BLUE BAYOU (CH - 19) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 19

"Engati nge min ben ngawt a?" a tho deuh uaih a, a Ni Pawlin lo pawt ṭhu lehin "Kutthawh zawng chuan ti lo teh u" tiin a laizawnnu chu a khap a, a Patea erawh a chhuak nal nal thung. Benja chuan ka lam a lo hawi a, engmah a sawi lo nain nuam a ti lo khawp ang, keipawn haw ka duh viau a, sawm chi a ni rih si lo va, ka kalsan zawk mai dawn em mawni?

"Duhtawk ru, inleng kan neih hi" Ni Pawlin a tih leh hnu chuan hmeichhe awmve pahnih chu an chhuak a, a pi leh ni Pawli ten an la dinchilh reng thung a, a pi zawk chuan a sam ah a chulsak heuh heuh reng. "I nu chu a damṭha maw?" awki damdiai hian a ti a, Benja chu a la lungawi vak lo. "Ka hre lo" tih zawngin a lo chhang a, a pi leh a ni te chu an inmitmei ru zauh bawk.

"Va hmu lo la kan duh chhan chu a ngaihsak loh em vang che ania, a tel loa ka chawilian che hi ka inchhuang ve bawk asin, i va pan khan ka induhtawkna a ti hniam ve tlat a, ka thinrim chhan hi i hrethiam lo mai mai a ni" a ni in a tih chuan phawk fein a ni chu a melh a.

"Nang leh ani te chu in inthlau lutuk, nangte chu doctor i nia, ani lakah te chuan khitah a lawm i awm, a bula va chen tuma kal pawh ka ni hleinem, a hmel hmu tur ringawtin a lawm ka kal" a ti hlak hlak a, chutah ka lam rawn hawiin, "In duh leh Rintei pawh saw zawt ula, ka hming pawh ka hrilh miah hleinem, a chawhmeh kan lei sak ringawt a lawm" a ti leh a, pitar chuan min lo en na a engmah a sawi zui lem lo.

"I pu hnenah chuan sawi miah suh" ni Pawlin a ti dek dek chu, "Patea khan a sawi vek tho ang" a lo ti hlur a. "A sawi lo ang, ka lo hrilh dawn a lawm, nidangah va hmuh tawh lo la.." a pi zawk a ni.

"Ka nu a nia, ka hmu ve bawk ang chu, in duh leh nangni chuan hmu lo tawp ula pawi ka ti hleinem, min khap lo ula a ṭha a ni mai" a tho vut a, tui khawihna lam panin a va ding ringawt a. "Naupang chhia ka nih loh hi, 'Ti suh, ti rawh' in ti reng hi ka ning teh ania, a ṭhenin 'Awm mai mai rawh' min tia, a ṭhenin 'Hna thawk ve rawh' min ti bawk a, tun aṭang chuan ka duh dan hlirin ka awm tawh ang" a ti hluk hluk a, a thinrim bawka a hmai te chu a sen ṭun a, a insehruh nasa hle bawk.

"Thu i awih loh chuan i pu i ti lungawi dawn miah lo ania" a piin a ti chu Ni Pawlin a lo khap vat a, "I duhtawk teh ang ka nu, a tana ṭha tur chu hre rual a nia lawm, a tlanbo phah leh zawk a nge" tiin a chhuak nal nal a, pitar chu a hawihai khawp mai. "I ni kha a lungawi lo anih kha, midang zawng zawng aipawhin a buaipui tam che a, fa pawh nei sela nang aichuan a duat bik hauh lo ang, kan haw phei dawn a, lo inti lungawi leh vat rawh u, nangni pahnih tal chu inrem ula a ṭha" Benja en ran chung chuan a ti a, thinrima sawi chu a ni lo. Mahse, Benja chuan chhang duh loin a ngawihsan hmak a, pitar chhuak tur chu a en zui reng bawk.

Sitting room lamah chuan an ṭawng barh barh a, haw an rawt anih hmel. "Ka pa bulah engmah lo sawi suh u, a ṭul chuan keiman ka hrilh ang" ni Pawlin a tih ri te chu ka hre pha a, rei vak loah pawn lamah an inzui chhuak a, keini pahnih chu kan inmelh leh zauh ṭhin a, sawitur a vang duh khawp mai.

"Haw mai ka duh" ka ti tawl a, min thlah kher lo mahsela pawi ka ti lo, ka awm ve reng chu a fuh loin ka hria

"I thingpui pawh i la in zawh loh kha" a tih chuan, "Ka puar tawh" ka ti leh vat a; mahse, ka tho tur chu min rawn nem ṭhu leh zawt mai.

"Ni Pawli kha ka va thlem lawk anga, ka thlah ang che" tiin sitting room lam a pan a, a ni lo let thawm ka hre zui bawk a, an in hau leh ang tih mawlh chu ka hlau.

"Chawhmeh leisak chu i duh lo viau em ni a?" Benja aw chu pawr tak a ni, ka thlem dawn a ti ve sia, a va chhuahchhal nghal ngawt nia.

"Leisak ringawt te chu pawi ka ti lo, va inhriattir lo la, va tibuai miah lo bawk la a ṭha a ni mai" pakhat chuan a lo ti hlak a, "Ka inhriattir reng reng lo, nichin khan ka sawi duh lo mai mai a, ka hmuh khan ka khawngaih a sin, nang pawh ka pi hian mi kawtah chawhmeh tlemte zuar ve sela i khawngaih ve tho ang, an chhungkaw eizawngtu a ni lehnghal, an rethei asin" chupa chu a au deuh lawng lawng a, a pen thawmin a zui bawk.

"I mu dawn e law, a mak e, titau ringawt lo la"

"Ka mu dawn lo, ka insiam dawn, lo va chhuak rawh, i ṭhiannu a awm ve reng saw" 

"Aaaa....i buaithlak thei em mai" 

"Pasal chungchang kha khatianga i sawi fo kha ka duh lo ania, i ṭawngkam hi fimkhur ṭhin teh, duh ni ila ka nei daih tawh ang chu" ni Pawlin a tih chuan ka ṭhutna aṭangin ka tho vat a, partition awmna bulah chuan va dingin an thawm chu ka ngaihthla zui a, ni Pawli chu a ang hlak hlak reng.

