BLUE BAYOU (CH - 16) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 16

"A mitah min en la, muangchangin thawk han la teh, i taksa kha thlahdul la, ka thusawi chiah hi ngaihtuah rawh aw" ka kut pahnih rawn vuanin amah zawk chuan thawk a han la vang vang a, "Ka tih ang khan ti rawh, muangchangin..." a tih hnuah ka sam a rawn hui kiang sawk sawk a, boruak thawk luh chu har ka ti takzet, ka awmah min hnawh tlat a, ka thaw a chham lek lek ṭhin.

"Thil dang ngaihtuah tum rawh.." a tih chuan ngaihtuah ber tur ka hre lo, a rawn lang zut zut a, ka ipik tulh tulhin ka hria.

Ka biang a rawn dawm thut a, "Min en la, ka rual zelin i ti dawn nia" a tih chuan ka en ve ran a, thawk a lak rual chuan ka theihtawpin boruak ka hip a, thawk chhuah leh pawh chu har tak tho a ni. "Ti nawn leh ang" a tih vangin a sawi ang zelin ka ti a, vawi sawm dawn kan tih hnu chuan ka taksa khur chu a zawi tial tial a, ka thawlak pawh a ziaawm ve viau tawh.

"Panic attack i nei ve ṭhin em ni?" ka tih chuan "Joshua zawkin a nei ṭhin a, a tih dan ka hria a lawm" a ti mai a, a ṭhut dan siamremin leiah chhan a ṭhu sawp nuaih a, ka kut a la vuan reng bawk.

"I ziaawm deuh em?" a tih chuan ka bu nghat a, ka awm tawt lutuk chu a zia tawh a; mahse, ka la pangngai lo ru hle thung a, ka ṭah a la chhuak em em reng.

"I bialpa vang em ni?" 

"Kan inṭhen a.."

"A chhan a chhe viau a ni maw?"

"Keiman ka ṭhen a, vawiinah aman min ṭhen veleh a" ka thilsawi chu a hrethiam lo aniang a meng rang ralh a, "Hmeichhia vang a ni em?" a tih chuan lu ka thing rang khawp mai.

"Ka ti buai zo vek, ka thikthu a chhe lutuka, kan inhnial phah reng a..a thiam loh pawh a awm lo, engmah hi a dik thei tawh lo" na zetin thawk ka la a, ka nu bulh mai hian ka hria.

"Ka hrethiam mai, sawifiah vak lo mai rawh...i la duh viau em ni?" kan inmelh vang vang a, ka la duh zia chu ka awmdan hian a hrilhfiah viau tawhin ka ring.

"Neih let leh i duh em ni?" lu ka thing ringawt, neih let chu ka duh takmeuh mai; mahse, ka theiin ka ring lo, Awmpuia ṭawngkam te, inṭhen a duh chhante kha ka han ngaihtuah chiang a, ka hriatthiam pui lo a ni bik lo, chumai ni loin ka tel lo hian a nun a nuam zawk dawn a, a hlim zawk ngei bawk ang.

"Ka nu a uire a.." engvanga chu thu chu hrilh ringawt nge ka nih le, ka mittui a rawn lum thla pap a, ka ṭah chak zia chu aw.....

"A hrehawm ngawt ang" a tih chuan ka bu nghat nghat a, ka mittui rawn hruk a tum chu ka lo hruk khalh bawk a, "Ṭap bawrh bawrh rawh, i rilru a na a nih kha" a tih ri chuan engti zawng emaw tak hian min hnem a, ka awm a nuam phah a ni ber.

"Ka nu chuan min la rawn be miah lo, biak chu ka duh bik lo a; mahse, tihian a hlim anih ka ring, inthiam lohna pawh a nei lo aniang" 

"Thiam chu a intih ka ring lo, i rilru a nat em hi, a hlim bik miah lo ang"

"I hrethiam lo anih kha, i la tawn ve loh vangin i hrethiam lo ang, kan tel loa a hlim hi ka haw ngawih ngawih..." min lo pawtchat vat a, "Hrehawm deuhin awm se i duh em ni?" a tih chuan chhan ngaihna ka hre lo, kan inmelh ran a, "I nu chu hrehawm deuhin a awm ka ring, hrehawm a ti ngei ngei ang, ka chiang" a ti nghat nghat a, a thil sawi chuan min hnem pawhin ka hre lo, a hlim ang tih ka hlau a, a hrehawm pawh ka duh chuang lo, a inchhir phei chuan....

"Inchhir leh pawh nise awmzia a nei tawh lo, ka pa pawn a pawm thei tawh lo ang, keiphei chuan ka thei lo hulhual ang" ka vin deuh hlak hlak a, inhrosa hi ka ang mah zawk.

"Chuti chu inchhir lo mai sela ti raw?" a tih chuan fiamthu a thawh emaw ka ti hman a, a hmel ka va en chuan a lo thutak hmel viau thung a, "In ngaidam thei tawh bawk si lo a, a inchhir chuan inbuai leh vek ang" a tih zawm leh a, a dikin ka hria, rawn i chhir leh tawh miah lo sela ka duh.

"Mahse, ka pa hi ka khawngaih lutuka" ka aw chu zawi tak a ni, ka rilru a na ru hle bawk.

"Keipawn ka khawngaih, ani pawh a rilru a na ve ngawt ang" a lo ti leh a, a ṭawngkam chuan min ti tlangnel ve aniang sawi hreh em em pawh ka nei lo.

"Ka pa chuan Revival team a zui ṭhin a, rawngbawla a chhuah hlanin ania a uire san. Mahse, ka pa chuan be ṭha turin min la ti zel a, ka be ṭha thei lo ang keichuan, amah vangin kan dinhmun a chhe lutuk, ka pa nen kan awmhran a ngai bawk si a" ka insum hleithei meuh lo, "Min en lo teh" tiin a darah ka va nam ringawt a, ṭah ka duh a ni.

"Ṭap hmiah hmiah rawh, ka hrethiam che a lawm" a lo ti ve tlat a, ka ṭap ring ngam bik lo va, ka inpetruh ṭun reng.

"Ka ṭahbelh lutuka, a hma chuan hetiang hian ka awm ngai lo" lehlam hawiin mittui ka hru mawlh mawlh a, "A pawi hleinem, lehlam ka'n hawi rih ange" a tih hnuah a thawm sawt sawt a, a lam ka va hawi chuan min hnungchhawn zawngin a lo ṭhu a, ka awmdan chu a zia lo deuhin ka hria, ṭhiante bul pawh ni loa han inphawrh chiam chu a atthlak ka ti.

