BLUE BAYOU (CH - 17) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 17

Chhin khat te mah ka chhing lo, ka inngaihtuah lungpuam a, ka nun chu chep ka tiin khawiah mah hian ka leng ve lo niin ka hria. Thi ta ila tih ngawt chu ka ngaihtuahna ah a awm a, lo thi ila tuin nge min ṭah ang le? Ka pa chu a ṭap ngei ang, ani lo tunge min ṭah tur awm ang aw? Awmpuia ka rilruah a rawn lang a, ka chiang ngam tawh lo, ani chu a hla lutuk tawh, ka awm ve emaw awm ve lo emaw a tan chuan danglam a awm tawh kher lo ang. Ka thil ngaihtuah chuan ngaihdan thar min neihtir a, thih chu ka tan awmze nei lo ber thil a ni, ka pa bak chu min ui tur leh min ṭah tur pawh an awm lo ang, chuvang chuan thih ka la duh lo a ni.

Tukṭhuan kan eilaiin Nu Hlimi bulah chhuah ka dil a, "Ka ṭhianten an vengah ruaiṭheh turin min sawm a, ka kal hma deuh anga, ka lo haw har lo ang" tiin dawt ka hrilh a, nu Hlimi chuan min zawt chik khawp mai. Mawitei te veng ka hrilh a, college a ka ṭhianṭha ber anih thu te, Kimkimi pawh a tel ve tur thu te ka hrilh luam a, "Inkhawm phawt la, chawhnu lamah i kal dawn nia" a ti ta hlauh a, ina awm ka nin vang a ni ber, U Lizzy hmuh loh tura inthiarfihlim ka duh bawk.

Inkhawm ban veleh ka insiam a, Mawitei te veng lam pawh pan loin kawtthlerah kein ka kal a, kalna tur ber pawh ka hre chuang lo, mi veivak te ka thlir a, ngaihtuahna lah chu a chawmawlh zo vek a, ka bing churh mai. Heti hian bo vang vang ila, haw na tur hre tawh loin bo hlen ila, movie a kan hmuh ṭhin ang hian khawiah emaw nun bul ṭan ṭha leh ila tiin suangtuahna ka nei a; mahse, kan khawveh zim zia chu... 'Rinṭahbelh' ti ri vang chuan chiang tak ka ni.

Min kohna lama ka va hawi chuan kawngpui lehlam aṭangin ban a rawn vai zauh a, mipa ṭhenkhat nen an lo ding a, "Khawiah nge i kal dawn?" a rawn ti lang lang.

Chhan ka tum zuau a, a hawi sawn leh avangin ka chhang ta lo a, kal leh mai ka tum laiim motor horn a ri tuar a, ka va hawi chuan a rawn tlan phei hlawk hlawk chu ka va hmu a, ka lo nghak veleh.

"I leng dawn em ni a?" ka hma ah tak a rawn ding a, a mit a sen deuh tih loah chuan rui hmel a pu lo. 

"Dawn hran lo" ka ti tlawng a, lenna tur ka hre miau lo a ni.

"Khawiah nge i kal dawn?"

"Ka hre lo"

"I broke leh tawh em ni a?" a nui deuh hui a, ka va han chhang chak lo mai mai.

"Ka tei kual mai mai" ka tih laitakin a ṭhianten an lo ko a, "Lo va kal mai rawh u, ka ṭhiannu hi sawtah ka va kal pui lawk" a lo ti reuh a, ka sawm tawp si lo.

"Khawiah mah kalpui ka ngai lo, i ṭhiante saw va zui rawh" 

"Ka kal ve peih chuang hleinem, ka va thlah ang che" a ti leh ṭalh a, a ṭhiante chuan an kalsan mek a, min zui a tum tak tak aniang a la ding reng.

"Kalna tur ka nei hleinem, heti hian ka kal mai mai dawn" ka pawr viau mai, mahnia a awm ka duh a, titi dun chu chak lo tak ka ni.

"Kalna tur i neih loh chuan kan leng mai mai dawn nia" tih leh ka hmalama kal a rual a, let leh mai tur nge tiin ka inngaihtuah buai a, ina haw lah chu ka chak hlawl si lo a, lenna tur tal hria ila ni tur.

"Ka kal chak peih lo ania" ka tih chuan a rawn inher vat a, "Ke a kal te chu i ning lo em ni, ka bike va la ila, ruaiṭheh turin kan kal dawn nia" phawk fein ka melh a, eng nge a hriat reuh chu le, kawm tur nei lo pawh a ni si lo a, minti buai tih a hre miah lo aniang.

"Taxi ka la mai ang, ruaiṭheh pawh ka chak lo" a rawn let leh a, ka hmaah rawn dingin "Kalna tur i hre lo a, in a thlah i duh bawk si lo a, intihhlum tuma lo chhuak i ni em" a ti mauh mai a, ka ka hau ringawt.

"Tum teuh lo mai, ninawm minti viau hlawm mah se ka dam ve tlat dawn, ka tihhlumin awmzia pakhat mah a nei lo" ka ti a, ka vin deuh chiam mai.

"Tih tur engmah i nei lo tihna anih chu, kan leng mai mai dawn nia" ka banah a rawn vuan a, min kalpui dawr dawr a, khawilam nge min pan pui a tum ni, footpath aṭangin a chhuk a, taxi a phar zui bawk.

"Khawi lamah nge?" taxi driver-in a lo tih chuan "Tlan tawp mai rawh, kan ride dawn" tih zawngin a chhang a, ka lam a rawn hawi chuan tukverh lamah ka tawlh phei vat a, taxi driver chuan mak a ti deuh aniang lehhawi meuhin min lo en a, "Ka tlan tawp dawn a maw?" a tih chuan ka chhang lo.

"I duh duhna lamah tlan rawh" Benja'n a tih leh hnu chuan a tlan chhuak a, tukverh lam hawiin kei chu ka ṭhu ngawi reng a, thui deuh kan tlan hnu thlengin kan inbe lo. Ka va hawi chuan a phone a lo hmet mual mual a, darthlalang aṭangin kan driver chuan min lo melh leh zauh ṭhin.

Ka awmdan chu nuam ka ti hlawl lo, thaw a ipik a, ngaihtuahna a vak kual nasain ka hnuk a ulh ṭun reng a, kan khaw lam ka ngaihtuah phei chuan ka lung a leng ve takzet. Lo han haw zawk ila ka pa bulah christmas hun nuam takin hmang ila, helai boruak chhia te pawh hi ka pumpelh ni mai tur, ka awmna apiangah lung tizingtu thil ka tawng zel a, lungngaina hian min bawh luk reng, chuti chung chuan hnem tu ka nei lo a,  ka harsatna min hriatthiam pui tur an awm hek lo, mahni ka inhnem a ngai a, chu chu a hrehawm ber lai a ni.

"Ka tlan reng chuan fare a tam dawn ania" Driver-in a rawn tih chuan bawngkawn kan thei phei tawh a, ka pawisa ken a tlem nasa mai si a, chuan reng chi a ni dawn lo tawp mai.

