BLUE BAYOU (CH - 22) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 22

January thla khaw vawh zual lai tak a ni a, zan boruak chu a thiangin thla eng pawh a lang mawi ngang mai. October thla bial zan ang thoin zûn a nei a, eng rau emaw tak hian min chenchilhin ka hria, kei ni loin thla chu a romantic zawk a, a eng hnuaiah lunglengin ka kiu vawng vawng mai a ni. 

Artist te hian an suangtuahna chenchilhtu leh an mitthla thilte an ziak chhuak ṭhin tih ka hria, an thinlunga khatliam chu a taka hmuh turin an pho chhuak ṭhin tih te pawh ka hria a, ka hmel mitthla chunga ngaihtuahna a han seng tur te, ka chelh chak em em a kut hmanga ka lem a han thai chhuak turte chu mitthlain ka hmu a, ka hlimna chu van zawla thla eng pawh khian a thik rum rumin ka ring, ka thlir vawng vawng chhan a ni miau a.

Hunbi nei loa khawharna min tawrhtir ṭhintu, ka ngaihtuah chhuah chang apianga thamral thei lo kan sulhnu te, ka duhthusam inṭanna leh a tawpna ni bawk chu amah ngei a ni. A ṭawngkam khat lek pawhin  hmeichhe lungawi berah min siam a, a chet lak vawikhat lekah pawh boruak a lumlet a, hmangaihna a van vawrh leh chiam ṭhin, ani chu ka tana danglam bik a ni reng a, ka thinlunga ka vawn ṭhat reng ṭhin a ni bawk.

Ka mut hma deuh khan message ka thawn a, a la en thei miah lo a, ka lawm thu sawina a hmuh hun pawh a nghakhlel zawkah ka ṭang a, a khat tawkin phone chu ka bih leh ṭhin. Signal a nei lo anih ka ring zan lai a pelh thleng pawhin a en lo, lemziak chu ka pindan banga tar atan chuan ka ui a, ka chhuah theih hunah frame ka lei anga, ka khum bulah ka hung ang tiin ka file-ah ka zep ṭha a, unicorn lem ka ngaina tih te pawh a lo la hre ve reng a, nunhlui min ti hre chhuak lo thei lo.

Ṭum khat chu bazar-ah kan kal dun a, a lehkhabu lei tura kal kan ni, my little pony soft toy an zawrh kha ka kalpel thei tlat lo a, ka duh ber pinkle pie lah kha ka pawisa kenin a daih si lo va, cheng 300 min belh ta ringawt kha ka nia, lehkhabu pawh a lei kim loh pah, kha Pony lah kha u Lizzyn ṭhenawmte nau a lo pe daih a, min hrilhtirh a ka thinrim zia te pawh ka hrechhuak uar uar mai.

Zinga ka harh rualin message ka check hmasa ber a, engmah ka la dawng lo. Ka pa ka han bia a, vawkte a lak tawh thu te min lo hrilh a, ar pawh vulh tel a tum a ni awm e. Chhun lamah hi chuan inchhung sekrek khawihin ka ṭul ve ṭhin hle a, inchhung hna hi chu a zo thei tak tak lo, nitin a ngai hi ka ti tluk tluk a, class chawlh chhung chu rei ka ti viau tawh.

Chumi kartluan chuan a message ka dawng lo a, call pawh a tlang thei lo, vuina emaw hnualna ka nei lem lo a, kar thar maiah kan inhmu dawn tih ka hriat vang a ni. Inrinniah nu Hlimi nen kan bazar a, class kalna a bun tur pheikhawk min leisak bawk a, phur tawh sa nen pheikhai a zâng duh khawp mai. Ka helhhawlh deuh aniang chu ka ṭhiante biain class ṭan hun tur ka sawipui ṭhin a, anni erawh an phur ve vak lo. Mawitei phei chuan a ṭan nghal loh tur thu a rawn sawi a, Kimkimi erawh ka sawm lui a, aw min pawh ve mai bawk.

Pathianni inkhawm kan bang chu a message ka dawng ta hlawl a, "Nizanah kan lo haw a, vawiin chu ka mu nileng ringawt mai, i inkhawm em?" tih hi a lo thawn a, ka lawmthu sawina pawh kha a lo en diam tawh.

A message chu chhangin ka inkhawm ban chiah thu te ka va hrilh a, a tukah class a ṭan nghal dawn em tih chu ka zawt bawk a, "Cr ho kan ṭhukhawm dawn a, ka kal ngei chu a ngai ang" a tih chuan ka phur leh zual. "Kan inhmu dawn nia" ka ti let vat a, ka message chu biangtaiteka nui lem hian min lo chhang a, ka awmdan chu ka helhhlawlh ti ila a dik ber ang, rilru ah thil dang a awm thei lo reng reng. Zanlam chu a inkhawm ve aniang kan inbe lo a, min biak loh chuan va biak hmasak hi ka hreh ve tlat ṭhin, ka inhmeh lo ngawt mai. Zing thawh hma ka duh vangin chawhmeh te ka siamsa a, ka thawmhnaw hak tur ka thlang lawk diam bawk.

Class ṭan ni chuan College chhaka waiting shed-ah Kimkimin min lo nghak a, min hmuh rual chuan,  "I awmno bik a ni maw, keichu ka zinna ah ka dum vek, vairam nisa hnuaiah kan vak nasa lutuk a, ka chauh te hi a la reh thei lo" a lo ti zung zung a,  college lamah inzui thlain Mawitei chungchang ka sawi thla melh melh a, a nutein nau a nei a, a lo awmpui chawt a ni awm e.

"A pass chuan scooty an leisak dawn a, ka inphurh tir ziah ang" a tih chuan kan nui dun kar kar a, a hrechhuak zawk aniang chu, "Awmpuia nen in ṭha leh tawh em?" tiin min zawt zui a, chhan thiam a har ṭhin a ni.

"Tunlai chu kan inbe ṭha ve lutuk, ka birthday khan present te pawh min lo pe a, an huana Fu te min lo hawn ṭeuh a" tiin kan la inhmuh loh thu ka hrilh zui a, "In ṭhat leh mai dawn chu, in inṭhen rei kha ka ring vak lo sa a" a tih chuan ka lawm ru ve khawp a, beisei ka sang viau bawk.

Class ṭan ni a ni tak nain zirlai kal an tam a, Noeli te ṭhian ho hmel erawh ka hmu lo. Canteen-ah coffee kan va indun te te a, tukverh aṭang chuan gate lam chu ka thlir deuh reng mai. Rei vak loah Peksanga lo tlan thla chu ka han hmu a, a bike a dah hnuah class lam a pan zui a, Awmpuia erawh a la rawn lang thei lo.

