BLUE BAYOU (CH - 38) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 38

"I ṭap em ni a?" Thantei lo lutin a tih chuan ka inhruhul sawk sawk a, a lo lut thawm takngial pawh ka hre lo. Ka lu chu a na ngut ngut a, ka ṭahna lamah ka hnar a ping ṭup a, thawk pawh a har. Ka bula lo ṭhutpah chuan min thlek deuh vang vang a, "Engtizia nge, i nuamsam lo em ni?" a ti zui zat a.

"Ka hritlang a, ka khua a sikin ka hria" ka chal a rawn dek a, "Damdawi a awm alawm, ka lo lak ang che" tih leh thawh a rual a, keipawh chu ka thochhuak ve vat a. Choka lama a phei chu a lo let leh har lo, tui no a lo keng a, damdawi nen chuan min lo pe a, min la enchik khawp mai.

"I ṭap chiang" a tih leh laiin, "Thil hriatchhuah ka nei asin" ka ti halh a.

"Eng thil?" tih pah chuan ka bulah a lo ṭhu a, sana ka en chuan dar 6 a lo ri ṭep tawh. 

"Eirawng ka la bawl lo, tirawh eirel pahin ka hrilh ang che" 

"I damsam lo em mai, ka lo bawl zawk ang"

"Ka zia mai ang, damdawi ka ei tawh kha" ti a ka tho chu min lo zui ve vat a, chokaah pheiin chaw chhumte ka siam a, anin chawhmeh a lo buaipui ve thung a, a ngaih a ṭha vak lo aniang a lam ka hawi apiangin min lo en a, ka ṭawng hun nghak hi a ang ber.

"Ka rilru a na" ka ti thawr a, "Tah hian lo ṭhu la lo sawi rawh" a tih chuan a bulah ka va ṭhu ve vat a, sawi ṭan mai dan pawh ka hre lo.

"Hmangaih pahnih chungchang ka hrilh che kha i la hria em?" a lo bu zauh a, "Pakhat zawk kha.." ka tih chuan, "A thinlung hlan chung chea nupui nei ta kha maw?" nuisang hian a ti a, lu ka thing rang khawp mai.

"Ni lo e, a rilru ka nei lo emaw ka tih zawk kha..." tiin thawk ka han la vang vang a, Awmpuia nena kan inṭhen hma kha ka hrechhuak uar uar a, khatih laikhan a taksa chauh ka nei a, a rilru ka nei loah ka inngai a, tuna ka ngaihtuah ang hi chu ka ngaihtuah thleng pha lo.

"Pakhat zawk a ni maw?"

"Aw, pakhat zawk kha, a hming chu Awmpuia a nia"

"Fel leh zaidam, hmelṭha leh lehkhathiam, hmeichhia zawng zawngte duhthusam kha" a lo tih chuan kan nui ve ve.

"Ni e, kan inṭhen hma khan a rilru zahve chauh ka neiin ka hre ṭhin a, kan inkar kha sawifiah thiam a har, ani kha chuan duhtu a ngah a, tu lakah pawh a ṭha em em vek a, atan khan ka special tawk loin ka hre ṭhin, a lakah khan beisei ka nei sang leh lutuka, a bialnu nih ringawt kha ka duhtawk lo a ni ber. Midang zawng zawng aia a ngaih pawimawh nih ka duh a, ka tum nasat poh leh ka hla telh telhin ka hre ṭhin. Tleirawl at lai a ni a, ka thikthu a chhiain huat leh thik tur ka hmu reng bawk a, ka duh anga a ngaihsakna ka dawn loh vanga inṭhen kan nia. Ka lo â ngawt mai, a rilru kha ka lo hrethiam ve tak tak lo a ni, ka chunga a ṭhat tehlul nen" ka ti leh vang vang a.

"A lo bia che em ni?" a tih chuan, "Aih, ngaihzawng dang ka neih hnu khan inlakhran a tum ve nasa a; mahse maw Thante, min hmangaih reng ṭhin a sin, tih lan dan a thiam lo chungin min ngaihsak reng a, vawiina a chanchin ka hriat hnu phei hi chuan ka inthiam thei lo, a chungah khan ka sual lutukin ka hria, a ngaihsakna te hi phu lo ka inti ngawih ngawih" ka sawi zawng pawh chuan ka hnuk a ulh a, ṭap lo turin ka insum ṭang ṭang bawk.

"Vawiinah a chanchin i hria maw, engtin nge i hriat?"

"A bestfriend nen kan inhmu a, nupui leh fa a neih tawh thute min hrilh a, home-a kan awm laikhan nupui a lo nei a, tunah chuan officer a ni tawh bawk a, MIS ah a inziak tling ve alawm" Thantei chu a lo meng nur nang a, "Nupui a nei hman maw?" a ti zui a, kei ka lo bu nghat.

"Chutak chu ania, a nupui neih hma khan kan khuaah a lo kal a, min lo zawng a, ka nuin Benja emaw tiin pasal ka neih thu a lo hrilh a ni awm a, chumi hnu lawkah chuan nupui a nei, a bestfriend chuan a nupui neih dawn zan thlenga min la ngaihtuah thu a sawi a...."

"E khai aw, a rilru a va na dawn ve le" 

"A rilru chu ka tina reng ṭhin alawm, Benja neih ka tum thu te ka hrilh a, a hmuh lai ngeiin mipa dang ka hmangaih a..." ka sawi zawm duh lo, keimah leh keimah chu ka hriatnawn tir leh a ni ber a, Awmpuia lakah khan ka lo nunrawng hlein ka hria.

"I awmdanah hi chuan nangpawn i la hmangaihin ka hria, hmangaih pahnih i nei a, Awmpuia pawh i la hmangaih tho a, tunah chuan i tleirawl at laia i hriatthiam lohte pawh i hrethiam tawh a; mahse, nupui a lo nei hman chu a pawi ber anih chu, Bena nen in inṭhen tawh si a, ani tal chu beisei thei ila ṭha tur..." a thil sawi vang chuan ka lo nui hak a, thil atthlak tak a ni, kei hi Awmpuia tan ka ṭha tawk ngai lo a, tunah leh lek phei chuan ngaihtuah ve ngam tur pawh ka ni lo, ka hmangaih ti a sawi pawh ka inthlahrung tawh.

Thantei nen chuan muthmun thlengin kan titi zawm a, ka chanchin engkim Awmpuia nen kan intawn dante, Benja a lo lan hnua thil thleng zawng zawngte, home-a ka awm tak dan te nen lam chuan ka hrilh a, ngaihnawm ti deuhin a lo ngaithla a, ka sawi kar lakah zawhna a nei leh zauh ṭhin. Ani chuan Awmpuia chu vawikhat tal hmu leh turin min duh a, "In inṭhen hnuah pawh mihrang kan ni lo a tih chuan ṭhian tal ni leh rawh u, hriatfuh loh inngah bawk si a, ṭhian han ni leh ula chuan in rilrunate pawh a zia phah zawkin ka ring" a ti sap sap a, a hmel hmuh chu ka chak lo a ni bik lo; mahse, a hmaa din ka hreh a, sawi tur ka hre meuh pawhin ka ring lo, pasal nei angin min hria a, han hrilhfiah dawn ila ka chanchin chhuanawm loh zet zet kha ka hrilh a ngai dawn a, ka ngam ngang lo a ni.

