leh hluai a.

"A la hma alawm," ti maiin min fawp zui a, ka hnar theih loh vangin ka dawh tawp, ngenngawl angreng zet hian min fawp a, phurna chhete mah ka nei ve lo, thawhsan daih te ania ka duh ni.

Chutah, inla hrangin min en vang vang a, "Lungngawi lohna i nei em ni?" a ti ta thlawt a.

"Nei hran lo e, zanin chu ka chau em mai, mu zawk ang," kan puansin chu ka pawt ṭha a, amah pawh ka sin ṭhat tir zui a. Mahse, ka kut lo manin a lamah min pawt hnai salh a, a awmah min kuah nghal hlu hlu bawk.

"Lo thawk hah lutuk ṭhin lo la, i pasal tan hian i tha te hi lo khek ve ṭhin deuh la a ṭha ang, " nui chunga tih pahin ka ban te chu a rawn hmet a, ka nui ve thei mang lo, ka sawi duh si loh thil chu ka pai ṭun a, hrethiam chung siin lung a awi mawlh lo, ka rilru chuan han pangchan ve a, induattir te pawh a chak ve ngei a; mahse, hrang bik riaua inhriatna a awm tlat si a ni.

"A mood-a i awm si loh chuan engtia han on sak chi nge i nih ang aw," a biangin ka biang a rawn nul thuak thuak a, ka beng bulah a rawn thaw lum ham ham bawk.

"Thil ka zawt che anga dik takin min chhang rawh aw?" ka ti tawl a, a lo bu rang khawp mai.

Ka han melh deuh vang vang a, engkim sawidun a ṭha, nupa chu engkim zep nei loa sawi dun zel tluk a awm lo ti rilru chungin, "Fa neih leh hi i chak tawh vak lo ti raw?" ka ti khawl a, a mitah ka en ran a, a meng nur deuh e tih loh chu danglam vak a awm lo.

"Chak loh thu a awm hleinem, a pai pawh i la pai hma hmaa," tiin a kiai suk a, a ngai thutak vak lo a ang ka ti.

"Nau lo pai thut ila engtin nge i ngaih ang?" ka tih leh chuan, "Siam hmasa phawt ila, hunin a rawn hril mai ang chu," tih leh ka lama rawn awn a rual a, min bawh bet nghal rawk rawk. Kan puansin chu a hnawl liam vek a, a kawr a phelh zui bawk a, ka zawhna a chhan dan ka lo duhkhawp lo vei nen min fawp tura a rawn kun chu a hmui ka lo hupsak a, "Nei lo mahila a pawi lo tak tak em?" ka ti leh ngat.

"Kan thu a ni hleinem, Pathian thu thu alawm," a ti thawp sup a, ka la duhkhawp lo cheu.

"Sex hmanpui tur lek te hian min lo nei ange," Chu thu chu a rawn ri chhuak phawng a ni ber, chet leh a tum chu a tawp chawt a, phawk fein min en bawk.

"Eng maw i sawi a?" a aw chu a chang fal mai, "Sex vanga nei cheah min ngai a maw?" a ti leh fak a.

"Min mamawhna dang i nei lo em alawm," sawifiah dan ka hriat loh vang a ni tawh ber, thil ṭul lo tak a ni ka sawi.

"Tunlai chu i mizia a mak hle mai," tih leh ka sira leh a rual a, a phur bik ta vak lo aniang, "Mu rawh, ka tibuai lo ang che," a han ti zui nghat a, nuam ka ti bik chiah lo.

"Ka rilru i hrethiam lo a nih kha.." ka tih laia ka aw chu a zawi hle a, ka rilru a na ru veng veng.

"Eng nge ka hriatthiam loh, i chak loh chuan sawi dawt mai la, ka tilui dawn hleinem che; mahse, i mi ṭawngkhum duh dan kha chu a mawi lo khawp mai," a ti nghet charh a, thinrim aw ni loin lungawi lo tak aw a ni.

"Fa neih chungchang zawk alawm ka sawi.." ka tih laiin, "I sawi chu ka hria," a ti bul hmuk a, puansin ṭhain a tawlh hla zui bawk a, ka lungawi lohzia chu aw.

"Keipawn ka hria, naupang bula i thilsawi kha ka hre ve vek ania..." ka ti ve sak a, chhan nei loa hetianga awm hi ka ni bik hleinem, ka lungawi lo ṭawngsual chauh a hria a, a chhan pawh a hre ve ngei tur a ni.

"Eng maw i hriat?" min rawn melh a, kei ka ṭhu chhuak hluai thung a, min en rei duh lo zui bawk nen ka darah ka va nam dat a, a lo hawi leh rang khawp mai.

"Kan fa i duat loh zawk tur thu i sawi kha ka hria..." a lo ner nghal sawk, keilah chu ka rilru a no laklawh a, ka thilsawi chu ka natpui zel tawh.

"Chutiang ka sawi ka hre lo,"

"Ka ngaithla che u,"

"Engtikah maw, fa kan nei pawh ni hawt lo a," aw....chu tak chu a ni, fa pawh kan la nei lo; mahse, engatinge khatianga pa berin ṭawngkam a neih, chu chu ka hrethiam thei lo a ni, a nupui ka ni lawm ni tih zawh a lo lut zung zung.

"Fa pawh lo nei ila, midang zawng aia i duat loh tur thu leh i hmangaih ber loh tur thu i sawi kha," ka insum khawp mai, rilru na anga lan lah ka duh lo.

A nui deuh hawk a, za lo tak a ni.

"Nichina naupang ho nena kan thil sawi kha em ni a, i va hahthlak mai mai e aw, ka sawi i hriat chuan ngaihkawih tur eng nge awm, naupang ho an pangchang ve a, duat hlawh loh an hlau anih kha maw le, kan fa ka duat loh ber tur thu phei chu ka sawi hauh loh kha..." a ban a phar deuh uk a, hahthlak min tih hmel hle bawk.

"Ka ngaithla reng alawm, khatiang kha naupang bula sawi a ṭulna ka hre lo, an rilru i ti khaw lo mai mai zawk ang," ka ti leh hram a, kei ni ila ka sawi duh loh tawp tur a ni.

"I ngai kawi mai mai anih chu, naupang hi i hrethiam viau ṭhin emaw ka tia, hetiang zawnga i lo ngaih ka ring hleinem," a ti a, min chhuahchhal ni awm hrimin min en tawh, ka rilru chu a buai deuh niai a, ka ṭanfung a dik lo riauin ka hre bawk a, a nuam duh lo hle.

"Sawi lo la a ṭha zawk, i fate ang khat veka i hmangaih tur thu te, tumah duat bik i neih loh tur thu te hrilh la, an ngaih a ṭha em em ang," ka ti sap sap a, min en deuh vang vang a, sawi leh tur ka hre tawh lo, naupang vanga buai anga lan ka hreh a ni ber.

