BLUE BAYOU (CH - 21)by Ahmangaihi violette khiangte

BLUE BAYOU 

by Ahmangaihi violette khiangte

Chapter - 21

Second rei lo te, rei lo te tak tak a ni!

Chumi hnu chuan phawk fahranin kan in en a, kei aipawhin a hamhaih zawk emaw tih tur a ni? Min ṭhawng lutuka; sawi mai tur pawh ka hre lo.

"Tihpalh" a tih chuan ka ner nak, chu aia sawifiahna ṭha zawk chu a neih a ngai.

"Eng nge i hriat a?" ka aw te chu a khur deuhin ka hria, ka sa pup pup mai a, ka thinrim nge ka zak pawh ka hre lo, rilru a buai nuai ringawt.

"Min hau miah suh, ka tum a ni bik lo" dar a kan ak a, a awmah ka nam dawt thung. Engmah pawh sawi loin ka inher a, ka bottle pawh chhar tawh loin ka phone zawk chu ka chhar a, a bal chu ka kawrah hru thuak thuakin Benjamina chu ka va melh leh a, a lo la ding khawng reng.

"Enteh..." a ti chiah chu, "Vawikhatmah min be tawh suh" tih leh kalpelh ka rual a, "Lawk" a tih pawh chuan ka hawi let duh tawh lo. Gate lam ka pan a, ka tlan a ni ber e. Kan kawtzawl ka thlen chuan thawk ka la kawk a, mitthla ah a rawn lang zut zut lehnghal, kha Benjamina phiangsen khan min fawp ringawt nia, eng nge a hriat? A â zo tawh a niang!?

Ka han ngaihtuah chian hnu chuan ka thinrim thar leh a, ka rilru a nuam lo takzet, ka lo be ṭha mah mah a, min zuam phah ni tein ka hria, mawl pawh ka inti, zuam turin ka awm anih hi tiin ka indem a, a kohna apianga ka zui te kha ka inchhir bawk.

Inchhung lam pan mai ka tum a, ka thawmhnaw lah chu. Chutih laichuan ṭawng thawm niawm tak hi ka hria a, inkhawm an lo bang a ni maithei, hetianga Nu Hlimin min hmu anih chuan a dik lo ang, ka kekawr mawng lah a huh dup a, ka pen zawng pawhin tui a far tluk tluk a, ka rimchhe bawk si.

Kawngkhar bulah chuan ka han ding ren rawn a, tihngaihna dang a awm chuang lo. Kawngka chu tlem pawt kauin inchhung chu ka va bih a, tv thawm emaw u Lizzy thawm hriat tur a awm lo a, a pindanah a awm anih ka ring. Hmanhmawh deuhin ka pen luta, choka bathroom lam pan mai ka tum chu unaunu lo chhuak nen kan intawk hlawl a, ka ding chiang teh e.

"E he...eng nge i tih a?" ka thawmhnaw chu a rawn melh chat a, a ner nghal nak.

"Side drain-ah ka tlu palh" a rawn kal hnai a, "I rimchhe lutuk" tih pahin a hnar a hup vat a, keitak pawh chuan ka ten.

"Ṭhenawmte motor sil sawn tui an ti tling ziah" tih leh bathroom lam pan ka rual a, "I va han tlu chiang awm em em, i pum berh a lawm kha" a rawn ti chu ka chhang lem lo. Bathroom ka luh rualin shower ka on a, ka inphuhtir chiam a, ka thawmhnaw chu ka hlip zung zung bawk.

A dik lo tawp mai, Benjamina mawlh kha a ni, ka rilru a ti nuam thei lo, engah nge khatianga a awm thut, min lo ngai kawi em mawni le? Aaa....chu zawng a ni thei lo ang, ngaihkawih turin ka awm lo, ṭhian ang bakin ka awm lo a, ka biak danah pawh zuam theih tur engmah a awm lo. Anih si chuan amah zawk kha a dik lo em ni ang? Min lo ngaizawng em mawni le? Ka thil ngaihtuah zet chu, thleng lo tawp tura ka duh a ni.

Washing machine chunga ka phone dah chu a rawn eng pap a, ka lo theihnghilh hmin der, a chunga thawmhnaw suk tur awmah chuan ka kut hru hulin phone chu ka en nghal a, Awmpuia message a lo lang ve zat bawk. Hlauthawng ru deuhin message chu ka hawng a, "An thil sawi kha engah mah ngai suh, i rilru te kha a lo hrehawm a nge, an duh duh an sawi ṭhin a, engmah an hriat loh vang anih saw" tih hi min lo thawn a, Noeli leh Mawitei inhnialna kha a hmu tawh a nih hmel.

Group ka en chuan picnic chungchang hlir an sawi a, Awmpuia pawh an lo ko chhuak a, a chat chu pahnih chiah a awm, "Class ṭan leh hunah kan rel ṭha dawn nia" tih leh, "Inhlawhna tur chu a awm ang, mipa ho in inhuam chuan" tih te zawng a ni. Awmpuia message chu ka va chhang a, "A ho lutuk, engah mah ka ngai lo ania" tiin a lo chhuk hun tur chu ka zawt pah a. Chutih laichuan nu Hlimi lo haw thawm ka hria a, "Gate inhawng rengin in dah a, kalh leh zel rawh u ka tih kha, in fimkhur lo ṭhin em mai" a ti lang lang a, ka hmanhmawh lutuk khan khar leh nachang pawh ka hre lo.

"Tunge bathroom-ah awm?" a tih chuan "Keimah, ka zo ṭep" tiin ka in tleuh zung zung a, ka thawmhnaw te chu zing lama suk turin machine chhungah ka vawm lut a, ka talbuai nuai a ni ber, towel lah chu ka keng lut miah lo lehnghal.

"U Lizzy, towel min lo pe teh" ka tih chuan min chhang miah lo. Mahse, nu Hlimi ṭawng thawm ka hre leh a, "Khawiah nge i dah?" a tiin ka hria, ka pindan lam a pan nghal aniang. Ring deuhin ka chhang a, rei vak loah kawngkhar a rawn kik a, "A vawh tehreng nen, zanah te i inbual a, i hritlang mai tur a sin" a tih chuan chhang loin towel chu ka lo ban a, a vawt lutuka, ka khur bauh bauh reng.

Ka pindanah lutin thawmhnaw lum ka ha sawk sawk a, a khat tawkin ka phone chu ka melh reng bawk. Ka inthlak zo ṭep tih ah message a lo thleng a; mahse, ka mi beisei hnen aṭangin a ni lo, Benjamina message zawk a ni, a thil rawn sawi lah chu....

"I cheese ball hi i la duh em, i paih daih sia ka lo ei mai dawn asin" a la rawn ti ham ham a, ka chhang lo chiang ang. 

Khuma ṭhut pahin ka sam ka chhem ro a, ngaihtuahna ah thil dang a leng thei lo reng reng, min fawh lai ngawt kha ka ngaihtuah let a, ka ṭim leh sawk ṭhin, a zia lo takzet a ni. Rilru buai laitak chuan a message chu a rawn thleng leh a, "I thinrim viau e law, ka tihpalh ka tih kha, i ngaih ang rilru kha ka pu lo ania" a rawn ti leh reuh a, ka ngaih ang rilru a pu lo anih chuan eng rilru nge a put a, a â hlawm tawp emaw min ngaizawng te anih loh chuan min fawh chhan tur a nei lo, a sawi pawh a la rawn sawi ngam zawk ka ti.