"Min tham lo deuh deuhin i ṭawng ziah mai, i hmakhua hi ngai lo ila ka indang pui miah lo ang che, i tan vek a ṭha tur anih hi hre ta che" a tih leh chuan, "Ka hre tho a lawm, kha chu ka sawi tum a ni bik lo; mahse, an lo sawichhuak hmasa ziah a, keimah vanga pasal nei thei lo angin an sawi che kha, nuam ka ti bik hleinem, dik tak chuan nei mahla pawi ka ti lo" a ṭawng tawp chat a, "Pawi chu ka ti tho a" a tih leh vang chuan thlek meuhin ka va en a, pindan kawng khar bula a ding chu ka va hmu thei.

"Pasal neih te chu i chak em ni, mipa sual deuh te nei fuh ta la i damchhungin i hrehawm dawn a sin, mi inah i awm daih anga, an chhiahhlawh i ni mai dawn asin, aaa...i hrethiam lo anih zawk kha, pasal neih hrim hrim kha ka duh lo a ni hleinem, makpa chhungkhung te pawn nei mai la, anih loh pawn sawn te pai mai rawh, i tar thlengin ka enkawl thei dawn che a lawm...." Benja chu a ṭawng bah nuaiin ka hria, a lu a tuai vut a, kawngkhar hawn a tum laitakin a ni chu a lo chhuak a, a in en hnai khawp mai.

"I dak thei em mai Benjamin, ngawi mai mai teh" a ni in a tih chuan, "I hmakhua tur ka ngaihtuah ve tho a lawm, i fa ang chiah ka nia, ka nu aipawhin ka ngaihtuah zawk daih che" a lo ti var a, a nui tih ka hre thei.

"I nuin a kalsan lai che khan naupangte ka la nia, i ni Hruaii leh Mary'n pasal a nei daih bawk si a, kei lo chu enkawltu tur che an awm si lo, nang lah chu i sawngnawiin i ṭahbelh em em mai a, zanah pawh kan mu ṭha thei ngai lo, a chang phei chuan reh nawk nawk mai che ka chak ṭhin"

"E he, min rek em?"

"Ngawi rawh" an in kal pel hmak a, Ni Pawli chu a vei thuak thuak a, Benjaminan a zui kual ve zel bawk.

"Enkawl che kha ka duhthu a ni miah lo va; mahse, ka pawm che apiang khan min en kar zel a, i nu emaw min ti ṭhin a, min ngen ziah bawk. Chuvang ania ka kut zalah i tlak ni, nangmah vangin pasal ka nei thei lo an tih kha dawt a ni miah hleinem, ka hreh chhan i nia lawm, fahrah nun hre miah loa seilen tir che ka tum a, i mamawh engkim pek che ka tum bawk a, i nu i va pan hi chu ka rilru a na ve deuh, min tlanbosan i hreh ngai bawk si lo va, i va awm hlen duh lo ang tih ka hre hleinem" tih pahin ṭhutthlengah a ṭhu tau nghat a, a bul chiah Benja va ṭhu ve chu a melh no lo khawp mai.

"Ka tlanbo a nih loh kha, helaiah an lo thleng phei ve ziah a, ka ning a lawm, ka riak chhuak ringawt anih zawk kha" 

"Thla khat dawn dawn te anih kha i awm bo ṭhin"

"Ka lo haw ru ziah a lawm, tlanbo an haw ru ngai lo" 

"Hetiang mai maiin nung tawh suh, i pu ten i nu hmuhtir che an duh lo a, a chhan pawh i hre vek, rawn ngaihsak ve ik che sela chuan kan khap kher lo ang che, pasal dang a nei a, fa te pawh a nei tawh a, nang chu a rawn ngaihven ngai miah loh che hi, kan hmangaih em vang chein kan rilru pawh a na a, chuvang ania tunah pawh kan lungawi loh ni" a ni ṭawng mawlh mawlh laichuan a sam a lo hui ṭhat sak a, a ni chuan a ban a lo vaithla deuh sak a, an awm dan chu inngaizawng inthlem te pawh an ang, an nuihzatthlak zawk a lawm le.

"Enteh ni, hna ka thawk ve tawh dawn, Joshua pawn.." a ti dek dek chu, "Hna i thawh loh nan a lawm theihtawpa ṭan ka lak ni, nuam sa taka i awm theih nan ania ka in dan pui che, midang kha chuan e hna thawk pawh ni la sawi nawi an nei tho ang, i ni Hruaii lah khan ka duat lo che a a hriat chang apiangin min ṭawng el khum a, hna han thawk chiah la chu an ṭawng ngeiawm leh khawp ang, chuvangin hna thawh a ngai lo, awm mai mai la, pasal ka neih loh phei chuan engkim hi i ta vek tur a ni mai, i awm mai mai peih loh leh thil eng emaw te zir zawk rawh" a lo ti barh barh a, Benja chuan a duh vak lo.

"Pasal i sawi leh tawh kha, nei leh ta daih si la kut bengin ka awm dawn asin" a lo ti hlur a, an buaina chu a ril ka ti dawn nge a ho ka ti zawk dawn ni, ngaihdan pawh ka nei thiam lo ve.

"Kut bengin i awm lo ang, ka la hrilh duh lo mai mai che a lawm, i damchhungin i rethei lo ang ka naute" tiin Benja lu chu a chul sak veleh a, kei ang chiahin Benja chuan a hrethiam lo. "Eng maw i sawi duh lo?" a ti vat a, "I rilru a puitlin hunah ka hrilh ang che" a ni in a tih chuan, "I ro khawmtu ah min dah em ni?" a ti leh zat a, a lo phur hmel nasa.

"Ro ka nei hleinem, ka hlawh bak hi engmah ka nei lo" a ni in a tih chuan thawk a la deuh hak a, "Ka pu hnenah ka kal dawn, ka pi khan chhungkaw mi zawng zawngin ro chan tur in nei ang a tia, ka chan ai ka va dil dawn a lawm, tih tur chu ka hre ṭeuh mai" a ti nghat nghat a, a ni erawh a ner nang thung.

"I pu chuan a pe lo ang che, i khawsak dan ngaihtuahin pek chi i la ni lo" 

"Min pek tur chu a nei tho ti raw...?"

"Nei mai thei, ka la sawi duh rih lo"

"Sawi la anih mai chu, tlaiah ka va kal nghal teh ang"

"Eng atan nge i tih, i nu ṭanpui leh i tum em ni?"

Benja chu a ngawi vang vang a, "An rethei asin aw, ar te an vulh a, a fapain ba te a nei ṭhin a, a pasal a mu bawk a, a fanu pawh a bawrchhawr lutuk, amah phei chu a cher bawk si a..." a chek zui tlat tlat a, a sawi uar thiam reuh khawp mai.

