BLUE BAYOU (CH - 35) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 35

December thla tirah exam kan zo a, lehkha ka zir tam ang aiin ka rilruah a lut ṭha lo riau a, exam pawh chhang ṭha ka inti lo khawp mai, chutih rualin mahni subject thiam ve ber la ka ni tawh bawk a, pass mark chu ka chhang ve thoin ka ring. Exam zawh ni chuan Canteen-ah ṭhiante nen kan awm khawtlai a, advance christmas hmaa haw ka tum thu ka sawi chu min chelh ve teh an tum a, chaw eikhawmte an rawt a, ka ṭhulh phah duh lem lo, ka pa ka ngai ve deuh a, Bena nen buaina kan ngah bawk si a, boruak dang han hip rih pawh ka duh a ni.

"Awmpuia hi a vang e, i hmu ngai em, a chhuah rualin a haw daih zel em mawni?" ti a Kimkimi'n min zawh chuan zing lam ka hmu thu ka hrilh a, kan exam-na building a in ang lo a, ka hmuh chang pawhin biak hman a ni ngai lo, tlai deuhah hian a lo kal a, a lo thlen rualin luh a hun mai zel a, kan chhuak rual ngai lo bawk.

"In inbia em, a pa boral chu a tuar viau a niang a?" a tih chuan, "A tuar ngawt ang, a ruka tuar chi a nia, engmah a sawi ngai lo" tiin kan inbiakna a rei tawh thuin ka chhang a, Noeli te hi ka hmu fo a, kan innuih liam a ni mai zel a, han inbiak leh tih hi kan nei ngai lo.

Dar 2 bawrah kan haw a, Mawitei chu Kimkimi te inah a leng kawi leh a, kei erawh Hostel lamah ka tlang thung. Ka pa ka bia a, ticket min lo hauhsak turin ka hrilh a, "Pawisa ka lo thawn che anga, i thawmhnaw lei pahin inkhawmna a bun tur pheikhawk min lo lei ve dawn nia, ka pheikhawk chhuat hi a ral lek lek tawh a, pahnih chauh hi ka bunthlak a, man to deuh pawh a ngai lo" a lo ti luam a, ka bank account-ah lo thun mai turin ka chah a, ticket chu lo tifel hma turin ka chah bawk.

Ka mut hma deuhin nu Hlimi'n min lo phone ve hlawl a, "I haw hmain lo phei lawk rawh aw, sawi duh ka nei a, thil thawn duh che pawh ka nei" a rawn ti a, ka haw dawnah ka kal chauh ang ka tih laiin a tuk zingah ka nuin min lo bia a, "I nu Hlimi'n kawr lo thawn a tum a, i pi ta tur aniang lo va lam rawh" a lo ti pek a, a tuk tlaiah peih lo deuh chungin ka va kal a, ka va thlen chuan a hna bang a lo haw deuh chauh anih hmel.

"Christmas lo hman chhoh ve pawh ka duh viau a, motor ka rui bawk si a, hla viau lo sela chu ka lo chho ve ang maw le, engtikah nge haw i tum, i bawr ang em?" a lo ti zung zung a, kartawp lama haw ka tum thu ka hrilh chuan, "Chawhmeh te pawh ka thawn ang che, i pi kha a rawn vui dur dur a, a vitamin te pawh leisak a ṭha ang" a ti leh a, awm rei lo a haw leh mai ka tum laiin chawei turin min sawm ta tlat a, ani hi chu ka hnial ṭha ngam ṭhin lo.

Eirawng ka bawlpui a, thlairah ka chan mawlh mawlh laichuan, "Paulinei'n i chanchin min hrilh nual a, an lawm vak lo che anih hmel kha, lo zilh deuh rawh min tia, Bena i hruai khaw lo angin a ngai che anih hmel kha, ka fanu ang chiah i ni a, i awmdan hi kan ngaihven lo thei bik si lo a, duhsak deuhin ka hrilh che anga, i haw bik lo ang chu" a ti dap dap a, "Engtin maw a sawi?" ka ti chu a thil tih lai dah meuhin min en a, tunah khan Bena ka hruai khaw lo a ti tlatin ka hria. 

"An chhungkua saw ka hrechiang a, ka ṭhiannute mah nise an duh lohnaah chuan an nasa ania, an awm thei bawk si a, an mizia leh kan mizia pawh a in ang lo, an bula ṭawngsualte hi a awl ania, 'Bena hian hna zawng ve sela' ka ti pawh an lo ngai haw khawp a, ka hmusit ang hialah mi an ngai a, nang phei chu an lawm lo khawp ang che, an ngainep viau maithei zawk che a ni" a ti leh nghat nghat a, a sawi chhuak hmasa bawk a, ka zawt ve ang, keipawn sawi duh ka nei ve alawm.

"Ka nu uire chungchang i lo hrilh em ni, an lo hria a, engtin nge an hriat ni?" tiin ka melh ran a, a meng buai nakin ka hria.

"A, kha kha chu.." a ti ringawt a, ka la en reng thung.

"Engtin nge i sawi a?" ka tih leh chuan, "A thuphung mai maiin a lawm ka sawi, i chanchin hriat chian a duh a, min zawt luam a, fanute tiin ka han sawi khawngaihthlak deuh che maw le, a lainat ve che ka beisei vang ania, 'A mal ve a, a nuin a uire san vangin a pa nen chiah an khawsa' tiin ka hrilh anih kha, ani lah khan 'Zilhhautu nei lo a ni ang, a kawlhrawng riau mai' a ti si che a, ka han sawithiam ve na che anih zawk kha" tiin a lo sawifiah zung zung a, ka awih duh dawn em mawni, rilru a hel deuh tlat a, awih a har riau tawh.

"Thil dang sawi a nei em?"

"A sawi ṭeuh mai"

"Eng thilte nge a sawi a?" ka ti leh hram a, ka awm ti nuam lo dawn viau mahsela hriat ve ngei ka duh a ni.

"An inkawp aṭang hian Bena hi a luhlul sawt lutuk a, kan thute hi a hnial zel a, a nu an lo va tlawhpawh bawk a, Rintei fuihpawrh zel hi a ni ang, tun hmain hetiang hian a luhlul ngai lo, in chhuahsan turte hian a thlem ṭhin a nih ka ring, Benjamina hian nupui neiha in dan a sawi fo mai a ti bawk a" a sawi laichuan a ner nang nang reng a, kei erawh min ṭhawng tehchiam lo, min ngaihdan a ṭha vak dawn lo tih kha ka rin lawk a ni. Mahse, a thil sawi leh erawh chuan min ṭhawng hle a, heti lam zawng khera min lo ngaih chu ka beisei lo a, ka lawm lo ve takzet a ni.

Nu Hlimi chuan ti hian a sawi zawm a, "Hmanni deuh khan 'Bena chu ro chungchangah a buai chung a tia, a bialnu hian a a thluak a su anih kan ring, chhungte lakah a hel zo a, a chanai lak a duh tut tut a, pe chiah ila chu in a chhuahsan nghal duh ang, chuvangin a pu hian a la hrensak hram hram alawm, a bialnu hian a neih a eisak nasa si a, Bena hi a pawisa vang baka duh a ni lo ang, Rintei hi a hlauhawm tlat, nupui nei sela a ṭha berin ka hria' a ti bawk a, chu tak chu a pa ngaihdan zawk anih hmel, Pauline thil sawi ho hi chu an chhungkaw rilru vek a ni ang" tiin min hrilh a, pawisa duh lutuk anga min ngai chu ka rilru nat chhan ber a ni, Bena ka duhna hi pawisa vangah an lo ngai chu a ni vei tak si a, chu chu ka nih loh dan lutuk a ni, hausa miah lo zawk sela ka ti rum rum, inngaihzawnna hi ka la thutak a, hausa leh rethei karah thliar ka nei ngai lo asin maw le.

