WHY DID YOU GO?
by Ahmangaihi violette khiangte
Chapter - 1
"Khi khi i arsi ania, khi lai ami khi ka arsi, Jupiter leh venus an nih khi,"
"Chawngmawii leh Hrangchhuana an nih khi," a coffee lem khalh pahin a ti a, "Engati nge ka hming hi Jenus ti loa Venus an lo tih zawk loh le?" a hawina lam en pah chuan ka ti vang vang. A nui deuh hawk a, "Ka tan chuan venus i ni tho alawm, zing lam arsi, arsi zinga mawi ber ka venus duhawmi i nia lawm," inla zei fahrana a tih chuan ka va nek salh.
"Tun aṭang chuan Muansangpuia leh Jenus.Lalduhawmi tiin ka thlak hmak e," a lama ka tawlh hnaih rualin min lo kuah sawk sawk a, a perfume rim chu ka hnim vang vang. Kan piah deuhah chuan kan ṭhiante an ṭhukhawm a, zanin hi Zohera piancham a ni a, lawm a duh lo chungin a lung a leng ve thei si a tiin kan leng khawm a, an in chung zawl aṭang chuan thla eng chu a lang bial kulh a, chhawng nganaa awm kan ni bawk nen thlifim a thaw heuh heuh reng.
"Zohera kha khawiah nge a kal daih a?" tih pah chuan hnunglam a hawi a, midang chu an la awm kim ṭhap a, Zohera erawh hmuh tur a awm lo reng reng.
"In hnuaiah a chhuk lawk aniang," ka ti nain Ruatfela chu a va zawt ta tho a, "Ka hre lo, phone a hmang aniang," pakhat chuan a lo ti mai si, Sangpuia thawh tum chu ka pawt ṭhu leh rih a, "Ngaihven vak duh suh, a lo chho leh mai ang, Veroi ka'n call ange," ka ti a, ka phone ka phawrh zui bawk.
Phone chu a ri ral ral a, a rawn chhang har hrep..
A vawihnihnaah a rawn chhang ta hram a, a lo mu hman anih hmel. "Heih, zanin angah te chuan be ṭha ve em em la, a piancham te anih ve hi, ka rin aiin in la thutak, kar hnih dawn anih tawh hi aw..." engmah pawh a rawn sawi hmain ka lo ti zung zung.
"Ka wish alawm, min reply lo a," zawi angreng zeta a rawn tih laichuan Sangpuia'n beng a lo dawh hnai ve sawt sawt a. "Call mai rawh, nilengin a mood kan thlak thei lo, a luhlulzia i hriat tlukin a duhzia che i hriat kha, a thinrim rei tak tak teuh lo," ka ti leh a. Zep loah chuan Zohera hi chu tih lungawi a har ve thlawt a ni, Veroi hi a dawhthei zawk hlein ka hria.
"A thinrim chhan kha a ho em alawm, thawhpuite nen chaw kan eikhawm ve a, a thikthu chhiat vangin tumah pawh ka be ṭha ngam hleinem, kal chhuak hlek ila ka haw hun tur thlengin thu neih a tum a, ka sawifiah nasa lutuk tawh, a video call kha la ila chu kha aikhan a thinrim zawk ang, ka lak loh vangin a thinrim a, mi zinga video call hman kha a nuam bik lo alawm," ka ṭhiannu chuan a rawn ti bal bal a, ka hriatthiam tehlul nen kan Zohera thikthu chhia khan a hrethiam pha lo tawp ang, Veroi laka a thikthu chhe lutuk hi kan buaipui zing viau a ni.
"Vero, mipa chu kan heti fo alawm, a ngai ve tawh che em che anih hi, hrethiam hram hram teh, engtia rei nge in inhmuh tawh loh, kum khatah kar hnih vel chauh te i bulah a awm thei a, ral aṭang tal chuan lo duat hram hram rawh," Sangpuia'n ṭhahnem ngai tawkin a lo ti ve bawk a, chutih laiin Veroi thung chuan, "Min chhan duh miau loh chuan ka be nawn tawh lo ang, inṭhen hlen a duh anih loh chuan min chhang turin ti ve mai rawh u," a lo ti let hlak a, Sangpuia nen chuan inenin ka nui ta ringawt, luhlul dun bar bar tak an ni.
"Kan lo zin huk mai dawn ania.." Sangpuia'n a tih leh chuan, "In lo kalpui ngawt ange, helai chu Aizawl ang a ni ve lo ania, mi sawi sep sep an hrat lutuk," a lo ti leh vat a, "Keini pawh lo kal i phal lo maw?" ka tih chuan a rawn chek tlak, "Christmas dawnah ka lo haw dawn reng alawm maw le," a ti bui bui a, a der pawha mi sawm a tum lo.
"Vawikhat tal lo call rawh aw, amah pawh kan lo titi pui ang.." ka tih leh laimek chuan Sangpuia'n min lo nghawk zauh a, hnunglam ka va hawi chuan Zohera ka va hmu nghal a, dawrah a zuk kal niawm tak a ni, nepnawi a rawn keng chho ṭeuh mai.
"Kan haw hunah ka lo be leh ang che," tiin ka ṭhiannu chu ka mangṭha a, ka bula ṭhu pawh a tho ve nghal a. Mi dang ho ṭhutkhawmna lama a phei chu ka en reng a, Zohera nen chuan Veroi chungchang an sawi aniang Zohera zawk chuan a phone a bih vut a, a ak ṭha leh vat thung.
Hemi te pahnih hi high school kan kal lai aṭanga inngaizawng tawh an ni a, nghet angreng deuh si hian an on off reng a, chawhruala inṭhen leh ni leh reng ang an ni. Zohera tan hi chuan Veronica-i a first love a ni a, Veroi tan erawh a first love tih theih ve tho a nih laiin off zeuh zeuh an nei zing a, a ngaihzawng pathum te zinga a hmasa bera ti ila a sual lo ang, an off laia nihpui zuai kha pahnih a nei ve a; mahse, first love na na na chu theihnghilh an lo har ania nge a ngaiah bawk hian a kir leh ṭhin.
Ka en reng laichuan ka lam an rawn pan a, ka sirah Sangpuia a rawn ṭhut mai laiin Zoa chu a ding deuh tlat a, ṭhutna ka lo kawhhmuh pawh chuan lu a thing ringawt. "Chips chu kan chang ve nange?" ka tih chuan, "Zuk lei ve mai rawh u, an la zo vek," tih pahin zial a phawrh a, "I duh ve em ni?" Sangpuia'n a lo tih chuan ka hnial thung.
"Eng nge a lo sawi a?" tiin ka hmaa ding chuan min rawn melh a, "Call rawh," ti maiin ka chhang a, a ner danah call chu a tum loh hmel khawp mai.
"Inhau reng lo teh u, in inngai lutuk awm ngaihna hre lo mai mai in niin ka hria," ka tih chuan, "Min ngai ve vak lo," a lo ti bawl a, a tum zui bar a.
"A ngai awm che em mai, hmeichhia te chu a khawhar zawk kan ni ziah alawm, thlem ve la, mipa phei chu tlawm hmasa zawka ṭan a ṭha, i zei lo thei lutuk anih kha.." ka sawi zawh rual chuan,"Min tluk lo em mai tiraw?" tih pahin ka bialpa chuan ka kut a rawn vuan a, "Nang chu a bu ang thlap," tiin ka lo nuih var var.