"A lo kal dawn em?" Kimkimin a tih chuan, "Cr ho an inhmukhawm dawn a, lo kal chu a tum" ka ti ve vat a, gate lam bawk chu ka va melh leh ṭhin.

Assembly neih hmasak tur anih vangin hall lam kan pan a, mi an lo tam deuh tawh avangin tlar hmasa ber dawtah kan ṭhu a, thawm a bengchheng khawp mai. Ka phone bih a ka kun lai takin ka bula ṭhu chuan min rawn kheuh zauh a, ka hawi chhuah rual a ka mi hmuh chu amah ngei a ni. Midang nen an lo luh vangin min hmu ve lem lo a, a kalpui ten an hliah bawk nen ka hmu chiang thei bik lo. Tukverh awmna thlang lam an pan a, ka va hawi ngial pawhin hmuh fuh chu har tak a ni.

Programme chu rei ka ti khawp mai a, chhuah hlan mawlh chu ka nghakhlel tawh. Kimkimi lah chuan, "Kal hrang suh aw, Mawitei a awm si lo" a ti ve sek a, Awmpuia ka zui san a hlau a niang. Professor te an chhuah rualin kan tho vat a, "Pawnah lo va awm ang" tiin ka ṭhiannu chu ka pawt chhuak dawr dawr a, Awmpuia lo chhuak chu changin kawt zawlah kan lo va ding vang bawk.

Rei vak loah Peksanga leh Zothana te nen an lo inzui chhuak a, min hmu chu a ding deuh dat a; chutah, ngaihawm fahrana min rawn nuihin ka lam a rawn pan a, a hnungah a ṭhianten khi vun vun chungin an lo zui bawk. A hmel chu ka lo en chik hle a, a sam a meh vang nge ni a lang cherin a dawldang riau a, a damloh vang pawh kha a ni maithei a vun a thim deuh a, hna a thawk nasa viau anih loh chuan a la damchiang lo hle anih ka ring.

"Hall-ah khan ka hmu miah lo che..." a rawn ti hmasa ber a, "Keini chuan kan hmu che" Kimkimin a tih chuan ka lam lo hawiin ka mitah tak min en a, nui hmel a la pu reng. "Kan lo tlai deuh a" a ti zawi deuh sup a, eng emaw sawi leh a tum laitakin Peksanga leh Zothanan min lo pawh a, "Zing chaw pawh ka la ei lo ania, thingpui min va inpui teh u" Pekan a lo ti sawt sawt a, Kimkimin a hnial lem lo bawk a kan panga chuan canteen lamah kan inzui phei ta hlawm a.

Kan han kal dun chu eng emaw riau hi a awm a, ka lai deuh ṭut mai. Ka melh a, ka nui leh ringawt a, sawi hmasak ber tur pawh ka hre lo a ni. "Present chu i duh zawng a ni maw?" a rawn tih rual chuan ka melh leh vat a, "I van ziak thiam em em, scenery lem chiah i ziak ṭhin emaw ka tia" lai ru deuh tak chuan ka ti a.

"Ka ti ve zeuh zeuh..." min lo thlek pah a, "I sam chu a sei leh tawh hle mai a" a tih chuan "A ṭhang chak lutuk" ka ti ve mai a, ka sam chu ka hui ṭha zauh bawk. "Sam sei kha inhmeh zawk a lawm, zuah char char rawh" thu tak hmel fea a tih chuan kan in en ren rawn a, ka thinphu te chu a rang dup dup maiin ka hria, min en danah chuan ka beisei chhanna kha ka hmu a ni ber.

Canteen kan thlen rualin ṭhutna tur min kawhhmuh vat a, a kal hmasa tak nain ṭhutthleng bulah a lo ding a, kan ṭhutfel hun a nghak leh te te a, a ṭhiante erawh eitur lamin counter lamah an kal thung. "Eng nge in ei duh ang?" a tih chuan, "Lassi a ni mai, Kimkim nang?" tiin ka ṭhiannu chu ka va thlek a, "Coffee ka in chak" a lo ti ve vat a, va lam tura Awmpuia kal chu ka en zui reng bawk.

"A fel hi chu a fel ve chiang mawle, tu te pawh hi a bialnu ang maiin min treat vek thei a, a bulah hi chuan eng emaw riaua lo inngaih hi a awl, mi a dah pawimawh thiam thei si" ti a Kimkimin a sawi zuina chu a nihna dik tak a ni, hmeichhia tu pawh hian a ngaihsakna dawn nuam kan ti vek chu anih hi.

Rei loteah kan in tur keng chungin a lo let a, "Class a la awm mumal dawn lo a, chawhnu lam chu kan ban hma ka ring" tih pahin ka epah chuan a lo ṭhu a, ka lassi in tur chu ka hma ah a rawn chhawp hnai bawk.

"I chhungte an dam ṭha maw?" ka tih chuan, "Dam ṭha e" a ti mai a, "Anih nang?" ka ti leh hram a, a la dam chian loh hmel tlat.

"Hetah hian a na leh ṭhin a, ka la zung chhuak lo aniang" tih paha a na lai min hrilh chuan ka lo thlek uluk khawp a, Kimkimin a lo zawt ve thuai bawk. "Ka kalah lungte a lo awm a lawm maw le, damdawi ka ei zo te te anga ka in entir leh ang" tiin coffee chu a lem zauh a, "Tui in tam rawh" tih bak chu han sawi vak tur ka hre lo.

"Noeli a lo la chhuk lo em ni?" Kimkimi a ni.

"Chhuk rual a rawt a, hna thawh tur ka neih vangin ka lo chhuksan a, a la khawmuang leh rih a ni maithei, signal ka nei lo renga, kan inbe leh miah lo" a tih chuan ka awm a lo nuam ve em em ringawt.

Peksanga te lo phei chu kan hnungah an ṭhu a, Games chungchang sawiin an ṭawng barh barh reng. Chutih laichuan most ṭhenkhat an lo lut a, mipa pakhat chuan kan lam lo panin Awmpuia darah chuan a rawn kuah a, "SU office-ah anih kha aw, ban rualin lo chhuk mai rawh, i va fit hmel ve" tih pahin Awmpuia ban chu a hmet nawk nawk a, chutah ka lam lo hawiin a ṭhen deuh ṭhu a, "I bialnu kha ti raw?" a han ti zui a, ka zak deuh chu ka hawi sawn rang khawp mai.

"Ka ṭhiante an nih hi" Awmpuian a tih chuan ka na deuh zawk. Mahse, 'Kan ni a lawm, ṭhian chauh kan ni' tiin ka inhrilh ru a, lung a dam zan lo.

