BLUE BAYOU (CH - 30) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 30

"Eng nge a lo tih dawn a?" tih pahin Awmpuian chuan Benja chu a en zui vang vang a, chupa pui chu a rawn hawi let duh lo reng reng. 

"Hetah a thawk dawn tihna nge?"

"A graduate tawh a ni lawmni?"

"Assembly-ah khan a ṭhu ve e law?" ka ṭhiante hnen aṭangin zawhna ka dawng mawlh mawlh, "A van ti buaithlak tak" ka ti ringawt a, ka ṭhiante zawhna chu ka chhang hreh ru khawp mai. Awmpuia chuan ka awmdan aṭangin a hrethiam aniang "Lut phawt ang u, nakinah i be dawn nia" tih pahin min lo mitmei a, Hall lam a pan chu ka zui ve thuai bawk.

Inchhunga kan luh hnuah pawh ka ṭhiante chuan min la zawt mawlh mawlh a, "A in admit ve a niang?" tih bakin ka sawi chiang duh lo. An nuih a za khawp mai a, "A veng reng dawn che anih chu, a thik thu a chhe awm mange" tiin an nui kar kar a, Awmpuia nen chuan kan inmelh leh ringawt ṭhin a, nuih a za lo hle a ni.

Darkar chanve chuang zet hun kan hmang a, kan chhuah dawn chuan ka hmaah Awmpuia a kal a, a rawn lehhawi leh zauh ṭhin a, sawi duh a nei tih ka chiang. Pawn kan chhuah rualin min ko hrang zui a, "A hrilh lawk lo che em ni, engti zia nge?" a tih chuan "Nichin khan ka hre ve chiah, engmah a sawi lawk lo" ka ti niah niah a, rilru put dan pawh ka thiam lo, ka lawm lo dawn dawn.

"Kum eng zat nge anih a?" a tih chuan "Keini aiin kum 2/3 velin a upa ang" a ti a, ka chiang bik chiah lo, a graduate tawh tih zawng kha ka hriat chhun a ni.

"Hna thawh a nei lo em ni?"

"Nei lo a; mahse, tih tum deuh kha chu a sawi ve a sin le.." kan in en vang vang a, "A va hman awm ve" a ti hul hak a, ka nui tawi khawp mai.

"Hrehawm i ti lo ang maw?" a tih leh chuan, "Ka hrethiam bik lo, hrehawm tih chhan tur pawh a awm chuang lo va.." tiin dar ka kan ak a, kei aichuan nuam a ti lo zawk mahin ka hria.

"Keimah vangte hi a nia nge, min thik deuhin ka hre tlat" ka nui leh ringawt a, hei hi chu a chhan pakhat anih ka ring. "Phei phawt ang, kan zawt chiang dawn nia" ka ti chu min hnial loin min lo zui thuai a, Canteen kawta kan ṭhiante lo ding chu kan va pawh thuai bawk. 

"A chhungah sawn a awm?" min mitmei zauh paha Kimkimin a tih laichuan Benja chu ka va thlek a, tukverh thlanglam hawia a ṭhut vangin a hnunglam chauh ka hmu thei a, earphone a vuahin ka hria. Awmpuia kal chu ka zui veleh vat a, canteen chu a khat bawk a, va inhnawh luh pawh a har deuh, ṭhutna tur pawh a awm mai lo, Benja bulah chuan pathum vel kan leng ang tih tur chauh a ni.

"Heih" tih paha a dara ka va nam chu phawk fe hian min lo en a, ṭhutna min lo kian sawk sawk.

"In va rei ve, ka ril a ṭam, eitur chah rawh u" tihpahin Awmpuia zawk chu a melh a, a bula ka ṭhut hnuah pawh ka sira Awmpuia lo ṭhu chu a la rawn thlek duk duk reng.

"Engati teh thut nge a, college i zo tawh a ni lawm ni, nge back paper i nei?" ka ṭawng zawi khawp mai a, ani pawn a beng a rawn dawh hnai ve sawt sawt.

"Nitin ka hmu chak che a, tih tur awm loh lai, lehkhazir te chu a inchhirawm chuang hleinem" tiin a nui var var a, a hmel pawisawi lo lutuk vang chuan huat vak theih a ni lo.

"I chhungten an phal em ni, i hrilh hlawm em?" ka tih leh chu "Ka out lai anih hi, tuman an hre lo" a ti liam puat a, Awmpuia chu thlek lehin "Eitur chuu..." a va ti zui a, pakhat lah chuan chhang loin a lo en run a, a hau dawn tlatin ka hria.

"Eng nge kan ei dawn?" ka'n ti hlut a, "Ngawiru, ṭhutna kan la chang lo" Mawitein a tih vang chuan ka han ngaichang leh rih a, rei vak loah tlarhnung bera mite an tho a, Peksanga tih loh chu an chho dial. Peka chu Awmpuia sirah lo ṭhu vein min rawn nek sawk sawk a, "Tunge a?" Awmpuia bula a tih ri pawh ka hre pha.

Chutih laia "In pass vek em?" tih ri vang chuan an lo hawi rual zawt a, "An pass ṭha lutuk, kan thiampuipa te an nia lawm " ka lo ti leh zung zung.

"Eng nge kan ei ang" Awmpuia a ni.

"Pass lawmnan eitur leisak che u ka duh viau a..." a sawi zawh hmain "A ngai hleinem.." Awmpuian a lo ti zauh, "Nia, pawisa ka nei lo va" nui hui chunga Benjan a tih chuan ka lo melh ralh a, "Ka broke em mai, in pass ṭha bawka min treat teh u" a'n ti zui a, min ti ip, an laiah tak ka ṭhu lehnghal a, an inmelh rulh rulh bawk si a, a nuam duh lo tak tak a ni.

"Eng nge i ei duh a?" ka tih chuan "I duh duh chah rawh, ka ei thei vek" a ti a, Awmpuia te lam a va thlek leh, anni ṭhiandun chuan menu an en a, "Ka lo pe ang, sachek an siamin ka hria" Pekan a tih chuan "Sachek i duh ve em?" Benja lam hawiin ka ti vat a.

"Midangin sachek an eilaia Alu papawr lo ei chu a nuam miah lo ang" a ti kher a, ka han melh rum leh rih. 

