BLUE BAYOU (CH - 24) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 24

"I thiam loh anih kha, khatiang khan min ṭawngkhum tawh reng reng suh" a ke pen thawm ka hria a, rei vak loah ka bulah lo dingin min lo thlek a, ka hawisawn rang khawp mai.

"I ṭawngkam chhiatzia kha i hria em, i u ka nih hi aw, mi zahna i nei miah lo, ka nu bulah te min lo hek ve ngawt a nge, i chak lo ang" a tih chuan a hmel pawh en duh loin ka kawrban chu ka pawt sauh sauh a, ka mitko thi chu ka hru mawlh mawlh a, a thip duh zek, a thi lah chu a la hnam ṭiam ṭiam a, a ser ang tih mawlh ka hlau.

"Khawmaw, ka lo en chhin ang" a rawn ti chu entir ka tum lo hle. Mahse, ka banah a rawn pawt sawka, min kuai her ta tho a, keichuan ka darthlalang ken ngawt chu ka la bih thung.

"A kak nasa pawh anih loh kha, damdawi ka lo hnawih ang" a tih chuan ka va melh hrawk a, a awmdan chu ka ngei zawng tak a ni, min hua anih chuan min hua angin awm mai rawh se, a dera ngaihsakna hi ka thlahlel lo.

"A ngai lo, ka ti ve thei" tih pahin darthlalang chu ka dah sawk sawk a, bangrel sanga pem thar damdawi chu ka han ban a, ka lakrualin min lo pawhthlaksak hmanhmawh a, kan inmelh no lo nasa mai. "Khawi.." ka ti pawr hlur a, "Ṭhu rawh, ka hnawih dawn che a lawm maw le" tih pah chuan lapua a la a, ka inhnawih tir lo tawp ang, kal mai ka tum chu ka kawr hnungah a rawn pawt a, "Titau vel lo mai teh" a tih rualin a kut chu ka lo vai sawn lawp a, ka kal nal nal bawk.

Ka pindanah lutin lapua ka zawng a, toner ka hnawih ṭhinna lapaw them chhete hi a lo la awm a, damdawi hnawih aiah hmai ka va phih bawrh bawrh a, a thi pawh a zia viau tawh, tuam luk tham law lawin min hliam sela ka ti, a inchhirna tham hliam a tling lo chu pawi ka ti mah zawk a ni.

Nu Hlimi ṭawng thawm ka hria a, "Keiman ka ti thei" ti a Unaunu ṭawng riin a zui bawk. Chhuak phei duh loin khumah ka ṭhu reng a, class kal pawh ka chak lo, ina awm phei chu ka chak lo hulhual a, khawiah emaw tlanbo daih ka duh. Rei fe pindana ka awm hnu chuan Nu Hlimin min lo au a, "Eng nge i tih, chawei kan siam dawn?" a rawn ti lang lang, "Chaw ka ei peih lo, min eisan ru" ka ti mai a, ka insiam zui bawk.

"A pum a ṭha lo riau mai, Pantop-in injection sela a ṭha ang" Nu Hlimin a tih ri te chu ka hrepha reng a, sana ka en chuan a la hma khawp mai. Bena message kha ka hrechhuak zawk a, "College-ah min lo lam rawh, lo kal hma ang che" tiin ka chhang let a, ka rilru a hel laklawh bawk a, U Lizzy huat zawnga awm chu ka chak tlat, runluih ka duh a ni mah ang chu.

Chaw an eikham deuh chauh tihah ka chhuak a, "Tiffin pai ta che" ti a nu Hlimin min biakna pawh chu chhang loin ka chhuak tlang a, taxi lain college lam ka pan nal nal bawk. 

Ka thlen chuan zirlai dang a la tlem khawp mai a, gate chhaka dawr teah ṭhuin ka lo nghak a, ka ṭhiante lo inzui thla pawh chu ka hmu reng nain ka au duh lo a, thil khaiin min hliah avangin anni chuan min hmu ve lem lo. Ka nghak ngat ngat a, a lo thleng har khawp mai, First period a zo hman mai dawnin ka hria. Ka call leh chu a chhang thei miah lo a, mood fuh loh sa nen thin a rim hlur tawh.

Sana chu ka bih sek a, dawr nghaktu lah chuan "Class i nei lo em ni?" a lo ti ve sek a, min ning nge mawni. Ka tho thut a, Benjamina chu ka nghak lo tawp ang ti rilru chungin Taxi stand lam ka pan a, kalna tur phei chu ka hre lo, ka thinrim ṭun a, tu chungah ber nge ka thinrim pawh ka hre lo,  ka thinrima hle tih chu ka hriat chhun a ni.

Taxi stand ka thleng chho ṭep tihah  Benjamina lo tlan thla nen kan intawk hlawl mai. Min tlanpelin a thlang deuha zawlah chuan a zuk inher a, mi lah chu a rawn en vung vung a, ankhum hrep mai te ka duh. Han koh ka tum laitak chuan a rawn tlan chho a, melh pawh ka melh ṭha duh lo. Ka bulah rawn dingin min rawn thlek leh chiam a, chuang rawh a tihna aniang a bike chu a rawn ti awn a, min be miah lo lehnghal. Ngawi rengin ka chuang a, kawngpui zawl ka thlen hnuah side glass aṭang chuan min rawn thlek a, ka lo ṭhu tum nasa khawp mai.  

 "Tinge in vengah min lo nghah mai loh?"

"Ka sawi peih lo, i thiam loh vek anih hi" a darah ka va nam salh a, min lo thlek leh vat.

"Ni Pawli ka va thlah hmasa a lawm, dar 9 chhoah hi chuan ka buai ve ṭhin a, inbual hmasak te pawh ka duh a" a ti a, ka thilsawi chu man lo tak a ni.

"Lizzy bulah engtin nge min lo sawi a, ka chungchang sawipui mahta che" ka vin deuh chiam mai.

"Chunu tak chu aw, sawi suh ka ti ve reng sia, hmeichhe ho hi chu in lo kam tam a ni" a ti bul bul a, U Lizzy khan a sawi dik a ni ngat mai, hepa hian min duh thu a lo hrilh tak tak a nih hmel.

"I van â tak, khatiang thil te han sawi reng reng, i rilru hi i thlak kual renga, nakin lawkah amah kha i duh leh awm tho sia, ka unau inkarah buaina i siam mai mai a ni"

"Ka rilru ka thlak kual reng reng lo aw, ka tawn hma che leh ka tawn hnu chein a danglam a ni mai, ṭhian nih i duh vangin i bulah phei chuan ka sawi ngai hleinem, phun phun lo teh, inngaihzawn i duh loh chuan kawm nuam deuh tal rawh" ka malah a rawn beng thlawp a, "Nilengin movie kan en dawn nia, eng nge chhunah i ei duh ang" a ti zui a, engmah ka chak lo, tih chak emaw eichak pawh ka nei chuang lo.

An veng kan thlen chuan dawr lian deuh kawtah a ding a, ka chhuk fel chiah chu ka ban a rawn vuan chawt a, min ti hamhaih lek lek. "I mitko kha a thi a nia, engtin nge i tih a?"a rawn tih chuan ka han khawih vat a, chhetein a huh a, kuta thisen kaitham pawh a awm lo, chutih rualin a na ngut ngut thunga, a vung deuhin ka hria.