"Nang hi chu rilru nei tak i awm angai ania aw, i pa khian a dampui reng lo thei che a, nupui dangte pawh a la duh leh thei, mipa hi chuan khawhar an tuar thei lo a, nupui a duh ve leh mai ka ring, chuvangin mipa innghahna tlak i zawn a ṭul a nia, Bena nen hi chuan hmakhua innei thim lutuk a, a chhungten an duh bawk si lo che a, nakina i hrehawmna mai mai tur anihte a hlauhawm, inneih a lo cho viau anih pawhin lo pawmpui nghal mai suh, mipa hi chuan chhungte an thlah thei tak tak lo, ka tawn hnu ania, a tira ṭha deuh pawh hi han inchenchilh hian a dan a dang tlat zel, nang phei chu tun aṭangin an duh lo nghal che a, a chhe thei ang berin an ngai bawk che a, zep loah chuan khatiang thu han hriatte khan rilru a lo na ve a, Pauline pawh ka kawm tam loh phah alawm, ka ṭan ve lo thei si lo che a" tiin min melh vang vang a, min endanah chuan chhanna a beisei emaw tih mai tur a ni.

"Ṭhen se min ti deuh em ni a?" nui lek leka ka tih chuan  "I theih chuan chu chu a ṭha ber ang" a ti nghat a, ka nui mai mai thung. Ka nuih erawh a za lo, za lo tak a ni.

"Puitling i ni tawh a, i hmakhua tur i ngaihtuah thiam ve a ngai" tih pahin min thawhsan a, bai a va chawk rawk rawk a, a lo let leh thuai bawk.

"Bena hi an duh duh dana tih kawi an tum mai mai a lawm, thuhnuai an tum a, mo atan pawh an thuhnuai theih an duh a, a pa ro chan tur a neihte hi ṭhenkhat sawn an it bawkin ka hria, keichuan kutlawng pawhin lo chhuak se ka nei duh tho ang, an ina va lawi chu ka tum bik lo" ka ti ve ta nghat a, a beisei loh thil ka sawi aniang chu min en phawk khawp a, "Ṭhen pawh ka tum chuang lo" ka ti leh ngat, tunah chuan Ni Pawli a awm tawh lo a, a chhungte dang saw chuan Bena hi an hmangaih tak tak loin ka hria, kei lahin an thu zawmna chhan tur pakhat mah ka nei lo, Bena hi ka bulah a hlim a, nuam a ti zawk tih ngaihdan ka nei thar a, khawngaihna leh hmangaihna rilru nen kalsan loh chu a thupui ber a ni.

"I luhlul si a, i la retheih phah dawn anih hi" a ti vang vang a, ka chhang duh tawh lem lo.

Zanriah kan ei laichuan ka awmdan tur min zawt a, "Hostel-a awm reng aichuan lo insawn leh daih rawh, mahni chauha awm chu khua a har a, pindan awl a awm reng bawka, chhungte nei lo ang maia awm pawh a ṭha lo" tiin min thlem zui a. "Semester khat chiah a awm tawh a, ka tluan law law mai ang" ka ti ve tlat a, helaia ka awm chuan min khak deuh reng dawn a, ka awmdanin a zir lo laklawh bawk nen, engkim min hriatpuitu bula awm chu ka chak lo a ni, min ṭan ang takin lang ṭhin mah se, ka ring thei miah lo mai a, ka hma a ngai tak tak em tih pawh ka chiang chuang lo, a thil sawi ṭhenkhatte kha chu a dik ngei anga, lehlamah engtin nge a sawi leh ang ni, min chhuah chhe leh viau mai thei.

Ka haw hma deuhin Bena ka call a, nu Hlimi te ina ka awm thu ka va hrilh a, "Hruai i ngai em?" a rawn tih chuan, "Ngai lo ang, taxi a la tam ka ring, naktukah min bazar pui rawh aw" tiin ka sawm zui a, a lo aw ve thlap mai. 

Rei pawh awm tawh loin ka haw zui a, Hostel ka thlen veleh Benja chu ka call leh a,   "Tun hnaiah chanchin dang a awm leh em?" ka va ti thawr a, exam chhung khan kan inbe tlem lutuk a, anin min tih buai a hreh ve bawk a, chanchin min hrilh loh a neihte ka ring.

"Engmah chanchin dang a awm pawh ka hre lo, ni Mami dawrah ka pui a, kum thar lamah Cafe a siam dawn a, ka enkawl maithei a ni, ka pu hi chuan min lo be zing a, swimming pool tur pawh an lai zo tawh a, 'I lo haw huna i chhunzawmah kan dah' a tia, min sawm reng mai" a ti bul bul a.

"I haw chak em?" ka tih chuan a nui ringawt.

"I chak chuan haw la a pawi lo ania" ka ti leh chu, "Chak lo e" tih zawngin min chhang  a, a ni Mami pui ringawta a khawsa chu a khawngaih ve deuh a, haw se ka duhna leh haw lo se ka duhna chu a inzat vel ang, a haw chuan nupui an neih luihtir ka hlau a, hetianga a awm lah hian ka khawngaih ṭhin bawk si a, a ni Mami lahin a pu bulah a chanpual a lo dik sak ve reng bawk a, anni lam pawh an inhmuthiam lo lek lek tawh.

 

Zing dar 10 pelhah insuk ka lo zar laimekin a lo thleng a, Hostel kawta ka zuk chhuk chu phawk deuh hian min lo en a, "Tinge i la insiam loh, i lo inpeih vek tawh ka ring a" tiin min lo melh rum titih.

"Aww...ka bedsheet te suk a ngai a lawm, ka haw san daih dawn sia"

"Ticket chu i ti fel tawh em, haw hma i tum leh lutuka, nuam pawh ka ti lo" ti nuah nuah chungin min lo zui a, Hostel warden te hi kawmchhak lamah an awm daih a, mipa lo lut hi an duh vak lo nain an rawn hmupha lem lo a, ka hruai lut ve mai zel, engmah thilpawi kan ti lo bawk a, rei tak a leng ngai lo bawk nen a pawi hran lo turah ka ngai.

Ka pindana kan luhrual chuan min pawt her lawp mai a, "Min sawm tumna rilru i pu em?" tiin hnai lutuk tak maiah min en a, "Tum lo, inngaihzawn laia inzinchilh hi ka duh ve lo, a zah zawng tak" ti a ka chhang chu a lawm vak lo, dik tak chuan ka zak a ni hran lo a, ka nu leh pa boruak a lo awm tawh vangin mi sawi kan hlawh zual ka hlau a ni.

"I haw hmain camping nei ila, Reiekah emaw...." a hmuiah ka lo fawp zauh a, a ṭawng tawp chaih mai. A lai emaw tih mai tur hian min melh ralh ralh a, "Kawngka ka'n kal lawk" tih pahin muangchang fe hian a tawlh hnunga, ka hnial hun ngaichangte pawh a ang.

"Kalh kher lo la" nui chunga ka tih chuan a ding mar vut a, ka khum lam a thlek dak dak a. "Ding chungin.." ka lo ti chu a han peih loh hmel khawp a, "A ngaiah kan kual rei tawh mange" tih leh min rawn fawh a rual a, khumah chuan min nem ṭhut teh a tum a, ka ṭang ve tlat a, a tum lui ngar ngar thung.

