BLUE BAYOU (CH - 27) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 27

"I ṭha em, buaina a awm lo maw?" phone ka chhan ruala a rawn tih chuan, "Ex te hi an lo hnawk thei hle tih ka hrechhuak chiah, i ex hian min hek nasa khawp mai, ka thupsak hram hram ṭhin tih kha a theihnghilh aniang" ka lo ti hlak hlak a, ka thinrim a reh hleithei lo.

"Engati nge dawt hi a sawi zung zung zel le...?" a ti deuh vang vang a, ka chhan leh hma chuan "A nu chuan eng nge a sawi a?" a rawn ti leh zat a.

"Engkim a hre vek, class ka chawl ru ṭhin tih pawh a hria..?"

"Kut a thlak che em?"

"Thlak lo; mahse, a ṭawngkam a na khawp mai, ṭhen tur chein min ti bawk a, ka nu chungchang thlengin a sawi" 

"Tehchai chuan, anih nih kan ni anga a ni mai a lawm" a ti vin hluk a, chutiang thu chuan min hnem lem lo, thawven phahna pawh ka nei chuang lo, ka thinrim chu ka insawithawl zo dawn loin ka hria, ka hrehawm ṭun mai a ni.

"Engtiang pawhin min ankhum sela pawi ka ti lo; mahse, ka nu chungchang a sawi dan kha chuan rilru a ti na, a cousin a nia, a tan mihrang pawh a ni bik hleinem, chu loah a pasal pawh a uire ve tho asin, Lizzy nen hian danglamna kan nei bik lo" ka ti hmawk hmawk a, ka sa leh pup pup tawh.

"Pawnah i lo chhuak thei angem, i chhuah theih chuan ka lo kal ang" a ti chu ka lo hnial vat, "Lo kal duh suh, engmah sawi tur vak pawh a awm lo, a tlai tawh reng reng" ka ti zung zung a, "Khatiang rilru a pu tih ka hre lo tak tak ania, Vodka te kha a duh lo der aniang, kei aipawn a in thei zawk daih ania" a ti chu ka rindan ve chiah a ni, min tal awh tir a duh vang bak a ni lo ang.

Benja bula thil sawi a nawmna em em chu mi a lo hrethiam ṭhin a, ka lawm lohna pawh min lawm loh pui ve thei zel a, duhtawkin a inhriktlak theih ṭhin. Rei deuh chu kan inbia a, kan inbiak tawp lamah chuan ipik zual pawh a reh deuh tawh. A Ni-in eng nge a sawi ve ka zawh chuan "Mi in zah turin min tia, a ṭhiannu lakah khan a inthiam lo deuh aniang" a ti mai a, kan beer in chungchang kha engtin nge a sawizui ka zawt leh a. 

"Beer in te mai mai chu a phal vek a lawm, a dahṭhat pawh kan in tih a hre vek a, min hau ngai lo" a ti leh mai a, min huatna a nei ve lo chu a ni phawt ang.

Dar 12 pelhah kan inmangṭha a, ka muhil thei lo chu ka inlet sek reng. Ka nu message kha zinga a hmuhah tiin ka va chhang let a, "Ka lo leng zawk mai dawn em niang, ka inkhawm peih pawh ka ring lo, i thawh veleh in awmna lo sawi la ka lo kal ang" tih chu ka thawn let a, chumi hnuah inbualin ka mu leh mai a, ka harh leh chuan zing dar 7 a lo ri tawh.

Chawbel sit ri ka hriat rualin ka tho vat a, choka ka chhuak phei chu nu Hlimin min lo melh ralh ralh a, ka ṭi dek mai, biak pawh huphurhawm duh tak a ni. Ka nu lah chuan ka message kha a chhang miah lo mai a, hmu renga a chhang lo chu ka lawm lo ru hle bawk. Tuk dang kan ang lo bawk a nu Hlimi chuan min tir duh miah lo, unaunu lo thawh rualin veranda lam ka pan nal nal a, an nufa a an inbe thawm chu ka ngaithla ve reng bawk.

Tuk dang zawng aiin an inhmangaih emaw tih mai tur an ni, unaunu chuan skin doctor hmuh a duh thu a sawi a, a chalah bawl a nei a nih hmel. "Tunkarah kan kal dawn nia, zan mengrei lutuk lo la, zingkar te hi lehkhazirnan a ṭha zawk, tui te in tam rawh" a nuin a tih chuan, "In tam a har em a lawm, zun a chhuak zing lutuka, inthlak reng a ngai a ka peih lo" unau chu chuan a ti a, "I hmai vun te chu a va nung lo ve maw le, thil i hnawih ṭha em?" a nuin a tih leh chuan a mamawh a lo sawi zung zung a, "I lei dawn nia" tih chu chhanna a ni, ka awm ve tih hreh awmin an awm lo a, min koh luh beisei deuhin ka ngaichang ve reng a, "Chaw ei dawn ang u" Nu Hlimin a tih hnuah pawh min ko thawm engmah a awm lo, ngawi rengin ka lut leh a, Phone khawih melh melh chunga unaunu chawei siam chu ka va pui bawk.

"I nu chu a lo kal dawn em?" tiin min lo be ve ta hram a, a ṭawng erawh a bul ṭha hmek hmawk hle.

"A rawn sawi leh lo a, a lo kal chu ka ring"

"Eng ti turin nge a lo kal reng reng a, an pa chhungte an rawn tlawh nge?" a tih leh chuan "A niang, in entir pah a tum" ka ti zawi sep a.

"Chaw lo ei em a tum em?" a ti chu ka hriat loh thuin ka chhang thung. Tukṭhuan kan eite chu kan ngawi deuh ṭhap hlawm a, chaw lem a sak ṭalh mai. U Lizzy chuan a kut lehlamin a phone a khawih deuh reng a, ṭum dangah chuan chawei laia phone a khawih hian nu Hlimin a hau ziah a, tukin chu a hau miah lo mai a, a ngaihthah lui nge ka hre lo.

Sa tui suah tuma ka ban laitakin Unaunu chu a rawn tawlh phei rawk rawk a, "I nghawng chu leh.." a rawn ti phawng a, a chek zui tlat tlat bawk. Rang fahranin ka sam chuan ka hliah a, nu Hlimi lam ka va hawi chu min lo melh kur mai.

"Eng nge a?" nu Hlimin a tih rual deuh thaw chuan "Love bite lianpui a nei" Lizzy chuan a lo ti leh a, ka zah zia chu aw, boruak a nawm loh sa tehlul nen..

"Engtin fakau nge maw in awm le..?" tih hluk pahin Nu Hlimi chu a tho a, eng chuan nge a nuih ti za ni ka bula ṭhu chu a nui kar kar a, melh pawh ka melh ṭha duh lo.

"A tlai deuh tawh a thleng sil loin insiam nghal mai rawh u" nu Hlimin a tih chuan inkhawm loh ka duh thu chu sawi ka chak viau a, ka ngam ngang lo a ni.