"Min lo be tawh suh" tih chu thawn ka tum zet a; mahse, Awmpuia message a lo thlen avangin ka ṭhulh leh a, engvanga ka thinphu chu rang em em nge mawn a nih le, thil ti ru ang mai ka ni, Awmpuia lakah pawh ka inthlahrung dawn dawn mai.

"Class ṭan hmain ka lo chhuk ang, i birthday hma a lo chhuk chu ka tum a; mahse, ka rawn hmu thei kher lo ang che, Peksanga bulah i thil tur ka lo dah anga, i lo lam mai dawn nia, thei eichak te i nei em?" a rawn ti duah a, engti zia nge le... ka hnuk a ulh ringawt.

"Ka birthday pawh ka lo theihnghilh ṭep a lawm, class ṭan hmain tih tur i nei a mi?" ka ti a, message chu a lo chhang har lo, "Tuirialah ka riak lawk dawn a, kar khat vel aniang" tih hi a lo thawn a, sawi duh ka ngah a, ka rilruah chuan a lang zut zut reng a, eng ber nge ka sawi ang tiin ka inngaihtuah buai leh ṭhin a, zawhna lah ka ngahin hriat duh tam tak ka nei bawk.

"I dam chiang tawh em?" min nin hlau tak chunga ka tih chuan, "Dam tawh e, na engmah ka nei tawh lo, Fu i la eichak em?" a rawn ti let var a, zanin chu min ngai ve em mawni tiin ngaihtuahna ka nei hman. Mahse, hei hi chu Awmpuia awmdan ngai reng a ni a, thil danglam tehchiam a ni lo, ka lakah hian a ṭha reng ṭhin a, tui lo chunga mi biak ang hi a nei ve ngai lo, hei tak hi a rilru ka chian theih ngai loh chhan pawh a ni, min ning ru angem, min thlakhlelna a nei ve angem? Mi ṭhenkhat laka awlsamtea kan hriat ṭhin ang kha ani lakah chuan hriat a har ṭhin a ni.

"Ei chak tho mai, hawn a buaithlak loh em ni?" tiin a message chu ka chhang a.

"Ka tan sa mai dawn a lawm, Peka te inah zan khat chiah ka riak dawn a, zingkarah kan chhuah hmel a, ka awm loh pawn i lo va lam tawp mai dawn nia, a hunah ka lo hrilh leh ang che" tiin goodnight wish min lo thawn bawk a, sana ka en chuan dar 9 a lo ri hnai tawh a, thingtlang lamah chuan mut hun vel a ni tawh, "Muttui" ka va ti ve vat a, message chu a en tawh lem lo.

Sam ka tih ro hnu chuan chair lain tukverh bulah ka va ṭhu a, eng emaw ka hriatthiam loh hian min mawlh reng a, a rilru a hah ti ila a dik ber ang. Awmpuia ka han ngaihtuah a, kan inkar chu ka duhkhawp lo hle mai a, chutih rualin nawr loh hram erawh ka duh, hetianga boruak ṭha kan nei reng anih chuan kan inlaichinna pawh a chhe lo anga, tun hma aia nghet zawk pawh a la nih phah maithei tiin ngaihtuahna ka nei a, kan kum a la tam lo a, hun ṭha pawh kan la ngah dawnin ka hria.

Mahse, tlangval zalen leh phuartu nei lo a ni a, hetiang reng hi a ni dawn lo tih pawh ka hre tel a, a duh zawng dangte pawh a la tawng leh mai thei, chutiang ngaihtuahna chuan min ti chiai a, ngaih a ngam thei tak tak lo, chu aimaha buaithlak ka tih chu min la duh em tih ka chiang thei lo hi a ni, nghak ta ila a lo let leh angem? Ka rilru a buai a ni, kan inhmu leh anga, ṭhian ang hian kan awm reng mai dawn em ni ang! Bul ṭan ṭhat leh hi a duh ve reng a ngem?

Dar 12 dawnah muturin khum lam ka pan a,  ka mu fel awrh tih ah ka phone chu a lo ri a, Benjamina leh bawk a ni. Chhang duh loin Phone chu ka hmet tawp a, a message a rawn thleng zui zat bawk. "Ka ti nawn tawh lo ang, ka intiam thlap e, min ngei phah lo hram teh" message chu chhan dan pawh ka thiam lo, a inthiam lo tih ka hre chungin ka hmu tuitang lo zo tawh a, inbiak fo pawh ka duh tawh lo, ṭhian pawh ni zui tawh lo zawk ila a ṭha ang.

Chumi kar tluan chuan ka pawn chhuak lo a, ka pa nen kan inbe zeuh zeuh tih loh chu phone pawh ka hmang meuh lo. Kawm tur ka neih loh vangin movie ka en nasa a, eisiam dan te ka zir bawk a, pickle siam tih angreng chu ka thiam ve viau tawh. Class ṭan a hnai telh telh a, ina awm chu ka ning ve ta deuh aniang class ṭan hun pawh ka nghakhlel ve khawp a, ṭum dang zawng aiin ka nghakhlel awm e.

Ka Birthday hmain ni thum chiah a awm tawh tihah ka nu hnen aṭangin thilpek ka dawng a, nu Hlimin min hrilh tirh chuan ka lawm lo ru hle a; mahse, nu Hlimin, "I u Scooty kan lo chah bawk si a, fridge thar lei te pawh kan ngai dawn a, i nu lo thawn hi semester fee ah hmang mai la a ṭha ang" a tih takah chuan sawi nawi thei ka ni lo, ka nu chu lawmthu ka hrilh lo a, ka pa erawh chanchin ka han hrilh thung a, "Lo thawn duh tawh lo sela a ṭha ang, ba nei ang maiin ka inngai, biak ṭhat pawh ka thei ve vatin ka ring a; mahse, hetiang zawnga min tih lawm a tum chuan kan inbe ṭha thei tak tak lo ang, pawisa hmanga min tih lawm hi chu tum lo sela ka duh" ka han ti luam a, ka pa thung chuan, "Ṭha taka in inbiak theih nan ka ṭawngṭai sak ṭhin che u a nia, ṭawngkam ṭha hi a uiawm lo a, i inchhir phah kher lo ang, chuvangin i nu chu lo be ṭha ve tawh rawh" a ti sam et a, a hmu leh tawh em ka zawh chuan "A dam sam lo a ni maithei, Pathianni a ka hmuh khan a cher riau a, biak phei chu kan inbe lo" a ti a, a hrisel loh zia ka hriat sa avangin ka awm a nuam lo zui hle bawk.

Unaunu chuan ka piancham a lo hre ve ngei a, a nu bulah lawm a rawt deuh chung a, keichuan ṭul ka ti ve lem lo, ka hriattheih chinah piancham ka lawm awm ka la hre lo a, kum hmasaa Awmpuia nen kan lawm kha ka hriat chhun a ni, khami ṭum khan a putea bike ṭawng ve zetah inphurin Berawtlangah kan han leng a, chhangthlum chi hrang hrang min siam sak a, kan haw lamah ruah surin min nan hrep bawk a, a chhang min pek te pawh a chhiat phah vek kha a nia, a lunglen thlak zawk khawp mai.