"Lo hawi mai mai rawh, ka sawi tawh dawn lo" ka tih veleh a rawn inher a, a ṭhut dan ngai tein bawp a khawkherh leh at a, min en ran bawk.

"Diktak chuan maw sawina tur ka nei lo lutuka, sawi nuam a ni bawk si lo a, nangpawn tumah hrilh suh aw, a zahthlak ania, uire tih te kha..." min chhang loin min en reng a, "Midang ka hrilh miah lo ania, Awmpuia takngial pawh ka hrilh lo, ka ṭhiante pawn an hre lo" ka han ti leh halh a, ka hrilh ringawt chuan awm a ti nuam lo leh hnuhnawh.

"Nang aiin sawina tur chu ka nei lo zawk ang" a lo ti bauh a, ka thaw huai ringawt.

"Keipawh hi insum ka ngai, ka no mah mahin ka hria, tunlai chu ka ṭahbelh lutuk a a zia lo tak tak a ni, Awmpuia nen kan buai ve renga, hei vang pawh hi a ni maithei..."

"I no lai anih vangin in buai zawk a niang" a lo ti zauh a, a thilsawi dan hi mak ka ti ṭhin. "Ka demawm i ti leh tawh a ni maw?" ka tih chuan "I hriatthiamawm lutuk a lawm, Anxiety i neih anih kha, i bialpa bula hlim chu a har ka ring" a tih zawm leh a, ka beisei aiin min hrethiam daih, a mak lek lek a lawm mawle!

"I ti tak tak em?" ka ti let hu a. 

"I huatthu a lo chhe deuh anih pawn a awm a lawm, i bialpa chu eng ngati nge i hrilh ve mai loh?" chu zawhna chu keimah ka inzawt a, eng ngati nge Awmpuia kha engkim ka hrilh loh? Ka ngaihtuah neuh neuh a, ka hrilh hreh chhan ber chu a phurrit nih ka hlauh vang a ni maithei, anih loh pawhin uire fanu ka nih thu hi ka zahpui vang a ni ang, a bulah khan ka sawi ngam tlat lo anih kha.

"Awmpuia chuan a ṭhen chiah a hria, ka nu uire thu chu ka hrilh lo, a hriat ka duh lo a lawm..." 

"Eng nge i hlauh a?"

"Ka hre lo, a mimal thil em a, chuvang chu a niang" dar a kan ak a, "Engtin nge in inṭhen?" tiin min zawt zui a. Engmah zep ka nei lo, Valerie chungchang te, Miss mazari leh Noeli thlengin ka sawichhuak a, ka thik vang a nih loh thu ka hrilh bawk.

"I thik loh chuan eng tak chu nge i buaina?" a ti fiah fak a, minti hamhaih angreng.

"Kan inhnial ṭhin a, ka thil sawi engmah a hrethiam lo, min thlawp ngai miah lo...i dik lo min ti zel a, ka thik vangah a ngai ziah a, sawi chhuah ka duh a lawm, khang ho kha sawichhiat te pawh ka duh...ka ngei thu te, an chet mawi loh thu te, rel bawrh bawrh kha ka duh ṭhin...." a lo nui huk a, ka en rang khawp mai.

"A nuihzatthlak loh a nia" lawm lo fea ka tih laiin "Ka nuihzat miah lo che, i lawmawm em a lawm" tiin a lo khi sung a, eng chu nge maw lawmawm a tih ni, ka sawi zawng pawhin ka hah.

"Ka lungawi loh thu kha sawipui ringawt ka duh a, engtin emaw ti let turin ka ti ngai lo; mahse, a lo ṭan zawk zel a, 'Thil awm lo i thik' min ti a, amah pawh khan a lo hrethiam ve reng tho a sin. Enteh, BJ....mipa ho hian nangmahni ngaizawngtute hi in hrethiam ve vek ṭhin tiraw..an biak dan che u aṭang hian..." phawk fahranin ka melh a, a nur deuh nang mai.

Ngaizawngtu a la nei lo em mawni le!?

"Ka hriat hmain min lo bem thut zel" a tih chuan ka awih vak lo. Mahse, "An mitmengah i hrethiam lo em ni?" ka ti leh hram a, "Ka lerh em em hleinem, ka duhzawng chu ka bem hmasa mai zel a" a ti leh a, a hrethiam lo tawp mai.

"Awmpuia chuan a hrethiam vek, ani chu a luck alawm" ka ti chu amah ka sawinep emaw a ti aniang "Ka luck ve tho" a lo ti bul hmuk a, ka ka hau ringawt.

"Chulam ka sawi lo"

"Anih eng lam?"

"Engkim a tawp, kan inṭhenfel tawh, ngaihzawng neih a peih tawh lo a, min ning tawh a lawm" 

"A hmangaih vak lo che aniang" a tih chuan pawm lo tak ka ni.

"Min ṭhen dawn khan 'Ka hmangaih reng ang che' min ti a sin, min hmangaih ve lutuk tho; mahse, ani chuan buaina tur dang a ngah a, ngaihzawng neih a ning pawh hi ka hrethiam ve lutuk, aaa....hrehawm ber tur chu nitin kan inhmu dawn a, a hma angin kan inpawh tawh bawk si lo a.."

"In inpawh em chu?" phawk fein ka melh a, eng ngaihdan nge maw a lo neih le!?

"Ka hrilfiah thiam lo che, ani chuan ṭhian a ngah a, semester dangah pawh ṭhian a nei ṭeuh, canteen-ah pawh kalpui tur a nei a, keichuan ka nei ve lo, ka ṭhiante an intihrang zel bawk si a, ka mal bik dawn lutuka, college te hi ban daih ka chak" chunglam melhin thawk ka la vang vang a, "Class pawh a nuam lo, tu bulah nge ka ṭhut ang, Miss Mazari a sual bawk si" ka ti leh halh a.

"In inṭhen tawh tho chuan hmeichhe dangte chu engahmah ngai duh lo mai la" zawi deuh supa a tih chuan "Noeli te intithei hmel ka hmu reng dawn a, Miss in class ah min khei fek fek anga, a nuam tawh lo ngawt ang" ka ti veleh a.

"Ngaihthah hmak chi an nih chu, ngawihsan mai mai zel la, an ti rei peih lo tawp ang" a ti leh mai a, min va han hriatthiam pui lo tak, inngaihzawnna lamah hi chuan hriat engmah a nei lo.