"Chhuk tawh mai ang, haw ka duh tawh" ka tih rual rualin " Durtlang lamah tlan chho la, leitan aṭangin kan let leh dawn nia" a lo ti leh a, a lam ka va hawi chu min lo nuih var var.

"Pawisa ka nei lo ania aw" zawi tein ka va ti a, "Ka nei a lawm, i duhtawkin kan leng dawn nia" tiin a phone a bih leh mai a, a chawi hnem dawn nasa mai si a, a inthlahrunawm duh khawp mai.

Tukverh lam hawiin thawk ka la vang vang a, nuam tihna pakhatmah ka nei lo, durtlang kham te chu ka thlir a, thi daih ila tih bawk chu ka ngaihtuah leh a; mahse, awmze nei loa thih chu ka hreh ve lawi a, ka pa mawlh a ni ka ngaihtuah ni, ka tel lo chuan hrehawm a ti dawn lutuk.

"I ṭap em ni?" a rawn tih vang chuan ka ṭhu ṭha vat a, ka ṭap lo tih a hmuh chuan,  "Ṭap duh tawh suh, an hmu thei chuang lo che a, awmzia a awm lo em mai" a ti leh zat a, a sawi dik chiahin ka hria, min hmu thei lo a, ka awmdan pawh hi an hrethiam lo ang, ka tel loin an hlim vek a, min mamawhna an nei miah lo bawk.

"Ka ninawm i ti ve em?" ka tih laia a hmel chu nuihza insum hmel a ni.

"I ngawi reng a, ka ning ve deuh" a ti tawl mai a, ning hmel pawh a pu chuang lo.

"Lo thi ta ila, tuin nge min ṭah ve ang le?" a phone en leh mai a tum chu phawk fein a rawn hawi a, "Ṭah tu tur pawh ka nei lo ang" ka ti leh halh a.

"I thih huna ṭah tur che ah buai suh, i damlaia i hlimpui tur ngaihtuah zawk rawh,  i nun chen la, hlim deuh khan awm tum zawk la, thih hnua inṭah te chu eng nge sawt ang, hriat pawh i hre dawn hleinem" a ti nghat nghat a, a thil sawi chu dik ka ti vek, tu nge min ṭah ang tih a ngaihtuahna sen chu thil atthlak mai a ni.

"Mahse, hlimpui tur engmah ka nei lo" ka aw chu zawi tak a ni.

"Movie te en la..."

"Movie enin i intihlim ṭhin em ni?"

"Ṭhin chuang lo e, kei te chu...ka hlim lo ngai  hleinem" hrethiam lo zetin ka melh a, nuihza hmel a pu reng pawh chu ka hrethiam lo.

"I broke ve theih em kha, ngaihzawng lamah pawh i tluang lo a, lo haw lo la...i fahrah ve tho a" ka ti a, ka sawichhuah rualin ka inthlahrung nghal. Mahse, a nui hmel avang chuan a haw lem lo tih a hriat a,  "Ka â ve em a lawm" tiin min la chhang zui a, tum loh lutukin ka nui thut.

"Nui mai mai teh, engah mah ka ngai lo" a tih chuan nuih a za telh telh, a lo inhrechiang ve hle anih dawn hi.

"I â tih chu ka hriatna a rei tawh" zawhna nei tih hriat deuhin min en a, "Â viau lo la chuan u Lizzy hi i ti buai reng lo ang" ka ti chiah chu a tum ta hmak mai a, a duh loh zawng tak ka sawi a nih hmel.

"Ka hrilh chian tawh em che kha, i u te chu ka hmangaih a lawm, hmangaihna avanga ât te chu thil zahthlak a ni hleinem" a ti fiah fak a, thu dik deuh deuh hi a sawi a, a hmel en aiin ṭawngkam a thiam zek a, beisei loh daih hian min chhang leh ṭhin.

"Ka hnen aṭang chuan engmah beisei duh tawh suh, tihpui che ka tum tawh lo, tunlai phei chu kan inngeih lo a, biak pawh kan inbe ngai lo" a hmel ka hmuh rualin lehlam ka hawi daih a, min zawt zui lo sela ka ti takzet, ka lo sawichhuak kher kher a ni, ka sawifiah a ngai ngei ang.

"Eng buaina nge in neih a?" a rawn ti ta reng a.

"A sawi chi loh" ka lo ti hmak.

"Eng nge chi loh awm, chhungkaw thil pawh i sawi vek ṭhin kha" a rawn tawlh hnai zui a,  en lem loin a malah ka lo nam ṭung a, min la rawn thlek ṭawk ṭawk mai.

"Hmanzanah kan leng chhuak a, a ṭhiante bulah min hnutchhiahin min len bo san daih a lawm, keipawn ka hawsan ve a, a nuin a hauh phah kha ka chungah a lungawi leh si lo anih kha" tukverh lam hawi pah chuan ka ang deuh hlak hlak a, Benja bulah hi chuan sawi tim vak hi ka nei lo a, ka rilru chhia zawng zawng pawh ka lantir zo tawhin ka hria.

"A va zia lo e, lo kal ka tum asin le" a ti deuh vang vang a, a hmel ka va en chuan pawi ti lutuk hmel a pu a, ka hrethiam ta kuar mai.

"Chuvang a ni maw min lo biak ṭhat em em ni, ka tihpui che i lo beisei leh a ni chiang mai" ka vin deuh lek lek, a meng nur deuh nang a, "Chaw eikhawmna ah hruai lawk ka duh a, min sawm pui la ka ti mawle" a tih chuan ka hau chungin ka en a, ka nuih a za deuh, ka chungah a ṭha ve hrim hrim ni turah ka lo ngai a, tum dang a lo neih vang lek a ni.

"I duh leh va kal la, va sawm mai ta che" 

"Min hnial fithla ṭhak a lawm, chuvang ania min sawm pui la ka tih, midang bulah hruai tur ka neih thu ka sawi vek tawh a, ka hruai leh loh chuan a zahthlak ngawt ang" a ti bui bui a, ka ngei zia chu aw, keilah chuan min ngaithla duh tu awmchhun tiin inbunruah nan tak ka hmang a, ani chance zawng zawng mai mai te ka thukruk thlengin ka hrilh a, tih sa loh loh a ni.

"I â tak tak anih hi, thu fing deuh deuh i sawi vang khan ka lo hmin ṭep a, min lo tlawn zawk a ni reng sia...." ṭah te pawh a ti chhuak deuh, ka thilsawi te kha ka ngaihtuah let a, ka zak leh hnuhnawh.

"Ka tlawn che anih loh chu, a nau i nia, ka biak ṭhat ve che pawh a ngai tho a lawm, min sawipui theitu awmchhun i ni bawk a"

"Awi....i hahthlak e" ka chek tlat tlat a.

"In inhau nasa viau em ni a?" a tih chuan, "I rin phak bak a ni ang, a nuin a vuak phah hrep a lawm" a meng deuh kawk a, "A vua a maw, chu nu mai mai chuh" a la ti pawr hlur zui a, a â hlawmtawp zawkin ka hria, hmangaihna vang ni pawhin ka hre lo, in atchilhna khaw lo tak a ni. 

