BLUE BAYOU (CH - 29) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 29

"A mak, naupang bula sawi chi pawh a ni lo" Pitein a lo ti ve tak na a Putea hmelah chuan  inthiam lohna pakhatte mah a lang lo.

"I DNA test ta ila chuan a i pa khu mihrang hlak anih ka ring, i nu hian a zep mai mai a ni" a la ti duh cheu a, ka ṭhinrim chu ka ṭap lo chauh tawh. 

Chutih laichuan ka pi leng a lo haw a, kawngkaa a lo lut tur chuan phawk lek lek hian min lo en a, "Min va rawn tlawh har ve,  chaw ei ve nghal ta che" a tih chuan ka chhang lo, hmanhmawh deuhin kawngkhar lam ka pan a, "Rinte.." ka Piin a tih leh rual chuan ka tlan hlawk hlawk a, ka mittui a luang zung zung bawk. Step ka thlen dawn a ka va lehhawi chuan an veranda-ah dingin min lo la en ve reng a, ka pi takngial pawh hi nel harsa ka ti, ka nu leh pa te inṭhen tirh khan ka pa kha a dem em a, ka nu a ṭan em em bawk a, ka lakah hian eng rilru nge a put ka hrethiam lo, min hmangaihna te hi a nei ve em le tiin ka inzawt ru hial a ni.

Pa Muana te inah pawh kawi loin ka haw tlang a, kawm char lama ka pa thawm ka hriat vangin ka pan phei vat a, vawk in bula a lo ding chu ka thlir reng ringawt a, zawhfiah pawh ka chak lo, thudik a nih thu min hrilh ka hlau, a lo dik a nih teh chuan ka rilru a na dawn em a, ka hre ngam hlawl lo a ni.

"Khawiah nge i kal a, chawei dawnah i lo chhuak daih a?" a rawn tih chuan "Ka pite inah ka han kal lawk a, chaw ei ka siam dawn asin" ka ti let vat a, a lo phei ve mai bawk. Tukṭhuan kan kil laichuan vawiin lama a tih tur te a sawi zung zung a, kei erawh ngaihtuahna kawmin ka ngawi leh veng veng ṭhin.

"I chau viau e law..?" a rawn tih vang chuan ka harh deuh zawk a, min lo enchhik khawp mai.

"Putea nen khian in inmil vak lo ti raw?" ka'n ti ngawt pek a.

"Mil loh pawh ka hre hleinem, kan inbe tam vak lo a" a ti mai a, zawhna nei hmel a la pu reng.

"Anih, ka pi te hian an be ṭha che em, ka nu awm loh hnu hian pawh an har tawh em a, i bulah te sawi an nei ngai em?" ka ti leh a, ka pa chuan a hrethiam vak lo aniang a hmel a buai deuh.

"I pi chu a lo kal veleh zawk ṭhin a, vawk a rawn en ve zeuh zeuh a lawm" a ti leh mai a, ka pa hi chuan ka nu chhungte pawh a biak chhiat phah lo ang tih ka chiang, han rel ve deuh pawh hi a nei ngai lo.

"Sawi an nei em ni?" tiin min zawt veleh khauh a, lu ka thing ringawt.

"Vawiin chu len phei i tum maw?" a tih chuan ka chak lo ru khawp mai, amah bawk chuan "Va leng rawh, vawkchaw chhum pahin inbul hi ka thlofai mai mai ang ka tia, tlai eirawngbawl hmain lo haw la" a tih zawm leh a.

"U Rinawman nen in inhmu ngai em?" ka ti chu chawbar ṭhulh meuhin min lo en a, "Hmu ve zeuh zeuh?" tih zawngin min chhang.

"Engtin nge a biak ṭhin che?"

"Kan inbe ngai lem lo, min hel ve deuh ṭhin a, biak dan vak pawh ka thiam lo" a tih chuan ka lainat thar leh, hengthil ka sawipui ziah hi a fuh lo riauin ka hria, ka hostel fee an tum te pawh hi nuam a ti lo tih ka hre ve miau a ni.

Chaw eikham veleh in ka tifel zung zung a, ka insiam laichuan kawmcharah vawk chhaw a lo chan a, ka kal chhuah tur thu pawh ka va hrilh ve thlap a, "Rei lutuk lo la" a tih chuan "Thingpui hmeh ka lo lei haw ang" ka ti ve vat a, ka nu dawr leh U Rinawma thawhna school hi a inhlat lo a, chhunah a lo haw ka ring, thil lei pahin ka va ṭhu ve zawk chauh ang ti rilru chungin ka nu dawr lam chu ka pan a, kawng lakah hmelhriat ten min lo be leh zauh ṭhin.

Ka nu dawr lan phakna ka thleng chiah tihah Hruaizeli ka tawk hlawl a, a damlo nge mawni a meng sen deuh ram a, an ina leng turin min lo sawm mawlh mawlh. "Tinge i mit kha, a na em ni?" phawk fea ka tih chuan "Na lo e, ka thawhna a la rei lo" a ti liam puat a, a rui zawk nge mawni, ruih nei a ang riauin ka hria.

"I let leh lamah lo peng kawi rawh aw, vaimim ka lo chhum ang" tih paha min kalsan chu ka enzui reng a, damdawi a ti leh tawh anih ka ring, hman deuha ka haw kha chuan a piangthar a, kohhranah pawh a inhmang viau kha ania, kan khuaa ka ṭhianṭha ve ber a ni nain ka nu hian kawm a phal vak lo a, phone-ah pawh kan inbe khat khawp mai.

Dar 10 bawr chauh a la ni chungin ni a lang lo a, van lamah pawh chhum a chhah angreng viau a ni. Ka nu dawr ka va thleng chu a lo phul ve hlut a, ka tlawh har a lo ti viau anih hmel. "Engtikah nge chaw i lo ei ang, ar talh sak che kan tum a" a tih chuan ka hnial nghal pang.

"In inah ka lo kal duh teuh lo mai" ka ti bul hmuk a, chawei te phei chu tum lo tak ka ni.

"Tikhan awm tlat zel lo teh, i pa pawn a phal leh em em ang, i U Rinawma lahin a duat em em che a, kan arpui tui lai pawh i lo haw huna talh ah a tia, chaweiah sawm rawh min ti reng a lawm, a nu leh pa te pawhin an hmu chak che ania" a tih phei chuan thin a rim deuh ut ut. 

"Min hre ngai lo pawh an ni hleinem, eng atan nge min hmuh chak a" nelawm loh thei ang bera tih pahin ka nu chu ka va melh a, a dul chu a la puar lo a nih hmel, ka hria tih pawh a la hre bik lo aniang, sawi a tum lo nge mawni?

"Aww...min ngaihsak ve a, kan inkar a ṭha lo nia an hriatte hian an rilru a hrehawm ve ṭhin a lawm" tih pahin a rawn nuisang a, ka ner nawng mai.

"An va fel ve" ka tih ri ah chuan ka lawmpui teh chiam lo tih pawh a hriat ka ring.

"An rilru a chhe lo ania, ka bulah awm duh pawh nila an phal vek ang, an ngaihtuah ve teh che ania" a ti leh zel a.

"Ka chhungte an ni ve chuang hleinem, min sawiluh lam kha chu tum miah suh, a zahthlak dawn lutuk" ka ti ṭeu hlar a, ṭhutthlengah ṭhuin pawn lam ka melh daih a, ka awmdan chu hrehawm tak a ni, engmah han phurna tur a awm lo, chu a hnekin ka ipik hluah hluah reng.

"Tih luih che chu ka duh bik lo a; mahse, rawn leng phei ve la chu ka duh khawp mai, i pa chu ka lo dilsak mai che anga. Hetia inpawh tlang taka kan awm hian mite pawn min hrethiam zawk ang, sawi neuh neuh hi an peih hlawm si a, keini ho karah intihthiam lohna an awm lo tih an hriat chuan an sawi zui peih dawn lo a, i tan tak pawh a ṭha zawk ania, tunah i fee zawng zawng tumsak che an inhuam a, rawn pawh ve deuh ik la chu an duat ngawt ang che maw le" tih angreng a sawi chu ka bengkhawn lem lo, ka ngaihtuahna ah chuan thil dang daih a awm a, nau ka nei dawn tih leh ka pa fa ka ni chiah em tih ngawt chuan ngaihtuahna a luah, ka thil hriat thar pahnihte chu dâwt ni sela ka duh ve ve bawk.

