BLUE BAYOU (CH - 33) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 33

Ka bag-a ka phone ah chu a ri dar dar reng a, ka chhang a nih chuan ka ṭap thei maiin ka ring. Ka inngaihtuah tluk tluk a, rilru a na telh telh mai, movie leh lehkhabuah chuan ka hre fo ṭhin, an ngaihzawng chhungten an duh loh vanga inṭhen ta te, an hmangaihte ṭhatna tur an duh avanga an inkalsan tak dante. Khang love story lungchhiatthlak takte ang kha kan ni ve dawn em ni? 

Benja tan ka ṭha tawk lo an ti a, min thlah turin an duh bawk. Lo inṭhen ta ila engtin nge ni ang, kan inṭhen emaw kan inṭhen lo emaw ka tan chuan hma hun eng a awm lo, chu chu kan hmakhua ka thlir thiam dan tawk a ni, hlimna a awm lo ve ve. Keichuan chân tur nei ve pawhin ka inhre lo, Benja chauh lo chu, ka ṭhian ṭha ber, min hmangaih em em tu, ka lungngaih leh ka nat changa ka belh ṭhin, ka mipa hmangaih leh a nupui atana min duh ve ngawih ngawihtu hi ṭhen ta ila eng ang chiaha mal leh khawharin nge ka awm ang, ka ngaihtuah thui zel a, ka zuam lo a ni, ka zuam lo takzet.

Anih chuan ka vuan tlat zawk dawn em ni, a chhungte doin an fapa hi heltir ta ila eng nge thleng zel ang? Nge ni a an rilru hneh tumin ka bei zawk dawn? Heng zawhnate hi ka inzawt a, rilru thianghlim pu lo na na na chuan a thim zawng hlirin ka thlir a, mahni inkhawngaihna nen rilru ka ti sak lui bawk a, midang hlim nana ka hlimna dah bo chu ka remti thei lo a ni, ngun taka ka ngaihtuah hnuah pawh thil pakhatah chauh thutlukna ka siam thei a, ka ṭhen lo ang tiin, mahni hmasial tak chunga he thutlukna hi siam ka ni.

Tukverh lam hawiin thawk ka han la vang vang a, ka phone a rawn ri ve leh chiah bawk. Ka chuanna taxi driver-in min lo thlek rual chuan ka bag ka hawng rawk rawk a, awki zangkhai thei ang berin Benja call chu ka chhang a, "I lo peng dawn ta em?" a rawn tih chuan, "First period ka nei a, tlai banah ka lo tlawh kawi ang che" ka ti vat a, ka thil hriat erawh zep tlat ka tum, ama ka aṭang ngeia ka hria anih loh chuan ka hai der lui ngar ngar mai ang, chu chu ka tih theih ṭha ber a ni.

"Ka zia deuh chuan ka rawn hruai ang che, i ban dawnah min lo hrilh rawh" a tih chuan ka hnial lo, eng nge a an tawh ka zawh chuan "A na chu a reh tawh, ka chau deuh ringawt" a ti a, a aw aṭang pawhin a chau tih chu a hriat theih. College ka thlen ṭep avangin inenkawl ṭha tura ka hrilh hnuah phone ka dah a, class-a ka luh hnu rei vak lohah Roma'n a kan thu a lo sawi a, nilengin a awmpui dawn a ni awm e.

Lunch break laia ka chhuak ve zawk tih loh chu class room-ah ka awm chawt a, mi han biak vel pawh ka peih lo a, tlar hnung berah ka ṭhu ngawt ngawt a ni ber. Ban dawnah Mawitei leh Kimkimi'n mipa ho inkhel enpuiah min lo sawm a, Awmpuia te department leh PA ho an inkhel dawn a, kan semester ho chu an kal deuh vek ang, ka ṭhiante chu ka nawmsam loh thu hrilhin ka hnial a, Benja ka call zui bawk.

"Roma ka va thlah lawk anga, ka lo kal ang, ka nau pheikhawk kha min va dah pui rawh aw" a lo ti zung zung a, an insiam buai mek aniang Roma ṭawng ri pawh ka hria a, pheikhawk an indil niin ka hria.

"I lo kal har a ngem?" ka tih chuan, "Kan chhuak ṭep, duh leh taxi stand-ah khan min lo nghak la, ṭhutna a awm kha" a rawn ti a, chu aichuan inkhel lo en rih ila, taxi stand-a hmelhriat loh zinga ṭhut aichuan ka duh zawk mah.

Benja ka hrilh chuan "A pawi hleinem, field-ah chuan lo awm rawh, ka lo thleng har lo ang" a ti leh mai a,  kan inbiak zawh hnuah ka ṭhiante chu ka call a, anni field-ah an lo awm tawh a, ka pan chho ve thuai bawk.

Field ka han thlen chuan an lo inkhel mek a, entu pawh an tam khawp mai, ban hnu anih tawh vang nge ni mipa ruih hmel deuh deuh an awm a, ka ṭhiante lah chu mipa rual zingah an lo ṭhu a, ṭhutna tur remchang pawh a awm lo. "Rinte, i bag kha hetah hian dah la, ka hmaah hian lo ṭhu rawh" Kimkimi'n a lo tih vang chuan ka va inhnawh phei rawk rawk a, Kimkimi ke bul chetah amah nghengin ka ṭhu a, ka ṭhu fel awrh tihah goal net puar pawp khawpin Awmpuia'n a pet goal a, an au dual mai.

"Vawihnih a thun tawh" Kimkimi'n a tih laiin "Noeli te saw" Mawitei'n a lo ti zauh a, Noeli te ṭhian ho chu field sirah an lo ding ṭhap a, an phusa leh hle tawh anih hmel.

"Bena a lo kal dawn a, ka awm rei hman lo" ka tih laimekin field lamah chuan thawm a awm a, an innam deuh laih laih a, "Tunlai chu Lalawmpuia hi a thinchhe tawp, a mizia hi a dang tawh lutuk" Mawitei'n a tih laichuan Awmpuia chu ka lo en ve reng a, a sawi dikin ka hria, a danglam ve hret hret a, hun leh boruak inlumlet hian mihringte hi a ni telin min sawi danglam a, kan rilru leh ngaihtuahna, kan mizia thlengin a her danglam chu anih hi.

Ka sana chu ka en deuh reng a, minute 20 lai a liam tawh a, a khat tawkin ka bula ṭhu ho chu an au leh dar dar ṭhin. Political science ho chuan an sawp nasa hle dawn a ang. Inkhel ka en dauh dauh laichuan "Saw saw Benja a ni lo'm ni?" Mawitei'n a ti teh thut a, ka va hawi chuan Bike a lo tung ṭha mek a, mipa ṭhenkhatin an bawr laih bawk.

"A lo thleng tihte chu sawi ve awm" tih pahin ka bag ka ak zui a, "E he..!" an tih vang chuan ka hawi phei leh rang hle. Benjamina chu mipa pathum hian an lo khawih rawn a, midang an tlan khawm huk bawk a, ka ṭhiante pawh ka nghak hman bik lo, ka tlan phei rawk rawk. Mi karah ka va inhnawh phei a, an insualna lai ka thleng chiah chu ka rak chul mai. " Bena..Ṭhelh ru" ka ti chul a, midang chuan ṭhelh an han tum ve tak naa kut an inthlak mawlh mawlh a, an ṭhelh tumtute an lo intibuai veleh zel bawk nen, an insual luih luih tawh.