"I tauh e law?!" a tih leh chuan ka tum nghal bur a, ka lungchhe leh riau tawh.

"Inah damdawi in kawl em, band aid emaw?"

Ka zawhna chhang lo chuan, "A kak em, khawmaw ka lo enchiang ang?" tih pahin ka bek tawn tawnah a rawn dawm a, hnai feah min rawn thlek zui a, a hmel aṭang chuan hliamna tak te pawh ka ang.

"A kak deuh anih hi, clinic-ah ka kal ila, damdawi kan hnawihtir dawn nia" a chek deuh tlat tlat a, clicnic a kal chu ka duh lo nasa mai, ni Pawlin mak min ti dawn lutuk tlat, nu Hlimi beng a thlen pawh ka hlau.

"Engtin nge i tih nat a?" a tih leh chuan "I bialnuin thlir tlangin min vawm a lawm" pawr fein ka ti a, a laka zep hi ka tum lem lo, engkim hi hre ve vek rawh se.

A hmel ka en chuan a nur deuh nang a, a awih lo em mawni...!?

"Hmarcha rawt fawngin min vawm, nangmah vang anih hi" ka ti leh kher. 

"Chunu mai mai chu, ka pizawn a awm lo em ni, vuaktir nek ta che" pawr zeta a tih chuan ka ka hau...!?

"I hahthlak e Benjamin, i Pizawn chuan min ṭan i ring em mawni, a hrim hrimin i bialnu bulah min duhthu i sawi a, a nu lah ka pizawn i ti tho a, ka hrethiam phak lo che aniang, i maksak em mai" beidawng fein ka melh a, rilru mumal pawh hi a nei loin ka hria.

"Ka pizawn a la ni tho a lawm.." nui chunga a ti leh chu ka lo melh tur khai a, ka ngaizawng ang tih pawh ka hlau zawk.

"Kal ang, mut mai mai ka chak tawh" tih leh inher ka rual a, dawrah ka luhsan nal nal. Chhun thingpui hmeh tur chhang leh chips te kan lei a, "In tur lam te i duh em, movie en paha ei tur te la rawh, i duh duh ka lei ang che" a ti zung zung a, fridge ka hawng tur te chu hmanhmawh tawk hian min lo hawn sak a, ice cream ka en dawn lahin min lo hawn khalh zel a, ka kalna lam apiangah min zui kual a, kan thil lei pawh a man a pe vek a, polythene ka khai pawh a phal lo, chutia a inla polite thut chu ka hrethiam lo khawp a, a uang zawk nge mawni!

In kan thlen hnuah pawh ṭhutna tur min kawhhmuh thlap a, min mut tir kher a la tum zui, an pindan aṭangin lukham lian deuh deuh hi a rawn la chhuak a, sofa ah chuan ka mutna tur chu a nawm hmel thei ang berin a siam a, ka duh loh chung chu min nem mu lehnghal a. A che vel chu makti deuhin ka en a ni ber,  "Eng nge i hriat?" bangbo fea ka tih chuan a nui ruh ruh a, ka ke hnuaiah lukham a rawn rawlh leh zat a,  choka lampana a kal te chu hrilhhai deuhin ka en liam a, a thawm ka ngaichang ran bawk.

A lo let leh chuan thei chi hrang hrang leh kan chips leite kha tray-ah a rawn chawi phei a, hepa hian min duat a tum a ni chiang mai, a ṭul ka ti lo nasa. "Puansin tur ka lo lak ang che aw" a ti zui a, phawk fein ka melh, a lum tehreng nen hian.

"A ngai lo, ka zung dawn" ti a thawh mai ka tum chu min lo nem mu leh rawp a, "Tho thut suh, i lu kha dim rawh" tih pahin ka darah a rawn dawm a, a muangchang thei ang ber hian min tung tho a, a tih dan chu ka mil hlawl lo.

"Kalsawn teh, i seat-ah va mu rawh" tiin ka melh rum khar khar. 

"Vawiin chu lei i rap lo ang, keimah vangin i na bawk sia, duat che ka ba tlat" a ti a, min pawm thawh a tum leh ta mai a, ka lo in dang chul.

"Kal teh kal teh, i ninawm cheng chung e..." a banah ka beng pawp a, chutah ka bulah lo ṭhuin ka sir tawn tawnah a rawn inbengkhalh run a, "Ka lung a awi lo hle mai" a ti bul deuh hmuk a.

"Engvang ngawt chuan?" ka lo ti pawr hlar thung.

"I mitko hi maw le" a ti daih, min hi danglel mai.

"I mit te lo fuh ta se ka lawm hauh lo ang, ka  pizawn hnena sawi tur a ni.." a tih chuan "A ṭul lo aw" ka ti chiam a, kan inmelh hnai hle tawh.

"Ngaihtuah i na tlat, in inah i him lo anih chuan..." a ngawi dat a, sawi lul lo teh se, ka duh miah lo.

"Benja, thutak deuhin ka hrilh ang che, min ngaizawng suh, buai ka peih lo" ka rilruah Lizzy a awm rauh rauh a, runluih kha ka chak viau nain Benjamina awm dan hian awm nuamin min siam lo, Lizzy runluih nan  chuan ani hi ka hmang thei lo ang, ka khawngaih leh dawn tih ka chiang.

"Kan buai loh nan i u pawh ka hrilh vek a lawm, kut te a lo thlak khanglang che a, ka lawm miah hleinem, ka duatlai an ti duhdah che ania" a ner zui sak a, sawitur pawh minti hre lo.

"I duatlai ka ni lo.." ka ti zawi sep a, a nui ringawt.

"Damdawi ka va zawng ange..." ti a a tho chu ka enzui reng a, pindan aṭangin "Tuilumin kan sil hmasa dawn em ni?" a rawn ti leh lang lang a, ka chhang let lo. A thei rawn chhawp chu ka ban a, apple da luap mai a ni, a tui hlawl lo.

Chutih laichuan center table-a a phone dah chu a rawn ri a, "I phone a ri ania?" ka va tih chuan, "Lo chhang mai" a rawn ti lauh a, ka ban ve mai bawk. Ka en chuan number hriat loh hnen aṭangin a ni. Ka lak rualin hmelchhe aw ka hre zui a, "Hello ka pu, ka lo tibuai lawk che, ina i awm lai a ni em, i thil chah a lo thleng leh tawh a" hmeichhe aw damdiai hian a rawn ti a.

"Bena chu a buai lawk a, khawi aṭangin nge aw?" ka tih chuan online shopping lam aṭangin a niawm e. "In in kawtah ka ding a, ka pu thil chah a lo thleng a" a rawn ti leh zat a, Benja chu ka au leh. Min chhan loh vang chuan "Ka lo chho ang, min lo nghak lawk rawh" tih leh thawh ka rual a, hmanhmawh deuhin kawt zawl lam ka pan a, ka han thlen chhoh chuan step bula scooty ding leh hmeichhe thau lam deuh lo ding hi ka han hmu a, percel pathum lai hi min lo pe a, engthil nge anih pawh ka hre lo, chu aimah chuan percel-a hming inziak chuan ka mit a la mah zawk!

'DR. BENJAMIN LALLAWMTLUANGA' tih hi hawrawppui ngatin a lo inziak a, hah...nuih tiza zawk hian..!

