BLUE BAYOU (CH - 26) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 26

"Hey...i ṭha maw?" Benja chuan a lo ti hmanhmawh a, Awmpuia hmel aṭang chuan zawhna a nei tih hai theih a ni lo. Kan bul a lo thlen chuan  "Eng nge i lo tih a?" a rawn ti hmasa ber a, a awki erawh a zangkhai angreng viau a ni.

Ka insangmar ṭeuh a, ka bula mi chuan engtin tak chhang ang maw ka tih laiin,"Khulai maiah khuan ka lo kal a, hmelhriat ka hmu a ka lo pengkawi lawk" a lo ti sam et a, ka thaw huai mai.

"I dam ṭha maw?" Benja chuan a ti zui a, "Damṭha a lawm, kan va inhmu khat ve?" Awmpuian a lo ti ve vat a, Bena a nuih vur vur laiin ani chu a nui ve lem lo, chutah ka lam lo hawiin "Thil i ei tawh em, khawnge i ṭhiante kha?" tiin min zawt zui a, canteen lam melhin "An lut tawh, min nghak mek ang" ka ti ve vat a.

"Tiru, thil va ei ang u" Benan a tih leh chuan rilru a buai map. Awmpuian pawn mak a ti deuh aniang a melh vung vung a, an ni pahnih kianga thil ei chu ka chak lo takzet.

"Kal ila..." tiin Awmpuia chuan min lo mitmei a, sawibuai theih a ni mang si lo, phur lo ru deuh chuan canteen lam ka pan a, ka hnung lama thawm awm chu ka ngaichang ran bawk.

"In college chu a nawm hi, basketball i khel ngai em?" Benjan a tih chuan "Football zawk, khawi college-ah nge i kal a?" Awmpuian a ti let var a, "Ka zo tawh, keichu ka upa tawh a lawm" pakhatin a tih chuan chhanna a awm lo, Benja hi khawi college chhuak nge a nih ka hre lo a, engtik kumah nge college a zawh pawh ka hre chuang lo, keini aichuan a upa deuh tih chu ka hria a, kum hnih khat vel baka a upat chu ka ring lo.

Canteen kan luh rualin "Eng nge i ei duh, ka va la dawn sin" Awmpuian a lo ti vat a, Benan a chhan hma chuan "Tiffin ka pai a,  chawhmeh theih tur chi lo la rawh" ka ti sawk sawk a, ṭhutna awl lam ka pan thuai bawk. Ka ṭhiante hlat deuh takaa dawhkan lam chu ka pan a, Benjaminan min zui bawk nen ka ṭhiante pahnih chuan min en duh khawp mai a, zawhna an ngah teh ang chu aw, Bena an hre lo erawh lawm tak ka ni.

"Tikhan i lawm em?" tih pahin ka ep chiah ah chuan a ṭhu a, ka lawm chiam pawh ka hre lo, awm a la nuam lo run mai a, awmdan thiam pawh a har.

"Ṭha deuhin be rawh aw, sawi a hun rih lo ania" ka ti ringawt a, Awmpuia dinna lam chu va thlekin a nui ruh ruh a, nuam a tih hmel hlein ka hria.

"A cool ve ngawt mai, i ex chu ni lo se ka kawm ang maw le" a'n ti pek a, ka lo thaw hak. 

"Sawi ka tum tho a, nang chu lo insum tlat rawh" hlauthawng ru fea ka tih chuan, "Ka insum thei lutuk, min vengthawng duh reng reng suh" rang fahran hian a ti a, a phur hmel lutuk chuan ngaih a ti ṭha thei tak tak lo, a ṭawng phawng phawng zel bawk si a, a insum thei ngut a nge maw?

"Rinte.." Awmpuian a rawn tih chuan ka hawi phei vat a, "I ṭhianpa khan eng nge a ei duh?" a tih leh chuan Benja chu a inher ve vat a, "I ei ang kha a ni mai" a ti ve zat a, a nui reng te chu a fuh lo riauin ka hria. Awmpuian kan eitur a lam lai chu kan en dun reng a, "Huat a har dawn hle mai" a han ti zui a, a sawi dik, ka tan pawh a har, amah pawh hian a haw lo tih ka hria a, chu tak chuan awm a ti nuam, a huat mawlh a nia ka hlauh ni.

"Rinsangpui...." tih ri vang chuan ka lehhawi vat a, "Hetah i lo ṭhu dawn emaw tih a?" Mawitein a lo ti lang lang a, "Kan len loh ka ring a..." ka tih chuan a rawn nui vur vur a, Benja zawk a en thung. 

"I ṭhiante em ni, min hria em?"

"Tuman an la hre lo che, sawina hun a la awm lo" ka ti chung pawh chuan "Benja ka nia, in college-ah ka lo leng lawk" a ti zui hram a, ka ṭhiante pawh an khi hui mai.

"Dawhthei hram hram rawh aw BJ..." ka lo ti chu, "Ka ning ania, mi nu uire sak ang mai ka ni" a lo ti zauh a, min en lem lo.

Chutih laimek chuan Awmpuia a lo let a, dawhkanah eitur rawn chhawpin "Soup hi a sa teh ania" tih pah chuan ka bula rawn ṭhut mai a tum a, "Hetah lo ṭhu rawh" Benan a lo tih vang chuan a ding dat, Benja chu a kil lamah a tawlh phei vat a, ka lo ṭang ṭung mai. Mahse, Awmpuia chuan engmah a sawi lo, ngawi rengin Benja bulah chuan a ṭhu a, soup chu ka hma ah a rawn nawr phei zui a,  Alu chop tui hmel deuh hi min lo lak tel saka, Benja nena an ei turin chow a la thung.

Tiffin chu han hawn mai ka tum a, a sak hrep mai, ka hmaa ṭhu chu ka va melh ṭhin a, min en loin a chow chu a ei mial mial a, ka hawng thei lo lutuk chu ka kut a na vek tawh. "Ka lo hawng ang" Awmpuian a rawn tih chuan Benja chu phu zawk niawm hian a rawn hawi a, Awmpuia tiffin ka pe lai leh Awmpuian hawn a tum lai chu a en ve ta reng a, tiffin chhin nghet zet chi a ni bawk a, Awmpuia pawn a hawng thei lawk lo.

A hawn hnu chuan ka hmaah a rawn dah a, Benja chu ka va melh leh ringawt, ngaihpawimawh loh hmel fe hian a thil eilai chu a ei zawm a, ka lo inthlahrun vei tehreng nen rin aiin a awm ṭha phian a, engmah chu a haw lo emaw tih mai tur a ni. A thil ei lah chu tui a han tih hmel em em khawp a, a plate bak chu hmun dang a melh lo reng reng, a han bih hnai em em lehnghal a.

"Ei ang le..." Awmpuian a rawn ti chu ka phu deuh zawk. Rang deuhin rice chu ka hawp a, ka lo theihnghilh leh ṭhin, thil kan ei dun reng reng hian ka ei hma chu a ei hmasa ngai lo, First bite hi ka tan a dah a, Burger kan in eiṭawm chang pawhin ka keih hmasa ngei ngei ṭhin.

"Assignmet kha in zo hman em?" Awmpuian a tih chuan, "Zo hman e, vawiinah i thehlut dawn a mi?" ka lo ti vat a.

