BLUE BAYOU
by Ahmangaihi violette khiangte
Chapter - 13
Mihring hi kan lo inthlak danglam thei dawn hlein ka hria, kan rilru puthmang, kan hlimpui thil leh kan ṭahpui ṭhin thil te pawh. Lungngaihna leh buaina ka neih changa ka inhnemna ni ṭhin, thil dang zawng zawng aia ka hlimna thlen ṭhintu kha phurrit ah a chang ta emaw tih mai tur a ni. Khami zan aṭang khan kan inkar chu thuruk ang mai a ni a, zep leh sawi hreh thil tam tak kan nei tawh a, kan inveng tawn a, rilru intih nat sak kan hlauin sawi chhuah lohah kan tlak ṭhin.
College ah chuan ṭha takin kan inbia a, kan inkar siam ṭhat pawh kan tum ve vein ka hria. Mahse, ka hriat chhuah tak erawh ṭawngkam ṭha ringawt hi mi pahnihte inlaichin nan a tawk zo lo a, kan ṭawngkam a ṭhat poh leh a daidangtu a lian zual emaw tih tur a ni ṭhin. Ka bula a awm reng laipawh hian ral aṭanga thlir anga inhriat chang ka nei a, a chhan pawh kan rilru kan inhriatsak tawh loh vang a ni, min ṭhen a duh reng a ngem tih thu pawh ka inzawt ngun ta malh malh viau mai.
Hmangaihna hi hetiang zawnga a inher danglam theih ka ring pha lo va, a hma chuan suangtuahna in ang neiin duhthu kan sam dun a, beiseina nen nakin hun pawh kan thlir dun ṭhin, kan nui hmel a lo danglam hret hret a, chutih rualin daidanna bang kan siam tam telh telh lawi a. Hmangaihna chu a duhawmin a hlimawm reng lo va, a chang chuan kan thinlung pawi sawiin ṭahna a thlen fo ṭhin tih te pawh ka hmuthiam ve ta a ni.
2nd internal test nei turin kan inbuatsaih a, lehkhazir chu tui lo viau mahila tun hma aichuan ka beingawrh ve ta bawk a, class awlah pawh Library-ah ka kal tam khawp mai. U Lizzy thawmhnaw min zawrh tir pawh ka ken niah ka hralh zo vek a, ka hlep te chu Exam fee atan tiin ka dahṭha a, Test zawh lamah chuan exam form kan fillup leh nghal mai ka ring.
Nikhat Library-a ka kal chu counter-ah Miss Mazari a lo ṭhu a, kal pelh mai ka tum laiin "Awmpuia a bang hma dawn em?" a lo ti khauh a, Last period a neih thu ka hrilh chuan "Last period chu Sir Muanpuia a lo kal lo a, ka la tlang ang, kan bang hma dawn nia" a ti a, ka chhang zui lem lo.
Rei vak loah Awmpuia a lo lut a, Miss Mazarin a lo bia chu ka ṭhutna aṭangin ka lo thlir ve reng a, kan Librarian ho chuan eng thil emaw an sawi a, hmeichhe pahnih te chu an nui an nui a, a lo phei dawn a "Ka rei hman lo ang, tih tur ka nei sa a" Awmpuian a tih ri chu ka hre pha, eng thil emaw ti turin a sawm anih ka ring.
Chumi hnu chuan ka lam a rawn pan a, a bag a rawn dah hnuah lehkhabu a va zawng kual a, a rawn let leh thleng chuan ka lo en a, "Kan bang rual dawnin ka hria" tih zawng ka sawi a, "Peka inthlah tir mai ta che, lehkhabu lo thleng tur a awm a, ka awm hnufual deuh ang" tih pahin a rawn ṭhu a, nidangah pawh Valerie emaw Peka nen an inphurh ṭhin avangin min thlah ngai lem lo a, Peka inthlah tir tura min ti chu mak ka ti deuh.
"Keimahin ka haw thei reng a lawm" ka va tih chuan "Tumah phurh tur a nei lo a, ka lo biak sak ang che" a ti leh mai a, ka hel deuh tlat thung.
"Nangmah chiah em ni an sawm a?" ka tih leh chuan "Ka hre bik lo" tih ringawtin min chhang a, "Motor silna ah i kal dawn a ni lawm ni" ka va ti leh kher a.
"Kal dawn e, chumi hma chuan ka pui lawk ang, tinge?" a rawn tih chuan ka ngawi hmak a, ka tum deuh bur tawh, 'Min lo nghak rawh' a tih ka beisei a, thil tih tur a neih hian min sawm ngai miah lo a, min sawm ni sela ka han hnial dawn loh tehlul nen, kan ban rual chang te hi chuan haw dun te ka chak ve ṭhin a, a rilruah a awm ve ngai miah lo em mawni.
"Political science hi core tlang i tum em?" rei deuh kan ngawih hnua ka tih chuan "Economics pawh a ni zawk mai thei" a lo ti zawi sup a, ka va melh phawk khawp mai.
"Core ang kan ti vek tawh sia" a lehkhabu chhiar lai dah meuhin a rawn hawi a, engtin tak min chhang ang maw ka tih laiin "Kan tih ṭhatna ber kan core a ngai a lawm" dam angreng deuh hian a ti a, ka hrethiam meuh lo, subject tinah a ti ṭha ber vek a, engpawh chu la sela a hnehsawh vek dawn tih ka hria.
"Anih chuan Economics chu ka core tlang mai ang" ka ti chu min lo hnial rang khawp a, "Political science ah i la ti ṭha ber a, tun aṭang khan i rilru siam sa la, a dang aiin uluk zual rawh, semester dangah pawh Economics chu i tih chhiat em kha, external ah i ti ṭha viau anih loh chuan Pol science kha a ṭha zawk ang" a ti nghat nghat a, a thil sawi dan ringawt pawh chuan min hlat a duh niin ka hre tawh a, class khata ṭhut dun lam chu a rilruah a awm ve tawh lo.
"Subject dang ve ve lak i duh em ni?"
"Ka bula ṭhut i duh vang ringawtin i subject tui miah loh lak i tum a, i tana ṭha tur ngaihtuah ve zawk ta che" ka mitah min en ran a, lung a dam thei mawlh lo.
"Nang chuan i tui vek a lawm" ka ti leh ngawt a, a duh anih phawt chuan a insiamrem thei ang, beisei ka nei sang lutuk ṭhin hi chu aw.....ka hnual phah fo mai anih hi.
