BLUE BAYOU (CH - 37) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 37

"Khawi min pe rawh, kha bak kha ka nei tawh lo ania, min pe nghal rawh" vin zeta tih ri ka hriat rualin ka mutna khum chu a che dat a, ka men rualin Thantei tho chhuak chu ka hmu zui bawk a, tuktin hian inhau thawm hriattur a awm a, hmeichhe awmkhawm tih takah buaina hi a awm deuh reng. Ngaihven duh lem loin ka puansin chuan ka invur ṭha sauh sauh a; mahse, thawm chu a ring telh telh a,  engthil emaw an inchuh a ni.

"Khawi aṭanga i neih nge sawi rawh, pawisa i kawl ru em ni, tunge i leitir?"

"Ka lei a ni lo, ka chhungte min lo ken anih kha"

"Dawt sawi suh, tihdan i hria aniang?"

"Min pe rawh.." hmeichhe pakhat hi a rak ṭhat a, an thawm nghal hlut mai. 

"Lo chelhbet rawh u" tih ri ka hriat leh rual chuan ka ṭhu chhuak ve vat a, kawngka bul maia mu ṭhin Ruatmawii kha hmeichhe pathum hian an lo chelhbet a, Hmunsangi thil ken chu an inchuh a niang Ruatmawii chuan a va ban ṭawk ṭawk a, Cigarette bawm ni ngeiin ka hria.

"Ka hek che anih chuan chaw i nghei leh mai tur asin, a zahve chiah ka laksak ang che" tih pahin Hmunsangi chuan cigarette chu a phawrh mawlh mawlh a, chutih laichuan Ruatmawi'n ban a lo vai fua a, Hmunsangi biang a ri sawk mai. 

"Zawngi leh.." pakhatin a tih rualin Ruatmawii chu chhuatah an hnuk thlu tawp a, Thantei te hoin lo tun thawh an tum chu Hmunsangi chuan a nam kiang rawk rawk a, a nulian bawka tuman an ngam lo. Ruatmawii chu chhipsamah a zuk ṭhamsak nawk nawk a, "Kutte min thlak ve ngam e law, min cho em ni a, insual i duh em" tih leh a hmaia hnek a rual a, chumai chu duhtawk loin a cigarette kenlai chu Ruatmawii ka ah hnawhsak a tum zui a, ka ngaihdan a pel khawp mai, tuk dangah pawh buaina an siam fo a, ka inrawlh ve duh ngai lo nain ka mit an tih khamna hi a rei tawh. 

Ka tho sawk sawk a, "In va bengchheng ve" tih leh an lam pan ka rual a, ka thlen phei hma aṭang chuan min lo en deuh ṭhap a, min ngaichang aniang an thawm a reh ṭhap a.

"Tunge au vak vak kha, eng buaina nge in neih a" vin fahrana ka va ti chu, "I lo buai a ngai lo" Hmunsangi'n a lo ti khanglang a, kei aia lian daih nimahsela ka hlau bik der lo.

"Pe let rawh, i ta anih loh kha" tih leh a cigarette ken lai chu phihthlak ka rual a, Ruatmawii kaihthawh nghal mai tuma ka kun chu ka hnungah min rawn nam zawt a, chhuatah ka bawk thlawp a ni ber. "Lo pui khanglang lo mai teh aw, ciragette kha min pe rawh" a tih rualin bangkil lam ka pan a, bawkvaka ka kal chu ka ke a rawn man hman thuak a, min chelhbet hman lo hlauh thung.

Bangkila khumban chhia an tun chu ka la lawk a, ka inher rualin a bekah ka hem chawrh a, a ri fawk leh Hmunsangi rak ṭhat thawmin a zui bawk. "Insual su, Rinte..tiang kha dah rawh" hmeichhe dang ho chuan an ti chul a, ka dah duh awzawng lo. Ka tiang ken lai chu ka vai kual fua fua a, "A ngam chuan buaina han siam leh teh u, ka vaw hlum phiar ang che u" tih pahin Hmunsangi chu ka tin vah a, rapthlak min tih hmel hlawm nasa mai.

"Khanu khan Ciragette a kawl anih kha, Honuten an hria anih chuan a pawi thui khawp ang" Hmunsangi ṭhiannuin a lo ti khar khar a, ka cigarette ken lai chu ka han thlek a, a zahve dawn a la awm, zuk leh hmuam hi an khap tlat a, a tiru tawk hi chu an awm ve ṭhin a; mahse, an inhek peih khawp a, visiting day-ah pawh chhungten an ken sak ngam ngai lo a ni.

"Khawi aṭanga i neih nge a?" ti a Ruatmawii ka zawh chuan, "Ka lo len luh" zawiteiin a ti a, a lo luhna pawh kum khat a tling tawh a, tun thleng thlenga a la nei chu a awihawm vak lo. Ka ngaihtuah ang chu midang pawn an lo ngaihtuah ve tho aniang, "Tih dan a hria a ni hrim hrim" an lo ti hlawm a, Ruatmawii chu a ngawi reng.

"I lo ken a ni tak tak a maw?" ka tih leh laimek chuan, "Hmanniah pawh choka bang phenah biscuit a eiru lai ka hmu tawh" pakhatin a lo ti zauh a, "Inruk em ni?" tiin thawm a ri hlut a, an ringhlel ṭhup a ni ber e.

"Dawt sawi loin i neihna sawi teh" ka ti leh hram a, midang ho hian an duh ve vek a, an ngawihbo pui mai chu ka ring lo, an hek ngei ngei ang.

"Hotuten an hriat chuan chaw an ngheitir dawn che ania" Thantei'n a lo ti ve bawk a, Ruatmawii a ngawih reng laiin Hmunsangi erawh chuan thip fein min lo la melh a, tihdan dang a awm chuang lo, cigarette chu ka la chhuak a, a zu chak deuh awma ka rin ho chu, "Pakhat te tein la rawh u" ka ti ta ringawt a, Hmunsangi pawh a ṭhiannuin a lakkep ve a, Ruatmawii erawh a neitu anih vangin pahnih ka pe thung a, a lungawi vak lo aniang a chhuak zui nal nal a, ka ngaihven duh tawh lem lo.

Kan khum lama ka let leh hnu lawkah dar a lo ri a, phur lo deuhin kan insiam zui a, "An hek maithei che ania" Thantei'n a tih chuan, "An duh leh min hek rawh se" tih zawngin ka chhang a, hrem leh chawnghei tir tih angreng hi chu ka tawng zing tawh bawk a, ngaiah ka nei tawh zawk a ni. Ka awm tirh khan chhuhruk ka tum fo a, ka thurualpui ten min phatsan chang pawh a awm ṭhin, a tira min tiduhdah tute kha an chhuak zo tawh a, tunah chuan a awm rei ber ka ni tawh bawk a, midang an tiduhdah ṭhin hi ka hmu thei meuh lo, ka awmpuite hian hlauh leh pawisak ka neih lohzia an hria a, an thlavang hauh tura min beisei leh ka bula vui tawk pawh an awm ṭhin a, kei erawh ka inrawlh khat khawp mai.

Devotion hmang tura kan inzui chhuak chu Hmunsangi te ṭhianhoin min lo umphain ka bul chetah an lo kal a, "Ruatmawii kha enthlak a ngai ania, a lo ken luh a ni lo tih ka chiang" Hmunsangi'n a rawn ti ru sur sur a, "I duh leh enthla rawh" ka tih chuan, "Ka enthla khawp ang" a ti zui nghat a, inkhawmna pindan kan thlen tak avangin ka chhang let tawh lo.

Zinglamah hi chuan darkar chanve bawr chauh hun kan hmang ṭhin a, ṭawngṭainate neiin kan zai ho a, hotunuin bible chang a chhiar a, chutiang chuan tukin hun kan hmang ṭhin. Kan ban dawnah chuan Hotunu chuan Thantei chu hla thlang turin a ti a, ka ṭhiannu chu lo ding chhuakin 'I lamah min hip rawh' tih hla a thlang a, chu hla kan han sa chu eng emaw zawng tak hian rilru a hneh a, ka sa hleithei meuh lo. 

"Dam chhung ni hmuak apiang I tirh ni se,

A nuam nge a hreawm, Eng pawh nise

Hei pawh hi ka dil a, I lam lo hnaih zel hi,

I lamah min hip rawh, Lalpa Pathian" tih chang kan han sak laite chuan ka chhungrilah min mawlhtu a awm a, Pathian hnaih hi ka lo tum ve takzet em, ka thinlung zawng zawngin ka sawm ve ngai tawh em tiin zawhna ka inzawt mawlh mawlh a ni.

