BLUE BAYOU (CH - 34) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 34

Khami ni ṭanga khan vawikhatmah ka kal leh ta lo, Benja chu a ṭhiante nen kan tir haw thei hram a, Roma'n a va riapui nghe nghe. A tuk inneihnaah pawh min hruai turin a lo kal leh a, ka zui duh loh vangin a lungawi lo hle bawk. Inṭhen chungchang kan sawi lo a; mahse, kan inkar chu beisei a bo hlein ka hre ṭhin.

2nd internal zawh hnu lawkah ka Nu a lo zin a, an pa chhungte inah bawk an thlen vangin ka va leng phei a, damdawiinah ka kalpui thlap bawk. Ka Pa chungchang pawh kan sawi dun a, a nu chuan, "Nakin lawkah pasalte i la neihsan awm si a, nupui nei leh sela a ṭha ang, amah chauhin a awm reng a, damloh leh tihah pawh mahnia awm chu a fel lo a lawm, khi lamah i awm tak tak hmel si loh a, aman nupui neih a duh anih phawt chuan hnial lo la a ṭha zawkin ka hria, kan hnenah pawh i awm thei reng tho ania" tiin min hrilh luam a, kan rilru chu a in ang lo dun hle a ni. Ka nu rilru chu ka hrethiam viau tho a, ka pa'n nupui a nei anih chuan a mualphonate pawh a reh zui maiin ka ring a; mahse, chutiang lam ngaihtuah viau thei pawh ka ni lo, ka In tia ka sawi ve theih chhunah khan hmeichhe dangin thu an nei tawh dawn a, ka pa ngaihsakna ka dawn ṭhinte pawh min chuh ṭhen ngei dawn a, ka phal lo a ni.

Ni thum a cham hnuah ka nu chuan min letsan a, ka pa erawh chuan chanchin dang a nei zui lo, a phone call ka dawn hi chuan nupui neih a duh thu min hrilh hi ka hlau ṭhin khawp a, chuvang chuan ran chungchang a rawn sawi pawh hi ka lo phul pui ve hlut zel a, nu Remi te pawn an nawr zui lo aniang engmah a sawi tawh bik lo.

Benja chu ram lamah a awm chawt a, JCB lei lai a veng nitin ṭhin, a changin Roma leh Lza'n an pui zauh zauh a, kal ve turin min sawm ṭhin tak naa External exam hmachhawn tur ka nih vangin chawlh a rem tawh lo a, a lo haw chang erawh chuan a ṭhiante inah kan leng a, chawte pawh kan eikhawm fo mai. Buainate, harsatnate a han awm chiah hian inhmangaihna leh inthlakhlelhna hi a zual ṭhin niin ka hria, a hma zawng aiin kan nghet a, kan inhrethiam dun em em ṭhin.

Tlai khat chu ka nu Hlimi'n min lo phone ve hlawl a, "Phaiah i u a awm dawn a, lo thlah ve rawh, inrinniah tlai chaw einghal turin i lo kal dawn nia" a lo ti ve teh mial a, ka chhuah hnu khan ka la tlawh leh miah lo a, kan boruak siamṭhat ka duh ve tho bawk nen ka kal tur thu ka hrilh a, Unaunu chu Air hostess-ah a lo tling a ni awm e.

Inrinni chawhma a ka va kal chuan a ṭhiante nen an lo awm laih laih a, "I thawmhnaw i lo keng lo a ni, riak nghal la ka tia sin" a lo ti nghal var a, nu Hlimi'n "I thawmhnaw hak tir la a ni mai a lawm, i ken loh tur phei chu pe deuh vek rawh" a lo ti ve bawk a, min lo lawm thiam khawp mai.

A kal hun tur ka zawh chuan, "Kar leh lamah ka chhuk ang, training ka nei phawt dawn" a ti a, amah a nulianin a hmelṭha bawk a, a thawh awm tak pawh a ni, a inhmeh dawn khawpin ka hria.

Nu Hlimi eirel ka pui a, riak turin min sawm tlat si a, Hostel-a awm ka nih vangin rem lohna em em a awm lo a, ka hnial hreh ve reng reng bawk. Mahse, min sawm chhan deuh hi an neiin ka hria a, chutia unaunu han awm lo tur chu amah chauha awm a hreh a niang, "Rintei a awm a lawm, mamawh changin ka ko zel mai ang" nu Hlimi'n a ti a, "Awm phei mai la" Unaunuin  a lo ti zauh bawk.

Aw ka pawh lem lo a, mi an sawm ṭha ngam bik lo, mahnia ka awm hran theih chhung chu tihbuai tawh loh ka duh a, a chhan pawh rilruah eng emaw a cham tlat tawh a, tun hma anga inngainatna ang kha a awm tawh lo ti ila a dik ang, kan boruak ṭha erawh ka lawm viau a, chaw ka ei thu pawh ka Pa ka han hrilh ve nghe nghe.

Zanah chuan U Lizzy thawmhnaw kan chinfel pui a, a ṭhiante leh ka ta tur a dah hrang thlap thlap a, a ṭhiante chuan mi an vengthawng nge ni min thlan hmasaktir zel a, ka lak duh lem lohte pawh min pe nual mai. Dar 10 dawnah a ṭhiante chu an haw a, tv en pahin zan rei deuh thleng chu ka meng a, kan titi dun luam bawk.

Bialpa a nei em ka zawh chuan, "Nei ṭep" tiin min chhang a, a bialpa thar ka chhuah hnua a kawp nen an lo inṭhen fel leh tawh zawk a ni awm e. Ngaihzawng neih loh lai tak tak hi a nei lo a, a ruka mi han star tih angreng te hi a peih ve lo a, a star deuh te hi chu hriattir ngei a duh ṭhin. Bena nena kan chungchang min zawh chuan eizawnna a buaipui thu chauh ka hrilh a; mahse, a nu hnen aṭangin a lo hre vek tho.

"An in saw ka lawi peih lohna chi a nia, nuam i ti lo ang, Bena rilru hneh tum la, indang nghal turin nei la a fuh zawk, a chhungte sawn an thlahthlam tak tak chu ka ring lo, an vau ve mai mai aniang, eizawnna a neih veleh nei hmiah la, i indan pui nghal dawn nia" tiin thu min rawn ve luam a, keipawn ka lo ngaihtuah dan ve tho a ni, hna a nei anih chuan inneih a duh maiin ka ring a, indan nghal pawh chu a duhdan anih ve tho ka ring.

Unaunu chu nilainiah a chhuk a, nu Hlimi nen Airport-ah kan zuk thlah thlap a, class pawh ka ṭhulh phah ṭhak a ni. Chumi zana Benja'n min lo biak chuan, "Ruah a sur duh lutuka, kan chawl rih ang" tiin a lo haw tur thu a sawi a, ka phur ve tehlul nen "Riakchhuak ila" a tih vangin ka lo hau nghal mawlh mawlh.

"Tuman an hre dawn hleinem, engmah pawh kan ti dawn lo va, i bulah ka mu chak ringawt a lawm" a ti leh ṭalh a, "Sawi pawh sawi suh, ka bula mu tur chuan man i pek phawt a ngai" ka ti ve tlat a, a hrethiam pha lo reng reng.

"Zan khatah engzat nge i inchhiar a, bialpa te lakah a man han phut te chu" tiin a nui hawk hawk a, a va han khaw lo..

"Hmeichhe man a lawm ka sawi" ka tih hnuah a hrethiam ve chauh. "Sumo-in ka han thawn a nge" tiin a la uang zui hram a, nuih pawh a za lo, Hostel-a lo riah te hi a tun fo a, tun ṭum chauh lo pawh hi min sawm tawh, a ṭhiante ina kan len changte hian riah nghal a rawt ringawt zel a, a ngaihtuah thui loh vang mai mai a ni.