Khuma ka han ṭhu chiah chu min bawh thlu a ni zui der a, bang lehlam maiah Betheli a zai rat rat reng a, thawm dim a ngai bawk si. "Kawngka ka kalh dawn" a ti leh a ṭhin a, ka phal lo chu a tum bur a, tum bur chung chuan min fawh a ṭhulh chuang der lo a, nuih a ti za lek lek.

"Ka haw hunah lo ṭap miah suh aw" a ner nung a, "Ka damlo mai dawnin ka hria" a'n ti zui a.

"Rosalyni lo inchhai thluk tir lo bawk la"

"A hming pawh kha sawi lo teh"

"Min lo ngai viau rawh aw" ka sawi laichuan ka kutṭang a khal niap niap a, "I awm loh chuan ka khua a har ngawt a, kumthar ni leh tawh mai se" tih pahin ka kut chu a fawp vang vang a, a khawhar dan tur chu ka hria,  kei aipawhin a lung a leng zawk ang. A sam chu chul sakin ka han nuih var var a, "Ka hmangaih che" zawi lutuk tak mai hian ka ti a, ka lai ve deuh.

Min lo fawp leh dawn chiah tihah, "Rinte, i la kal nange?" Betheli'n a lo ti lauh a, rang deuhin ka insiam thu ka hrilh a, a lo lut phei lo hlauh mai. Benja chu kawta min lo nghak mai turin ka hrilh a, ka nam chhuak nghal rawk rawk a, ka insiam zung zung bawk.

Hostel aṭang kan chhuah chuan dar 11 a ri ṭep tawh a, han bazar dawn lah hian Bike dahna tur hi a vang ṭhin lutuka, duh duhna a kal pawh a har. Benja chu T-shirt leh mawza lum ka leisak a, anin pheikhawk min lei hlauh mai a, ka duhzawng tak, kan leina dawrah pawh a man to ber anih ka ring. "Khawi aṭangin nge pawisa i neih?" ka ti ru sar sar a, "Ni Mami'n min pe ṭeuh mai, a thil dil a hlawhtling dawn aniang min pe huau huau" zawite hian a lo ti let a, lawm chi a ni em ka hre lo.

Thil kan ei laiin ka zawt a, "I ni Mami hian i lakah beisei a nei tak tak em?" ka ti phawng a, a sawi duh pawh ka rin loh tehreng nen, "Nei e" awlsam zet hian a ti a, minti hrilhhai angreng.

"An in hi hralh an duh a?" a tih chuan ka hrethiam zan lo.

"Ka rangkachak khurah chen a duh alawm" a tih takah chuan a chiang kuar mai.

"A thlawnin maw?"

"Umm..."

"I phal em?"

"Phal e, ka mamawh min pe tu apiang hi chu rulhlet ka duh alawm" a ti a, hepa hi chu, mahni hma pawh a sial thiam ve tak tak lo, mirethei chhungkuaa seilian nita sela an damkhawchhuak lo ang tih tur a ni.

"Harsatna i nei lo ang ti raw?" dar kan ak chunga a tih chuan, "Keiman maw, tinge?" phawk fein ka lo ti a.

"Aw, chutih hunah te chuan ka nupui i ni tawh dawn a, nupuite phalna lak ve a ngai ang chu..." ka nui hak a, ani pawh a nui ve tho.

"Immm...i ba ni a i inhria anih chuan rulh chu a ṭha viau ang; mahse, midang chungah hian ṭha lutuk suh aw, i ṭhatna te hi hrethiam loin an ti chhe mai ang che tih ka hlau" a lo bu nghat nghat a, "Nang pawh, mi chunga ṭhat chhuah i ba lo, 'They put you on a pedestal, and then they crush you when you fail them' kan pahnih chiahin kan inngaihtuah dawn nia" tiin min nuih var var a, kan pahnih chauh hi inngaihtuah thei tak tak ila ṭha tur, chutiang chu ni ngat sela chuan rilru hah tih vel hi chu ka nei ve pawhin ka ring lo.

Kan thil ei zo ka pa pheikhawk entura kan kal chu tum loh deuhin Awmpuia ka tawk hlawl a, min hmu thut chu ani pawh a phawk ve deuh. Rambo Polythene-ah hian chawhmeh hi a lo khai bawr khawp a, zikhlum, tomato, parbawr tih vel a niin ka hria. "I bazar em ni?" ka ti vat a, "Aw, naktukah ka haw dawn a, nang" a tia, a ṭawng sual a inti deuh aniang Benja lam hawiin "Nangni?" a ti leh a, ka pa pheikhawk kan lei tur thu ka lo hrilh zung zung a, a thil khai a rit deuh aniang a hah hmel khawp mai.

Benja lah chu a ngawi ngul a, a ṭawng ve mai dawn emaw tih laiin a hnuai lam a bih ngur bawk a, ka han nghawk deuh pawh chu a hrethiam lo aniang nur nang hian min en a, Awmpuia'n a lo en ve reng bawk si a, a zia lo tak tak a ni. 

"Engtikah nge i haw ve dawn?" Awmpuian a ti chu ka chhan hmain, "Mawza in ang in nei elaw?" Bena'n a lo ti zauh, Awmpuia nen chuan kan inmelh ralh a, a ke lam ka zuk en chuan a lo bun ve tak tak a, a sirah infinity symbol a la awm ve ve zui, a va pawi....

"Ui.....hei chu a rei tawh lutuk" ka tih rualin, "Nikum a mi" Awmpuia'n a lo ti ve khauh a, Benja chu kan melh ve ve.

"In va nei rei ve" tiin a lo ner nak a, a thik tak tak pawhin ka ring lo, a ngeiawm lui niin ka hria.

"Nia, ka hmuchhuak leh chauh a.." Awmpuia'n a tih laimekin "A dang bun tur ka ngah a" ka lo ti ve chiah a, kan ṭawng rual a ni ber ang chu.

"In sawifiah peih mai mai e a, engah mah ka ngai lo, couple t-shirt te pawh inneih ka ring..." tih leh min nam a rual a, engmah sawi hman pawh a ni lo, lehhawiin "Bye aw" ka han ti zui hram a, ban chu a rawn vai ve a, a hamhaih hmel viau thung.

Pheikhawk lei ka ngai lo bawka tiin ka pa pheikhawk tur chu ṭha pangngai ve tak ka lei a, kawr erawh puanthan chauh ka lei thung a, nu Remi'n puan min tahsak bawk a a bak chu mamawh dang pawh ka nei lem lo. Hostel-a kan let leh chuan dar 2 a ri tawh a, ka chau bawk aniang Benja haw hnuah ka muhil bawrh bawrh a, ka harh leh chuan chaw ei a lo hun tawh.

Ka haw hma ni hnih chhung chu chhun zanin kan inzui chhuak a, a chang leh Roma te inah kan kal a, a chang leh Brendai te inah, lenna tur dang hi kan hre vak lo a, inngaizawng ho len suau suauna hmuna kal te hi a duh tlat lo a, keiin nuam ka tih zawng tak anih vei nen.  Ṭumkhat Hlimen park-a lenpuia ka sawm pawh, "Ka duh lo e a, inngaizawng kan inpel suau suau a, kan innuih tet tet a, ka zah zawng tak" tiin min chhang a, chutih laiin dawr changkang deuha chawlh hi nuam a ti thung a, eitur tui pawh a hria, thawmhnaw mawi phei chu kei aiin a hre daih zawk.

Zirtawpni zanah chuan kham lo tak chungin kan inmangṭha a, zing kara ka chhuah dawn avangin zan rei thlengin ka insiam a, thawh hai ka hlauh avangin ka mu lo ta law law. Nu Hlimi lah chuan ka pi vitamin tur min thawn a tum a, zingah sumo counter-ah min lo pe a, zan ka mu tlem bawk nen kawng tluanin ka muhil a, ring a kham duh khawp mai.

