BLUE BAYOU (CH - 28) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 28

Ka lo nui chiam chu a duh dan a ni vak lo aniang chal tichuar tap hian min en a, ka insum leh rang khawp mai. Chutih laichuan Pi Manuni chuan min rawn en vang vang a, "Ka hmuh hnu i va ang e?" a ti ta khauh a, a chiang ngam vak lo aniang a rawn pen hnai deuh a, "Tute nge in nih?" a ti leh zat a.

"Eng lo.." Benjan a lo ti chu a melh vat a, a sawi tlang ngam dawn lo a ang.

"In inah kan lo kal lawk dawn a, midang an awm em?" a tih laichuan ka pen thla ve vat a, Pi Manunin "Bawiha ṭhiante em ni in nih?" a tih chuan "Ni lo e, thil dang zawk a nia" ka lo ti ve thuai a, ba ṭhing tur emaw min tih leh ka hlau a ni.

"Englam nge ni a?" a han ti zet a, ka chhan leh hma chuan "Lo lut phawt rawh u" a tih zawm a, an in lam pana a kal chu kan zui rang khawp mai.

"I sawi dawn chuan felfai deuhin sawi rawh aw, a ṭhawng ve dawn teh ania" tiin Benja chu ka hrilh a, lu min buk khum ringawt thung. 

Inchhung kan luh rual chuan ṭhutna min lo kawhhmuh vat a, "Naupang an la bang nange?" tiin pindana awm chu a be zui a, patling aw hian "Mama a lo haw a, Salem veng-ah a ṭhianpa a kalpui lawk anih kha, Bawihi chu a la rawn thleng lo" a lo ti chuar chuar a, a bag te a dah fel hnuah Pi Manuni chu pindan lamah a lut zui a, "Tute nge lo kal?" ti a an inzawt thawm pawh chu kan hre pha a, Pi Manuni chuan a hriat loh thuin a chhang mai bawk.

Rei lo teah a rawn chhuak leh a, "Eng maw in lo kal chhan?" tih pahin kan epah chuan a rawn ṭhu a, ngaihṭha zan lo hmel a pu.

"Benja ka nia, ka ṭhiannu hi Rintei" Benan a tih chuan a la hrethiam lo tih a lang, Benja chu ka han melh ringawt a, sawifiah a tum lem lo aniang a ngawi ran mai.

"Hmu tur chein kan lo kal a" ka han ti ve leh a, sawi sak mai a ṭhain ka hre tawh.

"Engthilah nge min hmuh in duh a?" a tih leh takah chuan "Benja zawk hian a nia hmu duh che" ka ti vat a, Benja lam chu kan melh ve ve.

"Aaa....eng lo a nia..." a ti nawi niai a, a kawr hnungah ka va pawt leh rih.

"I hre tawh lo a niang, Benjamina a nia, Benjamin Lallawmtluanga" ka ti chiah chu a  meng deuh kawk a, a hrilhhai nge a hamhaih ka ti zawk dawn ni, kan pahnih chuan min en tawn zak zak a, chutah Benja chu a han en leh vang vang a, a ṭhawng ve hle aniang ṭawng mai nachang pawh a hre lo.

"Ka nu i nia" zawi deuh taka Benan a tih chuan, "Eeeee khai...." a ti tlawk tlawk mai.

A rawn ding hluai a, "Chibai rawh" tih pahin ka bula ṭhu chu ka nawr tho sawk sawk a, inhma tawna an han ding chu a nu zawk chuan dak vah hian a en a, Benan kut a phar chhuak chu a lo vuan rang hle bawk.

"Mampui, i lo va lian tawh em em ve maw le, i tleirawl laia ka hmuh bak che kha ka hmu leh ta miah lo che a, engtikah nge mizoramah i lo haw?" a ti he haw a, keimah zawk chu ka bangbo!?

"Hetah ka awm reng a lawm?" hrethiam lo tih hriat taka Benan a tih chuan, "I awmna a rei tawh em?" a nu chuan a ti leh a, Benja kut chu a la vuan reng bawk a, a hnuk a ulh deuh tih chu a hmel aṭangin a hriat theih.

"Khawiah mah ka kal hleinem?" Benja chuan a ti leh mai a.

"Canada-ah i ni Mary te bulah i awm ve a ni lawm ni?" a nu'n a tih chuan, "Awm lo e, anni pawh an lo haw na a rei tawh a lawm" Benan a lo ti sam leh et a, a nu chuan thil hriatsual a nei anih hmel.

"I patean Canada-ah lehkha i zir a ti si a, i la awm reng turah ka lo ngai a lawm maw le?" ti niah niah chungin Benja kut chu a thlah a, kan sirah chuan a rawn ṭhu ve ta bawk a, a fapa chu a la en tlawk tlawk reng, chiang deuha ka va thlek chuan a mit a lo sen ram a, mittui a tling pam bawk.

"Engtin nge min lo zawn chhuah theih a, i pu ten ka awmna an hrilh che em ni, an damṭha hlawm em?" tih angreng a nuin a zawh mawlh mawlh laichuan "Patean Canada-ah ka awm angin a lo sawi em ni, ka chhungte nen in inbe ngai em, i lo kal ngai bawk si lo a, ram dangah ka awm emaw i ti char char a ni maw?" pakhat chuan a lo ti ve mawlh mawlh a, ṭawng an inchan meuh lo, hmuh an nuam dun takzet.

"Engtik kum nge ni ta kha aw, class 10 i zawh kum kha a nia, i patea ka rawn bia a, canada-ah i ni Mary te kianga lehkha i zir tur thu a sawi a, a tukah hmu tur chein ka lo kal nghal a, i pi leh i patea an lo awm a, in lo chhuak hman tawh a?" Pi Manunin a tih chuan Benja chu a lo chek hlak a, "Hostel-ah a lawm ka awm, ramdangah ka kal hleinem" a ti hul hak a, a nu pawh a hamhaih hmel khawp mai.

"Aww....i awm reng tih hriata lo kal ṭhin tur hi ania, ka hmuh chak ṭhin tehlul che nen" a han ti leh vang vang a, a mittui a hru leh rih te chu ka khawngaih ru kher mai.

"A hnuah pawh i lo kal leh lo em ni?" Benan a tih chuan, "Lo kal chu ka tum ṭhin a, midang pawh ka rawn be fo a, i lo la haw loh thuin min chhang zel a, i damṭhat thu bak chu i chanchin pawh ka hre zui lo, i thlalak ka dil lahin an nei ngai bawk si lo a" a ti tham ṭuak a, Benja inhumruh chu ka lo hmu rang khawp mai, tawlh hnaiin a hnungah ka va chul ringawt a, min en lem lo thung.

"Hmuh che an phal lo a, tunah pawh a rukin ka lo kal" a tih chuan an in en ren rawn a, a nuin a sam a rawn chulsak ringawt bawk, an sawichhuak vek lo nain thil awmzia chu an hrechiang dun tih a lang a, a puitling zawk chu ṭawng a insum hlein ka hria.

"I lo damṭha chu ka va han lawm em, tlangval puitling tak tak i lo ni tawh anih hi, i pa i han chhun fuh em em lehnghal a, i pi leh pu te chuan an enkawl ṭha viau che anih hi maw le" a ṭah insum chu a khabe a sai dar dar a, a ṭawng a seh chilh nasa hle bawk.

"Nang i damṭha em?" Benan a tih chuan a nu chu a bu nghat nghat a, a fapa sam chu a chulsak leh ringawt ṭhin.

