BLUE BAYOU
by Ahmangaihi violette khiangte
Chapter - 12
Zirtawpni zing lamah damdawiin aṭangin kan chhuak a, class kal tura min tih vangin ka kal a, unaunu erawh a putea te chhung an lo len avangin inlamah a awm ve thung a, a lo buai viauin ka ring. Lehkha min lo zir san nual avangin class awlah pawh note copy in a buai a, Awmpuian a thiam ang angin min lo hrilhfiah ve bawk.
Noeli lah chuan min lo be ṭha khawp mai a, "Kan lo ngai hman lutuk che a lawm" a ti ve ngei a, awih lem lo mahila a lawm awm viau tho. Mahse, thil eitura canteen kan va luh chuan dawhkan hmasa berah Noeli te ṭhian ho chu an lo ṭhu a, "Tualvungi a lo kal ta bawk a, Zawlpala chu an rawn chhai ngam tawh lo ang" Rebekin a lo ti zauh a, an ṭhian ho chuan an nui pat pat a, a thil sawi chu ngaihdan ka nei thiam a, ka chhang let duh lo thung.
Awmpuian eitur a va lak laichuan tukverh bulah ka lo va ṭhu a, kan zinkawng vang kha nge damdawiina ka mut ṭhat loh vang zawk ni ka chauh a reh thei lo a, tha a za loin phurna engmah ka nei lo a, thaw a ipik riau mai bawk. Mawitei leh kimkimi lo lut pawh chu ka bula ṭhu turin ka sawm peih lo a, mizinga awm chu nuam tihna ka nei lo a, han titi vel pawh ka chak lo. Kan hma chiah ah an rawn ṭhu a, "I dam deuh tawh em?" Kimkimin a rawn tih chuan ka bu ve mai a, Awmpuian ka damloh thu a hrilh anih ka ring, ka chanchin an hriat ve ka duh lo bawk a, ka damlo anga an hria chu a ṭha zawk bawk ang.
Rei lo teah Awmpuia chu a lo let a, ka sirah lo ṭhuin a eitura sa awm ho chu ka plate ah a rawn dah nghauh nghauh a, "Nangman ei rawh" ka tih laichuan ka ṭhiante pahnih chu an rawn hawi leh ṭhin a, an nui deuhin ka hria.
"Awmpui engin nge i haw dawn?" Mawitein a rawn tih chuan ka melh ve zawk a, "Kan haw rual dawn nia" Awmpuian a tih vang chuan ka inrawlh ve lem lo, Mawitein a zawh chhan erawh ka hria a, min lo thik pui ve hle aniang.
"I note kha ka hawn rih ang aw, zaninah ka copy zo hman ang" Awmpuia bula ka tih chuan "I kawl dawn nia" a ti ve mai a, note copy hi chu ka peih khawp a, a chhiar lam hi ka that chhe ṭhin a; mahse, external exam a hla tawh lo a, ka zir ṭhat ve hle chu a ngai tawh.
"Bazar kal pahin ka thlah ang che, pipe lei lawk ka ngai a" a tih chuan ka phur hman viau a, "Eng pipe nge?" ka tih a min chhanna erawh chuan min ti hnual leh rawih a, an inchungte tan hian a inpe zo mah mahin ka hria.
"Zanah i lo leng ang em?" ka tih chuan "Hnathawh lai ka nei a, bungrua kan unload ang" a lo ti vat a, Mawitei lah chuan "Tuition pek tur te pawh a nei a lawm, a leng mai mai hman lo ang" a rawn ti pek a, Awmpuia chuan a chhang lem lo, min ṭan vang zawk a nih chu hre tho mahila a awm nuam lo zawkah ka ṭang ṭhin a, hetianga meinei deuha Awmpuia an biak hian nuam ka ti ngai lo.
Thil kan eizawh hnu chuan classroom lam kan pan a, kan building kan thleng phei ṭep tih ah Prof Mazari kan tawk a, Awmpuia chu "Tlai banah min va thlah lawk rawh aw, ka rawn kal lamin ka tlu a, hei ka ban ka ti dik lo tlat mai" a lo ti a, a ban chu a lo tuam tak tak a, Awmpuian a theih tur leh a ban hun tur a lo hrilh ve mai bawk a, kan haw rual loh hmel khawp mai.
"Tinge nangmah kher a sawm che le" Miss Mazari kal hnua ka tih chuan, "Ka hre bik miah lo, week laikhan a scooty kan hman sak ṭhin a, Mawitei te rual khan haw mai rawh aw " a ti zui a, ka phur vak lo hmel a hmuh chuan ka darah min rawn kuah a, min nuih leh ringawt a.
"I lawm loh hmel e...." a tih chuan ka insiamṭha rang khawp mai.
"Lawm loh chhan tur a awm hleinem, hnial chi pawh a nih loh kha" ka ti ve leh vat a, Prof te ho hian an ngainain eng emaw tih dawnah pawh an ko phar reng a, ka tan lo lawm loh theih a ni bik lo, mi zawng zawng te bialpa kan tih ṭhin chhan pawh neltu a a ngah em vang hi ania, keipawn rilru zau tak ka put ve a ngai, anih loh chuan inngaihzawnna boruak nuam lo tak kan neih phah dawn a, keimah ber hi ka insiamrem thiam a ngai a ni.