"Ka be zing lutuka, min hne aniang ka ti tawh," Zohera'n a tih chuan awih lo zetin ka melh, "Mak ṭhin mange, inneih te pawh in hun tawh a, heti mai mai hian awm reng suh u, tleirawl inngaizawng pawh in nih tawh loh hi," ka ti let hlak a, kum engzah nge an inkawp tawh ang ni, vawi 50 chuang an inṭhen tawhin ka ring.
"Inneih puiah pawh ka sawm reng alawm, a hna a chhuanlam a, innei ila chu hna thawh pawh a ngai dawn hleinem, hrehawm deuha khilaia awm a duh zawk aniang chu," a tih leh chuan, "I sawm tawh maw?" Sangpuia nen kan lo ti rual zawt.
"Sawm zing, a nu boral hnu khan ka sawm a, nikuma a lo haw pawh khan ka sawm leh, kuminah hian vawi thum ka sawm tawh ang," a tih laichuan a beidawn hmel khawp a, tu nge thiam lo zawk pawh hriatthiam a har a ni.
"Veroi hi chu strong independent women a nia, a pa a hrisel si lo a, a naute zirna a tumsak a ngai bawk a, pasal neih chu a la duh chiah lo ang, anni ang hi chu dawhtheih deuh an ngai alawm," Sangpuia'n a ti chu a lo pawmpui ve vak lo.
"Ka nuin kan inneih chuan sumdawnna bul min ṭan sak a tum a, ka hrilh vek maw le, a duh tlat lo a, a chhungte pawh enkawlpui ka inhuam tih pawh ka hrilh zing, a pa pawn min hnial ka ring lo, amah ber hian min neih a duh lo anih hi," tiin a phun ve hlak hlak a, a thinrim viau aniang nidangah hetiangin a ṭawng tam ngai lo.
"Hetah rawn transfer tawh sela in zia deuh ang maw le, kar hlaa awm ve chi pawh in ni lo," ka tih leh pawh chuan, "A awmna khi nuam a ti lutuk," a lo ti leh zauh a, Veroi hi thingtlang khaw lian deuhah zirtirtu a ni a, a awmna khua chu nuam a ti ve viauin ka hria, ṭhian leh hmelhriat a ngah tawh a, a lung a leng vak tawh lo aniang a lo haw khat khawp mai.
"Kan han zin rup dawn em ni?" Sangpuia'n a tih chuan, "Mi pawh a be duh hleinem," a lo ti leh tlawng a, thawk ka lo la hak.
"I piancham pawh a rawn wish che," ka ti chu min rawn melh rulh a, "Kar khat hnua min biak ve chhun anih kha, 'Happy birthday' tih zawng," dar a kan uk a. "Vawi engzat nge ka call a lak duh loh ka hre seng lo," a tih zawm leh zat a, han thlem lungawi mai theih chi niin a lang lo.
Sangpuia'n an inhauh chhan a zawh chuan, "An chaw eikhawm a haw tlai aniang, message-in haw tawh angin a rawn insawi a, video call a la duh chuang si lo a, 'Dawt min hrilh,' ka ti kha a thinrim a nih kha, keimah zawkin ngaihdam te ka dil lehnghal a, ka lungawi bik vak lo," a ti ve luam a, an inhmu lo rei tawh bawk nen hriatthiamna chen chu ka nei a, an mahni hi inhrethiam dun sela an buaina hi chu fel mai thei tur chi a ni.
"Text ringawt loin call-in inbiak tum teh u," tiin thu ka rawn a, "Biak chu ka tum leh ang," a tih vangin kan sawi zui ta lo. Mi dangin haw an rawn rawt a, kan haw tur chu Zohera nuin balhla min hawntir ṭheuh a, tuirial ramah huan an nei a, a balhla pawh vai balhla kual lian pui pui chi a ni.
Muansangpuia'n thingpui rawn in kawi leh a tum vangin ṭhiante chu kan mangṭha a, a tlan chhuak hmasa berah kan ṭang bawk. Haw kawngah pawh chuan kan ṭhiante pahnih chungchang chu kan la sawi zawm a, "An vanneih bik tehlul nen, hetianga awm lo hian innei mai sela ṭha tur," ka ti vang vang a, ka sawi chhan a hrechiang bawka engtin mah min chhang let lo.
Muansangpuia nen hian kum 6 zet chu kan inzui ve tawh a, ka chhungte pawn min duhpui viau a, ani pawn ka chhungte a ngainaa, kan buaina ber erawh a chhungte lam an ni. Zohera te ang thoin an hausa a, Zohera chhungte lakah erawh Sangpuia chhungte hi chu danglam tak an ni. A nu hian min ngaina thei lo a, min haw zawk hialin ka hria, kan inhmuh fuh ṭuma ka biak pawh hian min melh ṭha duh mang meuh lo. Anni anga kan hausak ve loh vang nge, chhan dang vang zawk ni, ka theih tawk hi chuan pawh ka tum ve ṭhin a, hmasawnna a awm mawh khawp mai.
"I chhungte hian i nupui neih hunah indantir an phal che angem?" tia ka zawh chuan, "Ka hre lo le, ka nau saw laktlak deuh sela chu indang tur ka nia," a ti a, a rem dawn lo tih a chiang angreng viau a ni, a chhan chu a nau Zothana saw drugs addict a ni a, damdawiinah an lut zing angreng a, Muansangpuia hi chhungkaw innghahna a ni reng tawh zawk. A chhungkaw sumdawnna, an dawr leh pawisa lut chhuak zawng zawng hi a nu nen an ti dun ṭhin a, naupangte a nih lai aṭanga pa nei tawh lo an nih vangin a nu saw an chhungkuaah a lal em em bawk a, Sangpuia pawh hian a zah viau mai, a nu thu a hnial awmchhun chu kei min ngaizawng hi a nih ka ring.
"Keini hi engtikah nge kan inneih ve ang le?" ka ngaihtuah thui ngam loh chu ka zawt a, ani chuan, "A rei tawh lo ang, lo nghak hram hram rawh aw, hma ka la ve mek ania," zangkhai deuh hian a ti a, minti beidawng zawng hian engmah a sawi duh ngai lo.
"I nuin ka chungchang sawi a nei ngai em?" tia ka zawh pawh chuan, "A hriat tur ang chu ka hrilh vek alawm," tiin min chhang mai a, eng thil nge a hrilh chu ka lo zawt leh.
"I ni dawrah i thawh thute, chhim lam khaw chhuak in nih thute, ka hrilh ve nual mai.." a ti sam leh et a, "Ka pain zu ngawl a vei tih i hrilh em?" ka tih chuan, "Teuh nang, i pate chu a rui nawi ngai hleinem, buaina siam chi pawh a ni lo a," a lo ti leh vat a. Mahse, a nu chuan a hre dawn tih ka chiang, kan venga ka hmelhriat pakhat hnenah ka chanchin leh kan chhungkaw chanchin a lo zawt chiam tawh a, min hre chiang tawh hlein ka ring a ni.
"Hria sela chuan kum 60 hnaih tawh putar zuin chu a hrethiam lo viau ang," ka tih chuan min chhang ṭha duh tawh lo, "A ho em mai, kan inneih te chuan kan inah i lo lawi dawn a, i pa zuin leh in lohin kawngro a su hleinem, tiang lam chu sawi tawh lo ang," a lo ti zung zung a, ka ngawi ta reng naa ka ngaihtuah zui ngut ngut thung.
Kan kawt kan thlen chuan step bulah ka pa a lo ding vung mai. Min hmu chu a rawn nui vur vur a, zirtawpni tlai anih vangin a mood pawh a dik leh hmel viau tawh. Sangpuia chu, "Zial min lei teh, Jejei nuin pawisa nawi a nei tlat lo," a lo ti leh hmanhmawh a, pawisa dil a ching hi ka duh lo takzet.