"A nupui chu tunge ni ang aw, eng ang mi nge a neih ang le?" ti a min zawh chuan, "A tu a pawh nise Awmpuia thlan chu hmeichhe ṭha tak anih ka ring" ka ti zawi sep a, Noeli khan a chanchin min hrilh thui lo a, Awmpuia lungdumtu chu a ṭha emaw ṭha lo emaw hmeichhe vannei tak a ni ang.

"Anih Benja chu hmuh i hreh em?" tiin min zawt leh a.

"Ani nen kha chuan kan inkar kha kan hrechiang em a, lungdam lo deuha inṭhen nimah ila kan pahnih thutlukna a ni a, kan inhmu leh anih pawhin pangngai taka ka biak theih ka ring" tiin ka hmuh hnuhnun ber kha ka ngaihtuah let a, Awmpuia laka ka inthlahrunna ang kha ani lakah chuan ka nei ve lem lo, a duhthlanna ka pawmpui miau a, Awmpuia ang lo takin ani chuan a tana ṭha tur lam a pan a, ka dem lo a, ka hrethiam em em zawk a ni.

"I mipa hmangaihte pawn hmalam an pan ve ve tawh a, nupui leh fate an nei tawh bawk a, tunah chuan nangmah i inngaihtuah ve hun a ni tawh, nangpawn hmalam pan tum ve la, ngaihzawngte pawh nei ve la, an ni pahnih vanga i rilru i tih nat reng hi a fuh lo ang, ka ngaihdan chuan midang tawng la, i duh vak lo anih pawhin innawr lui ve la a ṭhain ka hria" ti a thu min rawn chu ka la ngaihtuah chhin loh thil a ni, midang tawn a, hmangaih neih leh chu ka chak lo mai ni loin ka theih pawh ka ring lo hial a, tunah chuan kehchhe leh thei pawh ka ni tawh lo, ka daipelh tawh te kha rilruin a hre ran a, hlauhna lian tak ka nei bawk.

Kan muhil har deuh a, zingah thawh kan hai chiang khawp mai. Mahse, mahni hna thawk kan ni a, hmanhmawh ngai em em a awm lo bawk a tiin muangchangin kan insiam a, dawr kan thlen chuan dar 10  a pel tawh. Thantei awm ni hi chuan counter-ah ka ṭhu chawt a, anin customer a lo chhawn ṭhin a, mi biang biak a thiam bawk a, a lo sumdawng mi ve bawk nen a awm hi chuan kan inhralh ṭha ve viau zel. Counter-a ka ṭhut vang hian dawr neitu zawk emaw hi min ti fo a, Thantei hi ka mi chhawrah an ngai ṭhin a, ani lah hian, 'Ka pi' ti a min koh fiam a ching a, a neitu zawk angin a khawsa ngai lo bawk. Pawisa pawh hi ka kutah a dah mai zel a, thla tawpa kan inchinfel rualin ka chanpual hi min pe thlap zel bawk a, sawmapakhat dah hrangin a bak zawng chu bungraw chah leh nan a hmang a, ka pate pawh ka thawn ve fo tawh.

Thantei chuan pawisa khawl turin min ti a, "Nakinah a hranga sumdawnte pawh i la duh thei a, i chhungte thawn vek loin inkhawl bek bek rawh" tiin min hrilh zing khawp a, mahnia sumdawn lam chu ka ngaihtuah zawng a ni lo ve thung a, hetia hlawh tlema zawng neiha a kianga thawh hi ka duh mah zawk a ni.

Noeli nena kan inbiak leh hmasak ṭum chuan beisei loh deuh thil a lo sawi a, Awmpuia nen an lo inhmu a ni awm e. "I chungchang ka hrilh a, pasal i neih leh tawh loh thu ka hrilh khan mak a ti lutuk a, hmuh che pawh a duh a, min hruai teh a tia, a hman veleh ka lo len pui ang" a tih chuan ka chiai ru khawp a. Engtikah nge an lo kaldawn ka zawt a, a la sawi chiang thei lo chungin ngaihtuahna a luah tluk tluk a ni ber.

A remchang ema tiin Awmpuia nupui chungchangte ka lo zawt a, "A hming chu Juniper a nia, Juni tiin an lo, a awm ṭhinna Pu Sawma te chhung kha ania, a unaupa fanu a ni awm e, college kan kal lai aṭang khan Juni chuan a ngaizawng tawh a, delhi-ah pawh an awm ho reng alawm, Awmpuia nen kan inbiak chang pawh hian an flat-ah a lo awm ve reng zel" a ti deuh luam a, chuti anih chuan hmana bazara Awmpuia hmeichhe kalpui ka hmuh kha a ni ngei ang, vawikhat chiah ka hmu a, hmeichhe sam dum hmelṭha zet mai a ni.

"Khatih laikhan a duh lo deuhin ka hria?" ka lo ti zauh a, amah Noeli ngei hian Kimkimi hnena a sawi kha ka hre tlat.

"Umm, a duh ngai hleinem; mahse, a awmnate khan an tihpui nasa ve em a, Juni a lo zei ve bawk sia, an inneih dan te kha..." a han ngawi deuh dat a, "A bulah lo sawi miah suh aw, midang bulah pawh a sawi chi loh" a ti leh hlut a, ka lo aw rang khawp mai.

"Delhi aṭanga Awmpuia a lo haw hlim khan an chesual alawm"

"Maw...?" 

"Mahse dawt vek" a ti leh zat a, a thilsawi chu ka hrethiam mang lo.

"Awmpuia chuan zing ka thawhin ka bulah a lo mu ve a, zanah khan a cousin te ho nen movie kan en a, ka lo muhil daih a tia, zingah a bulah Juni a lo mu ve tawp a, kha kha a nu Maengi'n a phawk leh si a, an sawirem nghal chuk chuk alawm" a tih chuan rilru a buai nak mai.

"MIS kha a tling zui a, amah hi chuan UPSC exam te a duh a, MCS tal kha a duh bawk a; mahse, a nu te an ngaihtuahawm ve bawk si a, a nu a lo damṭha lo ve bawk nen hna neih vat kha a mamawh a, a post lah Lawngtlai lam daih ania, a nu leh a farnu an hrisel lo bawk si a nupui neih kha a tan chuan a ṭha ber" a ti leh luam a, keichuan thil ngaihtuah dang ka lo nei a, a nupui chu duhtaka a neih a ni lo tihna em ni ang, an inneih hma lawk pawhin min rawn zawng a ni a, eng emaw tak chu dik lo a awm a ni.

"Chuan maw Rinte, hmanni a kan inhmuh chuan inkhuaa a kal chungchang kha ka zawt a" a tih chuan ka ṭhu ngil deuh uaih a, "Engtin nge" ka ti nghal thuai bawk.

"A lo haw hma deuh khan Benjamina nen an inbia alawm, Benja khan inkhuaah kala ngaihven tur chein a lo hrilh anih hmel, chuan, 'Kan inhau hrep' a ti, a bak chu an inbe zui lo" thawk ka la hawk a, ka ngaihtuahna a buai nuai nuai mai, ka hriat ve miah lohin thil thleng a lo tam lutuka, hun a liam tam tawh bawk si a, rilru put dan tur pawh minti hre lo.

"Ka lo lenpui hunah amah i zawt dawn nia" Noeli'n a tih chuan, "Dawrah maw, nge inah zawk in lo kal dawn?" ka ti sawk sawk a, huphurh tak tein ka huphurh.

