BLUE BAYOU (CH - 36) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 36

"Rinsangpuii" Confessor-in a tih rual chuan hall chhunga awmve te mit chu ka chungah a fu ṭhup a, ka vawikhatna tur a ni lo chungin ṭum dang ang bawkin ka zam a ni. Muangchangin ka ṭhuthmunah ka ding chhuak a, ka bula ṭhuin, "Ṭha deuhin aw, a rei lo zawnga tih dan ka hrilh che kha" zawitea a tih ri chu ka hria.

"Hetah hian lo chhuk rawh le" tiin pitar chuan ka lam a lo hawi a, a mitmeng fim zet chuan min melh a, duh lo eng ang mah ila ka pehhel theih a ni lo.

"Kal ta che" 

"Saw nu saw a ngeng ania aw"

"Engmah a sawi leh duh chuang lo ang" tih angreng a ri nawk nawk a, chhuk paha ka sir vel ka melh kual chuan min ngei hmel fe hian min melh hlawm a, min lainat emaw min khawngaih awm hmel ka hmu lo.

"Tun ṭum chu tih dan kan thlak a ngai tawh ang" pitari'n a tih laichuan Quad sir ka thleng thla tawh a, eng nge an tih dawn ka hre lo, mi pahnih lo chhuakin ka ban tawn tawnah an rawn vuan a, Quad-ah chuan min nawr chho zui a, pakhat chuan a ipte aṭanga hrui rawn phawrhin ka ban chu a phuar bet nghal mawlh mawlh a, chutih rualin thawm a ri mur mur a, ka chiai ru khawp mai.

Ka kut an phuar zo ta maw tihah chuan min nem ṭhu hnawk a, "Ṭhingṭhi rawh" tih riin a zui zat a.

Hotunu lam ka va hawi chu dak vah hian min lo melh a, "Hun i la nei, i sualnate puang la, A hnenah ṭhingṭhiin ngaihdam dil rawh, i tlai hmaa inlamletna hun pek i ni a, i sualnate a ngaithla anga, a angchhungah a lo pawm leh ang che" zawite fiah zet hian a ti a, ka hnung lama thawm ka hriat rualin pakhat chuan ka lu chungah bucket a rawn khai a, an thum nghal huk a, chuveleh min rawn leih bawrh a, ka rak ṭhat mai.

"Engthil nge i tih?"

"Engthil mah ka ti lo" ka aw chu vin ṭha tak a ni.

"Engvanga helai hmuna lo kal nge i nih?" chu zawhna ka huatzia chu aw, a hmai bula au khum chiam mai ka duh. Ka sam huh chuan ka hmai a hliah vek a, chumi kar aṭang chuan rum theihtawpin pitar chu ka melh a, a hmel chapo hmel zet chu ka va hmu thei.

"Eng nge i tih sawi rawh?" a tih leh rual chuan lu ka thing nawk a, "Tih ka nei lo" a aia ring mah chuan ka ti leh a, ka sawi zawh rualin tui bawk chuan min rawn leih leh a, tomoto ṭawih rim a nam huam mai. Ka ṭhinrim thut a, ka tal nghal chiam bawk.

"Ngun takin ngaihtuah let rawh, sual lian tak i ti tih kan hriat kha, kum 5 kaltaah khan nunchang ṭha lo tak nen i lo lut a, han hawikual mah teh, helaia lo lutte hi sualna nei veka lo lut in ni, i sual puang la, i tihsualte pawm la, in tan nunna kawngkhar hawn ala nih laihian a ang chhungah tlu lut rawh u" a sawi laichuan ka hmaah pakhat a lo ding a, puanvar thianghlim tak hi a keng a, "I la tlai lo ania, a la ngaidam duh che" tiin chu nu chuan min melh vang vang a.

"Chhan leh vang neiin i lo kal a, i lo kalchhan chu eng nge hriat kan duh, ngaihdamna kan dil sak ang che a, chu erawh i sualna i pawm chauhin kan ti thei ang, mahni sualna hre loin tuman a chhandamna kan chang thei lo, ngun takin ngaihtuah let la, engvanga lo kal nge i nih chu min han hrilh teh le" Pitar chu ka bulah lo kalin ka chhipah kut a rawn nghat a, a hmel ka han en chuan engtin emaw tak hian ka tirilah min ṭham a, ka khur ru nasa hle tawh.

"A hmutlang vek che a, i inpawm a duh mai a ni, hlau reng reng suh" tiin min hrilh a, a aw chu a fiahin a khauh em em reng.

Ka chhip aṭanga tui an rawn leih leh laichuan ka inpetruh fan fan a, ka ṭah a chhuak ngawih ngawih. Eng thil nge ka tih maw, thil tam tak a thleng a, thawnthu sei tak a ni. Ka mittui luang a rawn hmuh rual chuan "Inpuang rawh" a ti leh nghat a, ka han ṭawng dawn ṭhin a, ka aw a chhuak hleithei lo. 

"A sam kha han hui kiang deuh teh" Pitarin a tih chuan ka hnung lam aṭangin ka sam an rawn huikiang sawk sawk a, "Pawt tho ula, ding chungin sawi rawh se" a tih leh rualin min pawt tho zui a. Ka din takah chuan ka thawmhnaw huh nasatzia pawh ka hrechiang zual, ka kut chu phuar beh anih vangin kut hnungsuihin ka ding zum reng a, ka hawi chhuak ṭha ngam meuh lo.

"Tunge helai hmunah hian lo hruai che?" tih zawhna chuan min deng dawt maiin ka hria, tuin nge helai hmunah hian min hruai lut maw?

"Nangma thua lo lut em ni i nih?" lu ka thing nghal nawk a, "Tuin nge lo hruai lut che?" tih zawhna bawkin a zui a.

"Ka pa" ka tih laichuan ka mitthlaah ka pa hmel a rawn lang kuar kuar a, ka duh lo chunga min hruai luh lai kha ka mitthla let bawk a, mangchhia ang mai a ni.

"Eng vanga helai hmuna lo dah che nge a nih?"

"Ruihhlo vangin..."

"Engtin maw?"

"Ruihhlo" ka aw chu zawi tak a ni, ka chawmawlh riau a, vawtin min ṭham bawk nen ka khur ru dar dar bawk.

"Eng ruihhlo nge ni?

"Zu leh damdawi.." 

"A ṭha lutuk, sawi zel rawh..." ka sira dingin a lo tih chu ka va melh hrawk a, eng chu nge ṭha ka hre ve hauh lo, ka nunhlui rapthlak tak takte kha min sim tir nge an tum a, ka hriatchhuah fo hi an duh zawk le, tu hnenah nge ngaihdam dil tura min duh pawh ka hre lo, an hnenah nge Pathian hnenah, ka sualna puang turin mi heti zat hmaah hian min din tira, misual ka nih thu min fah mawlh mawlh a, a dawt leha thleng tur pawh ka hria, ka tan erawh awmze nei lo thil vek a ni.

"Chu lo chu sawitur dang i la nei em?" a dang ka sawi leh beisei zet hian min en a, ka ngaihtuahna chu kum 5 liamtaah khan a awm, ka sawi chhuah kher a ngai em ni tiin ngaihtuahna ka nei a, hei hi chu thil ṭul lo tak niin ka hria.

Pitar chu melhin, "Min hmu tlang vek i tih kha, ka sawi ngai loin A hre vek lo em ni?" ka ti a, min rawn din hnaih laichuan ka mitah min en ran a, hmeichhe dawhthei tak hmel ka hmuin ka hria. "I sualnate i pawm a duh a ni, inchhira inlamlet turin a duh bawk che a, i lo daipelh tawh anih pawhin inchhira a lam i hawi phawt chuan a ngaidam leh ang che" tiin min nuih var var a.