"Zingah Putea te inah ka han kal a, min lo ṭawngkhum vak a, dawtin ka pa a lo puh bawk a, vawikhatmah ka kal tawh lo ang" ka ti chhuak phawng a, ka sawi lo thei lo a ni.

"I Putean maw, eng nge a lo sawi leh pek a?" a tih chuan, "Ka pa nen in inneih hmain i rai lawk a, ka pa fa tak tak ka ni lo maithei te a lo tia.." ka sawipah chuan engtin nge a ngaih hriat tumin ka melh ran a, a lawm bik lo khawp mai,  "Chupa mai mai chu, a rui a ni lo maw?" a ti ve hluk hluk a, chutiang chauh chu ka duh khawp lo, a aia chhanna ṭha zawk ka mamawh, ka mamawh satliah lo a, ka mamawh ngawih ngawih zawk a ni.

"Ka pa fa chu ka ni tak tak em?" 

"Nanga pawh chu, i pa zawt ta che, i pa'n ka fa i ni a tih che chuan i ni tihna a ni mai a lawm" a ti pawr hlur a, min chhan dan zet chu aw, ka inrintawkna a bo nghal vek.

"Nangman i hre zawk daih ang chu, in inneih hmain bialpa dang i nei a mi, Putean ka pa zawk i puh daih angin a sawi" ka ti leh a, ka vin deuh pung pung tawh.

"Ani zurui kamliam mai mai te lak thutak chi pawh va ni suh, i awih duh zawk e a" a ti duh lek a, kei chu ka sa pup pup, thinrimna, lungawi lohna, ngaihtuahna ṭha lo ten ka chhungrilah min hnawh tup tup a, ka hah hluah hluah.

"Nangman hrilh chiang rawh, vawikhatmah khatiang khan ṭawng tawh suh se, ka pa bulah te khan a lo sawi anih chuan a chak lo ngawt ang" tiin ka nu chu ka han melh rum kha kha a, "Hahthlak em mai, khipa ṭawngthei lutuk khi chu, a farnu pawh min sawi hmingchhe zel mai a, a ruih tawh hi chuan inven nachang a hre ngai bawk si lo, mi pawi te hi a sawi tam tawh a nia, home-a dah daih tur nge mawni, sawisel lahin i pi khian a ṭan hlur zel a, an nu ve lah khi amah ang chauh" a ang zui hlak hlak a, ka insawithawl zo dawn loin ka hria.

"I naupai pawh kha..." ka ti chiah chu phawk fein min rawn melh a, "Tu nge hrilh che?" a ti nghal phat a, chu erawh ka sawi tum lam a ni lo.

"Nau i pai vang vek anih hi aw, Putean ka pa a hmuhsit phah, chhang ka neih loh vangin 'i pa hi a ching aniang' te a tia, keipawh ka pa fa ka nih a ring lo zo vek anih hi, nau pai thawt thawt pawh a ngai a mi, in inneihna a la rei loh tehreng nen, man pawh in la inhlan lo ania, ti nge min ngaihtuah ve ngai miah loh le, kan tan a zahthlak asin" ka ṭawng ring lutuk chu min lo khap sawk sawk a, kawtkai maiah mi an lo kal bawk nen insum tumin ka inpetruh ṭeuh.

"Miin an hre vaih anih chuan an sawi duh leh dawn ania, zeldin thu mai mai pawh an chawtak khukpui vak zel, i pa pawn hria se a lawm lo khawp ang, midang bulah sawi tawh reng reng suh, i Putea pawh chu tlaiah ka han kal a nge" zawite hian a ti a, thinrimna nei ve lo ang mai a ni, ka tan tak pawh tihzui dan a awm bik lo.

Rei deuh chu kan ngawi dun rauh rauh a, "Balhla kha hawn ve rawh aw" a rawn tih pawh chuan ka chhang duh lo, a dawr kawngka bula balhla inhung chu ka melh ngar a, ṭah a chhuak ṭun ringawt.

"Engtikah nge nau i neih dawn?" ka tih chuan, "Kumthar lamah daih a nia, Aizawlah ka rawn nei ang?" a ti zawi sep a, a sawi thui duh lo riaua ka hriat vang chuan ngeiawm ka chhuah a, "U Rinawma a chhun a nih chuan a hmelchhe ngawt ang" ka ti kher a, hua se ka tih laiin a nuih a za khawp mai.

"A hming phuah ta che, lo inring lawk la" a ti zui a, ka duh lo nasa, a lo pian hma aṭangin ka mil lo sa a nia, lo piang pawh nisela ka lawm chuangin ka ring lo, zep loah chuan ka dinhmun a ti chhe sual sauh tein ka hria, ka nu hi ka innghahna ni lo sela chuan hetiang ngaihtuahna hi ka nei kher lo ang, duhthlan tur dang hi ka nei hlawl si lo a, ka nu hlimna pawh ka hlimpui thei hek lo, ka lungawi lohna te lah hian midang ngeng a chhun pha ve tak tak lo a, ka nu lakah leh lek phei chuan mi chuangtlai ve mai chauh a ni, dem loh hi ka zir mai a ngaiin ka hre tawh, kei awm lo ila chu a nun pawh a nuam zawk ngei ang.

Khua a rawn dur khup khup a, ruah a tlak hma a haw ka duh thu sawiin thingpui hmeh ka lei a, "Aman pek a ngai lo" a ti chungin ka pe lui ve tlat a, a balhla zawrh erawh min khai haw tir ṭeuh mai. Ruah lah chu a rawn tla nghal phuar phuar a, in pawh ka thleng hman ta lo. Hruaizeli te inah ka tlan lut rawk a, min lo beisei sa bawk nen thingpui a lo siam zung zung a, vaimim chhum a rawn chhawp hluah bawk. Amah lah chuan engmah a ei ve duh lo a, ka bul chetah rawn ṭhuin a ṭawng bual bual reng.

"I nu naupai chu i lawm vak lo em, kei chu ni ila ka thik sa, chhang khat deuh hian naute thik a awl lutuk" tih angreng sawiin a nui kur kur a, eng nge a ruih chu ka zawt tawl mai.

"Engmah ka rui lo, ka hritlang deuh a...a tui chi kha a chak deuh, tlem te chauh a nia" a ti  nawi niai a, hritlang damdawi a rui anih hmel e.

Ruah han hun nghah pahin kan ti ti ve luam a, Rinawma a hmel ngei thu te sawiin a ang hlak hlak a, "An bulah awm reng reng suh, a lerh ropui si, a lo hmu tai palh ang che. I pa'n nupui dang a nei ve anih pawhin kan hnenah i lo awm dawn nia, ka pa hian a lainat lutuk che a, i lo awm te chu a phal viau ang" tih angreng a sawi chuan ngaihtuahna mak pui pui min neih tir a, lung a dam thei tak tak lo.

"Ka pa chuan nupui dang a neih pawh ka ring lo" ka ti zawi sep a, ka ngaihtuah thui ngam lo.

"A la nei ve leh ang chu, a la naupang a, i pa phei chu a hmelṭha bawk si, kan veng nuthlawiah star deuh tu pawh ka hria, chawhmeh a suah ziah" a tih chuan kan kawmchhak tlanga awm Nu Sangliani a sawina a nih hmel, ka haw hnuah pawh anṭam tel hnih lai chu min rawn pe tawh. Nuthlawi, fa pawh pathum lai nei a ni a, kan tet laiin a faten min vel ziah lehnghal a, ani leh ka pa chu ngaihbel pawh ka duh lo.

