BLUE BAYOU
by Ahmangaihi violette khiangte
Chapter - 31
Class kal tura ka insiam mawlh mawlh laiin ka phone a lo ri a, Benja a ni. "Good morning, i la thawh peih ka ring lo va" message ka la thawn loh vangin ka ti hmasa ber a, "Ka rawn lam hman lo maithei che, first in nei nitin hi a buaithlak em mai, vawiin chu 3rd period aṭang chiahin ka nei dawn" a tih chuan a pawi ka tih loh thu ka hrilh mai a, tuktin hian keimah vangin a rawn kal hmasa ve ziah a, college thlen hnuah ka luh san leh daih zel a, ka khawngaih ve deuh ṭhin
"I tho nuam maw, ka lu hi a na bur mai" a ti leh halh a, a penṭawng nasa khawp ang.
"Sertui in rawh, keipawh ka pum a nuam vak lo, chaw pawh ka ei lo" ka ti ve zung zung a, "Ka lo thlen hunah thil tui deuh kan ei dawn nia, inbual harh te ka duh" a tih laimek chuan a Ni aw ka hria a, "I Pu a lo kal dawn ania, lo tho rawh" a ti ni maiin ka hria.
"Eng nge a lo tih dawn a, a va ṭul lo thei ve" Benja chuan a ti deuh lawng lawng.
"Lo tho vat rawh, a lo kal mek tawh ang" tih ri ka hre leh a, "Anih phawt aw, debate kan nei leh dawn a ang" a rawn tih chuan ka nui ringawt. "College i lo thlen hunah min lo text mai dawn nia" tiin phone chu ka dah a, ka insiam zung zui mawlh mawlh a.
Kimkimi'n min lo sawm phei a, nidangah hi chuan kan kalrual ngai lem lo, inhnaih te e ti lovin kal lam leh haw lamah pawh kan inthurual thei lo a, a chhan pawh Mawitei nen an inphur a, kei Benja nen kan inthurual ṭhin vang a ni. Vawiinah Mawitei a lo kal dawn lo aniang Taxi a kalrual puiah min lo sawm a, fair pawh kan inchawi ṭawm thlap a, college kan thlen chuan dar 9 a pel tawh.
Firt period aṭangin class a indawt chho zut a, lunch break bak hi chu chhuahna hun pawh a awm ngai lo. 3rd period zawh ṭepah Benja chuan min lo text a, a lo thleng ve chiah a nih hmel e. Lunch break a ka va chhuah chuan class a la nei a, thil eiturin canteen-ah ka lo nghak ve leh a, zing aṭangin engmah ka la ei lo bawk nen ril a ṭam tawh khawp mai. Chutia ka lo nghah laimek chuan Awmpuia te ṭhian ho an lo lut a, Noeli'n hma a rawn hruai a, an eitur an lam mawlh mawlh hnuah an chhuak leh diak a, pawn lamah an ṭhu anih ka ring.
Benja chu a lo chhuak har khawp mai a, luh hmain minute 20 vel chauh a awm tawh. Ka eisan mai dawn em mawni ka tih rum rum hnuah a rawn lang hlawl a, hmuh tum dan sa ka lo nei nge ni beisei angin ka hmu hauh lo, a lo nui lut vur vur a, a phur hmel riauin ka hria. Ka bula a lo ṭhut rual chuan min rawn nek salh a, eng card emaw hi ka hmaizawnah a rawn lek kang vah bawk.
"Eng nge hei hi?"
"Ka Pu min pek"
"A ATM card a pe che maw?" phawk fein ka melh a, tukin lam chanchin kha ka la zawt miah lo.
"Pe lo e, min kawl tir mai mai, i mamawh leinan lo hmang rawh a tia" tiin a nui pat pat a, minti bangbo angreng.
"A thinrim tawh nange, tukin khan eng nge a lo tih?"
"Min rawn zilh ṭeuh, nimin kha a inthiam vak lo aniang hei hi min pe a, tih chi tak tak a ni" lawm hmel fea a tih chuan "Hman i tum em?" ka lo ti zauh a, a bu rang nasa mai.
"Hmang dawn chiang e le, ka hmang ṭeuh ang" a ti zui a, an inthlem lungawi chiang awm mange ka ti, han tih zui vak dan pawh ka hre lo.
Pawisa chu engtin nge a hman dawn ka zawt a, "Thawmhnaw ka lei anga, bike ka chei ṭhattir bawk ang, mamawhna a tam mai, tlema inlak thu ve deuh te a ngai" a ti nghat nghat a, tu laka thu neih nge maw a tum ni? Kan eitur a va order a, nidangah pawh kan ei ṭhat ngam loh man to deuh deuh a chah ṭeuh a, a hmelhriat a hmuh apiang chu kan dawhkan kilpuiah a lo sawm bawk a, ṭhian siam chu a tum khawpin ka hria; mahse, mipa lubuk deuh pahnih bakin min rawn zawm duh lem lo.
Benja ṭhiante chu an semester-ah pawh sual ve pawl, class tlai ching leh tlar hnungah baka ṭhu ngai lo chi a ni ang tih tur a ni, an naupan hmel ang aiin an sual hmel reuh a, Benja chuan kawm tam lo se ka duh ru khawp a, a ṭhian neih chhunte an nih hmel bawk si a, amah lah chuan a be mawlh mawlh reng a, an ina lengah te a sawm thul.
Thil kan ei zawh chuan kan thawhsan hmasa a, canteen aṭanga kan chhuak chiah tih ah "Zu an duh ania aw, zing aṭangin an rawn nam hman ziah" tiin min hrilh a, "Engati nge khatiangte i kawm duh a, midang fel deuh kawm tur an awm lo em ni?" lawm vak lo a ka tih chuan, "A ho lutuk, tumah tak tak hi ka kawm peih lo, engtikah nge SU an thlan dawn i hria em?" a ti a, nichin pawh khan a ṭhiante kha a zawt tawh.
"Din ve i lo tum leh ngawt a nge?" ka ti chu a nuih a han za khawp a, ka ringhlel thut thut.
"Ding reng reng suh ang che, mawhphurhna a sang ania, i tlin lo ang"
"Ka ding dawn ka ti hleinem"
"Thu ve deuh ka duh i tih kha"
"Thu dawn rapthlak e, ka thu vet vet viau ang.." ti a nui vur vur chungin min kalsan a, a class lampana a kal chu ka enzui reng a, ka ngaih a ṭha zan lo. Ka enreng laichuan an semester mipa ṭhenkhat a tawk a, engthil emaw sawiin an ding khawm laih a, ka luh a hun tawh avangin engtin nge a awm zui ka hre lo, ka luhsan a, kan building tukverh aṭanga va thlir ka tum chu ka hmu ta miah lo a, class-ah a lut a nih ka ring.