"Ka pa ṭhin hi chu..!" ka lo tih laiin Sangpuia'n a wallet a phawrh sawk sawk a, cheng 500 note pek mai a tum chu, "A tam lutuk, 50 pe rawh, zial leina a tawk..." ka lo ti hlut a; mahse, ka pa chuan a lo ban hman tawh.
"Thil dang leinan hmang suh aw pa, thingpui ka lum dawn a, lo let leh nghal bawk la aw.." ka pa lam hawia ka tih chuan min en lem loin pawisa chu a thlep mial mial a, a jacket-a a ah fel hnu chuan, "Zami dawrah rei lote zial zuk pahin ka va kal ange, a la hma alawm hei," a ti a, Sangpuia dar a rawn beng pah zauh, a lawmthu sawi vena aniang chu. Nuisang chungin kan piaha dawr lam a pan zui a, a kal pai deuh khet khet bawk nen koh let leh tak ka nap a, pate em han zahpui hi chu ka duh ngai lo; mahse, minti zak zing viau a ni.
"A hrehawm thei e..." ka ti zawi sep a, "A ruih viau loh kha, ngaihtuah duh suh.." Sangpuia'n a lo tih chuan ka melh vang vang.
"Pawisa hi a dil ziah che a, pe tawh lo tawp mai rawh, ka nui pawhin zu leinan a hman a hlauh vangin ania a pek duh loh," ka tih chuan tawi tein min nuih a, "I pa hnial thei ka ni hleinem, a fanu hi ka la dil duh dawn asin," awki thuk raih hian a ti a, ka zak nge, ka lungchhia pawh ka hrethiam chiah lo.
"Ti rawh, chhuk ang.." tia kal mai ka tum chu ka banah a rawn vuan a, "Ka lakah inthlahrun a ngai lo ania aw, i chhungte chu ka chhungte ve tho an nia, hrehawm ti duh reng reng suh," thutak deuh hian a ti a, chhang loin ka nui ringawt. Kawngka bul kan thlen hnuah kan inthlah chauh a, in chhung kan luh chuan ka nu leh Bawiha'n sweet corn kheh pahin tv-ah inkhel an lo en dun a, Sangpuia pawn a va ṭhutchilh rang khawp mai.
"In va rei angreng ve, chaw te in va eipuar thei maw?" tih angrengin ka nuin a lo be luam a, "I pa in lo tawk em?" a tih pawh chuan ṭha deuhin Sangpuia'n a chhang a, ani lakah hi chuan chhungkaw thuruk engmah hi a awm tawh lo, ka pa zuin te hi a zilh ve fo a, a ruih laia pawn chhuak lo tur leh ina awm turin a hrilh ve melh melh ṭhin a, ka nu pawh hian a lungawi loh thu hi a lo thlen ve mawlh mawlh ṭhin.
"Sweet corn kang teh," min tih vangin ka kan sak leh rih a, ka inthlak chhungin Sangpuia ka vil tir a, football chungchang sawi pahin a va chawk leh rawk rawk ṭhin a, an in lama a tih ngai loh tur hi a lo len chang hian a ti ve fo mai. A changin ar te kan talh tir a, sa ngaina miah lo hian sa bai te hi a thiam reuh a, ka nuin chemte a tah tir ziah bawk a, thingpui sen lum phei chu thiam tawh tak a ni.
"A hmin tawh em lo tem chhin teh," a rawn tih vang chuan ka va kal hnai a, thingpui pawh a lo thli diam tawh. Sweet corn ka suah chhungin a lo va chhawp leh diam a, ka va inchawi phei pawh chu ka lukham nghen turte min lo siamrem sak a, ka ṭhutfel rualin ka fiantur min lo pe leh zat bawk a, a bu ang thlap tih hi a inhmeh hliah hliah ṭhin.
Kan inkhel en chu a hmuhnawm reuh khawp a, kawr var ha lam ka ṭan laiin midang zawngin kawr sen ha lam an ṭan a, kan in au chhawk sek a, a khat tawkin kan nui ho leh dar dar ṭhin. Ka pa lo haw hnua sana ka han en chuan dar 10 a lo ri dawn thuak tawh. Sangpuia'n, "Zingah thawh hma ka ngai dawn si a, ka va haw phei ange," a tih vangin kawt zawl thlengin ka han thlah a, "Mu tui em em ang che aw.." tih paha ka biang a rawn piai chu, "Min ru mai ta che," ka lo tifiamthu a, a nuih a za khawp mai.
In chhung ka zuk lut leh chuan ka pa uak ṭhat ṭhat thawm ka hria a, a zawh bak a in anih hmel. Ka nuin a va ngaihven a, bathroom lama an invin hlak hlak thawm chu ka ngaithla rei peih lo, pindanah ka luhsan thuai a, khuma ka phone dah ka en chuan Veroi message a lo awm vang tawh.
"Min lo call-a, ngaihdam min dil pahin min rawn zilh leh kher ania," tih a ni.
"I ngaidam dawn nge thu i awih mai dawn?" ka tih chuan, "Ka ngaidam a, thu awih a ngai bawk dawn anih hi hei.." tih hi a rawn thawn let a, ka nuih a za angreng, Zoherliana kha a ni miau a, a pehhel rei thei teuh lo.
"I muhil daih tawh ang chu ka tia?" tih chu rei vak loah a rawn chhang a, "Darkar khat zet min rawn bia a, ka harh leh vek alawm, heti hi chuan ka muhil leh thei tawh mai lo ang," tih hi a lo thawn a, "Lo haw i tum hnai em?" tia ka zawhna chu chhang loin a rawn call a, ka mutfel zet hnuah ka chhang a, pawnah a awm nge ni mi ṭawng nawk nawk thawm ka hria.
"Eng nge i tih a?" ka tih chuan bathlara a ṭhut thu a rawn sawi a, "Hrilh tur che ka ngah mai," a rawn ti zui zat a, kan inbiak hi chuan sawi tur kan ngah dun em em reng, darkar khat chuang kan inbiak ṭum hi a tam khawp mai.
"Han sawi la.." ka ti hman ṭawk, a ṭawng deuh zung zung mai.
"Zohera hian inneih a duh tawh a, pasal nei thei pawh ka la ni lo, ka rilru hi a tibuai lutuk, ka ṭhen mai dawn em mawni ka ti ut ut a; mahse, ka thei tak tak bawk si lo, ka ti khawtlai reng dawnin ka hria a, ka khawngaih tho bawk si, engtin nge ka tih ang, thu min rawn tawp mai teh, i ṭhian ve ve kan nia, keima lam chauh ngaihtuah loin ani lam pawh ngaihtuah tel la, thutlukna tur ṭha deuh min han kawhhmuh teh?" a ti mauh mai a, ngaihdan pawh ka nei thiam lo.
"Pasal nei loa len tar i duh em ni?" ka tih chuan, "Duh bik lo e; mahse, tunah tut tut chuan ka la nei thei lo alawm, hlawh ka nei ve ṭan chauh a, chhungkaw eibel ka nih ve hi, ka pa pension hlawh lah kha lama an ei in leh in luahman daih awrh ania, ka naute zirna ka tumsak ve bawk si a.." a sawi lai chu lo pawt chatin, "In inneih hnuah a awlsam zawk lo ang maw?" ka lo ti zauh a, Zohera leh a chhungte kha an inhuam viauin ka hria.
"Chutiang ngawt a ni lo, mi in aṭang chuan thil tih a har tawh, ka chhungte pawn an duh bik nang.." a ti ve tlat a, a dik ve tho mai; mahse, Zohera ka ngaihtuah tel lo thei lo.