"Zawh duh che ka ngah asin.." bul angreng fea Benja ṭawng chu ka lo tuihnih vat a, "Hmuh che a chak thei lutuka, a hma pawn kan lo kal tawh a lawm, i chawhmeh zawrh te pawh kan lo dawr che kha" ka lo ti ve sawk sawk.

"Chutia ni maw, engmah ka hre hleinem, engah nge in lo insawi vat loh" a tih chuan, "Kan ngam rih lo a, a chhungte phalna a hmu bawk si lo va" ka ti leh vat a, a hriatthiam ngei tura sawi ka ni.

"Kan pa kha a muhil em ka va en lawk ange" tiin a tho zui a, a kalpah chuan a mittui a hru phei mawlh mawlh bawk a, rei dawn chu a va awm nghe nghe.

"I zawh duh kha zawt tawp tawp rawh.." ti a Benja ka hrilh chuan, "A sawi duh i ring em, min chhuahsan chhan hi zawh ka duh a, ka chhungten an huat chhan hi engemaw tak anih ka ring" a tih chuan ka ngaihdan ve chiah a ni. "Kan inhriattir ta rau rau zawt vek mahla a pawi lo" ka tih laimekin pen thawm a rawn awm a, Pi Manuni lo chhuak chu pindanah a va ṭap anih ka ring, a nui ve tak nain a hmelah chuan hai theih a ni lo.

"A mu nghet aniang, mi pawh a chhang lo" tih pahin kan bulah chuan a lo ṭhu leh a, "Ka zawh duh che chu" Benan a ti chiah "Engtin maw ka awmna i hriat?" a nu chuan a lo tih khalh vat a, a Pu te ṭawng thawm a ngaihthlak ruk aṭanga an veng a hriat dan te, kan pahnih ngei kala kan zawn chhuah dan te chu bah deuh nuai hian a hrilh a, chutianga a fapain a han zawng chhuak chu a lawm hle aniang a nui leh var var ṭhin a, Bena erawh a lungawi lo telh telh emaw tih tur a ni.

 

"Ka sen laiin min chhuahsan an ti a, hnute pawh ka la nghei hman lo an ti bawk a..." ti a a fapa zawhna chu chhan har a ti ngang aniang a inpetruh ṭeuh mai. A fapa kut chu lain a chul riak riak a, a chhang thei lawk lo.

Rei tawk fang a ngawih hnuah a rawn ṭawng chhuak ta hram a, a thil sawi chu kan beisei loh lam daih a ni. Heti hian a fapa zawhna chu a chhang a, "I pa nen khan tleirawl te ka nih laia intawng kan ni a, kan in upat hleih a, ani kha chu Officer a nih bakah chhungkaw khawsa thei taka seilian a ni a, a nupui hmasa nen an inṭhen hnu a ni bawk a, ka la naupang a ve bawk nen kawplai nei lo na na na kha chu venthawn tur an awm lo ah ka ngai a, a chhungte emaw a nunhlui lam kha ka ngaihven ngai lo bawk. Upa zawk tih takah mi duat a thiam a, keipawhin tih takzetin ka hmangaih ve ṭhin, nang hi kan intawn aṭanga thla rei lo teah ka pai che a, inneih ngei kha kan tum ve a.

Mahse, a chhungten kan chanchin an hriat hnu khan kan buai ta khawp mai a, kei lah ka nu hoa hmeithai kan ni a, chhungkaw khawsak nuam tak kan nih loh chu thuhran pasal neih hma a him lo ka ni a, chung thil vang te chu aniang a chhungte khan min lo duh i khaw lo mai a. Mahse, i pa khan min neih a tum em a, ka nu bulah pawh min neih a dil thlap a sin, ka nu kha chuan zu a in nasat avangin a duh chiah lo a, nau kan pai vang chauha min phalsak pawh a ni. Kan inruk ṭum khan an inah min haw pui nghal a, amah ka rinchhan lutuk leh a laka ka lo innghat lutuk kha a pawi a ni ber.

Chhungte duh loh nupui a han nei chu buaina a tam chho a, inchhungah lawm ka nih lohzia a hre ve reng bawk a, zu in lamah a ṭuan phah nasa a, kan inkawl hma pawh khan a lo in viau tawh, i pian hnu lawkah internal bleeding a nei a, rei min dam pui lo, nang pawh thla 8 i pum awrh chauh a ni, a han boral chiah kha chu  hremhmuna awm hi ka inchan ṭhin, nangmah vanga tawrh hram hram ka tum ṭhin a, innei kan nih loh vangin ka awm reng a rem si lo, nang lah ka hruai che an phal lo a, chhuah ruk pui che pawh ka tum ngun. Ṭum khat chu kan in ka thleng phei hman a; mahse, a zan zanah i patea leh i puin an rawn la che a, i ni Pauline-i chah hawin enkawl tur chein an ti tain ka hria, khatih laikhan ka nu kha cancer-in a tlakbuak a, kalsan kha a har em a, anni lamin ka let an remti lo bawk a, nang chu i ngaihtuahawm lo ang tiin ka inhnem ta ringawt a ni. I Ni khan min haw em a, vawikhat chauh hmuh che ka dil pawhin a phal ngai lo, Delhi-ah a chhuk pui zui che a, i senlai bak kha keichuan ka enkawl ve hman ta lo che a ni." a ti sap sap a, a aw chu a tham chhel a, a lawiin a zuih ral hle bawk.

"Chu chu min hmuh hnuhnun ber em ni, a hnuah min hmu leh miah lo maw?" ti a Benan a zawh leh chuan, "In lo haw leh khan ka rawn ngaihven ṭhin che a, ral aṭangin i school kal tur pawh ka thlir ṭhin che, i khawsak a nuam a, i damṭha tih ka hriat avangin ka hlim ṭhin a sin, ka kiangah awm nila chuan nun nuam pawh i nei kher lo ang, chuvangin i chhungte dem lo la, kan chantawk khuarel anih hi i pawm ang aw, hei tunah dam takin kan inhmu a, engmah lungnih lohna tur a awm lo ania, nufa kan nihna a bo reng reng lo, min lo zawng chhuak hi ka lawm lutuk" tiin mittui luang zawih zawih chungin a fapa awmah bei a, Benja chuan engmah a sawi lo, a nu chu nghet deuhin a lo kuah a, a khat tawkin "Ṭap suh" a ti leh ringawt ṭhin a, insum a har a ni, pawn lam hawiin mittui ka hru ve malh malh reng.

Ka ngaihtuahna chu a vak kual nasa ve khawp mai a, Benja chhungten Benja hnena thu an thlen dan hi ka hrethiam thei lo a ni, a nu chhuah chhan mumal tak pawh an hrilh lo a, a sen laia hlamchhiahtu a nih thu erawh an hrilh thung a, a rilruah huatna tuh sak an tum emaw tih tur a ni. An vai mai khan Pi Manuni hi an huat rawn a, tun thleng pawhin hmuh tir an la duh lo chu a nia, mihring khawsak dan tur niin ka hre lo, tunah Benja pawh puitling a ni tawh a, inhmu sela eng nge danglam vak chuang ang le? Mak ka tih deuh pakhat chu Ni Pawlin-i hi a ni bawk, engkim hi a hre ve vek a ngem, Pi Manuni sawi danah khan hmuhtir phal lo bertu a nih hmel a; mahse, Benja lahin a nu chungchangah a thurualpui thei leh ber lawi a, tu hi nge hrilh him a, tu lakah nge zep tur ber pawh ka hrethiam ta lo.