Mahni ka han inenlet a, phat leh sawimawi tur engmah ka hre lo, ka inpawma, ka thiam loh a nihzia pawh ka hria, dem ka nei hek lo. Pitar chu ka melh vang vang a, "Ka sualna chu ka pawm alawm, ka thiam loh vek a ni" ṭap ṭuau chungin ka ti a, ani chuan thaw huai hmel a pu thung.

"Midangte hi han hriattir ve teh?" tiin min kai phei dat dat a, dawhsan hmawrah min dinpuiin ka ṭawng ngaichang zet hian min en bawk. "Hotunu, ka ṭah a chhuak lutuk, min sawisak mai rawh?" ka ti ta ngawt a, ṭum dangah pawh a tih dan fo a ni a, min lo hnial bik lo.

"Vawiin hian kan unaunu leh kan ṭhiannu Rinsangpui'n sual puanna a nei a, ruihhlo ngai, a pain beidawng taka a lo hruai luh a ni. Vawi tam tak a OD a, inchhungah buaina a thlen fo ṭhin. He hmunah hian a vawi 5 dinna a ni tawh a, a tawpah chuan a sualna a inpawm ve ta, mihring chuan a sualna thai bo turin tih theih kan nei lo; mahse, Pa hnenah kan dilsak anga, zahngaihna leh khawngaihnaa khat kan Pathian hnenah kan theihtawpin kan dilsak dawn nia,  tunah Rintei tan chhandamna dilin i ṭawngṭai rual ang u" a sawi zawh rualin hall chhunga awm ho chu an ding suau a, a ṭawngṭai mur mur thawmin a zui a, kei erawh ka ding ngawi reng. Ka ṭawngṭai ve dawn ṭhin a; mahse, sawi tur ka hre lo, ka hul vek a ni.

Ka inchhir, nia...ka inchhir tehmeuh mai, ka sualna pawh ka inpawm ngei a, ka dik lohzia pawh ka hai lo, he lai hmuna awm tlak ngawih ngawih hi ka ni a, ka duh lo chunga lut mah ni ila vuina pakhatmah ka nei tawh lo. Mahse, sual puanna ringawt hi em ni he hmuna ka luhchhan chu tih zawhna ka nei, mite hriatah ka puang ta ngei a, danglam eng emaw tak awm tura ka ngaih laiin engmah danglam awm ka hre lo, ṭum dang ang bawkin rilru a na thar a, ka hrehawmna a zual tih chauh a ni. Pathian chuan min ngaihdam duh chu ka ring a, ka inchhirzia pawh a hriat ngei ka ring, sual kawng zawh tawh lo tura rilru ka siamna pawh a rei tawh a, ka ngaihtuahna leh ka rilru puthmang pawh a hre ngei ang; mahse, eng emaw kim lo a awm a ni, ka sawifiah thiam meuh lo, chhungril lama che dawt awm tura ka rin ang kha a awm lo a, mi piangthar ten thinlunga lawmna an neih ang kha engmah ka neih awm ka hre lo, ka sualna ka pawm tak vanga ka thawven phah awm lah ka hre lo a, danglam awm lo chu ka hrethiam lo hle zawk a ni.

Confessor chuan malsawm ṭawngṭai nain a tawp a khar a, a ṭawngṭai zawh hnuah puan varin min tuam a, "Pathian khawngaihna changtu, amah ringtu leh a hnungzuitu i ni tawh e, i hma hruaiin i hnung a dawl anga, i tan lungngaih leh ṭahna tur a awm tawh lo ang, a rawngbawl la, a hnenah in pumpek la, i kawngte chu a kawhhmuh zel ang che" hlim hmel pu sarha tiin ka biang leh chalah te a fawp a, tun angrenga ka laka nelawm hi a la nei ngai lo, he hmuna ka luhtirh aṭanga a ngainatawm ber ṭum a ni.

Ka ṭhutna lam ka pan hnu chuan midang an ko chhuak veleh a, mi ṭhenkhat hi chuan dawp emaw zawh thui vak ngai loin an sawi nghal zung zung a, an hlauh vang leh an nin vanga dawt sawite pawh an awm ṭhin, an lo lut a, rei loteah an chhuak leh mai ṭhin a, luhlul tlemte chu awm ve ṭhin bawk mah se, kei anga hun duh rei erawh an awm ngai lo. Sual puan aia hreh zawk ka la nei a, chu chu helai hmun chhuahsan hi a ni, pawn lamah thlakhlelh ka nei lo a, min thlahleltu an awm pawh ka ring lo, ka hmathlir chu ka awmna center bang chhungah hian a tawp a, ka khawvel zimteah hian lungawina ka zawng a ni ber.

Tlai dar 3 velah kan bang a, bualin lam pan nghal mai ka tum chu ka roommate-in min au ri ka hria a, "I hnung nawhsak i duh em, inbual rual ila" tih pahin a lo tlanphei dat dat a, kan awmna center hi compound zau lutuk a ni lo nain ngaw kara awm a ni a, Aizawl aṭanga hla lo te thingtlang kawng chhengchhe angreng leh tlawhpawh harsa tak a ni, a hmun thlenga motor a kal theih loh vangin tlawhtu kan nei khat a, kan chhungte hi kum khatah vawihnih khat chauh an lo kal ṭhin, hmeichhia hlir kan awm nain thawktu mipa an awm nual a; mahse, thuneitu hmeichhia hlir an ni a, an strict viau bawk.

Hall pakhatah hian khum 30 chuang zet a awm a, a ho hoin kan mu dal a, bualin pakhat kan inṭawm bawk a, kan bualin pawh chhungkaw lian luahtham zeta lian a ni, a thlang maiah lui a awm avangin tui kan hnianghnar a, chutih laiin ei in a chhe em em lawi a, heng vangte hian ṭhenkhat chuan chhuahsan vat an duh a, rei tak an awm ngai lo.

Ka roommate ka han ti ve tak nain Thantei nen hian khum kan inṭawm a, pindan khata khum inṭawm hi pathum kan awm a, roommate kan inti ve mai zel a, a lo luh tirh khan awm hmasa hoin an ti duhdah deuh a, ka khawngaihin ka khum ka ṭawmpui ta ngawt kha a nia, kei hi chu ka awmna a rei tawh a, tumah minti buai emaw min ngaina an awm lo a, Thantei hi ka ṭhian neih chhun a ni bawk. Champhai khawchhuak a ni a, a insawi dan chuan helai hmunah hian a pi leh a pu ten an lo dah a, call girl a ni awm e.

Bualin kan thlen chuan midang pahnih an lo inbual mek a, kan va lut chu min lo melh hrek hrek a, min be lem lo. "Bucket kha ka hmang duh ania" ka tih chuan pakhat zawk chuan min lo pe vat a, tuikhur tlangah ṭhuin ka inleih nghal bawrh bawrh a, a vawt lutuka, taksa ka hit mup mup thei.

"Sahbawn ka lo hnawih ang che" tih paha min lo hnawih nghal mai a tum chu, "Inbual ve rawh, midang an lo lut leh huk dawn ania" tiin no ka lo pe a, nui hmel a pu reng chu ka hrethiam lo lek lek a ni.

"Eng nge i hriat a?" lawm vak loa ka tih chuan, "Kan chhuak rual thei dawnin ka hria" phur hmel deuh hian a ti a, ka ngaihtuah loh lam daih a ni.

"Thla 5 chiah alawm i la awm?" ka tih chuan, "Hotunu khan visiting day-ah i chhungte kan be dawn nia, i chhuak thei tawh ang min ti alawm, ka pu a lo kal hunah min sawipui dawn a" tiin a nui var var a, "A va tihzia ve" tih bakin ka chhang lo.