Benja chuan amah rektu chu a khabeah a hnek dak awrh a, chupa chu a pai khut khut a, chuveleh mipa pakhat hian "Ka ṭhianpa i khawih ngam e law" tih leh rawn hnek a rual a, midangin an lo pui ve bawk nen Benja chu an rek bet chawt chawt a, hmeichhe ho chu kan rak chul mai. Va pan mai ka tum laichuan inkhel ho kha an rawn thleng a, pakhat chuan Benja chelhbettu chu a awmah a rawn ṭham lawp a, a hnek thal nghal ṭhuai bawk, kan lam a lo hawi chuan a hmel ka hmu ve chauh a, Awmpuia a ni. Benja nen chuan an han in signal zauh a, an ding dun ta ran mai.

Peksanga leh Zothana an lo thleng zui nen kawngpui lamah an innam phei dawt dawt a, mipa zu rui ho kha chu field lamah an nawr phei ve thung. "Lo kal rawh Rinte" ti leh Mawitei'n min kuah a rual a, kawngpui lamah kan tlan phei hlawk hlawk a, Kimkimi pawh a lo thleng phei tawh.

"I na em, engati ringawt nge a?" ka va ti chu min lo nuih ṭhu hlawm a, "An rui anih kha, khatiang chang kha a awm ṭhin alawm" Peka'n a lo ti vat a, Awmpuia erawh a ngawi reng. Bena chu ka va pan a, "A na lo, an bike kha ka tai thlu palh a, an pawr ve hlek anih kha" a ti mai a, hliam a nei lo niin ka hria.

"An khawih na che em?" Awmpuia'n a tih chuan, "Na lo e" tiin chil a chhak pharh pharh a, Awmpuia'n a thlek deuh chu a lo namsawn rang hle bawk.

"Ka na lo, va kal tawh ru" a tih chuan, "Haw ang, tih chi loh lutuk" ka lo ti ve vat a, "I rui em?" Awmpuia'n a tih leh chuan a melh rum ti tih a; mahse, Peksanga lo inrawlhin Benja chu a rawn kuah chung a, kan sirah kuah pheiin a fuih mawlh mawlh a, "A malin kan la khawih leh dawn nia, ṭhian nei lo i ni bik hleinem" tih angreng sawiin an va nui dun hawk hawk a, chutih laiin field lam chu an la au ring khawp mai. 

"A rui anih chuan inphurhtir lo ang che" ka beng bula rawn ti tu chu ka melh vat a, a kut tuai rauh rauh chungin Benja lam a hawi thung.

"A rui lo ang" ka'n ti ngawt a.

"Fimkhur ṭhin teh" a tih vang chuan ka melh leh vat.

"Kai hruai deuh rawh, i enliam mah mah ṭhin ania" thutak fein a ti leh a, a mitmeng dam ruih leh hah vanga a hmaisen deuh tih loh chu thinrim hmel a lang lo a, rilru chhia a pu lo tih pawh chiang takin ka hria.

"Midang zawk kha an rui anih dawn kha" ka tih leh chuan "Nia" a ti ve mai a, chutih laichuan Noeli ten an lo ko a, Awmpuia chuan a bag la turin a lo hrilh a, Benja lamah ka kalsan nal nal thung.

"Hei, Tualvungi a lo hlauthawng hman a lawm, khatiang kha chu a tih chi tawh loh" Peka'n a lo tih rualin Benja chuan min lo ban vat a, "Tihpalh aw" zawi deuh sup hian a ti a, "I na lo maw" tiin ka han thlek ṭha leh rih.

"Na lo e, min khawih ve tak tak hleinem, an mahni kha an na zawk ang" nui chunga a tih chuan "Tunlaiah tumah an insual tawh ngai lo, in ti ho lutuk" ka lo ti hlak hlak a, "Kal daih ang" tih leh min kuah a rual a, a Bike lama min kuah phei laichuan Awmpuia leh Zothana lo ding chu kan kalpel a, "Kan kal mai" Benja'n a tih chuan an lo bu ve ve.  Bike-a kan chuang tur chu min lo enzui reng  a, kan tlan chhuah dawn thlengin an kal sawn lo.

"Phunṭiha khan a rawn hnek ve a, mak ka ti zawk a sin aw" thui deuh kan tlan hnuah a rawn ti phawng a, a lo ngaihtuah zui reng a nih hmel.

"A insual ka vawikhat hmuhna" ka ti ve mai a, thil mak tak zawng a ni, mi zaidam em em, tu mah hawtu pawh a nei ve lo ang kan tih ṭhin kha a ni a, Benja a rawn pui nghal mai te kha a mak riau a ni, eng emaw zawng takin min ti lawm bawk.

A nu te in kan va thlen chuan an pa ber chiah a lo awm a, a muhil kan va kaitho nghe nghe, a nu chu Melthum lama an chhungte huanah thlai lain a lo feh daih a, a unaute class kal an la rawn haw lo bawk a ni awm e. A thil ken chu a dah tho a, rei pawh awm loin kan chhuak lehnghal a, "Zanah ka nu chu ka be mai ang" a tih vangin kan inphur haw zui bawk.

"Hostel-ah ka lo leng dawn nge, Brendai te inah kan kal ang?" a tih chuan, "I tih dan dan a ni mai" tiin ka chhang a, an ina kal a rawt miah lo a, zawhna ka nei bik lo.

Brendai te inah kan va leng a, a nu hoin an lo awm a, an unau chu hmeichhia hlir pali lai an ni a, Brendai hi an naupang ber a ni bawk. Thingpui leh chhang min lo chhawp hluah a, Benja khabe vung deuh a hmuh chuan a chhan a zawt ve zat a, an intihbuai dante ka lo hrilh chuan a nuih a han za khawp a, "Hepa hi chu buaina a nei ngei ngei, middle school kan kal lai aṭang tawhin a kalna apiangah a insual a lawm, a bialnu nih a zahthlak thei a nia" tiin a nui hawk hawk a.

Benjamina lah pek chuan "I bialpa nih a zahthlak fe zawk, i che ṭhing thei ropui si, ka kawrin i thi te i fun thul" a lo ti ve bawk a, sawi hreh leh tim pawh an nei lo.

"Khang hunlaia i hmelchhiat theihzia kha, ka ṭhianten min nuih ziah aw" pakhatin a tih laiin "I ṭha bik lo e, i sam kir bup chung khan engtin nge ka lo duh che ni, ka lo duhtui vak lo aniang" Bena'n a lo ti ve bawk a, an insawi chhe tawn chiam a, hmelṭha zawk nihte an inchuh a, an naupangchhia leh lutuka, thik lamah pawh a kal lo, nuih an ti za.

"Engtin nge in inngaihzawn theih?" ka tih chuan ka lam an rawn hawi rual zawt a, phawk fein ka lo melh, inngaizawng tura ka ngaihtuah hian inhmeh lo dun tak an ni, ṭhian inhnial reng ṭhin hi a an ang zawk.

"Awi.....lehkha min rawn thawn a, ka chhang let miah lo.." Brendai'n a tih laiin "I ta tur ni lo i dawng palh a nih kha, a ziaktu pawh ka ni lo" Bena'n a lo tia, ka nui hak a, an tum dun bur mai.

"Mahse, ka chhang chuang lo che, tlai banah min lo chan ṭhap kha aw" pakhatin a tih leh chuan, "A thlen lohna tura a thlen vangin Herbert-an min papek ringawt a lawm, khanglai te chuan a kid kan nia, kan hnial ngam hleinem" Benja'n a lo ti bul bul a, an inpuang zo mai dawnin ka hria.

"Engah nge min duh ve ringawt si, a hnuah pawh.."

"Sawi tawh lo zawk mai teh, i ṭahbelh lutuk a, inṭhen sawi apiangin i ṭap zel a lawm" pum dawm meuhin ka lo nui a, "Min star ru tih a chiang reng, Roma bulah a cute min tih kha" Brenda chuan a ti leh hram a, "I cute a lawm, tunah pawh i cute ka la ti reng, Ruatkima ka lo hrilh ve ang" Bena'n a tih chuan an inchum awk awk a, "I lo sawi vaih ange, a thikthu a chhe si, a tel loin ka rawn kal theih miah loh hi" a ti zui a, an invau zui nasa khawp mai.