 

"Khatiang mai maiah lungawi lohna tur a awm loh kha, i dik lo tlat, naupang rilru ang lek alawm maw i put le, an dinhmunah in chan la, ka nupui nei leh hi a phur vak lo tih pawh i hriat tawh kha, nangpawh an ngaina ve ṭan chauh che ania, a kawi zawngin engmah lo la suh, an pangchang veah ngai mai la, keipawn an rilru dam nan ka sawi ve mai chauh anih kha, naupangte hi chuan duat ber angah inngai vek sela an lungawi mai dawn alawm, a puitling zawk chuan hrethiam teh," a ti bul bul a, a puan sin ṭha lehin sir lam min chhawn zui a, ka chhang zui ta bik lo.

Mut pahin a thilsawi chu ka ngaihtuah let neuh neuh a, a dik ka ti bawk si, naupangte rilru tur ka dawnin an sawi awm tak an sawiin ka hre bawk si, indem phal mang lo chungin ka indem ru hle a, rilru a nuam lo ru veng veng tawh. Alana ka va en leh chuan a lo muhil tawh nge ni a mit a chhing a, a thaw ri sek sek a, ka kuah pawh chuan a hre tawh lo aniang a che eih lo. Rei deuh ka meng a, zan lai pelh velah ka muhil ve ta hram a.

Zing ka thawh chuan dar 6 a pel hret tawh, ka nu a lo tho tawh a, thingpui a lo lum zo diam tawh a, amah phei chu ka hmu lo, chaw chhum ka siam laichuan inhnuai lama a ṭawng thawm ka hria a, a vawk in tur a buaipui leh a nih hmel. Dar 7 pelha Alana lo chhuk chu thingpui ka lo thlit vat a, "Chanchinbu lak vat a ngai a ni," tih pahin thingpui chu a la a, naupang ho pindan lam a pan zui bawk.

Eirawng ka bawl zung zung a, Williama leh a pa chu kawngpuia insawizawi turin an kal thung a, hmeichhe naupangte erawh an la tho peih lo aniang pindanah an ṭawng melh melh a, "Lo tho ula, thingpui lo in rawh u," tia ka koh hnuah pawh an la rawn chhuak mai lo. Ka nu lo lut chuan a ko lang lang a, "Lehkha inzir loh chuan zingkarte hi hnathawh nan aṭha ania, kawt laite phiah a ngaih saw, thing hnah a tla leh ṭeuh tawh," a ti bawrh bawrh a, a khat tawkin a ko leh ṭhin.

Chaw eidawn ṭepah insiam sain an lo chhuak a, an pa ruala an kal ṭhin avangin chaw kan ei hma ṭhin khawp mai, an tiffin tur hi ka siam a, anmahni hian an duhzat an insiam veleh mai zel a, hmeichhe pahnih hi chuan sausage leh artui vel hi an duh a, Williama thung hi chuan alu bak hi a duh meuh lo a, zan lamah hian alu hi ka chan lawk a, tuktin kan siam tluk tluk mai a ni.

Chaw eilai chuan chhun lama chhuah ka tum thu ka sawi a, "Lo bazar nghal rawh, thlai chi i lo lei pah dawn nia," ka nu chuan a ti ve mai a, Alana'n "Kan rualin i kal dawn em?" ti a min zawh chuan ka hmanhmawh loh thu ka hrilh a, ka thawh ṭhinna school lama kal ka duh vang a ni, ka peih chuan ka nute ka tlawh kawi anga, scooty kawl ka duh thute pawh hrilh ka duh.

Chawei khamah chuan rei awm loin an liam diak a, kei erawh in vel ka tifai leh rih a, ka kal chhuah ve meuh chuan chaw chhun ei a hun leh tawh. Vanneih thlak deuhin taxi ka hmu hlauh a, duh duh hunah hian hman tur a awm lo a, thui fe kea kal a ngaih ka rin laiin kan kawt kaia ka nang fuh a, Women jail a kal nu pakhatin a hman lai a ni nghe nghe.

School ka han thlen chuan Rampuiin class a lo la zo chiah a, thawhpui hluite pawn min lo lawm thiam khawp mai. Sir Zoliana'n thingpui min lo thlitsak a, a ṭhenin min lo chhaihin kan nui ho bâwk bâwk a, lung te pawh a leng ve rum rum mai. Vawiin chu kal lo an awm nual a, an indaih vak lo bawk nen Rampuii pawh a awl hman mang lo a, titi pahin class-ah ka va ṭhutpui ta ngawt a, naupang chu chhiar tur a pe te te a, tukverh thlang lamah chair la thlain kan titi dun a, thurawn mamawha pan ka ni bawk nen zep sise loin engkim takmeuh chu ka hrilh a, ka han sawi zo chu ka thawl hawk mai hian ka hria.

Ani chuan, "Naupang chu i thik ve deuh niin ka hria," a lo ti teh daih a, a ni thei dawn em mawni?

"Naupang chungah hian rilru ṭha put ka duh  asin," ka ti a, ka rilru dik tak leh ka duhdan tak pawh a ni, ka tum ve hle bawk.

"I duh dawn tih chu chiangsa alawm, i chhia leh ṭha hriatna vang pawhin i tum ngei ang; mahse, i hrin loh na na na chu thik chin a awm ve tlat dawn a, i dik lo chuang miah lo ania, i pasalin a zir viau a ngai bawk ang," a ti dap dap a, chu chu a dik ang.

"Nizana a thilsawi dan kha a ṭha ka ti lo a, naupang rilru a ti khaw lo mai ang tih ka hlau a; mahse, a han insawifiah kha chuan ka dik loin ka hre bawk si a, min ngaihdan a dik lo zawk ang tihte ka hlau leh a," ka tih chuan, "Nia, i fimkhur reng a ngai, an nuhrawn i nihna pawh i hriat reng a ngai tho, venthawn an ngai ve tlat dawn a, fahrawn neih chu awm dan thiam a ngai anih kha," a ti ve luam a.

"Alana'n fa neih a duh chiah lo anga ka ngaih vang a ni ber, an thilsawi ka hriat hnu kha chuan ngaihbel a awl ve riau a, a fate vang hian fa neih a lo hreh aniang tih te ka ngaihtuah a, Sangsangi'n min lo ngaithei lo bawk nen rilru a no hma tak tak a ni," ka ti halh a, Rampuii chuan min hrethiam khawp mai. "Nuhrawn anga awm loha, inpawh taka awm i duh maithei a; mahse, nuhrawn mai i ni tih hi hre reng zawk la a ṭha ang, inrawlh chin tawk te pawh i hriat a ṭha, mawhphurhna pawh lak tum lutuk lo zawk mai rawh," tiin thu min lo rawn a, rilru put dan tur hi hriatthiam a har ṭhin, fel leh ṭha zawka kan hriat ang te hi midangin ṭha an lo ti ve vek ṭhin si lo a.

Class a lak zawhah chuan office-ah rei lote ka va ṭhutpui leh a, ka nu te tlawh kawi ka duh vangin rei ka ṭhu tawh lem lo. Taxi min chan pui a, "Kan inbe dawn nia," tiin kan invai liam ta rih a. 

In kan va thleng chu ka nu chauh a lo awm, "I lo chhuak mai mai em ni?" a lo ti var a, "Bazar pahin ka lo kawi lawk, ka scooty hi hmang an awm em?" ka tih chuan, "Hruaia'n a la chhuak zeuh zeuh, dah reng chu a chhe duh a tia, i kawl duh deuh em ni?" a ti leh vat a, "An hman vak loh chuan hawn nghal mai ka duh zawk a," ka tih chuan a nui heu mai.