"Ka la hre lo Rinte, engmah hi ka la sawi chiang thei lo, hetiang sawi nan chuan a la hma lutuk" a ti deuh vang vang a, eng ngati nge ka dawhtheih loh em em mai hi ka hrethiam tawh lo, a rilru hriat ka duh lutuk vang aniang.
Library aṭanga kan chhuah hnuah calssroom lampanin kan inzui a, Corridor ah Mawitei leh Kimkimi an lo ding a, kan lut tur chu min lo zui thuai bawk. "Awmpuia chhass in last period a la tlang ngei ngei ang" Kimkimin a tih chuan ka lo ner nak a, hmanni aṭang khan sawi chhuah zauh zauh a ching a, Awmpuia pawn nuam a ti bik lo; mahse, midangin an hrethiam ve lo hlauh a, kan lo sawi dun tawh avangin huatah ka la lo ve bawk.
Peksanga ten an lo koh avangin "Va ṭhu rawh, Mawitei te bulah ka ṭhu ang" ka ti ve mai a; mahse, kan ṭhutfel hnu rei lo teah kan hma chiah tlarah chuan an rawn insawn a, an ṭhianho chuan an titi a, a nui leh dar dar ṭhin.
Miss Mazari lo lut chuan roll a call zawh hnuah mipa ṭhenkhat hming a rawn lam lauh lauh a, mi panga vel an ni. "Banah Library-ah chhuk ula, chhuar te chawi sawn a ngai dawn a, in sir te in zuk pui dawn nia" a tih zawm a, a aw a ringin a thinchhe bawk a, a class ah hi chuan kan reh ṭhuap zel a, tumah hi kan bengchheng ngam ngai lo.
Lecture a pek laichuan a pawimawh tur ang chi chu kan lo thai zung zung hlawm a, keiphei chu ka hawi chhuak meuh lo. Chutah, ka hming a rawn lam thut a, ka phu zawk nghe nghe. "Han ding teh le" a tih vang chuan zam ru deuh chungin ka ding a, "Keynesian theory i hmuh dan han sawi teh?" a ti mauh mai a, midang lah chuan min en deuh ṭhap a, keilah chu ka bangbo nasa mai!?
"Keynesian theory maw?" ka aw chu zawi tak a ni.
Ka hma chiah a Awmpuia ṭhu chu ka zuk melh a, dawhkana bawk deuh chung hian a rawn hawi let a, ka thiam lo tih a hre nghal a niang chu a rawn ṭhu awn vat a, eng emaw hi a rawn sawi a, a thil sawi chu ka hre hleithei lo. Chhanna ka la neih loh vang chuan min rawn en leh a, kan inmelh buai nak mai.
"Lalawmpui, hawi lo let lo khan ṭhu ṭha rawh" a rawn tih fak hnuah nuisangin min rawn en a, "A bu a mi ang lo khan i hriatthiam danin han sawi tawp teh, class hmasa ah pawh kan explain tawh kha" a ti zawm leh zat a. Eonomics hi ka subject tui loh ber leh ka thiam theih loh ber a ni a, seat awl a tam vanga la ve chauh ka ni, heng theory te phei hi chu ka thiam hleithei lo, exam na ah pawh ka inziak pass ve ṭawk zel a, core tlang zel chi pawh ka ni lo.
"Miss, ngaihdan pawh ka nei lo" ka ti tawl a, classroom chu a reh tlawk tlawk maiin ka hria. Min ṭhuttir leh mai dawn emaw ka tih laiin "I bialpa rinchhan lutuk suh aw, Prof ten an sawi zing tlat, exam leh hunah chuan in inṭhut hlat viau tawh ang" a nelawm lohna zawng zawng a sawm khawm emaw tih mai turin min melh a, ka zah zia chu aw.
"Class neih hunah ka zawt leh ang che, ṭhu rawh" a tih laichuan zirlai dangten min thlir ṭhup a, ka ṭhut hnu te chuan ka khur ru dar dar a, ka ṭah a chhuak ngawih ngawih.
"Hrehawm ti duh suh, midang pawn kan thiam bik hleinem" Mawitein a rawn tih pawh chuan ka hawi ṭha ngam tawh lo. Awmpuina min rawn koh vang chuan dawhkanah ka bawk vat a, ka mittui a tling pam tawh.
"I text kha lo la lawk teh" a rawn tih chuan ka pe ve mai a, a lehhawi rualin ka mittui ka hru sawk sawk a, engtiangin nge min sawi zui hlawm ang tih mawlh chu ka ngaihtuah a, ka awmdan chu hrehawm tak a ni.
"Ka underline kha aw" tih paha Awmpuian lehkhabu min rawn pek chuan a kawr banah ka lo ṭham vat a, "Banah min thlah rawh" ka ti zawi sep a, ka aw te chu a la khur deuh.
"Tih tur ka neih kha, min lo nghak peih em ni?" a tih chuan lu ka thing leh vat a, Miss Mazari a awm ve ka ring a, a hmuh tura awm chu ka duh lo.
"Taxi stand thleng" ka ti takah chuan a bu zauh a, Miss chuan min hmu pha tawh lo emaw ka tih laiin "Rinsangpuii kha ṭawng reng suh" a rawn ti leh bawl a, midang mit chu ka chungah a fu leh ṭhup tawh. Chutah Awmpuia chu rawn biain Handout xerox tur a pe a, a class lak chhung chu ka hawi chhuak tawh lo reng reng, class zawh hnua pawna kan chhuak te chu thaw a ipik ṭup mai a, ka thaw te a hah lek lekin ka hria.
"Biakzari khan a ngaihzawn ruk vang mai mai anih kha, a thik lutuk vang che ah ngai tawp rawh" ka beng bula Kimkimin a rawn tih chuan ka ṭim sung sung a, chu bak chu chhan dang tur ka hre bik lo.
"I bialpa hi ngaihzawn a hahthlak em mai"
"Hmeichhiain an zuam lutuk"
"I thikthu chhia pawh hi i demawm miah lo ania, Awmpuia hian a zir lo a ni" tih angreng chu min hrilh mawlh mawlh a, ka ngaihtuahna chu a buai nuaih a ni ber. Awmpuia lo chhuak chiah chu ka va melh a, ani pawn min lo hmu ve thuai a, nghah pawh nghak duh loin ka kalsan hmawk hmawk a, Mawitei leh Kimkimin min lo zui thuai bawk.