"A...ka hre nang, dawra a rem loh chuan inah pawh a pawi hleinem, nitin a office a, inrinni emaw chawlhni velah a hman ka ring" a ti leh a.

"A fa chu kum engzat nge ni tawh a?" tiin zawhna dang ka zawt leh vat.

"Kum 2 a la tling lo, kum khat leh tlem, a duhawm reuh ania aw, a pa xerox copy a ni ringawt" a nui deuh kar kar a, "Ka hmu ve chak hle mai a" ka tih chuan, "A thlalak en i dil dawn nia" a ti leh mai a, an lo kal hun tur bawk chu ka zawt leh.

"Kartawpah hian kan lo tum dawn nia" a tih laiin, "In pahnihin em ni, an nu a lo kal ve dawn em?" ka lo ti vat a, "A chi nang, a first love i ni ve a, nupui te hruaina chi a ni hleinem" a ti a, a nui hawk hawk a, chu chu ka duh dan tak pawh a ni, an nu a lo hruai anih chuan sawi tur ka van dawn lutuk tlat.

Noeli nen kan inbiak zawh chuan ka inngaihtuah buai khawp mai a, Thantei ka zawh lah chuan, "Khawiah emaw inhmu fal zawk rawh u, sawi tur in ngah dun ngawt ang" awlsam zet hian a ti a, a fala inhmuhpui chu thil ṭha ber a niin ka hre lo. "Inrinniah kan buai ṭhin si a, chawlhniah inah lo kal mai sela pawi i ti em?" ka ti ta ngawt a, "A pawina a awm hleinem, titi na hun thawl a awm zawk ang chu" a ti leh mai a, "Mahse Rinte, mi pasal a ni tih theihnghilh suh aw" a tih chuan ka inhrechhuak ram ram mai, lo phur viau emaw lo chiai ve vak tur ka ni lo, ka tih a mawi lo tawp thil a ni.

"Ṭhian hlui angin alawm kan inhmuh dawn" ka ti ve tak nain ṭhian hlui ngawt zawng a ni lo, ka nuna mi pawimawh berte zinga mi a ni.

Helhkam nei ṭun chungin kar kan hmang liam a, Noeli pawh message thawnin chawlhnia lo leng tur chuan ka hrilh a, kan address te pawh ka thawn nghe nghe. Inrinni tlaiah kan haw hma deuh a, thingpui hmeh tur chhangte ka lei lawk a, keiai mahin Thantei chuan a vei zawk emaw tih tur a ni, zanah ka samte min colour sak a, "A hmuhah lang mawi la ka duh a; mahse, in veng reng ang che, i rilru hi i ven tlat a ngai" tiin min hrilh mawlh mawlh a, "I ngaih ang khan kan in en dawn lo, engmah venthawn tur a awm hleinem" tiin ka chhang ve tlat a, hmuh ve ngei ka duh chhan pawh hlim taka inthlah ka duh vang a ni.

Chawlhni chawhma chu kan han inkhawm ve a, chawhnu lamah in ka tifel zung zung a,  an lo thlen hmain ka lo inbual zo diam bawk. Ruah a tla cherh cherh reng a, an lo kal thei lo mai ang a ka tih rilruk laitakin Noeli'n min lo call a, "Inveng kan lo thleng tawh a, kawngpuiah min lo chang thei em" a rawn ti lang lang a, chutih laia, "Ruah a sur hi, an awmna lai kha zawt chiang la a tawk mai alawm" lo ti tu chu Awmpuia ngei a ni, a aw pawh ka la hrechiang khawp mai.

Nihliap nen kawngpuiah ka lo nghak a, minute 5 vel chu ka nghak awm e, car var hi ka lam panin a lo tlan phei a, ka bul a lo thlen hma deuh chuan a head light a rawn ti eng zak a, Noeli a lo dakchhuak rang hle bawk. An car dahna tur ka lo kawhhmuh laite chuan ka hawi chhuak ṭha ngam lo, min lo en em tih takngial pawh ka hre lo a, Noeli nen an inbe thawm erawh ka hre pha.

An lo chhuak chu ka hma zawnah tak a rawn ding a, ruah a tlak reng avangin veranda lam an lo pan thuai bawk. Awmpuia chuan kekawr dum leh t-shirt var a ha a, a chungah jacket dum a ha bawk a, a hmel erawh ka la en ngam lo, a sangin a palian zual sawt tih chu ka hmuh theih chhun a ni rih.

"Lo chho ru" tih leh step lam pan ka rual a, hmanhmawh deuhin step-ah kan inzui chho a, ka hnunga an inbe ri chu chiang mang lo zetin ka hre bawk.

Inchhung kan luh rual chuan Thantei'n a lo chibai vat a, kei erawh ka nihliap huh nen veranda thlang lam ka pan a, ka thinphu lah chu a han rang em em khawp a, awm a nuam lo hle a ni. "In in va nei nuam ve, in pahnih chauhin em ni in chen a?" Noeli'n a tih laiin, "Rintei kha khawiah nge a kal a?" Awmpuia'n a lo ti ve vat a, ka va lut tur chu ka lam a lo hawi vangin chiang fahran hian kan inmelh a, a nui hmel chu hman ami ang tho kha a la ni, a la danglam lo, a ngaihawm ngaiin a la ngaihawm reng. 

"Lo ṭhu ru, thingpui kan in dawnnia" Thantei'n a tih laiin, "Towel ka lo lak ang che u" tih leh pindan lam pan ka rual a, min lo enzui hlawm aniang,  "A lai anih kha" Thantei'n a ti zauh ri chu ka hria.

Towel ka va la sawk sawk a, ka chhuah leh laichuan an lo ṭhu fel tawh a, Noeli hnena towel pek mai ka va tum chu Awmpuia'n a lo ban hmasa a, ka lai ru nasa mai, ani lah chuan min en ngar ngar reng a, min ti khawr zo vek alawm maw le.

"Thingpui chu i chhuang em ni?" Thantei lam ka melh a, "Aw, ka insu pah dawn a, lo vil rawh" awmze nei zeta min melh pahin a ti a, Noeli lah chuan a lo hrethiam aniang chu, "Phone call ka'n hmang lawk ange" tih pahin a tho zui bawk a, hamhaih deuhin anni pahnih kalsawn chu ka thlir a, sawitur van nak alaiin awmdan pawh minti hre lo zo. Awmpuia chu ka melh zauh a, a lu a lo hru mek a, min en lem lo. Ṭi deuh chuan a bulah ka zuk ṭhu a, chutah min lo en pahin Towel chu min pe a, sawi duh nei hmel a pu bawk. 

"I damṭha maw?"

"Khawi vengah nge in awm?" kan ṭawng rual zat a, kan han innuih leh rih.

"Damṭha e..."

"Zarkawtah kan awm" ka lam hawiin a lo ṭhurem zui a, hetiang em em a Awmpuia hmaa ka laih awm hi ka la hre lo. Ani lah chuan ka mitah chiang fahranin min en a, lai hmel a pu lo a, inringtawk tak hmel a puin ka hria.

"I chanchin ka lo hre nial nual a"

"Engtin nge i hriat a?"

"A, Noeli khan..." a ngawi dat a, "Eng nge i an zel?" a ti teh daih a.