Dar 4 rik dawnah min va thlah a, ani pawh a haw tlangin ka hria. Zanriah hi kan ei hma ṭhin a, kan haw tlai deuh chang hi chuan chaw kan inlaksak mai zel a, Nanai chhuak a lo haw tlai avangin ka lo laksak a, a lawm ve khawp mai. Lehkha tlem ka chhiar ang ti a ka inbuatsaih mawlh mawlh laiin Nu Remi'n min lo phone ve teh nawlh a, kan inbiak lohna pawh a rei leh viau tawh, a duh hunah te hian min lo be tluk tluk a, a chang hian a reh leh vang vang ṭhin.

"Rinbawih, i dam ṭha em, tunlai i tluang zel maw?" a ti ha ha a, thil thar nei hlim ang maiin a phur hmel a, kuhva ṭhial chungin min lo bia tih ka hre mai.

"Dam ve zel e, i va induh ve" ka tih chuan, "Awi, tunlai chu ka buai em a lawm, puantah tur ka ngah deuh a, ka awl hman lo reng reng" a rawn ti lang lang a, "Min tahsak ve hman dawn tawh em?" ka tih chuan "Ka tah lai zawhah hian ka lo ti ang" a ti ve ta hram a, ka hauhna a rei viau tawh.

"Ka lo biak chhan tak che chu i pa chungchang a nia" a rawn tih takah chuan ka ṭhu mar at a, "Engthil nge?" ka ti phawk hru a.

"Eng lo, vengchhak lam a mi nen khian kan suihrem mai dawn nge mawni kan lo tia" phur hmel fahrana a tih chuan ka lo ner nak a, ka sawi peih lo zawng tak a ni.

"Teh daih chuan, aman a duh ngawt em ni?" lawm vak lo a ka tih laiin, "Hei i Pa Muana'n a sawipui zauh a, 'Kan la ngaihtuah ang chu' a tia, a aw chiah lo nain a hnial lo niin kan hria a, a hmeichhe lam te chu hmin sa ah kan ngai a, kan lo phur viau mai asin" a sawi laichuan ka lo chek tlat tlat, engtin nge an lo phur viau theih le, ka nu boruak pawh a la rehfel hma hmain.

"Inti mak e Nu Rem, ka nu pawh tih laiin, kan mualpho nawn leh ringawt ang, ka Pa'n a duh viau te anih loh chuan engmah lo sawipui rih lo teh u, a la hma mah mah bawk a, aman duhzawng te pawh a nei ang chu, sawipui vel kha chu ka duh ve lo" ka ti deuh duah a. "Aa..hmanhmawhte chu ngai lo e, an inngaizawng ve phawt ang chu" a rawn tih leh pawh chuan ka chhang ṭha peih meuh tawh lo, ka Pa chu damchhunga mal reng tur chuan ka duh bik lo a; mahse, tun dinhmunah hi chuan kan la inpeih lo a ni. Nupui a nei anih chuan kan inkarah a nupui a awm dawn a, kei chu ka hla sawt dawnin ka hria, ka Putea ṭawngkam ka hriat hnu phei kha chuan ka pa nena kan inkar a hlat hi ka hlau ngawih ngawih.

"Engmah lo sawipui rih suh u, in nawr vel ange, a tih chi miah loh ang, ka lawm dawn lo ania" tia ka chah mawlh mawlh hnuah phone ka dah a, ka pa chu ka han call nghal bawk a, a lo chhang rang khawp mai.

"Lehkha i zir ka ring a, i zir nange?" 

"Zir rih lo"

"Eng nge i tih mek a?" a aw chu a dam thluam reng.

"Pa, Nu Remi nen kan inbia a, nupui neih i duh tawh em ni?" ka ti khawl, ka pehhel buai peih lo a ni.

"A khai, i nu Remi ṭhin hi aw, mibulah te khan a sawi leh vak ang ka ti" a ti bul bul a, ka lawm lo zual telh telh.

"Nu Sangtei kha a ni em, vengchhak a mi a rawn tia, i pa nen suihrem tawh mai ang te a rawn tia"

"I nu Remite nupa khian mi tihpui ve deuh em mawni" a ti leh chuan ka ṭhinrim deuh thut.

"I duh reng reng em ni?" ka ti pawr hlur a, ani lah chuan "Duha duh loh pawh ka hre hleinem, an sawi ve fo a, min duh ngawt dawn em mawni?" a tia, a nui deuhin ka hria.

"I duh ve tho chu a ang, tinge i sawi ṭhat duh loh a, nupui atan i duh em ni?" ka tih leh chuan a pha ta bik lo a, "A fel viau a lawm, engmah boruak a awm hran lo a, keini angte min duh anih chuan kan hnar phal kher lo maithei a ni" a tih takah chuan a chiang viau mai.

"Ka nu nen in inṭhenna a la rei lo si, a zahthlak dawn e..." ka ti tham ṭiak a, insum chu ka tum ve nasa a, ka insum hleithei meuh lo.

"Aa...kuminah te chuan a tih chi nang le" a tih pawh chuan rilru a dam lo khawp a, "Nupui i neih hmain pasal ka nei ang, nuhrawn hrawn ka peih lo, nakumah pasal ka nei anga, ka neih hnuah i nei ve dawn nia" titau bar bar chunga ka ti chu a hrethiam lo aniang a rawn nui hawk hawk a, kei erawh ka ṭah a chhuak hluah hluah.

"Pasal i neih hma chu ka nei lo mai aniang chu, ṭha deuh khan han zir phawt mai la, pasal neih te chu a hmanhmawhthlak hleinem" tiin a Ar chungchang a rawn sawi zui mawlh mawlh a, "I lo haw huna talh tur chu a no ka la leh hman ang, kan vulh lai hi an lian deuh tawh a, Christmas ruai atan lo vulh ṭeuh rawh min ti hlawm a, ka la tam deuh tawh ang" a ti zui luam a, han haw a, han puih ve pawh ka chak khawp mai, a chinchin pawh ka ngaihven deuh a ngai dawnin ka hria.

Ni Pawli te inneih hun a hnai telh telh a, Benja nen pawh kan inhmu hman meuh lo, a Ni nen a inpui lamah an awm phei a, college pawh a rawn kal zui ta miah lo a, amah phei chuan "Ka bang dawn lo, ka lo kal leh dawn" a ti tak naa, a kal lo rei tawh si a, a hming pawh an thai chhe tawh hialin ka ring.

Zankhat chu Roma nen Hostel bulah an lo kal a, dar 11 velah a ni. Nanai nen kan va chhuah chuan kawngpui panthlakna step-ah khan an lo ṭhu a, mei an lo zu hlat hlat bawk. "In va tlai ve, zan a rei tawh a sin" ka tih chuan ṭhutna min lo kawhhmuh vat a, a bulah ka ṭhut laiin Nanai chu kan hnungah a ṭhu a, thlang lamah Roma a chhuk thung.

"In Hostel chu thlasikah a vawt dawn hle mai" tiin van lam a thlir vang vang a, "Nia, nipui laiin a dai nuam thunga" tiin van lam chu ka han thlir ve a, arsi an pe un a, boruak a daiin a thiang nuam hle bawk.

"Kar lehah maw i Ni te chu an inneih dawn?" ka zawhna chu chhang loin "Ka bang dawn anih hmel, picnic spot ka siam zawhah i ṭhiante nen kan picnic dawn nia" a ti zawi sup a, min ti hrilhhai khawp mai.

