WHY DID YOU GO? (CH - 10) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 10

"U Ṭhai dawrah min lo nghak la, heng ho hi i lo la khawm dawn nia," a thil ziahna lehkha min pek pahin a ti a, pawisa min pe nghal bawk a, "I mamawhte pawh lo en rawh," a tih leh laichuan a che chu a buai ru riauin ka hria, a kut chu a khur deuh a, a hmanhmawh hle bawk.

"I rei dawn em?"

"Rei lo ang, minute 20 velah chuan ka lo let leh hman ang,"

"Khawiah nge i kal dawn?"

"Sawtah, ka ṭhiante ka va tlawh lawk dawn, ka lo let har dawn chuan ka rawn hrilh mai ang che," a hmai a hru thuak thuak a, a nghawngte pawh chu a thlan deuh a, biak leh hlau niawm takin a kalsawn nghal a, dawr aṭanga a chhuak tur chu ka en zui vawng vawng a, a kal chak khawp mai.

Thil lei ngai ho chu ka la khawm zung zung a, chumi hnuah hmanhmawh deuhin nu Ṭhatei dawr lam ka pan a. Ka va thlen chuan an pa nen an lo awm a, "Nangmahin em ni i lo kal, eng nge i lo tih dawn?" nu Ṭhatei'n a lo ti thuai a.

"Ka nu nen kan lo kal a, a ṭhiante a hmu lawk dawn a, hetah min lo lam leh ang," 

"Tu a ṭhian nge, a tih tur a sawi lo em ni?"

"Sawi miah lo, ka rei lo ang chu a tia,"

"Chaw ei ve nghal mai ta che u," an pain a lo tih chuan, "Kan haw leh vat dawn aniang," tiin counter sira chair chu ka va la a, kawngpui lan theihna laiah chuan hungin ka ṭhu zui a, ka phone ka en chuan Remi message a lo awm vang tawh.

"Vawk in lam aṭangin an lo chho ka hmu a, tuikhur awmna lamah an kal liam leh chiah," tih a ni.

"Lo en zui zel rawh," tiin message chu ka chhang a, a hnu rei vak loah, "An lo chho mek, an in lam an pan," tih hi a rawn thawn leh a. "Thil ho mai mai ni lo hmuh tum ta che, an ṭawng te ngaihthlak tum rawh, hetiang mai mai min lo hrilh suh," ka va ti chu min chhang let tawh lo. 

"Mina, min lo hrukpui peih em?" nu Ṭhatei'n a rawn tih chuan ka tho vat a, "Dawhkan hnuaiah khan pawnchhe fai a awm ang, bur 3 lai a lo keh a, hlep tur pawh a awm dawn lo anih hi, " a ti bal bal a, puanchhia nena ka va kal hnai chu, "I hmang duh em?" a lo ti a, ka lotion hman ṭhin a ni lo a, Remi leh Biaki'n an duh ka rin vangin ka hman duh thu ka hrilh ta tho a, "A bur hi i thlak dawn nia," tiin polythene-ah min funsak a.

Kan thil hruk laichuan, "I puin kan chungchang sawi a nei em?" a ti a, a ngaihna ka hre chiah lo.

"Eng lam?" ka tih chuan, "Ka naupai hi maw le, kan pa hian an kohhrana ziah luh a duh tawh a, kan nufa ho hian an kohhrana awm tawh turin min duh a," a ti sap sap a.

"Tinge, i awm hreh em ni?" 

"Hreh hran lo ve, kan inneihtirh khan awm mai pawh pawi ka ti lo a; mahse, ka pa khan a remti vak lo a, anni saw lai farm-ah an awm daih a, helaiah lah kohhran mumal nei lo ang deuhin kan awm a, naupang tan hian a ṭha ka ti vak lo, ka nu kha lo sawipui turin ka tia, a sawipui tawh angem aw..." a ti leh vang vang a.

"Tinge helamah in inkhawm mai loha?" ka tih chuan, "A nuam bik lo alawm, ahma kha chuan kan inkhawm ve ṭhin a, chung laichuan ka pa pawh kohhranah a inhmang ve a, eng emaw thil vangin kohhran hruaitute nen an intithiam lo a, chuta ṭang chuan farm-ah hlir kan inkhawm tawh, kohhran mite pawh hian engmah min khawn ngai tawh lo," a ti leh luam a, farm-a ka awm hnuah pawh hian vawikhatmah khuaa an inkhawm ka la hre lo, a hla an tih vang ni turah ka ngai deuh a; mahse, nu Ṭhatei sawi danah chuan inkhawm duh loh chhan an nei a ang.

"Sawlai dawr neitute saw kan kohhran ve tho an nia, mi an sawi peih khawp a, kan wine zawrhte hi an lo ngaimawh a. Mahse, kohhran lamin min en tleu ve deuh tawh bawk nen engmah phei chu rawn sawi an nei lo, kan pate kohhran dang an lo ni bawk a, an ngaizam ve mai aniang," 

"Nu Makimi te hian buaina an nei ve em?"

"Ani chu an pa kohhranah a inhmang ve lo a, farm-a va inkhawm pawh a inthlahrunawm ve loh, keini chu kan pate chhung hi kohhran bel chawt an nia, kan pa lah a active em em bawk a, tunlai phei chu wine zawrh chungchangah kan inhnial reng mai, zu zuar angah hian a inngai deuh tlat a," a ti a, chutih laichuan an pa kal chhuak kha a lo lut leh hlawl a, "Chawlhnia dawr hawn hi chu a ṭha lo em mai, i dawr nimahse miin kan dawr niin an hre ve tho ania, rei deuh inhawng lo mai rawh," a rawn ti hlut a, nu Ṭhatei chuan a chhang lem lo.

"Chaw ka chhuang a, chawhmeh khi i siamah ka dah ania aw, ka nu pawn zan inkhawm a duh a, rawn inkhar hma rawh u," a tih hnuah a chhuak leh mai a, sana ka en chuan darkar chanve a lo liam tawh.

"A van rei tawh e..a lo la let dawn lo em mawni le.." ka ti nang nang a. "Khawiah nge maw a kal ṭhin le, hmanniah pawh hall vengah sawn ka hmu a, mipa pakhat nen bike-in an lo inphur a, mi lah chu a rawn tlawh mang si lo a, an dawra ka va pen lah khan Mangaihi'n  'A lo kal lo,' a ti bawk si a, ngaihzawng a nei leh tawh nge mawni?" a tih chuan ngaihtuahna a buai map mai.

"Tunlai chu in lamah pawh a awmdan a mak," ka ti zauh chu, "Engtin nge a awm?" a lo ti vat a.

"A rui deuh reng, ka pu pawhin a hau zing," ka ti ve mai a, a hmelah chuan ngaihtuah let nei a ang. "I pa nena an inneih hma ang chiahin a awm leh tawh anih chu, zu ngawl a vei ṭhin a, a sim rei tawh asin maw le, a lusun nen a ngaihtuahawm riau mai, damdawite hi a lo khawih em lo ang chu maw..." a ti vang vang a, chhan dan vak pawh ka hre lo, nichina a awmdan kha ka ngaihtuah let a, a chiri ni maiin ka hria, damdawi a khawih em mawni dawn le?

"I nu hian pasal dang nei leh ta se engtin nge i ngaih ang?" a rawn tih chuan ka nui tawi tak a, ka lo la ngaihtuah ngai miah loh thil a ni.

"A la naupang a, a la nei ve leh maithei a ni," ka tih mai laiin, "Hmannia a lo len ṭum chuan 'Pasal ka nei tawh lo ang, ka nei leh anih chuan naupang lam deuh dam rei tur ka nei tawh ang,' a tifiamthu zurh zurh a, 'Ngaihzawng nei mai mai la a tawk chauh,' ka lo tia nih kha," tiin a nui kur kur a. Kan hru zo ta bawk nen kan indahfel zung zung a, "I nu chu inah lo nghak mai rawh," a tih chuan ka hnial bik lo.

Pawna chhuah pahin nu Nguri chu ka call a  a tlang tak naa a chhang thei lo thung. Call nawn leh ka tum laitak chuan, "Mina, a kalhna hi a sak tlat mai, lo ti ve chhin teh," a rawn ti a, a fapa te zawk rawn chhuk thla chu a lo hau nghal bawrh bawrh a, step-ah an inpawt chho dawr dawr a.

Kawngka chu ka kalh thei mai bik lo, chutih laiin ka phone a rawn ri a, ka inkalh buai lai anih vangin ka chhang har deuh a, ka han la chu min rawn vin nghal hluk hluk. "Call hian chhang vat ṭhin ta che, i inngaihtuah buai phawt zel em mawni, la har thei em em lutuk, hei ka rawn let dawn, auto ka hmu mai lo a ka la chang mek," a rawn ti pawr hlur a, in chunga kan chhoh dawn thu ka hrilh pawh chuan, "Kawngah lo awm rawh, auto ka hmuh chuan ka rawn lut kawi lo law law ang," a ti leh zung zung a, a ṭawng dante chu a dang riauin ka hria, mutchhuak aw anih loh chuan ruih nei aw a ni.