"I pa chu rawngbawlin kal leh daih sela ka ti, helaia a awm reng chuan U Sangi ten an chhaithlu palh mai ang" Hruaizelin a tih chuan ka lawm vak lo. "Ka hrilh lawk dawn alawm, ka duh pui loh chu tumah a neih duh ka ring lo" ka ti ve tak nain Nu Sangi lo kal leh ka pa inbe lai kha ka mitthla let a, ka pa khan a nuih deuh var var kha a nia, a lo duh ru ve angem tih te ka ngaihtuah zui a, ka rilru a hah et et.

Hruaizeli meizial ṭan zo chiah chu ka lo pawhthlak sak a, "I zu ve ṭhin e law?" a tih chuan ka chhang lem lo, zial chu fawpin ka pak khu hlat hlat a, a khu chuan min bawh luk bawk nen ipik a ti zual.

"Beer i nei lo maw?" ti a Hruaizeli ka zawh  chuan "Leina tur chu ka hria a, ka in ngam teuh lo, ka nu'n a rim a hre thei lutuk"a lo ti vat a, ka inhrechhuak leh hnuhnawh, ka pa awm ve laichuan in chi a ni lo reng reng, ka lo ngaihtuah tawi deuh a ni.

"I duh chuan ka tih lai hi ka la nei a lawm, ka stock sa a awm, rim a nei ve lo a, a ṭha lutuk" tih leh thawh a rual a, engmah hi thui tak thlenga ngaihtuah loh ka duh, minti hrehawm mai mai a ni, ka pa emaw ka nu emaw, a tu ve ve pawh hi zalenna pe mai ila,   mahni chauh hi inngaihtuah ta ila, chu chu kan hlim tlan dan ber tur niin ka hria.

Hruaizeli lo let leh chuan damdawi bottle lian vak lo hi min rawn pe a, ka lo la ve mai bawk. A tir chuan ka hreh deuh a, ka hnim leh ringawt ṭhin a; mahse, ka han in chu a tui lo miah lo, "In ṭeuh rawh" a tih vangin ka in khawlh khawlh a, engtin vak ka awm pawh ka hre lo. Ruah chu a tla tam telh telh a, Hruaizeli phone hmangin ka pa ka va hrilh a, ruah do lo tura min tih vangin ka hmanhmawh duh ta lo , eirawngbawl hmana ka haw chuan a tawk viau ang.

Ka thil in rawn thawk chuan mut a han tichhuak em em khawp a, ka zawi bawk si a, ka lu a hai deuh chiai nen men chu har tak a ni; chutih rualin ka zâng deuh vuk mai hian ka hria a, beer ruih aikhan nuam ka ti mah zawk. Hruaizeli chuan "I dose a la hniam mai mai a nih kha, i tih ṭhan hunah a nuam telh telh ang" a lo ti bawk a, Benja chuan hria se min ngei ngawtin ka ring, midang bula ruih hi a phal lo va, a hmuh loh laia beer in pawh min khap tlat kha a nia, damdawi ka in tih hi hria sela chuan min beng duh hialin ka ring. Awmpuia ka hrechhuak zui a, ani chuan engtin nge min ngaih ang ka hre lo, a lawm bik hauh lo ang, min biak duh loh phah ang nge, a rilru a nat phah viau zawk ang le? 

Ṭhutthlengah muin mit ka chhing a, ka taksa chu tuichhunga awm ang mai hian a su dulh dulh a, ka pil riai riai bawk.

Ka muhil chu dar 3 pelhah ka harh hlawl mai, Hruaizeli leh a nu inbe thawm ka hre hmasa ber a, an invin deuh hlak hlak. Ka han tho tur lah chu ka rit luk a, zawi ṭha hnelh hnawlh tak ka ni. Hruaizeli lo phei chuan thingpui ka duh em min lo zawt a, ka luak a chhuah deuh avangin ka inchâk lem lo. Tui vawt ka va ina, Hruaizelin fanghma ei a rawt chu hnialin ka hawsan ta zawk a, in thlen hma chu ka inngaihtuah kawngtluan bawk.

Inthiam lohna lian tak ka nei a, damdawi kher kher chu thilsual tawpkhawk a ni tiin ngaihtuahna ka nei a, a chang leh ka damdawi ei kha ka thiam chawp thul, khuh damdawi mai mai a nia, mi drugs tih ṭhin dangte lakah chuan a nep ngei pawh ka ring; mahse, ka rilru chhungrilah chuan sual hle a inhriatna ka nei a, awm a nuam thei tak tak lo.

Kan in ka thlen hma deuhin kawta ka pa leh ka pi ding lai ka hmu a, ka va thlen phei chuan inchhungah an lo inzui lut tawh. Ka Pa'n thingpui hang a lo thlitsak mek a, ka lam an lo hawi ve ve bawk. "Tukin kha engmah sawi loin i kal nghal daih a, i putea chu i nu nen kan hauh hrep tawh kha, zingkar aṭangin zu a lo in leh pek a, a ruih tawh hi chuan sawi awm leh awm loh hi ka hre ṭhin lo a, a zurui kamliam mai mai a ngaih chi a nih kha" ka pi chuan a lo ti zung zung a, ka nu nen an ṭawngkam a in ang chiah. Chhang duh lem loin ka pa chu ka va melh a, lungawi lo hmel engmah ka hmu lo a, an lo sawidun tawh zawk anih hmel.

"Engtik thleng nge i cham dawn?" ka pi chuan a lo ti leh a, "Ka cham rei lo ang, july thlatirah class kan ṭan dawn a" ka ti ṭha ve mai a, ka chhuk hun tur tak phei chu ka chiang lo, kan khua hi nuam ka ti lo a, chhuk leh vat ka duh.

"In result chhuah hun tur i hre tawh em?" 

"I pass i ring em?" tih angreng min zawt luam a, "Pass ka ring" ka tih chuan "I pass hlauh chuan ar kan talh dawn nia" a ti ve ngei a, mintih phur sawt pawh ka hre lo, ka Pi lakah hian ngaihdan ka lo siam laklawh tawh a, tun hma anga pawh kha a harsa riau tawh. Inbual turin bathroom-ah ka luhsan a, an titi thawm chu ka ngaithla pah reng a, ran vulh dan chungchang hlir an sawi. Rei pawh awm loin ka pi chu a haw a, ka nu dawr aṭanga ka chhuah hnu khan ka nuin a lo han hrilh a ni mai thei, an ngai thutak lutuk chuan rilru a ti buai sauh a, ka ringhlel telh telh mai a ni.

Zanriah eilaiin ka pa chu ka zawt ta hram a, "In inneih hmain ka nu hi ka rai lawk em ni?" tiin,  tlang tak phei chuan ka zawt duh lo, hlauhthawn ka nei miau a ni.

"A pai che aṭanga thlahnihna ah kan innei a lawm, kan la naupang â ve a, kohhrana ka tal tam ve hma kha a ni bawk a, nau kan pai takah kha chuan inneih kha a ni zui nghal mai a, rei pawh kan inngaizawng hman lo, i Pu boral ta khan min nei turin a lo nawr ve bawk a.." a tih chuan ka lo pawt chat vat a. "Induh deuha innei in ni tho em?" ka tih chuan, "Chuvang a lawm i lo pian" tiin min nuih var var. 

Ka ngaihtuahna a buai khawp mai a, ka pa hian a fa ah min ngai nghet hmiah a nih hmel a, rinhlelhna a nei miah lo zawkin ka hria. Engati nge keimah zawk hian rinhlelhna ka neih tlat le? Pianphungah ka Pa chhunna ka nei miah lo te, kan rilru puthmang in ang lo ṭhin lutuk te, ka nu ngawt ka chhun mai te hi mak ka ti telh telh. Ka Nu kha a rai lawk ngei a, midang fa chu ka Pa fa angin a puh a ni thei mai a ngem? Chutiang ringawt chuan rilru a luah a, zan pawh ka muhil thei lo.

Inrinnia Nu Rami te ina ka leng chho chuan ka rinhlelhna tizual tur thil ka han hre leh a, nu Rami chuan ka Pi te ṭhenawmnu hnen aṭangin a lo hre thawi ve ni ngei tur a ni, ka Putea nupui sawi anih ka ring bawk. 