Boruak te a han zia deuh hnu chuan Pi Manunin thingpui min lum sak a, pangngai leh zangkhai zawkin chanchinte pawh an inzawt thei tawh a, Bena pawh a titi a kal ṭan khawp mai. A nuin a zirlai chungchang a zawh chuan "Ka graduate tawh a, eizawnna tur ka buaipui ṭan ang" a ti fiah fak a, a inringtawk tih a hriat hliah hliah.

"Englam nge tih i rilruk a?" ti a a zawh leh pawh chuan "Sumdawnna lam aniang, ruahmanna chu ka nei nual mai" a ti sam et a, ka lo chhuang ve hman dawn dawn a, engmah tih tir an la phal lo tih kha ka hrechhuak leh a, ka khawngaih reuh khawp mai, engtin emaw fuih te ka duh, a Ni emaw a Pu emaw zawk zawk hi a biak thiam chuan kawng a inhawn theih mai ka ring.

"Min rawn tlawh fo rawh aw, a ruk pawhin a pawi lo ania, chawte pawh i la rawn ei ang chu" ti a a nu sawmna chuan a ti lawm hle a niang "Ka lo kal ziah ang, mamawh i neih chuan min lo hrilh ṭhin dawn nia" a lo ti let var a, a lamah tawlh hnaiin ka va pawt deuh rawk rawk.

"Ni Pawli i hrilh dawn em?" ka tih chuan, "A hriat chu a ngai a; mahse, ka ni hi a lo sual reuh lutuka, ka hrilh lo zawk dawn em mawni?" a ti niah niah a, ngaihdan pawh ka nei thiam lo, aman hrilh chi chu a hre zawk  daih ang.

"Ih..ka pi..awh..." a ngawi leh daih.

"Nu ti mai la.." ka lo ti zauh a, a ṭawng zui duh miah lo. Pi Manunin thingpui min lo chhawp laichuan "Ka pute inah ka awm lo ania, i hre tawh em?" a lo ti vat a, Pi Manuni chuan a lo la hre lo anih hmel, zawhna ngah hmel deuh hian a fapa chu a melh a, "Khawiah nge i awm?!" a ti deuh hlut a.

"Ka Ni nen kan indang a, hna a neih hnuah in kan luah hrang nghal a lawm"  Benan a tih chuan Pi Manuni hmel chu a buai nak a, makti lutuk hmel a pu.

"Pauline-i nen maw?!"

"Aw, i chungchang pawh kan sawidun ṭhin a nia, ka lo kal hmasak ṭum khan a hre tawh a, ani chuan a haw tawh lo ang che, buaina dang in nei lo ti raw?" a han ti zui a, Pi Manuni chu a inngaihtuah deuh vang vang.

"I pa te ina ka awm laikhan Pauline-i chuan phaiah lehkha a la zir a, ka awmchhung khan vawikhatmah a lo haw lo, ka chhuah hnuah an chah haw chauh a, mimal taka inhuatna kan nei lem lo, i patea leh i pu saw min ngaithei lo ber tu an nia, i Ni dangte pawn an thlawp a, i pi saw chuan min lainat ve ṭhinin ka hria, hnute i hnek laikhan zanah te hian eitur min lo pe ru ṭhin, midang hmuha min duat kha a hreh a, a ruka min duhsak kha a ching thung a" tiin a nuisang a, ka hriatthiam loh kha a rawn fiah kuar tawh, Ni Pawli chuan midang thu thlen a dawng fuh lo a nih ngei ka ring, a sual ang tih mawlh kha ka lo hlau a, a tihzia hlauh a ni, tunah chuan Bena pawh a thaw huaiin ka ring.

"I Ni chuan a duat che em, a hma khan a duatzia che an sawi ṭhin a, i school tur a hruai che pawh ka hmu fo mai" a nu'n a tih leh chuan, "Sawiselna tur a awm lo, vuina tur pawh a awm lo" Benja chuan a ti ve nghat a, a nu pawh a lawm hle tih a hriat theih. 

Thingpui in pahin kan titi a, a pasal chanchinte pawh kan zawt ve a, a ṭha chak lo viau a ni awm e. "Zanah hian a muhil meuh lo a, chhun lamah hian a mu thei hlauh thung a, a harh hi chuan a pangkham te hi zut sak a ngai ṭhin a, Matei nen hian kan inmen chhawk zak zak ṭhin, tunlai chu Matei te an exam dawn a, keiman ka menpui rih ang" a tih laichuan hriatchhuah nei niawm tak hian a lo hawi a, "I nauten engmah an la hre lo a, an hriat hunah chuan a ṭhawng ve khawp ang le" a ti zui a, kan kal hmasak ṭuma kan hmuh tawh thu te, a u ṭhiante emaw min lo tih thu te ka han sawi chuan kan nui ho dar dar a, khami ṭum khan a fanu khan ba ṭhing turah min ngai kha ania, an pafain a buaiphah viau lehnghal.

"I nau Bawiha hian college a kal ve tawh a, Matei hian pawl 12 a kal mek thunga" tiin lehkha an thiam theih thute, an hunawla an inhlawh ve zak zak ṭhin thute min hrilh luam a, "Nakinaah in la inhmu ve dawn nia, chanchinte pawh ka lo hrilh ve anga, in pahnihin chaw in la rawn eidawn nia" a ti zui bawk a, kan phur tlang khawp mai.

Chutah ka lam rawn hawiin Benja chu a han kheuh zauh a, "Ṭhian nge in nih..?" a ti ta khauh mai a, ka lo lai dawn dawn.

Benja lah chuan "Ka bialnu a nih hi" a lo ti tlang rawt a, "In nih ka ring reng a" tiin a nu chuan min nuih leh var var. Thingpui kan inzo deuh chauh tihah kawmchhak lama mipa ṭawng lawng lawng ri kan hria a, "Bawiha a lo haw a nih chu, nidangah in hmu mai rawh u aw" Pi Manunin a ti deuh hlut. Bena chuan a hrethiam  lo aniang "Tunah pawh a pawi hleinem" a lo ti sam mai a, ka mitmei pawh chu a hrethiam zan lo. Kawngka lama a nu kal chu zui ve mai a tum a, ka lo pawt let vat thung. 

"Chhungkuaa sawi ho an duh ang, kan awm reng a ṭha lo, haw nghal ang" ka ti sawk sawk a, ka bag lain ka pawt nghal dawr dawr a, Pi Manuni chu ka mangṭha zui bawk. "In lo kal leh dawn nia" tiin awki damdiai hian min thlah a, Benja chu a la hawi let ṭawk ṭawk mai.

Chutih laichuan tlangval la naupang tih hriat deuh hi step-ah a rawn pen thla thauh thauh a, keini pahnih kalchho chu min en duh hle bawk. Kan kal pelh ruala ka zuk hawilet chuan a lo hawi ve chiah a; mahse, a nuin a lo koh avangin a hawi let leh thuai thung a, a hmelah chuan Benja nen in an na an nei lem lo, hmai bial khabe tawi lam deuh a ni a, a hmelchhe lem lo nain Benja chu a tluk lo deuhin ka hria, a nau hmeichhia zawk kha chu hmelṭha tak a ni thung a, a nu hmaifang a chhun fuh hle bawk.

"Ka nau a nih kha.." a rawn tih chuan, "I hmelṭha zawk, kal ang" tih pahin ka kalpui hmawk hmawk.

"Chutiang lam i lo ngaihtuah daih e law?"