Phone a dah hnu chuan in chungah chahbi dah turin ka han chho a, naupang leh pitar chiah an lo awm a, "Khawiah nge i nu kha?" tia mipa naupang ka zawh laichuan inhau thawm ka hria a, ka chhoh hma pawn an lo inhau tawh aniang naupang pahnih chu an ṭit hmel dui a, pindan kawngkhar lam an melh reng bawk.

"Pasalte kohhran zawm duh lo nu ṭha ka hre ngai lo, i fate hi kohhran mumal nei lo turin i duh em ni, an hming i ziaklut hreh anih pawhin inkhawm tal rawh se, naupang dang kianga inkhawm te pawh an chak ve asin, Bawihpuia pawn a u Saka te inkhawm tur a ngen fo, zing inkhawmah te pawh kal ve sela, Pathian thute han zir ve rawh se, an tana ṭha tur ngaihtuah ve rawh.." an pain a tih bawrh bawrh laiin nu Ṭhatei chu a ngawi reng a, lo chhuah a tum nge ni, "Kal ringawt suh, i pa chu va be leh rawh, i be lo anih chuan keiman ka be dawn ania," tih riin a zui a.

"A tirin ka pa'n a sawi lawk vek alawm, nangpawn aw i ti vek a, engah nge tunah i sawisel leh si," nu Ṭhatei'n a tih chuan, "Ka sawisel ang chu, a tirin hetiang an ni tih ka hre hleinem, adventist kohhrana lawi pangngai nise chu pawi ka ti teuh lo, pawlchhuak ang chauhin anih hi an awm, an kohhran mi ho pawhin an ngaihnep em hi, mi nuihzat an hlawh ziate hi i hre nange," an pa chuan a ti pawr leh hlur a, nu Ṭhatei chu a lawm ta vak lo.

"I ṭhiante sawi mai mai anih chu, wine zawrh i duh loh chuan kan zuar lo anga a ni mai, nangmah zawkin anih kha nuihzat," a ti let ve hlar a.

"Sawi ang che, hetianga awm hi ka duh miah lo ania," an pain a tih leh laichuan pindan kawngkhar chu a rawn inhawng a, nu Ṭhatei a lo lang zui a, min hmuh chuan nuam a tih hmel vak lo.

"I kalh fel em ni?" a rawn ti zawi sep a.

"Aw, dawhkanah khan chahbi ka dah, ka nu a lo let dawn chiah a, kawtah ka lo zuk nghak ange," ka tih chuan, "A lo lut kawi dawn lo em ni, chaw ei nghal law law ula," a ti ve tak naa a remin a hre bik chiah lo aniang, "I nu bulah engmah sawi suh," a rawn ti zawi sep a, ka bu ve mai bawk.

"Anih ka kal ania aw," tiin ka chhuahsan a, an dawr kawtah ka zuk ding vang vang a, mi vei vak pawh hmuh tur an awm meuh lo. Nu Nguri kalna lam chu ka thlek leh ṭhin a, auto a hmu mai lo nge ni a rei reuh khawp mai.

Rei fe ka ngah hnu chuan bike lo tlan thawm ka hria a, bike hnung sang chi a ni a, a kalhtu chuan helmet full face a khum a, a hnunga chuang chu nu Nguri niin ka hria. Foot path-ah chuan ka chhuk thla thuai a, bike pawh chu ka piah maiah chuan a rawn ding a, nu Nguri lo chhuk laichuan ka pan ve mek bawk. 

"I lo remchang hlauh chu a tihzia e," nu Nguri'n a ti ri chu ka hre pha.

"I tlu na lo maw, i kiu te kha a thi anih kha," mipain a tih chuan, "Na lo e, a pilh deuh chauh anih hi," tiin nu Nguri chu a nuisang a, mipa chuan a banah chelhin a kiu chu a thlek uluk khawp a, "A pun lohnan damdawi i hnawih dawn nia," a ti a, an bul ka va thleng chu min lo en ve ve bawk.

"Ka fanu a nih hi," nu Nguri'n a tih chuan bike khalhtu chu a bu nghat a, min thlek zauh hnuah nu Nguri chu en lehin, "A nu a chhun a ni maw," a ti vei nghat a, nu Nguri hmel chu a dang riauin ka hria, chupa lah chuan a ban chu a la chelhsak reng a, an inhuat loh hmel viau mai.

"Taxi a vang maithei, saw lai kawnah sawn va chang rawh u," a tih chuan nu Nguri chu a lo bu sawk sawk a, a kal mai dawn emaw ka tih tawh laiin, "I lo len leh hunah keiman ka hruai tawh dawn che nia," mipa chuan a ti leh rih a, chumi hnuah nu Nguri kut chu a thlah chauh a, a kiu ka en chuan a lo pilh phung mai.

Engmah sawi tawh loin mipa chu a inkhalh chhuak a, "Tunge a?" tia ka zawh chuan, "Ka ṭhiannu nau," ti maiin min chhang a, ka awih chiah lo, a tlan liam a thlir vawng vawng danah eng emaw tak chu a awm a ni.

Kawn zau deuh laiah auto chu kan va chang a, a khat tawkin nu Nguri chu ka va thlek leh ṭhin, a kal dawn aikhan a ṭhat hmel tawh a, a hmel erawh a pawr fap thung a, damlo khawsik zo te pawh a ang lek lek. "Pa Dinpuia kha kan lo innghah tir mai lo a ni," ka ti chu min chhang lo, 'Kan rei dawn' tiin a haw tir leh kha ania, pa Dinpuia'n min nghah theih thu a sawi pawhin 'A ngai lo,' a ti deuh tlat a, chawlhni berkhera kal chhuah a ti chu ka hrethiam chiah lo a ni. Chutia ka en reng laichuan auto pakhat hi a rawn tlan a, nu Nguri chuan a lo phar vat a, auto driver lah chuan fare a han ti to khawp a, ka lo ip deuh laiin ka nu Nguri erawh chuan a hnial buai eih lo.

Dar 4 pelhah farm kan thleng phei a, nu Nguri chu a pindan lamah a lut bo nghal daih a, kei erawh veranda-ah ka tawi khawmuang a, Lawma te kawta hmeichhe ding chu ka thlir reng bawk. Remi lo chhuak chuan, "An chhuak leh tawh lo," a rawn ti thawr a, ka bulah chuan lo dingin, "An chhung tak tak a nih ka ring kei chu, a nu leh pa pawhin an ngainat hmel lutuk, amah pawh khi a sual hmel loh," a ti zui zat a, ka lo melh dan a hmuh chuan a tim leh viau thung.

"Lo kawmngeih tum la, a chanchinte i zawt dawn nia, Lawma chungchangte pawh sawipui la, engkim min hrilh leh vek ang che, an chhung a nih pawhin Lawma a ngaizawng em tih ka hre duh ania," ka tih chuan, "Chhungte chu an inngaizawng bik nang," a lo ti leh heh a, "Ka sawi ang chuan ti la a ni mai," ka ti bul hmuk a, chhak lam ka han hawi chuan a lo kalsawn tawh a, an in sirah Lawma nu nena an inzui phei chu ka va hmu a, in hnung lam a pan avangin ka luhsan ta bawk.

Zan mut dawnah Azoi nen kan inbia a, "Lawma te an lo leng a, a farnu pawh an lo hruai ve a, a fel hmel reuh khawp mai, Lalpuia'n a chhaih deuh reng a, a ngaihmelh deuh bawkin ka hria," tih angreng a rawn sawi luam a, "Eng nge in sawi ho?" ka tih chuan, "Kan titi luam a, hna chungchang hlir kan sawi, a farnu kha farm chungchangte ka hrilh ve luam a, i pa chungchangte pawh ka hrilh," a rawn ti pek a.

"Engatan nge ka pa chungchang chu i hrilh a?" ka tih chuan, "I chanchin min zawt a, 'A khua a har hmel riauin ka hria' a ti che a, ka sawi phah alawm," a ti leh mai a, a ṭul ka vak lo naa ka sawi zui lem lo.

"Mahse maw Mina, Lawma farnu chuan zirtirtunu kha a ṭan riauin ka hria, ka han sawichhiat deuh khan, 'Tum reng vang emaw, a thiltih sual vanga that pawh an ni kher lo thei, Headmaster thattute chuan a chhuitute rilru lakpennana that ve mai chauh pawh an ni thei,' a lo tia, kan sawi zuinaah pawh i pa haw tute thiltih anih a ring a," a ti leh luam a, a thil rawn sawi dan chu mak ka tih deuh avangin ka zawt nawn leh kher a, 'Rilru lakpenna' tih tak chu a ni mak ka tih chu.

Kan inbiak zawh hnu chuan ka ngaihtuah let neuh neuh a, ka pa boral hlimchhawna police lo kalte khan chutiang chuan an sawi tlat a ni, a sawitu pawh ka la hria, kha hmaituama khan, 'Nula hi chu rilru lakpenna a ni thei,' a ti kha a nia. A va mak ve, he Jenusi hi kha mite rawn tirh kha a ni thei mai angem, Lawmate chhung dik tak a ni lo a, anih chuan engvangin nge hetah a rawn awm, Lawma'n a lakah bat a neih thu a sawi a, midang zawng zawng bumin hetah a rawn hruai bawk a, thil eng emaw zep ruk chu an nei chiang a ni.