"Peka te ho khan an la zo loin ka hria, Monday thleng hun a awm a lawm, monday ah kan thehlut dawn nia" a ti mai a, a thil ei a tui vak bik lo aniang, a eitur chu a chawk let sek a, keipawh chuan ka ti hleithei lo. Chutih laiin Benja chuan a lo eizo der a, "I duh belh em?" Awmpuian a lo tih chuan lu a thing vat.

"I rice chu a dai hman e law?" Banja a ni, min zawt phawng mai.

"A la lum" ka ti zawi sep a, "Ka hmanhmawh deuh riau tawh, Roman min la nghah ka ring" a tih leh chuan 'I duh leh min kalsan mai rawh' tih chu ka duh ut ut a, a tiffin chu a nghak aniang kal mai tum pawh a ang lo.

"I ṭhiante sawn min en duh hle mai a" a hawina lam ka va en chuan Mawitei lo hawi mek chu ka va hmu a, Kimkimi nen inhrilh ruin an nui an nui mai.

"I hmelhriat ve tho em?" tih pahin Awmpuia chu a va nghawk salh a, "Mawitei leh Kimkimi an nih saw" Awmpuian a tih chuan  "In mutual friend maw, an fel hmel hle mai a" tiin Benja chu a nui ṭhu a, va biak a chak hmel riauin ka hria.

"An fel lutuk, Rintei ṭhiante zawk an nih saw?" Awmpuia bawk a ni.

"Chutia law, an nel che em?" chu zawhna awmzia chu ka hre miah lo, eng atan nge maw a zawh le?

"Ka hre lo le, min nel em le?" ka lam hawia Awmpuian a rawn tih chuan, "Nang chu tupawn an nel che a lawm" ka ti mai a, tui ti lo chung chuan Rice chu ka hawp mawlh mawlh a, Lalroma chuan chi a al tam leh lutuka, tui a hal huam huam thei.

"In college-ah tunge luck ber" Benjan a tih chuan ka chhang ṭep.

"Ka hre miah lo" Awmpuian a tih chuan ka nuih a za deuh. Benja bawk chu a lo ṭawng leh a, "College ka kal ve lai kha chuan ka la lerh hman lo deuh a, kal ṭhat leh a chakawm a lawm maw le, in college a chhe lo ber ber hi chu ka phur chhuak thei sa" a lo ti nghat a.

"Chhe lo ka tih ber chu i phur chhuak thei lo ang" Awmpuian a tih chuan ka hma a ṭhu chu a nui chhuak hawk hawk a, ka lo mitmei nasa mai.

"Pawna ka bike kha i lo hmu em?" a ti leh daih.

"Hmu miah lo" 

"Hmeichhia hian bike an lawm, bike nalh deuh i neih chuan an be ṭha vek ang che" ti a inrintawk hmel fea Benja ṭawng chuan nuih a ti za.

"Bike hmangin hmeichhia i lêm ṭhin a ni maw?" ka lo ti fiam zauh a, "Tehnang, ka bike hian hmeichhia a lêm zawk" a tih laiin "Nangmah ni loin i bike zawk an duh anih chu" Awmpuian a lo ti ve bauh a, kan nui vek.

"Ka bike vanga min duhtu te chu ka duh bik hleinem, keimah min duhtu ngei ka thlang" a sawi pah chuan min lo melh kher a, mit ka la sawn rang viau a ni.

"Khawiah maw i kal, helai hnaiah i awm nge?" Awmpuia lo hawi chhuakin a tih chuan, "Bialnu thar ka nei a" a ti ta mai, rang lutukin ka melh a, Awmpuia a lo hawi chhuak ve tawh bawk nen khap ngam pawh a ni lo.

"Chutia law, thlah theih loh i nei khan ka lo hria a.." Awmpuia ṭawngkam chu a helh ang tih ka hlau, sawi hreh a nei dawn lo nasa mai si.

"Mipa chuan thlah theih loh a nei tur a ni lo, a aia ṭha zawk ka hmu pawh a ni thei a" tiin a nui deuh suk a, "Mipa pawn thlah theih loh chu kan nei ṭhin a lawm" ti a Awmpuia chhanna chu awmze nei tak a ni, ka lam a rawn hawi chu tawi tein ka lo nuih a, ka inthlahrun zia chu aw, hrehawm ka ti ngawih ngawih...

"I duh tak tak i la tawng lo anih dawn kha" tih leh pahin tui a thli a, min rawn pek mai a tum chu Benjaminan min lo ban khalh a, "Ka duh tak ka tawn vanga thlah ni ta ila" tui a in nghal khawlh khawlh a, vawikkhatah a tlak pap nia.

A in zo chu thawk a han la halh a, Awmpuia lam hawiin "I thlah theih loh chuan thlah thei thung che sela, i vuan lui bik a ngem?" a ti fiah fak mai a, tu chungchang nge a sawi ka hre ta miah lo, kei leh Awmpuia chungchang nge Lizzy nen an chungchang zawk!?

Awmpuia erawh chuan ngaihdan a nei nghal mai aniang, "Tu pawn Break kan mamawh chang a awm a lawm, ka thlah thei lo anih pawhin hun thawl ka pek a ngai ang, i vawn tur erawh i chian viau a ngai, vawn tlat tur mihring an awm a, thlah hmiah tur chi an awm bawk a, i kawppui i hriat chian danah a innghat thui khawp ang" a ti nghat nghat a, keimah ka inngaihbel lo thei lo, kei hi vawn tlat tur chi nge thlah hmiah tur chi zawk chu ka nih le, ka inngaihtuah chiang a, thlah hmiah tur chi zawk chu niin ka inhria, ka indem takzet.

"Min hrilh duh suh, ka thlah tur leh ka vawntur chu ka hre ve a lawm" tiin Benja chuan min rawh nuih sak a, kan boruak ṭang lutuk chuan minti hrehawm, thil ei pawh ka chak tawh lo, an mi uap a na leh lutuka, min ti hah hluah hluah.

"In duhtawk chuan kal ang u" tih leh thawh ka rual a, "Eiman ka lo pe ang" Benjan a ti chu Awmpuian a lo hnial vat, "Bialnu thar neih lawmnan ka lo treat ang che" nelawm fea tiin counter lam a pan zui a, Benja chuan a enzui vung vung mai,  "Misual chhuahin min chhuah ringawt dawn a lawm le, nang aiin lo tawng hmasa ila ka ṭhian a ni ang, sawpa saw ka duh riau" Awmpuia kal thlek pah chuan a ti a, a nui miah lo.

Chutah ka lam a rawn hawi thut a, "I rilru siam fel ang che, hunthawl inpek hi ka tihdan a ni ve lo ania, hunthawl mamawh khawpin ka siam lo hrim hrim ang che, inngaihtuah chiang la, sawina hun ṭha ka pek che hi lo bawhpelh miah suh" a ti a, a tho nghal nal nal. Hmanhmawh deuhin ka zui a, counter bula Awmpuia ding chu a darah va kuahin a va be luam a, pawna lo nghah mai a ṭhain ka hria. 