Chhun lamah thlai huan kan thlofai a, kan awmna thlang lawkah hian lui lian vak lo a awm a, a bul velah thlai kan ching a, a zau lo bawka kutruala thawk kan nih vangin chawhmaah kan thlo zo der a, chawhnu lam chu kawtlai thenfai leh inbual nan hun kan hmang thung. Kan inbual zo kan mutna lam pan ka tum chu Chapel aṭanga hotunu lo chhuak nen kan intawk a, "Inkawm lawk teh ang, thingpuite kan indun dawn nia" nelawm deuh hian a lo ti a, min zilh leh dawn a ni ngei ang.

Pindanah lutin ka va indahfel zung zung a, Thantei te ho erawh a ṭhian fel ve deuhte nen choka hnathawk ho puiturin an kal a, eirawngbawl ho puih hi nuam an ti a, anni pawn eitur lo rawlruk an ching a, kan eisiamtu hian a fel deuh hi chu a duhsak ve hle ṭhin. Chutih rualin eitur ruk chingte erawh an hrem ziah a, pakhatin a ruk chuan kan vaia kan tawrh hi a ngai ṭhin a, zing thingpui vawikhat nghei pawh hi buaina lian a tling zel ṭhin a, buaihat hi chu kan nei zing khawp mai.

Hotunu pindana ka han luh chuan lehkhabu a lo chhiar mek a, min hmuh rualin a tarmit a la thla a, ṭhutna min lo kawhhmuh thuai bawk. Ka ṭhutfel chiah tihah chuan, "Tukin chu in thawm a va ṭha ve" a lo ti khauh a, hrilh an awm leh hman tawh a ni ngei ang.

"Intibuai an awm a" ka ti liampuat a.

"Eng nge a chhan ni a?" a tih chuan, "An inhnial buai aniang, an intibuai rei lo" ka ti leh mai a, a nui deuh var var.

"I khap tih ka lo hria a, i ti ṭha khawp mai, a awm rei ber i ni bawk a kan hmuh loh chinah hian i lo thunun an ngai viau ania; mahse, tiang keng chunga han invau kha chu a fuh chiah lo maithei a ni" a ti charh charh a. "Vuakhlum i tum tak tak lo ang chu ti raw?" nuichunga a tih leh chuan, "Engtin nge ka vuakhlum theih ang, pakhat ka vuak chhungin midangin min vaw hlum hman ang chu" ka lo ti nghat a, a nui leh sang tawh.

"Ka koh chhan tak che chu thildang zawk ania, rin aiin i awm rei tawh a, midang nen pawh kan lo sawi ho a, chhuak ve tawh mahla a pawi loin ka hria, pawnlam thlakhlelhna in han neih loh chiah hian chhuah in inpeih tawhah ka ngai ṭhin a, nang hi chu piantharna i la nei lo tlata ka hriat vang hian ka la chhuahtir hreh deuh che a, i nungchang erawh a ṭha viau lawi bawk si a, i rilru i lo siam tawh hrim hrim em?" ti a min zawh chuan chhan dan tur ka van riau a, chhuak turin rilru ka la siamfel  lo tih ka inhria a, awm reng hi a ṭha ber angem tiin ka inngaihtuah bawk.

"Chhuak pawh ni ila tih tur vak ka nei lo a, min chhawrna turte i nei zawk lo maw?" ka tih chuan a beisei loh danin ka chhang tih a lang.

"Hnathawk tur chu kan mamawh reng a; mahse, nang ang ṭhalai, vanglai hmang mek te hi chu mihring lam taka ngaihtuahin pawn lama inawm a ṭha asin, pawnah sawn Pathian rawngbawlna tur tam tak a awm a, i chhungte pawn an thlahlel ve tawh lo ang che maw?" a ti vang vang a.

"Ka chhuah chuan Pathian rawngbawl lam chu ka tih ka ring lo, hetah hian ka ti thei zawk maithei a ni" ka ti a, thingpui an lo ken luh avangin kan titi chu kan tawp rih a, Hotunu chu a inngaihtuah buai deuh aniang a thingpui in pahin pawn lam a thlir vang vang a, rei dawn a ngawih hnuah, "I ṭawngṭai ngai em?" tiin min zawt leh khauh a.

"Ṭawngṭai ve ṭhin a; mahse, sawi tur ka van tlat ṭhin, han dil vak tur pawh ka hre lo, lawmthu sawi turin lawmna ka neih awm ka hre si lo a, ṭawngṭai chu ka ṭawngṭai ṭhin alawm" tiin ka rilru diktak ka hrilh ve a, a bu nghat nghat chu ka lo melh ve reng bawk.

"I ṭawngṭai chhan ni lo a i ngaih laipawh khan, i tan a ṭha turin Lalpan a chhang ṭhin che tih hre reng rawh. Inngaitlawm taka i ṭawngṭaina aw kha a ngaithla ṭhin a, chapo tak a i ṭawngṭaina erawh a ngaithla ngai lo. 

I rilru hel tlat ṭhin kha Setana mizia a ni a, 

i mangan avang khan setana bawih nih tum ngai suh, Lalpan i tan a ṭha tur a hria. He khawvelah hian zirlai nei kan ni tih hriain rinawm takin a ke bulah kan awm tlat tur a ni.

Khawvelin a thlamuanna min pekte hi chuan chuai hun leh ral hun an nei a. Lal Isua Krista in min pek thlamuanna erawh chatuan atan a ni. Mangang leh beidawng taka indawm kun turin Lalpan min ti lo a, amah avangah ropui tak a ngamtu ni turin min ti zawk a ni. Beidawng leh lungngai a kan awm laite hian min ṭanpui a duh a, tlawm tak a ahma a kan ṭhingṭhit hun a lo ngaichang reng ṭhin. 

Kan thinlung ṭheuhah hian 'Eng vanga beidawng nge ka nih?' tiin mahni ṭheuh hi han inzawt ila, beidawng lo tur chuan kan nun a beidawn chhan dik tak hi kan hriat a ṭul a, a chhan kan hriat hunah a siamṭhat dan pawh a lo awm mai ṭhin a, mihring nun hi buai chingchivet viau angin lang ṭhin mahsela, eng anga nunkawng hrehawm, khawkrawk leh chhengchhia pawh zawh mahila Pathian nen chuan a kalka a lo awmin a inrahbi thliah ṭhin a, duhtlanna dik lo leh pensual theihna lak aṭangin min hum tlat ṭhin, kan nun a beidawn chhan bulpui ber hi chu Duhthlanna dik lo zawk kan thlan thin vang a ni a, chuvang chuan Pathian hnenah kan ṭawngṭai mawlh mawlh a tur zawk a ni.

Dil tur emaw sawi tur dang engmah i hre lo anih pawhin duhthlanna dik siam thiam turin finna dil la, a enkawlna che kawnga lawmna tur i hmu lo anih pawhin lawmna rilru i put theih nan dil la, i lungawi lo anih pawhin i lungawi theihnan a thlarau chenchilhna dil ṭhin ang che, ṭawngṭai chhanna hi a thleng lo emaw kan tih laihian ka hriat loh lamah a lo thleng ngei ngei ṭhin a, Bible pawhin bang loa ṭawngṭai turin min tih kha, ṭawngṭai hlutna ber chu a chhanna kan hmuh dan hi a ni, kan dil min pe a ni ringawt lo a, amah nen inpawlna hun kan nei tih hi kan hriat hmaih tur a ni lo, be fo la, au mawlh mawlh la, a lo ngaithla em em ang che" a ti dap dap a, a sawilai zawng chuan chuan pawn lam a hawi a, chutah ka lam lo hawiin, "Ṭawngṭai dun i duh em?" tiin min zawt a, ka duh chiah em ka hre lo; mahse, ka mamawh tih erawh ka hria a ni. 

Honutu nen chuan kut invuan chungin kan ṭawngṭai dun a, harsa ka tihzia chu aw, ka ngaihtuahnate chu a ruak hung maiin ka hria a, eng emaw chen chu ka ṭawng chhuak lo. "Hlimnate, lungawinate i neih theih nan dil rawh, engkim neitu hian i tan ui a nei lo ania" hotunuin a tih leh laichuan ka thinphu a rawn rang dawt dawt a, ka hnuk a ulh ṭun mai.

