BLUE BAYOU (CH - 18) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 18

Zantir chauh a la ni a, mi vei vak an tam lai tak a ni, kawrlum pan te chauh ka hak vangin vawt ka ti ru khawp mai a, Bike hnung a sang ang reng si a thli thaw chuan min beng fuh mah mah ṭhin. Inbe lo a thui fe kan tlan hnu chuan motor jam-ah kan tang a, kan hma lamah chuan mipui an zi luih luih a, zanin angah hi chuan kawn chei fang an tam ṭhin a, kawngpui dung pawh a lun viau zel.

Benja chuan phone-in tu emaw hi a bia a, "Ka lo let leh har lo ang, min lo nghak rawh u, minute 10 velah ka lo thleng hman ang" a ti lang lang a, a ṭhiante an nih hmel. Phone a dah hnu chuan a rawn lehhawi vut a, "I puar maw?" a ti ve teh mial a, hrechhuak thut te pawh a ang.

"Puar ve reng mai" zangkhai deuha ka tih chuan "Kei chu ka puar lo, chawei khawm hi ka ning tak tak ania aw..." a ti deuh vang vang a, ka nui ṭep.

"Benja.." a lo hawi leh rang khawp.

"Ka rin aiin i fel daih"

"Teh thut a" a mit chiah ka hmu thei a, min en phawk hle bawk.

"Ka tih awmzia chu, chhungten an buaipui luai luai khawp sual i lo ni lo a, an duat hmel vek chein ka hria" ka ti leh a, a tir kha chuan chungkaw black sheep, chhungte pawn an ngaihtheih vak loh ang hi ni turah ka ngai a; mahse, a chhungten an en dan kha ka rin loh dan daih a ni thung a, a sual em em lo tih pawh a hriat ve theih tlat a ni.

"Ka insum ve mai mai a lawm, hunpui lai te a nia" a ti tak nain ka hmu fel riau tawh, a mizia hi a tlang riauin ka hria, a rilrua awm awm hi a sawi mai zel a niang.

"I let leh nghal dawn maw?" kan tlan chhuah leh hnua ka tih chuan, "Aw, ka ṭhianten min lo nghak dawn a, i u chu rawn hmuh ve zawk ka duh nen zanin chu ka hman lo tlat" a ti a, a ṭawng ring hle bawk.

"A ṭhiante an la awm maithei, lo kal lo mahla a pawi lo zawk.." kun hniam meuhin a beng bulah ka va ti a, min chhang zui lem lo. Thui fe kan tlan leh hnu chuan a tlan muang deuh a, a rawn ṭhu ngil zui bawk. "I bialpa nen chuan in la inṭhen em ni a?" a ti veleh khauh a, thil kan inhrilh nasa tawh bawk a, sawi hreh vak pawh ka nei tawh lo.

"Kan la inbe leh lo, Advance christmas kan hman zawh tuk khan an khua ah a haw a, a reh rih..." ka tih chuan, "I ngai viau lo maw?" a ti leh a, a nui deuhin ka hria.

"Ngai loh i ring em ni?"

"I ngaih ka rin vangin a nia ka zawh che"

"Ngai e, ka khua a har.." sawi nuam ka ti tehchiam lo khawp mai, kawngsir lam hawiin thawk ka la ham ham a, Awmpuia ngawt chu ka ngaihtuah zui bawk.

"Ka ṭhen hmasa i ti em khah?" a rawn ti leh hlawl a, kha kha chu sawi leh ka duh tawh lo asin le, ka ṭhen dan kha a mumal lo lutuk a, kan inkar tawpna ni chiah pawhin ka hre lo, aman min ṭhen chiah khan engkim a tawp zawkin ka hria.

"Ka thinrim laiin inṭhen ka rawt a; mahse, kan inṭhen tak tak chu a hnuah daih ania" tiin ka chhang a, engtin tak ngai ang maw ka tih laiin, "Inṭhen cho lutuk chuan inṭhenna a thlen chawk" a lo ti bauh a, min ti dang lel mai.

"Ka cho bik pawh a ni lo, kan awmdan kha a hrehawm em a, kan inti hrehawm tawn a lawm" 

"Khapa kha chu a cool maw le, ka kawm chak zawng tak a ni" 

"I kawm chi a ni lo ang, in mizia a in ang lo lutuk"

"Ka kawm chhin chak ka ti mai a lawm, kar khat velah chuan a cool-na a reh vek thei ang" tiin a nui hawk hawk a, a kawm chak chhan chu ka hrethiam pha ve lo, inkawmngeih tur chi an ni pawhin ka hre lo, an mizia a inpersan lulai em mai.

Kan veng panna peng kan thleng chiah tih ah Bike pahnih hian min rawn tlan pel vawk a, an rawn au ṭhawt nghe nghe. "Ummhmmm" tih leh um a rual ta mai a, a tlan chak lutuka a hnungah ka bei thlawp a ni ber. "Tlan muang rawh" ka ti nghal chul a, a darah ka inham tang ṭai bawk.

"Bullet mai mai ka um pha awm em mai" tih lawng lawng pahin a um zel a, pakhat chu rei loteah a tlan pel a, pakhat zawk a la um avangin kawngkawiah kan vung phei fua fua a, boruak te chu a ri vuk vuk mai hian ka hria, ka meng ngam lo va, thawk pawh ka thaw ṭha thei lo.

Bullet pakhat kan tlan pel leh chiah chu, "Zawnga" an rawn ti vin ṭhak a, an rawn um veleh zat bawk. 

"Benjamin tlan chak tawh suh, ka tla dawn" ka sawi laimek chuan an rawn tlan pel a, kawi pawh an thlen hman lo ang tih ah Benja chuan a lehpel leh a, nuam a ti ngang aniang a nui hawk hawk a, kei erawh ka thinrim hlur.