Ka birthday hma chiah zanah Awmpuian min lo bia a, tun ṭum erawh phone call-in a ni. "Muthilh hma ka ngai a, ka wish theihngilh palh tak chein piancham chibai aw" a rawn ti hmasa ber a, a aw chu hriat a nuam hliah hliah. 

"Zingah maw i chhuah dawn, hna i thawk dawn em ni?" 

"Aw, huan thlam kan sa lawk dawn a, Peka bulah i Fu tur chu ka dah a, i lak vat loh chuan a lo ei zo vek palh ang, i hman chuan naktukah i la dawn nia, Polythene dumah i thil tur ka dah tel bawk a, surprise ania, i birthday present" a ṭawng tawp lam chu a lai deuh nge ni a nui aw lek lek a, keipawh ka lo nui var var a, a hmel hmuh ka chak takzet. A awmna thar tur pawh han zawh chian ka duh viau a, sawina hun erawh ka nei lo.

"I hmuh hunah lo status suh aw, kar hmasa kha Noeli birthday ania, luiah kan riak a engmah ka pe ve si lo a, a lo titau leh palh ang" a tih vang chuan ka nui tawi tak a, ani titau mai mai ka han hlauh loh tehlul nen, lo hre ve sela ka duh zawk mah ang chu.

"Ka lo zep tlat dawn nia" ka ti kher chu a lo man thiam aniang, "Nang chu i special bik a, an hrethiam pha ve lo a lawm, i hmuh hunah min lo hrilh leh la...." a ngawi deuh vang vang a, "Signal a ṭha a ngem aw.." a ti zawi deuh sup a.

"Eng lo..." tih chiah ka sawi hman, ka tim leh deuh tlat.

"Eng maw?" a tih chuan, "I chhungte inah a mi i awm dawn?" ka ti daih a, ka ngaihtuah zawk tak erawh ka zawt ngam lo a ni.

"Kan chhungte chu an ni chiah lo, ka pa ṭhiante zawk an nia..." a ti mai a, a sawi thui duh vak lo a ang.

"Peka te bul aiin a nuam zawk angem?" ka ti leh hram a, "Nuam zawk turah ka ngai, Coaching ka kal pah dawn a, chumi ka duh vang mawle, ka zirna min tum sak thei dawn bawk a, keipawn a ṭul ṭulah ka pui ve ang chu" zangkhai angreng deuh hian a ti a, chu zawng thu lawmawm tak a ni, inhlawh a ngai dawn lo ringawt pawh tih laiin coaching a kal thei dawn a ni a, ka lo phur ve takzet.

Mut hma a duh thu a sawi vangin zawhna dang ka zawt ta lo, ka inbe zo chu khumah ka let hawl hawl a, ka zep lo nuam ka ti ngang a ni. Ka mut a chhuak lo a, rilru ah thil dang a leng hek lo, duh ai aia thui ngaihtuah pawh a awl, insum a har bawk si. Thlalak hlui te ka enkual a, kar khat chiah chawlh kan nei tawh a, class ṭan mawlh a ni ka nghahhlelh ni. Phone ka dah ruala sana ka han en chuan ka birthday a lo ni reng tawh a, ka nu ka ngaihtuah chhuak rauh rauh mai. 

Zing ka thawh veleh Peksanga ka call a, ka tho tlai deuh bawk a ani pawh a lo tho diam tawh. "I rawn tlai hret, nichin deuh khan an chhuak tawh" a lo ti fiamthu hlut a, "Ka thil tur i kawl kha, vawiinah i awm dawn em?" ka lo ti ve thung a, hna a thawk dawn anih hmel.

"Naktukah ka lo lam mai ang" ka ti ta ngawt a, ka nghahhlelh tehlul nen chuan.

Ṭhiannu Mawitein piancham chibaina thu min lo thawn a, ka dawn chhun a ni; mahse, nizan lamah ka mi beisei ber hnen aṭangin ka dawng tawh a, lung a awi tawk viau tawh. Phur deuhin eirawng ka bawl a, nu Hlimi lo tho lah chuan "Kal chhuahna tur i nei em ni?" a rawn ti ringawt a, ka thothang a ṭha mah mah a niang.

"Vawiin hi ka birthday a nia" ka ti ve mai a, "Ee..tlaiah sa hmeh ngei ngei a ngai anih chu, i lo va bazar dawn nia" a ti zui a, ka hnial lem lo. Mahse, unaunu lo tho chuan "Ka lawmsak ang che, cake pawh ka order tawh, Muani leh Baby ka sawm a, chawhnu lamah an lo kal ang" a lo ti zung zung a, ka ṭhiante sawm ve turin min ti zui a, ka phur ta lo khawp mai.

Mawitei chu ka va sawm ve ta tho a, "Nau awm ka ngai a, ka lo kal hman loh hmel" a tih vangin Kimkimi ka phone leh a, ani lah chu thingtlangah a lo zin daih chu niin, tumah midang sawm tur ka hre lo.

Tukṭhuan eikhamah nu Hlimi nen kan chhuak rual a, bazara ka chhuk san dawn chuan "I duhzawng leina tur" tiin cheng 2000 lai min pe a, ka hmang phal leh ngut lo ang.

Vawksa rep leh a thlak tur anṭam thar ṭha deuh ka lei a, a bak chu thlai leisa kan la neih avangin salad lam te ka lei a, zan rilṭama ei turin chhang tuihnai deuh ka lei bawk. Nu Hlimi pawisa min pek chu Secondhand thin nan ka hmang a, kawr pathum lai ka lei. Ka haw dawn ṭepah U Lizzy'n min lo call a, "Zoteah khan cake lo lam haw rawh, ka ṭhiante an lo kal mek a, present te pawh an lo ken dawn che ania, lo haw har miah suh" a rawn ti lang lang a, u Lizzy ṭhianteah chuan nel vak ka nei lo a, Muani nen hian kan inhre ṭha ve ber a, ka hmuh zin ber pawh a ni, an ni ho nena ka piancham kan lawm tur chu engemaw zawng tak hian ka inkhawngaih a, minti hnim ruih mai a ni.

Zoteah chuan cake chu ka va lam a, a bawm aṭang chuan a len ṭhat hmel khawp mai. Eng cake nge ka zawh chuan 'Red velvet cake anih kha" dawr nghaktu chuan a lo ti var a, a man pawh a lo pe sa diam a, a duhna ah hi chuan unaunu hi chu fel ve ṭhin tak a ni. Chhuah leh mai tuma ka inher chu ka tum loh deuh ka va hmu a, hmuh loh der dawn lahin min lo hmu ve nghal mai si a, ka be duh lo dawn em mawni?

Rilru pawh ka siam fel hma hma chuan "Tlaiah chaw ka lo eidawn, kha kha i birthday cake em ni?" a lo ti var a, U Lizzyn a sawm a ni ngei ngei ang.

Tawi tein ka nuih a, ka kal daih ang ka ti rilru leh hman awrh tih ah "Min lo nghak rawh, kan phei rual dawn nia" a ti leh ta mai a, ka duh awzawng lo, biak ṭhat pawh ka tui loh tawh laiin ka inphurh tir dawn lo reng reng.