"Ka khawngaih reuh e, a nghak rei ve tawh che sia.." ka tih chuan, "Chu tak chu alawm ka rilru tibuaitu, ṭhen ka tum uk a; mahse, lo ṭhen ta ila ka inchhir dawn lutukin ka hria, midang te nei ta se, ka rilru a na dawn lutuka, ka ngam tak tak lo, innei tur kan nih chuan inneih a hun tawh a, anih loh chuan inṭhen a hun tawh bawk a.." a ti duah a, a ṭawng rang angreng khawp a, a awmdan tur pawh ka mitthla thiam, min be chungin a ke a per leh et et tawh ang chu.
"Thu rawn vak dan tur che pawh ka thiam lo, i duhthlan tur ania, i inchhir loh dan tur kha a ṭha ber ang, Zohera lam aṭanga ka thlir chuan i ngeiawm ngawtin ka ring, mipa dang vang emaw, chhungten an phal loh vang leh inhauh buai vang pawh ni lo, pasal neih duh loh vang ngawta inṭhen chu a tlawmthlak bawk ang," ka ti sap sap a, a inthiam lo leh deuh aniang, "Ka sual ka inti e..." a rawn ti tlawk tlawk.
"An chhungkuaa mipa awmchhun ania, a nu leh pa lahin mo an awt em em tawh a, va lawi pawh ni la i hreawm dawn loh tehlul nen, nang ni ila chu ka aw daih tawh ang maw le.." fiamthu angrenga ka tih chuan a rawn nui hak hak.
"Kan dinhmun hi inpersan deuh siin a khirh dun ti raw..?" a rawn ti ve bauh a, a dik hlein ka hria.
"Kan dinhmun hi inthleng ta ila chuan thutlukna kan siam awlsam dun ngawt ang.." kan nui dun kar kar a, "Engtin nge ni zel a?" a rawn tih chuan sawi belh tur vak pawh ka hre lo.
"Hmanniah dawrah a ni leh a nu an lo kal a, min hre ngai lo awm hmiah hmiah, ka tan lo biak vak kha a nuam bik lo a, thingpui te pawh ka khilai ve bawk a; mahse, a man an pe tho, chutiang vel nuai chu kan la ni..."
"Kei aichuan i dinhmun hi buaithlak daih zawk anih hi, kei chu Zohera nu hian min be ṭha lutuk a, min thlem reng zawk a, ka pa pawh hian min duhpui lutuk; mahse, ka naute hian an duh ang an zir theih loh phah dawn aichuan pasal neih loh pawh pawi ka ti lo, damchhung hian Zohera hi ka ngaizawng mai dawn nge mawni.." a thilsawi chu amah zawkin a nuihzat a, "A va atthlak tak ti raw?" tiin a rawn nui kar kar a, a atthlak takzet.
"Zohera rilru hi tina lutuk suh aw, i rilru siam fel thuai la, inchhir miah lo tum ang che, i inchhir anih chuan keipawh ka rilru a na ngawt ang.." ka ti leh sap sap a, hei bak chu thu han rawn tur ṭha ka hre bik lo. Lehlamah Zohera, ka ṭhianṭha tak tho a ni a, Veroi lah ka bestfriend a ni bawk a, an kara din hi harsa ka ti ṭhin a ni.
"Ngun deuhin ka'n inngaihtuah ange, laklawha awm hi a hrehawm em mai; mahse, Jenus. Eng thutlukna pawh siam ila ka lam ṭang reng rawh aw, nang chuan min thlawp zel ang che..." a ti a, a thutak angreng khawp mai. "Ka thlawp zel ang che," nghet charhin ka ti let ve a, "Ka hmangaih che Mamte.." a rawn tih chuan, "Kei deuhin le Mamte.." ka ti let var a, phone kan dah zui ta bawk.
Muansangpuia message a lo awm a, in a thlen thu leh a mut chiah thu vel a ni. Ka chhang zuai a, ka ṭawngṭai leh te te hnuah ka mu ṭha zui a, phone ka en chuan a rawn chhang let tawh lo, a muhil leh der tawh anih hmel. Zanah hian a han meng rei thei lo khawp a, zingkar aṭanga dawr an hawn ṭhin avangin zing lam hi chu kan inbe mang ngai lo a, biak dawn pawhin chawhnu lama biak hi a fuh ṭhin.
Dar 9 vela dawr ka va thlen chuan ka ni a lo ṭhu vung tawh. "I va tlai thei ve, hetah chaw ei ve mai ṭhin rawh ka tih che kha," a lo ti nghal hluk hluk a, chhang lem loin choka lam ka pan san a. T-shirt te hi min han neihtir kher a, a eng ngat lehnghal, a mawi loh chu thuhran; a puan a chhahin nghawng thleh ngai a la ni zui a, choka lum uap churh nen chuan inrem lo tak a ni.
Sauce bottle ka va tikhat zung zung a, chumi hnuah an chow kan tur ka va chhumsak leh a, choka hna hi chu a zo thei meuh lo, kut awla awm bik hi a nuam lo a, ka ni dawr mah nise a che hah ber ka nih chang a tam a, ka thawhpui te hi chuan mi an fak viau a, an thatchhe em em thung.
Chawhnu lamah Zohera a rawn lang hlawl mai, percel a rawn pawm luk a, a rawn khi lut vur vur. "Tehhlawl che chuan, i mood a va ṭhat hmel ve.." ka lo ti ve hlut a, "Vawiin chu ka hmel te hi a ṭha sawt lo maw.." a lo ti reuh a, zahpuiawm hian...
"Eng nge kha kha..?" tih paha a percel ka va bih chuan eitur hlir a lo awm. "Apple kha la ve rawh," a tia. "A dang hi i phal nange?" ka tih chuan lu min thin khum pek a, runluih nan chips bawm khat chu ka la tel hram a, min chhuh let bik lo.
"I thawn dawn em ni?"
"Mamawh a ngah mai, a rawn list dul alawm," tih leh a phone rawn lek a rual a, Lalveroi chuan bialpa a nei leh pek e, nizana a rilru a hah tehlul nen.
Choka lam ka va hawi chu an rawn dak huang, Zohera chu ka melh vut a, "Nulaho sawn an en duh lutuk che ania saw.." ka ti zui a, a va hawi ve zawk a, a lai aniang menu a bih rang khawp mai.
"Lassi ka duh, beef roll nen.." tih pah chuan min nam phei rawk rawk a, chokaa ka va lut lah chu tunge a nih min lo zawt sap sap a.
"I bialpa em ni?" an tia, a nih loh thu ka sawi zawh rualin a hming min han zawt zui a, lerh ve hiang huang hlawm tak an ni.
Eitur pe a ka kal leh tur pawh chu, "Min lo biak keuh rawh.." tiin an nui ham ham a, ka phawk chhuahin Zohera bul ka thlen hma hma chuan, "Zoa, chokaa awm ho sawn min lo biak rawh an ti, pum thum cheng sawm man lek lek an nia, duh duh thlan theih.." ka va ti lawng lawng a, ka ṭhiana chu a rawn hawi â lutuk. Mahse, kan nulaho chuan zah hre hek lo, "Duhthlan tur kan tam mai," tiin an la rawn fiam ham ham a, Zohera chu a lai leh ngawt ang ka tih laiin kan nulaho lam chu a melh vung vung a, a ban a vai zauh, an lo ehhh dual a, ka ṭhiana pawh chu a kiai ve suk suk mai.