"An phal tawh e law?" ka ti deuh hu a, a lo bu nghat nghat.

"A hmun tur kan zuk en a, Patea'n min tihpui ang; mahse, in luah hran chu an phal hmel loh" a ti zui a, engtin emaw taka an chelh kha ka rin dan a ni sa a, ka khawngaih khawp mai, chutih rualin a duh ber tih an phalsak ta erawh ka lawmpui viau thung.

"I rangkachak khur kha engtin nge ni ta?" ka tih chuan, "Min zawt lo teh" a ti bawl mai a, "Tinge?" tiin ka zawt leh hram a.

"Nupui ka neih hunah an ti" phawk fein ka melh a, step nghengin van lam a thlir vang vang a, "Nupui i neih hunah maw, an duhzawng i neih chuan an ti zawk ang a?" ti a ka zawhna chu min chhang lem lo.

"Tlangval chu a rilru a hmin mai..." ka sawi zawh hma hma chuan, "Tlangval chuan nupui neih a tum lo, a duhzawng tak chauh a nei ang?" tiin min melh ran a, "Engtikah?" zawi tea ka tih chuan, "Ka hre lo" a ti hul hak a, bei a dawng lek lek tawh.

"Kei chu min ngaihtuah suh" ka tih laichuan min ngaihtuah se ka ti ngawih ngawih a, ka phutzia erawh ka ti lang ngam lo.

"Lo buai phah lo la, nakumah ka tih kha, chumi hma chu hrehawm kan tawrh rih a ngai, in luah hrang lo mahila ram lamah ka awm daih dawn a, ka lo hruai zeuh zeuh thei ang che" tiin min han ṭawng thlamuan ve bawk a, beisei erawh chaurau tak a ni.

"Inneihna ah chuan Rosalyni a lo kal ve dawn em?"

"Ka hre lo, ka ngaihven lem lo a"

"A lo kal ka ring"

"Kan inkawm ngai lo a nia, ṭhian pawh kan ni lo" 

"I nupui tura an duh ania lawm, chu bak bak" ka darah min rawn kuah salh a, "Chu bak a la awm a lawm, ka duh lo a, nangmah ka duh che a" tiin min nuih var var a, ka nuih tawi khawp mai.

"Min duh ringawt mahla tih theih i nei tlem e, nakin lawkah engthil emawin an thlem leh tho ang che" lungawi lo tih hriat takin a kut chu ka pawt thla a, step chu nghengin chunglam ka han thlir vang vang a, "A van mawi tak" a hriat tur tawk lek chuan ka ti a, min chhang lo chuan ka darah a lu rawn nghat a, ka kut a hum vang vang bawk.

"Mei alh hlawm mai mai an nih khi" a tih chuan ka ṭah a chhuak hlur mai, "Mei alh hlawm pawh nise a mawi a lawm" ka ti leh hram a, arsi chungchang ka sawi lo tih chu a hrethiam pawhin ka ring lo, engkim hi beisei loh dan hlir a ni, ka hma thlirte, ka duhthusamte, tum lawk leh ruahmanna ka lo neih ve te pawh khing arsi te ang chauh khi an ni.

Nanai'n "Rei lo ang ila" a rawn tih chuan "A la hma a lawm" Bena'n a lo ti mai a, a hmanhmawh lem lo aniang,  luhsan chu ka hreh viau nain Nanai mitmei ka veng ve deuh a, "Haw tawh mai ru, a tlai tawh lutuk hei" tiin kan thlanga Roma ṭhu chu ka ko zui a, a lo chho ve mai bawk.

"A lo kal dawn a mi?" Roma lo chhoin a rawn tih chuan hrethiam lo zetin ka melh a, "Aih" Bena'n a lo ti chu ka hrethiam lo zual.

"Engati leh si nge?" Roma bawk a ni.

"Engmah a ni lo, hruai chhuah che kan lo tum deuh a" Bena'n a tih chuan, "Kan ru dawn emaw ka tia" Roma'n a lo ti zauh a, Benja chu a nui var var ringawt.

"Ka ngai che a, Roma ka rawn tihder a lawm" a tih chuan ka han melhrum deuh a; mahse, Nanai'n min nghak ve reng a, khawmuan reng chi pawh a ni lo. Gate bulah kan inzui cho a, "Kal hmasa rawh u" ka tih chuan an hreh ve tlat. Gate chhung kan luh hnua gate ka kalh tur chu ka kut a rawn vuan chawt a, "Ka hmangaih che" hmui phun hian a rawn ti a, a thilsawi chu ka lo thlahlel viau aniang engtin emaw tak hian min fan a, suangtuahna beidawng kun tlawk tlawk tawh tura ka ngaihkha a rawn chawk tho leh a ni ber, kan inhmangaih a, chu chu kan pahnih tan a tawk a ni tiin ka inhrilh ru mawlh mawlh a, eng ang thlemna pawh ka do pui anga, kan inkarah engmah ka thlen tir lo ang tiin rilru ka siam sauh sauh bawk.

Muthmuna kan inbiak chuan Monday zana chhuah puiah min lo sawm a, man inhlan ni anih vangin an chhungte an tam dawn a, chhun lamah min sawm loa zan lama min sawm chu pawi tihna ka nei hran lo. Ka nu Hlimi te nufa pawh an kal ve ngeiin ka ring a, va inlan loh chu ka tan a fuh zawk bawk ang.

Pathianni zanah Brendai'n min rawn bia a, "Tinge i lo kal ve loh a, Bena'n a sawm che em, inneih ni ah i lo kal dawn em?" tih angreng chu min lo zawt a, "Monday zanah ka lo hruai ang che a nia, khawiah emaw kan chhuak dawn aniang, inneih ni chu class kan chawl lo a, ka kal ka ring lo" zangkhai thei ang berin ka ti a, min sawm thei dinhmunah a ding lo em a, keipawn ka phut bik lo.

"Monday chu i class banah min lo hrilh la, ka rualin i kal dawn nia" a tih chuan "Zanah a ni lawm ni?" ka lo ti vat a, "Man hlan ni a nia, chaw kan ei nghal dawn a lawm" a rawn tih chuan rilru a buai nak, ka kalna chi niin ka hre lo, lawm ka hlawh dawn lo tih pawh ka chiang.

"I va kal ṭhin em ni, ka chungchang sawi an nei mial em?" tiin Brenda chu ka zawt let ve a, "An sawi awm ka hre miah lo; mahse, an duh vak lo che tih chu ka hria a, Rosalyni vang pawh a ni lo maithei, Ni Pawli'n Roma bula a sawi dan chuan a nu i hmuhpui ṭhin kha a haw viau a niang, chuti ni lo sela chuan Ni Pawli hi chuan midang hi a thlawp vak ngai lo a, i lo va kal ve kha a pawi ber a nih kha, Bena pawh kan lo hrilh a, hruai tawh lo tur chein kan ti hlawm a" tiin a thil hriat ang ang a rawn sawi a, Ni Pawli ṭawngkam ka hriat nen pawh a in rem viau mai. Monday zan pawh chu ka ṭhulh leh mai dawn em mawni ka ti rum rum a, ka ngai ve bawk nen lo kal sela chu ka duh ru viau thung a, kan pahnih chauha chhuah dun a nia ka chak zawk ni. 

Mahse, ka beisei loh deuhin College-ah Benja a lo kal a, Lunch break-ah min lo hruaiin Roma te inah kan inphur phei vang vang a, Lza bakah Brendai leh a bialpa pawh an lo awm nghe nghe. Beer leh vodka nen an lo ri laih laih a, ka thlen rualin min lo thlitsak zung zung bawk. Benja chuan a in mai a, kei erawh chuan lem khatte pawh ka lem lo, chakna ka nei lo a, zep loah chuan ka ngam lo a ni ber, rilruah ni Pawli ṭawngkam kha a cham ve reng a, pawi ka ti thar leh ṭhin.