 

"Hei hi a ta tur a ni tak tak maw, midang nen i hriatpawlh em?" ka tih chuan nula chu a hmel a buai nak a, ka percel chu rawn bih velehin "A dik a lawm, Dr.Bena thil chah anih hi" a ti var a, "Aw anih ka ring, a buai rih a" te chu ka ti leh hnuhnawh. Chutih laichuan min rawn au a, "Damdawi chu ka hmu a nia, eng nge i han tih?" step hmawr aṭangin a rawn ti lang lang a, Dr.Benjamina mai mai chu aw....

Percel pawm chunga ka chhuk chu phur hmel fahran hian min lo laksak a, "Ka rin aiin a rawn thleng hma daih" tih pahin a kheh rawk rawk a, phone leh sunglass tih angreng a ni, a phone chah lah chu iphone man to zet mai a ni lehnghal a, sum hi chu kan inneih hleih deuh chu a ni.

"Doctor i lo ni reng a, ka lo hre ve miah lo" meinei fea ka tih chuan, "I hming bulah dah ve rawh, an be chhe ngam miah lo ang che, an polite thei teh ania" a ti sam et a, chhuatah ṭhu chungin phone chu a khawih pah mawlh mawlh reng.

Ka pum a nuam lo deuh bawk nen sofa-ah chuan ka mu leh a, a phone thar chu a khawih tui deuh bawk a, inbe loin kan awm chawrh chawrh a, ka lo muthilh lai pawh ka hre lo, ka harh leh chuan ka mit chung lam chu a mar deuh ṭanga, ka han khawih nak chuan band aid hi a lo inbel chhah luk a, a lapaw bel a lian bawk a, a pawng ṭulh mai.

"I harh tawh maw, i ril a ṭam em?" ka mutna sofa nghengin chhuatah a lo la ṭhu reng a, a phone a lo la buaipui ngar ngar chu niin.

"Eng nge i tih a?"

"Games ka khel mai mai, muhil leh rawh" min en lem lo a, a inkhel buai hle ringawt. Sana ka en chuan a la hma khawp mai a, muthilh leh pawh ka pawi ti lo. Mit ka chhing vang vang a, chutih laichuan ka phone a lo ri a, ka bag aṭangin a ni, Benja hma lawka center table-ah chuan ka dah a, ban tur ka tum laitaka, "Chu i android a ri" a rawn ti kher chu ka lo melh rum khawp.

Ka thawh dawn veleh bag chu a bana, mi pawh en hlei loin ka awmah a rawn nem bet chawt chawt a, phone ka phawrh chuan Mawitei a lo ni a, ka class kal loh chhan min zawh a tum aniang, call letin ka pum a nawm loh thu ka hrilh a, "Kimkimi nen kan lo present sak ang che, Education pawh i ai ka lo ṭhu dawn nia, lo inenkawl ṭha rawh, external exam a hnai tawh si" a rawn ti hlauh mai a, lawmthu ka lo hrilh ve mawlh mawlh.

"Eng nge kan eidawn?" ti a Benja ka zawh chuan, "Rom-a a lo kalmek, KFC ka chah" a ti liampuat a. 

"Tunge Rom-a chu?" 

"Ka ṭhianpa Jerome-a" 

"E he, kan pahnih chauha kan awm laiin tinge inleng neih i tum, min ngai dik lo ange?" ka ti hlut a, ka tho nghal sawk sawk.

"A ho lutuk, a ṭawngtam ve vak lo, ngaihkhata ngaih chi" a ti sam leh mai a, ka awm a nuam lo, midang kianga awm ka chak lo sa nen mipa pahnih bula awm phei chu ka chak lo lehzual.

"Ka haw daih dawn" a rawn hawi zawka, "I zak em ni a, engah mah a ngai teuh lo, zawh pawh min zawt lo ang" a ti leh mai a, nuam ka ti lo nasa.

Rei vak loah step-a lo pen thla thawm ka hria a, door bell a rawn ri zui zat a, "Kan kalh lo" ti a Benan a chhan hnuah khawngkhar chu a inhawng riai riai a, ka va thlek laichuan a rawn dak dek dek mai. Tlangval la naupang hmel ve tak ti ila kei aichuan a u deuh ang, a sam chu a dar chen velin a zuah a, a ngil siau a, a cherin a sang ṭha hle bawk.

"I lo lei em?" Benjan a tih chuan chhang loin choka lam a pan nul nul a, fridge a va hawngin ka hria.

"Lo be ve rawh, a zakzum ania" Benjan a tih chuan ka va thlek ṭha leh a, ka en laimek chuan tui bottle keng chungin a lo chhuak a, min hmu chu a lai nge ni a tawi deuh hrut a,  let leh mai a tum emaw tih tur hian a inher a, a let ta em lo. Kan lam a lo pan laipawh chuan a inthlahrun hmel khawp mai a, kei phei chu min melh duh mang lo.

A ṭhianpa bulah chuan lo ṭhuin "Khel ila" a rawn ti zat a, "Thil ei phawt ang" Benjan a tih vang chuan a thil rawn ken chu a phawrh sawk sawk a, ka awm ve chu mak a ti deuh aniang zawhna ngah hmel deuh hian a ṭhianpa chu a en leh ṭhin, "Rintei a nih hi, ka bialnu" pakhat lah chuan a lo ti pek a, "Ringawt a che" ka tih chuan a nui vur vur mai.

Ar bawp lian deuh chu min rawn pe a, "Ka college kal pui ṭhin anih hi" ka lam hawia a tih chuan ka bu ringawt a, chupa chuan a phone a bih melh melh a, min biak pawh a tum chuang lo.

"Kartawpah ka lo riak maithei, ka out thut maithei bawk" Benan a tih chuan "Inhnuai kan siam a, mutna a awm rih lo, Lza te inah phei zawk rawh" a lo ti ve vat a.

"Ka peih teuh lo, mi zalen duhin kan out ve a, Lza pi a dilchhut ropui si, a mut rei theih bawk si lo, zantirah an mu diak zel bawk si a, haw tlai pawh a inthlahrunawm" Benja chuan a ti nuah nuah a.

"Engati nge i out dawn?" a ṭhianpan a tih chuan "Tirhkoha ka hne maw le" pakhat chuan a ti hluk a, Joshua a sawina a nih hmel.

"Hmanniah a bialnu nen ka hmu a sin?" a ṭhianpa zawk a ni.

"Tu a bialnu maw?"

"Palian deuh, hmui sen thei deuh kha"

"Ramhlun nuthlawi, zu heh deuh kha a nih dawn chu"

"Kum 10 velin a upa zawk lo maw?"

"Upa daih ang, fa a neih theih tawh pawh ka ring lo, a ṭhiannu Siami kha a bialnu angin a rawn hruai ve ziah a, ka chhungte chuan a ṭhen tawh emaw an ti vek a lawm"

"Hepa hi a zei riau, mahni aia upa a chhaithlu thei tlat" jeromean a tih chuan "Khatiang te duh ila kan hmu ve ṭeuh ang chu, a hmeichhia zawk hian a thei tawhin ka ring, sawpa saw a virgin awm ve mai mai a ni" pakhat zawk chuan a lo tihsan a, mipain mi an rel lai ka vawikhat hriatna a ni, an nuihzatthlak ka ti.

"I bialnu tak tak maw..?" zawi fea Jeromean a tih chuan phone ka bih vat a, ka hre lo der a ni ber.

