BLUE BAYOU (CH - 15) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 15

Zan khawhar, nge ni a keimah zawk? Ka khawvel chu a reh ṭhuap a, titi pui tur takngial pawh an awm lo, ngaihtuahna a chawl thei lo a, mahni ngei pawh inhriatthiam loh chang ka nei a, eng hi nge ka duh ber lah ka chiang thei hek lo. Rilru chuan beisei chhete chu a nei a, ka tan ni loin a tan zawk a ni, duhtak chungin ka thlah a, ngai leh thlahlel ngawih ngawih chungin ka kaltir a ni, chuti chung chuan hlauhthawnna ka la nei cheu a, he tawrhna hi a tawp thei lo ang tih ka hlau.

A message chu vawitam ka chhiar nawn a, kan thlalak te pawh ka hailet zing malh malh viau tawh. Kan inkar chu inlaichinna dangin a thlak tawh dawn tih ka hai lo va, kan pahnih tan erawh a ṭhat zawk ngei ka ring, inngaizawng tam tak te tawp dan anga tawp ka duh lo a, chan hlen ka phal loh vang zawk a ni. A kiangah ka la nui thei anga, tui lo tak chunga kan inbiak a ngai lo bawk ang tiin ka inhnem a, ṭap lo turin ka insum hle bawk.

"Ngaihzawng dang i nei ang em?" ti a ka zawhna chu "Ka theih ka ring lo" tih zawngin min chhang a, "Ṭhian kan ni chhunzawm thei angem?" tih zawhna erawh "Mi hrang i ni dawn hleinem, keimahni kan la ni reng a lawm" tiin min chhang a, lungdam lo viau mahsela a thu rawn sawi chuan ka mittui min dan sak a, thutlukna ṭha tak anih pawh ka ring.

Hmeichhe dangte hian eng tiangin nge an paltlang ṭhin ka hre lo, 'Inṭhen thu' sawi kha a awlsam hle a, a hnu leh lam erawh a khirh fat mai. Rilru leh thinlung lam duh dan a in ang thei lo a, chu tak chu a ni tawrh har ber lai chu. Suangtuahna a tak ni tura duh em em ka nei a, ṭhenkhat erawh mumang mai nise tih ka nei bawk a, keia suangtuahna ve hi zawng hriatthiam a lungawipui a har ṭhin a ni.

Banga sana intar chuan dar 2 a kawk va va tawh a, mut chhuak reng reng a lang thei lo,  ka sûn ni ta berin ka hria. Ka pindan chhung  pawh khawharin ang maiin a ngui a, engkim chu ka mitah a chul a, chhungrila mal intihna a awm leh ṭhin. Rilruin ka han infuih ve bawk a, hetiang thutlukna hi siam lo ta ila kan inhrem tawn reng mai dawn a, maltlat chu hlau lo a, hmachhawn ngam tur tein ka inhrilh mawlh mawlh a, kan thutlukna hian a hma aia inlaichinna ṭha zawk min siam sak sela tiin duhthu ka sam bawk.

Khawvar hnuah rei lote chu ka muhil ve a,  nu Hlimin min lo kaihthawh chuan dar 7 a la ri lo deuh. "Ka ṭhianten vawk an talh a, ka va kal ve lawk ange, eirawng lo bawl la, i u pawh lo kai tho mai rawh" a rawn ti zung zung a, a bazar nghal dawn aniang chu Bag lian deuh a ak a, a chhuah hnua phone ka en chuan Noeli message a lo awm a, "Thil zawh duh che ka nei" tih tlawng a ni.

"Zawt la" ka ti ve mai a, tho chhuakin eirawng ka bawl zui a, phone pawh chu ka en leh mai lo.

Ka awl deuh hnua ka va en chuan "Miss Mazari chungchang insawi kha ka hria a, min lo hrilh chiang teh?" a rawn ti leh reuh a, Awmpuia zawt zawk sela ṭhain ka hria.

"Awmpuia zawt zawk rawh, a sawi thiam zawk ang"

"Message a chhang duh lo, in in hau ti raw?" 

"A la buai aniang, nakinah a hrilh mai ang che" a message dang chu ka chhang duh ta lo a, sawi chhawn leh ka chak lo em a tin a ni, kei aichuan Awmpuian a hrilhfiah thiam zawk ang.

Nileng deuh thawin ka pindanah ka tawm a,  ngaihtuahna lakpen nan lehkha ka zir a, zan lamah pawh rei deuh thlengin ka meng a, phone ka khawih meuh lo. Ka ṭhiante pahnih lah chu an reh tlawk tlawk a, ka pa lah chuti bawk. Ka chanchin ngaihven an awm lo emaw tih turin ka phone chu a ngawi thei a, message takngial pawh ka dawng lo. Pathianni zanah erawh Peksangan min lo text a, "In inṭhen a ni maw?" a rawn ti ve leh a, Awmpuian a hrilh a nih hmel.

"Zawlpala hi a awm dan a ṭha vak lo a" a rawn tih chuan min ti hamhaih deuh a, ka zawt chiang thuai bawk.

"Zanrei deuh thlengin veranda ah a ṭhu a, cigarette bawm khat a zu zo vek, lehkha pawh a zir lo, a inkhawm bang a mu kha a la rawn tho leh miah lo bawk a, in inṭhen anih ka ring mawle" a rawn ti duah a, ka lo beisei loh dan lutuk anih vang aniang ka chaiai deuh a, a damloh phah mai ka hlau.

"Lo ngaihven ṭha rawh aw, a damlo palh hlauh ange, exam laia a damloh chuan a pawi viau ang" ka ti zung zung a, "In inṭhen ti raw?! a rawn ti nawn leh a, "Aw, mahse kan in haw miah lo ania, i ngaih ang kha a ni lo ang" ka ti nawi niaih a, "Eng nge a awmzia?" a tih chuan sawifiah dan pawh ka thiam lo.

"Nakinah i hre mai ang, kai tho tawh rawh, chaw te ei tir la, lo buaipui ṭha rawh" ka ti leh ngawt a, "Inṭhen suh u, inngaizawng ka hmuh tawh ah in la inhmeh ber asin, inbe ṭha leh vat ang che u" ti nuah nuah chungin phone chu a dah a, keilah chu ka awm a nuam lo zui khawp a, a rilru a na ve hle anih ka ring, cigarette zuk chiam te, dam reng chunga mut mai mai te hi Awmpuia tih ngai a ni lo a, Peka sawi danah chuan a damlo hle tih ka hre thei a ni.

Biak ka duh viau a, call chuan sawi tur ka haihchham dawnin ka hria a, message thawnin "Naktukah inbia ila, kan chungchang hi kan sawi ṭha leh dawn nia" ka va ti a, mumal deuha sawi dun kan ngaiin ka hria, ka nawr loh zia te emaw kan tawp hlen na tur a nih loh thu te pawh hrilh ka duh. Message chu a rawn chhang lo a, ka mut dawn thleng pawhin a en lo, rilru nuam lo deuhin ka mut san a, ka harh leh rualin phone ka en hmasa ber a, a message a la awm chuang lo. Ka message erawh a lo en tawh a, chhan ṭul a ti lo anih hmel.

Tiffin ka siam kep a, inngaizawng kan ni tawh lo ringawt a, ani pawn mihrang kan ni dawn lo a ti bawk a, danglam tum vak a ngai loin ka hria. Nidang aiin college ka thleng hma a, canteen kawtah a lo thlen hun nghakin ka ṭhu reng a, ka nghak rei khawp mai. Zirlai dang an lo thleng zut zut a, Awmpuia hmel reng reng hmuh tur a awm lo. First period kan neih avangin ka luhsan a, kawngka lam chu ka melh deuh reng.