"Rinte" a rawn tih chuan ka ding leh lawi a, chutih laichuan Peksanga leh Zothanan min lo kalpel a, "Nu-i.. Pa-a saw nghak ve ta che..." tiin min lo fiam a, ka nui tawi khawp mai. Awmpuia lo thleng pawh chuan mak tih hmel deuh hian min en a, engmah min zawt loin "Taxi stand thleng chu ka lo thlah ang che" a ti a, kal mai ka tum chu ka bag ah rawn manin min pawt ding chawt a, a zipper a lo inhawng aniang a rawn zip ṭha zui a, zirlai dang ho lah chuan min melh hrek hrek a, an nui tet tet bawk a, min nuihzat anih ka ring hmiah tawh.
"Ka kal dawn...min thlah duh lo mai rawh" tih leh kal ka rual a, mahni chauha kal chu ka hreh leh lawi si a, midangin min en dan chu hrehawm ka ti ngawih ngawih, Mawitei leh Kimkimi lahin min kalsan daih tawh a, Noeli te ṭhian ho ka va hmu phei chu ka bing chuk chukin ka hria.
"Awmpui, Miss in a ko ve che a ni lawm ni?" Rosy'n a rawn tih chuan ka lehhawi vat a, ka hnung lawkah Awmpuia chu a lo kal a, "Ko e" tih bak chuan a chhang lo. "Rinbawih, i zak ve ram ram lo maw?" Hminghlui a rawn tih chuan ka chhang duh lo a, kal pelin ka kal chak sauh bawk; mahse, thawk lehkhatah ka darah a rawn vuan a, min kuai her lawp a, ka tlu ṭhelh nghe nghe.
"Eng nge i hriat?!" a tih chuan inpetruh ṭeuh chungin ka melh a, ka hriat te min han zawt a, hre ve lo ang maiin.
"Min thlah duh suh ka tih kha, ka ṭhiante pawh an kal tawh" zawi tein ka ti a, ka aw te chu a la khur deuh.
"Nichin vang kha a ni em?" a tih chuan ka chhang lo, lei lam bihin lungṭhil chu ka chhuih ringawt a, sawi chhuah leh pawh ka chak lo.
"Eng ngati nge ka chungah hian i ṭuan ziah mai le, ka thiam loh a awm em ni?" a ti fiah fak a, a lungawi loh zia chu a hriat theih. "A ngaihzawn vang che anih kha, ka thiam loh a awm bik a mi, khatianga min tih zah kher a ngai hleinem" ka sawizawng chuan ka hnuk a ulh a, min ṭan zawng emaw min hnemna ṭawngkam a sawi ka beisei a, chutiang pawh ti loa min chhuahchhal chu hriatthiam har ka ti.
"Keimah vangah i ngai a ni maw, midang pawh a zawh ziah ṭhin kha.." a tih chuan phawk fein ka melh a, "I ṭan a ni maw..." ka ti chhuak phawng a, awih pawh a har zawk a lawm le.
"Engvang chuan nge ka ṭan ang, hrehawm ka tih ve loh i ring em mawni" a tih leh laitakin Noeli te an lo chho a, chuveleh ka darah min rawn kuahin min kal chhoh pui a, "I ṭan anih kha, ka zah zia i hria em, keimah kher min zawh chhan te kha ka hre vek, a ngaizawng che a lawm, chuvangin min tih zah a duh a nih kha" ka ti chho mawlh mawlh a, ka hah vang pawh a ni lo, ka thinphu a rang a, thawk ka la sek sek bawk.
"Tu pawh hian min ngaizawng turah ngai suh, i awmdan hi a hahthlak lutuk ania, i tan pawh a hrehawm ang, kan bula hmeichhia zawng zawng i thik a..." ka melh zawk a, inlakhran tuma ka che chu nghet lutukin min lo kuah a, "Inhauh ka peih lo, buaina nei pawh ka peih lo " ka ti leh nghat a, kan hnung maiah Noeli te an lo kal avangin kan ṭawng ring lo a, phun ser ser chunga lungawi loh thu sawi chu a hahthlak takzet.
"Dik tak chuan min ning ti raw..?" ka ti leh tawl a, thawk a la hluai mai. "Rinsangpui, tunlai chu i mizia a dang khawp mai" ka mitah tak min en chungin a ti a, keipawn danglam chu ka hmu thiam ve tawh, a mit rawng chu a la ngai reng a, mahse, danglam a awm. Tu emaw mi hrang hlak, hmelhriat loh en ang maiin min en a ni.
"Min ning anih kha..." ka aw a lawi rat a, ṭah ka insum zia chu a hai ka ring lo, ka thil vei ruk em em, zantin deuh thaw ka inzawh ṭhin chu ka zawt a; mahse, a mi en danah ringawt pawh chu chhanna chu ka hmuin ka hria.
"Ka ning ngai lo ang che" kha fak hian a rawn ti a, a mitah tak ka en chung pawhin ka awih ngam chuang lo, ka rinna kha a bo zo ta em ni ang!?
"Dawt sawi suh?"
"Eng atan nge dawt chu ka sawi ang?"
"I hahthlak min tih kha, nangmah hi i danglam zawk, min be ṭha peih lo a, kan awm dun pawhin i ngawi reng zel a, ka biak loh che chuan thil dang i ti daih a, i danglam vek tawh" a lo nui hawk a, ka dar chu a rawn beng dat dat bawk a, ṭawng leh a tum chiah tih ah Noeli ten min rawn pawh a, Taxi stand kan thleng zui bawk.
Noeli te kal liam hun chu kan nghak leh te te a, "Nu-i leh Pa-a te u kan kal mai ang aw" tih paha taxi chhung aṭanga min rawn bye bye chu Awmpuia zawkin a lo vai let a, kei erawh ka lo ding ngawi reng thung. A tu a mah mah chuan taxi lak pawh kan tum chuang lo a, sawi tur dang a la nei tlata ka hriat vangin kal san chu ka chak bik lo.
"Ka va bia ang aw?" ti a kal a tum chiah chu a banah ka lo man a, "Haw rual ang" ka ti ta ngawt a, a hriatthiam loh hmel khawp mai.