"Chuvang chuan ka sawipui thei tawh lo ang che, i duh leh nangman va sawm zawk mai rawh, a duh loh zia che i hre ve reng a, tinge sawm pawh chu i la tum tlat le, bakah vawiin te chu mi zawng zawngin ruai an ṭheh dawn a, chaweia insawm na chi pawh a ni hleinem" ka ti hlak hlak a, "Ka hre tho a lawm; mahse, kan chaw eikhawm tur hi thil pawimawh deuh ania, ngaihzawngte hruai vek tur an tia, ṭhian ang tala lo kal turin a lawm ka sawm" a la ti ve tlat a, hahthlak hian a...

"Let tawh rawh ka pu, haw ka ngai tawh" ka vin hlak a, Driver pawh a rawn hawi let zawk mai.

"I haw tlang dawn em?" Benjaminan a tih chuan ka ṭhu tum deuh bur a, haw pawh ka chak lo, Mawitei ten ruai an ṭheh ka ring a, Kimkimi ka be zawk dawn em mawni, ani pawn ruai a ṭheh ve tho chu ka ring a, ka zui ve mai dawn nge tiin ka inngaihtuah buai nasa mai.

"I haw dawn chuan ka lo kal ve hrim hrim ang, ka thlah pah ang che"

"Ka haw dawn lo, inchhung nuam ka tih loh vangin ka rawn tlanbo anih hi" ka vin leh chiam tawh, ka thin chhe lutuk chu keipawn hrehawm ka ti, ṭah vak mai ka duh.

"Anih chuan kan chaw eikhawmna ah lo kal mai la, i u kan sawm theih dawn loh chuan hruai tur dang ka duh tho a lawm" a lo ti leh pek a, ka melh rum nasa tawh mai.

"Kan sawm chhuah theih hmel si loh a, i peih chuan min lo tel pui zawk la, a bak chu ka phut tawh miah lo ang che, min tih pui pawh a ngai tawh lo ang" a hmel chu inthlahrun hmel tak a ni, lehlam hawiin tukverhah ka dak zui daih a, kan taxi pawh leitan thlen hma deuhin a inher a, ka phone ka en chuan dar 3 pawh a la ri lo.

"I duh em, pawisa ka pe ang che" ka darah a rawn nam salh a, "I pawisa ka duh lo" ka lo ti bawl a, buaina ka ngah tehlul nen, midang ngaihsak thei pawh ka ni lo, ka ngaihtuahna ringawt pawh ka hahpui laiin engtin nge ka puih theih ang ni.

Bawngkawn kan thleng thla deuh chiah tih ah Nu Hlimin min lo phone a, "I u ten ruai an ṭheh peih lo a, kan inah chaw an eikhawm dawn a lo har lutuk suh aw" a rawn ti lehnghal a, an ṭhian ho awm laia haw chu ka chak lo lehzual.

Phone ka dah hnu chuan Benjamina chu ka thlek vang vang a, "Tunge lo phone a?" a tih chu chhang loin "Khawiah nge chaw chu in eikhawm dawn?" ka lo ti daih a, ina haw aichuan zui ve mai chu pawi ka ti lo zawk, kalna tur dang ka hre chuang lo a, min mamawhtu awmchhun a ni bawk.

"I lo kal dawn em ni?" a tih chuan, "Ka rei hman lo ang, zan thlenga awm te kha ka thei dawn lo a, min thlah leh a ngai bawk ang" ka lo ti zung zung a, a phur hmel ta khawp mai.

"Tehreng tehreng, kan inah bike kan va la phawt dawn nia, ka thlah leh thlap ang che" a ti a, Driver chu tlan chak deuh turin a hrilh bawk.

An venglam kan pan nal nal a, tlan pahin tu emaw hi a bia a, "A la hma a lawm, mi rawn hruai ka nei tak tak dawn ania, kan lo thlen hunah te khan mak i lo ti viau ange" tiin kan awm rei loh tur thu a hrilh bawk a, "Chawei dawn ṭepah kan lo thleng ang, khata lo awm ve reng kha kan peih chiah lo" tih angreng a sawi chu a lo thlawp ve hle a, rilru nawm lohna pawh ka nei lem lo.

Phone a hman zawh hnu chuan taxi driver hnenah an veng a hrilh a, "Hmanhmawh lo ang aw, rei lo te kan awm ve anga, kan haw hma daih dawn nia, mizinga awm hi ka peih vak lo a" ka tih chuan ka bu ve nghat nghat, "I bialnu angin min sawi miah suh" ka ti thla rawk a, a nui hui mai.

"Teuh nang, ka ṭhian angin ka hruai ang che" a tih veleh mai a, engmah ka zawt zui ta lo. Rei dawn kan tlan leh hnuah an veng kan thleng a, an in awmna a sawi lah chu building hring lian ṭha zet mai hi a ni a, mi inhnuai an luah a ni awm e. Taxi fare a pek laichuan ka chhuk tawh a, engzat nge a pek chu ka lo thlek uluk khawp a, zanga tlang a pe nual tih ka hria, a lo chhuk hnua ka zawh lah chuan a sawi duh bik ṭhak lo.

Step tawite kan chhuk hnuah veranda kan thleng a, an inluah chu kawngpui an hnuai chiah a ni, tala chu a hawng rawk rawk a, a chhung chu rin aiin a zau daih, chhungkaw rual chenna emaw tih mai tur hian bungrua a tam a, a faiin a changkang hle bawk. "In in van nei nuam em em" ka tih ri chu a hre pha lo aniang sitting room lam a pan a, an tui dehna leh chhuar vel te chu ka lo thlek kual a, an khawsak a nuam tawk hle tih a lang a, pahnih chauh an cheng tih chu awih a har.

Sitting room a ka va luh laichuan a lo awm tawh lo a, sofa ah ṭhuin ka lo nghak a, an christmas tree pawh lian ṭha tak a ni. Center table ah chuan pangpar nalh deuh hi an khawi a, bang thlanglam chu darthlalanga siam niin pawn lam a hmuh theih vek a, bathlar zau pui a awm bawk. Pan hnaia ka va en chuan sava bawm ang tak thir ṭhuthleng inkhai chu ka va hmu a, a bul velah pangpar leh plant mawi tak tak a inhung a, in neitunu thil ngainat zawng pawh a chiang viauin ka hria, zan thla êng thlir pah a ṭhut nan pawh nuam tak tur a ni.

"Benjamin" a rawn eih lauh a, "Hmanhmawh ila, chaw eikhawmna a kal tlai chu a nuam duh lo ania" min chhang lem lo a, a la insiam buai aniang. Sofa ah ṭhuin phone ka khawih a, Noelin status a lo nei dul a; mahse, ka beisei ang engmah a awm lo. Sana ka en chuan a lo tlai deuh tawh a, ka pa te lam pawn ruai an ṭheh mekin ka ring.