"Chhelo i ti em?" 

"Aw, Elizabethi kha engtin nge...?"

"Midang ka khek mai"

"I ṭhen tak tak maw?"

"Tak tak e, a thar ka neih leh tawh hi".

"I ti der leh a nge, Brendai leh Lz-an an nuihzat em che kha"

"Ngaihzawng dang ka nei tih i hrilh dawn nia" a nui kar kar a, ka chungchang a sawi tih ka chiang si, ka hre lo der ve laklawh bawk nen ka lo inhumruh ṭeuh a, ka thinrim ṭun mai.

Ar thla min lo pek a tum chu rum deuhin ka lo melh, "I duh nange" tiin a dang min rawn pek leh a tum a, a hrethiam hlawl lo a ang.

"I bialnu ka ni lo a nia" zawite chang zeta ka tih chuan "A ho lutuk, tikhan ngawi liam liam rawh" a ti reuh a, eng rilru nge maw a put ni, a uan hmel ropui si.

Thil kan eizawh chuan games an khel zui a, an bengchheng lutuka ka muhil thei mai lo. Ka inlet sek a, a khat tawkin ka va melhrum leh ṭhin, ka awmdan chu a hrethiam ve a ni chek ang "Chokaah phei teh ang, a nuamsam lo a, muhil rawh se" tiin a ṭhianpa chu a sawm a, Jeromea chu a tho rang khawp, an kal ta emaw ka tih hnuah puan min rawn sin tir hlun a, min thlek tih ka hriat vangin ka meng duh lo.

A kalsawn hnu chuan a pen thawm chu ka ngaithla reng a, "In nihna a rei tawh em, i van sawi ngai lo ve?" Jeromean a tih ri chu ka hre pha.

"A la pangngai chiah lo, hnemtu a mamawh a, keiin bialnu, chutiang vel chu a ni" pakhat chuan a ti sam et a, "I lerh ang ai hian i la na thei si a, ngaihzawng te hi nei ve sek lo teh, nangmah zawk hi hnem i ngai leh ang" a ṭhianpan a tih chuan an nui hawk hawk a, chumi hnua an inkhel thawm te pawh chu ka la ngaithla reng a, ka muhil har lem lo.

Ka harh chuan khawpui a ri dur dur a, khua a dur nge ni a thim deuh khuih mai, bathlar lam aṭang chuan thli a rawn thaw lut heuh heuh a, a vawt surh mai bawk. Benjamina lah chu ka ke pawm chungin a lo mu sawi bam a, engtia chutianga han mut reng reng, minti hrilhhai zawk a lawm maw le,  ka ke lah chu a pawm bet tlat a, ka che thei der lo.

Thawm dimfein ka inbengkang a, a ban dahsawn tuma ka va ban chiah chu a rawn rûm ta ṭuah ṭuah a, a ṭap emaw ka ti hman! Makti fea ka en laichuan a mit chu meng tur ang deuh hian a che det det a, a rûm leh ṭhin.

Mangṭha lo nei a ang ka ti, rang deuhin a banah ka vuan a, ka sawi nghal nawk nawk a, a rawn meng chu phawk lutuk tak mai hian min en a, ka ke pawh a thehkang nghal lawp mai, keilah ka lo phu nasa ve bawk nen ka rak ṭhawt a, ka ti hlauthawng ngang aniang a awm dawmin a thaw hluam hluam mai.

"Eng nge a, khati teh vaka i rawn men a?" min chhan mai lo vang chuan ka va thlek hnai a, "Maimi ho a niang" a ti ringawt.

"Mangchhia i nei a ni maw?" ka tih leh chuan, "Ka harh reng, ka bia che a, min hre thei lo anih kha, i tei i tei a, min ngaihsak vat tur che a lawm" a tih chuan ka bo hle ringawt.

"Ka muhila ka harh ve chiah a lawm, i mut dan a rem lo lutuk a nih kha, ṭhutthleng dangah te sawn mu ve mai ta che" ka ti vin khar khar a, "I puan i leng thla zel a, ka vil che a lawm maw le, i mangchhe ropui si" a ti bul bul a, a bula tui bottle chu banin a in nghal khawlh khawlh a, a ṭhianpa kha a haw tawh em mawni.

"Khawiah nge i ṭhianpa kha?"

"A haw na a rei tawh" sana ka en vat a, chawhnu dar 2 chiah chiah a ni, khua lah chu a dur nasa khawp mai a, ruah a rawn sur har lo tawp ang.

"A sur nasa angem le, ka la haw thlen hman i ring em?" 

"I thleng hman tawh lo ang, mu leh rih la, a han veleh ka thlah dawn che nia.."

"Thlah kher pawh ka ngai lo, i ni lo haw hma a haw ka duh" min rawn melh ralh a, "Eng nge i zah, a hre vek tho a lawm" a tih chuan phawk fahranin ka melh a, engkim hi a sawi tawl tawl mai a, hepa hi a buaithlak riau.

"Ti nge i lo hrilh leh pek a, a rukin ka lo kal a sin, awii...ka chhungte beng a thlen vaih chuan aw, ka rawn kal thei tawh lo nghal a ni mai"

"Engtin nge a hriat loh ang, a beer dahṭhat kan in zo zel a lawm, ani lakah inthlahrun a ngai lo, i chhungte bulah engmah a sawi ngai loh kha, hlauthawng duh suh" ka puan chu min rawn sin ṭhattir zui a, "Ka tho dawn, ka mut pawh a chhuak tawh lo" ka ti nain ka la mu reng lawi a, ruah a rawn tla ṭan der tawh.

Bathlar lamah chhuakin puan pho a va seng a, "A thim i ti em?" a tih chuan current on turin ka lo hrilh ve zat a, on a han tum chuan current a lo awm lo.

"Inverter in nei lo em ni?"

"Nei a; mahse, a thim hian a nuam zawk" tih leh pahin bathlar kawngkhar chu a kalh leh sawk sawk a, chumi hnuah pindan lamah a lut zui a, a vawt deuh bawk nen ka insin ṭha ve sauh sauh a, ruah sur laia mut hi nuam ka ti ṭhin a, khawpui ri te hian mut a ti tui zualin ka hre ṭhin.

Benja lo let leh chuan lukham a rawn pawm chhuak a, ka piah ah chuan a mu ve mai dawn emaw tih laiin ka mutna lam a rawn pan a, "Tawlh phei rawh" a ti mauh mai a, ka lo melh phawk nasa mai.

"Eng nge rawn mut i tum ngawt, a dangah sawn va mu rawh" pawr fea ka tih chuan "A vawt a lawm maw le" a ti pawr ve hlur a, rawn inthawlh a tum nghal ringawt.

"Benjamin...!?"

"Tawlh rawh"

"I bulah ka mu duh teuh lo, kal teh" a rawn mu chu ka kiuin ka lo nghawk sawk a, ka nek nasa mai bawk, ani lah chu a lo ṭang ve tlat a; mahse, a sira mu zawk anih vangin ka nek tla tho. 

Tum bur chungin ka ke lamah bawk chuan a va ṭhu leh a, rum theihtawpa ka melh chu a hrethiam lo der aniang ka ke chu la kangin a mal chungah a dah a, ka puan sin laichuan a invur hlun a, ka ke chu laksawn theih pawh a ni lo, a pawm bet ṭang ṭang mai.