Chumi hnu chuan SU chungchang a sawi leh miah lo a, candidate ṭhenkhat nen an in be lai hi ka hmu fo mai, a hmelhriatte an nih ka ring. College week in a zui bawk nen Benja chu buai vut vut tak a ni. Kan house awmna a in ang lo va, kei red house ka nih laiin ani Blue house a ni thung a, kan captain Awmpuia a nih laiin Benja te captain chu Peksanga a ni thung. A buai phar chiam chhan pawh mipa items a tel theihna zawng zawngah a lo inziak lut fai vek a, chumai ni loin an House fund atan pawisa tam tham zet a lo pe bawk. Chung vangte chu a niang beṭhatu a ngah ṭan khawp mai a, SU ṭhenkhat pawh pawisa hmangin a pawi a nih te ka ring, biak ṭhat a hlawh a, an semester hmeichhia leh an house hmeichhe ho lakah pawh a tlana ṭan aniang a hmingin an ko chat chat thei tawh.
"U Ben, vur min lo lei"
"Ice cream min lei teh" tih angreng hi a sawmna dawn a nia, amah aia naupangte te hian an bawl ni maiin ka hria.
Week kan ṭan ni chuan individual items an ti hmasa a, Benja chuan tel lohna a nei lo reng reng, "Ka tel ve dawn, min lo en rawh" a ti thei vek. Bialpa te na na na chu tiin ka ṭhiante ka sawm a, field sirah an intlansiak enturin kan ding far a, Benja leh Awmpuia ding dun an hmuh chuan, "Tunge zawk nge i ṭan dawn, a hlui nge a thar?" tiin Mawitei'n min lo chhaih zuk zuk a, ṭan pawh ka nei peih lo, an tih tihin ti rawh se.
"Lalawmpui, captain fantastic...kan ṭan che a nia..." ti a au lawng lawng ri chuan beng a ti kham deuh a, kan piah maiah kan assistant captain Noeli'n fresher hmeichhe ho a huikhawm a, a phusa hlawm lutuk chu ka lo hmu kham hlur.
"Lalrin, Red house i nih kha, i rilru ti uire suh" Kimkimi'n a tih chuan ka ner nak.
"Khatin lo ti suh, Awmpuia leh Bena an tel tlat, Awmpuia a ṭan chuan a rilru a uire tiha a ni zawk dawn, Bena a ṭan a ngai" tiin Mawitei'n Blue house ṭan turin min lo ti ve sek bawk a, an awm dan chu ka hne vel vek, chu aichuan Benjamina chu a insawitheih ang hu a ni em tih a nia ka hriat duh ni.
Whistle a ri tuar a, a dawk chhuak zawt a ni ber, an tlan chak hlawmzia chu aw, Benjamina pawh ka rin aiin a tlan thei daih, field chanve thleng chu a hmasa ber a ni. Mahse e.....field chanve hnulamah thung chuan pathumna ania, chupawh a hnung lam aṭanga chhiarin.
"Pakhatna leh pahnihna kan la e" Noeli'n a tih chuan an au dur dur a, a naute ho chu biain "Basketball khelh hunah phei chuan Cheerleader ah in ṭan a ngai dawn ania aw, in thawmhnaw tur chu ka lo ngaihtuah vek ang" a ti zat zat a, a naute ho chu fresher hmeichhia vek an nih bakah an hmelṭha hlawm phian a, a hmel keu deuh a thlang anih te ka ring.
100m race hmeichhe lamah chuan Kimkimi te pawl Green house-in pakhatna an la a, Kimkimi hi chuan kan luh tirh aṭangin phak tu a la nei lo. An zawh rualin mipa 200m race an ti lehnghal a, Benjamina pawh a lo ding leh vang tawh. Lalmawiin "Au phur ve rawh" a ti tak na a ka au ngam der lo. Amah zawk chuan awrawl tawp tawpin a au a, an tlan ṭan chiah chu ka ṭang ve ṭeuh mai. Benja chu 100m thlengin pahnihna a ni a, an tlan let lamah erawh field laiah a tawp daih, hahthlak bet bet tak a ni.
An zawh hnu chuan fei inkhawhsiak an nei leh a, chutah erawh pahnihna a la a, pakhatna chu white house ami a ni thung a, Awmpuia erawh a tel ve lo. Shotput-ah pawh Benja chu a tel leh a, an house an nil ṭhak, an point pawh a hniam ber.
Chhun thingpui in chawlh kan neih dawn avangin Benja chu kan lo nghak a, "Thil in show tir ang u" ṭhianten a ti bawk nen pavillion sirah kan ding reng a, chutih laiin ani thung chu Blue house ho awm khawmna bulah a la nui ham ham a, ka call pawh a hre lo. Rei deuh hnua a lo phei chu blue house ho chuan an lo zui dam dam a, "Ti ru, thingpui in ang u" a rawn ti chu tuman kan chhang hlawm lo.
"A huhoa in an tum aniang a" Kimkimi'n a tih laimek chuan "Blue house ho kha lo kal vek ru, Benan min show dawn" Peksangan a ti lawng lawng a, Pavillion hnuaia ṭhu ho pawh an rawn tho sap sap mai.
Phur lo deuhin kan zui a, Benjamina intih thuzia mai chuh, "Kan inluh chhawk angai, kan leng lo" tiin lut hmasa tur a kawk diat diat a, "Ka ṭhutna tur lo hauh ru" tiin kan ṭhianho chu min nam lut rawk rawk a, a chhunga kan luh hnuah pawh midang huikhawmin a la phar buai khawp mai. Peksanga hnena pawisa a pe lai te chu ka hmu ve reng a, a lo lut te chu thu hmel ber ber tak a ni.
"I pawisa ren rawh" ka han ti dek dek chu "Ren tura pek ka ni lo, hman huau huau tur, in duh duh ei rawh u" tiin ka ṭhiante chu a menu a pe a, ṭhiante an phur bawk si a, khap theih pawh a ni lo.
Thil kan ei mawlh mawlh laichuan pawn lamah Awmpuia ka va hmu hlawl a, Jerry te ho nen ṭhutna an la chang lo anih hmel. A rawmawl chuan a hmai a hru mawlh mawlh a, a lo hawi nen chuan kan inmelh fuh chiang hle bawk. Tawite hian min rawn nuih a, ka nuih let ve dawn chiah tih ah "Ei rawh" ka bula ṭhu chuan a lo ti hmuk a, min lo en reng chu niin. "Ka ei reng a lawm" ti a pawnlam ka va hawi leh chuan Awmpuia te kha an lo kalsawn tawh a, eina tur dang an zawng dawn anih ka ring.
"Telna tur i la nei em?" ti a Kimkimi'n a zawh chuan, "Volleyball-ah ka tel ang, long jump chu pum a nuam lo em mai midang ka kian mai" Benja chuan a ti ve ngei a, Peksangan "Nia tel tawh lo mai rawh" a lo ti chu "Ka peih chuan ka tel tho ang, engah mah khan min lo paih suh" a ti leh lawi a, Peka chuan tel lo se a duh tih a lang reng, pawisa hmangin an indawr tih pawh ka hria, chuvanga hnial ngam lo mai mai a ni ang.
