BLUE BAYOU (CH - 20) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 20

Benjamina chu ka call zui a, va hnial hram tuma call ka ni, rei pawh a rik hmain a lo chhang a, "Hello" a rawn tih laichuan pawnah a awm mek aniang motor thawm te ka hria a, a lo chhuak tawh zawk em mawni?

"Lo kal tak tak suh" ka'n ti deuh thawr a, a rawn au deuh lung lung mai.

"Dawrah min tir a, chumi pah chuan ka rawn tlang ang" a ti a, hepa tak hi chu aw...

"Ka lo kal peih lo tak tak a lawm, midang pawh ka hrilh vek kha, min lo hruai duh lo mai rawh, ka chak lo tak tak" ka au ve lawng lawng a, nuih te pawh a za deuh e a.

"Eng ngati maw i peih lo a, i thil tur pawh kan lei kep vek che asin" a tih chuan ka bangbo deuh, eng kha thil tur nge maw a sawi le?

"Eng thil maw...?" ka tih leh laichuan Bike thawm leh motor horn a ri chuah chuah a, eng nge a rawn sawi pawh ka hre tawh lo, vai ṭawngte a ri deuh nawk nawkin ka hria.

"Benjamin" a tawp nghal daih. 

Ka rilru a buai nak a, insiam ringawt chu ka duh si lo, ka chhungten min hruai tura an lo tir anih loh phei chuan va kal chu ka hreh riau, mak te pawh min lo ti zawk ang, an hriatpui em tih lah ka hre der si lo. Call leh ka tum laichuan a message a lo thleng hlauh a, ka en chuan "I lo kal duh lo tak tak em ni, awm ve la ka ti a sin" tih hi a lo thawn a, ka nui ta ringawt, a ṭhian ang tak takin min ngai tawh aniang, ka tan pawh a lawmawm lam a ni.

"I bialnu a lo len kha, ṭan lak i ngaih laitak anih kha aw, i thlun chat theih nan vil chawt zawk rawh" nui chungin message chu ka thawn a, a lo chhang leh rang khawp mai.

"Nuam pawh ka ti vak lo, sawi tur a vang lutuk, ṭawng fimkhur a ngai bawk si, awm la chu a nuam deuh ang maw le" a rawn ti a, a awm dan tur chu ka hrethiam mai, a lai ve deuh ni ngei tur a ni.

"Fel deuh khan lo chhawn rawh, mark tih ṭhat i ngai teh a nia" ka va ti ve leh a.

"Mark tih ṭhat vel hi ka thiam ve vak lo, i lo kal duh loh chuan ka thil leisak che hi ka lo thawn ang, chhang a nia, Lizzy i lo dil dawn nia" a rawn ti a, ka inhmuh leh hunah min pe zawk sela ka ti ru khawp a, innel lutuk anga lan chu ka hreh deuh a ni.

A message ka chhan leh hnu chuan dawrah ka va kal ve zawk a, noodles leh thei tui te ka lei a, ina ka let leh chuan dar 4 a ri thuak tawh. Insuk pho te ka seng hnuah chuan tih tur em ka nei tawh lo a, veranda ah ṭhuin mi status te ka en kual a, Awmpuia status a awm ve teh tlat mai.

Ni tla tur thlalak hi a ni a, ama lak anih ka ring, caption a dah lo a, ngaihtuahna erawh a ti thui hle thung a, a lung a leng ve anih te ka ring thul, khawhar taka ni tla a thlir liam tur chu ka han ngaihtuah zui a, min ti hnim ruih mai a ni. A lo chhuk hun tur han zawh chu ka chak ru khawp mai a, ka ngam bawk si lo a, tun hmaa kan awmdan te mitthla ah a rawn lang a, hetianga inthlahrung leh biak takngial pawh hreh ngawih ngawih a ka awm hi ka ring pha ngai lo, thu pangngai mai mai pawh ka zawt hreh ta chu a nih hi.

Inchhunga ka luh hnu chuan eitur ka siam a, tv en pahin ka ei mawlh mawlh a, dawhkan hnuaia ka phone dah chu a rawn eng leh zawk ṭhin, Benja anih ka ring deuha, chaw an ei ve mekin ka ring. Ka en chuan a lo ni ngei a, message tawi te "Nuam pawh ka ti lo" tih tlawng a ni.

"Eng ngati leh pek nge?"

"Kawm tur ka nei lo"

"Unaunu nen in inbe thei lo em ni?"

"Bia e" a rawn ti lawi sia, eng nge maw a buaina ni dawn le!?

"A be ṭha duh lo che em ni?" ka tih leh chuan, "Be ṭha e" a ti leh bawk si, a va khawlhkham tak.

"Thil thleng vut vut turin beisei lo la, chhungkua in inhre pawh tawh a, a zia chho zel mai dawn a lawm, nghak thei ve deuh rawh, puitling taka awm a hun" ka va ti duah a, ani hmanhmawh lutuk hian a beisei ang a hmu lo aniang, a phili thei bawk si a, 'Ka lo thlung nghal ang' te kha a ti fiamthu zuk zuk a,engkim thleng zung zung turin a beisei a niang.

"Ka lo thlah dawn a, lo la meng rawh aw, hmaichhanah kan sawi dawn nia, message chuan ka hrilhfiah thiam lo che" a rawn tih chuan ka inngaihtuah vung vung a, hepa hian thurawn a mamawh fo anih hmel, amaha ngaihdan siam a harsat tlat.