"I ṭanpui anih chuan an lawm miah lo ang" a ni in a tih chuan, "An hriat lohin ka ti mai dawn a lawm, pawisa chu ka mamawh hmasa ber, i pawisa ka hman chuan Patea a thinrim leh dawn em mai, a ruk zela tih a ngai ang" a lo ti nghat nghat a.

"I lam ka ṭang ngawt lo ania" a ni in a tih leh chuan an in en ran a, "Ṭang rawh" a ti ni maiin ka hria, ka phone a rawn ri a, ka kalsawn nal nal bawk.

Nu Hlimin min lo call a, "I lo haw dawn tawh em, i va rei ang reng ve, i u nen kalchhuah lawk kan ngai asin" a rawn tih chuan ka haw dawn chiah thu ka hrilh a, a bp check an tum anih hmel a, a doctor hmuh tur te inah ka awm tih a hre miah lo.

Kan inbe zo phone ka dah chiah chu "I hmanhmawh tawh e law?" a rawn ti hluai a, ka hnungah a lo ding reng tawh.

"Haw ka ngai" ka tih chuan, "Chawhmeh kha hawn ṭeuh rawh, keini chuan kan duh vak lo, hawn deuh vek rawh" a lo ti zung zung a, Anṭam leh maian tel khat ve ve chu ka duhtawk laiin ka bazar bag ah a rawn hnawhlut mawlh mawlh a, ka bag pawh a puar awk mai.

"Ka ni a chhuak dawn chiah a, a kal veleh ka thlah ang che" a tih vangin kan han nghak leh rih a, Ni Pawli insiam zo lo chhuak leh chuan keini pahnih lo ding chu min lo en ren rawn a, "In inngaizawng em?" a ti mauh mai a, ka lo pha rang nasa mai.

"Ngaizawng teuh lo, kan inkawm ve mai mai" ka tih laiin, "In ngaizawng kan ang em ni, a ti zahthlak em mai a" Benjan a lo ti pawr hlur a, ka va melh zawk nghe nghe.

"In inzui ngun riauin ka hria" a ni chuan a ti leh hram a, min rinhlelh hmel hle bawk.

"Vawihnih bak kan la inzui lo e a..." a hrechhuak leh thut a niang, "In hmuh lai chuan vawihnih chauh" a'n ti leh kher a, a ni chuan a awih loh hmel hle.

"Kawngka kalh ṭha ru aw, haw har lo la Bawiha, tlaiah Kimpuii a lo kal dawn kha" tiin a chah a, a chhuak zui thuai bawk, tunge Kimpuii ka zawh chuan an awmpui nula, langa lo kal ṭhin a ni awm e.

Haw pahin Bazar-ah kan kawi a, purun te min thlan pui a, kan purun leina vaipa lah chuan nupa emaw min ti lehnghal a, Benjan purun bial deuh a thlang chu, "Pasal chuan a ṭha hre ve" tiin min lo fiam reuh a, ka ngei tak tak a ni. Ka hmanhmawh deuh tawh avangin kawng sira Mai an lo zawrh chu ka lei tawp a, chumi hnuah in lam kan pan nal nal a, kan va thlen chuan ka chhungte chu an lo chhuak hman tawh a, a tihzia zawk mahin ka hria.

"Lengah min sawm dawn nange" kal mai ka tum laia a rawn tih chuan, "Tumah an awm hleinem, unaunu pawh a chhuak ve daih a lawm" ka lo ti let hu a, min chhan a tum zuau tih ah a phone a lo ri a, "Engmaw i theihnghilh, ka rawn kal peih lo asin" a tih vang chuan a ni bawk anih ka ring. Ban min vai tak avangin ka luhsan a, a tlan chhuak thawm pawh ka hre har lo.

Mahnia han awm chu thaw a veng huai hian a hriat a, vawiin phei chu ka zangkhai vuk maiin ka hria, ngaihtuahna la pengtu an tam bawk a, ka pa pawh ka lo hrechang meuh lo. Chawhmeh te remfela ka intifai leh zet hnuah ka pa chu ka han bia a, vawkin a lo sa mek anih hmel a, tualchhung vawk note pawh a lo hauh fel diam tawh. Engzat nge vulh a tum ka zawh chuan, "Pali"a ti hem mai a, a tlin ngut a nge maw, buhfai a hautak si a, ka huphurh pui khawp mai. Ani thung chuan "Chawṭhing ka dawh kual dawn a lawm, i pa Muana te retailer lai a ni bawk a, tih dan a awm mai ang"a ti sam et a, ka inbiak zawh hnuah a vawk note laktum thlalak te min lo thawn a, an mam ṭha hlawm viau mai.

Dar thum pelhah ei ka rel ṭan chauh a, ka chhungte chhuak lah chu a leng pah nge mawni an rawn haw lawk lo a, dar li rik dawnah pawh an la rawn haw thei lo. Eirawng ka bawl zawh tawh avangin sittingroom-ah tv ka en a, ka lo muthlu sek nghe nghe. Darkar chanve pawh ka muhil hman lo ang ṭawng thawm vangin ka harh hlawl a, ka chhungte lo haw chu an rawn inhau haw nge mawni.

"I va han hrechiang awm lo em em ve, ka tan pawh a zahthlak zawk a lawm, a lo sawi chhuak anih teh chuan ka zak ru ngawt ang, ṭhiante hmel pawh kan hmu ngam tawh dawn em mawni" Nu Hlimin a rawn ti lut barh barh a, "Ka hre bik hleinem, hria ila ka hrilh ve ang che chu" U Lizzy'n ti pawr hle bawk a, a thil sawi erawh ka hrethiam mang lo.

"A ni lakah bat ka ngah ka intih tehlul nen, a vahpa lah chu ka lo vuak sak nek a, a hmel pawh ka hmu ṭha ngam tawh lo ang, i tlawk tlaw vang vek a ni" Nu Hlimi thil sawi ka hria chu ka harh deuh kawk mai, clinic-ah an kal tak a lawm, Benja lah kha a ni in a lo ko a, an va inhmu a nih hmel.

"Chaw chu kan eikhawm tak tak dawn a mi a?" Sitting room lama rawn phei pahin U Lizzy'n a ti a.