Class zawh ruala kan va chhuah chuan Peksanga ka va hmu hlawl a, a lam panin ka pen phei hlawk hlawk a, ani pawh chu a lo thleng ve chiah a nih hmel e. "Khawiah nge Awmpuia?" ka tih chuan a lo ner nang a, "A haw daih" a ti ta mai a, a fiamthu emaw ka ti hman a, mahse "Tukinah a haw thut a lawm, engmah min hrilh lawk bik lo, ka thawh chuan a lo insiam zo vek tawh a, an counter ah ka va thlah a alawm" a tih zawm leh a, min ti hrilhhai takzet.

"A haw chhan a sawi em?"

"Haw lawk ka ngai a tia, engmah a chhan a sawi lo" 

"Kan exam dawn tawh hi..." 

"Nia, keipawn mak ka ti deuh a, a zirlai a ngaih pawimawh tehreng nen..." 

"Keimah vang aniang ti raw?" ka hnuk a ulh ṭun mai, chhan dang a awm ka ring lo, keimah vang a nih ka ring hmiah. 

"Ni kher dawn a mi, a chhungten an lo chah anih ka ring a" a tih chuan ka ring ve hauh lo, chhungkaw lam buaina ni sela a ṭhianpa hi a hrilh ngei ka ring. 

"Biak tum rawh" a tih chuan phone ka phawrh sawk sawk a, ani erawh class nei turin a kal a, canteen lam pan pahin Awmpuia chu ka call a; mahse, Switch off a in ti tlat.

Nilengin rilruah a awm a, ka awm a nuam thei lo, Noeli takngial pawn a haw chhan a hre lo a, Awmpuia chuan kan inkar engmah a hrilh lo anih hmel. Ṭhianṭha a ngah bawk a, a kal lo chu a chhan min zawt an awm reng a, "A haw lawk a, a lo chhuk leh vat ang" tiin ka chhang zel a, an awih ve tho chuan ka hria.

External exam hma hian rei lote class kalna hun kan la nei a, exam na a pawimawh tur chin hlir kan zir tawh ṭhin a, class ṭhenkhatah phei chuan question hlui te kan en ho a, note siam tur a tam hle ṭhin. Awmpuia a kal loh avangin ka theihtawp ka chhuah a, message emaw call in ka han hrilh ve mai ang tiin ṭhahnem ka ngai khawp mai. Tlai ban hnu thlengin a phone chu a switch off a, sawipui tur ka ngah tehlul nen...

Ka ṭhen kha inthiam lohna ka nghah hle tawh a, exam dawn kher a ka ṭhen chu inchhir tak ka ni. Inṭhen duh ngawr ngawr ka ni bik lo a, kan inkar a chhiat a, inhaw taka kan tawp ka hlauh vanga ṭhen ka ni. Hetiang hian a awm dawn tih hre lawk ila chuan ka ṭhen hauh lo ang, a awm dan chuan rilru a ti na zual a, ka thu kha zuk leh a, kan inkar pawh siam ṭhat leh ka duh, kan pahnih tana ṭha ber tur ka duh a, inṭhen hi kan buaina chinfel dan ṭha ber a ni lo tih ka ka hrethiam tawh bawk.

Ka mut dawn thlengin biak ka tum a, a phone chu a la off tlat lawi a, message thawn pawn awmzia a awm lo. A tuk lawkah Exam form kan fillup tawh dawn a, exam lo a tum anih te ka ring rum rum a, chutiang anih teh chuan ka inngaidam thei lo ang. Ka tih ngaihna hre lo chuan Peksanga ka va be leh ngawt ṭhin a, "Exam hmain ka lo chhuk leh ang a tia lawm, ngaihtuah vak duh suh, a lo chhuk hman em em ang" a ti mai zel a, ngaihtuah vak loh chu ka thei lo, Awmpuia mizia ka hrechiang a, ngaihṭha deuha lo awm theih a ni lo.

A phone a on huna a hmuh ah tiin ka note lak te leh question pawimawh te chu ka thawn ṭeuh a, kan rilru ka thlak thu thlengin ka hrilh a, message chu hnukulh ṭeuh chungin ka type bawk. "Inṭhen kha i duh ve anih ka ring a, nang chu ka tel lo pawhin ngaihtuahawm i ni ngai lo a, ṭhian tam tak i nei a, kei ang lo takin hlimpui tur thil i ngah a, lo inṭhen pawh ni ila i rilru a nat ka ring lo a sin. Nang chu i ngawi reng zel a, eng ngati nge i rilru hi i sawi ve mai ṭhin loh le, inṭhen i duh loh thu min hrilh ni la chuan hetiang hian kan awm miah lo ang, keimah chauh ka inngaihtuah bik lo a, i tana ṭha tur hi ka duh ve takzet a sin, ka tihpalh a ni, min ngaidam hram teh, lo haw la, a hma ang khan kan awm leh dawn nia, ka lo nghak ang che" tiin mittui nen a message chu ka type a, mahni indemna hlirin ka khat tawh, engkim hi keimah vang vek a ni.

Zinga ka harh chuan ka message chu a lo en tawh a, chhanna engmah a awm lo. Ka call zui a, vawithum zet ka call ṭhat hnuah pawh a rawn chhang lo a, min be duh lo tih chu chiang tak a ni. A hrehawm zia chu aw, vawikhat mah hetiang hian a la awm ngai lo, ka call a chhang duh loh te, ka message a reply duh lo te chuan inṭhen thu kan sawi ai khan min ti na zawk a, ka thil hlauh ber kha a thleng tain ka hria.

College ka va thleng lah chu Noelin min lo chhuahchhal pang mai a, chanchin a lo hriat tawh vang a ni. "I rilru hi a mak thei ngawt mai, khati khawp khan thikthu i pe chhia a, tunah a ṭhen hmasatu zawkah i ṭang leh a, exam dawnah ber kher lehnghal, Miss Mazari te kha i thik lehnghal a, a duh dawn lo tih hriatsa reng, a kawp ṭhin che pawh a ni chuang si lo, aaa.. i lo hmangaih ve tak tak lo aniang, mahni bak i inngaihtuah lo" min tih khum bawrh bawrh a, insawifiah ka duh viau na a ka indem em avangin sawifiah dan ka thiam lo.

"In inbe tawh em?" ka ti zawi sep a.

"Be tawh, form pawh ka thehluh sak ang" a ti bul hmuk a, chu ringawt pawh chuan min ti hrehawm, ka message khan awmzia pakhat mah a nei lo a, min haw hle anih ka ring.

"Engtik ah nge a lo chhuk dawn a sawi em?" ka ti leh chu min melh rawm a.

"I hriat duh viau te chuan zawt ve la a ni mai a lawm" a ti leh hmak a, ka message a chhan duh loh thu chu ka sawi ngam lo. Form a thehluh tir danah a exam dawn tih chu a hriat tawh a, a haw chhan pawh keimah vang tih a chiang bawk a, chu erawh lung ti zing zualtu mai a ni.

