BLUE BAYOU (CH - 23) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 23

"Engtizia nge..?"

"Mi in an hau che em ni?"

"I bialpa nen in inhau nge?" a tlan muang zui a, chuveleh a kawngah lo vuanin "Ding suh, ka chhuk duh lo ania" ṭap pur chung chuan ka ti a, "Kut a thlak che em ni?" a tih leh chuan ka chhang tawh lo. Insut hraih hraih chungin ka ṭhu ṭha a, side glass aṭanga min lo en vang chuan lehlam ka hawi rang hle bawk.

"A chhan sawi la, ngaih i ti ṭha lo ania?" ka hawina lamah min lo thlek leh a, "Ka ṭah a chhuak lutuk" tiin ka la inpetruh nasa mai, ka mittui lah chu dan sen pawh a ni lo, hruk pawh ka tum buai lo law law. Chutih laichuan ka kut a rawn ban rawk rawk a, a lama min pawtin a hnunga beithlawp khawp chuan min pawt hnai a,  "Ava buaithlak e aw, ka hnungah khan bei la, ṭap rawh" a ti hul hak a, kei erawh ka insum nasa hle.

"Ka tlan chak dawn a nia, tuman i ṭap tih an hre lo ang, insum lo khan ṭap bawrh bawrh rawh" a ti leh a, ka insut faih faih a, thawm ka chhuah duh lo thung, ka awmdan chu zahthlak ka tiin hrehawm ka ti ve takzet a, ka inthlahrung bawk.

Bike chu a tlan chak sauh a, chutih rual chuan "Intih pachan kher a ngai lo ania, ṭah a chhuah chuan ṭah hmiah hmiah tur, i thawl hawk mai ang" a rawn ti leh lawng lawng a, a ṭawngkam chuan min vel ṭha lehin ka hria, ka ṭap leh vawng vawng tawh, inhnemna ka lo mamawh viau anih ka ring.

"I duhtawk khan han ṭap phawt la, i thawl deuh hunah a chhan min hrilh ang che; mahse, in thlen hmain ṭap zo hman la" ka inhru hul thuai a, kawngpui lun lai kan thlen tawh avangin jam-ah kan tang zui a, kan sira ding ve te chuan min thlek deuha ka hriat vangin ka ṭhu ṭha leh a, hnuailam ka bih deuh ngul bawk. Khua a thim chulh tawh a, ka hmalamah chuan motor ding a tam si a, kan tlan sawt lo khawp mai. 

"Min zawng turin an lo tir che em ni?" ka tih chuan, "Tir hran lo e a, i haw har lutuk a, ka pizawn kha a phun a phun a, ka ning bawk nen ka lo zawng ve tawp che" tih pahin side glass aṭang chuan min lo thlek a, lawmthu hrilh ka duh viau a, sawi dan a vang duh khawp mai.

"I va fel ve, taxi a vang lutuk a" zawi tea ka tih chuan "I stayback nge, i ṭah chhan kha sawi teh?" a rawn ti leh a, ka sawi hreh pawh a ni lo, a bula hetiang thil sawi hi a ṭha lo riauin ka hria.

Ka chhan hma chuan "I bialpa vang a ni em?" a rawn ti leh khauh a, engtin mah ka chhang lo.

"Kut a thlak che anih chuan ka chhan dawn che ania, engmah hlau suh" a rawn lehhawi zawk a, a hma a tlante an tawlhsawn avangin a tlan veleh thuai bawk a, a hre duh ngang aniang "Sawi la..." a rawn tih zawm leh zat bawk.

"Bialnu a nei a, vawiinah an inphur haw.." ka ti tawl mai...

"A va zia lo ve aw, a lerh zek mai a, ṭap duh suh, inti pachang la..ani vang mai maiin inti nep duh miah suh" a ti hmawk hmawk a.

"Intih pachan a ngai lo i ti emaw ka tia..." tum deuh bara ka tih chuan, "Aa..ka rilru ka thlak leh daih, khapa vang mai mai a ṭah chu a ho em mai, a la inchhir viau ang" pawr angreng zeta a tih chuan ka chhang lo. Rei deuh chu kan ngawi dun a, kan tlan chhuak hleithei lo chu ka ṭhutdan ka siam ṭha sek a, mi a rawn melh rang ṭhin khawp mai.

"Min lo en zuk zuk suh.." a darah ka nam salh a, "I ṭap tawh lo maw?" a tih chuan ka bu leh ringawt. "A ṭha, chhel tur, mi tamna laia ṭah chu a ṭha lo, video ten an lo la palh ang che, i duh chuan ka hnungah khan bei leh rawh" a kut chuan min rawn ban a tum aniang rang deuhin ka lo ben sak a, "A ngai lo, a zahthlak a lawm" tih pahin ka bag chu ka pawm ṭha sauh sauh a, hnung lamah invuanin ka ṭhu khawng auh tawh.

Kan tlan chhuah hnu pawh chuan a ṭawng mawlh mawlh a, motor thawm a tam em avangin a thil sawi chu ka hre mumal meuh lo. Min fuih a, 'Ani vang mai mai' a tih leh 'Ṭahpui atan a ho lutuk, mipa dang an tam em' a tih te chu ka hriatchian chhun a ni.

Ka veng ka thlen chuan pengah a ding a, lehhawi meuh hian min rawn en a, "I ṭah a la chhuak em, kan thlen hmain..." rum fein ka lo melh, "I sam te kha a thur em?" a ti leh a, min zawt ve tak na a, min en reng tho. Ka sam chu ka han tuai ṭha ve sawk sawk a, "I mit a sen ang, engtin nge i haw tlai chhan hi chhuanlam i siam dawn?" a ti zui a, ka hre bik miah lo.

"I tlai lui ti raw, i bang tlai pawh a ni loin ka hria?"

"Taxi stand-ah ka ṭhu mai mai".

"An zawh che ka ring" a tih chuan ka rin dan ve tho a ni.

"Lâm kan zir ka ti mai ang" ka ti ta ngawt a, an awih ange maw..?