"Aw Lalpa, i duh danin min hruai la, ka tana ṭha i tih danin ka chungah rorel ang che, i rorel dan pawm thiam turin chakna leh chhelna min pe la, midangte tana harsatna thlentu ni lo a malsawmna ni thei turin ka thinlung hi min buatsaih sak ang che," a bak chu engmah sawi tur ka hre lo, ka rilruah chuan thil pakhat a awm a, ka ṭawngṭai laia ka sawi tawp ber kha a ni, midangte tana hnawksak nih hi ka hlau a, midangte tana ṭangkai leh malsawmna ka ni thei anih phawt chuan ka nun chu awmze nei leh inchhirawm loh tak a nih theih ka ring, ka tunhma nun kha ka ngaihtuah kir lo thei lo a, midang tana hnawksak ka ni reng ṭhin, ka chehvela mite tan khan ṭangkaina ka nei lo a, an lungngaihna thlentu leh harsatna siamtu mai ka ni a, khatiang kha nih leh ka hlau a ni. 

Pindan lama ka let leh chu Thantei a lo awm reng tawh a, chanchin min lo zawt zung zunga, hotunuin chhuah chungchang min sawipui dan ka han hrilh chuan "Ka rualin chhuak rawh, pawisa ka khawl tak tak ania, burma aṭangin bungrua kan la anga, kan sumdawng dun thei ang" a ti nghal chung chung a, ka chhuak anih chuan ka chhungten min thlahfal an remti chiah angem ka hre lo a, kan khaw lamah han tap ringawt tura chhuah chu ka chak fahran lo a ni.

"Kan la ngaihtuah ṭha dawn nia" tiin ka chhang ve tho a, ani zawng phur tak tein a phur, "Champhaiah nge Aizawl lama sumdawn i duh, dawr ho hnenah bungrua kan supply zawk dawn em ni ang?" tih angreng chu min zawt seuh seuh a, ngaihtuahna a ti thui reuh khawp mai.

Chawei dar a lo ri a, eng nge kan hmeh dawn ka zawh chuan, "Alu kan leh dal tlak" lungawi hmel fahran hian a ti a, alu hi a ngaina a, kan hmeh dawn hi chuan a phur viau zel. Midang rualin choka lam kan pan a, kan va luh chuan chaw an lo dawh mek a, a hnung lamah kan va in line ve thuai bawk. "Sa rim ka hria" Thantei bula ka tih chuan "Aw, u Chungnunga ten ar an talh a, a te lutuk" a ti mai a, u Chungnunga a tih chu choka lam hnathawk zinga mi a ni a, kan piber Pi Thansiami tupa a ni nghe nghe.

Chaw kan dawh zawh hnu chuan pawn lamah chawthleng kan chawi chhuak a, van lamah chuan thla pawh a lang mawi leh viau tawh. Midang ho chu an titi bawrh bawrh a, Thantei pawn visiting day lo awm leh tur chungchang sawiin a ruala chhuak tur chuan min la sawm mawlh mawlh a, engmah ka la sawichiang duh lem lo.

Chutia chaw kan ei mawlh mawlh laichuan choka bang hnunglam pana Ruatmawii kal liam zawk chu ka va hmu a, a chawthleng a chawi phei a, ani hi a la titau anga, kan bulah a ei duh lo em mawni ka tih ruk laimekin mipakhat hian a zui tih ka va hmu a, zuitu chu u Chungnung kha a ni.

"Ruatmawii kha i hmu em?" ka tih chuan ka ṭhiannu chu a lo hawi â khawp a, a hmu ve lo aniang chu, "Khawiah nge a awm a?" a lo ti let hu a, ka chhang let tawh lem lo. Ruatmawii chu kan chawei chhung zawng chuan a lo kir lo a, a zuitupa pawh kha a lo let bik lo a, ngaihtuahna mak deuh min neih tir lehnghal a, rinhlelh a awl khawp mai.

Chaw ka ei muan deuh avangin min thawhsan zung zung a, Thantei te ho chawthleng dah tura an kal hnu pawh chuan ka la ṭhu a, an lo let leh hnuah ka tho ve chiah bawk. Choka lam ka pan tur chu U Chungnunga lo phei nen kan intawk a, bawlhhlawh bawma polythene a paih zauh chu kalpelin chawthleng ka va dah rawk rawk a, midang awmna lamah pawh kal ta lo chuan choka hnung lam ka pan a, bang tawp aṭanga ka va en chuan Ruatmawii chaw ei mawlh mawlh chu ka va hmu zui a, hnunglam min chhawn avangin ka pan tih pawh a hre lo ang. 

A bul ka thlen chuan thil awmzia chu ka hrethiam kuar mai, sa ruh hi a lo khel mial mial a, "Ruatmawi" ka ti chiah chu a phu zuk a, a chaw thleng a thlauh lo chauh.

"Tinge helaiah i awm daih a?" a chawthleng ka melh laichuan a dah thukru ṭat ṭata, "Midang zinga ka ei chak lo a" a ti ve tak nain ka hrethiam tih chu hriat tawh tho ka ring.

"I va hmeh tui bik ve" ka'n ti deuh kher a, a inthlahrun hmel ta khawp mai. "Nu Lianmawi'n min suah hlek a" a ti a, ka awih lo nasa, a petu pawh ka hmuh ngei kha, a sa funna Polythene a paih lai pawh ka hmuchianga, a thup chhan erawh ka hre lo.

"Ei thuai thuai rawh, midangin an hmuh che chuan an thik viau ang che" tih leh inher ka rual a, kalsan nghal mai ka tum chu, "Tumah hrilh suh aw" a rawn tih vang chuan ka ding leh dat a, ka nuih a za deuh.

"Hrilh lo ang" ka ti ṭha ve mai a, cigarette a neih dan pawh kha a chiang ta mai, an lo inrawlruk anih ngei dawn kha.

Ka let leh hnu chuan Devotion nei turin chapel lam kan pan a, zan boruak chu a vawt var tawh a, kan awmnaah hian thlasik a na zual a, khua a han vawh deuh hi chuan kan hritlang sup sup zel a, pindan khata mu kan ni hlawm nen pahnih khatin hritlang an kai tawh chuan kan vai kai a ni deuh zel. 

"Banah Bethel pahin zai ho mai mai ila" ti a Thantei ṭhianten min sawm chuan ka lo hnial a, "Vawiin ka chau deuha mut ka duh, min lo ṭawngṭaipui ve dawn nia u" ka ti chu, "Kan ṭawngṭaipui ziah che alawm" Nunsangi'n a lo ti zauh a, "Tak tak maw?" awih mang lo zeta ka tih chuan an lo bu tliar tliar hlawm. 

"Zantin kan ṭawngṭaipui che, kan zingah chuan i rilru a sak ber a, inpuanna i nei thei te kha kan lawm asin, kan ṭawngṭaina Pathianin a chhangah kan ngai" an tih chuan eng emaw ti zawng takin min hneh a, rilru a nuam veng veng mai a ni, ṭawngṭaipuitu neih hi hetiang takin ka la hlimpui ngai lo, min ṭawngṭaipuitute dinhmun ka han ngaihtuah a, mi famkim an nih bik lohzia leh helaia an lo awm chhan pawh ka hrechiang a, ka laka an rilru puthmang chu lawm vawng vawngna tham a ni.

Inkhawm kan zawh hnu chuan pindan lam ka pan mai a, Thantei te erawh ṭawngṭaina pindan lamah an inzui phei hlawm a, Hmunsangi te ṭhian ho card deng an bengchheng deuh nen muthilh a har khawp mai. Pawn lamah chuan thli a thaw vuk vuk a, bathlara ka towel zar chu seng mai a ṭhain ka hria, ruah a sur har lo tawp ang.

Thantei te lo let hnu lawkah ka thochhuak a, kawngka bul ka thlen rual chhan Ruatmawii khum ruak hiai chu ka va hmu a, eng a thim ṭep tawh bawk si a, ruah a sur hnai dawn bawk nen a awm lo chu mak ka ti deuh viau a, ngaihtuahna ṭha lo ka nei bawk. Hmanhmawh deuhin bathlar lam ka pan a, towel pho ka va seng laitak chuan eng an lo ti thim a, a thim takah chuan hla deuh hleka bualin eng chu a lang chiang viau bawk. Let leh mai ka tum laichuan bualina tute emaw inzui lut chu ka va hmu a, kawl phet rual khan pakhat zawk chu chiang fahranin ka hmua, Ruatmawii ngei a ni, pakhat zawk lah kha mipa a ni tlatin ka hria.

Ka va chian dawn em mawni ka ti rilru neuh neuh a, thil awmzia erawh a chiang khat viau tawh a, an laklawh laite ka va hmu mai mai anga, a fuh lo zawk ang tiin ka luhsan leh ta zawk a, midang chu a lo mu ṭhap tawh. Thantei a lo la meng a, "Kawngka i kalh em?" a tih chuan, "An la kim lo" ka ti mai a, tu nge kim lo min zawh chuan ka chhang lo. Ruatmawii lo let hun chu ka ngaichang ru reng a, minute 30 vel a liam hnuah a lo lut thawm ka hria a, thawm a dim thiam khawp mai. 

