BLUE BAYOU (CH - 39) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 39

Thlasik inṭan tur boruak vawt deuh ruih chuan eng emaw zun hi a nei a, suangtuahnain hun hliam tawh lamah min let pui vawn vawn bawk. Hun leh hringnun inher liam zel hian liampui ve theih hauh loh an nei a, sik leh sa a han inthlak danglam chang apiangin a thar leh ṭhin, chung nunhlui hriatrengnate chuan minla thlunzawm tlat a, thamral thei lo mitthla, suangtuahna a takram chang thei lo tura thamral leh ṭhinte nen, a mak ka ti, an liam thei lo, an lo kir leh zel mai.

Zirna run khat bela kan hlim lai, kan nuihdun lai leh lungngaih laite, duhthu sam duna hma hun kan thlir lai leh, thu inhmuh fuh loh vanga kan nat dun laite, inngai tak chunga kan inmangṭha laite pawh. Tunah chuan nunhlui an ni ta, nunhlui ngaihawm, mittui tla chunga kan chhuikir fo ṭhin kha.

Kan dawr ṭhenawmte hla play vang chu nge ni rilru a hnim ruih reng a, message ka han chhang turte chu ka hnuk a ulh deuh tlat a ni. "Vawiin chu buaini a ni leh dawn a, inleng ngaihsak hman pawh ka ni lo ang" tih thu tawite chu ka thawn a, vawiin hi sawrkar chawlh a ni a, zingah khan a lo kal tur thu chu message-in min lo hrilh tawh a, hetia ka hnar chung pawh hian hmuh ka chak em em lawi a, ngai tak chung siin ka hnaih ngam lo a ni ber.

Rei vak loah Message chu a lo chhang a, "Ka rei lo ang, i hman hunah min hrilh mai dawn nia" inthlahrun hmel taka a lo tihte chuan ka hrehawm tih a zualting mai. Engmah hi a hrethiam lo, ka rilru leh ngaihtuahna hi han hrethiam ve ni sela chuan amah chauh chu tuartu a ni lo tih a hre tur.

Dawr ṭhenawma an hla play ri chu ka ngaithla vang vang a, ka ngaihtuahna hria an lo awm emaw tih mai tur a ni.

A dai hlen ta emaw ka lo ti

Hmana ka hmangaihna che

An thamral ta emaw ka ti ṭhîn

Nunhlui ngaihawm zawng pawh

Mahse, i sakhmel ka tawn changin

Kimte'n an lo thar leh ṭhin

I khiangawi hnu pawh hi e, Di hlui

Nghilh ilo har ka ti.

Hun meuh pawhin a liampui theih loh nunhlui chu, theihnghilh thei lotu tan chuan tlanchhiatsan theih a ni lo, ka hawikir chang lah a tam, ngaihtuahna a la tibuai fo bawk. Vawiin ang hian amah ngaia ka kiu vawng vawng ṭum pawh a tam ta. A hmel ka hmuh tawh chuan thinlung a phi buai a ni zel a, ṭha zawk ni a ka ngaih leh ka duhdan te pawh keimah ngeiin ka phet thlu leh zel a ni si, inhmuh tam loh chu a helna ṭha ber a ni tihte chu ka hre ve reng a, chuti chung chuan ka hnar thei hauh si lo.

Hun awl a neih apiangin a lo kal a, min ngai ngawih ngawih ti ila ka sawi sual lo ang, kan ramri kham chu a pel em lo a; mahse, ral hla taka awm a duh ngai lo. Min hnaih a duh a, rem lo tam tak a awm vangin a insum nasa hle ṭhin bawk. Ka buai deuh chang pawhin ngawireng hian a lo ṭhu a, ka biak ṭhat loh chang lahin phunnawina emaw sawisel a nei ngai lo, a buaithlak lai ber zawk chu hnar theih a ni ngai lo leh, ka hnarna ṭawngkamin awmzia a nei ngai lo hi a ni.

Noeli chuan tihian min hrilh a, "A hmu leh thut vang che hian a ti chiai a ni, nang lo hi duh tak tak a la nei ngai lo a, a awmdan ang hian enliam tawp rih rawh, i bula awm ringawt pawh kha a lungawi pui ang, ṭha takin bia la, ṭhian angin kawm bawk la, a bak chu a phut bik lo ang che, a dinhmun a inhre ve tho a, a ngaihtuah bawk che a, i tana ṭha lo tur chu a duh bik lo ang" tiin min hrilh a, keima lamah chuan venthawn tur a awm lo, Thantei'n min hrethiam em em a, engkim kan sawi dun ṭhin a, kan venthawn zawk chu amah Awmpuia a ni, dinhmun sang takah a ding a, mitmei ven tur tam tak a nei bawk, a sawhkhawk a awm anih pawhin a tuar ber tur a ni si a, chu mawlh chuan awm a ti nuam thei lo.

Chhunah chuan inring ru deuhin ka awm a, a khat tawkin phone chu ka bih leh ṭhin a, thil ei pawh a tui meuh lo a ni. "A lo kal mek em ni?" ti a Thantei'n min zawh chuan, "I hman hunah min hrilh rawh a tia, ka la reply leh lo" ka ti zuai raih a, ka hrilh dawn nge dawn lo tiin ka la inkhap buai khawp mai.

"Duh leh lo leng mai mai sela, engmah pawi a awm chuang hleinem, a lo len duh phawtte chuan lo leng rawh se"

"A lo kal zing angreng lutuka, ṭhenawm tlangval pawh sawn ka bialpa emaw a ti tawh alawm, hmanni khan min lo fiam a" tiin dawr ṭhenawm tlangval U Muana min fiam dan chu ka hrilh a, kar hmasaa Awmpuia lo kal a haw hnu lawk khan a lo lut a, "A va rawn birh ngun che ve, tihhuk a hnai tawh em?" tiin min fiam reuh a, tlangval ni turah a ngai hlauh zawk a, engmah ka hrilh duh lo kha a nia, Awmpuia a lo kal zing si a, tunge anih hre ngat sela chuan mi a ngai dik lo khawp ang.

"An nu kha a haw leh tawh em?" Thantei'n a tih chuan, "Thla hmasa khan a haw leh tawh alawm, a lungawi loh chang apiangin a hawsan ṭhin a, an nupa kar hi ṭha deuh sela chu a lo kal fo lo ang mawle" ka ti halh a, Noeli hnen aṭang ka hriat bawk a ni, Juni hian tlan tauh a ching a, lungawi lohna a neih hlek chuan an inlamah a haw mai zel a, an ko emaw ko lo emaw a duh duh hunah a let leh mai zel bawk a, an nupa boruak chu a ṭha tehchiam lo anih hmel. 

"An inhauh chhante hi a hrilh ve ngai che em?" a tih leh chuan, "Ṭum khat ka zawh khan Juni nuṭapa vang anih thu a sawi a, drugs addict ania, Awmpuia hi pawisa a dil ziah a, an inah a awm ve chawt bawk a, Awmpuia leh a nu hian an mil vak lo aniang' tiin ka hriat ang ang chu ka hrilh a, Juni chungchang pawh Noeli hnen aṭangin ka hre nual tawh a, ṭhiante nena thil tih khawm laih laih hi an ching a, inlam a ngaihtuah vak lo a ni awm e. A mizia ka hriat dan leh Awmpuia mizia chu a inpersan khawp a; mahse, Awmpuia hian ngaihsak deuh sela ka la ti fan thung a, a ngaihthah deuh mah maha ka hriat vang a ni.

Thantei chuan, "Lo be chhe hran lo la, tih ṭhat huam pawh a ngai chuang lo, inchhung lama a hlim loh vanga i hnen lo pante pawh a ni thei a, duhna rilru kha put loh hram a ṭha, mi pasal a ni bawk si a, awm dan tawk i thiam dawn nia" a ti sap sap a, ani hi chuan ka rilru ka hnehtir mai a hlau a, ka la duh tih a hrechiang bawk a, a chintawk hre turin min hrilh zing viau mai.

Thil kan eizawh hnu chuan dawrah thil lei turin ka chhuak a, Thantei'n ser min chah avangin bazar thlengin ka va kal a, ka thang rei lem lo. Ka let leh lamah chuan kan dawr chhohna step hmawra hmeichhe pahnih ding chu ka han hmu a, min hnungchhawn zawngin kawng dal tak chuan an ding a, an inbe mawlh mawlhin ka hria. Step-a ka pen chhoh rual chuan an kalsawn ve chiah a; mahse, dawra lut ta mai lo chuan kawngka bulah an la ding a, an la inhrilhru sar sar reng.

An hnunga ka ding chu ka thawm an hre lo nge ni, "Lut hmasa rawh, ka lo zui nghal ang che" tiin pakhat zawk chuan a hma ding chu a nam dat dat a, a hmasa zawka ding erawh a ṭang deuh tlat a, kawng an dal avangin kal pelh mai theih pawh an ni lo. Va biak mai ka tum laichuan, "Rintei a awm em i ti dawn nia?" pakhat zawk chuan a ti zauh a, ka ṭawng lo chiang khawp mai.

"Nangman zawt rawh"

"Ka duh lo, a hmel hmu ila kal leh nghal ang" a hmasa zawka miin a tih laichuan a hnung zawka ding chu a lo hawi zawk a, min hmuh takah chuan a dingsawn thuai bawk. Pakhat erawh chuan min la hmu lo a, a hnunga ka va ding chu a ṭhiannu emaw min tiin min lo ban thuak a, "Lo kal rawh" tiin a lutzui a, a ṭhiannu nen chuan kan zuilut a ni ber.