"Tualvungi kha i ni ti raw?" lo kal thar pain a tih leh chuan, "Ka ni lo reng reng" nui chungin ka tih san a, "I ni chiang lutuk, a ni ti raw?" Awmpuia lam hawiin a ti leh a, "Ni e" Awmpuian a tih chuan, "Tualvungi leh Zawlpala an inngaizawng an tih ka hria, engah nge i zep kher" tiin a ṭhianpa chu a chhuahchhal zui a, Awmpuia pawh a nui ve suk suk mai.

A ṭhianpa kalsawn hnu chuan ka melh ran a, a coffee in zo chuan dispo cup chu hmetkhawrin a hawi kual a, chumi pah chuan min rawn melh leh zawk ṭhin a, a lai ve deuh em mawni. "Pakora ka va la lawk" tih paha Kimkimi tho tur chu ka lassi in na ruak ka lo pe vat a, Awmpuia ken lai pawh chu a laksak nghal a, a kal hnu chuan kan in en a, ka rilruah sawi tur a rawn lang zut zut, zawh duh ka ngah ngang a ni, ṭawng ka tum rualin a lo ṭawng ve chiah a, "Sawi hmasa rawh" kan inti ve ve.

"Ka lo text ṭhin dawn che em, ka inthlahrung deuh a, min nin te ka hlau..." ka ti halh a, zep loa zawh tawl mai hi a ṭhain ka hria, biak fo kha ka duh dawn tih ka chiang a, kan inbiak loh chhunga hrehawm ka tih zia pawh ka hre thar leh.

"Tinge i inthlahrun, ka bulah inthlahrunna tur i nei hleinem" a tih chuan ka hahdam huai, "Min nin ka hlau a lawm" sir lam ka melh vat a, a nui ri ka hria. 

"Ka ning lo ang che, i duh duh i rawn sawi dawn nia, ka biak loh chhan che chu..." a ngawi dat a, ka melh leh rual chuan, "I lung ka ti leng ṭha leh mai mai dawnin ka hria a, i rilru nat ka hlauh vang zawk anih kha" thutak zetin a ti a, chu thu chuan min ti hnim ruih, a in veng tihna em ni? A ni ngei ang.

"Nia, kan lunglen loh nan inbiak tlem a ngai a ni" ka ti zawi sep a, ka hnuk a ulh lek lek. Engmah a sawi lo a, min en reng thung. Kimkimi a lo let tak avangin kan sawi zawm lo a, Picnic chung chang sawia an titi chu ka ngaithla ve reng a, ka rilruah thil dang daih a awm thung, keini pahnih hi kan inhlat theih nana inthurual kan ni berin ka hria, kan inkar siamṭhat lam aichuan ṭha taka inthlah lam kha kan changvawn a, in tihnat tawn kan duh lo chungin eng nge kan nih tak hi, kan nat loh phah chuang em mawni le?

Canteen aṭanga kan chhuah hnuah pawh kan inzui ho dal dal a, class mumal vak pawh a awm lo, english class chu pangngai taka kan neih awm chhun a ni mai. Chawhnu lamah phei chuan zirlai haw an tam a, Awmpuia lah CR ho inhmuhkhawmna ah a kal dawn a, Kimkimin haw a rawt ve reng bawk. "In ban har hmel sia, ka hawsan mai dawn che" ti a ka zawh chuan, "Ka thlah hman kher lo maithei che a ni, nidangah chuan kan haw rual thei ang" a ti ve mai a, Zarkawt lama a awm chuan kan haw rual thei tawh dawn a, a tih zia viau mai.

Mahse, kar tawp thleng pawhin haw rual kan nei lo, Cultural club hoin lam an zir ṭhin a, ka tel ve loh vangin ka haw hmasa mai zel a, amah pawh a inthlahrung ve khawp. "I duh chuan min lo nghak la" a ti ṭhin tak nain ṭhian mai kan ni tawh a, ka tibuai mah mah bawkin ka hria.

Zirtawpni ah Noeli a rawn lang ve ta hram a, kan result chhuah ni tak a ni, kan department ah chuan fail an tam khawp mai a, kei erawh second ah ka pass ve hlauh. Mahse, Awmpuia result mawlh chuan rilru a ti nuam thei lo va, a chhan chu Top 10-ah a lan phak loh vang a ni, ṭum dangah chuan pakhatna a ni ziah a, chutia top 10 ah takngial pawh a lang ta lo chuan titi a ti tam a, kan professor te pawn mak a ti ngang anianga a lo lut apiangin an zawt a, atan pawh a hrehawm duh khawp ang.

A ṭhiante bula a awm vangin biak falna hun ka nei lo a, ka mitmei ru deuh reng thung, a hmelah chuan lungngai hmel emaw lawm lo hmel hmuh tur a awm lo a, Professor ten an zawhna pawh, "Ka inthlahdah deuh a" tiin nui chungin a chhang mai zel a, a la dam thiam hle anih hmel. Chutih laiin Mawitein subject khat back paper a nei a, Kimkimi a pass vek avangin mak a tih thu message min lo thawn ve reng a, "Ka hrilh deuh vek zawk a, ka thiam lo a tih ho te kha a lo chhang vek aniang" a rawn ti a, a lawm lo khawp mai. Han sawipui dan vak ka hre lo a, Kimkimi lah a lo inthlahrung ve bawk nen a be ngam bik si lo a, nuam lo a tih thu a sawi reng mai a ni.

Canteen kan va lut tur chu Noeli te ṭhian ho lo chhuak tur nen kan intawk hlawl a, rin ang ngei ngeiin Awmpuia result chu keimah vangah a lo ngai a, min lo chhuahchhal pang mai. "I thikthu chhiat rah chhuah anih hi, i lo ropui khawp mai" min tih khum sak a, inthiam lohna ka nei sa chungin ka rilru a na ve ngang mai a, hetiang a ni dawn tih hi ka ring pha bik lo.

Thil kan eilai te chuan ka hnuk a ulh ṭun a, engmah chu ka ei hleithei lo, "Keimah vang vek a ni, an khua a a haw khan a rilru a na tih chu ka hrethiam a; mahse, hetiang em ema a tlakchhiat phah hi ka ring lo va, exam dawn khera ka ṭhen kha ka inchhir ngawih ngawih" tiin ka ṭhiannu chu ka hrilh a, ani thung chuan, "Inṭhen a duh loh thu engmah a sawi loh kha, a thutlukna a lawm" a ti mai a, a sawi dik teh meuh mai, amaherawh chu inṭhen sawi hmasatu ka ni miau a, ka thiam loh liau liau a ni.