Chawhnu lam chu volleyball anih vangin field chhak lamah kan chho dial a, hmeichhe inkhel a awm avangin Kimkimi a lo kal ve lo a, Mawitei nen kan inzui chawt thung. Beisei loh takin Benja pawh a laktlak ve phian e, ṭan pawh a nuam, a tifuh ṭum phei chuan phur thei tak a ni, white house lam an nawi deuh bawk nen an chak chiang khawp mai, a zawh hnuah a teammate te chu ice cream a show leh vek a, kan bula a lo ṭhu pawh zuitu a nei zel tawh, a bula awm an chak a lawm, mi zawng zawng money honey a ni tawh miau a, hmeichhe ho pawn an en dan a dang tih ka hai lo, amah hi chuan mipa ho hi a huikhawm bera, hmeichhe ho hi chu a ngaihsak lem loin ka hria, SU hmeichhe pahnihin an lo fiam pawn a chhang puat ringawt a, an bula ṭhu tura an sawm pawhin a kal chuang lo, mipa ho bulah zel a awm a, nuam a tih hmel hle bawk.
Zung turin field lamah kan chhuk thla a, kan zun zawh hnua Pavillion hnuaia kan din laichuan kan chung lawka ṭawng ri ka hria a, Noeli te ṭhian ho chu an ni loin ka hria. "Rintei leh U Awmpuia te chu an inṭhenna a rei tawh, 1st sem a mi Bena kha Rintei nen an inngaizawng an ti" hmeichhe pakhat chuan a ti a, "Kan veng a mi anih kha, ka hrechiang lutuk" pakhatin a lo ti ve vat a, an ṭawng barh barh mai. Mawitei chuan a han thlek a, "3rd sem an niang" a ti ringawt a, ka thlek ve duh lem lo.
"An hausak hmel tawp"
"Hausa lutuk, Bike chhuak thar apiang a nei thei, a nu pawh Doctor a nia lawm" pakhat chuan a ti leh a, "Engtin nge Rintei hi a duh zawk le, Awmpuia nen an inzui nasa ve sia, a hre lo aniang a?" pakhatin a tih laiin "Rintei te chu a zei dawn e, Awmpuia pawh khan a atchilh a lawm" midangin an lo ti ve thung a, nuih te pawh a za lek lek. Kan kalsawn tur chuan ka han thlek chho zawk a, a laia ding lukhum dum khum chu Valerie niin ka hria.
Volleyball court kan thlen chhoh chuan Red house leh Green house ten an lo khel mek a, Sangtei te ṭhian ho pawh an lo au nasa khawp mai. A khat tawkin Awmpuia hming a ri leh lauh ṭhin a, a chet ṭhat apiangin hmeichhe ho an au dual zel a, "Chicks maget-a" Mawiteiin a ti zauh pawh chu inhmeh tak a ni.
Kan house te khel a nih miau avangin ka lo ṭang ve lo thei lo a, chu loah Awmpuia a ni miau a, thinlung lam hian a lo duhsak ve hliah hliah zel. Ṭum khat phei chu kut ka lo beng uar deuh aniang Mawitei'n min lo nghawk sawk a, "I bialpa sawn a lo en ngar ngar che ania" a tih chuan Benja te ṭhutna lam chu ka melh vat a, kan ṭhutna lamah a lo phei mek a ni.
Kan bul a lo thleng chu ka hma ah a rawn ṭhu sawt sawt a, min rawn ngheng zui bawk nen ka pawm a ni ringawt. "Khawi lam nge i ṭan?" a tih chuan, "Kan house" tih chiahin ka chhang. "Zawlpala nge Phunṭiha i duh?" a'n ti zui a, hahthlak hian....
"An chak chuan naktukah Final kan khel dawn, i ṭan tur i thlan a ngai ang" te a tia, ka chhang duh lo chung pawhin "Zawlpala nge Phunṭiha team i thlan dawn?" tiin min zawt sek sek a.
"Phunṭiha i nia mi?" ka tih lah chuan a bu nghat nghat reuh a, a va han khaw loh thlak tak. Mawitei lah chuan a lo nuih kar kar reng a, "Ice cream min lei rawh Phunṭih" tiin a fiam lehta nghal a, zia lo tak a ni.
"Tualvungi leh Zawlpala thawnthu kha i hre ve reng reng em?" ka tih chuan, "Hria e, Zawlpala'n a nupui Tualvungi chu Phunṭiha hnenah a hralh a, Zawlpala kha lunglengin a thi a ni lawm ni" a ti hem mai a, ka lo nui huk, hriat a mual mual chu a nei ve a, a pawh pha lo deuh chu a ni.
"I hre lo em mai a, Zawlpala te chu changtupa a sin, a thawnthu pawh Tualvungi leh Zawlpala tih a nia, Phunṭiha te chu misual a lawm, mi nupa inhmangaih tak te a pawt ṭhen a, phengphehlepa an chan hnuah pawh phengphehlep dum hmelchhe deuhah chang vein an hnungah an um duan duan ania aw, Phunṭiha te chu thrid wheel a lawm a nih" Mawitei'n a lo ti zat zat a, Benja chu a rawn lehhawi rang khawp mai.
"Misual Third wheel ka ni reng reng lo e, changtunu changtupa ka nia sin, Zawlpala chu keimah ka nih chu" a lo ti leh heh a, Mawitei nen kan lo nui kar kar.
Red house an chak a, an inkhel zo player ho lo chhuak chu kan ṭhutna lamah an lo kal phei a, a hnung bera Awmpuia lo kal chu Benja chuan a lo au lauh mai. "LALAWMPUI" tih ngatin a ko, a hming a hre lo emaw ka tia!?
"Hetah hian lo ṭhu ve rawh" Benan a tih leh chuan Awmpuia chuan a ṭhiante a be zauh a, chumi hnuah kan lam panin a lo kal a, "Tui vawt in nei em?" a rawn tih chuan Benja tui chu lo pek mai ka tum a; mahse, Benja'n min lo ban khalh hmak.
"I va fit lo ve, ka rin aiin i vaw ṭha ngam lo tlat" tih pahin tui Bottle chu a pe a, Mawitei sira Awmpuia ṭhut tum chu a bula ṭhu turin a hrilh leh zat bawk. "Thil inthleng kan ngai" a han ti zui a, "Heih..." ka ti hman awrh, "Zawlpala ka ni tawh dawn, lo inti Zawlpala tawh suh" a'n ti pek a, Mawitei a lo nui chhuak huk.
"Rintei bialpa i nih vangin i duh duh i ni thei tihna a ni hleinem" tiin Awmpuia chu a lo nui suk suk a, a hah viau aniang a thlan a tla hluam a, a jacket-in a inhru mawlh mawlh bawk.
"Saw nu sawn a melh peih khawp mai che, a ngaizawng che a nih dawn saw" Benja'n a tih leh chuan a hawina lam kan en ṭhap a, theitui keng chunga Sangtei lo phei chuan Awmpuia chu a lo nuihsang a, Awmpuia chuan a nuihlet ve lem lo.