Second period ah exam form chu kan thehlut a, Noeli leh a ṭhiante chu kan hnunglamah an ding a, paper pahnih a keng  chu ka va hmu a, ngaihven loh a har a ni. Chutih laiin pawisa pekna bulah Miss Mazari a lo ṭhu a, min endan lah chuan mei a nei riauin ka hria a, melh pawh ka melh ṭha ngam lo. Ka zawh hnua Mawitei te ka nghah laichuan Noeli ten an lo thehlut ve mek a, "A damlo em ni?" Miss in a tih ri pawh chu ka hre pha. Noeli chuan a ngaithei bik vak lo aniang, "Ka hre lo, engmah min hrilh lo" tiin a kal nghal daih a, Miss chu a hamhaih hmel khawp mai.

Ka ṭhianten an submit zawh hnuah canteen lam kan pan a, kan thleng phei ṭep tih ah Jerry-a ten min lo um pha a, Kimkimi nen kan inkarah tak lo kalin min rawn kuah nghal thawr a, "Thil in ei dawn em, in bulah kan lo ei ve ang aw Nu-i" a ti ham ham a, a kut lah chu ka pawt thla thei mai lo. "Min thlah teh" ka tih lah chuan min kuah nghet sauh sauh a, "Ka lo treat vek ang che u, eng nge kan ei ang?" a la ti ham ham a, ka ṭhian te lah a phur phur ah an lo ṭang a, hnial ka duh tehlul nen.

Canteen thlengin min kuah lut a, dawhkan hmasa ber a ṭhu Noeli te ṭhian ho chuan min lo en duh khawp mai. "Lal Jerry..i kut" ka sawi zawh hma hmain "A hnung berah sawn lo va ṭhu ru, ka lo la vek ang" tih leh min thlah a rual a, a kalsawn nghal daih bawk a, Noeli te lam ka va hawi leh chuan min lo melh no lo hle tawh.

"Kal vat rawh, a chep a nia" Mawitein a rawn tih vangin ka kalsawn thuai a, Noeli te khan min ngai dik lo ang tih ka hlau khawp mai. Ka ṭhutfel hnuah pawh ka va en deuh reng a, Jerry-a lo kal phei chu an lo melh zui nasa hle bawk.

 

Jerry-a a rawn ṭhu fel awrh tih ah lehhawi meuhin Noeli chu a lo ding a, ka lam a lo hawi vang vang mai. Chutah, counter lam panin Lassi no khat a va lam a, a lo let leh pawh chu ka lo la en ve reng a, min be dawn emaw ka tih laiin Jerry zawk chu a rawn au a, "Laljerry, Single thar i chhai nghal e law, Phunṭiha kan ti luai luai mai tur che ania" a rawn ti pek a, a pawi ka tih zia chu aw....

"Tunge single, Rintei maw?" ring leng lawnga Jerryan a tih chuan min melh ṭhup maiin ka hria. Ni e, zirlai dang ho beng a verh a lawm, an bialpa inṭawm chungchang a ni miau a.

"Tualvungi leh Zawlpala te chu thawnthu ah pawh an Happy ending hleinem" nui har har chunga Noelin a tih chuan ka ṭhu kun daih a, nuam ka ti lo takzet. 

"In inṭhen em ni?" ṭhianten an ti nghal hlut a, zawhna zawng zawng zinga ka chhan chak loh ber a ni ngei ang, kan inṭhen thu hi midangin an hriat ka duh lo, kan rilru a khingbai em em a, kan la inpeih lo hle bawk.

 

'Eng nge Noeli sawi kha a awmzia?'

'In inṭhen tak tak em?'

"A kawp che em ni?'

Zawhna hlir a ni, "Aih" ka ti ngawt a, "In inṭhen lo maw?" an tih chuan dawt sawi a har ka ti bawk si, nakinah an la hre vek dawn a, Awmpuia lahin min be duh bawk si lo.

"Min kawp lo; mahse, kan inṭhen ka ring" ka ti leh tawl a, min zawt thui lo sela ka ti. Noeli lam ka va hawi chuan Rebeki nen an lo hawi chho ve chiah a, an inhrilhru sar sar bawk. 

"In inṭhen tak tak lo ang a, a chhan kan hriat a rem em?" Kimkimi a tih chuan "Chhan vak pawh a awm lo, break kan mamawh ve rih a, inhauhna pawh kan nei lo" pangngai thei ang berin ka ti a, a bak sawi erawh ka tum lo, an ni thung chuan zawhna an la ngah hle a, ka ne ne ral a ni ber.

"Chuvang a ni maw vawiinah a lo kal loh, exam form fillup ni a a lo kal lo hi mak ka ti reng a, in inṭhen vang anih dawn chu, vel tak hian a" Mawitein a tih chuan ka ngawi ran a, "I rilru ti na duh miah suh, mipa hi chu an rinawm loh em a ni, midang ṭha deuh i tawng leh mai ang, Awmpuia chu liam tir vang vang rawh" Kimkimin a lo ti ve bawk a, "Ka awm a lawm, ka hnem zo viau ang che"  Jerry an a lo ti phei chu ka melh rum khawp, a tu amah chuan min hnem lo a, thin an ti ur lek lek zawk.

"Keiman a lawm ṭhen, a thiam loh engmah a awm lo, tunlai chu buaina ka ngah lutuk a, zirlai lamah ka tluang lo bawk nen break lawk ka duh a, ani pawh an khua ah a haw a lawm, thil tih tur pawimawh a neih vang ania, exam hmain a lo chhuk leh ang" tiin ka han sawifiah ve luam a, hetia ka sawi chhan hi chu Awmpuia an dem ka duh loh vang a ni a, an demna ṭawngkam khan ka awm a ti nuam lo tlat a ni.

"Ka hrethiam lutuk che, in awmdan hi a hahthlak ru tlat, inṭhen rih kha a pawi lo ang, tikhan a inchhir phah ve ang chu, hmeichhe dang bulah a hlim bik ka ring lo, i hlut zia pawh a hrethiam mai ang, amah vangin Miss Zarin a hau bawk che sia, kei ni ila hman hmanah ka ṭhen tawh ang mawle" Mawitein a tih chuan thawk ka la hluai a, ka thlir dan leh an thlir dan chu in ang lo tak a ni, insawifiah pawn awmzia a nei lo.

"Thlah i ngai em?" Jerryan a tih chuan ka hnial vat a, haw mai ka duh tawh laiin kan semester leh kan junior te pawisa thapin an inkhel dawn a, ka ṭhiante chuan en an ti leh tlat a, thil kan ei zawh hnuah rei lo te chu ka han en pui a, chhuanlam siamin ka haw san thuai bawk.

In ka thlen chuan ka chau ngawih ngawih a, ka taksa lam aichuan ka rilru lam a ni mah zawk. Thaw a ipik a, eng tih tha mah a tho lo. Ka phone chu ka en leh ṭhin a, ka message te chu ka chhiar nawn leh ringawt ṭhin. A chhiar laiin eng ngaihtuahna nge a neih ang le, min chhang letin eng emaw tal rawn sawi sela, keipawn rilru put dan ka thiam ve tur hi a nia. Mahse, min duhna tlem tal a la nei anih chuan min lo biak ngei ka ring a, a ngawih hlen loh hram ka beisei.