"Ka chhuk leh a ngaih kha" a ti chung pawhin "Please in, haw rual ang, vawiin chiah" ka la ti fan a, ngen tak tein ka ngen, min hnial ang tih mawlh chu ka hlau a, min lo hnial anih chuan ka bei a dawng ngawih ngawih dawn, haw rual puiah mai ka sawm lo tlat a ni.
"Lo kal lawk teh" tih paha a kal chu ka zui ve mai bawk a, taxi stand a thir ṭhutthleng awlah chuan kan va ṭhu dun ran a, sawi leh mai tur pawh ka hre lo. Ka lam a rawn hawi chuan ka lo en ve vat a, "Miss kha thik duh suh, kan inngaizawng tih a hria a lawm, ngaihzawng nei lo pawh ni ila ka duh dawn lo a, hmeichhe dang pawh ka duh chuang lo, lo inṭhen ta pawh ni ila ngaihzawng dang ka nei lo ang" a ti nghat nghat a, 'Lo inṭhen ta pawh ni ila' a tih thu mawlh chu ka lo la vung a, a sawi chhuah vawi hnihna a ni tawh.
"Hmeichhe dang chungchang ka sawi miah hleinem, ka thik thu pawh ka sawi em ni, eng ngati nge inṭhen chu i rawn sawi chhuah chhan?" tiin ka melh tlawk tlawk a, inṭhen lam engmah ka sawi loh laia a rawn sawi lang chu ka hrethiam lo, sawi chhan a neih ka ring a ni.
"Ka thusawi la kawi suh" a ti leh ringawt a, a sawi tlang mai lo te chu ka hua, a duh anih chuan sawi dawt mai rawh se.
"Inṭhen i duh ti raw?"
"A va mak, inṭhen chungchang ka sawi lo" ka ti vin hluk a, a awka vin ringawt pawh chu mak tih tur a tling zel a, a danglamna a lang tam telh telh bawk.
"I duh a lawm, i sawi hreh mai mai anih kha, min ning tawh tih pawh ka hria, vawihnih lai inṭhen chungchang i sawi tawh" a lam pawh hawi duh loin kawngpui lam ka melh a, a rawn tawlh hnai erawh ka lo melh leh vat lawi a, a insehruh ve ṭeuh mai.
"Lungawina i nei hlawl lo anih hi, a hma daih aṭang tawh khan ka lakah i lungawi lo reng a, keimah ah hian duhkhawp i hmu lo anih ka ring" ka tih thu chuan min ti na vawng vawng, tun hnai mai a ni lo, ahma aṭang daih tawh khan min hmuh dan a lo danglam tawh tih na..!?
"Heti khawp hian ka duh che a, eng nge i beisei pawh ka hre lo, ka theihtawkin ka duat ve ṭhin che; mahse, i duhkhawp a tling ngai lo, i thinrim reng a, insawifiah ka ngai reng bawk a, dik tak chuan maw...inṭhen hi ka duh a ni lo, mahse ka hah tawh" a ti ta thlawt a, ka nghilh dup maiin ka hria, zawh belh leh tur engmah ka nei lo, a hmel chu ka en tlawk tlawk a, ka mittui a hnam ṭiam ṭiam bawk.
"Khawlai anih hi, sawi tawh rih lo ang" a tih leh chuan hnunglam ka hawi vat a, mittui ka hru lai chu min lo en ve reng a, "Tihpalh" a ti zawi ruih a, a inthiam loh poh leh ka hrehawm tih a zual. Eng emaw chen chu kan ngawi dun a, "Kal tawh rawh" tih bak chu sawi tur ka nei tawh lo.
"Taxi chu ka va biak sak ang che, i kal hnuah ka chhuk ang" tih paha a kal chu ka melh mawl tawp a, Taxi driver a va biak laite chuan ka lam a rawn hawi leh ṭhin a, ka ngaihtuahna chu a chiri nuai mai hian ka hria, thil tam tak ka ngaihtuah let a, phut leh beisei ka ngah lutuk ṭhin em ni tiin ka inzawt bawk. A ni ngei ang, tuartu zawk emaw ka intih lai khan a lo tuar ve tho a, kei ang thoin hrehawm a lo ti ve a, hmeichhe dang thik a ka phibuai ṭhin lai te khan a lo hah ru ve ngawih ngawih ṭhin anih dawn hi, tunah a sawi chhuak ve chauh a, chu pawh a tawrh theih chin a thlen tawh vang a ni.
Taxi driver in min rawn koh tak avang chuan ka tho thuai a, be tawh lo a luh mai ka tum chu "Ka haw har lo ang, zanah ka lo leng dawn nia" zawi deuh tak hian a rawn ti a, chhang loin lu ka bu ringawt thung. Kan tlan chhuah dawn thleng chuan a la ding a, ka va hawi let leh chuan college lam pana a chhuk chu ka va hmu a, kan han tlan liam chiah chu thawk ka la vang vang a, insum thei ka awm lo, ka mittui a luang zung zung a, insum a har takzet.
In ka thlen rualin pindan lam ka pan a, engmah thil dang ti hmasa loin ka inbual a, ka inbual zawh hnu lawkah Unaunu a lo thleng a, a pindan aṭangin min rawn au lang lang bawk. Ka va luh chuan a khumah a lo ṭhu a, eng emaw hi a lo inchhawp hnawk rup a, "Ka thil dawn hi lo en teh" nuisanga a lo tih chuan ka va en sak a, sneakers mawi deuh hi a lo ni a, "Ka bialpa min leisak anih hi, ka nu hrilh miah suh" hlim hmel deuh hian a ti a, a pheikhawk thar chu branded pheikhawk chhuak thar a ni a, a man pawh a to khawp ang.
Eirawngbawl turin ka chhuahsan leh mai a, vawiin chu Nu Hlimi a lo haw har khawp mai, a hna a ṭan veleh tawh a, an pu ten an la dimdawi ve rih avangin a lo haw hma ṭhin a, vawiin chu an buai deuh a ni maithei. Chawhmeh chan pahin ka pa ka han bia a, ani pawh a zin chhuak leh tawh a, ka biak laichuan a awmna ah ruah a sur a, an pandal chhiat thu te sawiin a rawn phul hlut a, chanchin ka lo zawt ve luam bawk.
"I nuin a lo bia che em?" a tih chuan ka ngawi ren rawn a, "In inbe lo em ni?" a rawn tih nawn leh vang chuan, "Be lo" ka ti bul hmuk a, a chungchang sawi hi chuan ka thinrim leh hlur zel a, ka pa pawh hian a ngaihven mah mahin ka hre ṭhin.