'Hmela, Zawnga' tih angrengin an in au lung lung a, Bullet khalhtu chu a thinrin deuhin ka hria, "Kuttum i duh em?" a rawn ti ṭeng chhuai a, an ruih hmel nasa mai bawk.

"Kuttum a, i ek tum anih chu" an intlanpel leh vawk....

"Benjaminnn...kan tlu ange"

"Ka hnek dawn che zawnga..." kan tlanpel veleh a, vawi 5 vel zet chu an intlanpel ang, ka thinrim chuan a hnungah ka chum dawm dawm a, "I um duh chuan min chhuk tir rawh, anih loh chuan ka zuang thla dawn" a ti chul a, ka au khum lawng lawng mai. Min rawn tlanpelh leh hnu chuan a tlan muang ta chauh a, ka la ṭhu ṭha ngam mai lo, chutih laichuan nichin deuha kan tlan pelh khan kan zawn a lo thleng a, "I rui a mi?" pawr fea rawn tih pahin min tlanpel zui a, "Ka um leh nanga" a tih rualin a hnungah ka beng ri leh dawm a, a um ta bik em lo.

Ka hlauthawng lutuk chu ka thinphu a rang dup dup a, ka sam te chu ka hma lamah a rawn uai thla hnuang a, siamṭha tur pawhin ka kut chu ka chet ngam lo, a tlan chak leh mawlh ka hlau. "Zu rui an nih kha, khatiang te chu um chi pawh an nia mi, in tlan pelh chu eng nge a pawi vak na" ka hau zui mawlh mawlh a, "Racing-ah te chuan min hneh teuh lo, ka phurh vang chein ka um ṭha duh lo zawk a nih kha, Bullet mai mai" tiin a ang ve hlak hlak.

"Accident i la engtin nge ni ang, ho teah kan thi thei a sin" 

"A teuh lo, an ruih em kha, keite chu ka rui ve hleinem"

"An ruih vangin min tai thlu palh thei a lawm" 

"An accident ngei ngei ang, khatiang chuan an thleng thui lo tawp" a ti hman awrh ang kawng kawia bullet tlu chu kan va hmu zui a, min tlanpel hmasa tute kha an nih hmel, a hnung zawka tlan te khan an lo tung tho dawn mek a, pakhat phei chu kawng sirah a lo ṭhu sawp nuaih a, an bula kan va ding chu phawk fein min lo en bawk.

'In na em?' a tih ve te ka rin tehlul nen "Kha in Bu-let ta a ni maw?" a ti deuh kher a, pakhat chuan a rawn melh rum khawp mai.

"I buaina tur a awm lo" a ding zawkin a lo tih chuan "Buai peih teuh lo mai" tih pahin a tlan chhuak thut a, ka va lehhawi chuan min   lo la thlir ve reng a. "An na vak lo a niang a?"   ngaihṭha zan loa ka tih chuan, "Ho lutuk, khatiang ho kha chu an uiawm loh" a ti deuh hmak a, teh ringawt ṭhin a.

Kawn kan thlen chuan chhuk mai ka tum a, a phal awzawng lo mai. "Gate thleng ka thlah ang che"a ti ve tlat a, ka chhungten min hmuh ka hlau ru khawp a, gate bul chiah chiaha ding lo turin ka hrilh hram. "Ka lo lut chak e" a ti leh ta mai a, "A ngai lo, luh rual ka duh lo ania, zan dangah ti zawk rawh" ka lo ti zung zung a, "Mi te chu i zahpui ve deuh em mawni" a lo ti pek a, teh daih chuan a...

"Engah nge ka zahpui ngawt ang che, in zahpui chhan tur pawh awm nghal lo chuan" 

"Ni bawk si, ṭhian i nei vak lo ti raw, kan mizia hi a in ang tlatin ka hria, duh leh inṭhian ve mai mai ila, hmeichhe ṭhian neih  hi ka chak a..." ka lamah a rawn thle bak a, a nui nge pawh ka hre lo.

"I beisei a hriat em mai a" ka tih chuan, "Chu lam a ni lo, ka kawmngeih che a lawm" a ti leh mauh mai a, ka va awih lo reuh tak.

"U Lizzy vang bak a ni lo ang" ka tih leh pawh chuan, "A ni lo tak tak, hmeichhe bula sawi tur chi ka ngah ṭhin a lawm, ka mipa  ṭhiante hi chu an mawl heih huih vek a, tlema serious deuh ṭhian neih ka duh" a ti leh a, chhan dan tur pawh ka hre lo.

Gate sirah chuan a ding a, rang deuhin ka chhuk a, a tlan leh mai dawn emaw ka tih laiin "Inkawm chu i duh em, ṭhian tiin ka sawi vek tawh che kha, dik tak chuan ṭhian i neih loh hmel vangin ka ti mai mai ania, i duh leh duh loh a ni mai, i duh loh pawn pawi ka ti chuang lo, Lizzy ka sawi chhan lo ania" a ti zung zung a, a insawikhalh lawk ringawt.

Ṭhiana min sawm te chu hnar chi a ni pawhin ka hre lo, chu loah an chhungkaw chaw eikhawmna thlengin ka zui tawh a, ṭhian chu ka ni tawh ber a lawm, zep loah chuan keipawm ka kawmngeih vein ka hria, mamawh hun te pawh ka la nei leh maithei bawka tiin rilru ka siam a,  "A ṭha a lawm; mahse, ka tihpui lo ang che" tiin ka melh rum khar khar.

"Chutiang tih tir che ka tum lo, engmah i sawi kaw thei tak tak hleinem, beisei san ngam pawh i ni em mawni?" a ti bul bula, chumi hnuah "Va lut ta che, keipawh ka kal dawn" tiin a bike a ti nung zui a, engmah pawh ka sawi leh hmain a inher a, a tlan nal nal bawk.