Chuta ṭang chuan ka chik deuh ta bawk nen an inhmu fal tur leh Ruatmawii zan chhuak ru hi ka hre ta fo a; mahse, inngaizawng inkar anih vangin Thantei bulah tak ngial pawh ka sawi lo. Inngaihzawnna hi ka la thutak ṭhin a, mi inngaizawng induh takte hi hmuhnuam ka ti ṭhin, Ruatmawii pawh chu ka dem lo a, Chungnunga'n duhsak taka eitur a rawl ruk ṭhinte pawh chu hmuh an nuam riauin ka hria a, chutih rualin nau a pai mai ang tih erawh ka hlauh pui a ni.

Tukkhat kan devotion hmang zo chu Hmunsangi ṭhiannu Lalkrossi leh Chungnunga in mitmei zauh lai ka hmu fuh leh a, ngaih dik lohna em em pawh ka neih loh laiin Thantei zawkin a lo ringhlel khawp a, "Nimin tlaiah pawh Chapel bulah an lo ding dun a, an inngaizawng aniang" a ti a, Ruatmawii nen zantin deuh thaw an inhmu falin ka hre bawk si a, ngaihtuahna a ti buai nak mai.

Mahse, ni tam pawh a liam hmain thil awmzia ka hre leh ta thuai a, Lalkrossi chauh pawh a lo ni lo, Thantei ṭhiannu Nunsangi thlengin Chungnunga chuan a lo kawp a, eitur leh eng emaw hmangin a thlem ṭhin hi a lo ni a, Nunsangi phei chu nupuiah a lo sawm hial a, anni eitur rawp hian an lo hnar thei lo ṭhin a ni awm e. A leta a phut ṭhin pawh ka rindan chiah a ni, Nunsangi nen chuan an la chesual em lo a, midang a kawpte erawh a chetsual pui ngei ang tih ka chiang, Ruatmawii ngat phei chu ka hriatna a rei tawh angreng a, hmeichhe engzat chiah nge maw a lo thlem thluk ang le, a khawsak dan chu ka duh loh zawng tak a ni.

A tuk chawlhni inkhawmnaah Ruatmawii chu ka bia a, "Chungnunga hian a kawp che tih i hria em?" ka ti khawl a, "Kan inngaizawng lo" a ti zet a; mahse, ka hria tih a chiang bawk a a pha zui duh ta bik lo, "Inngaizawng kan ni hleinem, tunah phei chuan Krossi nen an inkawp mek alawm" a tih laia a hmel landanah chuan danglam riau hi a awm a, sawi nuam ti lo hmel a pu a, a lo duh hman viau aniang.

"Ka bulah chuan zep duh suh, bualinah in inhmu ru ṭhin tih thlengin ka hria, a kawp kual che u a, in lakah remchang a la mai mai anih hi, nang leh Krossi chauh inni hleinem" ka han ti chu, "Tunge midang?" a lo ti vat a, a rilru na hmel chu a thup thei meuh lo.

"Midang pawh an awm, ka hriat loh pawh an awm maithei" ka ti zui a, a mitah chuan mittui a tling deuh pam a, hnem dan pawh ka thiam lo.

"Hetianga a ti kual ve hi a ṭha lo tlat, honunu hnenah sawi ila a ṭha ang, midang tan a him lo" ka tih chuan min lo hnial deuh a, "A pi ania, nangman i tawrh phah mai mai ang" tiin min hlauhthawn pui a, ka tan han hlauhna tur vak awmin ka hre lo a, a pi hnenah sawi ila, he hmun aṭang hian chhuahtir sela a fuh berin ka hria.

Inkhawm ban rualin Hotunu chu a pindan lamah ka zui chho a, "Eng nge i sawi duh deuh a?" a tih veleh, "U Chungnunga awmdan hi a ṭha lo, nula ho hi a chhai kual a, thil eng eng emaw hmangin a thlem ṭhin a nia, pakhat chauh a kawp lo a, a kawp kual ṭeuh mai" pehhel lo zeta ka tih chuan a mitmeng a buai nak a, min ring chiah lo em mawni tih turin min melh bawk.

"Chutiangte a ti duh dawn em ni?" a ti vang vang a, "Ka mit ngeiin ka hmu alawm, ka hriatah pawh pathum lai a kawp, zanah pawh bualinah..." ka sawi zawh hma chuan min lo pawtchat a, "Tute nge?" tiin min zawt a, a hming hmerha sawi chu ka hreh deuh a, "Ka ṭhiante an nia, an mahni pawn an hrechhuak tawh" tih zawngin ka chhang a.

"Ka lo zilh ange, chutianga a lo khawsa anih chuan helai awm tlak a ni lo tawp anih chu" a tih vang chuan ngaihṭha deuhin ka let san a, ka chhuk hnu rei loteah choka aṭanga Chungnunga lo chhuak chu ka hmu a, hotunu pindan lam a pan bawk. Rei pawh a han awm lo, a lo let leh chu chokaah a lut a, a hnu lawkah chempui nen thlai huan lam a pan ka hmu a, engmah a thleng lo emaw tih tur a ni.

Mahse, chumi tlaia chaw kan eitur chu min lo enchik khawp mai a, min lawm lo tih chu  a hmel aṭangin a hriat theih. Chaw ka va dawh tur chu min en run run a, kuttum tiat pawh tling lo tur hi ka thlengah chuan a rawn dah a, ka hmaa kal Thantei pawn mak a tih hmel viau mai. "Kal rawh" ti hmukin min melh run a, dil belh ngam pawh a ni lo.

"Rinte, ka chaw hi lak belh mai rawh, engati nge khatiang khan a tih che a, in inhau nge?" Thantei'n a tih chuan Hotunu hnena ka hek thu chu ka hrilh ve mai a, "Fimkhur rawh, a hlauhawm ange?" a ti hlut a, ka hlau hran lo nain awm erawh a nuam duh vak lo.

Chaw chu tlem chauh ka bar a, chokaah lutin thleng ka va dah a, ka chhuak leh thuai bawk. Midang ho awmna lam pan leh mai ka tum chu, "Lo ding teh aw" tih ri vang chuan ka lehhawi vat a, zial ṭan mawlh mawlh chunga Chungnung lo kal ka hmuh chuan ka lo nghak ve rih a, awm nuam lo viau mahila hlau anga lan chu ka duh lo a ni. Ka bul a lo thlen rual chuan, "Ka pi bulah min lo hek a ni maw, i ti zia lo khawp mai, kha khawngaih che a chaw ka ngheitir lo mai mai che anih kha" tiin a ṭhen sung a, ka hrethiam zan lo.

Ka hmel buai deuh a hmuh chuan, "Min ngaihzawn vang anih thu ka hrilh anih kha, damdawi ka neih sak che chuan i inphal zau viau bawk angin ka sawi che, i ti fuh vak lo ang" a ti zui a, hotunu chuan min ring miah lo anih hmel.

"I duh chuan ka inrempui ve thei reng che ania" a ti leh chiah chu, "I tenawm em mai a, ka inrempui lo chiang khawp ang che" tiin ka lo melh rum hrak a, "Naktukah chuan chaw i nghei tak tak tawh ang" min tih khum leh sak, a nui hmelte chu ten fein ka melh tawh a, hepa thuhnuaia awm hi chu ka tum lo khawp mai, hotunuin ka thusawi a awih duh lo a, he mihring thuhnuaia ka awm a ngai dawn anih aichuan ka chhuak nal nal zawk ang.

"I khirh dawn tih ka hriat vang alawm ka tum buai duh loh che; mahse, ka it teh mai che ania aw, i rilru i thlak chuan min hrilh leh dawn nia" tham lo fea min tih khum hnuah choka lam a pan a, ka thinrim zia chu aw, ka tum loh dan lutuka thil thleng chuan nuihte pawh a ti za zawk.

Zanah Thantei bulah ka ang hrep a, ani lah chuan, "Engah nge i hrilh duh, keini te chu misual leh rintlak loh awmkhawm, chhungte pawn tih ngaihna min hriat loh vanga helai hmunah dahkhawm alawm kan nih, hotunu chuan ring lo nasa ang, kan thusawite chu rintlakah min ngai teuh nang" a ti barh barh a, thudik sawi pawh ni ila min ring lo ang tih chu a ngaihdan a ni, chutia rintlak loh han nih tawp mai chu a tlawm thlak hlein ka hria a, helai hmuna kan dinhmun diktak pawh ka hriatchian zual phah a, mi pangngai anga en kan ni ngai dawn lo anih hi tiin ngaihdan ka nei ta bawk.