Police ho rawn tirh em ni ang? Kumah kan inrual velin ka ring a, kan inrual anih loh pawhin keia a upatna a tam ka ring lo. Police chuan ka chhungte hi an ringhlel ti dawn ila hetah pawh an lo kal a, engmah an rawn ti zui leh si lo a. Lawma pawh hian police chu nise a pui duh kher lo ang, farm hi an chhungkaw tan a pawimawh a, an eizawnna neih chhun hi a chhiat emaw a pute tihbuai hi a duh ka ring lo.

Police ni lo ta se? A ni lo anih chuan tualthattuten thil thlithlai tura an rawn tirh a ni zawk angem? Chu chu thil nithei tak a ni; mahse, Lawma a lo tel ve chhan hi ka la hrethiam chuang lo. Eng thil nge Lawmsangpuia chuan a bat ang aw, mi fel leh rilru ṭha tak a ni a, he nu hi a lakah a lo insawi khawngaihthlak anga, Lawma hi a lo bum zawk em ni ang? Chu pawh chuan a la hrilhfiah chuang lo.

Police ni loin, tuatthattute rawn tirh pawh ni lo ta se? Tunge a nih ang aw?  Henglai thleng thleng a rawn kal danah eng emaw turtu emaw ngaih pawimawh a nei chu a ni ngei anga, ngawi teh....a tuartu chhungte zawk em ni ang, kha zirtirtunu chhungte kha hriat kan nei lo a, ka chhungte pawhin an ngaichang viau chung pawhin an reh em em a, hetiang zawng hian an rawn ti a ni thei mai angem? A tuartu ve tho an nih vangin Lawma pawhin a lo khawngaih anga, thil hrechiang turin a rawn hruai a ni maithei.

Zingkar hma deuhah ka tho a, tui lum in pahin veranda aṭang chuan farm leh a chhehvel lang thei chin chu ka thlir pah a, vawiin chu khuaa ka kal a ngai dawn a ni. Biaki leh Remi lo tho chu veranda lamah ka ko chhuak vat a, "Ka awm loh hlanin lo mitmei reng ang che u, huanah hna an thawh ka ring a, a theih phei chuan tu emaw zawk zawk in kal ve dawn nia," tiin ka hrilh a, an phur loh hmel viau nain min hnial ngam bik lo.

Pu Muana a lo thawh chuan khuaa kal ka duh thu ka lo hrilh nghal a, "Eng nge i tih dawn?" tia min zawh chuan, "Ka sam hi tan ṭhat a, colour te ka duh a, hmai ka facial tir bawk ang," ka ti sam then a, "I nu Mangaihi rualin i kal dawn nia," a ti ve mai bawk a, nu Mangaihi lo tho chu a lo hrilh nghal bawk. 

Dar 8 dawnah nu Nguri kaitho turin a pindan lam ka pan a, ka va kik laichuan a lo la muhil aniang min chhang mai lo. Rei deuh hnuah a rawn hawng a, "Khuaah sam siamtir ka duh a, pawisa min pe la," ka tih chuan a ner nung a, min chhang loin a khum lam a pan a, "Ka purse-ah khan lo inlak rawh," tiin a va mu ṭha leh sat sat a.

Pawisa chu tlem chauh ka la a, dawhkana a phone chu ka la ru ṭhem ṭhem bawk. Ka pa thawhpuite number ka zawng a, an hming ka hriat chhun ho chu an lo awm vek a, number pakhat chiah ka la thung. Nu Mangaihi chuan, "Kan kal hma dawn nia, vawiin chu naupang ho rualin kan kal mai angai, i pa Dinpuia'n hnathawh tur a nei sia kal hma a ngai dawn," a lo tih vangin chawei hma chuan ka zuk insiam lawk a, chaw kan ei chuan dar 8 a la ri lo.

Midang an insiam laiin kawtah naupang ho nen kan lo ding a, chutih laiin Jenusi kha basket khai chungin a rawn chhuk a, kan awmna lam a lo pan laichu ka lo en ve reng a. "I pu a awm em?" a rawn ti chu chhang loin ka en reng ringawt.

"I chhuak dawn em ni?" a tih leh chuan ka inher hmak a, "A beng a ngawng em mawni le," zawi tea a tih ri ka hria. Min kalpel zet tawh tihah ka inher a, Duhsaka nau water pistol ken lai chu ka chhuh lawk a, veranda lampana kal chu ka va phuh ngheng. Phawk fe hian a rawn hawi a, "A va ṭha ve Valpui, hla deuh ami pawh a kap fuh thei anih hi," tiin ka nuihsang a, naupang ho pawh chuan min melh phawk viau a ni.

"U Mina, i kap huh vek a..." Duhsaka'n a rawn tih chuan, "Tu maw?" ka lo ti hu a, ka piaha ding erawh ka melh duh eih lo.

"Ṭhiannu.." a rawn tih chuan ka va melh vat a, "I ṭhiannu ka ni lo," tih leh motor kawngkhar hawn ka rual a, ka ṭhu lut zui a, "A tho â leh tawh aniang a," Lalduhsaka te unauin a ti sar sar ri chu ka hre pha a, ka nuihsan mai mai thung.

Pa Dinpuia te nupa an inpeih chuan khaw lampanin kan tlan chhuak ta a, nu Mangaihi'n ka kalna tur dawrte min zawt a, kal duhna bik ka neih loh vangin a hmelhriat ṭha a nei em ka zawt ve bawk a, a ṭhiannu parlour min kawhhmuh chu nu Ṭhatei dawr aṭanga hla lo teah a ni. Pa Dinpuia bulah chuan auto-a ka haw leh mai tur thu ka hrilh a, "Dawr min lo nghahpui daih la, tlaiah kan haw rual dawn alawm," nu Mangaihi'n a ti naa aw ka pawh lem lo, engtia rei nge ka thang dawn ka hre tlat lo a ni.

Khua kan thlen chuan parlour kawtah min va dah hmasa a, an tlan liam hnuah ka number lak ruk kha ka call a, min lo chhang rang khawp mai. Tunge ka nih ka sawi chuan a hamhaih deuh a, "School i kal hmaa rawn hmuh lawk che ka duh a, thil zawh tur che ka nei, rei lo te aniang," ka ti zung zung a. Inhmuhna tur a rawn sawi chu ka awmna aṭang chuan a hla deuh a, veng tawp lamah daih anih vangin auto ka la zui a, ka va thlen chuan dawr kawtah a lo ding vang tawh.

"Min rawn call ve teh nawlh a, minti hrilhhai alawm," nuisang hian a lo ti a, "I dam ṭha em, ka rawn tibuai lo che maw?" ka tih pawh chuan a lu thingin a la nui var var reng.

"Lo kal rawh, ka u dawr anih hi, coffee kan in dawn nia," tia dawr chhunga a lut chu ka zui ve thuai a, sana ka en chuan school ṭan a hun ṭep a, hun tam ka nei lo tih ka hria.

Coffee min lo pek hnuah ka sirah a rawn ṭhu a, "I nu a dam maw, hmannia in lo kal khan a cher riauin ka hria," nelawm deuh hian a ti a, an inbe ngai vak lo anih ka ring.

"A dam ṭha, a chhuak khat lutuk a,"

"A sûn rei khawp ang, pasal sun hi chu a na ve dawn em a ni," a ti zuai raih a.

"Ka lo biak chhan che chu nula kha ania, in thawhpuinu kha?" ka tih chuan min en phawk deuh. "Miss Veroi maw?" a ti he haw a, kei ka lo bu nghat thung.

"Tinge ani chu?"

"A chhungte lam hian an rawn be ngai che u em, chanchin hriat te an nei em hriat ka duh a?" ka tih chuan, "Be ngai lem lo, anni lam pawh khan engmah hriat an nei lo aniang," a ti mai a, han zawh leh dan pawh ka thiam meuh lo.

"Police hoin sawi an nei lo em ni?" ka ti leh ta ngawt a.

"Keini lam hi chuan kan hre tlem lutuk, Veroi chhungte pawh khan tih vak ngaihna an hre lo aniang, an chhungte lam ve ve hi in khawngaihthlak em mai, rinhlelh tur tal han awm tawh se ṭha tur," a ti leh vang vang a.

"Miss Veroi chu tuman an rawn ngaihven lo em ni?" ka ti leh hram a, "Ngaihven ti ila a bungrua chu an rawn la tawh a," a tih chuan  ka lo ṭhu mar hluai.

"A rawn la tu chu i hmu em?"

"Hmu e, school-ah pawh a rawn kal alawm,"

"Hmeichhia a ni em, eng ang hmelpu nge a nih?" ka tih chuan a mit tizimin a han ngaihtuah let a, "Nula la upat loh hmel deuh ania, ngo lam leh hmelṭha angreng deuh mai, a hming kha ka hre ta lo.." a ti nuah nuah a.

