BLUE BAYOU (CH - 32) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 32

An in lam kan pan laichuan Benja chu ka call a, "Roma te an awm tawh, Brendai te pawh an thleng chiahin ka hria, keini pawh kan lo chhuak thei ṭep" phur loh hmel fe hian a rawn ti a, "Lo hruai kher a ngai em ni?" ka tih chuan, "Lenpui turin min ti zawk a, chaw kan eikhawm dawn tih tuman an hre lo, ka lo thlen hunah ka Ni pawh ka hrilh chauh ang, Roma kha chahbi ka pe a, chawhmeh pawh lo lei turin ka tih kha" a rawn ti leh bul bul a, keitak pawh chu ka phur lo, ṭhulh leh daih te ania ka duh ni.

"Amah khan lo kal a duh ve tho em ni?" ka tih leh chuan, "Ka hre bik lo e a, a nui mai mai ringawt a, a mawl deuh aniang" a ti hmuk a, "Engmah a sawi lo em ni?" ka ti leh ngat.

"Sawi lo, puitling ho thu a awih hmel diam diam lutuk, Tirhkoha tan te tih zawk awm a ni, an in an hmel riau" a tia, "Ka lo chhuak dawn" a tih leh vangin phone chu ka dah thuai a, a ṭhiante an awm bawk nen va thlen hmasak ngei chu ka duh.

Ka ṭhiante pawh chuan zawhna min zawt mawlh mawlh a, "Inneih thu an sawi tihna maw, palai tirh an tum nge?" tih angreng min zawh chuan, "Chutiang an la sawi lo, an inhmelhriattir chauh, an induh theih an ring aniang" ka ti ve mai a, Mawitei zawk chuan "In inkar an hre ve lo em ni?" a ti khauh a, an hriat loh chu ka ring lo, kan inzui ngun a, an inah pawh vawikhat mai ni lo min hruai tawh a, a Ni Pawli pawn a hrechiang khawp ang, min hre lo der tihna a ni.

Benja te in kan thlen chuan Roman kawngka min lo hawn sak a, sitting room-ah  Lza leh mipa pakhat an lo ṭhu bawk a, Choka lam aṭanga hmeichhe lo chhuak chu Brendai a nih ka ring. "Tu ber nge Darlingi chu?" a lo ti vat a, Roman min lo kawk zauh.

"Anih ka ring reng a" tih pahin Brenda chuan min rawn nuih a, "I ṭhiante em ni?" tiin min zawt bawk. Inhmelhriattirna ka han nei a, ka ṭhiante hming ka sawi zawh chuan "Brendai ka nia, Roma chu i hre sa a, saw saw Lza, a hmelṭha zawk saw chu Ruatkima a nih saw" tiin a nui hak hak a, Lzan a lo melh rum khawp mai. 

Kan ṭhutfel hnuah theitui min lo pe a, a ṭawng duh bawk a ka ṭhiante pawh an ti tlangnel thuai a, bai an siam thiam em tih te zawtin chawhmeh siam dan tur kan sawi ho a, kan ri ve nak nak mai. "Bena chu i call em, rin aiin a rei" Brendai'n a tih chuan ka han call leh a, a la thei tawh lo, an lo kal mek nge mawni.

"Hmeichhia a lo hruai dawn, a chhungten an tihpui deuh a, a rawn zuitir a niang" Roma'n a tih chuan ka lam an rawn hawi ṭhap a, awm a nuam lo khawp mai.

"Engahmah ngai duh suh, lo hruai mai mai mahsela a pawi hleinem, Benjamina hi chu a fair ve a nia, hmun dangah hruai loin hetah lo hruai sela a ṭha zawk, i bulah pawh a zep miah loh hi, ring tawp rawh" Brendai'n a ti chu tawi tein ka nuih a, a bialnu hlui a ni tih ka hrechhuak zawk a, ka ṭhiante chuan an hre ve ang tih ka hlau, a zahthlak dawn lutuk tlat.

Ka theitui in na no dah tura ka kal laichuan Bike thawm ka hria a, rei vak loah kawngkhar a rawn ri zui a, Roma bawkin a lo chhawn leh. An rawn inzui lut chu choka aṭanga ka chhuak nen kan intawk ve chiah a, Benja chu a rawn nui suk a, ka nuih let lem lo, chu aichuan a hnunga hmeichhe lo lut chuan mit a la zawk a, ka lo thlek rang hle bawk.

"Eirawng kan la bawl lo" Brendai'n a tih chuan "A hmanhmawh thlak loh" tih pahin Benja chuan min lo pan a, choka a min pawh luh a tum chu ka kal duh mai lo, chutih laichuan Brenda chuan nula chu a va pan hnai a, "Lo kal rawh, kan ṭhiante vek an nih hi" tiin a nuihsang a, "Lo chibai ru" tiin ka lam a rawn hawi zui a, ka kal duh lem lo.

Choka ah kan inzui phei a, "Lo kawm rawh u, ṭhiante bulah ka phei dawn" ka bengbula a rawn tih sur sur hnuah Benja chu a kalsawn a, ka ṭhiante ka ko phei ve bawk a, hmeichhe ho zawng kan ni. Nula chu Brendai nen kan inkara chair-ah chuan a lo ṭhu a, ngo deuh leh a cher mah mah ang tih tur a ni, a nu hnup mai a, a zia a zawih hmel viau bawk.

Ka ṭhiante chu an phone enin an ti ti melh melh a, a khat tawkin min rawn melh leh ṭhin, Brendai lah chu eng eng emaw tiin a tho sek a, a bialpa a va ngaihven anih ka ring. Ngawih tir reng aiah tiin "Reginai tiraw?" ka ti zauh a, "Ni lo, Rosalyni zawk" a lo ti let a, LalRoma mai mai chu, min ti zak dawn a lawm maw le.

"Bena'n a hrilh dik lo cheu e law?" tiin a nui sen sen a, Benan a chungchang a sawi emaw a ti a ni ngat mai, a lawm hmel viau lehnghal a.

"Roma zawkin min hrilh, thil hi a hresual ve thei a nia" zangkhai fe a tiin ka han nuih let a, a hmel chu a ṭha hle tih tur chi a ni, en chian phei chuan a no chek a, a hmai a mam  nalhin biangsum a nei lehnghal a, mipa duhzawng tur chi tak a niin ka hria, chu chuan ka awm a ti nuam lo zual a, Benja bul hnaia awm fo lo turin ka duh, engtin nge maw ka han tih dawn ni.

"Ṭhian ho vek ami in nih a?" a tih chuan ka bu ve mai a, sawi tur ka dap ru chung bawk. Inthlahrung zawka ṭan ka duh loh vangin ka inti ngampa luia, amah hriat chianna a ni pah mai tiin a chungchang ka zawt luam bawk.

"Eng nge i tih ṭhin, khawi vengah nge in awm, Benja nen in inhriatna a rei tawh em?" tih ang reng ka zawhna chu ṭha deuh leh nelawm fein min chhang a. Nurse a ni a, a thawhna a la rei vak lo, Bena pu leh a pu hi ṭhian an ni a, anni pahnih erawh an la inhmuh ngai loh thu a sawi a, 'A pu nen chuan kan inngaina lutuk' tiin min hrilh zui a, a ṭawngdan leh a ṭawnglaia nui hmel a put reng danah Benja hi a hnar dawn lo tih a lang reng a, rilru thianghlim put a har khawp mai, a nui hmel pawisawi loh hmel takte, a ṭawngkam ngainatawm zette chuan ka pawi an sawi ti ila a dik ber ang.