"A ṭhat chu, jam-ah kan tang rei ka lo ti ve ang" tiin a tlan ve leh mai a, rei loteah kan gate pawh kan thleng a, Gate a kan tlan luh laichuan Veranda a Unaunu lo ding chu ka va hmu a, min lo en vung vung mai. Ngawi rengin ka chhuk a, kan lampana a lo phei chu ka be hreh ru khawp mai a, lawm lo hmel a pu tlata ka hriat vang a ni.

Mahse, Benja chuan min lo ṭawng khalh a, "Chaw a ei theih tawh em, Jam a turu lutuka, ka ril a ṭam tawh teh mai ania, haw hma ka ngai lehnghal" a lo ti zung zung a, "Chawei kan peihna a rei tawh lutuk, tinge in va bangtlai ve" tih pahin unaunu chuan min lo melh a. 

"Lam kan zir a, ka bang tlai" tih bak chu sawi vak dan ka hre lo, a awih leh awih loh pawh ka hrethiam lo. In lam ka pan san a, hnung lamah chuan an inbia tih ka hre thei, nghak duh loin ka lut zui a, sitting rooma Nu Hlimi leh Ni Pawli ṭawng ri ka hriat chuan ka tim ru ngang mai. Ka thawm hriain Nu Hlimi a lo chhuak vat a, "Engtizia nge, i phone i chhang thei bawk si lo?" a rawn ti hlut a, thinrim hmel ka hmuh loh vang aniang ka awm a nuam huai mai.

"Lâm kan zira, ka phone batry a low, a thi daih a lawm" tiin dawt hlang hlak chu ka hrilh leh, nu Hlimi hi chuan min ring ve em a, a hmelah pawh a awih tih ka hmu thei, chawei an peih tawh thu sawiin choka lam a pan a, keiin pindan lam ka pan zui a, Ni Pawli lo ṭhu ka hmuh chuan biak dan tur ka hre lo. Min lo nuihsang a, "Ka rei lo ang" tiin pindan lam ka pan zui a.

Ka insilfai thuak thuak a, darthlalang ka in en chuan ka meng sen deuh rum a, nu Hlimi khan min enchiang vak lo anih ka ring. "Chaw kan ei ania" tih ri ka hriat takah chuan ka chhuak phei ve vat a, midang chuan dawhkan an lo kil ṭhap tawh. "Ka phone tlang thei si lo che a, lo haw hma la ka duh nen. Chawpchilh deuhin chaw eikhawm kan rawt a, chawhmeh chi tam pawh ka siam hman lo hei, a awm ang ang min eisak mai a ngai a nih hi" tiin Nu Hlimi chuan Ni Pawli lam a melh zui a, kei erawh ka ngawi reng a, chaw chu ka chak lo takzet.

Benja lam ka va hawi chu mitko a lo san ralh a, chutih laimek chuan unaunu chuan Iskut chhum chu a thlengah a lo suah sak a, "Sa ti i duh em?" a ti zui a, a chhan hmain unaunu chuan a suah sak leh mawlh mawlh a, nupa an angin ka hria, chhungkaw chaw eikhawm te pawh kan ang.

"Kartawp kha kan hman tlang berin ka ring a, Bentean vawiinah a ti leh chuk chuk sia, ka inthlahrung ve khawp ania, i ban hma phah ringawt lehnghal a" Ni Pawlin a tih chuan, "Kartawpah ka hman hleinem" pakhat chuan a loti zauh a.

"Eng nge i tih dawn?" unaunu a ni.

"Hmun dangah ka awm lawk dawn"

"Khawi hmun dang?" Ni Pawli lo inrawlhin "A puin kartawpah lo riak phei rawh a tia, tirhna tur a nei aniang" a lo ti var a, Unaunu chu a ṭawng zui tawh lo. Chaw chu eiluih ka tum ngial a, ka ti hleithei meuh lo a ni, ka hrawkah min hnawh tlat. Antui ringawt chu ka hawp ka hawp a, an ti ti chu ka ngaithla pah ve reng bawk a, ka ṭah a chhuak ngawih ngawih reng, engkim chu ka ning a, midang kianga awm a, an titi ngaihthlak te chu nuam ka ti lo, thaw a ti pik a, chhungrilah min hnawh tup tup a ni ber.

"I chawei a tui vak nange?" Ni Pawlin a rawn tih chuan, "Ka chau deuh a, vawiin khaw lum lutuk vang aniang" ka ti ve vat a, chaw chu ka han bar lui leh rih, chuta ka hawichhuak chu Benjamina nen kan inmelhfuh chat a, min khawngaih hmel deuh hian min lo en a, sawi duh nei hmel a pu bawk. 

A tho hmasa berah ka ṭang a, midang an kham hnuah thlengte sengfelin ka che zung zung a, zanin chu U Lizzy'n thleng sil a, mak ka ti hran lo, tûm miah lo a thleng a sil vang a niang. Dawhkan ka ti fel zo chu tui bottle lain pindan lam ka pan a, khumah ṭhuin Phone ka on zui a, Message a rawn lut zawt zawt mai.

"An inngaizawng chiang lutuk, chawte an eikhawm ania, i hriatpui em?"

"Noeli pawh a tel leh tawh kha, a tihpui nasa ang henu hian"

"Noeli status saw..." tih angreng Mawitei hnen aṭangin a ni. Noeli status chu en ka tum a, vawiin tlaia an lam zirna bak chu eng mah hmuh ka nei lo.

"Eng status nge?" ti a Mawitei ka va zawh chuan "An chaw eikhawmna a tam saw" a rawn ti leh mai a, ka va en leh ṭhin a, engmah ka hmu ve si lo, Noeli chuan ka hmuh theih loh turin a siam a ni ngei ang.

"Min lo thawn teh, engmah ka hmu thei lo" tih chu ka thawn let a, rei lo teah thlalak a lo thleng ṭawk ṭawk a, Sangtei te ṭhian ho bakah Peksanga te, Zothana te ho pawh an tel a, nuam an tih hmel khawp mai, Awmpuia bulah Sangtei a ṭhu a, a sir lehlamah Noeli a ṭhu bawk. Rei ka en ngam lo, ka mittui a rawn hnam a, tukverh bulah va kalin thawk ka la vang vang a, intih thawven dan hlawl ka hre lo, ka bing chuk chuk a ni ber. 