Dawr chhunga kan luh rualin Thantei a lo tho vat a, "Lo leng rawh u, englam nge in zawn?" tiin hmeichhe pahnihte chu a lo be zung zung a, kei erawh counter lam pan nghalin ka thil ken lai chu ka dah a, lo lut tharte lam ka hawi chu min lo en tih ka va hmu nghal a, nichin khan ka hming an sawi a, ka hmelhriat anih loh vek chuan min zawnga lo kal an nih ka ring.

Ka han en vang vang a, pakhat zawk chu ka hmuh hnu a ang ka ti viau a, ka chiang thei mai lo, pakhat erawh ka la hmuh awm ka hre lo a, chutia ka en chu a zak deuh bawkin ka hria a, a hawisawn thuai a, kan thawmhnawi khaite chu thlekin a ṭhiannu chu a ko bawk a, fitting room bula an kal phei chu Thantei'n a zui ve thuai bawk. Ka ngaihtuah neuh neuh a, rinhelh ka nei nghal ringawt mai a, anih loh hram erawh ka beisei. 

Ṭawng thawm ka hriat rual chuan beng ka chhi kar a, thinphu a rang dup dup mai. Ka ṭhiannu chuan customer kan chhawn dan pangngaiin ṭha takin a bia a, an duhzawng a awm chuan ha chhin turin a hrilh bawk. Hmeichhe pahnih erawh an ngawi ran a, thawmhnaw zarin a hliah avangin an hmel ka hmu thei lo.

Thawh ve mai ka tum laichuan hmeichhe pakhat ṭawng ri chu ka hria a, ka ṭhiannu bulah chuan Rintei ka nih leh nih loh a zawt a ni. Thantei chuan eng atan nge Rintei chu an tih a lo zawt let vat a, an chhang leh mai lo. 

"Rintei in lo zawng em ni?" Thantei bawk chuan a ti leh a.

"Saw ta ṭhu saw a ni em?" ti tu chu a ṭawng zawi viau mai.

"Sawi phawt ula ka hrilh ang che u" ka ṭhiannu chuan a ti ve tlat a, "Anih dawn saw" ti zauh ri ka hria. 

"Biak lawk kan duh a, thawmhnaw hi ka lo en rih ang, va be rawh" pakhatin a tih leh laichuan ka ding ve vat a, ka lam pana lo kal chu ka lo en ve reng bawk a; mahse, Thantei a lo lang hmasa thung. Ka lo en dan vang chu nge ni min lo nuihsang a, "I hmelhriatte an niang" awmze nei zet hian a ti bawk a, a hrethiam tih a lang reng. 

"Tute nge a?" ka tih laimek chuan hmeichhe pakhat chu a lo lang a, "Nangmah i ni ti raw?" a ti ringawt a, chhan dan a vang angreng. 

"Min hre lo ang a" a nui deuh sang a, ka hre chiang ta khawp, ka rindan kha a lo dik ngei bawk a, awm erawh nuam duh lo tak a ni.

"Ka hre mai lo che" zak ru deuh taka ka tih chuan a lo kalhnai zui a, "Juni ka nia" a ti ta chiah a, hria anga awm ve mai tur nge hriat loh der tur ni ang tiin ka inngaihtuah buai ta khawp a, thildang vanga lo kal an nih ka ring lo, a pasal vanga lo kal a ni ngei ang.

"Juni maw?" a kut a rawn phar vang chuan ka lo vuan ve vat a, "I ṭhianpa Awmpuia nupui" a ti leh nghat a, zah zelah ka nuih ve ringawt.

"Kan pain 'Lo va dawr ve rawh u' min tia, bazar pahin kan lo peng kawi anih hi" a ti ve tak naa a lo kal chhan erawh a ni lo ang, ka hrechiang a ni, pawna an lo awm dan khan a ti chiang viau tawh. "I va ti lawmawm ve aw" tiin mawi hawihah ka han nuih let ve bawk a, ka aw te chu a dik zan lo, ka zam ru deuh tlat.

Ka sira ṭhutna chu ka khawhmuh vat a, a ṭhiannu kha chuan thawmhnaw a la enkual avangin Thantei'n a enpui a, a khat tawkin ka ṭhiani chu a lo hawi leh ṭhin. Juni lam ka va hawi chuan phone a lo hmet mawlh mawlh a, hmaichhana han hmuh takah chuan eng emaw huhang hi a nei a, Awmpuia nupui a nih vang nge ka hre lo. Kei aichuan a cher zawk a; mahse, a sang ṭhain a lang zahawm angreng viau a, a chanchin ka lo hriatdan leh a landan chu a inrem chiah lo ti ila a dik ang, hmeichhe induhtawk leh inringtawk tak hmel a pu a, kei angin a zam chhe ve lo tih pawh a hriat theih, kei nena khaikhin ralah phei chuan landanah pawh ka tluk hauh lo. 

"Naute i lo hruai nange?" ka tih chuan a lo hawi rang khawp mai.

"Ka nuin insaknaah a kalpui daih a, hetah a lo hruai tawh em?" tiin ka mitah min en kal a, Awmpuia a lo kal ṭhin tih chu hrilh a ngai lo anih hmel. A zawhna chhang lo chuan Thantei ka au a, "Ser chu ka vel dawn ania" ka ti lang lang a, "Ngawi rawh ka la puar asin" a lo ti nain ka vel lui ta tho a, zahzel tur ka mamawh vang a ni.

"Coffee in in duh em?" en lem lo chuan ka ti liampuat a, "Thil kan lo ei zo chiah a, rei pawh kan awm hman lo" a ti ve mai bawk a,  sawi tur vang lutuk mawlh chu a hrehawm, zawhna min zawh ka hlau a, sawi tur lah ka van nasa mai si a, ka biak loh chuan ka awm tinuam lo tur thil a sawi ka hlau bawk.

"I number min lo pe teh" ka va melh zawk a, hnial ka duhzia chu aw; mahse, a rem chiah si lo.

Phone min lo pek chu ka ban ve mai a, number type mawlh mawlh pah chuan, engtin nge kan dawr awmna a hriat dan ka lo zawt a, "Kan pa'n min hrilh alawm" a ti chu awih har ka ti deuh tlat, a thilsawi hmasa zawk pawh kha ka awih chiah lo a, Awmpuia'n a lo kaltir duh ka ring lo a ni.

"In in sa mek a maw?" ka ti leh a, ka ṭawngkam a pangngai tehlul nen, "A hrilh tawh lo che em ni?" a lo ti let hlak a, minti hamhaih deuh.

"Hrilh nial nual a...aa...engchen nge in thlen tawh a?" ka ti a, ka ṭawng bah nuai mai.

"Kan la sa ṭan ek ek chauh, ka enpui ve vak lo va, mipa hna a nia" a ti zui a, Awmpuia nu kha insaknaah a kal angin a sawi bawk si a, naute a hruai a ti lehnghalin ka hria.

"A hautak viau lo maw, Aizawla insak hi chu senso a tam duh dawn em mai" awki pangngai thei ang bera tiin ser chu ka vel mawlh mawlh a, min en deuh reng maiin ka hria. Chutah, ka chhan hreh deuh zawhna min lo zawt a, "Kan pa hi a lo leng ngun riauin ka hria, tlai tin a lo kal em?" a ti khawl mai a, sawi hreh leh tim vak a nei dawn lo a ang, keilah chuan sawi hreh ka ngah nasa mai si a, pehhel dan ka ngaihtuah ruai mai a ni.

"Min chhang hreh a, ka hrethiam lutuk che, ka huat vang che a lo kal ka ni lo ania, ngaih loh lamah ngai lo la, biak che ka duhna a rei tawh a, nakinah phone-ah kan la sawi dawn nia" a tih takah chuan, "Chhang hreh lo e, i lo lang thut si a ngaih a ṭha lo deuh mai mai maw le, eng nge i hriat duh chu ni a?" tiin ka chhang let vat a, a huaisar angreng riau a ka hriat vangin zuamawm lutuk loa awm a ṭhain ka hria.

"Midang awm loh hunah kan sawi dawn nia" a ti chu ka hnial lem lo, chutih rualin inbiak zui erawh ka chak fahran lo a ni.

"Min lo be mai dawn nia, zan lamah pawh a pawi lo" ka ti ve vat a, Thantei chuan kan ṭawng a hre pha lo aniang a lo kal phei a, "A khak hmain ei ang u" tih pah chuan ka ser vel chu a lo ei sawk sawk a, Juni ṭhiannu erawh thawmhnaw enin a la buai mek thung. Thantei kalsawn leh hnu chuan, "A takah hmuh che ka chak thei lutuka, Lalawmpuia sawi ang aiin ka hmu ṭha daih che" tih pahin min lo nuihsang a.

 "Min sawi e law?" ka ti veleh vat.

"Kan sawi fo che alawm, 'A hmelṭha hran lo' te a ti vel che a, i lo hmelṭha hle sia" a ti leh chu lawm tur nge ka hrechiah lo, a awihawm lo hle ringawt mai a ni.