Kan chhuah dawn ṭepah Awmpuia te ṭhianho an lo lut a, ka lo bia ang ka tih rilruk laiin Sir Sangtea leh Miss Mazari an lo lang a, Miss chuan "In duh duh lam rawh u, vawiin chu ka lo treat dawn che u nia" a ti a, mipa ho chu an phur khawp mai a, an duhzawng an lam sap sap bawk. Chutih laichuan Sir Sangtea leh Awmpuia chu an in be ve mek a, bill pe tur kan va kal pawh chu min lo hmu ve a, an inbiak laklawh vangin min be hman lem lo. Ka kalpelh dawn laitak chuan, "HOD pawn a fala hmuh a ngai a tih che kha, i subject core pawh thlang ṭha leh la a ṭha ang, i tih ṭhatna ber i lak a ngai" Sir Sangtean a tih ri ka hria a, Professor te hian an department core turin an duh vek a, Mizoram puma lang tura an beisei a ni bawk.

Bill kan pe zo kan chhuak tur chu min lo ko vat a, "Ka lawmpui che aw" tiin kutzungpui min lo hmuh zauh a, a nui hmel chu nuih let har tak a ni. Lu ka bu ringawt a, a ṭhianten an lo koh vangin a kalsawn thuai bawk.

Chumi zan pawh chuan ka rilruah a awm reng a, ka ngaihtuah tam poh leh ka inthiam lohna a zual a, biak ka tum lahin sawi tur ka hre lo, ngaihdam ka va dil ringawt dawn nge ka va fuih zawk ang, min dem em chu ka ring bik lo va; mahse, a chhanah erawh kei lo puh tur a nei dawn si lo, sawi lo mah se a rilruah a pai ve thoin ka ring.

Ka insum zo lo chuan inrinni zanah ka va bia a, "I result khan ka rilru a ti nuam thei lo, keimah vangah ka ngai, pawi ka ti lutuk" tih tlawng chu ka va thawn a, chu chu zan dar 8 bawra ka thawn a ni, dar 11 velah min lo chhang a, "Semester khat chauh a lawm, nangmah vangah ngai suh, ka thatchhiat vang zawk ania, a lehpekah ka ṭang veleh mai dawn a lawm, i pass pawh kan lawm ngei a ngai ang" a rawn ti ve duah a.

"Lawm tlak pawh a ni lo, i result chhiat ber ṭuma ka pass lawm chu ka duh lo" ka va ti a.

"Monday-ah ka treat dawn che nia, tun ṭum chu lawm ngei a phu" a rawn tih chuan nuih a za deuh, ṭum dangah chuan a zarah ka pass ve ziah a, tun ṭum erawh a puihna tel miah loin ka pass a, min lawmpui ve ngei ang.

"Monday chu keimah zawkin ka treat ang che" ka tih chuan min lo hnial rang khawp mai, "Ka treat khat em che hi, thil tui deuh kan eidawn nia" a tih chuan ngaihtuahna dang ka lo nei a, College-ah chuan hun remchang a awm lehin ka ring lo, Noeli te ṭhian ho hmuh lai phei chuan nuam ka ti lo ang.

"Hmun dangah ei ila" ka ti leh ngawt a, "A pawi hleinem, i kal duhna lo ngaihtuah la" a rawn tih chuan phur tawh tak ka ni, rei inbe zui tawh loin kan inmangṭha a, inthiam lohna ka neih te kha a bo zo emaw tih tur a ni, ka awm a nuam viau mai.

Inneihna ah nu Hlimi a kal vangin Inrinni chu ka bazara, unaunu erawh a scooty thar lawmin a ṭhiante nen an chhuak daih a, a khalh thiam sa bawk a, license te pawh an buaipui nghal dawnin ka hria. Nu Hlimin lei tur a ziah sa chu ka va zawng kual a, rei pawh ka thang lem lo, ka haw leh lam chu kan veng kawnah Benjamina ka hmu hlawl a, min lo chang nge mawni min hmuh rualin ka lam a rawn pan a, "Tumah in awm lo a, ka let leh hman ṭep a lawm" lawm loh hmel fe hian a ti a, u Lizzy a be lo em mawni?

"I call mai lo em ni?" ka tih chuan, "Ani hmu turin ka lo kal lo" a ti mauh mai a, min ti hawi â deuh.

"Eng nge i lo tih dawn?"

"Tinge ka message i chhan duh miah loh a?" min melh rum deuh ul a, eng nge a awmzia ni ngai.

"Eng message maw?"

"Message ka thawn hnem lutuk che, pakhat mah i en duh lo anih kha" 

"Eng message mah ka hmu lo" a lo nui hak a, nuihza hmel pawh a pu lo.

"Min block ti raw?" a ti hul hak a, ka bo telh telh.

"A awihawm loh em mai a?" khaw laiah kan din avangin kalsawn ka duh a, mahse ka pen sawn tur chiah chu ka banah a rawn vuan chawt a, min pawt let rawk mai.

"Eng nge min block chhan, call pawh ka call tlang thei lo che" a la ti zui a, hepa hi a ngaihna ka hre lo.

"Engvangin nge ka block ngawt ang che" ka ṭeu hlar hlar khawp mai, kawngkal lah chuan min rawn melh hrek hrek a, a zahthlak ka ti.

"Min block, min block..i la hre lo der khanglang a, min block chhan tal chu hriat ve ka phu" la ta deuh deuh chuan, ka phone chu ka phawrh sawk sawk a, whatsapp ah lutin kan inbiakna hlui ho chu ka hmet chhuak a, "Engmah i message a awm lo" tih pahin ka hmai zawnah ka lek vah a, a en vung vung hnuah, "A lan kuau khu" ner sawk chungin a ti a, a va hahthlak thei tak.

"Engmah a awm loh..." ka sawi zo hman lo phone ka bih rual chuan 'You blocked this content' tih inziak chu ka zuk hmu a, ka call list lam ka check pawh chuan a lo in blocked tak tak a, a ngaihna ka hre lo kher mai.

"Eng nge a awmzia?" ka ti let hû, min lo melh rum ul ringawt a, sawifiah rawh tih melh tak hian min melh a, engmah sawifiah tur pawh ka hre lo.

"Ka block lo che, midangin ka phone an khawih aniang" ka sawi zawh rualin ka rilru ah tu emaw a rawn langa, a va han ti awm ang lo ṭhin. Benja pawh chuan a ngaihtuah chhuak ve tho aniang chu, "Lizzy a ni maw?" a ti bul hmuk a, aw pawh ka ti peih lo.

"Eng nge a chhan?"

"Hria ila ka buai chung nang" a tia, a thinrim zawk zawkah chuan a ṭang a.

"In va han hahthlak dun tak, in pahnih khan va buai teh u" ka kalpel zui a, min lo zui ve zel tho.

"Anih chuan ka thil rawn sawi te kha engmah i hmu lo tihna ania" a lamah ka thle bak a, "Eng nge i rawn sawi?" ka tih chuan, "Ka hrilh lo ang che" a ti hmak reuh a, a va mawl.