"Thlah teh..." ka ti chung pawhin a thlah duh hlek lo.

Rei dawn chu chutiang chuan kan awm a, inbe loin phone kan khawih ve ve bawk. Pawn lamah chuan ruah a sur buan buan a, signal a chhe bawk si a, online hleihtheih pawh a ni lo. Benja lam ka va en chuan phone a lo bih ngar ngar a, ka ke chu a thlah dul tak avangin ka la sawn ve vat a, ka inlet fel awrh tihah a rawn che hrut a, engmah pawh ka sawi hman lo ka bulah a rawn mu fel der.

"Ka va han sil em em" tih pahin puan a rawn sin ṭha sawt sawt a, min hnungchhawn zui zat bawk.

"A chep em hi maw le, a dangah sawn mu ve mai la"

"Kan in ania, ka duh duhna ah ka mu ang" ka lehhawi zawk a, min hnungchhawn zawngin zial a zu hlat hlat a, a ni a lo haw thut ang tih ka hlau, kawngkharpui a kalh awm ka hre miah lo leh nghal.

"Kawngkhar i kalh em?"

"Kalh nang"

"Va kalh rawh"

"Eng atan?"

"Va kalh la a ni mai, mi an lo lut ang"

"Ruah a sur nasat em hi, tumah an lo kal lo ang"

"Va kalh rawh, va kalh phawt la i lo mu leh dawn nia" a hnungah ka nam dawt dawt a, peih loh hmel fahrana thoin kawngkhar lam  a pan a, a lo let leh hmain ka mu ṭha sawk sawk. A rawn let leh chuan a mutna tur awl awm lo khawpin ka lo mu dar dar a, a hahthlakzia chu aw....Ka bul a rawn thlen rualin bang lamah min nam bet rawk rawk a, a rawn mu lui leh ta tho.

"I ninawm e, eng nge i hriat?" 

"Ka pawngsual zawk dawn che mawni le, mi te chu i hlau der vel ah, tehchai che hian" a ti vin hluk a, ka lam hawia a mut vangin ka inlet ngam lo reng reng. Ka hlau miah lo a; mahse, ka awm a nuam lo hle a ni.

"I kut kha la sawn rawh, min rawn kuah reng reng..." ka sawi zo hman lo ka kawngah nghet fein a rawn kuah a, "Tawlh phei rawh" ka tih leh rualin "Titi mai mai ang" tih leh min khan a rual a, thawhsan tum pawhin tha kan inngah hleih em a, ka chesawn thei hlek lo.

"I bialpa kha...eng lo.."

"Eng nge?"

"Infawh a zei em?"

"Chutiang ka hrilh dawn teuh lo che" a nui huk a, "Min hlau e law, i va ho tak e aw, i mu dawrh suah chung pawhin ka khawih hleinem che, min hlau khanglang lo teh" a tia, ka lo ip ru nasa, ka muhil kha min lo en reng aniang, ka mu duh dah thei nasa mai si a, ka zak ru ram ram.

"Ka hlau lo che, i fel tih ka hria a lawm" ka tih chuan a ngawi daih.

Min chhang dawn lo emaw ka tih hnuah, "Min hlauhtlawn a nih kha" a rawn ti a, ka lo ner nak.

"Ka phuar hlawm che anga, ka khumah ka va suasam dawn che em mawni le, hrui kan nei em aw" a la ti zui a, a uang tih ka hre chungin ka ngei tawk a tling khawp mai.

"Rak rak suh, ka tlawh thlak i duh loh chuan mu ngawi hle hle rawh" 

"Ka ngawi hle hle peih lo, titi ang"

"Engmah sawipui tur che ka hre lo"

"Kan chungchang hi sawi ang"

"Eng kan chungchang maw?" a lama inher ka tum rualin a lo tawlhphei ve vat a, inhmatawnin kan in en ran tawh.

"I u chu tlang deuhin ka hrilh a, ngaihdam ka dil bawk a, huat tur engmah ka sawi lo, min duh vak lo bawk a, hrehawm a tih pawh ka ring lem lova" a tih laia a hmel chu a thu tak viau mai.

"Ka tih tir cheah a ngai a, ka lêm hmasa cheah a ngai bawk, tunah chuan a duh tawh che a, kan inkawm pawh hi a ngaithei lo sa a, i thil hrilh chuan a ti thinrim viau ang" ka tih chuan ka mitah min en ran a, buaina thleng thei chu kan hre ve ve a ni.

"I hlau em?" a tih chuan chhan ngaihna ka hre lo.

"Hlau miah suh aw, ka chhan tlat ang che, tih theih chu ka ngah lo maithei a; mahse, ka chhan zel ang che, i tan chuan do ngam loh ka nei lo ania, i tan anih phawt chuan ka pizawn thleng pawhin ka do mai ang" tiin a nui suk suk a, engvanga hetiang thu hi sawipui nge maw ka nih le.

"Mahse, ka ngaizawng hleinem che, engtin mah kan awm dawn lo, kan inkawp pawh a ni lo va, chutiang buaina a awm lo ang" a mitah tak enchunga ka tih chuan, "Ka duh che ka tih kha, ka ti mai mai lo ania, nangpawn min duh let rawh, i hlim angem chu ka hre lo nain tuna i awmdan ai hi chuan nuam i ti zawk ang, ka duat viau ang che" a mitmeng chu a nung sar a, min sawm nge min thlem zawk le, ka rilru a buai nak a, ngaihtuahna a thui duh hle bawk.

"Duh dang ka nei a lawm" ka aw chu zawi tak a ni.

"A pawi hleinem, ka bialnu ni tawp rawh, khapa kha theihnghilh rawh pawh ka ti lo, a rei anga i hrethiam ve mai anga, ani bula i awm ai khan ka bulah hian i hlim zawk dawn tih ka chiang, i hriat hunah min duh chauh la a ṭha zawk ang, ka tan pawh a fair zawk dawn a" ka sam chu rawn hui kiangin dimtein ka bengah a zep a, a thil sawi apiang mai chuan ngaihtuahna a ti thui a, zawhna ka inzawt ru mawlh mawlh mai.

Ka bula ka hlimzia chu phat theih a ni lo, chumai ni loin ka thla a muang ṭhin, ka nun hahthlak leh ninawm tak lak aṭanga ka tlanbona ṭhin, ka hahchawlhna a ni, chu chu amah ngei pawh hian a hria, 'Tuna i awmdan aihian nuam i ti zawk ang' a tih pawh chu awih loh a har khawp mai, a chhan chu ka ringhlel bik lo a tin a ni, ka ngaina a, duhna rilru pu lo mahila a bula ka hlimzia erawh ka hre chiang si a ni.

"Tinge min duh a, kan inhriattirhin min duh miah lo a, engtin nge min duh thut theih?"

"Min ngaipawimawh vangin ka ngaipawimawh che" a ti tlawng a, ka zawhna leh a chhanna chu a inpersan hlein ka hria.

"I duhzawng ka niin i hria em ni?" ka ti leh a, a lo bu nghat nghat.

"U Lizzy chu i duh tawh lo tak tak a maw, ka hmangaih i ti sia, i rilru i thlak hma ka ti" ka sawi zawh rual rualin "Ka hmangaih ṭhin a lawm; mahse, ka beidawng tawh, min duh chhan chu i hriat ve reng kha" a ti a, ni e..mi â chauh lo chuan a hai lo ang, a fing ve tlat.