Pindanah a lut fel ta maw tih ah chuan ka bula ṭhu chu a rawn thle hnai leh vat a, "I va inphal zau awm ve a" a rawn ti deuh sar sar a, ka lo melh no lo nasa mai.

Thawhsan mai ka tum chu min lo din khalh vat a, tuikhawihna lam a pan deuh rawk rawk. A kutsil lai chu a hnungah dingin ka lo nghak reng a, chutah rawn inherin min nek deuh sawk a, ka thleng chunga bowl chu a tla keh bawl mai. "Eng nge i hriat?" ka ti vin ṭhat a, engmah sawi loin min kalpel hmak anih chu.

Kut ka sil zawh hnuah ka nu chu ka call a, a chhang thei mai lo, thleng sengfel mawlh mawlh pahin ka call ṭha leh a, chutih laia Nu Hlimi lo chhuak chuan "Titau chunga i tih dawn aichuan dah rawh" a rawn ti chang bawl a, a ngaihna ka hre lo khawp mai.

Phawk ang reng fea ka en laichuan "I mizia te hi a mak ka ti ta riau mai, mi i han titauh khum ngat ngat duh ania" a ti zui hlak a, ka titauh awm reng reng ka hre lo, bowl tla ri vang khan min hresual anih ka ring.

"Ka titauh pawh ka hre hleinem.." ka ti dek dek chu "Min chhang zit zet suh, hauh te lah hi i haw ve lek a" a lo ti let hlur a, ka chhang tawh lo chiang khawp.

Min tih dan chu ka tha a na ve deuh nen ka che zung zung a, pindanah lutin ka va inkalhkhum hmak a, rei deuh hnua "I inpeih tawh em?" a rawn tih chuan ka chhang duh lo. Bathroom tap ka herh haw a, inbual ang deuhin khumah ka mu thung a, min rawn au leh ṭhin.

"Rinsangpui.." a tih laite chuan ka ngaithla kar a, Lizzy zawkin nge ka hre lo ka pindan kawngkhar chu a rawn chum ri dat dat a, kei erawh bawp khawkherhin ka mu dar dar a, Benja chips min leisak kha ka ei mial mial bawk.

"Inkhawm a tum lo aniang, kalsan mai ang" Unaunuin a ti chu "Ka vaw zawt dawn nge maw ni, a nu lo kal sela zilh rawh se, min hlau lo leh lutuk" ti hluk hluk riin a zui a, "Kan tlai tawh lutuk" unaunuin a tih leh hnu chuan an inzui chhuak ta niang an thawm a hla tial tial a, kei erawh ka awm ngaiin ka la awm reng a, eng tih tha mah a tho lo a ni. Thil eng eng emaw ka ngaihtuah kual a, Awmpuia ka hrechhuak vawng vawng mai. A putea te ina a awm laia a hrehawm dan turte ka ngaihtuah let a, a dinhmun kha ka hrethiam ve ṭanin ka hria.

Inkhawm chhung zawng chu movie ka en a, ban dawn hnaihah ka inbual a, an lo haw laipawh chuan pindan ka la chhuahsan lo. "Lalrini chu a muhil em ni a, a nu a lo kal dawn chuan tawm reng suh se" nu Hlimin a tih ri chu ka hria a, tawm reng chu ka tum bik lo, ka awm ve anih loh chuan min rel nasa khawp ang.

Pindan ka chhuahsan hma chuan ka pa ka call a, a lo chhang rang khawp mai. "Vawiinah ka nu a lo leng dawn a, a lo zin tih i hria em?" ring leng lawngin ka ti a, sitting room a nu Hlimi ṭhu chuan min lo melh rang hle bawk.

"Sumo-a an chuang kha ka hmu thuak a, kha lamah an lo kal a ni maw, eng ti in nge an lo kal" ka pa'n a tih chuan "A inentir dawn aniang" ka ti leh vat a, "A pum ṭha lo bawk anih dawn chu, a rawn tlawh che chuan ṭha tak khan lo chhawn la aw" ka pa aw chu a dam thluam a, tunlai kan inbe khat deuh nen ka ngai thar khawp mai. A vawk vulh chungchangte ka zawt a, thingpui lum pahin kan sawi dun luam a, kan khaw lama political party lamten VC a in candidate tura an sawm thu te a rawn sawi a, politics lam a tui ve loh thu te pawh min hrilh tel.

"Retailer tur hian min awt deuh nge ni mi thlem nan tak hian an hmang a, vawk te han vulh chuan a itawm ve duh khawp mai" a ti bul bul a, thu han rawn ve vak tur pawh ka hre lo, nu Hlimin ka ṭawng a hriat phak reng avangin ka be rei lui a; mahse, kan inbiak laichuan ka nu call a lut a, ka pa chu ka mangṭha thuai bawk.

Ka nu call ka chhang chu "Ka lo kal dawn chiah" a lo ti var a, "Nangmahin em ni?" ka tih chuan "I u Rinawma nen, taxi a vang angreng a, min lo hruai mai loh chuan" inthlahrung aw deuh hian a ti a, pawi ka ti tak tak a ni, engmah sawina chi a ni dawn lo tawp mai.

Midang an awm em tih min zawh chuan kan awm vek thu ka hrilh a, kan inbiak zawh hnuah ka thingpui lum chu flask ah ka thli a, nu Hlimi lo phei chuan min lo melh leh run tawh. "I nu chu a lo kal em ni?" a tih chuan "Aw" ka ti mai a, ka en duh lem lo.

"Thingpui chu lo thli teh" tiin sitting room lam a pan a, chhuat nawhna keng chunga ka va pe chu "Center table te hi a paw lutuk, nula pahnih in awm a, inchhung chet hi chu sawi ngai loin ti zung zung rawh u" a lo ti ve ngei a, ka awm hnua a vawikhat sawina a niang, a tirh ngai hian ka awm ngai lo hrim hrim a, vawiina taka a sawi chu ka helh ru ve lek lek.

Ngawirengin chhuat ka nawt a, ka zawh hnuah tv stand leh center table te ka hrufai leh thlap a, nu Hlimi chuan min melh deuh reng maiin ka hria. Ka zo fel chauh tihah ka nu te an lo thleng a, ka thlakhlelh ang he hu chu a ni dawn lo tawp mai. U Rinawma hmel ka hmuh rualin ka hnual rawih ti ila a dik ang, mi lah chu a lo nuihsawng a, a hmel pawh ka en ṭha duh lo, min chibai lai pawh chuan ka tawt ru hle a, ka hmuh a a rawn inlan ngam chu ka haw hlur bawk.

