BLUE BAYOU (CH - 25) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 25

"Engtin nge i tih dawn?" Classroom lampana kan kal laichuan Kimkimin min zawt a, ka ngaituahna chu ka ruak hung mai hian ka hria, ka ṭhiannu chu ka melh ringawt a.

"Awmpuia te chu an lo inngaizawng miah lo anih dawn kha, Mawitein 'An ni" a tia, an awmdanah khan an ang bawk si a, ka lo awih nghal tawp a sin le, a mak e..." a ti leh vang vang a, kei erawh ka la ngawi reng.

"I la duh reng ti raw, ani pawn a la duh hmel che sia, ṭha leh daih rawh u, Noeli te vang hrim hrim pawh khan ṭha leh ula ka ti.." a banah rawn vuanin min kalpui dawt dawt a, ka â deuh huih mai, ngaihtuahna a chawmawlh zo vek.

Classroom-a Mawitei kan va hmuh chuan "Lalawmpuia kha intawk em, handout a sem a, lakkep che ka tuma Kimkimi ta tur chiah min pe" a lo ti vat a, ka hawi kual a, Awmpuia hmel ka hmu miah lo.

"A lo lut leh mai ang" tih pah chuan ka ṭhu zui a, Kimkimi chuan kan thil hriat te chu a sawi melh melh a, Mawitei lah chuan "Nichin pawh khan Noeli chuan a rawn bia a lawm, thil eipuiah a sawm a, Awmpuia khan chhang loin a kalsan daih, an inhau a ni hrim hrim" a lo ti ve zat a, an sawizui luam bawk.

"Noeli thil tih kual mai mai anih dawn chu, Awmpuia hian a hrethiam lo a niang" tih chu an ngaihdan a ni ta ber a, "Rintei a la duh reng, ngaihzawng dang neihsan a tum loh thu pawh a sawi kha" Kimkimin a tih chuan, "A ṭhen tho a lawm, Sangtei nen inngaizawng lo pawh ni se Rintei tan beisei lo neih chi a ni lo, an inkar bikah chuan ka thiam lo tho tho" Mawitein a ti ve thung a.

"Keichu ni leh mai sela ka ti, Noeli te hi runluih ve hrim hrim rawh se" Kimkimin a ti leh chu Mawitein a thlawp lo khawp mai a, "Nakin lawkah an inkawm leh dawn a, Awmpuian Noeli a kawm chhung chu an ṭha tak tak lo ang, a hma ang tho kha an ni leh ang, an buai leh vat tho ang" a lo ti hlak hlak a, chutiang ngaihtuahna chuan ka rilru a luah ve lo a, keichuan thil dang daih ka ngaihtuah.

Ka phone chu ka en a, Benja message a lo awm va a, "Ruah do suh aw, Roma nen kan chhuak lawk a, tlaiah ka lo lam ang che, ka thlah haw dawn che nia" tih hi a lo thawn a, ka ban hun tur te hrilhin taxi stand-a ka nghah tur thu ka hrilh bawk a, "I ban hmaa lo thlen hman ka tum ang" a lo ti let var a, ban hmain period hnih ka la nei a, vawiin chu kan ban hma ni a ni.

"Rinbawih nih pui leh i tum em?" Mawitein a rawn tih chuan "Aw ti rawh, nangni pahnih bak baka inhmeh hi ka hre lo, inla induh tawn anih chuan ni leh ngei ngei rawh u" Kimkimin min lo tih khalh zung zung a, an pahnih chuan an han inhnial leh rih.

"In ril a ṭam em?" ka tih chuan lu an thing ve ve a, "Tun period zawh ah kan va ei dawn nia" Mawitein a ti chu ka hnial lem lo.

Midang an lo luh sap sap hnuah Noeli te ṭhian ho pawh an lo lut a, tlar hmasa berah an ṭhu bawk. An ṭhu fel chauh tihah chuan lehkhabu pawm ṭeuh chungin Awmpuia a lo lut a, kan mit a intawng chiang khawp mai. Chutih laia Noelin ṭhutna a lo kian chu en mang loin a kalpel a, kan hma chiaha ṭhutna awlah chuan rawn ṭhuin ka dawhkanah handout a rawn dah zui zat a, mawi fahranin min nuih bawk.

"Note i nei ṭha em?" a tih chuan "Xerox man kha min free la ka ta i copy dawn nia" Kimkimin a lo ti vat a, Awmpuia chuan keimah ngawt chu min la melh a, "Kimkimin a nei ṭha zawk ang" ka ti zawi sep ringawt, a ni tak tak reng bawk a, class kal loh ka ngah avangin copy ve tho ka ngai.

"Thil i ei tawh em, canteen-ah ka rawn zawng che a?"

"Aih, hemi zawh ah kan ei ang"

"Min lo nghak rawh aw" hma lam a hawi zui a, ka chhang hman lo. Kimkimi chuan min lo mitmei zuk zuk a, "Sawifel nghal vek rawh u, changtunu chet hun" a ti sar sar a, Mawitei erawh a ner nasa hle.

"Noeli zik zek khu" Kimkimin a tih rual chuan ka hawithla vat a, Noeli lo hawi chho ka hmuh chuan kei nge Awmpuia zawk a en ka hre lo, a tum deuh bur a, a ṭhu ṭha veleh mai bawk.

Professor lo lutin assignment min pe a, chapter thar kan kai avangin a pawimawh tur te kan thai mawlh mawlh a, external exam a hnai viau tawh mai. Ka ṭhiante pahnih chuan Political science an core a, Core ve turin min sawm reng a, Economics ka ti ṭha tehchiam lo bawk a, ṭhian thurualpui tur ka nei lo bawk nen Political science chu ka awn deuh a, ka hmaa ṭhu Awmpuia chuan eng nge a core dawn ka la hre lo, Prof ten an core student ni turin an duh vek a, subject thiam loh bik a nei ve lo a, eng subject pawh la sela a hnehsawh leh hle dawn tih chu chiang sa a ni.

Class zawh rualin kan tho sang sang a, kal nghal mai ka tum chu "Rinte.." Awmpuian a rawn tih vang chuan ka ding dat a, Kimkimin lah chuan Mawitei chu a pawt chhuak dawr dawr a, "Tibuai lo ang, lo kal dun rawh se" ti a a ṭhiannu a hrilh ri te chu ka hre pha a, kawngka bula Noeli te ding pawh ka va hmu nghe nghe.

"Min lo nghak lawk aw" tih pahin Handout a sem zung zung a, midang chhuah rem hnuah kan chhuak ve chauh. An kal daih tawh ang chu ka tih laiin Noeli te chu pawnah an lo la ding a, Awmpuia an lo nghak aniang, Awmpuia lah chuan Noeli a hmuh veleh ka darah a rawn vuan a, "Dawrah han kal hmasa teh ang" tih pahin Noeli te lo ding chu a kalpel hmak a, min enzui nasa khawp ang le.