"I in ve lo va" kan bul a lo thlen ruala a tih chuan "Khawi, ka lo tulh ang" tih pahin Benan a lo ban thawt thawt. Hreh hmel deuhin bottle chu a pe a, "I lo chhuk nghal dawn lo a mi?" Awmpuia lam hawia a tih leh chuan, "Ka'n hahdam ve phawt ange, lo zuk chhuk rawh" Awmpuia chuan a ti mai a, min lo melh leh zet hnuah Sangtei chu a kal a, kan piah deuh aṭangin a ṭhiante nen an la rawn hawi zing khawp mai.
"Zui ta che, a hope em che kha?" Benja'n a lo ti leh chu "A hrilh che em ni?" Awmpuian a lo ti ve khauh a, ka lo inrawlh vat. "I hriat reng kha, a hma pawn i sawi kha" ka tih chuan ka hma a ṭhu mipa te chuan min en ve ve.
Ka lai deuh chuan "Min bem i tih kha" ka ti zawi leh sep a.
"Nia; mahse, engmah a awm lo" Awmpuian a tih chuan, "A duh che tih i hrereng sia, i duh ve loh chuan beiseina siam mah ta che, i be chhe chuang si lo va, khatiang kha hmeichhe tan a rilru nat thlak duh a nia" ka han ti zui a. Min chhan a tum zuau a, "Rilru na tawh i va ang ve" Benjaminan a lo tih khalh zauh.
"Keimah aw..haa...teuh.." Awmpuian min lo en vang chuan "Hmeichhe rilru te chu.." ka'n ti leh ngawt a, ka insawi buai zo dawnin ka hria. "Ho lutuk, ho lutuk...Rintein a experience vek tawh, chu chu a ni mai" Mawitei'n a lo ti zung zung a, midang chu kan ngawi ṭhap mai. Sangtei te dinna lam chu kan hawi a, field lam panin an lo kal mek tawh a, a rawn lehhawi zing khawp mai a, ka hma a mipa ṭhu te chuan eng emaw chu an ngaihtuah ve vein ka ring.
"Bem ila.."
"Eng a..?"
"A chhiat loh kha.." Benja chu a nui vur vur..
"I duh chuan bem rawh" Awmpuian a tih chuan "Bialnu ka lo nei hman a, i single a lawm" meinei fein Bena'n a tih leh.
"Nupui i la nei bik hleinem, hetiang baka single" tiin Awmpuia chu a nui ve suk a, a inbiak dan chu ka ngei ania aw, engmah lah chu ka sawi ve ngam der lo.
"Bialnu ka lo nei tawh a, nangin i nei lo.." Benja bawk a ni.
"Nia ka nei lo; mahse, hmeichhe duh deuh ka nei" Awmpuian a tih chuan Mawitei a lo nui leh hak a, kan ṭhiana te pahnih chu an inmelh duh eih lo. "Duh ruk te hi chu inkhap beh theih a ni lo bawk a, ka hrethiam zel mai ang che, thil tihin zui lo se" Benja'n a ti leh chiah chu "Hun ṭha ka hmuh dan a zir" tiin Awmpuia chu a tho nulh a, "I chhuk dawn a mi?" Mawitei a tih chuan ban a rawn vai thuak a, a kal zui mai bawk.
"Lalbena chu ka chungchang awmze nei deuh deuhin i sawipui zel a, 'Bem ang?' tih vel te kha a ngai lo em mai.." vui awka zeta ka tih chuan, "Ngaihzawng nei vat sela ka duh a lawm, ka hmuh apiang hian ka awm a ti nuam lo" a lo ti reuh a, a awm nawm lohna tur zawnga ka awm ngai pawh ka hre lo.
"Engah nge i awm a nawm loh ngawt, ani te chuan ngaihzawng neih a peih tawh hleinem, lehkhazir ringawt a lawm a thupui, a ngaipawimawh ber bawk a, single a duh a lawm.." Mawitei a lo ti ve vat a, a lo sawi chu ka lawm ru khawp mai.
"A ni tak tak teuh lo, Single tur chi a ni lo" Bena'n lo a ti chu ka hrethiam mang meuh lo.
"Engati maw?" ka lo ti heu a.
"Min zawt peih e a, ngaihzawng nei vat sela ka duh a ni mai, anih loh chuan ka nei vat ang che" a'n ti zui a, kan nui zo ta vek. Ka chhuk hmain dawrah kan kal leh te te a, Cold drinks te kan lei hnuah kan chhuk chauh a, field kan thlen chuan inkhel pawh a lo zo tawh a, SU roll call kan nang tawk chiah a ni.
Kan haw tur Benja nena kan inphur chu min lo en duh hlawm khawp mai, hmeichhe ṭhenkhat rilru chu ka hmuthiamin ka hria, ka hmeichhiatpui te hi chu ka hrethiam ve riau zel, an mi ngaihdan tur pawh ka rin dik leh ngei ka ring. Kan tlan chhuak deuh chauh tih ah Lzan a lo call a, zana lenpuia a lo sawm a, Bena'n ka kal ve duh em tih min zawh chuan ka hnial vat a, ka chau deuh nen mut vang vang ka duh. Chutia ka hnial takah chuan, "Hostel-ah ka dah che anga, ka tlang ang, an inah chaw ka einghal mai ang" a ti zung zung a, Roma leh Lza te nen an ni dawn bawk a ka hnial lem lo.
Chumi zan chuan dar 10 velah min lo call a, a rui deuh phual mai. "Zantir khan ka Puin min lo ko a, college ka kal thu ka Ni in a lo hrilh a lawm maw le" a tih chuan an hau anih ka ring ringawt a. "Bang turin an ti che em?" ka ti let ve vat a.
"Ti hran lo e, ṭul lo a ti hle ringawt, thil dang daih min sawipuia" a tih zawm leh a.
"Eng thil nge?"
"Nupui nei mai la a ṭha ang min lo tia, nupui ka neih chuan ka puitlin phah a beisei thu te a sawi duah mai, kuminah emaw nakumah emaw chuan nei turin min duh anih hmel" a ti ta mai a, ka ka hau, eng ngaihdan nge ni ngai, a puitlin phah ka ring lo nasa.
"Engtin nge i chhan?" a lo nui huk a.
"Ka duh loh pawh ka hre lo, kuminah chuan ka peih chiah lo a, nakumah i graduate dawn a lawm" a rawn ti a, ka nuih a za deuh tlat.
"Nupuiah min sawm e law?" ka nui kar kar a, ani pawh a nui ve tho. "A mak teh thut ti raw, ka lo la ngaihtuah ngai miah lo" a tih chuan kan in hrechhuak ram ram, keichuan pasal neih vat a, chhungkaw nuam tak neih tluka chak dang ka nei lo. Mahse, a rawn sawi teh thut lutuk a, mi chu a ṭhawng ve deuh.
"I puitlin phah an rin vang chauh chein maw nupui nei tura an tih che?" tiin ka zawt leh a, "A ni ber ang, 'Nupui i neih hunah i pa ro zawng zawng pawh i kutah ka dah ang a tia, nupui fing fel deuh nei la, i kuta dah ringawt chu ngaih a ngam lo, thachhangdawltu tur i mamawh' min tia, mo atan an awt deuh che aniang" a ti deuh luam a, a Pu chuan a ring ngam lo ve hle anih hmel. Chutih rualin sual vang hrim hrima hren sak chu a ang loin ka hria, a tupa nungchang leh khawsak phung hian a ti tim anih ka ring.