"A sam a tawi em?" ka lo ti chu min rawn melh heu. "Engtin nge i lo hriat a, sam tawi, mittlangkawm nei lo, hnar ngur nalh deuh mai a ni, a inchei vak lo naa a fai ser mai a, a fel reuh asin," a ti hlut a, a chiang ta kuar kuar mai.

"Keipawn ka hmu tawh alawm, ka hmu leh hman ta lo va," tiin dawt ka hrilh ve zaih a, "Anih, mipa zawk kha i hmu em?" a tih chuan ka bo ta map.

"Tu maw?"

"Miss Veroi bungraw latu a lo kal hnu lawk khan tlangval pakhat a lo kal a, Veroi ṭhian tho a nia, tlangval sang leh hmelṭha deuh mai a ni, a nelawm vak lo, kan han titi pawh khan bul deuh deuhin min chhang hlawm a, midang pawh khan an ngaina lo aniang an be peih vak lo hlawm a, " a ti lehta zel a, a ngaihna ka hre chiah lo.

"Eng nge chupa chuan a lo tih a?" ka tih chuan, "Zawhna min rawn zawt luam a, Sir Kima khan a lo buaipui tain ka hria?" a ti a, a hming ka zawh chuan a hriat loh thuin min chhang a, anih chuan inthuruala lo kal an nih hmel, mahni chauha a rawn kal a rinawm loh reng a ni.

"Chupa chu hetah a la awm em?" 

"Sir Kima khan a tukah a haw leh nghal a tiin ka hria," 

"Anih, Miss Veroi bungrua chu an la zo vek tawh em ni?"

"Aw, a ṭhen chu an hralh a, kan thawhpuite pawhin an leisak ve nual a, a in pawh midangin an luah leh tawh bawkin ka hria," a ti leh a, sana a en chhen tawh avangin han zawh zel chi pawh a ni ta lo. "Ka haw hunah ka lo text che anga, thil eng emaw ka la rawn zawt leh dawn che ania aw, chuan..ka nu bulah engmah lo hrilh lo la," tiin ka han nuih var var a, "Tehreng mai, i nu nen te chuan kan inbe meuh hleinem, i duh hun hunah min lo be dawn nia," a ti ve luam a, ka kal tur pawh chu auto min lo phar pui a, ban vaiin kan inthlah liam ta bawk.

Parlour-ah sam ka va siamtir a, a hmawr te tak tak chauh ka tan tir a, ka tih kir duh vangin a rawng erawh ka thlaktir ta lo thung. An khawih rei angreng a, an zawh meuh chuan chawhnu her a ni tawh. Ka haw hma chuan dawrah chapal chhuat chhah deuh chi ka va lei a, nu Mangaihi pawh tlawh tawh lem loin auto ka la a, ka haw ta nal nal a. 

Haw kawngah chuan ngaihtuahna a vak thui duh khawp mai. Engvangin nge farm-ah a lo kal tih mawlh chuan rilru a kap a, ka chhungte hi rinhlelh an kai em mawni le tiin ka inzawt ru hial a ni. Ka nu Nguri lah chuan a tuar na em em a, tun thlengin a nun a pangngai thei lo a, ka pa lah kha a tua te pawhin an ngaina a, a laka rilru chhia han pu duh tur awm an awm si lo. He Jenusi hian engvanga lo kal nge anih chu min hrilh thei ngei ang.

Farm ka thlen chuan kawtah nu Nguri leh Azoi an lo awm a, "Sam thar i nei elo, i va inhmeh ve?" Azoi'n a lo ti hlut laiin, "Khatiang te han put duh, i lerh hmel em mai," nu Nguri'n a lo ti thung a, min melh no tehchiam lo.

In chhung ka va luh chuan a lo reh diak a, "Khawiah nge midang?" pi Lalpuii bula ka tih chuan, "I pu hoin dilah an kal anih kha," a lo ti var a. "Tu tu nge kal?" tia ka zawh chuan, "Lawmate pafa nen, i nuin cake a ur a, oven-ah khan a la awm," a ti zui zat a, ka rilṭam loh thu sawiin pindan lam ka pan thung.

"In awm ho mek em?" tia ka zawhna chu Remi chuan a rawn chhang lawk lo a, darkar chanve chuang zet a liam hnuah a rawn chhang a, "Kan lo haw mek, hemite pahnih hi an mak lutuk, Lawma hian a ngaizawng aniang a bulah hlir a awm a, a bulah chuan a ṭawng mawh ve miah lo, a nui a nui ania aw," tih hi a rawn thawn a, Lawmsangpuia ṭawng duh leh a nui a nui tur chu han mitthla dan pawh ka thiam chiah lo.

An lo thlen chuan in chung lamah an ri hlut a, ka inbual leh te te hnuah ka han chho ve a, kan nulai pawh chu a lo awm ve ran mai. Sangha kawchhung an lo paih tir a, Remi leh Biaki chuan hnai deuha ṭhutchilhin an lo be siam siam a, an innel hmel viau tawh. 

Veranda thlang lam aṭang chuan ka va thlek leh ṭhin a, eng eng emaw sawiin an nui leh dar dar ṭhin. Chutih laichuan nu Nguri a lo lut a, Jenusi chu "Cake hawn chho rawh," tiin a cake ur kha a lo pe a, a be zui lem lo thung. An zawh hnua haw mai a tum chu ka zui rang khawp mai, veranda kan thlen chuan a rawn lehhawi zuk a, engmah sawi loin a kal leh mai a, an in lam pan loin vawk in awmna lam a pan a, Lawma a awm a ni ngei ang.

Ka zui tih a hre lo nge ni a rawn lehhawi tawh lo a, kan in lan phak lohna kan thlen ruala han koh din mai ka tum chu, ka ang hman zuau tihah a rawn inher thut a, ka ve ding chawt.

"Tinge min zui a?" tih leh rawn chhoh a rual a, ka bul rawn thleng loin a ding leh lawi a, a lam pana ka kal chu min lo en ran bawk.

"Vawikhat chiah ka zawt leh ang che, Lawma te chhung i ni tak tak em?" ka ti chu min nuih ringawt a, a nui dan chu ka ngei zawng tak a ni.

"I ring em?"

"Ring lo,"

"I ring dik lo anih chu,"

"Dawt sawi tawh loin min hrilh mai rawh, eng nge hetah hian i rawn tih?" kan indinchilh tawh a, a hmel ka han en chik phei chuan miss Zuali sawi dan nen khan danglamna a awm lo, a ngo a, a sam a tawi a, mittlangkawm a nei lo bawk, 'A nelawm' a tih chiah kha a danglamna niin ka hria.

"Eng lo a nia.." dar a kan ak a, chutah chiang fahrana min enin a han nui leh sak a, "Lawmsanga hi a nia.." a tih chuan ka hrethiam map lo.

"Eng nge ani chu...?" Ka ti pawr hlar a.

"Farm-ah hlir a awm a, inhmuhna hun pawh kan nei lo alawm," a dar a kan ak a, an inngaizawng tih min hrilh a tum em mawni!

"Chuvang chuan maw i lo kal a?"

"Ni e, a nu a damlo bawk a, ka rawn pui anih hi, an chhung chu ka la ni chiah lo," 

"I daw thei hle mai, tu nge i nih ka hria, vawiinah ka pa thawhpuinu ka va hmu a, miss Veronicai vanga lo kal i ni tih min hrilh tawh, eng nge rawn tih i tum?" a nui tawp nghak hmak a, hriatthiam har zet hian min melh bawk.

"Eng nge ka lo tih i hre duh a maw?"

"Hre duh e," kan inen hnai viau mai, thawk a'n la hak a, a nui lui leh sang bawk a, a awmdan chu a lem pawh ka ti tawh chiah lo, a huatthlala tawh mah zawk.

"Veroi chhungte chuan eng nge rawn ti sela i beisei a, thil hrechiang duhin ka lo kal anih hi, i pa thihdan hi hriatchian i duh ve lo em ni?" zawi leh fiah zet si hian a ti a, ka mitah min en kal bawk.

"Kal lohna turah i lo kal anih chu, miss Veroi kha ka pa vanga thi ah i lo ngai ngawt a nge.."

"Anih i pa chu tu vanga thi nge a nih i lo rin a?"

"Police ten an chhui mek alawm, helaiah pawh an lo kal a, rinhlelh tur engmah an hmu lo," a lo nui hawk a, "Ni hnih khat chiah ka la awm a, kei chuan rinhlelh tur ka hmu ṭeuh tawh," a ti vei nghat a, min ngei hmel fein min melh bawk.

"Tu nge i rinhlelh chu ni a?" lawm vak loa ka tih chuan, "Rinhlelhna mitin va melh kual hlawm la, i hmu ṭeuh mai ang," a ti chu chhanna tling lo tak a ni.

"Ka chhungkua min rawn ringhlel ve ngawt tur hian tunge i nih a, Veronicai vanga thil thleng a ni ve thei tho asin," 

"Ka ṭhiannu vang a ni lo tih chu ka chiang, i pa khan eng thuruk nge a neih ka hre chhuak thuai ang, sawng i chhungte ho pawh sawn zep ruk chu an ngah hmel khawp saw, chuvangin lo ngawi mai mai la, i pa chunga thil thleng i hre duh tak tak anih chuan engmah sawi chhuak lo ang che," A thil sawi dan chu ka hrethiam lo, ka pa a mawhpuh deuh tlat maiin ka hria a, a rawn burbun vek duh lo ang tih pawh a sawi theih loh.