Unaunu lo haw chuan eirawng ka lo bawl mek a, "Lehkha zir ka ngai a, min lo awl mai rawh aw, nang chu a la pawimawh lutuk lo bawk a" tiin pindan lam a pan zui a, a zir thawm ka hre zui lo reng reng, rei vak lo hnuah Phone a hmang thawm ka hria a, darkar khat dawn a ṭawng a, a nui uar uar reng bawk. Dar 5 dawna nu Hlimi lo thleng chu a rawn chau khawp a, thingpui te ka lo siam zung zung a, a nu ṭawng thawm a hria aniang Unauni chuan a rawn chhiar ri ta lauh lauh a, Nu Hlimi chu a lawm ve khawp, "I u chu 'i pass chuan scooty ka lei ang che' ka tia, a zir ve lauh lauh mai" tiin a nuisang a, an inbum lai thlir hi ngaiah ka nei ve tain ka hria.

Zanriah eikham aṭangin ka zir ve mawlh mawlh a, ka rilru chak lo lutuk pawh kha a zia ta deuhin ka hria, tlem tlemin hma ka sawn a, a hma khan tih ṭhana ka lo neih loh vang a nih ka ring. Dar 10 dawnah Message ka dawng hlawl a, Awmpuia message a ni. "Ka haw lawk a, Exam hmain ka lo chhuk ang, min ngaihtuah lo la, ṭha deuhin lehkha i zir dawn nia" tih te hi a lo thawn a, ka note thawn ho kha a hmu em ka lo zawt vat a, Message chu a tlang lo anih ka ring. Ka rilru nuam lo chuan ka call leh a, a switch off leh tlat tawh.

A tuka college ka kal tur chu kan veng kawnah Jerryan min lo nghak pek a, "Taxi ka la dawn, min kalsan rawh" ka tih pawh chuan min la rawn zui zel a, khawlaiah min pawt ṭung mai a, dawr kawta ṭhu ten min en ṭhup avangin hnial luih theih pawh a ni lo. Tui lo ru deuhin ka chuang a, "Nidangah lo kal tawh miah suh ang che, hetiang hi ka duh miah lo ania" tiin ka vau zui a, a nui mai mai a, huatah pawh a la lo.

Hlauh ruk ang ngeiin Noeli te kan tlan pel a, ka lehhawi ngam hlek lo. Canteen kawta ka chhuk tur chu Mawitein min lo fiam bawk a, Jerry lah chuan "Chhura duh loh Na-an nei kan ti mai ang chu" a lo ti ham ham a, ka han khap leh rih.

"Ka uang mai mai anih kha, Pa-a tih lungawi loh te chu ka tan a ṭha nang, ka chhawr ṭangkai ve a lawm" a ti sam mai a, a ṭawngkam hi a ṭha phian zel a, Awmpuia nen pawh an innel ve a, Awmpuian zirlaia a puih ṭhin vang a ni.

Classa kan luh hnu lawkah Noeli te an lo lut a, "Che chak hle mai, inchhir leh awih loh" tih pahin min rawn kalpel a, ka han lehhawi chu min lo ner khum zui a, ka rilru hi hria sela hetiang hian min ti lo ang maw le. Rei vak loah Miss Zari a lo lut a, Assistant Cr Zoremi bulah Handout xerox tur a pe a, rei tak pawh a awm lo. A chhuah hnu lawkah Puipuiin min lo ko a, kan hnunglam ka han hawi chuan "In inṭhen an tia, tak tak a ni em?" a lo ti a, a bula ṭhu te pawn zawhna an ngah hmel khawp mai a, engtin nge an lo hriat hman ni.

"Tunge sawi?" ka tih chuan "Mi sawi ka hria, ka lo awih vak lo a; mahse, a lo kal bawk si lo a, a dik tihna a ni maw?" a tih zawm leh a, midang pawh chuan mak an tih thu an sawi ve sap sap a, "In inhmeh tehreng nen, inṭhen rei lo teh u, hmuh inhrehawm dawn em mai" an lo ti reuh a, rilru a hnim ru veng veng mai a ni.

Chhawhnu class ah Economic class kan nei leh a, Sir Tluanga lo kal hmain Zoremin handout kha a lo sem a, "Awmpuia i lak kep dawn em?" a tih chuan lo ban mai ka tum a; mahse, Noeli a rawn lang hlawl a, "Keiman ka lo pe ang" tih leh rawn pawhthlak a rual a, tlar hnunglam a pan leh nal nal bawk.

"In inṭhen an tih ka hria a, Noeli khi a va phur hmel ve" Zoremin a tih chuan ka han hawi chho leh a, an ṭhian hoin an lo nui har har a, an lo phur em mawni ka ti ve hial a, an nui deuh reng maiin ka hria.

Message a lo thawn bak kha kan inbe leh miah lo a, lehkhazir lamah rilru ka pe a, zir tui a har ṭhin khawp mai. Ka ngaihtuahna zahve hlawk a luah a, hriat loh chhungin ka lo ngaihtuah leh veng veng ṭhin. Ka ṭhiante chuan min hnem ve mawlh mawlh a, an ni lak aṭang hi chuan Awmpuia sawiselna thu bak hi hriat tur a awm lo a, inhnem nana ka hriat chak loh zawng tak a ni a, biak tam loha ka tlak leh ṭhin.

Ka pa nen kan inbe zeuh zeuh a, "Kalna tur chu kan la nei a, hmanni lawka camping kan va neihna kha a nia, an boruak a ṭha riau a, kan team ho hi Christmas hman puiah min lo sawm a, crusade an va nei ang" a tih chuan a kal ve chak deuhin ka hria a, kan khua a haw ka chak vak lo bawk a, kal ve mahsela pawi ka ti lem lo. A bula ka sawi chuan "Hmanpui loh che ka hreh a, i khua  ahar lutuk palh ang" a lo ti vat a, "Kan khua ah ka hmang chak lo zawk a, min ngaihtuah duh suh, nu Hlimi te pawh an khua a har dawn a, heta hman hi ka hreh lem lo ania" ka ti ve leh a. 

"Anih chuan ka rawn tlawh zawk ang che, i thawmhnaw te pawh kan lei nghal anga, midang kal hnuah ka va zawm ve mai dawn nia" a rawn ti ta a, kan exam zawh hnuah a lo chhuk dawn anih hmel e.

Zirtawp ni chu hma deuhah ka tho a, zan lamah nu Hlimin eirawng a bawl sa avangin lehkha ka zir a, college a ennawn leh hman ka duh vangin ka chhuak hma hle bawk. Ka va thlen chuan tu vak mah kal an la awm lo, kan ṭhut dan tur an tar chhuah hun ka nghak a, Awmpuia a lo kal em ka ngaihven reng bawk. Ka ṭhiante an lo thlen hnu lawkah lehkha an rawn tar chhuak a, Awmpuia nen room khatah kan ṭhu dawn anih hmel. Mawitei leh Kimkimi erawh building dang daih ah an ṭhu dawn a, an roll number a indawt bawk a an phur dun khawp mai.

"En nawn lawk kan duh" tiin min luhsan zui a, kei erawh gate lam hawiin ka la ding reng a, Noeli te an lo thlen avangin ka kalsawn leh vat thung. Canteen kawt aṭang chuan gate lam chu ka han hawi leh ṭhin a, Peksanga hmel takngial pawh ka hmu lo. Ka mangang deuh chuan ka call a, a chhang thei miah lo mai a, midang ho chu an lut zo deuh vek tawh.

"Rinsangpui, eng nge i la tih?" Sir Sangtean a rawn tih chuan hmanhmawh deuhin ka tlan phei a, ka ṭhutna tur ka va zawng chawp chuk chuk a, Awmpuia roll number chu tlar hmasa berah a lo inbel a, a hnung chiah ah Zothana a lo ṭhu bawk. "An ti danglam daih, a hnunglam khi han en teh" a lo tih chuan ka hrilhhai lek lek a ni. Ka roll number chu tlar hnung berah a lo awm a, ka ṭhutpui tur pawh a lo ṭhu fel diam tawh.