"Tinge a, inhauhna in nei em ni?" hriatthiam loh hmel fea ka tih chuan "Nei hran lo e, ka lungawi lo ve deuh chauh" a ti mai a, zawhna ka ngah ru khawp mai.

"Eng nge i lungawi loh chhan, nang meuh i lungawi loh chhan chu ka hre chak...?" ka melh chho ha a, kiai deuh sak pah hian "Ti maw?" a ti zawi sup a, "Noeli a ni sia" ka tih chuan a nui ringawt.

"Keimah vang bawk em ni?"

"Ni lo e, thil ei pahin ka hrilh ang che" a tih takah chuan ka dilchhut duh ta lo.

"Kurta chu i duhzawng a ni maw, lei tur a vang lutuka" a tih chuan "A mawi lutuk, a to hmel bawk sia ka lawm lutuk aw, thil man to deuh lei a ngai lo asin le" ka ti ve luam a, kawtzawla kan kal tak avangin min kuah tawh lem lo.

"I ṭhiante nen buaina in lo nei em?" a ti leh chu ka hrethiam lo deuh a, a chhan ka zawt leh vat. "Ka ngaihtuah mai mai che, kawm tur i lo neih loh te ka hlau maw le" a nui suk suk a, min lo ngaihtuah ve ni ngei tur a ni.

"I zinna chu a nuam bawk em?" ti a ka zawh chuan "Nuam vak nang, ka lung a leng lutuka, kan thlen zan aṭangin lo haw ka chak tawh.." a ngawi dat a, "Lo kal ve la a nuam deuh ang, i hmuh turah awh deuh deuh ka ngah mai" a ti zui a, dawr kan thlen tak avangin ka chhang zui tawh lo.

Dawrah chuan pen leh intur vawt a lei a, intur chu min lo pek pahin "I ṭhiante khan an lo nghak che em?" a ti vut a, "Nghak hran lo ang, an kal daih tawh " ka ti nawi niai.

"A ṭhat hlauh chu, kan pahnihin kan ei dawn nia, thil hrilh duh che ka nei a lawm" a tih leh hnuah kan inzui thla a, eng nge a sawi tum chu rindan pawh ka thiam lo, Noeli chungchang ni hlauh sela ka ti, ka hrechiang chak tlat.

Canteen-ah chuan mi an lo zi luih luih a, ka ṭhiante pawh dawhkan hmasa berah an lo ṭhu a, min lo ko tak nain ka va zawm duh lem lo. Kan eitur chawi chunga kan phei laichuan Mawitein min lo ner khum sak a, Kimkimi erawh a nuisang mai. "Ka rindan tawk vel" Mawitein a lo ti zauh a, ka chhang lo thung.

Bang hnung lamah dawhkan chu kan va kil dun a, "Sa i va nei tlem bik ve" a tih chuan ka hnial hman lo, a plate a sati chu min lo suah sak mawlh mawlh a, a tihdan fo a ni. Ka ṭawng leh hmain a tho nulh a, hmarcha a va la dawn a niang. A lo let leh chuan sauce bur zawk a rawn keng a, ka duh em tih min zawt leh zat a, a chezia chu a dam thlup reng, a hmel chu ka en leh ṭhin a, tun hma ang thoin a la hmelṭha a, a ngaihawm em em bawk. 

"Eng maw min hrilh tur chu?"

"Ei phawt la"

"Sawi pah la.." kan in en a, kan in nuih ve ve a, a nui hmelte chu hmuh a nuam takzet.

"Kan zin hma khan ka lenchhuah pui ang che ka tih kha ka la theihnghilh lo ania" a tih chuan ka hrechhuak veleh chauh a, ka lo theihnghilh hmin der tawh.

"Nitak e, i sawi a ka hre leh chiah" 

"Kha kha..." a sawizawm hmain Peksanga a rawn ṭhu ve hlawl a, "Kha kha a tui em, ka lo tem chhin" tih pahin Awmpuia fian chu a chhuh a, a ei nghal mawlh mawlh a, "Ka va la ve teh ang" tiin a tho leh thuai a.

"Lalpeka chuan nuam a ti leh bik ngawt ang a?" a kal hnua ka tih chuan "Hmeichheho a zui kual reng mai maw le, Senior Vani nen khan an inbe zuiin ka hria" a tih chuan ka lo nui hak hak a, ani pawh a nui ve tho, Peka leh Senior Vani chu an inhmeh hlein ka hria.

"Anih nang, nula lam te...?" a lo ṭhu mar deuh hluai a, "Eng lo..?" a tih chuan en chik tak ka ni.

"Mak i ti ve ngawt ang..."

"Eng chu maw...?"

"Hmeichhe pakhatin min bem ringawt a, a hming chu min zawt kher suh, i hriat deuh tur ania..." 

"Sangtei maw?" ka tih chuan phawk fahranin min en a, "Engtin nge i hriat chat theih a?" tiin min zawt zui a.

"Ngaizawngtu che chu ka hriat ziah kha" lawm hmel fahran hian min lo nuih a, "I hresual ngai lo, ka hriat loh pawh hi i hre vek zel anih hi" a tih chuan ka nuih a za ve hle, ka hresual ngai lo miau a.

"Chuan engtin zel..?"

"Aw, a hrilhhaithlak duh khawp mai, Noelin a lo sawipui fe hi a lo nia, mi tih pui kha a tum deuh tlat a, he nu hi ka hrethiam lo, kan inkar hrechiang bertu a nia, engkim ka hrilh vek asin maw le" a ti vang vang a, a rilru tluang lutuk hi chu aw, Noeli rilru takngial pawh a hre lo chu a nia.

"Sangtei chu i hnar nghal a mi?" ka tih chuan a bu nghat.

"Ka rawn ngaihtuah vawng vawng che, ka ngaihzia che i hrethiam pha lo ang, ka sawi thiam lo....min bem zan khan zankhuain ka inngaihtuah, kan inhlat bawk si a, lo biak che ka tum a, hmaichhanah sawi zawk ila ka duh a" ka mitah chiang lutukin min en a, ka awm chu a tawt mup mai hian ka hria, ka hnuk a ulh lek lek a ni.

"A ni maw..." ka aw chu zawi tak a ni.

"External zawh ah chuan Semester hnih chiah a awm tawh dawn a, i zirlai dah pawimawh ber rawh aw, kan graduate rual thei a, ka thil tih lai hi ka vannei hlauh anih chuan...." thinphu dep dep chunga ka lo ngaihchan laichuan "Ka innei dawn nia" a ti tawl mai. AW LALPA...ka mumang em ni zawk le?

