BLUE BAYOU
by Ahmangaihi violette khiangte
Chapter - 14
Tlai lam dar 3 a ri dawn tawh a, office building kawtah ka ṭhiante pahnih leh Awmpuia nen kan ding ho a, ka attendance complain tum a kal kan ni. Corridor ah chuan zirlai ṭhenkhat pawh an lo awm ve nual a, kei chauh chu rilru hah ka ni bik lo. Ka bula mi te pawh chu an rilru a buai hmel hle a, complain tum an tam avangin kan lut thei mai bik si lo a, kei phei chu ka zam ru takzet.
"Noeli pawh a tla ve a; mahse, ani chuan Principal a hmu ang, a pa borala a haw vang kha ania, a exam theih mai ka ring" Awmpuian a tih chuan "Vawiinah a complain ve dawn em, Principal chu hmuh ve chi nge?" ka lo ti zung zung a.
"Nang chu Professor te biak a ngai ang, i kal loh ni vel i check tir anga, damlohna vang tho ania, an hrethiam lutuk ang che" a tih chuan ka inngaihtuah let vang vang a. Nu Hlimi damdawiina ka awmpui laikhan ka chawl bawk si a, khangte pawh kha sawi tel a ngaiin ka hria.
"Miss Mazari chu nangman biak sak mai la, in innel tho a lawm" Mawitein a lo tih chuan Awmpuia lam chu ka hawi leh vat a, "Kan tum chhin dawn nia" a tih chuan ka awm a nuam deuh a; mahse, remchang la te pawh ka ang lek lekin ka hria a, rilru a nuam duh lo khawp mai.
"Rinte HOD hnenah kal hmasa lo zawk rawh, subject tina i attendance clear hmasak a ṭha ang, chumi hnuah HOD chu hmu chauh la, a awlsam phah zawk ka ring" Kimkimin a lo tih chuan ngaihdan ṭha tak a ni. Education lama kan Prof te an fel a, an ni chuan min lo hriatthiam mai ka ring a, va hmuh hmasak chu ṭhain ka hre bawk.
Chutih laichuan Noeli te ṭhian ho an lo kal a, "Awmpui, Principal room ah min lo kalpui teh" zam aw deuh hian a rawn ti a, "Va kalpui rawh, Sir Mafaka ka lo va hmu ang" ka lo ti ve vat a, "Min lo nghak dawn nia" a tih hnuah Noeli nen chuan an inzui phei a, an kal liam veleh Faculty room lam chu kan pan a, ka ṭhiante pahnihin min zui bawk.
Sir Mafaka dawhkan bulah mipa ṭhenkhat hi an lo ding a, Jerry-a te ho an ni. Peksanga lo phei tur nen kan intawk hlawl bawk a, "I sawifel thei em?" kan lo tih chuan a nui deuh vur vur a, "Fel diam tawh e, va sawi ve ru" a lo ti var a, Peka hian class a kal chhe thei khawp a; mahse, a tlin loh chang pawhin ani chu a exam thei zel thung a, a chhan pawh inhlawh chawpa college kal a ni a, Professor te hian a hrethiamin an duhsak em em ṭhin.
Sir Mafaka dawhkan bul kan thlen chuan an lo ṭawng bawrh bawrh a, engmah kan la sawi ve ngam rih lo. An ṭawng chu ngawirengin kan ngaithla a, Sir chuan "Prof dangte va be phawt ula, an niin an rem tih chuan ka lo clear dawn nia" ngaihsam hmel zet hian a ti a, mipa ho lah chuan "Min tih fel sak phawt rawh, Sir Mamuana bulah chuan 'Sir Mafaka pawn min tih sak' kan ti thei dawn zawk a lawm" an ti ve tlat a, Sir Mafaka lah chuan nui hui chungin a melh kual a, "Va kal phawt rawh u" a ti deuh tlat a, chutiang tho a min tih ve ka rin avangin kal leh mai te ka duh rum rum a; mahse, ka lam a rawn hawi tak avangin ka ding ve rih a, zam a awl duh khawp mai.
"Rinte, in tla ve em ni?" a tih chuan mak ti hmel ka hmuin ka hria.
"Aw, tla ve a, ka damloh laia ka chawlh vang kha aniang" ka tih chuan a nur nang a, chutah Register chu keuin ka hming a zawng kual a, ka kal loh zat leh ka kal loh ni te a rawn sawi fak fak a, a sawi laichuan a chhan ka lo sawi ve zung zung bawk. Nu Hlimi damdawiina ka awmpui thu te, kan khua a ka haw zawk thu te ka sawi a, register a khup hnu chuan min rawn en vung vung a, "Professor dangte i be tawh em, an clear theih chuan ka thei ve mai ang" a ti a, ka hnual rawih mai.
"Sir, clear sak hram teh, nangin i phal chuan midang pawn an aw sak ve mai ang" Kimkimin a lo ti ve hlut a, "Nia sir, please-in" ka lo ti ve ngial a. Min thlek vang vang hnuah "Hnar hi in har ṭhin si" tih pahin register chu a keu a, engthil emaw hi a thai melh melh a, lawmthu kan lo hrilh mawlh mawlh. Mawitei phei chuan a lo fak der luam a, "I fel ber, i class a nuam ber bawk" te a lo tia, sir chu a lawm ve hmel khawp mai.
Pawna kan chhuah chuan Awmpuia te an lo phei ve mek a, an nuih danah an ni pawh an va hlawhtling anih ka ring. "Engtin nge a lo tih?" Awmpuian a rawn tih chuan "Education chu kan ti fel, Political science kan la kal lo" ka lo ti vat a, thaw huai hmel a pu. Noeli lam ka va hawi chuan "Kei chu a fel nghal vek, ka Mark hmuh dan te min zawt a" zangkhai deuh hian a ti a, ani zawng an tih tlak phal loh tur zinga mi a ni, lehkha a thiam thei a, top 10 ah a lang ve ngei ngei ṭhin.