"Tih tur dang ka la nei a, nang mahin lo kal mai rawh" ka aw chu a nelawm vak lo. Mahse, a hrethiam lo nge ni, "Ka rei lo ang, chhang ka lei lawk anga ka hman a ni mai" a ti sawk sawk a, ka kal lui chu "Min lo nghak rawh" a la rawn ti zui hram a, dawrnghak nula nen min en reng avangin kal luih chu a nuam bik lo.

Chhang a thlang lai chu kawngka bulah ka lo nghak ta ringawt a, a hmanhmawh ngang aniang a kawk kual zung zung mai. A lo let ka hmuh veleh ka kalchhuak a, "MC bulah car ka dah" a rawn tih vang chuan ka ding leh chawt. "Tih tur ka la nei a sin" ka ti halh a, zui chu ka chak mawlh lo a ni.

"Ka kal pui ang che" hlauh ang ngeiin, a hman bawk si.

"Nidangah ka ti mai ang" ka tum deuh bar a, a lo nui suk reuh a, a hrethiam nge mawni?

Ngawi rengin Mc lam ka pan a, Benja chuan ka hnungah min lo zui ve zel a, cake ka ken avangin ka kal chak thei meuh lo, in thlen hma a a pherh ka hlau. Kawngpui ka kan hma chuan ka bulah a rawn ding at a, "Eng nge ka present ang che" ka hriattur tawk hian a ti zawi sup a, ka melh ralh ringawt.

"I duh sawi la, Mc-ah kan han en dawn em niang?"

"Engmah a ngai lo" 

"I u khan present lo keng vek rawh u min tia" thawk ka la halh a, unaunu zet chuh, a zahthlak ka ti angreng.

"A ti ve mai mai anih chu, engmah a ngai lo ania" awki pangngai zawkah ka tih leh chuan min nuih deuh vun vun a, "Nula fel chuan engmah an phut ngai lo tih chu ka hre ve a lawm; mahse, a thlawna chaw lo ei tawp chu a nuam hleinem" a ti ve ngat a, ka inmelh ran tawh.

"A thlawna chawei lam anih loh chu, chawei ah kan sawm che a lawm" ka ti ngawt a, ka sawi zawh rual rualin ka inchhir a, biak ṭhat ka duh lo asin mawle.

"Keite min sawm ve duh a ka lawm...." lehlam ka hawi san hmak a, a hmuh loh lamah ka ner chiam ringawt.

"Khawiah nge motor chu i dah" pawr angreng zeta ka tih chuan, "Garage-ah sawn" tih leh kal a rual a, a hnungah ka um ve dat dat a, a inchei dan ka en chuan kan ina lo kal tum a ang lo riau a, awm hmun nen a lo kal tawp aniang tih tur a ni.

A motor dahna kan va thlen chuan "I lo awm dawn nge, min lo zui dawn, lo kal zawk la, anih loh chuan ka duh duh ka rawn lei ang" a ti leh hram a, thilpek min pek chu a la tum khawp mai.

"Eitur lei mai rawh, thil lian tham lei a ngai lo" a ti bung nghat a, "Eng nge i eichak a?" a lo tih zawm ve zat.

"Ei chak pawh ka nei lo"

"Anih chuan han en ila, sana te i duh em?"

"Aaa...i duh duh han lei mai rawh, ka kal peih lo" motor kawngkhar chu ka pawt hawng zui a, ka ṭhu lut te chu ka tum lian viauin ka ring, chupa lah chu a kal mai ka rin laiin a rawn dak leh kher a, "Ka rei lo ang" tih pahin a chhang ken lai chu seat ah a rawn thehlut a, melh pawh ka lo melh ṭha duh lo.

A kal liam veleh unaunu ka call a, "Mi engzat nge i sawm, sa ka lei tam lo ania aw" ka va ti pawr hlur a. "Pathum bak ka sawm lo, Muanin thil lei tur a hre lo a, online shopping-ah kan en chawp a, i lo thlen hmain kan va lam lawk ange" a lo ti sawk sawk a, chutih laia "Beer chu engzah nge ka tih dawn" pakhatin a tih ri chu ka hre pha, "Kan kal dawn chiah, doormat hnuaiah chahbi ka lo dah ang" a rawn ti leh a, ka ṭawng leh hmain phone a dah daih! An ṭhianho enjoyment atan min hmang ṭangkai zawk em mawni, lawm tur nge pawh ka hrethiam lo e a.

Seat ngheng chuan mit ka chhing deuh vang vang a, chutih laia kawngkhar rawn inhawng thut chuan minti phu chiam pek! Benja chu a rawn ṭhu lut nghal a, ka rin aiin a rei lo. Shopping bag-a thil khai chu ka malchungah a rawn vawm phei rawk a, ka han en chuan kawfual paw dal pangpar tereuh te te a inchei hi a lo ni a, a mawi tih loh phal chi a ni lo. Mahse, aman inbel ka hmu chu ka meng kawk a, ka duh lo leh rum rum dawn em mawni! A to leh lutuka, lak pawh a inthlahrunawm.

"A van to ve, a dang i hmu lo em ni?"

"Min tlawm a lawm, an discount a"

"Engzatin nge an discount a?"

"A man zahve khan" awi aw....a man zahve pawh 3000 lai a la ni, ka lu a ti hai zo dawnin ka hria.

"T-shirt vel lo lei mai mai tur ania, sana te pawh a pawi hleinem" inher meuhin a lam ka hawi a, "Ka zawh che khan i duh loh hmel em a lawm, tinge kha chu i duh zawng a ni lo em ni" a ti liam puat a, motor a ti nung hlut hlut tawh.

"Duh tho a; mahse, a to em a lawm" 

"Ngaihdam dilna a ni pah mai" a tih chuan ka sawi tur a bo nghal vek.

"Ngaidam dilna a?" a rawn hawi chiah nen chuan kan inmelh ran a, "Ka fawh che kha,..kha kha...ngaihdam ka dil che ania" a ṭawng bah nak a,  a sawi bawl bawl lehnghal a, minti zak.

"Vawikhat mah khatiang khan awm tawh lo ang che, i ti awm ang lo leh lutuk" tum loh deuhin hmui ka pet ringawt, kawr chu bag-ah ka hnawh lut zui a, a lam chu ka hawi ṭha ngam mang tlat lo, mi lah chu a la en reng lehnghal a.

"Ṭhian kan nih kha, rules number one a ni mai ti raw, no kissing...." 

"Ka duh loh danin awm tawh miah lo ang che, ṭhian nih pawh hi..." ka sawi zo hman lo, "I duh dan hlirin ka awm tawh ang" a lo ti zauh a, ka va melh rang khawp mai.

"Ka duh dana awm pawh a ngai lo ve" ka ti chiam pek a, eng emaw ni ta te pawh kan ang zawk e a, min biak dan hi ka duh lo reng reng. 

"Engtin nge awm sela min duh a?" phawk fein min melh a, mi râwn reng ringawt mai.

"I duh dan khan awm ve la a ni mai a lawm" tiin ka hawisan hmak a, a nui ri te chu ka lo ngei hlur. Thilpek man to zet min pek avang hian be ṭha viau turah min ngai maithei, hetiang mai maia tih lawm chi ka ni lo tih a hre thuai ang, U Lizzy ang turah min ngai te hi a lo nia nge, ka ni ngai lo tawp ang.