"Ka damṭha viau e, nang zawk?" ka tih chuan dar a kan ak a, "Min hmuh ang hi ka ni mai" a ti zui a, kan awmdan chu a hahthlak ru riau mai a, sawi duh nei sawichhuak ngam lo ve vein an awm aniang kan inzawt tim dun khawp a, a hmelah chuan min zawh duh a nei tih lah ka hai lo, keimah zawk chuan ka hrilh tawp mai dawn nge mawni.

"Thingpui a soin ka hria" tiin ka thawhsan leh rih a, kan ṭhiante lah chu awm lo ang hmakin an inthiarfihlim a, an ṭawng thawm takngial pawh ka hre lo. Thingpui ka siam laichuan Noeli a lo dak zawk a, "Keichu ka puar rih a, min siam kep suh" tiin a kal leh daih a, inbiakna hun min siamsak an tum tih ka hriat vangin ka ko zui duh lem lo.

Thingpui no nena ka va let leh laichuan phone a lo khawih a, min hmuh rualin a ak ṭha vat a. "Kan khuaah i lo kal em ni?" no ka pek laia ka ti chu a duhzawng sawi ang mai hian min en rang a, "Engtin nge i hriat?" a ti zui zat bawk.

"Ka nuin min hrilh a, i hming a lo hre lo a, nangmah i ni tih pawh ka lo hre lawk lo va" 

"Nia, i awm si lo a, i pa tal hmuh ka duh nen kan awm rei hman lo va" a no chu center table-ah dahin ka lam a lo hawi leh thuai a. 

"Khawiah nge i awm a, school-ah i thawk nge pasal i nei, Noeli khan 'A nuthlawi leh tawh' a ti che a, i chanchin ka hretlem hle mai" thutak zet hian a ti a, a hmelah erawh zawhna hlir a lang, ka lo nui deuh chu ngaihṭhat loh hmel deuh hian min en bawk a, ka chungchang a hriat dan mawlh chuan nuih a ti za, a sawi ang takin a hre tlem hle a ni.

"Khawi school-ah mah ka thawk hleinem" 

"Ka ring reng a ni"

"Pasal pawh ka nei chuang lo"

"Maw..?" 

"Ka neih tak tak i ring em ni a?" min chhang loin min en reng a, "Nuthlawi ka ang em ni?" ka tih chuan lu a thing ringawt.

"I hre tlem tak tak hle mai" tawi tein ka nuih a, min nuih let ve hauh lo. Ṭawng leh ka tun laitak chuan, "Pasal i nei lo maw?" hriatthiam loh hmel zet hian a ti a, kei ka lo bu nghat nghat.

"I nu ka zawh khan pasal i nei a ti a?" 

"Nia, khuaah ka awm lo a, anihna takah chuan home-a ka awm lai a nia, ka nu chuan a sawi hreh anih dawn chu" a ṭhu ngil deuh hluai a, "Khawiah maw i awm?" a ti nawn leh ngat a.

"Home-ah, ṭhalai awmṭha duh lo ho enkawlna hmunah?"

"Engati nge chutah chuan i awm?" a aw chu a fiah fuk a, ka mitah chiang lutukin min en bawk.

"Ṭhalai awmṭha duh lo ka nia, ka pa'n min dah alawm" a hmel buai nak chu ka hmu lo der a, ka no la kangin bang lam ka melh daih bawk a, ani erawh chuan min la en reng.

"Engtin nge i awm a?" a tih ri chu a ring lem lo.

"Zu ka in ṭhin a, damdawi ka ei ṭhin bawk a.."

"Engvangin?"

"Ka ruih nan.." a ngawi ta reng a, rei dawn chu kan ngawi dun. A lam ka hawi chuan a thingpui no a ban vat a; mahse, in loin a dah  leh rih lawi a, chuta a lo hawi nen chuan kan inmelh chiang viau a ni.

"Tinge min lo biak loh, buaina i nei anih chuan lo sawi tur che ania, hetianga inpawh lo lutuk tur hi kan ni lo asin" a tih ri chuan min vilh ngut ngut mai.

"Tih buai che ka duh lo alawm, ka awmdan kha i hria ang tih ka hlau daih zawk, hreta la engtin nge min ngaih ang..." min lo pawtchat vat a, "Min hrilh la ṭha tur, kan inkarah sawi hreh tur a awm hleinem" a ti vang vang a, ka nui hleithei meuh lo.

"Tunah eng nge i an tawh?" a tih chuan, "Ka ṭha tawh, ka sim tawh alawm" ka ti ve vat a,  ka thil sawi chuan a ti lawm ve nge ni hahdan huai hmel a pu a, a nui lo tih chauh a ni.

"I chanchin kan la sawi ve lo, fapa i nei tawh tihte ka lo hria a, i nute an dam ṭha em?" ka ti zung zung a.

"An damṭha e, Noeli nen in lo inhrilh nual tawh a ni maw?" a tih chuan ka bu zauh a, a nui ve suk mai. 

"I nau pawh a nula ve tawh ngawt ang a" thingpui no a ban leh laia ka tih chuan phawk fein min rawn melh a, chuta a thil sawi chuan min ti hrilhhai hle a ni.

"Matei chu nikum khan a boral tawh alawm" a ti ta mai a, engmah ka lo hre lo, Noeli takngial pawn a sawi lo.

"Eng nge a awmzia?" ka ti he haw a, min ṭhawng takzet.

"Thluaka khawsik lut a nia, kan inenkawl rei lo, ni hnih thum chauh a na hman a, nikum kumtir khan a boral" a ti zuai raih a, engmah hre loa ka zawt chu ka inthiam lo kher mai, "A van pawi ve aw" ka ti ve vang vang a, hetiang leh lutuka chanchin kan inhre tawn lo hi ka thiam loh hulhual a ni, ni e, a sawi ang khan heti lutuka inpawh lo tur hi kan ni lo, ka hriat ve lohin hun harsa tak tak a lo paltlang anih dawn hi.

"Ka ui hle mai, a hmelṭha bawk si a, a la naupan tehlul nen.."

"A damchhung khan nun nuam takin a awm ve ngai lo a, tunah chuan a damlai aiin nuam a ti zawk maithei a ni" a tih chu amah a inhnemna ṭawngkam mai niin ka hria.

"I nu chu a khua a van har dawn ve aw..." ka ti leh vang vang a.

"In kan sa mek a, khawhar hman pawhin a awm lo, Bawiha hian a tibuai hneh ve bawk a" 

"A lung i phun tawh em?" ka tih chuan, "La phun lo, kan hmanhmawh duh rih lo a, ka hreh deuh bawk a, keimah ber hian ka ngaithiam lo aniang" tawitein min rawn nuih a, a mitah erawh rilru natna thuk tak a lang a, hnem thei dinhmuna ka ding lo chu pawi ka ti.

"A ngaina lutuk che asin, nupui ka neih dawn khan nangmah a beisei che aniang a titau deuh tlat a, chaw te a ei duh lo a, ka nupui hi a ngaina duh miah lo bawk a, ṭum khat phei chu ka phone-a kan thlalak dun kha a lo en a, sawi thei sela chuan min zawh duh kha a nei a, i thlalak kha a kawk leh ṭhin a, a sawi thei lo kha ka lawm, i chanchin hrilh tur ka nei si lova" a tih chuan chhan dan a vang khawp mai, ka awmchhung chu a tawt urh a, ka ngaihtuahna te pawh a mang dukin ka hria.