Polscience lam kan la luh theih loh avangin Economics professor te hmuh kan tum a, Compulsory class hi chu a dang kan tih fel theih chuan fel chiang sa a ngaih a ni a, dil hran vak pawh an ngaih ka ring lo. Awmpuia min kalpui dawn avangin ka ṭhiante chu min hawsan mai turin ka hrilh a, an kal hnuah Sir Tluanga va hmu turin kan inzui phei a; mahse, Sir Tluanga lo chhuak tur chiah nen kan intawk a, "Miss Mazari dil rawh u" a lo ti tlat a, Miss Mazari lah chu a lo haw daih tawh a, tih ngaihna a awm rih lo.
"Vawiinah Pol science clear leh ila, Miss Mazari chu naktukah kan hmu mai dawn nia" Awmpuian a tih chuan ka hnial lem lo. Midang ho zingah chuan kan va ding ve reng a, a indawt te tein an lut a, an va thang rei thei khawp a, Sir Sangtean a lo hau hmasa anih ka ring.
Dar 3 pelh feah kan lut ve thei chauh a, Sir Sangtean min lo hmu chu "Pa-a..i rawn sawi pui dawn em ni?" a lo ti kher a, a nui bawk si lo a, lo sawi hmasak ngam pawh a ni lo.
"Rinsangpuii hi i kal chhe hle mai a" tih bul bul pahin Register a keu a, "I tlak vawikhatna a ni em?" a rawn tih chuan ka lo bu sawk sawk a, Awmpuia lo inrawlhin ka damloh thu leh chhungkaw lamah buaina ka tawh thu te a lo sawi a, a sawi bak chu lo ve tur ka hre lo. "Insawipui hi ngai ka ti lem lo ania" Sir-in a lo tih chuan kan ngawi dun ran a, "Lo va chhuak rawh" Awmpuia lam hawi chuan a ti leh nghat a, "Pawnah ka lo awm ang" Awmpuian a tih pawh chuan ka chhang lo a, ka kimki dak ringawt.
"In inzui reng mai hian ka hria a, Lalawmpuia khitah a awm laiin nang erawh ṭan i ngai khawp mai, lehkhazir lai hi chuan ngaihzawng lamah rilru zawng zawng pek a fuh lo ania, hmeichhia phei chu in dinhmun a ṭha lo, rilru nei fea awm in ngai, rei deuh inkawp pawh hi an inṭhen leh chawk tih hriat tur aw, ṭha deuhin zir la, result ṭha deuh ka lo beisei ang che" a tih chuan lawm tak ka ni, a thil sawi erawh a zakthlak ru viau a; mahse, min clear sak dawn tih ka hriat vangin ka lawm em em thung.
Pawna ka va chhuak chu hlauhthawn hmel deuhin min lo en a, "Min hau na lo lutuk" tih zawng ka sawi, a lo nui var var a, "Kan haw thei anih chu" tih leh ka dara min kuah a rual a, zirlai ṭhenkhat erawh an clear sak ve thei lo aniang an hmel a ngui hlawm hle a, hmeichhe pakhat phei chu a ṭap deuh pur a, ka khawngaih reuh khawp mai.
"Naktuk chu kal hma ila, firsf period hmain Miss Mazari chu kan hmu dawn nia" a tih chuan ka lo hnial a, "Keimah a hmuh a ṭha zawkin ka hria, insawipui kha a lawm loh a hlauhawm" ka ti a, anih na takah chuan Awmpuia hman ṭangkai chu ka hreh vang a ni, chu loah a lo ngaizawng em tih ka chiang lo chungin rinhlelhna ka nei tlat a, chutiang anih teh chuan kan kal dun chu min lawm hauh lo ang, a thin kan ti ur zawk thei tlat.
"Nangmahin i kal ngam ang maw?"
"Ngam e, ka hlau hran hleinem"
"I sawifel theih mai dawn hi, kar leh lamah daih a lawm form fill up tur, i tih fel hman loh leh Principal kan hmu ve dawn nia" a tih chuan ngaih a ṭha ve takzet tawh. Taxi lain kan haw rual a, kei ka chhuk hmasa zawk a, ka chhungte chu la hrilh ve loh a ṭhain ka hria, nikhatni ah ka ti fel hman duak a, hriattir ve kher lo a ka chinfel theih ka ring a, ka pa phei chu hrilh chi pawh a ni lo. Exam fee pawh U Lizzy kawr ka zawrh aṭanga ka hlep kha ka la dah ṭha a, hmanni deuha Nu Hlimi a lo thawn kha ka la la chhuak lo bawk a, pawisa lamah chuan harsatna ka nei lo turah ka ngai.
Zanriah eikham aṭangin lehkha ka zir ve malh malh a, U Lizzy'n inleng a neih avangin zir tui a har khawp mai, a khat tawkin an ri leh huk ṭhin a, Nu Hlimin a khak deuh reng bawk. Awmpuian a pawimawh tur min lo thawn te chu ka bih kual thuak thuak a, hetiang em em hian ka zirlaiah ṭhahnem ka la ngaih awm ka hre lo, Miss Mazarin min tih zah ni aṭang khan lehkhathiam nih ve ka chak a, Miss Mazari mak tih tur khawpa result ṭha neih pawh ka duh, chu mai ni loin ka zirlai pui te hmuhah ngei pawh. An mi ngaihdan kha a chhe tawpkhawk a, college ka kal chhung ngei hian min ngaihdan kha thlak tir ka duh a ni; mahse, chutiang tur chuan ka exam theih ngei ngei a ngai.
A tukah chuan hma deuhah college ka thleng a, Prof kal pawh an la awm mang lo. Canteen ah ṭhu chungin Miss Mazari ka lo chang a, ka insawifiah dan tur te ka ngaihtuah pah bawk a, thaw a veng lo ru khawp mai. Awmpuia lo thleng lah chu a ṭhianten thil tih puiah an lo sawm a, "Va kal rawh, Miss Mazari ka nghak dawn" ka tih vangin min kalsan a, Miss chu a lo tlai dawn aniang Fisrt hour ah pawh a la rawn thleng lo.