"Thudik anih chu ka ring bik lo a; mahse, ka ngaihtuah chian hi chuan thil ni thei tak chu a ni, mak ka ti deuh tlat, i Nu leh Pa inṭhen dan kha khati kha ania, an inhaw mang miah lo leh i Pa dawhthei lutuk te hi nangmah hmang hian inremsiamna an nei a ang ka ti, i Pa hian an chhuhsak che a hlau a ang tlat, a kawl theih nan che i Nu thu zawng zawng a pawm sak vek a niang, i Nu zawk hian i Pa zângna dawmnan a lo hmang reng che hi a nia nga, an lo inberem anih te ka ring rum rum" a ti mauh mai a, chutiang zawng chuan ngaihdan ka lo la nei ngai miah lo.

"A tlaiah khan ka Pi a lo kal nghal a, ka Nu khan a han bia anih ka ring" ka tih chuan, "I Pa i zawt ve reng reng em?" a lo ti vat a.

"Ka Pa chuan engmah a ringhlel ve lo" ka ti zawi sep a, "I Pa hi an lo bum reng ania nge?" a tih chuan ka chhang lo, ka inngaihtuah buai hle ringawt.

"Ngawiteh Rinte, i Pa hian a hriat loh ka ring miah lo, tlem lai deuh khan i pa Muana bulah 'Rintei pawh puitling a ni tawh a, dan hmanga min chuh tum pawh nise Rintein duh a thlang mai dawn a, keichuan a duhna zawk zawkah awm sela a ṭhain ka hria, nupa inṭhen vanga naupangin an tuar ṭhin hi a pawi em mai, a nu bula a awm duh anih pawhin ka phal sak ang' tih angreng kha a rawn sawi a, dan hmanga inchuh a ngaih chhan tur kha hre miah lo, mizote chu kan pate bulah kan awm tlangpui a, mipa lam chan kan ni zawk alawm.." a ti zui leh a, chung thil ka han hriat takah phei chuan zawhna dang ka nei tawh lo, hriatbelh ka hlau zek zek tawh zawk a ni.

Hmanhmawh deuhin ka haw thla a, in ka thleng chu a lo ruak huai a, eirawng pawh bawl hmasa loin ka va mu ringawt a, ngaihtuahna a mang duk a ni ber. Benjamina ka call a, phone aṭangin ka ṭahkhum chiam ringawt. Zawhna a rawn ngah khawp mai a, ka sawi hleithei lo chu min vin hluk hluk a, a awm ve reng mai, ka ti hrilhhai khawp ang le.

"I chhungten an hau che em ni?"

"Kut an thlak che nge?"

"Pawngsual i tawk em ni?" tih angreng min rawn zawt mawlh mawlh.

"Ka Nu a rai a" ṭap ṭiau chunga ka tih chuan, "Engtikah?" a rawn ti a, chhan ngaihna ka hre lo.

"Nau a pai" ka ti leh ringawt.

"Chuvang chuan i ṭap a maw, pasal dang a neih tawh kha, va ngaihsak vak lo la i hrehawm lo mai ang, panic attack i nei leh ange, insum hram hram rawh" a rawn ti ve luam a, ka rilru a na zual sauh maiin ka hria. Ṭap tawh loin ka inhruhul sawk sawk a, "Lo chhuk leh tawh mai rawh, inkhua a awm kha a ṭha lo anih kha" a rawn tih chuan ka chhang lo. Rei dawn ka ngawih hnuah "Sawn ka ni tih ka hrechhuak asin, ka Nu leh Pa te inneih hmain ka Nuin min lo pai alawm" ka ti leh tawl a, Benja bulah hian sawi hreh ka nei ngai lo, min dawngsawng thiam ber tu a ni ziah ṭhin.

Mahse, "E heu...kan in ang chiah a nih chu" tih ringawta min rawn chhang chu ka hrethiam lo hle.

"Ka Pa pawh hi ka Pa tak tak a ni lo maithei" ka tih leh chuan, "I Pa tak a ni emaw ni lo emaw Pa i la nei kha lawm tawp zawk teh, keichuan ka neih ve miah loh hi" a rawn ti ta fuk a, ka ngawi chiang khawp mai. Ka lungawi lo ru hle a, min ngaihsak lo niin ka ngai bawk. 

"Engtikah nge i lo haw dawn?" a rawn tih leh chuan "In ina i haw phei hma chu ka lo chhuk lo ang" tih leh phone dah ka rual a, a lo call leh pawh chuan ka chhang duh tawh lo.

Ka Pa thawm ka hriat rualin ka chhuak phei vat a, iptepuiah chawhmeh a rawn ak haw ṭeuh mai. Khawiah nge a kal ka lo zawh chuan "I nu Sangliani te loah dawl ka va la a, chawhmeh min hawntir ṭeuh mai hei.." a ti mai a, lungawih loh sa nen Pi Sangliani chu ka ngei ru khawp mai a, ka Pa hi min chhuh a tum ni maiin ka hre tawh. 

"A be ṭha riau chein ka hria, a beisei che a ni hrim hrim" tau deuh bur chunga ka tih chuan, "A awm ang lo em mai, kei ain a upa daih a lawm" a ti leh mai a, ka lo ner nak.

Eirawngbawl mawlh mawlh pah chuan eng eng emaw ka sawipui a, nupui neih leh a chak em tih angreng a ni. Ka Pa chuan "Nupui pawh ka nei hman tawh dawn em mawni, vawk chaw zawn a ngai a, chhum a ngai reng bawk a, ka kawm hman lo ang" tiin a nui hawk hawk a, a duh phawt chuan nula hnahkhat pawh a la hmuh theih ka ring, ka Pa hi chu pa hmelṭha tak a ni a, ṭhamawl deuh ṭhin viau mahsela a nungchang leh Pathian a ṭihna hian a ti zahawm a, kan khaw tleirawlah pawh hmelṭha titu ka hre nual mai, ka naupan deuh lai phei kha chuan ka intithei ru ve viau ṭhin.

"Nupui i nei leh dawn anih chuan kan khua a mi ni lo, khawdang a mi nula fel deuh nei rawh, Nu Sangliani te chuan fa pathum lai a nei tawh a, a fate an sual bawk si, bakah amah khi ka ngaina lo" ka tih leh pawh chuan a nui mai mai a, "A kohhran mi riau a sin" tih bakin min chhang lo, a duh ru ve deuh em mawni chu aw, a sawithui duh miah lo lehnghal a.

Pathiani zan inkhawm banah ka pa ṭhiante an lo lengkhawm a, nu Sangliani leh kan kawmthlang nula senior U Muanpuii an rawn tel ve hlawl mai. Sitting room-ah an ṭhu khawm a, Pathianthu sawiin an ṭawng barh barh hlawm a, thingpui ka va lum sak laichuan nu Sangliani chu ka va thlek deuh a, ka Pa a melh dan ka chik a ni ber, engmah han ngaihmawh tur chu ka hmu hran lo va, rilru erawh a nuam duh tehchiam lo.

Thingpui ka pek zawh hnuah ka inthiarfihlim leh thuai a, khumah mu chungin Benja nen message kan inthawn a, min ngai viau aniang 'Lo chhuk tawh rawh' a rawn ti sek sek a, haw tura ka tih lah chu a zawm duh der lo a, luhlul ve ngang ngang tak a ni. Lza te inah a la awm meka, ka lo inthlahrunpui tehreng nen amah lah chuan inthlahrun ve nachang pawh a hre lo aniang.

"I Ni in a la rawn be lo che em ni?" ka tih chuan "Be ngun mah mah, vawi nga a lo kal tawh" a ti hem mai a, chutiang lehnghal te chu haw ve mai awm hi ania.

"Inneih chu an titlu ta em?" ti a ka zawh leh chuan "Tifel vek tawh, Ber thla ah an innei dawn" a ti leh mai a, a haw lo hlen dawn lo anih chuan haw vat mai sela ka ti.