"Bena hian zu a in ṭhin em?" tiin min zawt let ve khauh a, "In ṭhin e, beer hi chu a in thei vak lo" ka ti liampuat a, dawt ka sawi lo nain midangin min zawt chu ni sela hetiang hian ka sawi lo ang. Mahse, Rosalyni nui hmel danglam ka hmuh chuan nuam ka ti riau pek a, "A rui nawi ve thei a nia" nui chungin ka ti leh ngat.

"A in chu ka ring tho a, a in regu ve a mi?" a rilru a na deuh em mawni tih mai turin a ṭawng zawi a, a tih dan chu ka mil dawn hauh lo mai, tu hnenah nge a zawh a hre miah lo anih hi.

"Mipa hi chuan an in vek a lawm" ka ti hul hak a, a lo bu nghat nghat.

Brendai lo phei chuan Beer can a rawn pawm ṭun a, "In duh ve em, ka'n dah vawt a nge aw" tih pahin Fridge-ah a dah lut zui a, "Beer i in ve ngai em?" ka tih chuan Rosalyni  chu a lo hawi rang khawp mai, "Grape juice chu ka in ve zeuh zeuh, kan inah kan kawl ṭhin a, Beer hi chu a hrisel lo em a ka in ngai lo" a ti a, ka ṭhiante pahnih thung chuan Brenda chu an duh ve thu an lo hrilh zat zat a, Kimkimi phei chuan in nghal mai a duh tawh.

Brenda chuan "Eirawng bawl phawt ang u, kan nawi palh ang" tiin sa a rawn la chhuak a, "Chawhmeh siam thiam deuh te in awm em, sa kan hi ka thiam lo teh ania" tia min rawn melh kual chuan thawh mai ka tum a; mahse, ka bula ṭhu chuan, "Keiman ka lo kang ang, Bawngsa kan te chu ka thiam lutuk a lawm" tiin min lo thawh khalh a, ka chuh duh ta bik lo. A che chu Brendai nen kan en reng a, a che muang nain a che felfai ngang mai.

"Heih, in va innel hmel ve a, eng nge in lo sawi?" Brendai'n zawi tea a rawn tih chuan "A fel hmel tawp" tih zawngin ka chhang a, ka ner hmelah chuan a hriatthiam tho ka ring. 

"Va phei daih rawh, ka'n lo chhawr hrep a nge" nui vur vur chunga ti lehin Rosalyni chu a va pui zui a, pakhat lah chu a lo tlawmngai khawp a, "Ka ti thei a lawm, lo ṭhu mai mai ru" a ti zel a, chuti na na na chu tiin ka pui buai ta lo, ka ṭhiante pahnih lah chuan "I be peih em mai a, i bialpa bulah va awm chawt zawk rawh" min ti a, min nawr sek sek reng.

Rei vak loah Benja a lo lang hlawl a, "In buai em, puih in ngaih chuan min lo ko ru aw" tiin a rawn hawi kual vut vut a, "Buai lo e" Rosalyni'n a tih laiin "I buai zawk em, engah  nge in inthiarfihlim vek" ka lo ti pawr hlur a, nulain a rawi zui vei nen, min ngaihthah leh lutuk chu ka lawm lo a ni, ka ṭhiante lakah pawh ka zak mai dawn.

"I duh leh lo phei rawh" nui vur vura tih pahin min hui a, ka ṭhianten min lo mitmei ve zat bawk. Hmanhmawh deuhin Benja chu ka zui a, Sitting room kan thlen chuan "In duh leh lo hawng ru, tlem min lo dah ve ula" tiin a ṭhiante a hrilh a, ka banah rawn vuanin a pindan lamah min kai phei dawr dawr a, kan luh fel rualin kawngka a kalh hmiah bawk.

"Eng nge kan tih dawn?" phawk angreng zeta ka tih chuan "Chance kan nei dawn, mu mai mai ang" a kawr a phelh nghal sawt sawt a, a kekawr nen tlawng chuan khumah a bawk a, "Ka dar hi min lo hmeh sak teh" a la ti zui a, hmet duh loin a khum bula a beer can dah chu ka va la daih thung.

"I nupui hual chu a fel hmel kha" a lo hawi chhuak vat a, "Fel hmel pawh ka ti lo e a, ka nin nak a laiin, zawhna a ngah thei ropui si, a zak vak miah lo ania" ti a min lo chhang chuan min ti lawm ngei mai, kan hmuh dan a in an mawlh kha ka lo hlau a, ka awm a nuam deuh huai tawh.

"In mizia chu a in an hmel loh"

"Chu reng, ka bulah hian lo mu teh" tih leh min rawn ban a rual a, a sirah min pawt thluin nghet zetin ka kawngah a rawn kuah a, zu a lo lem hman sek aniang a rim a nam ham ham bawk.

"Midang min neihsan daih chuan aw.." ka han ti dek dek chu, "Khatiang ngaihtuah suh, i rilru aṭang khan paih chhuak lehnghal rawh" tiin a nui vur vur a, a biang ka dawm tur chu ka kut rawn vuanin a hmer vang vang, "Nang lo tumah ka nei lo ang, ka chiang" a ti leh nghat a, lung a awi hliah hliah mai a ni.

Khumah mu chungin games kan khel dun a, khelh dan min zirtir ve teh a tum a, ka thiam lo lutuk chu amah zawkin min khelh sak leh ṭhin. Beer chu ka hawn sak a, keichuan vawi hnih khat bak ka in lo, rei lo teah ka mut a chhuak a, a dar nghengin ka chhing siar siar tawh. "I duh leh muhil rawh, chaw ei an peih hunah kan chhuak chauh dawn nia" a tih vangin puan ka sin ṭha sawk sawk a, a Ni a phone thawm leh chaw kan eikhawm thu a hrilh ri chu ka mang hriat ruai ruai chauh a ni.

Pindan kawngkhar kik thawm vangin ka hralh hlawl a, Brendai aw ka hre zui zat bawk. "Bena, chaw ei hma ang u, in awm rei tawh lutuk lo chhuak tawh em em rawh u" kawngkhar chu a rawn chum leh dat dat a. Benja lam ka hawi chuan a lo la mutui khawp mai. 

"Bena, Benjamin...."

"Kan lo chhuak dawn" ka tih hnu lawkah inbe thawm ka hria a, "An pahnihin an awm e law?" titu chu Rosalyn-i a ni.

"Aw, an muhil aniang" Brendai'n a tih chuan, "Eng nge an awmzia?" tih riin a zui a, Brenda chuan a chhang lem lo. "Lo kal rawh, an lo chhuak mai ang" ke pen thawm ka hre leh a, Brenda chuan a kal pui anih hmel e.

Bena chu ka kaitho a, "La mu rawh, hmanhmawh a ngai lo" tih pahin min pawm bet tlat a, "I ṭhianten min ko tawh" ka ti chung pawhin min thlah duh lo, a awmah nghet zetin min kuah bet a, ka bawp a kherh bet tlat bawk.

"In ngaihtuah i ngai" a ti teh ngawt a, ka hrethiam lo hle.

"Engvangin maw?" ka melh chho ha a, ka chal, hmui leh biangah te a rawn fawp kual dan dan a, chumi hnuah "Pasal nei turin i rilru siam rawh, a ṭul thut mai thei a ni" a ti zawi ruih a, a thilsawi chuan ngaihtuahna a ti thui khawp mai.

"Tinge, an nawr che i hlau em ni?" ka tih chuan, "Nawr ang; mahse, an hlawhtling kher lo ang, pawisa hmangin min thlem dawn a, ka chân vek mai thei a ni, chuvangin min neih ngei a ngai dawn" a ti leh ta mai a, minti chiai deuh.