Sachek chu ka chah sak ta tho a, ka eiah rice ka chah thung a, vawiin chu an indaih deuh aniang rei lo teah kan eitur chu a lo thleng a, kan han ei tur chu dawhkan bawh meuh hian Benja chu a rawn hawi a, ka sir lam a thlek vangin ka hawi ve thuai bawk. "Paratha kha?" a va tih chuan Awmpuia a rawn hawi rang khawp a, "I duh chuan sawi ta che, ka chah ve mai dawn a lawm" tih leh a mala sih ka rual. Mahse, Peksangan a paratha ken lai chu a lo pe vat a, Awmpuian a dang a chah leh zat bawk.

"Rethei deuha college kal chu a nuam dawn lo hle mai, haw vat ka ngai a ni" ti nuah nuah chungin paratha chu a ṭhial pawng ṭawlh ṭawlh a, nuih a ti za bawk sia, thin a ti rim bawk si.

"Lo kal kher a ngai hleinem, hostel-ah pawh i lo leng thei reng a, miin hman an ti lutuk ang che" ka lam a lo hawi vat a, "Sorry" a ti zawi deuh sup a.

"Ṭhian pawh i nei si lo a, i rinaiin a nuam lo ang aw, i lo kal ve mai pawh a ni.." 

"Roma ka sawm a, a peih lo tlat a lawm, ka kal rei anga ṭhian te chu ka nei ve leh mai ang, kha..anni pawh an awm a lawm" tih pahin ka sir lam chu a mitmei zauh. "Semester khat vek a mi in nih?" a va tih chuan Peksangan a lo chhang a, "Senior most, Rintei te khua em ni i nih?" a lo tih chuan "Aih, Aizawl khua" tiin an veng a hrilh zui a, Peksanga te nen an veng a inhlat vak lo. "In vengah ka ṭhiannu te an awm a lawm" tiin Brendai a hriat leh hriat loh thute a zawt a, Peka pawn a lo hre khawp mai. Awmpuia erawh a ngawi reng a, kan luh tirh aṭang khan a la ṭawng mang lo reng reng.

"Zawlpal, khawi vengah nge i awm ve?" a'n ti pek a, a va nghawk zauh.

"Zarkawtah" bul angreng zeta Awmpuian a tih chuan "Tunge i pa?" a lo ti leh hlut a, Awmpuia hmel vang chuan ka lo ip ru ṭeuh.

"Eng atan nge i tih, an chhungte bulah a awm?" zawi te chang zeta tih pahin a lamah ka inher a, "Ka pu te nen an veng a in ang a lawm, a awmna chu ka hriat ka ring" min nam kiangin a va thlek leh a, "Tunge i awmna pa?" a va ti leh hram a, zahpui chu ka duh miah lo; mahse, zak ru tak ka ni.

"I hriat ka ring lo" Awmpuian a tih phei chuan ka inthlahrung hle tawh.

"Ti deuh tlat, anih SU i ni ve em?" ka lo chhan khalh vat a, "Kan CR a nia, an department ah pawh a nih leh ka ring" ka tih chuan nui lek lek phawk angreng zet si hian min en a.

"Lehkha a thiam thei em ni, nge..."

"Aw a thiam ber, pakhatna a ni ṭhin"

"Tak tak maw..."

"Niang chu, Prof te pawn rank nei pha tura an hual a lawm" min lo nuih tawi deuh tak a, "A va bawn hmel ve" a ti hul hak a, a lawm lo emaw tih mai turin a hawisawn hmak mai.

"Ka awm ve reng hi, min zawt mai ta che" kan lam pawh hawi lem loa Awmpuian a lo tih chuan, "Football i khel ve ngai em?" Benja chuan a lo ti leh a.

"Khel ve zeuh zeuh, Peka hi captain a nia" Awmpuian a tih rual rualin "I khel ve ṭhin em ni, trial rawn nei la" Peksangan a lo ti ve bawk a, Benja chu a phur hmel nasa mai. "Sport lam chu ka thei vek, basketball, badminton, tennis ka thiam vek, football chu trial ka rawn nei ang, lehkhazir lam hi ka tui ve vak lo a, sport lam hi ka ṭhat ve na" zangkhai zet hian a ti a, a insawithei ve deuh anih ka ring, sport chungchang engmah a la sawi ngai lo a, kan inhriatna pawh a rei ve thawkkhat tawh; mahse, 'Ka inkhel' tih a sawi awm ka la hre ngai lo.

"Sport tui hmel i va pu lo ve" Awmpuian a lo ti zauh chu "Nang aichuan ka laktlak ka ring, sport lamah kher chuan min tluk miah lo ang aw, lehkhathiam thei deuh hi chu sport ah in laktlak vak lo, ṭhahrui ngahte a ngai ve a" tiin a nui pat pat a, Awmpuia chu a cher sang deuh a, ani aichuan a sek lo zawk bawk a, a rawn melh danah pawh a rilru chu hriattheih tak a ni.

"College Week ah khelh tum la, trial a ni nghal mai dawn a lawm" Peksangan a tih leh chuan week neih hun tur te an inzawt a, number te pawh an inpe nghe nghe. Thil an ei zawh veleh Awmpuian kal a rawt a, an tho zui mai bawk. 

"Zawlpala chu a induh reuh hle mai a" ka beng bula a rawn tih chuan "Zawlpala ti zel suh, a hmingin ko ve mai la, khatianga i koh chuan midangin an nuihzat ang che" ka lo ti khar khar a, "Pawisa i nei lo viau em, bike chiah ka chang a, ka Ni-in kawngka a kalh zela ka lut ru thei reng reng lo, ka phone pakhat hi ka hralh mai dawn nge maw ni" a ti nuah nuah a.

"Ka nei a lawm, i puk duh em?" ka tih chuan "Min puk tir la, ka haw veleh ka rul ang che" a ti ve mai a, cheng 2000 lai ka pe. Pawisa chu a thlep neuh neuh a, "A zia lo khawp mai, i money honey nih ka'n tum ve nena" tiin a nu kur kur a, a thawmhnaw chu ka lo en daih thung.

"Lza kawr i ha em ni?" ka tih chuan, "Pheikhawk chiah hi, a kawr ka tawk hlawm lo a, Roman a rawn dah nual mai, hemi te pahnih hian incheina tlak pawh an nei lo" a ti hluk hluk a, thil dang ka lo ngaihtuah leh daih.