Nu Hlimi thung chuan ṭha deuhin a lo bia a, an chawhmeh lo ken te pawh a lawm thiam khawp mai. "Thingpui lo siam sak rawh, chhang tui chi ka lei kha han chhawp bawk la" zangkhai deuha tiin U Rinawma pawh a be bawrh bawrh a, "In lo kal leh hunah chuan hetah rawn innghat tawh rawh u, mikhual pindan ruak a awm reng a lawm, chaw te ei nghal ula" tiin a sawm zui a, a ṭawngkam chu a lem hlein ka hre pek a, ka nu chungchanga min ankhum dan kha ka hrechhuak uar uar mai.

Ka nu chuan kan exam hun tur min zawt a, kar hnih pawh a awm tlin tawh loh thu ka hrilh a, "I zawh hunah i lo haw chho angem?" a tih chuan "In kan extend a, i pindan tur pawh kan hisap ania" U Rinawman a lo ti zauh a, ka melh rum ṭep a ni. "Engah nge in lo hisap ngawt, in kan nei ve reng a lawm" ti a ka chhang chu min nuih vur vur a, ka nuin a mitmei ru zauh pawh chu ka hmu, an bula awm chu nuam ka ti mang tlat lo a, nu Hlimi leh u Rinawma an awm avangin engmah ka sawi thei bawk si lo.

"Insuk tur ka nei a, ka va ti lawk ange" tiin ka inthiarfihlim san ta daih a, Benja ka va call leh ta ngawt.

Phone a lo chhan chuan "Ka pu te inah kan phei a, chaw kan einghal ang" a lo ti a, "Ka nu a lo kal" tih chiahin ka chhang.

"E khai aw, in inbe ṭha em?" a rawn tih laia a aw ah chuan hlauhthawn nei a ang. "A pasal pawh a lo kal" ka ti leh tawl a, ka rilru a na thar leh a ni ber.

"Ka lo kal dawn em?" a tih chuan ka ngawi vang vang a, tunah tak hian a bula awm ka chak a, ka awm a nawm phah ka ring, chu erawh ngaihdan ṭha lo tak a ni.

"I lo kal chuan kan buai nuai ang, nidangah pawh lo kal tawh lo zawk la a ṭha ang..."

"Min ṭhen te kha i lo tum ringawt a nge" 

"Tum lo, ka ṭhen che anih chuan tumah lamṭang kan nei lo ang, kawm tur pawh ka nei lo ang, ka mal dawn lutuk" ka ṭawng mawlh mawlh laichuan ka hming lam ri niawm tak hi ka hria a, Benja thilsawi pawh chu ka ngaithla tawh lo, sittingroom lam thawm ngaichangin beng ka chhi ran tawh.

"Inah tlangval a lo tawmpui a, beer te a lo in a ni awm a kha, a pa ka hrilh dawn em mawni ka ti rum rum a; mahse, a pa hi chu a nem em mai a, nangman zilh zawk la a ṭha ang, nizana ka hau te kha mi a huat phah emaw ni, tukinah pawh min runluih nget nget reuh a, inkhawm pawh a inkhawm duh hleinem. A u hian a lo zep sak reng a, college kal loin a lo rawl bo ṭhin tih pawh ka hre ve chiah a lawm, nitin a chhuak a, ṭha te tein class a kal ang chu tih laiin a bialpa nen an lo inphur chhuak ziah a niawm e" nu Hlimin a tih bawrh bawrh laichuan "A bialpa chu a ṭha vak na nge?" U Rinawman a lo ti zauh a, ka nu aw ka hre lo thung.

"Ṭha tehnang le, mi hausa fapa duatsual, engmah thawh a neih pawh ka hre lo, zah pah nei lo deuh a ni lehnghal a" Nu Hlimin a lo ti leh hlak a, phone a ka biak laichuan hre pha sela chu a lawm lo ve khawp ang.

"I nu chu a cham rei a ngem, hmuh ve a chakawm hle mai" Benan a rawn ti chu, "Nakinah ka lo bia ang che" tih leh phone dah ka rual a, choka ah chhuakin an ṭawng chu ka ngaithla chiang a, ka nu aw chu inthlahrung aw dik tak a ni.

"Han zilh vak thei pawh ka ni lo, ka lakah a la lungawi hleithei lo a, zilh thei dinhmunah ka ding bik si lo a ni, a pa ka lo hrilh anga, a pa thu te chu a awih a lawm, ka sawi aichuan a ngaipawimawh zawkin ka ring" a ti sap sap a. Nu Hlimi lo ṭawng leh erawh helh tak ka ni. 

"Engtin pawh awm la a nu i nia lawm, i chawm leh hrai a nia, i zilh lohin tunge zilh ang, a pa te chuan engmah rawn tih sak a nei hleinem, Rinawma pawn zilh sela a pawina a awm reng reng lo, in sum hmangin a nung a lawm maw le, hetianga fawr kual mai mai tur hi a ni lo, in pahnih hian dem thei che u a ni bik hleinem, a mamawh engkim petu a lawm in nih" a lo ti bawrh bawrh a, ka thinrim lutuk chu ka insum zo lo lek lek a ni. 

Chutih laichuan U Rinawma bawk chu a lo ṭawng leh a, "Ka sawi ve theih pawh a ni chiah lo, a chunga mawhphurhna lak te chu ka hreh pawh a ni hran lo va; mahse, a pa a awm a lawm, a nu nen sawi dun zawk rawh se" a lo ti ve bul bul a, ani awm laikher kher a ni chu pawi ka ti, ka nu pasal mah nise mihrang a ni miau a, a mualpho thlak takzet.

"Engtikah nge haw in rilruk?" Nu Hlimin a tih leh chuan ka nu zawkin a lo chhang a, "Naktuk tlai lamah kan chhuak ang" a ti zawi sep a, a ṭawng tui tam ta vak lo. "Chaw ei ve nghal ula" ti a nu Hlimi sawmna chu an lo hnar ve ve a, keipawh chuan haw thuai sela ka duh, helaiah chuan ka tan engmah sawi theih a ni lo a, an haw hnuah phone-in ka hrilh ve ang, thil dil duh ka nei bawk.

Ka insu zo veranda a ka chhuak chu ka nuin min lo au a, "Ka la hman lo deuh" ka tih hnu lawkah a lo chhuak ve a, U Rinawma leh Nu Hlimi erawh an la titi dun a, an thil sawi tak phei chu ka hre pha lo.

"Tlaiah te i insu a, zanah ruah a sur ang tih a va hlauhawm ve" a rawn tih chuan "A pawi hleinem, naktukah ka pho tlang mai dawn a lawm" ka ti mai a, ka bulah lo kal hnaiin a rawn ding ren rawn a, sawi duh a ngah hmel riauin ka hria.

"I nu khan i bialpa chunchangte a sawi a?" a ti chiah chu, "A sawi apiang kha awih reng reng suh" ka lo ti nghal zat a, a hmel chu a buai nak mai.

"U Lizzy ex ania, a duh loh hnuah an hausa tih a hre leh sia, a duh leh hnuhnawh anih kha"  sawi kim lo ka inti ru khawp mai, sawi duah a ngai a, a hun leh hmunin a zir rih lo a ni.