A tukah chuan zing thingpui min pe ve lo ta ngei a, chaw pawh nizan lam ang bawka te kha min khawrh sak a, eirel dang bulah chuan hrem mek ka nih thu a sawi hmiah a, midang ho lahin Chungnunga chu an hnial ngam si lo a, min khawngaih hmel deuhin min melh hrek hrek ringawt. Mi luhlul tih takah ka chawthleng chu ka dahlet hmiah a, chhunah Thantei'n chhang tlem min lo lakkep a, chu chu zan thlengin ka ring a, zanriah chu ka dawh buai peih lo law law a, thin a rim bawk a rilṭam tawrh chu a har lem lo.

Zan mut hmunah Thantei nen kan titi a, "Thla thar mai hi visiting day a ni tawh dawn a, ka rual chuan lo chhuak ve mai rawh, helai hmun hi hmun nuam pawh anih loh hi, damdawi i ngheina a rei tawh a, i tum anih phawt chuan i nghei hlen thei em em ang, mahni hi kan pawimawh ber a, kan chhuah hunah pawh kan inpui tawn zel dawn alawm, i kalsual tur ka veng che anga, nangin min veng bawk anga" a ti melh melh reng a, "Chu ven i la ngai dawn elaw?" ti a ka fiam chuan, "Ka piangthar tawh alawm, Pathian duh loh zawnga nun ka tum tawh lo" a ti leh lawi a, keipawh chuan damdawi ka chak loh thu leh addict ka nih loh thu hahipin ka hrilh a, ka duh zawng chu ruih kha a ni a, damdawi ngaite an taksain a ṭhing ngawr ngawr ang kha ka awmdan a ni ve lo, ka la inchiu ngai lo a, ka duh anih phawt chuan ka insum zel theih pawh ka ring, tunah ngat phei hi chuan ruih chakna pawh ka nei lo, engthil mah hian minti phur zo tawh lo a ni ber, ruih takngial pawh chak lo khawpin thlakhlelh ka nei lo ti ila a dik ang.

"Kan haw anga, pangngai deuhin kan awm tawh anga, pasal ṭha deuh neih kan tum dawn nia, nang phei chu i hmelṭha bawk si a, duh duh i thing thei ang chu" tiin a nui kar kar a, pasal neih lam chu ka la ngaihtuah leh chhin lo reng reng, kum 5 kalta kha chuan pasal neih a, chhungkaw din kha ka chak ber a ni ṭhin a, tun hnu hian a lo atthlak hlein ka hria.

"Pasal ka neih pawh ka ring lo" zawi tea ka tih chuan, "Chutiang sawi suh, i la nei ve ang chu, midang ṭha deuh i tawng leh dawn alawm, kan tunhma nun te kha chu hrereng lo zawk ang, mahni inhmangaih ila, kan tana ṭha lo tur chu tih duh miah lo ila, nun nuam tak neih kan tum tawh dawn nia" a ti sap sap a, keichuan thidang daih ka lo ngaihtuah a, haw ta ila khawiah nge ka haw ang tih lam daih a ni, ka hawna tur pawh ka chiang ta lo, ka inngaihtuah buai ru hle a, rilru a hrehawm ṭun mai a ni.

Thantei bulah chuan "I rualin ka chhuak ve ang; mahse, thil tih dun lam kha chu ka chhungte thu thu ni rawh se" tiin ka hrilh a, chhuak tura rilru ka siam ta chu a lawm khawp mai. "Kan khuaah lo zin nghal rawh aw, kan inte min hmuhpui ve dawn nia" a ti chuk chuk a, visiting day-ah chuan ka pa ngei lo kal sela, amah ngeiin min hruai chhuak thei sela ka duh, ka awmdan turah ruahmanna a lo nei angem tiin ka ngaihtuah zui vang vanga, rilru ka han siamfel takah chuan a hmel hmuh pawh ka chak ve ta sawtin ka hria.

A tuk zingkar devotion kan neih zawhah hotunu chu ka bia a, visiting day-a chhuah ka duh thu ka chhungte hnena lo hrilh turin ka chah a, "Engtizia nge, i duh lo hle khan ka hre si a?" ti a min zawh chuan, "Khawilai emaw dikna chanvo ka neih theihna leh mi pangngai ang taka min en theitute kianga awm ka duh tawh a" tiin ka chhang deuh kher a, a inthiam vak lo aniang chu, "I pa ka lo be dawn nia" a ti a, a bak chu min zawt zui lo reng reng.

Ni a liam ve bek bek a, ka pa hnen aṭang pawhin chanchin ka hre ta thuai a, hotunu lo phone-in amah ngei a lo kal tur thu a lo hrilh a, kar khat chiahin min dang tawh bawka Thantei nen chuan ruahmannate kan siam dun a, kan tum dan chuan kan khaw lamah kan haw ve ve phawt anga, a remchan dan angin eizawnnate pawh kan buaipui ang tiin rilru kan siam a, aizawl lama inluah dunte pawh a han rawt ut ut a, ka haw phawt anih loh chuan engmah ka la sawi chiang thei lo. 

Haw tum ve dang an awm nual a, ṭhenkhat erawh an chhungten chhuah an la phal lo a, Hmunsangi phei chu hotunuin chhuah a la phal sak lo a ni awm e. Kei ka awm lo tur chu an huphurh hlawm ve khawp mai a, a chhan pawh Hmunsangi thuhnuaia an awm dawn vang a ni. Visiting day thlen hma zan chuan rei deuh thleng kan meng a, chhuah hunah inhre zui tur leh inṭawngṭaipui tawn turin kan inchah mawlh mawlh hlawm a, Thantei ṭhiante ho phei chu an ngui nghiai hlawm.

A tukah chuan Thantei pu a lo thleng hmasa a, a car a lo tlan chhoh theih loh vangin driver nen an lo kal a, ka pate an la rawn thlen ve loh vangin a pu chuan an ruala haw mai turin min sawm a, kei erawh chuan min lo hruai chhuah ngei ka duh thung a, min dah luttu ngeiin min hruai chhuak sela ka duh ve tlat a ni. Rei deuh chu min nghahpui a, dar 2 bawrah pawh an la rawn thlen loh vang chuan min hawsan ta vang vang a, ka inpeih hma tehlul nen ka pate chu tlai dar 4 velah an lo thleng ve thei hram a, nu Hlimi a lo tel ve bawk.

Aizawlah zan hnih kan riak a, kan awm chhung zawng chu ka chhuak lo a tih theih, haw dawnah phone leiin ka pa nen kan chhuak ve zawk a, ka phone hlui kha nu Sangi fanu Zualtei'n a hmang a, ka sim card erawh an la dahṭha a, a nung tawh pawhin ka ring lo. Ka pa chuan min duat thiam ve khawp a, eitur tuihnai leh thawmhnawte min lei nual a, kan inhmuh loh chhungin a sam pawh a lo ṭuak var vuk hman a, hna a thawk rim deuh aniang a lang upain a hmel pawh a lo zur hman viau a ni.

Ka nu nen kan han inhmu chu a lo ṭap pur mai a, min ti hrilhai zawk khawp mai, ka nau lah chuan mi hre miah lo mai a, ka biak pawhin a lai deuh tlat zel a, mi pawh a ko ṭha duh vak lo. Ka thlen tukah chaweiah min sawm a, "I u anih hi, i sen laichuan a bulah i mu ṭhin a, a paw nasa thei teh che nia" ka nun a tih pawh chuan "Awihawm loh e" a ti liam mai mai a, kan bulah pawh chaw kil ve ngam loin a inchawi hrang daih a, han biak hleihtheih pawh a ni lo.

Ka pa bulah Thantei nena kan ruahman dan ka han hrilh chuan, "Hmuhphak loha i awm chuan ngaih a ngam lo ang" a ti deuh tlat a, Thantein phone call a min rawn dilpui chung pawhin aw a pawh ṭha duh lo a, "Kan ngai ve rih a, helamah kan buai bawk si a" tih angreng chu a chhuanlam a, mahnia tal hrang tur chuan mi a la ring ngam lo ni berin ka hria.

Tlai khat ka nu dawra ka va leng chu nu Thanmawii a lo awm ve a, ka nu hian za dawr a lo siam tawh a, a dawr pawh an lo extend a, kan khuaah chuan dawr lian pawl a ni ve tawh. Ka va thlen laichuan secondhand an lo hawng buai khawp a, va puih ve mai ka tum chu,  "A bialpa kha a lo kal leh tawh em?" Nu Thanmawi'n a lo ti khauh a, ka nuin mitmeia a lo khap zauh chu ka hmu hman.