"In semester-ah i patling ber ang a, an melh hrek hrek lo che maw?" ka ti chhuak phawng a, ka ring a ni, a zak vak bawk si lo a, mak anti ve hlawm khawp ang chu.

"Mi chu an zah deuhin ka hria, mipa ho pawh khan min be ṭha hlawm riau a lawm" a tia, a nui a nui a, seat chan a har tehreng nen engtin nge a chan ve theih zawk le, a mark sheet ka hmu chak riau.

"Lehkha i zir tak tak dawn em, rawn heheu tur ngawtin i lo in admit a nge, eng sudject nge lak i tum a?" 

"Ka lak hnu hlir ka la, Public administration ka major a, Political science leh History nen" a tih chuan ka ner nak, History te a la a, an prof te an ṭang nasa mai sia, a awlsam lo khawp ang.

Amah bawk chuan "Zir hnu vek a nia, ka kalpah deuh mai mai dawn" a ti reuh a, "I thiam thei em?" ka tih chuan, "A bu ang thlap thlap" a ti ve ngei a, dawt a sawi lo turah ka ngai.

Class mumal a awm loh vangin Library ah kan chhuk a, lehkhabu keu mai mai pahin thla te kan la dun a, kawm chawt tur han neih chu a nuam dawn riauin ka hria, ka ṭhiante pahnih kha department dangah an awm tawh si a, inzui reng theih a ni tawh lo va, Benja lo kal ve chu ka lawm ru viau tawh.

Tlaiah banah pawh Hostel-ah min thlah thlap a, zingah class kal turin min lo lam leh ziah bawk a, chhun lamah pawh kan inzui chawt reng. Awmpuia te nen kan inhmu khat deuh a, kan inhmuh fuh chang hi chuan Benja hian a be ngei ngei a, eng emaw tihpuia sawm te pawh a ching a, a sawm hlawhtling ngai lem lo. Peksanga nen erawh an innel ta khawp a, games te pawh an khel dun fo mai. 

Fresher day chu ka pum nawm loh vangin ka kal lo a, Benja erawh an semester lama a ṭhianten an sawm ngawrh em avangin a kal a, a va lam nasa deuh aniang a chauh thu a rawn sawi a, zantirah a mu hmiah a, a message hnuhnung ber chu "Ṭhiante show nghaka awm hi ka kham, ka Iphone hi hralh mai ka duh, ka dress a ṭhing lutuka nula pawn min melh peih hleinem" tih angreng a ni a, pawi ka ti lo ru khawp mai. Mahse, thawhnaw pali nga chauh a rawn hak chhawk ṭhin chu ka khawngaih ve deuh a, ka hostel fee pek bang ka la neih chuan T-shirt leisak ka rilruk a, inrinni tlai lama chhuah puiah Nanai ka sawm bawk.

Inrinni chawhma pum chu kan hostel bula tuikhurah kan insu a, hostela kan let leh chuan chawhnu dar khat a pel tawh a, zirlai deuh hlir kan ni bawk nen awm an tam a, kan ri laih laih reng. Ka insiam nghal mawlh mawlh a, chhuah dawna ka lukham ka han keu chu ka pawisa dah kha a lo awm ta reng reng lo mai a, ka dahna leh ka dah lai ka chiang si, chuti chung chuan ka bag leh awngphah te chu ka han en kual ngial a, hmuh tur reng reng a awm lo. Hman chawpah cheng 3000 lai ka dah kha ania, la an awm anih loh chuan ka ti bo ngawt lo tawp ang.

Nanai ka au nghal chul a, ka pawisa bo thu ka hrilh chuan min zawn pui ve sawk sawk a, kawngka ka kalh em tih angreng min zawt bawk. Insu tura kan kal hma khan ka kalh ngei mai a, inchung zawla kan han pho laikhan lo lut an awm anih ka ring hmiah. Nanai chuan Betheli a ko a, inhnuai ho an lo chho em a zawt a, "Nichin deuh khan thil an lo zuar a, an tam mai" a ti ringawt a, tu tu nge lo chho pawh a sawi chiang thei lo.

Ka rilru a hah ru khawp mai, pawisa a bo si chuan chhuak ringawt pawh ni ila leina tur ka nei lo miau a ni. "I neih zawng zawng a ni em?" Nanain a tih chuan Bank-ah tlem a zawng ka la neih thuin ka chhang a, "Anih chuan ka pawisa puk mai ta che, i mamawh tam chuang lo a ni lawm ni" a ti zui a, cheng sangkhat vel a awm chuan t-shirt man tur chu a daih thei mai a, a bo mawlh kha ka ui, Bank-ah pawh tam ka nei chuang lo, pawisa hi ka ti bo ngai lo a, hrehawm duh tak a ni.

Rilru nuam lo deuh chungin Nanai pawisa chu ka puk sak a, amah phei chuan "I duh chen chen puk rawh, a neih deuh hunah chauh min pe dawn nia" a ti a, ka hmanna turin zir viau lo sela chuan ka puk kher awm lo ve. A hmelhriat te dawrah T-shirt kan va en a, min lo tlawm hlauh lehnghal a, 1000 a an zawrh kha 800 in min pe a, t-shirt var mawi lutuk mai a ni.

Benja chu ka hrilh lawk duh lo va, monday sawrkar chawlh a nih vangin lenchhuah puiah min sawma, chutah chuan ka pe anga,   a tuka a lo hak nghal theih turin a remchan ka ring, a lawm dan tur mawlh mai chu ka ngaihtuah a, thawmhnaw man to a ngaina bawk a, a duhzawng tak tur a ni. 

Thawhṭan tukah chuan dar 10 pelh zawtah a lo thleng a, Roma te inah kan kal dawn bawk a tiin ka inchei duh lem lo. Gate pawna ka va hmuh chuan a lo inchei nalh angreng khawp a, a thawmhnaw pawh chu a ta sa ni mai awm a ni, a thar ṭha riau lehnghal a, a va haw ru nge mawni!?

"Eng nge i ken kha?" tih pahin ka thil khai chu a rawn thlek dak dak a, "Thleng phawt ila ka pe ang che.." ka tih hman awrh min rawn pawh thlak sak a, t-shirt a hmu chu a nui nghal vur vur.