"Zu te i in em ni?" a tih leh chuan, "Beer ka in, ka hrat miah lo ania, ka in tawh dawn lo" tih pahin insuk chu ka zar mawlh mawlh.

"In tawh miah suh, lehkha te i zir ṭha thei em?" a tih chuan a lam ka hawi vat. "Zir ṭha e, back paper pawh ka la nei lo" ka nu hmelah chuan min ngaihtuahzia ka hmu theiin ka hria, min hauh a duh ka ring ru khawp a, a sawi ngam lo ni tein ka hria, min en deuh vang vang a, "Naktukah class i kal ang ti raw?" a ti leh daih a.

"Kal ang, ti nge?"

"Dar 3 ah kan chhuak dawn a, min thlah hman hmel si lo a" a wallet a phawrh zui a, "I exam fee tur" tih pahin pawisa engemaw zah hi min pek a tum a, hnar thei dinhmunah pawh ka ding lo, "A va tam ve" tih leh lak ka rual a, "I pocket money tur a tel ania, ṭangkai deuhin hmang rawh aw" a tih chuan ka bu nghat ringawt.

"I pum a la na reng a mi?" tiin a chungchang ka zawt ve leh a, "Ni deuh ber e" a tih laimekin U Lizzy a lo chhuak a, ka nu nena kan lo ding chu min en hrek hrek mai. Ka nu chuan  "I damṭha maw Eli, kuminah i graduate dawn em khah?" tiin a lo be vat a.

"Damṭha e, graduate maithei" a ti a, gate lam a pan zui mai bawk.

"A ngeiawm ṭhin viau lo maw, in inhau ngai em?" u Lizzy en zui vang vang paha a tih chuan, "Ka ngei peih lo, a nep lutuka ngei tham pawh a ni lo" ka lo ti hlak a, ka chhan danah chuan aman thiam aniang "Hrehawm i ti em?" a ti leh a, "Phone-ah ka lo hrilh ang che" tih zawng ka sawi, U Rinawma hmel ka hmuh vang a ni.

"Bawihi, kan haw tawh mai dawn em niang" nui vur vur chunga a rawn ti chu ka han melh rum khawp a, a rawn koh dan te lah chu aw...

"Kan haw san ang che aw mate, zanah kan inbe dawn nia" tiin ka nu nen chuan an inzui lut a, an lo chhuak leh hun nghakin pawnah ka la ding reng a, an rei lem lo. "Chawte ei ṭha la, buaina i neih chuan min hrilh zel dawn nia" tiin ka nu chuan min chah thlap a, nu Hlimin a lo chhuah ve avangin engmah ka sawi zui lo a, veranda thleng chauh chu ka thlah bawk.

An liam hnuah eirawng ka bawl a, nu Hlimi chu a awm ve reng tak nain kan inbe lem lo, a khat tawkin choka ah chuan a rawn vei sek a, ka awm dan chu min enthla ni maiin ka hria. U Lizzy lo haw chu zan inkhawm turin a lo hrilh a, unaunu chuan a hnial lo ve tehmial a, zan dangah a peih loh ṭhin tehlul nen. Min sawm ve dawn lo emaw ka tih hnuah "Inkhawm i tum em?" a rawn ti leh khauh a, "Ka peih lo mai" tih zawngin ka chhang a, min en dan mawlh chu, min ankhum hrep duh hmel a pu.

Chawei chhung zawng pawh chuan kan inbe lo a, an nufa pawh chu an inbe mang meuh lo. Inkhawm turin an insiam zui mai a, an chhuak fel ta maw tihah ka nu chu ka call bawk. Phone a rawn la chu "I nute an awm hnai em?" a rawn ti hmasa ber a, an inkhawm thu ka hrilh chuan "I chungah a lawm lo hle anih kha, vawiina a thil sawi khan ka awm a ti nuam thei lo reng reng" a rawn ti hlut a, tlaiah khan ṭawng a insumin ka hre reng a ni.

"Pawisa i neih veleh hostel-ah min dah rawh, semester hnih chiah a awm tawh a, hetah chuan lehkha ka zir ṭha thei lo ang, k thaw a ipik lutuk" ka ti ve mawlh mawlh a, nizan khan ka ngaihtuah fel tawh a, tlaia ka dil tum pawh kha a ni.

"I u Rinawma nen pawh kan lo sawi ve chiah a, boruak chhia neih aichuan Hostel-a dah che chu kan duh a; mahse, i awm dan a sawi kha tak tak a lo nih chuan awm hrang chi i niin ka hre lo ania, fel bik lo mahila ka fanu i nia, i ṭhatna tur ka duh tih hria la, i awm khaw loh chuan ka inthiam thei miah lo ang, mi pawn min dem dawn a, nang tal hi chu ṭha taka enkawl che ka duh tih hre bawk la, i nun uluk hram hram rawh aw.." a ti charh charh a, hostel chungchang a sawi bak chu ka ngaihven zui lem lo.

"Ka lo zawng nghal dawn em?" ka tih chuan "Tunah a ngai tut tut hleinem, in boruak te ngaichang phawt ila, i nu Hlimi te kianga awm kha i tan chuan a ṭha ber a, buaina dang a awm lo anih chuan hostela awm kher pawh a ngai hleinem" a ti leh daih lawi a, a inngaihtuah buai aniang.

"Nu Hlimi hian a ṭan tak tak miah lo che ania, ka pa bulah a dem che a, i bulah ka pa a dem anih kha, vawiina a ṭawngte pawh kha ka hre pha vek, i lam a ṭang miah lo ania..." ka vin deuh hlak hlak a, ka sawi zawng chuan ka thin a rim thar leh a ni ber.

"Ka chungchangte chu engtin pawh lo sawi sela a pawi hleinem, a pawimawh ber zawk chu nangmah i nia, hrehawm ti deuha khalaia i awm khan nuam ka ti bik lo va" ka nu aw chu a zuai raih a, a hnuk a ulh emaw tih mai tur a ni.

"Lizzy min ṭawngkhum fek fek hi chu ka tuar thei vek; mahse, nu Hlimi khan.....'i nu siar' min ti kher a..." ka aw chu a lawi rat a, ka mittui a hnam ringawt mai, ka nu bulah ngei ka han sawi chu a nia, a lo dawnsawn dan tur chu ka hre lo, ka rilru natzia erawh a hriatthiam ka ring.

Ka nu chu a ngawi deuh vang vang a, ka nghak zo lo chuan "Ṭawng ta che.." ka ti leh halh a, ka insum thei lo lutuk chu hrehawm ka ti, a lo ṭawng leh chuan a aw chu a zawi hle tawh, "Kan lo ngaihtuah dawn nia aw, i pa pawh ka lo rawn ve phawt ang, lungmuang deuh khan lo awm la, i chhuahsan dawn anih pawhin boruak chhe deuha inchhuahsan kha a ṭha lo ang, in buaina te han reh fel sela, exam zawh lamah pawh a pawi hleinem" a ti sap sap a, nawr vak chu thil tih chi a ni bik lo.