Pawn ka chhuak chu thawk ka la sek sek a, rilru a buai a, ngaihtuahna a nu but a ni ber. Loh theih lohin ka buk tawn a, buk tling zawk an awm thei lo, pakhat chu ka thinlung takin ka hmangaih niin ka hria a, pakhat zawk erawh ka mamawh chhanna a ni thung si a, keimah ber hi buaina chu ka ni, ka rilru le lo lutuk mawlh chu zahthlak ka ti, a tu ve ve lakah pawh inthlahrung ngawih ngawihin ka awm chu a nia, hetiang hi mihring rilru put dan tur a ni lo, a zia lo takzet a ni.

An lo chhuak chu ṭhian inkawmngeih deuh hi an angin ka hria, Benja chu a rawn ṭawng phei mawlh mawlh a, kan bul an lo thlen chuan "Ka kal nghal mai ang, tiffin chu inah ka lo lam mai dawn nia, Bye" tih pahin a kal nghal vut a, pen thum vel a pen hman awrh ang a rawn lehhawi leh a, "Lo inhau lo ula aw, kan inhmu leh dawn nia u" tiin a rawn nuisang a, a tumah mah chuan kan chhang lo ve ve.

Gate lampana Benja tlan chu ka thlir dun reng a, a lam ka va hawi chuan min en lem lo, Bike tlan liamna lam hawi chuan a ding khawng reng a, thil ngaihtuah nei a ang hle bawk. "Assignment chu.." ka lam a rawn hawi a, ka mitah chiang lutukin min rawn en a.

"Hmangaihnaah nge itsiknaah zawk ka awm pawh ka hre lo" zawi leh fiah zet hian a ti a, a aw ah chuan zawhna tam tak a awmin ka hria, chhan dan a vang khawp mai.

"I hria a mi?" phawk lek leka ka tih chuan lu a thing a, canteen lamah a inher ringawt, kal a tum uk chu rawn hawi lehin a inpetruh ṭun a, "Tiffin kha..." tih bak a sawi hman lo, Peksanga a rawn lang thut a, "Haw rual ang, saw tah min va kalpui teh, engine oil a lo kang ṭep a lawm" a rawn ti bawrh bawrh a, a paper ken laichu Awmpuia hmaah lekin "A tawi lutuk em han en teh" a ti zui bawk a, Awmpuia chuan a ban ve mai; mahse, a awmdan chu a buai nuai mai a, paper pawh chu a keu let sek ringawt.

"A ṭha mai em, a tawi lo ti raw...?"

"Aw..." pek let a tum a, Peka chuan a lo la duh lo.

"I thehlut mai ang chu, ziah belh a ngaih loh te chuan" a lo ti let hu a, Awmpuia chu a inngaihtuah em mawni.

"Kawl rih rawh" a han keu let leh a, "A tawi lutuk anih hi" a ti leh lawi a, Peka awmah a nem bet chawt chawt a, kan building lam panin a kal nal nal mai.

"Kan bang thei tawh a ni lawm ni?" ti a a ṭhianpain a au zui pawh chu hre awmin a awm lo.

Building-a a luh hnu thleng chuan ka thlir zui a, engtin nge a hriat a, eng laiah khan nge a lo man thiam ka hre lo, Benjamina nena an inbiak dante ka ngaihtuah let a, khatah khan a man thiam nghal em mawni le...ngawi teh, ka tiffin ken lai chu ka hrechhuak zawk.

Benja khan a kal hma khan 'Tiffin chu inah ka lo lam mai dawn nia' a ti a nih kha, awi aw....nichin mai khan bialnu thar a neih tawh thu a hrilh bawk a, Awmpuia tan hriatthiam loh chi a ni lo reng reng, a awmdan mawlh kha, a beisei loh lutuk thil a hriat khan engtiang takin nge a nghawng ang, external exam a hnai leh tawh a, a zirlai a tihchhiat phah leh mai angem, keimah vang bawka a tlachhe leh anih chuan....

Ka ngaihtuahna chu vak kual ruai mai, ngaihtuahna hrang hrang ka nei a, ka chiai ruai a ni ber, va biak ka duh a, sawi tur hlawl ka hre lo, ka va hnem ringawt thei lo a, a ti zuaikai tu mai mai anih ka hlau. Anih hetiang hian ka ngaihthah hmak dawn em ni ang, a na lutuk a ngem, min haw viau angem?

Tih tur ber pawh hre loa ka din laichuan ka ṭhiante an lo chhuak a, "Lalrini chu i mak ve thei ngawt mai, mipa bula i awm tawh chuan min thlahthlam hmak zel mai a" Mawitein a rawn tih phei chuan thaw a pik mup mup.

"Tunge lo tel ve kha, Awmpuia ṭhian em ni?" Kimkimin a ti pawh chu ka chhang lo.

"I chhass thar nge?" Mawitein a lo tih leh vang chuan ka melh hrawk a, "Anih i ring em mawni?" Kimkimin a lo ti ve zat.

"Ni ta se eng nge, ngaihzawng dang ka nei thei lo a mi?" chu thu chu ka ka aṭangin a chhuak phawng mai, anihna takah chuan keimah leh keimah ka inzawt a ni.

"I nei thei lo tih tunge sawi a, i bialpa a ni tak tak e law..?" Mawitein a tih chuan "Anih kha, a pawi viau a mi?" ka ti leh rawk a, chu pawh chu ka inzawhna tho a ni, ka ṭah a chhuak ngawih ngawih.

"E he....Awmpuia a awm ve reng kha, a hre ve tho a mi a, in van inpawh hmel hlawm si ve?" Kimkimi zawhna chu chhan ngaihna ka hre lo, min zawt sek lo sela ka duh.

"Lalawmpuia khan a titau a ni maw, a va mak em em, i la duh viau emaw tih laiin ngaihzawng dang i nei leh daih lawi a, i neihna a rei tawh em, Awmpuian engtin nge a tih?" 

"Aw, a thil min zawh aṭang khan a chiang reng a lawm, Awmpuia a la duh ru reng a, a bialpa thar lakah a inthiam lo anih hi" 

"Move on i duh vangin bialpa dang i nei ringawt a ni maw?"

"A move on theih te chuan a ṭha daih zawk a lawm" tih angreng an sawi chuan min ti chawmawlh zo. Ngawi rengin ka kalsan a, ṭawng bawrh bawrh chungin ka hnungah min lo zui a, "I bialpa chu a chhiat loh kha, nei ṭha thei fu mai" Mawitein a tih chuan, "Ṭha pawh ka ti ve vak lo kei chu, a hmelah te phei chuan a letin Awmpuia a ṭha zawk" Kimkimin a ti thunga.

"Hmel hi a ni ber lo, a lo fel zek maithei a sin" tiin Mawitei chu a nui kar kar a, kan building lam pan ka tum chu ka han ding leh rih. Awmpuia hmel ka hmu hreh riau a, min lo zawt ta se engtin nge ka chhan ang,  mahni inthiamchawp dan takngial pawh ka hre lo, ngaihzawng nei hmasa zawk ka nih vangin thiam lo zawk chu ka ni ber a, ka hrilh hma a a hria chu pawi ka ti bawk. 

Ka rilru hreve niawm tak chuan "A nei hmasa zawkah i ṭang hi a zia lo em mai, Awmpuian a nei ve bawk si lo" Kimkimin a lo ti ta chiah a, engkim tak meuh chu ka thiam loh a ni, ka rilru puthmang pawh hi a dik lo, Benja tan pawh a fair lo hlein ka hria, chutiang bawkin Awmpuia tan pawh.