"Ka ta tur a ni em, ka size anih hi?" tih pahin  a han thing pharh a, "A va mawi ve le" a tih chuan lung a awi ve hliah hliah.

"I inhmeh tur ka hria a lawm; mahse, a to reuh teh a nia..." ka thil sawi chu ngaihtuah lo niawm takin t-shirt chu a ha nghal a, "Ha rih suh, naktukah college-ah i lo ha dawn nia" ka lo ti nghal chul a, a phelh ve leh mai bawk.

"Ka lawm e aw, eng nge ka lei ve ang che" a tih chuan, "Engmah a ngai lo, ka leisak chak ve mai mai che" tih pahin ka nuihsang a, lawmthu sawina aniang ka biangah min rawn chuk zauh.

Roma te in kan thlen chuan a chhungte pawh an lo awm a, a pindan pawh inhnuai lamah a lo sawn diam tawh. Kan lut thla fel chauh tihah LZA a lo thleng a, Benja chu pawisa a rawn dil nghal chung a, chutah le...Benjaminan a wallet a rawn phawrh chu pawisa a khat ṭun mai, a ṭhiante lah chuan an ba an lo ṭhing nghal mawlh mawlh a, thil awmzia ka hriat chuan ka lawm hauh lo. Benjamina chu nizanah a lo va haw tawh anih hmel. T-shirt lah chu mi pawisa puk chawpin ka leisak lehnghal a, rethei bakberhin a la awm emaw ka tih laiin, awi....ka chhuhsak leh daih dawn em mawni?!

"Tehchai che u hian, ka pawisa in ei nasat ṭhin nen in uikawm dun si, min ṭhing zung zung zel mai, Rintei chuan T-shirt te min lei asin, tun aṭang chuan in tan ka inseng tawh dawn lo reng reng, ka sim hmak ang" ti hluk hluk chungin pawisa chu a pe a. "Hei hi maw a lei che" tih paha Lzan a T-shirt ken lai a lo ban chu a pawhthlaksak zawt a, "Eng nge min lei ve tawh le, i thawmhnaw hlui pawh min la lei tir hram chu ania, i zakkha ka kai teh anih chuan i khul let leh ang" a'n ti zui a, ka T-shrit pek chu a kekawr kawngah a thun mawlh mawlh.

"I cheng 2000 ka puk kha ka pe ve nghal ang che" tiin ka lam a rawn hawi a, "Ka hmanhmawh lo" ka lo ti bul hmuk a, ka lawm tehchiam chuang lo, nizan te khan min hrilh ve tur a nia, a haw hun ka lo nghahhlelh tehlul nen.

500 note paruk min rawn pe chu ka lo ban ve vat lawi a, "Ka belh ang che, nang chu i thil phal em mai" a ti zui a, a ṭhiante a melh rum ram ram bawk.

"Engzatin nge i hralh tak?" Roman a tih chuan "I hriat a ngai lo" a ti leh hmuk a, a phone a hralh a ni chiang.

"I iphone kha i hralh e law?"

"Hralh mai loh chuan neih ka nei hleinem, android kan hmang leh mai aniang chu" a ti a, a ui ve khawp a niang a ner nung mai.

"I bike hralh zawk ta che, ka lei duh ka tih kha" Roman a tih rualin a chal a ri lawlh. "Bike leina i nei a, cheng 5000 lek pawh min sihchhuah tur i neih loh kha" a tih laiin "I nei leh vat dawn tih ka hria a lawm, ka pawisa khawlsa ka khawih che duh hleinem" Roman a ti ve thung a, in tur leina a dil zui zat bawk. 

In tur lei tura a ṭhiante an chhuah hnu chuan ka hau zui a, "Engmah min hrilh loin i haw a, ka ngaihtuah tehreng che nen, hre lawk ila chuan t-shirt pawh kha ka lei miah lo ang che" ka ti chu min rawn nui tlawn vur vur. "Nizanah ka nawi deuh a, tum loh deuhin ka haw a lawm, ka hriat chhuah chuan inah ka lo awm tawh a, ngai ka la awh chuang lo ania, pawisa min pe duh lo, chuvang ania ka phone ka hralh, min la rep reng anih phei chuan bike pawh ka hralh lo ang tih a sawi theih loh" a ti bui bui a, keichu ka tum deuh bur.

"Ka pute inah kan phei tawh dawn, sawta ṭangin pasal a neih a ngai a, tunkarah kan phei ang" a tih chuan, "College i kal tih an hria em?" ka ti zui a, "Ka la hrilh lo" a ti deuh tlawng.

"Engtikah nge hrilh i tum?"

"Hrilh vat chu an ngai"

"An hau ngei ngei ang che"

"A pawi hleinem, Lighter pawh kan talha, a ṭek chhek a, a zo mai a lawm" a tia, a ngaih sam zia chu.

A ṭhiante lo let leh chuan zu leh beer an lo hawn ṭeuh a, beer can hnih chu "I period hun atan" tiin min pe ve ngei a, zaninah ka in zo vek ang. Tlai thlengin kan awm a, kan haw dawn chuan an rui nawi hlawm khawp a, Benja chu an fuihpawrh a, "I pu chu dil chhuak tawh rawh, i ta tur anih chuan a pe vat tur che a lawm, haw turin a thlem nasat che kha, i haw manah dil ngei ngei rawh, i Ni pasal neih dawn lai hi dil hun lai tak, nakinah chuan a harsa tawh ang" tih angrengin an kar a, Benjamina chuan a chhang lem lo.

Mahse, a lo vei ru viau aniang kan chhuah hnu chuan a pute ina kal a rawt thut a, "Ka ngaihdan a ni lo, ka ṭhiante pawh kha an lawm tawh bik lo anih kha, kan awm phei hmaa sawifel a ngai" a ti ta sawk sawk a, min thlah phawt tura ka ti pawh chu a ngaipawimawh tawh lo reng reng, a pu te veng lam panin min tlanpui vawk vawk tawh.

"Engtin nge va sawi i tum a, in inhauh phah mai mai a nge, in inah kal zawk ang, i Ni kan hrilh hmasa dawn nia" ka ti chul a, a rui deuh phual nen thil a kal dik lo dawnin ka hria.