"Tlem tal in ve rawh Rinte, beer te chu a rim a na hleinem" ṭhianten an tih pawh chuan ka hnar ve zel a, Benja thung chuan vawikhatte mah min hnawn lui lo, "I in tur ka lo lak ang che" tiin a tho nulh a, rei lo teah choka aṭangin Sprite bur lian deuh hi a lo keng chhuak a, noah min thlit sakin khat pup hian min rawn pe a, nui chungin mit min siai zauh mai.

"I rui viau a nge maw, a hun lo ania" ka ti chu a ngaipawimawh lem lo aniang a in tlek tlek reng a, a hnu deuhah phei chuan a ding ngil hleithei tawh lo. Roma leh Ruatkima erawh an insum ve aniang rui khawpin an in lo a, Brenda erawh a ṭawng duh sawt viau a, chutih laiin Lza a nawi em em thung.

Dar 3 rik dawnah chuan "Phei ang u, chaw ei a hun" an ti ta mai a, "Hostel-ah min dah phawt rawh u" ka lo ti chu min hnial vek. "I lo kal ve ang chu, inthlahrun a ngai lo, Rosai ber pawh a inthlahrung hleinem, nimin aṭangin a chet pui char char tawh a lawm, mark tih ṭhat ve i ngai"Brenda chuan a ti zung zung a, "Min sawm ve hleinem" ka tih laiin "Keiman ka sawm che" Bena'n a lo ti ve zat bawk.

Ka duh lo chung chu min phur phei lui a, a pu te gate-a kan luh laite chuan an hnungah ka tawi leh hrat hrat ṭhin. Mi an tam bawk a, tumah chuan min en zui lem lo a, a chhungte hmel ka la hmu miah lo bawk. "Inchung zawlah lo han awm ang u, chaw ei an ka siam chuang lo" Brendain a tih vangin kailawn lam kan pan a, thui pawh kan kal hmain Joshua kan tawk hlawk a, "Khawiah nge in kal bo daih a, buai lai laiin" tih leh min kal pelh a rual a, an en zui ṭhup a, Benja ṭhiante pawh chuan an ngaina lo viau aniang an ner nung hlawm mai.

An inchung zawl chu pangpar huan nimai awma mawi a ni, hawina lam apiangah a vul chuk mai a, hmuhnawm tham a tling. Kawtzawl lam kan zuk hawi thlak chuan kawr var ha mi sawm bawr vel hian bel leh thleng vel an lo hungrem mek a, chaw ei an siam mek anih hmel. Kawtah chuan naupang an awm laih laih a, mipa naupang pakhat pawm chunga Benja pu lo chhuak pawh ka zuk hmu nghe nghe.

"I phone a rik kha" Roman a tih chuan Benja chu a indap rak rak a, "Min zawng anih dawn hi" tih pahin a chhang zui a, a Ni a nih hmel. "Ṭhiante nen inchungah kan awm, midang khan dawh phawt sela kan lo chhuk ang" a ti liam puat a, a Ni chuan eng nge a lo sawi ni "Scooty a nei reng a ni lawm ni, ka hruai peih teuh lo mai, ṭhiante awm lai laiin" a ti hluk hluk a, "Midang kha tir mai rawh" tiin Phone a dah hmiah bawk.

"Eng nge a?" kan lo tih chuan, "Rosalyni duty zo va lam turin min tia, amah pawn a lo kal thei reng ang" a ti mai a, tunah zet chuan a Ni pawn a tihpui ṭan der tawh, keilah chu sawm lohin ka kal ve ngawt a, min hmu anih chuan a lawm lo khawp ang. "A nuam lo e, haw leh mai ka duh" Brenda bula ka tih chuan, "Ti khan ti zel suh, an thuawih ve ringawt tur i ni hleinem, an fapa chungah bak thuneihna an nei lo, luhlul ve tlat ta che" a lo ti pung pung a, awm a nawm phah chuang lo, haw ruk daih te ania ka ngaihtuah ni.

Rilru buai zeta ka inngaihtuah laichuan Benjamina min lo pawt hrang a, "Nuam lo ti suh aw, ṭhenhran theih emaw min ti a, kan ni lo tih an la hre lo va, zam duh miah suh, ka bulah zel awm la, engmah an sawi ngam lo ang" a ti zung zung a, "Min hruai lui lo la a ṭha zawk daih, min haw zual mai mai ang" ka tih pawh chuan, "Tuman an haw lo che, Nurse kha min sawipui an tum mai mai a lawm, an huat thu che an sawi hleinem" a ti ve tlat a, a Ni ṭawng ka hriat ruk kha engmah ka hrilh lo a, zep kan nei ve ve a, kan inhrilh duh lo ve ve bawk.

A phone a rawn rik leh chuan a ṭhiante a ko a, "Zuk ei vat ila, kan chhuak leh daih dawn nia" a tih chuan phur lo zetin ka zui ve a, an kai hlawm bawk nen an titi thla bawrh bawrh a, kei erawh ka ngawi reng.

Inhnuai kan thleng chiah chu min tawk zawng takin a Patea a lo kal a, min rawn hmu chiang khawp ang. "Man hlannaah tinge in awm loh" tiin Benja chu a rawn bia e, "E, an lo inhlan a ni maw?" Bena'n a tih chuan a melh rum khawp a. Chutah, ka lam a lo hawi a, "Chaw va ei rawh u" a ti zui a, keimah chu min bia nge pawh ka hre lo, Bena a en dan ang kha chuan min en lo a, ka awm a nuam deuh huai mai.

Pawna ka chhuak tur chu "Bena, chaw ei vat ula, bungraw zawn chhoh tur a awm nual ania, Roma te pawh lo la haw suh u" hnunglam aṭangin a rawn ti lang lang a, Ni Pawli aw ngei a ni. Rei loteah kan bul a lo thleng chawpchilh a, "Rinte, chaw va ei zung zung rawh u, khawiah mah lo kal bo lo ula" tiin midang pawh chu a melh kual a, ka hming a rawn lam rik rual kal a lo ṭang ru ṭeuh a; mahse, ka beisei ang em chu a thleng lo, min haw lo emaw tih mai tur a ni, ka lawmzia chu aw....hetianga min lo biak hi ka ring miah lo a, ṭah te pawh a chhuak rum rum zawk.

Chaw dawh nghal mai tuma kan kal chu ka pen tawp chawt a, Nu Hlimi chaw dawh lai ka va hmuh vang a ni. Rang deuhin Benja hnungah ka ding a, a lo hrethiam a niang in sir lamah min phei puiin kan han ding khawmuang leh te te a, chutih laichuan ka beisei loh deuh thil a rawn sawi a, "I Nu sawn ka Ni bulah zu in ṭhin angin a sawi che a, i room-ah a rukin i lo in nasa hle angin a sawi" a ti ta mai a, ka lo beisei loh dan lutuk a ni.

"Engtin nge i hriat?" ka tih chuan, "Ka Ni in min zel a lawm, engtin nge chutianga a puh theih che le?" a ti ve vang vang a, chawdawhna bula Nu Hlimi nui hak hak chu kan melh ve ve bawk. Rin dan chu ka nei a, ka chiang ngam chiah lo, ka chhuah dawna vodka um khat ka theihnghilh kha Unaunu khan a nu a lo hrilh a ni thei ang em, nge ni a a rinthu mai maiin min lo puh chhe zawk ni ang?