"Ka zawt mai mai che ania, a lo biak che chuan min hrilh ve dawn nia" a tih pawh chuan ka chhang lo, an camper che nawi deuh deuh chanchin te min rawn hrilh luam a, christmas hmain lo zin a tum bawk a, a lo zin thei anih chuan a ruala haw pawh a rem viau ang.
Dar 5 velah nu Hlimi a lo thleng a, zanriah ka peih tawh vangin chaw kan ei hma bawk a, dar 6 ah chuan Awmpuia phone ka chang leh ran tawh. Sitting room ah ṭhuin sana chu ka melh sek a, a rawn phone chiah chu ka la rang khawp mai. "Ka lo kal har deuh ang, bungraw unload tur a awm thut a" a rawn tih chuan "A pawi lo" ka lo ti ve sawk sawk a, vawiin lam thil kha vei zui loh hram ka duh a, kan boruak chu siam ṭhat a ngai hle tih pawh ka hria. Tv en pahin ka lo nghak a, a lo kal har reuh khawp mai.
A lo thlen chuan dar 9 a ri ṭep a, Nu Hlimi a la men avangin kan pathum chuan TV kan en ho a, ka nu Hlimi nen chuan an inbe deuh reng a, a ṭawngkam a zangkhai ṭhin viau bawk. Kan inmelh fuh chang chuan ngaihawm zet hian min lo en ṭhin a, ka biak pawhin ngaih han tih ṭhat lohna tur engmah a awm ka hre lo, ani pawn kan boruak chu siam ṭhat a duh ve anih ka ring a, ka hahdam huai bawk.
Thingpui te kan inzawh hnuah a haw tur chu ka va thlah a, gate lampana kan kal laichuan ka kut a rawn vuan a, a hmer vang vang bawk, kan han inen chuan boruak danglam deuh hi a awm a, ka hnim ru veng veng mai. "Vawiina ka thil sawi kha lo haw suh aw, huat tur a sawi ka ni lo ania, tunlai chu ka chau deuh aniang, ka ngaihtuahna hi a fim lo tlat zel" a tih chuan ka lo nuih var var a, "Engmah ka haw lo" tih pahin a biangah ka va fawp zauh a, ka nuih dun lohna pawh kar thum zet a ni tawh, hetiang hian nui dun reng thei ila ka ti....
"In hau tawh lo ang aw" a tih chuan ka bu leh vat a, chutah ka hma ah rawn dingin kan in lam chu a va thlek hmasa te te a, tumah a hmu lo aniang chu ka kawngah nghet deuhin a rawn kuah a, min fawp nghal vawng vawng.
Dingdihlip meuhin a fawhna chu ka chhang a, lung a awi hliah hliah, nipui sen sat laitaka thlifim rawn thaw hi ka tehkhin ber, a rimtui inkah rim te chuan min zem chiai chiai a, a mitmeng damthlup leh a hmui ka fawhna avanga hnawm chap chu ka han en ṭhin a, he hmangaihna hi keia hrilhfiah ve phak rual a ni lo, tui fawn ang maiin a so bulh bulh a, thawk leh khatah a reh leh duak a, ṭawngkam khat lek pawhin mei a kan ang maiin min ti na a; mahse, ṭawngkam khat lek hmangin ngaihdamna a van vawrh leh chiam ṭhin a, a duh duh danin min kai phar a ni ber.
"College ah kan inhmu dawn nia" tiin kan inmangṭha a, in a ka luh leh hnuah lehkha ka zir veleh a, a message ka nghah avangin rilru ah a lut mawh khawp mai. Ka chhiar tui dawn chauh tih ah message a rawn thlenga, Mawitei zawk a loh nih vangin phur lo deuhin ka en a, a message lah chu a han ho khawp a, "Ka suangtuahna hi kum zabi 20 na hmalamah a awm, ka duh aiin ka piang hma tlat mai" tih hi a rawn thawn a, "Lehkha zir rawh" tih zawngin ka va chhang a, ani pawh hi kei ang tho a thiam thei lo leh zir ṭha peih lo ve bawk a ni.
Rei vak loah Awmpuia message a lo thleng a, "Ka zir rei deuh ang min mut san mai dawn nia" a tih vangin Good night wish ka thawn a, chumi hnuah darkar 1 zet chu ka zir ve a, ruah a rawn sur tak avangin ka mu hma khawp mai. Zinga ka harh pawh chuan ruah a la tla cherh cherh reng a, ka class kal tur pawh thawmhnaw lum nen ka chhuak a, college thlen hnuah ruah chu a han leh daih lawi a, ni a sa zui bawk nen ka inthuam fuh vak dawn lo a ang.
Chhun chawlh hmain education class kan nei a, Awmpuian a lak ve loh vangin Kimkimi nen kan ṭhu dun a, "Noeli kha ka hmu reng sia, tinge a lo luh ve loh le" a tih chuan ka han hawi kual a, Noeli te ṭhian ho hmel reng reng chu hmuh tur an awm lo, 1st period ah khan Political science class ah kan ṭhu ho a, an awm ve lo chu mak ka ti deuh.
Mahse, class bana kan va chhuah chuan canteen-a an ṭhu ka va hmu a, Awmpuia pawh a lo awm ve bawk a, "Thil ei ang" ka va tih chuan min lo en ṭhap a, "Lo va lut rawh, ka lo kal ang" Awmpuian a lo tih chuan ngaihṭha lo ru deuhin kan luhsan a, tukverh aṭangin ka va thlek deuh reng thung. An awmdan chu mak ka ti riau a, Noeli chu an ṭhut hual deuh ṭhap a, buaina nei hmel an pu bawk.
Peksanga lo lut chu, "Saw mi te sawn eng nge an tih a?" ka lo ti vat a, "Tute?" tih leh ka bula rawn ṭhut a rual a, Eduction class kan neih hma khan Awmpuia nen an inzui a, a hriat ve ka rin vanga zawt ka ni.
"Noeli pa chu a boral em mawni le, ka va zawt teh ang" ti a kal mai a tum chu "Eng nge a awmzia?" Kimkimi nen kan lo ti rual zawt a, "Nichin deuh khan an sawi ka hria a, thing aṭangin a tla a lawm, an rawn phur thla mek an tia, engmah ka hre zui bik lo" tih pahin a pen chhuak hlawk hlawk a, ka va hawi chhuah leh laichuan Noeli chu a lo inhru mawlh mawlh a, rilru a ti hrehawm reuh khawp mai.