"Engtin nge an sawi a?" ka inla hrang vat a, a mitah ka melh ran thung.

"Nei tur chuan min la ti lo , inkawm rawh u an ti ringawt chauh a nia; mahse, ka pu rilru chu ka hria, saw nu saw a duhzawng ania, midang ho pawn an duh vek ang, an control theih tur an duh a lawm, Joshua nu khan a lo kawhhmuh pek a, ka pu ṭhianpa tunu kher a lo ni bawk si a, a buaithlak zo anih hi"

"I ni Mary'n maw lo kawhhmuh a?"

"Ni phiangsen e maw le, an thuhnuai theih tur nei sela min duh ber a lawm, nang an duh loh chhan tur che a nih chu, nang chu i fing a, i thuin i kaltlang ngam dawn tih pawh an hria, ka nu min hmuhpuitu i nia, an lawm lo ang che. Mahse, ka Ni hi chuan a duh che a, ka pu te ina ka let lo anih chuan hetah hian ka awm dawn a, kan pahnihin kan cheng dawn nia" a sawilai chuan min en loin inchung lam a melh daih a, a sawi mai mai lo tih ka hria, ka han ngaihtuah ve ngial a, rilru siam a har takzet.

"Innei ta ila engtin nge kan khawsak ang?" ka ti zawi sep a, ka lung a chhe lek lek.

"Ni Pawli clinic-ah ka thawk mai dawn a lawm, ka Ni in pawisa a khawl ve bawk a, kan bul ṭanna tur chu a awm ang lungngai suh, pasal han nei fel phawt sela, kuminah hi chuan kan innei thei dawn lo sa a, nakumah kan tum dawn nia" a ti leh a, a lo ngaihtuah thui hle tawh a nih hmel.

"A zia lo e, keimah vangin i rethei vek dawn anih chu" ka chalah a rawn fawp vang vang a, "A pawi ka ti hleinem, pawisate chu mamawh viau mahila nang aiin ka thlang teuh lo, pawisa chu hmun dang aṭang pawhin ka hmu leh thei mai ang, nang chu khawvelah nangmah chauh i awm a, a dang a awm tawh dawn lo a, i hlu daih zawk" tiin min nuih var var a, a biangah dawmin lungchhe zetin ka nuih let a, ka ṭah a chhuak ṭun mai.

"I chhungten pasal i neih an phal ang em?" a  tih chuan ka ngaihtuah ve vang vang a, tumah min hnial tur awm ka hre lo, ka pa pawn nupui a nei leh lo ang tih a sawi theih loh a, a nupui neih hmaa pasal neih chu ka duh dan zawk a ni.

"Phal mai ka ring, ka pa i dil ang a, i dil thiam chuan a phal mai ang" ka ti fiamthu a, "A phal hma chu ka dil tluk tluk anga a ni mai a lawm" tiin a nui huk huk a, innei turin rilru kan siam fel chu a ni ta der mai, a hun erawh kuminah a rem lo tih chu a ni tawp rih a, nakumah pawh engtik hunah nge kan sawi thei chuang lo, inpeihsa turin min duh a, a duh angin rilru ka siam ve tawp mai a ni.

Chutih laichuan Lza ṭawng ri kan hria a, "Eng nge a, i lut duh a mi?" tiin tu emaw a zawt a, pindan kawngkhar pawn maiah a awm.

Phun ser ser thawm ka hria a, hmeichhe aw a ni bawkin ka hria, "Ka koh sak ang che aw?" Lza'n a tih leh hnu lawkah kawngkhar a rawn kik a, "Bro, lo chhuak tawh ru, chaw ei a hun" a rawn ti lang lang a, Benja pawn a lo chhang ve vat.

Kan tho zui a, Benja'n kawr a hak laichuan ka sam ka chul mam thuak thuak a, Lza kha a la kalsawn lo aniang kawngkhar pawn lawkah chuan phun thawm ka hre leh ṭhin a, midang an awm ve a ni maithei. Hmanhmawh deuha kawngkhar ka va hawn chuan Rosalyni leh Lza'n phawk fein min lo melh a, "Eng nge a?" ka ti chu min chhang lo ve ve.

Ka chhuah hnu lawkah Benja pawh a lo chhuak a, Rosalyni'n a hmuh rual chuan "Bena, min va thlah lawk la" tiin a lo sawm reuh a, a inthlahrun hmel hle bawk.

"Tinge, chaw i ei ve dawn lo em ni?" ka tih chuan, "Ei lo mai ang" a ti zawi sep a, min en loin Benja zawk chu a en ran a, a rilru kan ti na em mawni, a va buaithlak thei tak.

"A tlai tawh em hi, dar engzat nge" tih pahin Benja chuan sana a en a, a thlah peih vak lo tih ka hrethiam a, awm ve lo mah se pawi ka tih loh tehlul nen Rosalyni chu ka khawngaih deuh riau a, "Chaw ei ve law law rawh, eirawng i bawl vek bawk si a, i ei loh chuan nuam kan ti lo ang" tiin ka sawm ve ta zawk a, a hreh deuh nge ni aw min pawh lo a, Bena zawk chu a en leh ringawt ṭhin.

Benja lah chuan "Khawiah nge an awm veka?" tih pahin choka lam a pan daih a, a ngaihsak lo lutuk chu lawm tur nge lawm loh pui chi pawh ka hrethiam lo, chutih rualin ngaihsak se ka lawm lo ang tih erawh ka chiang a ni.

"Ti rawh, chaw chu ei vat ila, eikham veleh a thlah dawn che nia" tiin ka sawm nawn leh a, kal nghal mai ka tum chu min zui hauh lo. Ka va lehhawi leh chuan "Ih...taxi-in ka haw mai dawn" a ti a, a awm hreh tawh ngang anih hmel e.

"Ti nge, hmanhmawh chhan dang i nei em ni, tuna haw leh daih te chu...?"

"Ka nuamsam vak lo a, taxi tlan a la awm ang ti raw?" a tih chuan "Awm chu ka ring; mahse, chaw chu ei ve phawt la" ka ti leh a, min chhan leh hmain Lza'n "I inthlahrung em ni, a ho lutuk, lo kal rawh" tih pahin a kuah phei dawr dawra, engmah a sawi buai ta bik lo, a hnial ngam chiah lo anih ka ring.

Choka lamah chawei an lo siam mek a, ka ṭhiante pahnih pawh Brendai hoin an lo vir buai khawp mai. Dawhkan kil pahin Rosalyni chu ka va melh a, fridge bulah tih tur ber hre loin a ding zum zat a, "Hetah hian lo ṭhu rawh" ti a ka hui hnuah hreh hmel deuhin dawhkan a lo kil a, Benja nena kan ep chiahah a lo ṭhu bawk. "Chawei khamah ka va thlah dawn che nia" Lza'n a lo tih chuan, "A ngai chuang lo, taxi ka la thei a lawm" a ti zawi sep a, chutih laia ka ṭhiante nui ruh ruh chu ka va hmu a, Brendai chu an signal leh zauh ṭhin. Benjamina erawh engmah hrethiam ve awm pawhin a lang lo, Roma nen Phone an en a, an ṭawng mawlh mawlh a, Rosalyni'n a melh leh ṭhin pawh chu a hre lo ang tih tur a ni.

Chaw eipahin kan titi mawlh mawlh hlawm a, ṭhenkhat an rui deuh bawk a, kan ri dar dar mai. Benja chuan chawhmeh min suah sak loh leh chaw min lo chawm sak a, bowl kan han inṭawm te chu Rosalyni tan chuan awm nawm lohna tur a tling ang, a tir khan hetiang hian hmu sela ka duh ru kha a nia, nuam erawh ka ti ta vak lo, ka inthlahrung ve deuh a, ka lainat bawk.