An la rawn dak huang reng reng bawk nen ka ngei ve deuh chuan, "In la duh belh elo, flying kiss em ni in beisei..in duh leh thlate rawn lakpui ula.." ka ti zuah zuah a, ka dinna bula ṭhu chuan min lo pawt zauh. Nulaho lah chuan, "Flying kiss a ni mai.." an rawn ti leh pek a, "Zoa duhthawh tawkin han thlawh phei tir teh.." tih paha ka zuk melh chu min lo melh rum hle tawh. Chutah, nulaho lam hawi chuan, "A uang ve a nih kha, ka ṭhiannu hi hetiang hian a mawl tih ka hre miah lo," a'n han ti pek a, a nui duh tawh eih lo.
"Nulain an chhaih che chuan chhaih let hrep mai tur alawm," tih pahin a epah chuan ka ṭhu rem zui a, "Min chhaiha ka chhaih let ve zel chuan min ngaizawng mai anga asin, ka ngaizawng ve dawn der si lo," a ti nuah nuah a, "Lalrinawma ni teh.." ka tifiamthu leh chu a nui ve suk a, a beef roll chu a ei mial mial bawk.
"In ṭha leh tawh maw, ṭha thei tawh lo tur ang mai hian in awm a, in han ṭha chiang leh thei em em khawp a, ṭawngkam te hi kan lo thlahdah palh ang tih a hlauhawm ṭhin,"
"Nangte chuan Veroi i ṭan ziah alawm, keiin ka ṭan em em che a," a ti nuah nuah a, ka hrethiam zan lo.
"Khawiah nge min lo ṭan a?"
"I phu lohin ka fak ar ek ṭhin che maw le, Muansangpuia nu saw mi dazât deuh chu nise ka hrilh piangthar daih tawh ang," a ti leh reuh a, ka nuih a za vak lo khawp mai.
"Nangni chu in ṭha leh thei mai zel a, keini ve hi chu kan hmakhua hi a thim mup bik a, kan innei ve thei pawhin ka ring lo," beidawng zeta ka tih chuan, "Inru mai rawh u," a lo tisam et a.
"Min sawm sela chu ka hnial teuh lo, min sawm hleinem.." ka tih ri chu zawi sep sawp tak a ni.
"A nu thih hun nghak mai rawh u,"
"Zoherlian..!"
"Rai mai rawh.."
"Hmelphak..!"
"Makpa chhungkhung mai rawh.."
"Awi..i thurawn hi laktlak pakhatté mah a awm lo," a nui kur kur a, "Mahse, nangni tal in ṭha a, ka lawm tho mai," ka tih chuan mit min siai zauh. "Ka ngaihtuah vak peih lo che u, in tlaw dun em mai," a ti leh kher chu ka helh khawp mai a, anni vanga kan buai dun ṭhin tehlul nen.
A thil ei zo chu kal lehnghal mai a tum a, "Pawn thleng ka rawn thlah ang che, plate hi ka va dah lawk," ka ti ve tak naa, "A ho mai mai, lo chhuak duh suh," a tia, a percel pawm chungin a kal nghal nal nal.
Phone ka en leh chuan Sangpuia message a lo awm a, "Vawiin chu ka nuamsam lo riau a, ka haw der tawh, ka nawm deuh chuan tlaiah ka rawn lam dawn che nia," tih hi a lo thawn a. A eng nge na ka zawh chuan, "Ka khua a sik a, nachawkna ka ei a, tunah chuan ka zia leh tawh, ka thaw hi a la hah deuh a," a rawn ti a, inentir tura ka lo tih chuan a tuk lama a nu nen an inentir tur thu a sawi a, ka buai deuh bawk nen kan inbe rei lem lo.
Tlai ban dawna ka va call chuan a lo la mu a, "Ka khua a sik leh tawh," a rawn ti zawi ṭiak a, ka ngaihtuah angreng khawp mai.
"Lo kal duh lo mai rawh," ka tih chuan, "Zanah ka lo leng mai dawn nia," a la ti ve fan a, "I nawm loh chuan mu mai mai zawk la, naktuk lamah pawh i lo leng thei alawm," ka ti a, "Ka zia leh mai ang," a tih ve tlat avangin ka hnial lui duh lem lo.
Dar 5 pelhah in ka va thleng a, ka pa'n eirawng a lo la bawl surh surh a, a ruih loh hi chuan inah hian a ṭangkai ṭhin khawp mai, kan eirawng bawltu ber a ni a, ka nu arsa zawrh tur te hi zan lamah a puah lawk vek a, insuk leh archaw pek, chhuat nawh thleng hian a ti hreh lo a, mipa ṭhenkhat anga zu rui buaina siam chi a ni lo bawk nen, ka pa hi chu huat har tak a ni.
Zanriah ei laichuan ka phone a lo ri a, Sangpuia a ni. Ka lak rual chuan, "Ka lo kal dawn, rei lote tal ka lo hmu lawk ang che," a rawn ti a, a aw aṭang chuan a la nuamsam vak lo niin ka hria.
"I zia deuh tawh em ni?" ka tih chuan, "Aw, chaw ka eikham chiah a, rei deuh ka leng lo ang, rawn hmuh zuai che a ni mai," a ti leh a, "Lo phei rawh, chaw kan la eimek hei.." tia ka hrilh hnuah phone kan dah zui a, dawhkan ka va kil fel leh deuh chauh tihah ka phone bawk chu a rawn ri leh.
Ka va en chuan number hlang tawp hi a ni a, ka chhang chiah chu, "Muansangpui kha a lo kal em ni?" a rawn ti nghal hluk a, Sangpuia nu niin ka hria.
"La kal lo, lo kal a tum chuan ka hria.." ṭi deuh taka ka tih laiin, "Dam pawh a dam ṭhat loh kha, rawn tir haw leh vat ang che, awm ang lo lutuk," a ti hmarh a, ka chhan ve leh hmain a dah daih.
Ka rilru chu a nuam lo ru khawp a, ka chawei pawh a tui ta vak lo. Chaw ka eikham veleh dawr kal pahin kawngpuiah Sangpuia chu ka lo han nghak a, ka nghak rei lo khawp mai. A lo thlen chuan, "Ti rawh, dawrah va kal lawk ang," tiin nu Zami dawr lam ka pan pui a, eng nge a an te ka zawt luam a, a nuin min lo biak thu erawh ka sawi lem lo.
"Ka zia viau tawh, thingpui min lum rawh aw, chaw pawh ka la ei ve lo a," a ti a, "I hritlang em ni?" ka tih chuan hritlang awmin a inhre bawk si lo.
"I thawk hah lutuk aniang a?" ka tih pawh chuan, "Hah hran lo, tunlai phei chu kan awl rih lutuk, kei phei chu ka ṭhu deuh chawrh chawrh zawk a, chawhnu lama ba khawn kual bak ka ti ve vak lo," a ti ve tlat a.
Thingpuife leh ka pa kuhva ei tur ka lei a, chaw a la ei loh vang chuan thingpui hmeh tur te pawh ka leisak a, "Inah chaw bar ta che, ka pa'n tui i tih dan deuh khan alu a bai asin," kan let leh lama ka tih chuan, "Ka ṭam vak lo, ṭam hnemah thingpui ka in anga a tawk mai ang," a ti sam mai a, ka hnial zui bik lo.
In kan thlen veleh thingpui chu ka lum sak a, thleng ka sil laite chuan ka nu leh pa ar puahna bulah a ṭhu ve reng a, eng eng emaw sawiin an titi bawrh bawrh mai. Ka thleng sil zawh chuan sitting room lamah kan ṭhu phei a, thingpui pawh chu a zahve chauh a in a, chhang phei chu a ei mang lo.