Dawhkanah chuan a entawn tur a lo ziak mawlh mawlh a, ka va melh vang chu nge ni a nui tet tet a, kan junior a mi, hmeichhe lian deuh mai a ni. "Tlar hmasa lama ka ṭhut ka hlau lutuk a, ka ṭhutna hi a fuh tak tak a ni" a tih chuan ka nuih tawi tak a, ṭum dangah chuan tlar hmasa lamah ka ṭhu ṭhin a, a hmasa ber dawttu ah Awmpuia hnungah ka ṭhu ṭhin, tun ṭumah erawh an seat rem dan a dang a, kei tlar hnung ber sira ka ṭhut laiin Awmpuia roll number chu tlar laiah a hmasa berah a awm thung a, Miss Zari tih anih te ka ring rum rum a, min ṭawngkhum dan kha ka hrechhuak uar uar mai.

Rei vak loah Professor te an lo lut a, tlar hmasa ber awl chu mak an ti deuh aniang an inzawt sap sap a, tukverh lam ka va hawi  chuan kawtzawl reh ṭhuap chu ka hmu a, mi veivak pawh an awm lo, zirlai dangte chu an lut kim vek tawh. Exam a tum khan ka hre si a, a hmel hmuh tur awm lo chu ka phili ruai mai a, ka ṭah a chhuak ngawih ngawih. Haw ve daih mai te ka chak a, a tel loa exam chu hreh tak tein ka hreh.

"Lalawmpuia seat anih hi, engti zia nge ni le?" Sir Sangtean a tih laichuan midang ho pawh an hawi kual hrek hrek a, ṭhenkhatin ka lam an rawn hawi bawk.

"A damlo a ni lo maw...?"

"Tunlai chu class a kal miah lo"

"Biak ka'n tum chhin a nge" tih angreng a ri nawk a, ka ṭah chhuak lutuk chu dawhkan bawhin mittui ka hru mawlh mawlh a, ka kut te chu a khur deuhin ka hria, ka thaw a ipik leh churh tawh a, ka thin zawn a na ngut ngut bawk.  A ṭhutna awl te chu hmuh a hrehawm, hawi chhuah pawh a nuam lo.

"I nuamsam lo em ni?" ka bula ṭhuin a rawn tih chuan "Ka mitah thil a lut a" tiin hnuailam ka bih vat a, "Tui i duh em?" a tih chuan ka chhang lo, "Kha, tukverh ah khan i hmai phih rawh" tih paha bottle a rawn lek chu ka lo ban ve mai a. Chutih laia "E, a lo thleng a lawm hei" tih ri vang chuan ka hawi rang nasa mai. Kawngkhar aṭangin a rawn lang hlawl a, ka thinphu ran zia chu aw... lawm tak ka ni, ka hahdam huai bawk.

A rawn hawi kual thuak a, min hmu lo aniang ka lam a rawn hawi lo. Sir Sangtean a ṭhutna tur a lo kawhhmuh vat a, a hah hmel te chu hmuh a nuam hliah hliah. "I exam dawn lo emaw kan ti hman a lawm maw le" Sir Sangtean a tih chuan "Bike-in kan lo chhuk a, ka admit card inah ka va la leh a lawm" a tih ri chu ka hre pha. Sir chuan a be mawlh mawlh a, ani pawn an khaw lama a haw thu te a lo hrilh a, Sir Sangtea kal hnuah hnunglam a hawi vat a, Zothana a be lai chu ka lo en ve reng bawk. Chutah, ka lam a rawn hawi a, kan mit a intawng chiang khawp mai, ka lo nuih var var a, tawitea min nuih hnuah a hawi let leh vat a. Ka zep lo, ka ngai ngawih ngawih, kan inṭhut hlat lutuka, chu vang pawh chuan ka ngai zual.

Exam question leh answer sheet te an rawn sem a, question paper ka han en chuan ka thiam a lo awm ve nual a, tlar hma a ṭhu ka va hmu thei vei nen hlim ru deuh chungin chhanna ka ziak a, a khat tawkin ka va hawi leh ṭhin. Ka chhang rei ve khawp mai a, ka thiam loh pawh phuahchawpin ka chhang kim vek a, chuti chung chuan dah hmasa pawlah ka ṭang a, Awmpuia erawh a la ziak dawn chauh emaw tih tur a ni.

Paper ka va dah laichuan ka melh pah zauh a, a rawn hawi ve lem lo. Pawn ka chhuah ruala "Awmpui, hmanhmawh a ngai lo aw" Sir, Sangtean a tih ri chu ka hre zui a, a sawi chhan pawh ka hria, ka chhuah hmasak vanga a hmanhmawh a hlau anih hmel e.

Canteen ah lo nghah ka rilruk a, engmah ka ei rih lo anga, a lo chhuah hunah kan eidun ang tiin treat ka tum ve hle a, ka phur ru khawp mai. Mawitei leh Kimkimi an lo chhuak ve chiah bawk a, "Lalpeksanga a rawn tlai ania aw, Zawlpala a lo kal em?" Mawitein a lo ti lang lang a, "Ani pawh a tlai lutuk" tiin ka lo nuihsang a. "Thil ei ang" an ti erawh ka hnial rang nasa.

"A lo chhuak ṭep ang, lo va ei ru" min han melh rum nghal pang a, "I ti leh chung dawn anih hi, engmah ka sawipui tawh lo ang che, ka zak zawk e a" Mawitein a ti hmak a, min ti hamhaih ang reng.

"Kan lo rel ve hrep a, i be ṭha leh daih zel a" Kimkimin a tih chuan sawitur a vang duh khawp mai. "Kan inhau hleinem, ka sawi awmzia chuh...kan inhaw lo" ka ti niah niah a, "I tih dan danin ti rawh" tiin min kalsan hmak a, an lawm loh chhan chu ka hrethiam lo, inṭhen turin min lo duh zawk em mawni.

Ral aṭangin Noeli te lo chhuak chu ka va hmu a; mahse, ka lamah rawn kal loin zunin awmna lam an pan a, zirlai dang pawh an lo chhuak nual tawh. Canteen bula thir ṭhutthlengah chuan ka ṭhu ran a, ka chhan dan te han bih nawn ve ngial a, Awmpuia nena tih dun ka duh avangin a zualpui chiah ka en a, ka chhang ṭha ve khawpin ka hria. Rei dawn ka nghah leh hnu chuan an lo chhuak sap sap a, a tawp lama Awmpuia lo chhuak chuan a question paper a bih ngar ngar a, a lam hawiin ka lo ding vang tawh.

Chutia ka en reng laichuan Noeli ten an rawn pawh a, an chhan dan an sawi ho aniang lehkhabu an keu a, kal pahin an lo ṭawng phei bawrh bawrh a, ka bul an lo thlen dawnah pawh a la rawn hawi chhuak lo a, a lam pana ka kal dawn chiah tihah Rebekin min lo hmu a, Noeli chu eng emaw hi a hrilh ru sar sar a, Noeli rawn hawi chuan min ti tim ru khawp mai. Mahse, ka pan lui ta tho a, ka kal phei an hmuh rual chuan Awmpuia chu an din hliah vat a, inher leh rang tak ka ni.