Kan buaina chu a hrechiang duh a, nute bulah hi chuan insawithiam a lo awl aniang engkim chu U Lizzy ka puh fai vek a, a zan haw tlai vanga ka tawrh phah ṭhin dante, ka buaipui ngunzia te leh Benja a hnar hnua kan inkawm chhoh dan te pawh ka hrilh ve duah a, nu Hlimi erawh ka sawisel duh miah lo thung. Mahse, ka han sawi zo chu ka rin aiin a lo man thiam a, "I nu Hlimi zia chu ka hrechiang a lawm, eng emaw hlekah a puh thlazen duh tawh ang che, Lizzy nen in inngeih bawk si loh chuan Hostel chu ngaihtuah ran a ngai a nih chu, i pa ka lo be vat dawn nia" a rawn ti ve ta sawk sawk a, ka awm a nuam huai huai mai.

Ka nu nen kan inbiak zawh chuan lehkha ka zir ve tlauh tlauh a, ka chhungte lo haw hnuah pawh chhuak loin ka inkhung chawt a, a khat tawka Benja Message ka chhang tih loh chu phone ka khawih tlem khawp mai. Mut dawnah rei lo te kan inbia a, Roma nen games an khelh laklawh avangin ka mutsan ta bawk.

Zing ka tho chu Nu Hlimin min lo hau mawlh mawlh mai, "I tho har thei lutuka, zan te hi i meng ve vak vak zel a, lehkha i zir chuang pawhin ka hre lo, i pindanah hian i tawm chawt mai a, inkalhkhum tawh lo la a ṭha ang, mi ina awmphung tur i hre miah lo a nih hi, Lizzy awm dan anga awm i tum ringawt a, hetiang chuan a fuh lo ang" a lo ti hluk hluk a, dar 7 a pel zawt a, tunhnaiah vawi 5 min thawh khalhna a ni tawh.

A thusawi chu ngaihsak lo niawm takin hmun ka phiat zui a, a ṭawngkam pawh huat loh hram hram ka tum a, a har ve thlawt a ni, ka bul hnaia a awm chuan ka insehruh ṭeuh renga, thaw a ipik ngawih ngawih zel.

Ka nu chuan ka pa chu a lo han be nghal ni ngei tur a ni, zing zingah ka pa call ka dawng a, chanchin min rawn zawt mawlh mawlh mai a, midang awm lai anih vangin chhan a rem mang si lo. "Ka buai rih lutuka, ka hman veleh ka lo call ang che" tiin ka dah rih ta ngawt a, a rilru a buai ngawtin ka ring, ka nu chuan engtin tak han sawi ang maw.

College ka thlen chuan a la hma deuh bawk a tu vak mah an la kal lo, Library lam ka pan a, a la inhawn loh vangin building hnuai panna step bulah chuan ka ṭhu a, ka pa chu call ka tum zuau zuau a, ka ṭhulh leh ṭhin. A rilru naten an kiansan ve mekin ka hria a, ka hriatpui lohin a la tuar viau maithei bawk, chutih laikara hetiang buaina lo neih hi ka inthlahrung a, tibuai lo thei ila ka ti takzet.

Ka pa chu call hmasa loin ka nu zawk ka va call a, eng chen nge ka pa hnenah chuan a sawi ka hre duh a ni. Ka nu chuan "Lizzy nen in inhauh vanga in boruak a ṭhat loh thu ka hrilh a, i beer in thu lam kha engmah ka sawi lo, ka sim tawh ang i tih kha ka ring che a, chuvanga hrilh loh ka nia, sim hmak tak tak ang che aw, Hostel awm kha chu i fee kan tum dawn avangin a phal mai ang, a vawk lak nan a inseng ral rih a, engmah kha han beisei lo la, 'Ka nuin min tum vek dawn' ti mai rawh, lawm deuh ang khan awm bawk la, a phal mai ang" a rawn ti luam a, ka awm a han nuam viau dawn a 'mahse' tih a awm, ka nuin ka sualna min zeppui ta chu a nia, ka pa lakah ngei mai lehnghal.

"Tukinah min lo call a, engmah ka la sawi ngam si lo a, ka han be nghal ange" ti a dah mai ka tum laichuan, "E, i bialpa chungchang kha a lo hre tawh a lawm" a rawn ti mauh mai a, min ti hamhaih khawp mai.

"Eng emaw a hriat?" awih mang lo zeta ka tih chuan, "Bialpa a nei ka tih khan 'Ka hria a lawm, phone ah kan inbe tawh' a tia, a fak em em lehnghal a, a duhpui viau che anih dawn kha, i nu Hlimi hi chu ka ngei ṭhin ngawt mai, a fanu tan a lo awt ru zawk anih dawn kha, a thik vang bak che a ni lo ang" a ti zui hlak a, ka pa chuan tu chungchang nge a sawi ka hria, ka nu lah chu aw...sawi ve tur pawh minti hre lo.

Phone ka dah hnu chuan ka pa chu ka call a, rei fe a rik hnuah a lo chhang a, vawk chaw a chan thu te a lo sawi luam a, chumi hnuah zawhna min zawt zui a, "I nu khan Hostel-ah dah ang a rawn ti tut tut a, Hlimi biak ka tum lah min khap hmiah si a, in buaina lah a sawi fumfe bawk si lo, i u nen chuan eng chungchangah maw in inhauh a?" awki dam dap leh fiah angreng deuh hian a rawn ti a, sawi chin tur ka hriat tawh avangin zangkhai deuhin ka chhang a, kan buaina pawh inhnial satliah kan nih thute ka sawi a; mahse, ka beisei loh deuh thil min lo zawt thung.

"I nuin Awmtea a hmu em ni, a uin a thik a ti lehnghalin ka hria" a tih chuan chhan mai dan tur ka hre lo.

"Awmpuia a lawm" ka ti ringawt a, chutih laichuan ka hnung lamah aw ka hre thut.

"Eng maw?" lo ti tu chu ka melh chho vat a, Awmpuia a lo chhuk mek chu niin.

"Ihh..pa..."

"I pa i bia e law...?" tih leh "Awmpuia ni zawk tak e.." tih ri ka hre rual zawt a, tu zawk nge chhan tur ka hre lo. Awmpuia chu a nui deuh sak a, ka bul a rawn thleng chawpchilh bawk. 

"Mi chhe sawi chu koh aiin a hnai" ka ti chu "Khatin an ti tawh ngai lo, 'Mi rel' an ti tawh ania aw" a lo ti zauh a, ka nui ve mai. Awmpuia ṭawng chu a lo hre pha a niang, "I bulah a awm a ni maw, ka lo be ve ang chu" ka pa chuan a rawn ti lehnghal a, kan boruak engmah a hre si lo, biaktir chi pawh a ni lo ang.