"Ka chungchang sawi fo tur a awm em mawni le" a mitmeng fin hmel zet chu ka melh a, eng nge maw chu a ngaihtuah ran rengin ka hria, a â miah lo tih ka chiang bawk, nelawm tak angin a lang a; mahse, a ṭawng chhuah dan erawh a khauh fang zel lawi a, chhan dan thiam a ngai viau mai.

"Lo va dawr ngei ngei rawh u a tia, thawmhnaw lam hlir in zuar sia, Lalpuiin a dawr mai dawn che nia, pheikhawk lam zuar ula ṭha tur" a ti zui luam a, chutih laia a phone lo ri chu phawrhin tu emaw hi a be zui a, Awmpuia nu aniang, "Lo haw pui mai rawh, keini pawh kan haw dawn chiah alawm, Hmingi pawh a awm reng a, hruai ve loh tur che ania" a ti hlak hlak a, pawr angreng zeta, "Kan haw dawn chiah ka tih chu" a tih leh hnuah Phone a dah hmak a, ka lo en reng tih a hmuh chuan, "Ka u ania" a ti a, a thilsawi inkalh chu ka lo hrechiang khawp a, engmah phei chu ka zawt duh lem lo.

A ṭhiannu chuan kawr pahnih a lei a, a man te kan inpek fel hnu chuan, "Zanah kan inbe dawn nia" tiin min chhuahsan a, an chhuah hnu chuan Thantei'n zawhna min zawt mawlh mawlh mai. Kan inbiak dan ka han hrilh chu a ngei tawk a lo tling khawp a, "A phone hmang ri kha ka lo hria alawm, a thinchhiat hmel ka ti lutuka, a nasa ru zekin ka ring" a ti mauh mai a, ka beisei ang aiin mi a be ṭha ka lo ti zawk a, ka chungchang hre vek si a lo kalah chuan a insum thei viau bawkin ka hria.

"A bulah khan i inthlahrun hmel leh lutuka, khatiang khan awm tawh reng reng suh, a pasal i ngaizawnga, i uire tir pawh a ni hleinem, ngam ve sarh ta che, thil sual ti ang maia lo awm kha a ṭul lo, i mizia pawh anih loh kha" Thantei'n a tih chuan, "Sawi tur a awm lo em alawm, mi a puh pawh a ni bik lo a, mawi lo leh eng emaw zawngin a awm bawk si lo a, ka tan tih vak theih a ni lo alawm" ka ti ve tlat a, a mi biak danin a zir miau a, ngaina bik lo mahila biak chhiat kha a rem tlat lo a ni.

Darkar khat vel a liam awrh ang tihah Awmpuia a lo thleng a, tun ṭum chu mipa pakhatin a lo zui a, a driver a ni awm e. "In chawl emaw ka tia" ti a ka lo zawh chuan, "Ṭhiante farm-ah kan zuk kal lawk a, vawiin in inhralh ṭha em?" tih leh ka bula lo ṭhut a rual a. Thantei lah chuan a lo melh hrek hrek a, an nu lo kal vang kha aniang a be ṭha peih lo a, Awmpuia'n a biak pawhin a chhang bul hmuk hmuk a, ṭhenawmte dawr lamah min pheisan daih bawk.

Eng emaw chen chu an ṭhu ve reng a, Farm chungchangte sawiin an ṭhiandun chuan an ti ti bawrh bawrh a, an dream an han sawidun chu Awmpuia rilru a thar anih ka ring. "Mahni inngei sak hi ka dream a ni ṭhin a, huan zau deuh nei bawk ila, fa pali nga vel nen, nupui ten pawn lamah hna thawk loin inchhung enkawl sela, ka thawhchhuah ringa khawsa ni bawk ila" tiin min rawn melh ralh a, "I ti mek reng lo em ni, in pawh i sa tawh reng alawm" a ṭhianpa'n a lo tih chuan lu a thing mat mat a.

"Dream tih hlawhtlin hi a har a ni" a ti halh a.

"Caleb-a chhang in neih hunah chuan Juni pawh a bang ve mai ang chu, in la chhangchhe lo em alawm" a ṭhianpan a tih leh chuan, "Eng nge a thawh?" ka lo ti ve vat a, "Thawmhnaw a ṭhui?" nui chunga a ti chu phawk fein ka melh.

"Designer ania, a hlawh tam zawk hial ang" lo ti tu chu a ṭhianpa zawk a ni.

Coffee an duh em ka zawh chuan a ṭhianpa chu a tho vut a, "Keiman ka zuk lei ange, ziak zuk tur pawh ka lo nei tawh hleinem" tih leh kal chhuah a rual a, Thantei lah chu dawr ṭhenawmah a ṭawng ri lang lang a, a khat tawkin a nui ri leh hawk hawk ṭhin.

Awmpuia lo ṭhu hnai chu ka lo melh vat a, dawhkanah a kut rawn nghatin a kutṭang chuan dawhkan chu a chhuri kauh kauh a, engmah sawi loin min melh leh ringawt ṭhin. An nu thilsawi mawlh khan rilru a luah a, engtin chiah nge a nupui bulah min sawi ang tih te ka ngaihtuah a, ka zawt chak ru khawp mai. Chutia ka inngaihtuah veng veng laichuan, "Dream i nei ve em?" a rawn ti phawng a, a zawhna chu ka ngaihtuah lohna a rei viau tawh.

"Ka hre lo, dream neih hi a ṭangkaina pawh ka hre lo" ka ti liampuat a.

"Nun a ti hlim ve alawm; a hlawhtlin loh hian rilru chu a hrehawm ve ṭhin" a ti leh bauh a.

"I dream tih hlawhtlin loh i nei em ni, officer i nia, hlawh ṭha tak i nei a, in i sa mek bawk a, nupui fanau i nei tawh lehnghal" 

"Ni e ti raw, a ṭhen chu ka ti hlawhtling a, a ṭhen erawh a hlawhtling lo thunga" tiin kawngkhar lam a melh vung vung a, a pa leh a farnu a hrechhuak a ni mai thei.

"I pa khan han hmuhpui ve thei che sela ṭha tur, a lawm ve ngawt ang, i nau lah a boral hma si a...." ka lam a lo hawi zawk a, "Nang pawh mawle" a ti hul hak a, ka hamhaih deuh.

"Eng nge kei chu?"

"I tel ve alawm"

"I dream-ah chuan maw?" 

"Umm, nangmah nen vek alawm, ka bula tel ve zel tur i nia; mahse, dream mai mai a ni" 

"Ka changsang mah mah anih chu" ka lo nui hak a, min en chian em avang chuan ka nui tawp leh rang viau thung.

"Fiamthu a ni hleinem, engkim hi nangmah nen veka thleng turin ka suangtuah ṭhin, in leh chhungkua, motor leh fate pawh, ka bula i awm zel ka tih kha.." ka lo pawt chat vat a, "Nupui nei tawhin chutiang sawi sawi loh tur" ka ti hlak a, a hma lawkin an nuin min rawn tlawh a ni a, hetiang thil ani nena sawi dun hi a nuam miah lo.

"Dream alawm ka sawi, dream hlawhchham tawh chungchang daih ania" a tih leh pawh chuan, "Chu pawh chu nise sawi tawh suh" ka ti let hlar a, a ngawi zui vang vang mai.

"Thil pakhat ka zawt ang che aw" rei dawn a ngawih hnua a rawn tih chuan chhang loin ka bu mai a, ka lam hawiin a rawn ṭhu rem te te a, a perfume rim mawlh chu, hman aṭanga a hman ṭhin kha a la hmang reng, lung a ti leng viau lehnghal a.

"A hma ang khan min ngaina tawh lo ti raw?" a ti mauh mai.

"Eng nge i zawhna chu a awmzia?"

"Lo kal tawh lo turin min duh a, min hmuh pawh hian i thinrim tlatin ka hria"

"Ṭha takin ka biak ziah che hi" a lo chek hlak a, "Anih, min la ngai ve ṭhin em, i lunglen deuh chang emaw, i inngaihtuah kir changte talin min ngai ṭhin em?" a ti teh thlawt a, a zawhna chu dik taka chhan chi a ni lo, a rem lo hulhual a ni.

"Ka ngai lo che ti ta ila i rilru a na ang em?" min en reng ringawt a, "Anih ka ngai che ti ta zawk ila engtin nge ni ang?" ka ti leh halh a.

"Ka nupui nen hian inṭhen dawn ta ila, chumi hnuah chuan a hnuhnung zawk khan min chhang thei ang em?" ka ṭhu ngil hluai a, phawk fein ka melh bawk.

"I â em ni, nupui ṭhente i sawi ngawt a?" ka kut a rawn vuan chawt a, "Hetianga awm reng hi ka ning a ni, tumah hi kan hlim lo, ka nupui, kei leh nang pawh, inṭhen ila kan hlim tlang zawkin ka ring?" a sawi zo chu a banah ka chum zawt a, ṭum dangah hetiang hian a la ṭawng ngai lo, vawiin zet chu, min ṭhawng zawk alawm maw le.

"I fapa ngaihtuah rawh, fahrah ni turin i duh em ni?" ka ti vin chiam, ka ṭhinrim nge ka beidawng pawh ka hrethiam tawh lo.

"Min hmangaih pui thei maiin ka ring a, i theih i ring lo em ni?" tiin min la zawt lehta nghal a, sawi ngaihna pawh ka hre lo. A lo nui chu tur fein ka melh a, a fiamthu anih chuan ka lawm lo khawp ang.