Thingpui kan in dun a, pangpar chungchang te a sawi hlut a, a ṭawng kar lakah min thlek leh deuh vang vang ṭhin, no sil tura ka tho chu, "I cher deuhin ka hria, i rai em ni?" a lo ti khauh a, "Ka rai thei lo mangang rilru hah anih hi," ka lo ti deuh kher a.

"Mangang mah ta che, in la innei rei lo em alawm, i la pai ve mai ang, naupai tur chuan hrisel ṭhatte a ngai ania," a ti ve luam a, no ka sil zui a, ka chhang tawh lem lo. Ka sil zawh hnuah in chungah kan inzui chho a, pangpar ṭiak ṭhenkhat chu ka la ve a, Scooty hawn nghal ka tum chu, "I u chu hrilh ve phawt la, ngawi renga lak ngawt aiah.." a tih vangin u Hruaia chu ka call leh rih.

"I lo la har la ti reng a, i duh leh hawn daih rawh, i tan te chuan kan ui ngam nang.." a lo ti lang lang a, "Ka ta ni miau hek.." ti a ka chhang chu a nuih a za khawp mai.

Bazarah ka va kal leh te te a, chawhmeh bakah ka nu pangpar chi min chahte chu ka lei bawk a, kan in ka thlen thlak chuan dar 3 a pel tawh. Eirawng ka bawl laichuan kawtah motor a lo ding a, naupang ho an lo thleng tih hriain ka va ngaihven ve vat a; mahse, ka tum loh dan deuhin ka va hmu, car sen aṭangin naupang ho chu an lo chhuk a, car khalhtu pawh an nu ngei a ni.

Mary chu ka lam hawiin a lo nui deuh sang a, lo chhawn dan pawh ka thiam meuh lo. Ka nu lo chhuak ve lam chu ka melh vat a, "School ah i va lam em ni?" tiin a Mary lam chu a hawi a.

"Vawiin chu tihtur ka nei lo em a, an mamawh lei pahin ka va lam anih hi," pakhat chuan a lo ti vat a, Sangsangi lo lut tur chuan min rawn melh rum kher a, Naomi erawh muangchang fein a nu leh a nau hnungah a lo kal thung.

"Mapuia'n taxi a tir leh awm sia, hrilh nachang te in hria maw?" ka nuin a tih chuan, "Hrilh e, an taxi nen a hmunah kan in nang alawm," Mary chuan zang khai deuh hian a ti a, min lo melh leh zawk tih loh chu min be lem lo, an lut chu ka zui ve vat a, an vai chuan sitting room lamah an phei a, an nu thil leisak vel enin naupang chu an ri le lu mai.

Choka aṭang chuan thingpui an duh em ka zawt a, Mary'n min lo chhangin a hâng a duh thu a lo sawi a, ka nu chuan a duh ve lo aniang engmah a sawi ve lo. No hnih chu ka siam ta tho a, ka va pek laichuan naupang te chu an pindanah inthlak turin an lo lut tawh a, ka nu leh Mary chu ṭhutthleng pakhatah lo ṭhuin Pathian thu an lo sawi dun mek a ni. 

Thingpui ka va hun laichuan min lo en ve ve a, Mary lam ka va hawi chu min lo nuih leh var var tawh. "Kurtai i duh em?" zawi deuh takah ka tih chuan lu a thing a, a hmelṭha angreng a, a nu lianin a zahawm deuh khup mai hian ka hria. Kal leh nghal mai ka tum chu, "Ruatte, naupang ho hi an buaithlak em?" a lo ti zauh a, minti hamhaih deuh.

"Buaithlak loh e, an fel khawp mai," ka ti ve mai a, "Ti rawh, lo ṭhu ve rih teh.." tiin min la sawm zui. 

Ka nuin min lo melh ve kur bawk nen an piaha sofa-ah chuan ka ṭhu a, Mary chu a ṭawng bawrh bawrh reng a, ka nuin a chhang ṭhin tih loh chu engmah ka sawi ve lem lo. Rei dawn ka ngawih hnu chuan ka lam lo hawiin, "In awmna hi a hla lutuk a, naupang pawh ka rawn ngaihven thei mang lo ang, i kutah ka dah tawp mai ania," nelawm deuh hian a rawn ti a, "Ngaihtuah duh suh, an nula tlangval tawh lutuk ania," tiin ka chhang ve leh a, a ṭawngkam leh min biak danah chuan nu sual niin a lang lem lo, ani pawhin min haw lo niin ka hria.

Pangpar chungchang an sawi leh tak hnu chuan thawh pahin no ka seng a, let leh tawh lem loin choka ah ka ṭhu reng a, ka phone ka hmet kual a ni ber e. Rei vak loah an thawm ka hria a, inchung lamah an inzui chho ta bawk. Williama lo chhuak chuan a nu awmna min lo zawt a, in chunga an awm thu ka lo hrilh vat a, ani hi chuan a nu hi a ngai khawp a, a chhoh pah pawh chuan a au deuh lang lang a, a nuin a lo chhang thawm pawh chu ka hre pha.

Ka nu chuan a pangpar a entir a ni mai thei, an awm rei reuh khawp mai. Sangsangi lah chuan, "Eng nge an tih a, an van lo chhuk har," a ti leh ṭhin a, min en nain ka chhang lem lo. Hmarcha ka rawt san a, a nau nen tv an en thung a, chutia hmarcha ka rawt zo in sitting room lam ka va pan chu an ṭawng thawm ka hria a, ka chungchang an sawiin ka hria.

"Anu chu ITF-i a awm chhung chuan a lo haw thei tawh lo hrim hrim, nupui dang awm laiin a haw thiang lo apuin a tih kha, a lo haw dawn chuan ITF-i a chhuah phawt a ngai alawm," Sangsangi'n a lo ti mawlh mawlh a, Naomi ṭawng thawm erawh hriat tur a awm lo.

Aw ka thian kharh a, an lo hawi rang dun nasa mai, "I thil sawi kha ka hre pha ania Rinsang, hei hi ka in ania, ka chhuak dawn reng reng lo, i nu pawh a lo haw tawh lo ang.." ka han ti deuh nghat a, Naomi chuan a u a melh zuk zuk a, Rinsangi erawh chuan min melh kur thung.

"I duh chuan i nu bulah awm daih mahla pawi ka ti lo ania, ka sual ve thiam lo emaw inti nge mawni..." ti bal bal chungin bathlar lam ka pansan a, huan lam hawiin thawk ka va la deuh vang vang, ka rilru thianghlim te hi a bo zo mai dawnin ka hria, naupang ka khing der chu a ni tawh a, beisei aiin a harsa daih mai.

Ka nu te lo chhuk chu ngaihsak tawh lem loin bathlarah ka awm reng a, Mary haw tur pawh chu kawt thleng a va thlahin ka hria. Rei vak loah an lo lut thawm ka hria a, a tute chu an homework ti turin a hrilh bawk. Ka va luh laichuan chokaah a lo ṭhu a, "I nu pangpar chu naktuk zingah kan khawih dawn nia," pangngai deuh hian a lo ti a, ka chhang lem lo.