"Pa, class-ah kan lut ṭep tawh, lunch break-ah ka lo be leh zawk ang che" ka ti ta sawk sawk a, "E..aw le" a tih rualin phone chu ka dah vat a, sir lam ka hawi chu min lo la en ve reng mai. Tawi tein ka nuih a, "I lung a leng em ni?" a ti ringawt.

"Engati maw!?"

"I lunglen hmel em a" ka bulah chuan a rawn ṭhu zui a, "I pa chu a damṭha em?" a tih zawm leh a.

"Damṭha e, eng lo.." a rawn hawi vat a, sawi chi a ni em ka hre lo, sawi tur dang ka hriat loh vang pawh aniang "Hostel-ah ka awm maithei" ka ti phawng a, makti hmel engmah ka hmu lo chu mak ka ti.

"Awm la a ṭha zawk ang, a hmanhmawhthlak em?" ka mitah tak min en chungin a ti a, thil hrethiam vek te pawh a angin ka hria.

"A chhante min zawt dawn nange?" a lu a thing a, za lo zetin min nuih bawk.

"I hmanhmawh chuan ka zawnpui dawn che nia" a tih leh chuan "Min ngei phah lo ang ti raw, sawi duh i neih chuan sawi tawp rawh" ti chung chuan a sawi hlau niawm takin thlanglam ka melh vat a, engmah sawi lo a a ngawih chu ka duh lo, chutih rualin ka hlauthawng hle lawi a, mi le lo ve tak chu ka ni.

"Ka sawi a ngai hleinem, awmzia tak tak a neih pawh ka hrechuang lo" zawi deuh taka tiin thawk a han la ham ham a, inhnaih taka ṭhu siin kan inkar chu hla tak a ni, kan rilrua awm pawh kan inhrilh ngam ta lo chu ania.

"Ṭhian kan ni reng a lawm, mihrang i ni hleinem" tiin hmana ka bula a ṭawngkam ngei kha ka han sawi chhuak veleh a, kan ngawi dun vang vang mai.

Rei dawn kan ngawih hnuah, "Mihrang angin en thei zawk che i ila ṭha tur" a ti zawi deuh sup a, a ṭawngkam chuan engtin emaw tak hian min vilh a, a hrehawm ve takzet.

"Tihpalh aw, nangmah vang a ni miah lo ania" tih bak chu han sawifiah dan ka hre lo.

"Keimah vang a ni lo tak tak em?" 

"Ni lo e.."

"A ṭhat hlauh chu, keimah vang anih chuan a pawi dawn em mai" a ti a, a thilsawi chuan awmze dang a nei tlatin ka hria.

"In thinrim em?" ka tih leh chuan "Thinrim hian awmzia nei dawn sela chuan ka thinrim khum viau ang che, kei aia duh zawk dang i nei hi chu indem loh hram ka duh, ka lawmpui thei dawn che em ka la hre lo, ani kher a han ni bawk si a, i tan a ṭha angem tih ka ngaihtuah chhungin Hostel ngaihtuah nghal a ngai bawk a" a ngawi leh vang vang a, "Che fuh lo miah suh, hmuh i hrehawm dawn em mai" a ti zawi leh ruih a, a aw chu a damin a zawi em em reng. Pawm thiam a tum ve tih chu a hriattheih a, a rilru a na tih pawh a lang, chu tak chu ka awm ti nuam lo zualtu a ni.

"Kan inzui hnu lawkah U Lizzy'n a lo duh leh a, kan boruak a fuh loh phah a lawm maw le" ka tih chuan min lo melh vat a, "Mi ina awm hrehawmzia pawh ka hrethiam ve tawhin ka hria, i putea te ina i awm laikha ka hrechhuak uar uar a lawm" ka tih zawm zat a.

"Tawrh hram hram a ngai ṭhin a nia, i duh viau anih loh chuan i chhungte chu do lo zawk la a ṭha asin....lo sawi hnawn sak che ka hreh viau nain khapa kha chu.." a ṭhen sak a, "I duh tih ka hria; mahse, ka hmuhdan hi chu i pawm ve vak lo ang" a ti chang rawt a, a sawi tim viau nain a chiang tawk khawp mai.

"A fel ve lutuk asin, i ngaih ang em em a sual a ni lo ania aw" dik tak chuan min ngaihtuah tlata ka hriat vanga sawi ka ni, a ngaihhuat loh ka beisei bawk.

"Ka rin anga a sual anih chuan a chak lo ang" a ti bawl a, ka lo nui ringawt.

"A ṭhen che emaw, keimah anga a awm anih vaih chuan..." 

"Inkhaikhin suh, in in ang lo lutuk...ka sawi awmzia chu, ani chu nang anga fel a ni ve hleinem, a fel ve deuh chauh...in in ang lo lutuk" ka ti bah nak a, a pawisawi ka hlau lutuk chu ka ṭawng buai nuai a ni ber.

"Lo let i hreh chhan, min pawm theih tawh loh chhan a nia, kei aia ṭhat zawkna a neih ka ring, a chanchin sawi pawh nuam i tih em hi..." a ṭhensak a, ka inthiam loh ruk zia chu aw, ka bialpa chungchang sawipui tur ka ni lo, ka â hlawmtawp anih hi.

"Sawi tawh lo ang" ka tih chuan, "Mihrang kan ni hleinem.." a lo ti leh vat a, a nui hmel chu hmuh a nuam miah lo. Ni e, mihrang kan ni lo, engtikah mah mihrang kan ni lo ang, kan kawng zawh a lo hrang a, kan hmathlir te a lo dang a, thil tam tak a danglam anih pawhin a tana ka duhsakna hi chu a danglam ve ngai lo ang, he mihring ang em em a rilru tluang leh huat harsa hi ka la tawng ngai lo, kan inkar chu engtiang pawh ni sela Awmpuia hi zawng ka tana mi danglam bik a ni reng tawh ang.

Kan Librarian a lo thlen tak avangin kan inzuilut vat a, ka lehkhabu hawh tur ka lak laiin Awmpuia chuan a Library card theihnghilh a lo va lam a, chumi hnuah class lamah inzui chhoin ni engemaw zat kan ṭhutdun tawh loh hnuah kan han ṭhu dun leh ta chu a nia, kan boruak chu beisei aitakin a zangkhai a, min hriatthiamna a neih tlat vang a ni. Hostel chungchangte chu kan sawi dun a, a awmna hnaiah chuan hmeichhe hostel pakhat chu a awm ngei mai a, a man a to deuh a ring thung a, hostel manto a awm thei ka ni lo ang, ka nu pek tur a ni lehnghal a, a nuam aiin a tlawm ka zawn a ngai bawk.