"Eng nge i beisei a, khatia i tihtauh khan an ṭhulh phah chuan loh kha" ka tih chuan "Beisei ka nei lo" tih zawngin min chhang a, hahthlak thei tak a ni.

"Mambawih, thingpui no a seng theih e" ka pan a rawn tih vangin ka tho vat a, ka va chhuah laichuan Nu Sangin no a lo khawm mawlh mawlh a, "Khawi keiman ka lo ti ang" ti a va chhuh ka tum chu min nuih deuh var var pahin tui khawihna lam a pan a, ka zui ve thuai bawk. Tui hmunah kan va ding dun ran a, a kut a sil a, no a hman avangin ka lo nghak ve reng bawk a, a nui deuh sang reng. 

"Engtikah nge chhuk leh i tum?" a tih chuan, "Ka la chiang lo, ka cham rei deuh ang" ka ti ṭha ve mai a, engvanga min zawt nge anih ang tih lam daih ka lo ngaihtuah.

"I awm loh chuan i Pa khua a har leh dawn mange" a ti ve ngei a, ka nui tawi khawp mai.

"Lo haw ve zeuh zeuh rawh, i Pa hi ngaihtuah ve deuh a ngai ania, a damloh pawhin duattu a nei mang si lo" a ti leh chu ka chhang chak tlat a, "Nia, ka lo haw zeuh zeuh tawh ang, ka awm loh laiin nuthlawi tuten emaw an lo chhaithluk mai a hlauhawm" ka ti deuh kher a, "Ni e tiraw, amah chiahin a awm si a,  ven a ngai dawn riau" a ti a, a nui zui kar kar a, han hua ang pawhin a awm lo, amah ka sawichhan tih a hre lo der zawk nge ni.

No ka sil zo ka let leh chuan ka duh loh dan deuhin an lo ṭhu a, nu Sangliani chu ka Pa bulah a lo ṭhu at tawh. Min lo melh ve zawk a, a nui hmel chu huat theih si loin mei a nei riau hian ka hria a, en pawh ka en rei duh lo. Pindan ka luh rualin Benja chu ka text mawlh mawlh a, "Ka Pa hi kan khaw nuthlawi pakhat hian a rawn hel a, ka awm loh laiin chawhmeh a lo pe ziah anih ka ring, tunah pawh sawn ka Pa bulah a ṭhu mek, Pathian thu a sawi lawng lawng mai, ka mil zawng a ni miah lo, fa pathum a nei tawh a, a fate pawh ka ngaina lo" ka ti duah a, ka thinrim deuh ut ut.

"I thik e law?" a rawn tih chuan, "Engah nge ka thik ang, ka duh phawt chuan ka inkawmtir lo hmak thei a lawm" ka ti leh ngat a, chu erawh chiang lo tak ka ni, thil ṭha ni pawhin ka hre lem lo; mahse, saw nu kher saw chu hmehbel loh ka duh.

"Nuhrawn neih chu a peihawm loh viau ang, ka hrethiam che ania, tikhan ka dinhmun i hrethiam ve deuh ang chu, ka lawmpui lo pawh a ni bik lo; mahse, ka lawm chuang lo" a rawn ti ve luam a, chu chu ka awmdan ve chiah a ni, ka Nu hetiang a nih lai hian kawppui nei ve tur chuan ka duh ngei a; mahse, ka Pa lehzelin nupui a nei anih chuan engtin nge keihi ni ve ta ang, a nupuiin min ngaithei lo ta ang sela, ka chhan pawh a chhe viau thei, chungthil chuan min mawlh tlat a, ka ngaingam lo a ni ber.

"Ka awmdan hi a laklawh zo vek, khap sak chu ka hreh a, a khawhar hnemtu a neih chu ka duh tho a; mahse, nupui ṭha lo deuh a neih ka hlau" ka ti leh a.

"Khatiang chiah kha ka rilru chu, a pasal tur hi eng ang mi nge anih pawh ka hre lo, ka ngaihtuah ve tho a, a tisual anih chuan a pawi ngawt ang, a awm loh phei chuan saw lamah ka awm phei a ngai dawn a, ka peih miah lo, thil hi a khaw lo zo vek dawn, amah phei chuan 'Kan indang nghal dawn a, kan hnenah i awm thei reng' min tia, chen ho pawh ka chak chuang lo" a rawn ti ve luam a, ka han nawr ve chiam tak nain a awmdan chu ka hriatthiam pui ve takzet, mahni hmakhua kan ngaihtuah ve lo thei si lo a, lawm taka lo pawmpui hi thil awlsam a ni lo, kan inhlat phah mai angem ti tein ngaihtuahna ka nei a, rilru a buai a ni.

"Pawisa i la nei reng reng em ni, i out rei tawh ang reng sia, engtin nge i khawsak, i ṭhiante kha i ring tawp em ni?" ip ru zeta ka tih chuan "Ka la nei hlek; mahse, hmanna tur liantham deuh ka nei a, ka inren lutuk, cigarette pawh ka lei ngam tawh lo, niminah Julie va dil ka tuma, min pe duh ṭhak lo a, ka Ni-in min pe lo turin a ti aniang" a rawn ti a, Julie chu a cousin, Joshua unaunu kha a ni.

"Engthil liantham nge i tih dawn a, engzat chiah nge i neih?" 

"A tam chuang lo, ka hmanna tur chu thuruk" hmmm...reuh tak hian, eng thuruk ṭha mah a neih ka ring lo.

"Eng thuruk nge ni a, ka lakah thuruk nei suh, engkim min hrilh zel rawh"

"Nakinah i la hre mai ang, i tan vek ania, ka la surprise ang che" 

"Surprise ka duh lo, tunah sawi rawh"

"Aih, i lo haw hunah ka ṭhawng thut duh che, min ngai lo si" ka nui hak a, zep loah chuan ka ngai ve reng tawh, a bike-a ride dun te ka chak a, a bula titi mai mai te pawh ka chak, ka chhuk hunah chuan haw turin ka thlem thlu thei maiin ka ring a, ka awm loh chhung chu duh leh lo out mai sela pawi ka ti ta lo bawk, a chhan pawh ka haw tir thei anih chuan ka chungah a Ni a lawm dawnin ka hria a, ka tan chance ṭha tak te pawh a ni ve ang.

Holam angreng takin ni kan hmang liam ve bek bek a, ka ni hman dan chu a inang pat rengin ka hria, ka Pa nen vawk chaw kan la a, anin a chhum leh pek a buaipui vek a, keiin eirel leh inchhung sekrek khawih ka ti thung a, ka Nu dawrah ka va kal ve zawk ṭhin tih loh chu ka pawn chhuak tam lo khawp mai. Ka Nu ka tlawh hram hram chhan pawh miin kan inkarah ngaihdan ṭha lo an neih ka duh lo a, vengchhak lam titi kha midangin an hriat te pawh ka hlau, ka Nu thung chuan message min thawn a ching a, chhunahte hian eng nge ka tih min lo zawtin leng turin min sawm fo a, engkim min tum saktu a ni vei nen induh emaw inlahrang thei ka ni bik lova, ka kal veleh nge nge ṭhin.

Kan exam result a lo chhuak a, vanneih thlak lutukin 2nd ah ka pass ve hlauh mai a, ka ṭhiante pahnih erawh 3rd ah an pass ve ve a, a lawmdun nghe nghein ka hria. Awmpuia result pawh a lungawithlak leh pek viau mai, pakhatna nih hi a inhmeh hliah hliah a, tun ṭum phei chu ka lawm lehzual, kan boruak vang khan ka lo hlauthawng deuh a, chutiang ni lo a pakhatna lai a rawn hauh leh chu kei tluka lawmpui an awm ka ring lo, message thawn pawh ka duh viau a; mahse insumin whatsapp group lamah ka lawmpui ta zawk a, ka message kher chu rawn chhangin a lawmpuitu te zawng zawng chungah lawmthu a rawn sawi a, Peksanga leh Zothanan an rawn chhaih zui nghe nghe.