"Nia, i rangkachak khur a duh a" ka tih chuan a nui suk a, keipawh ka nui ve tho. Dimtein ka biang a rawn dawm leh a, a rawn kun hnai riai riai a, a thil tih tum ka hriat vangin ka thlesawn vat thung.

"Hetiang chu ka duh lo ania, midang duh ka nei ka tih tawh kha" zawitea tiin inchung lam ka melh daih a, a tum lui bik lo.

"Kan duh deuh ten min duh let loh hian a hrehawm ti raw; mahse, kan han beidawn chiah hian a lo atthlak zia kan hre chauh zel, nangpawh i beidawn hunah chuan i hun khawral te kha i ui zawk ang, ka tih hnu i rawn ti ve mek anih hi" a ti zawi deuh sup a, ka chhang let lo; mahse, ka beidawng ṭan mek a, chu mai ni loin beisei engmah ka nei tawh lo, ka chhungrila khawharnain min la hneh em a, rilru dang ka pu thei rih lo a ni.

Dar thum pelhah ruah chu a han a, kan veng kawn thlengin min va thlah a, in ka thlen chuan tumah an lo awm lo a, ka inthlak hnuah eirawng ka bawl zung zung bawk. U Lizzy lo thlen chuan chaw ka lo chhuang tawh a, min be lem lo nain min enchik khawp mai. Ka be duh bik lo a, a inthlahrung nge ni engmah sawi loin a pindan lamah a inthiar fihlim hmak a, kei erawh ngaihtuahna kawmin rilru ka seng buai khawp mai.

Zanah chuan Benjamina nen message kan inthawn a, beer lak a tum a, ka duh ve em tih ang reng min lo zawt a, a ni Pawli hian excise lam ah ṭhian a nei a, wine leh beer te hi an kawl deuh reng, beer phei hi chu an fridge-ah an dah mai zel a, thil sualah pawh an ngai ve vak lo, chuvang ania keipawn an ina va in hi ka pawiti lem lo a, pawn lama in aichuan a ṭha zawkin ka hria.

A tuk class ka kal chu chhun chawlh laiin min lo phone a, "Gate chhakah ka awm" a tih vangin ka han tlan chho vat a, beisei loh deuhin tiffin min lo pe a, "Ni Mary te nupa an lo leng a, kan eibang ka lo ken che" a tih chuan sawi tur pawh ka hre lo, a thil min pek chu Rice leh soup a ni a, a tui hmel viau bawk.

"Canteen-ah i lo chhuk duh em?" ka tih chuan "Duh lo mai, let leh vat ka ngai" tiin min let san leh mai a, a chet dan chuan eng emaw ti zawng takin min hneh a, nuam ka ti ve takzet.

Canteen ka thlen thlak hnuah ka ṭhiante ka va zawm a, tiffin ka han hawng chu "Khawi a mi nge, i siam em ni?" Mawitein a lo ti vat a, ka dawn tih chu ka hrilh duh lem lo. "Ei ho ang u" ka tih chuan an phur khawp mai, a, buh duh tih takah Mawitei phei chuan a ei hnem khawp mai.

Chumi tlaia ka haw chuan Nu Hlimi a lo thleng tawh a, ei a lo rel mek a ni. Ka thlen hnu rei vak loah unaunu pawh a lo thleng a, ka insuk hlanin an nufa chuan eirawng an bawl a, maian hih paha an titi chu ka hre pha ve reng bawk. U Lizzy ṭhiannu Muani chungchang an sawi a, pasal a nei dawn a ni awm e.

"A la naupang angreng sia, college zo phawt sela a va ṭha ve, a rai lawk em ni a?" Nu Hlimin a tih chuan, "Rai lo e, a bialpa nen an inkawpna a rei ve tawh a, bakah a bialpain hna nghet a nei a, a chawm zo dawn tho a lawm" Unaunu chuan a ti a.

"Hna nghet a neih chuan zia tak a awm chu, tunlai mi hi chu naupang te tein pasal an nei hlawm a, an nula tlangval hman meuh tawh hlawm lo" Nu Hlimin a ti nuah nuah a. "Keipawh college ka zawh hunah pasal ka nei ve daih ang, fa neih hma a, chhungkaw hung deuh nih ka chak, chhungkaw lian deuh a mi pasal ka zawng dawn" Unaunuin a  tih chuan, "Pauline te chhung chu an hung a lawm" nu Hlimin a lo ti zauh a, unaunu nui hak hak riin a zui bawk.

"Bena hi i iai tawh loin ka hria?" unaunu a ni.

"Aa...amah hrim hrim te hi chu awhawm tak a ni lo a, sual phei chu a sual lo nain a puitling lo ve em mai a; mahse, a chhungte an fel em a, mi puitling kara khawsa chu ngaih a ṭha ve deuh a lawm" a nu chuan a ti thung a, "Nei dawn ta ila i phal tihna a ni em?" unaunuin a tih chuan, "Kan la ngaihtuah ang chu" tiin a chhang a, chutih laia ka va chhuak chu unaunu chuan min lo melh ralh ralh a, a mitmeng aṭang chuan ka hrethiam ve vek a, min ti el na mai mai a ni.

Insuk ka zar laimekin Benjamina chuan min lo call a, kawt lamah pheiin a call chu ka chhang a, "Ka chaw chhun pek che chu a tui em, engmah i la rawn sawi lo ania, lawmthu pawh i sawi lo" uang fein a rawn ti a, ka lo nui hak.

"Ka ṭhianten an ei zo vek, tlemte bak ka ei lo" ka ti chu "Engah nge i eitir, i tana ka lo ken anih kha" a lo ti pawr hlur mai.

"Eng nge i tih a?" a rawn tih leh takah chuan ka insuk zawh chiah thu ka hrilh a, "Ka pizawn te an awm em?" a rawn ti leh chu ka helh deuh tlat.

"Awm, i pizawn a nihna ka hre miah lo ania, a fanu i hnar a ni lawm ni" ka lo ti khawl a, an thilsawi ka hre zo chiah nen Benjamina nui ri te chu ka ngei lek lek.

"Ka pizawn a la ni tho a lawm, i nu a nia, an inah i awm bawk si a" a tih chuan ka danglel.

"Zanah kan inbe dawn nia" tiin Phone chu ka dah daih a, minti lai dawn dawn mai.

Zan lamah ruah a tla cherh cherh a, ka lungleng chu tukverh bulah ṭhuin pawnlam ka thlir a, ngaih ber hre loin ka khua a har em em ringawt. Phone ka en chuan Awmpuian status a lo nei a, vawiin lama an hun hmanna leh park vela an lenna te a ni, a thlalak hoah chuan Noeli leh Sangtei an lang ve zel a, ral aṭanga thlalak lo en mai mai pawh chu nuam ka ti lo. 

Benja ka va text a, "Eng nge i tih?" tih tlawng chu ka thawn a, min lo call nghal zat.

"I message ka lo chang a" a rawn ti hmasa ber.

"Min biak duh te chuan lo text mai ta che, chan kher a ngai hleinem" ka ti chu, "Hmeichhe chuan kan hne hma i tih vang khan ka insum ve anih hi, a ngaihawm tawk leka awm ka tum" a lo ti ve ngei a, U Lizzy laka awm dan tur ka hrilh kha ka lakah a lo apply chu niin, a va han rem hre mai mai, ngeiawm zawk hian a..