"Nakum chu tih tum sa deuh te i nei em, nupui ka neih a ngaih hmel sia" nuihza aw leh inthlahrung aw ka hre tel, a rilru tih buai ka chak tlat a, ka chhang ṭha duh lo.
"Ka hre lo, graduate ruala pasal neih te chu a, ka la naupang bawk si, hna ka nei awm bawk si lo" ka ti nawi niah niah a, "Naa.." a rawn ti leh ringawt ṭhin.
"Kum tlin tawh ber te chuan, keipawn nupui neih chu ka la chak hleinem; mahse, neih ngei ngei a ngaih ka ring, min nawr viau phei chuan thil an ti tlu zung zung zel ania aw, palai tirh te lo duh thut sela engtin nge ka chhan ang, lo inngaihtuah ngei ngei rawh, hun chu a la tam deuh a, tun aṭangin lo ngaihtuah ṭan la, nakum lam project daih a lawm" te a tia, nupui neih chak lo anga a insawi tak chu ka lo helh a, minti phur lo deuh tlat a ni.
"A la hla em mai a, a kar lakah kan inṭhen hman angem tih pawh hriat loh, tuna lo inngaihtuah ka duh teuh lo, duhthusam sual te hi ka hlau tawh" ka ti pang pang a, chutah kher chuan dawt ka sawi lo ang, Awmpuia nena kan hma hun kha ka suangtuah nasa lutuka, kan inṭhen pawh kha ka tuar thiam loh phah hialin ka hria, chuvangin ngaihtuah lawk chiam chiam a, beidawn leh kha ka hlau tawh.
"Inṭhen hman angem tih lam daih kha ngaihtuah a ngai lo, kan inṭhen lo ang, inngaihzawn tirh aṭanga nupui tura ka hisap awmchhun i nih kha aw, inṭhen lam ngaihtuah suh, ka ṭhen dawn teuh lo mai che" a tia, a rawn pawrzia mai chuh.
"I hre lo anih kha, inṭhen chhan hi ho te te a ni ṭhin, hma hun a hriat loh"
"Eng thil pawh thleng se ka ṭhen lo ang che, min phatsan te anih ngawt loh chuan, emaw Phunṭihan min tibuai te anih loh chuan"
"Awmpuia te chu chutianga mi tibuai chi a ni lo, min duhsak dun lutuk a lawm" ka ṭawng chu a ring ta lo, Awmpuia chungchang kan sawi vang a ni.
"Min duhsak a? Nangmah a lawm a duhsak che, keite chu..." a nui ri hawk a, ka sawi zawm peih lo. "I chhungte bulah chuan ka chungchang lo sawi vak suh aw, ka lo ngaihtuah ang; mahse, hmanhmawh lo ila" tiin a ngaihṭhat nan ka sawi ve ta hram a, ani pawh chuan min hrethiam ve niawm takin "Rilru ti hah vak duh suh, i hmin zan anih loh chuan ka nghak thei ania" a ti ve thlap a, phone a dah dawnah a tuk lam ka kal loh tur thu ka hrilh bawk, ka lu a na renga, chawlh mai ka duh a ni.
Zingah chuan Roma nen an awmdun laiin min lo call a, "Kan inah chaw kan va ei lawk anga, kan kal a ni mai, vawiin chu min lo kalpui dawn a" a rawn ti lawng lawng a, Basketball an khel dawn a, Roma pawh a phur khawp ang chu.
Nilengin ka mu a, ka pa ka han be zawk tih loh chu phone pawh ka khawih mang lo. Dar 3 dawnah Mawitei message ka dawng a, peih mang lo zeta en ka tum chu ka ṭhu chhuak zawt a ni ber. "An inti buai, an lo ṭhelh vat a, kut a inthlak hman lo, an innam sawk sawk mai" tih hi a ni a, thlalak a rawn tel bawk. A thlalak lo thawnah chuan Basketball court-ah a inbawr khawm luih a, Roma'n Benja a chelh bet lai leh Awmpuia midangin an pawt sawn lai a ni, engthil tehhrep nge maw thleng le?
Benja ka call hmain Mawitei chu ka call hmasa a, "Eng nge an intih buai chhan?" ka va ti thawr a, a sawi chiang lo nei nuai lutuk chuan thin a ti rim ṭun.
"An inkhel kha an ṭang lutuk a, chuvang aniang, nangmah vang anih ka ring lo, tui an in tur kha an in be mawlh mawlh a, an innam nghal ringawt a lawm" tih angreng a rawn sawi a, "Tu nge nam hmasa?" ka ti pawh chu "Benjamina a niang, a pawr zawk a lawm" tiin min chhang a, a sawi zawh hnu lawkah "Ka va luh laichuan an lo ṭhelh tawh" a ti leh lawi a, an innam lai hmu angin a insawi bawk si a, ka hrethiam mang lo.
"Bena ka'n call a nge" tih leh phone dah ka rual a, Benja chu ka call zui zat bawk. Vawithum vel chauh a ri hman tih ah a lo chhang a, a bul vela mipa ṭawng thawm a ri nawk nawk mai.
"Khawiah nge i awm?"
"Hall bulah zial kan zu lawk"
"In intibuai a ni maw?"
"Buai hran lo e, engmah buaina a awm lo" a nui deuh lek lek a, Awmpuia meuh a ti thinur a nih chuan eng emaw tak a awm ka ring, a sawi ṭha duh lo mai mai a ni.
"Min hrilh chiang teh, engvanga intibuai nge in nih?" ka ti nawn leh ngat a.
"Kan buai lo tak tak..." tiin a la zep cheu. "A ṭhat chu, ani pawh ka va zawt a nge" ka ti hman awrh, "Biak a ngai lo" a rawn ti chang fuk a, ka ngawi hmak mai.
"Zing aṭangin kan awm ho reng a, i chungchangte pawh kan sawi nual, kan inneih tur thu ka hrilh khan a lawm lo nghal ringawt a, 'Thle kual mai mai suh' minti kher a lawm maw le, kut ka thlak lo, engmah na pawh a nei lo ang, Lighter kan talh a a ṭek chhek ang hi a ni mai, a zo der" a tia puat puat a, ka ngaih serious tehlul nen, engati nge mipa ho hian thil hi an ngaihzam theih viau mai le, he thil thleng hian buaina a siam ang tih mawlh ka hlau, Awmpuia lakah ka inthlahrung a, Benjamina thiam loh chu ka duh bik si lo, hemi te inkara din hi ka thil duh loh ber a ni.
"Buaina lo nei tawh miah suh, Awmpuia chu a thinrim viau em?" ka tih chuan a ngawi deuh vang vang a, a kalsawn a ni maithei thawm pawh ka hre hla viau tawh.
"Awmpuia a thinrim em tih lam chu ka ngaihven lo, a hriat pawh ka hre lo, ka thinrim em tih chu ka hrilh thei ang che" a aw chu a vin ṭhain a kauh fung a.