"Pawi ka tihpui lutuk che, i tan ka ṭangkai lo ṭhin bawk si a, min ngaidam mai rawh aw" aw lawi zeta ka ti chu tawitein min nuih a, engmah phei chu a sawi zui lo.  "I  thingpui kha a dai ang e, in tawh rawh" ka tih laimekin Noeli a lo lut a, "In sawi thawl deuh tawh em?" a rawn tih chuan ka chhang lo ve ve.

"Rinte, Mawiite ho nen in la inkawm ngai em?" Noeli bawk chuan a ti leh a, kan graduate hnu khan kan inkawm tam lo khawp a, phone-ah takngial pawh kan inbe ngai lo, "Kan inbiak lohna a rei tawh mai, i hmu ngai zawk em?" ka tih chuan, "Hmanniah Kimkimi ka hmu a, kan inbe ve hlut a, sericulture office-ah a thawkin ka hria, Mawii chuan kan inbul lawkah pasal a rawn nei a, an dawrah a lo ṭhu ziah a, min hria ang pawhin a awm ngai lo, biak hmasak ve pawhin min hre lo der tlat a, ka hmelhriat loh pelh ve mai mai tawh" a ti barh barh a, an chanchin ka hriat lohna pawh a rei ta viau mai, Mawitei pawn pasal a lo nei tawh chu ania, Kimkimi nen tal chuan an la inkawm ang chu maw.

Thantei lo luh hnu chuan an titi bawrh bawrh a, Awmpuia hna chungchangte kan sawi kai a, "UPSC exam leh se ka tia, nupui a nei chuk chuk a, MIS ringawt tur chuan ka ui a sin mawle" Noeli'n a ti chu Awmpuia'n mitmeiin a lo khap zauh a, "Ka ui che alawm" pakhat lah chuan a lo ti pawr khawp a, "Tinge nupui chu a neih chuk chuk a" fiamthua Thantei'n a tih ve chuan Awmpuia chu a ngawi reng.

"Tihpuitu lam an che chak deuh te pawh aniang" ti tu chu Noeli bawk a ni, a sawi pah chuan min lo melh kher a, keimah vanga sawi a ni tih hre mah ila Awmpuia awm ti nuam lo zawng chuan ṭawng lo sela ka duh. 

"Tunlaiah chuan mihausa nu ho hian makpa tur hi an chuh chak ania, a ṭha ṭha hi an lo hauhfel zung zung zel" Thantei'n a tih laiin, "A dik chiah, zah pawh an hre lo, an fanute tan an kherh ngat ngat zel" Noeli'n a lo ti ve bawk a, an nui dun kar kar a. Awmpuia chuan insawifiah ngai a ti nge ni, "Ka awmbo a ngai a, ka nu lah a damṭha si lo a, Matei nen chauha kalsan kha ka ngaihtuah deuh maw le" a ti ve nuah nuah a, ka lo nui a hmuh chuan, "Chhungkaw thil a nia" a ti leh ngawt a, a chhan erawh rin dan ka nei, pasal ka neih thu a hriat hnu lawkah nupui a nei tih Noeli'n a sawi a, a nupui neih chhanah hian ka tel ve tlata inhriatna ka nei a ni.

"I nupui chu hmuh ve a chakawm hle mai" pangngai thei ang bera ka tih laiin, "Hmu chak duh suh, ani pawn a hmu chak lo ang che" Noeli'n a lo ti zauh a.

"Min hria em ni?" ka tih chuan Awmpuia nen an inmelh ralh a, "I hming chu a hria ang" Awmpuia'n a lo ti zawi deuh sup a, a bak chu ka zawt thui duh lem lo, sawi nuam a ti lo tih a lang reng a, ka hming a lo hriat dan pawh chu hrechak viau mahila ngawih chuh a ṭha zawkin ka hria.

Ruah a han thlengin an leng a, an haw dawn chuan dar 3 a ri dawn thuak tawh. Noeli a kal hmasa a, keiin Awmpuia kal chu ka zui ve bawk a, min nghak deuh nge a kal muang khawp mai. Step tawp kan thlen dawn ṭepah chuan a ding dat a, a lo rawn lehhawi rualin ka kut a rawn man a, a hmel thutak zet chu ka hmuh hmaih lo. "Thil ṭha lo engmah ti tawh suh aw, buaina emaw harsatna emaw i neih chuan min hrilh dawn nia, mamawh i neih pawhin inthlahrung lo la, mihrang anga awm hi ka duh miah lo ania, i unaupa angin min ngai rawh" a ti charh charh a, Noeli'n a lo koh vangin ka chhang ve hman tawh lo. "Remchangah kan la titi leh dawn nia" tiin min chhuk san a, step tawp thleng chu ka zuk zui ve leh tho a; mahse, ka en liam a duh lo nge ni motor-ah pawh lut loin "Chho hmasa rawh" a ti tlat a, ding chungin ka kal hun a nghak reng bawk.

"Anih u aw, in lo la leng leh dawn nia" ka tih hnuah ka chhohsan a, an motor thawm chu ka ngaichang ru deuh nain a thawm ka hre har khawp mai. 

Thil ngaihtuah neuh neuh chunga ka chho chu Step tawp ka thleng chiah tihah thawm ka hria a, ka lama lo pen chho thawm a ni. Ka lehhawi vat a, hmanhmawh deuha Awmpuia lo chho ka hmuh chuan theihnghilh a nei anih ka ring ringawt a, "Tinge a, theihnghilh i nei..." ka ti hman awrh ang ka hmaah a rawn ding a, a thil sawi chuan minti hamhaih chiang viau a ni.

"Khapa khan a nei dawn che emaw ka ti a" tih zawng a sawi!?

"Kha chu...buaina a tam a, i hrethiam lo ang" ka ti halh a, sawi thui a ngai lutuka, tuna sawi vek sen pawh a ni lo.

"Tinge engmah min hrilh loh, ruihtheihthil i khawih chhan chu khapa vang kha a ni em...." thawk a la hawk a, "Vawikhat tal min ngaihtuah chhuak ve lo em ni" a tih zawm leh a, chhan ngaihna ka hre lo, ka rilru a mang vek.

"Lo sawi nila chuan...." 

"Lo hrilh ta che ila engtin nge i tih ang, Delhi-ah i awm daih a, Peka bulah ka chanchin hriat i duh loh thu i sawi bawk a, engtin nge ka hrilh theih ang che" a rawn pen chho a, ka hmaah tak dingin min en chhuk run a, nichin lawka a hmel landan nen chuan a dang hlak tawh, rilru na leh thinrim hmel ka hmu a, ka hmuh duh loh dan ber a ni bawk.

"I zawhna hi maw vawitam ka inzawt tawh, min hrilh nila chuan vawiin ang hi kan tawng lo ang, ka lo pan loh che i ring em ni, ka chhan dan tur che hre lo tak tak chungin min zawt em? Rinsangpui, i ngawih reng vangin heti hi kan ni ta anih hi" chu ṭawngkam chuan nge a mi en dan zawk chuan min tina zawk ang le, ka en ngawih ngawiha, engmah ka sawi thei lo.

"Hmuh hlan che ka nghahhlelh tehlul nen minti hrehawm hle mai, pasal neiin fate lo nei tawh ni la ka hlim zawk hialin ka ring" a ṭawng chu a sehchilh rap a, a mit de sar sar chu mittui vang a ni, ka phu mawlh lo, en pawh ka en rei ngam lo. A banah ka vuan a, "Khatiang khan awm lo teh" ka ti tham ṭiak a.