"Noeli chuan 'Rawn inchhir suh' min ti tawh a, Miss pawn class ah zawhna te min zawt a, min ti zak hrep tawh, ka thiam lo zawng tak thil min zawt.." sawi pawh ka sawi zawh hma hmain "Chutiang te chu ti let nek ta che, 'Ka chhir lo tawp ang, i lo buai ve na tur a awm lo' ti rawh" a lo ti hluk hluk a, phawk fein ka melh leh.

"Engah mah ngai suh i ti zo chauh sia" hrethiam lo fe a ka tih chuan "Ka ngei thut a lawm" a ti sam et a, huiha....

"Eng ngati nge ka hrilh vak che le, i hrethiam tak tak lo a nih hi" beidawng awka zeta ka tih chuan, "Kha i dik thlap tawh a lawm, i pangngai lutuk tawh tlat" tiin min lo nuih vur vur a, engtik laiin nge ka ṭah chhuak kha ka reh ka hre lo, thaw hah pawh ka nei tawh lo a, ka titi mawlh mawlh zawk chu a nia, ka awmdan chu keipawn mak ka ti, ka zang deuh hawkin ka hria.

"Ka inbunruah vang aniang, sawi tur ka ngah lutuk a lawm" a nui hmel chu ka han nuih ṭha veleh a, "Mi rel chak lutuk vangin i'n ṭap ania leh" a tih chuan ka nui tawp leh rang khawp.

"Mi rel ka chak vang a ni awzawng lo aw, ka rilru a na a lawm, ka nu leh Awmpuia vang hian hrehawm ka ti lutuk, ka thaw a ipik vek a, a hreawm em a sin" ka ṭawng ring khawp mai, ani lah chu a lo nui hawk hawk a, "A pawi hleinem, rel bawrh bawrh rawh, i duh leh kan rel phar vek mai dawn nia" a ti zui a, relah pawh ka lo inngai lo asin mawle.

Sana ka en chuan a lo tlai viau tawh, Benjamina chuan haw a la tum lo aniang chu ka din hnuah pawh a la ṭhu reng a, a phone a hmet mual mual reng. "I la haw dawn nange?" ka tih chuan a tho ve vat a, "Haw dawn e" tih pahin a inher a, a phone bih paha nui vur vur chungin gate lam a pan a, gate-a a chhuak dawn ṭep tih ah rawn lehhawi lehin "Damdawi te ei la, movie te en rawh, thil ngaihtuah tluk tluk loh hi a hrisel a nia" a rawn ti leh a, ka chhang lem lo.

A kal liam hnu lawkah inchhung lam ka pan a, ka mut a chhuak hlawl si lo a, Tv ah entur ka va zawng kual a, rei deuh chu ka meng zui a, ka mut chuan dar 3 a ri thuak tawh. Zingah u Lizzy'n min lo kaitho ve tehmial a, min bazar pui a duh a nih hmel e. "Scooty kan en nghal dawn nia, book a ngaih te ka ring, ka neih hunah chuan nangpawn i zir ve dawn nia, i bialpa kha inzirtir ila, tlawm deuhin min zirtir thei ang ti raw?" a ti siam siam a, kan inṭhen thu engmah ka la hrilh lo.

"I bialpa sawm zawk rawh" ka tih lah chuan "A buai thei lutuka, duh duh hunah a koh kal ve theih loh" a ti mai a, "Anih Benja" ka tih chuan min melh rum hrak a, "A call leh message pawh ka chhang ngai lo, a lo haw aṭangin min rawn tibuai leh nghal ngawt a, home ah khan awm mai mai sela ṭha tur, chaw eikhawmna a min hruai te a lo tum ve ngawt a, a zakthei lo ania" a ti zui hlak hlak a, Benjamina chu a lo haw na a rei leh tawh anih hmel.

Tukṭhuan eikhamah kan chhuak dun a, nu Hlimin ka pa pawisa lo thawn kha min pe a, kawr leh pheikhawk te ka lei ve a, chawhnu lamah Unaunu scooty tur kan va en bawk. A duh rawng tak an lo kawl loh avangin a book a, kuminah chuan a nei hman dawn lo anih hmel. Haw pahin chawhmeh te kan lei a, Christmas bawrah a bula kal ve zel turin min ti a, min sawm chhan pawh ka hria, a free theih nana min sawm a ni.

"Sam i cut thiam em?" ka ti phawng a, ani lah chu a lo phur khawp a, in thlen veleh veranda ah min cut sak a, rin aitakin a thiam.

"I bialpa nen in inṭhen a ni maw?" a tih chuan phat ka tum zet a, "Hmeichhiain sam kan tan hian chhan a nei ngei ngei" a lo tih leh vang chuan ka pha duh ta lo.

"Naktukah advance chirstmas kan hmang dawn a, danglam deuha lan ka duh" ka ti zawi sep a, "Colour ila, tlemin kan ti êng deuh dawn nia" a tih vangin dawrkawnah kan va lei chawp leh chuk chuk a, duhzawng ka neih lem loh avangin amah hlir chu ka thlan tir a, rawng chi thum zet a pawlh a, ka suk zawh hnua ka han in en chuan sawisel tur engmah ka hmu lo. Ka bulah lo dingin min lo fuih ve melh melh a, "Mipa hmelṭha te chu kawitinah an awm alawm, pakhat vang mai maiin lungngai duh mahta che, a aia ṭha i tawng leh mai ang" a tih chu pawm pui lo viau mahila inhnem nan ka hmang a, Awmpuia chu ka kawppui tura ruat a nih chuan kan la inrem leh ngei ka ring.

Dar 8 bawrah ka thawmhnaw hak tur thlanga ka buai melh melh laichuan ka phone a lo ri a, Mawitei a ni. "Vawiinah hnatlanna ah i lo kal ve lo a, Awmpuia te pawh an lo kal asin" a rawn ti hlut a, "Senior most ho chauh an kal a ni lawm ni?" ka tih chuan, "Ni bik lo, 1st sem chauh a lawm kal lo, Kimkimi nen inkal lo ve ve a, Puipuii te ka kawm ringawt a lawm" a tih zawm leh a, kal an tam em ka zawh chuan ka beisei loh deuhin min lo chhang a.

"Awmpuia nen kan inbia a, ka va biak dawn laitak khan senior most ho nen an lo ṭhu a, hmeichhe pakhat khan a number a dil a, an lo inpek laitakin ka va ṭhu a, va ṭawng ngeiawm kha ka tum miah lo; mahse, a awm dan kha ka ngei lutuka, 'Ngaihzawng i nei hmasa dawn a va ang ve' ka tia.." ka lo pawt chat vat a.