An core subject tur an sawi khawm laih laih laichuan rilru a buai ru khawp mai a, a hma kha chuan Awmpuia bula ṭhut zel ka duh vangin a subject lak ang lak ve ngei ngei ka duh a, tunah hi chuan subject dang la zawk ila a ṭha angem tiin ka inngaihtuah buai hle thung. Kan inkar heti hi a ni tawh si a, nitin class khata ṭhut hi nuam a ti lo angem ti tein ka inzawt bawk a, rilru ka la siam fel thei rih lo. 

Ka insum ve kha ania, a core subject tur pawh ngaihven loh te ka tum laimekin amah zawkin min rawn hrilh a, mak ka ti rum rum. "Political science ka core tlang dawn ania, i tum i lo thlak leh hman em?" uang angreng deuh hian a rawn ti a, a hma kha chuan economics core a tum kha ania, engtizia nge ni le?

"Eco i core duh zawk emaw ka tia?" ka va tih chuan, "Pol science i core dawn si a, ka tlang ve mai ang chu ka ti" tih te mai hi a lo thawn a, ani tan chuan harsatna a awm dawn lo; mahse, a rilru a thlak chhan chu ka hre chak tlat a, keimah vang anih te ka hlau.

"Ti nge, Eco i tui zawk a ni lawm ni?" ka tih leh chuan "Pol science pawh ka tui tho a lawm, rawn core ve chu i la tum em?" a lo ti let vat a, ngaihdan mumal pawh ka la nei lo, a thu min rawn angin ka tih ṭhatna ber chu lak mai a ṭhain ka hria.

"Education-ah ka inlet dawn a, Eco leh Pol science chu ka ti ṭha lo em mai, ka tihṭhatna ber hi ka la mai ang" tih chu rilru nuam lo deuh chungin ka thawn a, engtin nge a lo ngaih ang tiin ka ngaihtuah zui vawng vawng.

Darkar khat dawn hnuah message a lo thawn leh chauh a, "Pol science pawh i ziaawm viau hi, i ti ṭha telh telh a lawm hei, a pawimawh zawk chu subject in ang kan lak chuan kan inpui thei dawn a, Eco i ti chhe angreng si a, Pol science hi kan la dun thei asin" a rawn ti a, a message aṭang chuan a inthlahrun hmel riauin ka hria. 

"Keimah vanga Pol science kha lak tum i ni em?" ka va ti khawl a, a lo phat ka rin nen "Ni e, i tihṭhat zawkna a ni sia lawm" a rawn ti khauh a, ka rilru a buai nak. Eco lak a duh a, ka thiam loh em avangin Pol science lak tlang a tum tihna a ni, kei lah chuan Education-a inleh ka lo tum a, Awmpuia hian Education a la ve lo thung.

"Tihpalh aw, department khata awm ka hreh vang a ni miah lo ania, ka tih ṭhatna ber hi lak ka duh a, nangpawn i tui ber kha la zawk la ka ti, a ṭulah te chuan kan inpui zel dawn a lawm" ka ti ve ngei a, puih theihna chu ka nei ve pawhin ka ring lo.

"A ṭha lutuk a lawm, department khata awm chu ka duh viau a; mahse, i tih ṭhatna ber i lak kha a ṭha, i pass pawh ka la lawmpui miah lo che a, nang aiin ka lawm maithei a ni, i duh chuan i thiam thei tih ka hria a lawm, lo ṭang sauh sauh rawh aw, harsatna i neih chuan min hrilh hreh lo la" tiin min lo chah thlap a, a hnu lawkah group lama a chat ka va hmu a, Economics a lak tur thu a rawn sawi a, kan group ah chuan economics lak tum chu tlem chauh an awm, chung zingah chuan Noeli pawh a tel ve nghe nghe.

Ka pass lawmnan ka Nuin chaweiah min sawm a, ka kal duh ngang si lo a, inrinni tlaiah kan inah lo kalin arpui lian deuh hi a rawn dah a, ka Pa nen chuan lo chhawn dan vak pawh kan thiam lo, kan inthlahrung dun hle ringawt mai a ni. Ar chu zanah kan puah a, Hruaizeli leh Pa Muana te nupa nen sunday tukah chaw kan eikhawm ve a, ka nu Ramin pass lawmnan cheng sangkhat min pe lehnghal a, ka Pa pawn kan ṭhenawmnu pheikhawk zawrh min leisak a, inkhawmna a bun chi a ni.

Benja chuan min rawn chah zing khawp mai, "I pass lawm ka rawt a, ṭhiante an phur tawh a nia, present ṭha deuh i duh chuan lo haw vat rawh" a rawn ti leh ṭhin a, a haw phei tawh em ka lo zawt ve ziah a, haw chu a la tum loh hmel khawp mai. A hnu deuhah phei chuan a ning ta aniang "Dawn lo, min sawt ziah lo teh" a rawn ti hmak a, ka zawt zui duh ta bik lo.

July thla tir teah sumo ticket ka tifel a, Benja zuk hrilh ka tum chu phone a la thei miah lo mai a, zantir aṭangin ka call tluk tluk a, a chhang thei lo reng reng. Dar 10 pelha ka call leh chuan hmeichhe pakhat hian a rawn chhang a, tunge anih ka zawh chuan "Brendai ka nia, tunge i nih zawk?" a lo ti let hu a, ka chhang duh lo.

"Benja a awm lo em ni?" ka ti ram deuh hmuk a, "A phone ka kawl" a rawn tih chuan ka sa zak.

"Khawiah nge a awm?" ka ti vin leh hlur a, "Ka hre lo, an leng aniang, kan inah a rawn theihnghilh anih hi" bung angreng zet hian a rawn ti let a, "A bialnu em ni i nih a?" ka ti leh chu "A bialnu hlui zawk" tiin a rawn nui hak hak.

"Anih vel tak chu" tiin phone chu ka dah hmak a, ka thinrim lutuk chu ka muhil thei lo reng reng, rilru nat lam aichuan thinrim lamah a kal zawk, kan ṭhat dun lairengin a bialnu hlui a lo va pan a ni awm a, mipain an ngaihzawng hluite an biak fo chuan awm a la awm ni ah ka ngai.

A tukah min lo biak a tum a, a phone call chu vawikhatte mah ka chhang lo, message a rawn thawn mawlh mawlh a, a ṭhiante ina  phone a theihnghilh thu leh a lam chiah thu te, a ngaihdam dilna thute a ni hlawm, a ṭhian anih lohzia ka hriat miau avangin message pawh chu ka chhang duh lo a, ka haw tur thu pawh ka hrilh hek lo.

Class kan ṭan hma karah ka chhuka, ka pa'n sunday hmang turin min duh nain Ramsanga sumo ah chhuk ka duh miau si a, inrinni hi a tlan ni anih vangin ka cham ta lo thung. Aizawl ka chhuk hmasak ṭuma kan tlanna kawng lamah bawk khan min tlanpui a, tun ṭum chu passenger dang a nei ve nual a, kan tawt reuh khawp mai. 

Khua a ṭha a, boruak a dai nuam viau thung a, tukverh bula ka ṭhut avangin thli thawin min chhem heuh heuh reng a, rinai tak chuan ka chuang nuam, midang titi ka ngaithla pah a, kan nui ho dar dar reng a, kawng a ṭha vei nen zinkawng zawh nuam tak a ni.

Kan kal hmasaka motor ke kan pump tirna khua kan thlen chuan tukverhah ka dak chhuak vang vang a, chhun enga han hmuh takah chuan an khua chu a lo lian phian a, a kawtthler te pawh a zauin a fai a, khawnuam ve tak anih ka ring. Mahse, kan motor ke pump-na dawr kha ka hmu ta hauh lo, ka ṭhutna lam anih vangin ka han thlek ve ngial a, a awm ang reng reng pawh hmuh tur a awm lo.

U Ramsanga chu ka zawt a, "Workshop kha ka hmu miah lo, kan la thleng lo em ni?" ka tih chuan, "Nichin deuha kan tlan pelh kha anih kha, kawngsira thilkang bung awm ṭeuhna kha, hmanni lawk khan an dawr a kang a lawm" a ti mauh mai a, a neitute chuan an ui khawp ang le, an fel tehlul nen, pawi ka tihpui khawp mai.