"Ka nghak tawh dawn lo reng reng, ka ro chan tur min pe sela keimaha indan pawh ka hreh hleinem, kan inluah lai hi ka luah tlang mai ang, an bulah ka awm peih teuh lo" a ti hluk hluk a, a insawi thinrim dawn a ang.

"An pek che pawh ka ring lo, an bulah awm la, fel deuhin va awm la an phal zawk ang" ka ti chu "Engmah i hre lo anih kha, an bula awm saw chakawm loh deuh mai asin, ka awm mai mai hi min ngaithei lo va, thil ti ve turin mi an ring duh bawk si lo a, mi hnuaia inhlawh turin a lawm min duh, ka pa ro chan tur tam tham deuh ka nei a, inhlawh te chu ka tum teuh lo, nuamsa taka awm thei a lawm ka nih, min pe lo anih chuan ukil ka ruai mai ang, kum tling tawh ka nia, ka chanvo chu ka la thei, a ba pawn ukil chu ka ruai ngei ngei ang" a ti pung pung a, a thinrim telh telh mai.

"I Ni chu ko phei ve tal rawh" ka ti leh erawh  min hnial lo, kawngsirah Bike a ti dinga, a Ni chu a call zui a. "Ka phei ania aw, i haw pahin lo kawi rawh" a ti ram hmuk a, thawm a tam avangin loud speaker a on a, a Ni ṭawng pawh chu ka hre pha.

"Inpuiah maw i phei a, inah tawm tlat rawh ka tih kha, i rui em ni?" a rawn ti lawng lawng.

"Rui lo, lo kal ang che, sawi fel vek a ngai tawh, i duh leh nangmahin lut mai rawh, ka zui dawn miah lo che ania, ṭha deuha ka awm i duh chuan min sawipui a ngai" a tih leh hnuah phone a dah hmak a, a ah ṭhat hmain a rawn ri leh zat.

"Va ninawm e, ka tlan laklawh a sin" 

"Lawmtluang, min vin pawng pawng reng suh aw, i pu chu ka sawipui tawh, 'Joshua kan ngaichang rih ang' a tia nih kha, a dawr tur te siam zo ve phawt sela an duh a, anih loh chuan pawisa pek bik che kha a rem lo a lawm, an thik leh dawn che asin, ngaihtuah chiang ta che, i a leh lutuk ṭhin, chhungkua kan buai nuai nuai ang tih hre tawp rawh, lo va haw la, keipawh ka lo thleng har lo ang" a ṭawng tir lam a vin nen a tawp lam chu thlem awka a ni.

"Joshua nen engmah inzawmna a nei lo, ka ta ania, ka duh tawh a ni mai a ni" a lo ti ham ham a, a luhlul a chhuah leh dawn e.

"I ta a ni ngawt lo, i kuta dah ngawt chi pawh a ni hleinem, i rilruin a phak hunah a pe mai ang che, i nghei dawn pawh a ni lo va engah nge i buai chung" ni Pawli pawh a rawn vin ta ṭhah a; mahse, an inti pawngpawrh zual sauh thung.

"Min ngai mawl anih chu, in hre mai ang, ka  ta chin ka la anga, ka out hlen dawn" tiin phone a dah hmak a, "Chuang rawh" a ti mai bawk nen ṭawng ve na hman pawh a awm lo, Bike a ka ṭhu fel awrh chu bu lawp khawpin min han tlanchhuah pui a, ka thinrim zia chu aw....

"Ka kal duh lo ania, in buai laiin ka awm peih lo, hostel-ah min va dah rawh" a hnungah ka chum dawm dawm a, min ngaihsak duh eih lo.

"Benjamin, ka awm duh lo ka tih chu, nangmahin kal rawh" 

"Buaina ka siam dawn lo, ṭha deuhin ka dil dawn, engmah buaina a awm lo ang" a ti a, a tlan lui zel tho.

Ka thu a awih duh loh vang chuan ka titau a, min biak leh pawn ka chhang duh tawh lo, kan thlen hma deuh chuan a inbengdai aniang, "Buaina ka siam dawn lo tak tak, inchhunga buaina siam chi ka ni hleinem, joshua nen kan insual ṭhin tih loh chu midang nen kan la buai ngai lo ania aw, ka pu bulah ṭha deuhin ka sawi anga, kan haw leh vat dawn nia, tun hi thil sawifel hunlai ania, let leh loh dan te ka zawn ve a ngai a lawm" a ti damthluam a, a thil dil tum chu ka duh lo bur a ni bik lo a, ka kal hreh lutuk mawlh chu a ni, ka tel loin kal mai sela ka duh.

A pute gate kan thlen chuan "Pawnah hian ka lo awm ang" tih leh chhuk ka rual a, min hnial a tum zet, "Nangmahin lut la, rei miah suh, ṭha deuhin sawi la, an phal loh pawn hnial lui suh" ka ti zung zung a, a namin ka nam lut a ni ber. Mahse, gate a lut fel chiah tih ah a Patea a lo chhuak a, "Ui a chhuak ang, gate kha lo kalh rawh, i Ni a lo kal ve nange?" a rawn ti lawng lawng a, "A lo thleng ṭep ang, ka pu a awm em?" a tih laia Benja aw chuan awm a ti nuam lo ru khawp mai, a ṭi deuh duk maiin ka hria.

"Inchungah a awm, i Ni Mary te chhung pawh an lo thleng chiah" tih leh pahin a patea chuan min lo thlek a, "Lo lut ta che, gate kha rawn kalh nghal la" a tih takah chuan ka hnial ngam bik lo, a hmel chu a thu tak run a, ka nel lo vei nen melh pawh ka melh ṭha duh lo.

"Tunkarah in lo phei dawn maw?" Bena lam hawiin a ti zui a, Benja chuan min nghak aniang a la ding ve reng a, muang changa ka gate kalh lai chu min lo en ve ve bawk.

"Ni Pawli thu thu, pindan tur pawh in la ti fel lo a ni lawm ni" Benja ṭawng chu a zawi sep sawp hle.

"Pindan te chu a awl reng a lawm, i Ni chu a awm rei dawn lo va, mikhual room khi hmang rih mai rawh se, a bungraw chhawm tur nen a leng zawk ang" a tih hnuah ka lam a rawn hawi leh a, "Chaw ei ve nghal rawh aw" a rawn ti mauh mai.  