"Kan inṭhen sia..." 

"Ka hria a lawm..."

"Inṭhen lo angin i awm bawk sia...." ka mittui a rawn hnam a, ka khap let sak sak chung pawhin ka ṭah a chhuak et et.

"I duh ve tho em tih ka hre lo a, i duh anih chuan...." thawk ka la vak a, ka mittui a rawn lum thla pap mai. A hmel chu ka en a, ka melh ngawih ngawih a, ṭawngkain ka sawi chhuak thei lo, 'I tlai a ni ka hmangaih, i tlai lutuk tawh a ni'.

"Ṭap suh" a rawmawl min lo pe vat a, mi hmuh loh turin ka inhru mawlh mawlh. 

"I awmdan hi....ka rilru i ti na e...." ka ti ta thlawt a, thla tam a liam hman lo pawh a ni thei, a tan chuan a rei lo viau maithei bawk; mahse, ka tan chuan a rei em a, ka nghak zo ngang lo a ni. Ka khawharna leh mal taka kalsan ka nihna khan tun hun hi min thlenpuia, a tan chauh tia ka lo tiam ṭhin kha ka tibawrhbang zo tawh, ka hmangaihna dah ṭhain midang kut ka vuan a, dinhmun a zawnga ka duh loh berah min din tir ta si.

"Ka tihpalh, lo hrethiam tur che ka nia, ka thiam loh vek a ni..."

"Tunah min hrethiam tawh em ni?"

"Aw, a atthlak ngawt mai, nakin atana dah ringawt tur che ka ni lo maw le, hlauhthawn ka ngah mah mah a ni" a ti zawi ruih a, chu chu a dik ang, kei aia dah pawimawh a ngah a, kei min chan aia chân hlauh zawk pawh a ngah, ka dem lo, khang thil chân a hlauh te kha a chân ka phal bik lo.

"Kei chu min ngaihtuah suh, i zirlai chauh ngaihtuah la, harsatna ka siam miah lo ang che...." min lo pawtchat vat a, "Ahma kha chuan a harsa em a, ngai tur takngial che pawhin hun thawl ka nei lo a, i bula awm ka duh chang pawhin ka thei chuang lo, ngaihtuahna lapeng thei thil kha a tam lutuk a, tunah chuan ka ngaihsak thei tawh ang che, i tih chak pawh ka tihpui thei vek tawh ang che" thawm ri nuai nuai karah pawh a ṭawng chu chiang tak a ni, min vilh ngut ngut a, ṭah a ti chhuak em em bawk.

"Period khat chiah i nei tawhin ka hria, lenchhuah i duh em?" a tih chuan lu ka thing ringawt a, "Anih naktuk tlaiah" a tih pawh chuan lu ka thing leh a, a hrethiam a niang "I rilru ka tina viau a ni maw" a ti zawi sup a, ka ngawi reng ringawt.

"Anih chuan, i duh hunah aw, min hrilh leh mai dawn nia.." tawi tein min nuih a, ka laka inthlahrung leh ngaihdam dil ngaia a awm hi ka duh dan a ni lo, hlim sela, ka tel lo pawhin hlim reng sela ka duh.

Peka ten min lo koh avangin kan tho thuai a, classroom-ah pawh ka bulah ṭhuin note a copy mawlh mawlh a, kan inbe leh zauh ṭhin. Kan ban dawna Pekan a sawm chuan "Rintei ka va thlah lawk ang" tiin a lo chhang a, "Zui rawh, tih tur dang ka nei a, ka haw tlang dawn lo" ka lo tih vang chuan a kal ta chauh a, pawna kan inzui chhuah laite chuan ka ipik ṭun mai, ka dam mawlh lo a ni.

Peka scooty-ah an inphur a, an tlan liam hnuah gate lam ka pan ve chauh a, ka ṭhiante pawh an inphur liam tawh. Kal pahin ngaihtuahna ka kawm a, dinhmun laklawh takah ka dingin ka hria. Hetiang tur tih hi lo hre lawk ila han siamṭha thei ila, duh ka thlan hi ngai lo thei se la ka ti.

Taxi stand ka thlen chuan Benjaminan min lo nghak reng tawh a, ka hmel a hmuh chuan "Hauh hrep zawh hlim i va ang ve" a lo ti hmasa ber a, "Beer i nei em?" ka ti tawl, intih thawven ka mamawh, rilru fim hman zawng a chauhthlak mah mah a ni.

"Beer chu ka nei lo.." a tih chuan "I nei lo maw?" phawk fein ka ti a, a lo ner nak thung.

"Wine i duh chuan a awm; mahse, bialnu te hnena chutiang pek chu ka duh chiah hleinem" a ti nuah nuah a, "A pawi lo, i bulah anih chuan a pawi lo, keiman ka duh a lawm" tih leh a bike a lawn ka rual a, an in lam panin kan tlan ta vang vang a.

An inah chuan tumah an lo awm lo, chahbi  lah chu a kawl der lo a, clinic a va lam a rawt nain ka tlai lutuk dawnin ka hre bawk si. "Rawn lam sa tur che a lawm, kan inhrilh lawk reng sia" ka ti nuah nuah a, mood fuh loh a ti zual.

"Roma te inah phei mai ila" a tih chuan ka inngaihtuah buai deuh a, haw nan a la hma angreng a, va lenpui chu a pawi loin ka hria.   Chutih laichuan Jerome-a chu a call a, kan kal tur thu a va hrilh zung zung a, a biak zawh hnu chuan "Beer pawh a neih ka ring" a ti zui a, ka duh ru viau nain midang hriata in chu ka duh lo thung.

Jerome-a te chu an veng ṭhenawm lawkah an awm a, kan va thlen chuan inchung pindan aṭangin a lo chhukthla thauh thauh a, a chapal ka hmuh chuan hriatchhuah zawk ka nei, hman deuha Benjamina lo bun chhuah kha a ni.

"Khawnge midang?" Benjan a tih chuan, "Inhnuaiah hna an thawk" a ti mai a, "I room-ah ka khum tur dah lawk ang che, ṭhutthlengah min muttir ziah mai" Benja chuan a ti ham ham a, a tlangnel tawh viau a niang.

An in chu a lian lem lo a, inhnuai chu choka leh sitting room a ni, hmun a hnawk deuh nuai a, naupang an nei anih ka ring toys chi hrang hrang hi chhuatah a let phung a, a ṭhutthleng pawh a hnawk angreng viau mai.  Ka hawi kual laichuan an lo inbekbawr sar sar a, "A sen chi pawh a awm asin, hman zana kan in bang kha ka la khawih lo" Jeromean a tih ri chu ka hria a, "Beer kan duh zawk asin" Benan a tih chuan ka lo inthlahring ru khawp.