"Chhuak rual ang aw, kan chhuah hunah kan khuaah i lo zin ve anga, in khuaah pawh ka lo zui ve ang che" ka bula ṭhut pahin a ti zui a, chhuah ka tum lo thu ka hrilh chuan phawk fein min en a, a hamhaih hmel khawp mai.

"Engati nge chhuah i tum lo, i awm rei ber tawh a, i ning ve tawh lo em ni, phone leh tv takngial pawh a awm lo a, ei a chhe bawk si, hrehawm i ti ve lo em ni?" a ti hlut a, lu ka thing mai thung, pawn lam thil ka thlakhlelh lohna chu rei tawh tak a ni, phone pawh nei ila biak tur ka hre chuang lo ang, ei in tuihnai pawh ka thlahlel chuang lo, ṭam hlum daih pawh ni ila pawi ka ti hek lo.

"I chhuah duh loh chuan keipawh ka chhuak lo mai ang"

"Engvangin maw, chhuah i chak tawh em kha?"

"Kan pahniha chhuah dun alawm ka chak, chhuahsan che ka chak hleinem" ka lo nui hak a, "Min ngai dawn lo em ni?" tiin a ner zui nang a.

"I chhuak anih chuan ka hrezui tawh lo ang che, i awm chhung chauhin kan inṭhian ang" ka lo ti awlsam et a, a lawm vak lo.

"Ṭhian pawh i neih loh kha, ka awm loh hunah chuan i khua a har dawn lutuk, ka lo lut leh tawh mai mai lo ang" a ti hmak hmak a, a dik ka ring, chhuak tawh te hi an lo lut nawn ngai lo.

"Chhuak rual ila, eizawnna tur te kan dap dun anga, ka pawisa khawl pawh ka dah thuhruknaah a la awm ka ring, sumdawnna bul ṭannan kan hmang dawn nia" a ti zui siam siam a, "I hna ngai i thawk leh dawn lo em ni a?" fiamthua ka tih chuan, "Ka sim hmak tawh ang, helaia lo let leh aichuan.." tiin min chhang a, ṭap zawih zawih chunga sualpuanna a neih laikha ka hrechhuak a, insiamṭhat a tum thu hi a sawi fo ṭhin, a ṭawngṭai mawlh mawlh reng a, piantharna tak tak a nei bawkin ka hria, hetiang hi ania danglam awm tura ka lo beisei ruk ve ka tawn ve si loh kha.

Zanah chuan devotion kan neih zawhah kan mu nghal mai a, Thantei erawh hmeichhe ṭhenkhat nen ṭawngṭaina pindan lamah an inzui phei a, zan dar 10 ah eng an tih thim ṭhin avangin kan mu hma ṭhin khawp mai. Zan muttheih loh ka neih avangin a mengrei pawl hi ka ni ziah a, zanin phei chu thla arkaiden zan a ni a, ka mutna aṭang chuan van lam chu a lang eng uar a, a khawharthlak khawp mai a,  ka muhil thei pawhin ka ring lo.

November thlaah visiting day a lo thleng dawn a, a tam zawk chu chhuah inring an ni hlawm. Ka nu Hlimi leh ka pa an lo kal ṭhin a, ka pa chuan kum 2 ka awm hnu khan min lakchhuah mai pawh pawi a ti lo a, keimah zawkin chhuah ka duh lo kha a nia. Kum dangah pawh ka hnial ta zel a, ka pa nena kan inhmuh lohna pawh kum a vei leh reng tawh. visiting day hnuhnung berah khan Nu Hlimi chiah a lo kal a, a pa chu a damlo niawm tak a ni, phone kan kawl theih loh vangin pawn lam chanchin hriat theih dan a awm lo a, thuneitu lamin engmah an sawi si lo a, chutia chanchin a awm tak loah chuan ka pa chu a damṭha zel anih ka ring.

Thantei lo let hnu lawkah eng an rawn ti thim a, zingah hian dar 5 ah devotion kan nei ziah a, thawh tlai a theih loh vangin an muhil hma ṭhin khawp mai. Kan khum lu lam tukverh aṭang chuan thla eng a rawn inkap lut riai a, ka bula mi pawh a muhil thei bik lo aniang a inlet leh sat sat ṭhin. Bawkkhupin pawnlam ka thlir a, pawnah chuan meilum aipaha thla eng thlir a chakawm khawp mai, zanin chu a eng mawi em a, mutbo san mai atan chuan a uiawm a ni.

"Rinte.." a rawn tih chuan a lam ka hawi vat a, "Ka bialpa nen khan October full moon hi kan lawm dun ṭhin a, min lo hrechhuak ve angem le?" a ti reuh a, ka nui ringawt.

"Ka ngai e..." a han ti leh vang vang a, a hnuk a ulh deuh nge mawni a aw chu a zawi ṭiak a, insiamremin van lam chu a melh ve vang vang a.

"I chhuak ṭep tawh alawm" ka tih chuan min chhang lo.

"A ngai ngawt ang che" ka tih leh rual chuan min lo melh vat a, "Tak tak maw" zawi deuh tak hian a ti a, kei ka lo bu nghat nghat.

"Nang, bialpa i nei ve em?" a tih chuan ka ngaihtuahna a mang vekin ka hria, ka chanchin hi engmah ka hrilh ngai lo a, helaia ka awm chhan pawh hi ruihhlo ka tih nasat vang tih zawng kha a hriat chhun a ni.

"Kan ta ni lo, thinlung lama kan ta ni si hi an awm a, chutiang zawng chuan bialpa ka nei" ka nui hak a, a hrethiam zan lo aniang min thlek ha a, "Ngaihzawng tak tak ania ka tih?" a ti leh nghat a.

"Umm...nei ve ṭhin e?"

"Ngaihzawng i ngah tawh em?!

"Ngah lo e, hmangaih neih hi a hlauhawm, ngah ka duh lo" kan nui ve ve a, zawhna a nei leh zat bawk.

"Kan mi hmangaihte thinlung neih a an taksa neih tel loh nge, an taksa neih a; kan kianga an awm reng chunga an thinlung neih tel loh hi na zawk ang?" tiin min zawt a.

"A na ve ve; mahse, duhthlan a ngai anih chuan a taksa neitu zawk nih chu ka duh" nui chunga tiin van lam ka thlir a, chung zawhnate chuan thil tam tak min hriatchhuah tir a, ka tawn hnu ve ve, ka lo ṭahpui vawng vawng tawh kha a ni.

"Anih leh, hmangaih pahnih a neih theihin i ring em, nge damchhungin pakhat chiah?" a ti leh a, ka chhan hmain min zawh chhan chu ka zawt hmasa a, ani chuan, "First love can never die an tia lawm" a ti a, chu thil chu keipawn ka la pai ve reng mai.

"Hmangaih chu pahnih ka nei tawh" ka tih chuan thla eng hawisanin min lo en vat a, "Tute nge?" a ti nghal thuai a. Nunhlui tam tak mitthla chungin heti hian ka chhang a...

"Pakhat zawk chu hmeichhia zawng zawngte duhthusam ang mipa hi a ni a, a felin a hmelṭha a, lehkhathiam leh hawihhawm em em mai a ni, a nungchang chuan tute pawh a lem a, a duhlai nih chu thik leh elrel ka hlawh nasa ṭhin. Mipa pa tak mai leh a rilru natnate pawh tilang ve mai mai ngai lo, chhel taka tuar ṭhin mi a ni a, hmangaihna ngah tak a ni bawk.