Kan tlan chhuah hnu pawh chuan tukverh lam ka la melh ngar a, engtih mah ka phur lo, ka thaw an ti pik zo. Chutih laia "Rinte..." a rawn tih chuan tûm chungin ka va melh a, "Ka thil lei hi dah lawk ang aw, remtih lohna te i nei em?" nui chung hian a rawn ti a, a tih dan chu min fiam te pawh a ang.

"Ka lo lut ve duh kher lo ania, rei hman pawh ka ni tawh lo" ka tih laiin, "Ka ni chiah a awm, hman zana chaw i lo ei ve lo kha a chhan min zawt tak asin 'A damsam lo' ka ti che a, a hmuh hunah che a lo zawt maithei che a ni" a ti zui a, "Engah nge dawt i sawi ngawt?" ka tih chuan, "Sawi pawh ka tum chuang lo, tun lai chu ka tum loh deuh deuh hi ka tia, eng lo pawh kha.." tiin a ner zui sak a, awih chi a ni em pawh ka hre lo e a, a chhuan lam siam tur hre lo mai mai a niang.

"Sawi tawh lo teh, hriat chhuah ziah ka duh lo ania" vin lek leka ka tih chuan "Ka sawi chhuak tawh miah lo ang, theihngilh hmak ang" a ti fahran a, ka thinrim deuh thut mai. 

"Thil serious anih kha, khatiang kha lak zam tur pawh a ni lo, theihnghilh hmak ang te i tih, thil zahthlak leh tenawm..." ka sawilaia min rawn melh dan vang chuan ka tim dat, "Anih kha... " ka tih leh chiah chu "I va duhthawh e....thil zahthlak tih kha a tawk, ka zak ve lutuk a lawm, tenawm tih kher a ṭul lo, chirh nena ka fawp tel che kha a tenawm lai chu a ni mai" min ti lek zek a, ka ka hau ringawt.

"I va han dakthei em em?" makti fein ka melh a, min hau ve ngam tur pawh a ni em mawni.

"Khatiang kha ka nia, ka tum loh deuh ka tih ṭhin chu, fimkhur ka ngai a ni" a tia, hma lam enchungin steering chu a bawh deuh ur a, min bia pawh a ang lo.

In be lo chuan kan ṭhu ngawi ta reng a, ka an veng pawh kan thleng har lo. Motor a din hnu chuan, "I cake saw chu lo thla lo mai rawh" tiin a polythene zawk chu a han ban a, motor a lo nghah mai ka duh, amah lah chu kawngkhar hawngin a chhuak nul nul a, biak a hlau emaw tih tur a ni.

Ka lo nghak mai ang ka tih rilruk lai tak chuan an inchungte in aṭangin Ni Pawli a rawn chhuak hlawl a, ka lam a rawn hawi ve zat bawk. Kan chutih takah chuan hmanhmawh deuhin ka chhuk a, ni Pawli chuan a zawhte pawm chungin ka lam a lo pan ve mek a, "Vawiin i chawl e law?" tiin be hmasa zawkah ka lo ṭang a.

"Zing lamah ka ṭhu a, lo leng rawh" motor lam a thlek vat a, "Benja chu a chhuk tawh" ka ti leh vat a, "Lo chhuk ve ta che" a tih chuan hnial a nuam bik lo. A chhuk thla chu ka zui a, "I dam deuh tawh em ni, hmanni kha chaw i lo ei ve lo va, i chhungte lah kan zawt ngam mang si lo" nui aw lek lek hian a ti a, lalbena dawt sawi chu ka chhunzawm ve ta ngawt chu a nia, a ho ru tak tak a ni.

"Keipawh tunlai chu ka mu ṭha lo a, chawhnu lamah hian ka mut a chhuak chauh zel" a tih laichuan inchung kan lut tawh, "Zan mut theih loh chu chauh a na ṭhin a, zingah tihian ka ṭhu hma deuh a, tlainemah te ka va ṭhu veleh a" a tih zawm a, choka aṭanga Benja lo chhuak chuan "I mu ṭha thei lo ve tho maw, keipawh ka harh ngun lutuk, kan ṭhenawma mitthi awmzan aṭang khan ka ni ṭanin ka hria, vawi thum te ka harh hman ṭhin" a lo ti ve luam a.

"I hlau deuh em ni?" a Ni in a tih chuan "Hlau teh nang, ka pi tê kha chuan min duat a lawm, amah chu ka hlau miah lo a, ka mumanga ka hmuh zawk kha ania den chu, ka harh ṭha thei ṭhin lo a, men ka tum pawn ka meng thei ngai lo, ka ngaihtuahna chu a harh vek zel a, ka rilru pawh a fim ṭhin;  mahse, ka che thei ngai lo reng reng, a chang phei chuan tu te emaw hian min delh bet tlat a, ka keah hian an man ṭhinin ka hria" zawhna ngah hmel deuh hian a ni chu a melh a, a awm dan a sawi chu ka hrethiam ve khawp mai, keipawh chutiang chuan ka awm ve tawh, ka hlau thei em em lehnghal.

"Maimizial a nih dawn chu, a hrehawm ṭhin a sin" Ni Pawlin a tih chuan, "Ka thi dawn emaw te ka ti ṭhin" a lo ti leh hluai a, ka nuih a za ang reng.

"Maimi ho mai mai chuh, khawih hlek te pawh an chakawm a lawm le" ka lo nui chhuk thut a, ka lam a rawn hawi rang nasa mai.

"An chak ania aw..." a'n ti zui a, a va mawl heih huih tak.

"Maimi ho chu maw...?" ka inhup ṭat ṭat a, "I taksa a chak lo anih dawn kha, zanah inkhel tawh lo la, awm hahdam i mamawh anih kha" thutak fea ni Pawlin a tih vang chuan ka nui ṭha vak ngam lo.

"Engti zia nge mawni ka rui bawk si lo ka tia, maimi ho lek an lo nih dawn chu" ti nuah nuah chungin sitting room lam a pan a, a va inthlak dawn anih ka ring.

"Thingpui i in duh em?" ni Pawlin a tih chuan lu ka thing vat a, "I chhuak leh nghal dawn em ni?" tiin min zawt zui a.

"Aw, ka u te ṭhian hoin min nghak a, haw leh vat ka ngai" ka tih chuan, "Bena kha tur deuh rawh, a insiam rei ṭhin ania, keipawh mut ka va tum teh ang" tiin a pindan lam a pan a, a luh hnuah pawh a ṭawng deuh mawlh mawlh reng a, a zawhte pawm kha a biain ka hria, "Ka fapa fel em em te...tlaiah sangha kan lei ang, Au Benan saw tah chaw min eisan dawn bawk si a, tui tawk tawk kan hmeh dawn nia" a tih te chuan ka nuih a za ru hle a, ran a duat thiam danah mifel a nih zia a chiang a, keipawn ka ngaina ve viau tawh.

Sitting room-ah phone khawih pahin ka lo nghak a, "Rei suh aw" ka ti chu min chhang miah lo. A thawm chu a ri sat sat a, a zai pah bawk a, imagine dragons hla 'On top of the world' tih kha a sa a, a thawven hmel ngawih ngawih.

'Cause I'm on top of the world, 'ey

I'm on top of the world, 'ey

Waiting on this for a while now

Paying my dues to the dirt

I've been waiting to smile, 'ey

Been holding it in for a while, 'ey

Take it with me if I can

Been dreaming of this since a child

I'm on top of the world'

A lo chhuah rual chuan ka lo ding vat a, a insiam rei bawk a, a rawn nalh vei zuk. Ka lo en phawk deuh aniang chu, "Wow..." a rawn ti teh hluai a, min ti zak dawn a lawm le.