"Zirtawp chawhnuah ka lo haw ang, ka lo thleng hma deuh mai thei a, class in la ban hman loh chuan ka lo hruai dawn che nia" a tih vangin zirtawpni chu phur deuhin class ka kal a. Benja chuan Hotel changkang deuhah thil min eipui a tum a ni awm e; mahse, college ka thlen hnuah Brenda-i message ka dawng a, zungbun thlalak min lo thawnin ka duh thlang turin min ti mauh mai a, a chhan ka zawh chuan a sawi duh lo.

"I sawi loh chuan ka thlang lo ang" ka tih tlat avangin min hrilh ta hram a, Benjamina chuan a bu ang thlap thlapa chet a lo tum a ni awm e. "Inhualna zungbun tur a nia, nupuiah a sawm dawn che a; mahse, inneih chu a ti nghal mai lo ang, ngaih tih ṭhatnan a duh a" tiin a ṭhiannu leh a high school sweetheart ni bawk Brenda-i chuan min hrilh a, ka tan chuan han lawm loh phal ziazang a ni lo, zungbun pawh chu ka duh zawk ka thlang nalh a, a man erawh min hrilh duh lo reng reng.

Lunch break- a canteen ka va kal chu Noeli te lo chhuak tur nen kan intawk a, "Awmpuia i lo hmu em" a lo ti nghal thawr a, he nu hian min la ngaithei lo reng anih ka ring.

"Ka veng lo" ti a kal mai ka tum chu, "Heih, a pa a thi ṭep ania" a rawn tih vang chuan ka ding chawt.

"Eng maw i sawi?" ka ti let hu a.

"A stroke thut a, tunah a mar pawh an hmu tawh mang lo" a tih chuan ka la awih mai lo; mahse, Noeli hmelah chuan dawt sawi hmel a lang lo a, a hlauhthawn hmel zawk hle a ni.

"Zawng ang u, an class-ah a awm si lo a, SU room emaw, common room velah a awm maithei" a tih tak zung zungah chuan ka umzui ve thuai a, Common room-ah chuan a awm lo. Library-ah ka tlan lut rawk a, a awm chuang hauh lo. Ka call lah chu a chhang thei der lo a, class lak laihian a silent ṭhin a, a ri tih a hre lo aniang.

Tualzawlah Peksanga ka hmuh vangin ka au nghek a, "Khawiah nge Awmpuia?" ka tih rual chuan Gate lam a kawk zauh a, Awmpuia chu an department mipa ṭhenkhat nen an lo inzui thla a, engthil emaw pawmin a bawr hlawm khawp mai. Chutih laichuan Noeli te pawh SU room aṭangin an lo tlan chho ve chiah a, Awmpuia te lo chhuk chu an han hmu ve zat bawk.

Noeli ten an va hrilh lai leh hmanhmawh deuha Awmpuia'n a phone a phawrh laite chu ka dinna aṭangin ka lo en ve reng a, gate  bulah dingin phone a hmang a, a tei kual vut vut bawk a, a chal a han dawm leh ringawt ṭhinte chu hmuh hrehawm tak a ni. Phone a hman zawh hnu chuan tualzawl lam an lo pan hlawk hlawk a, lo biakna hun pawh a awm lo, min melh zawk a, min kalpel thuak a ni ber.

"Eng nge in tih dawn?" Noeli ka pawt ding chawt a, "A boral, principal kan hmu dawn" tih leh min kalsan a rual a, ka rilru buaizia chu aw, a hrehawm tih hian a sawifiah zo lo.

Hmanhmawh deuhin an hnungah ka zui a; a ṭha em tih tal ka ngaihven a ngai a ni, tih theih ka nei lo lutuk chuan minti hrehawm zual. Awmpuia leh Noeli an lut aniang midang chu corridor-ah an lo ding ṭhap a, an hmel a ngui ngiai hlawm.

"Engtin nge an awm dawn le?" ka va tih chuan, "Principal a hrilh anga, a haw ang" Rebeki'n a lo ti zawi sep a, "Inzui dawn em?" ti a ka zawhna chu min chhang thei hlawm lo.

"Beki, i pa biaksak la, in motor hman tir turin" 

"Amah kha lo chhuak phawt rawh se, an chhungte nen an rel ho ve maithei a" tih angreng an sawi mawlh mawlh laichuan ngaihtuahna a lo vak thui ve hle a, a nu a hrisel loin a nau lah buaipui chawt ngai a ni a, an chhungkaw dinhmun hrechiangtu tan chuan an lainatawm ngawih ngawih, a nu mangan turzia te ka han ngaihtuah a, ṭah a chhuak ṭun mai.

Bang hnunglamah kalin Benja ka va call a, ṭah chhuak ru ṭun chungin chanchin chu ka hrilh a, "Engtikah nge an chhuah dawn, an kal dawn tawh em?" a lo ti vat a, engmah ka sawi hleithei lo. "Tikhan awm lo la, lo hnem zawk rawh, ka lo thleng tawh a, ka lo kal nghal dawn nia" a ti zung zung a.

"An kal ṭep tawh ang, a ṭhianten an buaipui a, biakna hun pawh a la awm lo" ka tih chuan, "Kan zui ve dawn nia, nangmah ber kha inti pachang rawh, hnem thei tura i awm a ngai" a ti leh a, ka hnem thei pawhin ka ring lo, kei chu ka hla lutuk tawh.

"A ṭhiante an awm a lawm" ka han ti leh ngawt a, rilru a na zual ting mai a ni. An lo chhuak thawm ka hriat vangin Benja chu hmanhmawh deuha lo kal turin ka hrilh a, ani pawn a lo chhuah nghal tur thu sawiin Phone a dah a, corridor ka va thlen chuan an lo ding khawm laih a, bang nghenga Awmpuia ding chuan min lo hmu ve chiah bawk. 

A mit chu a sen deuh rum a, a ṭap lo niin ka hria. "I chhungte hrilh phawt la, Beki pawn a pa motor a thawh thei dawn a, kan zui hreh lo che ania" Noeli'n a tih chuan, "Phei phawt ang u, Sir. Sangtea'n min zui dawn a, a lo phei ve mai ang" Awmpuia'n a lo ti a, chumi hnuah ka lam lo hawiin min melh vang vang a, sawi tur a vang takzet.

"Kan lo zui ang che" ka tih laia ka aw chu zawi tak a ni, ka lam a lo pan a, ka darah rawn vuanin bang lam a hawi tlat a. Chutih laiin Sir, Sangtea a lo chhuak a, kaldan tur a rawn sawi zung zung a, "Zarkawtah lo va phei ula, motor a awm dawn em lo sawi ula, a awm loh leh rental car kan la mai dawn nia, ka Motor-ah pali in leng bawk ang, midang kal tur pawh lo sawichiang vat ula" tiin midang ho chu a hrilh a, "Awmpui, lo va phei ta che u, ka rawn thleng phei har lo ang" a tih pawh chuan Awmpuia chu a hawilet lo.

Ka dar a vawnna kut chu a khur deuh dar dar a, chuti chung chuan min hmer na hle thung, "Peka ka'n phone ange" tiin Noeli a kalsawn a, ka bula ding chu ka hnem a ngai tih ka hria. Inherin a hmaah ka ding a, "Inti pachang rawh aw, a pawi em mai, tuar hram hram rawh" ka ti ve tak naa a hmel ka hmuh rual chuan ka na vek, a insum hmel chu hmuh nuam a ni mawlh lo. Thawk an han la vang vang a, ṭah a chakzia pawh ka hria.

"Kan zui dawn che ania.." ka ti leh chiah chu ka ban a rawn hmer a, "Ka pa khan, lehkha ka zir theih nan mi khawngaih a dil kual ṭhin a sin" a tih ri chuan min vel chiang khawp mai, a na a ni, a na thlawt, chhan dan pawh ka thiam lo, ka hnem zo lo lutuk a, nep ka inti ngawih ngawih.

Rei vak loah Noeli leh Peka an lo lang a, "Bro...lokal teh" tiin Awmpuia chu Peksanga'n a lo kuah hrang thuai a, Zothana a rawn lang ve hlawl bawk. An ṭhianpa chu hnemin an ṭawng thlamuan ve mawlh mawlh a, a fel khawp mai. Hmeichhe ho chuan an hnungah kan zui hlawm a, kaldan turte an sawi ho a, Benja a lo la thleng bawk si lo a, keichuan engmah ka sawichiang thei lo.