"Khawiah nge i phone?" a tih chuan inchhunga ka dah thu ka hrilh a, chutih laichuan Thantei lo chhuakin min rawn thlek dak dak a, "Ka kal ang e, kan inbe dawnnia" a tih chuan ka chhang tawh lo, a kal chu ka enliam a, a kalliam rualin ka mittui a rawn hnam ṭiam ṭiam a, "Eng nge a sawi a?" ti a ka ṭhiannuin min zawhna pawh chu chhang loin inchhungah ka luhsan a, awm ngaihna ka hre lo a ni ber, khumah ka bawk a, ka inngaihtuah tluk tluk a, ka awmdan chu hrehawm tak a ni.

Minute 20 vel a liam ang tihah Noeli message ka dawng a, "I number ka pe aw" tih hi a lo thawn a, inbiak leh pawh ka chak ta lo, kan rilru a na thar leh mai mai zawkin ka hria, inthiam lohna ka nei reng a, kan inkar vang ni loin heti taka a thinlung ka hliam leh tun thlenga a rilru a la danglam lo hi pawi ka ti a, hetiang rilru nen chuan pangngai taka inbiak pawh kan thei lo ang, tun dinhmuna ka tih theih ṭha ber chu inthiarfihlim a ni, chu chu atan pawh a ṭha berin ka hria.

Zanriah pawh ei loin ka mu tlang a, Thantei erawh inhnuai nulaten inkhawmpuia a an lo sawm vangin a han inkhawm a, an bang har reuh khawp mai. Khumah mu chungin phone ka hmet kual mai mai a, a khat tawkin message ka dawng em tiin ka en leh ṭhin bawk a, inbiak tawh loh ka duh chungin rilru chuan beisei a nei lawi si, ka rilru takngial pawh chu ka hrethiam tawh lo.

Kartluanin a chanchin ka hre zui lo a, Noeli a rawn lang lo a, min be lem lo bawk a, a reh zui mai dawn anih hi ka ti rilru a, ka pawm thiam angreng viau mai. Heti hian chanchinte pawh inhre tam lo zawk ila, kan nunhluiten min la chenchilh deuh anih pawhin a hnu leh lam awm loin inhrereng zawk ila, rilru dam lo mahsela pawm thiam tum tlat ila, kan dam lo anih pawhin belhchhah tawh lo zawk ila, kan khawvelah ve ve hian insiamrem tum zawk ila tiin mahni ka inhrilh ṭhin.

Tlai khat chu Thantei bungraw thawn tura chhuak chuan beisei loh deuh thil a rawn hria a, Home-a kan awmpui ṭhin Nunsangi nen an lo inhmu a ni awm e. "Lalrossi kha a rai a, honutuin inpuanna neihtir a tum a, a sawi duh si lo a, Chungnunga hmeichhe kawp pakhat khan a lo ringhlel aniang Krossi nen an insual hrep a, an buai nuai nuai a ti. A hnu lawkah Chungnunga chu an chhuah tir a, Kross-i lah kha a chhungten nau a pai vangin an hruai haw duh si lo a, a khawngaihthlak reuh tak tak a ni" a ti barh barh a, Hotunu chuan Nunsangi bulah chuan Volunteer a thawk tur an duh reng thu a lo sawi bawk a, ṭum khat ka dil ve zawk tawh vang khan min hrilh hre turin a lo chah bawk a ni awm e.

"Kal reng reng suh ang che, i hmakhua ngaihtuah a ngai" Thantei'n a ti hmiah a, ka kal leh duh mai a hlau aniang mi tihpui tur a ngaihtuah chuk chuk a, kan dawr ṭhenawm a mi tlangval chu min sawihmuh ut ut bawk. Chumi ni aṭang chuan min chhaih zauh zauh a ching zui a, ṭhenawm tlangval nen erawh fiamthuin kan lo chhang mai mai zel a, inngaihzawn kan tum lo lutuk chu min tihpui tumtu pawh a beidawng hma khawp mai.

Mahse, Thantei chan loh lamah midang an lo lang a, chupa chu kan inluahna building-ah tho a awm ve a, chhawng hnuai ber a luah bawk. Biakin khata kan lawi vangin kan kal ho zauh zauh a, Thantei bulah min duh thu a lo sawi anih hmel. Thantei chuan, "Duh mai ta che, high shool teacher a nia, amah hi serchhip khua a ni bawk a, amah chauhin a awm bawk si a, innei pawh ni ula hetah in awm thei dawn anih hmel a" tiin thu min rawn a, a han phur viau nain ka lo ngaihsak ṭha duh lem lo a, inhnuaipa erawh chuan lo len te a lo dil a, aw ka la pawh loh vangin a la rawn lang lo a ni awm e.

Chupa chu tlangval hang lam deuh, palian angreng deuh a ni a, U Zodin tiin kan ko mai ṭhin a, a hming pum tak phei chu ka hre lo. Pangngai deuha inkawm kan la nei lo a, kan inkhawm kal lam leh haw lam hi kan inzui ho ṭhin a, tlangval ṭawng duh leh biak nuam deuh mai a ni, a nunchang pawh a ṭhat hmel viauin ka hria. Kei aichuan Thantei nen hian an inngaina zawk a, kei hi chu min be tam ve vak lo a, ka tan pawh hmelhriat satliah ang chauh a ni.

Thawhṭannia dawr kan kal chu kan bungrua a lo thlen vangin Thantei a kalchhuak lehnghal a, a lo let leh hnuah pawh bungraw semin a tlankual zar zar a, kei pawh thawmhnaw remfelin ka buai khawp mai. Customer an lo lut ve deuh reng a, chhun chaweina hun pawh ka nei thei lawk lo. Darkhat velah dawr ṭhenawm tlangvalin coffee min lo pe a, kan titi zui luam a, chutih laia ka phone lo ri chu Awmpuia call a ni. 

Rang deuhin ka la a, "Dawrah em ni i awm?" a tih chuan pangngai deuhin ka chhang a, "Kan lo peng kawi ang" a tih takah chuan rilru a buai nak mai. Phone a dah lehnghal mai si a, tu nen nge an lo kal pawh ka hre lo. Noeli message ka thawn a, eng nge a tih ka va zawh chuan office-a a awm thu a lo sawi a, "Awmpuia nen in inbe tawh em?" tiin min lo zawt bawk a, anin a lo kalpui lo anih chuan Awmpuia chu tu nen nge an lo kal ang tiin ka ngaihtuah buai khawp a, a nupui a lo hruai anih te ka ring.

"Thantei em ni a?" ka ṭhianpa'n a tih chuan ka ṭhiante an lo len dawn thu ka hrilh a, ka phone screen-a ka in en laichuan, "Tlangval em ni?" a ti leh zauh a.

"Ni lo e, college ka kalpui ṭhin ania, nupui leh fa a nei tawh" ka ti chung pawh chuan, "I ex tal aniang" a ti teh ṭalh a, dawt lah chu a sawi mang si lo. "Ka rawn bihthla dawn che u nia" nui hawk hawka tih pahin an dawr lamah min letsan a, mahnia ka awm hnu chuan dawr ka tifel zung zung a, helhkam nei runin ka awm. Kanu dawr awmna a hria em mawni aw ka ti rilru a, min lo zawh theih mai danah Noeli'n a hrilh anih ka ring.