"I duh duh rawn puh kual tum suh, helaiah hian engmah tih tur i nei lo, tualthattu chu police hoin an chhui thei a, i lo inrawlh a ngai miah lo bawk, haw ang che, naktuka i la haw lo anih chuan midang ka hrilh ang," a mitah ka en let kal a, a nui lek lek a, chutah a kut a rawn lek thut a, phawk fea ka lo en laichuan a kut chu la letin a chal a han beng ri thlawp a, a â deuh em mawni ka ti hman.

"I pheikhawk bun ang chiaha chhah i nih hi," a ti chu ka ngei ngang mai.

"I duh duha rawn khawsak kha tum duh suh, i haw leh haw loh chu kan hre mai ang," ka ti leh nghat a, min melh rum hle tawh.

"I chhungte hian eng ang sumdawnna nge an khawih i hria em?" a ti chang fak a, engtin mah ka chhang lo. "Damdawi an khawih ru tih hre rawh, Veroi nen khan an thawk ho bawk a, an inkungkaih kual vek, i pa thihna leh Veroi thihna hi helai hmuna thil fel lo awm vang a ni, mawl mawl lo khan chik ve ta che...i chunga thil thleng te pawh kha ngaihtuah chiang rawh, tu nge pawngsual che, tunge zun cheh khawpa awm tir ṭhin che..." 

!!!!!!??????

Khai....sawi tur pawh minti hre lo, eng nge a awmzia ni ngai, Lawmsangpuia'n henu hi engkim a lo hrilh vek a maw, engtin nge a hrilh theih a, chupa zet chu...hetianga min tih mualpho duh hi chu ka ring lo asin...

"Ṭawng tawh suh aw, ṭawng tawh hlek suh..." ka kutzungchalin ka kawk sawk sawk a, ka thinrim luatah ka kut te chu a khur titih.

"Hei..." a rawn ti leh chiah chu ka nam tawlh rawk a, "I kalbo lo anih chuan ka um chhuah tir khawp ang che, naktuk pawh ka nghak dawn lo, vawiinah chhuak ang che," sehchilh zetin ka ti a, ka thinphu te chu a mumal lo, thawk pawh a har...

"I â anih hi, ka thurualpui theih mai che ka lo ring ve ngawt a, khawi lama thurualpui..."      a lo la ti hlak hlak a, "I kal dawn nge dawn lo?" ka ti vin hlur tawh.

"Puih che ka tum zawk anih hi, ka lam ṭang tur i nia sin, i pa leh ka ṭhiannu an thi, a thattute chu helaiah hian an awm maithei, an awm lo anih pawhin a chhan tal chu hetah hian a awm, i chunga thil thleng te kha ngaihtuah let rawh..." a rawn kal hnaia ka darah a rawn sawi nawk nawk.

Rang lutukin a kut chu ka beng thla a, "Ka chunga thil thleng pakhatmah i hre lo, nang tehlul hian eng nge hriat i neih ve, ka pa pawh i hre lo a, eng ang mi nge a nih pawh i hre lo, i duh chuan Lawma pawhin a zui nghal dawn che nia, in pahnihin thlawk bo rawh u..." min rawn hnaih leh a tum chu a kawrah ka lo man a; mahse, ka ke ka bilh vangin lei charah ka sawp thla hnawk a, min rawn ban leh a tum chu ka nam let rawk rawk.

"Eng nge i hriat a?" a rawn tih chuan ka tho sawk sawk a, "I hre mai ang, i kalbo dawn khawp," tih leh inher ka rual a, "Han sawi i tum elo?" tih leh ka lam rawn pan a rual a, ka han tlan tur chu ka tlan thei hlek lo, ka khup ruh chu a na lutuk tlat a ni.

"I rilruah khan Lawmsangpuia hlir a awm anih kha mimawlnu, ding teh," tih leh min pawh thluk a rual a, amah pawh a tluk tel ve tho avangin kan lum titih. Ka dar a rawn vawn leh rual chuan ka lamah ka lo pawt rawk a, a khabeah ka hnek sawk mai.

Sir lam hawiin a thle ngawih ngawih a, a samin a hmai a hliah vangin a hmel ka hmu thei lo. Thawh mai ka tum laichuan a rawn che leh thut a, ka thokang tawh chu leiah min nam thlu dawp a ni ber. 

Chutah, ka hrawkah a rawn rek zui a, "Tunge ka nih i hre duh a maw, ka fel viau emaw ti reng reng suh, khawvelah hian kei aia thinrim an awm lo ti hre rawh, helai thleng hi engvanga lo kal nge ka nih i hre duh a tiraw? Phuba la tura lo kal ka nih hi, nang ang hmeichhe mawl lutuk vang hian ka tawp dawn reng reng lo, a ṭul anih chuan ka that mai ang che," ka hrawk chu a rek na sauh a, "Ka sawi chu i hria em?" Sehchilh zet hian a ti leh a, ka chhang thei lo, thawk pawh ka thaw tawh mang loin ka hria, a kut chu pawh sawn tumin ka ṭang ve nasa a, a hmaiah te ka han ham bawrh bawrh a, min la thlah duh chuang lo, ramhuai ang mai a ni.

Thawk lehkhatah min rekbettu chu a kang lawp a, "I â em ni?" tih ri ka hre zui zat a, Lawma a ni. "Min thlah rawh, lo inrawlh ve hlek suh," tiin pakhat chu a la inhrosa nasa mai a, kei erawh ka khuh bawrh bawrh. Ka lam rawn pan leh a tum chu Lawma chuan a chelhbet a, chuti chung chuan a la tal fat fat reng. 

"I inbengdai lo anih chuan i pawi i ti viau dawn ania," Lawma'n a tih pawh chuan, "Ka kaltir thei ringawt lo, thilpawi chu saw nu sawn a ti dawn, va dang ta che," a lo ti pawr leh hlur a, ka thaw hleithei lo bawk nen engmah ka sawi thei lo. Lawma lam ka en chuan, "Mina, han haw rawh, nakinah ka hrilhfiah ang che," a lo ti sawk sawk a, thei leh thei loa ka inbengkan laichuan hmeichhia zawk chu a rawn che leh phut a, ka hlau lutuk chu ka tlu lek lek. 

Mahse, Lawma bawk chuan a chelhbet leh a, "Kal vat rawh, ka lo chelhbet ang, zanah i pindanah lo awm la, ka rawn hmu dawn che nia," a ti leh zung zung a, chhan pawh chhang lo chuan ka kalsan a. Ka mittui rawn  luang chu hruk pawh ka tum buai lo, hmeichhe chak lo leh nep tak chauh ka ni, ka mualphona khua hi a la sei dawn chauh anih ka ring....

In chhung ka va luh chuan sitting room aṭanga pi Lalpuii lo chhuak tur nen kan intawk a, "Engati nge i khup chu?" tiin min lo zawt a, "Ka tlu a," tih zawngin ka chhang a, ka pindan lam ka pan zui bawk.

Ka mu nghal sawk sawk a, tlai chawei dawn thlengin ka tho chhuak lo. Chaw eidawnah min ko turin Remi a lo chhuk a, "Ka ril a ṭam lo, min eisan ru," tih leh puana inkhuh ka rual a, a chhoh hnu lawkah pu Muana min lo au leh a, "Chaw ka ei dawn lo," tih bawkin ka chhang leh a, a bak chu an rawn lang leh tawh lo.

Dar 10 pelh hretah ka tukverh kik thawm ka hria a, parda ka va keu chuan Lawma a lo ding reng a, amah chiahin a ni. Tukverh chu hawng turin min rawn signal a, ka che chang duh mai lo. Ani pawh chuan min en ve reng a, tun dinhmunah chuan inbiak pawh ka chak lo a ni. Ka en reng laichuan hawng turin min rawn ti leh a, phur lo deuh chungin ka va hawng a, a rawn lut rang khawp mai. 

"I ṭha em, na te i nei em?" a ti chu ka lo en mawl tawp.

"Thil hriatthiam loh i nei a, ka hrilhfiah dawn che nia," a tih leh pawh chuan ka chhang chuang lo.

"Mina..." ka bulah a rawn thu zui a, kei pawh chu a lam hawiin ka ṭhurem ve nghal a, inhmatawnin kan inen vang vang phawt a, a hmelah chuan inthiam lo hmel ka hmuin ka hria.

"Mi dang bulah i sawi em?" a ti hmasa ber a, a lo kal chhan ka ni lo tih a chiang khawp mai. "Tumah i la hrilh lo ti raw?" a ti leh chu ka melh vang vang a, thawk ka la ham ham bawk.

"Chuvanga lo kal i nih chuan i rilru tihah duh suh, tumah ka hrilh lo, ka sawi chuan i tuar ve dawn tih ka hria alawm," ka aw chu zawi tak a ni.