Awmpuia number chu ka hmetchhuak a, ka block ringawt a, awmzia a awm lo reng reng, biak ka chak a, zawhfiah pawh ka chak, chu erawh ka tih tur a ni lo tih ka chiang si. Call list ka en chuan Benjamina number lang chu ka hmu a, Block tih a lo inziak kalh a, ka unblock leh ringawt bawk a, ka thiltih apiang chu awmze nei lo thil vek a ni, engkim takmeuh chuan ka thin an ti ur a, min ti hrehawm bawk.

Khumah bawk let lehin phone chu ka hmet kual a, ka pa chu biak ka tum zuau a, ka ṭhulh leh thung, ka nu number zawk ka call a, ngaihtuahna mumal ka pu lo, phone a rawn chhan rual chuan ka harh deuh zawk a, a aw chu ka ngaithla reng ringawt.

"Mate, i mu tawh em ni?"

"Hello, i ṭawng ka hre thei lo, signal a ṭha lo em mawni le" a aw chiang takin ka hria a, ka lunga chhe ruai mai. Ka mittui a rawn luang zung zung a, "Mate..." a rawn tih leh rual chuan aw ka thian kharh a, "E, tikhan ka hre thei e, i mu tawh em?" awki damdiai hian a rawn ti a, ka zep lo, ka ngai ngawih ngawih a ni.

"Ka mu deuh chiah, nang i mu tawh em?" ka aw chu a zawi hle a, ka phone humna kut chu a khur dar dar bawk.

"Thim hlim khan current a awm lo a, ka mu hma lutuk, i damṭha lo em ni, i aw a va chhang ve?" a tih chuan thawk ka la halh a, sawi tur ka van a ni, a bulah chuan sawi duh ka ngah a, ka chhia leh ṭha hriatnain min dang tlat lawi a, ka ngaihthu takngial pawh ka sawi thei lo.

"Ka mut a chhuak deuh tawh a, biak tur an vang em a ka lo call mai mai che" ka tih chuan, "Min lo be ngai lo lutuka, ka ngaih tehreng che nen, pawisa te i mamawh em, mamawh i neih chuan lo sawi zel rawh aw, i nu te kha ti buai lo thei la ka duh ania, thawmhnaw te i la nei ṭha em" a rawn ti zung zung a.

"Engmah mamawh ka nei lo, external exam dawnah min lo thawn dawn nia" ka tih chuan, "Tehreng mai, a hunah i lo sawi dawn nia, naktukah i nu Hlimi ka lo thawn anga, bazarnan lo hmang rih la, i fee chu a hranin kan inthawn dawn nia" a ti leh luam a, hnialna pawh ka nei lem lo, ka rilruah hnial lam a lang lo reng reng, ngaihsakna dawn ka thlahlel a, tun dinhmuna ka hmuh theih chhun anih vang aniang, huatna khan ka thinlungah hmun a chang lo ti ila a dik ber ang.

"I nu te an mu tawh em?" a tih chuan inleng a la neih thu ka hrilh a, an ṭawng thawm erawh ka hre tawh lo, an haw tawh zawk a ni maithei.

"Min lo phone ziah rawh aw, pawisa chu naktukah ka lo thawn ngei ngei ang, kawr nalh deuh deuh i lo lei dawn nia" tiin min chah zui a, "Lo thawn tam duh suh, mamawh ka nei lem lo ania" ka ti ve bawk a, a tuk lama min biak leh tur thu a sawi hnuah phone chu kan dah a. Eng emaw ti zawng takin awm nawmna ka nei, hetianga ka tih hian a ṭha zawk ang tiin ngaihtuahna ka nei bawk a, mahni ka inthiam chawp a ni mah ang chu.

Phone ka dah fel deuh chauh tihah call a rawn lut a, ka en hmain a tawp leh daih lawi a; mahse, message tone a lo ri leh zat a, Benjamina a ni. 

"Min Unblock leh tawh e law?" tih tlawng hi a rawn thawn a, min lo call tu pawh kha amah a ni, ka chhang duh lem lo.

Dar 12 pelh thlengin ka meng a, phone ka khawih lo a, inchung lam melhin ka mu ngawt ngawt a ni ber e. Ka pindan light chu rannung pakhat hian a vir kual reng a, chu chu che chang loin ka thlir ngawt ngawt a, ngaihtuahna a tawi turh mai. Ka muhil dawn siar siar tih ah ka phone chu a lo ri a, Benja bawk a ni.

Ka lak rual chuan "Pawnah ka awm, i thil tur ka lo keng" a rawn ti sur sur a, ka tho rang khawp mai.

"Engthil nge?" ka tih chuan, "I mamawh ka ring" a ti ringawt a, ka hrethiam lo khawp.

"Eng maw ka mamawh?" tukverh aṭangin kawt lam chu ka va thlek a, ka hmu thui thei lo, Gate pawnah nge veranda-ah a awm zawk pawh ka hre lo.

"Lo chhuak la, lo la lawk rawh" a rawn tih chuan hnial ka tum zet a, "Eng nge i lo ken?" tiin ka zawt leh rih.

"Beer..."

"Eng a...!?"

"I duh ka ring mai mai, i duh chuan lo la rawh" ka inngaihtuah buai deuh, rei lo te chhung chu. Mahse, ka hnar phal lo, ka mamawhin ka hria.

Thawm dim lutukin ka chhuak phei a, veranda ka thlen chuan gate pawn lama eng zak zak chu ka hmu a, a bul ka va thlen chuan bag dum hi a lo pawm a, koh luh aichuan chhuah zawk a ṭhain ka hria. Gate ka hawn laichuan a bag ami chu a lo phawrh ve sawk sawk a. "I la haw lo em ni?" tiin makti deuh tak chuan ka zawt a, a la inthlak tlat lo a ni.

"Haw zuai a, i thil la tur hian ka kal a lawm" ka nui ringawt, beer can tam deuh hi a rawn phawrh a, lo ban mai ka tum chu a banin min lo dang vut a.

"A vaiin ka pe dawn lo che, hrai hlum che ka tum hleinem" a ti hmuk a, ka nuih leh ringawt.