Ngawirengin filter-ah tui ka thun a, a awm ka ti nuam lo nge mawni min lo thlek leh ṭhin a, ka be duh lem lo. A tuar ta ngang lo aniang chu, "Mary hi chu ngaihdan tawk thiam ve a ngai ṭhin a nia, tih chhiat theih hian a awm duh ngai lo a, naupang lahin an ngai em em bawk si, lo hnarsak hi a rem ṭhin lo.." a ti duah a, ka va melh zauh ringawt.

"Ngaih loh lamah te khan mi i lo ngai ange, ka be chhe lo ringawt ania, chutin ka mil bik vak lo, uire zawk a ni miau a.." a ti leh a, chutah chuan zawhna ka nei ta chiah.

"I fapa leh i tute uire santu a nia; mahse, in inkar hi chu a ṭha riauin ka hria, Alana hian a khap hran lo em ni?" tia ka zawhna chu mak a ti deuh aniang min en hau a, min chhan a tum hman zuau bawk a, a ngawi leh daih thung.

"Mary pawh khan inthlahrunna vak a nei loin ka hria, hetianga a rawn ngampat hi ka rin loh nen..." ka ti leh kher a, a hmel chu chik zetin ka en bawk.

"Naupang hi ka khawngaih leh ṭhin alawm maw le, an pa lahin nupui dang a neih san bawk si a..." a ti kher chu ka han helh khawp a, ka insum thei ta meuh lo.

"Ka nu, i mo ka nih hi aw, i remtihna thlapin ka lo lawi ania.." ka ti fiah fak a, min en danah chuan mak tihna leh inthlahrunna a lang, kei erawh ka rilru a na ru veng veng thung.

"Mi i lawm vak pawh a ni maithei; mahse, i mo angin min en la ka duh khawp mai, naupang te nuhrawn chauh ka ni bik lo ania, i fapa nupui ka ni ve a.." ka han ti leh hram a, ka duh tawk pawh ka sawi thei lo, ka insum nasa hle ringawt.

"Ka lawm lo che emaw i ti a ni maw..?" a tih chuan, "Min lawm ang hian i la awm ngai miah lo, kei aiin i mo hlui lakah pawh khan i ṭha daih zawkin ka hria," ka ti ve zat a, min rawn melh rum ta.

"I fel viau emaw ka tia, i rilru hi a kawi ru riau mai.." min ti ta zek a, sawi leh ka duh viau nain mahni ka inkhap bet a, ani nen kher hi chuan boruak ṭha neih dun ka duh, ka chhang zel anih chuan an inkar ka ti chhe zo dawnin ka hria.

Dar 6 dawnah Alana pawh a lo thleng a, kawta ka scooty awm chu min zawt nghal zat a, ka kawl tawh dawn thu ka sawi chuan, "An ui lo maw, i duh chuan secondhand te pawh kan lei ve thei tho asin le," a ti nuah nuah a, "An dah chuang reng alawm, an hmang ṭangkai tak tak lo," ka lo ti sam et thung.

A inthlak laichuan Mary lo kal thu chu ka hrilh a, "Naupang a rawn dah a, a hrilh thu che a sawi bawk a," zawhna ngah deuh tak chuan ka ti a. "A zin hmaa hmuh min lo dil a, ka remtih sak ta mai anih kha, a awm rei em?" a tih chuan, "Awm rei ang reng e, ka nu pawn a lo be ṭha khawp mai.." ka ti leh a, ka ṭawng ring lem lo.

"Ka nu hi chu aw, khap deuh a ngai a ni...." tih zawng chuan min chhang a, eng hi nge maw ka beisei ni, an awm dan hian minti hnual rawih rawih thei mai.

A inthlak pawh chu nghak tawh loin ka chhuksan a, chawei ka siam zung zung a, Naomi'n chair min lo rem pui ve bawk. Zanriah kan han kil ho chu an reh ṭhap mai a, ka nu lah chu a ṭawng duh der bawk si lo, chaw bel a chang a, a titau em mawni tih tur hian a ti deuh nghut nghut mai a, Alana pawn a en leh vung vung ṭhin. A pi tho chu Sangsangi'n a zui ve nghal bawk nen ka pasal ngaih chu a ṭha vak tawh lo. Mitmeiin min lo zawt a, lu ka lo thing ringawt thung.

Naomi lamah thle hnaiin, "An inhau em ni?" a va ti sar sar a, "Api maw, tuman kan hau lo, Au kha chu...." a ti a, min lo melhin a ngawi leh daih.

Alana'n ka lam a lo hawi chuan, "Ka zilh ve hlek," tiin chaw ka bar san mai a, ka va hawi leh chuan a rilru a buai deuhin ka hria. "A kamtam deuh a, ka khak anih kha, ngaihṭhat lohna tur a awm lo," lawm vak lo chuan ka ti a, "OK..." a ti zawi sup a, min zawt zui ta bik lo.

Zanriah eikham chuan ka nu bulah tutor rawih a ngaih thu a sawi a, ka nuin "In nu a awm reng alawm, zirtirtu ania a zirtir thei ang chu.." a lo ti teh tlat a, ka hreh lem lo nain ka phur hran lo khawp mai. Ka pasal pawh chuan ka rilru a hrethiam aniang, "Midang rawih pawh a pawi lo...tlai banah emaw kal mai sela.." a ti nuah nuah a, ka han ngaihtuah chiang a, mi pawh an ngainat phah mai thei asin tih chu ka rilru a ni, min mamawhna an neih loh chuan an tan hian nuhrawn chauh ka ni reng mai dawn a, min mamawh tura ka siam an ngai zawkin ka hria.

"Ka zirtir thei alawm, hmun danga tuition kal a ngai lo ang.." choka aṭanga ka va tih chuan an reh ṭhap, rei vak loah Alana a lo ṭawng a, "I peih tak tak maw..?" a rawn ti a, ka peih thuin ka chhang ve leh mai bawk.

Mahse le, naupang lehkha zirtir ka han tum chu tihna mai a ni lo, a zan khatna aṭangin bei a dawng rawih rawih mai a ni. Ti tura ka tih apiang Sangsangi'n a ti duh lo nghal phawt, Naomi lah hauh ve ngam a ni lo, a u in a vin hlek pawhin a ṭap lo chauh zel mai a, a thaw te a hah titih ṭhin, a lung hi a ṭha lo tak tak anih ka ring, a u ka han vin deuh hlek hi chuan a lo phu leh chiam zel a, a bulah hian ṭawngkam vin hman vak a fuh lo a ni ber.

Williama erawh tih a nuam leh ber a, a thiam theih bakah thu a awih a, ani lakah hi chuan harsatna ka nei lo, Sangsangi ber hi a ni buaina chu, min runluih ngat ngat duh mai a, ka hauh pawhin min hlau eih lo, rum theih tawp hian min melh a, Hostel-a dahah ka vau leh ringawt ṭhin, chutianga ka vau chang pawh chuan, "I thu lo," mintih khum ngat zel.