"Naktukah chuan i nuin maw kalpui dawn che?"
"Aniang, zingkarah a tiin ka hria, ka tho peih lo khawp mai," a ti nuah nuah a.
"Mut hma deuh i ngai anih chu," ka tih chuan, "Nia, ka leng rei lo ang," tih pahin ka kut a rawn ban a, a kut pawh chu a lum deuh vurin ka hria, a pang ka han dehsak a, a lo sa ang reng a, "Hetiang chungte chuan lo kal loh mai tur alawm, i damlo zual mai tur asin," ka ti leh hlut a.
"Ka ngai che alawm, ka thlah leh bawk si lo che a, i lo thinrim te ka hlau ve a," a tih chuan ka nuih a za angreng, "Ka thinrim khum ngai che em mawni?" ka tih chuan a nui ve hak a, kan inzui rei tawh tehlul nen inhauh hi kan nei khat khawp a, han inhnial bap bap chang hi chu awm ve ṭhin mah se, thinrim khawpin kan inhnial ngai lo a, kan pahnih inkar ngawr ngawr hi chu ṭha ve tak a ni ṭhin.
Darkar chanve vel a len hnu chuan a nuam lo zual ta deuh aniang, "Mut mai ka duh tawh, ka va haw phei ange," a ti a, a mit te chu a sen deuh ram tawh mai. Kawngpuiah ka han zui chho a, a tlan chhuah hma chuan, "Naktuk chu ka rawn hruai tak tak tawh ang che, chaw ka lo ei nghal maithei," a ti leh bawk a, "Chanchin min lo hrilh dawn nia," tiin ka thlah ve bawk.
Zingkarah Veroi nen kan inbia a, "Ka ṭhen thei hlawl lo, aman min ṭhen anih loh chuan ka ṭhen bik lo ang, inneih chungchanga ka rilru chu a la ngai reng," tih angreng a rawn sawi a, an inṭhen loh chuan a ṭha maiin ka hria, han inkawp reng phawt sela, an awm zel dan tur chu hunin a la hril chho ve te pawh a ni ang chu.
Nidang aiin dawr ka thleng hma a, Sangpuia chu a la reh veng veng mai. Chhun reh laia ka va call chuan dawra an la let loh thute, test neuh neuh tih ngai an la neih thu te a rawn sawi a, tlaia min lam pawh chu a la tum ve khawp a, hmanhmawh lo turin ka lo ti ve thung.
Mahse, tlai kan ban dawn chuan a khawsik thu bawk chu a rawn sawi leh a, "Lo kal duh lo mai rawh," ka ti ta ngawt a, "Min hrethiam mai rawh aw, kan chhuak rei lutuka, ka chau deuh a, zanin chu ka'n mu hma mai ange," tih hi a rawn thawn a, in ka thlen hnua ka va call chuan a chhang thei lo, a muhil a nih ka ring.
Zan thleng chuan a reh zui a, ka ngaihtuah reuh khawp mai. A harh hunah a hmuhah tiin message ka hnutchhiah nual a, dar 10 bawrah ka mutsan ta bawk a. Chutia ka muhil zui mai chu ka phone riin min rawn ṭham harh leh hlawl. Ka chhungte kaih harh hlauin phone chu ka ban vat a, ka en chuan Zohera a lo ni a, dar 1 rik dawn tawha ani'n min lo call chu mak pawh ka ti viau a ni.
"I va lo call tlai ve?" tia ka han chhang chu, "Sangpuia a damlo tih i hre nange?" a rawn ti teh nawlh a, "Hria e, vawiinah an inentir alawm.." ka tih chuan, "Damdawiinah kan lut fel chiah," a rawn ti ta mai a, ka mu chu ka ṭhu chhuak rang khawp mai.
"Engtin nge a awm?"
"A khawsik a reh thei lo a, a nuin min lo call alawm, a thaw a hah bawk a..casualty-ah kan kalpui a, hei an lo admit nghal ringawt.."
"Awi aw...chutiang em em turah ka lo ngai lo asin," tih pah chuan ka tho sawk sawk a, sitting room lam pan pahin a la awm em tih ka zawt a, "Ka haw ṭep, oxygen an pe a, a muhil rihin ka hria," a rawn ti leh a.
"Engtin nge niang, a tlai tawh bawk sia?" Zohera chuan 'Ka lo hruai ang che,' a tih ka beisei tehlul nen, "Ngaihtuah suh, a nuin a awmpui a, a ṭha veleh mai ang," a ti hlauh thung a, zan a rei tawh bawk nen tih ngaihna a vang angreng khawp mai.
"Engvang nge mawni dawn le?" tia ka zawh chuan, "A thin a lian a ang ka ti, vawiin lamah test neuh neuh an nei a, thawhṭan lamah result a hriat chauh ang, duh leh naktukah kan va kaldun dawn nia," a ti a, a tuk chawlhni a ni hlauh chu ka lawm ru khawp mai. Zohera chu inkhawm bana min lo hruai turin ka ti a, mahniin ka va lang ngam lo hrim hrim a, min kalpui theih chuan a tihzia viau ang.
Ka muhil thei ta mai lo, Sangpuia nena kan inbiakna ka en kuala, ka message te lah chu a la hawng miah lo mai a, a phone a khawih leh tawh lo hrim hrim anih hmel. Ka ṭawngṭai mawlh mawlh a, chuti chung chuan ngaih a ṭha thei lo reng reng a, damdawiin lut khawpa a damloh ka hre ngai lo a, keimah zawk hi hrisel lo leh neuh neuh ngah zawk ka ni ṭhin a, ka damloh changa min duat ṭhin dan te pawh ka ngaihtuah chhuak uar uar a, mahni pawha ka kan ngam lo chu hreawm ka ti.
Khawvar dawn hnaih lamah ka chhing ve sek a, dar 7 dawna ka nuin min lo kaih thawh chuan ka phone ka ban rang khawp mai. Message emaw call engmah ka dawng lo, Zohera ka call a, a lo la muhil aniang, phone a rawn chhang chu, "A la hma lutuk, nakinah ka lo bia ang che," tiin a dah leh nghal daih a, kan class ho group-ah Sangpuia damloh thu post engmah a awm si lo a, a ṭhianṭha ber Zohera bak chu zawh tur dang an awm chuang lo.
Engmah chanchin dang hre zui lo chuan chawhma ka va inkhawm ve a, phone ka ngaichang deuh reng. Kan inkhawm bang in kan thlenfel hnu deuh lawkah Zohera chuan a rawn call a, "Lo insiam rawh, kawngpuiah min lo nghak dawn nia," a ti a, a la inbual dawn chauh thu a sawi bawk avangin thingpuite ka lum leh rih a.
Ka chhungte pawh chu chanchin ka hrilh a, ka nu leh pa chuan an ngaihtuah ve khawp a, "Hmanzan pawh khan a nawm loh hmel riau alawm, a mit te kha a eng deuh a," tiin ka nu chuan a sawi a, lo chik ve nachang ka hre hauh lo. Thingpui ka in zawh chuan ka insiam nghal mai a, Zohera chuan min rawn be leh har khawp mai. Message-in a hman tawh em ka va zawt a, chu pawh chu a en thei lawk lo.
Minute 20 vel hnuah min lo call ta hram a, "Kawtah ka awm tawh," a rawn ti chiah chu tlan chhuak rang tak ka ni. Kawngpui ka han thlen chuan, "Cabin-ah an insawn a, kan lut thei nghal angem aw..?" a lo ti nuah nuah a, "Kan nghak mai dawn alawm, haw hma i ngai lo a ni lawm ni?" ka tih chuan a bu ve mai bawk a, Veroi pawh a lo han hrilh tawh a ni awm e.