"Hawh Kimkim, va kal ve ang" ka tih chuan "Thil ei phawt ang" a ti tlat a, chutih laichuan an ding khawm lai chu ka va hmu a, damdawiinah kal an tum anih ka ring, keini pawh chuan zui ve mai a ṭhain ka hria, Awmpuia pawn kal ngei a duh ka ring a, lo han hmuah pui pawh a ngaih ka ring.
"Ka va kal dawn, i duh leh Mawitei lo nghak mai rawh" tih leh thawh ka rual a, canteen aṭang chuan ka pen chhuak hlawk hlawk a, an bul ka va thleng chu min ngaihven an awm lem lo. Awmpuia chuan Noeli chu kuahin a lo hnem mawlh mawlh a, "Hlauthawng suh, a lo thlen pui ṭep tawh a lawm" a tih vang chuan a la boral lo tih ka hrethiam a, Noeli chu ka lainat takzet.
"Peka scooty leh taxi kan hmang anga, damdawiin kawtah kan lo han nghak dawn nia" Rebekin a tih laiin "Zothana bike pawh a awm a lawm" Hminghluin a lo ti ve bawk a, an kal dan tur an rel zung zung a, "Ka lo kal ve ang" ka va ti zauh chu min en ṭhap a, sawi dik loh nei te pawh ka ang.
"Awmpui, Rintei thil va ei pui rawh, Pekan min dah mai dawn a lawm" Noelin a tih chuan "A ngai chuang lo, Awmpuia nen kan lo..." ka sawi zawh hma hmain "Lo kal duh lo mai rawh" Noeli bawk chuan a ti leh a, Awmpuia kuahna aṭanga kalsawnin lirthei dahna lam a pana, a hrilhhai thlak duh khawp mai.
"I kal ve loh te chuan, Noeli bestfriend a lawm i nih, chu loah in khaw ho an lo chhuk dawn a, i awm ve a ngai" Rebekin a lo ti zung zung a, Peksangan a scooty chahbi a lo pe thuai bawk. Awmpuian ka lam a rawn hawi chu ka lo en mawl tawp a, Noeli awmdan kha ka la hrethiam thei lo, Awmpuia chu kal ve ngei ngei turah ka ngai bawk.
"Khalh zawk la" Awmpuian a tih chuan Pekan lu a thing a, "Zothana nen kan lo inphur ang" a ti sam et a. Awmpuian ka lam a rawn hawi chu, "Taxi in kan kal mai dawn em ni?" hawihhawm chhuahin ka lo ti leh a, Mahse, "Taxi ah 5 kan leng lo, a hranin lo kal mai rawh u" Rebekin a tih chuan ka hrethiam ve chiah a, ka lo chuang reng anih hmel.
Ka kal ve lo mai ang ka tih rilruk laiin Awmpuia chuan Scooty chahbi chu Peka hnenah a pe let a, "Hmeichhe pathum hi taxi in chho sela, Noeli chu phur mai rawh, Rintei nen taxi dang ka lo la ang" a ti ta hlauh a, ka lawm viau rualin nuam ka ti lo ru hle a, Noeli lah chuan min ngaithei lo riauin ka hre bawk.
Gate lampana midang ho kal chu an hnung deuhah kan zui a, rei lo teah Peka ten min lo tlanpel a, ka piah deuhah chuan dingin innghahna tur te an inhrilh a, kan va thlen phei lai pawh chuan Noeli chu a ṭhu tum deuh bur a, Awmpuia a rawn melh dan chu a dang riau a, a huat hmel tlatin ka hre pek a, ka awm ve vang zawk em mawni.
An tlan chhuah leh hnu chuan Awmpuia chu ka zawt a, "Noeli kha engti zia nge a, a thinrim deuh tlatin ka hria" ka tih chuan, "I thik vang emaw a ti aniang" a lo ti mauh mai a, a awihawm loh lutuk chu nuihzat lamah a kal.
"Amah ka ngaihpawimawh vang zawk a lawm kal ka tum, chutiang thik lam engmah a awm lo" ka ti hluai a, "Nia, i kal ve na tur chu a nia lawm" a ti leh mai a, sawi zui vak dan pawh ka hre lo, kal lo zawk ila a ṭha angem tih te ka ngaihtuah leh hnuhnawh.
"Ka kal lo mai dawn em ni?" ka tih chuan, "Ka buaipui deuh kha a phut dawn a, i awm laichuan a duh vak ka ring lo, a inthlahrung ve ang" a ti leh a, a dik ve tho mai, mi a vengthawng ve tawh a; mahse, Awmpuia laka lungawi loh phah nan a hmang tlat a, ka awm ve chu a ṭha dawn lo riauin ka hria.
"Anih chuan, nangmahin kal mai rawh, chanchin min lo hrilh ve dawn nia" zangkhai deuhin ka ti a, lungawi vak lo mahila ṭhian tih tur a hlen chu ka duhpui zawk a, ani pawn min vengthawng ve dawn thoin ka hria, Noeli nen kan inngeih lo ṭhin lutuk khan thil a ti harsa zo a, han pawh luih viau theih pawh a ni rih lo.
"I thinrim em..?" thutak deuh a tih chuan ka nuih var var a, "Kal mai mai teh" tih pahin ka kuai kun a, a beng bulah "Nghet deuh deuh khan kuah lo la" ka han ti fiamthu zui a, a nui ve suk suk tawh.
Gate aṭangin ka let san a, Mawitei canteen lut tur chu ka va um thuai bawk. Kimkimin ka kal ve loh chhan min lo zawh chuan, "An ṭhian ho khan an leng tawk chiah a" pangngai deuhin ka ti a, "Zothana bike a awm lo em ni?" a tih chuan ka nui ringawt a, chutih laichuan Zothana pawh a lo lut ve chiah a, "Nu-i chu tinge i kal ve lo a?" a rawn ti ve leh a; mahse, ka chhan hmain Mawitein min lo ṭawng khalh a.
"Noelin a duh teuh lo e a, nichinah pawh an ṭawng ka hre vek, Awmpuian 'Rintei nghak lawk ang u' a tia, Noeli khan 'A lo kal ve kher a ngai lo, a awm ve chuan biak ṭhat ngam pawh i ni ngai hleinem' a ti anih kha, an huphurh em mai che, kal duh reng reng suh" a ti hmarh hmarh a, a thil sawi chu class aṭanga kan chhuah hma kha a nih hmel.