"Tu ka bialpa maw?" ka ti vat a, "A...ka ti mai mai, ka hriatsual ang" a ti nawi niai a, zep nei a ang riaua ka hriat vangin, "Lo kal an awm em ni?" tiin ka nu chu ka zawt leh hram a.

"Hman deuh khan Pu Zoliana dawrah lo zawng che an awm a, hetah an lo tir phei a lawm, vawihnih chu ka awm laiin a lo kal a, an Lawngtlai kal tur an lo peng niin ka hria, a hnu deuhah pawh i Nu Thani te kawtah, i nu Thanite awm laiin an lo zawt bawk a" a tih chuan tunge ni ang tiin ka ngaihtuah neuh neuh a, "Car var a khalh" Nu Thani'n a tih vang chuan Benjamina a nih ngei ka ring, engvanga min lo zawng nge maw anih le.

"An awm rei lo em ni?" zawh bik pawh nei lo chuan ka melh ve ve a, an sawi tim dun khawp mai.

"An zin tur an lo peng a" pakhatin a tih laiin, "A vawihnihnaah kha chuan an ṭhu ve reng a" ka nu'n a ti ve thung a, min chhan dan chu ka duhkhawp lo tak zet.

"Engtin nge min lo zawn?" ka ti leh zel a.

"Rinsangpuii te in inhria em a tia, khuaa i awm loh thu ka'n lo hrilh anih kha" lo ti tu chu Nu Thani a ni.

"Vawithum a lo kal maw?" ka nu lam ka hawi a, "Ka lo hrilh ṭha duh vak lo anih kha, khapa vang khan i nun a chhiat phah nasa em a, ka ngei deuh tlat alawm" a tih chuan thawk ka la halh a, a lo biak dan tur pawh ka ring thiam mai. Benja nen kan inṭhen tirha an hnena ka va awm laikhan kan chanchin engkim ka hrilh a, ka rilru natzia hretu a ni bawk.

"Engtin nge i lo biak?" tia ka zawh leh chuan a ner nung a, "Saw tah sawn an ṭhu reng a, ka be duh lem lo a, rei pawh an ṭhu lo" a ti deuh hmak a, "Aman a be lo che em ni?" ka ti leh hram.

"Bia e, i pate in awmna min zawt leh ṭhin a, i awm loh thu leh pasal i neih tawh thute ka hrilh anih kha" a tih chuan min ti bangbo khawp mai, ka han lawm lo deuh dawn a; mahse, a pawina vak a awm chuangin ka hre si lo, Benja chuan pasal ka neih thu chu engtiang takin lo ngai ang maw?

"A pawi em?" bul angreng zeta ka nuin a tih chuan, "Pawi lo e, ani pawn nupui a nei tawh alawm" ka ti ve mai a, rilruah erawh a luah zui reng a, in lamah ka haw leh hnu thlengin ngaihtuahna a luah a, engtin nge a nun a hman chhoh ang aw, nu Hlimi sawi ang khan nun nuam tak neiin, a nupui fanaute nen a hlim hle turin ka beisei a; mahse, engvanga min hmu duh nge maw anih ang le, a remchang ema tiin min rawn tlawh a tum zawk em ni ang, a hmel ka mitthla a, beidawng taka a haw tur chu mithlain ka hmu riai ruai a, ngaihtuahna a chawl thei tak tak lo.

Zanah chuan Thantei nen kan inbia, Bena chanchin ka hriat dan leh min lo tlawh a tum thute chu ka hrilh ve melh melh a, "A tu zawk kha nge, a taksa i neih loh nge, a rilru i neih loh zawk kha?" tiin min lo zawt khauh a, "A thinlung min hlan hnua nupui min neihsantu kha" ti a ka chan laichuan khami zana min hmangaih thu a sawi lai kha ka ngaihtuah let vang vang a, ka la hrechiang ngang mai.

"I la duh reng em ni a?" ti a min zawh chuan, "Duh reng lam a ni lo a, a hlui thei lo tih chauh a ni tawh" tiin ka chhang a, "Theihnghilh daih tawh rawh, nupui a neihsan thei che anih chuan nangpawn i theihnghilh thei tur a ni, hun a liam tam tawh alawm, hlui tir tawh rawh" ti a min chhanna chu ka duhthusam a ni, hlui sela, liam vawng vawng tawh sela ka duh.

Thlakhat dawn chu kan khuaah ka awm ve tawh a, ka pa leh nu Sangi te nufa nen kan cheng ho a, ran an vulh hnem bakah huan zau deuh an lo siam a, anni nupa huan lama an ṭul laiin Zualtei nen ran kan lo enkawl a, kan buai ve ṭhin khawp mai. Zualtei hi kei aiin kum thumin a naupang zawk a, ran enkawl kawngah erawh ka tluk lo hle a, a nu pawh hian min ring ngam zan lo aniang min pui turin a tir nasa a, ka tihve theih renga ka ngaih pawh hi, "Nangman ti rawh, i u kutah dah suh" a ti zel a, a awl zawkah ka ṭang leh nge nge ṭhin.

Hetianga nu Sangi'n, Zualtei ngawt a tir hi ka lo hrethiam lo mai mai hi a lo ni a, ka ngaihdanah chuan Zualtei chu a che felfaia, a rintlak zawk vangah ka lo ngai a; mahse, ka han hriatchhuah chuan a lo ni lo nasa mai. Tlaikhat ka nu dawr aṭanga ka leng  haw chu an nufain vawk chaw an lo chan a, kawmchar lama an awm avangin ka lut thawm an hre lo aniang nu Sangi chuan ka chungchang a sawi bawrh bawrh a, "A nu dawrah a kal aniang, a lo haw te hi mitmei reng rawh, damdawi ti ṭhin ania, a nghei em tih pawh kan hriat loh hi, thawmhnaw bo kan nei em tihte pawh check fo angai ania, i ngaih a sam leh lutuka, en liam mai mai zel suh ka tih che kha, in te hi amah chauha a awm laichuan chhuahsan miah suh" tiin a fanu chu a lo hau mawlh mawlh a, a mi ngaihdan chuan rilru a ti na ve vawng vawng mai, kan sual vanga miten min endawng aichuan ṭhat kan tum laitaka miten min rin loh hian a lo na daih zawkin ka hria.

Chungthu ka han hriat takah chuan leng ve lo riaua inhriatna ka nei a, mahni a ka tal hran a ṭul hlein ka hre ta bawk. Ka pa chuan a phal lo ngei mai a; mahse, ka nawr ve a ngai, helaia ka awm reng zawngin kan intihrehawm tawn a ni mai mai dawn a, thinlunga inzawmna nei miah loa chen ho chu ka tan mai ni loin an tan pawh thil nuam a ni lo ang, ka lakah an inveng reng emaw a nia nga, keiin ngaihbel tur ka hmu reng bawk anga, nakin lawkah buaina kan neih mai pawh a hlauhawm a ni, chutiang anih vaih chuan a tuartu tur chu ka pa hi a ni bawk.

Karkhat zenzawn a liam leh hnu chuan ka pa hnenah Aizawl lama awm ka duh thu ka hrilh a,  "Eizawnna tur ka dap ve teh ang, heng laiah chuan ran vulh bak tih tur a awm si lo a,  Aizawlah hna ka thawk anga, nangni pawh ka pui thei zawk ang che u" tiin rawn tawh lem loin ka thutlukna ka hrilh tawlh a, ka dil chuan a phal dawn loin ka hria a, chuvanga rawn chhin pawh nei loa hrilh tawl ka ni.

A tir chuan a han phal lo zet a; mahse, nu Sangi'n a lo sawipui ve aniang chu a tuk zingah chuan, "I ṭhiannu nen em ni in tum?" tiin min zawt ve khauh a, "Ni mai ang chu, in luah dun pawh a duh a, nu Hlimi te tihbuai leh aichuan a ṭha zawk ang, engmah hlauhthawn tur a awm lo ania, ka rui ngai tawh lo a, a hma anga awm leh kha chu ka tum tawh lo, min ring ngam ve phawt mai rawh" a ngaihṭhat nan ka ti leh luam a, min rin hi a duh ṭhin a, a ngaih a ngam zan lo thung a, tunah pawh hian min ring ngam lo chungin min rin erawh a tum lawi a, keipawn a tumna chu ka ti hlawhchham bik lo ang tiin rilru ka siam a ni, ka nunhlui ten min la vaw let mek a ni a, kir leh chu ka tum bik hauh lo.