Dar thum rik hma deuhin kan bang a, Miss Mazari pawh a rawn chhuak rang khawp mai, a helmet khai chungin a rawn phei hlawk hlawk a, "Kal kawina tur ka nei dawn, rei lo te aniang, i hmanhmawn em?" a rawn ti sawk sawk a, Mawitei ten min nghah vangin Awmpuia chu ka mitmei a, "Ka lo bia ang che" a tih hnuah muangchangin kan kal san a, gate kan pelh hnu lawkah an rawn inphur chhuak a, Miss Mazari chuan sunglass vuahin a rawn hawi sang vah a, ding meuha kan lo thlir chu Awmpuian ban min rawn vai a, Miss erawh chuan min melh eih lo.
"Ngaihṭhat thlak loh ve...." Mawitein a tih chuan ka nui mai a, "A thik awm loh em mai" ka lo tih san a, an nuih a za khawp mai.
Kawngpui kan chhuah dawn ṭep ah Political science a kan classmate Jerrya a rawn tlan chho a, "Nu-i thlah i ngai em?" a rawn ti zurh zurh a, chhan pawh ka chhang let lo.
"Khapa khan a star che ania aw, class ah pawh a melh lai che ka hmu fuh thei lutuk, in ṭhutna lam hi a rawn hawi deuh reng a, a mit zawn ka lo chhui hian nangmah zel a en che" Kimkimin a tih chuan ka han awih lo khawp a, "A en che tih ka chiang, Awmpuia nen in ngheh em avang hian a bem lo mai mai che aniang" a ti leh zel a, Jerry hi chuan min chhaih peih viau a, min nel ve thawkhat chuan ka hria a; mahse, min chhaih dan pawh nichina a rawn tih dan ang hlir kha a ni ṭhin a, min ngaizawng anga a awm pawh ka hre lo.
"I lo kal veleh an han inphur lo ngei a, nimin te kha chuan 1st sem ami khan gate bulah a lo nghak a, no tawk tawk khan a rawn au a, an inphur lai kha thla ka lo la lo a ni" Mawitein a ti chho hlak hlak a, ka ngaihtuah thui duh lo, a nih loh chuan thikna ringawtin ka rilru a luah leh anga, tih loh loh ka ti leh duh mai ang.
"Awmpuia te chuan naupang ang lekin a lawm a ngaih, a duh zawng a ni lo lutuk" zangkhai deuha ka tih laiin "Naupang angin ka ngai i bulah a tia mi, awih reng reng suh, mipa te chuan 'Ka cousin' ti in hmeichhia an kawp ṭeuh thei a lawm, i bialpa lah hi a inveng thiam hlawl si lo, i hauh na viau anih loh chuan khanu kha a huangtau khawp ang" a ti bawrh bawrh a, awm nawm loh sa nak a laichuan min la hrilh belh zel a, Valerie hmelṭhat thu leh a pangchan thiam zia te a sawi a, mipa tan hnar reng a har khawp ang tiin min hrilh bawk.
Taxi a kan chuan hnu te chuan ka ngawi reng a, tukverhah dakin thli thaw chu ka inchhem tir a, ka ngaihtuahna lah chu a tawi turh a, chutih rualin na sawi tur engmah ka nei lo. Ka ṭhiante ti ti pawh zawm peih loin ka hnungchhawn reng a, min lo biak chang pawh chuan a rul tawk tein ka chhang a, an bula awm chu nuam ka ti lo chungin ka khua a har ngawih ngawih thung.
Kan veng kan thlen a ka chhuk hnu chuan ban an rawn vai dun a, tawi te chuan ka han nuih lui ve a, an tlan liam hnu ah pawh ka la ding reng. Ina haw lah chu ka chak lo khawp mai a, engkim chu ka ning zo a ni ber mai. Khawi lai hmun fianrial ah emaw kal a, mahni te chauha awm ka chak a ni.
Muanchangin in lam ka pan a, ka zawi lutuk vang chu nge ni ka mi tawh te lah chuan min en hrek hrek a, mak min ti a niang. Kan gate bul ka thlen chuan ka din ren rawn a, thawk ka la vang vang bawk. Chutih laichuan unaunu a lo chhuak a, "Eirawng ka bawl zo vek tawh" nui heu chungin a rawn ti a, a nui hmel chu hmuh a nuam tak zet a, a awhawm hliah hliah bawk.
"I va broke hmel ve" a bul ka thlen ruala a tih chuan, "Ka chau" tih leh kalpelh ka rual a, "Cake zai sa a awm" a rawn tih leh chuan pindan lam ka pan tawh a, engmah pawh ka ei chak lo.
Ka inthlak zawh hnuah Nu Hlimi pindan lam ka pan a, a lo mu tui khawp mai, U Lizzyn eirawng a bawl tawh bawka tiin inbual ka rilruk a, choka a ka va lut erawh ka inchhir rum rum, hmun chu namen lo hian a hnawk a, tuidehna ah thleng sil loh a khat hnur bawk a, a chet fel loh zia chu aw.
Thildang pawh ti hmasa lo chuan ka tifai sawk sawk a, ka inbualna tur tui ka lum pah bawk a, pindan lama ka phone dah chu a lo ri ve reng bawk. Ka va en chuan Awmpuia a lo ni a, a haw leh tawh anih ringin ka call let thuai a, mahse ka beisei loh deuh thil a rawn sawi a.
"Kan miss hi a ṭhiannu te inah ka va dah a, bachelor party an lo nei a lawm, chaw ei ve turin min ti tlat a, ka hnial pawhin haw a phal lo, ka ei nghal anih chuan ka rawn tlawh kawi ang che, ka bag pawh kawl rih mai la, haw loin ka hnathawhna turah ka tlang nghal mai ang" a rawn ti a, lawm tur nge lawm loh tur pawh ka hrethiam lo.
"A tilui tlat em ni, a nuam duh awm lo e" ka tih chuan, "Nuam lo, upa deuh deuh hlir an nia" a rawn ti leh a, mipa an awm ve em ka zawh chuan an awm nual thu a sawi a, huat chi niin ka hre lo.