Zankhat phei chu a pa duty zan a ni a, lehkha zir tura a naute an ṭhut ṭhap tawh laiin Sangsangi chuan dawhkan a rawn kil ve duh tlat lo a, ka ko zing viau mai. Khumah chuan muin thlalak a en a, Korean boy band thlalak vel a ni a, school aṭanga a lo hawn anih hmel. Va pawh thawh mai ka tum chu ka malah a lo tlawh a, ka tlu ṭhelh nghe nghe. 

"In exam ṭep tawh, lehkha i zir duh lo anih chuan i thlalak kha ka paihsak vek ang che," tiin ka vau a, "Han paih na teh aw...i thilin a tuar ve nghal a ni mai, " a lo ti let khar khar reuh a, ka thin a rawn thawk deuh thut, thlalak chu ka phihthlaksak hlawk a, chuveleh min lo zuan nge pawh ka hre lo, ka ban te chu a rawn ham bian bian mai a, a inhrosa kuk kuk bawk nen, sual tak tak hian min sualin ka hria, ka tha tawpin khumah  chuan ka keuh ri dawp mai a, chuta a mitmeng chu mak ka ti zawk khawp mai, a rapthlak tih hi ka sawifiah thiam dan ber a ni ang, khatianga pawisak nei lo mitmeng kha ka la hmu ngai lo, hmeichhe naupang mita leh lek phei chuan. 

Chumi zan chuan lehkha kan zir ta lo a, Naomi leh a nau pawh ka mut tir ta ngawt, ka ban a pilh pheng phung bawk nen inchungah ka chhohsan a, Alana call-in ka va hrilh mawlh mawlh a, "Khawi ka lo bia ang," a rawn ti tak nain ka biak tir lo thung. "Doctor hmuh pui rawh, ahma pawn ka sawi tawh kha, a awmdan hi a dik lo," tiin ka hrilh mawlh mawlh a, "Ka lo haw hunah kan sawi ṭha dawn nia," a tih vang chuan lungawi lo deuh chungin phone ka dah a, ka ngaihtuah let leh pawh chuan ka lung a dam lo telh telh mai.

Zingah ka nuin min lo kaitho a, dar 6 a pel zawt chauh a ni, pindan kawngkhar pawn aṭang chuan min lo au leh ṭhin a, a aw pawh a vin viau, a hmanhmawh hmel hle bawkin ka hria. "Engthil nge nizanah in tih ni, lo tho vat teh..." a rawn ti lawng lawng a, hmanhmawh deuha kawngkhar ka va hawng chu ka ban a lo en vut a, "In buaithlak em mai.." a ti leh tlawk tlawk a, ka hrethiam zan lo.

"Ka na vak hleinem, a pem hlek chauh alawm.." ka tih laiin, "Damdawiinah hruai a ngaih khu, a ban ruh pawh a vung ul alawm.." a ti vin chiam a, a khabe te chu a sai dar darin ka hria. A thilsawi chu ka hrethiam lo khawp mai a, "Tu maw?" ka ti hu ringawt.

"In pa pawh ka hrilh tawh, a rawn haw mek...vawiin hian engkim kan sawifel ang.." a kutzungchalin min tin siah a, ka hrethiam lo telh telh. Inhnuai lam a pan chu hmanhmawh deuhin ka zui a, zawhna hlirin ka khat. Mahse, sitting room-a ka thil zuk hmuh chuan min ṭhawng a ni, ka awih lo hial zawk.

Sangsangi chu a lo mu bam a, a mit hnuai vei lam chu a duk chur bawk a, a ban a vung sen ul bawk. A awmzia ka hre lo kher mai, nizan khan ka khawih let ve eih lo a, khuma ka keuh thlak bak kha a chungah engmah tih ka nei lo, a na zawk ka ni kha a nia, engtin nge hetiang hian a awm theih, min ti bangbo takzet a ni.

"Engtizia nge ni?" 

"I hre zawk daih ang chu," ka nu'n a lo ti hluk a.

"Ka va hrethiam lo ve, engtin nge a intihnat a?" ka ti chu min melh tur viau mai.

"Engatinge a Na-i?" tiin ka piaha ding Naomi chu ka zawt a, "Nizanah khan a na a.." a ti ringawt, Sangsangi ka en leh chuan Naomi chu a lo melh ve kur a, Naomi lah chu a ṭi duk bawk si a, thil engemaw chu zep an nei tih ka hrethiam nghal a, a dik dawn lo tawp mai.

"Kut thawh zawnga naupang thunun hi kan ti ve ngai lo ania, an sual changa i zilh chu a pawi ka ti reng reng lo, i tih dan hi chu ka ngaihdan a ni hauh lo ania.." ka nu bawk a ni.

"Ka ti miah hleinem, engtin nge ka tih anih i rin theih a?" ka han ti leh hluai a, chutah Sangsangi chu a lo rum ṭiah ṭiah a, "Api, ka ban hi a na.." a ti ṭuau a, buaipui vak dan pawh ka thiam lo a ni. 

"Nizanah engtin mah ka ti si lo che a, engtia i tih nat maw ni a?" tih paha ka zuk kun hnai chu a lo kimki chawih chawih a, ka nu chuan min lo pawt sawn rang hle bawk.

"Nachawkna lo ei phawt la, i pa'n a ensak dawn che nia, xray te ti ula a ṭha ang.." tiin a pi chuan a va ṭhutchhilh a, a mittui tuai hul sakin a ban te chu a chulsak hauh hauh a, Sangsangi lah chuan na a tih hmel bawk si a, nizan thil te pawh ka ngaihtuah let ve ruai mai.

Mahse, ka han ngaihtuah let ngial pawhin a ban vun chhan chu ngaihdan ka nei thiam lo, a mit hnuai lah chu a duk ruih mai si a, chu phei chu ka hrethiam lo lehzual. Ngaihdan pakhat ka nei a, hei hi chu ka tih a ni lo chiang a, chuti anih chuan ama tih chawp em ni ang tih zawhna ka nei.

Rei vak loah Alana a lo thleng a, a lo lut chuan a fanu chu a rawn pan nghal a, a nuin thil awmzia a hrilh tawh aniang min en dan a dik zan lo, ka ban pilh chu a rawn melh zawk a, a ner deuh sawk a, a fanu chu a buaipui nghal mawlh mawlh thung. 

"Damdawiinah kan hruai dawn em niang?" ka tih pawh chuan min chhang lo. "School i chawl mai dawn nia," tiin ka nu chu Naomi te unau lo han thlah turin a ti a, anni chu chaw ei hma turin a ti zui bawk.

"Tliak leh pelh a awm lo anih dawn hi, a dam leh mai ang, i khua a sik em?" tih angreng a fanu a zawh laichuan an bulah ka lo ding ve reng a, Sangsangi'n damdawi a ei tawh thu hrilhin a pa chu, "Inah awm rawh aw, nang man min awm rawh.." ngenngawl zet hian a lo ti a, a pangchang thiam phian mai. 

Ka nuin Naomi leh Williama ka koh hran hnu lawkah chuan ka pasal chu a lo ding a, "Min lo zui teh," a ti chang bul a, inchung lam a pan chu ngawi rengin ka zui ve bawk. 