"Mut nghal mai ka tum asin, an lo haw dawn hnai a mi?" ka tih leh hnuah ka tho zui a, ka thil eina ka va sil laichuan ka message tone chu a ri leh a, "Lo la mu suh" tih te mai hi a lo thawn a, sawi tur pawimawh nei te pawh a ang. 

"Ka lo tum ang" tih zawngin ka chhang a, ka chhungte nghah pahin sitting room-ah ka mu dar dar a, ka nghakhlel lem lo khawp mai, an awm lo chu a nuam ka ti mah zawkin ka hria.

Dar 8 dawna an lo thlen chuan ka pindan lamah ka lo insawn tawh a, ka pheikhawk bawm ka remfel lai mekin an lo lut thawm ka hria a, min lo koh hma chu ka chhuak duh lem lo. "I nau chu a muhil em mawni le?" nu Hlimin a tih ri pawh ka hria a, "A la hma em hi" tiin U Lizzy'n min lo au zui a, ka eih ringawt a, "A la meng a lawm chu" tih riin a zawm zat bawk.

"I hmanhmawh em, ṭhu ve rih la" ti a unaunuin a biak chu Benja anih ngei ka ring.

"Hmanhmawh deuh, Rintei chu a mu tawh a mi?" Benja aw ka hre zui a, ka thil tih lai dahin ka tho ve sawk sawk a, ka va chhuah laichuan sittting room ah a lo ṭhu a, min lo nuihsang mai.

"I ṭha maw...?" a lo ti a, in hmu khat tak, rei deuh hnua inhmu hlawl te pawh kan ang.

"I lo thlah e law?" ka ti let var a, a bu ve nghat nghat.

"Lo ṭhu rawh, ka va inthlak lawk ang" ti a unaunu kal chu kan en zui ve ve a, a lam ka va hawi leh chuan zaizirin ṭhutna min lo kawhhmuh zauh a, engmah sawi loin ka ṭhu ve mai bawk.

"Engtin nge...?" 

"Chhang kha i nu zawk ka pe a, in chhungkuain ka pe mai che u, ni Pawlin a pe tho a, i ta tur pawh kan pe tel law law mai, Baklava ania, a tui teh mai ania" a lo ti zung zung a, choka lam ka va hawi chuan nu Hlimi hmel ka hmu lo a, bathroom lamah a thawm ka hre thung.

"A kaltluang maw?" ka ti leh vat a, a inngaihtuah em mawni, a chal ti chuarin a inpetruh fuat mai.

"Hei..."

"An fel lutuk, an fel mah mah a awmdan thiam a har zawk a lawm, enteh..." a rawn tawlh hnai deuh sat sat a, "Ka hmu lem deuh tlat" a'n ti pek a, ka nui hak.

"Sawi miah suh, a mak huih a lawm, ka dang a awk vek; mahse, hre lo anga awm a ngai" ka nui leh, insum a va har tak, thil hi chu a man thiam ve maw le.

"I dang awk chu maw hre lo anga awm ngai" ka ti fiam zauh a, "Ka hmu lem ka tih kha maw le, Lizzy chu.." a tih leh laimekin unaunu a lo chhuak a, Benja chu a ṭhu ṭha rang khawp a, unaunu lam hawiin a nuisang bawk.

"Thingpui i duh em?" tih pahin u Lizzy chu kan bulah a lo ṭhu a, a lo kal veleh a kan ngawi daih chu a ngaih a ṭha vak lo aniang min melh ralh ralh a, phone ka bih san daih thung.

"A hangin ka lo in ang, Rinte i duh ve em?" Benjanan a tih chuah ka lo hawi â hu a, Unaunu pawn min lo melh rang khawp.

"Keiman ka va lum dawn em ni?" ka ti ban charh a, "Lizzyn a lum dawn, a thingpui lum ka in chak" fiah fuka Benjan a tih chuan ka lo nui ru tet tet, a ṭawng dan te chu a khawr deuh ṭut hian a hriat a, Unaunu erawh chuan a hrethiam ve lem lo aniang "A hang maw i duh?" tih pahin a tho a, Lalbena chu a  la khi vur vur reng, 'Ka hmu lem e' te a han ti vel a, nuam a tih hmel hle lawi sia.

"Nuam i ti e...i thilsawi dan leh i awm dan kha a dang daih aw..." ka nui kar kar a.

"Nuam lo ka tih loh kha, tlemin awm a nuam lo deuh ka ti ringawt a lawm" a la ti ve fan a, keitak pawh chuan ka lawmpui, kha leh chen kha a rawn hel a, na tak taka hnar a ni ṭhin a, mittui nen a haw fo anih kha, engkim hmu ve tu ka ni bawk a, lawm pui loh theih a ni lo.

"Insum thei viau rawh aw, hmeichhia chu nawr chung chung loh tur, i ti hel leh hlauh ange.." a rawn tawlh hnai leh vut a, "Chutianga insum thei lo angin ka awm lo, bialpa te pawh a neih leh tawh kha, inṭhen tir ve phawt an ngai a lawm.." a rawn ti sur sur a, a lo la hre ve miah lo mai!

"An inṭhen tawh a lawm, kum hlui thlah zan khan an inhau a, an inṭhen zuiin ka hria" zawi tea ka ti chu ka hau hian min lo en a, "Golden chance" tiin ka mitmei ralh ralh.

"A awlsam purh mai a..."

"Mak khawp mai, tunhnaiah mi ṭanpui i nei a ni lo maw, malsawmna i va dawng ve..." ka fiamthu zet a; mahse, a lo sawichhuak ang tih ka hlau leh lawi a, "A bulah sawi miah suh, aman a hrilh che anih loh chuan sawichhuah a chi miah lo, ka hrilh che tih phei chu a hre tur a ni lo" ka ti zung zung a, a ner nung mai.