"Bena" a rawn eih leh vat a, chutih rualin Mawitei message ka dawng a, "Ruaiṭheh zawh ah kan lo leng ang" tih hi a rawn thawn a, a sawi har leh lutuka, kan in nang hmanin ka ring lo. Ka kal chhuah thu leh ka haw har ka rin chu ṭha deuhin ka hrilh a, "A pawi lo, ka rawn tlawh kawi ang che ka ti mai mai ania" a ti a, sawi hma sela chuan ka haw tlang mai tur ania.

"Benja...." a rawn eih leh lauh.

"Engah nge maw i awmna ngaiah i eih i eih chu"

"Ka hman ṭep" perfume a inkap a ni chiang mai a ri sat sat a, a rim a rawn nam nghal chek chek bawk.

Minute sawm dawn ka nghah leh hnuah a rawn chhuak a, a inchei emaw ka tia, rei zet a va awm ve a, a pheikhawk chiah a thlak a, a bak chu a ngai vek, a sam chu chunglamah uluk zetin a hui chho a, a lu a va su a nih hmel e.

"Kan kal thei, thil chu ei lo mai rawh aw, chawei a hun ṭep a" chhan pawh ka chhan hmain "I ei leh rih chuan kan tlai ang, bakah chaw i ei thei lo ang" a ti zung zung a, choka lam a pan nal nal bawk. Kawngkhar lam ka pan tur chu choka aṭanga a lo chhuak nen kan intawk a, balhla kual lian tawk hi min rawn pe a, ka la duh mai lo. "Ei rawh" tih  pahin a rawn lek kang vah a, amah lah chuan biang pawng ṭawlh ṭawlh khawpin a ei a, ei pawh a chakawm loh.

"Ka ei chak lo, nangman ei rawh" ka sawi laimekin kawngka ah zawhte a rawn lut a, a balhla ken laichuan a vawm zawt a, zawhte chu a tlan chhuak leh rang khawp mai.

Hmanhmawh deuha kawngkhar lam a pan chu ka um zui a, pawna zawhte ngiau chu a zawng leh nge ni veranda ah a tei kual thuak thuak a, kawmkar te chu a bih nasa mai a, engtia tih nge maw a tum ni. An inchhungah khan zawhte chaw pekna niawm tak kha ka hmu a, zawhte an neih kha ka lo ring nghal kha ania, tuna a thil tih dan chu a mak ka ti, an zawhte a ni lo aniang.

"Tute zawhte nge ni a?" ka tih chuan "Ni Pawli zawhte mawle, a hneawm ania" tih pahin a zawng kual duk duk a.

"In ta maw..?"

"Saw le" min rawn kal pel thuak a, "I Pi a awm lo" tih leh um a rual a, zawhte mangang lutuk chu step-ah a tlan chho zawi zawi a, a la vawm zui hram.

"I Ni zawhte i tia ni lawm ni!?"

"Ti e, ka zawhte a ni ve hleinem" 

"In ta anih tho chu..."

"Ka la vuakhlum sak daih ang, a hmasa pawh kha hnawhbo a har tehreng nen, khawi  khawi emaw aṭang hian hawn tur hi a rawn hmu leh zel, nula senior ho hi an hneawm ania" ti bul bul chungin kawngkhar a rawn kalh a, a nunrawn thlak ka ti, keichuan ran ka ngaina a, zawhte phei chu ka duh ber a ni.

"I ni ta anih te chuan khatin tih sak mahta che, a ril a ṭam anih kha, inchhungah a chaw in chhawp reng tho sia"

 "Miin lo eisak daih sela ka ti" 

"I sual reuh e a"

"Engah nge ka khumah te a lo muttir khanglan ni" a rawn ding ngil vut a, "Zawhte hi pul vek sela, anih loh pawhin sawrkar hian suat sela ka ti ania" a ti zui leh kher a, a rilru mai mai chu, huat chhan dang a nei a ni hrim hrim ang.

"I Ni in a duat vangin i thik a ni chiang?" min melh danah chuan ka sawi dik tih ka hre nghal, "Zawhte thik rual ka ni em ni, ka ngaih a ti ṭha lo ṭhin a lawm, mihring ang maiin a bia a, chaweina thlengin a pawm a, a mutpui bawk a, a chang leh a bual a, fa angin a lawm a enkawl, nula a la nia, hetiang te chuan miin chhul ṭha lo emaw an ti mai dawn a, a tih chi loh em mai" kal pahin a ti chho mawlh mawlh a, a hnunglamah ka nuih ru tet tet.

"Lo awm rawh" a tih vangin kawng bulah ka lo nghak a, rei lo teah bike nen a rawn lang a, a lu a len sa tehreng nen a helmet lah chu a han lian ṭha khawp a, a lawk deuh luau mai. Ka tlak loh nan nghet deuhin ka invuan a, chuti chung pawh chuan ka kang leh zawk tho. A khat tawkin 'Tlan muang rawh' ka ti deuh reng a, kawngpui a thawl si a, a tlan chak leh mah mah ṭhin.

Kan chaweina tur chu a hla vak lo aniang rei loteah dawr kawtah kan ding a, "Thilpek kan ken ve loh te chuan" tiin thil lei a rawt a, Family pack ice cream leh thei tui te kan lei a, cerelac a lei tel kher erawh ka hrethiam lo, a ṭhian fa nei tawh te inah kan kal dawn anih ka ring.

Kan thil lei te chu min khaitir a, "Nangman i pe dawn nia, an lawm viau ang" a tih chuan ka hnial lo a, ka awm a nawm phah zawk mah.

Kawi hnih thum kan tlan leh hnuah kawng pengah kan tlan lut a, kan tlanna lai chu kawtthler nuam deuh mai a ni, in ding te pawh building ṭha tak tak; compound nawm hmel zet zet te a ni hlawm a, mi hausa deuh inah kan kal dawn tih ka hrethiam tawh. "Mi an tam dawn em?" ka tih chuan "Tam ang, an ngaihzawng leh ṭhiante an sawm fur a" a ti a, eng ho chaw eikhawm nge ka zawh chuan min chhang tawh loin a ding a, kan thleng a nih hmel.

Kan dinna bula in chu ka thlek vang vang a, gate pawn aṭanga lang thei chin kawtah chuan coconut kung leh pomegranate kung te a awm a, lirthei a ding nual bawk. "Ka'n hung ṭha lawk ange" a tih vang chuan ka chhuk thla vat a, chutih laiin a phone a lo ri ve mek bawk a, a lak rual rualin "Gate lo hawng rawh" a ti vin hlur a, min ti hrilhhai khawp mai.

"Hmanhmawh la a ni mai, hetiang ni ah te chuan duty awm ta che u" tiin a hrawk zui a,  ṭhian ho zinga in la boss deuh chi ang kha a nih hmel, anih loh vek pawhin a luhruh ring chi chu a ni phawt ang.