Pakhat te chu a la chhuak a, "A percent a sang vak lo a, i mut duh dawnah in la, i muhil nghal dawn nia" a ti a.

"A percent sang ka duh a sin" ka lo ti chu min melh rum khawp mai.

"Engzat nge...?" 

"6 a tawk..."

"Chu chu a hniam ber tihna a mi?"

"Ka tan chuan eng tham mah a ni lo a, i tan chuan a tawk chauh" a ti a, ka hrethiam ve vak lo.

"I dang kha i in vek dawn a mi?" ka tih lah chuan "Hetiang ka inpeih teuh lo" a ti lawi a, eng atan nge a lak ṭeuh le?

"Min lo pe vek mai la, i in peih loh..." min lo melh rum leh hlur a, ka inthlahrung deuh, nidanga ka duh leh ka rin vang a ni; mahse, min ngai khaw lo viau ang tih chu ka hlau hnuhnawh a, ka la leh lo zawk dawn em mawni.

"Ih...lu a na thei lo ti raw 6 chauh chu...?" ka ṭawng bah deuh nuai...

"Na lo ang, a tawk chauh kha kha, a dang hi chu min dil a ngai ang, i duh hunah lo sawi la, ka lo dahṭhat ang che" e he....ka tan veka a lak anih hmel.

"Dik tak chuan ka in ngai lo ania aw, ka muhil thei lo a, nangma min pek chu ni lo sela chuan...."

"Insawifiah kher a ngai lo, ka rilru a zim hleinem...i duh leh ka awm laihian in rawh, i chhungten an man che i hlauh chuan" ka ken lai chu min rawn laksak a, a hawng nghal rawk rawk a, a rawn phuan chhuak buah mai.

"Sehhmeh i duh em?" a tih chuan ka lo melh haw a, "Tikhan in pawp pawp rawh" tih leh min rawn hmehbel a rual a, in pawp pawp chu khawi lam, a kha lutuka, vawihnih lem pawh a har.

"A va tui lo em em..." ka ti chu min lo nuih kar kar a, "Lo ṭhu la, muang chang khan in rawh" a tih leh lawi a, ka chhungte an mu tawh bawk a, inchhunga ken luh aichuan a pawi lo zawkin ka hria, a bulah chuan ka ṭhu ve mai a, ka inlai chu hmuhtir duh loin amah hnungchhawn zawng chuan ka ṭhu a, gate lam hawiin a hnung ka ngheng ar ar bawk.

"Min pe turin i lo kal vang vang a ni maw...?"

"Kal vang vang e, i mu thei dawn lo tih ka hria a, ka ngaihtuah che a lawm"

"Ka lawm e aw, a man a to em...?"

"To lo e...min unblock sia, ka rawn leisak hram che anih kha"

"Ka unblock vang che maw, tinge..?"

"Min block tawh lo la a ni mai, a dang i la duh chuan min lo dil zel a ngai tawh ang, hmun danga i lo in vaih chuan i nu ka hrilh ang?"

"Heih..i lo hrilh tak tak ange aw..." ka hlauthawng nghal ruai, a lam hawiin ka inher a, ani pawh a lo hawi ve vat a, "Hmun dangah lo in miah suh, hmeichhe tan a zahthlak ania, beer in thei chuan zu an in thei vek tih hi mipa ho ngaihdan tih hria la, midang hnen aṭang pawhin dawng lo ang che" fiah fek fawk hian a ti a, min vau nge min zilh pawh ka hre lo.

"Hrilh suh aw..." a mitah ka en kal a, ka aw erawh inthlahrung aw dik tak a ni.

"Hrilh lo ang, in zo vat la ka haw ang" ka sam a rawn chul a, thawk a la deuh ham ham a, zu rim a nam miah lo.

"In ve la, mahnia in chu a nuam lo e..." ka tih chuan lu a thing mat mat a, "Zu i duh zawk a mi?" ka tih chuan a nui mai a. "Khatiang chu ka ngaina lo, ka in ve zeuh ṭhin a, a nazawngin ka in lo, zu ngawivei nih ka hlau a lawm" a tih chuan ka hrethiam zan lo, zu heh lutuk turah ka lo ngai kha ania.

"Beer ka in sia, min hmuh hniam vek em?" a lo nui ri hawk a, "Hmu hniam che ila ka pe lo tawp ang che, hriatthiamna ka ngah a lawm, inthlahrung suh" beer ka in leh laitak chuan ka kut lehlam chu a rawn vuan a, a hmer deuh vang vang a, a awmdan chu mak ka ti deuh a, awm a nuam lo ru khawp mai.

"Ti kha chuan i muhil thei turah ngai ang, buaina i neih chuan min lo be zel la, college ah pawh ka rawn hruai thei che ania" a ṭawng zawi angreng khawp a, ka lo enchik khawp mai.

"I in zo tawh em?"

"Aih.."

"Hmanhmawh suh"

"Tunlai hi i fel riauin ka hria...i mizia hi a dang...?" a nui deuh suk a, min chhang dawn lo emaw ka tih hnuah "Ni Pawlin a lo hrethiam vek" a rawn ti a, ka thil in lai dah meuhin ka melh.

"Eng maw a hriatthiam....?" phawk angreng fea ka tih chuan, "Ka duh che a ti.." a ti ta mai a, ka lem sual teuh ngei mai, ka kut chu ka la sawn vat a, min lo ṭhuthnaih sauh thung.

"Heih....i awmdan hi ka hrethiam miah lo che ania, nangte chuan U Lizzy a lawm i duh...!!?"

"Nia, a mak ka ti, Lizzy ka duh laiin nangmah hi ka ngaihtuah zel che, ka lo hrethiam har deuh a ni, Ni Pawlin a sawi khan ka hrethiam ve chiah, ka lo duh zawk che aniang?" a nui deuh sang a, mi lah chu a ṭhuthnaih nasa mai a, awm ti nuam lo rum rum khawpin min en hnai bawk.

"I Ni chuan a hresual anih chu, i duh te chu nangman i hrechiang ang chuuu...."