"A pawimawh lo anih chu"

"Pawimawh tehreng e"

"Eng nge i rawn sawi a?" ka ti nawn leh.

"Ṭawngkain ka sawi thiam lo" mai mai chuan a, mi lah chu a zui zel a, lo len a tum a ni ngat mai.

"Lo kal suh, tumah an awm lo" ka ding dat a, min en run run chungin a hmui a han pet sawi a, "Min block lo chu ka va lawm e, min unblock nghal rawh" a lo ti let heh a, ka han melh rum leh rih.

"I thil rawn sawi chu sawi phawt la ka unblock ang che"

"I mu tawh em, muttui tih vel mai mai" a va ho angreng. "A bak a awm lo maw?" ka ti leh a, a rawn buai chiam danah a pawimawh hmel riau a ni.

"Ka bem maithei che" a tih chuan ka kalsan nal nal.

"Min lo nghak teh" hawi pawh hawi let duh loin ka pen hlawk hlawk a, "Ka uang anih kha, ka fiam ve mai mai che" a tih pawh chuan ka ngaihsak duh lem lo. Gate ka thlen rualin min rawn nang hman a, rum lutuka ka melh chu min lo nuih deuh hui a.

"Lo leng suh, ka kawm hman lo che" ka vin khar khar a, a la nui reng.

"Ka bem tak tak lo che, bem pawh chu i va han hlau awm em em" a nui kur kur a, ka nuih a za ve hlek lo.

"Khatianga min biak fo chuan ka kawm tawh lo ang che"

"Sawi tawh lo hrim hrim ang, ṭhian a lawm kan nih" ka melh leh rawm a, "I ṭawngkam kha ṭhiante bula sawi awm a ni em?" ka ti chang fak a.

"Ka sim nghal, rules number 2, in bem loh tur" a tia, a uang em mawn ni?

"Haw teh" ka Polythene khai chuan ka vai fua a.

"Min unblock phawt la ka haw ang" a ti leh reuh a, ka duh dawn em mawni?

"Haw la, ka unblock dawn che nia"

"Min ning deuh a ni maw, min block a ni hrim hrim"

"Ka ni teivet lo" ka ti pawr hlur a.

"I awm dan hi min block duh hmel tlat, ka ngaizawng che emaw i ti a ni chiang mai, min hlau a ni maw?" a chal a ti chuar tap a, a va han zam lo mai mai.

"Khawvelah hian i hlauhawm loh ber ang" ka sawi zo hman awrh ang ka phone a rawn pawt thla thut a, chhuhsak ka tum chu side drain lam a pan rawk rawk a, ka bawr tehlul nen, min ti buai nek.

"Khawi rawn la rawh, mi phone an khawih ringawt ngai lo" min hnung chhawna ding chungin a hmet mawlh mawlh a, chutah rawn inher thutin phone chu min pe a, a kal nal nal bawk. Hamhaih deuhin min hnungchhawn zawnga a kal chu ka en a, phone ka han bih leh chuan a lo in unblock tih ka hre nghal a, eng nge maw a hriat reuh ni?

In chhunga ka luh hnu rei vak loah a lo call a, ka la chiah chu "A tlang thei ta e" a tia, a dah leh daih! Chawhmeh ka rem ṭhat laite chuan phone chu a ri zawt zawt a, a Message lo thawn lah chu a han ho hlawm em em khawp a.

"Hello hello, test-1"

"Hei pawh a tlang thei e"

"Rules number 3, in block loh tur" tih angreng a ni.

Chhang loin ka inbualsan daih a, ka inbual zo lah chu ṭhutthlengah ka muhil a, ka harh chuan ei rel a lo hun reng tawh. Chaw ka chuan hnu rei vak loah Nu Hlimi pawh a lo haw a, dawnfawh lian pui hi a rawn pawm haw a, titi pahin ka eidun a, scooty khalh zir ve turin min ti bawk. "Thiam ve hrim hrim hi a ṭha a, zing karah saw lai kawng pheiah sawn zir ve mai mai rawh, i u ve hi zawng tirh a har si a, kan chhawrbawk leh lo ang" a ti luam a, ka chak lem lo khawp mai.

Dar 5 rik dawnah u Lizzy leh Muani an lo thleng a, Muani chu nu Hlimin chaw ei nghal turin a lo sawm a, inkhawm a duh vangin chaw pawh kan ei har lo. Zan tir aṭangin pindanah ka inkhung chawt a, kan zir hmasak apiang thiam tumin ka chhiar ve mawlh mawlh a; mahse, ka message tone ri leh ṭhin chuan ngaihtuahna a la peng zel a, Benjamina hman lutuk hi chu a hneawm lam a ni.

"Eng nge i tih?" tih ringawt pawh vawi thum zet a lo thawn a, ka chhang lo chung pawhin a rawn thawn mawlh mawlh reng.

"Induh suh"

"Ka message i hmu tih ka hre reng ania"

"Ka leng chhuak lo a, inbe mai mai ang"

"Min block em?"

"Block lo anih hi" 

Ner nang chungin phone chu ka melh a, lu a ti hai zo, ka block tak tak dawn em mawni ka ti rum rum.

"Rinte, ka ngai che" chu zet chuan min ti ṭim sawk thei, message chu ka type vat a, "Min lo text tawh suh, lehkha ka zir" tih tlawng chu ka thawn a, ka thinrim deuh hlur tawh.

"Chawl rih la" phone chu ka melh rum nghek a, ka chhang tawh lo ang ka tih laiin, "Min block rei em kha, sawi tur ka nei ṭeuh" a rawn ti leh a, ka chhang lehta nge nge.

"Eng nge i sawi duh a?" ka va tih chuan, "A hlawmin ka lo thawn ang" a rawn ti a, chumi hnu chuan phone chu a ri zawt zawt a, min biak theih loh laia a message lo thawn zawng zawng kha a rawn ti ṭha leh aniang, a va han hahthlak tak.  

Message chu 10 chuang zet a ni ang, ka en duh lawk lo a, lehkha ka chhiar san daih bawk. Minute 20 dawn hnua ka en chuan message chu 14 lai a lo awm a, a ṭhen chu "I mu tawh em, eng eng i tih?" tih angreng a ni a, a sei deuh chu pathum vel a awm ve a, chu erawh ngaihtuahna ti buai tham a ni.

"Ahma kha chuan inbula awm kha a nuam ṭhin a, tunah hi chuan a nawmna a bo vek, min biak ṭhat duh loh phei chuan a hrehawm, ka rilru te a hah ṭhin, a chhan pawh ka hre chuang lo, ka ngei leh thut zel che, i fel tehreng nen tinge ka ngei che le?"