Noeli chuan a ṭhiante chu, "Kan inah in innghat vek thei ang, a tam thei ang berin zui tum ang u" tiin a hrilh hlawm a, chutah chiah chuan Awmpuia tana Noeli hlutzia pawh ka hrethiam ve a ni.

"Rinte, zarkawtah i phei ve nghal dawn nge?" Rebeki'n a lo tih chuan, "Engtin nge in awm dawn?" tiin ka lo zawt ve vat a. "Keini chu kan va insiam nghal mai ang, saw tah kan innghak khawm dawn nia u" Noeli'n a lo ti vat a, keini pawh kan kal dawn anih chuan insiam ve phawt a ngai dawn a, Benja lo thleng sela kan kal dan tur pawh a hriattheih mai ka ring.

Awmpuia bulah chuan, "Kan va insiam ve lawk anga, kan lo thleng phei har lo ang" tiin ka hrilh a, "Lo hmanhmawh deuh rawh u, kan chhuak har lo ang" a lo ti ve vat a, chumi hnuah mipa ho zawng chu Awmpuia te veng lamah an inkhalh phei a, Noeli te ṭhian ho pawh Taxi lain an liam ta diak a, kei erawh Benja nghakin taxi stand-ah ka la ding thung a, Sir. Sangtea lo tlan chho pawh ka hmu har lo.

Benja chu call leh ka tum laitakin a Bike lo tlan ka hmu a, a lo din rual chuan, "An kal deuh chiah, Zarkawtah an innghak khawm dawn a, kal chu i ti tak tak em?" ka lo ti zung zung a, "Ti nge, i kal duh lo'm ni?" a tih chuan ka bu sawk sawk a, chumi hnu chuan  insiam turin hostel lam kan pan a, a tuk lamah an vui chauh dawn a, Bike a kal a tih vangin thawmhnaw lum ka ha sa a, hak thlak pahnih khat ka keng bawk.

"Zarkawtah min va dah hmasa la, ka lo nghak mai ang che" ka tih chuan min hnial a tum zeta; mahse, ka hreh hmel a ti ve deuh aniang "Ka rei lo ang, inthlak vak pawh ka ngai lo" tiin ka bag a la sawk sawk a, ka sawm pawh ngai miah lo va kal duhna rilru a pu chu ka lawm ru khawp mai, hetiang hunah hian a rilru a zauin a puitling leh tlat ṭhin a, a hahdam thlak hliah hliah zel a ni.

An khaw awmna min zawt a, a khaw hming chauh ka hria a, vawikhatmah ka la kal lo thung. "An hnung zelah kan tlan dawn nia" a ti ve mai a, zarkawt lampana kan kal laichuan dar 2 a ri dawn thuak tawh. Peksanga ka phone-a, an awmna laite min lo hrilhin kawngpuiah min lo nghak a, "Motor a awm nual a, Bike in ken loh pawn in leng dawn ania" a ti tak naa Benja thung chuan Bike ken ngei a duh a, motor a lo rui ṭhin niawm tak a ni.

Insiam tura a kal hnuah Peka nen an inzui lut a, Sir. Sangtea pawh a lo awm leh diam tawh.  Nu pakhat hian min lo chhawnin Awmpuia chu pindan lama a insiam thu min lo hrilh a, thingpui min lo thlitsak thuai bawk a, an chhungkaw nu ber a nih ka ring. Thingpui kan in laichuan kan bulah lo ṭhuin a lo titii bawrh bawrh a, "Kan pa leh Mapuia'n an zui ve ang, kei hi dawr bungrua thleng tur ka neih vangin ka thei dawn lo a, naupang school kal kan nei bawk si a, an exam zawhah an khaw lama han zinte pawh kan lo rilruk a, a pa pawh inentir tura kan lo chah laitak a nia, hman a inti lo zel a, hetiang a ni dawn tih tuman kan ring pha lo a ni" tiin chanchin te a sawi ve mawlh mawlh a, nu fel leh rilru ṭha tak a niin ka hria.

Rei loteah a pasal leh a fapa an lo thleng a, Sir. Sangtea leh keini min hmuh chuan min lo chibai zung zung a, an insiam nghal thuai bawk. Benja chu ka tur deuh a, Peka'n Noeli te ṭhian ho a phone ve reng bawk a, chhuak tura kan inpeih meuh chuan dar 3 a ri tawh. Awmpuia awmnate chuan Bolero an keng a, chutah chuan Awmpuia leh Noeli an chuang a, midang zawng chu Peka hoin Sir.Sangtea motor-ah an chuang thunga, keinin an hnungah Bike-in kan zui a, Zemabawk-ah Awmpuia Putea te nupa kan lamphei bawk.

Benja chuan zawhna min zawt ve mawlh mawlh a, eng ang chhungkua nge an nih a, engtin nge ei an zawn tih angrengte a ni. Zep awm loin ka hrilh ve vek a, a pa'n huan a enkawl dan leh a nau chanchinte, a enkawltu a nu a hrisel loh thute thlengin ka hrilh a, a khawngaih ve khawp aniang "Bussiness lam hi a tui ve ang em le?" a ti teh daih a, a chhan ka zawh chuan, "Partner tur ka la mamawh dawn a" a ti a, a thil ngaihtuah chu ka hrethiam khawp mai, puih duhna rilru a lo pu chu ka lawm hle bawk.

Zan rei lamah an khua chu kan thleng a, an kawta kan chhuk laichuan ṭhalai ho zai thawm a ri dup dup a, miṭhenkhat min lo chhawntu te chuan thingpui lumna lam min lo kawhhmuh zung zung bawk. Mahse, Awmpuia a luh nghal avangin kan zui lut vek a, kan han lut chu ṭap thawmin inchhung a luah a, a nuin a lo chhawn dan chu hmuh hrehawm tak a ni. 

"Mama, i pa a awm ta lo, pa kan nei tawh lo asin.." ṭap chungin a lo ti ngawih ngawih a, an pa ruang chu zuk kuahin, "Kan inngahna, kan kungpui a tliak ta maw, i nupui leh fate hi min khawngaih love'm ni, i tel loin engtin nge kan awm ang, kan zuam lo em mai, lo let leh mai rawh..." a tih ri te chuan min vel fai vek a ni ber. Awmpuia chuan a pa biang a va dawm a, a inpetruh fan fan reng a, a chang leh a nu chu a kuah leh ringawt ṭhin a, hmuh a hrehawm duh takzet.

A hmel chu ka en reng a, a nu vangin a intipachang hram hram a, ṭap lo mahsela a na tih a hmelah a lang a, a khattawkin a mittui a hru leh zauh ṭhin. A nu ṭap chau chu khumah a bawk ngiai a, thawm a rawn chhuah hlek chuan Awmpuia'n a lo kuah vat zel a, an inhnem ve mawlh mawlhin ka hria, ruang kil an tam a, a nau hmel erawh ka hmu lo.

Awmpuia awmnapa Pu Sawma khan thu sawina a nei a, ṭawngṭaina te a nei bawk a, a thusawi zo kan bula a lo ṭhu chu Sir, Sangtea'n nen an ti ti luam a, Awmpuia an fakna thu te chu ka lo ngaithla ve reng bawk. Pu Sawma chuan tihian a sawi a, "Ani hi chu a zirpuitlin ngei ngei a ngai, amah pawh ka hrilh nghe nghe a, 'I zir peih chhung chu i zir ang' ka lo ti sa a, coaching te pawh ka han kaltir a, kum thar lamah chuan phaiah ka awmtir ang ka lo ti rilru zawk a, a u Alberta bulah zuk awm sela, civil services lam te awn sela ka duh a, a pa boral chu pawi ka ti tak tak a ni, a kal hreh phah ang tih pawh a hlauhawm khawp mai, a nu leh a nau chauh an ni tawh mai si a, chhungkuaa la sawi ho a ngai ang" a ti charh charh a, a duhsakzia mawlh chuan minti lawm, hetiang duhsakna hi Awmpuia hian a phu reng a ni, ka rilru natna tamtak pawh a ti kiang vein ka hria, ka lawm takzet.