"Awmdan tur min hrilh ho kha i duhzawng aniang chu ka ti; mahse, duhkhawp hmuh a har hle mai, i induh ve hlarh hlarh si a, ka zawm thei dawn loin ka hria" a nui deuh kar kar a, "Ka induh pawh ka hre lo, Lizzy'n a awmkhum dan che leh ka awmdan te chu a in ang lo ve e...." ka ti a, a laka ka awmdan leh Unaunu awmdan kha chu inpersan ve tak a ni, min duh tih ka hriat hnuah pawh ka be chhe ve ngai lo a, kan la innel em em chu a nia, hetianga inlaichinna neih hi Awmpuia lakah ka lo experience tawh a, kan rilru puthmang dahṭhat a, pangngai taka inkawm hi ka tan thil har a ni lo.

"Ka hria a lawm, nang chu a letin i ṭha fe zawk, chuvang ania ka duh deuh bur tawh che ni..." ka lo nui ve hak a, "Ka ngai che ania, invengah ruah a sur ve em, inkuaha mut leh mai mai kha ka chak" a rawn tih chuan ka zak ru ram ram.

"I chak ve em?" a la rawn ti zui a, min biak dan ṭhin hi chu.

"Chak lo..i sawi ho em mai a?" 

"Keichu ka chak, i pangtilum nem deuh kha ka ngai leh tawh..." ka ṭim uai thei, a va han ngampa mai mai; mahse, ka haw miah lo chu mak ka ti, midang nisela chu ka huat dawn tehlul nen...

Naktuk lama a tih tur te ka zawt a, a hman lutuk leh hunawl a ngah lutuk hian minti thatchhe ve zel a, amah vang hian class pawh ka ṭhulh zing tawh. Games khelh tur min hrilh a, inzirtir pahin kan khel dun a, kan inbe zankhua deuh thaw mai, ka mut ve meuh chuan zing lam dar 3 a lo pel duai tawh. 

Ka harh leh rualin a message ka dawng em tih ka ngaihven hmasa ber a, engmah a awm lo. Keimah zawk chuan Morning wish ka va thawn a, college ka thlen hnuah min lo chhang let chauh a, a tho ve chiah a nih hmel. Message kan inthawn deuh reng a, kan chaw chhun thlalakte kan inthawn a, a Gym kalna thlengin min lo hmuh a, a message a lo thlen har deuh chuan eng nge a tih ngaihtuahin ka rilru a buai hman ṭhin.

Kartluanin chutiang chu ka ni hman dan a ni, kan inbe tam telh telh a, ka ngaina zual telh telh bawk, zan lama min lo biak loh phei chuan ka ngai riau zel a, kan inbiak loh  chhungin ka khua a har hman ṭhin. A message a lo thlen tawh hi chuan thildang tih ṭhulhin ka en hmasa ziah a, han vui der ve dawn hian min lo thlem thuai thuai a, min ti nui leh nge nge zel, ani biak hi chu sawi hreh leh tim a awm lo a, ka ṭhiante laka ka lungawi lohna te pawh ka thlen mai zel a, ka rilru chhia zawng zawng pawh ka lantir ngam ṭhin, ani lah chuan min lo ṭan thei em em khawp a, ṭawngkam a han neih tawh hi chuan ka dam sawng sawngin ka hre ṭhin, a mak a ni, heti em em a kan mizia a inmil hi ka lo ring ngai lo a, kan inmil mah mah ni tein ka hria, thilsualah pawh kan inthurual thei tlat.

Inrinniah percel ka dawng nawlh Dr.Benjaminan min lo chahsak a ni. Mahse, percel chu u Lizzyn a lo hawng hmasa a, Hoodie nalh deuh mai a hmuh ruala a hmel chuan awm a ti nuam lo takzet. Nu Hlimi lo kal ka hmuh rual chuan lehkha inbel chu ka pawtthla hlawk a, ka thukru rang hle bawk.

"Kawr i chah e law, a va mawi ve, eng aṭangin nge i chah a?" a lo ti zung zung a, "Amazon aṭangin, ka va ha chhin ange" tih leh kawr chu lak ka rual a, Unaunu chuan min melh rum khawp mai.

Pindana ka luh hnuah Benja chu call ka tum a, a chhang thei miah lo, Gym a kal anih ka ring. Chutih laichuan ka pindan kawngkhar chu a rawn ri dat a, Lizzy hmel a rawn lang zui zat bawk. "Ka rindan tawk vel, hetiang i beisei vang hi tiraw.." a tih chuan ka ner nasa mai, a duh duh hian min puh a.

"Nang ang ka ni lo ka tih kha..." ka melh let ve ngar a, "A duh rei tak tak dawn lo che, a lerh zia ka hriat vang a lawm ka hnawl char char ṭhin.." ka lo nui hak.

"A nih chu maw le, i hnawl tawh bawk a, i thik lo ang chu.." ka ti zauh a, a nui duh tawh miah lo. 

"Midang a neihsan leh vat tho ang che, intihtheih pui vak duh suh" tih pahin a inher nghat a, a chhuak chu nuihzat deuhin ka thlir a, nuam ka ti nasa, min thik tih ka hria, a hma chuan thil ṭha engkim a neih vangin a nun dan hi ka awt ṭhin, tunah erawh min thik a, ka dinhmun hi a awt tih ka hai lo, chu vang chuan nuam ka ti takzet.

Percel ka dawn thu chu hrilh ka tum a, zan thleng pawhin ka be thei lo, a phone chu a ri a, a chhang thei chuang si lo a, ngaih te pawh a ṭha lo rum rum tawh. Zan rei deuh thlengin ka nghak a, ka message thawn pawh a en thei lo reng reng. A tuk Pathianniah chuan inkhawm ban hnuah a message ka dawng ta hram a, "Min lo ngai em?" tih zawng a ni.

"Ti nge i biak theih miah loh?" 

"Min ngai em?" teh ringawt a.

"Nizan aṭangin biak che ka tum nasa lutuk, eng nge i tih a?"

"Ka chhang duh lo lui anih kha" a rawn ti pek a, ka sa zak.

"Engvangin maw i chhan duh loh a, min be peih lo a ni maw?" phone chu ka hmet sawk sawk tawh.

"Min vei telh telh la ka duh vang maw le, i tactic min hrilh kha a nih hi, kawr chu a mawi em?" a rawn ti a, mai mai chuan a, khang ka thil hrilh te kha U Lizzy lakah chuan engmah a thawk lo pawh a ni thei, ka lakah erawh thawk nasa tak a ni, awm nuamin min awm tir thei hleinem maw le.

"Vawikhatmah ka sawi ang khan awm tawh suh, Lizzy ka ni lo a nia, mipa induh hi ka ngaina ve lo, englai pawha ka biak theih ka duh, min pehhel der leh anih chuan ka be tawh lo ang che" tiin ka vau nasa mai.

Message chu a rawn chhang lawk lo a, a en reng tawh thung. A ti leh dawn anih hi ka tih rilruk laimekin a rawn type a, "Ka induh lo ang, ka pehhel lo ang che, Sorry" emoji mittui far fap lem hi a lo thawn tel a, ka lungawi chawpchilh ve mai bawk a, ani lakah hi chuan a thinrim rei theih loh reng reng.