Phur lo fahranin in lam ka pan a, U Lizzy ṭhiante chu an lo haw hman ni ngei tur a ni inchhung chu a reh ṭhuap a, Nu Hlimi a inkhawm aniang a hmel hmuh tur a awm lo. Ka pindan lam ka pan tlang a, khumah ka ṭhu fel chiah tihah U Lizzy ṭawng thawm ka hria a, 'Hello, call i va chhang thei lo ve, in i thleng tawh em?" tiin tu emaw hi a bia a, "Ka ngai leh nghal che, i haw hma leh lutuk a" a tih vang chuan a bialpa a bia tih ka hrethiam a, a rawn rim anih hmel e.

Ngaihven zui duh loin ka intifai a, "Ka nau a lo haw a ni maithei, a thawm ka hria" a tih ri te pawh ka hre pha a, a khat tawkin a nui kar kar reng.

Ka intihfai zawh hnu chuan ka mu nghal mai a, ka mut a chhuak tehchiam lo, ka phone-ah movie enin ka meng reng a, Nu Hlimi lo haw in min lo biak pawh chuan ka tho chhuak lem lo a, ka haw hun min loh zawh pawhin khum aṭangin ka chhang a, leng rei minti deuh aniang "Nidangah chuan mahniin chhuak tawh suh aw, ngaihtuah in na ṭhin em mai" a rawn ti lang lang a, ka chhang let lo thung.

Zan a rei telh telh a, ka harh tulh tulh maiin ka hria, pawn lamah chuan thli a thaw na deuh aniang thawm a ri vuk vuk reng a, a khat tawkin khawpui a ri reng bawk. Ruah sur hunah ka muhil ang ka tih rilruk laiin current a rawn thim hmak a, kawl a phe nghal zawr zawr bawk. Ka phone chu dahin puan ka sin ṭha sauh sauh a, ka mut lah chu a chhuak der si lo, ngaihtuahna a vak kual leh ṭan a, Awmpuian eng nge a tih ve ang tih ngawt chu ka ngaihtuah a, tunah te hian a muhil tawh ang nge a la meng ve reng ang, a zaikhawm angem, nge ni a a ṭhiante nen an awm ho zawk ang, min rawn ngaihtuah chhuak ve ṭhin a ngem?

Ka inlet sek a, ka thil ngaihtuah vang chu nge ni ka hnuk a ulh titih a, ka mittui a hnam ṭiam ṭiam bawk. Class ṭan hun a la hla deuh a, kan ṭan ni tur tak erawh ka theihngilh leh daih lawi a, ni 20 bawrah a niin ka hria, Awmpuia chu class ṭan hma a a lo chhuk ka ring a, kan inhmuh leh huna ka biak dan tur te ka ngaihtuah kual a, ka phurin ka huphurh ru em em lawi a, a khat tawkin thawk ka la leh vang vang ṭhin. Chutih laichuan ka phone a rawn eng pap a, ka message tone a ri zui zat bawk.

Ka en chuan Benjamina message a lo ni a, "I muhil tawh em, i ngaihdan zawh lawk tur che ka nei?" tih hi min lo thawn a, a thil min zawh tum chu rindan ka nei nghal a, U Lizzy chungchang bawk anih ka ring.

"Min zawt la" ka tih chuan a rawn type leh vat a, sawi tur a ngah viau nge ni a type rei khawp mai a, Minute 10 dawn chu ka nghak awm e. A message a rawn thlen chuan "Ka nu chungchang a nia, rawn dilchhut vak lo la aw, i ngaihdan chiah i sawi dawn nia" tih zawng hi min lo thawn a, a thil rawn sawi lah chu ka beisei loh lam daih a ni.

"A la dam e law?" ka va ti ngawt a, ka zawh dan teh tawp chu, ka inthlahrung leh deuh chuan delete ka tum zet a, a lo hmu hman bawk si. 

"Dam e, a awmna veng pawh ka hre tawh, midang sawi ka hre ru a" a rawn ti vat a, ngaihtuahna a ti buai reuh khawp mai.

"Eng tak chu nge min zawh duh?" ka message chu a bung deuh lek lek a, ka hamhaih vang a ni ang.

"Va hmuh chi a ni em ka hrethiam lo anih hi, vawikhatmah ka la hmu lo a, ka chhungte hian engmah min hrilh ṭha duh lo, va hmuh chu a pawi i ring em?" a rawn tih chuan ngaihdan ka nei thiam hauh lo. 

"I hmu chak em ni?" ka ti leh tawl a, a chak tih chu a hriat reng tawh, ka han ngaihtuah chiang a, amah hringtunu hmuh chu a chakawm duh ngawtin ka ring, vawikhat mah a la hmuh loh phei chuan.

"Ka chak leh chak loh pawh ka hre lo, hmuh ve chu a ṭha" tih a rawn thawn chu ka chhang lawk lo, engthilah nge ka ngaihdan chu hriat a duh le, ngaihdan a nei lawk vek tawh a nih hmel a, a rilru a buai deuh niin ka hria.

"I hmuh duh chuan hmuh ve pawh a ṭha a lawm, i chhungten an phal loh i ring em ni?"   ka va ti leh a, a chhungten an hrilh ṭha duh lo anih chuan an khap sak a nih te ka ring a, a rilru buai chhan pawh a ni maithei.

"An phal lo ang, ka hriata sawi pawh an duh hleinem. Mahse, a hmel hmuh ve hrim hrim ka duh a, va insawi kher pawh ka tum lo, a ruka va hmuh ka tum" min rawn chhan danah chuan ngaihdan lo sawi vak a ngai pawhin ka hre lo, thlawptu a duh a ang mah zawk.