"Hostel-ah ka awm a, ka ei chhuak thei chiah lo" ka ti nawi niai a, "Keipawh ka ei kher lo maithei, ka Ni lo thleng phawt rawh se" Benan a lo ti ve bawk a, a ṭawngkam leh awki ah chuan buaina siam duh turin a lang lo a, ka awm pawh a nuam ve deuh, a Patea chu a hlau deuh a ni mai thei, inchhung lampan kan kal lai te chuan a hmanhmawh loh hmel khawp a, a che cool ruih ti ila a dik ang chu.

Inchhung kan lut chu joshua nu leh pa te kan hmu hmasa ber a, an lo nui ruh ruh mai. "Bente, engtikah nge i lo haw?" Joshua pain a lo ti chu a melh rulh a, choka lam a pan daih bawk. 

A pi kan va hmu erawh min lo lawm thiam khawp mai, "I puin a sawi a sawi che a, kar tawpah an lo phei ang ka tia, i thawmhnaw i lo keng nghal em?" a lo ti zung zung a, "Ka pu ka lo be ringawt dawn, ka lo la phei rih lo" Benan a tih chuan, "In hreh deuh a ni maw, i Ni khan a sawi nawi riau mai" tih pahin ka lam a lo hawi a, "In ril a ṭam em, keipawh ka lengchhuak e ka tia, chaw eidawn hnaiha ril a ṭam riau a, thingpui kan in dawn nia, in eipuar nan a tlai laklawh riau" a ti siam siam a, an awmpui nu chu thingpui a siamtir zui a.

Bena nen chuan inhnaih deuhah ṭhuin an titi a, a kal chhan a han hrilh chu a pi chuan phawk fein a melh a, a hauh hrep ka rin laiin "Kar ve deuh a ngai ang, i mamawhna leh i tih tum te fiah deuhin hrilh la, a phal ve mai chu ka ring, naupang chhia i ni tawh bik hleinem, eizawnna neih a hun ve tawh lutuk a lawm. Amah lah a damṭha si lo va, a ziaawm deuh lai hian ngaihtuah sela a ṭha ang" a lo ti ve luam a, Benja pawh a phur hmel khawp mai.

"Engtin nge ka dil ang, picnic spot siam kha a phal vak si lo a, a ram khu a ui aniang a?" a tih chuan, "Sumdawng tur hi chuan keipawn ka ring ngam zan lo che, a pawisain dil lo mai la a ṭha ang, i pa building ho kha enkawl dil la, inluah man khawn turin mi a tir ziah tho a, i khawn peih chuan i kutah a hlan mai duh ang" a pi chuan a ti leh a.

"Aw..chutiang zawng chuan ka lo ngaihtuah lo reng reng, a tih chi dawn hle mai, inluah man khawn te chu a har hleinem" a tia, thawh nghal mai a tum chu  "Phunglung deuhin va dil suh, i pu ngaih i ti ṭha lo a nge" tiin a pi chuan a pawt ṭawk ṭawk a, "Ka hria ka hria" a ti leh hmawk hmawk tawh.

A thingpui a tlak pawp a, chumi hnuah min rawn mitmeiin sitting room lam a pan a; mahse, beisei loh deuhin sitting room-ah a pu chu a lo ṭhu luau sia, Benja chu a tawi deuh hratin ka hria. A puin a lo hmuh chuan "Bena, mi i va rawn tlawh duh lo ve, khawiah maw i tlanbo a, koh lawm lawm pawha haw duh ngai reng reng lo mai" a lo ti bul bul a, Benja chu a ngawi kar.

"I rawn awm phei tawh em ni?" a puin a tih leh chuan, "Phei lo deuh, thil hrilh duh che ka nei a, ka lo peng zuai" tiin a pu chu a pan phei a, "Eng thil maw?" a puin a tih chuan  a ni Mary te nupa lam a va thlek te te a, an awm ve laia sawi a duh lo tih ka hrethiam, an ni nupa lah chuan a lo ngaichang ve reng a, a pu lah chuan a lo zawt nawn leh ngat.

"Eng nge i sawi duh chu, lo ngaithla ang hmiang?" muang ban charha tih pahin a tupa chu a melh chho vah a, a hawi her leh hmel aṭang hian pa namai lo tak, mahni tawka kei ka ni inti pha ngat chi a ni ang tih a hriat a, a mitmeng aṭang pawhin a inchhunga roreltu a nihzia hi a lang hliah hliah mai a ni.

"Midang awmlaia sawi chi loh, i pindanah sawi ang" Benan a tih chuan an thawm huk a, puitling zawng an nuih laiin Benja nen chuan kan ṭi ru dek thung. Chutih laichuan a pi kha a lo kal a, ka ding lai chu ka banah rawn vuanin ṭhutna min kawhhmuh zui a, ka bul chiah ah chuan a rawn ṭhu ve nghal bawk.

"Thil min dil tur i va ang ve maw le?" a puin a tih chuan "Dil dawn tho a, eng lo...pawisa lam chu a ni lo a, a falin ka hrilh ang che" a ti nawi leh niai.

"Kan hriat ve chi loh em ni?" Joshua nuin a tih laiin "Chhungte bulah zep a ngai hleinem, tihian sawi rawh, sawi hona te pawh kan nei nghal ang chu, inrawn khawm a ṭha ngai" tiin a pu chu a nui huk huk a, Benja chu kan ngaichang ṭhap tawh.

"Hmanah khan ro chan tur kan nei vek i tia, chhungkaw mi zawng zawngin i thih hunah kan insem ang i tih kha" a han ti bawl mai a, a pu chu nui tawp chiang hmek hmuk tak a ni.

"Eng nge sawi i tum a, i ro chan tur dil i tum e law..!?" Joshua pain a lo tih chuan a melh duh eih lo.

"Ka sawi ngei tak a lawm, chu chu eng tin?" a pu a ni, a inhmelh hnai khawp mai.

"Bul ṭan ve ka duh a, sumdawn i phal rih lo anih pawhin ka pa building te kha luahman ka lo khawn ve tawh anga, ka lo enkawl ve tawh mai ang, i kal thei tawh chuang lo a, mihrang tirh aichuan, a neitu tur ka ni tho a, ka lo inzir pah a ni mai" a'n ti leh nghat nghat a, ka lo ip ru ṭeuh, a pi pawn "A va sawithiam lo e aw" zawi tein a lo ti ve vang vang a, Benja pu erawh a beisei loh thil a hria a ni chek ang a lo ka hau thung.