Class ah pawh lut loin ka lo nghak ngat ngat a, a lo thlen chuan dar 10 a pel duai tawh. A scooty in a rawn inkhalh thla bauh bauh a, faculty ho garage lama a tlan lut chu ka va umzui thuai a, a lan phakna ka va thlen chuan phone in tu emaw a bia a, a nui kar kar a, min rawn hmu ve chuan ka hria. Biak tum zeta ka lo ding chu min melh thuak hnuah min kalpel a, "Miss" ka tih pawh chu a hre lo aniang ṭawng mawlh mawlh chungin office ah a lut a, zam tawh sa nen min ti zam lehzual.
Kawngkhar bulah dingin thawk ka han la vang vang phawt a, chumi hnuah zam leh inthlahrung deuh chungin ka pen lut a, Miss Mazari dawhkan lam ka pan laichuan phone a lo la hmang a, min en chungin a ṭhu awn dar dar bawk. A bul ka thleng chiah chu zaizirin ṭhutna min kawhhmuh a, phone chu dah tang e pawh a ti chuang lo, english leh mizo ṭawng inpawlh hian tu emaw a bia a, a nui har har reng.
Ka hnunglam ka va hawi chuan Sir Sangtea leh Jerry a inbe lai chu ka va hmu a, attendance chungchang bawk anih kha ring. Miss Mazarin Phone a dah takah chuan han sawi mai ka tum a; mahse, sir Sangtea a rawn au deuh lung lung a, "Tun ṭum chu tla an tam lutuka, min ti buai hle mai, ṭhenkhat phei hi chu clear sak chi pawh an ni lo, a hun laiin an ngaipawimawh lo lutuka, a hnuah an phi leh chung zel lawi a, tlak phu hi chu an awm ve anih hi, ka ren vak duh lo mai" a tih chuan "Ka ti tla ṭeuh mai, exam pawh ni se an fail tho ang tih tur te an ni hlawm a" Prof pakhatin a lo ti ve bawk a, an sawi zui bawrh bawrh a, Miss Mazarin "Kei chu ka strict a, min hlau bawk a, kal ṭha lo vak an awm lo" a tih chuan chil ka lem ri khalh a, ka khur ru deuhin ka hria.
Chutah ka lam rawn hawiin "Eng nge i duh a?" a rawn ti a, a mitmeng fin hmel lutuk chuan min melh ran bawk.
"Eng lo, Miss...Attendance kha.." ka han ti dek dek chu "Complain hi chu tum buai duh suh u, sawisel tur awm lo khawpin ka register hi a felfai ania, complain hi ka remti ngai reng reng lo" min tih khum nek a, sawi leh pawh inthlahrun awm duh tak a ni.
"Min ensak leh hram la, ka damloh ṭum bak chu ka chawl miah lo asin" ka tih lah chuan min melh rum hlur a; mahse, ka chance neih chhun anih vangin hlawhchham thiang ka ni lo tih ka inhria a, khawngaih dil pawh ka hreh hek lo.
"Hmanni deuh khan ka damlo a, a bak chu ka kal ṭha lutuk, Prof dang te pawn min clear sak tawh a..." tiin ngenngawl zetin ka melh a, "Please in min lo clear sak hram teh" khawngaihthlak thei ang ber turin ka ti bawk. Mahse, min khawngaih vak lo aniang, "A complain theih loh, ṭum dangah pawh hetiang hi ka ti ve ngai lo, in Prof dang ten an lo ti anih pawhin Economics lam chuan kan ti ve ngai lo" a ti deuh hmak a, min chhang beidawng chiang khawp mai.
"Exam pawh ni la i pass dawn chuang em mawni, Lalawmpuia bul hnaiah kan ṭhuttir dawn tawh hleinem che" a tih phei chuan min vilh ngut ngut, engmah pawh sawi tawh loin ka tho vut a, Sir Tluanga lo lutin "I lo complain dawn em ni?" a tih pawh chuan "Aih" tih leh pawn lam pan ka rual a, ka thaw a hahin ka ṭah a chhuak hluah hluah. Classroom lam pawh pan tawh loin gate lam ka pan a, ka mi tawh te pawh chu tute nge an nih ka hre lo, ka taksa chu a khur dar dar a, ka khawhmuh te chu a fiah loin ka beng a kiu vung vung bawk.
Gate bul ka thlen chuan ban phenah ka va ding ringawt a, van lam ka hawiin thawk ka vang vang a, ka bing chuk chuk mai. Ka exam thei dawn lo, engtin nge ka tih ang, ka exam ve lo anih chuan back paper ka nei dawn a, 6th semester a ka clear loh phei chuan ka graduate ve thei dawn lo, chu mawlh chu, Awmpuian min graduate san mai ang, midangte pawn....awi aw.....
Thawk lehkhatah ka thinphu a rawn rang chiam a, thawk har khawpin ka awmah min hnawh tlat lawi a, ka insum nasat lutuk vang aniang. Ka awm chu na deuh deuhin ka han chum a, chutih laia zirlai lo chhukthla ho lah chuan min melh hrek hrek a, engtia awm tur nge pawh ka hre tawh lo. Tih ngaihna hre lo zetin College lam chu ka thlir a, class a va ṭhut leh pawh ka hreh tawh. Ka ṭhiante emaw Awmpuia hmel hmuh tur an awm lo a, khawiah nge an awm takngial pawh ka hre lo.
Awmpuia chu ka call a, a lak theih loh vangin Peksanga ka call leh a, Awmpuia chu SU room ah a awm thu a lo sawi a, a phone a silent anih ka ring. Call tawh lem loin taxi stand lam ka pan a, kawnga ka kal lai te chuan ka thaw a chham lek lek ṭhin a, ka ding leh ringawt ṭhin. Kan khua a ka haw aṭang khan hetiang hian ka awm zeuh zeuh a, ṭah ka insum nasat lutuk vangah ka puh ber. Inah haw a, ṭah bawrh bawrh ka chak, mizinga awm thei pawh ka ni rih lo.