Rei loteah min rawn kalpel a, Rebeki leh Noelin an hliah tlat avangin min hmu ta lo a, canteen a an lut tur te chu ka thlir mawl tawp a ni ber. Thawk ka la vang vang a, va biak ka duh, min hmuh a duh ve tho ka ring, min zawng angem tiin ka inzawt ru bawk.

Huphurh ru deuhin canteen lam chu ka pan a, dawhkan hmasa bera an ṭhu chu ka va hmu nghal a, ka va luh rualin a lo hawi ve chiah bawk. Chuveleh a ṭhiante chuan an lo be mawlh mawlh a, a ei duh te an zawt a, chhan pahin min la en ve reng thung. Ka be dawn nge ka kalpel ang tiin ngaihtuahna ka nei hman a; mahse, amah zawkin min lo bia a, "I chhang ṭha em?" tiin zawhna min zawt a, a nui lo nain ka lawm tawk em em thung.

"Chhang ṭha ve tho mai, nang zawk?" a sir deuhah chuan ka ding a, Rebeki leh a ṭhiannu eitur lam an bengchheng lutuka ding hnai lo thei ka ni lo. Ka va din hnaih laia "Thiam loh ka nei nual mai, i pass pha ang maw?" a tih chuan ka bu vat a, an bulah chuan ṭhutna awl a awm lo a, ani lahin min sawm bawk si lo a, kalsan mai loh chu tih theih ka nei lo, "Eitui u" zawi tea ka tih hnuah ka kalsan a, ka ṭhutfel hnua ka va hawi leh chuan paper bihin a lo ṭhu kun leh daih tawh a, Noelin a darah a kuah chial bawk.

Ka rilṭam zia chu ka hria; mahse, eichak engmah ka nei lo, ka bula tui chu ka in sek a, hmalam chu ka va melh leh ringawt ṭhin. Rei pawh ka ṭhut hmain mipa ṭhenkhat an lo lut a, Jerrya lah chu ka bulah a rawn ṭhu chawt a, a ring thei ang berin eitur a lam zui a, Awmpuia awm laia ṭhut dun chu ka duh loh avangin ka tho thut a, "Ka lam kep vek tawh che" tih pahin min pawt ṭhu leh zawt a, Awmpuia a rawn hawi ve chiah bawk.

Min rawn en deuh vung vung a, Noeli a lo hawi veleh bawk nen awm ngaihna ka hre lo a ni ber. Mawitei chi auin "Lo ṭhu phei rawh u" ka va ti ngawt a, ani lah chuan eng nge a hriat ni "Kan tibuai palh ang che u" a lo ti kher a, Awmpuia chuan a hre pha tih ka chiang. A lam ka zuk hawi leh chuan a ṭhu ṭha tawh a, Noelin nen an inbe mek a, kan chungchang an sawi tih chu chiang tak ka ni.

Ka bula ṭhu chuan min be mawlh mawlh a, a rul tawk bakin ka chhang lo. Ka ngaihtuahna a chawmawlh a, ka bing chuk chuk a, ka thaw lak a mumal lo hle bawk. Thil eng emaw helhhawlh nei ang mai ka ni,  ka awm a nuam lo takzet. Rei loteah kan eitur an lo dah a, chow chu tlem te tak tak chauh ka ei a, ka ei chak loh chu thuhran ka hrawkah min hnawh a, lem a harsa lutuk tlat. 

"I va ei tlem ve, a dang ka chah leh dawn em niang?" Jerryan a tih chuan "Engmah ka ei chak lo" bung zetin ka ti a, ka awmdan chu a hrethiam ve a ni chek ang, "A hrehawm rih viau ang; mahse, pal luih ve a ngai a nia, ngaihven lo lui rawh" a ti zui a, ṭah a ti chhuak hlur mai.

Kan hma lam ka zuk hawi leh chuan an lo ding ve chiah a, an haw dawn anih hmel. Ka ṭhu ngil hluai a; mahse, ka lam pawh rawn hawi loin kawngkhar lam a pan a, an chhuah hnuah pawh tukverh aṭangin ka la thlir ve ṭawk ṭawk a, Peksanga nen an inphur tur te chu Noeli ten ban an vai liam a, a hrehawm zia chu aw....ka mittui a hnam leh ringawt tawh.

"In inbia em?"

"Bia e"

"In ni leh dawn em?" chupa han dilchhut zia chu aw. "I lo buai ve a ngai lo" ka ti hlak a, a inthiam lo hmel ka hmuh chuan "Ka kal mai ang, ka ei man ka pe dawn ania" tih leh thawh ka rual a, "Keiman ka lo pe ang" a ti chu chhang duh loin counter lam ka pan a, pawisa ka va pe sawk sawk a, pawn ka chhuah rualin ka hnual leh rawih rawih thung. Tumah thurual pui tur an awm lo, keimah chauh ka ni, ka ṭhiante lah chuan min ngaihsak tak tak pawhin ka hre lo, tumah lamṭang ka nei lo a, mal tlat chu ka tih theih chhun a ni tawh.

Ka pawisa ken zawng zawngin Taxi ka la a, in ka thlen rualin ka pindan lam ka pan a, ka ṭap hlawp hlawp mai. Ka lo in up rei hman aniang taksa khur hlawk hlawk khawpin ka ṭap a, ka inṭap chau zui der bawk. Zangthalin khumah ka mu zawi ngiai a, kan ṭha leh tawh dawn lo tih chu bengbula hrilh tluk zetin a chiang. Mahse, ṭha taka inbiak a, ṭhian ṭha tak nih kha kan tum si a, vawiin zet kha chu mangchhia ang hlauh a ni.

Kan insum ve ve aniang kan inbe lo reng a, lehkha zir a har duh takzet. Ka ti lui ve nasa a, ka tlaivar deuh thaw ṭhin. Pathianni zan erawh ka insum zo loin ka va text a, "I thiam hnem tawh em?" tih te hi ka va zawt a, a message lo thlen hun nghakin phone chu ka vil ran bawk.

Darkar khat dawn hnuah a rawn chhang a, "Thiam hnem a har khawp mai, ṭha deuh khan zir rawh aw" tih hi min lo thawn a, "Nangpawh le" ka va ti leh ngawt a, kan inbiak dan chu ka duhkhawp lo takzet.

Thawhṭanni ah Economics kan exam a, college ka thlen tlai deuh avangin Professor te nen kan lut rual a, ka chhang ve leh thei zul mai. Mahse, ka chhuak tlai a, Awmpuian min chhuah khalh avangin kan inhmu hman ta lo a, a awmdan chuan min peh hel deuha ka hriat vangin va biak leh kha ka hreh ve tlat a, ka inthlahrun vang a ni ber. Exam laichuan tihbuai loh a ṭhain ka hria a, a rilru lakpen loh hram ka duh, exam zawh niah ka bia anga, kan inkar pawh ka sawipui ang tiin rilru ka siam a, insum erawh a har dawn khawp mai.