Ka pa'n min lo hmuak a, ka pheikhawk lei pawh a duhzawng tak a nih hmel, a bun chhin a, a kalpui thauh thauh a, a lungawi ngang aniang a nui suk suk a, aman erawh ka zep ṭhen thung. Ka haw hma deuh avangin inbul vel ka ti fai hman bawk a, a tuk aṭangin ka bur ngar ngar a, kan inrawngte kan hnawih ṭha bawk a, inrinni ah ar kan talh ṭhin bawk a, mahni tawkah kan buai dun ve hle a ni. Chutih laiin Benja pawh a puin a ko haw a, a ni Mami te in aṭangin a va lam a ni awm e.

Kan inbiak chang hian thlalak hi min lo thawn mawlh mawlh zel a, picnic spot a siam dan tur vel a ni. A hisap nasa a, a phur viau bawkin ka hria. Inneih chungchang ka zawh chuan, "Engmah an sawi tawh lo" tiin min chhang a, rilru pawh a nuam ve ta deuh.

Mahse, inneih chungchang dangin min deng zui a, ka pa a ni. Chawlhni tuk khat chu chaw kan eilaiin a lo sawi chhuak hlawl a, "I nu nen kan inṭhenna pawh a rei ve leh tawj a, nupui neih pawh a hun ve tawh thoin ka hria, eng nge i ngaihdan, pawi i ti ang em?" tiin min zawt a, tu nena inneih chungchang nge a sawi lo nain hrechiang tak ka ni. Ka rilru a na dawn dawn a; mahse, a hmel ka en chuan khawngaihna ka nei tlat a, lungdam lo tak chunga ka pawm mai a ngai. 

"Insawi dun tawh em ni?" ka tih chuan, "Sawi dun tawh a; mahse, kan fate râwn ve phawt ang ka ti a, engmah thu tih tluk a la awm lo" zawi deuh tak hian a ti a, a aw aṭang chuan a inthlahrung tih a hriat theih.

"Ka hrethiam lo, i duh te chuan a pawi hleinem, i khua a har awm sia" ka tih laia ka insum nasatzia chu aw..

"Anih chuan kum tharah palai ka tir ang aw" a zawhna chu chhang mai loin ka ngawi ren rawn a, "Inneih pangngai lo deuhin man te inhlan tawp mai ila a ṭha ang" a tih zawm leh a, an pahnihin an lo sawidun tawh a ni ngei ang.

"I thu thu a ni mai" ka ti thei ṭawk a, ka hmelah chuan tih lan loh ka tum hle a, lung erawh a dam lo ru hle a ni.

Chumi zanah chuan Pa Muana te nupa inkhawmbang an lo peng a, pindana ka tawm tlat avangin nu Remi'n min lo ko leh ṭhin a, ka chhuak duh lem lo, an titi chu ka ngaithla ve reng a, ka hrehawm ru ṭun mai. 

"Kumthar veleh kan han leng nghal ang chu" Pa Muana chuan a ti a, an phur hmel khawp mai a. Mahse, ka pa chuan tihian a lo chhang a, "Rintei a rilru a la buai deuhin ka hria, duh leh college te han zo phawt sela, kumthar lamah a chhuk leh mai a ngai dawn si a, la nghah deuh pawh a pawi lo, kum laihawl velah kan ti dawn nia" a ti a. "Engtin nge a chhan che?" nu Remi'n a tih chuan, "Mi chu a hnial hran lo a, a ṭhawng ve deuh chuan ka hria, a nu Sangi pawh khan 'Rintei ngaichang phawt ila' a ti ve tho a, kan hmanhmawh lem lo" ka pa'n a ti veleh a.

"Sangi fate pawh inhrilh tawh em?" tih zawhna chu, "Hrilh tawh e, anni chu an hmin anih hmel" tiin ka pa chuan a chhang a, "A fate a rawn chhawm hlawm angem?" Pa Muana'n a tih leh chuan, "A te ber chiah khi a chhawm ka ring, midang chu nula tlangval an ni tawh a, an upa ber phei khi chu sipaiah a lut dawn a, a fanu lian zawk lah a pi ten an hauh ve bawk a" ka pa chuan a ti leh a, nu Sangi fate an fel thu leh ngaihtuahawm an nih loh thute a sawi zui luam a, "Rintei ber hi a ngaihtuahawm, han insiamrem hi a harsat dawn riauin a hriat a, amah hi ka vengthawng ber" tiin a sawi bawk a, ngaihtuahawm leh venthawn ngai ber han nih chu nep ka inti ru deuh a, nu Sangi fate lahin an pawm hmel viau si a, ti khawtlaitu nih pawh chu thil nuam a ni bik lo. 

Benja hnenah chanchin ka hrilh ve luam a, "Phur pui ve zawk rawh, nangte chu Aizawlah i awm daih a, i pa amah chauh a awm anih phei chuan nupui neih chu atan a ṭha ber a lawm, inhmangaihte inkar dangtu nih chu a ṭha lo ang, keini pawn hrehawm kan tih em ni" tiin min lo chhang a, a dam zawnga thil ka thlir thiam ve a ngaiin ka hre  ta. 

Ka pa bulah chuan, "Inneih chu induh hunah lo ti mai rawh u, man inhlan tawp anih phei chuan ka awm ve kher pawh a ngai lo a, min nghak duh suh u" tiin ka hrilh a, "I awmlai nisela a ṭha ang" a ti ve leh tlat a, July thla velah an tum dawn anih hmel e.

Christmas leh kumthar vuak vetah Hruaizeli nen kan inkawp chawt a, ka haw hma deuh khan a chhungten khaw ṭhenawma revival camping-ah an luhtir a, a inhlan thei lo pawlah a lo ṭanga, chutih laiin inkhawm erawh a taimak phah hlauh thung a, "Ka nun a tuihalin ka hria" a ti ve ngei a, zaikhawm turin min sawm deuh reng tawh a, peih vak lo chung pawhin ka telpui ve hram hram ṭhin.

Kum thar ni a kan inkhawm bang chuan ka pa leh nu Sangite thingpui in dun ka va hmu a, biakin gate bulah no dawm chungin an lo titi a, min hmuh rualin nu Sangi chuan min lo nuih var var a, ka chhuk hun tur min lo zawt bawk. "Balhla ka um a, i hawn ve dawn nia" tiin a lo nelawm khawp mai a, han belhchian takah chuan ka pa nen an inmil hmel viauin ka hria, kohhranah a inhmanga, inchhung uap lum tur chi a ni bawk a, ran a vulh nasat thu nu Remi'n a sawi ka hre tawh bawk nen an inthurual thei viau dawnin a lang.

Hruaizeli chuan, "A taima lutuk, zing ṭawngṭai pawh a kal ṭhin" a tih vangin rawngbawlna lamah ka pa a thlawp thei dawnin ka hre bawk a, ka tan chuan hnialna tur a awm ta meuh lo ti ila a dik ang, a nuthlawina a rei tawh a, ka pa nen an kum a inrual viau bawk.

Aizawla ka chhuk hmain ka pite inah chaw ka han ei ve a, ka nu pawh a lo tel ve a. Ka pa nupui neitur chu an lo helh deuh a; mahse, ka nu zawkin a lo thlawp khawp mai a, ka pi pawh a khak nghe nghe. Ka nu chuan Aizawl lama nau neih a tum lo a, an pa chhungte lakah a inthlahrung niawm tak a ni. 