"Ei khawm mai loh ten min sawm si a lawm, a hma daih aṭangin kan lo sawi tawh a, a hrim hrimin i bialpa hlui a ni lawm ni, a chhungte i hre miah lo chu i mak mange ka ti" choka aṭanga nu Hlimin a tih chuan, "Engtin nge ka hriat ang, a ṭhiante inah a riak kual mai mai a lawm, i ṭhiannu fapa tih ka hre lo hrim hrim" unaunu chuan ti lehin a pindan lam a pan zui a, ngaihtuahna an ti buai reuh khawp mai, chawei khawm te an sawi ri lehnghal a, engtikah nge an tum ang le, ka kal chak lo nghal pang mai, ngaihtuah chian phei chuan ka kal ve chu a ṭha dawn lo tawpin ka hria, zawhna a tam dawn tlat.

Ka pindan lam pan ka tum chu Unaunu lo chhuak tur nen kan intawk hlawl a, "Enteh Rinbawih, Benja kha..." a rawn ti hluai a, ka lo ding rang khawp.

"Anu doctor fapa a lo nia" a tih chuan ka ner hman ṭep, "A fapa a...?" ka ti ringawt a, "A fapa tih ah, a fa lak a lo nia" a'n ti leh hram a, a va la chiang lo reuh tak.

"A va mak ve" ka tih chuan, "Mak ka ti lutuk, anu sawi dan phei chuan an hausak hmel tawp, ka lo chik lo leh lutuk a, a bike aṭang te khan lo ngaihruat thiam ve tur hi ania, an rethei lo tih a hriatreng a sin le" a ti deuh vang vang a, ka rin dan tawk vel a ni, Benja laka a awm dan lam aichuan a retheih leh hausak lam kha a ngaituah ka ring sa reng a.

"Clinic-ah chuan a lo awm ve em ni?" an inhmuh dan tak hriat ka chak vangin ka zawt leh a, an thilsawi te pawh ka hre chak.

"Kan thlen hnu lawkah a lo lut ve hlawl a lawm, min rawn be nghal bawrh bawrh a, anu lah kha a hamhaih leh lutuka, keimah zawk min ṭawngtir zel a, tum loh deuhin ka biak phah vak a lawm" a ti a, a ner deuh nain thinrim hmel a pu lem lo. "A ni chuan eng nge a lo sawi, a ngaizawng che tih a hre nghal em?" ka ti leh a, a hria anih chuan ka u a nih thu pawh a hre nghal dawn a, a chhan chu Benja khan a bialnu nau ka nih thu leh ka tihpui thu a sawi tlat a ni.

"Ka sawi ṭhin kha amah hi a lawm a ti nghal a, Doctor khan mak a ti lutuka; mahse, min be ṭha ve lutuk, chawei khawm te an rawt a, kar leh ah an inah kan eikhawm dawn, kan chhungin min sawm a lawm" a tih chuan ka chungchang an sawi lang lo anih hmel a, ka thaw huai mai.

"Anu saw a inthlahrung lutuka; mahse, inthlahrun vak pawh ngai ka ti lo, Benjamina pawh khan a haw bik lo a, engahmah a ngai lo zawkin ka hria" a ti leh luam a, "A ṭhat chu" tih bakin ka chhang tawh lo, pindanah ka luh san a, phone ka va charge laite chuan choka lamah an ṭawng barh barh a, Benjamina chu va zawh ka chak ru khawp mai, an ina chaw ka ei thu te kha zep tura hrilh ka duh.

Zanriah eidawna ka va chhuah chuan nu Hlimin min lo bekbawr sar sar a, "I u in thil a hrilh ngai che em, a bialpa helaia lo kal ziah ṭhin kha ka ṭhiannu vahpa a lo ni reng a lawm, an inkar i hriatpui em?" a lo ti a, "U Lizzy'n a duh lo tih chiah ka hria" tiin a bak chu ka sawi thui duh lem lo.

"Nia, an inngaizawng rei lo viau a niang, kha tlangval ber kher kha a lo ni reuh a, min ti hrilhhai tak tak a ni" a ti nuah nuah a, a ngaihtuahna a buai ve hmel khawp a, a ṭawngkhum dan ka ngaihtuah phei chuan a awm dan tur chu ka hrethiam hle a, nuih te pawh a za deuh.

"Chaw chu kan va ei tak tak dawn em ni?!" bathroom aṭanga unaunu lo chhuakin a tih chuan, "Dawn ka tih tawh kha, Pauline-i hriatah engmah sawi chhuah loh tur, tlangval khan a hrilh maithei a; mahse, hawihawm deuhin i awm dawn nia, kan inhriat sa loh vang ania, ka thiam lo hulhual bik hleinem, a vahpa kha a rawn kawlhrawng ve em bawk a..." dawhkana chawi thleng rawn dah pahin unaunu chu a en ren rawn a, "A la rawn be ngai che em?" a ti leh hluai a.

"Tunlai tak chu be lo, tinge..?" Unaunuin a tih chuan, "Lo biak dan tawk i thiam dawn nia, zuamawm si loin ṭha takin lo biak tum la, anni nen chuan chhungkhat ang ka ni tih hriat tur aw" a han ti zui a, unaunu chuan a chhang lem lo, a phone a bih a, dawhkan a rawn kil thuai bawk.

Zanriah eilai chuan Benja lo len ṭuma an inbiak dan te kha an sawi chhuak a, "I vuak hrep kha, a chhungte i sawi chhe bawrh bawrh lehnghal a, i ṭhiannu lek a lo ni sia" tiin unaunu chuan a nu chu a fiam a, Nu Hlimi chu a nui ṭha duh vak lo. "Min zawt anih chuan a vahpa khawsak dan kha ka sawi ve tawh mai ang chu, ka tan pawh ka fapa ang mai a ka entur a nia, a nunphung ṭha lo te pawh hrilh a pawi hleinem, a lo zilh ve zawk anga" nu Hlimin a tih chuan, "A rawn kal leh maithei a ni, a ni nen in lo inhre ṭha sia" ka lo ti zauh a. " Dik chiah, engtin nge kan tih ang, gate hawnsak ringawt pawh i phal si lo a, ka hawnsak ziah tawh dawn tihna nge, lo danglam thut kha a nuam dawn miah lo" unaunu chuan a ti ve ngei a, Nu Hlimi erawh a ngawi vang vang.

"Lo biakṭhat vak te chu a nuam duh tawh awm lo tiraw Rinte?"

"Nia, kan kawtah a ṭhu tlaivar ṭhak zel sia"

"Dik chiah, luh pawh a lo lut ngam ngai lo ania, tun a taka lo tih ṭhat hawrh te chu a, min ngaikawi duh ngawt ang" a nu chuan a rawn melh ralh a, "Be ṭha hluak rawh ka ti hleinem che, a mawi tawkin hawihhawm i lo chhuah mai dawn a lawm, i duh loh te phei chuan biak ṭhat viau a ngai lo a, ṭhiante nau mah nise ka fanu tibuaitu te chu ka hau hreh miah hleinem" a ti hmarh hmarh a, Unaunu chu a ner nang nang ringawt. Chutih laichuan ka message tone a lo ri ṭat a,  ka en chuan Benja hming a lo lang nghal a, phone chu ka ak ṭha leh rang khawp. 