Exam kar a hlat deuh ṭhin avangin kan inhmu lo leh vang vang ṭhin a, kan inhmuh ve chhunah lah hian han biak falna hun takngial pawh a awm ngai lo. Amah zawk hian min lo be hmasain ka chhang ṭha em tih min lo zawt ziah a, ka kal tlai deuh chang te hian tlar hmasa ber aṭangin min lo nuih a, ṭha deuha chhang turin duhsakna min lo hlan ṭhin a, exam zawh lamah hi chuan Noeli ten an zui reng a, ka va pawh ngam tawh ṭhin lo. Inhmelhriat satliah hi kan ang ta berin ka hria, ka inngaihzawn hma a Awmpuia ka hriat ṭhin, tlangval fel leh hawihawm tak kha ka laka a awmdan chu a ni, a thinlungin engtin nge min hriat erawh rin dan ka thiam lo, min la theihnghilh loh erawh ka la beisei ve fan a, chu beiseina erawh keimah ang maia chaurau a ni, kan inkar chu pangpar mawi tak, chawmtu tui a hmuh loh vanga thi lek lek hi ka tehkhin ber.

December thla a ni a, Exam kan zawh ni anih vangin ka haw tlai tur thu ka chhungte hnenah ka hrilh lawk a, College ka thlen chuan an lo lut mek a, Professor te erawh an la lut hman lo. Kawngka a ka va lut chiah chu ka lam a lo hawi a, engmah pawh a sawi hmain a dawhkan hma ah tak chuan ka va ding a, "Banah ka lo nghak ang che" ka va ti tawl a, a hamhaih ka rin tehlul nen "Ka chhuah hmasak chuan gate chhakah ka lo awm ang" a lo ti vat a, mak ka ti zawk angreng.

"I chhuak hmasa lo ang" ka ti ringawt a, a nui suk.

"Ka thiam vak lo a, ka chhuah hmasak ka ring"

"Anih, theihnghilh suh aw" ka ti leh hram a, Noeli ten an lo kal hran pui leh ka hlau a ni.

"Thingkung bulah khan aw" a tih chuan ka bu sawk sawk a, Professor te an lo luh tak avangin ka ṭhutna lam ka pan thuai bawk.

Mizo subject kan exam a, ka subject thiam ber anih laiin ka hmanhmawh leh lutuka, ka chhang ṭha em tih pawh ka chiang lo. Awmpuia a chhuah hmasak chuan Noeli te nen an lo inhmuh hman ka hlau a, chhuak hmasa zawka ṭan ngei ka duh. Pathum vel chauhin paper an la dah ang tih ah ka va submit a, Awmpuia chu zaizira ka hrilhin; a chhanna pawh nghak loin ka chhuak nal nal a, gate chhak lam ka pan zui bawk.

Thingkung awmna bul ka thlen chuan a reh ṭhiap mai a, thlasik ni sa vawl vawl kara thlifim rawn thaw leh ṭhin chuan boruak dang deuh hi a nei a, ngaihtuahna a la peng hneh khawp mai. Khawharna te, mal intihna te, chhungkaw kehchhe kara baihvai ka intihna te leh hmangaihna avanga ka lungngaihna te chu chauh pui viau mahila beisei neih ka ṭhulh ngai lo. Tunah ngei pawh hian helaia ka awm chhan hi a ni, kan inkar siam ṭhat ka duh a, tun hi a hun tak pawh a niin ka hria, ka rilru chu ka siamfel tawh a, a thutlukna ah engkim a innghat a, keipawn ka rilru dik tak ka hrilh ang. Duhthusam thuhmun kan nei ṭhin a, keichuan khang kan duhthusam bak kha engthil dangah mah duhthu ka la sam leh lo, ka la ngai reng a, ani pawn duhthusam dang a la nei bik lo turah ka ngai a ni.

Darkar khat dawn ka nghak a, sana ka en zing khawp mai, zirlai dang an lo chho sap sap a, Noeli te ṭhian ho lo chho pawh chu ka zuk hmu a, ka awmna a biruk deuh avangin min hmu ve lem lo. Ka zawn an lo thlen laia an ṭawng thawm chu ka lo ngaithla reng a, "A rilru a na lutuka, ka khawngaih ania aw, a first love ania, amah pawn 'Hetiang em em hian ka lak nat ka ring lo' a tia lawm, an khua a a haw lai pawh khan zanah a muhil thei lo a, 'Lehkha pawh ka zir thei lo' a ti" Noelin a rawn ti chho bawrh bawrh a, "Inṭhen hlen se a ṭha ang, Rinsangpuii aia ṭha hi a phu" midangin an lo ti bawk a, an kal liam dawn thlengin an la sawi chho bawrh bawrh a, rilru a na ru ve takzet.

Minute sawm vel ka nghah leh hnuah pen thawm ka hria a, ka hawi chhuah chuan ka bulah a lo ding reng tawh a, thawh nghal mai ka tum chu a darah lo vuanin ka bulah chuan a rawn ṭhu a, a chang ṭha em tih ka lo  zawt hmasa te te a, "A zia viau e, eng nge i sawi duh?" a ti khawl a, a hmanhmawh hmel riauin ka hria.

"Kan awmdan hi a hrehawm e" ka tih chuan "Nia" a ti ringawt a, a lam ka hawi chu kan inmelh vang vang a, a nui tawi khawp mai.

"Ka ngai lutuk che" ka tih laichuan ka hnuk a ulh deuh tlat a, ka aw pawh chu zawi tak a ni.

"I damṭha em?" a lo ti vat a, lu ka bu ringawt.

"In enkawl ṭha rawh aw, advance christmas kan hman zawh ah ka haw ang, engtikah nge i haw dawn?" a ti zui a, kan college hian kartawpah advance christmas kan hmang dawn a, inrinniah a haw dawn anih hmel.

"Kei chu ka haw dawn lo a, i va haw hma dawn ve"

"Tih tur vak ka nei lo a, i sawi duh chu sawi la, Putea te inah va kal lawk ka ngai a" tih pahin a tho uaih a, keipawh chu ka tho rang hle.

"Ka message kha i lo chhang si lo a" beisei nei zetin ka melh a, a hmel aṭang chuan eng nge a ngaihtuah ang ka hrethiam lo. Thlanglam hawiin thawk a la vang vang a, chutah min rawn en lehin "A sarhu lai ania, kan inhmu lo rei dawn a, a zia vat mai ang" zawi deuh tak hian a ti a, ka beisei ang chhanna chu a ni lo chiang khawp mai.

"Kan inṭhen hlen dawn a maw?" min chhang loin min en vang vang a, "I duh tak tak em?" ka han ti nawn leh a, a hmuh laia ṭah lo hram ka tum ang, a chhanna tur chu a chiang tawh a, min ti na lutuk lo sela tih chauh chu ka beisei tawh.

"Ka duh tak tak em tih chu ka hre bik lo; mahse, ngaihzawng neih hi ka chak tawh lo a ni, i rilru ka ti na anih chuan min ngaidam dawn nia" ka mitah chiang zetin min en a, ka mittui a hnam ṭiam ṭiam mai. 

"Min hua em ni?" ka ti tham ṭiak a, ka kut rawn vawn pahin lu a thing a, a kut leh lamin ka biang a rawn dawm bawk.

"Ka hmangaih reng ang che; mahse, tunah chuan kan inṭhen a ngai, ngaihzawng dang ka neihsan dawn lo che a, i rilru tina turin engmah ka ti lo ang. Engtin nge ka hrilhfiah ang che pawh ka hre lo, i tel loa paltlang tur ka ngah lutuk a, i awm ve chuan engmah ka ti thei lo, zirlai ngaihsak pawh a har....." a ngawi leh vang vang a, "Nangmah vanga rilru nat hi ka duh tawh lo" a ti leh khawl a, a ṭawngkam tin chu ka nat pui.