"Mak leh deuh chu maw, i bulah ka awm loh lai hian ka ngaihtuah chhuak leh thut zel che a; mahse, ka ngaizawng miah lo che, i u zawk kha ania ka duh chu"

"Min block em mawni le, vawiin kha ka fiamthu mai mai a nih kha, pindanah khan engmah tih ka tum tak tak lo, i thinrim chuan a nuam lo ania, min chhang teh"

A tawp ber a mi chu,  "Ka ngaizawng ang che tih ka hlau" tih ringawt a ni, rilru a ti buai map, hepa awmdan hi a dik miah lo, a ngaihtuahna leh tuna a awmdan ngei ngei pawh hi a dik lo, min ngaizawng ṭanin ka hria, a message te lah chu ngaihbel tur chi hlir a ni.

Ka chhang ang nge chhang lo ang tiin ka inngaihtuah buai nasa mai a, hetiang anih chuan biak tawh loh zawk a ṭhain ka hria, ṭhian nih pawh a chi loh ang, ka inlakhran mai a ngai a ni. Message chu ka type leh a, "Lo thawn tawh suh" tih bak chu sawi tur dang ka hre lo, ka thawn zawh rualin a number chu ka block zui a, rilru a ti hah riau lehnghal a, awm nuamin min awm tir lo. Lehkha chu ka han chhiar leh te chu rilruah a lut thei lo reng reng, ngaihtuahna a la peng a, ni lo lo ka ngaihtuah. 

Awmpuia ka ngaihtuah chhuak a, ka ngai zual khawp mai. Kan boruak ṭha leh mek karah hian Benjamina hi ka tlakzeh tir tur a ni lo, ani chuan ka unaunu a lawm a duh, amah ngei pawhin a sawi kha; mahse, eng ngati nge min ngaizawng tlata ka hriat le, a thil hlauh te lah kha, a hai bik lo tih ka chiang.

Thawhṭanni tuka college ka thleng chu canteen kawt aṭangin Mawitein min lo au a, canteen-ah inzuilutin ka note a copy mawlh mawlh a, chutih laichuan Ramnunsangi te ṭhian ho an lo lut ve a, kan piah deuhah chuan lo ṭhuin min lo melh leh zauh ṭhin a, an ṭhian ho chuan an phun sar sar reng bawk. Rei vak loah Peka leh Awmpuia an lo lang a, han koh nghal mai ka tum chu midangin min lo biak khalh a, Sangtei ṭhiannu a ni. Awmpuia chu "Lo kal teh" tiin a hui sawk sawk a, Awmpuia lo kal phei chu ka lo en ve reng bawk.

"Enrollment tih ve an duh a, tlai aṭangin an lo tel ve ang" hmeichhiain a tih chuan, "Sawmsangi bulah sawi ula, a lo ziak lut mai ang che u" Awmpuian a ti a, "Engtikah nge kan zin dawn?" Sangtein a tih chuan ka hrethiam kuar mai, Cultural club ho hi phaiah an zin dawn a, Awmpuia pawh a tel ve leh ngei ang.

"External exam hmain a niang" Awmpuian a tih chuan, "Rel-in a mi?" pakhat chuan a lo ti vat a, "Silchar thleng chu college bus-in kan kal anga, a bak chu Rel-ah" ka en reng tih a hria aniang Awmpuia chu a rawn lehhawi vut a, tum loh deuhin ka lo nuih a, ani pawh a khi ve suk.

"Lo ṭhu ve la" Sangtei ṭhiannuin a tih leh chuan, "Ka ṭhianten min nghak a, Sawmsangi chu in lo hrilh mai dawn nia" tih pahin kan lam a rawn pan a, ka lo lawm ru khawp mai. Mawitei ep chiahah chuan lo ṭhuin "In va hma ve" a ti zawi sup a, "Eng lo kha..." tih bak ka sawi hman lo Peksanga a lo phei a, a rawn ri phawr phawr a, thil dang a sawi theih loh reng reng.

"Coaching i kal tawh em?" ti a ka zawh chuan "Kar hmasa khan ka ṭan tawh, zingkarah ka kal mai, tlailamah ka hman lo zawk a" tih pahin a phone a bih zauh a, sir lam a va hawi nghal vang chuan ka lo thlek ve vat a, Sangtein a rawn nuih seih chu ka va hmu a, an awmdan chuan ngaih a ti ṭha lo takzet, tunah khan message a rawn thawnin ka hria.

"Tlaiah chuan i hman em?" ka tih lah chuan a hrilhhai hmel khawp a, a lo theihnghilh hman aniang.

"Thil kan ei chhuah dawn kha"

"Ni tak, khawiah nge i duh a?" min zawh dan vang chuan ka sawi chak lo khawp mai a, mahni inbengvar chawp te pawh ka ang dawn.

"Ka hre lo, i hman dawn em ni?" a phone chu a lo eng leh a, a bih vang vang hnu chuan a jacket ipteah a rawlh lut a, kan sir lam ka va hawi chuan Sangtei khan a lo la en reng a, ka awm an ti nuam miah lo, an inbe fo anih ka ring.

"Education class i neih chhungin an lam zir ka lo han enpui anga, min lo call mai dawn nia" nelawm takin a ti a, ka rilru a buai nak mai, ka thil hmuh khan min mawlh tlat a ni.

Mawitei thil ziak zo lo hawi chhuak nen chuan an inmelh ren rawn a, "I chheih leh dawn em, kan lo en dawn che ania?" Mawitein a tih chuan Awmpuia chu a nuisang a, first semester kan nih lai aṭang khan chheih lam thiam tak a ni tih ka hre tawh, kan lo au nasa thei hle anih kha.

Class neih a hun tak avangin kan inzui chhuak a, Kimkimi pawn corridor-ah min lo nghak reng tawh a, mipa pahnih ten tlar hma lam an pan laiin keini erawh tlar hnung lamah kan chho a, ka ṭhiante pahnih chu an inbe lo reng reng. Kimkimi nen chuan kan titi dun a, Mawitei chu ṭawng tir ve tumin ka han be ṭhin a, a rul tawk bakin min chhang duh lo, a phone bihin a ṭhu kun reng ringawt.

Noeli leh a ṭhiante lo lut chu kan hma lawkah an lo ṭhu a, Awmpuia chu auin, "Thil chu min lo ken em?" a va ti lang lang a, Awmpuia lo kal chuan lehkhabu chah angreng deuh hi a lo pe a, pawisa an inpe telin ka hria. Awmpuia let leh tur chiah chu "Sangtein a lo bia che em?" Noeli chuan a ti a, Awmpuia chu a bu ringawt a, "I number min dil nasa lutuka, club-ah lo tel ve an duhin ka hria" Noelin a tih leh chuan, "Kan inhmu tawh" tih zawngin a lo chhanga, a let leh nal nal bawk.