Ka inthiam lo leh deuh chuan "I thinrim viau a mi?" ka ti leh rih a.
"Thinrim lo" bak fein a rawn ti, em em chuan a.
"Eng nge i vin vak" thawk ka la hluai a, a lo nui leh kur kur tawh. "Kan bang dawn, nakinah ka lo be leh ang che, Phunṭiha pawh a thinrim lo ang, kan inhuat phah kher lo ang" a ti zung zung a, "Haw tlang rawh aw" tih bak chu ka sawi hman tawh lo. Phone a dah hnu chuan ka inngaihtuah rauh rauh a, Awmpuia chu ngaihven ka duh viau nain ka ti lo ta zawk, ngaihzawng nei lai ka ni a, boruak neuh neuhin min la ṭham vei nen a indah hla zawka ka ṭan mai a ngai a ni, Benja ka veng thawng lo thei si lo a, ani pawn min hriatthiam tho ka ring.
Dar 5 velah chaw kan ei a, Benja chu a Ni nen a pu te in lamah inneih thil vel rel fel turin an kal a, message min rawn thawn zauh zauh bawk. "Kuminah chuan nupui nei turin min nawr dawn lo, ka Ni in pasal a neih dawn vangin nakum lamah a niang, a hmanhmawh thlak loh" tih angreng a rawn sawi a, "Nangmah i pawimawh ber, i peih hun hun a ni mai" a rawn tih te chuan a ruka min hrilh ru hi a angin ka hria.
An haw hun nghah pahin ka mu dar dar a, dar 10 dawnah pawh an la haw phei lo a, inkhel an en thu a rawn sawi tlawng ringawt. Bathroom-a hmai ka va phih zo chu ka message tone a lo ri karh a, Benja emaw ka ti a ka en chuan Awmpuia zawk a lo ni a, vawiin lam boruak nen a hming ka hmu chu ka zam ru tlat pek a, engtin emaw tak hian min ṭham a ni.
A message chu a sei lem lo, "I mu tawh em, biak lawk che ka duh a, ka lo call thei em?" tih a ni, eng tak chu sawi tum ang maw, ka hreh ru deuh.
"Message-in lo sawi la, ka pindan lehlama mi te an mu tawh a" tiin ka va chhang a, chumi hnu chuan a rawn typing ngar ngar a, a sei viau aniang a type rei khawp mai.
"Ka thil sawi tur hi i ngaihdan a ni lo maithei a, i lungawi loh phah anih chuan ka hrilh che hi pawi ka ti viau ang. I ngaihzawng hlui ka ni a, tunah tak hi chuan i ṭhianṭha leh i unaupa angin ka sawi ang aw, i duh dan anga i awm a, i hlim phawt chuan enliam che ka duh a; mahse, naupang mai i la ni, i kawppui te laka i inhuam thuizia pawh ka hre ṭhin a, mahni inngaihtuah miah loa thutluka siam ṭhin i nihzia pawh ka hria. Chuvangin puitlin kawng zawh i tum anih chuan ngun takin ngaihtuah la, chiang mang loin eng thutlukna mah siam suh.
Kan inkar vang leh i laka ka rilru puthmang vangah i ngai ngei anga, anihna chen a awm ang. Mahse, i hma ngaitu leh duhsak em em tu che ka ni tih i hre hmasa ber dawn nia. Pasala i duh anih pawhin ka dan theih i ni lo a; mahse, engmah sawi loh hi ka duh lo a ni, hmeichhe â i ni lo a, i inchhirna tur i tih loh hram ka beisei, pasal neih nan khua a la tlai lo. I vanglai i hmang ṭan dawn chauh a, i nuna i hun nuam lai ber tur a ni, holam takin i hmang liam ang tih ka hlau, engkimah, engthil pawh ti dawn la ngaihtuahna fim tak nen aw" tih hi a rawn thawn a, thumal khatte pawh hmaih nei loin ka chhiar chhuak dap a, rilru a ti hnim veng veng thei.
"Vawiin vang kha em ni, chanchin ka lo hria a?" ka va tih chuan, "Vawiin vang chauh chu ni lo, ka sawi duhna a rei tawh a, a ṭul lo ka ti bawk si a, vawiinah khan sawi ngei a ngai tih ka hrechhuak chiah, ngaih loh lamah lo ngai suh" a lo ti let vat a, lungawi lohna tur engmah ka hmu lo, hetiang taka min ngaihtuah vang hian ka lawm viau zawk a ni.
"Min ngaihtuah vang ania ka lawm zawk, lo zawm ngei pawh ka tum ang" tiin ka chhang ve thlap a, vawiin chungchang kha zawh chian ka duh viau a, Benja hek ka hlau si a, ka sawi ṭha ngam lo.
"I thinrim lo ti raw, in inhua ang tih ka hlau lutuk a, in bula awmdan pawh hi ka thiam ṭhin lo, in pahnih hian inngeih ula, in haw lo ula ka duh ber, keimah vang phei chuan inhaw miah suh u" tiin ka chah ve luam mai.
Message chu a lo chhang a, "Ka haw hleinem, i kawppui anih vang pawhin ka haw thei lo ang, i tan a ṭhat loh hi ka hlau ber" ti a min chhanna chu hriat nuam tak a ni.
"A ngaina ve lutuk che ania, ka bulah pawh a fak ṭhin che, kawm che pawh a chakin ka hria" ka ti chu a nuih a za deuh aniang, "Min ngaina tih ka hria a lawm, a ngeiawm ṭhin deuh a, ka hrethiam viau tho e" emoji nui lai lem a lo thawn tel a, a hrethiam chuan awm a ti nuam huai huai thei.
Message dang a lo thawn leh a, "Ka mawhphurhna ah ka la ngai tlat che a, farnu ten ka duh zawng ni lo ngaihzawng an nei ang deuh hi a ni" a tih chuan ka nui sak, ka duhthusam dang leh chu Awmpuia hi ka nuṭa ni sela, a thlamuan thlak ngawtin ka ring.
Heti hian ka va chhang a, "I farnu angin min en la, min ngaihsak reng rawh. Benja pawn tih sual emaw fel lohna a neih chuan hrilh hreh lo la, misual tak a ni bik lo a nia, ka mawhphurna angin ka ngai ve lo thei lo a, ka chunga i rilru put ang tho kha a laka ka rilru a ni, thu min rawn tur emaw min hrilh duh i neih phawt chuan inthlahrung loin a tu zawk zawk pawh min hrilh mai dawn nia" tiin ka inhawnzia pawh ka hrilh ve luam a, boruak ṭha lo awm tura ka ngaih kha a bo duak a, a chhan pawh an pahnih hian mipa rilru ṭha tak ve ve an nih vang a ni.
College week kan zo a, Red house te kan champion avangin pawisa kan dawng nual a, a lawmnan picnic an rawt bawk. Pawisa thawh belh an rel a; mahse, kal ve duh lo, kal tum lo hrim hrim an lo awm nual avangin chaw eikhawm a rel leh ta zawk a, Noeli ṭhiannu Rebeki'n an in a thawh phal bawk nen an phur khawp mai.