"A tihzia hlauh chu, ka hrilhfiah vek ang che," a rawn ṭhu hnai sauh a, "Eng aṭangin nge ka han sawi ang aw," a ti leh rih a, chhang loin ka la en reng.

"Jenusi hi i ngaih ang a ni lo, i pa leh a ṭhiannu thihdan hi hriat chian a duh vanga lo kal a nia, thil fel lo hi a tam angreng a, keipawn rinhlelhna ka neih ve tho avangin ka lo pui a, eng eng emaw chu kan hre chhuak nual tawh," 

"Eng thil maw?" hrethiam lo fein ka melh a, "Damdawi chungchangte ania," a tih chuan ka rilru a buai deuh.

"Eng nge a awmzia?" ka tih laichuan a sawi hreh deuh nge mawni chhuat lam a melh vang vang a, chumi hnuah min rawn en lehin, "Farm-ah hian damdawi an la lut a, keimah hi a la luttu chu ka nia," a ti ta a, ka hrethiam lo telh telh mai.

"An zuar tihna em ni?"

"Ka hre lo, an zuar maithei, engtin nge an tih zui ka hre lo,"

"Tunge tih tir che a?"

"Pu Muana'n min tir a, i nu pawh khian a hriatpui ve nghe nghe,"

"Ka pa thih chhan nen a inzawm em ni?" zawi ṭiaka ka tih chuan, "Ka la hre thei mai lo, a pawimawh ber zawk chu i chhungte hi i rin anga mifel leh ṭha an ni lo tih zawk hi ania, i ring lutuk tih chu ka hria a; mahse, thil fel lo a awm tih hi hria la ka duh," a ti leh a, han ngaihruat dan pawh ka thiam meuh lo.

"Chuan maw, min zuiruk zan khan i chungah engmah a thleng lo, Hriata khan a khawih miah lo che, i hnung maiah khan ka awm a, ka veng reng che ania, tuman an pawngsual lo che," a ti chu awih tur nge pawh ka hre lo, a mak niai nuai vek tawh.

"Mahse, ka hmu chiang..." ka darah a rawn vuan a, nghet zet hian a hmer a. "Hypnosis kha a dik lo, pu Muana khan a bum che anih kha, Hriata kha tal awh tir dan a dap a, a chhan pawh nu Atei nen an lo chet khaw loh deuh vang ania," a tih chuan phawk fein ka melh a, ngaihtuahna a buai ta map mai.

"Mahse, Hriata khan..."

"Ka hmu che alawm, chhek in i bihthlak lai kha han ngaihtuah let leh teh, i thil hriat hmasak dan leh an hypnotize lai chea i thil hriatah khan eng emaw danglam a awm ngei ngei ang, hriat chhuah han tum chhin teh," a ti a, ka han ngaihtuah let a, engkim chu a inang thlapin ka hria, chhek in ka bih laikhan ka dar a rawn na zawk a, a bak kha ka hrezui tawh lo a, a hnu leha thil thleng kha chu hypnotize ka nih laia ka thil hmuh vek a ni tawh.

"Chhek in ka bihthlak laikhan tu emawin hetah hian min vitin ka hria.." ka dar ka khawih vat a, Lawma'n ka kawr nghawng a rawn keu chuan, "Vihna hnuhma a awm lo, thing tuaiin a vaw zawk che anih kha, i tluk hnu khan kawt zawlah a han dah chho che a, a kal hnu thlengin ka rawn en zui che alawm," a tih chuan thawk ka la vang vang a, ka lungchhia nge ka hlim vang pawh ka hrethiam chiah lo, ka hnuk a ulh ṭun mai.

"A hnu lama thil thleng chu engmah ka hre ve lo; mahse, dawt i sawi lo tak tak maw?" ka ti leh rih a, thudik min hrilh se ka ti ngawih ngawih.

"Dawt ka sawi lo, a hnu leh lam i hre lo anih chuan i hriat chin té kha han ngaihtuah let zawk teh, i hmuh ngei leh midangin an hrilh chawp che anih vangin a danglam ngei ngei ang," a tih leh takah chuan ka ngaihtuah let vang vang a, khami zan khan grape huanah khan ka zui a, ka kal hlat deuh avangin a bo daih kha ania, tichuan chhek in êng kha ka hmu a, a chhungah a awm ringin ka pan hnai ta a.....ngawih teh.., dik lo a awm.....

"Eng lo...ka hriat dan kha chuan mi ṭawng thawm ka hria a. Mahse, min hypnotize lai kha chuan zai play thawm ka hria, country music lam a niin ka hria, ka hrechiang tawh lo," ka ti bah niai a, Lawma chu a lo bu nghat nghat.

"I awm ve chuan i hre ve ang ti raw?"

"Aw, zai play thawm ka hre ve lo, a dang ngaihtuah zel rawh..." 

"Zai play a rin vang khan an ṭawngthawm ka hre thei lo a..." ka buai leh ta map mai, khawi nge a tak zawk pawh ka hrethiam ta lo. Ka hma ṭhu chu a rawn kun hnaia, fim zet hian ka mitah min en a. "Zai an play lo a, an ṭawng thawm pawh i hre pha...zai play ri kha han dah bo daih la, ngaihtuah let leh rawh le," nghet charh hian a ti a, ka inngaihtuah let nasa ngang mai.

"Ka hrechiang chiah tawh lo, zu an in ho a, wine chungchangte pawh an sawiin ka hria," ka tih chuan, "Engtin nge an sawi?" a lo ti leh vat a, ka lu lah chu a na ngut ngut a  ka vai deuh ruai mai bawk a, an thil sawi lah chu fumfe tak pawhin ka hre tawh lo.

"Ka hriat leh chhun chu pu Muana khan 'Kum 50 chung lamah test ka duh' a tia," ka sawi zawh rualin min thlah hlawk a, "Wine anih chu," a rawn ti hlut a, hrethiam lo fea ka lo en laichuan a jacket ipte a zen a, lehkha them hi a rawn phawrh a, chu thil chu ka vawikhat hmuhna a ni lo.

"Hetiang lehkha inbelna bottle hi i hmu mial em?" tih leh ka lama rawn lek a rual a, ka ngaihtuah let ngial pawhin ka hmuhawm ka hre lo, ka awmna a hla deuh bawk a, ka hmu pha lo pawh a ni maithei.

"Hei hi khawi aṭanga i neih nge, hmana ka hmu tawh asin..ka pa boral hlimchhawn khan..."

"I hmu tawh amaw?" mak tih hmel fahran hian min en a, kei ka lo bu nghat.

"Aw, police hoin an lo keng a, nula khan a thih hmain wine mak deuh a in an tia, he varak lem chuanna lehkha hi min en tir a, farm siam chhuah hi a ni em tihte min zawt bawk a.." ka ti ve luam a, keimah zawk chuan ka hrethiam meuh lo a ni.

"Jenusi lo ken anih hi, he thil hi ania kan zawn mek chu, hmun dangah i hmuh awm i hria em?" a tih chuan lu ka thing rang khawp mai.

"Farm siam hi anih i ring tak tak em ni?" a lo bu zauh a, "Anih chuan ka pa kha an that maithei tihna maw..?" chawplehchilhin hlauhthawnnain min rawn ṭham a, hetiang hi chu ni lul lo se ka ti...

"Chu chu thil ni thei a ni, i pa kianga awm khan a in a, i pa hnen aṭanga a neih nge tih erawh chu kan la hre lo, helaiah hian tualthattu a cheng ve maithei a, a lo cheng lo anih pawhin heng an wine siamte nena inkaihhnawihna nei thil vanga thah an ni thei bawk, a chhan kan hriat chuan tualthattu chu kan hre thei maiin ka ring," a sawi lai zawng chuan thawk ka ip ngar ngar, ka awm chhung chu a tawt urh a, a na veng veng bawk a, ngaihtuahna a mang duk a ni ber.

"Heng thil hi a ruka kan tih a ngai a, chuvang ania Jenusi khan dan che a tum, nangmah a huat vang che a ni lo a nia," a rawn tih chuan thawk ka la vang vang a, "Sawi ka tum tak tak hleinem," ka ti chu a hrethiam vak lo aniang zawhna ngah hmel deuh hian min melh a.

"Ka sawi tawh kha, midang ka hrilh chuan nangpawn i tuar ve dawn a, chutiangin ka ti thei hleinem," tiin a mitah ka en ran a, lawm sawt hmel ka hmu lo a, awih lo hmel pawh hmuh tur a awm chuang lo.

"Mahse, kha nu kha engkim i hrilh a, khatianga ka chungchang i sawipui kha chuan rilru a tina ve khawp mai," ka aw chu zawi tak a ni, ka hmelah pawh ka rilru natzia chu a hmuh ka ring.

"Thil ka hriatchian loh vang a ni, i awih theih turin engmah fiahna ka nei si lo a, chuvangin ka hrilh thei mai lo che anih kha," a ti zawi ruih a.