"Professor te pawhin college a lo kal tirh aṭanga kan hual ruk a nia, a lakah hian beisei kan nei sang hlawm khawp mai, lehkha a thiam theih piah lamah amah hi a puitling reuh a, zirna ngaipawimawh deuh leh neizo tak enkawltu nei sela kan lo ti rilru ve ṭhin khawp a, nangni in lo awm chu a lawmawm hle mai" tiin Sir. Sangtea'n a lo tuihnih ve bawk a. Pu Sawma bawk chuan sawizawm lehin an hnena a awm dante a sawi kai a, "Kan nu ṭhiannu hi hemi khua ah hian zirtirtuin a awm a, a pa hian awmna tur a lo zawn sak niawm tak a ni, kan ṭhiannu chuan min lo kawhhmuh ve hlawl a, keini hi zirna ngaisang nupa tak mai hi kan ni a, tun hma pawn zirlai chawm hi chu kan nei fo a, Awmpuia hma chiaha kan awmpui khan min bum a, pawisa ruin a tlanbo daih mai a, chuvang chuan mihrang awmpui hi kan lo duh vak tawh loh lai kha a nia. 

Mahse hei, Awmpuia pa hian phone-in min lo bia a, kan rilru a hneh em em chhan pawh a fapa a rintawkzia leh a chhuanzia kha a ṭawngkamah a hriat theih a, kan nu zawk khan awmpui ngei ngei a duh a, a hmel kan han hmuh takah phei kha chuan fapa ang takin kan en, a inngaitlawmin a taima bawk si a, duhsak loh theih a ni lo, lehkha a thiam thei tih kha kan hriat dan ania, heti taka a thiam phei chu kan ring lo a, pianpui B.A a nei kan tih ang chi hi a ni, a Nu Maengi lah hian dawr lamah a chhawr ṭangkai a, a bula thawk tur te hian a thlem a thlem a, keiin coaching kaltir ka duh thung a.  Ka fak leh deuhna chu Awmpuia hian tum rilruk a lo nei ve a, a zirlaia hlawhtlin ngei hi a tum a, chuvang chuan a zir peih chhung chu a zir ang, a mamawh apiang ka tum ang, zirṭha peih mang lo kan fate kan tirh luih ngawng ngawng laiin lehkhathiam zirna ṭha nei mang lo hi an awm leh ṭhin a, an ni ang tana insen hi ka hreh miah lo" a ti leh dap dap a, thu hriat nuam tak a ni, Awmpuia lehkhazir chhoh dante ka han ngaihtuah let a, hnuk a ulh ṭun reng mai.

Sir, Sangtea'n kan awmdan tur min lo zawh chuan kan tlaivar tur thuin kan chhang hlawm a, chumi hnuah thingpui in turin min ko chhuak a, kawngah chaw kan ei peih  si lo a, kan ril a ṭam viau tawh. Pawna kan va chhuah laichuan sawhchiar sem an lut ve chiah a, a vawt bawk si a, meilum kan va ṭhuthnaih sat sat hlawm.

"Noel, khawiah nge in in a awm?" Sir. Sangtea'n a tih chuan, "Sawtah, venglai lamah" Noeli'n a lo ti vat a.

"Hmun khatah inthleng vek dawn em ni" tiin Sir chuan a zawt leh a.

"Ka ṭhiante hi chu kan inah a lo innghat dawn a, Rintei te pahnih hian engmah an la sawi ve lo, kan inah pawh a innghah theih tho a, invai pawn lo thleng mah ula a pawi lo, engtika haw nge i tih?" tiin sir chu a zawt let a.

"Tukṭhuan eina tur kha a ni mai a, vui zawhah te chuan kan let leh mai ang chu" Sir-in a tih chuan hmeichhe ho chu an ner nang a, "Tlangah kan leng hman dawn lo a ni maw" Rebeki'n a lo ti zauh. "Kei chu ka cham ang" Peka'n a tih chuan, "Keipawh ka cham a ngai" Noeli'n a lo ti ve bawk a, Benja lam ka hawi chuan mutchhuah hmel zetin thingpui a lo in a, mel alh chu a en ngur bawk a, kan thil sawi chu hre ve awm pawhin a lang lo.

"Bena, engtin nge kan awm ve dawn?" zawitea ka tih chuan, "Peka khan thlan nghahni thleng awm ang a tia ni lo'm ni" a lo ti bauh a, an sawi dun lai ka hre miah lo.

"Khawiah nge kan thlen ang?" ka ti let hu a.

"Hetah a theih tho ang chu ka ti" a ti leh mai a, ka rin aiin a awlsam daih.

"I chhungte i hrilh em?"

"Ka pi ka hrilh a, midang chu a hrilh tawh ka ring"

"I cham peih tak tak maw?" ka lam a lo hawi a, ngun deuh hian ka mitah min en a, "Cham i duh ka ring a" a ti sawi deuh sup a.

"Duh tho a; mahse, haw nghal i tih pawn ka hnial chuang lo ania" ka inthlahrung deuh chuan ka ti ve thung a, min lo hrethiam leh khawp mai, "Inthlahrung suh, nakinah i inthiam lo mai mai zawk ang, i hnem ve te pawh a ngai a lawm, tihian ka lo ṭawiawm ve che a ni mai" a ti a, tawi tein min nuih bawk.

"Ka lawm e aw" ka tih chuan, "Lawmthu sawi a ngai lo, ka ṭhian a ni ve tawh tho a lawm" a ti sam et a, a thingpui chu a lem zui khalh khalh a, a bula Peka lo insawn chu "Mutbu chu a awm tak tak dawn em ni, sunday kan cham dawn chuan engkim i ngaihtuah a ngai ania" tiin a lo hrilh a, "A awm ang, mipa te chu chhuatah kan mu mai dawn a, khawharin riak ho bulah kan mu dawn nia" a lo ti zung zung a, chumi hnuah Sir. Sangtea bulah kan cham tur thu chu kan sawichiang a, ani pawn min lo thlawp khawp mai a, kan let leh hunah a bula in report turin min hrilh bawk a, kan attendance a lo buaipui dawn a ni awm e.

A tuk zinglam dar 11 ah Awmpuia pa chu an vui a, an nufa hoa ruang an kil lai chu kan ṭhutna aṭangin a lang thei a, a nau pawh a lo lian ve viau tawh, Awmpuia nen a in ang reuh hle a, thil awmzia chu a hrethiam vak lo nge mawni a ṭap ve lo a, a ṭhu ngawi reng a, lung a ti chhe duh viau thung. Mi an tam a, ui tu a ngahin a thlah tura thlanmual thlenga kal pawh an tam a, a ṭhiante an ni maithei patling ṭhenkhat ṭap tlawk tlawk pawh an awm. 

Zingkarah Peka hoin pangpar leh puan an lo va lei a, puanin ka tuam ve nghe nghe. Zan lamah kan tlaivar chiang bawk a, thlan aṭanga kan let leh chuan ka chau ve hnawp tawh a, Sir. Sangtea te haw tur pawh ka thlah peih ṭawk a ni.

Benja leh Peka chu Awmpuia pindanah an mu bawrh bawrh a, kei erawh thingpui lum nula ho ka pui a, ka buai ve hle a, ruang a liam tawh hi chuan YMA lam kut a ni tawh ngai lo a, chhungkhat laina leh ṭhenawm khawveng hnai deuh ten thingpui an lum mai zel a, Awmpuia'n mu tura min tih pawhin ka la hnial ve tlat a, tlai lamah erawh eirawngbawl puiin Benja leh Peka an che ve thunga, darkar hnih zen zawn chu ka mu ve awm e.