Pawisa an khawn avangin ka thawh ve tho a, kal erawh ka tum lem lo. Mahse, an bazar dawn tlai chuan Awmpuian min sawm teh tlat a, a tukah inhmuh khawm chawpa bazar a buaithlak an tih vangin tlai banah bazar lawk an tum a, keimah kher chu min sawm a, ka ṭhiante an tel ve dawn si lo a, Noeli te bula kal ve chu chak lo tak ka ni.
"Noeli te sawm mai la, Bena nen haw rual kan tum a sin" ka tih pawh chuan, "Duh leh ani pawh lo kal ve sela, Sangtei te ho an ni leh dawn a, nuam ka ti bik chiah lo" a ti ve tlat a, Awmpuia hian Sangtei hi a duh lo tak tak niin ka hria.
Canteen kawtah Benja kan lo nghak a, message-in ka hrilh tawh nghe nghe. Chutih laiin Noeli te an lo lang a, "Canteen-ah kan kal lawk dawn, min lo nghak rawh u" tiin canteen lam an pan zui a, an inhrilh ru phei sar sar chuan ka chungchang an sawi ka ring hmiah.
"Pui, Sangtei chu tinge, in inbe fuh lo em ni?" ka ti phawng a, a chhan pawh a hel deuh tlata ka hriat vang a ni.
"Kan biak ṭhat chuan beiseina kan siam in ti si a, min lo biak tlat chuan lo biak ṭhat duh loh hi a nuam bik lo a lawm, a bul hnaia awm loh hi a ṭha ber ang chu ka ti" a ti ve mai a, "Tinge, i duhzawng a ni lo viau a mi?" ka ti leh kher a.
"Zu a in ṭhin a lawm, hmeichhe zu in ṭhin chu ka ti vak lo, a chhan a awm nual, duhzawng a ni lo ve bawk a, ngaihzawng neih pawh ka chak chuang lo" a ti nuah nuah a, a inthlahrung leh nge ni, "Ka chak lo ka tih chhan zawk chu " a ti leh chiah "A ho lutuk, sawifiah duh kher suh" ka tih vang chuan a nui suk a.
"Saw a lo chhuak e" a tih rualin kawtzawl lam ka hawi vat a, Benjamina chu a rawn ner phei nasa mai.
"Red house pawh ka ni ve hleinem, engah nge min sawm ve ngawt..." a rawn ti phei lung lung, kan chhak deuh aṭangin Peksangan a lo hre pha a, a rawn tlan thla rawk rawk a, min kalpelin Benja lo kalphei chu a va kuah chawt a, "Chaw eikhawm ve teh ang u, pathumna nih manah eikhawm ve a ngai" a ti pek a, "Khawn ta che u, 5000 ka lo thawh ang, duh leh picnic ti ula" pakhat lah chuan a lo ti sam et a, hepa sum chelek lutuk hi chu.
"Rintei red house a nia, a lo tel a ngai" kan bul an lo thlen ruala Awmpuian a tih chuan, "A bialpa tel loin khawiah mah a kal ngai lo" Benjamina'n a lo ti hmuk a. Awmpuia nen chuan an in en deuh ran a, ṭawng ka tum laitakin "Chuvang a niang kan nghah che" tiin Awmpuia chu a tho a, Noeli te a koh hnuah Gate lam a pan nal nal a, Benja chu a la ner nung reng.
"Kal chu i tum tak tak em ni, i duh chuan Roma te nen kan eikhawm ve thei reng a lawm, i ṭhiante pawn an chak em kha, chawhmeh pawh a tui zawk daih ang" tiin min lo zui ve zel a, Awmpuia a lo hawi veleh min kuah zui a, a han nuih deuh sang bawk.
"Kal kher pawh ka chak lo, bazarpui turin min sawm a, Noeli ṭhiante ho bulah nuam a ti lo aniang" ka tih chuan, "Nangni pahnih hi ka hrethiam vel lo che u, khi pa khi i pa pawh anih loh khi" a ti hluk hluk a, min kuah nghet sauh sauh.
"A ṭhiante hi an over ve a, a ning ve ṭhin a lawm, Peka te an awm loh chuan ani pawh hi a mal ve thei lutuk" ka han ti dek dek chu, "A mal lai ka la hmu lo reng reng, i bulah a lo inla mal a ni maw..." a tia, an ner zui sawk a, sawi zel chi pawh a ni lo.
Bena nen kan inphur a, Awmpuia chuan phurh a nei ve lo thung, Noeli te ṭhian ho an inphur bawk a, Bazar lampanin kan inzui diah diah a, kan va thlen chuan parking a awl loh vangin Rebeki'n an veng bazara kal mai a rawt a, "Kan inah ka hawn nghal mai dawn a lawm, vawksa rep pawh kan vengah a tuihnai thei lutuk" a tih vangin kan zui ve ta zel a, an veng kan thlen chuan dar thum a pel duai tawh.
Rebeki chu an veng bazar nu hoin an lo hre ṭha khawp mai, "Bekte, min lo dawr rawh" an lo ti sap sap a, thlai te pawh tlawm te tein min pe hlawm a, sa rep pawh hrang 1 min belh nghe nghe.
Thlairah leh salad tur vel ena kan buai laimek chuan Awmpuia leh Benja chu thil rep zawrhna bulah an lo ding a, engthil emaw an en dun a, an inbe thawm chu ka hre pha lo, an ṭawng ve nuap nuapin ka hria. Ka va hawi lai chuan an inmelh run run a, an inhau leh mai ang tih hlauin ka thil khai chu Noeli ka hmehbel rawk a, ka pan phei thuai bawk.
An bula ka va ding chiah chu min en loin an hawisawn ve ve, "Engtin nge an siam ṭhin a?" tiin Benja chuan dawr nghaktu chu a zawt a, an thil en chu Uchang rep a niin ka hria, an kar huang hlawm a, posi mak pui pui te an awm.
"Tikhan an kang mai, a rawh te pawn a tui, a ṭhen chuan an rawt thak a, sehhmeh atan te an duh thei lutuk a lawm" patling pakhat awm ve chuan a lo ti zung zung a.
"Sehhmeh ah a tui maw" tih pahin Benja chuan pack hnih chu a la kang a, a han thlek ngial a, sehhmeh chungchang Awmpuia bula sawi chu chi loh ka ti ru khawp.
"Dah teh, tuman zu an in dawn lo" Awmpuian a ti ta chiah reng a, Benja chu a nui nghal vur vur.
"Enteh Phunṭih, in in an hlawmzia hi" tih pahin Awmpuia ke lam a melh zauh a, Uchang rep chu a'n en leh a, "I unaute an nih hi, ṭhiau ṭhuau hlawm a" a tih chuan ka nuih a za ru nasa; mahse, nuih chi a ni lo, Awmpuia a ner nasa em a ni.
"A note an la nih kha, an puitlin hunah in in ang ve chiah ang" Awmpuian a tih chuan ka nui hak, Benja chu a rawn lehhawi vut a, nuih a za telh telh.