"Kan kal hmasak pawn ka ṭha zawk ang i tih kha" ka tih chuan a lawm aniang a nui vur vur.

"I zâng huai tawh em?" ka han ti leh a, a lo bu zauh mai, "In bual zo hlim ang sar ka ni" a tih chuan a rilru a sawifiah hle a ni, ka lawmpui ve takzet.

Kan haw leh lam chu kan titi kawngtluan a, a nu te chhungkaw chungchang ngawt a ni kan sawi ni, a Ni hnenah hrilh a tum em ka zawh chuan, "Hrilh ang, a hriat ve vek a ngai, midang chu an la hrilh chi loh ang, ka mark tih ṭhat ve a ngai rih a, ka puin pawisa min pe anih loh chuan ka thiltum engmah a tih theih dawn loh, Picnic spot ka siamna tur ram lah kha ka pu ram ania, an thu ka awih phawt a ngai, zep loah chuan va chhuahchhal ka chak a nia aw, insum ngai lo sela chu vawiin tlaiah hian ka va kal nghal ang maw le, ka ngaihtuah zawng pawh hian ka thinrim, min lo bum mai mai hlawm a lawm maw le " a ti vin pung pung a, chutiang zawnga thil a thlirthiam pawh ka lo beisei lo a, a ngaihdan a sawi te pawh chu ka pawm ve hle a ni, hma hun engmah hriat a ni si lo a, rilru nei tak a awm a ngai ang.

Nidang aiin ka haw hma a, keipawh insum a, fel taka awm tumin rilru ka siam ve sauh sauh a, inchhung chet leh lehkhazir lamah ka ṭuan a ni ber. Chumi kar tluan chu Benja nen kan inhmu lo a, a pu te in lama a tap chawt a ni awm e. In lam boruak chu ipik viau ṭhin mahsela college lam erawh a nuam viau zel, Awmpuian a pawimawh tura a rin te min hrilh ve zel a, Benja chungchang min zawt ngai lo a, ka lakah lawm lohna nei angin a awm ngai hek lo.

Kimkimi pawn Hostel chu min lo biak fel sak a, single room pakhat chiah a awl avangin hmanhmawh a ngaih thu a sawi a, rilru pawh ka siam fel tak tak hmain min lo hauh sak diam tawh. Thla khatah cheng 4000 chawi a ngai dawn a, keichuan to ka han ti mai mai khawp a; mahse, Hostel dang  pawh a aia to te a ni nawk hlawm. Ka nu ka han hrilh chuan "A ṭha mai a lawm, pawisa thawn a ngaih hunah min lo hrilh dawn nia"  a lo ti sam et a, bank account ka neih loh avangin ka han buaipui leh rih bawk a, chutih chhungin a kar leh mai chu kan exam hun a ni tawh.

Inrinni tlaiah zanriah kan eilaiin Nu Hlimi chu ka hrilh ve chauh a, a lawm vak lo. "Engtikah nge luh i tum?" a ti bul deuh hmuk a, thawhṭanni a luh ka tum thu ka han hrilh te chuan min melh ran a, min hnial tlat ang a, ka ṭhulh leh a ngai mai ang a ti a ka hlauhthawn viau laiin "I thu thu a lawm, kan kiangah nuam i tih loh te chuan kan chelh thei hleinem che" a ti ta khauh a, lungawi hmel a pu chuang si lo va,  awm a nuam lo duh angreng khawp mai.

"Nuam lo ka tih vang pawh a ni lo" te chu ka han ti ve tak na a, a man thiam vek thoin ka ring.

Unaunu thung chuan "I free chak deuh a ni maw?" meinei zet hian a ti a, ka chhang duh lem lo. Pindana ka luhsan hnuah pawh an nufa chuan sittingroom-ah an titi ser ser a, ka hre pha lo nain ka chungchang an sawi ngei ka ring.

Pathianni tlaiah ka insiam lawk vek a, thil engkimah chuan ka chhungte chu rawn chi an ni lo, min be duh mang si lo va, mahni a ka inbuaipui vek a ngai. Benja chuan message-in hostel-a min thlah theih tur thu a rawn sawi a, Kimkimi pawn min kalpui a tum a, ka awmna tur Hostel hi an in aṭanga hla lo teah a ni nghe nghe a, ṭhiante an awm hnai tur chuan thla a ti muang ru ve takzet.

Chumi zana mutura ka insiam laichuan Nu Hlimin ka nu a call a, an inbe thawm chu ka pindan aṭangin ka lo ngaithla ve reng a. "Ka hmangaih vanga zilh ka nia, hetiang zawnga thu i lakpui duh hi ka ring hleinem, naupang â mai a la nih hi, a nundan engmah in rawn hmuhpui lo va, a sawi apiang rin tur a ni hleinem" a ti hlak hlak a, ka nu chuan engtin nge a lo chhan ni, "In tih tihin ti rawh u, ka inrawlh tawh lo viau ang" tiin phone chu a dah hmak a, a thawm a reh zui vang vang bawk.

A tukah pawh chuan min la be ṭha peih meuh lo, ka biak chang pawhin a rul tawk chauhin min chhang a, u Lizzy chu haw hma a, eirawng bawl turin a hrilh a, "Tunkarah i pindan kan zauh dawn nia" a han tih te chuan awm a nuam lo leh zual. Chawhmeh siam dan tur te an inhrilh zui a, Unaunu chuan a huphurh tih a lang reng a, nu Hlimi erawh ka awm lo tur chu pawiti tehchiamin a lang lo a, awm ve lo ang maiin min ngaihthah hmiah bawk.

Unaunu zawk chuan "Hruai i ngai dawn em?" a rawn ti ve tehmial a, "I hman chuan duh leh lo kal ve la" ti a ka sawm chuan, "Bena a lo kal dawn chuan ka peih lo" a ti leh lawi a, "Motor an nei a ni lawm ni, an inbuaipui thei ang chu" Nu hlimin a lo ti ve chiah bawk, ka laka an lawm loh chhan hi Benja vang ni ta berin ka hria.

First period-ah attendance an lo tar chhuak a, ka hming pawh a awm ve vang mai. A tukah form kan fillup anga, zirtawp niah exam kan ṭan nghal dawn a, class pawh a mumal lutuk tawh lo. Chawhma chauh kan kal a, dar khat bawrah Kimkimi nen kan inzui haw a, kan gate bul kan va thleng chu rilru a na vawng vawng mai a ni. Ka suitcase kha pawn veranda-ah an lo dah a, kawngka chu tala-in an in kalh bur a, chahbi pawh an dah lo reng reng.

Ka ṭhiannu lah chuan engmah hre ve hek lo, "Pawnah te i dah ringawt a, a bo mai anga sin" a ti hlut a, "An haw tlai ṭhin a, ka kal hma duh takah ka tia lawm" ka tih pawh chuan, "Hmanhmawh a ngai hran hleinem, i chhungte awm loh laia kal daih chu i inthlahrung zawk lo em ni, zanah pawh a luh theih vek a lawm" a ti ve fan a, sawifiah loh law law ka duh, thil sawi nuam a ni tlat lo.