Ka pa nen chuan Thantei kan phone a, Aizawl lama ka chhuk tur thu Thantei'n a hriat chuan, "Lo zuk awm hmasa la, ka lo chhuk ve vat ang, inluah turte i lo zawng dawn nia, keiin dawr bungrua ka rawn keng thla anga, dawrah kan sem hmasa anga, chumi chhungin dawr luah tur pawh kan ngaihtuah bawk anga" tiin rem a lo ruat zung zung a, a pute lamin an duat bawk a, chhungkaw harsa tak an ni lo bawk nen a eizawnna tur engkim an buaipui sak a, hetia a han awm ṭhat hnu phei hi chuan an duat zual viau a ni awm e.

Christmas te ka han hmang leh te te a, kum thar veleh Aizawl lamah ka chhuk a, ka pa chuan pawisa tlema zawng min pai ve bawk. Nu Hlimi hnenah ka innghat hmasa a, Thantei'n bungrua a chah mek bawk a, lo chhuk a tum vat tur thu pawh a rawn sawi a, inluah tur zawn pahin ka lo nghak rih a ni ber. Nepnawi lam khawih hmasak kan tum a, a remchan angin thawmhnaw lamte pawh kan khawih chho ang tiin rem kan ruat a, capital tumtu a ni bawk a, engkimah a thu chu ka ngaichang a, ani pawn mi a rawn peihin ka duhdan a ngaipawimawh thiam khawp mai a, a chang phei hi chuan min ngaichang mah mahin ka hre ṭhin.

Ṭum khat chu, "Dawr ruak a awm a, address ka lo thawn che anga, lo va en teh" a rawn tih vangin hmanhmawh deuhin ka chhuak a, Aizawlah hi chuan dawr ruak hi a vang a, chuh chak hi a ngai ṭhin khawp a, midangin an biakfel hmaa chet vat a ngai ṭhin, "Kan duhzawng anih chuan pawisa ka lo thawn nghal ang" ka ṭhiannu chuan a ti zung zung a, a hmun a sawi chu lower zarkawtah niin kawng an chung chiah a ni a, a zau lo nain a hmun a ṭha ngang mai a, thawmhnaw leh eng ilo zawrh nan a rem khawp mai. Thantei chu thlalak te ka thawn a, "Hetiang anih chuan ka nepnawi chah ho hi champhaiah ka tiral anga, thawmhnaw ka chah leh nghal dawn nia, pawisa ka lo thawn che anga lo pe tawp rawh" tiin a rawn hauh fel nghal der a, bungrua kan neih hmain dawr chu ka nei a ni ta reng mai.

A neitute chuan luahlut vat turin min duh a, dawr ruaka kan dah rih tur chu an hrethiam vak lo. Mahse, pawisa ka pek nghal avangin kan inhrethiam ta tho a, hmabak la ko viau mah se thaw a veng ve huai tawh. Sana ka en chuan dar 1 a ri zawt chauh a, chapal ka nei ṭha lo bawk a tiin MC ah en tumin ka chho a, ka han thlen chuan ka duhzawng a han vang em em khawp a, duh vak loh man to deuha lei hi ka tha a na ṭhin. 

Thantei'n ka haw tawh em tih min lo zawh chuan chapal ka zawn thu leh ka duhzawng a van thu ka lo hrilh luam a, "I size lo sawi la, ka lo chahsak mai dawn che nia, china apps-ah man tlawm nalh deuh deuh a tam alawm" a lo ti ta hlauh a, mawi vak lo to deuha lei aichuan a ṭha zawkin a hria. Ka size ka hrilh a, a chah nghal tur thu sawiin kan inbiakna kan titawp zui a, rei pawh a ni hman lo ang thlalak a lo thawn zut zut a, ṭhutthleng ka hmuh hmasak berah ṭhuin ka han en leh rih a, duhthlan tur chu tam tak a ni, henglai dawra an zawrh aiin a mawi daih a, a tlawm zawk fe bawk.

Chutia phone ka bih melh melh laichuan ka aw hriat ṭhan deuh hi ka hre thut a, ka hawi chhuak rang khawp mai. Ka piah lawka dawr aṭang chuan a lo chhuak a, a hnungah a nupuiin a lo zui bawk a, an fanu ni ngei tur hi a nupui chuan a kai bawk. An inzui phei chu ka en zui vawng vawng a, floor hnuai an thlen thlengin mit ka la sawn lo. An lam rual chuan thawk ka la kawk a, ka en chhung zawng khan ka thaw mang lo tih ka hre chawpchilh a, ka thin phu lah chu a rang nasa, a ri deuh dawt dawtin ka hria. Rang lutukin ka tho a, kawngkaa an chhuak tur chu ka zuk thlir zui leh hram a, Benja chu a aw hrechiang lo ila chuan ka hai ngei ang.

A sam a bukin a bawrchhawr reuh khawp mai a, hoodie lianpui leh pheikhawk a tawk lo emaw tih mai tura lian hi a bun bawk a, inchei mumal loa lo chhuak hi a ang a, a hmelah chuan hlim hmel ka hmu lo, lungawi lo tak hmel a pu a, Rosalyni erawh tun hma ang thoin a la nalh var reng. Pawna an chhuah hnuah chuan a fanu chu a kai a, Ice cream an lei laite chu ka thlir reng a, a fanu hnena ice cream pek paha a nui chu hun rei tak hnua a nui hmel ka hmuh leh hmasak berna a ni, a nui hmel chu ka hlimpui a, rilruin duhsakna ka hlan mawlh mawlh a, a hmaichhana ka sawi theih loh tur lawmpuina thu chu ka hlan bawk.

Ka haw leh lam chu ka chau ngawih ngawih maiin ka hria, ka ipik churh a, hlim rukna erawh ka nei lawi a, a chhan pawh a damṭha a, a nupui fanaute nen chhungkaw duhawm tak an din tih ka hmuh vang kha a ni ang. Duhtaka a fanu a enlai kha ka mitthlaah a lang iar iar a, chu mawlh chuan a ni minti lawm ni, engtin chiah nge nun a hman chhoh hre lo mahila mawhphurhna sang tak a nei tawh a, pa ṭha tak nichunga a hlen chhuah ngei pawh ka ring. Benjamina kha ka hrechiang a, a duhthusamte thlengin ka hriatsak a, a hmangaihte tana a rilru zawng zawng pe ṭhintu a ni, kan inkar tawp dan vang hian ka ṭhiante leh ka chhungte chuan an dem ngei anga, kei erawh chuan engtik lai mahin ka dem ngai lo a, ka dem phal hek lo, hun rei lote chhung atana hlimna min pekte kha ka thinlungah ka vawng a, theihnghilh lo turin ka hriatrengnaah ka dahṭha a,  ka theihnghilh phal ngai lo ang.

In luah tur ka hmu vangin thla thar ni hmasa berah Thantei a lo chhuk a, nu Hlimi te vengah tho a ni nain an inhlat deuh a, veng nuam lai takah a ni. Thantei'n lo be fel rawh min ti ngawt a, ka duh aia a len bakah a luah man a to mah mah a, keini pahnih chauh awmnan chuan a thawl khawp mai. Ka ṭhiannu erawh chuan, "Bungrua te pawh kan stock duh ang, dawr a zim si, in zau hi a ṭha" a ti sam leh mai a, dawr luahman nen chuan thlatin chhuak chu a tam duh khawp ang le.

Dawr lisence a buaipui chhungin dawr lamah ka lo inremfel a, a hmun a rem ṭha bawk a, kan inremfel niah pawh lo en an awm nual a, kan dawr ṭhenawmte a fel bawk nen a nuam dawn hlein ka hria. Signboard te kan siamtir a, kan dawr hmingah 'Blue bayou' tih a duh tlat a, a awmzia ka zawh lah chuan, "Thil mawi tak suangtuah rawh, hringnun hahthlak lutuk aṭanga kan chuan chhuahna tur anih hi" tiin min chhang a, a awmzia pawh chu ka la hrethiam ta chuang lo.

Dawr kan han siam zo chu kan buai ve nak nak reng, social media lamah te kan han zuar ve bawk a, kan indaih leh reuh si lo a, tlai thim hnuah kan haw chauh a, eirawng inbawl chawp a lo ngai ṭhin bawk nen ka mut ve theih meuh hi chuan dar 10 a lo pel tawh ṭhin a, kohhrana han tal tam pawh a har khawp a, kan hman ve chhun kartawpah lah hian kan chau a, ka chhuak peih tawh ṭhin lo. Pathianni chhun leh zan hi chu inkhawm kan ṭhulh ngai lo a, kan theihtawkin kan invawng ve a, kan nun ngaia kir leh chu kan tum lo dun hle a ni. Thantei hi a fel a, kei aiin a puitling zawk bawk a, min nawr kaltu leh kawng engkima min kaihruaitu ti ila a sual lo ang, a tel lo chuan hetiang dinhmuna ka din theih hi ka ring lo a, rilru fim ka put reng theih chhan pawh a ni, ani ang ṭhian ka tawng hi vannei ka inti takzet.