"Lalawmpui, ka mihring hriat tawh zawng zawnga smart leh perfect ber i ni a sin, hetianga hriatreng che hi ka duh, tuna i rilru ang kha pu turin ka duh ngai lo che"

"Eng rilru maw?" min rawn hnaih deuh ruak a, a awmah ka lo nam rawk rawk.

"I hriat ve tho kha, i thil sawite kha ngaihtuah chiang rawh, Bible-in engtin nge a sawi, ngaihtuahna ringawt pawh sual a ti asin, uire rilru i pu der tawh tihte i inhria em?" hahhmel zet hian thawk a la hawk a, ka banah vuanin ka mitah min en ran bawk.

"Nang kher chuan uire min ti lo teh aw, hetiang rilru hi tun hnai maia pu ka ni hleinem, hman aṭang khan ka hmangaih tawh che a, hmani thleng pawh khan ka la hmangaih che a, tunah pawh ka la hmangaih tho che, hei hi ka rilru putdan ngai reng a ni, ka lo hriatsuala a lo ngaireng lo anih chuan a nasa zual zawk a ni ang, chuvangin uire min ti tur a ni lo, i hria em?" a ti fiah fak a, a ṭawngkam chu thupek ang maia khauh a ni, a mitah erawh ngenna a lang thung a, a khawi zawk zawk pawh chu pawm har ka ti ve ve a ni.

"Ka ngaihdan hi i tana pawimawh ber a ni lo asin, i mualpho ka duh loh vangte, miten an dem che ka duh loh vang zawk tein alawm ka sawi, i hlimna aia duh ka nei ngai lo tih i hriat kha, lo pawm ringawt che ila ka bulah hian i hlim dawn chuang hleinem, i nu leh i nupui fanaute pawh...." ka sawi zawm hleithei lo, ka awmchhungah min hnawh tlat a, thawk a sak ṭalh mai.

"Ka hria alawm" zawi deuh supa a ti chu ka melh tlawk tlawk a, a hria; mahse, engati si nge?

"I bul aia hlimna ka nei lo tih pawh ka hria, ka hmuh loh hlek che chuan ka ngai ngawih ngawih reng che, ka nupui kiangah awm pawh ni ila nangmah ni zawk la ka ti tho ang, min hrethiam lo a ni, ka inthunun thei lo, ka kal thui tawh lutuk, hmu lo chein ka awm thei  lo a, chuvangin hei hi tihdan ṭha ber a ni. Tun anga ka lo kal reng anih chuan nangmah zawk hi i mualpho thei a, nupui ṭhen, pathlawi ka nih chuan buaina tur a awm lo zawk ang..." a ti tawl mai a, a  thilsawi chu ka ngaihtuah loh lam daih a ni, ka hmakhua a lo ngaihtuah a maw, hetiang dinhmunah lehnghal hian!?

"Min ngaihtuah ka ngai lo, nangmah chauh kha inngaihtuah rawh, Caleb-a hi tih fahrah a nuhrawn hrawn turin i phal em ni, i duhna chauh kha kaltlangpui ta la i chhungkua hi a tuar ber tur asin in nih.." ka ṭawng ring bawka dawr ṭhenawmte thawm pawh a reh hmak mai, min ngaithla mek tawh ang.

"Kan vaia tana ṭha tur tih ka hrilh che kha, Caleb-a chu ka ngaihtuah loh i ring em ni, inringtawk lo ila hetiang thutlukna hi ka siam miah lo ang" tiin a ṭang ve tlat, thil hriat thar ka nei a, Awmpuia hi a danglam takzet tawh tih hi.

"Nangmah kha i ang tawh lo" ka ti ta thlawt a, a inpawm khawp mai. "I hriat ṭhin ang kha ka ni tawh hleinem, a hma chuan midangte ngaihdan leh an duhdan kha ka ngaihpawimawh ber a ni ṭhin a, tunah chuan hlim ve ka duh tawh a ni, mahni hmasial dan ka thiam tawh a, mahni inhmangaih pawh ka thiam tawh" a ti leh hmiah a, hetiang em em hian a lo danglam ang tih ngaihna ka hre lo.

A ṭhianpa a lo let tak avangin kan sawi zawm ta lo a, coffee kan in chhungte chuan ngaihtuahna a bing mup a ni ber. Rei loteah Thantei pawh a lo phei a, a rawn titi bawrh bawrh nain Awmpuia ṭhianpa chauh chuan a lo chhang a, keini pahnih erawh kan ngawi chawrh chawrh a, kan ṭhiante pahnih pawh chuan an hrethiam ve aniang min be lem lo. Rei tak pawh ṭhu tawh loin haw an rawt a, an haw tur veranda thlenga ka va thlah laichuan, "Lo lungngai lo la, min lo ngaichang dawn nia" zawitea tiin min kalsana, kan inhnar nasat poh leh rilru a hah zual ting mai a ni.

Dawra ka luh leh hnu lawkah Noeli'n min lo call a, a rawn sawi dan chuan Awmpuia nupui khan kan dawr awmna a lo zawt a ni awm e. "Kan office-ah an lo kal a, meeting kan nei dawn tawh si a, ka hrilh ta ringawt a, engmah ka lo sawi leh hman tawh lo a, ka hman veleh ka lo hrilh che anih hi, a lo kal maithei a ni" a lo ti zung zung a, kan inhmuh tawh thu ka hrilh chuan zawhna min zawt mawlh mawlh a, ṭha takin ka hrilh ve mai bawk a, Awmpuia thilsawite pawh kha ka hrilh ve nghe nghe.

Noeli chuan a lo hre sa leh diam tawh, "A rilru a buai lutuka, in nu hi ṭhen mai rawh, hetiang chuan Rintei pawh i ti luhai zo ang, inṭhen fel ula, zalen deuhin nangpawn i rim thei ang' ka ti anih kha" a ti hem mai a, "Tunah fa hial an nei tawh a, naupang vang chauh pawhin inṭhen tur an ni hleinem, an chhungkaw kehdarh chhan nih hi ka duh miah lo asin" ka lo ti bawrh bawrh a, ani hian a lo fuih khaw lo em mawni ka ti deuh.

"Amah khan inṭhen a pawi tih loh thu a sawi hmasa alawm, Caleb-a te chu a ngaihtuahawm loh ang, an awmpui nula leh a pi ngawtin alawm buaipui ṭhin, Juni hian a fapa hi a ngaihsak tak tak lo, a lungawi loh chang apiangin a haw san ziah alawm, Juni ai chuan i enkawl thei zawk daih ang" a ti duh lek a, a ngaihsam lutukte chuan lung a ti awi lo zual.

Awmpui danglam nasat tawhzia ka han sawite chuan, "Nangmah vang vek ania, chuvangin i mawhphurhah lo ngai mai rawh" a ti sam et a, ani sawipui chu lung ti zing zualtu chauh a ni, "Engmah lo sawipui tawh suh, an nupa kar a ṭhat nan thurawnte pe ṭhin zawk la a ṭha ang, keichuan inṭhentir kha ka remti dawn lo ania, amah pawh hrilh rawh" tiin phone chu ka dah hmak a, a hnu lawkah message min lo thawn leh a, "Lo hnem rawh, ka khawngaih a nia, i Zawlpala kha lunglengin a fam ve palh ange" tih zawng hi min lo thawn a, kan zinga danglam lo awmchhun chu Noeli chauh hi niin ka hria, tun hma ang thoin Awmpuia hma a la ngaihsak em em reng.

.

Khaw thim hnuah kan haw a, eirawng kan bawl chawp chuk chuk a, zanriah eikham hlim hlawtah ṭhenawm nulate lokalin thawmhnaw thleng thar an lo en a, Thantei'n a lo enpui laiin keiin bungbel ka nawt fai a, chutih laia kan doorbell lo ri chu ka lo chhawn vat a, beisei loh deuhin inhnuai tlangval kha a lo lut ve hlawl mai. Kan inleng nulate chuan an lo be hlut a, in lo inhre ṭha viau ni tur a ni.

"In haw har ṭhin viau e law, chawte in ei tawh em?" ti a min biak chuan kan eikham tawh thu ka hrilh a, "Lo ṭhu rawh, thingpui kan in dawn nia" tiin ka let san leh mai bawk. Thantei leh kan inleng nulate nen chuan an titi bawrh bawrh a, nulate chuan an thawmhnaw ha chhinin Zodina chu an endik tir a, mawi a tih loh deuh chu an han la hreh leh ṭhin a, Thantei'n a lo hnial veleh ṭhin nen an ri bawrh bawrh hlawm.

Bel ka nawh zawh veleh thingpui ka lumsak a, a hang kan duh an tih vangin a sen hang chu kurtai nen ka chhawp sak a, "Thingpui lum i va thiam ve, a rawng aṭangin a dik tlat" Zodina'n a lo ti chu tawi tein ka nuih a, a khat tawka min en leh ṭhin avangin phone ka bih deuh reng. Nulate an haw hnu pawh chuan a la ṭhu ve reng a, Thantei lah eng eng emaw tiin a tho sek a, thawhsan ve daih chu thil nuam a ni lo, min lo lenchhan anih hmel bawk nen ka ṭhutpui ve reng a, kan inbe tam lo khawp mai.