Taxi ka hmuh hmasak berin lain inlam ka pan vang vang a, ka va thlen chuan tumah an awm lo. Ka ṭap lai min hmu tur an awm lo a, ka thawm hre pha pawh an awm lo ang; mahse, a rilru a nat tehlul nen ka ṭap thei lo reng reng, ka ipik churh a, ka thaw lak a sak hle ringawt a, a awmdan chu a hrehawm tih hian a hrilhfiah berin ka ring.
Ka pindana ka va lut te chu ka tha a zawi zo vek a, ngaihtuahna a bing churh reng. Class ka kal ve tawh lo mai ang ka han ti ringawt a; mahse, ka ngai ngam lo, ka ngaihtuah zawng ringawt pawhin ka rilru a na. Chutih laichuan ka Phone a lo ri a, Awmpuia anih vangin ka chhang vat a, "Ka zawng che a, khawiah nge i awm, thil ei a hun asin" a rawn tih chuan ka mittui a luang zung zung tawh.
"Ka haw mai, ka exam thei dawn lo..." ka ti tham ṭiak a, ka hnuk a ulh ṭeuh.
"Miss Mazari chu i hmu tawh em?" a rawn tih chuan, "Aw...a phal lo" ka ti leh halh a, thawk a la ri chu ka hria.
"Lo kal rawh, Principal kan hmu dawn nia" a tih chuan "An phal chuang lo ang, ka core subject ah ka tla a lawm" tiin ka insut hlawp hlawp a, kan inbiak dan min zawh pawh chuan ka chhang hleithei lo. "Miss chu ka lo biak sak ang che, lo lungngai suh" tiin min hnem ve a, a sawi chuan awmzia a neih pawh ka ring lo, Miss khan min haw em a, ka complain takngial pawh a phal loh anih kha.
"Ka lo be leh ang che, i rilru lo ti hah suh" a tih hnuah phone a dah a, che chang loin khumah chuan ka la mu reng a, ngaihtuahna a vak kual nasa khawp mai. Rei vak lo hnuah ka Phone chu a rawn ri leh a, "Miss Mazari chu a lo haw chiah a, naktukah kan be mai dawn nia" a rawn ti a, va hmuh leh chu chak lo tak ka ni, min lo tawng leh hrep duhin ka ring.
Rei deuh chu ka mu a, Nu Hlimi lo haw thawm ka hriat chuan dar 4 a ri thuak tawh. Eirawng ka va bawl sawk sawk a, ka peihfel hnuah ka mu leh daih a, U Lizzy lo haw thawm leh a nu bula bag leina a dil thawm te chu ka hre pha. "Ka inzaina senso ah pawisa khawlsa kan hmang a, hlawh ka la la thei si lo, i exam fee leh Rintei exam fee a ngai dawn a, thil dang engmah leitheih a nih rih lo" Nu Hlimin a tih ri chu ka ngaithla ve reng a, rilru a buai nuai mai. Ka inngaihtuah tluk tluk a, naktukah chuan va kal veleh phawt a ṭhain ka hria, Prof dangte pawh min sawi pui turin ka ti thei a, 2nd semester-a Puipui a tlin loh ṭum pawh khan Sir Mafakan a sawipui a, an tifel thei mai kha a nia, Sir Mafaka chuan min puih ve theih mai ka ring.
Zanriah eilai chuan Nu Hlimin pawisa engzat nge ka mamawh dawn min zawt a, !Ka la hre chiang rih lo" ka ti zawi sep a, Unaunu erawh chuan cheng sang thum lai a dil a, chutiang zat zat chu form fillup man a ni ngai lo, a lam ka va hawi chuan min lo mitmei zuk a, engmah ka sawi ve lo nain hrehawm ka ti deuh riau a, ka chhehvela mite leh ka chunga thil thleng engkim hi palzam har ka ti a ni, engkim hian ka thaw an ti ipik a, awm nuamin min siam lo a ni ber.
Mut dawna Awmpuia nen kan inbiak chuan "Naktukah lo kal hma rawh" a rawn ti a, ka hnial bik lo. Ka tum dan te pawh chu ka hrilh ve a, Sir Mafaka hi chu kan Prof te zinga ka nel ve ber leh zirlai dangte pawhin an ngainat rawn a ni a, Prof te vekin min dil sak anih chuan a dan a dang deuh turah ka ngai.
Zirtawpni a ni a, college ka thlen chuan dar 9 a pel zawt a, Miss Mazari Scooty pawh a lo inhung ran tawh. Sir Mafaka a awm em tih ka va en hmasa a, a lo chhuak dawn aniang register bu keng chungin a tei kual vut vut a, pawna lo nghah mai chu ṭhain ka hria. Step lama ka va phei leh laichuan Peksanga leh Awmpuia te gate aṭanga an lo tlan lut chu ka va hmu a, han koh ka tum zet a; mahse, Sir Mafaka a lo chhuah tak avangin ka inher thuai a, sir chuan min lo hmu ve chiah bawk.
"Class neih a hun e?" zangkai vah a rawn tih chuan "Sir, Attendance kha" ka lo ti vat a.
"A la fel nange, niminah ka clear sak che kha" a hmelah chuan makti hmel a lang a, "Professor dangte i hmu em?" a tih zawm leh zat a.
"Pol science chu ka clear tawh, Eco zawk ania" inthlahrung ru tak ka ni. "E, dil ta che, Miss Mazari hnenah i sawi dawn nia" tih paha min kalpel chu ka um dat dat a, zirlai dang koin lut turin a ti hlawm a, a kal chak lutuka kal rual pui a har khawp mai.
"Complain a phal lo a, min lo sawipui teh" ka ti leh chu thlek meuh hian min en a, a kal muang zui bawk.
"I hmu tawh em ni?"