"Inchungah chho ang u" tiin Jerome-a chuan min rawn melh a, tui bottle a lak hnuah kan inzui chho a, a pindan chep ve zeta kan luh hnu chuan ka awm a nuam vak lo. An ṭhiandun chuan intur an buaipui a, Benjan beer min rawn pe chu ka tim deuh tlat.

 

"Ka in lo mai dawn.." zawitea ka tih chuan "In rawh a pawi lo, hepa hi zah tlak vak a ni lo" a ti liampuat a, Jerome-a pawh a lo nui hui mai.

Khumah ṭhu chungin beer chu ka in a, an ni pahnih erawh tukverh bulah ṭhuin an titi barh barh a, an ṭhiante chungchang an sawiin ka hria. "Brenda-i pindanah a lut ru lai an man a lawm, an inneih phah ngei ngei ang" Jerome an a tih laiin "A nuin a duhpui loh em kha, Lza bulah a lo va zawt ṭhin a lawm, inṭhen tir rawh u te a lo tih kha" Benan a ti thunga, Brenda zawk chu an ṭhian a nih hmel.

"Chhungte duh loh ngaihzawn hi a hrehawm dawn anih hi, keini ve duhpui loh tur pawh kan hmu zo lo ania" Jeromean a tih chuan an nui dun hawk hawk a. "A mipa kha a zei lo em a lawm, hetiang te chu tawn luih hmiah hmiah tur, ka bialnu chhungten min duh lo sela chu ka sual thiam khawp ang, ka leng sek duh ang" Benan a tih chuan ka va melh zawk a, a va inhmeh mai mai tak ka ti rilru a.

"I chhungte zawkin duh lo ta se, Hriatpuia chhungte khan Brenda hi an duh bik loin ka hria" Jeromean a tih chuan, "A nuam khawp ang chu, buaina kan siam deuh reng anga a ni mai a lawm" pakhat chuan a ti leh then a.

"I sawi ve mai mai anih chu, ṭap purin i rawn out leh mai tur asin" a ṭhianpan a lo ti chu a duh lo ve khawp mai, "Ngaihzawng vangin ka la out ngai lo e" a lo ti pawr hlur a, chutah ka lam lo hawiin min rawn nuih sawng a, "I in thei em?" a tih chuan ka bu ringawt.

Sana chu ka melh zauh zauh a, dar 3 pelhah ka haw ang ka ti rilru a, in lam thlakhlelhna ka nei lo hi hrehawm ka ti ṭhin, a hma kha chuan ka chhuak peih mang lo a, college bak chu pawn lamah ṭhian ka kawm ngai lo a tih theih. Awmpuia pawh kha a lo leng mai ṭhin a, chhuah kan ngaih chang pawhin nu Hlimi kan hrilh thlap ṭhin a, Benja chungchangah erawh engmah ka hrilh ngam lo, a lo len pawh ka duh hek lo, heng vangte hian pawn lam thlakhlelhna ka nei ta anih te ka ring.

Ka phone rawn eng chu ka bih vat a, Awmpuia a ni. A hming ka hmuh rual chuan keimahah che dawt a awmin ka hria, hlauhawnna ka nei ringawt lehnghal. A message chu ka hawng a, "Zanah lo len a rem em, Peka te inah chaw ka ei dawn a, haw pahin kan lo leng ang" tih hi a lo thawn a, ṭum dang ang chu ni se ka aw rang viau ang maw le; mahse, aw tiin ka chhang thei tlat lo, ka hlauthawng a ni, nat nawn leh ka hlau, amah vanga na thei dinhmunah pawh ka ding tawh lo, a rem lo vel vek a ni.

"Ka nuam sam lo a, zanin chu mut hma ka duh" tih ka va thawn chu a lo chhang let vat a, "Engtin nge i awm, vawiin pawh kha i nawmsam loh hmel lutuk a, damdawi te i ei em?" a rawn ti a.

"Ka pum a ṭha vak lo" tih chiahin ka chhang.

"Pum damdawi i ei em?" a tih leh vang chuan ka ei mek thu ka hrilh a, "In enkawl ṭha rawh aw, chaw te eiṭha la, pum ṭhat loh chuan hunbi neia thil ei a ngai ania, zan te mengrei lo la" tih a lo thawn leh chu chhan ka tum laimekin "Pum dam..dawi..i ei emm?" tih ri vang chuan ka phu zawk, ka sira Benjamina lo kun hnai chu phawk fein ka melh a, ani lah chuan ka Phone bihin a chhiar nuap nuap a, ka han hup rang mai mai khawp ah...

"Eng nge i lo bih duk duk...mi message an chhiar...."

"Kha kha i bialpa hlui kha a ni em?" a tih vang chuan ka ngawi hmak a, ṭi dekin ka melh.

"Zawlpala maw a hming?"

"Ni lo.."

"Khawmaw min lo entir leh teh, a hmel kha a ni tlatin ka hria" ka phone chu a rawn ban a, ka awmah ka lo pawm bet chawt chawt a, a lawm lo chuan min melh run mai a, a thinrim dawnin ka hria.

"In lo la inbe reng e law?" zawi deuh taka a tih chuan, "Be reng nang, a zin a lo haw chauh a lawm.." ka lo ti vat a, sawifiah dan vak pawh ka hre lo, "Kan inbe ngai mang lo" ka ti leh ngawt a, a ner nawng mai.

"I ngaih ang kha a ni lo ania" 

"Engtin nge ka ngaih i rin a?"

"Ka hre nang; mahse, i ngaih ang kha chu a ni lo..." a mit ti zimin min en ran ran a, chutih laia "Eng nge a?" Jeromean a lo ti chu "Lo ngaithla suh" Benja chuan a ti pawr hlur a, Jerome lo ding uk tawh chu a ṭhu leh hnawk a, ka va nuam lo duh tak.

"I la duh em ni?" a ti khawl mai a, midang awm laia sawi chu ka hreh ru khawp mai. Jerome-a bawk chu ka va melh a, min lo la en reng lehnghal. 

"Midang an awm ve hi, i sawi ring si..." a ṭhianpa lam a melh vat a, "Bengngawng angin lo awm rawh" a ti deuh hmuk a, Jeromea chuan a beng a lo hup vat.

"I la duh em, tlang takin han sawi teh...?"

"I hriat vek kha..." chu ka chhan dan chuan a hrilhfiah chiang khawp ang, zep ka tum lo, thil ṭha niin ka hre lo bawk.

"Anih chu, a ṭha a lawm" a ti tak nghatah chuan a lamah ka tawlh hnai a, "Mahse, kan inṭhen tawh a, engmah a awm tawh lo" zawite tak tak hian ka ti a, min rawn melh dan chu hriatthiam a har khawp mai.