"Muangchang vak suh aw, i hna ah i tlai phah ang" ka tih chuan "I thinrim lo ti raw?" a lo ti vat a, a inthlahrun hmel khawp mai. Ka thinrim loh thu ka sawi chuan "Ka thlah hman bawk si lo che a, ka inthlahrung lutuk ania, tihpalh aw, ka lo kal pahin thil tui deuh ka lo lei ang che" a ti a, lungawi tak chungin phone chu ka dah a, hetianga lawm loh chhan tur zawng nghal lo a ngaihtuahna ka hman hian kan inkar a ṭha zawk tih hi ka chiang tawh, a hahdamthlak hle bawkin ka hria.
Zanriah kan eihma deuhin a lo thleng a, Jelebi leh laddu min lo ken sak a, Coconut hring lian ṭha deuh hi nu Hlimi tan a lo keng bawk. A hmanhmawh bawk si a, rei pawh a ṭhu hman lo, Nu Hlimi a va hmu zuai a, ka nu Hlimi pawn a lo lawm thiam leh khawp mai. "I Bag chu dah rawh, naktukah ka lo ken sak ang che" ka tih chuan a dah ve sawk sawk a, tui a in leh hnuah kan inzui chhuak a, "I eipuar em?" ti a kal paha ka zawh chuan a ner nang a, makti deuhin ka lo en bawk.
"Ka inchhir" a ti teh thlawt a, a chhan ka zawh lah chuan "A zahthlak em a" a ti mai a, anih ka ring, chawei a sawm hi a har thei lutuka, a ṭhian dang te phei chuan an sawm chhuak zo ngai lo, mi ngainat a hlawh viau chung hian puipun leh huau huau vel hi nuam a ti lo a, mawhphurhna a nei anih loh phei chuan a tel ngai mang lo.
"Hah deuhin va thawk rawh aw" ka ti chu min han melh rum ve ngei a, "Inbualna tur tui lo lum ang che" a han ti zui a, kan innuih leh rih.
"I buai lutuka, mi pawh i ngai hman lo anih hi" thutak deuh zawka ka tih chuan "Ka ngai lutuk che a lawm, ka buai lai pawh hian ka ngai reng che" zawi deuh sup hian a ti a, gate bul kan thlen tawh avangin inkuah leh na hman a awm tawh lo, ka kut a hmer vang vang hnuah min kalsan zui a, a bula ka awm hi chuan ka danglam ṭhin, a kiangah ka nui a, fiamthu te ka sawi a, chu chuan midang aia a danglam bik zia min hriatchian tir a ni.
Inchhunga ka va lut leh chu nu Hlimin min lo ko a, "I pa khan pawisa lo thawn a tum a, tun bak hi chu ti duh suh se, i pocket money tur te anih loh chuan i zirna sen so chu ka tum vek dawn ka tih kha, nangpawn chah lo la, a rilru te a lo hah palh ang" a lo ti charh charh a, hnial duh mahila ka thei lo ang, ka nu pawisa dawn aichuan pawm awl tak a ni a, ka pa ngaihtuahna nen lawm taka lo pawm chu ka tih theih chhun a ni.
Zanriah kan eilai chuan U Lizzy bulah "Thil zawrh tur ṭha deuh i hre lo maw?" ka ti phawng a, a lo hre nasa mai. "Ka thawmhnaw hlui zuar rawh, pakhatah 200 zel ka hauh anga, a bak chu i nei vek dawn nia" a lo ti then a, ani thawmhnaw te chu branded ṭha tak tak hlir a ni a, hralh a nuam dawn tih a chiang. Kan chaweina ka seng fel hnuah a thawmhnaw chu kan va hai a, a pheikhawk leh bag te pawh a rawn dahchhuak nual a, pheikhawk ah erawh 400 a hauh thung a, a la thar ṭha a, sang chuanga ka hralh theih ka ring.
Awmpuia haw hun nghah pahin note ka copy a, min lo biak chuan dar 10 a pel tawh, "I chau em?" ka va tih chuan "Chau lutuk, ka thawhpui te an rui lutuk a" a rawn ti a, ka khawngaih angreng.
"Inbual rawh, ka lo la nghak ang che" ka tih vangin a inbual zui a, rei loteah a online ka hmu leh si a, "I la inbual nange?" ka va tih chuan a en a, a rawn chhang lo lehpek a, hetiang hi Awmpuia tih dan anih loh vangin a phone khawih sak tu an awm tih ka hre nghal a, message dang thawn lehin "Naktukah ka hmu duh che ania, canteen ah lo kal ang che" ka va ti bawl a, hauh phei chu ka tum lem lo, ka va sawiṭhaih ve a ni ber.
Min rawn chhan pawh ka rin loh laiin message a rawn thleng a, "Naktuk chu inrinni a lawm" a rawn ti reuh a, min ti sa zak mai.
"Ka rawn kal ang" ka ti leh hram a, emoji nui keh tuarh lem hi a rawn thawn leh a, ka thin a rim hluah hluah tawh.
"I phone a nih loh kha, lo khawihsak tawh suh" ka va ti leh erawh a rawn chhang ta lo a, rei dawn hnuah Awmpuian a rawn chhang a, "I lo kal dawn a maw, hna ka thawk dawn asin, sunday ah ka lo leng zawk ang" tih hi a rawn thawn a, Velerie te reuh chuan ka message dang kha a delete anih hmel.