Awmpuia chuan exam hmaa insawn turin min duh a, a chhan pawh lehkha ka zir theih loh a hlauh vang a ni. Lunch break a ka pa ka han biak leh chuan "Semester tharah ti law law mai la, pawisa ka lo inkhawl ve phawt ang chu" a lo ti thung a, hreh deuh chungin ka nu nena kan remruat dante chu ka hrilh a, mi chu a hnial hran lo, nuam erawh a ti vak loin ka hria. "Duh leh han lut ve phawt la, nakin lamah chuan ka rawn ti ve thei mai ang" a tih chu ka pawm thlap.

Canteen-a kan chawlh laiin ka ṭhiante pahnih chu hostel min zawn sak turin ka hrilh ve melh melh a, Kimkimin a lo hre nasa mai, "Fee ka lo zawt phawt ang, double room hi a tlawm ṭhin a; mahse, i theih chuan single ah awm rawh, hmeichhia chu inhmuh thiam loh chang a tam si, mahnia a awm a ṭha ber" a ti luam a, chu chu ka duh dan pawh a ni, zalen taka awm tluka thlakhlelh ka nei lo, mi mitmei ven ngai tawh lo sela ka duh.

Phone ka en chuan message a lo thleng ve zat a, "Tlaiah ka lo lam ang che" tih leh "Bazarah ka nu ka hmu a, a damṭhat loh hmel riau, va thlithlai lawk teh ang" tih hi a lo thawn a, a nu chungchang anih vangin ka hnial duh bik lo. Mahse, haw har thei ka ni si lo a, lo kal hma deuh turin ka chah ringawt a, ka ṭhiante bulah ka roll number-a lo present leh mai turin ka hrilh bawk a, an lawm vak lo nain min aw sak ve leh mai bawk.

Chawhnu chu period hmasa ber chiah ka awm a, taxi stand-ah Benja ka lo han nghak ang ka tih rilruk laiin a message a lo thleng a, "Gate chhakah ka awm" a rawn ti leh ta mai a, ka tlan chhuak rang khawp mai.

Gate ka thleng chho ṭep tih ah Awmpuian min ko ri ka hre thut a, "Min lo nghak rawh" a tih chuan ka rilru a buai nak.

"Eng nge i tih dawn ka hmanhmawh asin" ka tih chuan, "Thil xerox ka ngai" a ti mai a, ka lam panin a lo kal mek bawk. Benan min nghak ve mek si a, inhmuhtir fo chu ka duh lo maw le, a tan a nawm loh tur chu thuhran, ka tan pawh a nuam bik lo, Benja tan tak pawh a nuam lo ang.

Kalsan luih chi ni hek lo chu ka lo nghak veleh tho a, ka bul a lo thlen chhoh chuan "Min pe tlai thei lutuka, kan thiam hman tawh dawn em mawni" tih pahin a handout ken lai chu a bih mual mual a, pathum lai a ni.

"I thiam hman leh tho ang" ka ti chu min en phawk vak a, "Test dang pawh ka nei dawn a lawm, zirtur ka ngah lutuk" a ti halh a, a coaching kalna lam a nih hmel.

"I ti ṭha leh mai ang, zir ṭha la, ka lo ṭawngṭai pui ang che" ka tih chuan kan nui ve ve, chutih laichuan "Nangni pahnih kha" tih ri kan hre zui a, chhak lam kan hawi chuan a helmet pawm chungin kawnglai takah a lo ding a, a han ding kak em em lehnghal.

"Eng nge a lo tih leh dawn a?" zawi angreng zeta Awmpuian a tih chuan, "Kal lawkna tur kan nei a" ka ti ve mai a, "Class ṭhulh fo suh aw, attendance an tar leh ṭep tawh ang" a tih leh chuan "Ka ṭhianten min present sak dawn a lawm" tiin ka nuih var var a, thawm awmna lam ka hawi chuan Benjamina chu a rawn pen thla hmawk hmawk mai.

"Min rel in va ang ve a" a rawn ti lung lung a, Awmpuia pawh a nui tawp.

"I va hmanhmawh leh si ve, i lo thlenna a rei tawh em?" min en ran ran a, Awmpuia a melh leh te te..

"Tih tur in nei em ni?" a ti bul hmuk a, Awmpui zawk a en thung.

"Nei lo e.." Awmpuian a tih chuan awih loh hmel fein a melh a, "I number min pe teh" a ti phawng, eng atan nge maw a tih chu le!?

"Ka duh lo" Awmpuia a lo ti chu a han melh rum khawp a, "Sawi duh ka nei a lawm maw le" a la ti vin hluk zui.

"Engmah ka hre peih lo" Awmpuian uang deuh taka a tih leh chuan, "Ka bialnu anih hi aw" a ti leh khawl, a va han hahthlak ṭhin.

"Lalben.." ka tih rualin, "I pheikhawk hrui a phelh anih kha" Awmpuian a lo ti zauh a, ka pheikhawk ka en chuan a veilam hrui chu ka lo rapbet hi a lo nia, a bal hman viau mai.

Suih nghal mai tuma ka kun chu ka bag ka thlau zui a, ka lipstick leh pen a rawn tla darh nuai a, ka compact phei chu gate lamah a lir thla daih. Ka bula dingte pahnih chuan min lo chhar pui ve vat a, ka compact chhar tura Benja kal ka en laichuan Awmpuian ka pheikhawk hrui a rawn suih ta mai a, kan pahnih inkarah chuan thil thar a ni lo nain tun dinhmunah erawh ka hamhaih hle a ni.

Engtik laiin nge Benja chuan kan bul a lo thlen pawh ka hre lo, "A lehlam pawh kha suih ṭha nghal law law rawh, ka bialnu pheikhawk hrui anih kha aw, nghet deuh khan suih rawh" a rawn ti zuah zuah a, ka darah min kuah bet tlat. 

"I mak ve e, khawmaw min thlah teh" a kut dahthlak ka tum chu min kuah ṭha sauh sauh a, "Ex te bulah bialpa te an khak ngai lo" a'n ti leh reuh a, ka melhrum hrak mai.

Awmpuia lo ding chhuak chu ngeiawm zet hian a lo nuih a, "Number chu" a ti leh hram  a, Awmpuia erawh a ner sak.

"Ngawireng hian i phakar dawn a ang riau, chance i hmuh theih hmel tlat, a ṭha dawn lo riau" Benja chu ka nghawk sawk a, a uang mai mai tih ka hre nain Awmpuia chu ka vengthawng lo thei lo.

"Rawn in admit ve law law la a ṭha ang a" Awmpuian a tih chuan "Min thik leh si ang, nitin min hmu dawn asin" a lo ti leh zat a, a nakah ka lo sik nawk nawk.

"Thik che ila chuan i nui mai mai lo tawp ang" tih paha Awmpuia inher chu kan zui ve vat a, "Eng nge a sawi kha a awmzia, a va inringtawk ve a, ngaihṭhat rukna nei a va ang ve" ka bengbulah a rawn ti sar sar a, min khuah nghet leh lutuka kal pawh ka kal chak thei lo.