Class ṭan hma kar khat vel zet a la awm tihah ticket ka tifel a, ka kal dawn zanah nu Sangi'n Balhla thlar thum lai hi min lo pe a, kei aichuan ka pa a lo lawm zawkin ka hria. "Lo haw leh vat rawh aw" tiin min chah ve thlap a, ka haw leh hun a nghahhlelh chhan pawh ka hria a, a phur ang em chuan ka phur ve lo. "Class chawlh hunah a ni mai" tiin ka chhang a, a haw tur chu ka pa'n pawn thlengin a va thlah bawk. 

A tuk zingkarah sumo-in ka chhuk a,  Kimkimi'n pass lawm a rawt vanga chhuk hma ka ni a, Hostel-ah lut hmasa loin an inah ka innghata, Mawitei nen balhla ka hawn sak chu an lawm ve khawp mai.

Benjamina chu ram lamah a awm daih a, mi a rawn chah zin tehlul nen pass lawmni ah pawh a lo kal thei lo, "Thil ka leisak che a, Roma ka lo kentir dawn nia" a ti mai a, kartawpah chauh a lo haw tur thu a sawi bawk. Ka lungawi lo chuan ka be ṭha duh lo a, nilengin a message pawh ka chhang lo a, Roma hmel takngial pawh hmuh tur a awm lo chuan minti lungawi lo zual.

Kan ṭhian hoin eirawng kan bawl a, Kimkimi nuin cake te min siamsak bawk a, mark ṭha tak hmu hlawm lo mahila ṭhian hoa han pass chu nuam ve tak a ni, kan zingah chuan a tichhe ber ka ni a, ka pass ṭawk ṭawk laiin anni pahnih chuan second an pha a, an tih ṭhat ber ṭum a ni thung.

"Awmpuia pawh a pass ṭhat kha, a pa boral vang khan a tih chhiat deuh ka ring ania, a ti ṭha lehpek khawp mai" Mawitei'n a tih chuan, "Zir miah lo pawhin ani chu a pass thei ang" Kimkimi'n a lo ti ve vat a, result te chu kan han en ho leh rih a, political science ho chu department dang zawng zawng aiin an ti ṭha a, fail an tlem ber bawk.

 "Ṭhutthlenga pangpar saw tu ta nge ni a?" tih thawmah chuan kan hawi rual ṭhap a, Kimkimi nu chuan keimah ber chu min lo en a, a ngaihna ka hre lo khawp mai.

"Thilfun pawh a awm" a tih leh takah chuan kan va en a, ka ta tur a nih hmel, engtik laiin nge a lo dah hman pawh ka hre lo, engmah lah chu a rawn sawi si lo a. Thilfun ka en chuan kawrlum sen duk nalh zet hi a lo awm a, pangpar pawh a senduk tho a ni. Ka ṭhiante chuan an inchuha, thlate an lakpui a, an rak chul mai.

"In inhau em ni, i va lawm loh hmel ve?" Mawitei'n a tih chuan ka chhang lem lo, phone ka en a, "Roma a lo thleng tawh em?" tih hi vawi thum lai min lo zawt a, "Ka hmu tawh" tih zawngin ka chhang a.

Mawitei a lo riak ve bawk nen kan mengrei khawp mai a, ka muthilh chuan dar 1 a pel tawh. Tukṭhuan pawh eitawh loin Hostel-ah ka phei a, Hosteller dang an lo rawn let loh vangin kan floor chu a reh ṭhuap a, a khawhar thlak reuh khawp mai. Nilengin ka mu a, zanah pawh chutiang tho chu a ni. Ka biak tur neih chhun ti ila, min biak tum awmchhun chu Benja a ni a, ka tan chuan induh khum ve hi a theih tak tak loh, nikhat lek ka biak loh chhung pawhin ka ngai a, a lungawi lohna te pawh ka ngaih vang tho a ni.

"Kartawpah ka lo haw dawn nia, ka duat viau ang che" a ti chu ka lungawipui ve leh mai a, swimming pool tur an lai zo a, in an sa ṭan dawn a, a la buai dawn chauh anih hmel.

Ni thum chhung chu Hostel ka chhuahsan lo, zirtawp tlai erawh eitur leiin kawngpuiah ka chhuk a, a tukah Benja a lo haw dawn bawka tiin chhuak turin ka lo inring lawk a, zan pawh ka mu hma khawp mai. Zing dar 8 velah a lo thleng a, chaw eikham veleh kei ka insiam a, dar 9 ah chuan ka lo inpeih at tawh. A kawrlum min pek kha ka ha a, ka inhmeh zawng hi chu hre ve tak a ni, thawmhnaw mawi hi kei aiin a hre zawk a, inchei dan tur pawh min hrilh fo mai.

Dar 10 pelh hretah min lo call-in gate pawna a awm thu min lo hrilh a, kan han inhmu chu nuih a za deuh, khabe hmul a lo zuah a, a sam lah chu a han buk khawp mai a, a thu em em lehnghal. "I va patling ve aw" tih pahin ka thlek vang vang a, zu a in nasa nge a hah vang zawk ni a cher a, a mitkhur a tla dawk bawk a, zan tam tak mu tawh lo hi a ang ber.

"Nang chu i hmelṭha" min kuah thuak pahin a ti a, a perfume rimin min bawh chuk mai.

"Khawiah nge kan len dawn?"

"Roma te inah?"

"Roma te in bawk, hmun dangah te leng ve ila"

"Lo kal rawh u a tia, min ngai ve aniang" a ti mai a, peih lo deuh chungin kan inphur chhuak a.

"Pangpar kha mawi i ti em, a senno lei rawh ka tia, a senduk a lo lei daih a, pangpar senduk te chu a mitthi rawng em mai ka tia, ka hau kha a thinrim lehnghal a, vawikhatmah min tir tawh suh a tia" tiin a nui kur kur a.

"A hmel ka hmu lo reng reng, a lo dah lai pawh ka hre lo" ka tih chuan, "A va han laktlak loh" a ti zui hluk a, engtin nge kan awmnate kha a lo hriat zawk ni, a lo dah a, a chhuak leh nghal daih aniang.

Kan va thlen rual chuan a ṭhianpa chu a au lauh a, a nuin inchunga a awm thu a lo sawi laimekin Roma chu a lo chhuk a, Benja chuan a lo melh rum khawp a, Roma erawh a ngawi ngul, min lo chhawn pawh a nei lo, min melh zawk a, choka lam a pan daih a, fridge a va hawng zui a, a titau em mawni.

"Mawla, ka ai lo awh turin ka tih che kha, i hmel pawh an hmu miah hleinem,  ka aiawh chu khawilam nangma aipawh i awh zo lo" tih pahin Benja chuan a zui zel a, "I bengchheng" pakhat chuan a lo ti duh lek a, melh pawh a melh ṭha duh lo. A nu nen kan lo nui ru tet tet a, "I hmelte chu zu zuar luhkhung lo haw leh lam i va ang ve" Roma'n a tih chuan a inhnek ri dawm a, "I nghawng kha engati nge?" tih riin a zui zat bawk.

"Saphirikin min seh, huanah a tam lutuka" titu chu Benja a ni.

"A va zia lo ve aw" Roma'n a lo ti hluai a.

"Tinge" Bena'n a tih chuan, "Saphihrikah i chang dawn anih chu, eng power mah an nei lo" Roma'n a lo ti pek a, a nu nen kan lo nui huk.

 

Inhnuai room-ah kan inzui thla a, games an khelh dun leh takah chuan an ṭawng dun barh barh a, Brendai bialpa mawl thu ngawt an sawi, ka haw laiin an lo inṭhen a, Ruatkima chuan inawhhlum a lo tum a ni awm e, "A inkhaina hruiin a dawl lo a, a tla thum dawt ri ah an va man chhuak alawm" tiin an han nuihzat khawp a, Brendai erawh an ṭan dun hle a, "Kan biak sak dawn nia" an ti leh lawi bawk a, Ruatkima'n an puihna a lo dil anih hmel e.