"I phone kha midang khawih theihin dah tawh suh, valerie khan ka message a lo en ziah a nia" lawm lo fein ka va ti a, "Nia, a lo inhawng sa a, password ka'n dah ange" a rawn ti leh mai a, lungawi lohna pawh a nei ve lo aniang.
Inrinni chu inchhung sekrek khawihin ka buai a, chawhmeh lei turin unaunu a chhuak ve thung, Nu Hlimi pawh a rawn ṭhu chhuak peih a, tukverh bula ni lum aipahin zai a ngaithla a, a khat tawkin min rawn au leh ṭhin. Thingpui te ka va lum sak a, unau lah chu a rei hrep a, a leng kawi anih ka ring, a lo haw chuan dar 2 a ri tawh.
Ani bazar hi chu pawisa a ren lo bawk a, tlawm dilna chang a hre lo aniang a rawn inhmang zo vek a, thil eina a ken daih loh avangin a lawm lo hle bawk. Thingpui ina dawhkan kan kil laichuan "Benjaminan a lo bia che em?" a rawn ti teh hlawl a, kan inbiak ngai loh thu ka sawi laichuan "Phone an ken tir lo a ni maw" a ti leh a, ka hrethiam pha chiah lo.
"Khawiah nge a kal?" ka tih chuan, "Ṭhalai awmṭha duh lo dahna hmunah a awm an tia, a ṭhianpa Jeromean min hrilh a lawm" a ti leh a, a reh ka ti reng a, a zin anih te ka lo ring hman zawk a, a awmna lah chu aw...ruihhlo a khawih nasa viau em mawni dawn le!?
Zana Awmpuian min lo biak chuan Peksanga te unau an lo haw tawh thu a rawn sawi a, ka lo lawm hman viau laiin "Pa Zuala te haw hma chu ka la riah pui a ngaih hmel" a tih zawm leh a, sawi zui vak tur pawh ka hre lo. "Lehkha i zir ṭha thei lo ange" ka ti ringawt a, "Buai chu ka buai lo zawk, hetah chuan eirawng ka bawl vek a ngai a, hnathawh dawn hian a buaithlak deuh ṭhin a" a rawn ti leh a, chu chu anih ngei ka ring, eirawngbawl mai bakah inchhung sekrek khawih pawh a kut vek a ni leh ang, keilah chuan haw tawh se ka lo ti ve ngawih ngawih a, ani lah ka lakah a inthlahrung ve bawk a, a laka rilru chhia put hi a har ṭhin a ni.
Pathianni inkhawm banah nu Hlimi unaute an lo leng leh a, tlai eirawngbawl dawn thlengin an awm a, Awmpuia pawh lo kal lo mai turin ka va hrilh a, a hnathawk a chauh ka rin vang a ni. Zana ka mu tur chu Kimimin min lo text ve leh hlawl a, "Awmpuia kha Miss Mazari ṭhiante nen chaw an eikhawm ania" a rawn ti ve leh hlawl a, zirtawp laia thil thleng kha a rawn sawi tih ka hria a, khawi aṭangin nge maw a lo hriat ni.
"Aw, Friday tlai khan Miss te chawei khawmna ah a va dah a, chaw eive nghal turin an lo sawm a lawm" ka ti ṭha ve mai a, ka huat viau a ring aniang, keilah chuan ka lo la dam phian a, mak a ti deuh mai thei a ni.
Rei vak loah Message chu a rawn chhang a, "Ka u pawh a tel ve a lawm, an thlalak ka lo hmu a, Awmpuia kha Miss Mazarin a bialpa angin a sawi ania aw, a ṭhiante bula a sawi dan anih chu" a rawn ti ta mai a, chu zet zawng ka beisei loh lutuk thil a ni, a awihawm loh rum rum zawk a lawm.
"I u chuan a hriat sual a ni lo maw" ka ti ṭha leh ngat a, "Hre sual lo, an chawei laiin Miss Mazarin a sawi a ti, 'Mipa kha chu a ngawi reng a, a zak deuh aniang' a tia, an ṭhian ho chuan a mipa zawk khan a sum a duh vanga ngaizawng mai mai anih te an lo ring a, Awmpuia te chu a hmelṭha bawk sia, Miss Mazari a chhe bawk si, ka u pawh ka lo hrilhfiah hrep a lawm" a rawn ti leh duah a, ka nuih te pawh a za deuh. Awmpuian lo kal lah khan a inchhir thu leh a zah thu te kha a sawi a, hetiang lam hi a nih ka ring pha lo reng reng.
"Miss chu a van ti awm ang lo ve, Awmpuian hnial ngam loin a thlah ve hram hram zawk ania, i u chuan a ṭhiante chu lo hrilh leh ngei ngei rawh se" ka va ti a, Awmpuia an ngai dik lo lutuk te chu ka lo tha nat pui.
Awmpuia chu ka call zui a, engmah pawh ka zawh hmain Valerie'n a lo chhang a, "U Opa chu U Peka nen an chhuak lawk, an electric a chhia a" a ti chu ka awih zan lo.
"A phone khawih sak tawh lo turin ka tih che kha" ka ti chang bawl a.
"Engtikah maw?" tiin a rawn nui kar kar a.
"Min zuam sual a nge" ka ti leh chu "I inti thu em mai, ka ngam teuh lo, U Opa pawn a chang chuan ka ning ṭhin a ti che" a rawn ti let sak a, a thil sawiin min ti nat zia chu aw, thudik nge dawt tih lam a lang lo, ka te chem chem maiin ka hria.