"Chuvang chuan em ni min pehhel zel a?" ka tih chuan, "He thilah hi chuan kan inkar engmah a tel lo ania, farm leh i pa leh nula thihna chauh kha a ni, nangmah hi an hmang ṭangkai che a, i chunga thil ṭha lo an tih ka hlau bawk a, chuvang ania farm hi chhuahsan la ka duh.." a ti leh dap dap a, a hma khan min hrilh nise ka la ti fan, a sawi chu ihe lovin ka awih ngei ang.

"Anih, engtin nge in tih zel dawn?" 

"He thil inbelna wine bottle hi kan zawn hmuh phawt a ngai a," tih pahin varak lem chuanna lehkha phek chu a rawn lek kang a, "Wine dahna chhek in kha in en tawh em?" ka tih chuan, "Kan luh theihnan chahbi kan mamawh a, i lo nei thei angem?" a lo ti let khauh a, a tawpah chuan min mamawhna a nei ve ta hram alawm, ka beisei loh lam daih thilah.

"Ka lo la chhuak thei ang; mahse, ka lo kal ve dawn ania," 

"Fimkhur a ngai asin,"

"Ka hria alawm; ka puih dawn che u chuan engkim hriat ve zel ka duh, ka pa chungchang ania, ka hriat ve a ngai," A duh chiah lo nge mawni a inngaihtuah vang vang a, "Wine dahna hmunah chuan ka kal fo a, hmanni maiah pawh ka kal a, nangni aichuan ka hre bel zawk ang," ka tih leh takah chuan a rilru a siam fel aniang, "Naktukah chahbi chu lo neih tum la, zanah kan kal dawn nia," a ti ve ta hram a.

"Fimkhur la, rinhlelh awmin awm miah suh aw, chahbi chu lo nei la, zanah saw laia kawng pengah khan kan lo awm ang," tia min hrilh leh thlap hnuah min chhuahsan a. A chhuah hnu chuan ngaihtuahna a vak kual nasa khawp mai, chahbi chu pu Muana'n a kawl a; mahse, zana kal a ching tlat a, a kal loh zan anih ngei ka beisei.

Ka pa kha ka ngaihtuah ṭhin a, he laia cheng te thah ni tura han ngaihtuah chu a har a ni. Zawhna hlirin ka khat a, tunge ni ang tih mawlh chu a ni! Pa Dinpuiate unau lahin an ngaina em em a, an unaupa ang maiin an en a, a chhuang takin 'Kan makpa hi high school headmaster a nia,' tiin an sawi ṭhin a, ka nu Nguri lahin a tuar em em a, pu Muana phei chuan a duatin a fapa ang chiahin a en a, engtin nge maw an tih theih ang le?

Mahse, ka chunga an thil tih dan ngaihtuah chuan ka ngaih ang em a ṭha chu an ni lo tih a chiang a, Hriata puh nana min hmang ṭangkai duh mai hian ka laka an rilru pawh a tichiang hle tawh a, ka pa chungah khan rilru ṭha an lo pu miah lo thei bawk, anih chuan pu Muana ber hi em ni ang?

Kha zana wine chungchang an sawi kha Varak lem awmna wine ni tak tak ta se, kha thil vanga ka pa leh a thawhpuinu kha that ni bawk ta se.....ka ngaihtuahna buai lutuk chuan min ti hah hluah hluah. Muthilh ka tum ngial a, ka muhil thei hauh lo. Khumah ṭhu chungin khawvar hun ka nghak ngat ngat a, zan a rei duh khawp mai. 

Khawvar rualin ka tho chhuak a, chahbi an khaina ka han en chuan a tam khawp mai a,  wine dahna chahbi lah chu ka hre der si lo, tihdan dang ka dap mai a ngai dawn a ni. Ka chhungte lo thawh hun ka nghak a, tuk dang aiin an tho hma hlawm a, naupang school kal tur an insiam buai viau bawk. Ka nu Nguri lah chu a han mu rei khawp a, a pindan a kalh tlat avangin a luh theih si loh a, a mu tukpum leh mai dawnin ka hria.

"Ka nu chu a va mu rei e," a khat tawka ka ti leh ṭhin chu, "Ngaihtuah suh, nizan a mengrei deuh aniang," pi Lalpuii'n a lo ti sam then a, "A cher bawk sia, chaw tal hi ei ṭha se ka duh a," ka tih chuan a lawm hmel khawp a, "Nang lah hian i ngaihtuah em em a, ani pui hian fanu fel deuh a nei tih pawh a inhre ṭhin lo a, a vanneih tehlul nen hian," a ti a, a nui var var bawk.

Naupang school kal tur kan neih vangin chaw kan ei san a, chaw eikhamah nu Mangaihi hoin an chhuak diak a, pa Dinpuia'n a va thlah bawk. Pu Muana chuan veranda-ah chem a tat mawlh mawlh a, hna thawk tur an lo thleng zui nen pawn lamah chuan an ri hlut a, chutih laia nu Nguri lo chhuak ka hmu chu ka pan rang viau a ni.

"Chaw kan eisan che a, i ve nghal dawn em?" ka va tih chuan, "Ei rih lo ang, tinge i bai suih suih a," phak chhelh chhawlh hian a ti a, ka chhanna pawh nghak lem loin choka lam a pan zui bawk. Ka va umzui leh a, bathroom chhungah lutin a va uak ṭhat ṭhat a, nizanah a lem hnem viau anih ka ring. 

Hmanhmawh deuh chuan a pindan lam ka pan a, a side table-a wine bottle ruak pahnih awm chu ka va hmu nghal a, a khum hnuai leh drawer te chu ka en kual zung zung a, ka thil zawn chu ka hmu mai lo. A kawl tawh lo zawk em mawni ka tih rum rum hnua a closet ka va hawn chuan bur hnih a lo la awm ran mai. Rang deuh chuan ka la chhuak a, ka pindan lamah ka chhuk pui nal nal a.

Ka han chhoh leh chuan pi Lalpuii a lo ang hlak hlak, "Hetiang mai maia nutling awm tur a ni ngai lo, Minai pawh i ti hrilhhai lutuk, lusun ve tho a nih hi, a belh tur neih chhun i ni tih te hre ve ta che," tih angreng an sawi laia va awm ve chu a nuam zan lo. Veranda lam ka pan a, pu Muana chu eng nge a tih dawn te ka va zawt a, "Nimbu huan lamah hna kan han thawk ange," a lo ti var a, hnathawk tura lo kal ho pawn an chem an lo tah tir ve hlawm a, eng eng emaw sawiin an nui ho leh dar dar ṭhin.

Rei vak loah an inzui chhuak ta hlawm a, keipawh ka pindan tifaiin chawhma chhung chu ka buai a, thingpui in tura ka han chhoh chuan dar 12 a pel fel tawh. Ka nu Nguri chu a pindanah a awm a, pi Lalpuii'n a koh pawh chuan a rawn chhuak lawk lo a, a mu leh ringawt anih chuan ka thil tih khan awmzia a nei thui lo khawp ang.

Mahse, thingpui pe tura Remite ṭhiandun an kal dawn ṭepah a rawn chhuak a, "Ka pa kha a lo let leh dawn em?" tiin pi Lalpuii chu a rawn zawt a.

"Dawn lo ang, nimbu huanah alawm an thawh," pi Lalpuii'n a tih chuan, "Wine dahna chahbi a keng em lo zawt rawh u," tiin Biaki chu a hrilh a, "A awm reng lo em ni, hnathawhnaah te chuan a keng nang," pi Lalpuii'n lo ti lehin an pahnih chuan chahbi dahna chu an va en dun a, "A khawi ber hi nge mawni?" tiin an zawng buai dun khawp mai.

"Eng atan nge i tih a?"

"Ka mamawh.."

"In reng suh aw, nimin piah lawkah pawh a lo hawnsak tawh che kha, i khamawm lutuk em mai," An nufa chuan an inhau dun leh hlak hlak a, pi Lalpuii kalsawn hnuah Remi chu a rawn au a, "I pu chu wine dahna chahbi hi eng ber nge lo zawt rawh," a rawn ti lang lang a, "Nizanah khan ka inzo loin ka hria asin maw le," a ti bal bal ri chu ka hre pha.

Ka nulate pahnih chu an chhuak nghal a, an thang rei phian mai, thil dang ti loin ka lo nghak ve reng a, darkar khat dawn hnuah an rawn let leh chauh a. "Rubber sen inkhaina kha a ti, bottle hnih bak la suh a ti bawk," Remi'n a rawn tih chuan ka lo thaw huai huai tawh. Chahbi a lak hnuah nu Nguri chu a chhuak ve nghal a, keipawh Lawmate in lam panin ka chho ve bawk a. Mahse, ka han thlen chuan a nu chiah a lo awm a, an pafain an nula nen vawk chaw an la a ni awm e.

"Ṭhu rih rawh," min ti tak nain nu Nguri a lo let leh vat ka ring a, rei ka awm lo. 

Tlai thlengin Lawmate chu ka hmu zui lo a, engmah an rawn ngaihsak zui lo nge mawni, min hrilh loa ruahmanna an neih te ka han ring ngawt a, zep an neih loh hram ka beisei, ka pui dawn anih chuan a chuang bik nih ka duh lo tawp ang.