Ka ning deuh chuan a games khelh lai chu ka ve en pui a, "Lo ṭhu rawh" tih pahin Benja chuan min lo melh zawk a, ṭhu ta mai lo chuan dawhkana a phone chu ka la a, kalpui mai ka tum chu phawk deuh hian min lo thlek a, a ui deuh nge mawni. "Eng nge a?" a ti hu a, "Ka en dawn" ka tih laiin, "Kap rawh, kap rawh" Roma'n a lo ti chul a, min ngaihven zui ta lo bawk a phone chu lain khum lam ka pan nal nal a, password a dah lo hlauh mai.

Khumah bawk chungin ka enkual a, chat chu a tam khawp mai a, Brendai inbunruahna vel chu ka chhiar peih lem lo, hmeichhe hming a awm mang lo a, u Lizzy message pawh a rei hmel viau tawh. Ka thai chho leh chiah chuan ka mitla deuh thil ka hmu a, 'Zawlpala' tih inziak chu a ni, a display picture ka en vat a, Awmpuia a ni tih ka chiang, an lo inbe ṭhin a maw?

Rang deuhin chat-ah ka lut a, an lo inbe nasa mai, khai aw, a inbiak hun lah chu hmanni mai, Christmas bawr vel kha a ni, ka thai chho par par a, Awmpuia status a reply na aṭangin a inṭan a, photo caption a va zawt fiah anih hmel. 'I told the sunset about you' tih inziak chu, "Eng nge i hrilh?" tiin a va zawt a, "I chungchang chu a ni lo phawt ang' tiin Awmpuia'n a lo chhang a, Awmpuia status hi ka en ve ziah a, he thil a hman lai hi ka hre miah lo.

"Infinity mawza kha em ni?" Benja'n a tih chuan, "Infinity zungbun pawh a ni maithei" tiin Awmpuia'n a lo chhang leh a, Emotican hmangin an inzuihzat ve ve bawk.

"Infinity awmzia i hria em?"

"Chutiang hre lo rual ka ni em ni?"

"Keichuan awmze neiin ka pe a, nang chuan i pek hnuah i ṭhen" 

"Tuman hma hun an sawi thei hleinem, i ṭhen loh tur thu i tiam chu ka ring" an innuihzat leh a, Benja chu a nui duham thei bik khawp mai.

"Ka tiam ang chu, ka ṭhen dawn hleinem, ka hmangaih kumkhua dawn alawm"

"A va ṭha ve, i kumkhua chu rei tak anih beisei ang" chu message chu Emotican thinrim deuh hmelin a chhang a, "I la duh reng a ni maw?" tih thuin a zui bawk.

"Ka duh kumkhua dawn alawm, kan inkar chu a tawp tawh ṭhiana, i ta a ni tawh e" ti a Awmpuia'n a chhan chuan an uang mai mai lo tih a hriat theih a, ka chhiar zawng pawh chuan ka lo ṭang ru ṭun mai a ni.

"Harhchhuak teh, i kumkhua chu a tawp tawh, khawvel tharah kan cheng tawh ania" Bena'n a tih chuan sei deuh tak hian a lo chhang a,  "I kumkhua kha chatuan daih pawh nisela kei nen chuan inkhaikhin duh suh, a tawn ve hma che khan ka lo hmangaih tawh tih hria la, hriatrengna ni loa amah neitu i ni kha lawm zawk rawh, kei aiin hmangaih la, duat zawk la, ngaihsak la; mahse, kei aichuan i hmangaih rei thei lo tih hria ang che, i kumkhaw sawi thleng rawkin ka hmangaih dawn a, i ṭhen anih chuan ka la let bawk ang" a ti tawl mai a, a bak chu eng message mah a chhang let tawh lo. 

Benja chu ka va melh vang vang a, "Rinte, i ril a ṭam tawh em?" a tih pawh chuan ka chhang lo, hnul ulh lek lekin ka awm a, a tu ve ve pawh hian minti lungngai a ni. Kei tehlul hi heti khawp hian min hmangaih a, an pahnih tan hian ka ṭha tawk lo ve vein ka inhre bawk.

A lo hawi thut a, khuma ka bawk chu mit tizim sun hian min melh a, "Lo muhil lo la aw, ka zo ṭep, Roma tel loin thil tui deuh kan va ei dawn nia" a ti a, "Min hruai ve ru" Roma'n a tih chuan, "I hnawk, kan thuril sawina i dal" tiin a nui kur kur a, thochhuakin Benja chu ka va kuah ringawt a, ani thung chuan Games a khel mial mial a, min zawt dawn lo emaw ka tih hnuah "I check zo tawh em ni?" a ti khauh a, ka nui tawi hle ringawt.

"Hmeichhia ka be ngai lo" 

"Ka hria alawm?" a sam ka chul a, "Naktukah ka met ang" a tih chuan, "I inhmeh alawm" ka ti leh mai a, lo hawiin ka biang a rawn fawp zauh a, a lungawi hmel viau bawk.

Jannuary thla tawp lamah class kan ṭan a, Benja pawh ram lamah a kal leh tawh a, mamawh lama a lo haw changin kan chhuak dun a, kan inhmuh loh karin phone-ah rei tak tak kan inbe ṭhin. February thla ah ka nuin nau a nei a, mipa kg 4 zeta rit a ni a, a duhawm reuh khawp mai. "A sap hming tur lo phuah rawh" a tih tlat avangin Jacob tih ka phuah sak a, a tirah fiamthuin 'Esaua' ka tia, a'n duh lo em em khawp a, U Rinawma nuin a hming a phuah ve bawk a, Jacob, Lalhruaikima tih hming a pu ta a, unaupa ka nei ve ta reng mai, a tira ka lawm loh ang aiin a lo pian hnu chuan ka lawm leh lawi a, hmuh hlan ka nghakhlel viau tawh.

Ni a liam ve zel a, internal exam te kan han nei chho leh a, kan final semester anih tawh vangin tute pawh kan ṭang a, Awmpuia phei chu a ṭang zual aniang ṭhian a kawm lo a, Peka nen an inzui pawh ka hmu ngai meuh lo, class a lo kal zawk a, a haw leh nghal zel a, in lamah a buai viau nih te ka ring.

Peka chuan, "Ngaihzawng ve deuh reuh a neiin ka hria" tiin min hrilh a, Noeli thung chuan, "A nei lo, a awmnate nau ania, a hmeichhia zawk khan a ngaizawng a, a nu Maengi'n a tihpui deuh bawk a, Awmpuia chuan a duh hleinem, Rintei bak duh tak tak a la nei lo" tiin Kimkimi bulah a lo sawi thunga, Noeli hnenah hian ngaihzawng chungchang hi a sawi hreh ngai lo a, engkim a hrilh ka ring. 

Vawikhat chu Bazarah ka hmu dun a, a hmeichhe kalpui chu nula sam dum hmelṭha deuh mai a ni a, an inkhai bawr lutuka, min hmu ve lem lo bawk nen ka be ta lo a, ka enzui reng thung. Hmeichhe hmelṭha leh fel a tawng anih phawt chuan keichuan ka duhsakna zawng zawng nen ka pawmpui khawp ang, hlim takin awm ve sela tih hi ka duh ber a ni.