"In mu duh tawh em?" a tih chuan sana ka melh zauh a, dar 9 a pel zawt chauh a ni.

"A la hma alawm" ka ti ṭha ve mai a.

"I mut duh hunah sawi mai rawh aw, zan mut theih loh ka nei a, lenna tur lah hi a vang bawk si a, inthlahrung deuhin ka lo kal ania" a ti zui a, "Inthlahrunna tur a awm hleinem, keini pawh kan mengrei alawm, lo leng ziah rawh" mawihawihah ka han ti ve a, a lawm hmel khawp mai. Dawr lam chanchinte min zawt a, titi sawipui tur ka hre vak lo a, a zawhna ka chhang a ni deuh ber. 

Pindan lama Thantei a luh hnu chuan a rawn thle hnai vat a, "Hmanni deuh khan Number ka lo dil a, lo biak che a rem em?" a ti khawl a, min ti hamhaih angreng viau a ni. Ka chhan hma chuan, "Bialpa i nei em?" a tih zawm leh zat a.

"A pawimawhte chuan a rem lohna a awm hleinem" tiin a zawhna hmasa chauh chu ka chhang a, min zawt nawn bik lo.

"In dawr chu bazar kalpaha lo hmuh ve tur a ni, mipa thawmhnawte inzuar ve em?" a tih leh chuan hmeichhe thawmhnaw chauh kan zawrh thu ka hrilh a, "Ka la rawn tlawh ve ang" a tih chu ṭha tak bawkin ka chhang a, a hawihhawm angreng a, mipa ninawm leh ngeiawm tur chi a ni loin ka hria.

Darkar chanve vel a ṭhut leh hnuah a haw zui mai a; mahse, a haw aṭanga rei loteah message min lo thawn a, "Zodina aw, lo save ve la"  a rawn ti a, ka save tur thuin ka chhang ve mai bawk. Chumi hnua a message lo thawn leh erawh ka chhang hreh ta viau a, a zawhna ngai bawk a rawn zawh leh vang a ni.  

Ka chhang hreh chuan, "Thantei i zawt dawn nia" ka ti ringawt a.

"Ka lo zawt dawn nia, thildang a hrilh tawh ang che ti raw?" a ti leh pawh chu chhan ka la hreh cheu mai. "Engthil nge ni?" tiin ka hre lo der ta ngawt a, "Lo zawt ve la" a tih chuan ka zawh tur thuin ka chhang ve leh a, "Min ngei phah em lo ang chu" a ti leh erawh ka chhang tawh lo. Ka inbual zui a, mu tura ka inpeih chuan dar 10 a lo pel tawh a, a tuk lamah bungraw remfel turte kan ngah avangin kal hma kan tum bawk a, kan mu hma khawp mai. 

          

Ka muhil deuh chauh ang tihah ka phone riin min ṭham harh hlawl a, ka han en chuan number hlang tawp hi a lo ni a, phone number hi ka nei tam lo a, ka number nei pawh an tam lem lo, chutia number hriat loh hnen aṭanga call ka han dawng chu thil pawimawh a awm takah tiin harh chiang mang lo chuan ka chhang a; mahse, a aw ka hriat rual chuan tunge anih ka hre chawpchilh a, ka ṭhu chhuak rang hle bawk.

"Rinte, keimah Juni aw, Awmpuia nupui"

"Aw ka hria alawm, eng nge ni ta?" mut tawh hnua min lo call chu mak ka ti deuh a, dar 11 a pel tawhin ka ring.

"Eng lo a nia, biak lawk che ka duh a, vawiin khan ṭhiante an awm ve si a, engmah kan sawi dun thei si lo a" a tih chuan ka zam ru lek lek a; mahse, a awkiah chuan thil ṭha lo lam rawn sawi tur a ang lo a, eng thil nge a sawi duh chu ka zawt let thuai bawk.

"Kan pa chungchang ania, in chanchinte pawh Peksanga hnen aṭangin ka hre tawh tho a, nangpawn tlang deuhin min hrilh ve rawh aw" a ti hmasa tete a. "Han sawi la, ka chhan theih ang ang chu ka chhang dawn che nia" ka ti ve thlap a, sawi hreh chin erawh ka nei ngei ngei ang.

"Zawhna lam vak pawh a awm chuang lo, ka rilru hi a hah ṭhin lutuk a, kan pa hian a rawn hel leh chein ka hria, a lo kal ngun tih pawh mi ka aṭangin ka hre fo a.."a sawi laichuan rilru a lo buai ru khawp a, mi ka aṭanga a hre fo anga a sawi mawlh chu a ni.

"Ani sawipui aichuan nangmah hi sawipui zawk che ila a ṭhain ka hria, a hnen aṭang pawhin i hre ve tawh tho chuan ka ring a, kan nupa kar hi a ṭha tehchiam lo a, a hmuh leh che aṭang khan kan ṭha lo zual bawk a, sawi vek sen pawh a ni lo, i hriat tho kha, nang chu a first love i nia, a la theihnghilh thei lo ber che hi kan buaina a nia, a lo kal pawh hi ka khap fo mai, engmah hi min sawipui duh ngai lo a, hauh ve dawn pawhin a ngawi tlat zel a, nangtal chuan min hrethiam la, kawm dan tawk lo thiam mai teh, ka thilsawi hi ngenna angin min ngaihsak la, nangin i lo hnar anih chuan lo kal pawh a sim ve mai ka ring" a ti sap sap a, a aw aṭang pawh chuan a rilru a buai hle ang tih a hriat theih a, inthlahrun a na duh khawp mai.

"A van zia lo ve aw; mahse, i ngaih ang em e. kha a awm miah lo ania aw, in nupa kara tlakzeh phei chu ka duh dan a ni miah lo ang" insum ru tak chung chuan ka ti a, han sawi duah tur ka hre lo, Juni rilru tur ka ngaihtuah a, a rilru hahna chu awm ka ti viau bawk a, inthlahrun erawh a na a ni.

"A lo kal anih pawhin lo be ṭha duh lo hial teh, 'I nupui leh fapate ngaihsak zawk rawh' ti mai la, nang chu hmeichhia i nia, ka dinhmun leh ka rilru tur pawh i hrethiam ber ang, a zahthlak viau nain tih ngaihna dang ka hre si lo a, min ṭhente hi a duh mai ang tih ka hlau, tunah phei chuan.." a ngawi vang vang a, eng thil emaw sawi hreh tak sawi duh nei si a ang.

"Buaina dang in nei em ni?" dilchhut zeta ka tih chuan, "Kan inneih tirh khan i chungchang hi chu min hrilh tawh a, pasal i nei tawh a ti bawk a; mahse, hetia i lo lan leh hnu hian min hlat telh telh, nang lah i lo la nula bawk si a, chu tak chu ania ka awm tinuam lotu chu, ka sawi hi khawiah mah min sawi chhuahsak lo la, kan buaina zawng zawng hi hre ve la ka duh vangin ka hrilh tawp ang che, khum khatah pawh kan mu tawh ngai lo, nupa nun kan hman lohna pawh a rei tawh" a ti teh thlawt a, chutiang thleng thlenga min hrilh ta mai chu ka hamhaih angreng hle bawk.

"Keimah vang vek chu a ni dawn em mawni le, keipawn tlang deuhin ka hrilh che anga, in pa nen hian inngaizawng leh inkawp angin kan awm miah lo ania" ka la ti ve fan a, ka lo hnar ve tih pawh hre ngei sela ka duh a ni, chutih rualin Awmpuia rilru put dan erawh sawi chhuah ka duh bik lo a, Juni tan pawh hriatnuam a ni lo ang, hria sela ka duh zawk tak chu a pasal nena kan inkarah inzawmna a awm lo a, an nupa kar buai chhana min ngai lo turin ka duh bawk.

"Nia i ni vek lo ang; mahse, a tizuaikaitu chu a ni ve a, amah pawh a inthup thei meuh lo chu anih hi, mi pawh a hmaizah seng tawh lo, in dawr piah lawkah khan ka ṭhianten dawr an nei a, a lo kal thu hi report ka dawng zing lutuk, a tir phei kha chuan ka ngai dik lo hman che a; mahse, Peka'n i chanchin min hrilh khan mi ṭha deuh i nih ka ring a, zah pawh dawn loin ka rawn be tawp che anih hi" a ti leh luam a, a ṭawngkam a tlawmin a inthlahrung hmel si a, keipawn thinlung takin ka khawngaih a,  a thu min rawn pawh chu ka tih makmawh a niin ka hria.

"Keimah vang chuan lungngai suh, buaina engmah a awm lo ang" a ngaiṭhat nan ka ti ve thlap a, "A lakah lo ṭha duh lo mahla a pawi lo, i felzia ka hre reng nain min lo tihsak hran mai rawh" ti a min chah mawlh mawlh hnuah kan inbiakna kan ti tawp a, phone ka dah rual chuan ka ipik ṭup maiin ka hria, thaw a veng mawlh lo, eng hi nge ka tih a mawi leh mawi lo tiin ka inkhap buai khawp a, Juni duh dan zawm mai chu kan ṭhat tlanna tur niin ka hria a, ka rilru erawh a na dawn, a awlsam hek lo ang; mahse, ka tih ngei a ṭul si.