Kan va thlen laichuan an chhungte an awm nual a, duty ten chhuak ṭhen turah min tih vangin keini chu kan chhuak leh rih a, kan luh theih hun nghakin pawnah kan ṭhu rei khawp mai. "Ka va zawt chiang lawk ang," tiin Zohera chuan min luhsan a, rei tak pawh a va thang lo, a lo let leh chuan heti hian a sawi a, "A thin a lian a, a chuapah tui a tling bawk, a khawsik a na angreng a, a thawh a hah tel bawk a...biak theih pawh a ni rih lo.." zangkhai deuh hian a ti a, hlauhthawnna nei ve lo ang maia a ṭawng chu mak ka ti.
"I ngaih a va ṭhat hmel ve?" phawk lek leka ka tih chuan, "Ṭha bik lo.." a ti zawi sup a, "I sawi awlsam lutuka, i sawi na bawk si.." ka tih lah chuan, "I rilru a hah loh nan.." a ti leh mai a, ka rilru a hah telh telh.
"Tutu nge awm a?" tia ka zawh chuan Sangpuia nutei te leh a pa chhungte an awm thu a sawi a, an haw dawn tawh em ka zawh chuan a hre bik lo. "Lut lo chuan haw lo ang aw.." ka ti leh erawh a aw ve thlap a, a hmel ka hmuh ve phawt loh chuan ka awm a nuam thei dawn loin ka hria, a natna lah chu chi khat mai pawh a ni si lo a, hreawm a ti ngawt ang.
Dar 3 pelhah kan lut ve thei ta chauh a, kan va luh laichuan a lo muhil mek a, a nutei leh a nu chiah an lo awm tawh. A nu lah chuan, "Va kil hnai suh u, a thawh a hah hma ania.." tiin kal hnaih lo turin min lo ti a, Zohera'n min ṭhutpuina aṭang chuan a hmel pawh ka hmu thei lo.
"A khawsik a zing em?" tia Zohera'n a zawh chuan, "Zing lo a, a sik sang ṭhin lutuk a," a nutei zawk chuan a lo ti a, Sangpuia nu ka va melh chu ka hawisawn rang ngang mai, min lo en kur a, ka kal chu a lawm lo tih a hriat hle bawk. Zohera'n thil dang a zawh leh pawh chuan a nutei hlir chuan a chhang a, kei leh Sangpuia nu chu kan ngawi dun chawrh chawrh thung.
"Ahmain insawiselna a nei ṭhin em nu Rin?" tia Zohera'n Sangpuia nu a va zawh chuan, "Nei lo, nimin piah khan 'A hmain ka sa vak vak a, ka thawh a hah ṭhin,' a ti chauh a, na hi a hre har bik hrim hrim a, na a tih ve tawh hi chuan a na viau zel tawh, 'Ka sa,' a tih ve te pawh kha khawsik ser ser a nei aniang, dawra a ṭhute hi a thlan bawrh bawrh zel a, thil hi a sawi mai bawk si lo a, a tawpah a chhe ta rup anih hi," a lo ti hlak hlak a, ka ngainat bik loh vang nge ni a ṭawngdan chu mi hau te pawh a ang ka ti.
"I bulah engmah a sawi ngai lo em ni?" a ruka Zohera'n a rawn tih chuan, "A sawi pawh ka hre lo, chaw kan eikhawm tuk aṭang khan a nuam lo tih a sawi chauh a," zawitein ka ti a, Sangpuia nu lam ka va hawi leh chu min lo melh leh kur tawh.
Rei pawh kan ṭhut hma chuan an chhungte dang an lo thleng a, ṭhutna awl dang a awm loh vangin Zohera'n kal mai a rawt a. Din pahin khum lam chu ka va melh ṭawk ṭawk a, ani lah chu ka awm tih hre loin a mu siai siai a, ka ngai vawng vawng mai. Va kal hnaih a, a biang va dehsak te ka chak a, a kut em pawh vuan loa ka kalsan leh tur chuan rilru a ti na bawk.
Kan haw lam chu kan inbe lo reng reng, kan kawt kan thlen hnuah pawh, "Anih aw, chanchin kan inhrilh zel dawn nia," tih zawng sawiin ka kalsan a, ka chhungten chanchin min lo zawh pawh chuan, "A thin a lian a, a chuapah tui a tling bawk," tih leh bathroom lam pan ka rual a, ka ṭah chhuak lutuk chu ka insum thei lo, hmai phih pahin ka va ṭap ru tlawk tlawk a, ka thawl phah deuh chuan ka hria.
Zanah Veroi'n min lo bia a, min ṭawng thlamuan ve luam a, keia lungawi lo leh hlauthawng bawk si chu ka lo inhrithla ve mawlh mawlh, "Va lang miah lo ila a lawm zawk dawn em maw ni le, hetiang hunah te chuan kan rilru a hah tlang a, min hrethiam ve se ṭha mai tur a nia, midang an lo luh laite khan Zohera kha a rawn mitmei a, haw tura min duh lutuk te khan ka rilru a tina.." hnuk ulh ṭunin ka ti a.
Veroi chuan, "Engahmah ngai lo khan va kal lui zel rawh, Sangpuia'n a ngaih dawn tehreng che nen, hmu lo chea nikhat awm pawh hreawm a tih ṭhin kha, va kal lui ngar ngar rawh," tiin min lo fuih ve sauh sauh a, chutianga tih chu a ṭha maiin ka hria, a fapa saw ka bialpa a ni miau a, a nuin min ngaithei lo viau mahsela ka ngaihthah thei bik lo a ni.
Ka luhlul chuahin thawhṭan tukah chuan keimahin ka va kal a, a nu chuan min lo melh leh ram ram tawh. Mahse, Sangpuia a lo harh lai a ni hlauh a, ani lah chuan ka kal chu a lo lawm em em khawp a, a bula kal hnai turin min lo hui sawk sawk mai. A mutna bul chiah ṭhutthlengah chuan ṭhuin a kut ka vawn sak a, "Ka ṭha a nia aw, ka dam ṭep tawh," tia a han nui lui te chu ka lainat ngawih ngawih a ni.
"Dam leh vat rawh aw, hna kal hmain ka lo peng zuai a, tlai lamah ka lo kal leh ang, i phone khawiah nge..?" zawi tea ka tih chuan a nu ṭhutna lam a melh zauh a, "Khawnge a dah pawh ka hre lo, min pe duh lo reng reng," a ti zawi sup a, ka lungawi lohna chu ka thup ve taknain ka hmelah a lang tho aniang, "A pawi lo, ka khawih vak thei lo a," a lo ti leh a, a nu hi a haw ve ṭhin tih ka hria; mahse, ka bulah hian vawikhatmah a la sawi chhe ngai lo, hetiang anih vangte hian ka insum phah fo ṭhin.
Ṭawng chu harsa a tih deuh avangin ka be rei duh lo a, eng emaw chen chu ka ṭhutpui thung. Ka awmchhung zawngin a nu nen chuan kan inbe lo a, min biak a tum loh chuan biak luih ka tum bik lo, "Kal tawh rawh, i tlai ang.." Sangpuia'n a tih chuan dar 9 a lo pel fel reng tawh.
"Anih ka kalsan rih ang che aw, ban veleh ka lo kal leh dawn nia," a kut hmersak vang vang pahin ka ti a, a mitmei hmanga min chhang chu ka nuih var var bawk. Ka kalchhuah dawn chuan a nu chu ka va thlek zauh a, a phone a bih bawk nen biak ka tum zet nain ka chhuahsan ta zawk a, ka hrethiam loin ka lungawi lo zual telh telh a ni.