"Min en danah khan ka chhe lo chiang?" ka ner nang a, "Ka ṭha tih zawng i ni lo e a" ka ti chu a hua nge mawni a rawn kal hnai rawk rawk a, hnai lutuka min rawn en leh ta mai, a ti leh thut dawn emaw tiin a awmah ka lo nam ṭai a, chutah a rawn nui chhuak huk a, ka awn nasa leh lutuka a kawr awmah ka ṭham bet chawt chawt.

"Ka mitah tak min en chhungin i sawi thei dawn em ni?" zawi deuh supa tiin ka mitah min en ran a, a kalsawn hma chu engmah ka sawi lo ang. "Enthuak hi chuan ka ṭha thuak a, en chet chet hian..." a nui leh a, a hmui ka en laia ka thil ngaihtuah chu ka duh miah lo, ka thinphu lah chu a rawn dang dawt dawt a, sofa-ah ka awn thla rawk mai.

"A'n thal nghal tawp ah" 

"Eng nge khatih tehchiama i rawn kun hnaih?" ka lo melh ram ram a, han inbeng thawh mai ka tum a mah se, ka ke chu sofa banah a in hlang tlat a, ka tho thei lawk lo.

"I intlawhkhalh pha lo anih kha" nui huk huka tih pahin min rawn pawt tho lawp a, chhuat ka rah rualin ka awn lawih mai, chuveleh ka kawngah a vuan chat a, ka tlu tur min lo dang a ni ber. 

"Mawla....!" 

"Che vai film ve" a la ti zui a, a ban chu ka phih thla rang khawp. 

"Kal ang, i muang ropui si ka hmanhmawh tawh ania" ti hlak hlak chungin kawngkhar lam ka pan a, helmet kengin min lo zui ve thuai a, kawngpui kan chhoh laite chuan a nui suk suk reng a, ka va melh leh ringawt ṭhin. Eng emaw zawng tak hian awm a ti lo leh nghal a, min rawn melh te chuan ka hawi sawn vat zel a, ka ngaih a ti ṭha lo ni berin ka hria, a awmdan hi ka hrethiam lo, ka duh aiin min pawh dawn tlat.

"Cake kha i keng thei angem?" phawk fein ka va melh a, ka lo hrechang tawh miah lo. 

A inngaihtuah vung vung hnuah, "Lo awm lawk rawh" tiin inhnuai lam a pan leh nal nal a, a lo chhoh leh helmet a rawn keng tawh lo a, a dahna lam Car a pan nal nal bawk. Muangchanga ka va kal chu kawngkhar min lo hawn sak ve ngei a, a rawn ṭhu lut lah chuan sunglass a han vuah kher bawk a, pawisa chawi tur a nei bawk a, a inringtawk viau aniang.

Kan tlan chhuah hnu chuan zai a play a, a rilru a zaipui niawm takin a kut a ti phu euh euh reng a, a hmel ka va en chuan kha thil bawk kha ka mitthla ah a lo lang leh a, ka awm a nuam lo tawp mai. Kha thil kha thleng miah lo tur a ni a, a pawi pawh ka ti, rilruah ka pai run lehnghal a, a bula awmdan pawh minti khawr zo, ka tim lutuk tawh a, biak dan thlengin ka inveng ran tawh.

Ka ngawih rauh rauh laichuan, "I bialpa i sawm ve em?" a rawn ti teh hlawl a, min ti phu deuh zawk.

"Cool deuh kha" a rawn nui suk a, "In inṭhen hlen ta e law? a tih zawm leh a.

"Hetah a awm lo" tih zawngin ka chhang.

"Khawiah nge a awm a?"

"Ka hre lo, kar lehah a lo haw ang" ka ti a, ka chhang thui duh vak lo a ni.

"I birthday tih a hria em" a tih leh chuan "Hria e, present pawh min pe a lawm, ka la lam hman lo" ka ti liam satliah a, "E heu!" a tih vang chuan ka va melh zawk a, "A la duh che a va nih hmel ve?" a lo ti leh a.

"Kan inhaw hleinem, kan la induhsak tawn a lawm" ka chhanna chuan a nuih a ti za viau a niang chu a nui huk huk a. Ka lam rawn hawiin "Inṭhen duh chungin a thlah phal lo che a va ang ve, nih pui duh tawh lem suh, midang neih san daih rawh" a ti leh reuh a, ka huat zawng a sawi tlat.

"Engmah i hre lo Benjamin" ka aw chu fiah fek fawk tak a ni.

"Ka hre ve phian maithei asin"

"Hre phian la chuan u Lizzy ah hian i bet tlut lo ang"

"Kan in ang hleinem, nang chu a ṭhen che a, keichuan Lizzy hi ka ṭhen ve lo" a rawn nui kher a, ka rilru a na deuh tlat, ka nihna dik tak a sawi vang a ni.

"Keini te chu a hma ang thoin kan la inbe ṭha alawm, nang chu a huat em kha" ka thil dawi chu a nihna ve tho ania, a hrechhuak ve rauh ruahin ka ring.

"Phuba ka la dawn a lawm, ka zunah a la uai dawn chauh, tikhan lo thlir tawp mai rawh" a tih laia a aw chu a danglam riauin ka hria, ka va enchik deuh a, a sawi mai mai  a ang lo riau a, ngaihtuahna a ti thui hle bawk.

"A rilru tihnat i tum a ni lo maw?" ka lam hawiin a rawn nui hui a, "Engtin nge ka tih i rin?" a tih chuan ka hrit loh lam tak a ni.

"Engtin nge tih i tum?" 

"I la hre mai ang" 

"Phuba lak te chu misual ho tih awm tawk a lawm" tiin pawnlam ka hawi san a, ka bag a ka phone lo ri chu unaunu call anih ka ring, an thleng tawh a ni maithei.

Ka lak rual chuan "Benja kha a lo kal ve dawn a, in i thleng tawh em?" a lo ti vat a, ka thlen ṭep thu ka hrilh hnuah phone a dah leh daih a, a duh a sawi zawh hian a dah hmak zel.

In kan thlen chuan tumah an lo la awm lo a, Bena chu unaunu call turin ka hrilh bawk. Veranda ah chhuakin a va call a, chumi chhungin sa chu siam mai theih turin ka lo buatsaih a, nu Hlimi a lo haw hma dawn bawk a chaw kan ei tlai vak ka ring lo. Benja lo lut leh chuan min rawn pui ve sawk sawk a, sa chu chantir in thingpui ka lum zui a, unaunu te pawh an lo thleng har lo.

An lo lut chu Benan a lo chhawn a, thingpui te a lo thlitsak a, unaunu lah chuan eng present nge a rawn ken a lo zawt sek a, ka entir laia a hmel chu hriatthiam har tak a ni. "A va to ve" tih tlawng a sawi a, ka lam rawn hawiin "I vannei hle mai" a ti zui a, ka nui tawi hle ringawt. A ṭhiante pahnih chuan lehkhamawia tuam bawm lian vak lo hi min lo pe a, ka han hawn chuan t-shirt leh perfume tih ang reng a lo awm a, lawmthu te pawh ka hrilh ve luam a, thil dang zawng aiin Awmpuia min pek tur mawlh khan rilru a luah.