Pakhat thung erawh a hmasa zawk mize letling thawk a ni ve thung a, sual leh tawrawt tak a ni, vawi tam tak kan inah lo kalin buaina a lo siam a, nu ber hmaah ṭap chungin a fanu a duhzia thu a sawi ṭhin. Zan thum laite kan inkawtah a ṭhu tlaivar a; chuti chung chuan a duh ang engmah a hlawhchhuak ngai chuang lo. Kawngka aṭanga nam chhuah a hlawh fo chungin lo kal a sim phah lo a, anchhe pui pui nena hnar a nih changte, a rilru a nat vawng vawng chang pawhin a lo kal nawn leh ṭhin. Hmangaihna avangin a mittui a tla fo a, vawi tamtak hnawl a ni chung pawh khan a beidawng ngai lo, a hmasialna chuan chhelna a pe ṭhin." ka ti duah a.

"A tu zawk chu nge i hmangaih nasat zawk?" tiin min zawt leh khauh a, ka chhanna chu "An pahnihin" tih a ni, nasa zawka hmangaih ka nei lo miau a.

"Pakhat zawk chiah han thlang teh" a tih teh ṭalh a, vawiin thleng hian ka thinlungah an la cham ve ve a, engkim hian hun bik an nei tih hi ka pawm thiam dan ber a ni.

"An ngai tawh ngawt ang che a, tu zawkin nge ngai ang che?" chu zawhna chuan ngaihtuahna a ti thui vawng vawng mai, min ngai ve ang em, a tu zawkin nge min hrechhuak ve ṭhin ang?

"Ka hre lo, min ngai lo ve ve maithei" zawi tea tiin luhkhamah hmai ka phum a, thawk ka han la vang vang a, engkim takmeuh chu an thar leh a ni, hriatchhuah fo hi ka duh ngai lo a; mahse, hun kal tawh hi amahin a rawn inlar nawn zel mai a, a theihnghilh theih tak tak loh.

Thantei chuan ka ṭap emaw tiin ka sam a lo chul a, "Muhil tawh rawh, thawh i hai ang" ka tih takah chuan a mu ṭha ve vat a, kan piah deuha phun ser ser thawm leh generator thawm bak chu thawm dang a awm meuh lo. Van var thiak kuk lam chu ka han hawi a, rilruin nunhlui a chhuikir vawng vawng a.

Benjamina hnena a patea chungchang ka hrilh hnu khan ka beisei loh dan hlirin thil a inher a ni, Benja chuan ti tura ka tih ang khan a ti ngei a; mahse, kar khat chhung zet chu boruak dang a awm lo, a patea'n a pha tlat a, a cousin lahin a bialpa a puh bawk a, an insawifihlim chiang viau a ni awm e. Kei leh Benja chu dawt sawi kan ni ta a, kar khat hnuah ni Pawli'n min lo call-in an chhungkaw thila ṭawngkam nei tawh lo tur leh Benjamina fuih khaw lo zawnga thil ti tawh lo turin min hrilh zui a, kei chu a engkimah bur bun ka ni.

Benja chuan min ring a, vawikhatmah min zawt nawn lo. Kan inkar pawh a han ṭha chho viau dawn a; mahse, a hma angin thil a kal thei tak tak lo thung, a rilru la pengtu chu a nu a ni a, a thlahthlam thei bik si lo a, ka bulah lah a hlim thei tak tak lo. Chuti chung pawh chuan ṭhen ka tum ngai lo a, anin nupui neih a duh bik lo bawk a, chutih laiin a chhungten an lo nawr ve reng bawk.

Zankhat chu a phone call ka dawng hlawl a, a nu a chau thut a ni awm e. Chumi zan chuan a nu te inlamah a riak a, "A khua a sik a, a bp te hi ahniamin ka hria, a pum hi ahma aiin a mar bawk a" tiin min lo hrilh a, a aw aṭang chuan a mangang ru hle tih a hriat theih.

"Tihngaihna a awm lo Bena, i chhungte thu chu zawm mai rawh" ka ti ta ngawt a, thutlukna siam harsa tak kha awlsamtein ka sawi chhuak a, duhthlan tur dang a awm miau lo a ni.

External exam kan neih laiin a nu chu an zai a, damdawiinah pawh ka va kan ve nghe nghe, a puin pawisa tam tham tak a pe a, pawisa lamah harsatna an nei ta lo bawk a cabin nuam takah awmin treatment ṭha thei ang ber an pe a, damdawiin aṭanga an chhuak pawh a pu chuan an driver lo tirin an inah an va dah thlap a, ei in thlengin an ngaihtuah sak bawk.

Benja chuan a nu chu a awmpui chawt a, kan inbiak apiang hian chanchin ka zawt ṭhin, "Palai an kal tawh em?" tiin.

Exam kan zawh ni thlengin palai kal thu emaw inneih chungchang an sawi engmah kan hre lo a, an thu an zuk leh anih ringin kan lawm ve khawp mai. Kan khaw lamah pawh haw rih loin ka cham ve reng a, ka pa bulah chuan Graduation day kan hman zawh hnua ka haw tur thu ka hrilh a, ani chuan haw phawt turin min duh a, a chhan pawh nupui nei tura min la nghah vang a ni.

Ka haw hreh deuh chu Bena'n haw turin min ti ve tlat a, ni hnih khat chauh cham turin ka haw a, kan in ka han thlen chuan ka pa chu a lo inpeih viau tawh. Zan lamah man an inhlan a, kan pastor a awm loh vangin pro pastor-in in lamah a invawntir a, zingkarah an rawn lawi fel der a, an ṭhiante leh chhungkhat hnai mi tlemte nen chaw kan eikhawm ve a, zan lam erawh ka tel pui ta lo. Ka nu ka va tlawh a, kan nautein zan muttheih loh a neih vangin an tlaivar zing viau hi a lo ni a, "Zanin chu lo riak daih rawh, saw lam an ngaihtuahawm chuang hleinem" ka nuin a tih vangin ka riak zui a; mahse, ka pa awm a nuam vak lo aniang min lo phone zing khawp mai.

Ni hnih ka cham a, ka lakah nu Sangi a ṭha bawk a, ṭhian thar nei ang mai hi ka ni. Ka chhuksan leh dawn chuan a dan pawh a dang ta deuh a, amah chauha ka pa ka kalsan ṭhin ang kha a ni ta lo, ngaihngam leh rilru nuam takin ka kalsan thei tawh a ni. Aizawl ka thlen tukah Bena ka va tlawh a, a nu pawh a lo zia viau tawh a; ka balhla hawnsak ka han pe te chu a lawmthiam khawp mai. Ka kal hma deuhin a ni ten an lo kan ve a, an lo haw fel deuh chiah anih hmel. 

"Sawi an nei em?" ka tih chuan a lo hrethiam vat a, "Engmah an sawi lo, an ti tak tak dawn lo aniang" phur hmel deuh hian a ti a, kan awm dan chu a thlamuanthlak loh takzet, sawi an neih hun kan nghak hi a ni ber a, chutiang nghak chunga kan inkar tih ngheh chu thil har tak a ni, engtikah nge ṭhen hran kan nih ang, engtikah nge heng thil hi a tawp ang, zawhna ka inzawt reng ṭhin.

Graduation dinner pawh chhim ve loin Benja bulah ka awm chawt a, ani pawh a chhungten an la thlah zalen ve rih a, engmah thil dang ti loin a nu a la awmpui ve chawt a, a chhungte hnen aṭangin percel an dawng zing viau a ni awm e. Thei leh eitur ṭha chitin reng hi a puin a lo thawn a, hetiang baka induhsakna hi a awm bik dawn em ni tih tur a ni a, Bena nen erawh kan lawm a famkim thei lo. Ti hian min hrilh a, "Ka duh dan vekin an ti a; mahse, sa talh tura an buatsaih hi ka angin ka hria, an ngawi rengte hian ka thaw a ti pik zo, eng emaw hi a inṭham rengin ka hria a, an phone call te hi hlauthawng chungin ka chhang ṭhin, min lo tlawh zin deuh phei chuan nuam ka ti ngai lo" a ti ve thlawt a, a lainatawm ngawih ngawih.