Kan pindanah kan inzui lut a, engmah a sawi hma chuan "Ka tih a ni reng reng lo ania," ka ti nghal tawng a, min ring zan lo a ang, min melh dan a la dik hauh lo.

"Engtin nge hetiang ka tih duh i rin theih zawk le?" ka'n ti leh hluai a, ka mizia a hrechiang ve viauin ka hria, hetiang ti duh tura min ngai anih chuan mak ka ti zawk khawp ang.

"Anih chuan i ban kha engtinge?" min dawp awka tak hian a ti a, ka ban chu rawn banin a thlek uluk viau bawk.

"Nizanah thlalak kan inchuh alawm, nangpawh ka rawn hrilh reng che kha," 

"Thlalak vang mai maiin kut in inthlak a maw, kum 15 chauh anih khu...nangpawh hi i dawh thei lo mah mah.." a sawi zawh hma hma chuan ka ban ka la sawn vut a, phawk fein ka melh tawh.

"Nangpawh hian min puh a ni maw, mi in lo va ring chhe hlawm ve.." ka ti chang rawt a, sawifiah tur engmah ka hre lo, ka tih a nih loh thu sawi bak chu.

"Chiang deuhin ka hrilh tawh che kha, Sangsangi awmdan hi a dik lo, rilru lam doctor a mamawh, tunah pawh khuan amah leh amah a intina niin ka hria, min puhchhiat dan a zawng tih a lang reng ania, hetianga ṭan nghal ringawt lo hian a chhan te ngaihtuah ve rawh, pa ber i ni a, hetianga i awm anih chuan kan buai nuai nuai dawn, naupang thlavang hauh chin tawk te pawh i hriat a ngai," insum fein ka ti a, a fanu hi chik sela chuan dik lo a awm tih a hriat ve mai ka ring a ni.

Min chhang mai lo chuan min en vung vung a, chutah..."Nangmah zawk hian doctor i mamawh a ni lo maw?" a rawn ti teh hlauh a, min ti hamhaih hle.

"Eng a?" tiin ka lo zawt nawn leh ngat.

"Tunlai chu i awmdan hi a mak, naupang i hek reng bawk si..." thawk ka lo la hluai a, za lo zetin ka nui bawk. 

"Mi rinna i lo nei tlem hle mai a.." ka ti ta thlawt a, tih ngaihna tak pawh ka hre lo, min rin miau si loh chuan ka tan tih theih a awm lo.

"Engpawh nise, i kutah naupang hi awm tam lo zawk teh se, ka thiam lo vek bik lo che a, anni pawh an tihmawh a, hriatthiamna chen pawh ka nei che, han inngheng tam ula in inngainat mai ka beisei ania, hetiang anih dawn aichuan tutor pawh  ruai mai teh ang.." a tih chuan ka sa deuh pup pup.

"Ka theihtawp chu ka chhuah ve ania aw, inngainattir pawh ka tum,.." ka chu a lawi khawp mai a, ka hnuk a ulh deuh tlat.

"Hahtakin ka duty zo ka rawn haw a, inchhungkhur boruak a lo chhiat hi chuan thaw a pik vek ṭhin, nang lah i lungawi lo reng a, naupang ho thlem an ngai reng bawk, inhnaih lo mai ula ka ṭha tlang zawk dawnin ka hria.." tia min chhana chuan awmze dang a nei tlatin ka hria.

"Chhungkua kan nia, in khatah kan cheng a, engtia inhnaih lo turin nge min beisei..?" a mitah tak en chungin ka ti a, a ṭawngkam chu fuh a ti bik vak lo tih a hmelah a hmuh theih. "A....Ka sawi awmzia chu.." ka kut a rawn man a, "Ka nu kutah dah mai rawh, i tan pawh a hrehawm lutuk alawm.." a tih zawm a, engmah beisei tur awm tawh lo hi kan ang ka ti, ka beidawnthlak ngawih ngawih.

"Anih chuan kutsil turin min duh tak tak a maw...?"

"Hlim tlang ula ka duh ber, kan awmdan hi a hahthlak ka ti em mai,"

"Nia, kan hah tlang a nih hi," ka aw chu zawi tak a ni.

"Sangsangi chu ka zuk ngaihven leh lawk ange, a nu hrilh lo tura khap a ngai.." tia kal mai a tum chu ka pawt ding leh rih a, "I fanu khu kut ka thlak lo ania, khutia a nat chhan chu hriat tum ang che," thupe aw zet hian ka ti a, hei bak hi chu ka sawi tawh lo ang ka ti rilru bawk. 

"Ka lo zawt ange," a tih hnuah a kal chhuak a, kei erawh ka la chhuk mai lo, muangchangin khum ka siam a, ka bing mup reng bawk a, ngaihtuahna lah a chawl lo. Ka pasal chuan a fate lak aṭanga inla hrang mai turin thu min han rawn chu ania,  eng ngaihdan nge mawni ngai le, thil ṭha pawh a ni dawn em mawni, kan hlim phah a beisei chu a ni si a.

Rampuii ka call a, han sawi ka tum ngial a, ka insum leh rih, ka ṭhiannu bulah chuan, "Ka dinhmunah hian ding ta la, i pasal faten ngeih miah lo ta che sela engtin nge i tih ang?" ka va tih chuan, "Tih vak dan a awm lo, min ngeih lo tu chu ka ngaihthah ve mai te pawh a ṭha zawkin ka ring," a lo ti sam et a, chu chu midang pawhin ka laka an beisei ni tain ka hria.

In hnuaia ka zuk chhuk chuan naupang ho pindan lamah an lo awm a, Naomi insiam zo a lo chhuak ve chiah bawk. Ka nu chuan chaw ei a lo peih tawh a, an tiffin tur te chu ka va buaipui ve zung zung a, midang erawh an lo chhuak har khawp mai. Eng nge an tih Naomi ka zawh chuan, "Apa'n au a hau a," ti maiin min chhang a. "A zilh leh nek ang chu, i pasal hi chuan a ṭan khawp che a, naupang ho a hauh zin phah khawp mai, insiamṭhat vek in ngai," ka nuin a lo ti ve bawk.

Ka nu hmuh loh laiin Naomi chu ka ko hrang a, thlanglam bathlarah kan inzui thla a, "Nai, i u kha amah a intina ti raw, dawt sawi miah loin min han chhang teh, tumah ka hrilh lo ang," zawi deuh tak hian ka ti a, Naomi chuan a pi awmna lam a melh zuk zuk a, "Hlauthawng suh, tuman an hre dawn lo," ka ti leh vat a.

"A hmai kha Box thir khan a chhu vak vak a, a ban kha chu ka hmu lo, Estheri ang khan a ti ve aniang.." a ti reuh a, ka hrethiam zan lo khawp mai.

"Tunge Estheri chu?" ka tih chuan, "I hre ve lo ami, a ban a ti tliak alawm," a ti leh a, ka la hre thei chuang lo, an ṭhian tu emaw a nih ka ring.

"Lo kal rawh, box-a a inchhu i hmuh thu chu i pa va hrilh teh ang," ka ti chu a duh lo nasa mai, "Aih ka duh lo, tumah ka hrilh dawn lo tih khaaa..!" a ti chul a, a u a hlau anih hmel e.