"Fiamthu chintawk hre teh aw, kan mizia a in ang vek lo ania" zawi te bawka ka tih chuan, "A thinrim ve thei e law, a tum bur khi hmuh a nuam ve a lawm" a ti duh lek a, ngainep ang deuh hian a han awm ve bawk a, a rilru tak tak a ni lo tih erawh ka hria, chutih rualin venthawnna a nei lo lutuk hi chu a zia lo ka ti, an inhuat phah chuan a pawi ngawt ang.

Dawr kawn kan thleng chho chu kan han ding ren rawn a, "Ka rei dawn lo a, i lo nghak duh em?" ka lam hawia Awmpuian a rawn tih chuan chan pawh ka chhang hman lo, "Ka hmanmawh, ka hmanhmawh" Benan a lo ti leh thawt thawt.

"Naktukah min lo ken mai la, anih loh pawhin ka ṭhiante hnenah lo pe mai ta che" ka ti ta ringawt a, "Ka kawl thei tho a lawm, zanina i zir duh takah ka ti mai mai" tiin dawr chhung lamah min luhsan zui a, nui hmel pu miah loa a kal chuan awm a ti nuam vak lo.

Benjamina bike dahna lam kan pan laichuan ka han hau deuh hlak hlak a, "A number chu ka duh tak tak a nia" a la ti ve fan a, a duhchhan ka zawh lah chuan chhanna mumal a nei lo, "A la ṭangkai ang" tih zawngin min chhang. Ni lo lo a lo tih ka hlauh vangin ka pe duh bik lova, inhmu tam lo sela, inbe tam lo bawk sela a ṭha maiin ka hre tawh, an inhuat loh phawt chuan innel ve kher lo mah se kan ṭha tlang zawk ang.

"I nu chu engtin maw i hmuh?" tiin kan tlan chhuah hnuah ka zawt a, "Ka tlanpel ringawt a, a chawrche reuh lutuk, kan va hmuh lai aikhan a cher a, a damlo a ang riauin ka hria" a tih chuan, "Engtin nge kan va thlithlai dawn a, an inah kal i tum em ni?" ka ti leh vat a.

"Tun ṭum chu inhriattir pawh pawi ka ti lo, thil tihsak te ka chak a, tunge ka nih hre ve hrim hrim rawh se" inrintawk hmel deuh hian a ti a, ka lo thlawp ve khawp mai, a ngaihtuahzia ka hria a, a insum thei ka ti viau zawk a ni.

"I chhungten an hau leh lo ang che maw?" ka ti chu a ngaih hoh hmel leh mai mai khawp. "Eng atan mah ka ngai lo, min hau leh anih chuan ka out vang vang ang" a tia, out hi a sawi ve ziah a, Roman a huphurh tehreng nen.

A nu te veng kan va thleng chu a ṭawngmang tawh lo reng reng, an step bula thingkung hnuaiah ka ding dun reng a, a inngaihtuah aniang chu a vei kual vut vut a, a zam deuh em mawni, nichin lawka a inrintawk tehlul nen. "Chhuk ila" ka tih pawh chuan "Ngawi lawk" a ti zel a, a kut a tuai neuh neuh reng bawk.

"Tunge i nih min tih hunah ka insawi chauh ang, nge 'ka nu' ka ti thut zawk dawn le, min awih loh i ring em, ka hmel aṭang hian a hre  ve mai ang ti raw, mahni fate chu hriat hran ve awm tak a nia, min hriat i ring em?" a ti mawlh mawlh a, ngaihdan pawh ka nei thiam lo.

"Ka hming a hria a ngem le, ka chhungte hian ka hming hi an thlak angem le aw..." a han ti leh vang vang a, ka nuih a za deuh tlat.

"Chhuk phawt ila, min lo biak dan azirin i sawi mai dawn a lawm" ka tih chuan, "Ngawi rawh, ka sawi dan tur ka ngaihtuah lawk phawt ang, smart deuha lan a ngai a lawm" a ti ve tlat a, "Ka sawi sak mai che em ni?" ka ti pawh chu min hnial leh. "Puitling deuha awm a ngai, min lo duh vak loh ka hlau deuh a, zuk pak huam chu ka duh chiah lo, ka hming ka sawi anga, a fapa ka nih thu ka hrilh bawk anga, thutak deuhin ka sawi ang" a ti nghat nghat a, step- a a chhuk tur chiah chu ka lo ko ding vat.

Kan piah kawngpui lam aṭanga nu pakhat lo kal chu ka mitmei zauh a, a tum lohna lama a nu a hmu thut chu a hamhaih nge ni ka lam a rawn pan rawk rawk a, ka hnungah a rawn ding ringawt. Benja nu chuan ip lianpui a ak a, phone-in tu emaw a be mawlh mawlh bawk a, Benja sawi ang tak takin kan hmuh hnuhnun ber aikhan a cher a, damṭha lo a ang tak takin ka hria. Keini pahnih lo ding chu min melh thuak hnuah min kalpel a, min hre tawh lo a ni ngat mai.

"Be ta che, au rawh" ka tih laichuan a nu chu step-ah a pen thla tawh.

"Ka duh mai mai lo, engtin nge ka koh ang?" ti nuah nuah chungin step lam chu a pan a, thawm dim fahran hian a pen thla den den a, a rawn lehhawi chu a nui vur vur mai. Hmui phun hian eng emaw hi a rawn sawi a,  "Ka be dawn.." a ti ni maiin ka hria.

"Be rawh, ko rawh.." ka lo ti ve sar sar a, han au thut mai sela, a nu lo hamhaih dan tur te ka hmu chak.

"Heih.."

"Nu...

"Ka nuuuu..." ka lo ner nang...

"Ring deuhin au ta che, khatiang ser ser te chu..."  

"Ka ko ringawt ngam hleinem, i ngam bik dawn a mi" a tih chuan "Ngam awm e, ka nu anih phawt chuan ka ngam sak" dawh thei lo zet chuan "A liam hmain au vat rawh" ka'n ti zui a, a tum ve tak tak aniang thawm dim tawh lem loin a pen thla hmawk hmawk a, chutih laichuan a nu pawn phone a lo hmang zo chiah a.

"Lo ding lawk"

"Nu.." Benjan a tih chu a hre lo nge ni a lo hawi lo reng reng, a ṭawng zawi ve bawk em a ni. Benja lo hawi chho chu zui turin ka lo mitmei vat a, rawn chhoh leh a tum ut ut nia.

"Lo kal in tum em ni?" tih ri vang chuan a pen tawp chawt a, an kawt aṭangin Pi Manuni chuan min lo en reng tawh. Benja chu a ding ṭha vat a, "AW, KA PI" pawr tawkin a ti, ka lo nui chhuak huk a, an ni pahnih chuan ka lam a lo hawi ve ve, insum chu har tak a ni, an hamhaih hmel te chuan nuih a ti za telh telh.

(End of chapter - 27)