"Tunge i biak a?" ti a a phone hmang zo ka lo zawh chuan "Joshua" a ti mai a, rei pawh kan nghah leh hmain ke pen thawm ka hria a, gate lianpui chu a rawn inhawng ta ruau a, tlangval ria thlerh thlawrh, tarmit vuah,  inkhawm zo hlim ni mai awma smart hi kan hma ah chuan a lo ding a, Benja chuan a thlek deuh vang vang a, an inbe dawn emaw tih laiin mipa chu a inher nghat a, a kal nal nal mai.

Ngawiteh, kei hi engmah hrechiang loin ka lut ngawt thei lo ang, a ṭhiante in a niin ka hre lo, khapa kha 'Joshua' a ti lehnghalin ka hria, Joshua te chu a cousin fel deuh a tih kha a ni lawm ni, hepa pui hian a chhungte inah min hruaiin ka hria!

"Benjamin" Bike nawr paha a kal chu ka um dat dat a, "I ṭhiante in a ni lo ti raw, khapa kha joshua i tiin ka hria, i cousin kha a ni em?"

"Ka pu te in a nih hi" ka ding dat.

"Ka haw dawn" a rawn lehhawi vut a, "Kan thlen tawh hi, lo kal mai mai rawh" tih pahin bike chu a nawr lut zel a, kei erawh ka ding tlat, ka kalna tur chi niin ka hre lo, haw san leh mai ka duh.

"I ṭhiante inah i ti emaw ka tia"

"Ka tih loh kha"

"Hetiangah chuan ka kal duh hleinem, a zahthlak a sin"

"Engmah zahthlak a awm lo, duh duh hruai an phal a lawm" a ti sam mai a, a ngai holam angreng si a, a tih chi dawn em mawni.

Bike a hun ṭhat hnu chuan a rawn hawi vang vang a, "Min thlah leh mai teh, ka kal duh leh lo" ka la ti fan a, nu Hlimi ṭhiannu kha a awm ve dawn a, nu Hlimi bulah a sawi ngei ang, chu loah ṭhianṭha ti a sawi tur kan la ni lo a, mipa leh hmeichhe inzui chu an hrethiam lo tawp ang.

"Min thlah leh lo mai rawh, taxi ka la mai ang" tih leh inher ka rual a, engtik laiin nge a lo thlen phei hman ni, gate ka chhuah rualin ka banah a rawn hmer chawt a, "Kan rei dawn lo, engmah zahthlak a awm hleinem" tiin min pawt let leh dawr dawr a, "Ka duh lo, ka telna chi a ni lo" ti a ka ṭang chung pawhin min pawt lui tlat a, a kut lah chu ka phih thla thei der lo.

"Benjamin, engtin nge kan insawi anga, i Ni in min hriat chuan a chi loh ang aw"

"A hre teuh lo mai che, Lizzy pawh a la hre hleinem"

"Ṭhian kan ni ti ang che, thildang sawi miah suh" a nui ringawt a, ka la ṭang deuh ṭung. Veranda kan thleng ṭep tih ah chuan pa pakhat hi a lo chhuak a, a hmuh rualin ka kut chu a thlah vat a, chupa chuan "E..Bawiha, i va tlai thei bik ve" nelawm deuh hian a rawn ti a, min rawn en chik hle bawk.

"Patea anih hi" ka tih chuan ka nui lui ve ngial a, ka zak ru chem chem.

"Midang an awm vek tawh em?"

"Awm vek tawh e, i puin a lam reng tawh che"

"Eng atan nge min lam a, a ro a sem dawn a mi?" Benjaminan a tih chuan a patea chu a lo nui hui a, ka lam rawn hawiin "Lo lut ru" a ti leh a, inchhung lam a pan zui bawk.

"Inkai lut kher lo ang aw" a rawn nui ruh ruh a, ka nuih a za lo nasa mai.

"Min kalsan miah lo ang che, an bulah min thlahfal miah suh, anih loh chuan ka haw daih ang" thutak fein ka ti a, hmelhriat loh zingah min hnutchhiah ang tih ka hlau, a zakthlak bawk si.

"Tehreng mai" tih pahin kawngkhar lam a pan a, a hnungah ka zui ve vat a. Inchhung kan luh rual chuan naupang ṭawng thawm leh puitling nui ham ham ri ka hria a, rin aiin awm an lo tam daih. "Au Bena a lo thleng ania" hmeichhe tleirawl hian tiin a sitting room lamah a tlan phei tarh tarh a, "Benbawih" tih riin a zui zat bawk.

"Choka ah phei ang" a tih laichuan sitting room aṭangin hmeichhe pakhat hi a lo chhuak a, Doctor Pauline-i kha a ni tih ka hre nghal a, a inchei vang nge ni a lang dang khawp mai.

"Nula a rawn hruai tak tak, hetah lo kal rawh u" tiin nelawm zet hian min hui a, ka zak bawk si chuan Benja ngawt chu ka ngaichang a, sitting room lam pan a tum chu ka zui hreh ru khawp mai.

"Tunge i ṭhiannu chu?" a Ni-in a tih chuan, "Rintei a nih hi, chaw a lo ei ve dawn" a ti tawl a, ni Pauline-i hmelah chuan danglam vak a awm lo. "Mimo-a chaw i pe em?" a lo ti daih a, "Pe pe pe..." Benja chuan a ti hluk hluk a.

 "I van fel tak em" ti a a Ni in a fak laichuan ka lo nui ru tet tet, zawhte a tih dan kha hria sela chuan aw...

Ni Pawl-in ṭhutna min kawhhmuh ah chuan ka ṭhu vat a, ka thil khai chu ka lo pe bawk a, a bih duk duk a, engmah phei chu a sawi lo. Nu pakhat hian Benja chu lo koin "Ka bulah hian lo ṭhu lawk teh" a rawn ti a, Benja va ṭhu tur chuan nutling bula Joshua ṭhu chu a melh ran ran a, Joshua ṭhut lohna lam a pan tharh a, chutih laia Joshua lo ner hmel ka hmuh chuan ngaihdan ka lo nei a, an inngeih loh hmel riauin ka hria.

"Thingpui i in duh em, ice tea pawh a awm asin" ni Pauline-in a lo tih chuan "Aih, engmah a ngai lo" ka lo ti vat a, Benja chu ka va melh leh. Nu pakhat bulah khan a lo ṭhu tawh a, chu nu chuan a darah a kuah ran a, "I cher deuhin ka hria, i Ni in a chawm ṭha lo che em mawni, i mitmeng te pawh a dik lo, i hrisel loh hmel tlat?" tiin duat hmel deuh hian a thlek a, ni Pauline-i chuan a duh vak lo aniang, "Kei aiin i enkawl ṭha awm bik lo em mai, i bulah pawh a awm duh tawp loh kha" a lo ti zauh a, a biak nu chuan a ngaihsak lem lo.

"Nakum chu kan hnenah lo awm ve tawh la,  i duh duh i zir dawn nia, kan duat ngawt ang che" tiin a thlem heuh heuh a, "Ka la rawn awm mai thei, a ṭul thut leh aw" Benjaminan a tih laichuan a intithei deuh tlatin ka hria, a chhan chu a Ni a rawn melh kher a, engthil emaw tak chu a awm a ni.