"Aw, nimin khan hmu a, Economics-ah complain kan phal lo a tia"
"In Miss Mazari hi chu a khirh ania, a thu te hi a duh phian a, tlangval pawhin an ngaihzawn ngam loh hi" tiin a nui phei vur vur a, canteen lam ka va hawi chuan Awmpuia leh Peka lo ding dun chu ka va hmu a, kan lam panin Peka a lo kal mek bawk.
"Min sawi pui la Sir" ka tih leh chuan, "Class la phawt ang, nakinah kan sawi dawn nia" a ti liam leh puat a, "Sawi tak tak rawh aw, tunkar chiah complain na hun a awm ania" ka tih pawh chuan a lo aw zung zung a, a theihnghilh ang tih ka hlau.
Classroom-ah pawh chuan rilru nuam lo deuhin ka awm a, 2nd period chu Political science anih nghal avangin sir chu ka zui chhuak hman dawn lo a, a theihnghilh loh hram ka beisei. A class la zo a chhuak tur chu zah pawh dawn loin ka va au a, "Lo sawi nghal rawh aw, class ka la nei a" ka ti leh a, tuman ka complain hlawhtling lo tih an la hre lo a, chuvanga class ah pawh la ṭhu lui ve ngar ngar ka ni.
"Ka lo sawi dawn nia" Sir chuan a tih vangin ngaihṭha deuhin ka awm a, class zawh veleh va hmuh ka tum bawk. Kimkimi leh Peka lo lut lah chu ka bulah an rawn ṭhu sawt sawt a, Awmpuia erawh a lo luh tlai deuh avangin kan hma lamah a ṭhu a, Noeli te ṭhian ho nen chep deuhin tlar hma ah an inhnawh a, nuam an tih hmel riauin ka hria.
Ka zuk hawi chang pawhin an titi loh leh an nui ho a, ka rilru hahna chu min hriatpui ve awmin a lang lo. Vawikhat chu a rawn hawi zawk a, eng emaw hi a rawn sawi a, a bengchheng leh lutuka ka hre thei lo reng reng. A hnu lawkah Noelin a darah a kuah a, hmeichhe lo kara a ṭhu chu hmuh nuam ka ti lo, a ṭhiante an ni tih chu ka hre teh meuh mai. Mahse, min ngaihthah riauin ka hria a, ka rilru dik loh vang zawk nge ni, chuang bik riaua inhriatna ka nei bawk.
Sir Sangtean Class a rawn la a, attendance complain tur ho chu vawiina tifel ngei ngei turin min hrilh a, "Keichuan ka clear sak vek dawn che u a, ka subject in bat hi ka duh lo tih hria ula, tumah fail lo ang che u" tiin min chah bawk a, zirlai dang an phur tehlul nen kei erawh ka rilru a hah hlui reng a, kal peih loh hrim hrim vanga tla nih loh phei chuan a hrehawm duh lehzual.
Professor chhuah rualin ka tho vat a, tlar hmasa bera Noeli chhuah tum lo ding chu tlan ti tihin ka kalpel a, Awmpuia khan min hmuh leh hmuh loh pawh ka hre lo. Hmanhmawh deuhin Faculty building lam ka pan a, ka thlen chuan kawngka ah ka va dak dek dek a, lut ngam loin ka tawi leh ṭhin. Sir Mafaka chuan phone a hmet mual mual a, a bul lawka Miss te an ṭhut avangin ka zak ve deuh a, ani lah chu a lo hawi chhuak thei bawk si lo.
Ka dah leh laitak chuan Sir Nunpuia lut turin min rawn hmu a, "Eng nge i tih a?" tih leh ka hnunga rawn ben a rual a, a ṭawng ring bawk a, Professor te pawh an lo hawi ṭhap mai. A chhung lam ka va en leh chuan Sir Mafakan min lo hmu ve chiah a, a rawn tho rang hle bawk.
"In miss chu ka va bia a, 'Tumah midang clear sak kan nei bik lo, pakhat kan clear chuan midang pawn an beisei leh vek dawn a a chi loh' a tia nih kha, Principal a zin lawk a, monday-ah a lo kal ang" tih zawng a rawn sawi a, engmah pawh ka zawh leh hmain Miss Rinpuiin a lo ko a, thlang lamah a chhuk daih a, a hrilhhaithlak duh takzet.
Tualzawla ka let leh chuan ni a sa vawl vawl a, kalna lam tur ber pawh ka hre lo. Ding meuhin ka hma zawn chu ka thlir a, ka dang a ro huam a, ka lungphu a muangin ka chawmawlh zo a ni ber. "Rinte.." an rawn tihna lam ka va hawi chuan Kimkimi leh Mawitein Canteen kawt aṭangin ban an rawn vai a, ka kal châk lo takzet. Awmpuia ka zawng ru deuh a, Canteen bulah Noeli te ṭhian ho ṭhu chu ka va hmu a, Awmpuia erawh hmuh tur a awm lo. Peksanga chu gate chhakah ka han hmu a, Zothana te nen zial zuin an ṭhu khawm laih a, haw mai tur nge tiin ka inngaihtuah buai hle tawh.
"Lokal rawh, thil ei ang" an rawn tih leh chuan ka pen uk a; mahse, ka kal châk lo takzet.
"Ka ril a ṭam lo a, lo va ei mai ru" ka ti ta ngawt a.
"Khawiah nge Awmpuia?" an rawn tih pawh chuan dar ka kan ringawt a, an zawng aniang chu an kawi kual vut vut a, ka thaw an ti ipik zo. "Library ah kal lawk ka ngai" tih leh inher ka rual a, Library ka thlen hnuah pawh ka lut leh ta chuang lo a, a sira step zau laiah chuan ṭhuin ka bag ka pawm a, thil ka ngaihtuah kual chiam mai. Class dawt leh pawh awm tawh loh mai ka rilruk a, kan khua a haw rih te ka ngaihtuah a, chu pawh chu chak lo tak ka ni.