"Kamtam deuh nih ka duh lo ania, a bialpa nen an la ni emaw ti la, an inṭhen tih i la hre lo aw.." ka tih leh chuan rilru buai hmel deuh hian min lo en a, "Engmah ka hrilh lo che" ka ti nawn leh nghat a.

"Aw, ka hre lo der tlat ang" a tui vak lo nge mawni a ner leh a, engmah pawh min zawt zui chuang lo, ngaihtuah eng emaw chu a nei tih a hriat theih.

Rei vak loah thingpui no chawi chungin unaunu a lo phei a, eng chhang emaw ni ka la hmuh ngai loh hi plate ah a rawn keng bawk a, chithlum lam te pawh a ang deuh. "Chhang hi a tui lutuk, ei chhin teh" unaunuin a tih chuan ka ban ve vat a, Benja te lo hawn tir chu a nih hmel, a thlum tui reuh khawp a, a sak hmel ang aiin a hnip phian bawk a, ka ngainat zawng tak a ni.

"Jeromea te nen in la inkawm em, tunlai chu ka hmu khat lutuka, Darcy nen an la inzui em?" tih angreng sawiin unaunu chu a ṭawng barh barh a, Benjan a chhan veleh thil dang a zawt leh zung zung a, an pahniha an han ṭhu dun leh an titi dun lai han hmuh chuan ni lo lo min ti hrechhuak a, chutih laia Nu Hlimi lo phei lah chuan, "Dawhkanah sawn i ni pangpar chi tur ka dah a, i hawn dawn nia" tiin a rawn nuih sang bawk a, eng emaw hian min mawlh a, kan awmdan chu a nuihzatthlak riauin ka hria, ka ngaihah pawh heti anih chuan Benja tan pawh mak tih tur a tling ang, ka hmu lem a ti pawh kha a awm ve viau mai.

Thingpui a inzawh chuan haw mai a tum a, ka lam lo hawiin min rawn mitmei zuk zuk a, eng nge a awmzia pawh ka hre lo. "Gate thleng ka lo thlah ang che" unaunuin a tih hnuah an tho uaih a, choka lama unaunu a liam chiah tihah ka sam a rawn pawt nawk nawk a, "Lo la mu suh" tiin a kal nal nal.

U Lizzy chu a lo lut leh lawk lo a, gate bulah an va am dun anih ka ring, a lo luh tak mai loah chuan mu turin pindanah ka luhsan a, minute thum vel hnuah a lo lut thawm ka hria a, "Rinte, i mu tawh a mi, i va mu hma ve" ka kawngkhar pawn aṭangin a rawn ti sa sa a, "Tihtur a awm lo em a, ka mu mai" ka tih chuan min chhang zui tawh lo. A pindan lamah a zai phei rat rat a, chutih laiin message ka dawng ve chiah bawk.

"Naktukah eng nge i tih dawn?" a rawn ti a, a la haw lo em mawni, u Lizzy a lo lut tawh bawk sia, khawi aṭangin nge min lo biak le.

"Pawnah i la awm e law?" ka tih chuan "Car-ah" a rawn ti tlawng a, ni dawn tak, bike chuan a rawn thlah lo tawp ang.

"Eng nge naktuk chu..?"

"Saw tah min lo kalpui la" aaaa...hepa pui hian sawm ṭhanah min nei dawn tlat, hnial a ngai a ni.

"Ka hman ka ring lo, inkhawm a ngai a lawm" ka va ti a.

"Inkhawm banah a ni mai, tlai deuh hlekah pawh a pawi lo" a rawn ti ve leh a, a nu tlawh leh a tum em mawni?

"I nu te vengah maw?"

"Ni lo" engah nge maw tawi te te a min chhan chu le, ka zawh belh zel a ngai lehnghal a.

"U Lizzy sawm zawk rawh" ka va ti a, sawm awm zawk tak pawh a ni, a hmeichhe duh ber bulah chuan hrilh hreh chhan tur a awmin ka hre lo.

Mahse, message a lo thawn leh a, "A hriat chi a ni lo" a ti leh tlawng a, min va ti buai reuh tak e aw.

"Bialnu te bulah thil an thup ṭeuh ngai lo, engkim i harsatnate pawh hrilh vek zawk rawh, in inpui tawn anga, thurawn te pawh in inpe thei anga, inpahnih tan a ṭha ber bawk, in inkar pawh a ṭhat phah zawk ang" ka va ti luam a, ṭul lo deuhin Awmpuia ka hriatchhuah phah, kan kawppui te laka zep kan neih hi chuan kan inkar a hlat phah chawk a, chuvanga Benja pawh hrilh lawk ka ni, harsatna te kan inhriat pui a, engkim kan inhrilh hian kan inti chak tawn a, inrintawnna pawh a pung ṭhin, chu chu inlaichianna atana pawimawh em em thil a ni.

"Eng mah ka thup lo, ka nu chungchang pawh ka la hrilh ve ang. Mahse, tuna mi hi chu a hriat a rem rih lo" a message lo thawn chuan ka rilru a ti buai nak, engthil nge maw ni dawn le, mi lah chu a hrilh tlang duh reuh si lo.

"Sawi la, kal a ṭul viau leh lo chhuah dan ka ngaihtuah ang" ka va ti ngawt a, a pawimawh lo a nih teh chuan ka hau nek ang.

"A hmun thlen phawt loh chuan sawithiam a har" a rawn ti leh chu ka ner nang mai.

"Anih chu.."