Awmpuia nu chuan min lo hre sa bawk nen min be seuh seuh a, kan chanchin a hre lo a ni ang tih turin min duat bawk a, ka inthlahrung zawk khawp mai. YMA lengkhawm an haw hnuah thingpui lumin tap bulah kan ṭhu dun reng a, kan titi luam bawk. Awmpuia awmzel dan tur kan sawi laichuan, "Ṭawngṭaipui mawlh mawlh a ngai, naupangtein a phur hi a rit ṭhin khawp a, a pa a han awm loh takah phei chuan pa ber a nih a ngai tawh a, Pathiana a innghah loh hi ka hlau ber mai, nang pawn i lo ṭawngṭaipui ve dawn nia" tiin min chah a, a khat tawkin a mittui a hru leh ṭhin a, han hnem vak dan pawh ka thiam lo.

Awmpuia te in hi a lian lem lo a, inleng an tam deuh chuan an leng lo mai zel a, zan inriak pawh chhuatah an khat hneh viau a ni. "Rintei chu ka khumah mu mai rawh se" Awmpuia'n a tih vangin khum ka chang a, Bena te erawh inriak dangte kiangah an mu a, nuam an ti viau zawkin ka hria. Ka mut hnuah Awmpuia nu chuan puan min lo thuah sak a, "Zing thawh hma a ngai lo ania, inriak hoin thingpui chu an lum mai zel a, tho hma duh lem suh" a ti leh thlap a, a nelawmin a dam dap reng.

A nau kha chu a nutei ten an la chho a, thlan aṭanga kan haw hnu khan ka hmu zui ta lo a, a nu sawi danin, "Boruak a zo lo ṭhin a, mi tam deuhna a awm ve vak chi pawh a ni lo, thil awmzia pawh hi a hrethiam tak tak lo" tiin min hrilh a, an kawmchhak lawkah an awm a nih hmel e.

Pathianni chhun inkhawm banah thlan kal an rawt a, inleng an awm reng avangin vai kal a rem lo an ti a, Noeli hoin Awmpuia nu leh a nutei te ho an kal hmasa a, keinin tlai lama kal kan rel thung a, Bena leh Peka'n khawchhung fan an chak bawk nen chu mi paha kal chu kan rilruk a ni. Awmpuia Putea te kha an kawmchhaka a nutei te inah an thleng a, inleng kawmin an awm ve reng ang chu tih laiin an lo lang khat hle a, chaw eidawnah bak hi chuan hmuh tur an awm ngai lo.

Chumi tlaia thlan kal tura kan insiam laimekin a Putea chu a lo lut a, pa ṭhenkhat thingpui ina ṭhu mekte bulah chuan ṭhu vein a titi bawrh bawrh a, an zinga pakhat chu a nutei pasal a niin ka hria. "Puia chu in hnenah awm leh mai sela, chhungkhat pawh ni lo hnena khawsak reng chu a ṭha dawn em mawni le, nangni in awm ve reng a" pakhatin a tih chuan, "Awm rawh kan ti reng a lawm, mi hrang hnena awm duh tlat hek, mi hi a tlawh ṭha duh lo a, pu te kan awm ve reng laiin motor hman tur chungchangah pawh mi rawn der a nei lo, a pitei phei chu a lawm vak tawh hleinem" a putea chuan a ti bul bul a, Peka takngial pawh a ner sawk mai.

Pindana Awmpuia lo lut chu, "I Putea thil sawi kha i hria em?" a lo ti vat a, Awmpuia chuan a hre hman lo anih hmel.

"I ti buai lo thei te hi a tlawm la ve anih dawn saw, tibuai chiah la chuan a uikawm viau tho ang, a rilru saw an nu rilru bak a nih ka ring lo" a lo ti hmawk hmawk a, eng nge a sawi Awmpuia'n a zawh chuan a hrilh zung zung a, Awmpuia chuan a chhang duh lem lo, Peka thilsawi kha ka rilru ve tho a ni a, han tibuai chiah sela chuan a lawm lo zawk hlein ka ring, hetia an tel loa a awm thei lah an lawm chuang lo a, mi mak ve tak chu an ni.

Brendai message ka dawng a, "Eng nge chanchin?" tih te hi min lo thawn a, "Naktukah kan lo haw ang?" ti a ka chhang chu "Zungbun kha maw le?" a lo ti let khauh a, ka lo theihnghilh hmin der, Benja pawn a hrechang tawh bik lo aniang a dawn pawh ka la dawng lo.

"Min la pe miah lo"

"A pe ṭep ang che, i yes dawn em?" a zawhna chuan minti hamhaih deuh a, kan tun dinhmun ten a zir lo rih em a, rilru fim leh thawl hek hawka ngaihtuah a ṭhain ka hria, boruak zangkhai tak hnuaia tih chi a ni.

Dar 3 bawrah Awmpuia nu te ho an lo let a, keini kan chhuak ve nghal a; mahse, kawt aṭangin kan la thleng thui hman lo tihah Awmpuia chu a nuin a rawn au lang lang a, "Lo va kal rawh u" tiin min letsan leh rih a, thlanmual awmna kan hre tho bawk a, ka nghak duh lem lo.

An khua hi a lian viau lo nain khaw thleng rem leh nuam zet mai a ni a, a boruak a nawm chu thuhran tlang mawi tak tak thlir tur a awm a, thingtlang khaw nuam ve tak ti ila ka sawi dik ang. Thlanmual kan thlen chuan naupang an lo awm nak nak a, chawlhni tlai len nan an hmang ṭhin anih ka ring.

"Mikhual a mi in nih?" naupang pakhatin a lo tih chuan, "Police ka nia, kha thlan pangpar in ru a ni maw?" Peka'n a lo ti khar khar a, naupang lah chuan pangpar a keng vang mai a, Peka chu ṭi dekin a melh bawk.

"Khawia mi nge i lak, i lakna ngaiah va dah leh rawh" tiin an innawr phei dawt dawt a, "Police i ni lo" ti chung chuan an zui dam dam tho a, kan piah deuhah an va ri bawrh bawrh mai. Benja chuan phul chungah a jacket phahin min pawtṭhu zui a, tlai boruak thiang han hip chu hah a dam sawng sawng hian a hriat a, khaw hawi a nuam hle bawk. 

"BJ, henglaia hnim ṭo hi lambak anih hi, i ei ngai em, a hrisel lutuk asin, la ang hmiang, Aizawla hawnah" ka ṭawng mawlh mawlh laichuan ka kut a rawn vuan thut a, zungbun a rawn rawlh lut nghal nawk nawk a, engmah sawina hman pawh a awm lo. Ka kutṭang ka en laiin a hawisawn daih a, phulah chuan a mu zangthal duai bawk a, a lam ka zuk hawi chuan min lo nuih vur vur bawk.

"Eng nge?"

"In nei ang"

"Ringawt a.."

"Yes or no?"

"Ka sawi hmain min buntir hi..." ka kutṭang chu ka lekkang vah a, "Sawibuai theih loh, thil inchhu kha han en teh" a mitko a san ak a, eng symbol emaw ni hi a inchhu a, rangkachak zungbun a ni nghe nghe.

"Eng nge a awmzia?" zawitea ka tih chuan, "Infinity anih kha, a awmzia chu tawpchin a nei lo tihna, kha kha ka hmangaihna tawpchin nei lo entirna a nih kha" tiin min nuih var var a, chuzawng ka hnar phal lo tawp ang, a lam ka hawi a, ka han nuih ringawt a, chutah zawite hian, "Ka hmangaih che" ka mitah tak min enchungin a ti a, kei ka lo bu nghat nghat, zungbun chu ka han en leh ṭhin a, ka tan chuan a mawi thlawt a, ka phu lo zawk mah a ni.

Phulah chuan mu chungin van kan thlirdun a, kan titi dun melh melh bawk. Helaia ka hruai ta mai hi engtiangin nge a ngaih chiah ka zawt a, Awmpuia vanga kal kan ni chungin awm nawm lohna emaw, rilru a pai dangte a nei em tih hriat ka duh a ni, a chhan chu inthiam lohna ka nei leh ṭhin a, keini pathum inlaichinna hi thikna tel ve lo ang maiin a lang a, chuvang tak chuan hmuh hmaih neih ka hlau a ni.