Rosalyni nen an inbe ngai em ka zawh chuan lu a thing mai a; mahse, a phone ka en ṭumin Rosalyni message ka hmu nual a, a nu chanchinte lo zawtin hnem a lo tum nasa ve khawp a, thil eiṭha tur leh inenkawl ṭha turin a chah mawlh mawlh a, a ṭawngṭai pui ṭhin thute pawh a hrilh a, Benja erawh chuan a chhang let ngai lo. 

Roma te ṭhian hoin an tlawh zing ve a, inrinniah phei chuan a huhoin kan va kal ṭhin a, ṭum khat kan leng ho chu Rosalyni chungchang kan sawi kai a, "An lo innei anih chuan mitthi vui angin kan inngai anga, an inneihniah pawh kawr dum kan ha ang" Brendai'n a tih chuan an nui hawk hawk a, "A nu dam deuh hunah an inru mai dawn alawm" Roma'n a tih laiin, "Nupui nei chungin in inkawp lui tlat anga, an inchhir khawp ang chu" Lza'n a ti ve thung a, an sawi zui barh barh a. Bena nen chuan kan inena, kan innuih tawi hle ringawt.

Chumi zana kan inbiak chuan ka beisei loh deuh thil hi a rawn sawi a, "Nupui ka neihsan che anih pawhin kan inkar hi titawp lo ang aw" a rawn ti mauh mai a, ngaihtuah pawh ka ngaihtuah thui ngam lo. 

"Ka nu hian ei azawng thei tawh dawn lo a, a pasal lah hna thawk thei tak tak a ni si lo a, ka buaipui zel an ngaih ka ring, ka nauten lehkha an zir zawh hma chu ka enkawl an ngai ang" a ti zawm leh a, a ko rihzia chu ka hai bik lo, a chhungte thu zawm mai chu a tana ṭha ber a ni a, kan inkar erawh hunin a la hrilh ang tiin beiseina ka la nei ve fan a, a chhan pawh tawpna ka sawi thei tlat lo a ni.

Graduation day chu a hnai zel a, Benja ngawt ka lo ngaihven laiin Awmpuia kal hun a lo hnai hle tawh, gown kan va lak niah Noeli hnen aṭangin a chanchin ka hria a, "Kan khaw lamah a haw chho rih a, naktukah a lo chhuk ang, a nuin a lo thlah dawnin ka hria, ticket pawh an hauh fel tawh" tiin min lo hrilh a, inhmuhna hun kan neih tawh loh takin graduation day-ah chuan hmuh ngei ka tum a, ṭha taka thlah ve pawh ka duh.

Min hruai turin Benja a lo kal a, ka graduate min lawmpui nan pangpar leh pheikhawk mawi deuh hi min lo leisak a, ka insiam chu ka khumah ṭhu chungin min lo nghak ran a, mi graduate an han hlim tehlul nen kei erawh zing aṭangin ka ṭah a chhuak ṭun reng a, ka piaha ṭhu pawh chu a hlim bik loin ka hria. Ka insiam zo chu khumah min pawt ṭhuin a ka hma ah a rawn ṭhu sawt sawt a, a pheikhawk lo ken chu ngawirengin min buntir a, a sam ka chulsak laia a lo hawichhuak chu tawi tein ka nuih bawk.

"Pheikhawk hi leisak che ka duh a, tlereuh inleisak aichuan a ṭha zawkin ka hria, pheikhawk ṭha chuan hmun ṭha takah a hruai ang che tih thu an sawi ka hre tawh" ka lo nui hak hak a, a kut a lo phar rualin ka lo kuah vat a, "Ka chhuang lutuk che, i exam laiin ka tibuai reng che a, i pass lo ang tih ka hlau hman alawm" a ti bul bul a.

"A chhe ber chiin ka pass; mahse, pass ṭha ka inti teh ania" nui chunga ka tih chuan, "Nang aiin ka lawm ang" a ti leh a, zep loah chuan pass ka inring lo khawp a, ka beisei aiin ka result a ṭha ka ti ve tak nain paper tinah pass ṭawk ṭawk ang ka ni, ka ṭhiante pahnih erawh chuan first an pha a, Awmpuia thung chu top 3 ah langin mizoram pumah pahnihna a ni a, pakhatna nen pawh an inthlauhna a tam loa, lawmpuitu a ngahin Professor te pawn an chhuang khawp mai.

Benja chuan hall kawtah min va dah a, rei awm loin min letsan leh thuai a, ka ṭhiante hmel ka hmu mai lo. Ka phone call an chhang thei si lo a, ka nghahrei deuh hnu pawha a la rawn lan tak loah chuan ka luhsan a, kan department lama ṭhian ṭhenkhatte bulah ka ṭhu ve ta ngawt a, Awmpuia leh Noeli pawh ka hmu chuang lo, hall chhung chu a thim deuh khup a, a bengchhengin a uap em em bawk. 

Department hrang hrang chu a indawtin stage-ah min ko chho a, Political science ho an koh laimek chuan hmanhmawh deuha Noeli lo tlan thla ka han hmu a, a hnungah lukhum khum ṭha mawlh mawlh chungin Awmpuia'n a lo zui bawk a, kan semester ho ṭhutna zawn an lo thlen chuan an department mipa hoin an lo au a, ṭhenkhatin an lo kuah chung bawk a, vawiina hlimna tur ka hmuh chhun a ni mai awm e. 

Political science ho an chhoh hnuah kan department chu min ko chho veleh a, stage a kan din laichuan friends forever tih hla sain an zai rual dual dual a, hmeichhe ṭhenkhat an ṭap bawk a, kei erawh ka chau nghulh maiin ka hria, college zawh hun hi ka nghakhlel hle ṭhin a, tun dinhmunah erawh a bul aṭanga kal ṭhat leh ka chak a ni, engkim hi a bul aṭangin ṭan ṭha leh thei ila, hetiang lo deuh hian hun hmang chho thei ila, vawiin ka hman dante pawh a danglam ngei ang maw le.

Lukhum kan vawr zawh hnua backstage lama kan lut chu ka ṭhianten min lo ko vat a; mahse, ka kal dawn laitak chuan tu emaw hian ka kutah a rawn vuan chawt a, a lam ka hawi chuan Awmpuia a ni. Inthlakna room lamah min pawt pheiin a phone a phawrh zui zat a, ka darah min lo kuahin thla min lakpui a, ka ṭhiante an lo tel ve bawk. Midang an tam a, inbiakna hun pawh kan nei mang lo, a bula ṭhu turin min sawm a; mahse, ka ṭhianten min koh ve sek avangin "Va kal mai rawh, banah kan inhmu dawn nia" a ti a; mahse, kha kha ka hmuh hnuhnun ber ṭum a ni, ban hnu thlengin ka hmu zui ta lo, tluang taka kal turin ka thlah lo a, duhsakna emaw lawmpuina thu pawh ka hrilh lo a, mangṭha thu takngial pawh ka sawi ta lo.

Kar khat hnuah Peksanga nen bazarah kan inhmu hlawla, Awmpuia chu graduation kan hman hnu lawk khan delhi-ah a chhuk a, a phone  number a thlak thute pawh min hrilh nghe nghe a. "Signal a nei ṭha lo deuh a, a number i duh chuan ka pe ang che" a ti zet a; mahse, thil dang a sawi zawm leh a, "I chanchin hriat a hreh deuh aniang, kan inbiak ṭum khan 'Rintei chungchang engmah lo sawi suh' a ti ringawt a, pasal i nei dawn angin a sawi bawk a, tak tak em ni?" tiin min zawt khawl a, chhan a har khawp mai.