"Kan Benjamiana ṭhin hi a" patling ṭhu chu a nui hawk hawk a, a nupuiin nui chungin a lo khap ve vat.

"I ro chanai i duh a maw?" muang leh fiah fek fawka a puin a tih chuan, "Aw, ni deuh ber mai, ka pa thil chauh pawh a pawi lo, tam pawh a ngai lem lo" Benan a tih mawlh mawlh laiin "Pawisa a ni lo te a'n ti hmasa a, a va beidawn thlak ṭhin tak" tiin a ni Mary a lo ner nang a, Benja chu huaisen ta sawt emaw tih tur hian a awm.

A pu chu a en ran a, "Chhungkaw mi zawng zawngin in zat vekin in chang ang i tia, nikum hmasa a i bp sang vanga i tluk ṭum khan..." a ti leh a, ka lo ṭang nasa lutuk chu ka hah vekin ka hria. Chutih laichuan kawngkhar a rawn inhawng rawk a, ni Pawli a lo lut ve hlawl. Benja pu chuan a lo be vat a, "Khawnge Tea kha a awm, hei kan tupain a ro chanai a duh hi, han ko khawm hlawm teh" a ti dam thluam a, inchung  kailawn aṭangin Bena patea chu a lo chhuk ve mek bawk.

Ni Pawli chu ṭi deuh hian a lo kal phei a, kan vai chuan kan ngawi ṭhap hlawm. "I ro chanai chu i duh tak tak a maw?" ring leng lawnga a puin a tih leh chuan Benja chu a lo bu nghat a, a pu chu a nui phuh huk mai.

"Ro i nei hleinem" ti a zat hmel lutuka a pu nui hawk hawk chuan mi rap deuh, Benja lah chu a han hrilhhai hmel khawp mai a, Joshua nu leh pate an nui kur kur bawk a, ni Pawli leh a pi erawh chuan an lainat hmel hle thung a, a patea erawh a lawm vak lo tih a lang, an vai chuan an landan a dang hle hlawm a, Benja hmel mawlh chu ka lo khawngaih. 

"Khawnge..i han ngaihtuah sak hlawm teh ang u, in thil hlu neih ang ang kha han dah khawm ula, kan tupa tlanbo hi a ro chanai chu siam sak ang u" tiin a pu chu a ding uaih a, Benja inhumruh leh insum hmel chu hmuh a nuam lo takzet.

"Engah nge maw khatia intih chiam chiam chu" a pi lungawi loin a lo tih chuan, "Fapa tlanbo chanchin kha i hrilh ve ṭhin lo em ni, Bible ah engtin nge kan hmuh kha" a pu chuan a ti leh bul bul a. Chutah Benja chu hnai set sawtah enin "Rosum chu peta che ila engtia tlak ral nge i tum, i chhungten hetiang nei tur hian eng nge kan tih i hre ngai em, eng nge thawh ve i neih, i mu a, i ei a, pawisa i hmang ral a, i duh hun hun ah i tlanbo a, hei tunah i tlanbo i lo haw a i ro chanai mi i rawn dil a, i pawisa ka ba em ni reng reng, i phu tawk tur i thawk chhuak ve tawh em, pek phuin i nung tawh ngai em, han inngaihtuah vang vang la i phu ni a i inhria anih phawt chuan ka ro zawng zawng hi ka pe ang che" a ti nghat nghat a, a nuih a za nge a thinur pawh ka hrethiam lo, a tupa nen chuan an in en ran a, boruak chu a ṭang ru ṭeuh mai a ni.

"I duhtawkin min nuih rawh, i duh dan danin a lawm min awm tir, in vai hian nautelem angah min ngai hlawm anih hi" Benan a tih chuan. "Khatiang zawngin i pu chhang suh" a piin a lo ti zauh a, ni Pawli a lo inrawlh ve vat.

"Ka ning zozai ania, hetianga ti leh tur si chu engah nge a tir khan in sawi mai loh, a pa building te saw a chang vek ang inti a ni lawm ni" a lo ti ve khar khar a, "Lo inrawlh suh, i enkawl dan a dik loh vang anih hi" ni Maryin a ti chu "Nang kha lo ngawi rawh, Joshua thik thu chhiat lutuk vangin kan nghak rei tawh, ka pa hian a pek tur thu a sawi vang chauhin keipawn ka hrilh, in pe dawn anih chuan pe ula, amahin a inenkawl ve mai ang, keipawn i sawi kha ka la hria ania ka pa" tiin a pa chu a melh ve ta ran a. Sehchilh deuh rap hian, "Chungkaw mi zawng zawngin chanpual kan nei i ti bawk a, ka chan pual tur pawh pe tel rawh, aman chan tur a nei lo i tih pawhin a pawi lo, ka chanpual leh a pa chanpual chu a awm ve kha, amah hi ka rokhawm tu tur ania, ka hminga ram i dah pawh kha a tan ka duh ania" a ti chang bawl mai a, kan vai chuan ni Pawli chu kan melh ṭhap mai.

"Nangte pawh chu i va huaisar ve maw le, ka la dam ve laia ro sem te in han sawi chhuah chu le" putarin a ti chiah chu, "Kan sawi ngai hlek lo, i damloh apiangin nangman i sawi ziah a ni lawm ni, sawi fo lo la chuan hetiang kan ni lo ang" ni Pawlin a ti leh ṭhat. 

"Ni..." ti a Benan lo khap a tum chu, "Haw ang, he inah hian kan leng lo, kan indang ta sa sa lut leh tawh lo zawk ang, kan eikhawp chu kan thawk chhuak ve thei a lawm" a ti a, Benja chu pawh sawn a tum ta mai, Benja chuan a lo chelh bet vat a, "Sawi duh ka la nei" a ti zawi deuh sup a.

A ni kut a thlah leh te te hnuah a pu chu a en a, "Ka nu kha dawt in lo hrilh a, ka bulah min tlanbo san angin in sawi bawk, engkim ka hre tawh, ka chanpual ka dil chhan che chu ka phu vea ka hriat vang a ni, phu lo min ti anih kha, keichuan ka phu ka inti, ka nu pawn a phu.." a tih khum ta sak a, a nu chungchang a sawi chhuak bawka an phul nghal hlut mai.