"I lo kal thei dawn em?"

"Ka peih lo" khumah ka mu tau nghat a, a rawn call zui, chhang duh loin ka hmet tawp hmak a, message a lo thawn leh zat.

"A pawimawh lutuk, chhungkaw thil ania, naktukah ka hrilhfiah ang che, lo hman tum la" rei deuh chu ka chhang duh lo a, darkar chanve dawn hnuah "A pawimawh tak tak em?" ka va ti leh hram a, in a thleng tawh mai thei a ni.

Minute nga hnuah a rawn chhang a, "A la pawimawh ber ang" a rawn tih chuan ka nui ringawt. 

Message chu chhang tawh loin phone ka dah a, chhun lamah ka che hah ve bawka zan dang aichuan ka muhil hma deuh. Pathianni tuk anih vangin ka chhungte pawh an tho hma a, zing aṭangin chhuanlam siam dan tur ka ngaihtuah a, a vang hrep lehnghal. Mahse, tukṭhuan kan eilai chuan Nu Hlimin a kal chhuah tur thu a sawi ta hlauh a, a awm loh laia ka chhuah theih mai ka ring, haw tlai erawh a chi dawn loh thung.

Kan inkhawm chu nidang aiin kan bang hma a, in kan thlen hnuah Nu Hlimi pawh a chhuak zui mai a; mahse, U Lizzy'n a sam colour a rawt a, ka chhuak thei mai lo. Benja chu kawnah min lo nghak turin ka hrilh a, U Lizzy hruai phal sela chu kan kal hma thei ni mai tur. Ani lah chuan 'A hriat a rem lo' a ti bur mai si a, a thawi pawhin ka sawi ngam lo.

Sam kan colour zawh chuan "Mawitei te inah ka leng lawk dawn a, ka lo haw har lo ang" tiin unaunu chu ka hrilh a, "Eirel ka peih lo ania, dar 3 hmain lo haw rawh" a ti sam mai a, ka insiam rang khawp mai. Benja ka va call leh chuan kan vengah a lo awm reng tawh a, "Biakin peng bulah ka awm" a rawn tih vangin hmanhmawh deuhin ka chhuak a, kawn ka va thlen chuan ka zawng nasa mai a, biakin pengah lah a hmel ka hmu si lo a, ka han call leh rih.

Phone a rawn lak ruala car lo tlan thla chu ka han hmu a, amah a niin ka hria, "Ka hmu che" a rawn ti vat a, car chuan ka lam a rawn pan mek bawk. 

Ka bula a rawn din rual chuan "License i nei em?" ka ti hmasa ber a, a nui huk mai.

"Pawisa chawi tur ka nei, lo lut rawh" tih pahin kawngkhar lam a melh zauh a, ka chuang ngam dawn em mawni.

"I khalh thiam tak tak em?"

"Insurance ka nei" awi a....a va sawi awlsam thei tak. 

Phur lo deuhin ka ṭhu lut a, "Tu car nge?" ka tih chuan min chhang lem lo, ka lam rawn hawiin a nui deuh vur vur a, "Khawiah nge kan kal dawn?" ka ti leh chuan "Kulikawn lamah, zawn chawp deuh a ngai" a ti a, a tlan chhuak zui bawk.

"Eng nge kan zawn tur chu?"

"I hre mai ang"

"Sawi ve nghal mai la" 

"Hmuhin a chiang zawk" ka ner khum nang a, a rawn hawi a, a nui ruh ruh reng a, min bum tlatin ka hria.

"Ka haw tlai thei lo ania" ka tih lah chuan "Kan rei lo ang, kan en zawk anga, ka thlah leh ang che" zangkhai deuhin a ti a, a phur riau tein ka hria.

"Tunge kan en leh dawn a?" ti a ka zawh chuan min chhang ṭha duh hlek lo mai a, "Thil te te, lian deuh" a tia, ngaihdan pawh ka nei thiam lo.

"Rinte, bialpa duh vak loh nei ta la, chupa chuan rangkachak khur lo nei ta reng sela, engtin nge i ngaih ang" te a tia, a zawhna chu ho ka'n ti mai mai khawp a, chhan pawh ka chhang ṭha peih lo. "Ka duh vak loh chuan ka bialpa a ni lo ang, duh vak loh ka ngaizawng ngai lo, rangkachak khur za pawh nei sela ka duh phah lo ang" ka ti hmarh hmarh a, a lo nui reng chu ka hrethiam lo. 

Kulikawn kan thlen chuan a Ni a phone a, kan kalna lam tur a zawt chawp a, a Ni lo sawina zelah kan tlan a, rei vak lo hnuah kawi zau deuh laiah kan ding a, a chhuk mai bawk si lo a, car ṭanga dakin a hawi kual a hawi kual ringawt. Ka ning ta deuh chuan "Eng nge kan tih dawn?" pawr fahranin ka ti a, "Lo nghak lawk rawh" tiin a Ni bawk chu a call leh a, a Ni kan lam dawn anih ka ring.

"Ka awm tawh a, i sawina lai kawngah khan ka ding reng tawh" tih pahin car khawngkhar a hawng zui a, kan hma deuh kawngah chuan kal pheiin kawng chhak lam a hawi vang vang a, a ṭawng pah mawlh mawlh reng. Chutah, ka lam a rawn hawi a, min rawn hui zauh a, ka chhuak ve mai bawk. 

A bul ka thlen laichuan phone chu a dah chiah a, "Han ring chhin teh?" a lo ti var a, eng nge rin chhin tur pawh ka hre lo.