"I pa'n ka tih emaw a ti mai dawn asin, thudik hi zep a ṭha lo zawk a, i u pawh hetianga kan en liam mai mai chuan a sual tawlh tawlh dawn ania aw, tun hi a nungchang kan siamṭhat theih hun a nih vangin i pa'n a hriat ve ngei a ngai alawm," ka han ti leh a, a la duh chuang lo.

"Ka sawi anih chuan auin compass-in ka mitah vih a tum alawm, ka sawi duh lo.." a ti mauh mai a, rapthlak hian, a nau pawh a lo vau nasa hle ṭhin anih dawn hi.

"Ahmain kut a thlak tawh che em?" ka tih chuan lu a thing vat a, "An class ami Nungnungi chu step-ah a nam thla tawh, zirtirtuten anu an ko a, anuin pawisa a chawi ṭeuh mai.." a ti a, chung thu chu Alana'n a hriatpui lo em mawni dawn le.

"I pa'n a hre ve lo em ni?" 

"Apa chuan engmah a hre ve lo, anuin sawi a phal lo, Au Sangsangi bialpa neih pawh apa chuan a hre ve lo.." a ti leh ta zel a, Naomi hian engkim a hriatpui chu a nih hmel, a u hi a thlawp vak lo niin a lang bawk.

"Ka rilru in va han ti hah tak e aw.." ka ti deuh vang vang a, "Tumah hrilh suh aw.." a lo ti leh chu pawm harsa ka ti ngang mai. "I u chu i hlau hle mai a, nangmah te hi i khawngaihthlak reuh anih hi," tiin ka en deuh tlawk tlawk.

A piin a lo koh vangin min kalsana, keipawn ka zui ve thuai a, ka nu chuan chaw ei a lo siam mek tawh. Sangsangi tih loh zawngin tukṭhuan kan kil ho a, Alana bak chu ṭawng kan awm lo, ka pasal chuan min han hnem ve leh rih a, "Sangsangi pawh ka zilh kha, buaina a awm tawh lo turah ka ngai, a sual let ringawt che pawh a thiam loh a ni tawh, ka vau deuh a, a ti let ngam tawh lo ang che," ka ti charh charh a, kan thubuai chu khap daih a ni mai chauh a, chinfel erawh a ni ta lo thung. 

Thleng ka sil laichuan ka ngaihtuah neuh neuh a, a dik theiin ka hre lo, Naomi lah a vau bet hmiah mai a, a nau te laka a awmdan te hi a hlauhawm thei dawnin ka hria. Naomi khan hlau viau mahsela hetiang thil hi chu zep chi ah ka ngai lo, hei chauh hi chu ka sawi leh ang tiin rilru ka siam a, thleng chu tleuh sawk sawkin in chung lam ka pan nghal bawk.

Alana lo mu tur chiah chu, "La mu lo lawk teh, Naomi ka zawt a, 'Au chuan box-in a hmai a chhu vak vak' a ti ania aw, Naomi'n a sawi chhuah chuan compass-a a mit vih sakah a lo vau bawk a," ka ti zung zung a, khuma ṭhu chungin rilru buai hmel deuhin min lo melh.

"Engtikah nge a sawi?" a tih chuan, "Nichin lawk, chaw eihma mai khan," ka ti vat a, engmah sawi loin a tho nghal vut mai, hmanhmawh deuhin inhnuaiah ka zui thla a, Naomi chu a ko lauh lauh a, pawn lam aṭangin Naomi a lo lut rang hle bawk.

"I u chu i hmu em ni?" a pa'n a han ti chiah chu a tang nghal hru mai a, ka lam lo hawiin a pa lam a melh leh.

"Box-in a inchhu i ti em ni?" ti a a pan a zawh leh laichuan a pi a lo lut ve a, "Taxi a lo thleng ṭep ania," a lo ti chu Alana'n a lo khap rang viau.

"I hmu em Naom..?" kan vai chuan Naomi lam kan hawi a, hmeichhe naupang chu a mitmeng a tlan chhe ruak, "Hlau suh Nai, sawi vek rawh.." ka lo ti ve bawk a, ama tan pawh sawi mai hi a him tih hrethiam se ka ti.

Chutah, a bag pawm ṭha sauh sauh chungin a pa lam a hawi a, "Engmah ka sawi lo, " a ti mauh mai. "Naom..i sawi kha.." ka lo ti chu Alana'n min lo melh zawk a, "Dawt i sawi nge sawi lo?" tiin a fanu chu a vin nghal chiam bawk. 

"Engmah ka hre ve lo, min hau zel suh u.." pakhat lah chuan a lo ti ṭuau a, a hlauthawng nge a lungchhe zawk ni a ṭap aw lek lek, "In mak nupa mange, naupang inti thlabar reng mai.." tiin a pi a lo inrawlh a, Williama a lo lut ve leh ta bawk nen ka nu chuan an pahnihin a chhuahpui nghal a. Ka thilsawi pawh awmze nei lo a ni leh ta phawt mai, ka pasal lah chu ka lakah a lawm lo khawp a, "Ka mu dawn a, min rawn tibuai tawh suh ang che, zan duty ka nei leh dawn ania," tiin min chhohsan nal nal.

Eng eng emaw ngaihtuah buai pahin inchhung sekrek ka khawih a, rilru la pengah tiin zai ka play bawk, rilru erawh a peng mawh khawp mai, rilru a buai nuai a, min ti chau zo a ni ber. Chimney ka lo tihfai laimek chuan Sangsangi mutna pindan inhawng thawm ka hria a, phone-in tu emaw a be pah bawk a, a pi phone a kawlsak anih hmel, ka nu lah chu a lo let har zek a, darkar 2 dawn a thang tawh.

Rei vak loah Sangsangi chu a lo lang a, a sam a delh buk mai bakah a mit hnuai duk deuh ruih nen hmuh a nuam lo reuh khawp mai. Phone-a ami biak chu a han vin deuh hlak hlak a, a thil sawi vang chuan ka lo melh leh rang hle bawk. "Leakout thar chu min lo thawn rawh, ka en ve duh alawm," tiin a nui awr awr a, min rawn melh zawk pahin min kalpel zui a, chemte a ban lai chu ka lo en reng.

Tui dehna ngheng chungin chemte chu a han vai kual pap pap a, a chemte hum dan mawlh chuan mit a la a ni, pawisak a nei lo tih a hriat hlein ka hre mai. Chutah, ka lam a rawn pan thut a, rang lutukin kei ka lo ding sawn a, a han chimawm zia chu aw...dawhkana Apple chu a va chhun sawk a, min rawn nuih deuh kher anih chu.

"I va mi ang lo reuh e aw.." ka ti nuah nuah a, ka thinphu te chu a lo rang hman deuh alawm maw le. 

Rei deuh thleng chu sitting room-ah phone a hmang a, "In college-ah ka la rawn kal ve ang, kal dun i chak chuan lo fail char char mai la.." tih angreng a sawi vang chuan a bialpa chu college kal lai anih ka ring, Alana hian a hriatpui leh der si lo a, a fanuin amah aia kum upa lutuk a ngaizawng te hi a ṭha lo maw le, kum 18 em pawh a la tling si lo.