Period awl kan neih laiin library-ah kan kal a, Kimkimi a awm ve tak vang aniang Mawitei chu a kal hrang daih a, an inkar hi tih ngaihna ka hre lo, thil pakhat erawh hriat chhuah ka nei a, lungngaite intawrhpui hi chu thil awlsam tak anih laiin lawmte lawmpui hi a lo har hle tih hi. Kimkimi tan pawh a pass chu lawm viau a har ang, a ṭhianṭha ber Mawite lahin a lawmpui thei si lo va, hetiang rilru Awmpuian a pu ve lo hi ka lawm hle bawk.

Class nei tura ka let leh chuan kawtzawl hla deuha Awmpuia ding chu ka va hmu a, a bula hmeichhe ṭhenkhat ding chu Sangtei te ṭhian ho kha an niin ka hria. Hmeichhe pakhat chuan a helmet ken laichu Awmpuia hnenah a pe a, Awmpuia chuan a lo khum vat a, ding meuha ka en laichuan scooty-ah a chuang a, a hnungah Sangtei a chuang ve zat bawk a, a ṭhianten an bye bye sap sap bawk. An inphur chu ka thlir liam vawng vawng a, ka nghilhdup maiin ka hria, Awmpuia chuan kan thil tum kha a theihnghilh leh tawh aniang, min hawsan nal nal mai.

"Ramnunsangi nen khan an inngaizawng em ni?" ti a ka ṭhiannu zawhna chuan min ti tawt up up, chhan dan pawh ka thiam lo.

"Engmah ka hre lo" ka ti zawi sep a, ka thaw a hah leh der tawh.

"I rilru ti na duh suh, ngaihthah ve hmak la ka duh ania, tunah pawh hian i la be ṭha mah mah" Kimkimin a tih chuan ka chhang tawh lo, ngawi rengin class lam ka pan a, phurna ka nei loin ngaihtuahna a tawi turh mai a ni.

Mawitei lo ṭhutna lam kan pan a, a bul chiahah va ṭhuin ka sirah Kimkimi a ṭhu bawk a, Mawitei chuan min ngaihven lem lo. "Rinbawih, be ṭha tawh lo tak tak teh, senior most a mi kha Noelin a tih pui anih kha, Awmpuia pawn a hre vek, hre chunga a be ṭha reng anih chuan a hnar bik lo tihna a ni mai, tikhan ni mai mai rawh se, i rilru na viau mahse thik angin awm miah suh, engah mah ngai lo angin awm la, a lo biak che pawn mihrang angin en ve tawh rawh" Kimkimin a ti bawrh bawrh a, a ṭawng zawi lem lo bawka tukverh bula ṭhu pawh a rawn hawi rang khawp mai.

"Eng nge thleng a?" a rawn tih chuan, "Awmpuia mawle, nula nen an inphur leh tawh" Kimkimin a lo ti vat a, thawk ka la halh ringawt, ka mitthla ah a cham a, ka rilru nat zia chu ka sawichhuak thiam lo ang.

"Nula chu tu nge, canteen a mi te kha em ni?" Mawitein a tih chuan ka bu zauh a, a sa leh phat tawh. "A va han lerh mai mai, hepa pawh hi a, a duhtawka a free theih nan a ṭhen mai mai che a niang, zalen deuha nula dang kawm a chak vang bak a ni lo ang" a ti sak sak a, Kimkim lahin, "Inkawp mai mai rawh se, a tel loin i hlim thei tih hi hmuhtir ve rawh, han be duh lo hmak la, a inhrechhuak rauh rauh mai ang" tiin a lo tuihnih ve bawk a, Mawitei pawm zawng tak a lo ni vei nen an pahnih chuan an ṭawng zui mawlh mawlh a, min fuih a, Awmpuia an sawi chhe chamchi bawk a, an ṭawng ngaihthlak chuan lung a ti zing mup a ni ber.

Class lak laite chuan ka ngaihtuah tluk tluk a, ka ṭhiante sawi ang khan be duh lo ve ta ila tiin ngaihtuahna ka nei a, ka inhumruh leh chiam ṭhin. Ni e, ka hlat ve a ngai tawhin ka hria, hetianga awm hi a duh anih chuan ka tibuai bik lo ang, ka awmdanah min hai a ni bik lo va, a duh anih phawt chuan ka inhawng tih pawh a hre ngei ang. Mahse, amah ngaichang reng renga ka awm hian ka hrehawmna a zual a, ka beiseina ringawt pawh ka nat pui a, hetiang tur hi a ni lo, keimah zawk hi ka danglam a ngai a ni, beisei tawh lo law law ila, nat nawn fo aichuan beidawn mai a ṭha zawk ang.

Class ban hnu chuan mi an lo reh diak tawh a, Cultural club ho lam zir thawm chu kawtzawl aṭang chuan a ri dup dup a, cheraw an zir anih hmel. Mawitein scooty a lo keng a, Kimkimi nen an veng a inhnaih avangin an inphur haw thei a, keichu ka chuang leh tlawng tawh. "Taxi ka lo la ang" ka tih chuan min kalsan chu an hreh ve hmel khawp a, "Kal ru, ka rawn zui ang che u" ka ti chung pawhin an la ding ve tlat.

"Jerry-a hi tihpui mai ila, inthlahtir ṭhin sela a ṭha ang. Rinte, i bawl thei hrim hrim, bike nei biak ṭhat i ngai, Awmpuia hmuh laia inphurhtir tur i mamawh" Mawitein a tih mawlh mawlh laiin Jerry a haw tur gate bula a ding chu kan va hmu a, a bike a la chhuak mek a ni. "Ka ko dawn, inphur haw rawh u" Mawiteiin a ti leh ta mai, koh nghal mai a tum chu a hmui ka lo hup chawt chawt a, a han ṭang ve nasa em em khawp a; mahse, Jerry-a tlan liam hma chu ka thlah duh lo.

"Awmpuia a lo phei ania" Kimkimin a rawn tih chuan ka thlah vat a, hnunglam ka va hawi chuan min ti hamhaih lek lek, a haw tawh emaw ka tia!?

"Lo be duh suh, a lo thlen hmain kalsan ang u"

"Kan in threeble mai dawn em ni?" 

"Chhoah khian min zo lo ang. Rinte, kal rawh kan lo zui ang che" an pahnih chuan scooty-ah an chuang zui a, kei erawh ka din ngaiin ka ding reng a, kalsawn tumna pawh ka nei lo. Awmpuia lo phei mek lam chu hawiin ka intipaukhauh lui a, lo biak ngei pawh ka tum a ni.