Thleng ka sil dawnah message chu ka hawng chauh a, "A fuh chho dawn riau mai, i lo hre tawh em?" tih hi a rawn thawn a, a phur mai bawk sia, a nui vur vur ang chu. Message chu chhang hmasa loin thleng ka sil te tea, pindana ka luh hnuah ka va chhang chauh a, "Nuam i van ti awm ve, hmalak dan tur i ngaihtuah mek em?" ka ti fiamthu a, a rawn typing nghal.

"Nuam khawp mai, makpa interview pawh ka tlang nghal dawn a ang riau, ka pi zawn min melh danah khan a lang tlat..." a message chu ka nuih pui hak a, a hmel awmdan tur pawh ka mitthla thiam.

"Ka lo kal thu leh chaw ka lo ei thu te kha zep a ngai a nia, i ni khan a lo sawi chhuak palh hlauh a nge" 

"Lungngai suh, ka hrilh vek tawh a lawm, an inah rui chungin ka kal a, a nu in min mil vak lo a ka ti bawk a, a hrethiam ve lutuk" a ti sam leh mai a, mi â tak hi chu a ni bik lo, thil hi a lo man thiam ve zung zung zel.

"Chaw in lo ei dawn kha aw, kar thar lamah an tiin ka hria" a rawn tih leh chuan, "I zak ve det em?" ka va ti tawl a, engtin nge a lo chhawn ang ngaihdan pawh ka nei thiam lo.

"Zak teuh lo, keite chuan ka lawm lo ve ngai hleinem, an nufain ka hmangaih ve ve" a rawn ti leh a, ka chhan hmain "Nangpawh ka duat che" a rawn tih zawm leh zat a, lutuk hian, a phur khaw lo zo mai dawnin ka hria.

"Unaunu pawn a be ṭha ve tawh turah che ngai ang" 

"Vawiinah pawh min be ṭha fu a sin, a nu ka hneh anih phawt chuan min hnar rei lo tawp ang"

"Mahse, inngaizawng inkarah chuan induhtawnna hi a pawimawh ber ania" ka message chu a en lawk lo a, khuma ka mut hnuah pawh rei deuh thleng chu ka nghak a, thil dang a ti a ni maithei.

Ṭawngṭai tuma ka ṭhu chiah tiha message chu a lo thleng a, "A duh thu ngeiin ka nihpui leh ang, min duh lo hulhual a ni bik hleinem, a nu khan min ngeih vak si lo a, a inthlahrun phah ve anih kha, tunah chuan buaina a kiang vek tawh a, a rem lohna a awm tawh lo ang" a rawn ti ve duah a, a dik ve na chen chu a awm ang, unaunu dinhmun kha a laklawh ve riau a, nu Hlimi rilru a dang a nih chuan Benja sawi ang chu thleng thei tak tak pawh a ni.

"Mahse BJ, bialpa a nei mek a sin?" a rilru tihbuai tuma va hrilh chu ka ni lo, keimah zawk chu ka rilru a lo buai, Benja hi ka ṭan tawh em a, a tih fuh loh ka hlau riau a ni.

"Ka hmanhmawh lo, muangchangin ka che dawn a lawm" a rawn tih chuan ka nui ringawt, han bei ve leh poh sela, a hlawhtling lo anih leh inhmuhchhuah phah hlauh sela a ṭha ang, zep loah chuan hun ṭha a nei leh hi ka lawmpui ve reng mai, a atchilh bawk si a, a phu ve em a ni; mahse, unaunu berkher hi chu...aaa.. ka ṭhian a nihna angin ka duh pui chiah lo chu a ni.

Pathianni tukah ka pa nen kan inbia a, ka nu nen an lo inhmu a ni awm e. "I chungchang min zawt a, a ngai ve deuh che aniang, kum thar te a ni tawh dawn bawk a, i be chak vak lo anih pawhin message-in chibai te han buk ve la, i rilru pawh a nuam huai zawk ang" a rawn ti charh charh a, ka hmin lo ru khawp mai.

"I be ṭha viau em ni a, engtin nge ka chungchang te a lo zawh ngam che le" ka ti khawl a, kei min la pawh a duh viau hi chu ka hrethiam thei mai a, ka pa laka inthlahrung lo ang taka a awm hi chu ka ngaidam thei lo, be hreh a, hmuh ringawt pawh zak viau turin ka beisei a, ka sual vang pawh a ni maithei, ka pa bula ka chungchang a lo zawt te chu ka ngaihdan a ni hauh lo.

Chhunlamah kan inkhawm a, chawhnu lamah pawh zaikhawmna ah Nu Hlimi ka zui a, Unaunu erawh a ṭhiante nen kan inah ar kan an tum a, zan lamah pawh a inkhawm ve lem lo. Kum hlui thlah zan a ni a, hman pui tur nei ve ta lo chu ka mu hma ang ka ti rilru a; mahse, ka muhil thei dawn lo tawpin ka hria. In kan thlen chuan kawtah an lo ri laih laih a, unau leh a ṭhiante ho chuan zai an play a, ar hemna tur an lo buatsaih mek bawk.

"I va ti ṭha bik ve, tluk loh rim i nam hle mai" tiin a ṭhian hmeichhia te chuan min lo fiam a, ka inthlak zawha zawm ve nghal turin min sawm bawk. "Tel pui ve rawh, hmun danga an kal aichuan hetah ti mai rawh u ka tia nih kha" nu Hlimin a tih chuan, "Mut ka chak tawh zawk, an ṭhian hoin an awm tho a lawm" ka tihsan mai a, pindana ka lut chu ka intihfai zawhah ka mu hmak a, ka khum aṭang chuan an zai thawm leh an nui ri te chu a hriat chian theih viau mai.

Movie ka en a, rilruah a bet meuh lo, zan rei a hnai a, halmawi hal thawm a ri chuah chuah reng a, a reh hauh lo na in ka lung a leng ru khawp mai, a khat tawkin tukverh bulah ka va ding leh ringawt ṭhin a, ngaihtuahna kawmin; rilruin ka zeldin bawk. Engtin nge zanin hun hi a hman ve ang, a hmel chu ka mitthla ah a rawn lang uar uar a, a nui hmel hlir a ni ka hmuh ni, hun nuam taka a hman ka beisei. Chutih laichuan kan kawt lamah thawm a ri ham ham a, number an chhiar rual ṭhap ṭhap a, kum thar lawmna halmawi thawmin beng a luh chuah chuah bawk. 