"Tu ber nge?" ka tih chuan "A hming ka hre lo, SU Tluangpuia bialnu hlui kha ania, ngo deuh kha, sam sen" a tih chuan hrechiang tak ka ni, Lalchhuanawmi chu nula mize zawi leh nungchang ṭha deuh mai a ni a, Noeli te veng a mi anih thu pawh ka hria.

"Va tibuai miah suh u aw, ngeiawm deuha ṭawngkhum te kha a ngai lo ania, keini pawh kan inhaw lo a, kan inṭhen ringawt a nia" ka han ti ve ngial a, ka rilru nat ruk zia chu aw.

"Ka la sawi zo lo, ka lo hrilh duh zawk tak che chu thu lawmawm lam ania, haw dawnah gate bulah kan inhmu leh a, lo fiam leh ka tum laitak khan 'Ngaihzawng dang neih ka tum lo, Rintein a neih hma chu ka nei lo ang' a tia lawm, 'I nei hmasa awm em mai' ka tih pawh khan 'I hre mai ang' a ti ve tlat a, a thutak hmel lutuk, Noeli ten haw rualpuia an sawm pawh khan a kalsan daih a, a zia hi a dang ve deuhin ka hria, nui chung pawhin min be tawh ngai lo, min ngei a ni maithei" a ti zung zung a, Awmpuia chhan dan mawlh chu ka lo ngaihtuah zawm a, lawm tur nge pawh ka hre lo.

Kan inbiak zawh hnu chuan an status te ka enkual a, Noeli Status ah chuan Chhuanawmi nena an thlalak a awm a, thik dan tur ka hre meuh lo a ni, lo thik thei dinhmunah ka ding lo bawk a, chuvangte pawh chu a ni mahna. Awmpuia ṭawngkam te ka ngaihtuah let a, min dang zawng zawng aia min ngaihsak tur thu kha a sawi a, a sawi laia ka rilru a nat tehlul nen tunah chuan ka awm tinuamtu a ni leh lawi a, englai pawha atana danglam bik nih chu ka duh dan a ni.

Dar 10 dawnah U Lizzy a lo lut hlawl a, "Mamawh i neih chuan lo sawi rawh aw, incheina vel kha chu lungkham lo la, chass thar kan zawng dawn nia" a rawn ti lut bawrh bawrh a, ngaihzawng dang neih chu ka la ngaihtuah chhin lo reng reng, ka theih pawh ka ring lo.

"Chutiang ka ngaihtuah lo, zirlaiah ka insawrbing dawn" ka ti ve ngat a, ka tum tak tak reng bawk. 

"Star tu che pawh ka hre maithei asin, hmanni ah a sawi zuk che a" 

"I ṭhiante zinga mi anih chuan ka duh lo sa"

"I duhzawng a niang, a fel ber asin, an lo len leh hunah ka hmuhtir ang che" ka va melh ralh a, "A sang ber kha i la hria em, T-shirt var ha kha" a tih pawh chuan ka hrechhuak zo lo, ka kal pel thuak ringawt a, an hmel pawh ka hmu chiang hlawm lo.

Ka hak tura ka thlan te chu min enpui a, a dangin min thlaksak bawk. "Nu deuha inchei hi i inhmeh zawk ang" tiin kawr senno min thlan sak a, a pindan lamah letin rei lo teah bag nen a lo lut a, a bag min ah tir a tum anih hmel.

"Rackshack i ak reng zel a, hetiang lam hi uar rawh, lady deuha inchei hi inhmeh ania" tiin min hrilh a. "Min pe dawn em ni?" ka tih chuan a bu ve mai a; mahse, a man min hrilh vang chuan ka tim leh hnuhnawh a, amah lah chu a han thil phal khawp a, mak ka ti lek lek a ni.

"I ui leh ange aw" ka tih chuan a duh lo ve hle a, "I bialpa i ṭhen sia, ka hnem ve na che a ni mai" a ti a, ka nuih a ti za deuh.

Zing ka tho tlai deuh a, college ka thlen chuan an lo tam tawh hle a, tualzawlah ṭhutna siamin pandal an lo zar khup a, stage ah chuan banner lianpui a in tar bawk. Photo booth an siamna lamah chuan miṭhenkhat an zi laih laih a, Noeli te ṭhian ho thlala pawh chu ka va hmu a, ka ṭhiante erawh hmuh tur an awm lo.

Tlar hnung lamah ṭhuin ka han hawi kual a, Stage a Awmpuia che tla ka hmuh chuan ka awm a nuam deuh huai mai. Electric hrui niawm tak hi lo sam kual a, a buai viau aniang a rawn hawi lawk lo a, progamme ṭan hnuah lah ka hmu zui leh tawh lo a, tlar hma lamah a ṭhu anih ka ring. Ka ṭhiante ka hmuh loh vangin semester dang ho karah ka ṭhu a, ka bula ṭhu te chu an hming takngial pawh ka hre lo. Professor ten hun an hmang a, chumi karin zai kan ngaithla deuh reng a, programme zangkhai deuhin an kalpui bawk a; an lam luih luih reng.

Ka nin deuh avangin phone ka khawih leh ṭhin a, ka ṭhiante ka text bawk. Rei deuh hnuah Mawitein a lo chhang a, Refreshment an lo buaipui a ni awm e. "Most ho building hnuaiah kan awm, i duh chuan lo chhuk ve rawh" a rawn tih chuan ka tho vat a; mahse, building ka thlen phei hmain Miss Mazari chhuk tur ka va hmu a, ka let leh rang khawp mai.

Ka va ṭhut leh hnu lawkah ka ṭhutpui te chu an tho daih a, mipa ho an lo ṭhut ka hlauh vangin ka hawi kual deuh reng. Mahse, rei vak lo ah an lo let leh a, vur leh mix tih angreng an lo lei a, an ṭhian ho chuan an eikhawm laih laih a, min sawm ve tak nain ka ei pui duh lem lo, boruak a uap bawk si a,  vur chu ka eichak ve deuh avangin dawr lam ka pan a, ka kal chhungin refreshment an lo sem aniang an tho sang sang a, gate lama lo chho an awm nual bawk.

Ka ril a ṭam tawh hle  a, Mawitei te bula awm ka duh viau tawh, mahnia awm chu nuam ka ti lo a, thurualpui neih loh pawh a hrehawm. Kimkim zawk chu ka call a; mahse, a chhang thei lo, chutih laimek chuan gate bulah Awmpuia nen kan intawk hlawl a, min hai deuh nge ni min rawn en chik khawp a, kei lah chu ka ding ringawt a, ka lai deuh ṭut mai.