Ka nu a lo haw chuan dar 1 a ri dawn thuak tawh, lei ṭha a lo hawn avangin inchungah pangpar kan han singsa a, tlai thlengin kan buai dun a, zing lam thil erawh kan sawi dun leh ta lo. 

Tichuan, ngawiha en liam mai chu ka tum dan a ni ta chu a nia, ka insum a, ka kain sawi a nei lo chungin ka rilru erawh a buai map map reng. Ka han ngaihthah deuh takah chuan buaina em em a awm ta lo a, min la ngaina lo chhunzawm zel ti ila a dik ang chu, Naomi takngial pawhin min be ṭha duh ta lo. 

Alana chuan tutor a ruai a, a ṭhianpa farnu a ni nghe nghe a, naupangte hian an school banah an pan tlang mai ṭhin a, an lo haw tlai phah viau zel bawk. Tih tur em em ka neih loh vangin ka nu nen vawk kan lak belh a, panga lai kan vulh tawh a, huan lamah thlai te a tuh a, ka pui ve ṭhin bawk a, kan ṭul ve ṭhin khawp mai.

Inrinni tlai khat ka bazar chu Damiena nen kan inhmu hlawl a, thingpui inpuiah min sawm a, ka inhmu khat bawk nen ka hnial bik lo. A pa a damloh vangin a lo haw hi a lo ni a, Aizawlah kar thum dawn a lo awm leh tawh. Chutia thingpui in paha kan han titi laichuan hmeichhe chungchang a rawn sawi a, "I u hian mi a tihpui lui tlat a, amah pawh i hre ve maithei a ni," tiin a nui ruh ruh a, tunge ka lo zawh chuan a mi sawi chu ka nute in piah lawk ami a lo ni a, nula la naupang te a ni, kum 25 vel anih ka ring.

"A hmelṭha reuh asin.." ka tihsak a, a nui mai, "I duh chiah lo em ni a?" ka tih leh chuan, "Ka hre lo, ka upat hmaa nupui neih chu ka duh a, ka mamawh tih pawh ka hre reng. Mahse, rilrua cham veng veng ang kha ka nei tawh lo," tiin min chhang a, duhtu a ngah awm nen hian tlangval lerh lo ve tak chu a ni, nula bem kawngah hian a zei vak lo bawkin ka hria.

"Nula hnahkhat ngei i nei dawn nia.." tiin thu ka rawn ve ngei. A nui deuh suk suk a, "Pasal neih chu eng nge a an?" tiin min zawt zui a.

"Dam ṭhat hi chuan a zia mai zel," tih zawngin ka chhang.

"I u nen kan la rawn tlawh dawn che u nia," tiin ka kal dawnah min thlah a, ka nu te pawh tlawh tawh lem loin ka haw tlang a, in la thlen chuan naupang tuition kal pawh an lo thleng reng tawh. Ka nu a lo awm lo a, Williama'n huana a awm thu min lo hrilh vat a, eirel a lo peih tawh vangin ka inbual zui bawk.

Ka inbual zo pindan aṭanga ka chhuak chu inhnial bap bap thawm ka hria a, "A uire bawk lo, dawt an hrilh che anih chu," ti tu chu Sangsangi niin ka hria. Thawm chu inchung lam anih vangin step lam ka pan nghal a, an la inhnial bap bap mai.

"Apa leh apiin an sawi ri ka hre tawh hmanah," Naomi'n a tih laiin, "Uire pawh nise i nu a ni tho a, i ṭan zawk tur alawm, eng nge khatia i va zawh ringawt a, nu te zah tur," Sangsangi'n a ti ve thung a. "A sual em mai a, apa ka khawngaih fe.." Naomi'n a lo ti ve leh zat.

"Apa pawn nupui dang a nei daih tho alawm, anu te chuan tumah a la nei ve hleinem.." Sangsangi bawk a ni.

Chhuk leh mai ka tum laichuan, "Anu chu ka be tawh dawn lo reng reng.." Naomi'n a ti zauh ri ka hria a, Sangsangi chuan a haw khawp aniang, "Engatinge min ben ngawt a?" tih riin a zui a, ka ding leh rih.

"Nu ITF-i hi apa nen an inngaihzawnna a rei tawh, apiin an tleirawl lai aṭangin an inngaizawng tawh a ti, apa pawh a uire ve tho.." Sangsangi'n a ti hlak hlak a, an hre ṭhelh angreng bawk si, hrilhfiah chiam chi lah an ni si lo.

Inhnuaiah ka chhuak san a, Williama tlai muhil pawh a lo tho ve chiah a, chhangthawpah butter ka lo tahsak a, ei mawlh mawlh chungin a u te awmna lamah a chho ve nghal a, sana ka en chuan dar 5 a ri dawn thuak tawh a, ka nu chuan vawk chaw a pe nghal a ni maithei. 

Hmarcha rawt tuma ka mal laimek chuan step-a lo tlan thla hlawk hlawk thawm ka hria a, Naomi lo tlan thla chu a u Sangsangi'n a rawn um thla a, an pindanah an in um lut bawk nen hmanhmawh deuhin ka va ngaihven a, an la inhnial bap bap, pakhatin a nu call a tum a, phone an inchuh niin ka hria.

Nu leh pa te nena sawi fel chi anih vangin ka inrawlh duh lem lo a, Alana chu message thawnin lo haw hma deuh turin ka va chah ringawt a, thil hrethiam rual an ni tawh bawk nen hrilh ve tawh mai sela a pawi loin ka hria.

Hmarcha ka va rawt san leh hnu chuan an thawm pawh a reh ta deuh a, rilru pawh a nuam deuh huai tawh. Mahse, Williama chho kha a la rawn chhuk miah lo tih ka hrechhuak a, ani hi an lo hrilh ve em mawni dawn le.

Ka thil rawt lai ka zawh hnu chuan ngaihven turin ka han chho a, in chung zawl pawh ka chhuak chho hman lo tihah step-a williama lo tlusawp reng chu ka han hmu a, ka tlan chho rang khawp mai. Ka han pawm tho a, a tukkhum ka han dawm chiah chu a lo huh dup mai a, thisen hlir a ni, step-ah pawh chuan a thisen chu tling hman nual tawh. Ka sawi nawk nawk a, ka ko mawlh mawlh bawk. 

A rawn meng deuh diar diar a, vawikhat chu a rawn ṭap chhuak feih a, a bak chu thawm a rawn chhuah leh lo reng reng. Min melh reng a, engmah a sawi lo. Pawm chunga thawhpui ka han tum lah chuan a rit khawp mai a, step anih vangin ka tluk pui ka hlau bawk si, "Hetah hian lo awm lawk la, i pi ka zuk ko ange.." ka ti ta ngawt a. 

Mahse, step-a ka mut ṭhat leh laitak chuan Sangsangi a lo lang a, "Sangsang..." ka lo ti chiah chu a rak nghal chul a, "I pi ko vat rawh..." ka ti leh pawh chu a ngaithla tawh lo, tlan thlak pahin a pi a au a, "Williama thah a tum a nia, thisen a tam lutuk..." tiin a rak thla chiam a, minti hrilhhai zawk khawp mai.

End of chapter - 5