"Ka hnenah cheng duh la chuan restaurant saw i nei ni mai tur ania" patling pakhatin a tih chuan, "Engmah a thawk peih tak tak lo" a bula a nupui niawm tak ṭhu chuan a lo ti a, Benja chu a ner sawk mai. "Chuvang a lawm in bulah ka awm peih lo" tiin chu nu chu a melh rum al a, a bula ṭhu zawk chuan kuah deuh nawk nawk pahin "Engmah i thawh kan phal hleinem, kan naute duat a lawm i nih" a lo ti leh a, an awmdan chu mak ka ti deuh tlat a, a chhan pawh Benjamina insawi dan leh an chhungkaw lan dan chu a inpersan riauin ka hria.

Ka bula a insawi danah kha chuan fahrah ve tak, chhungte ho pawhin an ngaihsak lem loh kha a ang a, a ni Pauline-i chauh chu ngaihsaktu leh a chhungkaw neih chhun emaw tih mai tur kha a ni a, tunah hi chuan an duat rawn a ang leh viau lawi a, ka hrethiam pha ve chiah lo.

"Tlangval puitling i ni tawh a, i ni rinchhan reng lo la a ṭha ania, eizawnna tur te ngaihtuah la, pawisa lamah harsatna i neih loh hi, nakin lawkah i Ni-in pasal a la neihsan che anga, hetianga i awm chuan i inchawm zo lo mai ang" lo ti tu chu pawna kan hmuh a Patea kha a ni.

"Khai a, a inchawm zo dawn lutuk, tlangval a ni tawh a lawm le, chhungte belh tur nei lo pawh a ni hleinem" a bula ṭhu khan a lo ti zat zat a, Benja chu a nui ṭha duh miah lo.

"A Ni a uai bet tlat a, Mami lahin pasal neihsan a hreh ve bawk si a, an awmdan hi a buaithlak deuh tlat" a Patean a tih leh chuan "A duh leh pasal chu nei daih sela, mahni a awm ka hreh hleinem" a lo ti hluk hluk a, "A bialpa nen in insual a ni lawm ni" hmeichhe pakhatin a lo tih chuan a hma aia rum mahin a va melh a, "Kan insual lo ve" tih pahin a bula ṭhuin a kuah na chu a phih thla sawk a, mipa ho chu an lo nui ruh ruh mai.

"I ṭhiannu chu tu maw a hming" a melh rum hrep nu bula ṭhu mipa khan min lo thlek a, "Rintei" tih zawngin a chhang a, chutih laichuan midang ho pawn min lo en ṭhap a, ka lo ip ru nasa mai. "Bawiha, thil va ei pui rawh, chaw kan la ei har deuh ang" Ni Pauline-in a tih chuan Benja chu a tho ve mai a, ka bul a rawn thlen rual chuan a ni chu hmuiphunin a hrilh ru a, "Sawifiah vek rawh, an mawl hlawm si" a ti maiin ka hria, a kutin min rawn hui sawk sawk a, ka zui va thuai bawk.

"A bialnu a ni maw?"

"A hmelṭha reuh hle mai" tih ang reng an sawi ri chu ka hre pha a, a bialnu anga min ngai chu a zia lo ka ti, ṭhian kan nih thu sawi mai sela ka duh bawk.

"Bena, i bialnu emaw min ti ania" 

"Nakinah kan hrilh dawn nia, thingpui chiah in rawh aw, chawei a hun dawn" tih pahin choka lan a pan hlawk hlawk a; mahse, kan thlen phei hmain hmeichhe pakhat hi kan tawk a, Dr.Pauline-i  clinic a lo awm ve kha a ni. Min hmu chu a phawk lek lek a, Benja chu en in "Ka pu a damṭha lo ania, Joshua nen inhau tawh miah suh u, lung ṭha lo hi chu an bulah fimkhur a ngai ania, nangmahni vanga a nat leh vaih chuan in chak lo ang" tiin a vau khar khar a, "I duh leh i nau va hrilh rawh" pakhat chuan a lo ti hmak a, a kalpel hmiah bawk.

Choka kan va luh chuan pitar pakhat leh nu pakhat la naupan ve hmel deuh hi an lo awm a, eirawng an lo bawl mawlh mawlh a, pitarin Benja a hmuh chuan a lo ban chuk chuk a, a biangah te a piai sak thul. "Joshua bialnu a lo kal i ti sia" Benjan a tih chuan, "A awm lo em ni, Nanoi nen an awm ve reng kha" tiin hmeichhe awmve chu a zawt a, "Inchungah an chho aniang" pakhat chuan a ti mai a, "Puitling ho bulah a awm leh tlat tawh saw, inhmuam up tawkin" Benan a tih  chuan, "Ngaithei lo viau zel suh, i nau anih saw, unau inngeih lo deuha awm a ṭha ngai lo" a pi chuan a ti a, chutah ka lam rawn hawiin "I van fel ve, hetah lo ṭhu rawh, Seni.. cake kha lo zai sak la" tiin hmeichhia chu a tir zui a, hmeichhia pawh chu a tho rang khawp mai.

Benja bula ka va ṭhut chuan "Patea nupui anih saw" tiin min lo hrilh vat a, rei vak loah an monu chuan cake min lo chhawp a, ka ril a ṭam tawh bawk ngawirengin ka ei mial mial a, a pi nena an titi chu ka ngaithla pah reng bawk.

A pu chungchang an sawi a, "A zia leh tawh a lawm, hmanni khan ro sem a tum ut ut a, i pu hi chu a mangang hma thei leh lutuka, midang tih phawklekna mai mai a ni" a piin a tih chuan "Chan tur kan nei ve tawh dawn a mi, Ni Pawlin a chan ai a la vek tawh sia" Benja chuan a ti a.

"Engah nge in neih loh ang, nangpawn i nei ang chu, i pa chanai lak tur i nei a lawm" a pi chuan a ti a, a fiamthu deuh nge ni a nuisang reng. "Ni Pawli nen kan inṭawm vek a, pasal a neih chuan a kalpui daih dawn tihna ania, ro in sem anih chuan a hranin min pe ang che u" tiin a pi chu a hrilh a, a pi nuih a za khawp mai.

"Pawisa nei ṭeuh la engtin nge i hman ang?" a piin a tih chuan "Ka hre nang, ka hman chawp bak ka la nei ngai hleinem" a lo ti sam et a.

"Eizawnna tur thil engmah i la ngaihtuah lo em ni?"  a pi bawk chuan a ti leh a.

"Kum thar aṭang chuan ka ngaihtuah ve ṭan tawh ang, ka pu hnenah chuan ka ro chanai ka dil dawn a lawm, ni Pawlin pasal a neih loh phei chuan Joshua aiin ka hausa daih ang chu" tih pahin cake chu a ei tuam tuam a, a purun kheh lai dah meuhin a pi chuan a lo en a, "Joshua chu a che thei nek a sin, car a lei kual a, a chei ṭha a, man to deuh deuhin a hralh leh a, a chhungte puih ngai loin a inchawm zo der tawh ania" thutak deuh hian a ti a, Benja lah chu a vawikhat hriatna emaw tih mai turin a phawk a, a fian a dah thla riai riai.