"A sawi dik a lawm, vawiina i ṭah te khan hrehawm ka ti lutuk, ka naute ang deuhin ka ngai che a, i rilru a nat chuan ka buai vek, ka duh tak tak che a niang..." a thutak hmel khawp mai a, sawi tur pawh minti hre lo.

"I va â reuh tak, beer ka in vangin min ngai easy aniang, i ngaih ang ka ni lo ania aw, keichuan midang duh ka nei..." ka thil in bang chu ka in nghal khawlh khawlh a, ka hai deuh chiai tawh, luhsan mai a ṭhain ka hria, zanina a thil sawi hi chu ka hre lo der tlat ang.

"Ka kal dawn, nang pawh haw tawh rawh" ka tho hluai a, ani pawh a lo ding ve vat a, kal nghal mai tur nge ni. Rum deuha ka melh hnuah ka inher a, min bem bawk si lo a, han hnar vak dan pawh ka hre lo.

Gate ka hawng tur chu, "I mu nghal dawn em?" a rawn tih vang chuan ka ding leh dat a, inherin "Mu dawn e, haw rawh" ka ti leh hlak a.

"Tui deuhin mu rawh aw, khumfa te kha insehtir lo la" tiin a lo nui vur vur.

"Khumfa ka nei lo e a...." 

"Muttui..." a tia, a khisawng reng a, a mawl ka ti tak tak a ni. Hmanhmawh deuhin ka luhsan a, veranda ka thlen rual chuan message tone a lo ri ṭat a, ka lehhawi rang khawp mai, a phone ti engin a rawn vai zauh a, a kalsawn thuai bawk, a message ka en chuan "Ka duh che" tih zawng hi a rawn thawn a, a tih ngaihna tak pawh ka hre lo.

Khum ka thleng chu ka bawk thlawp a, ka zawi hle tih loh chu ka ngaihtuahna a fim khawp mai, hriat loh karin ka lo muhil thuai a, zinga ka harh chuan dar 7 a pel tawh. Chaw chhum chauh a ngaih vangin ka inbual hman var var ang ka ti a, ka hmanhmawh duh lem lo. Nu Hlimi lo tho chuan "Lâm kha zir tawh lo mai teh, tunlai chu ka chau riau a, eirawngbawl turin i u a rintlak si loh" a rawn ti hmasa ber a, "A pawi lo, an bang tlai thei em mai, ka peih tawh chiah lo" ka tih chuan min chhang zui lo.

Ka Phone ka en chuan engmah a awm lo a, mak ka ti zawk hial, nizana a thil sawi kha ka ngaihtuah let a, a rawn sawi zawm miah lo chu mak ka ti. Ngaihtuahna lah chu a luah ve reuh reuh reng a, min fiam mai mai anih te ka ring, thutak se zawng sawi a rawn nei ngei ang.

College ka thlen chuan first period a zo chiah a, canteen ah pawh kawi loin classroom lam ka pan a, tlar hmasa bera Awmpuia lo ṭhu ka hmuh chuan ka hawisawn rang khawp mai, a bul ka thlen dawn chuan min en tih ka hria a, a tawlh phei tih pawh ka mitsirin ka hmu thei. Melh duh loin ka kalpel a, tlar hnungber dawtah chuan ka han ṭhu a, hma lam ka zuk hawi thlak chuan lehhawi meuh hian min lo en a, mak ti hmel a pu bawk.

Rei loteah Noeli te an lo lut a, a tih dan ngai tein Awmpuia bulah chuan a ṭhu a, a bekbawr nghal sar sar a, ngaihven loh hram hram chu ka tum ve; mahse, a har a ni, hriat loh karin ka lo en leh hman ṭhin. Ka ṭhiante lo lut pawh chuan nimin lama Noeli status ngawt kha an sawi a, engmah an chiang bik lo chungin Awmpuia chu an dem hle a, "Midang a nei chak tawh a ni mai, a duh ru ve reng anih dawn kha" an tih chuan phatna tur ka hre lo, ka ngaihdan ve tho a ni.

Rin ang ngeiin chhun chawlhah pawh canteen kawtah an ṭhu ho lehta reng a, kan va kalpelh lai pawh chuan min lo ngaihven lem lo, canteen a kan ṭhutna aṭang chuan pawna an ṭhu chu chiang takin a hmuh theih a, a khat tawkin ka va hawi leh ṭhin. Ka en laireng chuan Sangtei chu a tho a, Awmpuia chu a bia a, kalpuiah a sawm aniang Awmpuia chuan a zui ve vat a, Gate lampana an kaldun chu an ṭhiante pawn an en zui a, ka rinhlelh ruk kha a thleng fel tawh a ni ngei ang, an ṭhiante nui hmel chuan a ti chiang hle bawk.

Thil kan eizawh veleh classroom kan pan a, tlarhnung bera kan ṭhut vangin Awmpuia lo lut ka hmu lo a, ban dawna a chhuak tur erawh ka hmu thung a, Zothana leh Peksanga te nen an ni. Mahse, pawna kan va chhuah chuan gate lampana an kal ka va hmu a, nghaktu an nei anih hmel, gate chhakah Sangtei te ṭhian ho an lo ding ṭhap a, an vai chuan kawng chhak lampanin an inzui chho a, Awmpuia ṭhiante pawn an hriatpui tih ka hriathiam tawh, ka beisei aiin thil engkim chu a thleng chak a, ka insiamrem hman meuh lo chu a ni, rilru na miah loin paltlang thei ila, duhsakna nen han thlah thei ila ka ti; mahse, a ni hauh si lo.

Ka ngaihtuahna a luah awl lo a, ka natna chuan chhungrilah min kher nget nget maiin ka hria, ṭhiante kiangah inhnemna ka hmu lo a, tum pawh nise min hnem zo kher lo ang, a chhan chu thil pakhat chiahin min hnem thei a ni, mahni a awm a, ruih chhum hmawk ka duh, inti pachan emaw, mahni infuih lam chu ka rilruah a awm lo, ka tawrhnate, ka natnate hi hmu sela ka duh.

Benjamina ka call a, "Beer ka duh" ka va ti thawr a, mi min ngaihdan tur lam ka pawisa lo, Awmpuia ngei pawhin hria sela pawi tihna ka nei hek lo.