"Lizzy hrilh suh aw, hei chu kan thuruk tur"

"Aaaa...sawi mai mai teh" 

"Hawi chho la" a tih vang chuan ka hawi chho ve mai a, tumah reng reng ka hmu lo.

"I Ni chu a awm em ni?" ka tih chuan, "Midang an cheng, a piah lamah pawh sawn" a ti a, ka bo telh telh.

"I thil sawi hi a awmzia ka hre miah lo ania" phawk fein ka melh a, min en loin kawng chhak lam a lo melh daih a, ka en leh chuan kan chhak kawnga Building chu a thlir tih ka hrethiam a, ka melh leh rang khawp mai.

"Building khi maw?"

"Aw, ka rangkachak khur chu an nih khi" 

"Eng a?" ka man lo, Building a sawina tih erawh ka hria.

"In ta maw? A khawi ber khi?"

"A sen ho zawng khi" Building lam chu ka hawi leh vat a, a sen chu pathum a awm a, chhawng nga laia sang an ni hlawm. Zawh leh ka tum laitak chuan, "A pathum khian ka ta, ka pa sak a nia" a ban a phar deuh hluai a, "Rangkachak khur neitupa ka nih hi" a'n ti leh hluai a, a nui hmel mawlh chu, khawvelah hian a hlim ber mai awm e.

Nu pahnih inkhawm bang niawm tak hi an lo kal phei a, min thlek deuh hu hu a, ka bula mi lah chuan a ban a la phar duai mai. Building lam hawi chuan thawk a la ham ham a, a mit a chhing vang vang bawk. A zahthlak ka ti deuh a, a ban chu ka lo dahthlak sak sawk sawk a, "A va nuam tak" tiin min rawn thlek a. "Kal ang" tih pahin motor lam ka pan nal nal a, min lo zui lawk lo.

Kawngthlang lam a pan a, hla deuh hlek aṭang chuan a thlir ṭha leh a, a duhtawk thei dawn lo a ang riau. "Benjamin" ka va tih chuan, "Ka lo kal" a tia, a lo kal chuang lo, a rangkachak khur chuan a aikaih em mawni!

Rei tawkfang a thlir leh hnuah a rawn phei ta chauh a, "Kha zawng kha em ni?" ka lo tih chuan, "A bawn em khi, pathum lai lehnghal" tiin a kutṭang pathum a rawn lek vah a, motor-a a ṭhu lut te chu a nui suk suk a, ka erawh ka lawm ve tehchiam lo. Amahin a en thei reng sia, engah nge maw min hruai ve kher le, a ruka ka chhuah chu thuhran, dawt te ka sawi phah lehnghal a nia.

"Lizzy chu a hrilh chi loh ang aw" a ti leh chu, "Hrilh ila, inneih te pawh a awlsam rum rum tawh ang chu" ka lo ti zauh a, a rawn hawi phawk khawp mai.

"Heng vanga min neih hi ka duh hleinem, ka induhtir hmasa phawt dawn, tunah chuan eizawnna turah ka buai a ngai tawh lo a, nupui neih bak chu lungkham tur vak ka nei lo, in ho khi midangin an luah vek a, a luah man pawh ka pu kutah a lut a, ka rochan tur ka dil chhuah phawt a la ngai, chumi hmain Lizzy chu ka thlung fel ang" a ti nghat nghat a, a lo ngaihtuah thui nasa tawh mai.

"A hre vek tawh a lawm, Doctor Pauline-i vahpa i ni tih a hria a, a biak pawh a biak ṭhat tawh em che hi, zep a ngai lo e.." 

"Aih, kan la hrilh rih lo ang, anih loh chuan keimah zawk hian ka ngai dik lo dawn tlat" a ti chu ka lo bengkhawn rang khawp a, "I ngai dik lo a maw, englai tak kha nge i ngaih dik loh a" ka lo ti zung zung a.

"Kan inhriatchhuah hnu lawkah a bialpa a ṭhen sia, min be ṭha thar thut bawk a, nuam ka ti lo deuh a lawm, chuvangin ka rangkachak khur hi chu ka zep rih a ngai" awlsam angreng deuh hian a ti a, a rilru puthmang hi a sawi mai zel a, a lam ṭangah min ngai nghet bur aniang ka unaunu chungchang sawi pawh a tim chuang lo. A hmuh dan vang chuan a rilru a thlak phah lem hlei lo a, hua emaw lawm lo ang pawhin a lang chuang lo, mi mak sak ve tak zawng a ni.

In lam panin ka tlan haw leh nal nal a, kan inphurhna hmunah bawk khan min va dah a,  "Zanah ka lo leng maithei a ni, ka ṭhiante an lo len loh chuan ka lo kal ang" nuisung chunga a tih chuan, "Ka buaina tur a nih loh chu, thil pawimawh deuh loah chuan min lo sawm tawh suh aw, ka hman em em bik lo ania" ka lo ti kha kha a.

"I la chhawr ve dawn a lawm, i u nen kan inneih hunah kan inhnuai te pawh i la luah duh thei" a ti khanglang a, ka lo melh rum hrep.

"Pathianin min veng sela, chutiang chu thleng lul suh se" tih paha ka inher chu min lo au leh a, "Mamawhna min neih chuan lo sawi zel rawh aw, ṭhian kan nih tawh kha" a rawn ti vei zurh zurh a, a hman em em reng anih dawn hi ka ti tawh. Ban ka vai thuak a, kan inpeng lam ka pan nal nal a, ka va hawi leh chuan a lo tlanchhuak ve chiah bawk.