"A che thei viau e law...a hlawk viau em ni a?" a pi chu a lo bu nghat nghat a, "Car thar a pawh a lei a sin" a tih chuan "Chuvang anih chu a nu sawn min khei leh fek fek tawh ni, ka ni bulah te a lo insawithei leh lo maw?" tiin a pi chu a zawt let hu a, a pi lah chuan "Kan bulah chuan a fak nasa mai a, Joshua hi chu fak ngai lo a ṭha sa ania, nangmah zawk hi fakna tur i vang ṭhin a, i nau i tluk lo deuh tlat a ni" a ti dap dap a, huat tur zawnga a sawi loh tehlul nen "Nang lehzel chuan min khaikhin lo teh, midang ho pawh nin tawh nak alaiin" a lo ti pawr hlur a, a pi pawh a ngawi ran mai.

"I pu bulah awm tam ve la, i bul ṭanna tur pawisa te pawh i dil dawn nia, Joshua pawh a pe mai zel a lawm, a tih dan hi i thiam ṭhin lo a, hei tak hi i nau i tluk lohna a lawm.." pitar chuan min rawn melh pah zauh zauh a, chhungkaw thil hlir an sawi avangin keipawn nuam ka ti chiah lo, kalsawn rih a a ṭhain ka hria.

"Bathroom ah ka'n kal lawk" ka tih chuan bathroom awmna lam min lo kawhhmuh vat a, "I duat zawk tlatin ka hria" ka kal phei laia Benjan a tih ri chu ka la hre pha. "Duat zawk ka nei lo che u, ka tute vek in ni a, ka en dan che u a in ang vek, nang phei chu pawisa ka pe bik ziah che a lawm" a piin a tih laiin, "Pawisa nawi bak min pek ngai loh kha, za khat te te bak i nei ngai hleinem" Benjaminan a lo ti hluk hluk a, ka nui chhuak teuh ngei mai.

Bathroomah chuan rei dawn ka va ṭhu a, an duh ang an sawi zo tawh ang tih awmah ka chhuak chauh a, a pi zawk chuan min lo biain kan vengte leh eng nge ka tih ṭhin te min lo zawt luam a, a nelawmin a aw a damdiai a, nui hmel a pu reng maiin ka hria. Rei pawh ka ṭhut leh hmain Ni Pawli a lo lut a, "Ka pa a inpeih tawh a, chhung inkhawm nei lawk ang u" a rawn ti a, a hnungah hmeichhe tleirawl pathum hi an lo dak dek dek a, an pil leh zuk ṭhin a, min lo enin ka hre tlat pek a, ka zak thar leh.

"Ti ru le, chhung inkhawm nei ang u" ti a a pi tho chu kan zui a, "Ṭhu dun ang, kal hrang tawh suh" tiin ka hrilh phei mawlh mawlh a, "Awle" tih bak chu a sawi lo.

Sitting room-ah chuan naupang ho nen an lo ṭhu ṭhap a, kan ṭhahnem angreng khawp mai. Kan ep chiah a sofa ah chuan Joshua te chhung ni awm tak hi an ṭhu a, Joshua bula ṭhu nula lian deuh chu a bialnu a nih ka ring. Ka lam a rawn hawi zing hle a, min rawn nuih leh ṭhin chuan awm dan min ti thiam lo, ka lai ṭut mai.

"Chaw eikham veleh haw ang aw, ka chhungten ka kalna an hre lo a, ruai ṭheh zawh a ka haw tur thu ka hrilh sa ania" tiin Benja chu ka hrilh a, chutih laichuan kailawna lo pen thla khap khap thawm a awm a, rei lo teah Putar; sam leh khabe hmul var vuk mai hi tiang hawl chungin a lo lang a, a palianin a lang zahawm hliah hliah a, thil a tih theih hmel hle bawk.

A nupui bulah chuan lo ṭhuin a tu leh fate chu a thlek kual dan dan a, "Nimin ka pianchamah Ramthanzuali te chhung in reh hmak a, i puzawn te inah chaw in ei tih ka hria ania" a ti chuar chuar a, Bena lo be ṭha deuh tu nu khan "Ka pa, an damlo an haw lo ve chauh a, kan va lan ve a ngai a lawm" a lo ti thuai a, "Ka hau hleinem che" Putarin a tih chuan thaw huai hmel a pu. 

Benja chuan min lo hrilhru sar sar a," Pu Chhangnanga a nih saw, massi tukah a piang a, kan inchhunga kan berampu anih saw" tih angreng a lo sawi a. Putar lam ka va hawi chiah chu "Benjamina bialnu chu lo chibai ve ila" a rawn ti ta mai, ka ṭhu ngil at a, Bena chu ka nghawk pah zauh.

"Ka bialnu a ni lo" a tih chuan kan lam an rawn hawi nghal ṭhap a.

"I bialnu a ni lo maw, anih tunge a?" an vai chuan mak tih hmel deuhin min en hlawm.

"Hei chu a nau zawk ania" a tia, ka lo zak.

"Eng ngati nge a nau zawk i lo hruai daih?" a Patea a ni, midang pawh chuan zawhna an ngah hmel hlawm khawp mai.

A ṭhu mar deuh hluai a, "Min tih pui" a ti leh tlawng, Joshua chu a lo nui huk a, kei chu ka hawi ṭha ngam lo.

"A tihpui tu chu ka lo chibai tho a nge" a puin a tih chuan "Va kal rawh" tih pahin min rawn nam sek sek a, va kal kher kher pawh chu. Inpetruh ṭeuh chungin ka tho a, putar chuan min chibai pahin "Tihpuitu hi a hmelṭhat hi, a dang dang intihpui a ngai em mawni" a lo ti fiamthu ve hlut a, midang ho pawh an nui dar dar mai.

"Thu han sawi vak pawh ka tum lo, Joshua khan Bible chhiar sela, ṭawngṭaina ka neih zawhah zanriah kan ei mai dawn nia" putarin a tih chuan Joshua chu a lo ding vat a, a nuin bible a lo pe thuai bawk. Chhiar tur a lo inring sa aniang a duhlai a keu fuh chat a, a chhiar zawh hnuah pawh duhtawk mai loin a sawi belh a, ka rin ai daihin a puitling. Chhungkaw inrem lo leh inchhungkhur nuam lo hrehawm zia te a sawi a, 'Keini chhung chu kan vannei a, zanriah kan la kil tlang thei te hi lawmawm tak a ni, Pathian leh ka pi leh pu te vang liau liau a niin ka hria a, an tu leh fate min hui khawma, an zara tun dinhmun thleng hi kan ni bawk a" tiin a pi leh pu chu a fak luam a, ṭawngkam a thiam khawp mai. 