"Kan bang thei tawhin ka hria, haw mai in duh em?" ka tih chuan, "Haw kan tum a ni lawm ni, classroom lam i pan daih a" Mawiteiin a lo ti hu a, vawiin hi chuan engmah va hrilh belh tawh lo ila ṭhain ka hria. Ka ṭhiante kal chu ka zui a, anni pahnih chu thildang sawiin an titi leh daih tawh a, an hnungah ngawirengin ka kal thung.

Taxi kan la a, bazara kal an rawt chuan ka chak ve lem lo, haw hma ka ngaih thu ka sawi a, min sawm lui bik lo va, min chhuksan hnuah in lam ka pan vang vang a, ka phone chu ka en deuh sek. Benjamina chu message thawn ka tum a, ka type a, ka ṭhulh leh ṭhin a, ka rilru buai lutuk chuan sawitur minti haihchham zo, ka va hau dawn dawn a, a ni thei chiahin ka hre si lo.

In ka thlen hnu rei lo teah a message ka dawng a, "I hrilh ta em?" a rawn ti leh tlawng tawh.

"Nangman i hrilh vek a ni lawm ni?" ka va tih chuan, "E, a hrethiam lo emaw ka ti hman a, a hriatthiam chuan a ṭhat chu, sawi a nei em?" a rawn ti leh vat a, a tan hi chuan a awlsam bik a ni.

"Engmah a sawi lo, a rilru a nat viau ka ring" Awmpuia hmel kha ka mitthla ah a rawn lang a, a chet buai danah khan a hai theih loh, ngaihtuah let ringawt pawh a hrehawm.

 

"Nang i rilru a na em?" ka message dawn chu ka en reng a, engthil nge a hriat duh le, dawt hrilh turin min duh a ngem?

"Hrehawm ka ti lutuk; mahse, sawitu nih a nuam lo a, hetia a hria hi a ṭha zawk maithei" ka ti ringawt a, chu chu ka ngaihdan veilam te pawh a niang chu.

"A rukin inngaihzawng ta ila a tan a lawmawm loh zawk ang, keipawn ani venthawn reng kha ka peih dawn lo, nangmahah hian ngaihṭhatna tur ka nei miah lo lehnghal a"

"Tinge i ngaih a ṭhat loh?"

"I bialpa ka ni tih hi ani aipawn i la hrechiang lo zawkin ka hria"

"Ka hre reng a lawm" ka tih chuan, "Chuti chu ka bialnu angin awm tawh rawh, thikthu ka tihchhiat te phal la, hauhbur thei tur chein min siam ta che" a rawn tih chuan ka nui ringawt, Benjamina hian inngaihzawnnaah hian a rilru zawng zawng a pe ṭhin tih ka hria, keimah ang chiah a ni.

"Rei lote lo nghak leh rawh, nang chuan i hriatthiam vek kha, keipawh min hrechiang a, i tan hlauhthawn tur a awm lo ania" tiin ka va chhang let a, "A rilru dam kan nghak leh phawt dawn a mi" a rawn ti let heu a, a thil sawi dan ṭhin hi aw...

"Uchuak taka awm nghal chu a ṭha lo a lawm..." ka ti chu "Mi uchuak ka ni sa reng a sin" a rawn ti leh hram a, a uang tawh lutuka ka thutak pui thei ta lo.

"Ka ṭhen ve ve che u a nga, lo inkawm mai ta che u" ka tifiamthu ve hlut a, a kawm chak thu a sawi kha ka la hrereng.

"A pawi ka ti lo maithei a ni, kan inkawm anih chuan i star pawh ka phal dawn teuh lo a nia" a rawn ti veleh. "Nangmah zawk kha star ta che ila" ka tih chu emoji nui vak vak lem hi min lo thawn a, chumi hnuah a rawn typing zui a.

"I duhthusam aṭang khan harhchhuak rawh, i bialpa ka ni mek reng a lawm hei" a rawn ti reuh a, ka harh kawk tak takin ka hria!?

Zanah chuan kan nu nen kan inbia a, sitting room-ah kan vaia kan ṭhutkhawm laiin a ni, a lo zin mai thei thu a rawn sawi a, kan hnenah chuan lo thlen a tum lo a nih hmel. U Rinawma chhungte khatla ah a awma, amah U Rinawma a rawn kal ve dawn bawk a,  rinni zingkarah an lo chhuk anga, a tuk lamah min rawn tlawh chauh dawn a, amaha lo kal a tum bawk.

"Ei chak te in nei em, vaimim te pawh kan thar tawh asin, dil sangha rep ka dahṭha bawk a" tih angreng a rawn sawi chuan "Chawhmeh theih chi chu kan duh vek" Nu Hlimin a lo ti vata, henglaiah thlai a to si a, thingtlanga kan ei duh mang loh pawh to tak tak vek a ni a, ei duh loh pawh hi kan nei meuh lo.

Inrinni tuk chu ka tho hma khawp mai, zan lam ka mutṭhat loh vang a ni. Nu Hlimi zing rawn tho chuan "Tlaiah chaw ka eichhuak dawn ania, ka school kalpuite nen inhmuhkhawm kan tum a, ka rawn haw tlai deuh maithei a ni" a ti zung zung a, tunhnai lawkah khan whatsapp velah group siamin an in hawt phur ve a ni awm e.

"Ni Pawli pawh a tel ve ang a?" ka ti liampuat ringawt a, "Tu nge ni Pawli?" a rawn tih chuan ka ip chawih mai.

"I ṭhiannu Paulinei kha...kan Prof-ah Paulinei a awm ve a, Miss Pawli kan ti ṭhin" tiin ka pha leh ngawt.

"Keini ho pawn Pauli kan ti mai zel a lawm, a haw thei a nia" tiin a nui ker ker a, ka sawi zui duh tawh miah lo.

"Rawn tel theih awm tak a nia, ani hi chu a buai leh lutuka, nizan pawh khan a la sawi nawi deuhin ka hria, fate rawn hruai lawp lawp pawh an awm dawn reng a, 'Ka awm loh chuan kan tlangval hian chaw a nghei leh ringawt zel' tih angreng kha a chhuanlam a, rawn kalpui mai tur maw le" a ti zui hlak hlak a, "Kan kal ve thei em?" Unaunuin a lo tih chuan "Pahnih hruai chu a chi loh, in lo nghak dun zawk rawh u, nangmah ka hruai che chuan i nau amahin a awm a ngai dawn a, lo chhuahsan bik lo mai rawh" a lo ti vat a, ka kal chak lo bawk a pawi ka ti lo khawp.

Tukṭhuan eikham hlim aṭangin Nu Hlimi chu a insiam a, ka nuin chawhmeh min lo ken dawn avangin thlailam lei vak kan ngai lo a, ṭhenawm hnaiah vawk talh an lo awm bawk nen bazar chhuak loin inah kan tawm chawt a, u Lizzy nen tv enin ka mu dar dar a, kan inbe meuh lo, chutih laichuan nu Hlimi chuan phone a hmang a, a nui leh hawk hawk ṭhin a, ni Pawli a bia a ni ngei ang.