"I hau dawn emaw tih a, i lo nuih ker ker chu le" ti bul bul chungin a uchang ken lai chu a dah a, a tum bur mai. Chutih laia Noeli te lo phei chuan Awmpuia chu an lo au a, "Beki te inah kawi lawk ang" a rawn ti a, keini erawh min sawm ve lem lo. "Benja, haw nghal mai ang keini chu" ka lo ti ve vat a, "Lo kal ve ula" Awmpuian a tih chuan lu kan thing a, "Hostel chawei a hun leh ṭep tawh, kan kal mai ang" tiin ka han nuih a, a bu ve mai bawk.
"Anih mai aw, naktuk chu min lo beisei duh lo ula, nangni aiin kan hmeh tui zawk dawn tlat mai" uang fahrana Benan a tih chuan, "I rawn thlah ang chu" Awmpuian a lo ti zauh a, Bena a lo duai duh bik lo, "Ngawiteh, kan nu hi chu ka tel loin khawiah mah a tlei lo" a ti vei fahrana, Awmpuia pawh a nui ve tawp.
Benja nen chuan Hostel lam kan pan vang vang a, "Zanah ka lo rawt ang, i ṭhiante kha lo sawm la, an pahnih khan lo kal rawh se, Brendai leh a bialpa pawh kan sawm ve dawn nia, in hmelhriat ve rawh u, an hmu chak teh che ania" tiin min hrilh phei mawlh mawlh a, Awmpuia te chaw eikhawmna a kal aichuan ka chak fe zawk a ni.
Mahse, zana min lo call chuan thudang a rawn nei a, "Naktukah an hman hlawm lo a, inrinniah ti mai ang aw, Brendai bialpa kha office kal a ngai a, mi ai a lo kal aniang, Lza pawh a hman chuang lo, i ṭhiante chu lo hrilh tho la, inrinni chu sure" a rawn ti leh lawi a, tumah ka la hrilh lo bawk a, ka aw ve zel mai.
A tukah chuan class ka kal lo a, red house ho chaw eikhawmnaah pawh chuan ka kal ta chuang lo. Peksanga leh Zothana erawh an kal thung a, status an rawn nei nasa hle bawk. Ka ṭhiante pahnih pawh chaw eikhawm chungchang chu ka hrilh ve ngei a, an phur zawng tak a ni, thil tih puiah hian ka sawm khat a, ka sawm chhun chu an ngaipawimawh ve khawp, "Tute inah nge kan tih dawn?" a tih chuan Benja te in a nih ka ring a, engmah phei chu a rawn sawi leh lo.
Zirtawpni nilengin chanchin a rawn sawi lo a, class a lo kal lo a, a Pu te ina a kal tur thu leh chaw an ei tur thu zingkarah a lo sawi a, chu chu kan inbiak chhun a ni. Ka ṭhiante lah chuan chanchin min zawt sek a, Benja lah chuan message a chhang thei der lo a, kan ṭhulh leh dawnin ka hre tawh. Mahse, Roma'n min lo be hlawl a, an inah Benjamina chu a lo va chatthla a ni awm e.
"Engtizia nge, tinge chhun chhunah te a in a?" lungawi lo fe a ka tih chuan, "Thil ṭha lo deuh a thleng, zia lo lutuk" a rawn ti teh hluai a, minti hamhaih angreng.
"Eng thil....?!
"Bena hi nupui nei turin an nawr a lawm" a rawn ti a, Roma chuan a hre ve chauh aniang, ka lo hre daih tawh sia.
"Naktukah nei nghal rawh pawh an tih loh kha, eng nge lo buai phah chung tur awm?" ngaihsam zeta ka tih chuan "Naa....naktukah inhmuhtir an tum a lawm, chaw eikhawm kan tum ni takah" a rawn ti ta mai a, tu chungchang nge a sawi ka hre ta hauh lo.
"Tu maw, tu nen maw inhmuhtir an tum a?" ka vin deuh chiam mai.
"A Pu ṭhianpa tunu ania, Nurse an ti, a hming kha Regina tih vel a niin ka hria, a mizo hming kha chu Ruatpuii a ni chiang a, amah i la zawt chiang dawn nia"
"Eng nge an hriat a, engati nge Benjamina hi an duh duh dana an tih kawi le, an intithu em mai, Bena hi an ti khawngaihthlak leh lutuk" ka lo ti bawrh bawrh a, rilru nat aichuan ṭhinrim lamah a kal.
"Nia ti raw, an ti lutuk ka ti keipawn, a out phah leh maithei a ni; mahse, out lo turin i ti dawn nia, pawisa a chan vek a ni mai, lo fuih ve tlat rawh, i tan chuan lungngaihna tur a awm chuang lo a nia, ṭhen che a tum teuh lo, hetiang lamah hi chuan ka ṭhianpa hi ka ring ve tawk" a rawn ti nghat nghat a, keitak pawh chuan hlauhthawnna ka nei bik lo, thin a rim hle ringawt mai a ni.
Zanriah eikham hlim hlawtah Benja chuan min lo call a, a haw phei chiah a nih hmel. Roma thilsawi kha ka lo zawt vat a, "A ho lutuk, chaw eikhawm pawh kan ṭhulh lo a nia, nupui tih vel kha chu engah mah ngai duh suh, tih dan ka hria a lawm, an hre mai ang" a rawn ti sam et a, a sawi awlsam hmel khawp mai. Out lo tur leh kawng danga a chhungte ti lawm turin ka chah ve thlap a, kan inbiak zawh hnuah ka ṭhiante pawh ka hrilh ve a, Mawitei'n "Ka chhungten Scooty an hmang dawn a, Kimkimi te inah innghak ila kal rual ang u" a tih chuan ka hnial bik lo, Benja pawh min lam lo turin ka hrilh ve nghal a, hma deuhah ka mu bawk.
Chawhma pum chu insuk leh ka pindan siksawiin ka buai a, ka insiam ve dawn meuh chuan Mawitei a lo thleng tawh a, Kimkimi te inah min lo nghak reng tawh a nih hmel e. Insiam pahin Benja ka va call a, "Ka pu te inah ka awm, nau min awm tir a lawm maw le" a rawn ti bui bui a, tu nau nge ka zawh chuan a riat nawi khawp a, "Ka rawn hruai a ngai, i hmu mai ang" a ti hul hak a, Reginai kha an lo hmuhtir tak tak anih hmel, rawn hruai te chu a la tum zui a, a va han tih chi loh ber tak.
Kimkimi te in ka va thlen chuan ka ṭhiante bulah ka sawi nghal bawrh bawrh a, "Kan kal lo mai dawn em ni?" an tih chuan ka hnial leh tlat, hmuh ngei chu ka duh, thil awmzia pawh hre teh se, a inthiarfihlim ran a ngai tih te, bialnu tawrhhlelhawm tak, a bialpa hauh bur ṭhin ka nihziate pawh hmu sela a ṭha ang, tichuan a rawn inham buai lo law law anga a ṭha zawk bawk ang.
(End of chapter - 31)
Comments
Post a Comment