Tukverh aṭang chuan ka lo thlir ve reng a, van boruaka halmawi puak darh mek te, kan kawt kaia 'Happy new year' ti a chibai inbuk thawm te chu ka hriain ka thlir ve reng a; mahse, ka ngaihtuahna erawh an la peng zo chuang lo. Ka mit ka chhing vang vang a, a hriat phak loh tur duhthusakna thu chu ka hlan a, 'Kum thar chibai, thil ṭha zawng zawng ka duhsak che a, i tan kum ṭha lo ni mawlh rawh se' tiin a hming ka lam a, ka ngai takzet a ni. 

Ka han meng chiah chu ka message tone a rawn ri zat a, ka en chuan ka ṭap lek lek mai, Awmpuia ngei a ni.

"Kum thar chibai" tih thu mawi em em mai hi min lo thawn a, ka hlim zia chu aw.....min theihnghilh bik lo, min lo hrechhuak ve ngei a, chibai min buk hmasa ber tu a ni bawk.

"Kum thar chibai le, i dam ṭha em, zanin te i hmang nuam maw?" ka ti a, ka chhang let lo phal tlat lo.

"Ka damlo reng a, ka dam leh tawh zawk, nang i lo dam ṭha em?" a lo ti let var a, khum lam panin ka va ṭhu rem sawt sawt a, ka hmanhmawh chung a ni ber.

"I eng nge na a, i reh lutuka, i damlo tih pawh ka hre miah hleinem" 

"Ka kalah lungte a lo awm a, Christmas hma deuh khan ka inentir a, ka ṭha tawh lutuk" tiin damdawi a eimek thu a rawn sawi a, Christmas hma lawka a inentir anih chuan a hmain a na tawh a ni maithei.

Ka han zawt leh ngat a, "A na zeuh zeuh a, hna ka thawh nasat khan a hrehawm ṭhin a, ka haw chhoh hnu khan a rawn zual a lawm" a tih chuan ka inthiam lo ru khawp a,  engmah tak tak hi hriatpui ka nei lo, ka lo ngaihsak lo lutukin ka hria a, rilru a na dawn dawn mai.

"Inenkawl ṭha dawh aw, zai ngai loin a la dam thei aniang, damdawi an chawh che chu ei ṭha la" tiin hnukulh ṭeuh chungin ka chhang a, a message rawn thawn leh erawh chuan min ti nui var var thung. "A tir chuan tila ril tla aniang min ti a, ka taiah hian a puar tlat a, ka zung ṭha thei bawk si lo va, ka hlau hman ania aw" a tih chuan biak ka chak et et, a aw ka hriat lohna pawh a rei tawh.

"In be lawk ila, i hman em?" 

"Zanlai inkhawm kan nei dawn a, ka lut dawn chiah a sin" a rawn tih vang chuan ka call ta em lo, "Inkhawm nuam le" tih ka thawn chu, Emoji hmaisen ṭena nui lai lem hian min lo chhang a, phone chu dah phal loin a message chu ka chhiar nawn sek a, rilru a hlim ru veng veng bawk.

U Lizzy'n an ar hem hmin eiturin min lo ko a, tlem chu ka va eipui ve a, a phawk deuh avangin tui ka ti ve tehchiam lo. Mipa pathum hi an lo awm ve a, u Lizzy bula ṭhu ṭhu a bialpa thar kha niin ka hria, an inhau nge mawni mipa zawk chu a ṭhu ngawi reng a, Unaunu pawh chu lungawi zan lo hmel a pu. Rei pawh awm duh loin ka luhsan a, ka mut hmain Awmpuia nena kan inbiak na chu ka chhiar nawn leh dap a, ka nui leh ringawt ṭhin.

Dar thum pelh thlengin ka meng a, Awmpuia inkhawm bang ka nghak a ni ber; mahse, engmah a rawn sawi lo a, keilah chuan beisei ka lo nei sang hman khawp a, sawi tur lah ka ngah, kan inhriatirh lai, be ṭha ngam lo a a message ka nghah ṭhin lai te ka hrechhuak a, ka awmdan chu khang hunlaia ka awm dan ang chiah kha a ni.

A tuk lamah pawh a reh vang vang a, a status lah hmuh tur a awm lo. Inkhawm banah pawh a message a awm beiseiin phone chu ka en leh ṭhin a, a beidawn thlak khawp mai. Nizana min lo biakna kha ka lo ngai dikhlel deuh a ni maithei, ani kha chuan ṭhian angin chibai min buk ve mai chauh a ni ang, ka ngaih ang hian min ngai lo a nih ka ring, danglam riau tura ka ngaih ang kha engmah a awm lo; mahse, rilru a na thar a, ka ngaihtuahna chuan min hliam nawn leh a ni, a reh thei tak tak lo, a zual zel zawkin ka hria.

Kum thar ruai chu ka ṭheh ve a, ruaiṭheh hi nuam ka ti ngai lo va, nu Hlimi ka zui kual a ni deuh ber. Unaunu erawh a nuin a thlah zalen ve deuh a, zan inkhawm dawnah a lo haw chauh a, a inthlahrung aniang chu a insiam ve sawk sawk a, a rawn inpeih rang hle bawk. Ani hi chu a pian ten a zir bawk a, puan a han bih pawh hian a nalh thlup zel a,  pheikhawk sang an bun ve lo chung pawhin an nufa bulah hi chuan ka te bik riau zel.

"Benjaminan min lo bia a, inkhawm banah lo kal a tum" biakin chhunga kan luh hnua a tih chuan, "In inbe ṭha tawh em ni?" ka lo ti vat a, a ṭawngkam aṭang chuan eng emaw a awm tlatin ka hria.

"Be zeuh zeuh, nizan pawh khan lo kal a tum a, midang an awm vangin ka hnial a lawm, nizanah Nau-a nen kan inṭhen a, Benja chu lo la hrilh suh" a tih leh chuan lawm tur nge pawh ka hre lo, Benja erawh a lawm khawp ang.

"I nih pui leh dawn em?" chik zetin ka melh a, a nuih a za deuh nge mawni. "I ti ho em mai, ka single ve rih dawn, Bejamina awm danin a zir viau anih loh chuan ka chhang rih dawn lo" a ti ve nghat a, a nuih danah erawh ka hrethiam ve tho a, engmah phei chu ka sawi tawh lo, a single rei lo ang tih erawh ka ring.