"Chhiat tawhna thil a nia, complain ka nei lo" a ti mai a, "Tak tak maw?" zawitea ka tih chuan, "Mahse.." a ti leh halh a, ka melh rang khawp mai.

"Ka thik lo emaw i tiin ka hria, mihring ve mai ka ni tih i hre dawn nia, mipa hi kan ngaihzawngte laka thikthu chhe lo kan awm lo. A tir kha chuan kan bul ṭan danin a zir em a, ka hrethiam ve tho che a; mahse, inṭawm che ka duh lo ania, zungbun ka pek chhan che anih kha, ka bialnu satliah i tawh loa, ka nupui tur i nih tawh hi aw" a aw chu uang lek lek angin a lang a, a hmel erawh a thutak hle thung a, a rilru dik tak a sawi pawh ka ring, min hrethiam ṭhin a, chuvanga helai hmun pawh hi thleng dun kan ni.

Kan chhak lama thawm ka hriat rualin ka tho vat a, thlanmual in chhak kawng aṭanga Awmpuiate lo chhuk thla chu ka han mu zui a, a farnu a rawn paw thla lawp lawp mai. Eng emaw sawiin a nuisang a, chuveleh a farnu chuan min lo bye bye lauh lauh a, an unaua an nui dun hmel chu hmuhnuam tak an ni.

"In lo titi thla mawlh mawlhin ka hria" ka lo tih chuan, "Hmui phun a hre lutuk" tih pahin a nau chu a nghat a, a u awm a chen ve zan tawh a, a nulat hunah chuan a hmelṭha ngawtin ka ring, Awmpuia ang thoin a ngo a, an hnar ngul leh mitmengte chenin a in ang a, ani phei chu a sam a buang lek lek a, a nui hmel mawlh chu hmuh a nuam, a rilru a thianghlim tih a hriat hliah hliah. Awmpuia chuan zaizirin a bia a, chumi hnuah an pa thlan lamah an inzui phei a, rei dawn chu an va ṭhu dun nghe nghe.

An lo let leh laichuan lambak ka lo la mek a, a tam bawk a, a kung nen ka pawt bawrh bawrh a, a dahna tur ka nei lo chuan Benja jacket-in ka fun a, "Khatiang an ei ngai em ni, mi rah hnu aniang" tiin min lo khap ve sek. Peka lo phei pawh chuan min lo lakpui ve thuai a, kan lak dun mawlh mawlh laiin zawhna min lo zawt khauh a.

"Engtikah nge zungbun kha a pek che a?" a ti.

"I hriat loh laiin" ka ti liampuat a, sawi a hun lo ka ti ru khawp mai.

"In va ti ho e, ṭhingṭhiin a sawm che em, sap ho tih dan ten ti thlap thlap ta che u, mizo tihdan phung lo lutukin ka Propose e in intia, ṭul lo em mai a" a ti leh nuah nuah a, "Thlanmuala in propose chi pawh ni nghal lo chuan" Bena'n a ti chu, "I mut theih loh phah kha, nizana i video en te kha ka hmu ve vek ania" Peka'n a lo ti leh a, a mawlzia chu aw... 

Awmpuia chu kan chhak lawka phulah a lo ṭhu ngawi reng a, kan ṭawng pawh a hre pha a, engmah phei chu a sawi ve lo. A piah deuha a nau phone khawih lai chu a melh veng veng a, kan thil sawi chu hre lo ang maiin a awm bawk. 

Rei vak lo hnuah, "Ni a tla ṭep tawh anih saw" a rawn ti chhuak hlawl a, min ti phu zawk lehnghal. Ni tla tur lam chu ka hawi a, a sen no riai mai a, a mawi takzet.

Haw pahin thlanmual chhak lawka ser kan lo a, Peka'n "Chawngbawla ser" a ti mai a, a bawl vak pawhin ka hre lo, a rah eng tuar mai a, mi ta chu anih ngei ka ring, an lo ngai lo em mawni?

"Tinge an lawh loh le, a tla ral mai mai awm sia, zawrhah te a ṭhat dawn nen" ka tih vang vang laiin, "Ka lawmpui che aw" zawi sup hian a rawn ti a, a hmel chu a lang dam dap a, a nui lo tih mai chauh a ni. 

"Naktukah kan hawsan dawn che sia, engtia rei nge i cham ang" ka ti a, "Ka cham rei lutuk lo ang, exam a hnai tawh em mai" tih pahin a chung lawka ser chu a ban a, min pe nghal zat a, Benja lo phei a hmuh rual chuan, "Zingah em ni in chhuah ang?" a lo ti thuai bawk.

"Ka hre nang, thlan siam phawt ila, tlai lama chhuah pawh a pawi hleinem" Bena'n a tih laimekin, "Nangni pathum kha, ka thluak hi inti buai vek" Lalpeksanga'n a rawn ti phei bawng bawng a, kan bulah lo dingin min melh kual dan dan bawk.

"In huatna te hi in nei ve eih nange?" a ti leh phawng mai a, ka lo ner nasa....

"Ka mit inti kham lutuk, inthikthu te hi a chhe ngai nange.." a ti leh chiah chu Awmpuia'n a chalah serin a nawr sawk a, "Haw ang u" tih leh kal a rual a.

Benjamina lah pek chuan nuih vur vur chungin, "I lo tel ve duh em, kan inkawpkim a ni mai" a'n ti zauh pek a, Peksanga chu a meng rang nasa mai. Ka lam a lo hawi chuan, "Tu zawk nge Zawlpala kan tih dawn?" a la ti zui a, "Vahui ka hriatah i la mawl ber" tiin ka kalsan nal nal.

YMA zan tawpna anih vangin hun an hmang rei deuh a, an ban hnuah lah Noeli leh nula ṭhenkhat nen chhuat kan nawt a, ser te kan bawl a, kan ri ve dar dar a, inriak ho pawh an mu lawk thei lo. An khuaa kan cham chhung hian Noeli hian min be ṭha ve khawp mai a, a chang hi chuan fel ve ṭhin tak a ni, Awmpuia ṭhianṭha leh duhsak em emtu anih vang hian a chungah ka lawm a, ka tih theih loh thlenga a tih theih vangin a lakah beisei ka nei sang ru hle bawk. Keichuan ngaihsak theih loh chin, tihsak theih loh chin ka nei tlat tawh a, Noeli erawh chuan a hnem thei anga, a bulah awmin a ngaihsak thei dawn a, ṭhian chauh mah nise a mal dawn lo tih ka hria a, ka hahdam a ni.

Thawhṭanniah thlan an siam a, mipa ho chu thlan lamah an kal diak a, kei erawh Noeli te bulah thingpui ka lum ve a, tlai lama chhuah kan tum vangin zingkarah kan insiam lawk diam bawk. Benja phone ka ah chu a ri zing khawp mai a, a Pu leh a Ni te an ni, ka chhan ngam loh vangin ka silent ringawt a, rilru a nuam lo ru khawp mai.

Thlan aṭanga an lo haw chuan dar 2 a ri dawn tawh a, Benja inbual kan nghak leh te te a, Awmpuia nuin kan hawn turin phuihnam leh hmaicha rep tih ang reng min lo lakkhawm sak a, "Huanah kal hman ila chu hawn tur a tam maw le, la rawn zin leh ang che u, fu kan her dawnah in lo zin dawn nia" tiin min sawm bawk a, kan chhuak tur pawh kawtkai thlengin min lo thlah nghe nghe. Kan tlan chhuah ruala ka va lehhawi chuan Awmpuiate unau chu ka va hmu a, a nau zawk chuan ban a lo vai lauh lauh a, an lan theih thleng chu ka thlir bawk.

Chau deuhin Aizawl kan thleng a, a tukah class ka chawl nghal a, Nanai lah chuan an chhungte in lama insawn a lo tum a, ka kawm ve ber anih vangin a awm lo tur chu ka huphurh khawp a, a pindanah Betheli a awm dawn avangin a insiam zung zunga, a zan zanin a chhuak a, a awm lo chu lung a leng ve khawp mai. Benja lahin ram lamah min awmsan zui a, college kal pawh a nuam ta lo.