Fur lai a ni a, nikhat chu keimah chauha dawr ka nghah laiin beisei loh lutukin thlawhtu ka nei a, Noeli a ni. Coffee la a ka chhuak, dawra ka lut leh chiah tihah a rawn lang hlawl a, ka hmu thut chu ka hamhaih bawk aniang lo biak hmasak nachang pawh ka hre lo. Amah zawk chuan, "I dam maw, min hre lo a va ang ve?" tiin min nuih var var a, a danglam viau tawh, a inchei smart zuih mai a, ukil hna a thawk emaw tih tur a ni.

"Tehhlawl che chuan.." phawk fea ka tih laiin, "Khu laia i kal kha ka hmu che a, ka lo umzui che" tih pahin kan thil zawrhte chu a thlek kual dan dan a, "I dam zawk em?" ka ti chu min lo en leh rang khawp mai.

"Dam e, fa i nei tawh em, hei hi i dawr em ni?" a ti zui zat a.

"Anih hi, ka ṭhiannu nen kan ti dun a?" a inchei dan mawlh chu ka lo enchik a, "Eng nge i tih ṭhin?" tiin ka zawt leh.

"Advocate lam daih" a tih chuan ka ring dik viau mai.

"Engtin nge i awm tak zel, khawdangah pasal i nei daih emaw ka tia, heng laiah te kan inhmu leh hlawl a" tih pah chuan ka sirah a lo ṭhu a, "Pasal ka la nei reng reng lo" ka lo ti chu phawk lek lekin min melh a, "Ka awih lo" a ti teh tlawng a, han sawifiah vak pawh ka chak lo, min nuihzat duh mai ka hlau a, a hmuh chin hi a tawk viauin ka hria.

"Benjamina kha ka hmu ṭhin a, nupui dang a lo nei daih sia, ka ngaihtuah reuh lutuk che a" a nui deuh hak hak a, chumi hnuah, "I thlawi em ni?" tiin min zawt zui a, ka lo nui ringawt.

"Awmpuia a damṭha em?" ka tih chuan, "Damṭha e, kan inbe ngai mang lo, a buai lutuk a, kuminah helamah a rawn awm a, kan inhmu thei chuang lo" a ti luam a. 

"Ahmain khawiah nge a awm a?" min rawn en deuh ran ran a, "Lawngtlaiah, a post hmasa ber ania lawm, kumin hian Aizawlah a rawn awm chauh, a chanchin i van hre lo em em?" min chhuahchhal awka lek lek hian a ti a, "Fa a nei tawh em?" ti a ka zawh chuan, "Fapa a nei, kum hnih a tling ṭep tawh" nuisang hian a ti leh a, chutih laichuan a phone a lo ri a,  "Khawi vengah nge an awm?" ti a ka zawhna chu min chhang tawh lo, a phone chu a chhang a, "Ka lo chhuk dawn, lo awm rawh u" tiin a tho sawk sawk a, "Rinte, ka kal mai ang aw, ka ṭhianten min nghak a" a ti a, engmah pawh ka sawi hmain kawngka lam a pan rawk rawk a, "Anih aw, lo kal leh rawh" ka tih laimek chuan a rawn inher leh lawi a, a name card hi ka dawhkanah a rawn thehthla zauh a, ban min vai khum thuak hnuah a chhuak zui a, a kal liam hnuah pawh a perfum rim a la nam chek chek mai.

A name card chu ka en a, mahni chuan ka han nui ringawt a, kum 5 chhung teh meuh hun ka khawhral laikhan ka ṭhiante ho chuan hmalam an lo pan a, hna ṭha tak tak thawkin an lo puitling ṭhuau tawh awm si a, Kimkimi leh Mawitei khan eng nge an tih ve ṭhin ang aw, Peksanga te mawlh kha, sawi hmaih theih loh Awmpuia pawh, ani phei chu....

Hriatchhuah zawk ka nei, Noeli khan a post hmasa ber kha Lawngtlai a ti maiin ka hria!?

Rang lutukin ka nu ka han call a, a chhang chiah chu, "Hmana ka bialpa hlui lo kal i tih kha eng ang hmelpu nge?" ka ti vin chiam a, engvanga vin viau nge ka nih pawh ka hre lo. Ka nu pawh chuan mak a ti deuh aniang, "Eng nge maw i hriat vak vak chu le" a lo ti bul hmuk a, thawk ka han la leh rih.

"Nu, a hmel landan, i hmuh dan han sawi teh?" ka ti ṭha leh a, ka thinphu ran zia chu aw, ka lo ring sual tlata hriatna ka nei a, Awmpuia zawk hi a ni thei dawnin ka hria.

"Sang deuh, palian deuh"

"A ngo em?"

"Ngo e, a sar vung mai, i nu Thani'n hmelṭha a ti lutuk" a sawi laichuan mit ka chhing vang vang, amah ngei a ni, Benjamina emaw ka tih kha Awmpuia zawk a ni.

Nilengin thildang ka ngaihtuah thei lo, engtik laiin nge a lo kal, ka nu khan pasal ka neih thu a hrilh anga, engtin nge a lo dawnsawn ang aw, ani kher hi chuan hetiang thu hi hre lo sela ka duh asin maw le, min theihnghilh hmak sela, ka chungchang ngaihven miah loin nupui sela ka duh asin, engvanga min ngaihven leh nge maw anih le, Benja nen kan chungchang a hria anga, chuvanga lo kal chu em ni ang?

Hma deuhah dawr ka khar a, awm nuam lo nen ka khua te a sik deuh lek lekin ka hria. In ka thlen veleh ka pindan lam ka pan a, ka phone pawrhin Noeli chu ka call zui a, han zawh ṭan mai dan tur pawh ka hre lo. Phone chu a chhang lawk lo a, a rik chhung chuan ka lo inngaihtuah buai nasa hle ringawt.

Rei fe a rik hnuah Noeli chuan a lo chhang a, "Keimah, Rintei" ka tih chuan, "E, ka'n save ve nghal ange, i inhralh ṭha em, i dawrah khan duh deuh ka nei a, hlawh ka lak hunah ka lo en leh ang" a lo ti zung zung a, ka zawt tawl ang, Awmpuia chungchang a ni bawk a, ani lakah chuan sawihreh tur a awm loin ka hria, a hrechiang ber tur leh zawh awm ber a ni bawk.

"Enteh Noel, Awmpuia kha kan khuaah a lo kalin ka hria a.." ka han ti dek dek chu, "In khua chu a lo paltlang fo ang, engtikah nge a lo kal a?" a rawn ti let hlauh a, chhan dan pawh ka thiam lo.

"Tun hnaiah a ni lo, ka awm loh laiin a lo kal a, ka nu dawrah kan in a lo zawng tih te ka hria a, a rei tawh ang" chu thu ka sawi zo chiah chu, "Kha kha maw, a rei tawh e, i awm si lo a, mi ho lah khan pasal i neih thu an lo hrilh a, ka ṭahpui nasatzia kha Mawli" a ti teh chiam a, ka hrethiam lo telh telh!?

"Eng nge i sawi awmzia?" 

"In khuaa a lo kal hnu lawkah khan nupui a nei alawm, pasal i nei tih a hria kha a tuar na teh asin, a nupui neih dawn zan thleng khan i chanchin a la sawi a, in khuaten pasal i nei an ti si che a, i u Lizzy lahin in khuaa school-ah i thawk angin a sawi a, a lo kal leh lahin i awm chuang si lo a" ka kut khur dar dar chu chiang takin ka hria, ka mit chu mittuiin a rawn chim khat vek a, ka ṭap lek lek tawh.

"Vawi engzah nge a lo kal?" ka aw chu a tham ṭuak mai.

"Nupui a neih hma khan a lo kal a, a hnuah khan vawi engzah nge a lo kal ka hre lo, a kalkawng ania, a lo pen fo chu ka ring" mit ka chhing sawk a, ka biangah mittui a rawn luang nghal zung zung, ka awm loh hnuah pawh a rilru ka la hliam nawn cheu chu a nia, Lalawmpui, khawngaihthlak lutuk, keihi min tawng lo la i hlim zawk tur, engah nge kei kher hi min lo hmangaih le, kei vanga i rilru nat thute, i tawrhna te ka hriat hian maw ka dam thei mawlh lo, rilru i ti na takzet a ni.

(End of chapter - 37)