Benjaminan sa ti min lo pe leh tur chu "A ngai lo, a ruh awmna ka duh" ka lo ti vat a, a thlengah ka dah let leh zat bawk. A han at phelh phulhzia mai chuh, Roma sa suak lai a en vung vunga, a thlenga a dah hnuah a ba chhuhsak thurh a, ka thlengah a rawn dah nia!

"E he...!" Roman a lo ti hluai, "A ruh kan duh" ti a nui vur vur chungin ka thlengah a rawn dah a, "Ka khel lai hi i duh em?" fiamthu a Brendain a ti pawh chu a laksak duh nia. Min rawn pek mai a tum a, "I mak em mai, chawhmeh hmangin uang suh" ka lo ti khar khar a, ka melh rum zui bawk. Rosalyni lam ka hawi chuan min lo en ve reng a, a nui tawi khawp mai.

Rei loteah a tho a, "Lo nghak rawh aw, Benan a thlah dawn che nia" tiin sitting rooma a phei tur chu ka au zui a, a puar ngutin ka ring lo, engtham mah a ei loin ka hria.

A kal hnu lawk chuan Benja chu kan hau sap sap a, "A hrethiam vek tawh a nia, 'Bialnu a nei tih ka hre miah lo, ka zak e' a ti ve ngawih ngawih kha" Mawitein a tih chuan ka rilru a nuam lo takzet tawh. Roma takngial pawhin a ṭhianpa chu, "I Over mah mah, i rawn hruai a nia, ngaihsak ve deuh rawh" a lo ti a, Benjamina chu a nui mai mai. Keimah chauh min ngaihsakzia tih lan a duh a, ka tan chuan lawmawm tak a ni; mahse, thlah a tum loh thu a sawi erawh ka hnial a ngai, a nunrawn thlak ka ti, a mawi pawh a mawi lo ang.

"Roma te nen an veng a in anga, an haw rual thei reng a lawm" a ti deuh tlat a, "Va thlah zawk kha a pawi lo, a hriatthiam vek tawh tho kha, ti lutuk lo teh" ka ti ve thung a, a ner nung ringawt.

Kan chaw eikham hnu lawkah Ni Pawli a lo haw a, Brendai a hmuh chuan "I piin min lo be tak asin, hetah chaw i ei ve tih ka lo hre lo a" tiin a be bawrh bawrh a, Benja chu va thlah turin a tir zui bawk. Car a awm takah chuan ka ṭhiante pahnih nen min thlah rual thei dawn a, a tihzia viau mai. Ni Pawli chuan min be ve lem lo a, tu ber nge a biak pawh hriat lohin "In eipuar em, in va lo leng ṭha duh lo ve" a ti liampuat a, a zawhte pawmin choka lam a pan zui a, Lzan a lo chhanna pawh chu a hre zui kherin ka ring lo. Zawhna ka nei ru rauh rauh a, min lawm vak lo em mawni tiin ngaihdan ka nei bawk.  

Kan chhuah dawn thu Benjan a hrilh chuan, "Leng khawtlai loin lo haw nghal rawh aw, koh haw ngaiin awm suh" a rawn ti lang lang a, a hmel pawh a rawn lan tawh lem lo.

Seat hma-ah ka ṭhu a, Rosalyni erawh ka hnung chiah tukverh bulah a ṭhu a, midang pathum an ṭawng bawrh bawrh laiin ani chu a ngawi ran a, ka va thlek laipawh chuan tukverh lam a hawi ngar mai. "Tu nge kan thlah hmasak ber ang?" Bena'n a tih chuan, "Keimah min lo thlah hmasa" a lo ti zauh a, an veng leh a chhuk duhna lai a sawi a, chu chu a chhuk hma zawnga a ṭawng chhun a ni.

An in chu Roma te in thlen hma deuhah a awm a, kawngpui bul maiah inchhawng sang ut mai a ni, an hausa tih a lang reng mai. Car aṭanga a chhuah dawn chuan, "Ka kal aw, muttui u" awki damdiai hian a ti a, thinrim emaw titau aw pawh a awm lo, a pawm thiam viau zawk nge mawni.

Mawitei kan thlah leh hnuah Kimkimi kan thlah a, kan hostel a hnaih tawh avangin rei lote kan chawl bawk, thingpui te kan in a, minute 10 vel chu kan chawl awm e, chumi hnuah hostel lam kan pan a, kan thlen hmain dawrah kan kal leh bawk a, ka Money honey ah aṭang ti ila a fuh ber ang chu, eitur min lei ṭeuh mai. "I ṭhiante pe ve suh, ri miah loin i ei zo vek dawn nia" tiin a nui ruh ruh a, chips ringawt pawh polythene lian khat lawih a ni, in tur leh theitui chi hrang hrang a la awm bawk a, chhang pawh chi sawm dawn a lei. Pawisa ka ui deuh chuan ka han khap ve bawk a, anin a lak belh zel thung a, kan chhuak leh lam chu bawr dun tak kan ni.

Kan tlan chhuah leh hnu chuan muang fein a tlan a, min rawn melh leh zauh ṭhin. Hostel pan chhohna step bulah motor a ti ding a, chhuk mai ka tum laiin a la phal tlat lo. "Lehkha i zir dawn em?" tih pahin ka kut a rawn ban ṭhem ṭhem a, ka zir loh tur thu ka sawi rualin a nui vur vur bawk.

"Lo len i chak a ni maw?" lu a thing vut a, "Ka lo leng lo mai ang, ni Pawli lo call leh hmaa haw ka ngai" tih pahin a ner sak a, thil zep a nei tlatin ka hria, Ni Pawli thu chu a ngaipawimawh em em ngai pawhin ka hre lo a, a mak riau a ni.

"Rosai kha engtin nge ni zel dawn?" ti a ka zawhna chu, "Min ngei ve khawp ang" ti maiin min chhang a, chu chu chiangsa ahka ngai.

"Ka khawngaih reuh" ka ti tawl a, fel ka tih vang aniang ka khawngaih tlat a ni.

"I rilru a ṭha anih chu, ka lo khawngaih ve vak hleinem, tikhan a chantawka khuarel a ni ve mai a lawm" a tia, a nuihpui mai mai.

"A fel reuh em a lawm, a rilru a na ve mai thei a ni, anih loh pawhin a zak ngawt ang"

"Nangpawh i fel a lawm, i fel ka ti daih zawk"

"Aa...uang lo teh, amah kha a zawiawi bawk sia, zakthei lo leh chimawm a ni bawk si lo, a nungchang a ṭhat hmel bawk si" min lo pawt chat vat a, "Ani aia i ṭha faivek hi i vannei nge ka vannei zawk, whole package dik tak i nih hi" min lo ti a, a lo nui ruh ruh reng.

"I chimawm em mai, ka ti tak tak a nia, Rosai lakah khan rilru chhia put a har, fel viau lo sela chu eng emaw deuha han awm ka tum a nia, a hmel ka hmuh rual khan ka rilru a danglam daih a lawm, zep loin hmelṭha i ti ve tho em, ka haw miah lo ang sawi teh" ka nuih var var laiin ka sam a rawn hui ṭha a, min melh deuh vang vang mai. Thawk a han la halh a, "I van hmelṭha tak" a ti zawi sup a, a nui leh pek tawh.

"Fiamthu loin...." 