Peksanga leh Noeli an lo chhuk hmasa a, Awmpuia erawh kar khat dang a cham leh a, a lo haw hnuah pawh kan inhmu lawk lo a, an department-in an ral tih chu a chanchin ka hriat chhun a ni.  Exam turin kan inbuatsaih a, college kala ka chhuak tih loh chu hostel-ah ka tawm chawt a ni ber. 

Nikhat chu Nanai a lo leng a, bazara chhuahpuiah min lo sawm a, chumi ṭuma kan va chhuak chuan tum loh deuhin Benja nu kan hmu a, min lo hre ve chat mai. Eng nge a tih ka zawh chuan a inentir thu min hrilh a, "Ka pum a na leh ṭhin a, chaw ka helh nasa bawk si a, tunlai chu hna pawh ka thawk mang lo" a lo ti luam a, amah pawh a cher deuh kuam tawh. "Bena'n a lo be ngai che em" ka tih chuan, "Be ve zeuh zeuh e, damdawi leina tur te pawh min lo thawn a, a fel ve khawp mai" tiin a nuisang a, "A lo haw hunah kan lo kan ang che" ka ti ve bawk a, Bena chhungte khan an lawm lo viau nain Bena berin a pawh duh miau si a, ka lo biak chhiat emaw ka lo inlakhran ve chu a dik berin ka hre lo a ni, a nu a ni miau a, lo ngaihsak pawh ka tih tur a ni vein ka hria.

Zana Benja nen kan inbiak chuan a Patea nen an inhauh thu leh ram riah pawh nuam a tih loh thu min lo hrilh a, "Ka lo hawsan daih maithei a ni, ama ta zawk ang maiin engkim tih a tum a, a hna ka thawh sak mai maiin ka inhria, mahni puala tihtur dang zawn ka ngai" a ti nuah nuah a, ro han rel pui vak dan hi ka thiam ṭhin lo.

"I lo hawsan chuan a kutah i dah ringawt dawn a sin, i pu te pawn an ring lui ve mek che a, i ti beidawng hlauh ang tih a hlauhawm" tiin awm rih tura ka duhthu ka sawi a, ka rilru tak chuan ka khawngaih thung a, a inah lah Joshua nen an inngeih bawk si lo a, nuam a ti chuangin ka ring lo.

"Ni Mami te inah ka awm maithei" a tih chuan Ni Pawli te unau zinga hmeichhe upa ber Ni Ramthanzuali kha a ni tih ka hria a, a awm thei anih chuan a nawm deuh ngei ka ring, a ni Mami kha chuan a duat ve khawp a, a bula awm turin a thlem fo tih pawh ka hria.

"Mahse maw Rinte, Ni Mami te ina awm pawh a chi ber loh, Ni Mary hian a sawisel peih lutuka, hmanni a min sawm ṭum pawhin an lo inkhak a, Joshua nu khan 'A pawisa i duh vang' tih zawngin a lo ṭawngkhum a, Ni Mami pawn min sawm ṭha ngam tawh hleinem" a tih chuan mak tihna hlirin ka khat a, an chhungkua hi ka hrethiam lo takzet, a chang leh an inṭan ṭhem a, an inthikin, an initsik leh lawi bawk si a, chhungkaw mak ve tak chu an ni. 

"Ni Pawli ang hian independent deuhin awm thei la ṭha tur, sawrkar hna emaw te thawk ni la, i pu te hi tibuai miah lo thei la, hetianga an ti kual leh lutuk che hi chu ka rilru a na ve deuh" tiin ka rilru diktak ka hrilh a, an chhungkua aṭang hian sum leh pai ngah ringawt hian chhungkaw nuam a siam lohzia pawh a langin ka hria, an inlaichinna a ti chhe mai mai zawk a ni.

Exam kan ṭan hma deuhin a lo haw zawk a, kal leh erawh a tum thung a, min hmu tura lo haw a ni deuh ber. Chhunah Roma te inah kan va leng a, chawhnu lamah kan bazar a, kawr pathum lai min leisak a, ka han hnial ve deuh lah chuan, "Cigarette leina bak mamawh ka nei hleinem, ka nu damdawi leina tur ka thawn tawh a, inthlahrung duh suh" a ti mai a, tlaiah chaw kan eichhuak bawk nen a inseng hnem khawp mai.

Pathianniah erawh Hostel-ah a lo leng a, Betheli hoin inchungzawlah kan ṭhu ho a, rei tak phei chu a awm lo, a ni Pawlin a lo call a, hmanhmawh deuha haw turin a lo hrilh a, a pute inah an lo nghak a nih hmel e. "Chanchin min lo hrilh rawh" tiin ka thlah ve kha a nia, zanriah eihnu thlengin a reh a, ka message pawh a chhang thei lo. A Ni khan a ko hmanhmawh angreng si a, ngaihte pawh a ti ṭha lo rum rum a ni.

Dar 8 bawra min lo call laichuan lehkha ka lo zir mek a, a thil rawn sawi lah chu, ka lo hriat ruk sa mah nise min ṭhawng a ni, a chhan pawh engmah a hre ve lo a, a chhungte dang pawn an hre hek lo. Benja chuan a cousin rai thu a lo sawi a, "Naute pa a sawi duh si lo a, a pa'n a vaw hrep a, ka pu leh patea'n an lo duat ve bawk si a, an lo chhan ve deuh a, kan buai nuai nuai mai, Joshua pa pawh a haw tau daih a lawm" tiin min hrilh a, ka thil hriat ang hi hre ve sela engtin nge an ngaih hlawm ang, tunah pawh an buai ṭan der chu a nia, hre hlawm ngat sela chu an chhungkua saw an darh vek theiin ka ring.

Mi chhungkaw buaina a ni a, ka inrawlh lo ang tiin thutlukna ka siam a, Benja bulah takngial pawh ka sawi lo. Mut hmunah ka ngaihtuah zui reng a, hetia ngawih ka chuh chhan hi ka hmakhua ka ngaih vang a ni pakhat a, a Patea'n ka hria tih a hriat miau avangin ka chan a ṭhat ve theih ka beisei a, thup a duh takzet anih chuan ka chungah sual a chhuah bikin ka ring lo, chutak chu ka tan remchang ṭha tak a ni ve thei tlat a ni.

Mahse, ka thil rin dan leh beisei anga thil a han kal lohzia mai chu...

Exam kan ṭan awrh tihah thu dengkhawng lutuk ka hre zui a, Benjamina chhungte chuan Rosalyni hnenah palai tirh an lo tum a ni awm e. Bena chu a thuphungin an rawn ve ngei a, ani pawn a lo hnial fithla ṭhak a; mahse, a Patea'n ram lama a awm hlanin palai a lo va tir lui a, ni Pawli takngial pawh an hrilh lo a nih hmel. 

Phone-ah a rawn inhrosa chiam a, "Ka haw anga, ka chhuak nghal ang, in khaw lama awm a vawk vulh pawh pawi ka ti lo, inneih kan duh thu pawh ka hrilh chiang maw le, nupui nei turin min duh a ka hrethiam lutuk, an duhzawng kher min neihtir an tum hi ka hrethiam lo, Rosalyni nen kan inngaizawng pawh a ni lo a, engvanga pawm duh lo che nge an nih pawh ka hre lo, i hausak loh vang ti dawn ila pawisa an ngah lutuk, mo te hnen aṭangin an mamawh miah lo bawk a, an thu anga min awmtir hi an duh ve hrim hrim anih hi" a ti bawrh bawrh a, ka rilru chu a na lo ti ila chuan dawt ka sawi ngei ang; mahse, rilru nat lam aichuan thinurnain min luah hneh zawk a, huatna hlirin ka khat a ni.

"Kumthar lam anih ka ring a, engati nge an hmanhmawh teh thut le?" ka zawhna chu rindan ka nei thiam a, chu tak chu ania ka lungawi loh chhan chu.