In ka thlen chuan dar 3 a pel zawt a, u Lizzy chu sitting room-ah a lo mutui khawp mai a, ka nu Hlimi erawh a la haw lo thung. Sunday tlai chu eirel a sam a, chaw chhum bak chu chawhmeh ṭhing chhuanlum a ni deuh mai. Dawhkan kil pahin ka chaw chhum chu ka vil a, phone ka han en chuan kan class group-ah mipa ho an lo ti ti a, Awmpuia a lo lan avangin ka en rang hle bawk. Peksangan a lo let hun tur a zawhna chu "Karleh lamah aniang, zan khat ka lo riak anga, a tukah ka phei ang" tiin a chhang a, hriat chhuah zawk ka nei, a insawn dawn thu kha min hrilh tawh tak a lawm.

Chat ka en laimek chuan Zothanan a insawn na tur a lo zawt a, "Zarkawt lamah" tih zawngin a chhang a, in a luah dawn nge tih a zawh leh chuan a chhang tawh lo. Mi inah a awm dawn tih kha a sawi tawh a, an chhungte in a nih ka ring ringawt a, ka lawmna deuh pakhat chu kan inhnaih leh zual dawn a, Noeli aipawhin kan veng a inhnaih dawn tihna a ni.

Nu Hlimi lo haw chuan zan inkhawm a duh vangin chaw kan ei hma a, zanriah eikhamah ka pindan lam ka pan a, movie en pahin khumah ka mu dar dar a, chutih laia unaunu phone hmang thawmah chuan inleng a nei dawn tih a hriat theih a, " I lo thlen hunah lo sawi la, Gate ka lo hawng ang, i rawn tlan lut dawn nia, tunlai chu mi bike suasam ching an awm a, gate pawna dah chi a ni lo ang" a ti zat zat a, Benja a nih ka ring.

Rei vak loah a pindana a lut thawm ka hre zui a, "Lotion lei ka ngai tawh a ni maw?" a tih ri chu ka hre pha. "Rinte" a rawn tih chuan ka eih ve mai a, ka pindan lamah a lo pheiin ka hria. Ka tho kang uih a, a rawn lang ve nghalzat bawk.

"I lotion ka lo inhnawih lawk" tih pahin ka dressing table lam chu a pan a, ka lotion chu a duh zawng a ni vak lo aniang a hnim de de a, a inhnawih tlem khawp mai. "A rimtui a sin" ka lo tih chuan, "A rimtui tho a; mahse, ka ngeih loh ka hlau a" a ti a, ani hman ṭhin lakah chuan a man pawh tlawm tak a ni.

"Inleng i nei dawn em ni?" ka tih chuan, "Benja a lo kal dawn" a ti liam puat a, a nui hmel chu darthlalang aṭang chuan ka va hmu thei.

"Flask-ah thingpui a awm sa kha aw" ka ti leh zauh chu, "Lo tih ṭhat chiam pawh ka tum lo, ka la enthla rih" a ti ve ngei a, in enthlak lah chu an tum ve ve a, an nuihzatthlak mange.

U Lizzy chhuah hnu chuan ka mu ṭha ve leh mai a, rei pawh a liam hman lo ang kawngkhar inhawng thawm leh kan kawta bike lo tlan lut thawm ka hria a, an ṭawngri erawh ka hre pha lo. Ka ngaithla ve reng a, rei vak loah an lo lut thawm ka hre leh a, "I Nu a awm nange?" ti tu chu Benjamina ngei a ni.

"A inkhawm a?"

"Ka va lawm e, khawiah nge i nau?"

"Ani chu a mu tawh"

"A va mu hma ve"  

"Nia, vawiinah a leng nasa lutuka, a chau aniang" u Lizzyn a lo ti kher a, ka ngaithla uluk tawh nasa mai.

"Tunlai chu i cher deuhin ka hria, Gym-ah i kal em ni a?" u Lizzy aw zet chu, ngeiawm khawpin a nelawm a lawm le, a hma a be ṭha duh ngai miah si lo.

"Zanah badminton kan khel ṭhin a, Boxing pawh ka khel zeuh zeuh" sitting room-ah an ṭhu tawh aniang an ṭawng chu ka hre hnai viau tawh. "I haw dawnah thingpui chu kan in chauh dawn nia" U Lizzyn a tih laichuan ka phone a rawn ri karh a, Benjamina a nih vangin ka lo en ve vat a, "I va mu hma ve a" tih zawng a ni, ka chhang duh lem lo.

Bathroom-ah ka luhsan a, ka hmaite phihin ka insil thuak thuak a, a vawt bawk si a mut lum a har leh dawn khawp mai. Ka va chhuah leh chuan zawite tein an inbia a, a khat tawkin unaunu chu a nui leh hak ṭhin a, a chang phei chuan engthil emaw inchuh niawm takin an ri chul a, nuam an tih hmel khawp mai. 

"Rintei chu a muhil tak tak em mawni le?" tih ri ka hriat leh chuan ka nui sak a; mahse, unaunu ṭawngkam vang chuan nuih a za lo hle thung. "Eng atan nge i tih a, i rim duh zawk em ni?" a lo ti hlak a, "Teh ringawt a" Benjan a tih ri pawh chu ka hria.

Chumi hnu chuan an ngawi ran a, rei dawn an ngawih hnuah, "Games khel turin a mi i lo kal?" u Lizzy chuan a ti fiah fak a, pakhat erawh chuan a chhang lo. An ṭawng hre pha renga awm chu a hahthlak ka ti riau a, ka ning lek lek tawh. 

"Bialpa i la nei em?" Benja chuan a ti leh khauh a, "Hmmmp" tih bak chu chhanna a awm lo.