"Class i kal lo em ni?" a rawn tih chuan, "Ka bang ṭep, min lo hruai hman em?" ka ti leh vat a, college chuan ka thaw a ti pik a, haw nal nal ka duh. "Ka pu te inah ka awm, khawia kal nge i duh a?" a tih chuan sawi tur ka hre lo, "Kan inah kan phei dawn nia, tumah an awm lo, taxi stand ah khan min lo nghak rawh" a tih leh hnuah phone a dah a, ka ṭhiante pawh hrilh lem loin gate lam ka pan hlawk hlawk a, gate ka pel fel awrh tiha ka mi tawh te vang chuan ka tim ru khawp mai.

"Khawiah nge i kal dawn?" Peksangan a lo ti var a, "Khitah..." ka ti mawl tawp.

"Dawrah maw..." a tih leh chuan chhang loin Awmpuia ka va melh a, min lo en ve reng a, an hnunga Sangtei te ṭhian ho erawh an titi barh barh a, ka tan dinreng na chi a ni lo. Kal mai ka tum chu, "Khawnge i ṭhiante?" Awmpuian a lo tih vang chuan ka ding leh rih a.

"Library-ah" ka tih laia ka aw chu zawi tak a ni.

"Haw i tum em ni a?" a ti leh a; mahse, ka chhan hmain Sangtei ṭhinnuin a lo bia a, a phone rawn hmuhin a nui kar kar a, Awmpuia nui hmel ka hmuh chuan min vilh ngut ngut mai, Sangtein ka lam a rawi hawi ve chiah bawk nen hmanhmawh deuhin ka kalsan a, "Rinte.." Awmpuian a tih ri pawh chu ka hre pha reng nain ka hawi let tawh lo, kawng chhoah chuan awmdawm chungin ka pen chho hlawk hlawk a, kawngpui ka thleng chu ka thaw hleithei lo a ni ber, ka thinphu chu a rang dawt dawt a, hah luatah ka thlan hluam bawk.

Chau hluah hluah chungin waiting shed lam ka pan a, ka ṭhu te chu ka bet lo reng reng, ke ka per et et a, khaw lum leh boruak uap churh nen, ka vela thil awmte chu ka hmu kham hluah hluah vek, college chu hremhmun ang maia nuam lo a ni a, inlamah pawh thaw aveng chuang lo, ka khua a har a, ka nu emaw, ka pa emaw ka thlahlel hek lo, Awmpuia takngial pawh thlakhlelhna ka nei ta lo, a tu a te pawh chu ka lak aṭangin an hla vek a, ka thiante thlengin. An vai chuan hnai tak angin an lang na a hla taka mite an ni, tumah hi ka kiangah an awm tak tak ngai lo.

Minute 20 dawn ka nghah hnuah Benjamina chu a lo thleng a, Clinic-ah chahbi a va lam hmasa a ni awm e. An in lam panin kan inphur haw a, kawngtluanin chanchin min zawt a, kei chu ka ṭawng peih meuh lo, ngaihtuahna ka kawm a, khawsik zo hlawt hi ka intehkhin ber, ka chau tih piah lam a ni.

An in kan thlen chuan Fridge aṭangin beer vawt reih rawih hi a rawn la chhuak a, sehmehah Ni Pawli theite um a rawn chhawp bawk a, can hnih lai ka in a, a pahnihna phei chu ka in zo em ka hre lo, bathroom ah ka va luak nghek a, chumi hnuah sofa ah ka mu a, ka muhil zui mai bawk.

Kan dinhmunin a zir loh em vanga duh lo deuh thil kan tih chang a awm an ti a, kei chu ka duhthlanna liau liau a ni, rilru fim put aichuan mu leh mal nei lo leka ruih ka thlang a, rei lote chhunga min chhawk pawh ka thlahlel a, inchhir leh hlauhna ka nei pha lo. Benjamina leh a Beer chu inhnem nan ka hmang a, vawikhatin vawihnih dang a hring a, a bak chu awlsam tak vek a ni tawh, mualpho hlauhawm khawpa ruih chang pawh ka nei fo mai.

Ka mihring hriat tawhah Benjamina ang em em a min hrethiamtu leh mizia a ka mil hi ka la tawng ngai lo, engkimah ka thurualpui thei a, min hnial ngai loh chu thuhran a phur em em vek zel a, a bulah hi chuan ka hahdam huaiin ka hre ṭhin. Beer kan in dun fo a, a ngaina lo chungin min inpui ve mai zel a, keiin cigarette ka zuk pui ve ṭhin bawk. Hetianga kan inkawm hi kan chhungten an hre lo a, an hriat pawh ka duh hek lo.

College kal loh zeuh zeuh ka ching chho a, Benja hian kan veng kawnah min lo nghak a, a ni Pawli chhuah hun awmah an inlam kan pan a, nilenga movie en changte kan nei ṭhin, inngaizawng angin kan khawsa dun ngai lo a, ṭhian ṭha tak kan ni, ani ang ṭhian hi ka la nei ngai lo a, nuam pawh ka ti ve takzet.

College-ah chuan thil thar engmah a awm lo, nitin chu a ngai ang a ni, kar a liam a, internal test te kan nei chho a, zir mang loin ka tlingtla ve mai a, result a chhuah chuan a ti ṭha pawl chu ka ni lo chiang khawp mai. Awmpuia erawh a ti ṭha berah a ṭang leh tawh a, thinlung takin ka lawmpui, a hlim hmel ka hmuh hi chuan ka awm a nuam ve tlat zel. A khawsak a ziaawm ta deuh bawk nen tun hma aikhan a thau ve tawh a, nitin hian a hmelṭha zualin ka hria, a nui hmel chu ka lakah a ui ngai lo a, min hmuh apiangin min la hmuhtir ziah a, ka laka a awmdanah chuan engmah danglam a awm lo emaw tih tur a ni, chutih rualin kei chu ka danglam hret hret a, Pangpar par ve ting tanga, vul si lo hi ka intehkhin ṭhin.