"Ka fiamthu hleinem, hmelṭha ka ti tak tak che a lawm"

"Ka chungchang ka zawt hleinem che"

"I chungchang a lawm ka sawi"

"A mak Benjamin"

"I thinrim laipawhin i hmelṭha tho a nih hi, 'Benjamin' i tih laitak khan i ṭha zual"

"Eng emaw sawi ve la, Rosai lakah khan ka inthiam lo ania, i chhungte pawn an hau maithei che ania aw"

"Min ngaihtuah tihna a ni em?"

"Ngaihtuah ang chuuu" ka sawi zawh rualin a awm a dawm vat a, thawk a la vang vang bawk.

"Hmelṭha bawk rilru ṭha bawk, min la ngaihtuah em em zui, a tak i ni lo ang, a lem i ni em?" a tia, ka biang a rawn dawm vut a, "Ah...a lem a ni miah lo" a'n ti zui a, hepa tak hi chu...

"Ka kal dawn, i Ni in a lo call hma chein haw rawh" 

"Eitur ka lei ṭeuh che sia, kiss ka hlawh dawn nange" ka han melhrum ram ram a, a biang a rawn dawh nghal ringawt. Rang deuhin ka va chuk a, ka polythene khai chunga chhuk ka tum chu "Ka kham lo" tih leh min pawh a rual a, kei ka ṭang ve thung a, kan inchhaih rak chul mai. Chutah, thokang meuhin ka hmuiah min rawn fawp a, "Muttui aw, hmelṭhanu" a ti zawi sup a, kan lungawi dun viau a ni.

Hostel ka thleng chu ṭhiante an rawn lutkhawm a, eitur ka hawn chu an duh duh an kheh a, an ei hnem khawp mai, a ei bang ho chu khum hnuaiah ka dah lut vek a,  inbual tawh loin ka mu hmiah bawk. Mut hmunah rei lote kan inbia a, chawlhni ah a pute ina an kal tur thu leh a peih loh thu a rawn sawi a, keitak pawh chuan ka peih loh pui a, Rosalyni khan chanchin a hrilh a nih phei chuan a pawi viau maithei a ni.

"I Ni a kal ve dawn em, sawite a nei ve em?" ti a ka zawh chuan, "Nei lo e, kan kal dun ang" a ti mai a, eng emaw tak chu a sawi ve ka ring a sin le, Bena hian a zep zawk anih ka ring.

Chawlhni chu Nanai nen kan inkhawm a  kan Hostel piah lawkah hian biakin a awm a, hming pawh ziak lem loin kan inkhawm ve mai zel a, chawhma bak hi chu ka inkhawm ngai lo thung. Inkhawm banah Nanai room ah noodles kan chhum ho a, kan ri laih laih a, ka phone ri pawh ka lo hre lawk lo. Nanain a lo lak chuan Benja call a lo ni a, vawi hnih lai a lo call tawh.

"Hello" ka tih rualin "Message en la" a rawn ti a, phone a dah leh daih.

A message ka han en chuan "Rosalyni khan engmah a sawi lo aniang, a puin delhi-ah min zin pui a tum tlat mai hei, Lza leh tirhkoha pawh an kal ve dawn, ka pu hoin anih hmel, an lehkhazirna hmun te min fan pui an tum" tih angreng hi a peih loh thu leh  chhuanlam a siam dan tur a rawn sawi luam a, ka rilru a buai nak mai, chhan mai dan tur pawh ka hre lo.

Ka pindana ka let hnuah ka call a, "Engtin nge i tih dawn?" ka tih chuan, "Class ka kal laklawh ka tia, bang turin min ti ringawt a  ka bang dawn lo nasa" a ti a, a aw aṭang pawhin a thinrim tih a hriat theih.

"Lza a kal ve dawn maw, anih Roma a kal ve dawn em?" 

"Vawiinah Lzan min kalpui a, ka Puin a lo sawm ve nghal a lawm, a lo phur hurh a, a nawm dawn loh tehreng nen" a ti hluk hluk a, "Rosalyni pawn hna a nei a ni lawm ni, a chawl dawn tihna nge?" ka tih leh chuan, "A pu kha in checkup a ngai a, chumi pah chuan an ti a niang" a ti leh a, putar pahnih te remruat tih chu a chiang viau a ni.

"A duh chiang mai che, ni lo sela chuan a hnial ngei ngei ang, eng nge maw a ngaihtuah le?" ka ti vang vang a, fel leh pawisawi lo lutuka ka ngaih ang kha a ni dawn lo tawpin ka hria, ṭhat ka lo chhuah mah mahin ka hre ta bawk.

"Ni Mary'n a fuihpawrh nasa viau ang, an innel a lawm, an inbe deuh reng ang" a tih phei chuan thaw a pik mup a, thlawptu nei ve lo chu ka chan chhiatzia ka hre thar a, a chhe ber thlengin ka ngaihtuah bawk. Inṭhen thut thei reng kan niin ka hria, keichuan tih theih vak ka nei lo, engkim chu Benjamina awmdan leh a thutlukna vek a ni, lo thlir tawp bak chu ka tan tih theih a awm lo.

Internal exam kan hmachhawn dawn avangin lehkhazir lamah rilru ka pe deuh a, Benja te pawh exam zawh lama zin turin ticket an tifel diam tawh. A exam tur chu a vei ve vak lo aniang lehkha a zir awm pawh ka hre lo, amah phei chuan "Pass tawh hnu a lawm" a ti mai zel a, a chhungten an ngaihpawhmawh sak lo bawk a, zir rawh ti tu nei lo na na na chu zantin Roma te inah a leng a, games a khel tluk tluk a ni ber.

College-ah ṭhian leh hmelhriat a ngah viau tawh a, SU ho a be thiam bawk a, a kal loh chang pawhin SU roll call-ah chuan buaina a nei ngai lo, class pangngai ah lah a ai ṭhutsaktu a nei zel a, college kal ve ziah si hian pawn velah a tap mai maiin ka hria, class aṭanga ka chhuah hi chuan hmuh tur a lo awm hman ziah zel. 

Exam kan han ṭan a, a exam kim ve vek a, kei chuan ka ti ṭha hran lo ka intih laiin "Ka rin aiin ka chhang ṭha" a ti thei zel a, a zirhnu a ni bawk nen a hnehsawh khawp a niang. College khata kan kal dun hi a nawm ve deuhna chu englai pawhin ka tan hun a nei a, nitin eitur tui tak tak min lei ṭhin, chumai ni loin ka kal lam min hruaiin min thlah ziah bawk a, khawhar malin ka awm ngai lo, a lak aṭang hian inngaihzawn nawmna ka tem ve tak tak niin ka hria, min duhzia a ti lang hreh ngai lo a, min ngaihsak em em reng a, ka ṭhiante pawn ka vanneih thu min hrilh fo mai.

Exam zawh aṭanga kar khat hnuah kan result a chhuak a, Lunch break laiin an rawn tar nghe nghe, keini class kan la zo lo deuh a, tukverh aṭangin semester dang hoin an en sap sap lai chu a hmuh theih a, Benja pawh a ṭhiante nena an inzui lai ka va hmu a, message in a result chu ka va zawt bawk.

"Canteen-ah ka lo awm ang, pass kan lawm dawn nia" a rawn tih vang chuan ka phur ve khawp mai a, ka ṭhiante pawh phur deuhin ka hrilh. Mawitein "Min treat vek rawh se" a lo tia, min zui an tum avangin Benja chu ka hrilh leh vat a, "An ni pawh lo tel rawh se" a rawn ti sam leh et a, an phur tlang khawp mai.