"Anih chuan va hmu rawh, a biakte pawh i be ve zawk ang chu, a khawsak dan hriat te pawh a ṭha a lawm," ka va ti luam a, a inngaihtuah buai nge ni message chu a en a, a rawn chhang leh lawk lo a, a duhtawk anih ka ring. Phone chu dahin muthilh ka tum leh a; mahse, ka phone bawk chu a rawn ri leh a, a ngai bawk a ni.

"Ka zam ve deuh a, biak dan tur vak pawh ka hre lo, min kalpui peih em, kan en mai mai dawn nia, kalpui neih loh aiah min kalpui teh" a rawn ti leh reuh a, rilru a ti buai nak mai, midang sawm tur a hre hlawl lo em mawni, engtia kei te min rawn sawm daih nge maw a nih le?

"Tinge keimah kher?"

"Mipa ho bulah ka sawi duh hleinem, ka beisei ang lo ni lo sela ka zak dawn a sin" a rawn ti pek a, a va hahthlak tak.

"Mahni nu te an zahpui ngai lo, khawvelah hian nu nei lo an tam lutuk, i nuin a la dampui ringawt che pawh kha lawm viau ta che, zahpui rilru kha pu nghal reng reng suh" ka va ti duah a, a rilru tur chu ka hriatthiam ve tho mai, a ṭhiante an laktlak vak lo anih ka ring bawk.

"Ka zahpui pawh a ni lo, hruai chi an awm lo a lawm" a rawn ti leh ta reng a, ka khawngaih ve deuh riau a ni, kei ang thoin ṭhianṭha engkim hrilh ngamna a nei lo tih a hriat a, keimah ang chiah a ni.

"Ka kalpui dawn che nia" ka tih chuan a hun tur min lo zawt leh vat a, chu erawh ka sawi lawk thei lo, tih tur ruahman lawk chu a awm lem lo a; mahse, Nu Hlimi awm ni hi chuan chhuah a rem vak ṭhin lo a, a ni zawna len chhuah phei chu ka dil ngam lo ang. Benja bulah chuan ka hman hun ka hrilh leh tur thuin ka chhang a, kartawp lamah chuan ka hman mai ka ring.

Ka mut hlanin ruah a sur nasa hle aniang zing ka tho chu kawt lai a hnawk hle a, kan pangpar te chu an chul rup a, thliin hnawk a rawn len lut nasa hle bawk. Nu Hlimi nen chawhma chhung chu inbul kan tifai a, U Lizzy erawh a period taina vangin a mu deuh reng a, tlai lama a lo thawh chuan Jelebi ka siam thiam em min lo zawt a, ka thiam hauh lo lehnghal.

"I bialpa kha inzirtir ta che, kawna an zawrh saw a thur leh lutuka, a tui ka ti lo" a ti niah niah a, ani aiin Awmpuia siam chu ka  eichak zawk ang, engtikah mah ka ei leh tawh pawh ka ring lo.

Zan ka mut dawnah Noeli status ka en a, Awmpuia nau nena an thlalak a lo dah lang a, Awmpuia nau ka hmuh hmasak berna a ni, a u nen pawh an hmel a in ang deuh a, a nulat hunah chuan a hmelṭha ngawtin ka ring. Awmpuia thung chuan a haw aṭangin status a nei miah lo a, a phone chu a khawih ngai lo emaw tih mai tur a ni, a reh tlawk tlawk mai.

Kartluanin inchhung sekrek khawihin kan buai a, Nu Hlimin pangpar lam aia thlai lam chin a duh vangin inbul te kan thlo fai bawk a, chhuahna hun pawh a la awm thei lo. Benja lah chuan ka hman hun tur min lo zawt ve sek a, inrinni ah bazar paha kalpui ka rilruk a, amah phei chu ka la hrilh lo. 

Zirtawp zanah chuan Nu Hlimi bulah bazara chhuah ka ngaih thu ka sawi a, "Chawhmeh lei tur sawi la, ka lo bazar nghal ang, secondhand thin ka duh a" ka tih chuan, "Kan kal dun dawn nia, thlai i lei thiam lo ang" a ti tlat a, a rual a ka kal anih chuan khawiah mah ka kal hrang thei lo ang. Benja bulah chuan "Sunday-ah ti mai ang, chhuah dan ka lo ngaihtuah dawn nia" ka va ti leh a, a lo aw ve mai bawk.

Mahse, a tuk zingah chuan Nu Hlimi chu a tho nuam vak lo a, "Ka lu a hai deuh tlat, ka bp a hniam a ni mai thei" tiin keimaha bazar mai turin min ti a, ka leitur a ziak thlap bawk. Benja pawh ka va hrilh chawp leh chuk chuk a, a lo nghakhlel tawh viau a niang chu a rawn kal nghal tur thu a sawi a, keiin bazara min lo nghak turin ka ti thung.

Chaw eikham veleh ka chhuak a, bazar ka thlen hnuah ka phone bawk. Ka inhmuh chuan bazar kan ngaih thu ka hrilh hmasa ber a, ka list ken chu rawn banin a bih vung vung a, a nui suk suk mai. "Purun sen a bial chi, a tung lo lei suh, Mai kan tur a pawn lam hring a chhung eng, vawksa a thau nem" tih te a ni nawk a, heng vang hi ania kan bazar hi a duh vak ṭhin lo.

Kan bawr lutuk dawna ka hriat vangin Sa chiah ka lei rih a, a bak chu haw lamah ka lei ang tiin a nu te veng lam kan pan a, an awmna veng a sawi lah chu veng chengker deuh, ka la kal ngai lohna lamah daih a ni. Kalkawngah chuan zawhna ka zawt phei mawlh mawlh a, a chhungten hre ta sela an lawm lo angem, hrilh chu a pawi dawn em ni tih angreng a ni.