Inkhawm chhung zawng chuan a hlabu karah phone a khawih a, mi biak nei ang maiin a nui leh ṭhin a, Benja a bia a ni mai thei. Ka va thlek thuak a, a hlabu a khup ran em avangin ka hmu hman lo, engah nge maw ka hmuh te a hlauh viau chu ka ti rilru a, ka hriat chin hi rin dan pawh a nei thiam miah nang, tunah tak hi chuan ka ṭhianpa bialnu angin ka en a, ka unaunu anih vanga ṭan rilru put kha ka tum tawh bik lo, a mi ngaihdan khan min ti lawm tehchiam lo a ni.

Kan inkhawm bang in pawh kan la thlen hma chuan ka phone a lo ri a, beisei loh lutukin ka nu phone call a ni. Nu Hlimi hriata biak chu ka duh lo va, hmanhmawh deuhin an nufa chu ka kalsan a, gate-a ka luh rualin ka chhang ve chiah bawk. "Mate" a rawn ti nghal a, sawi tur pawh ka hre lo, ka be duh lo kha ania, min lo call anih pawhin ka chhang lo ang ka ti ṭhin a; mahse, a phone call ka hmuh khan chhan ka tum nghal ngawt a, eng nge maw ka hriat ni,  ka inngaihtuah fim lo a ni ang.

"I damṭha em, mamawhte i nei em lo zawh che ka tum a, engmah rawn sawi hreh suh ka tih kha aw...i pa bulah pawh.." a sawi zawh hmain, "Engmah ka mamawh lo" ka lo ti bul hmuk a, ka thinrim em em pawh a ni lo, biak ṭhat loh chu ka la thupui hlur a, mamawh lam phei chu tum lo tak ka ni.

"Kumthar te in hmang nuam em?" tiin thil dang min zawt leh daih a, a aw chu a damthluam reng.

"A pangngai" ka tih chuan, "Ruai in ṭheh ve em?" a rawn ti leh a, a zawhna apiang chhan chu ka duh lo ru khawp a; chuti chung chuan ka chhang leh hram tho, ka inhrethiam bik lo, nuam lo tihna ka nei tlat a, ka be ṭha thei lo va, biak chhiat pawh ka thei chuang lo, ka hrehawm ru ṭun mai.

"Engtikah nge class in ṭan dawn?" a tih leh chuan "A ni ka la chiang lo, thla tawpah" ka ti bawl a, admission fee ka nei em tih min zawt leh zat a, ka neih thuin ka chhang a, pawisa phei chu ka nei lo, nu Hlimin min tum sak dawn tih erawh ka hria.

"Bazar na tur ka lo thawn ang che aw, thawmhnaw vel i lei dawn nia" a tih chuan ka inhumruh nasa mai. "A ngai lo" a tih laiin, "I nu Hlimi ka lo thawn ang, a hnen aṭangin i lo la chhuak leh mai dawn nia" a tih zawm leh a, "Lo thawn duh suh, mamawh pawh ka nei lo" ka la ti ve fan a, kan inbiak reng chuan ka thinrim leh zo dawnin ka hria. "Inthlak ka ngai, ka dah ania" tiin phone chu dah mai ka tum a, "Ka ngai che asin mawle" a ti ri ka hre leh a, kawngka a ka lut tur chu ka ding leh rih. A thawm chu ka ngaithla vang vang a, "Hello" a rawn tih leh rualin phone chu ka dah daih thung.

A aw lah chu ka bengah a cham reng a, khawngaihna rilru put chu ka duh loh tehlul nen ka lainat ru tlat pek a, ka ngaih ve zia pawh ka hrechhuak thar a, min ti hnim ruih thei. Ka pindan lam ka pan a, ngaihtuahna a vak kual nasa khawp mai, inthlak pahin kan inbiak dan te chu ka ngaihtuah let a, heti hian inhrang aṭangin chhungkua kan ni thei tho ang em tiin ngaihtuahna ka nei bawk. Ka pa nen chuan ṭha takin an inbe thei a, kan inkar hi siam ṭha ta ila eng nge kan an zel ang le, tun hma ang khan kan inrem leh thei chiah a ngem, rilruah kan pai reng dawn si a, engmah hi a pangngai thei tawhin ka ring lo.

Zan ka meng rei ṭhang a, mut ka sual nasa ṭhin khawp mai, chhun lamah tih tur em em a awm loh vangin ka mu rei ve thei rih a, dar 7 hmain ka tho ngai meuh lo. Taksa na sawi tur awm si lo hian ka chau hluah hluah ṭhin a, a chang phei chuan ka lungphu a rang chiam a, thaw hah titihin ka awm leh ṭhin, ka mut ṭhat loh vanga ka taksa chau tawngkhawng a nih te ka ring, hmun zima ka awm chang lah hian ka thaw a pik hma hle a, bathrooma ka luh laihian a zual ṭhin bawk. Ka chhungte bulah chuan ka sawi duh lem lo a, sawi ila chuan nu Hlimin inentir turin min ti ngei a nga, pawisa a hek mai mai dawnin ka hria, na chhia ka ni lo bawka tiin ka pal zam a ni ber.

Zirtawp zanah Benjaminan min rawn be ve leh hlawl a, u Lizzy nen khan an inbe zui vak lo nge ni engmah a rawn sawi leh lo a, a message ah pawh chuan u Lizzy chungchang a rawn sawi chuang lo, "Ka nu te vengah ka va kal leh a; inrinniah chiah chawhmeh a zuar aniang a ṭhutna ah khan a lo awm lo a" tih zawng hi min lo thawn a, an inah a kal em ka zawh chuan, "Ka ngam hleinem, tunge ka nih te min lo zawt anga, a chi loh ang, an inchhaka step bul thleng kha ka kal a, tumah ka hmu lo" a ti leh mai a, ka khawngaih angreng, va biak pawh a chak ru ngawtin ka ring.

"Kalpui leh i duh em?" ka tih chuan, "Duh lem lo, ka duh thut leh ka lo sawm ang che" a rawn ti a, naktuk hi inrinni a ni a, va hmuh a remchan ni tak chu a ni. Ka va sawi chuan, "Kan kal hman lo ang, chaw in lo ei dawn kha" a lo ti let vat a, ka lo theihnghilh hmin der.

U Lizzy nen an inbia em ka zawh chuan, "Be zeuh zeuh, lo len pawh ka duh a, chaw in lo ei hma chu lo len a phal lo va" a ti leh reuh a, unaunu chu a invengthiam ve tlat mai, a nu a ngaichang anih hmel e.