Eirawng ka bawl laiin anni ho chu sitting room-ah an awmkhawm a, beer an in vang nge ni an ṭawng duh hlawm hle a, an thawm a ring viau bawk. "I nau sawn bialpa te a nei ve lo a mi, tinge tumah a sawm loh a" Muanin a tih ri chu ka hre pha ve reng a, Unaunu chuan lo chhangin "A nei chhelo reuh lutuk; mahse, an bialpa kha chu mi zilh fuk fuk tur chi hi ania, a boring ka tih chi" a lo ti zauh a, chutih laia "A cool a lawm le" Benjan a lo tih chuan an ngawi deuh ṭhap a.

"In inhmelhriat em ni?" ti tu chu unaunu a ni.

"Kan lo len dun tawh kha"

"An inṭhen tawh a lawm, Rintei sawn a tuar lutuka, chaw pawh a ei ṭha thei lo, zanah te hian a ṭap ru ṭhinin ka hria, a mengrei thei lutuk" unaunu chu a ṭawngzawi deuh a, ka va kal hnaih avangin ka hre chiang viau tho.

Rei vak loah Muani te ṭhiandun chu an lo phei a, "Cake hi tlem ei i phal em?" Muani zawkin a tih chuan "Ei ru, lo inzai tawp rawh u" tih leh chemte pek ka rual a, "Va ko ve rawh" tiin an ṭhiandun chuan an inmitmei zui a, va koh mai ka tum laiin pindan lama an inzui phei tur chiah chu ka va hmu a, ka let leh rang khawp.

"Khawnge an awm a?" Muani ṭhiannuin a lo tih chuan "Pindanah an kal" ka ti mai a, an nui ruh ruh mai.

Cake chu a zai belh a, chutih laiin an lo inhrilhru sar sar a, an nui leh hak ṭhin.  "CD a in ring sa a lawm?" Muanin a tih chuan pakhat zawk chuan a hmui a lo hup sak chawt chawt a, ka rilru a nuam ta hauh lo. Eng nge thleng tur chu ka hria a, ka buaina tur pawh a ni hek lo. Mahse, Benjaminan 'Phuba ka la dawn' a tih kha ka hrechhuak a, hetiang chuan a dik dawn lo tawpin ka hria, sana ka han en a, Nu Hlimi a lo la haw mai dawn si lo va, ka rilru a buai ru nasa mai.

"Va ko ula, cake hi an ei ve duh ang?" Muani bula ka tih chuan, "Tibuai rih lo ang u" a ti sam mai a, titi ho te te sawiin an ngaihven zui lem lo a, an luh aṭang khan minute 5 vel chu a liam tawh ang.

Ka rilru a buai telh telh, Benjamina chuan hetiang zawnga phuba lak hi a tum anih ka ring, a mutpui anga, chumi hnuah ṭhen a tum a niang, in hmangaihtir a tum nge mutpui ringawt chu a tum ni ang le, engmah hi ka hrethiam ve tawh lo. U Lizzy aichuan ka ṭan zawk ṭhin ngei a; mahse, ka unaunu chunga a chet tum dan hrereng chunga haider hi a ṭha dawn em ni, ka remtih sak te pawh a ang zawk ang, hei kher hi chu ka khap a ngai a ni.

Benjamina chu message ka va thawn a, "I thil tih tum kha ti lo la i ti fuh zawk ang, nakinah i buai lehna tur mai mai anih kha, nu Hlimi pawh a lo ṭep tawh" tiin ka va sawi ṭhaih pah a, message chu a lo en vat a, engtin mah min chhang lo.

"Benjamin, at so suh...khatianga i awm chuan i lam ka ṭang dawn hlek lo ania, u Lizzy kha i hmangaih tak tak anih chuan tihchhiat i duh lo ang" ka ti leh a, chu pawh chu rang deuhin a lo en a, min chhang lehta chuang lo. Ka tihngaihna hre lo chu ka sa deuh pup pup a, thin a ur dawn dawn mai.

Va kal em chu ka hreh ve si a, ka khap lahin awmzia a nei der si lo, anṭam chu ka vawksa chhumah chuan ka va thlak rawk rawk a, ka chawh mawlh mawlh laichuan ka phone chu a lo ri karh a, a rawn chhang ta hram e. Message chu emoji nui keh tuar lem a ni, a rawn typing zui a, "A lum ṭan hle mai" tih hi a rawn thawn a, min runluih em mawni le?

"I la inchhiar ang" ka ti leh ngawt a.

"Ka hria a lawm, ka hnar thei ange maw, keichuan ka duh chiah lo a, pakhata hi thluak hran nei ania, ka dang thei kher lo ang" a rawn ti pek a, ka ner nghal sawk.

"I zakthei lo em mai, lo chhuak rawh"

"I u hian kawngka a kalh daih, min phuar beh hun ka nghak mek" 

"In ṭhiante pawh an awm ve hi, in zak miah lo em ni?"

Message chu a rawn chhang ta miah lo a, a online tawh hek lo. Sana ka en chuan dar 3 pawh a la ri lo a, ka chiai deuh ruai mai. Muani te ṭhiandun lah chuan online shopping ah thil an en dun a, an ṭhiante lam reng reng an ngaihtuah lo a, engtin nge an remtih sak theih zawk ni, ka u ṭhiante zawk an ni lehnghal!?

Bawlhhlawh paih tura ka va chhuak chuan kan gate a mipakhat lo tur chu ka va hmu a, "Lizzy te in a ni tiraw?" a rawn ti phei lauh a, "Aw ni e" hamhaih angreng zeta ka tih chuan, "TKP target ka lo khawn a, Rinsangpuii pawh a awm em?" a ti leh a, keimah ka nih thu ka lo hrilh ve mai bawk, kan bial changtute hian inrinniah target an lo khawn fo a, lo kal chu mithar a nih ka ring, nidangah a lo kal awm ka la hre lo.

Veranda a lo thlen chuan engzah nge kan pek ṭhin ka lo zawt a, "In unauin 500 in pe ṭhin anih hi" a ti a, u Lizzy'n leh nu Hlimin an pek mai ṭhin avangin ka hriatpui lo a ni.

"Ka u ka va ko ang, lo nghak rawh" ti a luh mai ka tum chu, "A gpay theih asin" a lo ti leh a, ka bazarna bang pawisa chu ka kawl ve reng a; mahse, unaunu chu va koh chhuah hrim hrim ka duh vangin ka kal lui ta tho a, ka hmanhmawh tehlul nen a pindan bul ka thlen chuan ka tim tlat, thawm chu ka han ngaithla deuh a, phun se se thawm chu ka hria a, U Lizzy niin ka hria, a ṭawng zawi lutuka, ka hrechiang thei lo.

"U Lizzy..." thawm a reh hmak a, an hria tih ka chiang.

"Target an lo khawn ania" Benjamina nui huk thawm ka hria a, "A va hun lo tak" ti a unaunu phun riin a zui bawk. Rei vak loah kawngkhar chu a lo hawnga, a hawng zau duh lem lo. 

"Veranda ah a nghak che" 

"Keimah kher maw, pawisa ka kawl lo asin" a ti niah niah a, "A gpay theih a ti" ka lo ti leh vat. Peih loh hmel fea a kal chu ka han thlir liam te te a, a liam fel ta maw tih kawngkhar chu ka pawt hawng thut a, khum tlanga Benjamina ṭhu nen chuan kan inmelh heu mai.