Thil eipahin ka ngaihtuah neuh neuh a, kan hriat ve miah loh pawh hian mi pawi sawi hi a lo awl dawnin ka hria. Kei phei chu thil zep thiam lo leh ka lungawi lohna pawh tilang nghal mai ṭhin ka ni a, mizinga khawsak dan hi thiam a lo ngai hlein ka hre bawk. Ka ṭhiante pahnih chuan Noeli te ṭhian ho chu an rel bawrh bawrh a, kei erawh a pa kha engtin nge a awm ang, boral ta se Noelin a tawrh dan tur te ka lo ngaihtuah a, a lo boral anih chuan Awmpuia pawn a zui haw a ngaih ka ring.
Chawhnu lamah chuan period hnih chiah class kan nei a, compulsory class anih vangin kan tam a, note lain ka lo ṭang ve khawp mai. Prof-in a pawimawh a sawi te pawh ka lo chhinchhiah thlap a, Awmpuia chu a lawmthiam leh khawp ang. Chutia Note la a ka buai laitak chuan hnung lama ṭawng thawm chu ka hre pha a, ka hming an sawi vanga hre fuh viau ka ni.
"A bialpain a hrilh nasa thei lutuka, Miss Mazarin a khak hlak a lawm, a zak ve ngawt ang chu" tih angreng an sawi a, ka hawi chhoh rualin engmah sawi lo ang hlauhin an awm a, tu te nge an hming pawh ka hre hlawm lo.
Mawitei leh Kimkimi lah chuan ban rualin min lo kalsan daih a, an hmanhmawh nge min hrechang lo zawk ni, hei tak hi kan inkawm tam loh phah chhan pawh a ni ṭhin, Awmpuia a awm loh hi chuan ka mal leh tlat zel a, ka ṭhiante pahnih hi kawp chawt theih chi an nih loh vang a ni.
Awmpuia chu a la reh vang vang a, in ka thlen hnua ka call chuan a chhang thei lo a, Peksanga pawn a chhang thei chuang lo. Ngaihṭha lo deuhin eirawng ka bawl a, a khat tawkin phone chu ka en leh ṭhin a, zanriah eidawn tawh ah pawh engmah message leh call ka dawng lo a, Noeli pa chu a boral ta anih te ka ring rum rum tawh. Awmpuia bulah khan chanchin min hrilh turin ka ti a, engmah a rawn sawi bawk si lo.
Zanriah eikhamah ka call leh a, phone chu a tlang thei miah lo a, a khat tawkin ka call deuh reng. Dar 10 vela ka call chuan a tlang a, mahse a chhang lo. Peksanga bawk chu ka call leh a, a rawn chhang thei ta hlauh a, "Eng nge chanchin, Awmpuian call a chhang thei lo" ka ti hmasa ber a, "A bag ka ak haw a, a chhungah a phone a lo awm anih hi, hei ka charge sak mek" a rawn ti lang lang a, eng nge a awmzia ni ngai.
"Khawiah nge amah?" ka tih chuan, "E le, a zui ve ang chu, Noeli pa kha a boral a lawm" a rawn ti ta mai a, min ti hamhaih takzet.
"Dar engzatah nge a boral?" ka tih chuan "Dar 3 vel kha ania, a rawn hrilh lo che elaw; a buai ve lutuk a, a phone ka ak haw daih bawk sia, nakinah phone dangin a rawn be mai ang che" a ti zung zung a, Noeli phone number chu ka nei a; mahse, biak chi ni pawhin ka hre lo, a sarhu lai anih bakah min lo be tui lo maithei.
A tuk inrinni anih vangin men rei ka zuam deuh bawk a, Awmpuia min lo call hun chu ka nghak ngar ngar a, an thleng tawh ang em tiin rilru ka lo seng buai ve hle ringawt. Dar 1 a pellh hnuah pawh call engmah ka la dawng lo a, phone hman tur a hmu remchang lo nge ka number a hre lo zawk ni ang tiin ka inzawt leh a, Noeli chu rilruin a hre ru rauh rauh thung. Mahse, a thil tih ka hria a, a ṭhiannu pa a boral miau a, a zui ngei ngei a ngai tih ka hre bawk. Remchang a hmuh chuan min lo call em em ang ka ti rilru a, ngaih tih ṭhat loh emaw, lo phili chiam chu dikin ka hre lo, amah pawh a lo buai viau zawk maithei a ni.
Ka muhil thei lo chuan tukverh hawngin pawna ruah sur chu ka thlir a, zai ngaihthlak pahin ngaihtuahna ka kawm melh melh a, ka mut dawn meuh chuan zing lam dar 4 a ri thuak tawh. Ka mutui khawp mai a; mahse, ka harh leh chuan ka hrawk a thip hlur a, dairiala ka awm rei vang aniang.
Chhun lamah pawh vawt tiin ka khur hlak hlak reng a, insuk pawh ka peih ta rih lo. Ka phone ka en chuan number hriat loh aṭangin Missed call a lo awm a, ka call let chuan naupangte hian a lo chhang a, Awmpuia a nih ka rin tehlul nen phone chhangtu chuan a hming chauh min hrilh thei a, 'Anu a awm lo' a tih zel avangin han zawh hleihtheih pawh a ni lo.
Zanlamah chuan ka pik ta hle a, ka damdawi ei lah chu ka rui aniang ka muhil hma khawp a, zinga ka harh chuan number hriat loh aṭang bawkin missed call pathum a lo awm a, ka chhang thei lo chu ka inthiam lo ru khawp mai. Chung number te chu ka call let vek a, an rawn bangbo thei khawp a, ka tan pawh a zahthlak lek lek. Mahse, a tawp bera ka call chuan "Lalpuia khan a rawn call a ni lo maw?" a rawn ti ta hlauh a, "Awmpuia a ni em?" ka ti let ve vat a, "Aw ni e, a patea ka nia" a rawn ti ta a, thil dang chu ka sawi zawm ngam lo va, ka mut hilh lai anih thu leh lo call leh mai tura lo hrilh turin ka chah thung.