Ka pa nupui neih hun a hnai telh telh a, nu Sangi pawn min rawn ngaihsak sawt khawp mai, kan khuate lo chhuk an awm hi chuan huan thlai leh thei tih angreng hi ka pa'n min lo thawn ṭhin a, nu Sangi lo thawn tir tih ka hria, ka pa hian a fak ṭhin khawp mai a, "I chanchin pawh min zawt ve ziah ania, i tan pawh a ṭawngṭai ṭhin" tiin min hrilh a, ka tan a ṭawngṭai ṭhin tih chu ka awih vak lo nain ka pa lung a dum em a, chu zawk chu ka lawmna a ni.

Benja pawn inneih a sawi ri ta zauh zauh a, a duh dan chuan college ka graduate ruala tih mai a duh a, ram lamah kan awmdun anga, picnic spot enkawl pahin huan kan siam anga, kan indang nghal ang tih chu a remruat dan a ni a, hnialna em em pawh ka nei lo. "Mahse, i chhungten an remti dawn em ni?" ka tih chuan, "An remti ang, ka pu bulah ka sawi chiang tawh alawm" a ti ve nghat a, rilru erawh a buai, remti ringawt mahsela kan inkar a zau angreng si a, an chhungkuaah chuan ka intatlut thei tak tak angem, ka hriat loh lamah min lo haw viau angem tih te ka ngaihtuah a, an mi ngaihdan lah a ṭha lo nasa mai si a, innei tur chuan ngaihtuahna ka la seng thiam meuh lo.

Zan khat kan inbiak leh chuan palai chungchang a lo sawi a, "I haw hunah palai ka lo tir anga, favang velah inneih kan tum anga" tiin min râwn zui a, 2nd internal a hnai leh tawh a, external exam-in a zui mai dawn a, ka graduate har dawn tawh lo. Hmachhawp nei lem lo ka ni bawk a, pasal neih chu ka duhdan tak pawh a ni, in lamah ka pain nupui a nei dawn a, ka mal bik dawn riauin ka hre bawk a, pasalte thlazar hnuaiah awm ila, chhungkua din ila, ka nun pawh a nuam zawkin ka ring.

A sawmna chu "Aw" tiin ka chhang a, a phur khawp mai, ka haw veleh palai a lo tir anga, a chhungten an remti lutuk lo anih pawhin kan nek lui ve ang tiin thutlukna kan siam ta chu a nia, chhungte nek luih chu a harsa lai ber tur a ni. Mahse, Benja chuan a chhungte kianga min awmtir a tum lem lo a, kan inneih ruala min indanpui a tum bawk. 

Pasal nei tura rilru ka siam hnu lawkah zankhat chu Awmpuia message ka dawng nawlh a, "Naktukah inhmu lawk ang aw, thil eng emaw ah i thurawn ka mamawh?" tih hi min lo thawn a, "Tunah pawh i sawi thei ania" tih chu ka va thawn let a; mahse, "Hmaichhanah kan sawi dawn nia" a ti teh tlat a.

Englam nge ka zawh chuan, "Thutlukna liantham deuh siam ka ngai a, i ngaihdan i sawi anga, i sawi angin ka ti tawp mai ang" tiin min chhang a, ngaihdan chu ka nei thiam nghal mai a, min râwn kher a ngai lo a sin maw le, a tana mi pawimawh ber ang maiin ka thurawn a duh a, ka sawi anga awm a tum bawk chu ania; mahse, keichuan atan ṭha ber tur ka lo hrilh ang, a phu ve bawk alawm, keimah vangin a tuar rei mah mah tawh a ni.

A tukah chuan canteen-ah ka lo nghak a, rei pawh ka awm hman lo tihah min lo phone a, "I awmna kha mi an tam lutuka, a bengchheng em mai, Library-ah lo chhuk mai rawh" a lo tih vang chuan hmanhmawh deuhin ka chhuak leh a, Library ka zuk thlen chuan a lo awm reng tawh.

A bula ka ṭhu chu sawi duh nei leh hreh hmel zet si hian min en a, ka sawi hmasak mai a ngaiin ka hria. "Keipawn hrilh tur che ka nei?" ka'n ti hmasa thawr a, a nui ringawt.

"Sawi hmasa la" a tih chuan, "Pasal ka nei dawn a, ka graduate zawhah kan innei ang" ka ti tawl a, a nui hmel chu makti hmelin a inthlak nghal a, min en vang vang mai. 

"Mahse, a la chiang lutuk lo, palai a lo tir dawn a, a rem chuan favang velah kan tum ang" tawi tein min nuih a, a awmdan chu sawi tur a nei ta lo emaw tih mai tur a ni. Hetianga ka sawi hian thutlukna a siam fel nghal theih ka ring, min rawn kher a mamawh lo tih pawh a hre tawh ngei ang. Ka rilru chuan tihian ka hrilh a, 'Dam tawh rawh, move on la, ngaihzawng chu nei rawh, i zalen a, tun aṭang chuan hlimna zawng zawng nei ang che' tiin, ka thinlung chhungril ber aṭangin duhsakna ka hlan a, kei vang hi chuan na leh tawh ngai lo sela ka duh bawk.

"Kei chu..." tiin a ngawi dat a.

"Engthilah nge ka thurawn i mamawh a, thutlukna lian tham deuh chu eng nge?" ka lo ti zung zung a, phur hmel thei ang berin ka nuih bawk a, ani chu a nui ve tak nain a hlim lo tih ka hmu chiang hle thung.

"Thurawn pawh a ni chiah lo, ka hrilh ve hrim hrim ang che" a tih takah chuan thutlukna a siam tih ka hrethiam, ka duhdan chiah a ni, hetianga amah ngeiin thutlukna a siam hi.

"Delhi-ah ka awm dawn?"

"Maw..!?"

"MA ka zawm ang, coaching kal pahin"

"Chu chu maw...i ....sawi...tum?"

"Aw, ka graduate veleh ka buaipui ang, i pasal neih hunah chuan ka awm thei dawn lo anih hmel" tawi tein min nuih a, sawi tur pawh ka hre lo, lawm tur nge lawm loh tur tih takngial pawh.

"Pa Sawma fapa upa zawk hi Delhi-ah a awm a, a bula awm turin min duh a" tiin a chhungte an ngaihtuahawm loh thu min hrilh zui a, hei hi em ni a sawi tum chu le, delhi a awm tur hian em ni ka thurawn chu a mamawh, ka lo beisei dan kha chuan....

A hmel chu ka enchiang a, a sawi duh a sawi lo tlatin ka hre pek a, ka ngaihbel zawk nge mawni?

"Zirzawm leh chu a ṭha lutuk alawm..." ka ti ban charh a, chutah ka kuta zungbun chu a lo en a, ngaihtuah chhuah nei niawm tak hian a nui a, "Ka lo haw leh hunah chuan in lo innei hman tawh dawn a, inhriat zui zelah ti ang aw" zangkhai deuh hian a ti a.

"Min hre duh tawh pawhin ka ring lo" ka tih chuan min han melh rum der a, chumi hnuah kan innuih ve ve a, "Lungleng tur an awm em?" ka tih chuan a inngaihtuah vang vang.

"An lung a leng angem aw?" ka lo nui hak a, "Kan ngai hlawm ngawt ang che, i kal hmain chaw eikham ang u" ka lo ti vat a, "Tehreng mai, exam zawh veleh kan ti dawn nia" tiin min chhang a,  class neih a hun avangin kan inzui chho a, chutia kan inzui dun chu kan semester hoin min lo chhaih nak nak a, "Nui leh Paa chu khawiah nge in kal dun a" ti a min lo fiam tawk pawh an awm.