Bena ka call a, a rawn kal nghal tur thu a sawi avangin Veranda-ah chuan kan lo nghak a, a phurna leh ka hrehna chu a inzat thuak ang tih tur a ni. Nu Hlimite nufa hi helaia laichin hnai ka neih ve chhun te an ni mai a, hetiang boruak hrehawm tak nena kan inchhuahsan hi ka ring ngai lo, ka tel loa an buai dan tur te ka han ngaihtuah a, chumai ni loin ka chhiat ṭhatah pawh an ni bak chu belh tur ka nei lo ang, chungthil ka ngaihtuah chuan nuam ka ti lo telh telh, chutih rualin awm zel thei ka nih lohzia erawh ka hria, ka awm reng anih chuan hei aia chhe zawka kan inchhuahsan pawh hi ngai mai thei. Heti hian inthiarfihlim vat ila, mi an haw reng bik lo turah ngai ila, min mamawhna an neih anih phawt chuan ka tlanchhe lo ang tiin rilru ka siam bawk.

"I bialpa kha Awmpuian a hre sa em ni a?" Kimkimin a rawn tih chuan ka inngaihtuah harh zawk. A lam hawiin lu ka bu zauh a, "A thik ve em?" a tih leh chuan "Engmah a sawi lo" ka ti mai a, Awmpuia rilru hi ka hrethiam bik chiah lo, thik ang chuan a awm ngai ka hre lo a, a rilru a na tih zawng kha ka hriat a ni. Min la hmangaihzia chu a awm danah a hmuh theih laiin min thlah theih loh thu a sawi lo a, lungdam lo deuh chunga min kaltir hi a ang berin ka hria, pain a duhpui vak loh tlangval hnena a fanu a hlan ang hi ka tehkhin ber.

"Eng nge a tih ṭhin a, hna a nei tawh nge a la zir ve?" ti a a zawhna chu hna a zawn mek thuin ka chhang a, "Eng ang mizia nge?" tiin min zawt leh a.

"Thothang ṭha deuh, a ṭawng duh angreng a, a ṭawngkam a nem ve vak lo nain a rilru a chhe lo thung a, engpawh a sawipui theih, mi pawh a rel pui bawrh bawrh theih" ka tih chuan a nui a han za khawp a, "Ka kawm duh chi a nih chu" tiin a nui kar kar.

"In inkawmngeih viau ang, i lo be bawrh bawrh dawn nia" ka tih hnu rei vak loah Benja chu a lo thleng a, Gate bulah lo dingin min rawn hui zauh a. Kimkimi nena Luggage kan zawn phei chu gate kan chhuah rualin min lo laksak vat a, a car rawn ken chu a hmain ka la hmu miah lo.

"I Ni car a ni nange?" a dar a kan ak a, "Ka Pu ta, petrol lak haw ka ngai dawn" a lo ti vat a, Kimkimi lawm hawiin "Hostel-ah i awm ve em ni?" a ti zui zat bawk.

"Awm lo e, hostel piah lawk ah kan awm" Kimkimin a tih chuan, "A va tihzia ve, chawte eikhawm ila, sa ka tum ang" a ti nghal hlut a, Kimkimi a lo phur khawp mai.

Kan tlanchhuah hnuah pawh an sawi zawm mawlh mawlh a, "Chawhmeh te i va pe thei ang chu, artui rawn kan zawk te a rem ang ti raw, Hostel fee a tlawm sia, an mess a ṭha lo mai thei" Bena a tih chuan ka nuih a za ru hle.

"Aw..nangman i pe ang chu, tiffin pawh i lo ken sak ṭhin tih ka hria ania aw" Kimkimin a lo ti ve leh hlut. "Tunge i ṭhiannu kha, engati nge in lo hruai ve loh?" tih angreng an inzawt zui a, vawiinah Mawitei a kal lo a, an naute a dam loh vang a ni.

Benan "Beer i in ngai em, ka nei asin" a tih chuan ka lo ip ru nasa mai. Mahse, Kimkimi chu a lo in ve thei tlat, "In inah eikhawm zawk ila, kan ina kan tih chuan engmah ka in ngam lo ang, exam zawh hunah Mawitei te nen kan ti dawn nia" a ti ve luam a, Awmpuia chungchang zawh a tum erawh ka lo khap vat thung.

Hostel kan thlen chuan warden-in min lo chhawn a, ka room tur chu inchung berah kawngka bul mai a ni, bathroom a hnaih ber a, tukverh pakhat a awm bawk a, a zim nain tukverh chuan a ti eng ṭha phian a, bungrua ka ngah lem lo bawk a, ka tan chuan a tawk tiu teu viau mai. "Hotpot in kawl thei anga, inbualna tur tui in lum duh chuan inhnuaiah mei chhemna kan nei a, in khaichho mai dawn nia, tlai dar 5 ah leh zing dar 7:30 ah chaw kan ei ṭhin ang" tih angreng chu warden chuan min hrilh zung zung a, mi engzah nge awm ka zawh chuan 20 lai an awm thu a sawi a, a tam zawk chu double room a ni awm e. 

"Zirlai vek em ni?" Benjan a tih chuan, "College kal an tam ber, hna thawk an awm nual a, B.ed training lai pathum an awm bawk, higher kal pahnih nen" a lo ti zat zat a, chutah ka lam lo hawiin, "Tikhan lo indahfel ula, chaw ei hunah kan lo hrilh ang che u" tiin min chhuahsan zui a, a chhuah hnuah Kimkimi chu a hming ka zawt a, "Nu Thante kan ti mai zel a, a hmingpum ka hre lo" a ti a, Hostel chhak chhiah a building ah an khawsa anih hmel.

Kan inremfel chhungin Benja chuan a lo enkual a, Veranda thlanglam te chu a va thlek nasa mai a, "A rem lo e" a ti leh ringawt ṭhin a, eng chu nge rem lo a tih ni.

"Mipa len vak a theih loh ania aw" nuichunga Kimkimin a tih chuan a ner nang a, "Luhrukna tur ka lo zawng mek a" a'n ti pek a, a va ho mai mai.

"I Veranda aṭang hian pawn gate saw a lang thei a, sawta ṭang sawn ka lo ko ṭhin ang che" a tih chuan ka lo nui hak hak. "Lo kal ngun viau lo ang che, exam ka nei dawn ania" ka han ti zui a, Nu Hlimi te inah khan a lo len ka khap hmiah si a, Hostel ka han awm tur chu a phur ve khawp a, a lo kal fo ang tih phei chu ka hlau.

Dar thum pelh thlengin an awm a, Kimkimi chu "Ka rualin i haw dawn nia, ka va thlah ang che" a tih vangin an chhuak rual a, kawngpui thlengin ka zuk thlah ve bawk. Ka let leh hnu lawkah Hosteller dang an lo haw a, ka room-ah ka inkalhkhum tlat avangin an hmel pawh ka hmu lem lo, an ṭawng nak nak a, ka room-ah chuan mithar an awm thu te an sawi a, a ṭhen an zai al al bawk a, a khawharthlak dawn lo hlein ka hria.

Phone ka bih melh melh laiin Kimkimi call a lo lut hlawl a, in a thleng fel der tawh. "Bena kha a fel ka ti teh mai ania, a ngaihsak hmel bawk che sia, Awmpuia aia a ṭhat lohna ka hre tawh miah lo, hmelah chiah a tluk lo a nih kha, kawm a nuam bawk si" a rawn ti lang lang mai.

"A ṭawng duh ka tih kha..in inkawmngeih dawn lutuk" uang angreng zeta ka tih chuan, "Nia, a ṭawng ve phawng phawng zel, Awmpuia chungchang te min zawt a, a thik ve deuh aniang ka tia; mahse, a fak teh daih a?" a tih chuan ka nui sak.

"Engtin nge a zawh che?" ka lo ti ve vat a.