"A van zia lo ve aw, engtin nge a kan theih le?" ka tih leh chuan, "An khaw sumo driver kha chuan 'Miin an hal sak' a tia, a dawr neitupa khan a chhui chhuak niawm tak a ni, a bungrua pawh a kang chhe deuh vek a, an sa ṭha leh dawn chu a tih kha" tiin min hrilh ve luam a, mi dawr han halsak ringawt mai chu a suahsualthlak hlein ka hria.

"Bul ṭan ṭhat leh pawh a huphurhawm dawn anih chu, anva khawngaihthlak ve maw le.." midangin an lo ti ve bawk a.

"A neitute kha an fel tehlul nen, an lainatawm hle mai a" ka tih chuan, "Nia, an damdawiin awm lai a ni awma kha, dawrneitunu kan kal ṭuma lo awm ve kha Aizawlah a beng an zai lai ania, an chhungin an awm lo a, an thang hlanin an lo hal sak anih hmel, an haltute lah kha tleirawl te te an nia, an inchhuichhuah dan ka hre chak khawp mai" u Ramsanga bawk chuan a ti leh a, ngaihtuahna a luah zui reng a, an dawr kha dawr lian angreng tak a ni a, bungrua a kang chhe deuh vek anih chuan an chan nasa khawp ang le.

U Ramsangan kan hostel bul thlengin min thlah a, min lo chang turin Nanai ka phone lawk bawk a, a ṭhiannu kan floor-a awm ve tho Betheli nen min lo hmuakin ka bag te pawh min khaichhoh sak a, mi an lo ngaiderin min duatthiam khawp mai. Benja chu hrilh ka tum zuau zuau a, ka la ngei ṭhem ṭhum bawk nen ka hrilh ta rih lo. Vawiin phei chu min la rawn be miah lo a, min lo biak hma chu ngawih ka la duh, min lo biak dan azirin ka hrilh chauh ang ka ti rilru a, ngaihdam nghal mai chu ka la tum chuang lo.

Beisei ang ngeiin zanriah eikhamah a message ka dawng a, "Tihsual ka nei si lo a, hetianga i awm chhan hi ka hrethiam lo, in khuaah midang i tawng nge, hriattir ve chu ka phu, i ngawih reng chuan ka lo zin dawn ania, bike pawh ka kawl reng tawh a lawm, message i chhang lo anih chuan monday-ah ka lo kal ang" tih angreng a ni.

Mut dawnah ka chhang chauh a, "Tunge Brendai?" ka va ti tawl a, a rawn chhang let rang khawp mai.

"Ka ṭhiannu maw, engtin nge in inhriat a?" 

"I ṭhiannu ringawt anih loh kha, i bialnu hlui a ni zawk lo maw?"

"In inkawm ṭhin em ni, a va mak ve?"

"Kawm ngai lo, ka zawhna chu chhang mai rawh"

"Bialnu hlui tih tham pawh a ni lo, high school kan kal lai daih tawhin a lawm, tunah te chuan ṭhian chauh kan ni tawh" a rawn ti chu ka awih mang meuh lo.

"Phone te pawh i kawltir a ni lawm ni, in la inbe zing viau aniang" ngeiawm fea ka tih chuan, "Hei vang hi a ni maw, hmanzan khan Roma te nen an inah kan leng a lawm, Roma nen pawh kan sawi fo kha, Brendai te chu ṭhianṭha a lawm, i duh leh Roma zawt rawh, ngaihzawng hlui ang pawn kan in en tawh lo hrim hrim" a rawn ti duah a, ka la ring zo chuang lo.

"Dawt min hrilh a nge aw, a pawi viau ang, i phone a lo chhang a, i bialnu hlui a nih thu a sawi a lawm" ka ti leh ngat a.

"Ani te chu a uang reng zel a lawm, i duh chuan an inah pawh ka la len pui dawn che nia, i tan thik tham a ni lo, i hmuh hunah i nuih a za zawk ang" a tih leh chuan ka rilru a buai ru nak a, han ngaihdam nghal mai erawh ka la hreh deuh.

"Kan hria ang chu, min kawp anih chuan ka man chhuah loh che ring suh, bum ka har teh ania" tiin ka han vau deuh kha kha a, "Ka bum phal teuh lo che, ka ngaitawh mahnak a lai chein, engtikah nge lo chhuk i tum, lunglenga min thihtir i duh aniang, ka ngai lutuk che a, chaw pawh ka eithei lo" a rawn type duah a, ka chhan hma hmain a message dang a lo thleng leh a.

"Phunṭiha khawhar hi dawn ve tho rawh aw Tualvung, artui pawh lem a har" a rawn ti ngei, Phuhṭiha te a han intia, a va han chhah tak, Tualvungi leh Zawlpala thawnthu a hre ve lo em mawni.

Ka haw tih ka hrilh chiah chu rawn kal nghal a tum ut ut mai a, kan inkhap bet thei hram a ni. A tuk Sunday tlaiah min rawn hruaichhuak a, Roma te inah kan va phei a, kan thlen hnu rei loteah an ṭhianpa Lza a lo thleng ve bawk a, Lza hi chu ka hmu ve fo a, Roma ang em hi chuan ka ngaina ve lo. Benja chuan Brendai ka thik thu te kha a lo hrilh phawng phawng a, a ṭhiante pahnih lah chu an nuih a han za khawp a, a thikawm vak lo anih ka ring ta, an ṭhian tak tak pawh a nih hmel e.

Beer an in a, ka inpui ve duh lem lo, an pathum chuan eng emaw hi an sawi ho ser ser reng a "A hre tawh em?" tih angreng an inzawh chuan ka chungchang an sawiin ka hria. "Naktukah a hre mai dawn a lawm, on the spot-ah" Benan ti ve lehin ka lam an rawn hawi zuk zuk hlawm a, "Eng nge in sawi, ka chungchang insawi tih ka hria" ka tih chuan an ngawi hmiah hlawm a, huat tham si loin an nui an nui mai.

Chaw eikhawm nghal an rawt a, keiin haw ka duh thu ka sawi ve tlat a, rawt chawp leh lutuka chawei chu ka duh lo a ni, Benja hian a ṭhiante pahnih hi a kartawn a, a ti buai mah mah bawkin ka hria. Tlai thim dawn ṭepah min thlah a, gate bulah chuan min fawh teh a tum a, Veranda aṭangin Nanai ten min lo thlir reng bawk si a, kan innam let chawt chawt.

"I induh e, chuk ka nghei rei tehreng nen" a ti bui bui a, "Vawiin chu lo nghei leh phawt mai rawh aw" ka tih chuan a tum bur a, ka kal pawh phal loin ka kut a la chelh bet tlat.

"Tlem talin min ngai ve em?" a tih chuan, "Ngai e, sual ber bur viau mahla i ngaihawm ve a lawm" ka ti let var a, ka lo nuihsang bawk.

"Ka sual pawh ka hre lo, i lakah phei hi chuan ka tlawm lutuka, tuai ang mai hi ka nia, ka inten deuh ṭhin" a han ti kher a, ka ngei reuh tak tak a ni.

"Kal tawh rawh, zanah kan intext dawn nia" ti a han nawr kal mai ka tum chu a biang a rawn dawh sawk sawk a, a duh a hmuh hma chu kaltir theih pawh a ni lo. Rang tawkin a biangah ka chuk a, lehlam a dawh leh zat a, bathlar lam ka han hawi nak chuan hmui hup chungin Nanai leh Bethelin min lo thlir a, zak tak ka ni. "Kal rawh, kal rawh" tih pahin ka nam nawk nawk a, ka biangah a rawn chuk leh hram. 