"Ka bulah chuan chanchin kan inhrilh zel dawn nia a ti asin" ka ti a, Peka chuan, "A rilru a na alawm, a la duhzia che i hriat ve tho kha, a reh rei bik lo ang, i chanchin pawh min lo zawh leh tho ka ring, an khuaa a awm laipawh khan min lo zawt ziah alawm" a ti thung a, chhung thu han hriat chuan rilru a ti hrehawm ve ṭun mai, a number thar chu ka la ta tho a, ka be zui ngam ta lo thung.

Lehkhazir leh turin ruahmanna ka nei lem lo a, ka chhungte lah chuan hna zawng ve mai turin min duh a, ka nu phei chuan hnaruak dil tur min lo thawn ngun hle tawh. Vawihnih khat chu hna dilin written exam ka nei ve a, ka tling lo chiang khawp mai. Chutianga ka tangkhang laimek chuan Nanai'n a thawhna dawrah hna min lo hmuhsak hlauh a, dawr lianah skin care lam bik atan beauty advisor hna a ni a, company lam aṭangin hlawh a awm a, dawrah erawh midang nen kan thawh a inang reng a, dawr chhung tih fai te, customer lo chhawn leh a remchang a awm apianga company products lo kawhhmuh chu ka hna a ni, buai a na angreng a, beauty advisor tih kha chu a hming ve mai chauh a ni a, dawra thawk satliah nen kan danglamna a awm chuang lo, ka thawhpui dangte nen kan hlawh lakna a in ang lo deuh e tih mai chauh a ni.

Benja nu pawh chemo a khai thei tawh dawn a, nitinin zemabawk lama cancer hospital-ah an kal ṭhin a, an vei vahnan Bena puin motor a kawl tir a, Bena'n a va hruai mai ṭhin a, chhun lamah hi chuan inhmuhna hun kan nei ngai lo, zan lam pawh weekend hi kan inhmuh theih hun a ni mai a, kar khatah vawihnih khat chauh kan inhmu ṭhin bawk a, phone-in kan inbe zing hle thung.

Inrinni tlaikhat ka hna bang chu Roma'n min lo call ve hlawl a, "Sipaiah ka tling a, a lawmnan naktukah chaw eikhawm kan rawt a, Bena'n a lo hrilh tawh che em?" a lo ti hlut a, chhuna kan inbiak bak kha chu Benja nen kan la inbe leh lo a, a la buai anih ka ring. Roma chu lawmpuina thu te ka hrilh ve luam a, "Bena'n a lo hruai mai ang che" a tih pawh chuan ka kal ngei tur thu ka hrilh a, phone kan dah hnuah Benja chu ka call zui bawk.

Mahse, ka han sawi ṭan dek dek chu, "Ka kal theih hmel loh, ka pute an lo leng phei dawn a, nidangah kan va leng mai dawn nia" a lo ti zung zung a, ani a kal theih loh chuan ka tan kal a chi bik loh a, Roma pawh aman lo hrilh leh mai turin ka chah a, engtin nge an inbiak zui chu ka hre tawh lo.

Chau deuh viau mahila chawlhniah chuan ka va inkhawm ve hram a, ka pa hian ka inkhawm em min zawt ziah a, inkhawm loh hi a nuam ṭhin lo. Chawhma chauh ka inkhawm, chawhnu lamah erawh ka mu der der a, dar 2 vela phone call ka dawn chu Benja hnen aṭangin a ni. Phur deuhin ka chhang a, lehlam thawm erawh a reh vung vung a, a hre thei lo emaw ka ti hman hial.

"Hello.." ka tih leh laichuan, "Rinte..." zawi ruih hian a rawn ti a, thil ṭha lo tawng ang maiin a aw chu a zawi.

"Ka lo chhing sek a, i pute chu an haw tawh em?" ka tih chuan,  "Aw, an haw deuh chiah a, Rinte..." a ti leh halh a, ka tho chhuak rang khawp mai.

"Eng nge thleng a?" hlauthawng ru fe a ka tih chuan "Zaninah palai an kal dawn" a ti ta mai a, ka nghilh dup maiin ka hria.

"Engtin nge niang" ka ti thei ṭawk a, chhanna ka beisei lo, min chhang lo zawk sela ka duh.

"Khawvela ka hmangaih ber nang chu ka nei thei dawn lo che a, ka hmangaih miah loh Rosalyni hi awlsam takin ka nei thei thung a, Pathian rorel ve dan hi, a fair lo ngawt mai ti raw" a ti chuai raih a, ka hrawk chu hnawhtu awm ang mai a ni, thawk pawh a har.

"I tih dan dan a ni mai, engtin pawh awm ila ka dem lo ang che" tiin ka han hnem ve bawk a, mittui nen takmeuh a ni ka sawi, ka pawm thiam a ni bik lo a, duhthlanna harsa tak a nihzia ka hriatpui ve vang chauha sawi thei ka ni, a rilru ti hrehawm zual tura ṭawngkam neih loh hram ka duh a, ka insum nasa hle bawk.

Tlaiah Brendai'n whatsapp group a lo siam a, keini pahnih awm dan tur chu sawi ho an rel a, Roma nen an sawi dun nasa khawp mai. An chat chu ka chhiar ve zel a, ṭawngkam erawh ka nei ve lem lo. Brenda chuan inneih ṭhulh theih dan tur hrang hrang a lo sawi a, "Inru mai rawh u, a tirah chuan inbuai ve nak anga; mahse, hetiang thilah hi chuan chhungte hi an rilru a nem ve leh mai zel a nia, i nu pawn chemo a khai zo ṭep tawh a, a ngaihtuahawm bik lo ang, a hautak zual pawh a zo tawh alawm" tiin Benja hnenah thu a rawn a, inruk chu a duh anih phawt chuan pawi tihna ka nei lo a, ka rilru chiai leh mangang chuan pawisak a nei tawh lo a ni ber.

"Rintei te khuaah han chho ula" tiin Roma'n rawtna a nei ve leh a, Brendai'n "Hotel khawi laiah emaw awm rih zawk rawh u" a ti ve thung a, engmah chu hnialna ka nei lo, Benja chauh chu ka ngaichang tawh.

Dar 8 velah a rawn lang ve ta hram a, "Inneih chu october thlaah an ti" tih zawng hi a rawn sawi a, engkim an rel fel ta anih hmel e. Ka va call a, "I ṭha maw?" ka va ti leh tlawng a, "Ṭha lo" tih ngawtin min chhang leh.

"Chaw i ei em?" ka tih chuan, "Inruk an sawi kha ka hmu a, i duh em ni?" a lo ti khauh a, keichuan a duh dan ang apiang zawm ka tum thu ka hrilh a, eng thutlukna pawh siam sela ka hnial dawn loh thu chenin ka hrilh a, "Ka lo ngaihtuah ang aw" a ti pawh chu ka pawm thlap a ni, rilru fim taka inngaihtuah turin ka duh a, phawk lek rih viau mahila kan nakin hun thui tak thlengin a hril si a, ngaihtuahna fim hman kan ngai ve ve a ni.

A tukah chuan ka hnathawhnaa ka awm laiin a message a lo thlenga, "Ka nu hian chemo a khai zo ṭep a, a ṭha ve hret hretin ka hria, inruk kha i duh anih chuan chemo kan khai zawh hi min lo nghak la, thildang chu ka lo buaipui ang" tih hi min lo thawn a, ngun taka a ngaihtuah hnuah thutlukna a siam anih ka ring. "Hmanhmawh suh, kei chu venthawn ka ngai lo ania" tiin ka chhang let a, rilru hah reng rengin a awm rei tawh a, nawr hmanhmawh emaw phili zawka ṭan loh ka duh ka ni.