"I buai viau chuan an hrethiam em em ang che, Liansangin an motor-in min rawn lam dawn a, kan haw lamah kan rawn tlawhkawi dawn che nia, 'Ka hmuh lohna a rei lutuk tawh' a tih ve ngei che kha, a damsam lo bawk a, râwn duhna che pawh a neiin ka hria" tih angreng a sawi a, a ṭawng chawl lo reng reng.

Chhun thil eihun awmah Nu Hlimi ṭhiannu a lo thleng a, a fanu a rawn hruai bawk a, nu Hlimi chu "I fanu hi hruai ve rawh, midang pawn an fate an rawn hruai dawn kha, Zoliani te phei chuan a thlalak a rawn post sek kha, keini ho inelna ve anih ber hi kan fate hi" tiin a hrilh a, a nui hawk hawk a, a fanu lah chu a han inchei vul khawp a, u Lizzy chuan a melh leh zauh ṭhin a, a ngei deuh emaw tih mai tur a ni.

"An exam hnai a, chhuak thei pawh an ni ve lo" nu Hlimin a tih chuan "I kal ve chak em?" tiin unaunu chu ka zawt a, "Chak lo, a nuam awm lo em mai" a ti bul hmuk a, a nu te chhuah hnuah "Kal ve ila chuan ka dah nil hlawm ang chu aw, khanu incheina ṭhin zia kha i lo hmu em" a rawn ti hmasa ber a, ka nui ringawt.

"Ka lo kal ve lo a ni, tlangval chhe lo deuh te pawh an lo hruai maithei" tiin a nui kur kur a, noodles te kan chhum a, titi pahin kan ei a, chawhnu lamah pawh movie en pahin thei kan bawl a, kan awm awl khawp mai.

Ka muhil dawn siar siar tih ah ka phone a rawn ri thut a, phak chhelh chhawlha ka en chuan Benjamina a lo ni a, "Tlaiah chaw ka lo ei ang, Ni Pawli chawei khawmna ah a kal daih dawn, ka Pizawn pawh a kal dawn ti raw?" a rawn ti lang lang, "Lo ei ringawt lo ang, i niin kal a tum lo emaw ka tia" phawk fea ka tih laiin "Bena e law, lo kal a tum a mi, ka bal si lo kal tir suh" unaunu chuan a lo ti hmak a, a awmzia ka hre lo, min ti bo deuh riau.

"U Lizzy nen kan awm a lawm, ngaihtuah ka ngai lo" ka'n ti ve ngawt chu, "Keimahin ka awm a lawm, ngaihtuah ka ngai" a lo ti hlur a, a va hahthlak mai mai.

"U Lizzy, amah chiahin a awm dawn a.." ka va ti dek dek chu min lo melh rum nek a, inthlahrunawm duh tak a ni, a rilru tur ngaihtuah chuan a awm ve tho mai, hmuh fo kha a nuam bik lo ang.

Tho chhuakin choka lam ka pan a, "Lalben, i ex a awm ve hi mawle, inthlahrunna te nei ve la" ka ti tawl, a ngaih a sam mah mah bawk a ni.

"Unaunu angin ka en daih tawh ex ti reng lo teh ang, amah pawn 'A rukin inngaizawng rawh u' min ti reng a lawm, ka pizawn a awm chuan loh kha" a tih chuan, "Nuam a ti hleinem maw le" ka ti ve tlat a, "Ka insiam mek, chaw min lo chhum kep rawh, lizzy chu vodka ka lo ken ang, va hrilh la min nghahhlelh dan tur zia chu" a la ti ham ham a, hnial zel theih pawh a ni lo.

Kan inbiak zawh ah U Lizzy chu ka va hrilh a, "Vodka ka lo ken ang che a ti" ka tih chuan min melh zawk a, engtin mah min chhang lo, tv lam hawiin a tum deuh bur ringawt.

Bena chu a lo thleng har zek a, chaw ka chhuan hnuah pawh a la rawn thleng mai lo, rei deuh hnuah "Beer i duh em?" tih hi a rawn thawn a, a awmna ka lo zawh chuan Roma te inah a lo awm daih, "Rawn kal vat ta che" ka ti chu a nuih a han za khawp a, "Min ngai lo ang deuh hian i awm a, min nghakhlel leh hle si" a ti zui a, a lo kal dawn rau rau chuan lengkual hmasa lo sela ka duh vang a ni, U Lizzy pawn a nghakhlel ve thoin ka ring, a duhzawng a rawn ken sak dawn miau a.

"U lizzy thil tur chu lo theihnghilh suh" tiin ka chah thlap a, chutih laichuan U Lizzy chu inbual turin a lut a, a inbual rei khawp mai. Benja lo thlen hnuah pawh a la inbual zo lo a, Benja lah chuan beer can pali zet hi min lo ken a, unaunu tan vodka bottle khat a lo keng bawk.

"In inbe ṭhin em ni, 'A rukin inngaizawng rawh u' tih vel i bulah a sawi elaw?" ka tih chuan, "Hmanniah daih, rawn rim miah suh a ti bawk a" tiin a nui hui a, ka bula a sawi dan ang tho a ni, min hmu dun chak lo te pawh aniang, min huat phah lo chu a nih hmel a, awm a nuam huai bawk.

Beer chu a hawng a, kan in ṭan chauh tihah unaunu inbual zo chu a lo chhuak a, Benja a hmu chu a han melh deuh ram ram a, pakhat erawh chuan a lo nuih var var a, vodka chu a lo kawhhmuh thuai bawk. Mahse, unaunu chuan lawm hmel a pu lo.

"Ka lo hawn sak ang che, va inthlak phawt rawh" nelawm fea Benan a tih chuan, 

"Eng nge hetah zu te i rawn ken luh" a ti hmak mai a, ka lo inthlahrung khawp mai.

Benja chuan vodka chu han pek mai a tum a, "Ka duh lo e a, ka simna a rei tawh lutuk" tiin a kalpel zui a, kan pahnih chuan kan in en a, a ngaihna kan hre lo dun khawp mai, hmanni lawk pawh khan zu rim a nam a, a nghei lai reng reng ka hre lo.

"Tinge a?"

"Ka hre bik lo" dar ka kan uk a, U Lizzy kal liam tur chu ka va thlek zui a, rilru a ti buai nak, beer lah chu kan lo hawng thawt thawt a, han in zel pawh a nuam lo.

"In rih lo teh ang, a nuam lo" ka tih lah chuan, "A kha vek dawn a sin" a lo ti bawk si, a va buaithlak.

"A ho lutuk, in ang...kan in a hmuh chuan a duh veleh tho ang" Benja chuan a ti sam leh mai a, a lo chhuak leh har bawk nen rilru nuam lo deuh chung chuan ka in a, Benja chuan vawihnih thum bak a in lo ang, a in pawp pawp a, a in zo der.

"Ka ta hi in leh rawh, ka duhtawk mai" ka ti ta ringawt a, hetiang hi chu rilru muang deuh taka in chi niin ka hria. A chanve vel chauh ka in a, a strong bawk a, lu a hai deuh chiai tho.

"A lo bia che em?" a tih chuan, "Be miah lo, min biak duh tawh pawh ka ring lo" ka ti zawi sep a.