Rei pawh ka nghak hman lo ang tihah min lo call leh a, "In dawr hming kha eng nge ni?" zangkhai deuh hian a rawn ti a, "Hetah lo kal rawh" tiin tu emaw hi a be bawk. Kan dawr awmna laichu ka hrilh a, "Kawng aṭang khan i lo hawichho anga Blue bayou tih a lo intar ang" ka tih chuan, "Kan lo thleng ṭep e, eichak i nei em?" a lo ti let zat a, thingpui ka in tawh thu ka hrilh thung.

Phone ka dah deuh chiah tihah customer an lo lut a, thawmhnawte an enkual a, an ha chhin bawk a, duh an thlang buai khawp mai. Chutia ka lo buaipui laimek chuan mipa naupang duhawm deuh hi a rawn penlut thauh a, phawk fein kan lo melh hlawm a; mahse, amah zuitu ka hmuh takah chuan ka hrethiam leh rang khawp. Naupang chuan a pa chu a va thlek a, a pa chuan a toys kenlai chu a lo pe vat a, "A va lian tawh ve, a ṭawngthei tawh em?" tiin kei ka lo phul ve hlut a, chu veleh mipa naupang chuan "Aw" pawr tawkin a lo ti a, customer ho pawh an lo nui ṭha hlawm.

"Tunge i hming, khawmaw hetah lo kal teh" tih pahah a biang piai ka tum chu a ban a lo phar a, tum loh deuh chuan ka han pawm ta chu ania, mi lah chu a kuah chial reuh a, naupang duhawm leh hmelṭha zet mai a ni, a pa hmel a phawk fuh khawp a, a mitmeng leh hnar ngul te, a hmui te thlengin a pa chiah chiah a ni.

"Tunge i hming?" ka tih leh chuan, "No" tiin min chhang a, ka nui ringawt.

"I hming hrilh ta che" a pa'n a ti chu a ngaihsak lem lo, a toy kenlai chu a khawih niap niap a, "Kum engzat nge anih?" tiin a pa chu ka va melh a.

"Kum khat leh thla 9" tih paha a thil min lo pek chu doughnut a niin ka hria.

"Eitur lo ken a ngai lo asin" ka tih laiin "Engmah kan la ei lo, kan inentir lawk a" a lo ti a, a fapa chu a lei a na a, an lo va inentir a ni awm e.

"A chhun hle mai che a, i naupan lai niawm a ni" a lo nui sak a, ṭhutna ka kawhmuh lamah chuan a ṭhu thuai bawk. Customer ten min lo biak avangin, "Chhuktir rawh, ka lo en ang" a lo ti leh vat a, ka chhuktir rual chuan mipa naupang chu a tlan vut a, a tlu leh reuh si a, a motor lem kenlai pawh a per nawlh a; mahse, a ṭap miah lo. Rang deuha ka va pawt tho chu, "Popsy" tiin a pa lam a hawi a, a khup chu a sawh na deuh aniang a tuai vat vat a, ka velh chak zia chu aw, a duhawm thlawt a, naupang lawm em em lo kei ang tan pawh ngainatawm tak a ni.

"Engtin nge ka koh dawn?" ti a Awmpuia ka zawh chuan, "Caleb. Vanlalthlamuanpuia, ka nu phuah a nia" a tih chuan mawi ka ti viau mai, "A hming hmasa kha ka phuah" a tih zawm leh zat a, "Caleb, chhang i ei duh em?" ka tih chuan "Aw" a lo ti leh lauh a, a 'aw' fiah thei lutuk mawlh mai chu a lawmawm.

"A nu a lo kal ve nange?"

"A buai deuh a, haw pahin ka va dah ang" a tih chuan zawhna ka nei nghal pang mai. Amah pawh chuan a hrethiam aniang, "A haw phei lawk" a ti leh vat a, zawhna ka la nei cheu. Mahse, customer an awm vangin ka zawt zui lo a, an pafaa an inbuaipui lai chu ka va melh leh zauh ṭhin.

Customer an chhuak chiah chu a bulah ka va ṭhu phei a, "Eng nge thil awmzia?" ka ti nghal hlut a, "A haw zawk, kan inhau ve deuh a" a ti sam mai a, a sawi serious lo angreng khawp mai.

"Eng nge a chhan, ka hriat ve chi a ni em?" ka inthlahrung deuh nain keimah vang anih ka hlauthawng a, chuvanga dilchhut viau pawh ka ni.

"Thil ho mai mai mawle, a lungawi veleh vat ang" ti a min chhan vang chuan ka hriat a duh lo anih ka ring.

"Keimah vang te hi a lo ni lo maw?" ka ti tlang rawt a, ka sawi zawh rual rual chuan ka inthiam lo. Min lo melh zawk a, a nui suk suk a, "Engmah zep lo teh" ka ti leh hram. 

"Chhungkaw thil lam daih ania, nangmah vang a ni lo" a tih takah chuan awm a nuam ve deuh. 

"Nangmah vang nita sela engtin?" a zawhna vang chuan ka lo ip chawih mai.

"I ti ho e, chutiangte inzawh" a nui sak a, a fapa lam melh chuan aw a thian kharh a, "Lungngai suh" a ti teh daih a, ka hrethiam lo angreng hle.

Engmah kan la ei lo a tih vangin eitur ka chah a, Caleb-a leina chuan thil a eiṭha thei si lo a, a ril a ṭam ve ngang aniang theitui a han in laite chuan a mittui a tla kiang kiang reuh a, "Na.." a pa lam hawiin a ti leh ṭhin a, ka khawngaih reuh tak tak a ni.

"A nu bulah i va dah dawn a maw, a hruai lo em ni?" ka tih chuan, "Hruai lo, ka nu'n hruai a phal lo a, hei lah hian a lam reng bawk si a, zanin chu ka va dah mai dawn anih hi" a ti ve luam a.

"Ko haw nghal law law la" thutak deuha ka tih chuan, "Chhuak rawh ka ti hleinem, a duh hunah a lo haw ve mai ang chu" tiin min chhang a, eng buaina tak chu nei dun ang maw.

"Rilru i van ti nuam lo reuh e" ka ti leh ṭhin a, "Nangmah vang a ni lo" tih zawngin min chhang thung a; mahse, inthiam lohna ka nei tlat si a ni.

Rei dawn chu an leng ve a, an haw tur pawh kawngpui thlengin ka zuk thlah a, "I phal chuan ka rawn tlawh zeuh zeuh ang che" an kal dawna a ti te chu ngaihtuah tham a tling zel, hnial awm tak hi ka ni a, a mawi chiahin ka hre bawk si lo, dinhmun laklawh deuhin min siam a, ka be ṭha lutuk ang tih ka hlauh laiin a laka sual nih ka hlau tho bawk a, mahni inrintawk lohna nen amah zawk hian min hnaih lo sela tiin ngaihtuahna ka nei bawk, a chhan pawh ka tana huat theih a ni ngai lo a, hlat lui ṭalh tura ka chak tawk loh ka hlau a ni.