"Ka ni chuan hre ve mah se a pawi lo a, patea te chu a hrilh chi loh ang" a ti mai a, a chhan ka zawh chuan, "Min tlanbosantu ania, a kal dawnah lehkha a dah ringawt a, kan awmpui nula hnenah min hnutchhiah a lawm" a ti a, a sawilai chuan a lawm vak lo tih a hriat theih.

"A chhuah laichuan kum engzat nge i nih?" ka tih chuan "Kum khat ka pum awrh an tia, hnute pawh ka la nghei hman lo, zanah ka ṭap nasa ṭhin a, tumah an muhil thei ngai lo Ni Pawlin a tia, an tan chuan a huatawm ve ang, ka ṭahbelh anih phei chuan" a ti zui a, ka ngawi ran mai, sawi nuam a ti vak lo tih ka hre miau a ni.

Bengthlehem vengthlang lamah kan tlanthla zel a, chite kan thleng mai dawnin ka hre tawh, "An awmna lai tak i hria em?" ka tih chuan a lo hre bik awzawng lo mai, "Mi kan zawt dawn nia" a ti ringawt a, kawngkal ho chu zawh a tum nge ni a ding uk uk a, a be ngam lo aniang.

Thui vak lo kan tlan leh hnuah dawr kawtah a ding a, dawr nghaktu chu a lo hawi chhuak rang khawp mai. Benjamina a ngawih reng vang chuan "Ka pi, thil kan lo zawt lawk che" ka lo ti vat a, chuveleh Benja chuan "Pi Ramnunsangi i hria em?" a lo ti ve khauh a.

"Ramnungsangi chu pahnih ka hria, eng rual nge?" dawr nghak tuin a tih chuan "Kum 40/50 bawr vel, nutling a nia" Benja bawk chuan a ti leh a.

"E, U Manuni anih dawn chu, kan thlang lamah khuan tlan thla zel ula, in tawp lamah khan an awm, midang in zawt leh dawn nia" a sawi laimekin "A thlalak i nei lo a mi?" a lo ti zauh a, ka va sik hlak.

"Thlalak chu ka nei miah lo, amah pawh inah a awm ka ring lo, an pa leh a fate an awm ka ring" a tih chuan "Khawiah nge a kal a?" a lo ti leh zat a, ka va sik nawn leh.

"Kawnah khian chawhmeh a ṭhutpui ṭhin a, vawiin chu a lo rawn chhuak ka hmu miah lo a, inah a awm pawh a ni maithei, zuk kal chhin rawh u" dawr nghaktu chuan ti lehin min nuih var var a, "A chhungte em ni in nih?" tiin min zawt bawk.

Chhan ka tum laichuan "Kan inchhung ve deuh" Benja chuan a lo ti hmanhmawh a, dawr nghaktu chuan a hrethiam vak lo aniang, keipawh ka nui ringawt a, sawifiah vak dan pawh ka thiam lo. "Kal chhin phawt ang aw" a rawn tih chuan "Muang changin tlan rawh" tiin ka ṭhutdan ka siam ṭha sauh a, kan tlanna chu kawng chhuk deuh a ni.

"Chawhmeh a zuar te a tih kha..."

"Tinge, i va lawm loh hmel ve"

"Eizawngtu a nih hmel" a ti leh a, a ṭawngbul deuh hmukin ka hria.

"An khawsa nuam vak lo a ni maithei" ka tih chuan min chhang loin a ngawi ran a, eng thil emaw a ngaihtuah mek a niang.

Veng hmawr lam kan thlen hnuah kawngkal pakhat chu kan zawt leh a, an in awmna laitak pawh min lo kawhmuh thei tawh; mahse, step-a chhuk a ngaih vangin bike chu kawng bulah kan hung a, ngawi rengin step-ah chuan kan inzui thla a, kan kalna tur chu assam type in la thar ve angreng deuh mai a ni, kan dinna step aṭang chuan an kawtzawl pawh a lang thei a, kawtah chuan sintex lian vak lo hi a inhung a, hmeichhe pakhat keini aia naupang deuh tur hian tui a lo dawh mek bawk.

"Kal hmasa teh, engmah sawi rih lo ila a ṭha ang" tih pahin ka hma a kal chu a rawn lehhawi vut a, "Engtin nge kan sawi chuan ang" ka lo ti let hu a, a buaithlak mai maiin ka hria.

"Kan ṭhiante in kan zawng der dawn nia" a tih chuan ka rilru a buai nak. "In vengah ka ṭhianpa te an awm ka ti anga, Jasona kan ti dawn nia, a hriat loh tur sawi a ṭha zawk, a hmel kan hmu zawk anga, kan kal leh daih dawn nia" a ti zung zung a, a ṭawng rang bawk si a, a phili deuh em mawni.

"Aw le, mah se kal hmasa rawh" ka sawi laichuan nula tui dawh mek kha a rawn hawi chho a, min rawn thlek deuh vang vang a.

"I farnu a ni maithei" ka ti chu a duh vak lo nge ni thawk a la deuh hawk a, rawn hawi lem loin min rawn ban deuh thuak thuak a, a la kal muang em em zui...

Kawt zawl kan thlen hma deuh chuan "Jasona te in a ni em" a'n ti lauh mai a, nula khan a lo en phawk khawp mai.

Tu Jasona nge, Au Bawiha chu Johana a lawm" a lo ti reuh a, ka nui ṭep.

Benja chu a ngawi rauh rauh a, a pen thla ve zel lawi a, luh ngei a duha ka hriat vangin "Kawng kan bo deuh a, tui vawt intur in nei mial em, kan tui a hal tawh lutuk a" ka lo ti ve sawk sawk a, "Lo in rawh u" nula chuan tiin inchhung lam a pan a, kawt zawl kan thlen chuan ar ek rim a nam hukin ka hria.

"Engrim nge a?" a rawn ti a.