Ngaihtuahna a vak kual nasa a, semester pum tawp ka han ba tur chu ka ngaithiam lo, zirlaia ṭhahnem ka ngaih va ber ṭum a ni a, ka dinhmun ngaihtuah lahin ka hrehawm tih a zual, ka nu Hlimi rinchhana zir ka ni ber tawh a, subject hnih khat chauh te chu ni sela a hriatthiam awm ve deuh tur, hetiang anih chuan 6th semester ah pawh ka clear thei lo mai ang a tiin ngaihtuahna ka nei bawk.
Darkar khat dawn ka ṭhut hnuah Awmpuian min lo call a, "I lo chho dawn tawh em, Corridor-ah ka awm" a rawn ti a, "Min luh san mai rawh" ka tih laiin "I Exam thei dawn, miss chu ka be tawh" a rawn ti ta mai a, min ti hamhaih lek lek.
"I bia maw, engtikah?"
"Tun lawk khan, amah pawn a hrilh tho ang che" a tih leh pawh chuan rin har ka la ti fan.
"Engtin nge i biak?" ka ti leh halh a.
"Ka dil sak tawp che, i damloh thu te ka hrilh a" a tih chuan mak ka ti deuh, nimin pawh khan ka damloh thu chu ka hrilh ve reng sia.
"Engtin nge a lo chhan che?"
"A sawi ṭeuh mai, hei class neih a hun ania, lo chho vat rawh, midang pawh an lut tawh" a rawn tih takah chuan hmanhmawh deuhin ka tlan chho a, ka thil hriat chu lawm tur ka nih laiin ngaihtuahna ti buai tlattu a awm a, min ṭhawng deuh pawh a ni maithei, kei leh Sir Mafaka pawn kan sawifel theih loh laia Awmpuian a va sawifel thei chu a mak tlat!?
Min lo nghahna ka thlen chuan chik fahranin ka en a, "Miss chuan eng nge a lo sawi?" ka ti leh tawl a, eng thil emaw ngaihṭhat lohna ka nei a ni.
"Ka lo clear dawn nia a ti, midang tumah hrilh lo turin min ti bawk a, tla an awm nual mai, complain an phal lo hrim hrim a lawm" a tih te chuan awm a nuam lo telh telh.
Rilru nuam lo deuh chungin class-ah kan inzui lut a, anin mipa ho ṭhutna lam a pan a, kei Mawitei te bulah ka ṭhu thung. Engthil emaw hian min mawlh a, a khat tawkin Awmpuia chu ka va thlek leh ringawt ṭhin, a ṭhiante nen an inbe mawlh mawlh a, a nui hmel leh a ṭawnglai te chu ka thlir reng a, ka ṭhianten min biakna pawh ka lo hre lo. "In inhau leh tawh em ni?" Mawitein a rawn ti chu ka lo hawi a heu a, lu ka thing ringawt.
Rei loteah Miss Mazari a lo lut a, Roll call na pawh nei buai tawh loin Lecture a pe nghal mawlh mawlh a, Awmpuia hming lama thil a zawt te chu ka lo enchik khawp a, a han nuih dan te, a melh dan te thlengin ka enchik. Thiam tak maia a zawhna Awmpuian a chhan chuan lawm hmel fahran hian a nuih a, a hnu ah pawh eng emaw hlekah Example atan a hmang a, midang ho chuan duhsak hmel an ti maithei, kei erawh chuan a ngaih melh riauin ka hria, a melh danah chuan ka hai lo. Hmanni deuh aṭang tawh khan mak ka tih turin a awm fo a; mahse, khatih lai kha chuan rin thu mai mai kha a ni a, tunah hi chuan a chiang ta viauin ka hria.
A chhuah dawnah chuan Awmpuia chu Handout xerox tur a pe a, eng emaw sawiin mipa ṭhutna lam chu an hawi a, Awmpuia chu a bu deuh nghat nghat a, midang an thawh tak dualah chuan an hmel ka hmu pha ta lo a, pawnah an inzui chhuakin ka hria. Hmanhmawh deuhin ka inkhunga, ka ṭhiante pawh nghak loin ka kalsan a, pawn ka chhuah chuan step bulah an lo la ding dun a, "Nimin khan lo kalpui tur a lawm, i rawn sawipui kha ka ring sa hrim hrim a" Miss Mazarin a ti ri chu ka hre pha.
"Midang chu i lo sawm dawn nia, pali vel ni ula a tawk ang" a tih leh hnuah Miss chu a kalsawn a, Awmpuia rawn inher chu makti fein ka lo melh a, a nui deuh suk a, "Peka ka'n be lawk anga, ka thlah ang che" tih leh min kalpelh a ruala, ka piah deuh ah Peka nen chuan an va inhmu a, midang lo chhuak thawm a nat deuh avangin eng nge an sawi chu ka hre pha lo.
Ka ngaihtuahna a fim lo, thil ni lo lo ka ngaihtuah, ka rilru a chhe takzet, lawm tur ka nih laiin ka lawm hleithei tlat lo. Lalawmpuia rilru ka hre lo a, thil thleng te pawh hi ka hriatthiam theih piah lam a ni. Amah vang chauhin ka exam thei dawn, chu chu ka ngaihtuah tluk tluk a, ka duh em tih pawh ka chiang tawh lo, rilru a insual buai a, tu emaw chuan ka thinlung pawi a sawi a nih ka ring, ka ṭah a chhuak et et mai.
"I ril a ṭam em?" rawn phei paha a tih chuan ka inhersan hmiah a, "Thil ei phawt ila" a ti leh pawh chu ka chhang lo.
Mahse, Canteen lam a pan avangin ka zui ve zel a, kal paha Question pawimawh a sawi te chu ngawi rengin ka ngaithla a, "Ka xerox sak mai dawn che nge, i text ah i chhinchhiah ang" a tih chuan ka melh ve leh chauh. "Ka ti ve thei a lawm, puih ka ngai lo" ka ti bawl a, ka tum loh deuh ka sawi, ka inngaihtuah fim hman lo reng reng. Ani pawn makti hmel a pu a; mahse, sawifiah erawh ka tum lo, a thiam pawh ka thiam lo ang.