"I nei nge nei lo?"

"Nei lo ta ila eng nge?"

"Sawi mai teh?"

"Ka neih chuan min bansan angem?"

"Lizzy, i hriatreng kha, ka hmangaih che tih pawh hi ka hrilh tam tawh che" a ṭawng ring deuh chu unaunu chuan a lo khap vat a, ka hriat an hlau anih te chuan pawnah chhuak mai sela ṭha tur, ka kham tawh tak tak a ni, a ngaihthlak loh theih si lo.

"Kan inṭhenna a la rei lo" u Lizzyn a tih chuan, "I la duh em?" pakhat chuan a ti leh zat a, "Duh ila ka ṭhen nang?" a lo ti let hlar a.

"Anih kei min duh em?" Benjamina aw chu zawi sawt tak a ni.

"Ahma pawn ka duh hmasak che kha"

"Nia, a ni tho a; mahse, a hnuah khan min haw zui anih kha" awi aw...Lalbena chuan chhuahchhal a tum em mawni. Thawm chu a reh daih a, "Eng nge a awmzia?" Benan a tih ri ka hre leh daih a, U Lizzy ṭawng lai ka hre miah lo.

"Ka fawp che, eng nge ni vak ang" ka lo ṭhen chiam a, pawna chhuah daih ka duh, mi tawm enthla ang mai ka ni, mahniin ka lo zak ru chem chem.

"Fawh chu i duh vak nange?" Unaunu a ni, a pawr lek lekin ka hria.

"Chutiang a ni lo, i danglam riauin ka hria..."

"Hahhh...ka fawp leh lo angah che ngai rawh, ka inchhir" unaunu chu a nui deuh hak hak a, chumi hnu chuan an ṭawng lo a, eng emaw ri deuh ṭak ṭak hi ka hre leh ṭhin a, ka rilru a thil awm chu ka duh miah lo, thawm chu ka han ngaithla leh deuh a, ṭhutthlenga inlet thawm niawm tak te ka hria a, khum aṭang chuan ka tho rang khawp mai.

Hmanhmawh deuhin chapal ka bun a, an hriat ngei turin thawm ka dim lo lui a, ka chhuak phei dawn tih an hriat theih nan "Khawnge ka bottle?!" ka'n ti lauh bawk a; mahse an ṭawng thawm emaw, thawm dang ka hre zui lo reng reng. 

Side table-a bottle chu ka la lawk a, chutah Room kawngkhar chu dim vak loin ka pawt hawng a, ka va chhuak phei chu ka ding deuh dat. Benjaminan min lo melh heu a, a piah tv lam hawia sofa inhungah chuan U lizzy a lo ṭhu bawk a, a phone a bih ngar a,  ka rin ang reng reng chu ka va hmu lo, a lo titau zawk anih hmel e.

"Ila muhil nange?" Benan a lo tih chuan, "Muhil lo" ka ti liampuat a, choka lam ka pan nal nal bawk.

"Khawiah nge i kal dawn a?" a rawn ti leh lauh a, "Dawrah" ka ti ringawt a, pawnah awm rih a ṭhain ka hria, chance ka pe a ni ve mai, ka ngaih ang thil kha thleng turin ka duh miah lo a, chu aimah chuan an thawm hriat phak chu ka duh lo zual a, an inhau thawm emaw, an inhmangaih thawm emaw, an inhnial thawm emaw pawh.

Ka bottle pawh chu dah lem loin pawn lam ka pan a, gate ka thlen dawn ṭepah sunday a ni tih ka hre leh lawi a, Pu Zaia ten inchhungah dawr an hawn tho chu ka ring. Tei kual mai mai pah tiin kawn lam chu ka pan a, zan tir chauh a la ni bawk a, engmah hlauh tur a awm lem lo. Dawr ka va thlen chuan cheng 50 chauh ka lo ak leh nghala, cheese ball leiin ka let veleh mai bawk.

Muangchangin ka kal a, u Zuali dawr kawtah minute 10 dawn chu ka ṭhu khawmuang bawk a, veivak hmuh tur vak an awm lo. Kan class ho group ka en chuan Noeli leh Mawitei an lo inhnial a, Picnic na tur pawisa thawh chungchangah a ni,  inngeih tak an ni lo bawk a, hetia inhnial hi an nei fo mai. Noeli chuan thawhkhawm tura an tih cheng 500 chu a tam mah mah a tia, Mawitein senso ngai zat a lo sawi zat zat a, midang nei vak lo te kep a ngaih thu nen. Noeli chuan, "Tiffin pai ila a ni mai, a hautak lo ber a lawm" a ti fiamthu a, Mawitein "500 pawh thawh harsa intih chuan ṭhulh rawh u" a lo ti hmak thung a, chutiang thuar tham vel chu a ni.

"Pa-an inhlawhna tur lo ngaihtuah sela" Zothanan a lo ti chu, "Pa-a kan ti tawh lo, Tualvungi zûn ngai Zawlpala chauh a ni tawh" Mawitein a ti leh a, chu chu Noelin a lo haw khawp aniang chu, "Ngawi mai mai rawh, engmah i hre lo, Tualvungi lo zawk zûn pawh a lo ngai maithei ania" ngeiawm zetin a lo ti a, Mawitei lah chuan, "Tihpui tur i dap chung tak a lawm" a lo va ti kher a, ka chungchang te anih nawk avangin ka awm a nuam lo khawp a, Awmpuia a online em ka va en vat a; mahse, a lo online lo hlauh.