Kan Hostel bathlar ka han thleng chu min lo fiam hlut a, ka nuiṭha ngam lo. Chaw lah chu ka nghei phah ringawt lehnghal a, mahni chauha zuk ei chu ka hreh tawh.  Tuilumna Hotpot-ah noodles tui lo zetin kan chhum a, chu chu zanriahah ka hmang ta ringawt a, ka puar ve fe tho mai. Ka thil eina ka senghawi hnu chuan Nanai nen Betheli room-ah kan va leng a, a khumah mu chungin kan titi a, Benja message ka nghak pah bawk.

Mahse, ka beisei loh zawk Awmpuia hnen aṭangin message ka dawng a, niminah Aizawl a lo thleng ve tho a nih hmel. "Naktukah class i ṭan thei dawn em? Hostel-ah i lut nghal nge, i chhungte bulah i awm rih?" tih angreng min lo zawt a, class ka tan nghal tur thu leh Hostel-a ka awm thu chu ṭha deuhin ka hrilh a, "College-ah kan inhmu dawn nia" a ti pawh ka aw ve thlap a, a bak chu  engmah a rawn sawi zui lem lo.

Benja message ka dawn chuan Lza te inah a awm tawh a, naktuk lama a tih tur ka zawh chuan "Tih tur a tam mai, naktukah i hre mai ang" a ti a, engmah a sawi ṭha duh lo.

"Zingthawh hma ka ngai" a ti ve ngei a, mak zawk tak a ni. Ka la mu dawn lo tih ka hrilh chung pawhin mut hma a duh miau si a, rei pawh a biak theih loh. Ka mangṭha hnu chuan a reh vang vang a, a muhil fel tawh emaw ka tih hnuah a message a lo thleng leh lawi a, thlalak pakhat a ni, ka ner deuh sawk.

"Ka inbual zo chiah a, hei ka mu nghal e aw, ka mutkawr nen ka awm tawh" tih hi caption-ah a dah a, thlalakah chuan a dul aṭanga hnuailam zawng, ke thluang duaia khumah a ṭhu lai a ni a, boxer chhing tei, a tawk mang loh a ha lehnghal a, Lza ta a nih ka ring, min thawn zah ve awm hi a nia.

Betheli laptop-ah movie kan en a, dar 1 dawnah mu turin ka phei ve chauh a, ka muhil rang khawp mai. Zingah Nanain min lo kaitho a, ka ril a ṭam bawk aniang chaw ka ei ve ṭeuh. Class ṭan ni anih vangin ka hmanhmawh duh lem lo a, Benja ka be hmasa leh te te ang ka ti a, eng emaw tih tur a nei tlatin ka hria, a ni hman dan tur zawh te ka duh, Aizawl ka thleng ta bawk nen haw phei tawh sela ka ti hle bawk.

Ka call chu rei deuh a rik hnuah a lo chhang a, "Ka insiam mek a, kan inah kal kawi leh te ka ngai a, ka hman hunah ka lo bia ang che, hetah thawmhnaw haktlak vak pawh ka kawl lo, a ruka va lak ka ngai" a rawn ti zung zung a, engmah pawh ka sawi ve hman lo "Anih aw" a tia, a dah daih.

Eng nge a awmzia pawh ka hre lo e a, a kalna tur tal sawi awm ania, awm a ti nuam lo zo vek lehnghal. Muangchangin ka insiam a, hmamhmawh a ngaih loh chang hi chuan ka inchei uluk ve ṭhin khawp a, ka inchei thiam lem lo thung. Nanai class a la chawl a,  dawr kal pahin taxi stand thleng min lo thlah a, sana ka en chuan dar 9 a pel zawt a,  a la hma angreng viau a ni.

Kal pahin ṭhiante nen kan inbe kual a, anni chu an lo thlengfel tawh a, "Assembly kan nei hnuhnung ber dawn a, canteen-ah kan lo awm ang, Fresher ho an chhe lo teh a nia" tih angreng an rawn sawi bawng bawng a, senior most nih dawn takah chuan college pawh a nuam deuh sawtin ka hria. Ka college luh tirh laite ka hrechhuak uar uar a, Awmpuia ka hmuh hmasak ber ṭumte, kan inbiak hmasak ber ṭum leh ka hminga min lo koh hmasak ṭuma ka hlimrukzia te pawh, hriat loh karin thil hi a danglam zung zung a, kar loah tun hun pawh hi a liam leh anga, engtikah emaw ka la ngaihtuah let leh ngei bawk ang.

College gate ka thleng ṭep tih ah ka aw hriat ṭhan deuh ka hria a, "Rinte.." a rawn ti lauh mai. Ka lehhawi vat a, Awmpuia leh Peksanga te an ni, Awmpuia zawkin Scooty a rawn khalh a, "Hei a nei thar ania" Peksangan a rawn ti lawng lawng.

"Awmpuia ta maw?" ka tih laimekin ka zawnah an rawn ding a, "I lo chuang duh em?" Awmpuian a tih chuan "Zawnga, ka chuan mek hi" Pekan a lo ti pawr hlur a, ka lo nui hawk hawk.

"Kal ru, ka lo zui ang che u" ka tih chuan, "Canteen-ah aw" Awmpuian a lo ti vat a, ka bu ve mai.  "Lalpeksang, ṭhu eu ul lo teh" a'n ti zui hluk a, chuveleh Peksanga chuan Awmpuia chu a bawh deuh ul a, "Awi bawih, tlanchak suh aw, ka englo ka ṭhutbet tlat ania" no fahran hian a ti a, Awmpuian a nghawk sawk sawk chung pawhin a kuah bet tlat. "Nui, canteen-ah lo tlang rawh aww..." no duaia tih pahin ban a rawn vai a, gate lama an inphur thla chu pumna vek khawpin ka lo nuih.

Ka zuk thlen thlak chuan coffee an lo in mek a, Mawitei leh Kimkimi pawh an lo ri leh hlut tawh a, "Hetah lo ṭu rawh, ka star ka hmuh ang che" Mawitein a lo ti chung bawk nen an bulah ka va intawlh sawk sawk a, star chu pathum lai a nei, Awmpuia leh Peksanga lah chuan an lo bih ve duk duk reng a, ka ṭhianten an star min kawhhmuh apiang chu "A van hmelchhe em em" Peksangan a tih loh leh "A van hmelṭha lo em em" a lo ti zel a, "Ti raw Awmpui?" a tih apiangin Awmpuia a lo bu ve vat zel bawk a, Mawiteiin a haw thei khawp mai. Peka nen chuan an han inhnial leh bap bap ṭhin a, Kimkimi nen kan lo nuih kar kar reng.

1st sem ho an lut hmasa a, chumi zawh ah 3rd sem leh 5th sem ho chu lut rual tur kan ni. Kan luh hun nghakin canteen kawtah kan ding far a, Fresher ho lo chhuak chu kan lo thlir ṭhap bawk. An chhuak rem ṭan tih ah Awmpuian phei a rawt a, a hnung ber lane-a ṭhut kan duh vang a ni, Assembly hi chuan tlar hmasa lama ṭhut hi kan duh ngai lo.

Mahse le, kawngka kan thleng phei ṭep tih ah tum loh lutuk mihring ka va hmu a, ka ding deuh chawt. Ka bula Awmpuia kal pawh chuan a lo hmu ve chiah a, ani pawh a ka hau tho. "In ṭha maw Senior te u" tiin min rawn nuihsawng a, eng nge a hriat, hetah hian eng nge a rawn tih ve!?

"Benja e law...?" Kimkimin a ti chu ka chhang lo, ka pan phei mawp mawp a, "Eng nge i lo tih?" ka va ti thawr.

"Lehkhazir turin ka lo kal" a ti mauh mai a, eng nge a awmzia ni ngai.

"I rawn in admit ve elaw..?" 

"Surprise, canteen-ah ka lo nghak ang che, Zawlpala bulah sawn ṭhu suh" tih leh min kalpelh a rual a, a piah deuha Awmpuia ding chu nuih vur vur chungin a kalpel bawk. Awii awww...hei hi a ni maw nizan aṭanga a thil tih tum kha! Ngawi teh, a surprise sawite kha...mai mai chuan a!?

(End of chapter - 29)