Canteen-a kan lut chu bangkil lam ka pan a, ka ei duh min rawn zawh chuan ka tho leh rang khawp. Ka ei tur chu ka order a, Lassi ka duh em tih min zawhna erawh ṭha deuhin ka chhang a, ka ta tur an siam zawh hmasak avangin ka let san nal nal bawk. A lo phei ve chuan Alu chop min lo laksak a, a rawn ṭhu fel deuh chauh tih ah Noeli te an lo lut a, kan hmaah ah rawn ṭhuin Awmpuia chu an lo be bawrh bawrh a, question pawimawh a tih deuh te an zawt a, inthawn dan tur te sawiin an titi tui khawp mai.
"Sunday ah kan lo kal ang, Question hlui study ang u" Rebekin a tih chuan an phur hmel hlawm khawp a, "Hminghluin eitur tum rawh se, pawisa a ngah ber" tiin an nui bâwk bâwk a, Awmpuia chuan 'Aw' a pawh lem lo a, hnial hmel pawh a pu chuang lo.
"Lo kal tak tak an tum e law?"
"Aniang....i lo kal ve duh em?"
"Duh lo mai, question hlui en te chu a har hleinem" ka lam hawiin a rawn nui suk a, ka rilruah chuan thil dang daih a la awm.
Ka insum thei lo chuan "Miss Mazari nen khan eng nge in sawi dun?" ka ti leh phawng a.
"Nichin khan maw, an inbulah lungrem tur a awm a, mi pali vel inhlawh tur an mamawh a, Peka leh a naute nen kan kal ang chu ka ti..." thil ei mawlh mawlh pahin a ti a, chu erawh ka zawhna chhanna a ni lo.
"A duhsak hle mai che..." ka tih ri chuan mei a nei viau tawh a, a hrethiam lo der nge ni, "A fel ve a lawm.." a ti mai a, a fel a ti chu ka lo helh nasa mai.
"Ka lakah hi chuan englai mahin a fel ngai lo, zirlai dang ho pawn an nel hleinem, i bulah a lo fel bik anih dawn chu" ka ti ram hmak a, ka thil ei chakna a bo zo vek.
"I attendance pawh a clear sak che hi"
"Nangmah a clear sak zawk che aniang" ka nui hak a, kan inmelh ran tawh. "Nimin kha chuan sawina hun takngial pawh min pe duh hleinem, engtin nge awlsam deuha i va sawifel theih le, a mak ka ti deuh?" tih pahin a mitah ka en ran a, a fian a dah hmasa te te. Chutah, ngun deuh hian min lo en a, "Thil eng emaw i lo ngaihtuah a ni maw?" a ti fiah fak a, a ring sual lo khawp mai, ka ngaihtuah thui hman lutuk tlat a ni.
"Thil phut te a lo nei lo maw...?"
"Rinsangpui.."
"A lo be ṭhin che em, i number a nei ti raw...? Aaa.....i duhzawng a ni lo tak, i chhang ṭha ngai lo ang a?" ka sawilai chuan vawiina a inbe lai leh Miss-in a rawn nuih lai kha ka mitthla ah a rawn lang a, ka ner nghal nak.
"I thik miah loh tur i thik ania" nghet cherh chawrh a a tih chuan, "Min thik si a lawm" ka ti ve ngat a, hei hi chu kei ai pawha a hriat chian zawk ka ring.
"Chutiangin mi an ring ringawt ngai lo, thik chhan tur che a nei hleinem" a tih laia a awki chu a dam leh daih a, a insum thei lutuk hi ka haw ṭhin, a bulah hian tumah a rel theih ngai loh a, Noeli leh hmeichhe dang chungchangah pawh khan a ni ziah a, ka lam aṭang lo emaw tih chang pawh ka ngah.
"Nimin a min ṭawngkhum dan i hria em, 'Exam thei pawh ni la kan ṭhut dun tir lo ang che u' min ti a sin, kan inzui hi a ngaimawh tih ka chiang, a hma lawk pawhin a bialpa angin a sawi tawh che ania, class ah min ti zak hrep a, nang a be ṭha huam reng che a, engmah a awm lo pawh ti la ka awih chuang lo, a awmdan hi ka hrethiam vek, i lo ṭan hi ka rilru a na bawk" a mitah ka en kal a, ka hnuk a ulh bawk nen ka thawk a sak hle a, ka duh ang pawh ka sawichhuak thei lo.
Mahse, min chhang loin a ngawi hmuk a, a insum nasat zia chu a hmelah a hmuh theih. Engmah a sawi loh chhan ka hriat chuan thawk ka la hawk a, Noeli te ṭhian hoin min lo ngaithla tih reng ka hre lo, an lam ka va hawi chuan min lo en ṭhap a, chu veleh ka tho thut a, ka bag lain counter ah pawisa ka va pe sawk sawk a, Awmpuia rawn phei chu ka kalsan nal nal bawk.
"Lo ding teh" a tih chuan ka ding chhawt.
Hawi let duh loin ka hnungchhawn tlat a, ka bul a lo thlen rual rualin ka banah a rawn vuan a, gate lamah min pawt kal dawr dawr a, "Min thlah rawh, miin min en ania" ka tih pawh chuan biak loh ang hmak a ni, Zothana lo chhuk tur kan tawk a, "Bro..." hamhaih hmel fe a rawn tih chuan, "Kan hmanhmawh deuh a" tih leh kalpelh a rual a, Zothana chuan min en zui vung vung a, Canteen a awmte pawn min lo thlir chu ka zuk hmu thei.
"Lalawmpui, ding teh, ṭha deuhin sawi ang" ka ti chul tawh, a thinrim vak dawnin ka hria a, minti hlauthawng bawk.