Tukṭhuan kan ei laiin Thantei hnenah ka hrilh a, ani lah chuan, "Ngaihzawng neih i ngai, in buaina chinfel dan ṭha ber a ni" a ti sam et mai a, ka insiam laite chuan ka ngaihtuah zui neuh neuh a, ngaihzawng neih chu a ṭha ber tak ang a tiin ngaihtuahna chu ka nei ve ngei a, rilru erawh a hmin lo khawp, duh vak lo chunga ngaihzawng neih chu ka tih ngai lo thil a ni a, ka ngaihzawng pahnihte kha duhtak chunga ka pawm ve ve an ni bawk. Ngaihzawng nei ni ila chuan Awmpuia pawn a rilru a thlak theih mai ka ring a, Juni tan tak pawh ngaihṭhat vawng vawngna tham a tling ang; mahse, hetiang lo deuha beidawn tir theih dan awm sela ka la ti fan a, ka inngaihtuah tluk tluk a ni ber.

Nilengin dawr kan siksawi a, Awmpuia emaw Juni call ka dawng lo a, message tak ngial pawh a awm lo. An nupain an sawi dun ve a ni maithei chawlhniah pawh engmah thu leh an rawn nei lo a, Noeli'n thawmhnaw chungchang min zawh paha Awmpuia zin thu min hrilh chu a chanchin ka hriat chhun a ni rih. 

Chawlhni zanah Zodina a lo leng leh a, "I lo zawt ta em?" tiin min zawt leh phawng a, ka la zawh loh thuin ka chhang leh ringawta, ka chhanna erawh a fuh ta vak lo, a inpuan phah ta tlat, 'In lo awm tirh aṭang khan ka duh ru tawh che a, ka lo leng ngam si lo a, Thantei hi ka zawt ziah alawm, bialpa i nei lo a tia, remchang ka rawn la ve ngawt anih hi" pehhel lo tak hian a ti a, fiamthu anga ka laksak chung pawhin a thutak ngul mai a, lenpuiah te min sawm thul.

Chumi kar chu a rawn leng zantin a, biak hrehawm tak phei chuan a awm lo, thingpui a rawn in a, a titi luam hnuah a haw leh mai zel a, message erawh a rawn thawn kur dup reng. "I ṭha tih zawng ka ni lo em ni?" tih angreng hi min zawt khawl khawl zel a, chutiang zawnga ka en ngai loh thuin ka chhang ve mai zel. Ngaihzawng ka neih chak rih lo thu ka hrilh ṭum pawh chuan, "Ngaihzawn hrehawm ka ni lo ang, min khawngaih ve mai la" ngenngawl zet hian a ti a, mipa hnar har tak chi anih ka ring, ka mipa tawn tawhte hnar har ka tih dan nen erawh a in ang lo hle thung a ni.

"Inrinni chu dawr ka rawn nghahpui ang che u" a ti teh tlat a, dawr kan thlen hnu lawkah a rawn lang zui a, Thantei nen an inngaina si a, ka tan lo biak chhiat vak theih a ni lo. Chhun thingpui hmehte a lei a, pawisa a nei bawk aniang a inseng huai angreng khawp.

Dar 2 pelhah pawh a la ṭhu ve reng a, a titi bawrh bawrh reng. Thantei thil thawn tura a chhuah vangin counter kan nghak dun a, a thawhna school lam chanchinte pawh ka zawt ve luam a, science teacher a ni awm e. Nupui neiha inbenbel a duh thu leh, fapa mal a nih thute min hrilh ve duah a, ka rilru hneh tuma sawi a ni ber. 

Chutia inhnaih taka kan lo titi mawlh mawlh laichuan beisei loh deuhin Awmpuia a rawn lang hlawl a, min hmu chu a phawk ve deuh. Keilah chuan ṭhutna ka lo kawhhmuh thawr a, ka bulah Zodina a ṭhu si a, kan piah hla deuh hleka Awmpuia ṭhu chuan awm a ti nuam lo ru khawp mai. Ka va thlek laichuan kawngkhar lam a hawi a, min biak pawh a tum lem lo. Min lo melh ve zawk a, chumi hnuah Zodina chu a melh leh a, a la ṭawng chuang miah lo; mahse, lawm lo hmel a pu a, eng emaw ngaihtuah nei a ang.

"Engtikah nge i lo haw a?" ka va tih chuan, "Niminah" tih zawngin min chhang a, kawngkhar lam a melh leh daih bawk.

"Tunge a?" Zodina'n a tih ri chu a hre pha aniang a lo hawi vat a, ka chhan dan a ngaichang tih a hriat theih.

"Awmpuia anih hi, i hre ve lo ang" ka ti ngawt a, kan piah a mi ner deuh sak chu ka va hmu zui a, awm a nuam lo thlawt.

"Thingpui i in duh em?" ka va ti leh chu,   "Thil eichhuah pui che ka lo rilruk a, i ṭhiannu a awm nange?" a lo ti khauh a, Zodina pawh chuan mak a ti hmel ta khawp a, min lo en rang viau a ni.

"Chhuak thei pawh ka ni lo, hmanniah in nuin min lo dawr ve tak asin, fel kan ti tak tak a ni" 

"Hetah maw, in inhria em ni?"

"Hre chiah lo, amah zawk khan min lo hria a" a hmel chu ka en reng a, a insehruh deuhin ka hria, a rilru a buai hmel viau bawk. Zodina'n kuhva a duh em a lo zawh vangin min chhang zui lo a, "Ka ei lo" tiin pakhat lah chu chhang mawl tawp a, "I ei ve zeuh zeuh emaw ka tia" ti a ka lo ṭawng ve chu a lawm vak lo aniang, "I va hre rei ve" a ti bul hmuk a, kawngkhar lam a hawi leh hmak.

"Engtiin maw i zin?" ka ti leh hram a, chu erawh min chhang pangngai leh viau thung. 

"Kan khaw lamah YMA golden jubilee ka han hmanpui a, chhungte tlawh pahin" a ti a, ka lam lo hawi pah chuan, "Fu lo hawn ka tum deuh a, ka feh hman ta lo alawm maw le" a tih zawm leh zat a, a ṭawngkam pawh a pangngai leh thlap tawh.

"Coffee in teh ang u, i duh ve em?" Zodina'n a tih pawh chuan "A pawi hleinem" a ti ve mai a, "Ka zuk la ange" ka ti erawh Zodina'n min lo hnial vat a, "Inleng i neih hi, keiman ka zu la ang" tih leh kal a rual a, pawisa thawn pawh a duh lo.

A chhuak fel chiah chu, "Rinsangpui" tih riin a zawm zat. Rang fein ka va melh a, min lo en reng.

"Ngaihzawng i nei em ni?" a ti khawl a, ka hun remchang a ni tih ka hre ve nghal a, dawt pawisawi lo tak anih ka beisei.

"A la chiang chiah lo; a fel i ti em?" tiin ka nuih var var a, min nuih let lo chiang hle.

"Keimah vang a ni em?" a ti zawi deuh sup a, rilru a na tih ka hai lo, a mitmengah a lang tlat.

"A nihna chen a awm ang" ka ti liampuat a, ngaihsam tak anga lan ka duh a ni.

"Keimah vang anih chuan ṭhen rawh, tih hrehawm che ka tum hleinem, keimah vanga engmah i tih a ngai lo" a ti halh a, a thilsawi chuan awmze dang riau a nei. A lamah ka inher a, kan in en chiang dun kher mai. Ṭawng leh a tum laitak chuan, "I nupui kha a lo kal a, engmah a sawi lo nain a chiai tih ka hrethiam asin, hetianga awm hi bansan a hun tawh, inṭhen turin ka duh lo che u a, in nupa kar keimah vanga a chhiat hi ka remti thei lo ang, in inkar a lo ṭha lo viau anih pawhin pasal i nih angin siamṭhat tum zawk rawh, Caleb-a vang chauh pawhin kei chu ka rem tawh lo, ngaihzawng ka nei dawn a, i tan beisei tur ka awm tawh lo ang, inngaihtuah harh la, thil a pawi thui hmain siam ṭhat tum zawk teh ang" ka ti nghat nghat a, ani chu a ngawi reng, ka mitah min en reng a, chawmawlh hmel takin a ni min melh ni.

"I nupui kha ka khawngaih lutuk, hrilhfiah vak dan che pawh ka thiam lo, nupui ṭha leh fel deuh i nei a, fapa hial innei dun tawh a, mahni duhna changchawia chhungkua tih darh a ṭha lo, i nu pawhin a thlawp hauh lo ang che"

"Engmah i hre lo Rinsangpui"

"Hriat ka duh hleinem, tunah chuan mihrang kan ni tawh a, ṭhian pawh kan nih tawh loh hi, nang pawn chutiang chuan ngai la, lo kal tawh lo zawk rawh" 

"I bialpa a la ni chiah lo i ti tiraw?"

"Ka la inngaihtuah mek a, ka chhang vatin ka ring" thawk a la hawk a, a tho nghal vut mai. 

"Ka phei teh ang" a ti chu phawk fein ka melh a, "Coffee a lak mek kha" ka ti leh chu min en ngur ringawt.

"Engati nge khati teh vaka min en a?" 