Mawitei chu message ka thawn a, "Chhang tawh suh, ka tan a nuam lo ania, Awmpuia pawn a duh lo ang" ka va ti a, ka message chu a en a, min chhang let lem lo a, group-ah pawh thildang an sawi tak avangin  Noeli chu a lo lang zui tawh lo. Mahse, status a rawn nei a, Awmpuia nena an thlalak huana an kalna niawm tak hi a rawn hmang a, "Class ṭan leh hun nghakhlel deuh kan awm em aw, Most lam te" tih hi caption-ah a dah a, a sawi chhan chu hrechiang tak ka ni.

Ka tho vut a, inlam panin ka kal hlawk hlawk a, gate ka thleng phei ṭep tih ah Benjamina lo tlan chhuak nen kan intawk hlawl mai. Ka hmaah tak rawn dingin a head light chuan min en vu mai a, biak pawh ka chak lo. Kawng sir thim lam chu panin kalpelh mai ka tum a, "Hei..." a rawn tih vang chuan ka ding leh rih.

"I va induh ve a?"

"Engvang ngawtin maw, i va haw leh hma ve" ka ti liam satliah a, ka phone rawn eng chu ka en leh zauh ṭhin.

"I u chuan a single tih a sawi tawh aw" ka va melh zawk a, "I lawm em?" ka tih chuan dar a kan ak a, "Muttui" ti a kal leh mai ka tum chu "Lo ding teh" a rawn ti leh a, Bike aṭangin a rawn chhuk bawk.

"Tinge ka message i chhan duh loh" a ti  bawl a, min ti hamhaih dawn a lawm le.

"Chhan duh loh pawh a awm lo" 

"I chhan loh tawp kha" 

"A ngai kher em ni, ka mu tih te chu i hre reng a lawm, unaunu pawn a hrilh reng che kha" ka melh rum deuh a, ka hmanhmawh ru riau tawh.

"Kan ṭawng i hre vek a ni maw" a tih chuan ka nuih ringawt a, "Eng nge in tih pawh ka hria" ka fiam zui a, a nuih a za vak lo aniang a ner nak a, lungawi vak lo hmel a pu bawk.

"In inthlah ṭha vak nange?" ṭha deuha ka zawh laiin, "Eng nge kan tih chu?" a ti deuh hluk a, hepa chuh!

"I hriat ve reng kha" 

 "Ka fawp lo e" a lo ti ram hmuk a, a lawm loh hmel viau tawh.

Chutih laichuan ka phone chu a lo eng pap a, ka en chuan Awmpuia hming an sawi chu ka zuk hmu thuak a; mahse, Benjamina lo che vut chuan ka phone chu a rawn ban a, lo dan ka tumna lamah ka bottle ken chu ka thlauh a, side drain lamah a lir phei a, a chhin te chu a tla hrang daihin ka hria.

"Eng nge i hriat?" ka ti he haw a.

"Ka thusawi ngaihsak ve ta che" a tih chuan ka lawm bik vak tawh lo.

"I va hahthlak tak" tih pahin side drain lam chu ka pan a, bottle chu ka hmu mai a, a chhin erawh ka hmu hauh lo. "Nangmah vangin a bo daih hi, lo zawng ve rawh, kan hmuh loh vaih chuan..." ka sawi zo hman lo pipe emawni inkhamah hian ka inpal nawk a, side drain khuar ah ka sawp thla hnawk a ni ber, tuichhe tling nge mawni hi ka delh per chuai a, ka hmaiah chuan a rawn bet thlawpin ka hria, tui a ni lo tawp mai, a rim aṭang pawhin chhirhdiak a ni tih a hriat theih.

"Mawla" ka ti vin chiam, "Fimkhur ve ta che" tih paha min rawn pawh thawh a tum chu ka phone thlauh zawngin ka hawisawn leh rih a, ka piah deuhah chuan a lo eng va va mai.  Han inbengthawh mai ka tum chu a lo nal lutuka, ka ṭhu thla leh hnawk.

"I va han zei lo tak" a lo chek hluk a, ka thinrim ta bawk a; rum theihtawpin ka melh tawh. 

"I phone ringawt i en vang anih kha" a tih rual chuan a awmah ka lo beng zawt a, ka kut chu chirh a lo kai luai chu niin, a kawrah chuan lang chiang kelh kawlh tak a ni.

"Mawli, min tih berh vek hi..." a kawr chu enin a chek tlat tlat a, "I chawh" ka lo ti chu a duh lo kher mai, "Chawh min tia law!?" tih pahin a ban a rawn lek vut a, min ben a tum ta mai emaw ka tih laiin ka sira chirh chu a rawn ṭham a, ka ban leh kawrah te chuan a rawn tat nawk nawk a, kei ka lo rak chul a, ka kut bal chuan a kawr chu nasa thei ang berin ka lo ti berh ve bawk.

"A tawk a tawk, a rimchhe si...." a lo nui hawk hawk a, keipawh ka nui ve tho, "Tho rawh" tih leh min pawh thawh a rual a, ka han ding chiah chu kan awm a insi chet a, ka inmelh hnai leh lutuka thaw lak a tawi mat thei.

"Ka berh vek" thawk ka la deuh halh a.

"Keipawh..." a tih chuan kan inen ran a, a nui lo a, ka mitah tak min en bawk. Chutah, a kut thlah ka tum chu a rawn che hrut a, ka hmai bul chetah a rawn kun hniam a nih chu!?

"Heih...." ka ti hman awrh ang min rawn fawp thut a, ka lo ip chawih mai, min ṭhawng tih piah lam a ni!?

(End of chapter - 20)