"Tihpalh..." a rawn kun hnai deuh a, "Ka haw miah lo che ania, i thiam lohah ngai suh, ngaidam tur zawk che ka nia; mahse, ka rilru i la peng hneh lutuk a, ka inven ve a ngai" a ti leh halh a, ka bianga rawn dawm leh a tum a kut lo man sakin ka hmer vawng vawng a, "I hrethiam ti raw?" a tih chuan ka chhang lo, ka melh tlawk tlawk a, "Mangṭha" tih zawng ka sawi.

Kal mai tuma ka inher chu ka darah a rawn vuan a, "Ka ngaihsak reng ang che, midang zawng zawng aiin ka ngaihsak ang che" a ti leh a, chu chu ka duh chiah em pawh ka hre tawh lo, keimah chiah min ngaihsak sela tih kha ka duh a ni ṭhin, midang aia a ngaihsak bik ni loin a ngaihsak awmchhun nih ka duh.

"Ka kal dawn" ka tih chuan min thlah vat a, "Haw rual ila, ka va thlah ang che" a rawn tih chuan "Aih, thlah pawh ka ngai lo, kalna tur i neih kha" tiin ka han nuih lui ngial a, chutih rualin ka biangah mittui a rawn luang zung zung a, insum a har takzet.

Ka ṭah chhuah mai loh nan ka hmui ka hup a, kawngpui lampanin ka kal chho hlawk hlawk a, min lo zui em tih takngial pawh ka hre lo. Thaw hlawp hlawp chungin kawngpui ka thleng a, taxi lo tlan hmasa berah chuangin in lam ka pan vang vang a, vawtin min ṭham emaw tih mai tur a ni, ka khur nasa lutuk tlat.

In ka thlen chuan U Lizzy leh a ṭhiante an lo awm a, engmah pawh sawi loin ka pindan lam ka pan a, rizai hnuaiah ka va inlukhuh ringawt a, ka inhaihawng leh rang khawp mai. Ka message tone a rawn rik vangin phone ka ban vat a, Awmpuia a ni. 

"Kumthar ah chuan midang inah ka awm dawn a, ka zirlai chiah ka ngaihsak a ngai tawh a, i tan hun ka nei thei tawh lo ang, chuvangin inṭhen hi i tan pawh a ṭha ber a nia" tih hi a lo thawn a, a bulah chuan sawi tur engmah ka nei tawh lo. Ka ṭap a, ka insehruh a, ka inngaihtuah lungpuam bawk.  Ka hmuh phak lohah awm sela ka duh rum rum a, inhmu tawh miah lo bawk i la ka ti, hetiang chunga hmachhawn reng chu ka zuam lo, a theih pawh ka thei lo ang, ka hmuh apiangin ka rilru a na thar anga, ka duhna pawh a reh theiin ka ring lo. Hetiang ka nih laihian a ngaihsakna ka dawng thei dawn em ni, ka theih ka inring lo, a ti zualkai leh mai mai zawk ang.

Ka muthilh lai reng ka hre lo, nikhaw hre loin ka awm zawk nge ni ka harh leh chuan dar 8 a lo ti tawh a, ka chhungte pawn chaw an lo eifel diam tawh. Nu Hlimi lo haw laiin ka lo hmuhil daih a, ani lah chuan ka zan meng rei chau tawngkhawng anih ringin min lo kai tho duh lo a, eirawng pawh a lo bawl chawp chuk chuk a ni awm e. 

Sitting room-a ka va chhuah chuan heater a lo ai mek a, "Chaw va ei rawh, bawngsa kha chhuanglum la, fridge ah salad a awm bawk kha" a lo ti zung zung a, eichak lo deuh chungin chawei ka va insiam a, kuttum tiat pawh ka ei tling lo ang. Ka eikham hnuah ka mu leh daih a, ka muhil leh thei lawk lo thunga, ngaihtuahna a vak kual nasa khawp mai.

Nu Hlimi mut hnuah tho chhuakin veranda ah ka va ṭhu a, ka nu ka ngai takzet. Khawvela ka mi huat ber chu engvanga ngai tlat nge maw ka nih le, inhnemna tur dang ka nei hlawl lo aniang, ka pa lak aṭangin beisei ka nei lo a, heng ka rilru natna te hi min hriatthiam pui pawh ka ring lo. Ka nu erawh chuan a hriatthiam ka ring a, ka bulah awm sela chuan thurawn pawh min pe thiam ngei ang, awm ngat sela chuan ka mal lutuk lo tur.

Van lamah chuan thlasik kawng a lang paw riai a, arsi an de sep sep bawk. Thli thawt rualin zan par rim a rawn nam leh hak ṭhin a, a vawh vang nge ni ka khur hlak hlak reng a, ka hnar leh ka hmanga ka thaw chung pawhin boruak chu ka kham meuh lo. Ka awm lah chu a tawt urh a, thawhah ka neiin ka hria. Thawk leh khatah ka lungphu a rawn rang dawt dawt a, Veranda aṭanga chhuk thlain ka tei kual sek a, awmzia a awm thei lo, ka thaw a hah telh telh. 

Gate sira pangpar awmna bulah chuan ka va ṭhu leh ringawt a, ka phone chu ka han hmet eng a, tumah han call tur pawh ka hre lo. Ka pa chu a muhil tawh ang, ka ṭhianten eng nge tih theih an neih, Awmpuia an huat thu chu hriat ka chak lo, min ngaihsak tak tak lo bawk. Ka nu bawk chu ka ngaihtuah chhuak leh a; mahse, ka thei ngang lo a ni.....

Am thei ang berin thawk ka la a, ka lungphu chu a zawi riai riai maiin ka hria. Hlauthawng zeta ka awm ka han dawm  chuan a lo la phu ve dat dat a; mahse, thawk a har takzet. Zawitein ka ṭap a, ka ṭap hleithei lo chungin ka mittui a luang zung zung lawi a, ka hru seng meuh lo.

Chutih laichuan aw ka hre thut a, gate lam aṭangin a ni!?

"Nula chuan eng nge a ṭah pui leh tak a?" a rawn ti a, chhan pawh ka chhang hman lo, "Ka hre phak che ania" a rawn ti thum leh dut a, gate hnuai lam ka en chuan tu emaw gate nghenga ṭhu chu ka va hmu a, a dar lehlam chiah a lan avangin ka lo hmu lawk lo.

"Benjamin.." ka aw chu a khur nasa khawp mai. Muang chang fein a ding a,  "Lo hawng teh" tih pahin a rawn inher a, kut khur dar dar chungin ka va hawn sak a, a lo lut tur chuan hnai lutuk tak maiah min rawn bihin "I.. u ..a mu tawh em?" a ti ban charh a, "A muhil tawh ang, an...an ..mu tawh" ka ti bah nawk a, thawk a sak lutuk a, ka ṭahna lamah ka hnar a ping bawk si a, hmui ka chip ṭha ngam lo.

"I khua a sik em ni?" tih leh ka chal rawn deh a rual a, lu ka thing rang khawp mai.

"I ṭap a ni maw?"

"Ka ..thaw ..ṭha thei lo..."

"Engtin maw?" min kuai dak salh a, "Panic attack i nei anih hi" a ti hlut a, engmah ka hrethiam ve lo. Ka kut khur a hmuh chuan a rawn vuan chawt a, "I ṭha mai ang, chiai suh, ṭhu la...tih dan tur ka hrilh ang che" tih pahin leiah min pawt ṭhu a, ka mittui luang chu a rawn tuai hul zung zung bawk.

(End of chapter - 15)