"I ṭhen duh tak tak lo a nge, i rilru siam fel rawh, min chhai kual a nih chuan nuam i ti dawn lo teh a nia" a ti a, a mitmeng te chuan min vauin ka hria.

"Chhai kual duh turah che min ngai em ni, chutiang mai maiin ngaihzawng ka nei ngai lo, min hrechiang a ni lawm ni?" ka ti ve ngat a.

"I text fo te chuan..."

"Ka text fo lo, ka hrilh ve te pawh a ngai a lawm; mahse, min khap kha tum nghal ringawt lo la, ṭhian kan nih vangin inbiak a ngaih changte a awm ṭhin a, nang chu i rilru a zau kha, ho mai mai i huat chuan buaina a tam zel ang" ka ti duah a, a mitmeng chu a buai nak.

"Hre lo der sela min ti a ni maw?" naaa...chu chu ka sawi tum pawh a ni lo maw le, ka duh tak zawk chu Awmpuia hi thik lo sela, kan inkawm pawh phal sela, keipawn fair takin thil ka ti ve ang, amah ka thlan zawk vang hian Awmpuia ka haw ta tihna a ni bik lo a, chu chu hrethiam sela ka duh takzet.

"Inhaw deuha inṭhen kan ni lo ka tih kha, nangpawn haw suh aw, ka inkar pawh ka hrilh vek ang" ka aw chu thlem awka dik tak a ni, min hriatthiam hram ka beisei.

"Thikthu chhe lo ang deuha awm der turin min duh a ni maw..?" a tih leh chuan bei a dawng rum rum a, a thik tih a chiang em a ni.

"Chutiang a ni loooo....thik lo la i tan pawh a nuam ber a lawm, kan buaina turin ka awm dawn lo a, min ring tawp rawh, Awmpuia i huat loh kha ka duh tak chu a nia, i huat chuan a buaithlak vek ang.." 

"I la duh hle mai a, mi hi i duh ve tak tak loin ka hria.."

"Aaa...min ngaikawi kher lo la, khatiang khan ngai dawn lo la chu engkim hrilh zel che ka tum a sin" ka melh vang vang a, a bulah hi chuan sawi hreh neih loh hi ka duh, he thu ah pawh hian inlungrual thei ila chuan ka hrilh hreh miah lo ang.

"Anih aman a la duh che em?" tiin ka sawi hreh ber mai chu min zawt lehnghal a, ngaihtuahna a buai map map mai.

A hrethiam aniang hnai lutuk tak maiah min lo thlek a, "Aw tiin min chhang reng reng suh" a ti zui zat a, sawi tur pawh minti hre lo.

"Vawiinah kan inhmu a.." ka ti zawi sep.

"Chungte chu chiang sa reng a lawm, college khatah in kal a ni lawm ni?"

"Class khatah kan ṭhu.." ka lo ti leh chu min melh rum hlur tawh.

"Chuan engtin.." a ti leh hmuk a, ka sawi zo law law ang, rilru siamfel kan ngai ve ve tlat a ni.

"Kan sawi dun a, kan inkar siamṭhat a duh thu te a sawi a, hmeichhe dangin an ngaihzawn avangin ka lakah a inthiam lo bawk a, chuvang chu niberin ka hria..." 

"Ka hre peih lo, sawi lo zawk teh" a tho thut a, a ban ka vuan rang khawp mai.

"Ka chhang hleinem..." ka ti chiah chu rang tawkin a rawn ṭhu leh a, min en duh loin a beng a rawn dawh hnai ringawt a, Jerome-a lo nui ri chuan minti tim deuh.

"Neuh neuh hi a tam lutuk a, keini chu kan rem thei tak tak tawh lo, inzui ṭha leh pawh ni ila a hma ang tho kha kan nih leh ka ring, ka beidawng tawh..." ka aw chu a lawi rat mai, sawi nuam a ni mawlh lo, ka bialpa thar bulah leh lek phei chuan. Mahse, hriat hi a phu a, ka laka rinna a neih pawh ka duh, kan inkar hi thikthu vanga a nghin ka phal hek lo.

"I ti tak tak em, dawt i sawi loah ngai ta ila; mahse, thik lo tura min duh hi ka hrethiam chiah lo, mipa chu kan thikthu a chhe hma ania, i be sek a, kei aia i ngaihsak anih phei chuan hriat loh der kha ka thei lo ang, mipa  chuan kan ngaihzawngte hi midang tel ve miah lo a pumbilh kan duh, hresa veka ka ngaihzawn vang chein ka insum anga, min ngaihthah emaw min palzam miah lo ang che" tih pahin ka biangah a rawn beng thek thek a, a nui deuh sang bawk a, a ṭawngkam chhuak erawh a khauh fung mai.

"Ka ṭhian angin en la, ka ngaihzawng hlui angin en lo la, ngaimawh lo thei la ka duh vang ania..." inthlahrung ru taka ka tih chuan, "A ṭha a lawm, ka lo hre lo der tlat ang, chu chu a ṭha khawp ang chu" a ti nghat nghat a, phur ta viau hi a ang, ngaih te pawh a ti ṭha lo rum rum a lawm le!

"In sawi zo tawh em?" Jeromean a rawn tih chuan "Nangpawn hre lo der tlat ang che, ka bialnu hian bialpa hlui a nei lo" a ti kher a, a lungawi lo tih chu chiang tak ka ni; chuti chung chuan a nui deuh suk suk a, zial a ṭan mual mual bawk.

"A ngeiawm ti raw....?" Jeromean a rawn ti chu ka chhang lem lo, "Nakinah a bialnu hlui ka hrilh ve ang che" a tih rualin a tukkhum a ri thlawp a, ka hre chak angreng, U Lizzy lo hi ngaihzawng hlui a nei ngei ngei ang.

Kan haw lamah chuan kawna min thlah mai turin ka hrilh a, "Engtikah nge lo len hi i phal dawn le, college i kal a, ka kal ve bawk si lo a, kan inhmuh dawn chuan class i ṭhulh ziah a ngai a, weekend-ah i buai thei bawk si, lo len phal la chu ka hman tehreng nen" a ti nuah nuah a, chu kher chu ka ngam ngang lo a ni.

"Thil eng emaw tih tum te i nei em?" ti a ka zawh chuan "Ka pu hi a lawm, min la dangchat vek a, ni lo sela chu Picnic spot siam ka duh, tunlaiah chuan a hlawk ber maiin ka hria, a hmun tur ram kan nei sa lehnghal a, pawisa min pe sela chu ka phur ve maw le" a ti luam a, a chhungte hian an ring ngam lo nge maw ni. A ni lah khan "Engmah tih a ngai lo, awm mai mai rawh" a ti ringawt zel a, tlangval pui awm mai mai tura an ti hi ka hrethiam ve meuh lo, a patea lah khan a phut hmel bawk si a, a tan pawh hian awmdan thiam a har ve dawnin ka hria.