Ka intipaukhauh lui a, "I u Opa kha ka bialpa a nih kha, nang aiin ka hrechiang ang tih ring tawp rawh, hetianga awm i ching dawn anih chuan amah ka hauh tir ang che, i nu bulah ka sawitir bawk ang" tiin ka vau zui a, phone chu a dah rang khawp mai. Khuma ṭhu chungin ka inngaihtuah lungpuam zui a, Valerie thil sawi kha ka ring tak tak lo chungin 'A sawi ang em?' tiin ka inzawt lawi a, a tak tak ni se tiin ngaihtuahna ka nei bawk.
Awmpuia chuan min ning ang em? Ninawm takin ka khawsa ṭhin tih ka hria, tun hma a ka awm dan te, keimah vanga Noeli ngei pawh a kawm ngam loh lai te, a care ngai rengin ka awm ṭhin a, ka lo ninawm ṭhin ngawtin ka ring. Mahse, ka duh em vang a ni tih a hria angem, a hre lo ang tih ka hlau ngawih ngawih, ka duhna tih lan ka thiam lo ṭhin a, ka hauh bur ringawt a, khang te kha a tan ninawm a chang ang tih ngaihna ka hre ngai lo, chan phah ta ila engtin nge ka awm ang le, ka â thei hialin ka ring.
Thawk leh khatah ka thaw a sa huam a, ka kawchhung aṭanga rawn inṭham ang maiin ka hria, khumah chuan ka bawk thlawp a, ṭah chiam mai ka chak a; mahse, min hnawhtu a awm tlat thung. Ka thawk a rawn sak zui mai bawk nen hmanhmawh deuhin tukverh ka va hawng a, pawn boruak dawngin thawk ka han la vang vang a, awmzia chu a nei ve a, chhete chauhin a ni.
Ka pa ka ngai takzet, tunah hian ka kiangah awm sela, min hnem se ka ti.
Ka lungngaihna min hriat pui ve niawm hrim hian van lamah chuan chhum dum a chah tup a, min chhawk lo takzet, ka thaw a ipik a, ka mit sulh sulh mai hian ka hria. Rei deuh chu tukverh tlang vuanin ka ding a, ka lungphu muang riai riai chu ka ngaichang ran bawk. Pawn lam thawm chu ka han ngaithla ve ṭhin a, a reh tlawk tlawk thung a, mahni inkhawngaih nain ka khat zo tawh.
Chutih laichuan ka phone a rawn ti a, khum lam a va hawi chuan a lo eng va va a, Awmpuia a nih ka ring a, biak pawh ka chak lo. A bulah chuan eng nge ka va sawi ang ni, ka rilruah chuan zawhna chu a awm ngei a, ka zawt ngam der bawk si lo.
Va zawt ila engtin nge min lo chhan ang, a rawn sawifiah ang nge a pha hulhual zawk ang. Dawt mai mai anih thu min lo hrilh angem; mahse, ka awm a nawm phah dawn lo tih ka hria a ni, mahni insitna leh inthlahrunna ka nei a, a bulah chuan vui thu takngial pawh ka sawi hreh ta, a phurrit nih ka hlau a, chu aimah chuan chân ka hlau a ni. A tel loa ka mal tur zia mawlh mai chu ka ngaihtuah a, chân ka hlau takzet.
A call chu chhang loin ka rik zawh tir a, bathroomah lutin ka va insil bawrh bawrh a, ka zia deuh huaiin ka hria. Khuma ka let leh chuan a message a lo awm a, dawra a kal thu leh an inchungte ina phone a charge thu te, a mut dawn chiah thu te a rawn sawi a, engmah chu ka chhang let lo. Inchung lam melhin ka mu meng reng a, ngaihtuahna a vak kual ruai bawk.
Ka muthilh theih loh vangin hma deuhah ka tho a, dar 6 bawra ka chhungte an lo thawh chuan eirel ka peih diam tawh a, nu Hlimi chuan ka ṭawngmawh a ti deuh nge ni min thlek leh ṭhin a, zawhna min zawh ka hlauh avangin pindanah ka luhsan thuai bawk. Dar 8 dawnah chawei siam turin min lo ko a, chaw chakna pawh ka nei lo, "Canteen ah ka ei mai ang" tiin ka insiam san a, class kal pawh chu phur lo tak ka ni.
College ka va thlen chuan Awmpuia a lo la kal lo a, building kawtah lo nghah pahin a lehkhabu chu ka keu a, a bag chhung ka han hai chuan Valarie key chain pek kha a lo ak a, ka paih teuh kher mai. Paih tuma ka tin hman uaih tawh tih ah Mawitei a lo lang a, ka lam a rawn pan avangin keychain chu ka ak ṭha leh sawt sawt a, a rawn hmu hman aniang "Eng nge i thuhruk?" a lo ti vat a, ka hmuhtir duh lem lo.
Chutih laimek chuan Gate aṭangin Awmpuia a rawn tlan thla a, Valerie nen scooty in an rawn inphur a, zirlai dang awm ve te pawn an lo en ṭhap a, min rawn melh hrek hrek tih pawh ka hria. "Luh san ang" ka tih laiin Mawitein min lo pawt bet tlat a, "Va kal rawh, saw nu hmuh laisawn va inti thu rawh" a lo ti khar khar a, chu chu a hma a ka awm dan ṭhin a ni, tunah erawh chutiang tih chakna chu ka nei lo, ka ngam tawh lo hulhual bawk.
Ka ṭhiannu chuan min nam kal teh a tum a, kei ka lo ṭang ve tlat a, "A lo kal dawn a lawm saw" tiin ka bag ken chu ka pawm ṭha sauh sauh a, Scooty a hungṭha lai chu ka en reng ringawt. Min hmu lo aniang an la rawn hawi lo a, Valerie'n nui var var a a biak lai te chuan chawmawlh lutukin ka lo thlir a, han koh takngial pawh ka ngam lo, inthlahrunna ka nei tlat tawh.