"A pawi hran hleinem, a tihbuai zui loh che chuan a ṭha ting a lawm"

 "Min tihbuai i lo ring a?" phawk fein ka melh a, a awm ang lo ka ti, Awmpuia mizia a ni lo.

"Ring chuang nang, a che cool thei em a" nui chunga a tih chuan ka nui ve mai, minti buai hauh lo ang, amahin a tuar leh tlawk tlawk zawk ang chu. 

Pindan kawngkhar inhawng thawm kan hre zui a, rei vak loah unaunu chu inchei deuh hian a lo chhuak a, Benja nen chuan kan lo en phawk khawp mai. "Ka chhuak lawk dawn a nia, ka rei lo ang, chaw min lo eisan rawh u" tih pahin filter-a tui chu a thli a, min en ṭha duh vak lo.

"Khawiah nge i kal dawn?" ka tih chuan "Ka ṭhiante inah" a ti mai a, "I perfume chu a va rimtui ve" Benja a ti erawh a chhang lo. 

"Hei chu i duh lo tak tak maw" a tih leh chuan, "Zu ka in ngai lo" uan hmel deuh hian a lo ti a, Benja pawh a nui ringawt. "Fel deuh khan lo awm ang che u" a tih leh hnuah a chhuak a, a scooty a keng dawn lo aniang helmet a keng miah lo a, a nu lo haw hmaa a lo thlen hman loh ka hlau, anih loh chuan an inhau leh ngei ang.

"I ni chu a kal ve dawn lo emaw ka tia, nu Hlimi bulah khan a kal hman loh thu a sawiin ka hria, hetah i lo kal tih a hria em?" ti a ka zawh chuan, "Min hruai a tum a, ka peih si lo a a titau bur a, a ṭhulh emaw ka tih hnuah a lo tum leh anih kha, khatiang nu ho inhmuhkhawmna ah ka kal peih teuh lo mai" a ti bul bul a.

"An fate an hruai hlawm aniang, Nu Hlimi ṭhiannu khan u Lizzy pawh hruai ve turin a lo tia, an fate ho hmangin an inel ve ṭhin aniang" ka tih chuan a nui hawk hawk a, "Chuvang anih chu min thlem nasat em em ni, 'Sana thar ka lei ang che' te min tia, ka pizawn a kal ve dawn bawk sia, lo len a rem dawn lutuka ka hnial tlat a lawm" a sawi pah chuan ka kut a rawn ban ṭhem ṭhem a, "Ruah sur hrep se ka va ti e" a'n ti zui a, a thil ngaihtuah chu hrethiam tak ka ni.

"Engmah i ti chuang lo ang" ka tih chuan a hmui a petsawi zauh a, "Ka lo kuah lawk che, ka inkuah lohna chen pawh ka hre tawh lo" tih leh a lama min pawh a rual a, rem lo fein min han kuah zui a, nuih a ti za angreng, ka hnungah a rawn beng thek thek a, ka nghawng vel chu a hnim kual dan dan bawk.

"I rui em?"

"Ruihna tham pawh anih loh kha"

"A eng emaw tawk lek a nih ka hlau a lawm" a nui hawk a, chutah inla hrang deuhin min melh vang vang a, a hmel chu a lungawi hmel hliah hliah.

"Tlemte talin min ngai ve em?" a tih chuan "Tlemtein" ka ti ve mai a, "Keichuan ka ngai lutuk che, nangmah chiah ka ngai che" zawi leh thutak hmel zet hian a ti a, ka kut chu a hum nghet viau tawh. "Min fawp chak em?" a tih chuan ka nui thut, lu ka thing nghal nawk nawk a, chuveleh ka biangah rawn dawmin min fawp thut a, rei lo te a ni.

"Kha maw..i rui.." ka sawi zo hman lo min fawp nawn leh zat a, a duhthawh ta viau mai, beer rim a nam ham ham a, ka bianga a dawm tlat avangin ka chesawn thei lo, a uang emaw tih mai tur khawpin a uar zui a, ka hmui chu a pet kual a, ka chhanglet thiam lo chu nuam a tih phah nge ni a uar telh telh a, a zei bawk si a, a thawri te chuan thluak a fan thei hial a ni.

Mit chhing chhungin ka dawh mawl tawp a, a kutzungpuia ka khabe rawn tuai pahin ka nghawng lamah a nul thla dan dan a, a hmui sa ham hamin ka nghawng a tawh laichuan ka mur er er mai, thinphu a rang dup dup a, ka dang a ro nghal huam huam bawk. Ka kut chu la kangin a darah min vawn tir a, ka nghawngah bawk a rawn fawp leh. Mit ka chhing chial a, ka thaw mang tawh meuh lo, a fawhna ngaiah a fawp ngar ngar a, a za ka ti lutuk chu ka talh leh aih ṭhin a, min thlah chuang lo.

"A fiah ṭha hle mai" nuisuk chunga a tih chuan thawk ka la hak a, laih vang ni hauh si loin ka sa pup pup thung, ka hmui chhah deuh tap chu ka han pet zauh a, ka lai deuh tlat, hepa lakah hian ka lai nia maw le...

"Infawh i va zei ve" a tih phei chuan lai tak ka ni.

"Ka fawh ve loh che kha" ka aw te chu a khur deuh titih.

"A ni maw, min fawp ve la..." ka hmai bul chetah a rawn kun hnai a, kan hmui chu a insi leh deuh thaw tawh. 

"Mu ang" a ti teh thut a, ka lo ka hau, a tho nulh a, khawngkhar a va kalh deuh rawk rawk a, hamhaih lutuk ka lo en laichuan ka banah rawn vuanin sittingroom ah min pawt phei ta mai a, engmah sawi hman pawh a ni lo, "Heih.." tih chiah ka sawi hman min bawh deuh rawk rawk mai.

"Eng nge tih i tum aaa..!?" 

"I hre mai ang" tih pahin a jacket a phelh sawk sawk a, chhuatah a thehthla hmiah bawk.

"Ka duh lo ania Benjamin" min rawn fawp lui tho, kan awm a insi chet a, ka lungphu rang dawt dawt te chu a hriat vek ka ring. Ka ke chu a bawp pahnih inkarah a kherhbet tlat a, nuam chu ka ti, zep loah chuan a zei em a, hnar pawh har tak a ni; mahse, kan kalthui ka hlau a, ka invengru hle bawk.

Ka kawr chung a rawn zen tur chiah chu a kut ka lo man chawt, "A pawi lo" a ti ringawt a, pawi ka ti miau si a ni.

"A tawk tawh, i insum thei lo mah mah" ka ti fiah fak a, a la nui mai mai duh chauh. Min fawh tuma a rawn kunhniam leh chiah chu ka lo chuk zeuh a, "Tho rawh" ka ti chang bawl thung a, a nur deuh nang mai.

Muangchangin a inbeng kang a, a tho ṭha mai dawn emaw ka tih laiin ka kawr a rawn hlim thut a, ka che hman ṭawk a ni ka awmah a hmaiin a rawn nawr a, ka ṭek sawk mai hian ka hria, a tukkhum samah chuan ka ṭham ngawr ngawr a, a awm sawn duh eih lo, ka kawr hnuai a rawn zen tur chu ka rak ṭhat a, a zen lui tho. Ka thinrim lutuk chuan a hnungah ka chum dawm dawm a, a samah te ka ṭham sak thul, ani lah chuan ka darah a nem bet tlat a,  kan awmdan zet chu aw....kan insual nita berin ka hria...