In chhunga Nu Hlimi a luh hnuah kan va dawh ve chauh a, kan dawh zawh chuan inchhungah pawh lut ve loin inhnung lam kan pan a, an panpar huan bulah kan la kil khawm a, chaw ei a tui lem lo khawp mai, Brenda pawh chuan a eitui vak lo aniang tlemte chauh a bar a, a kham hnuah "Min zun pui lawk teh" tiin min sawm zui a, nu Hlimi hmuh leh hlau zetin ka zui lut bawk.

Kan va luh chuan sitting room-ah an lo eikhawm laih laih a, hmanhmawh lutukin choka lam kan pan thung a, mi an tam em a, min hmu kherin ka ring lo. Mahse, choka bathroom a lo awl lo a, an awmpui nula khan inchunglam min lo kawhhmuh a, biru chung bawkin Brenda chu ka zui chho leh a, kan han luhna chu tu room ber emaw chu a ni ang, King size khum a lo inhung a, nupa pindan erawh a ang lo viau lawi a, mikhuak pindan a ni maithei. 

Brendai zung nghah pahin bathlar lamah ka va chhuak a, ka dinna aṭang chuan thlang lama Bena te ṭhianho ṭhu khawm chu a hmuh theih a, an ti ti a, an nui hawk hawk hlawm a, an ṭawng ri erawh a hriat chian theih loh. Chutia ka en dauh dauh laichuan thawm ka hria a, kawngkhar a rawn inhawng ruai ruai bawk a, bathlar aṭanga ka va thlek laichuan Joshua u, ni Pawli clinic-a thawk ve ṭhin kha a rawn lang hlawl a, a pindan a lo nih hmel e. Va pan mai ka tum chu ka ding leh rih a, a chhan pawh hlauh nei ang maia kawngkhar pawnlam a bih vang a ni.

Ka en reng laichuan pawn lam aṭangin kawngkhar chu an rawn pawt a, "I va muang ve" nulain a tih ri chu ka hre pha. Chutah, mipa pakhat hi a rawn lut veleh hlawl a, an pahnih chuan kawngkhar nghengin an infawp nghal mawlh mawlh a, ka dinna a hlat deuh avangin a mipa hmel chu ka hmu chiang thei lo, nula zawk chuan min hliah reng reng bawk a, ka hmuh hnu erawh a ang viau mai.

Mipa zawk chuan nula mawng chu a han ṭham salh a, a indap tawn vel niin ka hria, thawm an dim khawp mai a, va inlan ngam chi a ni lo reng reng. Min lo hmuh hlauin puanzar phenah ka ding a, an thawm chu ka ngaichang reng bawk. Brendai lah chu a awm rei zek a, a inthiar nghal nge mawni, a lo chhuak thut anga, an inphawk ka hlau bawk si, message ka thawn mai dawn em mawni?

An thawm a reh deuha ka hriat vang chuan ka va thlek dek dek a, ka pil leh rang khawp mai. Ngawi teh, mipa kha...

Ka thlek leh ngat a, ka thil hmuh vang chuan ka ip chawih thei.. 

Benja Patea kha a ni, karei leh...nichin mai khan kan hmu a, a kawr a thlak vangin ka lo hre mai thei lo zawk a ni. Mahse, pafa an ni lawm ni, Joshua patea anih chuan saw nula tan pawh sawn a patea ve tho a ni..khai aw...?!

Brendain tui a herh haw aniang an rawn hawi phawk hru a, kei ka pil vat bawk. "Tunge awm a?" mipain a tih ri chiah ka hria a, khawngkhar inhawng ri ka hriat chu Bathroom lam zawk a ni mai thei, ka inlan duh mai lo a, thawk ka ip ngar ngar bawk.

"Rinte.." a rawn tih rual chuan ka thaw huai huai ringawt. Rang deuhin ka dinna aṭang chuan ka chhuak a, "Ka hman ania, i zung ve duh em" ka lam hawia a lo tih chuan ka chhang lo, kawngkhar lam ka melh daih a, Brendai lo chhuah hmain an chhuak hman a nih hmel.

"Eng nge a?" a tih chuan, "Thawm i hria em?" ka'n ti ngawt a, a hmel aṭang chuan a hre lo tih a chiang reng.

"Tinge, phone i hmang a mi?" a ti heu a, lu ka thing ringawt.

"Chhuak vat ang, haw hma ka duh" tiin a banah ka pawt dat dat a, "Ka lu a hai lutuk, kal chak vak suh" a ti chung pawh chu ka kal pui hlawk hlawk tho a, chhuah vat ka duh, helai hmun hi ka ṭih riau a ni, haw nal nal a, kal leh tawh miah loh ka duh.

Step awmna kan thleng ṭep tih ah chuan vei lam sir aṭangin aw kan hre thut a, "Nangni kha" mipa awin a rawn tih rual chuan ka ding chawt mai. A lam ka hawi rualin Benja Patea nen kan inhmachhawn ran mai a, keimah ngawt chu min enin ka hria.

"Eng nge in tih a?" a tih chuan "Kan zung lawk" Brendain a lo ti vat a, kei chu ka ṭawng ve lo. Mahse, Bena Patea chan min enchik khawp mai a, min ringhlel hmel a pu bawk.

"In pahnihin maw?" bul fea a tih leh chuan Brendai bawkin a chhang a, "Keimah chiah, tinge?" tiin a nuih deuh var var a, kan hmaa ding pawh chu a insiamṭha ve vat a, tawi tea min nuih pahin "Engmah ni lo e, mikhual thleng an awm a, inhnuai bathroom in hmang tawh dawn nia" a ti a, a awki pawh a dam deuh tawh. 

"E..aw le, kan kal laiin a lo awl lo a, chuvang mawle" Brendain a tih pawh chuan a bu ve mai a, keiin Brenda chu ka lo pawt sawk sawk a, Step lam ka pan zui bawk. Ka thinphu chu a han rang khawp a, a ri deuh dawt dawt mai, engvanga hlau em em nge ka nih pawh ka hre lo, min zawh laia min endan vang kha a niang.

Pawn kan thlen chuan thaw a veng huai ti ila a dik ang, "I va hah awm ve?" Brenda chuan a lo ti vat a, "Ka lungphu hi a rang dawt dawt mai" tiin ka awm ka han dawm vang vang a, "Tinge, Panic attack i nei leh tawh em ni?" a tih chuan phawk fein ka melh.

"Benjamina'n min hrilh hlawm a lawm, 'Rintein Anxiety a nei a, panic attack te a nei ṭhin a, tuman a rilru lo ti hrehawm suh u, ṭawng thlamuan deuh reng a ngai' a tia, a chhungte leh Rosai chungchang phei chu i bula sawi a phal hleinem" a lo ti reuh a, a lo hriat pawh ka rin tawh loh laiin. "Chutia law" ka ti zawi sep a, a ṭha lam chu a ni hauh lo nain ka lawm ve takzet, min ngaihtuah rukzia ka hre tlat a ni.

"Kan duat rawn suau suau che a nih hi, kan ṭhianho a kan awm lai phei chuan Darlingi tih hlirin kan sawi ṭhin che" ka banah a rawn vuan a, phur fein min kalpui a, inhnung kan va thlen chuan "In report ila, kal ang u" a'n ti zui a, khawiah emaw kal ho leh an tum aniang.

"Naktuk i chawl thei angem?" Bena'n a lo tih chuan, "Aih, class kal ka ngai, nu Hlimin min hmuh hma a haw ka duh ania" ka lo ti zung zung a, "Tirhkoha a awm tho a lawm, kal daih ang u" midangin an lo ti ve bawk.

"Ka Ni kha kan hrilh ve loh chuan" Bena'n a tih vangin kawt zawl lamah kan inzui phei a. Mahse, a pi zawk kan va hmu a, "Bawiha, i puin a zawn a zawn che kha, inchhungah a awm, va kal rawh" a lo ti a, keini pawh lut turin min sawm a, kan zui duh lem lo.