Nilengin rilruah thil dang a awm thei lo, midang kianga awm te chu hreawm ka ti a, min biak pawhin ka be peih hlawm lo. Ka ni lah chuan ka damlo em tih min lo zawt sek a, ka dam thu ka hrilh pawh chuan a ngaih a ṭha vak lo aniang, "I dik lo riau," a ti leh ṭhin a, haw hma ka dil erawh min lo phalsak hlauh mai.
Dar 4 rik dawnah damdawiin ka va thleng a; mahse, cabin kawngka bul ka thleng chu a hrilhhaithlak takzet. Kawngka chu chhung lamah an kalh tlat a, ka kik pawhin min chhangtu an awm lo, chutih laiin phun ser ser thawm hi ka hre lawi a, "Nu Rin?" ka tih rual deuh thaw chuan, "Tu nge i nih?" hmeichhe aw hian a rawn ti ve nghal a, nu Rini aw erawh a ni lo, a nutei zawk kha niin ka hria.
"Keimah, Jenusi..."
"Ee, doctor-in kan an phal rih lo a..." a tih chuan thawk ka la hak, an phun leh ser ser a, kawngkhar chu chum tumin kuttum ka lek uaih, nurse lo kal ka hmuh vangin ka la thla leh vat a, ka ding sawn thuai bawk.
Sangpuia cabin-a nurse a luh laichuan nu Rini aw chu chiang takin ka hria a, ka rilru chu a mang zo vek tawh, ka insehruh a, 'Ka rawn kal lo tawp ang, in hmuhsit hi ka tuar dawn tawh lo, i fapa khan a duh chu thlang teh se, tu emaw zawk zawkin kan la chang ang, ka chân anih loh chuan i chân a ngai a ni mai,' ka ti ru neuh neuh a, ka thungrul ve khawp ang tih chu ka rilrua a thawhdan a ni.
Ni thum zet chu a chanchin ka hre zui lo a, ka luhlulnain min nawr a, ka ngaihven lo lui a ni ber, chutih rualin ka ngaihtuahna zawng zawng a luah a, a tan ka ṭawngṭai awl lo. Kartawp lama Zohera'n a va kan ve chuan min lo call nachang a hre hlauh a, a nu chhuah lawk lai a lo ni bawk nen a zarah kan inbiak theih phah hlauh. A thawh a hah em avangin a ṭawng chu hriat a har a, Zohera'n a lo puih vangin kan inbe lui ve ngar ngar thung.
"I dam veleh inneih ka duh ania," ka ti tawl a, "Dam loh lai laia.." Zohera'n a lo tih ri chu ka hria. Sangpuia ṭawng chu ka hre thei mang loa, "Kan innei dawn nia a ti," Zohera bawkin a rawn ti leh a.
"Engtiang pawhin inneih ngei ngei ka duh, inruk pawh a pawi lo, kan ina i lo awm pawh a pawi lo, naupai pawh ka duh vek tawh.." lehlam chu a reh vung vung a, "Ka ṭawng in hre thei em?" ka tih leh laiin, "I â reuh mange.." Zohera'n a lo ti hmuk a, nu Rini a lo lut aniang, "Ka dah phawt ang aw, nakinah ka lo bia ang che," tiin Zohera chuan call a ti tawp a, atthlak chu ka ti ve takzet, hetiang lo sawina hun pawh a ni lo; mahse, ka rilrua ka pai a ni miau si a.
Inrinni chuan ban hma ka dil leh a, damdawiin kawtah rei deuh ka va ṭhu a, lut loin ka haw leh thung. Chawlhni tlaiah chutiang bawk chuan ka va kal leh a, chumi ṭum chuan Sangpuia nutei'n min lo hmu a, nu Rini pawh a hrilh ngei ka ring.
Ka haw leh lamah Zohera'n min lo call a, "Va kal i duh em, ka hman asin?" a rawn ti a, ka rilru no a rawn chhuak thut, dan sen loh hian ka mittui a rawn luang zung zung a, ṭap ṭuau chung chuan, "Ka kan an duh hleinem, a nu saw ka haw ngawih ngawih, hmaniah pawh ka kal a, kawngka min hawn sak duh lo a.." sawi pawh ka sawi zo thei lo, Zohera lah chuan, "Hahthlak ve," tih zawngin min chhang a.
Chaw pawh ei peih loin in ka thlen veleh ka mu nghal a, ka chau deuh aniang ka muhil hma khawp mai. Ka phone a lo rik chuan dar 7 chauh a la ri a, Zohera bawk a ni. "Insiam rawh, ka rawn lam ang che," tiin phone a dah lehnghal a, ka tho ve nghal sawk sawk a. Minute 15 vel hnuah Zohera chu a lo thleng a, a thil min hrilh chuan min deng dawt a ni ber. "Nichin lawk khan ICU-ah an dah lut, Veroi pawh naktukah a lo haw ang," a tih chuan sawi mai tur ka hre lo.
Kan tlan chhuah hnuah, "Zoa, a thi dawn em ni?" khur ru dar dar chungin ka ti a, "Aih, a thawk a hah vang aniang," a ti taknaa ka ring zo lo.
"A khawsik a sang thut an tia.." a tih leh pawh chuan, "Dawt sawi suh, a thi tawh em ni a...?" ṭap pur chungin ka ti a, "Ka hre chiang bik lo, chutiang lam engmah an rawn sawi lo," a ti leh tlawng a, min hnem lo takzet.
Damdawiin kan va thlen chuan mi an lo awm nual a, Sangpuia chhungte deuh hlir an ni, Zohera chuan chanchin a zawt hlawm a, "A thawhhah a zual thut a, a khawsik a sang bawk a," tiin kan thu hriat ngai tho an lo sawi a, rei vak loah Sangpuia nu leh a nutei an lo lang ve bawk. Midang nen chuan an inbe hlawm a, kei erawh min melh zauh bak chu min be lo. Zohera bulah ka ṭhu a, a thawh leh ka tho a, a zial zu tur pawh a zui ve zel a, mahnia awm ka ngam lo a ni ber.
Zung tura kan kal laiin Veroi kan han bia a, ani chu a lo insiam diam tawh a, zing sumo-ah a lo chhuk dawn niawm tak a ni. "I awm ve chuan a zia deuh ang, lo thleng thuai thuai rawh," ka ti ve mawlh mawlh a, Zohera aichuan ka thlamuanpui zawkin ka ring.
Rei lote an inbiak leh hnuah kan let a, kal pah chuan Veroi nen inneih an tum thute min hrilh a, "A lo haw remchan laihian chhungkuaa rorel ka duh deuh a," tih angreng a sawi chu ka ngaithla liam a ni ber. "I ngawng vek a ni maw?" a tih leh laimek chuan thawm ri mar mar ka hria a, "E he...!" tih pahin ka kalpuipa chuan min tlansan thut a.
Hmanhmawh deuhin ka umzui a, midang awmna kan va thlen rual chuan nurse pakhat leh Sangpuia chhungte kal liam tur chiah chu ka han hmu a, Zohera lam ka hawi ruala a mi biakpa ṭawng ri chu ka va hre pha, "A boral chiah.." tih ri chu..!
Ka mit sulh sulh a, ka kaihza tha a khur dar dar mai... Hmanhmawh deuha Zohera kal tur chu a au zui a, a rawn hawi let tawh lo...
End of chapter - 1
Ngaihnawm dawn ve aw
ReplyDelete