"Kan ṭhianpa cool deuh kha in classmate a ni em a tia, 'Awmpuia' maw ka tih khan 'Zawlpala emaw ka tia" a lo ti a lawm, Tualvungi leh Zawlpala thawnthu drama-a in chan thu te kha ka hrilh a, 'Tun aṭang chuan Zawlpala min ti thei tawh anih chu' a lo ti ve ngei a, 'Nang chu Phunṭiha zawk' ka tia, a duh lo ve lutuk" tiin a nui hawk hawk.

 "In van sawi ho em em" ka lo tih laiin, "Aw, amah khan a sawi ho zel a lawm, Awmpuia ka fak deuh khan a lo sawisel a, ka sawisel dawnin a lo ṭan leh daih zel a, a thik ve deuh chu a nih kha; mahse, Awmpuia hi chu sawiselna tur a awm lo ve em a, i bialpa pawh khan sawichhiatna tur a hre vak lo anih kha, a lawmawm reuh e...chhaih a nuam tawp" a nui ri chu ka ngaithla reng a, sawi ve tur pawh ka hre lo. 

"Kimbawih..."

"Awih ah....enteh Rinte, chaw chu la eikhawm tak tak ang u aw, Mawitei nen kan paliin kan ti mai anga, chaw eikhawm pawh kan la nei ve miah lo , Awmpuia ṭhiante nen in eikhawm bik ziah a, tuna i bialpa hi chu kan kawm ve duh tawh ania, inti hrang tawh miah suh u" a rawn tih chuan ka inhrechhuak ve ram ram. Awmpuia hi Noeli vangin an pawh lutuk ngam lo a, kei lahin sawm nachang ka hre bik lo, kan lo inti hrang ṭhin ngawt ang a tiin ka ngaihtuah let neuh neuh a, a ni thei dawn hlein ka hria. Amah Awmpuia hi chu an ngaina a, fel pawh an ti reng a, ṭhian ang tak takin an pawh lo thung, keima thiam loh zawk tak pawh a ni.

"Kan la tum dawn nia, exam zawh lamah hun remchang a awm mai ang" ka tih chuan a rawn phul leh hlut. 

"Khawiah nge kan tih ang?"

"Ka hre lo le, Bena te inah a rem mai ka ring"

"Nia, kan in pawh a rem a; mahse, beer te kan in dawn sia" a aw aṭang pawh chuan phur tawh tak a ni, kan inbiak laimek chuan "Chaw a ei theih" an rawn ti lauh a, "Chaw kan ei dawn" tiin ka ṭhiannu chu ka mangṭha zui a.

Ka room aṭanga ka chhuak chu ka piah chiah aṭangin hmeichhe pakhat hi a lo chhuak a, min hmuh rualin min lo nuihsang a, "Lo awm thar kha a mi?" a tih chuan ka bu nghat.

"Kan room a indawt chiah ania aw, college kal lai ni em?" a tih leh chuan, "Ni e, nang zawk?" ka lo ti ve vat a. 

"B.ed ka training, ka zo ve ṭep, engtin nge an koh che?"

"Rinsangpuii, Rinte min ti mai rawh..." kawngka ah inzui chhuakin inhnuai lam kan pan dun a, ka ṭhiannu thar hming chu Nanai a ni, chhim lam khua Lawngtlai aṭanga lo kal a ni awm e.

Chaweina ah pawh kan ṭhudun a, hostel chungchangte min hrilh luam a, bathroom an intihfai chhawk ṭhin a, kawt zawl te pawh inhnuai ho nen an inphiah chawk ṭhin  a, inhnuai lamah awm te a phawhraw deuh a, an inhauh nasat ṭhin thu te min hrilh luam a, inchunga ka awm chu vannei ka inti ru khawp mai, a chhan pawh "Inchung chu kan fel, kan inngeih tlang" a tih vang a ni.

Choka ah chuan tlangval kan rualpui vel tur hi pathum lai ka hmu a, hosteller nge helaia hna thawk an nih ka hre lo, Nanai ka zawh chuan, "Kan warden nau te an nih saw, eirawng an bawl ṭhin, an siam thiam lo rapthlak" ner nang hian a ti a, kan chawhmeh pawh chu an siam aniang, tui lo ve tak a ni, zana eitur ka lei loh vangin ka ei lui hram hram a ni ber.

Kan chaw eikham kan chhoh leh lamah chuan midangte pawh kan tawk a, mi an en hrek hrek a, mi bia pawh an awm lem lo. Nanai chu rei lote ka room-ah a lo lut a, tuibur hmuam a duh vangin a chhuak leh vat thung. Ka phone kalsan ka han en chuan Benja message a lo awm reng tawh, "Ka thleng tawh e, i khua a har em?" tih hi a lo ni a, a tawi viau nain minti hlim ru veng veng.

"Ka khua har ta sela engtin?!" 

"Ka lo hruai chhuak ang che" 

"Lehkhazir tur hlirin ka khata, khawhar hman pawh ka ni lo" 

"Anih chuan zir char char rawh, khaw har rawn sawi miah suh, tuarzuau viau loh tur" a rawn ti ve ngei a, "Eitur nen min lo kan ṭhin ang che" ka lo ti let zauh. "I duh duh rawn sawi rawh" a tih chuan a ti leh tak tak dawnin ka hria a, ka han khap leh rih.

Zanah chuan ruah a tla cherh cherh a, kan floor-ah chuan exam tur an awm ve nual aniang lehkha chhiar lauh lauh thawm hriattur a tam a, kei erawh ka zir hleithei lo, zep loah chuan ka khua har takzet. Tukverh aṭangin pawn ruah sur chu ka thlir a, ngaihtuahna a vak kual nasa ngang mai. Nu Hlimite nufa chuan min ngai ve angem le ti tein ka ngaihtuah a, min ngai lo anih pawhin an ruak ve huaiin ka ring, kim lo tlat awma ka hriat ang hian an kim lo ve mai thei, ka pindan kha ka mitthla ah a lo lang a, choka dawhkan leh ka ṭhutna bik chair te, veranda zaupui leh kawtkaia pangpar inhung zawng zawngte nen, ka bathroom zau deuh kha...chutah chiah chuan hriatchhuah zawk ka nei, bathroom ah khan Benja Vodka kha ka thukru a, ka la chhuak leh miah lo, khai aw, ka pindan an singsak hunah an va hmuchhuak ngei ngei ang.

"Ben, i vodka kha Lizzy te inah ka theihnghilh daih a nia?" tih chu Benja ka thawn a, rei vak loah "E khai aw, a lo in ringawt ang chu, ka va ui" tiin min lo chhang a, a thil lo ngaihtuah teh daih chu.

"Nu Hlimin lo hmu ta se?"

"Aw eng nge pawi tawh chuang a, i out tawh a lawm"

"Mahse, ka pa a lo hrilh chuan..."

"Lizzy ka lo hrilh ang, lo lungngai suh, a la rang viau ang" a rawn tih vang chuan ka awm a nuam deuh huai, U Lizzy chuan a lak duh ngei ka ring, a nu a hrilh phalin ka ring lo bawk.

Zan rei deuh thleng chu lehkha ka zir ve a, mithar ka ni vei nen ka chhiar ring ve ngam lo a, ka pindan piah lam a mi te erawh an thawm a rin ang aiin an reh hma a, dar 12 dawnah chuan a reh ṭhap tawh. Zing hma deuhah thawm a rawn awm a, an tho hma hlawm khawp mai. Keipawh Nanain min lo koh vangin ka thochhuak ve vat a, thawh veleh a chawei chu a har hret a ni. Nanai nen chuan class kal turin kan chhuak rual a, kan kalna lam a in an loh vangin taxi stand ah kan in ṭhen thung a, phone number te pawh kan inpe nghe nghe.