Kawngpui lam pan loin kawngpengah min kai lut a, thingbuk awmna bul kan thlen chuan a ding thut a, ka lamah rawn inherin min en run a, ka ban a vawnna pawh a sen ṭul mai. "I exam theih nan Miss kha ka bia a, a lo clear sak tawh che a, i lawm viau turah ka ngai a sin, inngaihtuah chiang deuh teh aw, engkim hi huat chânin i châng vek mai, thil awm lo i thik thul, ka kham ve tawh ania" a ṭawng chu a ring lo nain chang ṭha bel bawl tak a ni.
"Min clear sak dan kha lawm tur chi a ni em ni, chhan a neih vangin a lawm ka lawm loh, nang lah chuan i ṭan tlat a, hrethiam ve lo ang maiin i awm a, i hriat ve vek tho kha"
"Chhan pawh lo nei se i tan a ṭha zawk a lawm, i exam theih loh aichuan chhan hrang hrang pawh lo nei se eng nge pawi" a vin lutuk chuan thingphu a ti rang dawt dawt a, chu aimah chuan a thil sawi dan chuan min ṭhawng a ni, a lo hai bik tawp lo.
"I hre vek..." tiin ka melh tlawk tlawk a, a lu a tuai vut ringawt.
"Chutiang engmah hriat ka duh lo, ka haider hram hram zawk anih hi"
"Chuti si eng ngati nge 'Thil awm lo i thik' min tih"
"Engtin nge ka tih chuan ang, 'Min ngaizawng a lawm' ka ti dawn em ni, i lawm phah a ngem?"
"Engmah i sawipui theih loh, ka awm nawmna tur takngial pawh sawi tur i nei lo anih kha"
"Nangchuan ka awm nawm lohna tur i sawi ziah thung a lawm, ka kham lo bikin i ring em, ka ning ve hluah hluah tho asin"
"Anih chuan eng ngati nge min ṭhen mai loh, i ning tih ka hriatna a rei tawh lutuk, i duh chuan sawi tawp rawh, keipawn ka ning tawh" ka insum theihna kha a bo zo a ni ber, inṭhen thu ka sawi hmasak hi ka ring ngai lo, mahse, ring takin ka sawi a, chhanna ka duh bawk.
Ka thil sawi chuan a ti hamhaih ve aniang maktih hmel deuhin min en a, "I inchhir leh na tur sawi suh" a ti teh thlawt a, pehhel tur chuang a awm tawh lo.
"Ka tih apiang hi inchhirna tur vek a ni ṭhin,
buaina ka siam che hian ka inchhir a, i ṭhiante ka thik ṭhin pawh kha ka inchhir tawh. Ka rinchhan lutuk che pawh hi ka inchhir a, engkim hi inchhirna tur vek a ni, nang chu a thiam zawk leh dik zawk i ni ziah a; mahse, keimah vang chuan inchhir ve suh, inngaizawng pawh kan ang lo, ṭhian ṭha ang chauh ka ni, min ṭhen i duh a, ngaihzawng neih hi i ning tawh a, i inthlahrun vang chauha min la kawp anih chuan i inchhir zawk ang" hnuk ulh ṭeuh chungin chu thu chu ka hrilh a, ka chelh rei thei dawn lo a ka hriat vang a ni.
"Engtik aṭangin nge inṭhen hi i duh?!" a tih chuan ka ngawi vang vang a, engtik aṭang khan nge ka duh ka hre bik lo, ka â tawh zawk a ni maithei.
"Ih maw, inṭhen hi ka duh ngai lo, ka ngam ngai lo bawk. I tel lo chuan ka khua a har dawn a, ka mal dawn tih pawh ka inhria, Chuvangin i chau tawh chung chung pawh ka chelh lui che a, ṭhen che ka hlau ngawih ngawih ṭhin. Mahse, tunah hi chuan i kianga awm reng chunga khawhar ka hlau tawh zawk a, ka bula i awm reng chunga mal pawh ka hlau" tiin ka rilru dik tak ka hrilh a, kan inkar hi inhremna ang chauha a chhuah ka duh lo, in ning ngawih ngawih chunga inkawp pawh ka duh lo ang, na viau mahila ka laka a danglam tur hi ka phal lo a ni, kan thlen chin hi hriatreng a, ka ngaihtuah let chang pawha hlimpui ka duh, chuvangin hetah hian tawp tawh mai sela, a bak kan rah belh leh anih chuan inchhirna tur dang a awm leh ngei ngei dawn a, pumpelh theih ka inring lo, inrintawkna engmah ka nei lo a ni.
"I sawi zo tawh em?" zawite chang zeta a tih chuan "Mipa zawk i nia, i thu thu ni rawh se" ka ti leh a, ka mittui a luang zung zung mai. Engmah sawi tawh loin min kalpel hmiah a, "Lalawmpui..." ka tih pawh chuan a rawn lehhawi lo a, hre lo ang hmakin a awm. Hmanhmawh deuhin ka va um zui a, College gate bul ka thlen chuan Peksanga lo tlan chhuak tur nen kan intawk a, a hmu em tih ka zawh chuan "Hmu miah lo" tiin min chhang a, ka han hawi kual ngial a, kal bo na hman pawh a la awm si lo a, kawng chhak lamah a chho anih ka ring.
Ka ṭhiante min kohna pawh chhang loin gate lam ka pan leh hlawk hlawk a, taxi stand ah takngial pawh hmuh tur a awm lo. Ka thil sawi kha a lak nat viau pawh ka ring lo a, a chhan pawh inṭhen duh mai tawh ang a ṭawngkam a neih tawh vang a ni.
Zanah chuan kan inbe lo a, a tukah pawh a message emaw call engmah ka dawng lo. Mahse, Pathianni zanah chuan Message min lo thawn a, thu tawi te a ni. "Kan kar thu ka hria a, ka dem hran lo che ania aw, harsa tak chunga thutlukna siam kan nih zia pawh ka hria, i hlim hi ka duh ber a ni a, heti hi chuan kan tuar ve ve a, tawp tawh rawh se" tih zawng a ni.
(End of chapter - 14)
Comments
Post a Comment