Sunday tukah ka khua a sik hluah mai a, inkhawm pawh ka peih ta lo, hritlang hi ka kai zen zen lo a, ka kai tawh vek hi chuan ka la na thei hle a, khum betin ka na ngei ngei ṭhin. Awmpuia call chhan theih loh ka hlauh avangin phone chu ka ngaichang deuh reng a, unaunu nen lah hian kan ringtone a in ang a, a phone a ri zing bawk si a, min ti phawk leh hru zel.
Noeli ka call tawh mai dawn em mawni ka tih rauh rauh laiin a rawn ri veleh ta hram a, ka chhang chiah chu thawk a rawn la hluai a, "Biak i va har ve" a ti tawl bawk a, "Nang pawh" ka lo ti vat, ka aw chhang chu a rawn hre rang khawp a, "I hritlang elaw, damdawi i ei em?" a ti leh zat a, ka ngaih hman zia pawh a hriat ka ring.
Damdawi ka ei tawh thu ka hrilh hnu chuan "Ka phone kha bag ah ka lo dah daih pek a, a zia lo tak tak a ni" a rawn ti nuah nuah a, Pekan a lo chhan thu te hrilhin Noeli eng nge a an ka zawt a, a sawi danah chuan a tuar thiam lo viau anih hmel. Thildang zawh leh ka tum laichuan "Ka nu i be duh em, hei a lo ngaithla ve reng a" a rawn ti ta mai a, ka ṭhu chhuak rang khawp mai.
Rei vak loah nutling aw sin deuh hian "Hello" a rawn ti a, "I dam em Nu Chhuante?" ka lo ti var a, "Dam ṭha rih e, i va hritlang awm ve" a rawn tih chuan ka nui var var a, a aw chu ngainatawm tak a ni, a zaidam hle ang tih a rin theih.
"Tunge a hming khah?" tiin a fapa chu a zawt a, "Rinsangpuii, Rinte ti rawh" Awmpuian a lo tih ri chu ka hria.
"Ka be thiam vak hleinem, nangman bia la ka lo ngaithla ang" a ti zui a, "Be mai mai rawh, hmelṭha ka ti lutuk che ti la" Awmpuian a tih chuan ka lo nui kar kar a, chumi hnuah "Rinte, sawhthing tui a ṭha aw, tuilum nen in rawh" a rawn ti a, kei pawh chu ka khawr ṭut a, "Aw le" ti a chhan bak chu han biak dan vak pawh ka hre lo.
"Lo zin ve ta che, christmas te rawn hmang la" a tih chuan "Lo zin chu a chakawm khawp mai" ka ti ṭha ve mai a, "Lo zin ngei ngei rawh, i hmel pawh kan hmu ve chak a lawm" a rawn ti leh a, a nui pahin ka hria.
"Lo zin chu ka chak lutuk a lawm; mahse, Awmpuia khan a phal lo va" ka ti fiamthu a, "Eng ngati nge a phal loh a, i phal lo em n?" tiin a fapa chu a zawt zui a, "Mikhual mutna a awm lo a ti tlat a lawm" fiamthu bawka ka tih leh chuan, "Aw, a khum a awm reng a lawm, ani te chu ṭhutthlengah pawh a mu thei reng a lawm" a rawn ti hlut a, an nufa chuan a phun sar sar a, a nu zawk chu a nui leh ṭhin a, a nuam ve takzet.
"Nangman be tawh rawh" an intih leh hnuah Awmpuian a lo chhang a, "I lo zin hunah chuan i awm hlen ang chu" a rawn ti ve ngei a, "Min lo hruai la" ka ti erawh "Nakinah" a ti tlat a, a lai deuhin ka hria. A lo let hun tur ka zawh chuan thawhṭanni a a lo chhuk tur thu a rawn sawi a, ticket pawh a hauh fel tawh anih hmel. Rei deuh kan inbia a, ruang phur motor-a a chuan vanga a ruih nasat thu te, huanah pawh a kal hman loh thu te a rawn sawi a, darkar khat dawn chu kan inbe ve a, phone a kan la inbiak rei ber ṭum a ni.
Thawhṭanni chu ruah a sur cherh cherh a, ka hritlang lah chu a zual zel maiin ka hria. Class pawh awm tluan peih loin chawhhnu ah ka haw a, in ka thlen veleh ka mu nghal thlawp a, ka harh leh chuan Awmpuia pawh a lo thleng tawh a, a message a lo awm va va tawh. Ka khua a sik thu ka va hrilh chuan tuihu a inur turin min lo ti a, kan inbiak zawh hnuah peih lo deuhin ka va in steam a, rei ka ti peih lo nain ka ven phah deuh chuan ka hria.
Chumi kar chu class ka kal mumal meuh lo, Awmpuia nen pawh kan inhmu khat a, zan lamah hna a thawh vangin a lo leng hman bik lo a ni. 2nd internal pawh zir mumal lo deuhin ka tlingtla ve a, test hmasa ah khan ka ti ṭha zawk mahin ka hria, kan tih ṭhatna zawk chu an lak dawn avangin ngaih ṭha deuhin ka awm a; mahse, mak tih deuh ka nei. Kan internal mark an rawn tar chuah chuan Economics ah mark ka hmu chhe hle a, Awmpuia nen kan chhan dan a in an vek laiin kan mark hmuh chu inthlau tak a ni thung.
Miss Mazari vang anih ka rin avangin ka complain duh lo a, min lo tih zah leh ka hlauh vang a ni. Mawitei leh Kimkimin Complain ngei ngei turin min duh a, "I paper tal en dil rawh, Prof dang bulah sawi bawk la" an ti nain ka ngam chuang lo, a chhan chu ka thiam leh thiam loh min lo zawh ka hlau tlat a, Awmpuia paper nen an enkawp ka hlau bawk.
Chuta ṭang chuan lehkha ka zir ngawrh sawt a, thiam thei lo viau mahila zir tam chuan awmzia a lo nei khawp mai. Exam pangngai ah chuan Awmpuia ring lo a, mahni thiamna ngeia pass ka tum a, ka hming chhiatna thaibo ka tum ruh hle bawk. Chutih laiin buaina dang ka nei leh a, external exam dawnah hian attendance a tling te chauhin exam form an thehlut thei ṭhin a; mahse, attendance ah chuan ka lo tling hauh lo mai a, ka damloh chhung kha kar khat vel a ni a, tlak phah na tur khawp chu a ni lo, tu emaw thil ti thei tak a inrawlh anih ka ring.
(End of chapter - 13)
Comments
Post a Comment