Awmpuia a rawn hawi rualin ka lo nuih var var a, min hmuh veleh hmanhmawh deuhin a lo phei a, "Message i va chhang thei lo ve" ka bul a rawn thlen ruala a tih chuan, "Hlawh neiin i khalh sak em ni?" Mawitein a lo ti zauh a, mitmeia ka lo khap chu a hrethiam lo aniang, "A free a kal theih na a ni ve bawk sia" a ti leh kher a, Awmpuia chuan a chhang lo nain keimah zawk chuan hrehawm ka lo ti a, "Lut ang u" tiin Awmpuia chu ka pawt dawt dawt tawh.
"I ṭhiannu sawn eng nge a hriat a?" ka bengbula a rawn tih chuan, "Ngaih loh lamah ngai suh, a sawi tum a ni lo ang, Valerie nen a hmuh dun vang che u a nih dawn kha" ka ti vat a, Mawitei ṭawngkam kha ngaih huat theih tak tur a ni a, hrehawm a tih phah ka hlau khawp mai.
Tlar hmasa berah kan ṭhu dun a, a bag ka pek laimeka Mawitei lo lut chuan "Kimkimi a lo kal dawn lo a, in bulah ka lo ṭhu ve dawn" tih leh a sira rawn ṭhut a rual a, chutih laichuan zirlai dangte pawh an lo lut ve mek a, Noeli te ṭhian ho pawh an rawn ri hlut a, Awmpuia chu lo biain "I haw dawn ta lo em ni?" a lo ti zauh a, "Haw hman ta lo, exam zawh lam.."a ti chiah tih ah "Aw..an inchungten an chelh tlat a lawm, an makpa chhungkhung daih tawh" Mawitein a lo ti leh a, Awmpuian min rawn melh zawk mai.
"Inchungah i awm e law, Peka te an lo la haw lo em ni?" phawk fea Noelin a tih chuan "Lo haw tawh e, hmeichhia chiah an awm a, inchungnu a damṭha bawk si lo a, ven deuh a ngai ṭhin a, ka awm rei tawh lo ang" tih pahin ka lam a rawn hawi a, keimah chu min hrilh a ang mah zawk.
"Anih chu a, a hrehawm i ti lo em ni, i inthlahrung leh viau a nge aw, in pawh buai tir lutuk suh" Noelin a ti chu ka lo thlawp khawp a, nui deuh chunga ka lo en chu "Nu-i pawh a lo leng ngam nang" a rawn ti leh a, Awmpuian a chhan hmain a kal nal nal thung.
Noeli kal hnua ka lam a rawn hawi chu, "I riak chho tih ka hrilh a" ka lo ti leh vat a, a ngaih a ṭha ta vak lo aniang, "I lungawi lo em ni?" a ti a, engmah pawh ka sawi leh hmain Mawitein a rawn kuai her sawk a, "Mi in an sawi sep sep tawh che hi i hria em, Peka a lo haw tawh te chuan rawn kalpui kher zel lo la, Rintei tan pawh hmuh in nuam hleinem, runluih te pawh in ang ka ti" a lo ti khar khar a, "Lalmawite" ka va tih pawh chuan min bengkhawn duh lo.
"A ngaizawng che anih kha, i zuam awm thei bawk a" a ti leh kher a, Awmpuian "I hre sual hle anih chu" a lo tihsan a, keimah bawk chu min lo en lehin ka beng bulah a rawn kun hnai a, "A bulah hian i lo vui em ni?" a rawn ti a, lu ka thing rang khawp mai, ka vui thu engmah ka sawi tlat lo.
Professor a lo luh tak avangin "Nakinah kan sawi dawn nia" a ti a, a lawm vak lo tih ka hre thei. Mawitei chu Awmpuia hmuh loh laiin ka va mitmei ṭhin a, eng emaw hi hmui phunin a rawn sawi a, a thil sawi chu engmah ka hrethiam lo. Prof a chhuah veleh Awmpuia chu a tho a, mi pawh be loin a chhuak nal nal a, pawna kan va chhuah laichuan Gate lama a kal chho chu ka han hmu a, thil a xerox dawn anih ka ring.
"Engah nge ngeiawm deuh deuha i ṭawngkhum reng a, nuam a ti loh hmel zia kha i hmu lo em ni" tiin ka ṭhiannu chu ka hau mawlh mawlh a, "A ho em mai, ka ngei tlat tawh" a ti duh lek a, kan inkar a chhe ta pawh a ni lo a, ka ṭhianten a lo biak chhiat chu ṭha ka ti lo takzet.
Class dawt leh ah chuan kan pahnih chauhin kan ṭhu a, kan inbe tam lo khawp mai. Tiffin a pai em tih ka va zawh chuan "Canteen ah kan ei dawn nia, ka treat ang che" bul deuh hian a ti a, min melh eih lo. "Mawitei kha ka tih tir a ni lo ania aw" ka va tih leh pawh chuan a ngawi reng a, min chhang dawn lo emaw ka tih tawh hnuah, "Engmah lo sawipui tawh suh" a rawn ti leh bawl a, a lawm loh hmel viau tawh.
Miss Mazari chungchangte kha zawh ka duh tehlul nen kan boruakin a zir ngang si lo a, sawichhuah rih lo mai a ṭhain ka hria. Class awl kan neih leh rualin Mawitein tui inpuiah min lo sawm a, hmanhmawh deuhin cooler awmna lam kan pan a, "A va ṭhu tum nasa ve" ka ṭhiannuin a tih chuan "Engmah ka sawi loh chuan lo ngawi mai mai tawh rawh, kan inhau pawh a ni lo va, Valerie te chu ngaih khatah ka ngai mai mai a lawm" tiin holam thei ang berin ka hrilh a, a pawm zawng a ni vak lo aniang chu a ner a ner mai.