"Benjamin..." side glass aṭangin min rawn melh zawk a.

"I fel eee..."

"Deuh teh thut ṭhin a..." a lai deuh nge ni a ngawi zui reng a, rei dawn a ngawih hnuah "I ṭhianpa chu hrilh rawh aw, min hriat loh kha ka duh dawn miah lo ania, ka hrilh kher te kha a ngai a nge" a ti a, chu chu ka duh lo tawp ang, keimah ngeiin Awmpuia chu ka hrilh a ngai. Mahse, engtin nge ka hrilh ang, a rilru tina miah loin engtin nge ka hrilh theih ang le, ka huphurh ngawih ngawih.

Kawnah ka chhuak a, "Bye aw..." ti a kal nghal mai ka tum chu "Lawk lawk.." a lo tih vang chuan ka inher leh vat a, "Min lo thawk khum teh" a ti mauh mai. 

"Eng a...?" ka lo ti let hu a.

"Beer rim i nam em ka lo hnim lawk" a tih chuan ka inhup ṭat ṭat, khawlai laia inthawk khum te chu a.

"Ti vat..." ti paha a rawn kun hnai chu rang tawkin ka lo thawkkhum a, "Nam deuh mah mah...lo kal rawh, eitur ka lei ang che" a ti chu phur fahranin ka zui a, "Eng nge min lei dawn....?" tiin ka nuih var var.

"Eng nge i ei chak, zana i eiturte kan lei dawn nia" a tih phei chuan phur vet vet tak ka ni. 

Dawrah chuan eitur pack ho chu ka melh kual dan dan a, duhthlan tur a tam lutuk, lak ber tur pawh ka hre lo. Amah zawk chuan chips chi hrang hrang chu a rawn la khawm a, dawr nghaktu hnenah polythene a dil a, "Intur tui deuh eng nge i neih?" tiin a zawt zui a, pawisa a ngah hmel a ti deuh aniang dawr nghaktu chuan a man to to a lo kawhhmuh a, ka pawisa a ka lei ngam loh tur te a ni hlawm.

"I inseng hnem lutuk a nge?" ka lo tih chuan, "I tana insen te chu a na chuang hleinem" a ti sam et a, dawr nghaktu chuan fel a tih hmel khawp a, "A phal te chuan la hmiah hmiah rawh" a lo ti ve sek a, kan chhuak leh lam chu ka inkhai bawr luk mai.

"Ka lawm e aw, ka hausak hunah ka la lei ve ang che" fiamthu a ka tih chuan, "Kei aia hausak tum chu a har khawp ang, i u in lehkha a thiam thei lo lutuk a ti che a, i hlawhtlin pawh ka ring lo" a lo ti pek a, ka melh rum nek.

"Anih chuan nangman min lei ziah anga a ni mai a lawm, a nuam ting, rangkachak khur i nei bawk a, ka sugar daddy ah i ṭang ang" a lo nui huk a, "Sugar daddy nih chu ka duh teuh lo mai, i Money honey ka ni zawk ang" a ti reuh a, khi vur vur chunga a kal chu a hnungah ka zui dat dat.

"Ka lo enliam ang che, kal hmasa rawh" a tih chuan, "Aih, kal hmasa zawk rawh" tiin a bike bulah chuan ka ding a, a helmet a khum hma chuan min rawn thlek leh te te a, "Min nuih reng chuan ka kal thei lo ang, inher rawh" a tih leh ngei, ka lo nui hak hak chu min han nuih veleh a, chutah a helmet khumin ban a rawn vai zauh a, a tlan chhuak thuai bawk.

Hmanhmawh deuhin in lam ka pan a, midang an lo la thleng lo chu lawm tak ka ni, Bena eitur min leisak ho chu ka pindanah ka thukru daih a, zan rilṭama eiah tiin engmah chu ka khawih duh rih lo. Ka inthlak a, eirawng ka bawl zung zung a, a khat tawkin ka phone chu ka en reng bawk a, in a la thleng lo aniang message ka dawng lawk lo. 

Eng eng emaw ka ngaihtuah a, ka duhthlan chu ka chiang thar hle a ni. Inngaihzawnna boruak ka thlakhlelh ang zawng zawng kha Benjamina lakah hian ka hmuin ka hria. Awmpuia ka hre chhuak zui a, ani chu a danglam a ni, ka rilru tinain min ti hrehawm viau ṭhin mahsela ka haw thei lo, ka hmangaih em vang a nih ka ring. Benja erawh ka inbunruahna, ka hahdamna leh engkima min hrethiam ṭhintu a ni, an pahnih hian ka tana mi hlu tak ve ve an ni a, buk emaw khaikhin ka duh lo, hetiang zawng hian ngaihtuahna ka neia, Awmpuia chu ni tla mek ang a ni a, Benja erawh ni chhuak tur ang a ni, thutlukna ṭha tak siam ka duh a, mahni hmasial taka duhthlanna siam ka nih vangin ka tihsual loh hram ka beisei.

U Lizzy a lo thleng hmasa a, ka anṭam thenna bulah chuan lo ṭhu veiin min en chik ṭhin khawp mai. "Back paper i nei lo ti raw?" ti a ka zawh chuan "Pakhat ka nei, ka clear nghal ang" a ti sam et a, min la en reng vang chuan nuam ka ti lo deuh a, "I pass chuan MA i zawm dawn em?" ka ti leh a. 

"Ka peih pawh ka ring lo, hna ka zawng dawn" a ti leh mai a, BA certificate nen ringawt chuan hna hmuh a har ngawtin ka ring, zirzawm chu ka rilruah a awm bik lo a,  kei erawh ka thiam theih loh em vang a ni, thil dang eng emaw ngaihtuah a ngaiin ka hria, anih loh pawhin pasal min chawm thei tur nei daih ila, ka inbengbel hma berin ka ring.

"I mit kha a na em ni?" a rawn tih chuan ka melh vat a, "Ti nge?" ka ti let heu a.

"A sen em a, ruih nei te pawh i ang a lawm" a tih chuan ka ip ru ngang mai.

"Ka mut a chhuak a" ka'n ti ringawt a, min zawt zui lem lo.

"Bena nen chuan in ni tak tak em?" a rawn ti teh daih a, a hma anga chhan awlsam a ni tawh lo tawp mai, ahma kha chuan engmah a awm lo a, tunah erawh ka pha ngam ta lo.

"Amah zawt mai la" ka tih chuan, "Ka buaina tur a awm hleinem" a ti leh hmak a, a sawi dik khawp ang.