Benja lut chu a rei angreng khawp a, minute 10 dawn hnuah a Ni nen an lo inzui chhuak a, an landanah chuan an inhau niawm tak a ni. "Va kal lawk la, i lo let leh vat mai dawn a lawm, mi zingah i pu hnial vak vak zel suh" a Ni in a rawn ti phei hlak hlak a, ka lam rawn panin "Rinte, inchhungah lo nghak rawh u, Bena hi a puin a tir lawk a" a tih chuan an tirhna awm chu rindan ka nei. "Rosalyni a niang" Brenda chuan a lo ti ve hlak a, mipa ho pawh an tum deuh bur hlawm.

"Va kal rawh, kan lo nghak ang che" ti a Bena ka hrilh chuan, "Inchungah lo han chho ula, ka rei lo ang" phur loh hmel fein a ti a, ni Pawli erawh a nui var var thung a, keini ṭhian ho chu "Ice cream te va ei rawh u, desert dang pawh a awm kha" tih pahin min hui a, midangin an zui laiin Benja kal tur chu ka thlir vang vang a, ka khawngaih reuh tak tak a ni.

A thang chhungin inchung zawlah kan lo awm a, a rei lem lo, a lo thlen chuan "Khawnge?" kan lo ti hlawm a, "Tar ho bulah" a ti mai a, a hnu lawkah a Ni in lo phone-in 'Inleng haw hma chu lo kal bo suh u" a rawn ti leh a, keipawh Nu Hlimi haw hma chu ka chhuk ngam tawh bik lo. Thim thlengin inchung zawlah kan ṭhu ho a, mipa hoin games an khel a, Brendai nen kan lo ti ti ve thung a, an school kal ho lai chanchin te sawiin kan nui kan nui mai.

Inhnuaia kan chhuk chuan dar 8 a ri dawn thuak tawh, inleng an lo haw diak tawh a, awm erawh an la awm nual tho. Benja pu in min lo hmuh chuan, "I Pu Dailoa te hi va thlah leh lawk ta che" tiin Benja chu a lo hrilh a, kan la kal thei lo cheu mai. Keini ho chu Ni Pawlin ṭhu rih turin min ti tlat hlawm a, mipa ho chu an nam deuh huam bawk si a, an inthlahrung ve aniang a ngawi ran hlawm a, keiphei chu ka hawi chhuak ṭha ngam mang lo.

A puin Bena car chahbi a pek laichuan choka aṭangin Rosalyni a lo phei a, Joshua u nen an ni. "Patean a thlah dawn che u, ka lo kal ve ang" Joshua u chuan a ti zat zat a, chutih laia "Benan a thlah dawn" lo ti tu chu Ni Mary a ni. Putar pahnih te chu an inmangṭha laichuan Benja chu a chhuak nal nal a, Rosalynin a umzui thuai bawk.

An kal liam hnu chuan thei an vel a, an eikhawm laih laih a, Brendai tih loh chuan kan ban ve lo, an ti ti karah kan inmelh hrek hrek a, mipa ho chu an inhup ṭat ṭat reng bawk. Joshua u kha ka lo enchik deuh a, a Patea a melh ṭhin dan mawlh chu, mikhual pindana thil thleng ka lo hmu tawh bawk nen a Patea a han biak dan te chu ka ten zawng tak a ni. Kawr lei a ngen a, a nu lah chuan a lo sawipui hlut a, a Patea erawh a inti mitak deuh tlat a, an monu zawkin "Kan lei dawn nia, i duh lo va thlang la" tiin a lo chhang a, a pasal leh nula inkar chu a hre ve lo a ni ngat mai, a fel hmel viau lehnghal a.

"Rinte, chaw te in eipuar hlawm maw" ni Pawlin a rawn ti chuan ka lo aw rang khawp a, ka lam an lo hawi vangin hnuai a bih zal zal bawk. Mikhual te an awm ve avangin min ngaihsak vak lo zawk a, tuman min be zui lo chu lawm tak a ni. Mahse, ka han hawi chhuak leh chu Benja Patea khan min lo melh reng a, ka hawisawn hnuah pawh min la enrengin ka hria, ka tirilah min ṭham nasa khawp a, ka ep chiahah a ṭhu vei nen melh fuh lo turin ka hawi kual sek reng.

Kan ṭhiante pawn an ning ve ta deuh aniang pawna lo nghah an rawt a, kan chhuak tur chu ni Pawli'n min lo zui vat a, "Naktukah lo inkhawm ngei ngei ang che u aw, Benjamina  hi lo thlahthlam lo bawk ula, fel deuha in awm chuan thil te te ka tihsak ang che u" tiin Benja ṭhiante chu a thlah hlawm a, a lut leh thuai bawk. 

Veranda ah dingin kan rei dawn chu kan nghak a, Lza rui chu a muthlu lek lek ṭhinin ka hria, Roma leh Ruatkiman tih harh an tuma, "Tui va suak teh u" an tih vangin Brendai nen kan inzui leh rih. Brenda chu kal hmasa zawkah a ṭanga, kan chhuak leh lam kawngka kan thleng ṭep tih Bena Patea kha a lo phei a, ka hnungah a rawn kalin ka hria. Hman hmawh deuha ka kal chu "Rinte" a rawn tih vang chuan ka ding dat a, ka lehhawi rualin ka bul a lo thleng chawpchilh a, Brenda erawh a chhuak tawh thung.

"Mikhual pindanah khan ka hmu che" a ti khawl mai a, min ti hrilhhai khawp mai. 

"Brenda nen.." ka tih laiin "Bathlara ding kha i ni tih ka hria ania" a ti leh ta nghal a, ka ni lo pawh ti ila a awih lo ang, a mitmengah pawh a chiang tih a hriat viau a ni.

Ka chhan leh hma chuan "Ngawi hmak ang che, sawi i nei hlek anih chuan ka dim dawn hauh lo che a nia, midangin an hria anih chuan ka ringhlel nghal bawk ang che, i hrethiam em" a ti chang leh bawl a, chhan pawh ka chhang ngam lo.

"I hrethiam em ka tih chu, engah nge i ngawih reng?"

"Aw, engmah ka sawi lo ang"

"Rin i va har ve, Bena i lo hrilh hman em?" 

"Aih, tumah ka hrilh lo" min en vang vang a, min ring ngam zan lo aniang a ner nung a, a chal a tichuar tap bawk.

Kalsan mai tuma ka inher chu, "La ding teh" a tih vang chuan a inher leh vat a, "Bena nen hian in inzui ngun riau mai, in awmdan hi a mawi lo tlat, a nu te i lo va hmuhpui lehnghal a, hetiang hi kan duh lo ania" a ti leh nghat nghat a, a sawi apiang lo aw chu a a ṭha ber rih ang tih ngaihdan ka nei a, kal vat ka duh vangin lu ka bu zung zung tawh.

"Pauline-in a sawi tawh em?" a tih leh chuan, "Aih, engmah a sawi lo" tiin thudik ka hrilh ve mai a, a lungawi lo zual ni maiin ka hria.

"Lo kal leh tawh suh aw" a ti tawl mai a, chhan dan a vang takzet, ka zakin hrehawm ka ti ngawih ngawih mai a ni, "Umm" ti paha ka inher chiah chu Benja nen kan intawk hlawl a, engtin laiin nge a lo thlen pawh ka hre lo, kan ṭawng a lo hria tih hriat takin a Patea chu a melhrum nghal hlur a, "Tu maw lo kal tawh lo tura i tih, i thu ber em ni?" a ti vin nghal khar khar a, a banah ka lo pawt chawt chawt a, kaih chhuah ka tum chu a ṭang tlat thung.