A lo kal hnaih takah chuan min rawn nuih var var a, "I va nalh ve" a tih chuan lai chhe tak ka ni.

"Thil i ei tawh em?" tiin ka lo nuih let sang a, "An la tam lutuka, Sir Mafela camera ka han la lawk ange, lo va ei rawh" a tih hnuah min kalpel mai a, pen hnih khat bak ka pen hman lo 'Rinte' a rawn tih vang chuan ka lehhawi leh vat.

"Mass Putar lem inbelna ah khan i duh chi a awm" a lo ti a, ka bo deuh hu mai.

"Engtin maw?"

"I chhang duh chi" tiin a kal leh daih a, ka awmdan chu ka sawifiah thiam lo, a kal chho chu ka thlir a, kalsawn nachang pawh ka hre lo, zep loah chuan ka ngai a ni, ka ngai takzet, ka rilruin ka be mawlh mawlh a, a hre pha der si lo.

'Ka rilru hi hria la, a hrilhfiahna min pe thei la ka ti ngawt mai, eng hi nge hmangaihna chu ni ta ang le, ngaihtuahna pahnih ka nei a, ka tel loa zalenna i nei te, i hlim zawk tih te, i tan engkim a awlsam phah zia te hi ka hre ve reng a, heng vanga rilru damna ka lo nei ve hi hmangaihna chu a ni ang em?

Hmangaihna hi ka hrethiam lo a ni, i tel loa mal leh khawhara ka awm te, ka ngai ngawih ngawih reng che hi hmangaihna tho a ni em, i ṭhatna tura inṭhen ka duhna hi nge  i kianga awm ka chakna zawk hi hmangaihna chu ni ta ang? Ka rilru hi a insual buai reng a, keimah takngial pawh hi inhriatthiam loh chang ka nei, heng zawhna te hi ka inzawt a, i tana ṭha tur hi ka duh ber a ni; mahse maw, i tel lo hian ka ṭha ve hlawl si lo a, ka chelh lui lo che kha ka inchhir leh ṭhin, chu chu ka hmangaih vang che a ni ang ti raw....?' Chhanna awm lo zawhna chu ka inzawt a, a kal liam thlengin ka thlir bawk a, ka awm a tawt leh ṭun tawh.

"Rinte" tih ri ka hriatna lamah chuan ka inher a, Corridor aṭangin ka ṭhiante pahnihin min lo hui sawk sawk a, "Intlar ve suh, kan lak kep che" an tih vang chuan Building chhung lam ka pan tlang a, ka va luh chuan tlarhnung lamah an lo ṭhu a, chhang bawm min lo pekah chuan MassPutar lem a lo chuang vang a, a chhungah chuan donut chocolate leh sparkle candy telna ka duh ber chi kha a lo awm a, minti hlimtu ber erawh thil dang daih a ni.

"I va lawm awm ve a" Mawitein a lo tih chuan ka ṭhu ṭha vat a, "He chhang hian ka lung a ti leng" tih pahin hnuk ulh zetin ka ei a, ka lem hleithei lo, ka mittui a tla mai dawnin ka hria.

Programme kan ṭan leh hnu chuan ka ṭhiante bulah ka ṭhu ve ta a, nuam erawh ka tih phah lem lo, an ni pahnih chu an phur thei hle a, zai an awm apiangin an ṭhuthmunah an ding a, an lam nasa thei hle a, min lam tir ve tumin min pawt tho reng bawk. SU lamin Professor te pangpar an pe a, Awmpuia ko chhuakin Miss Mazari kher chu rose an pek tir a, chutah chiah chuan hriat chhuah ka nei a, senior most ho lo au dual dual te, SU hoin Awmpuia kher an ko chhuak te chu a chhan a awm, an lo hrethiam ve hle tihna a ni.

"Zarchhiai mai mai chu, nuam a va ti hawr hawr ve le..." ka ṭhianten an tih laichuan ka ṭhu kun daih a, en pawh ka en rei duh lo. Haw ka chak a, ka ṭhiante bula ka rawt lahin "A tawp thleng awm ang, thla pawh kan la la ve lo" an ti tlat a, ka hawsan thei mai bik lo.

Dar 3 bawrah Programme chu a zo a, photo booth bulah kan va ding ve reng a, thla lak tum an tam avangin kan chang thei lawk lo a, kan nghak rei khawp mai. Chutia kan din laichuan Jerrya a lo kal a, thlalak puiah min lo sawm ve leh mauh mai a, "Photo booth ah kher a ngai lo, hetah hian a ni mai" a tih vangin mi karah kan la dun a, a ṭhiante hoin min lo hmehsak mawlh mawlh.

Midangin thla min lakpui an tum leh laitakin Kimkimi a lo inrawlh a, Photobooth lamah min pawt phei dawr dawr a, vawi nga vel kan lak hnua kal leh mai kan tum chu Awmpuia ka hmuh vangin ka ding chawt a, kan mit a intawng chiang khawp mai. A rawn kal hnaia, engmah pawh sawi loin ka bulah a rawn ding a, ka ṭhiante pahnih chu an kalsawn rang hle bawk.

"Naktukah em ni i haw dawn?" ka tih chuan a bu nghat a, chuta ka lam rawn hawiin min en vang vang a, camera lam reng reng chu rilruah a awm lo. 

"Christmas hman nuam aw" a ti zawi sup a, ka lungphu chu a muang siai siai mai hian a hriat a, ka hnuk a ulh tlat.

"In pose ang le" tih pahin ka darah min rawn kuah salh a, a nui hmel mawlh chu.

"Lo hawi ru" an tihna lam chu ka hawi vat a, camera a de chuai a, ka nuilui hmel chu a ṭha tehchiam lo ang, ka hlim a, ka ṭah a chhuak hle bawk.

A hmel chu ka en leh ṭhin a, sawi duh em em sawi chhuah theih loh ka van ngah si em, ri loin ka bia a, 'Kan tawp dan chu engtiang pawh ni sela, kan hun liam tawh kha hun hlu tak vek a ni, i kianga hun khawhral kha ka inchhir lo va, kir leh thei pawh ni ila ka pawm leh tho chein ka ring, hriatreng tur hun hlimawm tak tak min pek avangin ka lawm a, vannei ka inti bawk' ka lam a rawn hawi vangin tawitein ka lo nuih a, chumi hnuah kan kal hrang ta ve ve a, haw dawn thlengin ka hmu zui leh tawh lo.