Karthar maiah chemo an khai zo dawn a tiin ka lo inbuatsaih ru ve deuh a, Brendai lah chuan kan kalna tur a lo ngaihtuah buai khawp a, "Khawdang daiha tlan aichuan hotel biru deuha awm chu a ṭha zawk ang" tiin ka pawisa neih ang ang chu ka khawl ve a, ka thawmhnawte pawh ka thawhpui te hnenah ka hralh ṭhen nghe nghe a, pawisa chu emergency atan ka dah ṭha hmiah bawk.

Thawhṭan nia dawr ka kal chuan ka beisei loh lutukin tlawhtu ka nei a, customer pangngai emaw ti a ka lo chhawnte chu Rosalyni te ṭhian ho an ni. Engtin nge ka thawhna an hriat pawh ka hre lo, an lo lang hlawl a, eng eng emaw en kualin an awm reng a, ka thawhna dawrah hian customer te hi kan enpui emaw kan zui kual ngei ngei a ngai ṭhin a, ka product chan bik kher chu an en avangin dawrneitu chuan ngaihven turin min tir a, min hria angin awm lo mahsela keimah vanga lo kal anni tih ka hria, min rawn thlithlai a ni ngei ang.

An ṭhianho chuan an inmitmei zauh zauh a, an bul hnaia ka kal veleh nelawm deuh hian min nuih ṭhin a, eng nge an zawn ka zawh pawhin ṭha takin min chhang a, ka thil kawhhmuh erawh an ngaihsak tehchiam lo, lei tum tak tak lo hi an ang a, a khat tawkin thil hran hran min zawt a, ka kawhmuh apiang chu an duh lo lehzel bawk a, dawhtheihna a pan duh khawp mai.

"Kan duh ang an nei lo anih hi" pakhatin a tih chuan, "Kal mai ang u" Rosalyni'n a lo ti ve vat a, chutah ka lam lo hawiin, "Ka skin care hman ang in kawl lo a, nidangah kan lo dawr ang che" tiin min han nuih deuh kher a, engtin mah ka chhang let lo. A ṭhiante lam hawi chuan, "Facial tih ka ngai, inneih hmain ka hmai hi enkawl ṭhat ka duh" a han ti zui a, ka hriat tur khera sawi a ni, a ṭhiante lah chuan min melh ralh ralh a, ka tlawm vawng vawng a ni ber.

An chhuah veleh Benja ka text a, "Zirtawpniah chemo inkhai zo dawn anih chuan tlaiah kal nghal mai ang aw, Brendai nen rem kan lo ruat tawh a, hotel pawh kan lo ngaihtuah ang" ka va ti khawl a, "A ṭha alawm" ti a min chhanna chuan awm a ni nuam ve deuh. Rosalyni beisei ang lo taka thil thleng tur chu rilruin ka zeldin a, a hriat hunah chuan tlawm a inti ve vawng vawngin ka ring, ka awmdan ang chiah hian a rawn awm ve anga, a phurnate pawh a chuai ve rawih ang chu.  

Zirtawpniah Chemo chu an khai zo a, keipawh ka nawmsam loh chhuanlamin chawhnu lamah ka haw a, Hostel ka thlen rualin ka insiam mawlh mawlh a, Benja chu message-in Hostela ka awm thu ka hrilh bawk. A reh deuh vang vang a, a la buai anih ringin ka call duh lem lo.

Mahse, tlai dar 3 pelh thlenga a reh takah chuan ka call a, phone a lo chhan rual chuan, "Kan la haw phei lo, kan inah kan awm" zawite hian a rawn ti a, a pute inah an kawi anih hmel e. Phone chu ka dah vat a, min lo call leh hun ka nghak ta reng a, a rei duh khawp mai. A khat tawkin sana chu ka bih leh ṭhin a, dar 4 a pel a, dar 5 a ri leh a, engmah a la rawn sawi lo. Chutih laiin Brendai'n hotel a book fel tawh thu min lo hrilh a, Aizawl khawpawn lawkah hotel thar tu vak mahin an la hriat loh hi a ni a, a awmna lai chu thlalak nen thlap min lo thawn a, kan kal hun tur min lo zawt bawk.

Bena ka nghah thu ka hrilh chuan, "Dar 9 hmaa inthlen chuan a pawi lo, counter-ah in report ula, an lo ti fel zung zung mai ang" a ti leh a, khua a thim fel tawh bawk nen rilru a hmanhmawh ru hle tawh.

Dar 7, dar 8...chanchin a la rawn sawi lo fo mai. Lungawi lo deuh chungin ka call leh a, a chhang thei lo te chu thin a rim deuh hlur tawh. Kan ṭhiante lah chuan chanchin an lo ngaihven ve reng a, Benja pawh biak an tum a; mahse, a be thei bik lo. "Ani hi a haw nghal em mawni?" Roma'n a tih chuan ngaih a ṭha tawh lo hle a, chhuata ka bag khai chhuah mai theiah ka dah chu ka melh leh ringawt ṭhin.

A reia reiah chuan a rawn call ve ta hram a, dar 9 pelh hnuah daih a ni. "Lo chhuak lawk teh" a tih laia a aw ri ah chuan dik lo a awm tih ka hre thei a, a thilsawi dan ki pawh chu a dik chuang lo. Bag khai chungchuan hmanhmawh deuhin ka chhuk a, tualzawl ka thlen laichuan gate pawna a ding chu ka va hmu pha tawh. Min hmuh rualin a kalsawn vat a, kei ka tlan phei hlawk hlawk thung.

Step thlang deuhah a lo ṭhu a, a kun deuh lup mai a, "I van lo kal har ve" ti  a ka biakna pawh chu hre lo maiin a awm. A sirah chuan ka bag nghatin ka ṭhu zui a, a lam ka hawi ruala a lo hawi chhuak nen chuan hnai deuhah kan inmelh a, minti hamhaih chiang khawp mai. A mitah chuan mittui a tling a, a sen ram bawk a, a ṭap tih chu haitheih a ni lo.

Engmah pawh ka zawh hmain, "Min ngaidam rawh" a ti teh thlawt a, chu ṭawngkam chu tun ang dinhmuna ka hriat duh loh ber a ni.

"Engati nge...engthilah nge ka ngaihdam dawn che?" ka inhumruh ṭun a, ṭap lo turin ka insum ve nasa; mahse, chuti chung chuan ka mittui a hnam ṭiam ṭiam tho.

"Ka nu a cancer tih ka hriat tirh aṭang khan engmah beisei tur kan nei lo tih ka hre tawh, ka tih palh a ni" a hmai a tuai pawk a, ka kut rawn banin a hmer vawng vawng a, lung a dam mawlh lo.

"Anih chuan engati nge inruk puiah min sawm si?" beidawng lutukin ka melh tlawk tlawk a, a rilru na chu a inpetruh ṭun a, ka chan mek tih ka inhria, vawiin bak hi chu a lehpek kan nei tawh kher lo maithei tiin ngaihtuahna ka nei bawk a, ṭah a chhuak ngawih ngawih.