Professor chhuah rualin notice board lamah kan tleh phei huk a ni ber, ka result ka en chuan ka pass ve ṭawk ṭawk a, mark ka khawl ṭha lem lo hle a ni; mahse, 2nd internal a la awm a, ṭan deuh chu ka ngai dawn. Ka tih ṭhat loh chhan ni a ka hriat tak ber chu pawimawha ka rin te ka zir ve mawp mawp a, ṭum dangah chuan Awmpuian a pawimawh tur min hrilh ziah ṭhin a, tun ṭum erawh kan intibuai miah lo, ka zawt lo a min hrilh bik hek lo. Ani chu mark sang tak hmuin a hmasa berah a hming a chuang leh vang tawh a, a result chu a hre ve tawh nge a la hre lo zawk ni, a hmel ka hmu lo reng reng.

1st semester ho result chu ka enthla diat diat a, a roll number ka hriat loh vangin ka zawng rei hrep, a hming ka hmuh chuan ka kawk vah a, ka han en phei chiah chu nuih a za lo nasa a ni, ka ṭhiante lah chu an lo nui kur kur a, kei erawh ka tum bur thung, kan Benjamina mai mai chuan a pass chhuah hnu te zuk han fail leh chuan...

Lungawi loh deuh chungin canteen lam ka pan a, ka ṭhianten nui chungin min lo zui bawk, kan va luh laichuan Bena leh a ṭhiante chu dawhkan hnung berah an lo ṭhu a, min hmuh ruala a lo tho chu ka'n melhrum nghal ringawt a, "Eng nge in ei duh duh, lam rawh u" tiin a lo phul hlut.

"I pass tawp lo" ka tih laiin, "A ho, i pass chuan a tawk" a tia, couter lamah min kalsan nal nal a, a duh duh a va chah reuh a,  a man to to chah lo sela chu kan sawisel ngei ang, mi tih lungawi dan hi a hre leh lutuka, han titauhna hun hi min pe ngai lo a ni ber. Ka ṭhiante lah chuan a lam a han ṭang khawp a, "Degree a nei tawh a lawm, college life bak a rawn kalchhan chuang hleinem" an tihsak a, an bawl thiam leh lutuk hi ka lo ngei lek lek ṭhin, an duh duh an leitir ziah lehnghal a, Lalbena lah hian ka ṭhiante an nih vang nge ni a hnial ngai lo reng reng.

Thil kan eizo kan la ṭhut khawmuan laiin Awmpuia leh Peka an rawn lang ve hlawl a, min hmuh rualin kan lam an lo pan bawk. Lo biak ka tum lai tak chuan Benja chu a rawn nuih a, "Fail zingah mark i hmu sang ber em?" a rawn ti ta mai a, Benja chuan a haw mai ang a ka tih laiin "Min va ngaihsak ve, ka rin ai daihin min ngaihsak" a lo ti sam et a, haw awm pawhin a lang, Awmpuia lah chu a nui ruh ruh a, hepa pawh hi ka beisei loh dan deuhin a awm leh ṭhin, tunhnai te hian fiamthu te hi a thawh ve zuk zuk zel a, a ngeiawm thiam ve riau zel.

"A result aiin i result a en hmasa?" Pekan a tih chuan, "Min vei anih chu, bialnu ka nei tawh, min vei duh vak suh" Bena a lo ti hluk hluk a, "A result i ensak ve em?" ti a an zawh chuan, "Eng atan nge ka tih ang a, a hmel hmuh pawh nin nak alaiin" a ti leh bawl a, a ep chiaha ṭhu nen chuan an inmelh no vak lo.

Bena'n zial a pawrh chiah chu "Canteen-ah mei zu suh" Awmpuian a lo ti chang bul a, an in en ran mai. "Khawi, nakina zukah" tih leh Peksanga'n rawn ban a rual a, Awmpuia leh Ben'an an melh rual zawt, chutia rang lutuka an lam an hawi chu hamhaih deuh hian a melh let a, "No smoking' a'n ti ngawt pek a, hmeichhe ho chu kan lo nui hawk hawk.

"Rinte, Education i tihchhiat ber ṭum a niin ka hria, i zir fuh lo viau a ni maw?" Awmpuia'n a tih chuan, "Ka zir a chhuak tlem lutuk, kan subject in ang sela chu ka lo zawt ang che" ka ti ve vat a, "Min lo zawh tho tur a lawm, question hlui ka lo hai sak tur che ania" a tih leh rual chuan, "E hee..." Benja'n a lo ti hluai a, Awmpuia lam hawiin a chek tlat tlat.

"Eng nge?" Awmpuian a ti chu za lo fahranin a han nuih a, "Inkawm tawh lo ang u" a ti teh thlawt a, kan nui zo leh ta vek. Eitur an chah laiin kan chhuahsan a, pawn ka thlen rual rual chuan "Ka fiamthu lo ania, kawm tawh lo ang" a'n ti zui a, kan inhmuh khat tehlul nen.

"I thikthu a chhia anih chu" ka tihsan mai a, "Ka zin laiin i lo kawm ange, mi ka enthlak tir dawn che" a ti leh hram a, an zin hun tur ka lo zawt ve zat.

"Kartawpah" tiin min chhang a, zirtawpni ah an kal dawn a ni awm e. "Ka nu va tlawh phawt ka duh, a phone number lak nachang ka hre lo a, biak ve zeuh zeuh a ngai a ni" a ti zui a, ka kalpui theih thu ka hrilh ve bawk a, a hun tur erawh a la sawi thei lo.

Min lo hrilh mai ka rin laiin an zin dawnni thleng chuan a nu chungchang a sawi lo a, an zin chhunga Awmpuia kawm lo turin min chah zing hle thung. Zirtawpni chawhnu lamah an kal a, a thlen hnuah video call-in min lo bia a, hotel room pakhatah Joshua leh Lza te nen an mu dawn a nih hmel. Rosalyni chungchang ka zawh chuan, "Kan inbe lo, thlawhna ah pawh  Johshua nen an ṭhu dun" a ti a, a rawn insawifihlim khawp mai.

"Buaina chu maw, Lza hi englai pawha zu lem in reng ang a nia, Tirhkohah hian Bible a keu reng thunga, khum pakhatah hian keimah a mut ka duh si a, an mu dun thei ange maw, pakhat sawn a nam huam reng a,  an inngeih lo maithei a ni, an pahnih bulah sawn ka mu peih lo ve ve" tiin a phun nuah nuah a, ka nuih a za deuh.

"Saw a chhiar leh tawh saw.." a tih laimek chuan Lza a rawn lang a, "Bro, a chhiar leh tawh, please-in i khum hi min kian mai teh, Isua bula zuin ka ang em mai" Lzan a ti bui bui a, Benja chuan a lo hnial nasa, "A missionary na tur i ni mai tikhan, va mu ringawt rawh" tiin an innawr phei a, screen-a Joshua a rawn lan chuan ka lo enchiang vat a, khumah bawp khawkherh chungin Bible a lo chhiar a, "Bro.." Lzan a ti leh ṭhin nen, mahniin ka nui kur kur mai.

Zan rei deuh thlengin kan inbia a, a aw ah a chau tih a hriat theih a, muhil tura ka tih lah chuan a duh tlat lo. "Ka nu chu ka lo haw veleh kan va tlawh dawn nia, kal leh har min ti tawh ngawt ang, a naute ho pawh a hrilh ve tawh ka ring" thutak deuh hian a ti a, engtin nge an lo ngaih ang tih min zawh chuan "Ka hre lo le, an lawm viau che chu ka ring a" tiin ka chhang a, ka chiang ngam bik chiah lo.

"Eng emaw ka rawn hawn sak ve ang" tiin a nui zui hak a, a rilru tur chu ka hriatthiam pui ve ruak tho, a phur leh tawh ngawt ang chu.