Classa ka luh hnute chuan ka ngaihtuah zui reng a, ka thil sawi kha sawi hmasa lo ta ila eng nge a sawi ang le tiin ngaihtuahna ka nei a, ka ngaithla hmasa lo kha pawi ka ti bawk. Mahse, a thil tum erawh ka thlawp khawp mai, a tana ṭha ber pawh a ni, ka ngaihtuah leh ani ngaihtuah hi chu a inpersan hle reng anih hi.

Kartawpah Benja a lo haw a, a Ni Pawli te in tharah a va riak phei a, zana min lo biak chuan thu lawmawm deuh a lo sawi a, ni Pawli pawn nau a pai ve tawh anih hmel. "A rai theih pawh ka ring tawh lo ania, a lo la in fit zak zak khawp mai; mahse, fa pakhat bak chu a neih theih pawh ka ring lo" a lo ti hlut a, inneih kan tum chungchang pawh a lo hrilh a, "I pute thu thu" tiin a lo chhang a ni awm e.

Chawlhniah a nu tlawh turin kan kal a, tum loh deuhin sitting room-ah pa ber a lo ṭhu luau a, tiang hawl chungin a lo kal ve sawlh sawlh tawh. A nauin thingpuite min lo lum a, a nu erawh ṭhutthlengah a lo mu bam a, "Ka nuam lo deuha, ka mu zal mai mai" a ti tak nain a damloh hmel riau a, kan hmuh apiang hian a cher telh telh maiin ka hria. Benja chuan damdawi leina tur a pe a, a tam tham bawk nen an la hreh ve khawp a; mahse, Benja chuan a hnawn lui ve tlat a, inentir ṭha leh turin a hrilh bawk.

A tukah Benja chu ram lamah bawk a liam leh a, kartawpah pawh a lo haw ta rih lo. Chawlhni zana kan inbiak chuan beisei loh lutuk thil a rawn sawi a, a nu inentir kha result a lo chhuak a, a pumpui a lo cancer a ni. "A chawkawng lamah a ṭai darh tawh an tia, zai a ngai ang" a ti bawk a, a rilru a hah hmel khawp mai. Ka thiam ang tawkin ka lo hnem ve a, "Lo haw ka duh a, ka chhungte  bulah ka sawi ang; mahse, an ngaihsak vak pawh ka ring lo" a ti zawi ruih a, "Lo haw tho mai rawh" ka ti ringawt a, tih dan ka hre bik lo a ni.

"Ka lo thlen hunah ka lo hrilh che anga, kan va kal dun leh dawn nia" tiin kan inmangṭha rih a; mahse, zingah chuan engmah a lo sawi lo a, a lo haw ta em pawh ka hre lo. Ka call a chhang thei lo a, a lo thang mek anih ka ring.

Tukṭhuan eikhamah chuan ka insiam sa a, class pawh kal loin hostel-ah ka lo nghak tawp a, dar 10 thleng pawhin chanchin a lo sawi lo. Roma ka bia a, an inbia em ka va zawt a, "A nu kha a cancer a, 'Ka pu hnenah pawisa dil a ngai' a tia, a bak chu a la rawn sawi leh lo reng reng" a lo ti a, Benja chu an in lamah a awm tawh zawk em mawni.

Call leh ka tum laitak chuan amah zawkin a lo call a, "Rinte, Patea nen kan va kal dawn a, lo kal rih lo mai rawh, ka lo tlawh kawi ang che" a lo ti zung zung a, an chhuak nghal dawn aniang a hmanhmawh hmel khawp mai a, a Patea ṭawng ri te pawh ka hria. Chutia a chhungte lamin an ngaihven sak anih chuan a lawmawm lam a ni, a Patea meuh a kal dawn lehnghal a.

An kal hlanin khumah ka lo mu mai mai a, a message ka nghah chhungin ka lo muhil daih a, ka phone ri ah ka harh hlawl mai. "Pawnah ka awm, lo chhuak mai rawh" bul ang reng zet hian a lo ti a, hmai pawh phih buai loin ka chhukthla a, step-ah a lo ṭhu ka va hmuh chuan thil dik lo a awm tih ka hre thei.

"Eng nge chanchin?" tih pahin a bulah ka va ṭhu a, thlang lam a melh vung vung mai a, a hmel chu a nur nang bawk.

"Pawisa a pe a, a duhtawk aniang"

"Engzat nge a pek a?"

"Singkhat"

"I puten engtin nge an tih?"

"Chhungkaw aiawhin a lawm a kal, ka pocket money ka pe ve a, inzaina pawh a daih lo ang, eitur ṭhate a ei a ngai a, damdawi man a to dawn bawk si"

"I ni i hrilh ve em?"

"Aw, an hre vek tawh, ka lo kan ve ang chu a tih kha"

"Cancer chu inhem te, chemo khai te a ngai ṭhin a sin, an harsa ve bawk sia" a lo bu nghat nghat a, keimah zawk pawh chu ka rilru a hah. 

"Ka va han nep tak em" a ti leh hluai a, ka kuah ringawt a, sawi tur a vang a ni. "Ka va haw phawt teh ang" tiin a tho hluai a, "Tih deuh zung zung a ngai, an khawtlai reng chuan kan inchhan hman lo mai ang" a ti bawk a, engtin nge a tih dawn ka hre lo, a pu te a be leh dawn aniang. "Chanchin lo sawi rawh u" tiin kawngpui thleng chu ka zui thla a, a tlan liam thlengin ka thlir bawk.

Roma ka be zui a, "Benja kha a haw phei chiah a, boruak a ṭha vak dawn loin ka hria, Lza nen lo va ngaihven teh u" tiin ka hrilh a, "Ka va phei nghal ange" a lo ti ve vat a, chanchin min hrilh turin ka chah bawk a, Bena hi chuan sawi loh chin a nei ṭhin a, engtin nge an inbiak te pawh hriat ve ka duh a ni.

Rei vak loah Roma chuan a chhuah thu a lo sawi a, amahin a kal anih hmel. A thlen thu pawh message-in a lo sawi a, a reh zui vang vang a, ka message a lo chhan leh chuan chaw kan lo eidawn mek a, message ka han chhiar chu ka chaw thleng ka dah let rang khawp mai. Ka pindan lamah ka chho a, khumah bawk chungin message chu ka chhiar nawn leh ngat a, "A patea'n Rosalyni a neih chuan a nu an enkawl sak tur thu a hrilh a, engmah la hre lo angin awm rawh, i bula sawi lo turin min ti a, ka lo hrilh ru che anih hi" tih thu a ni. 

Ka lungawi lohzia chu aw, thin a rim ngawih ngawih. 

Benja chu ka call nghal a, hre lo der anga awm pawh ka thei lo. Phone a lo chhan rual chuan, "Thil ka hrilh ang che, tumah kha inthunun tir suh, i cousin naupai kha i patea fa anih kha, ni Pawli man hlanni khan pindana an infawp lai pawh ka hmu ania, kar let nan hmang ang che" ka ti sawk sawk a, thinsa phata call ka ni bawk a, sawi tim leh pawisak engmah ka nei lo.

"Eng maw i sawi a, i ṭawng fimkhur teh..?" a tih rual chuan, "Ka mit ngeiin ka hmu" ka ti vin leh hlur a, "Rinsangpui" a tih ri chu ring ṭha tak a ni.

"Min awih nange?"

"I chiang em?" 

"Ka chiang lutuk, amah khan min vau a, hei vang hi alawm nupui nei tura a duh em em che, a thuruk ka hriat vangin min hua alawm" 

"I chiang tak tak maw?" a aw chu fiah ṭha fek fawk tak a ni, aw ti a ka chhan leh rualin call chu a tawp hmiah a, thawk ka la hawk mai, tunah khan bomb fuse ka dep kai niin ka hria.

(End of chapter - 35)