"Fimkhur rawh aw, ka nuin a hriat chuan a lawm vak lo ang" a tih chuan ka nuih a rawn za deuh thut a, ka insum vat thung.

"Ka bialpa hlui tih a hre vek a, unaua bialpa inṭawm chu a zahthlak ania, thup ang che, hetah te hian lo len tir reng reng suh" a ti zui hmarh hmarh a, chu erawh ka pawm zawng tak a ni, ka chhang buai peih lo law law zawk.

Chutih laichuan ka phone a lo ri a, Benja anih vangin ṭi deuh chuan ka chhang a, "Ka thleng tawh e, eng nge i tih mek?" a rawn tih ri chu ka bula mi chuan a lo hre phak aniang a ner nak a, a kalsawn nal nal bawk.

"Eirawng ka bawl a, i va thleng har ve?" ka tih chuan, "Jam-ah ka tang a, Engloa chu i hrilh tawh em?" a rawn ti zat a, Awmpuia chungchang min zawt tih ka hria.

"Hrilhna hun pawh a la awm hleinem" ka ti dek dek chu "Thil dang ti hmasa loin hrilh ta che, min be reng loin va hrilh nghal rawh.." a rawn ti sawk sawk a, eng nge maw a hriat ni.

"Vawiinah ka sawi vek kha aw, i ngaimawh dawn riauin ka hria..." 

"Ngaihmawh lam a ni lo, ka thik lo ang tih ka tiam vek kha; mahse, a hriat loh ka duh lo ania, hrilh ngei ngei ang che.." thupe aw zet hian a rawn ti a, ka huphurhzia lah chu a hre mang si lo.

"Remchang hmasa berah ka hrilh ang, va sawi nghal ngawt kha a nuam bik hleinem, ka inthlahrung ve tho asin.." ka aw chu a zuih ral khawp mai.

"Eng nge inthlahrun tur awm, keimah ka inthlahrung hleinem, ka lo hrilh mai dawn a mi" a ti leh chu ka lo khap rang nasa. 

"A ngai lo, ka hre lo der ang i tih kha, keiman ka hrilh thei.." ka pawr ṭha hlar hlar khawp mai.

"Anih chuan phone kha dah la, va hrilh vat mai teh..bye ka dah" ka ṭawng leh hmain phone a dah daih a, engmah tih nachang pawh ka hre lo, phone hum chungchuan ka ngaihtuah tluk tluk a, ka be ngam hlawl lo, eng nge ka va sawi ang ni, lo len a tum pawh ka lo hnar kha a nia, zawhna a rawn neih miah loh laia ngaihzawng dang ka neih thu va hrilh chu ka ngam lo hulhual a ni, a aw ka hriat ringawt pawhin hrehawm ka ti leh dawn.

Nu Hlimi lo haw chu a inbual nghal a, a inbual chhungin eirawng ka lo bawl zo a, zanriah pawh kan ei har lem lo. Rei lote chu sitting room-ah ka ṭhu ve a, message ka dawn reng avangin U Lizzy chuan min  melh leh ṭhin. Ka chhang ṭha ngam bawk si lo chu lehkhazir chhuanlamin pindan lam ka pan ta daih a, ka message dawn lah chu "I hrilh ta em, eng nge a lo sawi?" tih ang reng a ni.

"Lehkha ka zir, min lo tibuai suh" ka va ti ngawt pek a.

"Ka awih lo" a rawn ti khawl.

"External exam a hnai tawh, ngaihzawng leh a hlui lam ka buaipui hman lo che u" ka tih leh chuan emoji leichhuah duai lem hi min rawn thawn a, a thinrim loh tihna aniang ka ti mai.

"Lo mu rawh, ka zir dawn" ka tih leh chuan, 

"Naktukah hrilh rawh" a la rawn ti hram a, sawina hun ṭha a awm fe te anih loh chuan ka sawi ngam kher lo ang, a hmel hmuh pawh ka inthlahrung zawk e a.

Zing ka thawh har avangin eirawng ka bawl lo a, ka inthlahrung deuh chuan ka insiam hmain chhuatte ka nawt vek a, a chhuak hnuhnung berah ka ṭang bawk. College thlen hma dawrteah Mawitei nen kan innang hlauh a, a scooty tlan loh ni aniang scooty ka hmu miah lo. "Vawiin chu class a mumal lo ang an tia, kan assignment kha ti ho ang u, Kimkimi chu a thleng tawh" a lo ti sawk sawk a, a chhan ka zawh chuan ka prof te seminar-ah an kal nual a ni awm e.

Kal pahin kan titi thla melh melh a, "Awmpuia chu engtin nge ni zel a?" a tih chuan zawh chak deuh ka nei a, a rilru ka hre bawk a ka zawt tawl ang.

"Engmah a awm lo, thil ka zawt che anga i rilru dik takin min chhang rawh aw?" ka han ti hmasa te te a.

"Ka rilru dik tak lo hi ka sawi ngai lo hrim hrim" a ti vei nghat a, a tihzia khawp ang chu.

"I hmangaih deuh, i hmangaih tih i hriatchian em em nen in lo inṭhen ta a, ngaihzawng dang neih har i tih i ring em, inthiam lohna i nei angem, amah nen inhuatna nei lo bawk ta ula, a bulah engtin nge i awm ang?" ka tih chuan ding meuh hian min en a, ka tim ru khawp mai.

"I va han ho reuh tak, nang leh Awmpuia in ni tih ka hre reng, khatianga sawi kher kha a ngai lo em mai" a ti bawl a, ka nui ringawt.

"Ka hrilh tawp ang che, Awmpuia chu amah tawp hi a ṭha, in inkawp kha chu in ṭha hlawl lo, in inmil pawh ka ti lo, a hran ve vein in ṭha.." a ti fak fak a, ka hrethiam zan lo, min duh pui loh thu a sawina ni berin ka hria.

"Kan inṭhen tawh a, nang ni la engtin nge i awm ang tih ka hre chak a lawm, kei ni la engtin nge i tih ang?" ka tih leh chuan, "Ka ngaizawng tawh kher lo ang, midang ka neihna a rei tawh ang, ngaizawngtu nei lo pawh i ni hleinem" a tih chuan ka zawt chu ka inchhir lek lek, a hrethiam pha lo tawp a ni.

Library-ah Kimkimi kan va hmu a, ka thil zawh kha a sawi nghal bawrh bawrh a, Kimkimi chu "Nangman chhan sak rawh" tiin a han papek ringawt pek a.