"In la inbe ṭha lo zawk em ni?" a rawn tih chuan ka bangbo deuh a, hmannia ka lungawi loh thu ka hrilh vang kha em mawni?

Mahse, ka chhan hmain a message a lo thleng a, "I bulah engmah sawi tawh lo turin min tia, phone-a lo biak che pawh a phal vak lo, a intithu sawt khawp mai" tih hi a rawn thawn a, ka ner nang ringawt, unaunu thil sawidan chu ka va zawt chiang leh ngat a, Benja chuan engmah a zep lem lo. "Ka hriat duh chu amah zawt zel turin min tia, 'Rintein ka chungchang engmah a hre lo, min tih lawm nana biak ṭhat pawh a ngai lo, ka nau ania, i tirh kual tur a ni lo' a tia, min tih pui kha a lawm vak lo aniang" a rawn ti duah a, ngaihdan chu ka nei a, Benja ngaihdan ang erawh a ni lo.

"Ka tihpui tawh dawn hleinem che, i kutah engkim a awm tawh, i thlun theih leh lo thlung rawh" fiamthuin ka va ti a, a nuih a za khawp mai. "Lo kal phawt ula, thlun ka lo tum ange" emoji nui lai lem a rawn thawn tel ṭeuh a, ka chhang let tawh lo thung.

Dar 3 bawrah ka muhil a, ka thawh chuan dar 7 a lo pel thui viau tawh. Chaw chhum ka siam laiin unaunu pawh a lo tho chhuak ve a, "Anu a la tho nange, dar engzatah nge kal a tih le..." ti niah niah chungin dawhkan a rawn kil a, a pindan lama nu Hlimi ṭawng thawm ka hriat vangin ka chhang lem lo.

"Ka sam rawng hi a ṭhing em?" a rawn ti leh phawng a, ka va thlek chuan a lo tuai mam sauh sauh a, "A mawi reng a lawm" ka ti chu a awih loh hmel hle.

"Colour ka duh a sin le" a ti vang vang a, a nu lo phei chu enin kan kal hun tur a zawt zui a.

"E, kal hma a ngai ang, Pauline-in hna a ṭhulh phah dawn a, kal hma turin min chah a lawm, chhun thingpui in hmanin kan phei dawn nia" a ti a, ka lam rawn hawiin, "Inah i lo awm mai dawn em mawni, tui haw ni a ni sia, kan chhuah vek chuan a fuh lo ang ka ti" a ti leh halh a, chhan pawh ka chhang hman lo, "Ka thil chah pawh a lo thleng mai thei" U Lizzy'n a lo ti ve zat a, an nufa chuan min rawn melh ve ve bawk.

"Chuti chu ka kal ve lo mai ang, insuk te pawh ka ngai a lawm" ka ti vat a, ka kal chak lo bawk em a ni, an nufa a an kal chuan a tawk maiin ka hria.

"Duh leh tlai lamah i lo kal anga, chaw eihmana i lo kal chuan a tawk mai a lawm" nu Hlimin a ti leh tak nain ka hnial ta thung. Unaunu chuan a thil chah khulna tur pawisa min pe zui a, chhun thingpui hmeh leina tur min pe tel ve ngei a, min nuih tlawn deuhin ka hria, min tirh dawn laia a hmel ang hi pu reng thei sela ka ti ṭhin.

Tukṭhuan kan eitlai deuh a, kan eikham chuan an insiam ṭan der a, unaunu insiam lah chuan min ko phar ve reng bawk. A thawmhnaw hak turah a buai a, lan nalh loh a hlau khawp mai, "I ngo a, rawng dal lampang kha i inhmeh ang, i sam kha thlah bawk la, i fel hmel lehzual ang" ka ti ve luam a, ka hmuhdan dik tak ka sawi a, a ngaihdan pawh a ni ve tho aniang ka tih ang ang chu a inbel a, a lungawi hmel viau bawk.

An chhuah dawn chuan dar 11 a pel tawh a, tui an lo sem hun ka nghah vangin ka la insu duh lo va, an sem loh thut hian tui kan rem thiam hlawm si lo a, lei a ngaih phah fo ṭhin. Mahnia ina awm hi nuam ka ti teh tlat a, khawhar deuh chung pawhin rilru a thlamuang ve riau zel a, min uaptu an awm loh vang te pawh a niang. Tv ah zai ka play a, chhuat te nawtin inchhung ka tifai zung zung a, pawn aṭanga min ko ri pawh ka lo hre lawk lo.

"Tunge awm che u, tui a haw..." a rawn tih leh rual chuan ka tlan chhuak rawk rawk a, a kal liam tur chu ka va hmu hman thuak chauh a ni. Tui haw chhungin ka thawmhnaw leh mut puan te ka su leh zung zung a, ka inpeih fel chuan a lo tlai angreng viau tawh, ka ril a ṭam lo bawk a, tlai lamah noodles ka lei anga, tlai chaw ah ka ring tlang mai anga, eirawng pawh bawl a ngai lo ang ka ti rilru a, mahni chauha awm ni ila ka khawsak a sam dawn khawpin ka hria.

Sitting room-a ka phone charge ka va en chuan missed call a lo tam khawp mai a, Benjamina hlir a ni, vawi 8 zet a rawn call nia!? Ka call back vat a, a chhang thei miah lo, a rawn call leh mai ringin phone chu ka dah a, pangpar tui ka pek san bawk. 

Darkar chanve pawh a tling lo ang tih a ka va luh leh chuan missed call 3 a lo awm leh hman a, message pahnih nen.

"Engati nge i lo kal ve loh?" 

"Rawn kal ve tur a lawm, ka ni pawh ka hrilh vek a, a zep dawn reng a lawm" tih angreng a ni. Phone call ka dawn avangin ka tlan chhuak vat a, unaunu thil chah chu eng nge a nih pawh ka hre lo, a to bawk si a, a zang em em lawi bawk si, hawn sak loin a pindanah ka va dah a, chutih lai chuan ka message tone a rawn ri leh a.

"Ka lo hruai ang che, lo insiam rawh" tih tlawng a ni, a va mawl, ka inthlahrung turah a ngai em mawni?

"Ka lo kal peih lo, duh ila ka rawn kal thei reng a lawm" ka va tih pawh chuan, "Lo insiam rawh" a rawn ti leh ṭalh a, lo kal a tum tak tak a niang, a va buaithlak thei tak.

(End of chapter - 19)