"Rinsangpuii em em hi chu, i intithangtlawm mai mai.." Mawitein a tih pawh chuan hre lo ang hmiahin ka awm a, tu thurawn mah hi lak ka tum tawh lo, ka duh danin ka awm anga, ka nuna thutlukna engkim hi keimah ngeiin ka siam bawk ang.

"I hman tawh em ni?" Awmpuian a rawn tih chuan ka inhumruh chiam a, ka bul a lo thlen hma chu ka chhang let lo. Ka hmaa a rawn din laichuan ka lo melh vang vang a, "Ṭhulh leh mai ang" ka ti tawl bawk a, a mitah chiang lutukin ka en bawk.

"Tinge, i hman leh lo em ni?" a tih chuan, "Ka chak vak lo" la en ngar chung chuan ka ti a, a hmel chu a buai ve nak.

"Kalna tur in nei nge?" ka ṭhiante lam chu a melh a, anni pahnih chu an lo ngawi reng thung.

"Ka peih leh lo mai, haw ka lo tum chiah a" ka tih chuan mak tih hmel deuhin min lo en a, "Ka thlah dawn che em?" a tih chuan ka chhang hman lo, 6th semester building lam aṭangin an rawn au lauh a, "Awmpui, Sarlamkai kan en dawn, lo chho rawh" hmeichhe pakhat hian a rawn ti lang lang a, Sangtei pawh kha kan han hmu ve nghe nghe.

"Han kal rawh.." ka aw chu bul ṭha tak a ni.

"I peih lo tak tak em ni?" a la ti ve fan a, a buai tehlul nen, chu loah tun ṭum angreng renga hriatthiam ṭum hi ka la nei lo ang, kal mai zawk sela ka ti.

"Peih lo e, ka ti buai mai mai che a lawm" a meng nur deuh a, "Thinrim i va ang e" a tih chuan ka nui ringawt.

"Han chho rawh, an nghah che khi" min la en reng a, nuam chu ka ti bik lo khawp mai. Chutih laia, "Lalawmpui, haw i tum e law?" lo ti tu chu Noeli a ni, Canteen aṭangin a rawn phei a, kan lam a rawn pan bawk.

"Ka kal mai" tih leh inher ka rual a, "Ka lo thlah ang che" a rawn tih vang chuan ka hawi let leh vat, a hmel ka hmuh chuan ka ṭah a chhuak ngawih ngawih. "Taxi ka la mai ang" hnuk ulh ṭeuh chungin ka ti a, min chhan leh hun pawh ka nghak hman lo, gate lam ka pan a, ka ṭhiante lo tlan phei thawm bak chu thawm dang a awm lo. 

"I ti ṭha lutuk, thlen hunah kan lo call ang che" Kimkimin kutzungpui min lo hmuh vah a, an tlan liam tur chu beidawng zetin ka thlir a, hnunglam erawh ka hawi let lo, min lo thlir liam ve ngei chu ka ring.

Taxi stand ka thleng chu ka vai deuh ruai mai, ka thaw a hah a, ka khawhmuh pawh a fiah lo. Thaw hlawp hlawp chungin stand lam chu ka pan a, taxi pawh la ta chuang lo chuan ṭhutthleng awlah ka va ṭhu a, ka han hawi kual leh ringawt ṭhin. Kawngpuiah chuan motor a tlan liam zung zung a, mi kawngkal te, an nui ri te, an inbe thawm te chu ka kham hluah hluah vek.

Ina haw ka chak lo va, khawiah emaw bo vang vang ka duh, ka ṭah lah chu a han chhuak em em khawp a, ka thin a tawt urh mai bawk si. Ka inngaihtuah lungpuam zel a, ṭah a chhuak telh telh, chuti chung chuan 'Awmpuia chu a lo chho ang a' tiin college peng lam chu ka melh leh ṭhin a, ka rilru chu a inlumlet but but a ni ber, lo chho sela ka duhna leh ka duh lohna chu a inzat hial ta ve ang.

Ka phone lo ri chu u Lizzy call anih vangin ka chhang duh lo a, a rik zawh rualin ka switch off hmiah bawk. Taxi driver ten min lo biak chang chuan mi ka nghah thu ka lo hrilh mai zel a, haw ka chak loh em vang zawk a ni. Ka ṭhut rei deuh hnu chuan lam zir ho pawh an lirtheiin an lo tlan chho sap sap a, Scooty-a Awmpuia lo tlan chho pawh chu ka lo hmu reng a, a hmeichhe phurh chu Sangtei ngei kha a ni.

A tawp ta vek mai, beiseina ka lo neih ve te, hlauthawng leh inthlahrung tak chunga duhthu ka sam ve te kha, engkim, keimah tiamin a chuai zo ta a ni. Ka mit aṭanga mittui luang chu thlahna mittui a ni a, vawiin chauh chu a tawp nan ka ṭap leh ang, inhnemna ka neih chhun a ni miau a.

Khua chu a tlai telh telh a, ka rilru a fim lo telh telh thung. Taxi ding pawh an chhuak zo tawh a, khua pawh a thim chhulh tawh. Hlauhnain ka tirilah min ṭham a, ka thinphu  a rawn rang zui chiam a, eng nge ka hlauh ber pawh ka hre lo, ka khur hlawk hlawk a, vawtin min ṭham bawk.

Ka bag-a ka phone dah chu ka pawrh rawk rawk a, switch on ka tum laitak chuan ka hminga min ko ri ka hria a, kawngpui lehlam aṭang mai chuan a ni. "Eng nge i tih a?" tiin phawk deuh hian min rawn en a, Benjamina a ni tih ka hriat veleh rang lutukin ka tho a, ka bag pawm chungin ka pan phei hlawk hlawk.

"In inah chaw kan lo ei dawn a, i chhungte pawh an mangang a lawm, in va bang tlai em em ve?" chhang loin a Bike hnungah ka lawn a, min lo thlek rualin a jacket-ah ka vuan a, a hnungah ka bei thlam bawk. 

"Hey, engti zia nge a?"

"Ka number i block leh ti raw?"

"I damlo em ni a, i va sa ve" ka kut a rawn vuan a, ka khur nasa lutuka chhan pawh ka chhang thei lo.

"I awmdan chuh?"

"Tlan rawh" bike chu a ti nung zui a, kan tlan chhuak chiah chu ring lutukin ka ṭap chhuak hlawp hlawp. Ka lungchhiat zia chu aw.....ka kehsawm vek maiin ka hria, ka mittui a luang zung zung a, ka ṭap ring zual sauh bawk a, insum pawh tum mahila awmzia a awm lo ang, ka taksa, ka rilru leh ngaihtuahna thlengin natna chuan a thunun fai vek a ni.

(End of chapter - 22)