"Keichuan ka hrethiam lutuk che, ka bialpa hlui nen kan inṭhen khan inhau tho mahila kan la induh ve ve a, Awmpuia nena in awmdan ang tho hi kan ni mai; mahse, ngaihzawng a nei leh hma a, a hnuah keipawn ka nei ve leh a, ka neih hnu lawk khan a bialnu nen an inṭhen ve leh sia, lo let leh a duh a, ngaihdam pawh min dil nasa, ka rilru a hah ṭhin a sin aw...ka bialpa kha a fel si a, rilru na deuhin ka ṭhen a, tun thleng hian ka la inthiam thei lo, ka bialpa hlui nen chuan kan ni leh a; mahse, rei pawh kan ni chuang lo, kan inṭhen leh vat tho. Chuta ka hriatchhuah chu maw, kan ngaihzawng hluite kan la duh tlat emaw kan intih chhan chu nunhlui tam tak kan theihnghilh theih loh vang ania, kan hriatrengna a a cham tlat avangin minti lungleng ṭhin, hmangaihna emaw kan tih kha kan nunhlui kan theihnghilh theih loh vang mai mai a lo nia, nunhlui kha chu a liam tawh, engmah a lo let thei tawh lo, chuvangin move on a ṭha. 

Awmpuia nen in ni leh dawn anih pawhin in nunhlui kha dah bo hmiah la, a tharin bul ṭan rawh u, a hma ang kha engmah hmuh in beisei suh, i rilru a na mai mai ang" tiin min hrilh luam a, a sawi zawng zawng chu hrethiam lo mahila nunhlui ngaih chungchang erawh a dik viauin ka hria, ka hriatrengna a cham hi a tam lutuka, min ti hrehawm ber tu pawh a ni.

Chawhma ah chuan second period chiah class kan kal a, a bak zawng chu library-ah assignment ziakin kan buai a, kan zawh chuan chaw chhun ei a hun der tawh. Canteen lampana kan kal laiin Phone call ka dawng a, Benjamina a ni.

"Thil i ei tawh em?" a rawn ti lang lang a, "Ka ei dawn chiah, nang zawk i..." ka sawi zo hman lo, "Lo la ei suh, Roma thil siam ka lo ken che, ka lo thleng ṭep" a rawn ti leh ta mai a, "A ngai kher lo asin" ka tih rualin phone a dah daih.

"Ṭhiante u, mi nghah lawk ka ngai a, lo va lut mai ru" ka ti chu min en phawk dun khawp mai a, "Tu nge..?" an ti rual zawt. Gate lam ka han hawi chuan Awmpuia lo chhuk thla mek chu ka han hmu a, "Khi a lo thlen reng khi, ko la lut ang u" Kimkimin a tih chuan ka chhang lo.

Awmpuia chuan ban min lo vai zauh a, chutih laitak chuan mipa pakhat nen an intawk a, hmanhmawh deuh hian Faculty building lam an pan dun a, ka thaw huai mai, Bena a lo thlen har ka ring lo a, an inhmu ang tih mawlh ka hlau.

Ka ṭhiante chu ka zui lut ta tho a, engmah ka chah ve lo chu a chhan min zawt reng a, tiffin ka dawn tur thu chauhin ka chhang. Minute nga em pawh a liam hman lo tih ah Benja call ka dawng a, a lo thleng der tawh. Hmanhmawh lutuka ka chhuak chu Gate chhakah min lo nghak dawn emaw tih laiin kawt zawlah a lo ding vang a, ka phu deuh zuk lehnghal, ka lo hrilh lawk lo atin a ni.

Kawt vela zirlai awm ho lah chuan an han en duh khawp a, mipa ho thleng chuan an melh hrek hrek a, a bike vang chu aniang, a bul ka va thlen laipawh chuan a bul lawka Bike la chhuak tur pakhat chuan a helmet a lo ensak a, a man zat te a lo zawt a, Benja chuan a leina thlengin a hrilh a, chupa chuan a bike ke chu a han thlek leh chiam a, "I mody nalh hle mai a, ka va awt e" a ti deuh vang vang a, an titi lai chu va pawt chatin "Khawnge i thil min pek tur chu" ka va ti sawk sawk a, kal tir leh vat ka duh.

"Engmah ka la ei bik lo, canteen-ah ka lo zui ang che" a tih chuan ka ka hau mai.

"Kan canteen-ah maw?"

"Aw, i bulah ka ei ang chu ka ti..." a hawi kual deuh vut vut a, zawn a nei chiang...

"Eng nge a?" ka tih chuan, "Khawiah nge a awm a, a lo kal em?" a tia, a la hawi kual reng, a va han buaithlak mai mai tak.

"Eng atan nge i tih a?" pawr fea ka tih chuan, "Eng atan mah" a ti bul hmuk a, min nuihtlawn zui em mawni!?

"Kal rawh, zirlai pawh i ni ve lo a, kan canteen-a thil ei chu a chi loh" han nawr kal mai ka tum a, "Ka eitur ka rawn in ken vek a lawm, college canteen-ah hian pawn lam miin thil ei phal loh tih ka hre ngai lo" a la khi sung a, lo kal chu a tum hmel khawp mai. Canteen lam ka va hawi chuan tukverh aṭangin ka ṭhianten min lo thlir reng lehnghal, sawifiah tur neuh neuh chu ka ngah khawp ang le.

"Kal ang, thil ei ila ka let leh vat ang, Rom-an kan inah min nghak reng ania" ka darah a rawn kuah chawt a; mahse, Faculty building lam ṭanga Awmpuia lo chhuak ka hmuh rual chuan min kuahna chu ka pawt thla vat a, a hrethiam nghal aniang ka melh lam chu a melh ve vang vang mai.

"A lo kal e..." a ti zawi deuh sup a.

"Keiman ka hrilh ang ka tih kha, heta a hmuh che chuan engkim i ti buai zo ang, i thil tih tum kha ka duh lo ania, a rilru tihnat ka duh lo ka tih vek kha, nang chu midang ngaihtuahna i nei lo reng reng..." ka ṭah a chhuak nghal ṭun a, ka rilru a hah et et.

Awmpuia leh a kalpuipa chu an ding dun a, pakhat zawk a kalsawn hnu chuan kan lam a lo hawi ve chiah a, min hmu nghal aniang ban a rawn vai leh a, kan lampanin a lo kal mek bawk. Ka bula ding pawh chu a rawn hria ni ngei tur a ni, a rawn en ding khawp mai a, eng nge ka lo sawi dawn pawh ka hre lo, ka bing chuk chuk mai a ni.

"Engmah lo sawi suh, ka hrilh lawk che kha" vau awka zeta ka tih chuan, "Ngawih reng bik te chu a ṭha nang, lungngai suh a rilru ka tina miah lo ang" nui chung hian a ti a, ka ring ngam hlawl lo, Awmpuia lam ka va hawi leh a, ka thinphu chu a rang dawt dawt maiin ka hria, khuk chem chem a khuk ral daih theih ka chak a ni.

(End of chapter - 25)