"Hman aṭang tawh khan ngun deuha thil  ngaihtuah hi i nei ngai lo, i rilru a lang apiang hi i ti phut phut ṭhin, i dawhthei lo em em reng a, mi pawh i ngaichang ngai lo, thutlukna dik i siam ngai lo a, ka lakah hian i dawhthei lo zualin ka hre ṭhin; mahse, tun ṭum chu inngaihtuahna hun inpe ngei ngei ang che, awlsam takin eng thutlukna mah siam suh" a ti nghat nghat a, a thinrim nge min zilh pawh ka hre lo, a chal a ti chuar tap a, a meng nur hle bawk. 

"Ngun deuhin ka ngaihtuah ang, tun ṭum chu eng thilah mah tihsual neih ka duh lo" a mitah tak en chungin ka ti a, "Keipawn" tih chauh a sawi. A kal chhuak chu a thlir zui reng a, a liam hnu lawkah Zodina a lo let a, "Tinge i ṭhianpa kha, coffee min chah ve reng sia, a kal leh daih a?" a rawn ti lut bul bul a, "Tih tur pawimawh a nei thut anih kha" tih zawngin ka lo chhang.

Thantei lo let leh hnu lawkah Zodina pawh a haw a, keini erawh thim hnuah kan haw chauh a, eirawngte chu ka han bawl ve tak nain engmah eichak ka nei lo, hma deuhah ka mu a, ka harh zing hle thung. Khawvar hmaa ka harh chuan mu leh tawh loin ka inbual a, tukṭhuan tur ka buatsaih zui a, Thantei lo thawh chuan ka lo inpeih diam tawh. Chawlhni anih vangin chaw kan eihma a, chawhma bak chu ka inkhawm peih ta lo thung a, ka mu tluk tluk a ni ber. Zana Zodina a lo len pawh chuan ka tho peih lo a, Thantei nena an titi thawm chu mut hmun aṭangin ka lo ngaithla ve reng a, ka chungchang ngawt an sawi.

"I bem lo em ni, ka hnenah sawi zel loin amah sawipui ta che" Thantei'n a tih chuan, "Bem ve bawk e, a duhzawng ka ni lo nge mawni" Zodina'n a ti nuah nuah a, ka duhzawng anih leh nih loh takngial pawh ka hre lo, rilru ka pe thei lo a ni ber.

Thawhṭan tukah dawr bungrua a lo thlen avangin counter lamah Thantei a tlang a, keiin dawr lam ka pan thung a, dawr danga a sem nghal avangin chawhma chhung chu a lo let lo a, "Ei tur ka lo hawn nghal ang" a tih vangin engmah ei loin ka lo nghak ve reng bawk. A lo let har tak em avang chuan coffee lam mai ka rilruk a, dawr ṭhenawmah va dakin u Muana chu coffee a duh ve em ka va zawt a, inleng a lo nei a, no thum lai min chah a, a lawm vur vur viau lehnghal.

Kan dawr piah kawngpui maiah chuan coffee chu ka va la a, rei pawh ka thang lem lo, dawra ka let tur step-a ka chhoh laimek chuan min ko thawm ka hria a, "Rini, lo ding teh" ti ri a ni. Ka zuk leh hawi chiah chu Juni lo chho ka hmu zui a, amah chauh a ni lo, nutling pakhat hian a lo zui a, "Han hnuk thlu tawp rawh" chu nu chuan a ti vin hlar a, a ngaihna ka hre lo kher mai.

Juni lo chho chu, "Eng nge i lo tih dawn.." ka ti hman awrh, "Thil sawi i va ngai pawimawh lo ve a, ṭha te tein ka hrilh che a ni lawm ni" a ti pawr hlar mai a, a ṭawng ring bawk si a, hnuai lama kawngkal ho pawh an lo hawi hu hlawm.

"Eng maw, ka van hrethiam lo ve" ka ti leh chuan a pawi a sawi a ni ngei ang, "Hre lo der khanglang suh" a ti ṭeu leh hlar a, ka bo telh telh.

"Eng maw ka hriat loh der, eng chu nge ka tih.." ka ban a rawn vai pawp a, ka rak ṭhat, coffee sa chuan ka awm a rawn per avangin a sa hut hut a, ka ban phei chu a thip hlur. "I â em ni?" ka ti ve ta ṭhat a, chuveleh step-ah min nam chho rawk rawk a, veranda ka thlen rualin ka bawp thlawp a, a la duhtawk mai lo, "Mi pasal ngaihzawn chu a nuam em, zahna chang i hre lo bawk a hetia tih hi i phu" tih leh ka sama rawn ṭham a rual a, ka lo indang ve nain a hnuai zawka ṭang ka ni miau a, ka indang hleithei lo.

A duhtawkin min chinglet ti ila a dik ang, kan bul hnaia awmte chuan min en ṭhup a, Juni lah chuan ṭawngkam chhe zet zetin min ankhum bawka, "Mi pasal uire tu i nih hi hre rawh, mualpho thei loah i lo inngai a ni maw, mi hurherh leh khaw lo mai i nih hi" tih pahin ka sam a rawn pawt bawrh bawrh a, a lo kalpui nu lah chuan, "Sawisa hrep rawh, mi chhungkaw buaina siamtu anih kha, khatiang dim a ngai lo" a lo ti ve sek bawk a, kawngpuia lam aṭanga "Tute nge ni a?" a tih ri te chu ka hre pha.

U Muana lo chhuak ka han hmuh chuan, "Lo nam sawn teh" ka ti ṭial ruan a, ka thinrim lutuk chu ka khur thei hial a ni. 

Ka theih tawpa nain a khabeah ka nam a, chuti chung chuan ka sam a pawt bet tlat a, "Ka that dawn che Zawngi" a ti bawrh bawrh mai a, ka nghawngte chu rawn reh a tumin ka hria, ka rawn ham thuak a; mahse, u Muana a lo inrawlh tak avangin min rek hman lo hlauh thung. Thawk lehkhatah a kang deuh lawp a, "I va han nasa reuh ve a, police man tir i duh em?" chang fek fawka u Muana'n a tih chuan, "Hmela, i lo buai vena tur pakhatmah a awm lo, thlawk bo rawh" a lo ti let hlar a, u Muana'n a nam deuh dawt dawt.

"Miin an en ṭhup che hi i hria em, hmeichhe rapthlak lutuk, kalsawn rang rawh" ti tu chu u Muana bawk a ni, a inlengte khan min lo kaitho a, ka samte chu min huiṭhatsak mawlh mawlh a, ka zak lutuk chu hawi pawh ka hawi chhuak ngam lo, hmanhmawh deuhin u Muana dawrah ka tlan lut a, pawn lam thawm erawh a la ring ṭha khawp mai.

Banga darthlalang intar lam chu ka pan a, ka mitko leh nghawngah pem chhete a awm tih loh chu hliam dang ka nei lo, a tin hriamin min hamna ka nghawng chu a thi em lo nain a thip hlur a, chu zawng aia na ka tih chu ka awm chhung lam zawk a ni, ka thinur ngawih ngawih a, ka zak hle bawk.

Eng nge ka tihsual, hetiang tehhrep hi ka phu em ni, rapthlak ka ti lutuka ka thinphu a la mumal thei lo, ka mitah chuan mittui a tling pam a, ka rilru a nain mahni inkhawngaihna ka nei ruai mai.

Thawm a reh tak hnu chuan an lo lut sap sap a, "I na em Rinte" u Muana'n a rawn tih chuan counter lam ka pan daih a, "Ka na lo" tih zawngin ka chhang, pangngai thei ang bera lan chu ka han tum ve a, ka aw erawh khur nasa tak a ni.

"A nasa reuh hle mai, lo kal ṭhin kha a pasal a lo ni maw?" 

"I nghawng kha a thi anih kha"

"I sam pawh a pawt tla ṭeuh alawm" tiin min lo ngaihven chung hlawm a, a ṭhenin ka nghawng hrukna tur chu min lo pe bawk a, nuih a har ṭalh, tham lo ang taka lan ka duh tehlul nen.

"Thil hriatsual palh a nei aniang, eng nge a awmzia pawh ka hrethiam bik lo" ka ti chu min lainat hmel deuhin min en hlawm a, "Thantei ka'n ko haw ange" tiin u Muana'n Thantei a call bawk a, pawnah chhuakin a va hrilh nghal mawlh mawlh mai. Midang zinga awm reng chu nuam ka ti lo a, "Dawr ka kalsan ringawt a, ka va phei teh ang" tih leh thawh ka rual a, pawna u Muana ding pawh chu be tawh lem loin ka pheisan a, a lo lang leh rang viau thung.

"A lo kal leh angem aw?" a ti halh a, "Kal tawh lo turah ngai ang, ka ṭha ania, min ngaihtuah suh" ka lo ti zung zung a, "Thantei pawh a lo let mek" a tih chuan engtin nge a lo chhan ka zawt vat a, "Ka lo haw nghal ang a tia, a rawn sa haw ve hlut maithei a ni" tiin a nui ruh ruh a, za lo zet chuan nui ve. 

Inleng a neih mek avangin an dawr lamah min pheisan a, minute 10 vel awrh chu mahniin ka awm hman ang Thantei a lo thleng a, a rawn phul ve hlut a, "Ka awmlai nisela chu a va han chak dawn lo" a ti leh ringawt ṭhin a, tih vak ngaihna ka hre lo.

"A pasal khan inṭhen a rawt aniang" a ti chu ka rindan ve tho a ni.