"An inrem anih pawhin kum thar lam a niang; mahse, lo lungngai duh suh, chumi hma chuan ka chhuak dawn a lawm" a ti zung zung a, a aw aṭang chuan a rilru a na tih ka hre thei, keilah chuan hnem dan ka hre lo, ka rilru luahtu thil dang a awm tlat a ni.

"Rosalyni number i nei em?" ka tih chuan a chhan min zawt vat a, biak ka duh thu chiah ka hrilh. Mahse, min lo pe ve mai a, eng nge ka sawi tur takngial pawh min zawt lo.

Khumah ṭhu chungin ka call a, sawitur chu ka ngaihtuah lawk nasa hle bawk. Rei deuh hnua phone a lo lak chuan a mu ka kaitho tih ka hre chawpchilh a, inthlahrunna pawh ka nei chuang lo. Engmah dang sawi lo chuan, "Rintei ka nia, min hriat kha, thil zawh duh che ka nei" ka ti nghal khawl a, a ngawi deuh vang vang mai.

A tho chhuak a ni ngei ang thawm a ri sat sat a, "Engthil nge a, ka lo mu tawh a" awki damdiai hian a ti a, kei ka lo ner sawk thung.

"Hmanni khan i hrechiang viau tawh turah ka ngai a, mi pangngai i nih chuan i inthiarfihlim mai pawh kan lo ring a sin" ka ti chang bawl a, "I sawi awmzia ka hre lo, thil tihsual ka nei em ni?" a lo ti chu ka ngeitawk a tling khawp mai.

"In chhungte thil tih zawk a ni tih chu ka hria, lo hnar ve ni la hetiang hian kan buai lo ang, i thiam loh vek a nih hi" ka ti vin chiam a, ka ṭawng chu ring ṭha tak a ni.

"Min ngai dik lo mai mai anih kha, an mahni lamin a lawm chet lo la hmasa zel, ka pu an hmin a, ka chhungte dang pawn an thlawp vek a lawm..." ka lo pawt chat vat a, "Bena hi i duh reng reng em ni?" phawk fein ka ti a, a chhanna erawh ka hre chak hlawl lo.

"Min neih a duh hleinem" a tih rualin thawk ka la hawk a, leh lawi si a, hrethiam lo pawh anih loh tawp hi....

"A duh lo che tih i hriat chu, heti chunga neih i duh loh chuan i chhungte pawh lo hnial ve ta che, Bena'n a hnial laia i lo aw zel te chuan thil a fel thei nang, i tan pawh a zahthlak lutuk ang, chu loah lo aw zel pawh nila in innei dawn chuang lo a nia, Bena hian in chhuahsan a hreh reng reng lo, a hunlai hian lo hnial rawh, anih loh chuan i la mualpho zawk ang" ka ti duah a, ka ṭawngkam chu a na deuh tih pawh ka hria, ka chhungrila thu awm leh ka ngaihtuahna erawh ka la sawi chhuak pha teuh lo thung, a mi ngaihdan tur lah ka pawisa hek lo, min hlau sela ka duh zawk bawk.

"Engati nge ka chungah i thinrim vak a, Bena'n a hnialte chuan duhtawk ve mai ula, a chhungte pawh lo leng nawn tawh lo turin hrilh mai rawh se, keichuan chhungte ka hnial ve ngai lo, nei tura min duh ngawih ngawih chu ka nei hreh hleinem, Benjamina kher ni lo pawh nise ka hnial chuang lo ang, nangmahni lam buaina a lawm" a rawn ti ve nghat nghat a, hei chu a mizia ka rindan sa a ni, a luhlul dawn tih ka chiang. Tin, Benja hi a duh tih pawh ka hai lo.

"Enteh bawihi, min zuam sual hlauh a nge, tih hreh ka nei lo ania aw, nangni vang mai maia ka bialpa hi tawrhtir ka tum lo, min runluih anih vaih chuan i hnathawhnaah ka lo kal anga, i chak lo ang tih hre rawh" ka ti ta khar khar a, a hlau ta deuh aniang chu, "Ka pu bulah ka lo sawi ang, min duh lotu neih luihte chu ka duh bik hleinem" a ti ve ta hram a, ka awm a la nawm phah chuang hauh lo.

"Palai an lo kal nawn leh hmain sawi ngei ngei ang che" thupe aw zetin ka han ti leh a, chuta a lo ṭawng leh erawh a aw a dam leh thluam tawh a, "Lo mangang suh u, tihbuai che u ka duh bik lo ania, ka lo sawi ngei ngei ang" a ti ta zung zung a, "Min ngei phah suh aw, ka chhungte ka hlauh vang ania" a ti zui bawk a, chu erawh ka chhang tawh lo, "Chanchin kan lo ngaichang ang" tiin phone ka dah hmak a, khumah bawkin thawk ka la vang vang bawk.

'Chanchin kan lo ngaichang ang' ka ti kha ania, nghah rei a ngai lo khawp mai. A tuk tlaiah Bena an lo tir a, min hmuh an duh niawm tak a ni. "I bialnu kha lo hruai rawh an tia, ni Pawli pawh an ko a, kal lo zawk la a ṭhain ka hria" Bena'n a tih chuan ka rilru a buai nak a, kal nge ṭha ang kal loh tiin ka inngaihtuah buai leh bawk. 

Hostel bul step-ah ṭhua kan sawidun laimekin Bena'n message a dawnga, a ni Pawli hnen aṭangin a ni. "Rintei khan Rosalyni a lo va vau a ni maw?" tih zawng hi a lo thawn a, Rosalyni thu thlen dan pawh a hriat theih viau mai. Ka vau ngei a, Bena bulah pawh ka pha bik lo, ani chuan, "Kal duh lo mai rawh, an sawi tur a hriat sa em mai" tiin min hruai loh mai a rilruk a, kei erawh ka la inngaihtuah buai deuh.

Tlanchhiat emaw biruk hian awmzia a nei vak pawhin ka hre lo, an sawi duh chu ngaithla ila, an duhtawkin ka chungah che mai sela, ka tawrh tur ang ang chu tuar mai bawk ila, a bak tih theih ka nei tawh chuang loin ka hria, a kawtawpah ka ṭang tih lah ka hai bik lo.

Kal mai pawh pawi ka tih loh laiin Bena'n a pi a call a, "Ka lo hruai lo ang, an thil tum kha ka hre vek, i lo hrilh mai dawn nia" a va ti a, a pi erawh chuan, "Lo hruai a ngai reng reng lo, buaina a ti tam mai mai" a lo ti ve thung a, kan kal ta lo ringawt chu a nia. 

Chumi zana Benja haw lah chu a ni Mami te inah a insawn nghal daih a, a hnua ka hriat leh danin a Ni Mami chuan a lungawi loh pui ve hle a, a pu pawh a lo va kamkhat a ni awm e. Mahse, a Patea'n a thu a zuk duh lo a, a tih dan erawh a dang ta viau thung. Bena chu a nawr tawh lo a, a thlemin a thlem a ni,  an inchhungah a lal bawk a, Bena rangkachak khur lah kha chawchah atan an hmang a, a pu ho chuan an thlem rawn a ni ber.

Brenda-i nen kan inbiak ṭum chuan mak ka tih deuh thil a lo sawi a, "I nu uire thu an sawi ka hria a, chu chu an duh loh chhan che niin Nu Mami'n a sawi a" a rawn ti a, Bena'n ka bulah a la sawi miah lo, an hriat dan tur chu rindan ka nei a, Nu Hlimi'n Ni Pawli a hrilh a ni ngei ang, ka chungchang a hrilh nasa tih ka hria, chubak chu an hriat dan tur dang ka hre lo.

"Ka nu uire vang ngawt chu a ni dawn em ni?" ka tih chuan, "Chhan dang pawh a awm tho ang" a ti leh a, keipawn ka ring, a Patea a hmanhmawh chung danah khan rin ka nei tawh, Joshua farnu a rai tih kan hriat hnu lawkah hetiang thil hi a lo thleng a, nupui nei vat tura Bena a duh chhan hi anih ngei ka ring, min hlau a ni, a thuruk ka sawi chhuah a hlau a ni ngat mai.

(End of chapter - 34)