Christmas hma karah ka pa a lo zin a, ka kawr duhzawng ka hmuh mai loh avangin puanthan kan lei a, kan ṭhenawm nula hnenah ṭhui turin ka dah bawk. Ka pa chu ni hnih chauh a cham a, Nu Hlimin christmas hmang tura chelh a tum viau nain kan khaw lamah kohhran an hlim lai a ni a, helaiah hmelhriat a nei bawk si lo, "Nakum chu vawk vulh ka duh a, hun awlah vawkin te sak lawk a ngai" tiin min haw san leh mai a, ka nu chanchin erawh ka hre tlem khawp mai, nu Remin zu a ruih ṭhin thu min lo hrilh a, chu chu a chanchin ka hriat chhun a ni.

Awmpuia pawh a haw ta a niang a reh vang vang a, a status takngial pawh hmuh tur a awm lo, vawikhat chu Noeli status ah an lui kalna a rawn lang a, video ah rei lo te a rawn ti lang a, Noeli chu Awmpuia te huanah pawh a feh ve a ni awm e. Chhun lamah tih tur em em ka nei lo bawka tiin Doormat ka phiar ṭhin a, pathum lai chu ka zo tawh. Zanah hi chuan Movie ka en tluk tluk a, lung tih len lo chu ka tum ve hle ṭhin, ngaihtuahna la peng thei thil tih tur ka dap a, a zia phah vein ka hria.

Urlawk ni chuan U Lizzy te ṭhian hoin chaw eikhawm an tum a, min sawm nasa hle a, ka tel loin a nu'n kal a phal bawk si lo. Phur lo deuhin ka insiam a, kan va thlen rualin ka inchhir leh a tih theih. Hmeichhia hlir an ni a; mahse, zu a in ru kerh kerh hlawm a, an titi ka ṭawm pha lo hle bawk. Pindan lama an awmkhawm laiin Muani nu eirel ka lo pui a, nu upa lam deuh; ṭawng duh zet mai a ni a, ka kawm theih awmchhun te pawh aniang chu, midang ho chuan min be mang lo a, unaunu lah a rui a mu zawi reng a, a chhuah chhunah hian fel ṭhin sela chu heti taka khuahkhirh a tawk lo tur.

Chawei kan siam hnuah pawh Unaunu chu buaipui ngaiah a ṭang a, a ṭhianten an kai tho thei tlat lo. Ka ṭhinrim deuh chuan khum aṭangin ka va pawt tho a, a duh lo chungin bathroom ah ka luh pui a, inkawm luak mai turin ka hrilh bawk. "Ka luak a chhuak lo, chaw min eisan mai rawh u, ka ril pawh a ṭam lo" a ti bui bui a, min hruaitu ber chutianga a awm chu ka tan pawh nuam lo duh tak a ni.

"Vawikhatmah ka zui tawh lo ang che, hetianga i awm dawn anih chuan khawiah mah ka kalpui tawh lo bawk ang che" tiin ka vau khar khar a, "Tih palhhhh" tih bak chu sawi tur a hre lo. Luak tura ka tih tlat avangin a han tum ve ngial a, chil a chhak phurh phurh ringawt a, a beidawn thlak khawp mai. A ṭhianten min lo koh avangin ka chhuahsan a, dawhkan ka va kil hnu lawkah a lo chhuak a, a rawn ṭhu tur te chu a thleng a hai baw lo chauh a, zahthlak duh tak a ni.

A harhfim ber ka nih vangin thleng ka sil a, an ṭhian ho chuan sitting room-ah an ri bawrh bawrh reng. Phone an hmang thawm leh an zai ri te chu ka ngaithla ve reng a, unaunu pawh a harh ve ta deuh aniang a ṭawng lang lang a, kan haw hmain reh vek hman sela a ti, Nu Hlimin min lo la nghak ngei anga, min hau tel ve leh ngei ang. Thleng ka sil zo ṭep tih ah unaunu chu a lo kal phei hlawk hlawk a, khawngkhar lam a pan chu ka thleng zui vang vang a, pawna a ṭawng thawm chu ka hrechiang thei lo, tu emaw biak a nei tih erawh ka hria.

A ṭhianu lo phei ve chu ka lo zawt a, "A bialpa nen an inhau deuh anih kha, pawnah a awm a, an va sawidun dawn aniang" a ti sam et a, a rui bawk si a, a bialpa pawh chuan a lo hau duh maiin ka ring, va hmu rih lo sela ṭha zawk tur.

Thleng ka sil zawh hnuah pawh chuan a rawn lut lawk lo a, Sitting room ah phone khawih pahin ka lo nghak a, darkar chanve dawn chu a liam tawh. "Va ko lut teh" tiin an ṭhiante ho chu an intir a, tumah chuan kal an tum chuang lo. Ka nghak leh deuh a, a la rawn luh loh reng avang chuan ka ning ta deuh a, hawpui vat a ṭhain ka hria.

Khawngkhar ka va hawng chu le tumah reng reng ka hmu lo, ka han hawi kual thuak thuak a, a reh ṭhuap ringawt, an ṭawngthawm takngial pawh hriat tur a awm lo. Ka call zui a, a ring zo ṭhak a, a hre lo nge a la duh lo zawk ni? Ka tihngaihna hre lo chuan ka call nawn tluk tluk a, a vawi 6 na ah a rawn la ve hram a, "Lo awm rawh, kan chhuak lawk a, ka rei lo ang" tih zawng a sawi a, a dah leh hmak mai.

Lungawi lo ru deuhin ka nghak leh a, a ṭhiante dang te chu an haw zauh zauh tawh. Muani lah chuan an kalna awm a hre miah lo a, call lah a chhang leh thei tawh lo a, thin a rim et et. Darkar hnih a liam a, call a la chhang thei chuang lo, keimah chauh chu ka awm tawh a, Muani nu a mu tawh bawk nen hawsan mai te ka duh a, ka hawsan anih chuan a chan tur ka hre ve reng bawk si. Dar 9 rik dawn thleng pawha a la rawn let loh vang chuan hawsan ka tum bur tawh a, ama zir loh a ni bawk a, min dem thei bik lovang.