"I lo tel ve duh em?" a la ti zui a, ka va han ten mai mai tak.

"Nu Hlimi a lo haw ṭep, i mualpho palh ange" chik deuhin a awmdan chu ka thlek a, a sam a thur deuh tih loh chu engmah danglam ka hmu lo, an la ṭan chiah lo aniang.

Min la en reng vang chuan "I awm dan hi ka huat zawng tak a ni, i duh tak tak pawhin ka hre tawh lo ve, phuba lak i duh chuan i hmangaih lo tawp ang, i mutpui hnua ṭhen i tum anih kha..." a rawn tho vut a, ka lamah rawn kalin kawngkhar chu a vuan deuh run a, nuihza hmel a pu bawk.

"Tinge min tihbuai reng a?" a tih chuan ka bo map. 

"Nu Hlimi a lo haw ṭep tawh" ka sehchilh nak a.

"I thik em ni?" min ti lehta nghal a..huhhh...khawi lama thik, a uang em mawni?

"I zakthei lo mange, in duh duh khan awm rawh u, ka ngaihsak peih lo a che u" ti hmakin ka kalsan a, choka dawhkan bula unaunu ding pawh chu en duhin bathroom ah ka lut tlang a, ka thaw a pik ṭup a, bathroom chhung a lo zim bawk nen ka hah titih a, ka lu a hai muai muai mai. 

Ka va chhuah leh chuan sitting room lama Benjamina ṭawng thawm ka hria a, pindan lam aṭanga u Lizzyn woofer a lo pawm chhuak chu ka va hmu bawk. Pawnah chhuakin ka va ding vang vang a, tlai lam boruak vawt leh thli thaw heuh heuh chuan hah a ti dam sawng sawng thei. Thawk ka han la vang vang a, muang changin ka thaw chhuak leh ṭhin a, hetianga ka tih hian ka zia phah ve huai zel a, rilru hahna ka neih chang chauh a awm ṭhin kha tunah a rawn awm leh a, khamite pahnih vang kha em mawni.

Inchunga ka luh leh chuan sitting room-ah an lo ṭhu phei diak tawh a, chaw chhum te siamin eirel ka chhunzawm mawlh mawlh a, anni ṭhian ho erawh zai play-in an ti ti bawrh bawrh a, unanu pawh a nui ring ṭhin khawp mai. Salad chana ka lo buai melh melh laichuan ke pen thawm ka hre thut a, Benjamina a ni.

Tui bottle a lo keng phei a, fridge lam a pan ve mai dawn emaw ka tih laiin a ding dat a, ka hnung mai a ni. Ka han ngaichang ren rawn a; chutah, lo kun hniamin min rawn hrilhru deuh sur sur a, "Engtin mah kan awm lo ania aw" a ti reuh a, phawk fea ka melh chu min lo nuih suk a, a tih dan hi ka duh miah lo, ka thik emaw a ti tak tak a ang. 

"Kal teh" ka ti hlak a, ka melh rum hle bawk. Chutih laichuan gate inhawng thawm ka hria a, nu Hlimi anih ka ring. 

Benjamina kalsawn hnu rei vak loah Nu Hlimi chu a lo lut a, "E..i va buai awm ve?" a rawn ti hlut a, a ṭawng thawm an hriat rualin an zai play chu a reh hmak a, a che deuh sang sangin ka hria. "Bai ka lo siam dawn nia" ti a nu Hlimin pindan a pan rual chuan Muani a rawn chhuak phei zal zal a, a kawr chhung lamah engthil emaw hi a thukru ṭat bawk a, an beer in ruah na a nih hmel, pawnah a chhuak tlang a, a va paih ru dawn aniang.

Nu Hlimin bai a rawn siam a, chaw pawh kan ei hma khawp mai. Chawei laichuan an college chungchang sawiin hmeichhe ho chu an titi barh barh a, nu Hlimin Benjamina a lo be ve mawlh mawlh bawk. A pu a damṭha em tih angreng a zawt a, chawhmeh te suah sakin a duhsak hmel khawp mai a, tun hma thil te kha chu tuman an hre tawh lo ang tih tur a ni. Benja chuan min lo melh leh zauh ṭhin a, ka en ṭha duh lem lo bawk a, chawei chhung chuan kan inbe lo.

Zanriah kan eikham hnu lawkah Peksanga hnen aṭangin call ka dawng a, "Ka leng pahin i thil chu ka lo keng ang, min lo chang rawh" a rawn ti a, va lam a ngai lo chu ka lawm khawp mai a, a lo thlen hmain i U Zuali dawr kawtah ka lo va nghak a, minute 10 dawn chu ka nghak awm e.

Peksanga thil min pek chu Rambo polythene a infun hi a ni a, a rit nulh a, Fu a tam deuh a ni maithei. "Polythene dum chu?" ka tih chuan 'A chhungah khan" a ti ve vat a, a insuih ngheh deuh avangin ka hawng nghal duh lem lo. "Inṭhen chu in inti ve sia, in la inngai hluah hluah em mai, ni leh rawh u" khisawng chungin a ti a, kal mai a tum chu ka lo chelh leh rih.

"A awmna tur kha...?" ka tih chuan, "An hausa lutuk, a nuamsa viau ang" a ti sam et a, a hre thui vak lo aniang.

In ka thlen veleh ka thil dawn chu dawhkanah ka pawrh a, midang ho pawh chuan min lo enpui sap sap a, ka han hawng lah chu Fu hlir hi a lo awm a, midang ho chu an lo nui tet tet hlawm. A mawng lama Polythene dum chu ka la vat a, "Eng nge a?" hmeichhe hoin an lo tih chuan ka thukru deuh ṭat ṭat a, ka pawrh ngam chiah lo a ni.

"Khawi a mi nge?" nu Hlimin a lo tih chuan, "A ex pek a ni niang, a birthday ah Fu a rawn pe ṭeuh" tiin u Lizzy chu a nui hawk hawk a, ka ngei ru tak tak a ni.

"Khawi maw, lo en chhin ila?" nu Hlimin a tih leh tak vang chuan phur lo ru deuhin ka la chhuak a, a suihna ka han phelh tur te chu ka zam lek lek, nuih inring sain min en hlawm a, ka awm an ti nuam zan lo, chutih laiin Benjamina lah chu a rawn ṭhu hnai ang tawlh tawlh a, mahnia hawn ka duh tehlul nen...

Ka han hawng chu ka beisei loh deuh thil a lo awm a, lehkha zial pakhat leh chocalate bakah thing hmanga siam thil kermawi hi a ni a, unicorn lem a ni, a mawi zia chu aw, midang ho pawn mawi an ti ngang aniang an enkual dan dan a, hmeichhe ho chuan "A van siam thiam em em" an ti ve sap sap a, a nuam ve duh takzet. Lehkha zial ka han phelh leh chuan a hma ami aimaha mawi hi a lo awm a, chu erawh ka lem a ni, class room-ah dawhkan bawha ka muhil lai lem a ni a, 'Happy birthday Rinte' tih hi hawrawp ka hmuh tawh azawng mawi ber mai hian a in ziak a, Awmpuia signature a chuang vang bawk.

(End of chapter - 21)