"I bulah chuan ka awm thei pawh a ni maithei, awm ta ila engtin nge ka chhungte hi an awm ve ang, ka nu damlo saw a pasal sawn a enkawl thei dawn lo, ka naute lah..." thawk a la hawk a, "Ka pu sawi anga ka awm anih chuan, ka naute zirna pawh a tumsak vek dawn a, ka nu inenkawlna leh an mamawh dangte pawh ka tihsak thei dawn a..." a ngawi zui daih a, hnuai lam a bih ta tlat a, zawhna ka nei lo reng reng, ka â deuh chulh maiin ka hria, thil awmzia chu sawifiah leh tur a awm lo, a mamawh a inhria a, keipawn a rilruah a lian zawk tih ka hai lo, tehkhawng ṭha tak nena an teh hnuah lang ta zawk hi ka inchan a, a na lo ka tih chuan dawt ka sawi ngei ang, a na thlawt a ni, a tir khan beidawng zawk ila, hetiang beiseina tehhrep hi lo nei lo ila ṭha zawk tur.

"Kan lo intawng hi i inchhir em, lo intawng lo tawp ila a ṭha tur ania ti raw, kan vanduai lehzual nan ka intawng a, kan rilru kan intina tawn mai mai a, a tawpah hetianga kan inṭhen hi a ngai leh tho si a" ka aw chu a khur dar dar a, ka mit aṭangin mittui a luang zung zung bawk. Ka lam lo hawiin mitmeng sen rum hian min melh a, "Engtikah mah ka inchhir lo ang, i bulah ka awm thei lo anih pawhin ka theihnghilh ngai lo ang che, ka hmangaih lutuk che Rinte" min kuah thlawp a, nghet lutukin min pawm zui a, a taksa khur chu chiang takin ka hre thei.

"Tihian kan inṭhen tihna a ni em?" insut hlawp hlawp chunga ka tih chuan min chhang loin min kuah nghet sauh a, ka zawhna chhanna erawh ka hmu chiang a ni, kan tawp tih ka hria, kan beisei lawk thil, phal lo leh ui chung chunga kan chelh luih kha a tawpna kan thleng ta, inthlahlel leh rilru na tak chungin kan inthlah a ngai ta si a, mangṭha tih thu erawh ka sawi thei ngai dawn lo, min hmangaih thu min hrilhin a thinlung min hlan a, chu chauh chu ka kawl ve theih chhun a ni.

A tawp nan lungchim takin kan infawp a, ka bianga mittui luangte pawh duat takin min hruk sak a, a ngaihsakna ka dawn hnuhnung ber tur a ni dawn tih ka hria. Rei lote chhung chauh chu tiin ka la chelh khawtlai ve fan a, zanin hi tawp thei lo mai sela, heti hian kan kumkhua hi tawp thung sela, a liam tur mittui nena hlir aichuan a kianga ṭah chu ka la thlang fan a ni.

October thla tirah an innei a, kei erawh kan khaw lamah ka haw thung, an inneih thlalakte pawh ral aṭangin ka lo hmu ve a, Brendai thlalak lo thawnah chuan kan ṭhiante chuan kawr dum vek ha chungin thla an lak pui a, hetia an inneih hnu lawkah hian a puin a rangkachak khur a hlan thute pawh ka hre zui a, Benjamina chuan a duh ang takin a chhungte pawh a enkawl thei tawhin ka ring. 

Ani chu ngaihtuahawm a ni lo a, a nupuiin a duat hle tihte pawh kan ṭhiante ka aṭangin ka hria a, a ruih changa min lo biak a tum ṭhin tih loh chu kan inkarah awm a awm tawh lo. Ani telin kei chu ka chuai a, hmathlir nei lo leh thinlung kehchhe chunga khawvel han hmachhawn chu harsa ka ti ṭhin. Hruaizeli nen kan inzui lehta bawk nen ruihhlo lamah ka ṭuan a, harhfima nunhlui ngaihtuah let leh ṭhin aichuan a lo nuam fe mai, rei tak a daih ngai lo tih chauh a ni.

Ka kal thui telh telh a, thingtlangah chuan beer tih angrengin min daih miau lo a damdawi lamah kan tlan a, chhungte bumin chhun zanin kan rui a ni ber. Chutianga ka han khawsa chu khawi emaw aṭangin ka nu Sangi'n a lo hrechhuak a, ka pa hnenah lo sawiin inchhungkhurah ka tlatlum lo zui a, ka nu hnenah rei deuh chu ka va awm nghe nghe.

A chang chuan mualpho lek lek khawpin ka rui ṭhin a, zan khat phei chu ka nu te inbul step-ah ka lo chatthla a, a tukah zing ṭawngṭai kal turin min lo hmu a ni awm e. Ka nu pawh a mangang ta khawp a, ka pa leh nu Hlimi hoin rem an ruat a, nu Hlimi'n Ṭhalai awmṭha duh lote siamṭhatna hmuna min dah turin thu a lo rawn bawk.

Ka pa'n Aizawla min kalpui dawn khan engmah a sawi lo a, ka nu bulah 'Ran damdawi kan la ang' tiin a lo hrilh a, ka nu khan a hriatpui em ka hre lo, thil awmzia ka hriat chuan engkim an lo ti fel tawh a, nu Hlimi nen inthurualin he hmunah hian min dah a, kan thlen tirha ka rilru natziate pawh kha ka la hre reng mai, ka pa haw tur kha ṭah aw takmeuhin ka ngen a, min kalsan a hrehzia pawh ka hai lo; mahse, ka pa chuan, "Ka hruai haw leh che anih chuan rei loteah i thi mai ang, i nunna chhan nan helaia ka hnutchhiah che hi a ngai" a ti mauh mai a, min tlawh tura a lo kal ziah tur thu sawiin min haw san ta a ni.

Kumtin visiting day-ah a lo kal a, pawn lamah chuan thil a pangngai reng emaw tih turin chanchin dang a nei ngai lo. Ka han tlangnel ve takah chuan pawnlam thlakhlelhna ka nei lo telh telh a, Benjamina ten fa an neih thu pawh nu Hlimi hnen aṭangin ka hre ve chauh a, phone kan kawl loh vangin min lo tlawh changa chanchin an sawi bak hi chu a chanchin ka hre ngai lo a, an lo kal hi chuan ka lo zawt hmasa ber ṭhin. 

Benja chuan nun pangngai tak a nei chho a, sumdawnna lamah a tluang a, a nupui nen an inkar pawh a ṭha viau a ni awm e. Chungthil ka han hriat chuan lawmpui har ka ti ṭhin a, kan dinhmun a inthlauh tak em vang a ni, ka chanchin a ngaihven awm ka hre ngai lo a, min theihnghilh ta em ni ang tiin zawhna ka inzawt fo mai.

A kum thumnaa u Lizzy hmel a lo lan hnu phei kha chuan chhuah lam reng reng ka rilruah a awm ta lo a, a chhan pawh Awmpuia'n nupui a neih thu min hrilh vang a ni. "Delhi-ah kan inhmu a, i chanchinte pawh min zawt a; ka sawi hreh vangin inkhaw lamah i awm a, school-a i thawh thu ka hrilh anih kha, ani chu MIS a ni tawh a, i chanchin hrilh kha nuam ka ti lo a" tiin min hrilh a, tunah chuan Officer a lo ni reng tawh a, Aizawl lamah a chhungte la thlain a inbengbel tawh a, u Lizzy nen an inhmuh laihian nupui a nei hlimhlawt a ni awm e. 

Engtikah emaw kan la inhmu leh ngeiin ka ring a, chutiang hun chu thleng lo thei sela ka duh hle bawk. Tum loh taka kan lo inhmu anih pawhin ka biak ngam ka ring lo, ani pawn min hre duh tawh kher lo ang? Tunah chuan mihrang kan ni tawh a, kan dinhmun lah a inthlau em em tawh a, hmuh leh tawh loh chu ka tan a finthlak ber bawk ang. Benjamina leh Awmpuia chu kan tan chuan vana arsi ang mai anni, nunhlui duhawm tiin an hming erawh ka hre reng tawh ang.

(End of chapter - 36)