"I thlengthla chauh a, lungleng nghal i va ang ve" fiamthua ka tih laiin, "Ka khua a har reng ṭhin a lawm, nang awm lo phei la chu ka a hrehawm ngawt ang, lo intawng lo ta ila engtin nge ka awm ang le?" a ti leh vang vang a, "U Lizzy a awm a lawm" a tih chuan a nuih a za khawp mai.

"A lo be ngai che em?" tiin ka zawt zui a.

"Vawihnih khat chu kan inbia, a nu kha a inentir leh a, clinic hawn hun tur min lo zawt a, a hnuhnung zawkah kha chuan a chhuahpuiah min lo sawm a, ka kal ta lo va" a ti a, a inbiak lohna pawh a rei leh tawh a ni awm e. Kei erawh min la rawn be miah lo a, Nu Hlimi takngial pawhin min be lo a, a chungah an lungawi lo viau anih ka ring.

"Kan inneih hunah chuan kan indang nghal daih dawn nia, ka chhungte hi hrawn an nuam vak lo ang, chhungkaw hung deuh kan nia, ka pi leh pu chauh an ni dawn si lo a.." a tih chuan ka ngaihtuah ve rauh rauh a, an inpuia lawi luh chu ka chak fahran lo a ni, khawsak a harsa deuh dawn anih pawhin indan nghal chu ka thlawp khawp ang.

"Kum te han thar se, kan la ngaihtuah ṭha dawn nia, i pu rin theih tur khan han awm phawt la" a ti leh chu min chhang ta lawk lo a, "I muhil em ni" ka tih pawh chuan a ngawi reng, a thawm chu ka han ngaithla ngun deuh a, a thaw sek sek ri ka hria a, a muttui viau anih ka ring. Phone ka dah hnu chuan keipawh ka mu ṭha zui a, ka muhil thei hauh lo thung. Eng eng emaw ka ngaihtuah kual a, inneih kan sawi kai tawh laiin kawng a ping riauin ka hria a, kan hma hun chu han ngaihtuah vak dan pawh ka thiam lo, ngaihtuah thui pawh a har.

Delhi-ah chuan ni thum vel chauh an cham a, Rosalyni te putu erawh inentir turin an la cham thung a, an pute beisei ang chu a thleng lo chiang khawp mai. An lo haw dawnah Benja chuan a pute thu awih tawh lo tur leh an sawi leh pawha hnial zel turin a chah a ni awm e, "Ka hrilh laichuan a ngawi reng a, nuih pawh a nui lo" tiin Benja chuan min hrilh a, a sawi chiang bawk a, mi pangngai tan chuan tlawma lak chi a ni tawh ang, a a hlawm tawp te anih loh chuan a lo hnial ve tawh turah ka ngai. 

Benja lo haw chuan tlereuh leh kawr min lo hawn nual a, an lo thlen tukah Hostel-ah min rawn pe vang vang a, class a la kal peih loh avangin mahni tein ka kal bawk. A tuk lamah class kal loin a nu chu kan va tlawh a, min lo lawm thiam khawp mai a, a fate pawh a hrilh tawh ni ngei tur a ni. A fanu tleirawl kha a lo awm ve a, a lai deuh aniang min be ṭha ngam lo a, Benan a thil hawn a pek pawh chuan lawmthu hrilhin pindanah a lut nghal daih a, an tlangval erawh hmuh tur a awm lo.

Benja chuan a nu phone number a la a, "Mamawh i neih chuan min lo hrilh dawn nia" tiin a chah bawk a, a nu chuan,"Min ngaihtuah suh, ka damṭha ve leh tawh a lawm, chawhmeh pawh ka zuar leh tawh" a lo ti a, kan kal hma deuh khan khum betin a lo na a ni awm e.

"I eng nge na a?" Benan a tih chuan, "Ka pum hi a na ṭhin a, a chang hian a rawn na vak zel a, Doctor chuan ka ril chak loh vang a tia, damdawi te ka ei a ka zia leh tawh khawp mai" tiin a lo chhang a. Chaw eiah min sawm a, "Mama pawh a lo haw ṭep ang, Ar kan talh tir dawn nia" a tih chuan kan han hnial deuh a; mahse, pindan aṭangin a pasalin "Chaw ei rawh u, sawm che u kan tum reng ania, in lo kal remchan laihian ei ngei ngei rawh u" a lo ti bul bul a, Bena nu chu a fapa ko haw turin a hrilh bawk.

An tlangval chu an call a, "Ka lo haw dawn" a ti chungin a rawn thleng har khawp mai a, a tlai tawh bawk nen Bena chu "Nangman talh mai rawh" kan ti ta ringawt a, ar a lo la talh ngai reng reng lo chu niin. Hmeichhe hoin a nghawng kan zai ngam si lo a, a nu hoin a nau nen ka lo chelhbet a, maimitchhing chungin a zai a, a zo chiah chu hlim vur vur tak a ni, "Mi lu la hnam kan nia lawm le" a ti ve ngei a, a zai dawna a ṭih tehlul nen chuan.

Dar 5 rik dawnah a nau mipa kha a lo haw a, kawngkaa a rawn lut chu min hmuh vang aniang a tawi deuh hrat a, a chhuak leh nul nul mai. Pawnah chuana thawm reng a, an ṭhenawm pa emaw ni hi a be lung lung bawk a, a lo lut ngam lo anih hmel. A nuin a koh hnuah pawh a lo lut lawk lo a, Bena chu "Va chhuak ve mai rawh" ka ti ta ngawt a, a kal ve mai bawk.

Eng nge an sawi ka hre lo, an inbia tih erawh ka hria a, an ṭawng ve mawlh mawlh mai. Rei dawn hnuah an lo inzui lut a, "Kan bun tawk a in an chuan ka lo kal leh hunah ka rawn ken ang che, ka inkhel leh peih tawh lo va, size engzah nge i bun?" tih angreng chu Benan a zawt a, football chungchang an sawi dun a nih hmel. "Futsal i khel ve ngai em? Zantin kan khel a, boot a hek duh tak tak a ni" a nau chuan a lo ti ve vat a, pindanah lutin a ballboot a rawn la chhuak zui a, Benan a lo en sak thuai bawk.

"Ka ta chu tlemin i thawl deuh dawn anih hi" Benan a tih laiin "A thawl lam ka duh a lawm, hei hi ka tawt mah mah" a nauin a lo ti vat a, "Pheikhawk dang pawh bun loh ka ngah a sin" a tih leh chuan "Lo keng vek rawh, ka duh a lawm" pakhat chuan a lo ti leh zung zung a, an inbe lai chu a nu nen kan lo thlir reng a, a nu hmel chu hmuh nuam tak a ni. Chawhmeh chawk tura a kal pawh chu a mittui a hru zauhin ka hria.

Kan han awm rei takah chuan a nulate pawh chu a ṭawng ve barh barh tawh a, Benja erawh a la be ṭha ngam meuh lo. Purun kan rawt dun a, eng eng emaw min zawt ve luam mai. "In innei ṭep tawh em, lehkha in la zir ve ve a mi?" tih angreng min zawh chuan, "College a zo tawh a lawm, nupui neih chu a la ngam lo ang" ka ti fiamthu a, a kal ṭhat leh thu te kha chu ka sawi lang duh lo.

"A u nen sawn an in ang lo i ti ve em?" nui sen sen chungin a u te pahnih chu a melh a, "A u hi chuan apa a chhun leh lutuka, a tukkhum te hi a phek lutuk" a ti zui a. "Nangmah nen hian in in ang riau a lawm, i mitmeng te pawh a in ang" ka ti chu a lawm zawk emaw tih mai tur a ni.