Chumi zan chuan ka inngaihtuah buai khawp a, amah ngawt ka ngaihtuah te mi pangngai rilru put dan tur a ni lo. Ani chuan inpawh taka awm a duh tih ka hria a, chu erawh kan tan a ṭha ber si lo va, an nupa kar ṭha lo te pawh ka ti punlun mai ang tiin hlauhthawnna ka nei bawk. Thantei bula ka sawi chuan, "Nangman awmdan i thiam a ngai anih chu" a ti sam mai a, a dik viau tho mai, inlakhran chin ka neih mai a ngai a ni.

A tuk tlaiah dawrah ka awm em tih min lo zawt leh a, "Office ban pahin ka lo kawi ang" a ti bawk a, an nu tlan tauh lai a ni bawk si a, inhmuh zen a chi loh ang tiin dawra ka awm loh tur thu ka hrilh a, Thantei bulah haw hma ka dil ringawt bawk a, "A pawi hleinem, eirawngte lo bawl la, kei chu ka rawn tlai deuh ang" a tih vangin ka haw san a, in ka thlen chuan dar 3 a la pel lo deuh.

Ka inthlak zung zung a, eirawngte ka bawl zawh hnuah buh ka thlei a, Thantei hian inchungte ration a khul ṭhin a, a thlei lam hi chu a thiam zawk ka nih vangin ka kutah a dah ṭhin a, bag khat dawn chu thlei tur a awm. Zai ngaihthlak pahin ka thlei mawlh mawlh a, chutih laia Thantei message lo thleng chu, "A lo kal a, a chhuak leh chiah" tih zawng a ni, ka awm loh tur thu kha ka hrilh reng si a.

"Sawi a nei em?" ti a Thantei ka zawh chuan, "In dawr hming hi Rintei phuah a ni em a tia, 'A inhmeh in ti deuh em ni?' ka tih khan a nui ringawt a, a chhuah dawnah khan, 'Ka blue bayou a awm si lova ka kal mai ang' a tia, a inzep lo khawp mai, mawi leh mawi lo lam pawh a ngaihtuah lo aniang" tiin min chhang a, nuam ka ti ta hauh lo, ka rilru a hah a, hrehawm a ti ngawih ngawih.

Rei pawh a liam hman lo, minute 20 vel chauh a liam hman ang tihah Step-a lo pen chho thawm ka hria a, kawngka bul maia buh ka thlei vangin pen thawm chu ka hrechiang khawp mai. Beisei ang ngei chuan a rawn lang ta zui a, lo chhawn dan pawh ka thiam meuh lo a ni.

Han biak loh ngawt theih a ni bik si lo va, ka invenna lah a hrethiam ve der si lo. Ka buhthleina bulah chuan a lo ṭhu ve reng a, sawi tur a hre vak bik lo. Zawhna min zawt a, dawr chungchang leh ka pa a dam em tih angreng min zawt a, ka chhan hnuah a ngawi leh vang vang ṭhin a, a khattawkin a thaw leh halh ṭhin bawk. A lam ka va hawi chuan a mit a sen deuh rum a, ani lungleng hi a rui em mawni ka ti rilru a, zu rim lah chu a nam der si lo.

"Nuam sam lo i va ang ve?" ka tih chuan, "Nizan aṭangin ka khua a sik" a ti zawi sup a, a chhan sawi tur awm si lovin ka lo inthiam lo leh ringawt tawh.

"In nu chu a lo haw tawh em?"

"Ka nuin koh a tuma, vawiinah an in ko em ka hre lo"

"Nangman va ko ta che, helaiah i rawn kal daih a" lawm lo awka ka ti lang deuh a, ani lah chu kei aimahin a lawm loh hmel a, min melh deuh tlawk tlawk mai.

"Min ning tlatin ka hria" a ti ta reng a, chu erawh ka hnial a ngai.

"Engah nge ka nin ngawt ang che" pangngai zawkin ka ti leh a, min chhang lo.

"Damdawi i ei duh em, nachhawkna ei rawh aw" tih paha thawh nghal mai ka tum chu, "I bulah ka awma, a tawk mai" a tih vang chuan ka ṭhulh leh rih.

"Eng nge i awmzia?" ka ti let hu a, "Ka hre lo" tih ringawtin min chhang.

"I awmdan hi ka hrethiam miah lo ania, ka pui thei bawk si lo che a" 

"Puih ka ngai hleinem.." thawk ka lo la hluai a, ka ṭawng sual ang tihte ka hlau, ani lah a khua a sik hluah a, chuti chung chuan a ṭhu ve tlat bawk si a, hnar haw pawh a nuam chuang lo ang.

"Hetianga i lo kal fo hi a ṭha lo ania aw, nang chu nupui nei tawh i nia, i nupui pawh a lawm lo ang" pehhel angreng taka ka tih chuan, "Min hriatthiam ka ring reng a ni, i hai ngai lo" a ti zawi sup a, chu thu chuan min ti na vawng vawng.

"Nang pawn i hrethiam alawm" a lam hawi duh loin buhfai chu ka hai mawlh mawlh a, a lo hai ve pawh chuan ka en duh lo a; mahse, ka kut a rawn man rualin ka en rang viau thung.

"Insum ka tum a nia; mahse, ka ngai lutuk che a, ka insum thei thlawt lo a ni, min haw lo la, min enliam tawp mai teh" a ti tawl mai a, zep sela ka duh ngawih ngawih a han sawi chhuak chu ka nghilh dup maiin ka hria, sawi tur reng ka hre lo.

"Min huat phah lo ang ti raw?" tiin ka mitah tak min en a, chhanna eng emaw tal chu ka pek a ngai.

"Thil sual a ni tih i hria em?" ka ti tawl a, keichuan ka haw thei lo, chu chu amah pawh hian a hria ang; mahse, Pathian leh khawvel mithmuhah erawh sual lian tak a ni, ka dan ngei a ngai.

"Hetiang zawng hi chuan engmah ka sawipui lo ang che, haw la, i nupui pawh hruai haw rawh, nupui fanau i nei tawh a, keinen chuan kan rem tawh lo, min la ngai ṭhin anih pawhin lo kal tawh lo la, ṭha taka inhriatreng tum zawk ang" tiin ka rilru dik tak ka hrilh a, ka chhang beidawng deuh nge ni a ngawi zui ta reng a, rei tak pawh a ṭhu tawh lo, a haw tur chu step bul thleng chauh ka thlah a, "Damdawi ei rawh aw" tiin ka au zui hram thung a, a hnartu zawka ka ṭang chu hrehawm tak a ni, hnar lo ta ila kan chan tur ka hre si a, kei vang mai mai hi chuan engthil mah chan lo sela ka duh.

A kal hnu chuan ka indahfel sawk sawk a, keipawh chu ka damlo thei mai dawnin ka hria, ka rit luk a, ṭah a chhuak em em reng. Chutih laichuan a message ka dawng a, ka han en chuan thu tawite hi min lo thawn a, a tawi tehlul nen thinlung hliam a ti thar vawng vawng lawi a ni.

"Nang duh che hi sual anih chuan ka thinlung min laksaktu chu nang i ni a, demna tur ka awm lo e" tih thu chu mittui nen takmeuh ka chhiar a, 'Keichuan ka dem hauh lo ang che; mahse maw, miten an dem che anga, an sel rawn ang che, chutiang i nih chu ka phal si lo va, i chunga ka lo nunrawng deuh anih pawhin min ngaidam ang che' tiin ka chhungril rum vawng vawng chu ka hrilh a, a thinlung ka laksak ni a a sawi chu pe let thei ila ka ti takzet.

(End of chapter - 38)