"Ka haw mai dawn, duh leh kan inthlen hmaa dawr velah ka lo nghak mai ang" tiin a ṭhiannu chu ka hrilh a, min lo hnial bik lo va, pawnah min zui chhuakin taxi min chanpui thlap bawk. "Biak ka lo tum leh ang, a kai deuh hi chuan a ngaih a sam thei lutuka, hetiang chuan 26 zanah pawh a rawn chhuah theih loh a hlauhawm a lawm" a ti ve luam a, a nuin a man a nih teh chuan a chhuak thei lo chiang khawp ang.

"Keipawn biak ka lo tum ang, hetah a lo let anih chuan lo tir haw nghal rawh aw" ti a ka chah leh hnuah ka kalsan a, dawrkawna lo nghah mai a ṭhain ka hria, mahni a haw chu  ka hreh tlat a, sawifiah pawh ka chak lo.

U Lizzy chu ka call leh ṭhin a, message pawh ka thawn nual mai. "Dawrteah khan ka lo awm ang, kan haw rual a ngai ania, message i hmuh veleh lo call ang che" tih angreng chu ka thawn mawlh mawlh a, a hmu ve mai turah ka ngai.

Kan vemg ka thlen chuan kan inpeng bula dawrte chu a lo la inhawng a, ka va luh laichuan dawr nghaktu chiah a lo awm a, kan inhmelhriat ṭha ve tawh bawk a, min lo be ve hlut mai. "U Lizzy ka'n lo nghak lawk ange, i inkhar dawn hnai em?" ka tih chuan "Khar ve ṭep tawh, panhnah ka khawih laklawk a, naktukah damlo kan te ka duh si a, ka awm rei deuh a nih hi" zangkhai deuhin a ti a, chinai te lo tahsak pahin kan titi ve luam a, kan zawh hnuah pawh unaunu chu min la nghah pui ve rih a, ka ṭhu rei leh tawh khawp mai.

"Tlangval lo kal ṭhin kha Lizzy bialpa em ni, cigarette hi a rawn lei ve ziah a, ka haw pah hian in gate bula a ṭhu hi ka hmu ṭhin a" a tih chuan "Benja anih dawn chu" ka ti mai a, ka sawi thui duh lem lo.

"A hmelṭha reuh sia, a awmdan kha mak ka ti ṭhin a lawm, drugs addict anih te ka lo ring a" a tih leh chuan ka lo phat sak vat a, "A fel ve lutuk, zu a in bak chu engmah dang a tih awm ka hre lo, a lo leng ṭha ngam vak lo a, nu Hlimi a hlau a niang" ka ti fiamthu a. "Lizzy lah hi mipa dang dangin an lo thlah bawk si a" a ti leh erawh chhan ngaihna ka hre lo, kawngkam maiah dawr a nei a, kan in nen a inhlat bawk si lo a, tunge lo lut chhuak ṭhin chu a hre hneh khawp ang.

Darkar khat zet ka nghah leh hnu chuan a ni em em ta loin ka hria. U Zuali pawn haw   a duh viau tawh a, ka ti khawtlai rei mai mai a ni. "Ka va haw a nge, ka nghak tawh lo mai teh ang" tih leh thawh ka rual a, min hnial lo khawp mai. Ka chhuah hnu lawkah a inkhar thawm ka hria a, keipawh muangchang tawh loin inlam ka pan hlawk hlawk a, kawngka a la inhawn danah nu Hlimi chu a la mu lo anih hmel a, min lo zawt anih pawhin zep emaw thup buai neih ka tum lo, unaunu chuan zilh a mamawh bawkin ka hria, a laizawn ka nihna angin a nun a thlahdah lutuk hi ka duh lo.

"In va lo haw har ve, phone che u ka lo tum mek a" Nu Hlimin a lo tih chuan ṭi ru deuhin ka pan phei a, "Khawiah nge i u" tih pahin kawngkhar lam a thlek zat bawk.

"A kalna ka hre lo, thleng ka sil laiin a ṭhian pakhat nen an lo chhuak daih a, a rei angreng sia ka lo haw san tawp, kan lenna te kha an mu duh tawh a" sawimam ngaihna ka hre lo a, ka hrilh tlang rawt mai.

"Tu a ṭhian nge, a kalna tur a sawi lo em ni?" a lo ti hluai a.

"Tu ber nge pawh ka hre lo, a lo haw ve ṭep ang" ka ti leh chu min ngaithla tawh lem lo, u Lizzy chu a call a, a hmel aṭang chuan chhanna a awm lo tih a hriat theih.

"Rawn haw teh se, he nu em em hi chu vuak sim deuh a ngai a nih hi" a ti hmarh hmarh a, a ṭhutna aṭanga thoin choka lam a pan zui a, "Mipa nen em ni an chhuah?" a rawn tih chuan "Ka hrechiang lo" tih zawngin ka chhang a, sawi tam ka hlau a ni ber, hek te pawh ka ang deuhin ka hria.

"A va han chak dawn lo mai mai e, vawikhatmah a chhuak leh tawh lo ang, hmeichhe khawsak phung pawh a ni lo" a ti hlak hlak a, thingpui a chhuang nge pawh ka hre lo, a thawm a ri rawk rawk a, titau chunga che hi a ang ber.

"Ka mu dawn ania aw" tiin pindan lamah ka phei san a, a lo haw hmaa muthilh daih ka duh, an inhau thawm chu hriat ka chak lo. 

Ka inthlak zawh veleh ka mu a, ka muhil ṭan siar siar tih a ka harh zawk a, nu Hlimi ang thawm chu ring ṭha tak a ni. Thawm a ri ṭhuai a, an inbeng a ni ngei ang!? "Tlangval em ni i nih, vawi engzah nge ka sawi tawh, zu rim te chu i rawn nam haw lehnghal a, ding vat rawh...." a chek zui tlat tlat a, "I kal dan te mai mai chu leh, zahpuiawm lutuk" a tih leh hnuah thawm a ri leh ṭhak a, a vua ni zawkin ka hria!

"Ka haw tlai loh hi, Rinsangpuiin min lo haw san daih a lawm, 'Dawrah innghak ang' a tia, U Zuali dawrah rei deuh ka nghak a, ni lo sela chu ka rawn thlenna a rei tawh ang" u Lizzyn a tih chuan ka ner sawk a, U Zuali chu ka haw dawn khan a inkhar nghal a, engtin nge dawt chiang lutuk a sawi theih le?

"I nauin a nghak rei lutuk zawk che, a hriat loh laiin i put ru zawk anih kha, dawt lah hi i sawi zuah zuah reng a, vawikhatmah i pawn chhuak leh tawh lo ang" Nu Hlimin a tih laiin, "Ka chhuah khat em hi, chhuah chhunah ka am ve a ni mai a lawm, min khuahkhirh nasa leh lutuka, awmdan ka thiam lo zo anih hi" a lo ti let pang pang a, Nu Hlimi chuan a haw khawp mai.