Dar 6 pelhah chaw kan ei chauh a, dawhkan kila kan han ṭhu ho chu kan hlim ve dar dar viau mai. "Engtikah nge in lo kal leh dawn a, pheikhawk chu lo dah vat la" a nau mipain a tih chuan "Tunkarah ka lo kal leh ang" a ti ve mai a, tunah chuan amah chauh pawhin a kal ngam tawh ang chu.

"Pheikhawk hi a heh lutuka, a ballboot pawh saw ṭhuiṭhat sen a ni lo, vawikhat a buna a ti chhe nghal zel mai" a nuin a lo tih chuan, "Inkhelhnapheikhawk chu a tlo thei lo a lawm" Benjan a lo ti ve vat a, an tlangval ber chuan min lawm tain ka hria, kan haw tur pawh kawngpui thlengin min lo thlah a, "I lo kal leh hunah rawn ken theihnghilh suh aw" tiin a u chu a chah ve ṭawk ṭawk a, Benja phur zawng tak a ni, kan tlan liam hnuah pawh "A thar ka lei zawk dawn em mawni" a ti nuah nuah a, "Bun loh i ngah chuan a hlui pawh pe la a pawi hleinem, i pu pawisa kha ren deuh rawh, i buai phah ang e" ka lo ti ve thung a, a hmang hnem tawh ngawtin ka ring.

Hostel-ah min va thlah a, lo lut kawi loin a inkhalh haw zui a, a thlen fel hnu rei vak loah "A pum a na, ka ni a lo la haw lo" tih hi min lo thawn a, "Pum damdawi emaw Avil emaw ei rawh, tui te in ṭeuh la" ka va tih chuan pum damdawi a ei tawh thu a lo sawi a, a chhawk vak lo aniang darkar chanve hnuah pawh a pum nat thu bawk a rawn sawi leh a, "Ka kua a ṭha lo" a ti zui a, amah chauhin a awm bawk si a, ka khawngaih reuh khawp mai.

"I Ni phone la?" ka tih chuan "Message ka thawn tawh" a ti ringawt a, va kal ringawt dawn ila zan a ni bawk si a, amah nen kan inzui haw dun te anih loh phei chuan mahniin ka leng hreh ve tlat a ni.

Ka call a, "A lo haw dawn tawh em, dar engzatah nge a lo haw ṭhin a, tunah dar 8 a ri dawn tawh a lawm?" ka ti zung zung a,

"A bialpa nen chaw an eichhuak" a ti bul hmuk mai, a lungawi vak lo.

"Aw haw...i pum a na tih hrilh la, arsa kha i eisual anih ka ring, tunah a la na viau em?" a tih leh chuan thawk a la ham ham a, a ṭawng pawh a dik zan tawh lo. "Na e, ka luak te a chhuak, ka va inthiar leh lawk" tiin a thawm zui sat sat a, khawngkhar inhawng ri ka hriat rualin phone chu a tawp daih bawk a, min lo biak leh hun nghakin khumah ka lo ṭhu reng ringawt.

A rei em avang chuan message ka thawn ṭhin a, a chhang thei lo, darkar a liam a, engmah a rawn sawi bawk si lo a, call lah a chhang thei bawk si lo, ka va kal mai dawn em mawni ka tih ut ut tawh hnuah a rawn Call ta hram a, "Min jection zo chiah" a rawn ti a, a Ni a thleng tawh a nih hmel e.

"I zia tawh em?" ka tih chuan, "Ka chau, ka hah" a ti halh a, ka nui ringawt.

"Muthilh tum la, zingah chuan a dam veleh mai ang" ka tih chuan, "Min ngaihtuah suh, ka dam mai ang" zawi deuh sup hian a rawn ti a, a ṭawngkam chuan engti zawng emaw tak hian min ti na a ni, ka hrethiam chiah lo,   eng emaw danglam tak, ka chhungrilah hian che zawk a awm ti ila a dik ang, ka hnuk a ulh deuh lek lek mai.

"Muttui aw, i thawh veleh min lo be dawn nia" tiin ka mangṭha a. A la hma viau nain lehkha ka chhiar peih lem lo a, khumah chuan phone khawih chungin ka mu mai mai a, ka muthilh tak chu dar 10 pelh hnu ah a ni. Ka muhil chu ka harh hlawl a, sana ka en chuan dar 2 a lo ti va va tawh.

Benja message a lo awm a, "A na leh tawh" tih tlawng a ni, dar 1 bawra a lo thawn a ni a, a bakah message dang engmah a awm lo. Call ka tum zuau a, a muthilh takah tiin message ka thawn ta zawk a.

Ka message kha a lo chhang mai lo a, ka lo muhilh veleh mai bawk nen a lo chhanna chu zingah ka hmu chauh a, "Ka ngai lutuk che, vawiin chu class i kal hmain min lo tlawh rawh" tih hi a lo thawn a, ka pen kawi tur thu ka va hrilh hnu lawkah "Ka ni chhuah hunah i lo kak chauh dawn nia" tih hi a lo thawn leh a, ka ngaih a ṭha zan lo.

"Tinge i Ni chhuah hunah kher?" ka ti let vat a.

"Chance ka duh a" a tih chuan ka thaw huai ringawt.

"Eichak i nei em?" ka ti leh chu "I hmui" a rawn ti teh thlawt a, a zia tawh khawp aniang chu ka ti mai. Dar 9 rik hma deuhin ka chhuak a, dawrah Almond cake ur thar leh theitui ka leisak, taxi in an veng lam ka pan vang vang a, first period chu nang lo mahila pawi ka ti lem lo.

Ka thlen hma deuh chuan "I ni a kal tawh em?" message in ka va ti a, a muhil leh nge ni min chhang miah lo mai a, an veng ka thleng zui mai nen ka call duh ta lo ngawt a. Mahse, an step-a chhuk laimekin a Ni ṭawng thawm niawm tak ka hria a, thawm aṭang chuan an inhau ni maiin ka hria.

An kawt ka thleng chiah chu ka ding chawt a, ka hming an sawi tih chu chiang takin ka hria, "Zu in indun ṭhin pawh ka haider hram hram che u a, i duh tlat avangin duhpui che pawh ka tum; mahse, he nu kher hi chu ka duhpui miah lo che ania, i nu nen suihzawm cheu a tum lehnghal em mawni, kan lawm lo tih pawh a hre reng a ni lawm ni, a huang lo a dai zat zat mai henu hian, kan inah te hian a lo kal ngun mah mah, zah hre lo deuh a nih dawn hi" tih angreng ka hriat takah phei chuan ka pen zawm ngam tawh lo reng reng.

"Keiman ka sawm a lawm, min kalpui ringawt ka tih kha" Benan pawr fea a tih ri ka hria a, "Sawi fihlim kha tum duh suh, ani aichuan i Ni Mary sawi pawh kha a ṭha daih zawk ang, Hlimi fanu pawh kha ka duhpui zawk ang che, a chhe ber i thlang anih hi, inneih te phei kha chu sawi reng reng suh, i pu bulah ka ṭan dawn hlek lo tih hre rawh" ni Pawlin a ti leh hmarh hmarh a, Benan a chhan letna chu ka hrechiang thei lo. "College kha bang nghal che, kartawpah i pu teinah i phei ang, tlanbo i tum leh anih chuan home-ah ka dah ang che" tih riin a zui a, ka nghilh dup maiin ka hria, ka chiai deuh ruai a, thaw a ipikin, rilru a na vawng vawng mai a ni.

(End of chapter - 32)