"Ar an vulh a niang, lut rawh" tiin a hnungah ka nam dat dat a, an inchhung kan luh chuan tumah midang kan hmu lo, nula khan tui bottle min lo pe vat a, "U Bawiha a mi in zawn?" a ti he haw a, ka kalpuipa nen chuan kan inmelh ralh ralh mai.

"Jasona a nia, ka ṭhianpa.."

"Ka van hre ngai lo"

"A ni maw, a pawi lo" ka va melh hrawk, "I nu ten an hria ang em?" a ti leh vat a, ka lo ner nak.

"Hre bik lo ang, kan vengah jasona ka hre lo reng reng, kawn lama mi a ni lo maw..." nula chuan a ti leh a, chutih laichuan aw thian kharh kharh ri hi kan hria a, an pindan lam aṭangin a ni.

"Chu chu tunge a?" phawk fea Benjan a lo ti chu rang lutukin ka kal hnaih a, a kut ka va hmer nawk nawk a, a hrethiam a niang "I pa em ni?" tiin a nuih leh var var. Nula chuan mak a ti ve deuh a ni maithei a hmel a buai ve nak a, lu a bu zauh ringawt.

Tui bottle ka pek let leh hnu chuan Fridge lam a pan a, Benja chu a darah kuai kunin "Lo ngawi rawh, ṭawng phawng phawng zel suh" ka ti ru sar sar a, ka thusawi chu min ngaihsak lem lo, a hawi kual ruk ruk a, an inchhung chu rinai takin a fel fai a, 'An rethei hle' han tih tur chi chu an ang lo a, Benja hmuh dan pawh a nih ve ka ring.

"Mate, Ar chaw i pe tawh em, i nuin chawṭhing a dah chhuah sa kha" patling aw in a rawn tih dut dut a, nula chuan a pek zawh chiah thuin a lo chhang bawk.

"In in nei nuam hle mai a, midang khawiah nge an awm a?" ka tih chuan, "Au Bawiha chu a inkhel a, anu chu kawnah a kal" a ti ve mai a, makti hmel a la pu reng thung.

Sawi tur hre lo a kan ngawih ran ran laichuan "Au Bawiha ṭhiante in ni chiang, pawisa a lo ba leh tawh a mi?" a rawn ti hlawl a, "Tute nge?" pindan aṭangin a rawn ti ve chiah bawk.

"Ba lo e, Jasona zawkin a ba a" chupa zet chu aw, dawt sawi a thiam lo si, sawi ve ṭalh chu a la tum a.

"Au Bawiha a niang; mahse, amah dil ru aw, anu ten pek sak an duh tawh lo a, tunlai phei chu pawisa kan nei lo lutuk, a ba chu aman a rulh zel a ngai tawh" nulain a tih chuan chhan ngaihna ka hre lo, Benja lah chu a ngawi hmuk a, a hmui a petsawi nang bawk.  A landan vang chu nge ni nula chuan a rawn thlek vang vang a, "Apa a inhlawh thei bawk si lo a, lo nghak hram hram mai rawh u, engzat nge a bat leh a?" a rawn ti zui a, a inthlahrun hmel khawp mai.

"Khawiah nge i nu?" Benja a ni, teh phawng phawng ṭhin a.

"Kawnah thil a zuar a?" nulain a tih chuan "Mate, lo kal lawk teh" patling aw khan a rawn ti leh a, nula chuan pindan lam a pan thuai bawk. A lut fel awrh ang tih ah Benja chuan "Chawhmeh a zuar chiang lutuk" lawm loh hmel fahranina rawn ti a, kan awmdan chu hahthlak ka ti riau tawh.

"Hei, ba ṭhingah min ngaih mek hi, kal vat teh ang" ka tih chuan  "Ka pa a inhlawh thei lo a tih kha i hria em, a chhan zawt teh" a ti leh peka, a va buaithlak thei tak.

Rei loteah nula chu a lo chhuak leh a, "Anu dil mai rawh u, kawnah chawhmeh a zuar a, Pi Manuni tiin in han zawng mai dawn nia" a rawn ti a, an rilru kan ti buai hle anih hmel. "I pa chu a dam na nge?" tiin nelawm thei ang berin ka nuih a, "Aw, a damlohna a rei tawh" a tih chiah chu " Tinge, a eng nge na?" rang fein Benjan a lo ti leh a, a ṭawng ring thei bawk si.

"A nerve a ṭha lo a" a tih chuan Benja chu ka lo mitmei vat a, "Kal tawh mai teh ang, kan tlai dawn" tih pahin pawn lam ka pan nal nal a, min lo zui ve mai bawk.

"Chawhmeh zawrhna ah chuan kal teh ang, hmu ve hrim hrim ang" a ti chho mawlh mawlh a, "I be dawn em ni?" ka tih chuan a ner nawk. "Ka be duh kher lo, a hmel chiah hmuh ka duh" min kalpel zui vut a, chutah rawn inher leh thutin "A fanu kha, a zia reuh ti raw?" a rawn ti pek a, ka nui hak mai.

"In in ang miah lo, a fanu kha chu a hmelṭha riau" a lo meng rang ralh a, "A u Bawiha aichuan ka hmelṭha hrim hrim ang" a'n ti zui a, a nuih danah a hlim tih a hriat reng.

Kawn lampanin kan inphur chho leh vang vang a, kan thlen chuan chawhmeh zuar an lo tam phian a, kan zawn chawp leh a ngaih hmel e. Bike kan hun fel leh zet hnuah chawhmeh zawrhna lam chu kan pan a, "Nangman zawt rawh" a tih tlat avangin anhnah zuar pitar pakhat chu ka va zawt a, amah phei chuan kan hnung lam dawr kawtah min lo nghak a, a rawn hawi ve reng thung. 