Tlaikhat kan class bang chu kawngka bulah a lo ding a, kal pelh ka tum chu ka darah a rawn vuan chawt a, "I number i thlak em ni, test hma aṭang khan ka be thei tawh lo che" a ti ta mai a, ka block tih a la hre miah lo. 

Chhuanlam tur lah chu ka van nasa mai a; mahse, amah bawk chu lo ṭawng lehin "Kan zin hun an sawn hnai thut a, naktuk pawh ticket buaipuiin ka kal daih ang, i damlo deuhin ka hria, i cher riau" tih pahin min rawn thlek zui a, "Engtin nge i awm?" a tih phei chuan ka hamhaih zo vek.

"Ka dam reng a lawm, in zin rei dawn em?" ka tih pawh chuan min la en chik khawp a, min biak a lo tum ṭhin ang tih rin ngaihna ka hre lo, ka lawm a, ka inthlahrung bawk.

"Kar khat vel aniang, tunlai chu biak i har e, ka biak loh che chuan min biak i tum si lo a, min hua emaw ka ti hman a lawm" a nui zui a, engtin nge ka huat phal tehlul ang ni.

"Biak i har daih zawk, midang nen inawm ho zel a, biakna hun i awm lo a lawm" ka tih chuan a ner deuh a, a sawi zui duh vak lo aniang, "Lo damṭha rawh aw, ka zin rei lo ang" a ti zawi deuh sup a, min ngaihtuah ve reng anih ka ring.

"Thil min lo hawn la" fiamthu deuha ka ti chu a lo aw rang khawp a, "Thil ṭha deuh ka lo hawn ang che" tih leh ka dara rawn kuah a rual a, gate lampana kan inzui chu rilru a thar uar uar mai, a ṭhang leh tawh aniang a dar ka chen ta meuh lo a, a khat tawkin a hmel chu ka en leh ṭhin.

A coaching kalna chanchin te ka zawt a, kan titi ve luam mai, "Ka lo haw hunah ka hruai chhuak ang che, hawi harh ve deuh i ngaiin ka hria, inah i tawm nasa leh lutuk i dik lo zo mai dawn" a tih chuan kan nui dun hak hak a, taxi stand thlengin min thlah bawk. Chumi zan chuan ka unblock a, biak erawh kan inbe zui ta chuang lo.

A tuk lamah chuan a hmel hmuh tur a awm lo a, ticket chu an va buaipui anih ka ring. Ka pum nuam lo vangin zirtawpni ah class ka chawl a, ka thil in ṭhin kha ka tuar lo aniang nilengin ka mu a, tlai eirawng ka bawl tur te chu a che sawt lo khawp mai. Chhuara Ulgel lo awm chu ka lem pawp pawp a, ka luak a ti chhuak leh si a, hrehawm duh tak a ni.

Dar 4 vela Unaunu lo haw chuan min han melh rum khawp a, eng nge a hriat ni titau ang mai hian pindan lam a pan nghawng nghawng a, a rawn let leh rang viau thung. Chaw chhum ka siam mawlh mawlh laichuan dawhkan bulah dingin min lo en reng a, min melh danah chuan ka laka lungawi lo a ang hle bawk. 

"Tinge min en reng?"

"I va zep thei ve, Benan min hrilh vek?" a ner nawng a, a thil sawi chu ka hrethiam hauh lo.

"Engmaw a sawi?"

"A ngaizawng che tih min hrilh, duh lo ang deuh khan awm tum suh, in college a ka ṭhianten in inphur an hmu ngun lutuk che u, ka hrechhuak vek tawh" a vin deuh khar khar a, nawmsam loh nen ka lo pawr ve hlar a, "Ṭhian bak kan ni lo, i ngaih ang kha engmah a awm lo e" bak fein ka ti a, engmah a awm lo reng bawk, Benja khan vawikhat a sawi bak kha a sawi zui lo a, ṭhian ang bakin kan inkawm zui lo miau a ni.

"A bulah engtin nge min lo sawi a, ngaihdam min dil tur ten i lo ti a ni maw?" ka thil sillai dah meuhin ka va en a, "I chungchang ka sawi ngai lo" ka ti chu a awih loh hmel khawp mai.

"I lo ṭhing hle mai, kan inkar hre vek chungin i han kawm vel a, i ngaihzawn ruk vang bak a ni lo, ka rinhlelhna che a rei tawh, i lêm hmasa vel aniang chu.." 

"Hrechiang lo khan min puh suh..." lawm lo fea ka tih laiin...

"I duhtawk khan lêm rawh, ka duh hun hunah ka chhuhsak thei che, ka thikah a hmang ve mai mai che anih kha..." min tihkhum sak a, ṭah a ti chhuak et et, sawifiah dan pawh ka thiam lo.

"In buaina a lawm, inrawlhna ka nei lo, ka lêm lo bawk..." tiin chawbel chu ka siltau sawk sawk a, a la ding reng nain ka melh duh tawh eih lo. Chaw ka chhuan hnu chuan a kalsawn ta hmak a, Benja chu va chhuahchhal ka duh ut ut, eng nge an sawi dun pawh hriat ka duh, hepa hi vau deuh a ngai a ni, ka lakah hetiang rilru hi a pu a nih chuan kan inkawm reng a fuh lo ang. Message thawn tuma phone ka en chuan Noeli message a lo awm va a, ka beisei loh lutuk thil a rawn sawi lehnghal.  

"Awmpuia leh Sangtei te inkar i hre ve reng sia, tinge hetiang hian i awm a, Sangtein 'Min lo hrilh sak teh' a tih vang chauhin ka rawn sawi, aman a be ngam lo che a, Awmpuian i hmuh laia inkawp a hreh tih te hre ve ta che, i mitmei a ven vangin an buai phah reng anih hi, lo inthiarfihlim rawh" a rawn ti bawl a, eng nge ka tih reng reng ka hre lo, nimina kan inzui vang kha em ni ang le, Awmpuia zawkin min lo bia a, ka chhang ṭha ve mai kha a nia, ka rilru puthmang chu engtiang pawh nise, mi inkara ka inrawlh awm reng reng ka hre lo.