Chhun lamah exam form kan fillup a, rei lo te class kan kal zui a, Awmpuian handout a sem bawk a, kan bang chu a ni zui der. Hostel ah Kimkimin min lo zui haw a, question hluite en dunin tlai thleng a lo leng a, chawei turin min sawm ve ngial a, ka chhuah peih loh em avangin "Exam zawhah ka lo ei dawn nia" ka ti ve tlat a, kawngpui thlengin ka zuk thlah bawk.

Zirtawpni ah exam chu kan ṭan a, a nikhat ni chu ka chhang ṭha ve viauin ka hria, exam kar lakah chawlh a tam a, dawrah ei tur leia ka chhuak ṭhin tih loh chu ka pawn chhuak lo tluk a ni. Zantin ka nu nen kan inbia a, exam zawha haw chho turin min chah ngun hle a, a damṭha vak lo aniang min ngai em em reng. Ka pa erawh a buai ṭhin khawp a, ka han biak chang pawhin vawk chaw a chhum loh leh vawk chaw lain a lo chhuak daih zel a, kan inbiak hi chuan a vawk chungchang ngawt chu min hrilh ṭhin a, han hmuhpui ve pawh ka chak viau a, exam zawh chuan haw ve ngei pawh ka tum.

Lehkha ka zir ngawrh ve bawk a, exam pawh harsa lutuk loin ka zo thei a, ka chhang ṭha ve viauin ka hria. Thla khat zen zawn chawlh kan nei dawn a tiin haw tur chuan rilru ka siam a, Awmpuia phei chu kan exam zawh tlaiah a haw tawh a, kei erawh chawlhni ka hmang leh te te a, a chhan pawh Benja vang a ni.

"Chawlhni tlaiah ka hruaichhuak ang che, chaw i lo ei dawn nia" a tih vangin warden bulah ka chhuah tur thu ka hrilh lawk a, a tuk zingkarah ka haw dawn avangin ka insiam lawk diam bawk. Nanai bulah "Min lo mutsan lo la, dar 8 hma a lo haw hman ka tum ang, kawngka an lo kalh hman anih pawhin ka lo call mai ang che" tiin ka hrilh lawk bawk a, ani pawn haw har lo turin min chah a, inthlah nan noodles chhum ho an duh a, kan floor-a awm ve dangte pawh haw tur an awm nual a, Nanai erawh tihtur dang a neih avangin a haw ve dawn lo thung.

Benja chu ka han call ṭhin a, a chhang thei reng reng lo mai a, vawi 10 chuang ka call tawh. Tlai dar 3 pelh ah pawh a la rawn lang thei lo a, bathlar ah Nanai nen kan lo nghak dun reng a, a khat tawkin gate lam chu ka va hawi leh ṭhin. Dar 4 a rik hnu chuan ka thin a rim hlur tawh a, ka ṭhiannu lahin chawei turin min chhuk san a, an chaw eikham an lo chhoh leh hnuah pawh Benja chu a la rawn thleng thei lo.

Ka lungawi lo chu ka inthlak leh sawk sawk a, khumah ka mu tau bur mai. Ka phone pawh en duh loin Nanai room-ah ka pheisan a, a perfume te ka va en sak a, chutih laia ka phone ri pawh chu ka hre reng a, ka ngaihsak duh lem lo. Rei deuh hnuah ka va en chuan Benja missed call a lo awm a, a message pakhat nen.

"Ka out" tih zawng hi a lo thawn a, lungawi loh sa nak a lai chuan.

"I lo kal dawn em?" ka va ti leh hram a, lo kal pawh nise ka zui chhuak tawh kher lo ang ka ti rilru a, ka message lah chu a rawn chhang har hrep.

Dar 8 dawnah a rawn chhang a, "Bike ka keng lo, Roma te inah ka leng rih lo a, Lza te inah ka phei" tih tlawng a ni.

"Eng nge i out chhan?" ka va tih chuan, "Sawi tur a tam, mahnia awm hi ka zir a ngai" a rawn ti leh tlawng a, ka hrethiam lo nasa. Ka call zui a, a lo chhang rang khawp mai. 

"Eng buaina nge i neih a?" lawm vak lo a ka tih chuan, "Ni Pawlin inleng a nei a, pasal neih a lo tum reng a lawm, a thu loin palai kha an lo kal dawn lo reng reng, a rukin rem an lo ruat tih hriat reng" a ti hluk hluk a, eng nge a lawm loh chhan chu ka hrethiam lo reng reng.

"I Ni a nih kha, i fanu pawh a ni hleinem, a upa tawh a, pasal neih pawh a hun tawh lutuk, lawmpui zawk tur i nia sin " ka ti dek dek chu, "Min râwn ve tur a lawm a nih, engmah a sawi hleinem, an sawifel vek hnuah min hrilh chauh lehnghal a, ka lawm teuh lo" a ti vin leh hluk a, sawipui vak dan pawh ka thiam lo.

"Lza te chu khawi vengah nge an awm, mi inah i awm ringawt zel a, an lo ning che ange" ka tih chuan, "Roma pawh a awm, zanin chu kan riak ho ang" a ti bul hmuk a, ka haw dawn tih kha a theihnghilh a niang, engmah lah chu min zawt lo a, ka sawi duh bik lo.

Thin ri rim zual turin "Kan chhuak lawk dawn a, min lo mutsan suh" a la ti zui a, "Ka mu dawn" tih leh phone dah ka rual. Mutsan chu ka tum uk uk a, a hrechhuak thut anga, lo kal a duh leh rum rum ka ring si a, ka muhil thei lawk lo. Mahse, dar 11 thleng pawhin a rawn call leh ta lo a, an leng an la haw lo aniang.

Zing dar 6 ah kan khaw lampanin kan tlan chhuak a, mut ka kham lo bawk a, ka muthlu bawk bawk reng. Benjamina lah pek chuan chhunah eng nge ka tih dawn min la zawh heh mai a, "Lo insiam rawh, thil tui deuh ka lei ang che, pawisa ka ngah mai" a rawn ti ham ham a, rei deuh chu ka chhang duh lo. Thingpui ina kan chawlh laiin ka haw thu chu ka va hrilh chauh a, a rawn thinrim ringawt a nih chu.

Min rawn call a, "Engati nge engmah min hrilh loh, thil hrilh tlakah hian min ngai hlawm loh a nih hi, tumah hian mi in ngaipawimawh ve lo" a rawn ti pawng pawng mai, ka thinrimzia chu aw....

"Nizan hmasa pawn ka sawi vek, ka hrilh zing lutuk che.." pawr fea ka tih laiin "A hun i sawi lo, haw ka ngai dawn ti ringawt anih kha, sawi chiang la chuan ka rawn thlah ang che, engmah i sawi chiang lo..i haw hnuah min hrilh chauh a nih hi" kei aimaha pawr chuan a rawn ti let.

"Mi an tam, phone ka dah dawn" ka tih lahin "Min lo ngaipawimawh lo hle mai" a rawn ti ṭha leh a, ka ner nang ringawt.

"Nizanah pawh ka nghak reng che, zankhuain khawiah nge i lenbo pawh ka hre lo, min ngaipawi lo zawk chu a nih kha, ngaipawimawh chu ni la i theihnghilh miah lo ang" ka han ti ṭha leh rih a, ka ṭawng ring ngam lo.