"I nu bula awm chu i duh deuh em ni a, i va kal leh a ni maw?" ni Maryin a tih laiin "A chanpual chu pe ula, a nu bulah chuan kal rawh se" a Patean a lo ti bawk a, ni Pawlin a lo chhan leh tur pawh chu an khap hmiah tawh.

"A nuin a thluak a suk sak anih hi, a chanpual dil turin a nawr tih a hriat reng" ni Maryin a ti zat zat a, "Nang kha lo ngawi rawh, ka nu kha dawtin in puh a nih kha" Benan a tih pawh chuan, "I pa boral chhan a nih kha, zu zuar fanu a nei a, a in inhlum ta ṭhak anih kha" a lo ti khum leh salh a, thil kal dan chu a dik lo telh telh, thaw a ipik a, tlan chhuahsan daih te duh; mahse, keimah chauh chuan ka chhuak thei bik lo, Benja hmel chu ka va en ṭhin a, ka khawngaih ngawih ngawih.

"Fel takin awm la chu i pu hian a tihsak hreh lo che, Joshua pawh bul a ṭan sak vek a lawm, nang chu bul ṭansak tlak pawhin i awm ngai hleinem" ni Maryn a ti chu ni Pawlin chhan a tum hman zuau a; mahse, Benja zawk a lo ṭawng a, "I fapa ve kha mi lem a nih kha, a fel vakna ka hre lo" a ti bawl mai.

"Joshua ne pawh i ek lo ve" a ti leh chu "Nun tak nei ve rawh se, ka fel der ve ngai lo" tih ri in a zawm zat a, "Ngawi tawh rawh u" putarin a tih ri chu an ngaihsak lem lo.

"Joshua hi i thik a, i er em em reng anih hi" ni Maryn a ti leh.

"Eng nge thik tur awm, ka awh zawng engmah a nei lo e, nu leh pa fing kherek deuh a nei che u a, ka awh loh zawng tak a ni" Benja chuan a ti zui hram, chu veleh a dar a ri zawt a, a puin a tiang kenin a lo hem chu niin. A pu chu a melh ngar a, "Ka ngawi ang, ka chhang tawh lo mai ang che u, aia upa te chuan....ZAH IN PHU" seh chilh rap hian a ti a, a Ni lam hawiin "Haw ang, haw vang vang ang" a ti zui a, a aw chu a khur dar dar mai, ka ṭhutna bulah lo kal hnaiin ka ban a rawn vuan chawt a, engmah a sawi lo, rang deuhin ka tho a, pawn lamah kan inzui chhuak hlawk hlawk a, ni Pawli khan min zui ta lo aniang pawn kan thlen hnuah pawh a lo chhuak ve lawk lo. 

Benja chu ka han melh a, a mit sen rum leh a thlan bawl ṭiam ṭiam te chu hmuh a nuam mawlh lo. "Kal ang" ka ti zawi sep a, thawk a la vang vang ringawt.

"Rinte.."

"Ummm"

"Min nuihzat ve lo ti raw?"

"Teuh lo mai" a darah ka va kuah a, a banah ka beng thek thek a, hnem dan vak pawh ka hre lo a ni.

"Haw lo ang, tlan kual lawk teh ang" a tih chuan hnialna ka nei lo, boruak dang dawn a mamawh, a bula ka awm ngei a ngai bawk.

A pu te kawt aṭanga kan inkhalhchhuah laichuan khua a tlai ruih tawh a, Hostel-ah chuan chaw an eifel tawh ngei ang. A pan tur lam pawh sawi chuang loin a tlan par par a, keilahin zawhna ka nei hek lo, a jacket-ah nghet deuhin ka vuan a, a hnungah ka bei thlam bawk a, ngaihtuahna a vak kual ruai mai.

Inbe loa rei deuh kan tlan hnu chuan khawpawn kan thleng a, khua chu a thim lek lek tawh. Kawngsirah a ding a, chhuk pawh a tum lem lo. Ka han ngaichang deuh a, engmah a sawi si lo a, a inngaihtuah anih ka ring. 

"Bena...i ṭha em?" 

"Ka chhuk dawn em?" min la chhang lo. 

"I duh leh kawngsirah hian ṭhu rih ila" tih paha ka va thlek chuan a ṭap tih ka hrethiam chiah, ri miah lovin a ṭap. Nghet deuhin ka va kuah a, ka hnuk a ulh ve ṭeuh mai.

"Insum miah suh, i duhtawkin ṭap rawh, i bulah ka awm tlat dawn ania" tiin ka han hnem ve ngial a, ka hnem zo lo ang tih erawh ka chiang. Ka kut chu a rawn vuan a, a hmer vawng vawng a, "Ka ṭap lo, hre lo der rawh" tiin a nui hak a, kan ṭah nuih ve ve.

"Ka hre lo der ang, ṭap bawrh bawrh rawh" ka kut chu a hum nghet zual sauh a, thawk a la ham ham bawk. 

"Ka rilru bak hi pek tur che ka nei lo maithei a ni, i duh tho ang ti raw?" a ti zawi deuh ruih a, "Aw, chu bak a ngai lo, keipawn chutiang bak chu pek tur che ka nei lo" ka ti ve vat a, ka rilru dik tak a ni, money honey angin ka en ngai lo, a rilru min pek aia duh dang leh phut pawh ka nei chuang lo, min pek theih chhun hi ka ngaihlu em em a ni tih hi hria sela ka duh.

Kawngsirah beer kan in a, can hnih chauh anih vangin an lak belh bawk a, zan rei thlengin kan tlan kual a, kan rui dun bawk. Inhnem tawnin hlimna tur kan hmuh ang ang chu kan am dun a, a haw peih lo lutuk te chu tirh lui a har ka ti, min ngaiin min thlahlel ve ngawih ngawih a, mal leh khawhara a awm chu ka phal bik lo, zan rei deuh thlengin Hostel gate thlangah kan ṭhu dun a, sawi dun tur kan hria a zeng pawh a ni lo, lungngaih changa belh tur ṭha ber ni a ka ngai ang chiah hian ani pawn min ngai ve tih ka hria, a peih chen chen tiin ka ṭhutpui ve ngar ngar a,  Hostel-a lo riah a tum erawh ka khap thei hram a ni.

(End of chapter - 30)