"Zanah ka lo kal ang?" a ti chu ka lo hnial vat a, keimah vanga lo kal tum anih chuan lo kal lo sela ka duh, phone-a inbiak hi a tawk viauin ka hria.

"Gate bulah lo awm la, i hmel ka rawn hmu zuai anga, ka haw leh mai dawn a lawm" tiin min dil lui tlat a, class ka ṭhulh hreh tawh a, chhunah ka hmu thei dawn lova tiin "Zan reiah aw, midang men laichuan lo kal suh" ka ti ta hram a, min lo hnial bik lo.

Zan dang aiin ka chhungte chu an meng rei deuh a, an mut fel meuh chuan dar 11 a ri tawh, an muthilh hun ka nghak leh te te a, chumi hnua Benja chu ka call ta chauh a, a rawn chhan rualin "Gate bulah ka awm tawh" a ti hem mai a, engtia rei nge a lo awm hman ni.

Hmanhmawh deuhin ka va chhuak a, "Ka hman rei lo, ruah a sur leh ṭep tawh hi, ruah sur hmain haw leh vat rawh" a bul ka thlen rualin ka ti zung zung.

"Gate lo hawng teh" a tih chuan, "Lo lut lo zawk rawh, ruahin a nan hman ang che" ka ti leh zat a, a lungawi lo khawp mai.

"I hmel ka en chiang duh a lawm, anih lo ding hnai tal rawh" tih pahin amah chu a rawn ding hnai a, keipawh chu ka kalhnai ve mai a, thir gate karah chuan a kut rawn zen lutin ka ban a rawn vuan a, min pawt hnai sauh a, ka han enchian takah chuan a biang chu a vung deuhin ka hria.

"Ti nge i biang kha, a sen ṭul a nia?" ka tih chuan a ṭhen sak a, a hmel chu a dik zan lo, thinrim hmel a pu.

"Mi nen in insual em ni?"

"Mi a ni lo, Joshua maw le" a tih chuan, "Engtizia nge?" ka ti hluai a.

"Putea pawisa a bo a, mi a puh khanglang a lawm maw le" a ti bul hmuk a, a va han zia lo thei.

"I putean a hau che em ni?" ka ti leh erawh lu min thin khum a, "Tuman min hau lo, Joshua dakthei lutuk saw chu ka la khawih leh ang" a ti a, a ner nang bawk.

"In inah haw tawh mai rawh, ruah a sur dawn lehnghal a, haw vat rawh"

"Ka haw dawn a lawm, ka thinrim a reh thei lo, min lo thawidam phawt teh" a nui deuh sang a, keilah chuan tih ngaihna ka hre lo khawp mai. "Ka thawidam thiam hleinem che" ka ti zo chiah chu ka darah a rawn man a, gate si deuh thaw chuan min pawt hnai a, chutah ka tukkhumah rawn dawmin min pawt hnai leh salh a, thir gate kar aṭang chuan ka hmui a rawn fawp chawt mai!

Chet lawk nachang pawh ka hre lo, ka hriatchhuah ruala tawlhsawn ka tum chu min lo vuan bet tlat a, min fawp uar sauh a, ka dawh mawl tawp a ni ber.

A duhtawk a ngah hnu chuan min thlah hlawk a, "Lut tawh rawh le, ka haw dawn.." tih leh inher a rual a, a bike ah lawnin a tlan nghal daih a, minti hrilhhai takzet.

Khuma ka mut hnu thlengin ka ngaihtuahna a luah a, ka hmui chu ka han khawih leh ringawt ṭhin, ka thinphu te chu a mumal lo, min la ṭhawng takzet. Heti hian kan inngaizawng tihna a ni mai em, inngaizawng te tih tur kan ti a, kan inbiak danah pawh danglam a awm chuang lo, min duhthu a sawi a, a bialnuah min siam ringawt em ni, anih kei ve hi, engati nge hetiang hian ka awm, ka duh ve reng em ni ang?

Ka message tone a rik rualin phone chu ka en vat a, "Ka thleng e, min ngei phah em?" a rawn ti leh tawp a, ka ngei lo tih chu chiang tak ka ni, ka zep bik lo ang. A message chu "Ngei lo" tih zawngin ka chhang a.

A tuk aṭang chuan kan inbiak dan pawh a dang hle tawh ti ila a dik ang, inngaizawng diktak kan ni, ka thiltih hi min zawt peih khawp a, nuam ka ti ṭhin, min ngaihtuah reng tih ka hriat vang a ni. Inbiak hun bik kan nei lo a, ka phone ka en hi chuan a message a lo awm hman ngei ngei a, class lak lai pawhin phone ka bih deuh reng mai a ni.

Nilainiah Cultural club zin te pawh an lo haw a, a tukah college an lo kal nghal a, classroom-a Awmpuia lo lut chu Noeli te ṭhian hoin an lo zui bawk. Awmpuia chuan ka lam rawn panin a thilkhai chu min rawn pe a, ka en hma hmain Kimkimin a lo chuh a, a han hawn chuan kurta sen duk nalh deuh mai a ni.  "Pa-a chu, i nu ta tur emaw kan tih khan Nu-i ta tur zawk a ni maw, i thlang uluk ka ti reng a ni" Zothanan a lo tih chuan Awmpuia chu a nui ve suk suk a, "Ka lawm e aw" ka tih chuan a bu nghat, midang ho lah chuan min lo chhaih a, a zahthlak duh angreng.

Chhun chawlh veleh Kimkimi nen bathroom lam kan pan a, "Lut rual ang" a tih tlat avangin a rualin kan lut a, rei pawh kan awm hman lo pawn lamah chuan hmeichhe ṭhenkhat hi an lo kal a, an ṭawng nak nak a, tute nge an nih chu a hriatchian hle bawk.

"Sangtei a zei lo thei em a lawm, a ti chung chung a, Awmpuian a ning thuai ang ka tih kha" hmeichhe pakhatin a tih chuan, "Awmpuia hi a zei lo em a lawm, hmeichhe rilru hi a hrethiam thei lo reng reng, a hma pawn a ni ziah, a man fuh thei ngai lo, khatiang khan Sangtein bem tawp lo sela chuan a duh tih pawh a hre miah lo ang" pakhatin a lo ti ve thung a, Noeli aw ka la hre miah lo, an thil sawi lah chu aw...

"Noel, engtin maw Awmpuian a lo chhan?" pakhatin a tih leh chuan, "Midang duh a neih thu a lo hrilh tawl a lawm, Rinsangpuii bak a ni lo ang, a get over thei lo hepa hian, a thil hawnsak te kha in lo hmu em?" Noelin a lo ti ta chiah a, Kimkimi nen kan inmelh ran mai.

"An inṭhen hlen tawh ang chu tih nak a laiin" hmeichhe dangin a tih chuan "Lalawmpuia ber hian a thei lo anih hi, nizana ka va biak te khan a thinrim lehnghal a, 'Lo inrawlh suh' min ti hmak, nichin pawh khan min be duh lo reng reng" Noeli bawk chuan a ti leh a, an ṭhianho thilsawi chu ka hrethiam vek lo nain ngaihdan erawh ka nei thiam a, rilru an ti buai takzet.

(End of chapter - 24)