"Min pawngsual i tum a ni maw..?" ka tih lahin "Teuh lo mai" a ti bawk si a, ka hrethiam pha lo.

"Anih chuan tho rawh" ka nam leh vak a, a ning ve ta deuh aniang a tho sawt sawt a, a titau zui nge mawni a jacket tla chu a chhar a, ngawi rengin a ha a, ka lo insiamṭha ve mawlh mawlh.

"Engati nge khatiang khan i awm a?"

"Engati nge khatiang khan i awm zawk a?"  

"Minti hlauthawng a lawm" pawr fahrana ka tih chuan, "Eng chu nge i hlauh, i ex nen khan engmah in ti ngai lo em ni?" a ti fahran a, ka sa ve phat.

"I ex angah khan min ngai suh" ka ti vin ṭhat a, ka lawm lo takzet, ex te insawichhuah sak fo pawh hi ka duh lo.

"Tu ka ex, Lizzy bak ka ex i hriat loh kha, ani nen te chuan lei leh van ang vel a lawm in nih, pawngsual tum che ah min ngai a ni maw, han on ve deuh che ka tum mai anih kha, khatiangte chu inngaizawng tawh phawtin an ti ang chu, tinge i blind em em a..." a chek zui tlat tlat a, ka hre lo pawh a ni bik lo, a hmanhmawh leh lutuk a, kan inngaihzawnna a la rei bawk si lo, a chet dan kha hlauh loh chi ni pawhin ka hre lo.

"Tikhan awm lo ta ila eng nge i tih dawn ang ka hre hleinem, i che buan buan anih kha.." ka bula lukham chu pawmin ṭhutthleng kil teah ka ṭhu a, ka melh duh lo nain min rawn en reng tih ka hria.

"Ka che buan buan a maw...?"

"Aw..."

"Ka phur a lawm.." phawk fein ka va melh, deuh teh thlawt chuan a!

"Chance ka neih hmasak ber te a ni ve a, mite hrethiam ve ta che..." dar a kan ak a, a nui suk suk.

"Hnial lo che ila engtia awm nge i tum a, sawn thlak ka duh lo i tia ni lawm ni?" a mitah ka en kal a, ka ṭawng pawr hle bawk.

"Ti e...ka duh reng hleinem" a ngawi dat a, "Mahse, nangmah i nih chuan ka hreh vak lo, neih che ka tum tho a lawm" a'n ti pek a, sawi tur pawh minti hre lo.

"U Lizzy lakah i insum a, ka lakah insum i tum lo a maw, mipa hian an hmangaih tak te an khawihchhe duh lo, U Lizzy chu i hmangaih a, min hmangaih ve lo anih chu" ka sawi zawng chuan ka thinrim nghal hlur mai, a ex nena an inkar ka hre tam leh lutuk hi thil ṭha nge anih a thil ṭha lo anih pawh ka hrethiam lo ve.

"Chutiang lam a ni loooo..." a rawn tawlh phei zui a, "Sorry aw, ka lo kalthui mah mah anih chuan ka tihpalh, tih hlim che ka duh a, tih dan hi ka hre vak lo a lawm, dik tak chuan ka ta ah siam che ka duh a, ka mawl ti raw..." a nui deuh hak a, "Sorry, ka ti hlau tawh miah lo ang che" a beng a han pawt zauh a, ka la nuih let thei mai lo. Chutah, ka kut chu lakangin a han fawp vang vang a, a mitmeng fiah zet chuan min en kal bawk.

"Tenawm deuha inngaihzawn ka duh lo ania" ka tih chuan "Aih aih..kan tenawm lo ang, ka insiamṭha nghal ang" a lo ti zung zung a, thinrim reng chu a dik bik lo. Ṭha deuh chuan kan inkuah a, kan inrem chu a ni leh mai.

"Ex te chungchang sawi tawh lo ang, insawichhuah sak hi a ṭha lo, nangpawn sawi tawh lo la, keipawn ka sawi tawh lo ang" ti a ka rawtna chu min lo thlawp ve hle a, "A ṭul fe anih loh chuan ex te hming lamin kan inhau lo ang" a ti ve nghat a, chumi hnu chuan tv kan en a, eirawng kan bawl pah bawk a, mitmei ven tur dang an awm lo bawk a ṭhutthlengah inkuah rialin kan mu a, ka thil in khan mut a ti chhuak deuh aniang ka lo muthilh lai pawh ka hre lo.

Ka harh leh chuan khua a lo tlai ruih tawh a, Benja erawh a la mutui khawp mai, thochhuakin khawngkhar ka va hawng a, kan beer in na can ruak te chu polythene-ah funin hnawmbawmah a paih a, Vodka erawh u Lizzy khan a duh tho ka ring a, ka pindan lamah ka dahṭhatsak thung. Zanriah kan peih tawh bawk a, ei hma a ṭhain ka hria, nu Hlimi pawh a lo haw har ka ring lo.

Benja chu ka va kaitho a, a la tho peih lo aniang a mu meng reng. U Lizzy pawh text-in a lo haw dawn tawh em ka va zawt a, "Ka lo haw ṭep" tih zawngin min lo chhang a, "I nu lo haw hmain lo haw hman rawh" ka ti leh chu min chhang let tawh lo.

Kan han nghak deuh a, a lo la thlen mai loh vang chuan ka hmanhmawh tawh khawp a, Benja chu chawei a duh tawh em ka zawt sek. "I u lo thleng phawt sela, i nu pawh lo haw mahsela a pawi hleinem, ka lo leng ve a ni mai a, chhungkaw ṭhian kan ni tho a lawm" a ti sam et a, unaunu chu awm ni tal sela chuan hreh chhan tur pawh a awm lo maw le, kan pahnih chauha lo awm chu a fel lo riauin ka hria a ni.

Dar 6 dawnah pawh a la rawn thlen tak lohah chuan chaw kan eisan a, chawei kham hnuah ka text leh nghe nghe. Min lo chhang a, "Haw mek" tih a rawn thawn vang chuan awm a nuam deuh huai. Chutih laiin Benja chuan call a dawng a, a ni Pawli hnen aṭangin a ni. "Ka leng kawi lawk dawn a, inah i awm em?" tih angreng hi a lo zawt a, ani pawn a haw ṭep thu a hrilh a, rei pawh an inbe lem lo.

"Haw ve nghal mai rawh" ka tih chuan "Nangmah chauhin i awm dawn asin, i u lo thleng phawt rawh se" a ti ve tlat a, U Lizzy a lo haw mek bawk a, ka hnial bik lo.

Sittingroom-a kan ṭhutlai chuan a vodka awmna min zawt hlawl a, ka dahṭhat thu chu ka hrilh ve mai, "Nangmah tein i lo in kerh kerh a nge" a ti fiamthu zui a, "Ka lo rui chhum hmawk dawn" a ti chu min nuih kur kur a, chutih laichuan pawn lamah thawm ka hria a, nu Hlimi ṭawng thawm ni tlatin ka hria, ka rin aiin a lo thleng hma tlat!