"Ka bialnu anih hi, i duh duh a i thunun tur a ni lo" a tih rualin "Min vin hlek suh" a Patean a lo ti ve hlur a, Benja chuan a duhtawk mai lo, "Ka nu chung chang pawh kha i sawi tur a awm lo, ka duh hun hunah ka hmu ang, lo buai ve vak duh suh" a ti leh ta zel a, hnaiteah indinchilhin an inmelhrum hle bawk.

"I va han zahpuiawm mai mai e, i duh leh an hnenah va awm daih ta che, kan dang hleinem che" a Patean a tih chuan, "Ka awm lo ang, in rilru hi ka hre ve vek, mi mawl angah chuan min ngai duh suh" a ti leh khar khar a, kut an inthlak hlauin Benja chu ka pawt chung chung tawh.

"Kal rawh, i duh duh danin va awm teh, kan ngaihsak hlek lo ang che" a Patean a tih leh laitakin ni Pawli a lo lang a, a rawn hawi phawk khawp mai. "Nanga ngaihsak ka ngai lo, ka thil tihah lo inrawlh tawh lo mai teh, i property ah ka inrawlh lo a, nangpawh lo inrawlh tawh suh" Benan a lo ti leh bawng bawng a, a ṭawng ring bawk a, ni Pawli pawh a rawn ter at mai.

"Lallawmtluang, i Patea anih kha, khatiang khan ṭawngkhum reng reng suh, i mak em em lutuk" a rawn ti bawrh bawrh a, "I hre lo anih kha Ni, ka pu bulah engtin nge min lo sawi zawt rawh, ka pa building te neih a lo tum anih kha, picnic spot siamna tur pawh a account ah dah a lo tum a, teh chai hian..." a nui deuh hawk a, Benja chuan ka hriatpui loh buaina a lo ngah viau anih hmel, tunah chuan a rui a, insum loin a ṭawng phawng phawng a; mahse, dawt engmah a sawi ka ring lo.

"Khatiang zawng khan rilru nei suh ka ti lo che em ni, pawisa i hum theih lohzia kan hriat vang a lawm hetianga kan tih, i kutah engmah dah chi hek lo, pek ang ang i hmang zo zel a, i kuta a awm te chuan i tlak ral leh thuai ang" lawm lo fea ni Pawlin a tih chuan "An lam i ṭan ka ring reng a" tiin Benja chuan a lo melh vang vang a, a rilru a nat hmel ngang mai. "Ṭan theihin awm hek lo che, midang i zah bawk si lo, hel rilru i pu reng ringawt a, inthubuai rem hi ka kham tawh lutuk, hei vang a lawm pasal neihsan che ka duh, hetiang chuan engtikah mah i puitling lovang" aw khur dar dar chunga ni Pawlin a ti chu za lo zeta nui thawmin a zui a, Benja a ni.

"Chuti chu in duh duh danin ti rawh u, in kei chu awm ve lo angah min ngai ula, haw pawh ka rawn haw tawh lo ang, ka ruang hlawm tur chauhin min rawn zawng tawh dawn nia" tih leh inher a rual a, ka banah rawn vuanin min kaichhuak dawr dawr a, kan thawm hre phaka awm ka ṭhiante pawh chu engmah hrilh an ngai lo, ngawirengin min lo zui hlawm a; mahse, gate kan thlen hmain a Puin a rawn au a.

"Mimawl, khawiah chuan nge maw kal i'n tum ni, lo haw rawh, heti mai maia min pal zawngin ka inhrethiam zel tawh lo ang" a rawn ti lung lung a, midang pawh an lo chhuak hlawm a, kan lam an lo hawi ṭhap bawk.

"A rui lungpuam mai mai anih saw ka pa, an leng ringawt dawn a lawm, a lo haw leh mai ang" ni Pawlin a tih ri chu kan hre pha.

"Lo va chhuak rawh u" Benja chuan a ti zawi sup a, tumah chuan kan kalsan duh bik lo. Muangchangin a chhungte awmna lamah chuan a phei a, veranda a thlen hma deuh chuan a ding a, an chhungte lam a melh ran bawk.

A ṭawng chu a ring lo hle a, a sawi erawh kan hrechiang viau a ni. "I bula awm tur hian min duh tak tak em?" tiin a pu chu  zawt a, "Lut rawh" tih ringawtin a pu chuan a chhang.

"Awm turin min ti ringawt suh u, awm ka duh chhan pawh i hriat reng kha, i thih hun ka nghakhlel viau maithei, keichuan ka thlahlel ve vak lo che ania, i hriat ve tho vang a ni lawm ni i inven, i rin ngam loh bula chen reng chu i peih em ni?" Benan a tih chuan, "Ka tupa chu i ni vei tak si a...engtia han enkawl tur che nge mawni, lu a i ti hai ṭhin em mai" a pu chuan a ti vang vang a.

"Kal rawh bawiha, leng rei lo la, ruih laiin buaina siam loh tur" a Piin a lo tih chuan, "Tuman min mamawh lo, awm rawh kal rawh in ti kual mai mai a ni" a aw chu a lawi khawp mai a, a rilru a na ngang aniang. Chuta a rawn inher chuan a mittui a hru zauh a, ka pan nghal teuh kher mai.

"Lo haw ang che" a Puin a tih leh laichuan ka lam a lo hawi a, "Rinte, sawng ho sawn ṭhen tur cheiin min ti a; mahse, kan inṭhen lo ang, an tel loin kan awm thei a, an pawisa pawh kan mamawh lo, kan la tlanbo daih dawn nia, an bula cheng turin ka duh chuang lo bawk che a, an chhungkua saw i lawina tlak an ni lo, engatan mah ti bik suh" a rawn ti lawng lawng a, a runluih tih chu hrethiam ve mahila pawi ka ti takzet, hnunglam ka hawi a, gate lam ka hlawk hlawk a, "Benjamin..." an tih ri ka hriat chuan min rawn zui tih ka hrethiam a, ka kal chak sauh sauh thung.

"Lo ding teh..." 

"Rinte..."

"Um rawh Bena, hrehawm a ti dawn lutuk" ka hnunglamah chuan thawm a ri nawk nawk a, keichu ka chiai ruai mai, ka tan kawng a ping fai veka, engtikah mah a chhungte rilru saw ka hneh ve tawh dawn lo tih ka hria, intihpaukhauh dan pawh ka thiam lo, Benja pawh hnem ngaihna ka hre chuang lo. Ka awm chu a rawn tawt up up a, thaw lak a sak ṭalh mai. 

"Rinte.." tih ri ka hriat leh ruala ka inher chiah chu ka min lo pawm chawt a, hamhaih hmelzetin min en bawk. "Tihpalh, nang tal chu hetiang hian awm lo teh" ka biangah a rawn dawm a, chutih laichuan ruah mal a rawn tla phuar phuar a, "Haw ang" tih bak chu sawi tur ka hre lo, tun dinhmunah chuan thawk lak ka mamawh a ni, ka fim lo takzet.

"I thinrim em ni, khatianga ka sawi kha a ngai a lawm, min tih dan hi ka kham lutuk tawh a, min hrethiam ta che" ngenngawl zetin min en a, "I ruih vak loh khaa.." ka ti zawi sep ringawt.

"Ka rui lo, ka fim lutuk, ka thilsawite kha chu ka duh reng vanga sawi a lawm ka nih" a ti a, min ring rawh tih melhin min melh bawk. Chutah, a kut lehlam chuan ka biang a rawn dawm leh a, "Ka hmangaih lutuk che" tiin min fawp vawng vawng a.

(End of chapter - 33)