Tui kan inzo kan va luh leh chuan kan dawhkan chungah Noeli a lo ṭhu a, an lo inbe mawlh mawlh a, ka va ṭhu leh tur chu Noeli chuan min lo melh rum khawp a, kei aimah chuan Mawitei chu a melh rum zawkin ka hria. Tlar hnung lama an kal chho chu ka thlir zui reng a, lehhawi meuha Noelin Mawitei a be lai chu ka han hmu bawk. Noeli chuan Mawitei awmah a nam dat a, inhnial te pawh an ang lek lek. Eng thil emaw an sawi a, an ṭawng erawh ka hre phak lo, an hmelah chuan an lungawi lo ve ve tih a hriat theih a, kan chungchang thil an sawi ngeiin ka ring bawk.
"Noeli khan eng nge a lo sawi?" a kut ka va man chawt a, a thil ziah lai dah pah chuan min en ren rawn a, "I ṭhiannu thil sawi a hria a, min lo zawt anih kha" a tih chuan ka hrethiam hauh lo.
"Mawitein maw?"
"Umm"
"Eng nge a sawi a?"
"Min rel"
"Awi ha..." sawi tur pawh ka hre lo, tlar hnung lamah a lo han sawi zui a ni ngei ang, Noeli hriat lai ber kher lehnghalin. Hnunglam ka han hawi chuan an lo ṭhu ṭha tawh a, ka rilru a nuam thei lo reng reng.
"Engtin nge a rel che a?" ti a Awmpuia ka zawh leh chuan "A ho lutuk, ka haw hran hleinem" a lo ti mai a, thil a ziah zawm mawlh mawlh laiin kei erawh ka thaw a ipik ṭun a, a tu a te pawh hian min tih hrehawm an tum ni maiin ka hre tawh. Awmpuia lamah chuan ka va tawlh hnai ringawt a, bang lam hawiin ka ṭhu ngawi reng thung.
Lunch break a kan chhuak tur lah chu Noeli te ṭhian hoin an lo au a, "Ei ho ang chu" Rosy'n a rawn ti a, Awmpuia chuan a hnial lem lo, Peksanga leh a ṭhian pakhatin min lo zui ve bawk a, chutih laiin Mawitei chu kan hnungah muangchangin a lo kal a, a mal angreng si a, sawm ve loh chu ni theiin ka hre lo.
"Lo kal chak rawh" ka va tih chuan "Zung lawk ang" a lo ti vat a, Awmpuia chu midang ho ruala lo va kal turin ka hrilh a, ka ei duh min zawh hnuah an inzui phei hlawm a, keinin zunin lam kan pan thung.
"Noeli nen khan eng nge in sawi?" ka ti hmasa ber a, "Khanu khan ka thilsawi a ngai kawi a nih kha, a ṭhianpa hi a lo chhan ve hlur zel a, ka ning teh ania" a ti hlak hlak a, eng nge a sawi chu ka zawt nawn leh ngat.
"Aw, Puipuii te bulah Scooty a lo khalh thu kha ka hrilh a, ka rel pawh a ni lo 'A tan chuan kal man free a ni ve a, a hnial thei lo aniang' ka ti kha a lo haw lutuk a" a sawi zawh rualin a darah ka beng nghal zawt a, "Engtin nge khatiang rilru kha i put theih!?" ka ti halh a, Noeli mai a ni nang, keipawn hetiang zawnga miin an ngaih hi ka duh miah lo, sum leh paia a harsatna chu kan hre vek a; mahse, sawichhuah ṭul lo lutuk thil a ni.
"A khalh sak ziah chhan tur dang ka hre hleinem, in ṭha reng tho bawk sia" a ti nuah nuah a, lung a ti zing lehzual. "Khawngaihin engmah lo sawi tawh suh, i ti buaithlak mai mai dawn" tiin ka ngen ta thlawt a, Noeli lah khan min huat hmel riauin ka hre lehnghal a, sawifiah leh pawh a chak awm loh.
Canteen a kan va luh chuan ka eitur min lo lam sak diam tawh a, ṭhutna lah chu pakhat chiah a awl a, Pekan Mawitei ken a tum chuan a lo ṭhu chak vak lo aniang Puipuii te bulah a ṭhu daih a, Noeli te ṭhian dunin an lo melh no lo em a tin a ni.
Thil eipahin ka bula ṭhu chu ka melh leh zauh ṭhin a, a ṭawng ve meuh lo. Peka leh Noeli te ho an ti bawrh bawrh a, keini pahnih erawh kan ngawi ngal a, pang insi renga ṭhu chung siin kan inhlat riau hian a hriat a, kan inmelh fuh chang pawhin danglam a awm tlat tawh. Biak ka duh a, ahma anga nel taka titi pui pawh ka chak; mahs, engthil emaw hian min dang tlat a, eng nge a bulah chuan sawi tur pawh ka hre lo. Ka dawihzep luatah ngawih ka chuh a, engmah a sawi lo chu remchangah ka la te pawh a ni mah ang, sawi a neih mawlh ka hlau a, a fala awm dun pawh ka chak loh phah a ni, hlauhthawn ka nei tlat a.