"Ka rilru a van na em em ve, ka out laiin min haw san daih ania, tlaiah ka rawn hrilh che a, tinge i ṭhulh mai loh" a tih chuan thawk ka la hak, thil hi a ngai awlsam leh lutuk anih hi.

"Ticket ka la fel vek tawh a, ṭhulh theih a ni tawh hleinem" ka tih chuan "Aw haw rawh, haw vang vang rawh" a rawn ti chiam pek a,   phone chu dah ka tum hman ut ut; mahse, "I thlen veleh min lo bia ang che, ka lo nghak dawn ania" a rawn tih vang chuan ka ngawi ran a, phone chu ka la vuan reng bawk.

"Ka thinrim lo, tluang deuhin i haw dawn nia, i haw tih ka hre thut a, ka lawm lo deuh mai mai anih kha" a tih ri ah chuan titau awka ka la hre thei.

"Vawiinah haw ang che" thupe aw zeta ka tih chuan "Aih" a rawn ti bawl a, "Haw ang che" ka ti nawn leh ngat.

"Ka haw lo nasa ang, ka sazu hmawrah min pawt pawh nisela ka haw lo ang" tiin phone a dah hmak mai. 

Midang an inpeih tawh avangin ka call zui ta lo a, sumo a kan chuan hnuah message chu ka thawn leh hram a, "Mark tih ṭhat i ngaih kha, va haw ngei ngei rawh, i Ni tan pawh khatiang chuan a nuam lo ang, rilru hrehawm deuhin a awm phah a nge" ka va ti ve luam a, min chhang lem lo.

Kan khua kan thlen chuan chawhnu her a ni tawh a, ka pa'n min lo hmuak a, a vawk chaw la a lo tlang aniang hnathawh kawr nen bal deuhin a lo awm a, in kan han thleng te chu ka bag a nghat sawk sawk a, kawmchar lamah min ko chhuak a, vawk chu pariat lai a lo vulh tawh. Ar note a lo la thar bawk a, a phur hmel surh surh khawp mai.

Benja chu ka thlen thu ka hrilh a, a la haw lo aniang "Roma te inah chaw kan ei dawn" a rawn ti a, a reh zui vang vang. 

Chumi zan chuan ka nu'n min lo call a, a tukah dawra leng phei turin min lo sawm a;mahse, zingkar aṭangin ka pa nen Pa Muana te inah kan chho a, chaw kan ei a, chhunah kawlbahra hnah te kan hlep a, kan inpeih chuan eirel a lo hun leh tawh a, ka nu pawh chu ka hrilh lem lo, va len reng kha ka hreh deuh a, U Rinawma awm lai anih te ka hlau. A tukah pawh ka pa Muana te nupa nen an loah kan feh a, tlai ka haw chu ka chau khawp mai a, zantirah ka mu hmiah bawk. 

Zinga ka thawh chuan nu Rami a lo kal a, vawkchaw tur chaw ṭhing a lo dah dawn niawm tak a ni. "I nu i tlawh tawh em, tukinah sahdah ka va lei a, "Matei chu mi pawh a tlawh ṭha duh lo" a lo tia, i hostel fee te a tum vek a ni lawm ni, thil lei pah ten va tlawh ve zuai la" a lo ti luam a, ka nu chu a lo mangang hman anih ka ring.

"Chaw eikhamah ka va kal ang" ka ti ve mai a, U Rinawma chuan school a kal ka ring a, a awm loh lai zela kal ka duh a, mite hmuha inpawh emaw innel tak anga lan hi ka duh lo, ka pa tan a nuam lo ang.

"I nau nen chuan in chhang a khat dawn hle mai a" a rawn ti chu phawk fein ka melh a, ka hresual em mawni ka ti rum rum.

"Ka nau a...?" ka ti let haw a, a lo bu nghat.

"I la hre nange, i nuin nau a pai a lawm, inentir tur pawn an lo kal kha" a ti leh ta mai a, min ṭhawng dawt a ni ber, ka lo beisei loh tawp thil, ngaihtuah nachang pawh ka hriat loh thil a ni, min ti hamhaih takzet.

"Ka pa'n a hria em?" 

"Hre tawh ang chu le, kan hre vek tawh a lawm" 

"Engtin nge a tih a?" 

"Tih vak dan a awm chuang hleinem, i pa te chuan a lawmpui leh mai ang" tiin a nui ruh ruh a, kei chu ka chiai ruai mai, ka lawm ve hauh lo, nau han neih te chu suangtuah dan pawh ka thiam lo, chu loah ka zak deuh riau a ni.

Nu Rami chhuah hnu chuan chapal ka bun sawk sawk a, vengchhaka ka pi te in lam ka pan nal nal bawk. Ka han thlen chuan Putea te nupa an lo awm a, ka pi chu damlo kanin a lo chhuak a nih hmel. "Engtikah nge i lo haw a?" Putean a tih chuan, "Thawhṭan khan" ka ti mai a, ka chhuk hun tur min zawt leh zat.

"July thla tirah ka chhuk ang, ka nu chanchin in hre tawh em?" ka ti tawl a, an nupa chuan min lo melh rang khawp.

"Eng chanchin?" putea bawk a ni.

"A rai a lawm.." phawk fein ka melh a, Putea hmelah chuan ka ṭhawng lo tih a hriat hle bawk. Chu ai maha mak ka tih zawk chu a ṭawngkam rawn chhakchhuah chu a ni, "Mipa pangngai bula a han mut chuan a rai leh mai a lawm hei" tiin a nui hawk a, ka pa hming chu a lam ri hauh lo; mahse, a ṭawngkamah chuan ka pa chunga a rilru chu langchiang tak a ni.

"I sawi zak lo e, an inṭhen chhan te chu ka nu uire vang a lawm maw le" ka lo ti vin deuh chiam.

"A ve vak vak a che, i pa chu a ching a nih te kan ring asin" a tih leh chuan rum theihtawpin ka lo melh a, ka Putea chu ni lo sela chuan ka nasa khawp ang.

"Rinte, mak kan lo ti mai mai a, i nu a rai awlsam leh hle sia" Pitein a lo ti veleh chu "I sawi ve tur a awm lo" ka lo ti hmak a, ka insum zo lo lek lek.

"Rinsangpui, ṭeu hlar reng suh aw, thil engmah i hriat loh kha, i nu hi i burbun fai vek a, i pa pawh khu i pa tak tak a ni lo maithei a nia" lo ti tu chu Putea a ni, engtin nge chutiang thil a sawi theih?

"In zakthei lo e, ka pa anih lohin tu pa nge anih anga, i puhchhe chak lutuk puhna tur in hre lo hi inkhawngaihthlak" tih pahin ka inher nghat a, kal mai ka tum chu Putea thil rawn sawi leh vang chuan ka ding dat.

"I nu kha a rai lawk miau a lawm, khatih laia a bialpa emaw kan tih lah kha a puh miah lo a, i pa zawk khu a puh a, Thantluanga fa i nih tak tak pawh ka ring lo e a, chhang pawh i neih miah loh hi, i nu lah heti hian a rai leh mai a, ka ringhlel riau tawh" Putea chu ka va melh ngar ngar a, a ṭawngkam chuan mi rap takzet, awih pawh ka duh lo, dawt anga ka ngai chung pawhin min vilh ngut ngut a, ṭawng pawh ka ṭawng chhuak thei lo, inpetruh chungin kut ka hum khur ngawr ngawr mai a ni.

(End of chapter - 28)