"U Lizzy a lo la haw si lo a, engtin nge kan lo sawi ang" mangang fe a ka tih chuan, "Sawi tawp mai rawh, amahin a sawifel ve mai ang" a ti mai a, an inhau leh ngei ngei dawn. "Dawrah a kal' lo ti ringawt dawn ila unaunu kha inchei deuhin a chhuak si a, ka sawifel zo chuangin ka ring lo.

"Muani te inah a kal kan ti mai dawn nia" a ti zo awrh tihah kawngkhar a lo inhawng a, nu Hlimi hmel a rawn lang ve zat bawk. Mahse, amah mai a ni lo, a hnungah Ni Pawlin a rawn zui a, chu aimah a mak ka tih chu U Lizzy a rawn lut tel ve chu a ni.

Benja an hmu chu mak ti hmel deuh hian an en a, "E he, Bawiha teh nawlh chu, Roma te inah chaw i ei emaw ka tia" Ni pawlin a tih laiin "Hetah a lawm a ei" u Lizzyn a lo ti vat a, nu Hlimi erawh chuan engmah a sawi lo a, min en chik hle thung.

"Heta i kal tho te chuan Lizzy lo zui ve tur a lawm" ni Pawlin a tih chuan ka hrethiam chiah, Muani te inah kal loin a nu bulah a lo va kal a nih hmel.

"Min zui duh nang le" unaunu chuan a lo ti kher a, puitling pahnih pawh chuan a hrethiam tawh ngei ang.

"I nau i kalsan daih a, ka lo awmpui mai loh te chuan" Benja a ni, ka lo melh vat a, min en ve lem lo. Nu Hlimi chuan gas lam a pan a, "Lo ṭhu rawh, thingpui ka'n chhuang a nge" tiin a ṭhianni chu a bia a, a awmdan chuan ngaih a ti ṭha hman dawn viau a; mahse, U Lizzy a lo ṭawng leh tlat.

"Ka kal daih mai loh ten, chance neih loh i hlauh em kha" fiamthu hmel tak leh ngeiawm zet si hian a ti a, "Chance min pe tura ka tih awm che ka va hre lo e.." tiin Benja pawh a han nuilui ve ngial a, awm a nuam lo hle tawh.

"In awm dan kha ka hmu peih lo che u a lawm, kan inah zu te i rawn keng lut a, Lalrini hi i lo pe fo a nge, beer i inpui thei tawh lehnghal" U Lizzy chu ka melh hrawk a, min ngaipawimawh lo fein min rawn kalpel a, a pindan lam a pan nal nal bawk. A thil sawi khan Nu Hlimi beng a verh hle aniang chu lehhawi meuh hian min lo en a, Ni Pawlin "Hetah zu i keng lut e law...?" a ti sar sar chu ka hre pha reng nain nu Hlimi zawk chu ka ngaichang ran a, min lo melh thip ṭha ngang mai.

"A ti ve mai mai anih kha, khanu kha a va han daw thei ve, a rilru a chhia a nih kha" Benan a ti chu a Ni-in a lo khap vat. "Ngawi mai mai rawh, hahthlak thei lutuk" Ni Pawlin a ti chung pawhin, "Mi hek ching anih kha, ṭhing lutuk" a ti leh hram a, keichuan sawi tur ka hre lo, insawithiamna tur lah ka nei hek lo, hrehawm ka ti ngawih ngawih mai a ni.

"In exam a hnai tawh a ni lawm ni, lehkha va zir ta che" fiah fek fawka Nu Hlimin a tih chuan dek pawh ka ti ve ngam lo, ngawirengin pindan lam ka pan a, "Ṭhiani, kan haw phei mai teh ang, thingpui chu siam duh lo mai rawh" Ni Pawlin a tih ri chu ka hre pha. Pindana ka lut fel chu thawk ka la vang vang a, thil thlen dan ka han ngaihtuah let a, nuih te pawh a za deuh.

Minute 5 vel a liam awrh ang tih ah pen thawm ka hria a, ka pindanah a lo lut ngeia ka rin laiin u Lizzy pindan lam a pan tlang a, hmanhmawh fein bathroom lamah ka phei ve nghal a; mahse, ka han ngaihthlak ngial pawhin phun bul bul thawm bak chu hriat ka nei lo, ṭawng pangngai hi chu a hriat chian theih viau ṭhin a, an ṭawng zawi dun hle a nih hmel.

Rei vak loah ka pindan kawngkhar a rawn ri dawm a, ka phu zawk lehnghal, "Rawn hawng vat teh" tih ri ka hriat rual chuan rang lutukin ka pan phei a, hreh ru deuhin kawngkhar chu ka hawng bawk.

"Beer i in em ni?" a lo ti bawl a, aw leh aihin ka chhang ngam lo ve ve. Mahse, zawhna dang a nei zui zat a, "Bena nen khan in lo inngaizawng a ni maw, i u bialpa tih i hre lo em ni?" a tih leh chuan ka chhan ngei a ngai tawh.

"An inṭhenna a rei tawh a lawm" ka ti ringawt a.

"I rapthlak reuh mange" tiin min melh vang vang mai, hnial vak theih a ni si lo chu hrehawm duh tak a ni.

"Vawikhatmah beer kha in tawh lo ang che, mahni u te ngaihzawng lo chhuh reng reng, zahpuiawm lutuk" a ti leh zet chu ka te rawih rawih maiin ka hria. 

"Class tlan bo te i lo ching a ni maw, hriat loh lai hian i lo nasa ru zek mai ka ti, vawikhat pawh i ching leh anih chuan kan in awmpui thei lo ang, i pa ka han hrilh nghe nghe a nge, nang hi i nu siar i nih hi" a han ti zui leh hlak a, a ṭawngkam tin chuan min vilh ngut ngut, min zawt lo a, chhanna a mamawh chuang lo, engtin pawn min ankhum sela ka tihsual a ni miau a, ka vui thei hek lo ang; mahse, ka pa beng a thleng tur mawlh chu ka ngai ngam lo, dan ngei ka duh, anih loh chuan a pawi thui dawn lutuk tlat.

"Ka ti tawh lo ang, min ngaidam rawh" ka ti zawi sep a, ka aw chu zawi tak a ni, a hmel ka en ngam lo a, hnuai lam ka bih tlat.

"I bialpa chu ṭhen vang vang ang che, ka duh loh dana i awm leh anih chuan i pa ka hrilh dawn ania, hetianga vau rual pawh hi i ni lo reng reng, ṭha te tein i awm emaw tih laiin..." phun hluk hluk chungin a kalsawn zui a, a liam fel tih ah khawngkhar chu ka kalh vat a, bathroom-ah lutin hmai ka va phih bawrh bawrh a, ka ṭap eih lo, ka chhungrilah thinurna in min tuam hlawp hlawp a, huatna hlirin ka khat.

Ka message tone ka hriat rualin phone ka en vat a, ka nuin inkhawm bana a lo kal tur thu min lo hrilh a, ngaihtuahna ṭha lo hlira ka khah avangin ka chhang let duh lo. Chutih laichuan U Lizzy phone hmang thawm ka hria a, bang piah lawk aṭang chuan a ni. 'Hmeli' ka tih ri chu a hre pha lo; mahse, a hmaichhanah ngei ka la sawi ang, a mitah tak en chungin ka la sawi ngei ang.

(End of chapter - 26)