Mahse, a sawi tawp lamah a unaute a fuih tel a, Benja lam rawn hawiin "Lawmtluanga pawh i khawsak dan apiang hi chhungkaw hmel lanna tih hriat a ṭha, miten nangmah ringawt an thlir lo che a, i chhungte an chhui zel dawn tih hria la.." tiin a rawn hmer tel zauh a, Benan a lo duh bik vak lo, Joshua ṭawnglai chu a lo pawt chat a,  "Umm...khatianga i tih dawn chuan i din zawh ah ka ding ve ang" a lo ti hmanhmawh a, midang ho chu nui ṭha ngam si loin a khi ṭhaw hlawm.

"Benjamin" a piin a rawn tih vang chuan a ṭhu ṭha leh vat a, Joshua din chhung zawng chuan rum zet zet hian a lo melh a, vanneih thlak takin a rawn sawi zui tawh lo hlauh.

A ding ve tak tak ang tih ka hlau chuan a kawrah ka lo pawt a; mahse, a pu lo dingin ṭawngṭaina a nei zui a, chumi hnuah choka lam kan pan sang sang a. Hmeichhe tleirawl ho khan min en duh khawp mai a, an u bialnu ka ni der si lo. Benjamina lo kal hnai chu a nakah ka lo sik nawk nawk a, "Engah nge ka ṭhian i tih ve mai loh, 'Min tih pui' tih kha a ngai em ni" ka ti vin khar khar.

"A ho lutuk, sawpa saw ka biak lawk a ngai" tih leh min kalsan a rual a, sitting room lam a pan lehin ka hria. U Seni leh an awmpui nula te nen chawei kan siam a, kan buai mam mam laichuan sitting room lamah thawm a ri huk a, midang ho chu an tlan phei rang khawp mai. Hmanhmawh deuha ka va chhuah laichuan Benjamina chu an rawn pawt phei chawt chawt a, Sitting room lamah nutling aw hian Joshua chu a lo khap ve chul bawk a, an lo insual hman anih hmel.

Benjamina a lo kuah luh laichuan tuidehna lam ka pan rawk rawk a, a Ni in chair-ah ṭhut tirin a vuan bet tlat a, "Min koh dan te kha i hria em, kum 2 in ka upa ania aw, ka hmingpuma min ko kha ka duh lo, upa zawk angin awm suh se" tiin a ni chu a au khum lawng lawng a, midangin an lo kil huang bawk.

"Hmingpuma in koh te chu a na vak em ni" a Ni-in a ti chu a haw khawp a, "Mi zah derna nei ve rawh se, a zilh tur ka ni em, ni lo nasa, engvangin nge kan inpuiah hian a awm reng a, in an neih ve tho kha, haw tir rawh u..." a che deuh vut vut a, thawh a tum uaih uaih bawk. Mahse a pu a lo luh avangin a ṭhu ṭha leh a, a ṭawng tawh lo nain inhumruh nasa ngat ngat tak a ni.

"I nau zawk anih saw, naute an khing pung pung ngai lo, u zawk chu dawhthei zawkah ṭan ṭhin tur" a puin a lo ti chu hmai zangthal hawin a melh chho a.

"A naupang tiin chhuanlam insiam sak zel a, hmui hmul pawh a nei tawh" a aw chu ring ṭha tak a ni, tleirawl ho chu an nui tet tet a, Ni Pawlin a lo khap avangin an nui ṭha ngam lo a, an inhup ṭat ṭat mai.

"Ka pa, Joshua hi a hnar a thi a nia" choka luhna bul aṭangin Joshua nuin a rawn ti a, a monu chu hmanhmawh deuhin a kal chhuak a, Bena pu pawn tih vak ngaihna a hre lo aniang a darah a ben sak thak thak a. "Ka pa, ka haw pui mai dawn em niang?" Ni Pawlin a tih chuan Putar chuan a remti lo, "Va ko rawh" tiin a nupui chu a mitmei a, keini ho pawh kan ṭhu ṭha sap sapa, Benjamina chu a Ni lam hawiin a tum bur reng a, ka tan pawh awm a nuam lo zo.

"BJ, tikhan awm lo teh, a nuam lo em mai" ka tih chuan ka awm tih a lo theihnghilh pek aniang "E..Ei vat ila, ka haw dawn nia" a ti ta sawk sawk a, a mood a dang hlawk emaw tih tur a ni.

 Joshua te chhung an lo luh hnu chuan  "Ngawi rengin ei rawh u" Putar chuan a ti hmiah mai a, tuman an sawi zawm leh tawh lo. Kan ṭhu ngawi ṭhiap a, a ṭawng chhun te pawh zawi te tein an inbia a, boruak chu dam hmel deuh siin an ṭang ru ṭeuh mai a ni. Benjamina chaw eikham tho tur chu "Ka pindanah lo han chho rawh, Joshua pawh i eikhamah chho ve nghal la" a pu chuan a lo ti khauh a, Benja peih lo hmel chu a ner nak a, kan la haw thei dawn lo a ang.

Zanriah eikhamah chuan Ni Pawli nen Veranda ah kan ṭhu dun a, Bena nen kan inhriat dan te min zawt luam a, keipawn ṭha deuhin ka hrilh a, ka u bialpa hlui anih thu leh a lo len ṭhin thu te ka sawi a, Nu Hlimi te ina ka awm thu chu ka sawi lang lo thung, an mahni ngei chu inhre pawp sela ka duh vang a ni, inrawlh ve anga ka lan loh nan.

Rei pawh kan nghak lo ang sitting room kailawna an lo chhuk chu ka va hmu a, Joshua nen chuan kut inkai chungin an rawn chhukthla a, a puin kailawn tawp aṭangin a lo thlir reng bawk. Puitling ho chuan nuihza insum hmel an pu vek a, thil thleng vel chu a naupang chhe thil riauin ka hria, nuihzat lamah a kal zel.

Kailawn tawp an rawn thlen rualin a inher leh te te a, an pu awmna lam an en chho vang vang bawk. Putar chuan 'In kal thei' ti niawm tak hian a ban a rawn vai a, chuveleh an inthlah hlawk a, an kal hrang nal nal bawk. 

Pawnah a Ni nen kan zui chhuak a, "Ka thlah ang che, ni Pawli chu ka lam leh mai ang" a lo ti zung zung a, a Ni thung chuan "Inah lo tlang rawh, ka rawn haw ve nghal ang, driver-in min thlah thei a lawm" a ti ve tlat a, chutih laichuan a pi lo chhuakin Bena chu eng emaw hi a rawn pe ru zauh a, "Fel deuhin awm la, i pu chu ka lo biak sak ang che, eng emaw chen chu hetah lo awm phei la a ṭha ang" a tih mawlh mawlh laiin Benja chuan a thil pek chu a lo en a, Zahnih note hi a lo ni a.

"Pawisa nawi dang ka nei lo a, zial leinan i hmang dawn nia" a piin a tih chuan a pi chu a thlek ren rawn a, lawmthu a hrilh ṭha ve mai dawn emaw tih laiin "Min hmangaihna hi a thawra thei emmm maiiii" a ti deuh vang vang a, ka lo nui thut. "Anih ..mai ..u" ban charh a tih pahin kawt zawl lam a pan a, a kal chak bawk si a..ka um dawr dawr mai.

(End of chapter - 17)