"Hmeichhe khawsak phung hian khawsa ve rawh" a ri leh zawt a, vawithum lai a ni, "Min vaw tawh suh, zan rei pawh a la ni lo a, mipa ka inruk tir pawh a ni lo, Rinsangpuii nghak lo ila ka rawn tlai lo ang" unaunu chu a ṭap lek lekin ka hria. Ke pen thawm ka hria a, "Mu nghal ang che, tukverhah te khan bar ka vuah vek ang, len chhuah chu ngaihtuah pawh ngaihtuah tawh suh" Nu Hlimin a ti leh lang langa, rei vak loah ka pindan kawngkhar a rawn inhawng a, a ṭap hmel hmuh ka lo beisei tehlul nen rum theihthawp hian min rawn melh a, a rawn luh laichuan ka lo tho ve mek bawk.

"Mi hek i va hrat ve a, ka nu bulah hian lo ṭawngtam tawh lo la a ṭha ang, awmpui mai mai i nih kha hre rawh, ka lo khawngaih ve tehreng che nen, i dinhmun i hre lo mah mah" min nuihzat hmel taka min en chungin ka khum lam a rawn pan a, "I duh chuan va hrilh leh rawh, ka bialpa nen a car-ah engemaw kan ti dun ania, kal la va hrilh nghal rawh" min tih khum sak sak a, sawi ve tur pawh minti hre lo.

"Ka call pawh i chhang thei lo a, rei deuh ka nghak che a sin" ka ti dek dek chu, "Hria ang che, i lo inrawlh leh anih vaih chuan ka beng hreh lo ang che aw, ka chungchang hi vawikhatmah lo sawi leh tawh suh" a mitmeng chuan min vau a ni ber, "Zakthei lo lutuk, duhsak pawh i phu lo ve" a tih leh hnuah a inher nghat a, a kalchhuak chu ka en mawl tawp a, ka hrethiam lo takzet, engtin nge min puh theih zawk le, a ṭawngkam te lah kha aw.....

A mizia ka hrechiang a, huata lak loh ka tum ve hle a; mahse, a ṭawngkam ṭhenkhat kha ka bengah a cham tlat a, a ruih vanga sawi mai maiah ka ngai thei lo, Ka chunga a rilru dik tak anih ka ring a, ṭap em lo mahila rilru a na ve takzet. Ka mut ṭhat leh hnu pawh chuan ka khur deuh dar dar a, a thaw a hah ru riau bawk. Inbengdaih tumin ka inhumruh a, hetiang changa ka talbuai ringawt zel hi nep ka inti, kei ang tan chuan chhel a ngaih zia ka hria a, inthunun ka zir a ngai.

Zing ka tho chu Nu Hlimin min lo zilh a, "I u hi i zep pui ṭhinin ka hria, thil sual inzep sak hi ka duh loh zawng tak a ni a, a ṭhatna tur i duh pui anih chuan i zep lo turah ka ngai bawk, nidangah chuan ching tawh lo ang che, 'Engmah ka hre lo' tih kha ka duh tawh dawn miah lo a nia, ka khuahkhirh dawn a, a chhuak ru emaw, a ṭhiante a hmu ru emaw hriat i neih apiang min hrilh ang che" a ti khar khar a, ka aw ve tak nain chak lo ru tak ka ni, tel ve lo tawp ila ka duh tawh.

Christmas tuk a ni a, ka pa hnen aṭang chiahin Chibaina thu ka dawng a, ka christmas hman tawh azawngah a la nuam lo ber awm e. Unaunu lah chuan min be duh hlek lo mai a, ka biak pawhin min chhang ngai lo. Ka inkhawm tih loh chu pawnah ka chhuak lo a, zan lamah pawh inkhawm ban hnuah ka mu daih a, ṭhiante lahin min biak an tum lo a, ka pa lah a zaikhawm daih a, tumah han kawm tur pawh an awm lo, a rehin a reh ngawih ngawih mai a ni.

Noeli status ka chang ṭhin a, an ṭhian hoa ar an kan thu leh an thlalak ṭhenkhat chauh chu hmuh tur a awm a, Awmpuia chu a tel ve lo nge ni, a hmel ka hmu lo reng reng. Kum hmasate kha chuan mahni khua ve ve aṭangin Christmas kan hmang dun a, kan inbe zingin kan inngai thei hle kha a nia, thil danglam chak lutuk hi a hrilhhaithlak ka ti, ngaia neih a har ka ti takzet.

Ka muthilh hmain va ka inphihfai a, ka pindan bathroom hi u Lizzy bathroom nen a in zawn chiah a, a ṭawng ri pawh chu hrechiang tak ka ni, ka chungchang a sawi mek a, tu hnenah nge a sawi erawh ka hre lo. "A inla fel lutuk te hi ka ngei a lawm, hling kung a ni ringawt, a fel poh leh min ti lang sual zel a, diktak chuan ani te chu thingtlang mi a nia, khawpui nula nen chuan kan inang thei hleinem, kan lifestyle pawh a hrang hlak a, pawisa chungchangah pawh kan dinhmun a inang lo a, a inrenthiam te hi ka nuin min zilh phah zel a" tiin a ang zui hlak hlak a, nizan thil thleng te sawi zuiin ka laka a lawm loh thu chu hahipin a hrilh a, nghak loa ka hawsan kha a lawm loh chhan ber a ni.

Ka awm a nawm loh phah zo dawna ka hriat vangin chhuah leh mai ka tum a; mahse, a thil sawi vang chuan ka ding leh rih a, "Tunah chuan ka ngei zo vek tawh, in khatah kan chen a ngai bawk sia, Hostel-ah awm daih sela ka ti ania, ka nun a ti chep zo vek, college te hi zo vat sela, haw vang vang sela a ṭha ang" tiin a mi biak chu a hrilh a, ka rilru nat zia chu aw, ka ṭap thei lo a, ka chungrilah min vilh ngut ngut. Tu te mah hian min mamawh ve loa inngaihna ka nei a, ka khawvel chu lungngaihna hlir a ni, pawn lamah nuam ka ti lo a, ka chenna in pawh chu nuam ka ti chuang lo, thi daih ila a nuam zawk ang tiin ngaihtuahna ka nei a, ninawm ve sek nih te pawh ka hlawh lo zawkin ka ring.

(End of chapter - 16)