"I hresual aniang, ngaihzawng a nei duh anih chuan a nei thei a lawm, inrawlh tumna ka nei lo, amah pawh kha i lo hrilh dawn nia, ka mitmei chu veng duh suh se, engah mah ka ngai lo" tih chu ka thawn let ve ngat a, ka sa deuh pup pup mai, ka thinrim zia chu aw, Awmpuia thleng chuan ka haw hlur ringawt.

Benja pawh chu be loin phone ka dah hmak a, ka ngaihtuah zui nasa mai, Lalawmpuia chuan engvanga ka mitmei veng viau nge a nih, a duh eng nge tih loh a neih, min ṭhen a, midang bulah a nui thei reng a, nuam deuhin a awm ṭhin anih kha, ka be chhe bik lo a, pangngai lo tak emaw tuar tak anga ka lan bik ka ring lo, engvangin nge min ngaihmawh em em, hnawksak min lo ti viau ang a tih te thlengin ka ngaihtuah a, ka ngaihtuah tam poh leh ka lawm lo zual, hetiang anih dawn chuan ka inthiarfihlim chiang khawp ang, hei bak a awmdan pawh ka hre chuang lo, ka be tawh lo hmak anga a ni mai tiin rilru ka siam bawk.

Ka nu pawisa lo thawn kha Inrinni bazar pahin ka va la chhuak a, ka la hmang phal rih lo thung. Ka nu pawh Message thawnin lawmthu ka han hrilh a, boruak chhe tak karah pangngai takin kan inbe leh thei ta chu a nia, ka pa erawh a lawm khawp mai. Pathianni chawhma ka inkhawm a, ka pum nuam lo vang bawk chuan tlai thlengin ka mu a, a tuk zing ka tho te chu ka hnungzang thlengin a na a, inchhung chet ngai nen mi ina awm chu damsam loh chang hian a hrehawm zual ṭhin, ka lakah an ṭha viau nain an mitmei a ven loh theih loh a, a nazawngin na pawh hi ka sawi ngai lo.

Nu Hlimi zing tho chuan "Eng nge i an, i pum chu a la na em?" a lo ti var a, "A la na riai riai reng a, damdawi mum chi ei ka duh, a tui ho hi ka ei hleithei lo" ka ti ve mai a, in Jection mai tura min tih chuan ka ngam lo nasa mai.

Saptheihnah tauh a eichak vangin kan siam dun a, chutih laichuan unaunu pawh a lo tho ve chiah a, zu ṭhing rim a namin ka hria, a nu hritlan lai a ni hlauh a, ni lo sela chu Nu Hlimi pawn a hre pha ngei ang. Dawhkan a rawn kil rual chuan "Badam hi lo rawt keh rawh, ka va inthiar lawk ange" tiin nu Hlimi chu a tho zui a, Unaunu chuan peih loh hmel deuhin a lo ban a, a han rawt te chu rawt keh hlau te pawh a ang zawk mah.

Dawhkana ka phone dah chu a rawn ri karh a, ka ban hmain min lo ban khalh pek a, chhuhsak ka tum lah chuan a lo dahsawn rang nasa mai. A duh ang a hmu aniang a ner chiam a, "In va han tenawm" tih pahin a  rawn theh phei rawk a, ka lo melh rum ve hrak.

Message chu "Lo leng rawh, Movie thar i en chak deuh kha ka nei ania, a ngaiah khan min lo nghak la, ka lo hruai ang che" tih hi Benja hnen aṭangin a ni. 

"In lo che khaw lo tawh ngawt ang a, college kal tur hian i chhuak nitin a, in lo fawr dun ṭhin a ni ngat mai" a sawi pahin a thil ken lai chu a chhuri bur bur a, chhan pawh ka tum buai duh lo, inhnial ka chak lo a ni.

"Khawiah nge in kal ṭhin a, hepa lah hi a free ropui si..." a nui deuh kar kar a, ka melh duh eih lo.

"I lo inphalrai vel ange aw, miten an sawi duh ngawt ang che..." a ngawi dat a, ka chhang lo chu a thinrim nge ni, "Zahthlak ngawt ang" ring fahran hian a ti a, ka kham lek lek tawh chu a ni.

"Rini, i rai palh a nge, in lo che duh anih pawhin invenna hmang rawh, Benja chhungten an duh loh phei che chuan i chan a chhe khawp ang" ka thinin a tuar ta lo, rum theihtawpin ka melh a, "I ṭawngtam khawp mai, tenawm zawk chu i rilru kha anih kha.." ka ti let zek a, kan inkar hre hawt si lo, mi a puh chhe mah mah a ni.

"I la thinrim zawk lehnghal a, Benja te chu nang aiin ka hrechiang ang, ka duhsak vang che anih chu, sawn pai la miin an nuihzat ngawt ang che, i nu a uire bawk si...uire fanu sawn pai tiin..." saptheihnah chuan a hmaiah ka vawm ṭhawt a, ka thinrim lutuk ka insehruh nasa mai, hmusitna ṭawngkam zawng zawnga dawn ka hlauh ber kha a rawn sawichhuak a, ka rilru a na a, ka thinur hluah hluah...

"I va han nasa reuh tak.." 

"Nang ang kha ka ni love, mi zawng zawng hi nang anga sihhnip turah ngai suh, Benja pawh nangman anih kha thlem hmasa, a mutpui duh loh vang chein i ṭhen anih kha, engmah hre loah min ngai..." ka sawi zo hman lo, ka chal a ri fawk a, ka rak ṭhawt nghe nghe...

A badam rawtna thir fawng chu chhuatah a tla ri bawl a, ka chal chu na tak a ni, ka khawih rual chuan thisen a rawn luang a, dawhkana a rawn far ka hmuh chuan ka chiai ruai mai, ka ṭap deuh pur a, hmanhmawh deuhin sitting room lam ka pan bawk. Darthlalanga ka va en chuan a lo pem thuk lem lo a, ka mit ko anih vangin a thi duh viau thung. Ka rilru no a rawn chhuak a, ka hnuk a ulh ṭun mai a, insum thei pawh ka awm lo, ka mittui a luang zung zung a, mahni inkhawngaihna hlirin ka khat, engati nge hrehawm tinreng hi ka tawrh bik le?

(End of chapter - 23)