"Ka pi, Pi Ramnunsangi i hria em, Manun tiin an ko ang?" ka va tih chuan, "A sir bera ṭhu saw anih saw, kawr sen ha saw" tiin min lo kawhhmuh a, hmanhmawh deuhin Benja awmna lamah ka let leh a, "A sir a mi, kawr sen ha saw" tiin ka va hrilh ru sar sar a, engmah pawh a sawi lo, a kal phei pawp pawp a, ka umzui ve thuai bawk.

A va be dawn emaw ka tih laiin chawhmeh chu a thlek vung vung a, a nu chuan "Eng lam nge in zawn?" a lo ti var a, a thil zawrh chu thlai lam hlir a ni. "Zawn pawh kan nei lo" a ti bul hmuk a, ka lamah a rawn inher ringawt.

Zawhna ngah deuha ka lo en laichuan ka ban a rawn vuan thut a, min pawt let rawk rawk mai, "Kal la, va leisak teh" tih pahin a wallet a phawrh a, "A thil zawrh saw sangkhat man pawh a tling lo ang, va lei zo vek rawh" a ti ta mai, a pawisa min pek chu enin ka han melh leh te te a, a mittui a hnamin ka hria, ka awm a nuam bik miah lo.

"Nangman va leisak zawk la"

"Ka duh lo" a hawisawn hmak reuh a, a mit chu a sen rum tawh.

"A vaiin maw ka lei ang"

"Aw, i nei vek dawn nia"

"Lo kal ve rawh" han pawh mai ka tum chu a ṭang tlat a, "Kal rawh" tih pahin min nam zui bawk. Huphurh ru deuhin ka va pan a, a bul ka va thleng chu, "Lo en rawh, Maian te i duh em, tukina sih thar a nih hi" a lo ti zung zung a, a hmel ka en chian chuan Benja nen in an na deuh an nei a, a mitmengah a ni.

"Kharchhawng ka nia, a lo la vek ang aw, a vai hian engzat man nge?" ka tih chuan a hamhaih hmel khawp mai a, "Thlairah hi i duh tel em?" a ti ban charh a, "A vaiin ka lo duh ang" tih zawng ka sawi. "Mahse, ka khar chhawn ve tho ania, ka tlawm thei lo che asin" a ti leh halh a, ka sir lam a melh zauh mai. Ka lehhawi chuan Benja chu ka sirah a lo din ve chiah a, "A va thar ve" a rawn ti ringawt, "Rambo va lei rawh" ka lo ti zauh a, a nu hmel a en leh zauh hnuah a inher a, ka nuih a ti za angreng.

"Kan veng a mi in ni em, khawiah nge i zawrh leh dawn, anhnah hi kan hlep a chhe lutuk a, han intlawm thei ila ṭha tur" Benja nuin a tih chuan, "A ngai lo, tlawm kan ngai lo ang" ka lo ti ve sawk sawk a, "Chuti maw.." a ti leh vang vang a, a hmelah chuan makti hmel a lang reng bawk.

Rei loteah Benja chu a lo let a, rambo polythene pahnih ah kan khung khawm a, kan inkhung chhung zawng chuan kan bulah lo dingin a nu ngawt chu a melh a, engmah phei chu a sawi lo. A nu chuan lawmthu te min hrilh mawlh mawlh a, a lawmawm duh ve khawp ang, vawikhatah a hralh zo miau a lawm, a fapain a dawr tih lah a hre der si lo a, hria se engtin tak ngai ang maw?

Bawr lukin bike-ah kan inphur a, tlan chak lo turin ka hrilh deuh reng, kan thil lei lah chu 'Nei vek rawh' min ti ringawt a, ka duh bik chiah lo, Nu Hlimi bulah sawifiah te a ngai leh dawn a, a ṭha dawn lo riau.

"Ka lengkawi tih an hriat ka duh lo, a ṭhen chauh hi ka nei ang, kan insem dawn nia" ka tih chuan, "Kan inah tlang mai ang aw, tumah an awm ka ring lo" a ti ve mai a, ka hnial bik lo.

An veng lam kan pan vang vang a, kan thlen phei chuan dar 11 a la ri lo deuh a, a la hma viau mai. "Purun sen leh Mai lei ka la ngai a, min thlah pahin bazarah kan kawi leh dawn nia" an step-a chhuk pah chuan ka ti a, "Hmanhmawh suh, thil kan eipuar phawt dawn nia" a tih laimek chuan zawhte ngiau thawm ka hria, rang deuhin an kawng khar lam chu ka hawi a, awm an awm chiang a ni. 

"I ni a awm?" 

"Garage-ah khan motor dang pawh a awm, inleng kan nei aniang" a ti a, ka hma ah a rawn kal thuai bawk. Inchhung kan va lut chu le, tum loh deuh deuh an lo awm a, polythene pahnih khai chunga Benja lut chu an lo en ṭhap mai. 

"Kha kha eng nge?"

"Eng nge in lo tih a?" an inzawt rual a ni ber. 

"Hei i piin a chhang siam a lo ken sak che a" Ni Pawlin lo tiin min lo melh ve zawk a, "Lo kal ru, thingpui kan in zo chiah" a tih zawm zat a, a piin min lo nuih var var bawk. A patea te nupa erawh an hawi â deuh a, hmeichhe pakhat awm ve chu a ni ve tho a niin ka hria, "Bente, eng nge i khai a, chawhmeh a va ang ve, i bazar em ni?" a lo ti zung zung a, Bena chuan a chhang mai lo, choka lam a pan a, ka zui ve zel bawk. 

"Tinge clinic-ah i kal loh a, tumah an awm dawn lo emaw ka tia"

"I piin min lo be leh thut sia, chawhnu lamah ka kal ang" tih pahin a ni chuan a thilkhai chu a en sak a, "I va han lei hnem em em ve, chawhmeh i lei dawn tih i sawi lawk bawk si lo, midang sawn ka tir che emaw an ti ange, an awm lai kherin i rawn hawn a" a ti niah niah a, a sawi zo chiah tih ah, "I ni in a bazar tir che em ni a, a va chhawr nasa awm che ve, tlangvalin chawhmeh i rawn khai haw pur pur a" a ni lian zawk khan a rawn ti a, ni Pawli chu a tum deuh bur mai.