"A ngaih ang tak tak khan awm zawk la, tuar ve hlak sela ka ti rum rum dawn alawm" a ti zui leh hlak a, chu thu chuan min mawlh zui reng. "Va haw hma mai rawh, i mu hahdam veng veng dawn nia, eirawng pawh lo bawl duh suh, ka rawn bazar haw mai dawn nia" a tih vangin ka haw hmasa a, in ka thlen chuan dar 2 a la ri lo. 

Khumah ka bawk thlawp a, ka la thinur ngang aniang ka sa leh pup pup ṭhin. Ka ngaihtuahna lah chu a nu but a ni ber a, rilru ṭha ka pu mawlh lo, ka ngaihtuah let leh ṭhin a, rulh let ve mawlh ania ka chak ni, ka thil ngaihtuah lah chu aw, mihring rilru put dan tur a ni mawlh lo; mahse, inthunun thei lo khawpin min siam miau a, mi ṭha leh famkim ni bik lo chuan ka ngaihtuah lo thei lo a ni.

Noeli ka bia a, ka va ang hrep a, a thil rawn sawi ve lah chuan min hnem hlawl lo, "Hmeichhe nasa a nih thu ka lo hrilh tel lo che chu a zia lo hle mai, thin butut a nei a, tih hreh pawh a nei lo ang saw nu sawn, a chawhmeh duh loh zawng an siam pawha thleng paih darh ngam ngat kha ania, tumah hmaizah a nei lo, Awmpuia nu takngial pawh a zah lo, hei vang hi ania an inṭhen pawiti lo tura ka duh chhan che, inṭhen hmiah sela a ṭha ber, Awmpuia pawh a khawngaihthlak lutuk alawm" a ti duah a, a hmate khan min hrilh zawk sela ṭha tur, Awmpuia'n 'Engmah i hre lo" a tih kha hei ngei hi a nih ka ring.

Thantei lo haw chuan chawlh min pe ringawt mai a, "A ngai hran lo, ka kal thei a lawm" ka tih pawh chuan, "Inthlahrung suh,  bungraw thleng tur a awm hnai lo a, dawr nghah hrim hrim chu mahni pawhin ka ti thei ang, eng emaw chen chu lo hahdam teh, khanu kha a rawn kal leh maiin ka ring, saw lai velah titi a tam dawn si a, nuam i ti lo ang" a ti ve tlat a, ka hnial duhta bik lo.

Noeli khan Awmpuia a lo hrilh nghal aniang zanriah eikham hnu lawkah Awmpuia call ka dawng a, vawi eng emaw zah a lo call chung pawhin ka chhang duh lo a, a message takngial pawh ka en lo, a hnenah chuan sawitur ṭha engmah ka nei lo a, ka ngaihtuahna ngei pawh a ṭha chuang lo, inbia pawh ni ila sawi tur ka hre chuang lo ang. 

Mut hmunah ka inngaihtuah tluk tluk a, ka dam thei lo reng reng, ka rilru ana ngut ngut mai a ni, a khat tawkin thawk ka la hluai zel a, a ven phah chuang der lo. Khawvar dawnah ka muhil ve chauh a, Thantei kalchhuak tur thawmte chu ka mang hriat riai ruai chauh. Mumang mak deuh deuh hi ka nei a, ka mumangah chuan college kan lo kal a, Juni ka hmu tel ve teh tlat a, chemte kengin min lo um chiam a, ka harh chiah chu ka thinphu a rang dup dup mai.

Ka phone riin min lo ṭham harh hi a lo ni a, ka han en chuan Awmpuia hming a lo lang va a, zinglam dar 10 a lo ri der tawh. Kawngka kik thawm niawm tak ka hriat avangin call chu ka chhang a, "Lo hawng teh" rin ang ngei chuan a rawn ti zui a, ka hnar duh ta bik lo.

Muangchang fahranin kawngkhar chu ka va hawng a, a hmel ka han hmu chu sawi tur a a vang khawp mai. "Lo lut rawh" tih leh inher ka rual a, min pawt let rang viau thung. "Engtin nge a tih che" a ti halh a, ka nghawng leh hmai velte chu a thlek zui bawk a, a ner leh sak ṭhin.

"Office i kal dawn lo em ni?" 

"Dawn e, ka call i chhang thei si lo a, ngaih a ṭha thei lo alawm" a ti a, dawrah a va kal hmasa anih ka ring. Ka chal rawn deh a tum chu a kut ka lo man vat a, "Hliam dang i nei em?" a tih zawm a.

"Ka ṭha vek, engmah na ka nei lo" a mitah ka en kal a.

"A zia lo hle mai, keimah vang vek a ni" a ti chuai raih a, chu zawng tun dinhmuna ka thu hriat chak loh ber a ni, he thil vanga a  inthiam lo hmel hmuh pawh hi ka duh lo.

"Nupui fel leh ṭha i nei ka tih kha ka sut leh ania" ka ti tawl, ka ṭawngkam chu mak a ti ngang aniang min en reng a, eng nge a ngaihtuah hriat a har khawp mai.

"Sawi tur pawh ka hre lo, pawi ka ti lutuk"

"Ngaihdam dil sak i tum em ni a"

"Chutiang ka tum lo, nangmah zawk hi ka ngaihtuah che" a thilsawi chu ka ring thlap, min ngaihtuah tih ka hai lo, a mitah pawh ka hmu thei a ni. Sitting room lamah kan inzui phei a, "I na lo tak tak maw?" a ti leh rih a, lu a thing ringawt thung.

"Juni bulah khan sawi i nei em ni?" ti ka zawhna chu pehhel lo zetin min chhang a, "Nizan hmasa khan inṭhen ka duh thu ka hrilh anih kha" a ti khawl a, ka lo ring dik chiang ngang mai.

"Chuan engtin nge?"

"Huhh" za lo zet hian a nui a, zawhna ngah fein ka lo en bawk.

"Ka thusawi a zawm ngai lo, ṭhen ka duh chuan a awm a, chelh ka tum chuan ka kal lui ṭhin, koh haw ka tuma a lo haw duh ngai loh laiin ka koh loh hunah a lo haw ṭhin, min runluih hi a nuam tih ber ania lawm" a ti mauh mai a, em em hian a, chunu chu a khirh dawn hle anih hmel.

"Anih chuan engtia tih nge i tum?" ka ti fak a, ka dawhthei tawh meuh lo a ni.

"Engtin nge ka tih ang Rinte, vawitam ka lo tum tawh a, ṭhen ka duh chhan hi nangmah vang chauhah ngai suh, Caleb-a vanga inṭhen loh ka duh chang pawh a awm ve ṭhin alawm, tawng leh lo phei che ila chuan khatiang rilru kha ka la pu maithei a ni, mi hlawhchham ka ni tih i hrethiam tawh em tihian..." a awri chu natna thuk tak aṭanga lo chhuak hi a ang a, ka khawngaih vang pawh a ni maithei, puih a ngai ngawih ngawihin ka hria.

A biang tawn tawnah ka dawm a, "Ka bulah hian i hlim angem ka hre miah lo; mahse, i hlimna aia duhsak che ka nei lo tih chu ka hria" ka ti zawi sep a, "Keipawn i hlim ka duh, keimah vanga i rilru a nat hian hrehawm ka ti ṭhin" a ti ve zat a, chungril lama ka rilru inlet but but chu ka hre thei, tunah hian duhthlanna ka siam a hun takzet ta.

"I nupui chu ṭhen rawh, a harsa anih pawhin ṭhen ngei ang che" ka ti ta thlawt a, ka inchhir lo ang tiin ka inhrilhru mawlh mawlh. A hmui chu dimtein ka fawhsak a, min chhang hauh lo.

"I inngaihtuah buai em ni?" ka tih chuan lu a thing a, inngaihtuah buai hmel chu a pu lawi si a.

"Tinge?"

"Hetiang hi ka lo beisei dan anih chiah lo a, inkawp leh chu ka duh ṭhina; mahse, mipasal nichunga kawp che hi chu ka duh dan a ni ngai lo" a ngawi deuh vang vang a, "Rei lote min lo nghak dawn nia" a tih laia a mitmengah chuan ngenna ka hmu a, ka lung a chhe lek lek hial a ni.

"Min lo nghak thei ang ti raw?" 

"I tlai tawh lo ang tih tiam la" 

"Tlai lo ang, min nghak chhuak dawn tih hria la" ka ṭah nuih hak a, ka ngaihtuahna chu kum 5 liamta ah daih khan a awm. Ni e, ka nghak thei tur a ni, engtia rei pawh ngai dawn mahsela ka nghak tlat tawh ang, Awmpuia'n ka laka a thutiam a hlen lo ngai lo, a sawi angin a awm ngei ngei ṭhin. "Ka lo kuah ang che" ti a ban a rawn phar rual chuan a awmah ka bei vat a, duat deuhin min kuah hlu hlu a, hah a dam sawng sawngin ka hria.

Vanneihna hi a hming an sawi ṭhin ka hria a, ka la tawng ve ngai lo niin ka hre thung a; mahse, vanneihna chu mahni kan inhmuh danah hian a lo innghat zawk niin ka hre tawh. Ka vanneihna chuan Awmpuia min tawntira, hriatreng tur nunhlui hlimawm tak takte min pek hnuah tun hun hi kan thleng a, chu ka vanneihna bawk chuan a vawihnihnan min intawntir leh ta a ni.

(End of chapter - 39)