Canteen aṭanga kan chhuak tur chu Noelin min lo pawt sawk a, "I bialpa hmusit tute hi engtin nge i kawm reng theih, a ka kha veng ṭha tawh turin hrilh ang che" zawitein ka beng bulah a rawn ti a, engmah pawh ka sawi hmain a ṭhiante nen an kal nghal daih a, Awmpuia pawn mak a ti deuh aniang phawk lek lek hian min lo en a, engmah phei chu min zawt lo.
Tlai banah Valerie'n Gate bulah a lo nghak a, "U Rintei va thlah phawt la" a lo ti ve tehmial a; mahse, ka tlawm la ve tlat a, "Mawitei nen kan lo haw rual ang, fimkhur deuh khan tlan rawh u" tih pahin ka hma a kal Mawitei chu ka umzui a, Awmpuian min lo koh pawh chuan ka hawi let duh lo. Mahse, rei loteah ka zawnah an lo ding a, "Zanah ka lo leng ang, i phone lo en bawk la aw" awki damthluam hian a rawn ti a, Valerie hmuh laia min nin loh zia a tilang chu nuam ka lo ti a, ka nuih let var var bawk.
An tlan chhuak chiah tih ah "I nui lui a ni maw?" ka ṭhiannu chuan a rawn ti a, ka chhang lo, a chhan pawh ka hmelah a lan reng vang a ni.
Zanah chuan Peksanga nen an lo leng a, u Lizzy hoin ser kan bawl hluah a, kan boruak pawh a zia leh sawtin ka hria. Inkawm falna hun erawh kan nei lo a, an haw tura gate bula ka va thlah chuan rei lote kan indinchilh a, a nui hmel ka hmuh vang aniang Miss Mazari chungchang kha zawh ka chak tlat a, pehhel buai loin ka zawt tawl mai.
"Ka bialpa anih hi min tia, ka haw san dawn te khan pawisa min pek a tum a, ka la duh lo a lawm, pawisa duh vanga thlah ka ni lo a, i hriat vek kha" a ti a, Miss chu ka hmuh dan a dang hlawk tawh, nula Senior fel leh zahawm takah ka lo ngai ṭhin a, a zirlai naupang chunga a khawsak dan chu a tenawm ka ti.
Chungthil ka lo ngaihtuah lai chuan "Pawisa chu ka mamawh lutuk; mahse, pawisa vanga engkim ti duh tur chi ka ni lo" a lo ti leh nghat a, a aw chu a dik lo riauin ka hria. A hmel chu ka en ran a, ka nuih veleh ka sam a rawn chul thuak a, gate-ah a chhuak zui thuai bawk. Ka han tlaw zia chu aw, an tlan liam hnuah a thilsawi awmzia kha ka hre leh chauh a, Miss Mazari chungchang chauh a sawi lo, vawiin lama Mawitei thil sawi kha ka hrechhuak a, ka bulah a lo insawifiah reng zawk a, ka hriatthiam thu sawina chang pawh ka lo hre lo.
In a thlen hnua kan inbiak chuan ka va sawi a, a awm a nawm phah beisei tak chunga sawi ka ni, "Miten eng ang pawn lo ngai che mahsela, kei chuan ka hmangaih reng ang che, chuvangin mi thil sawi chu engah mah ngai suh, Valerie i rawn thlah ṭhin pawh kha ka haw miah lo a nia, i tan a remchang zawk miau alawm, Mawitei sawi ang kha ka ngaihdan a ni ve lo, in inah haw thla tawh la chu ka duh viau a; mahse..." min lo pawt chat vat a, "Khatianga sawi kher kha a ngai lo, zep loa i sawi phawng phawng ṭhin kha ka duh zawk, i thik thu chhia te pawh, nangmah ti nangmahtu che ania lawm, i awmdan thlak phah duh suh, buaina chu keimah zawk hi ka nia, ngaihzawng neih hi ka tlin ve loin ka hria" a tih laia a aw chu a zuai raih a, rilru natna a nei emaw tih mai tur a ni.
"Eng nge.. i sawi.. awmzia?" ka ti ban charh a, a thil sawi chuan rilru a ti buai deuh tlat.
"Buaina hi ka ngah lutuka, i beisei ang pawhin ka ngaihsak thei lo ang che, zirlaiah rilru pek ka ngai a, hna ka thawh a ngai bawk a, ka ti hrehawm mai mai dawn chein ka hria..." a rawn tih chuan, "Aih, teuh lo mai" ka lo ti sawk sawk a, sawi belh tawh lo sela ka duh takzet, ka hlauhthawn thil kha a thleng dawna hriatna ka nei.
"Min ṭhen i tum em?" ka ti tham leh ṭiak a, ka awmdan chu hrehawm tak a ni, hlauhthawnna hlirin ka khat.
"Nangman i duh te anih loh chuan ka ṭhen lo ang che" a rawn tih chuan ka na ru vawng vawng, kan inkar chu ka duh leh duh loh kar chiahin a dang a, ka kutah a dah tawp tihna anih chu. Ka mittui hnam tur chu ka khap let sak sak a, thawk ka la vang vang bawk, rei dawn chu kan ngawi dun a, min ngaichang tih pawh ka hria.
"Inṭhen ka duh lo, ngaihtuah pawh ngaihtuah tawh suh" ka ti vin chiam a, "Inṭhen thu ka sawi lo" dam ruih hian a rawn ti leh a, kei erawh ka chiai a ni, a tel loa ka mal tur zia leh ka khawhar tur zia ngawt chu ka ngaihtuah a, college ah pawh engtin nge ka awm ang ni, ka zuam lo a, ka thei lo ang tih pawh ka chiang, kan inkar chu ka duh leh duh loh ah a innghat anih chu 'Ka duh lo bur' tih chu ka chhanna a ni.
(End of chapter - 12)
Comments
Post a Comment