"Tunlai chu ka duat a, ka chhawk ve anih hi" Benjan a tih chuan a Patea nui ri kan hre zui a, ni Pawli erawh a la lungawi vak lo. "Khawi a mi nge, hetiang i lo buaipui a ngai hleinem, awm mai mai rawh ka ti ve reng che sia" a ti hlak hlak a, "Ka ṭhianpa nu zawrh anih kha, an harsa ve a, ṭanpuinan ka lei sak" tiin Benja chhan a pha mawi ve khawp.

"Rintein hawn ṭhen ve rawh se" a tih leh chuan "Pakhat kha a tawk" ka lo ti vat a, "Hawn ṭeuh rawh, thlai te chu kan ei ṭha peih tak tak lo, kan ei a tlem bawk si, kan ti chhe leh ṭeuh ang" Ni Pawlin a lo ti a, dawhkanah a phawrh zui mawlh mawlh a, anṭam tel te chu paruk lai a awm.

Thingpui in ka tum laimekin a Patea kha a rawn lang ve hlawl a, "Chawhmeh i lei a maw, eng te nge i lei a?" a rawn ti lut a, dawhkana chawhmeh awm hnur chu rawn enin a ner deuh nang a, "A ṭhianpa te zawrh, ṭanpuinan a rawn leisak a nih hi" ni Pawlin a tih chuan, "A nu zawrh a ni zawk lo maw?" a patea chuan a ti ta mai a, ka thingpui in chu ka hak ṭep a ni.

"A nu awmna a hre hleinem, hmuh pawh a la hmu lo" Ni Pawli chuan Benja lam a rawn hawi a, Benja chu a ngawi reng, plate a chhang chu banin a hmawm pah zauh a, a hmel aṭang chuan thil awmzia chu a lang vek ang, an hriatthiam ngei pawh ka ring.

"Hmannia a pu ho a kan sawi laikhan pawnah a lo ding a lawm, a hre vek ang" a Patean a tih chuan Ni Pawli chu a nur nasa khawp a, Benja chu a melh rum titih bawk.

"I nu chu i va hmu em ni?"

"Benjamin, i va hmu em?"

"Zawh vak pawh a ngaih loh kha, a ngawih reng danah a hriat mai a lawm" a Patean a tih chuan, "Engvangin nge i va hmuh, i va dawr vel a ni maw, thil awmzia ka hrilh vek che kha, va zawn chhuah leh tur a ni hleinem" Ni Pawlin a ti khar khar a, Benja chuan a la chhang lo reng reng.

"I tihmawh lutuk hi chu a buaithlak deuh a ni, keinin tlawmah kan la a, va tihbuai miah loh kan duh laiin i lo va zawng chhuak ania, ani te chuan thi daih mahla pawi a ni nang, i damlo chungin a kalsan duh che a, vawikhat te mah a rawn ngaihven hlenem che"  Ni Pawli chu a ṭawng ring bawka, midang pawh an lo lang rang khawp mai. A pi chuan thil awmzia a rawn zawt hmasa ber a, a patean a lo hrilh chuan an thinrim hmel hlawm khawp a, ka tan pawh lo awm ve reng a nuam lo, a kalpuitu ka ni bawk si.

"In awmna i hrilh em?"

"A lo insawi khawngaihthlak viau em ni?"

"Pawisa a rawn dil maithei cheu a ni" tih angreng a ri nawk a, an insawi ṭhinrim zualin ka hria. Benja pawn a ning ta deuh aniang, "Ka en ringawt, ka be lo a, tunge ka nih pawh a hre lo" a ti vin ve hlur a, midang chuan an la duh tawk thei chuang lo.

"Vawikhatmah va hmu tawh suh ang che, ani saw i mamawh loh nan i niin a ṭul pui che tih hre ta che, nangmah vang anih hi tun thlenga pasal pawh a la neih loh" a ni pakhat zawk khan a ti hmarh hmarh a, chutih laiin a patean "An khawsak dan i hria a a ṭha reng reng e, a hnenah khawsa la i dinhmun tur pawh i hmuthiam ang chu" a lo ti nghat a, Benja chuan a haw khawp mai.

"In chhungkua chu a ni lo maithei; mahse, ka nu a ni ve tlat, va puih ka duh anih pawhin ka thu thu ania, in lo buaina tur a awm lo" a tih khum hmiah a.

"I duh chuan i chawm pawh kan phalsak ang che, thawhchhuah te han nei ve phawt la; mahse, i ni thawhchhuah hmanga chawm chu tum suh" a patean a tih leh chuan a piin a lo khap vat a, Benja chuan a ni lam a en daih thung.

"I hria maw chu, hna thawk ve turin min duh vek, ka dil ziah che a, hna thawh min phal sak ngai lo a, 'Awm mai mai rawh' i ti ringawt zel a, ka thatchhiat vangah an ngai anih hi" a ni chu rum theihtawpin a melh a, "Khatin i ni ṭawngkhum suh" a piin a lo ti veleh bawk.

"Keimah vangin pasal a nei lo a, engah nge min enkawl loin pasal chu a neih mai loh, min enkawl turin ka ti em ni, a duh thuin a lawm min enkawl" a ti chiah chu a chal a ri thlawp mai, a ni lian zawk khan a lo beng chu niin, phawk felin a ni chu a melh a, "I ni hian i nu tih ai a tih sak vek che, zah ve deuh rawh" a lo ti nghat a, ni Pawli chu a ṭap ṭepin ka hria.

(End of chapter - 18)