Dar engzatah nge kal tur a sawi loh vangin zan dar 10 velah chuan ka insiam tawh a, inhnuai kawt zawl aṭangin an in lam chu ka han thlek leh ṭhin a, kawngka lah chu an khar ṭhiap a, mut reh hun an nghak anih ka ring. Ka nghak ngat ngat a, in chung lam thawm a reh fel ta maw tihah ka han chho a, ka chahbi duh pawh a lo inkhai vang mai.

Ka lak hnua ka chhuk leh chuan kawt zawl lam ka pan nghal a, rei dawn ka thlir leh hnuah an kawngkhar inhawng chu ka han hmu ta a, an pahnihin an rawn inzui chhuak bawk. Chutih laichuan pu Muana khuh kharh kharh thawm ka hria a, a la mu nghet chiah lo anih ka ring. Pindanah ka va lut leh rih a, minute 10 ka nghah leh phawt hnuah ka chhuak ve chauh a, kawng awm lohna lama ka kal vangin kawng a hnim si a, ka inhai chawp hle a, pheikhawk pil hmawka chirh dai te a ngai a, thing hmun ka thlen hma chu phone pawh ka ti êng ngam lo.

Thinghmun ka thlen chinah kawng ka han pawh a, huan peng pathum awmna lam chu ka pan nghal hlawk hlawk a, rei loteah Lawma te lo ding ka va hmu zui a, min lo nghak rei an ti viau tawh aniang, "I muhil daih emaw kan tia lawm," Lawma'n a lo ti var a, "Chahbi chu i rawn nei em?" ti tu erawh melh duh loin Lawma zawk chu ka pe a, a kal hmasa berah ka ṭang bawk.

"Chhek in pathum a awm a, Wine bottle dahna bik chu pakhat chiah a awm," 

"A ṭhat chu, a lo awm anih chuan i in chhin dawn nia,"

"Hmeichhe tana siam anih hmel sia, nangman in zawk rawh," tih angreng sawiin an nui dun kar kar a, ka awm an ti nuam miah lo.

Chhek in awmna kan va thlen chuan ka kal tuma chu ka pan ding nghal a, anni pahnih pawh chuan min lo zui ve zel a, a chhung kan luh chuan a thim ṭha khawp mai. Kan phone kan ti eng sap sap a, chhuar tin chu uluk deuhin kan en hlawm a, kan thil zawn chu a vang hrep. "Hetianga an dah mai chu ka ring lo, a kil khawr lai deuh te kha uluk deuhin en teh u," Lawma'n a tih chuan, "Barrel awmna zawkah khan kan en dawn em niang?" ka lo ti vat a, "In pahnihin helai hi lo en ula, chhek in dang chu ka va en ange," tiin Lawma chu a kal nghal a. Ka awmpuinu chu ka va thlek ṭhin a, a zawng uluk khawp mai a, ka awm ve tih pawh hre awmin a lang lo.

Minute 10 vel a liam awrh ang tihah thawm kan hre thut. Jenusi chu ka lamah a rawn phei nghal a, rang lutukin chhuar pakhat phenah chuan kan biru a, tu emaw lo lut thawm kan hre zui bawk nen thawk a rang duh ngang mai. "Che miah suh," a bula miin a rawn tih chuan hmui hup chungin thawk ka ip ngar ngar a, lo lut chu mipa a ni ngeiin ka hria.

Bottle pakhat chu a la a, rei awm loin a chhuak leh mai a, "Thannguri mai mai chuh, chahbi la loin a kal leh ringawt anih hi," ti tu chu pa Dinpuia aw ngei a ni. Kawngkhar a rawn khar zui a, a kalh ri kan hre zui zat a

"A kalh ania..."

"Eng a, engtin nge kan chhuah anga?" a tih chuan chhanna ka nei bik lo. Ke pen thawm chu ka han ngaichang leh deuh a, a hla tial tial a, rilru erawh a buai duh map map khawp mai.

"Lawma au rawh,"

"Lo kal pa khan a hre pha ang,"

"Chahbi pawh a nei si lo a, kan tang ringawt dawn ania," mangang fea ka tih laiin, "Khita khi ventilation a awm," tih pahin chhak lam bang chu a kawk zauh a, "Engtin nge kan lawn ang?" ka tih chuan min chhang lo, zawn nei niawm takin chhek in chhung chu a chhun kual a, barrel ruak pakhat hi a va chhun fuh ta hlauh a; mahse, a bung anih vangin a tawi viau thung.

"Min lo zâwn pui teh," a rawn tih chuan ka pan phei ve thuai a, barrel chu ventilation zawnah chuan kan han hung a, awlsam taka lawn chhuah theih anih hmel loh. "Lawma nghak ila, tihdan a hre maithei," ka tih laichuan barrel chungah a lawn tharh a, "Lo lawn rawh, kan dâwm chho che anga, min lo pawt chhuak dawn nia," ngaihsam hmel fahran hian a ti a, ka che chang duh mai lo.

"Hmanhmawh rawh," a rawn tih leh takah chuan ka lawnkai ve vat a. 

"I ke lehlam kha khaikang la, ka dar hi i rap dawn nia, i khupin bang hi sik tir la, ka din rualin khi khi han ban phak tum ang che," tih leh kun a rual a, thu min pe zat zat chu ngaithei lo viau mahila sawi nawi thei ka ni rih lo. Thuawih deuh chuan a darah ka rap a, "Bang lamah khan innemkhalh rawh," a tih veleh bang chu ka nem ve nghal a, a han ding chu kan bu lûk lûk a, min thlauh ka hlauh luatah ka che ṭha ngam der lo.

"Che tawh suh.." a rawn ti khar khar.

"Ka che lo, nangmah kha i che zel anih kha," 

"I ke hi ti nghet ta che maw le," 

"Ṭawng lo khan ding mar la a ni mai,"

"Ka ding mar dawn ania, inring rawh," a tih rual deuh thawin kang vuk a, tukverh tlang ka han man chu ka thaw huai tawh. "A hawn theih em?" a rawn tih chuan ka hawng fel der. "Fimkhur rawh aw, " tih pahin ka keah a rawn chawi a, a lu te chu ka zuk rap nawk nawkin ka hria. Harsa fein ka chhuak thei hram a, ka hah lutuk chu ka thaw hlawp hlawp mai. 

"I va rei ve?" a rawn tih chuan ka chhang lo.

"Hmanhmawh ta che," a rawn ti leh hlak a, ka zuk dâk thla chu a light-in min rawn chhun vu...

"Min thah i tum a ti raw?" ka tih laia ka aw chu bung ṭha fel fawl tak a ni.

"Ka tum tak tak i ring a maw?"

"Ring e.."

"I ring dik lo anih chu,"

"Ka pawh chhuah che i ring anih chuan nang pawn i ring dik bik lo anih chu," tih leh  inher ka rual a, "Hmeli..." a tih ri chu ka hre pha.

Chhak lam aṭanga Lawma lo chhuk ka han hmu a, lo chhuk pah chuan, "Chahbi pakhat chauh kan nei sia, luh ruk theihna tur a awm em ka han en a, ventilation khi a sang lutuka, leilawn tel lo chuan a lawn theih loh ang," a rawn ti nuah nuah a, keimah chauha ka lo ding a hmuh chuan ka hnung lam a thlek vat a, "Khawiah nge Jenusi?" a ti zui zat a.

"Pa Dinpuia a lo kal a, wine bottle a rawn la a, kawngka pawh a kalh nghal,"

"Jenusi chu khawiah nge?"

"A tang, ventilation aṭang sawn va pawt chhuak rawh," ka sawi zawh rual rualin chhek in lam a pan nghal a, ka thlir zui vawng vawng a, chumi hnuah nghak tawh loin ka kalsan a.

Ka pindan ka thlen chuan ka inpelh sawk sawk a, tui vawtin ka va inleih bawrh bawrh a, ka awm a nuam deuh huaiin ka hria. Ka zawh fel hnuah in chungah ka han chho a, tuilum ka han in a, ka chhuk leh hmaa pa Dinpuia lo tho ka hmu chu thinphu a rang dup dup. "E, Mina, i muhil thei bik nange?" a rawn tih laichuan a meng sen deuh rûm a, a rui hle tawh a ang.

"Phone ka khawih a, ka mu dawn chiah," tia kal mai ka tum chu, "I pa Tluanga te chu an lo haw hunah pawh khuaah an awm rih ang, thil kan sawifel vek tawh ania aw, ngaihṭha deuhin i awm dawn nia, ani pawh a inthiam bik lo a, a hmu hreh ve khawp che ania," a rawn tih chuan ka ngawi vang vang a, "Ngaihdam kher pawh a ngai lo ang," a tih leh chuan ka bu ringawt, "Muttui aw," a tih pawh chuan, "Aw," tih bakin ka chhang lo.

Zing karah exer lak pahin vawk in lamah ka tlan thla a, anni pahnih chu an lo awm reng tawh, "Khatiang khan vawikhat mah ti tawh lo ang che," samtawii chuan a lo ti khar khar a, melh pawh ka melh ṭha duh lo.

"Engtin nge ni zel dawn a?" tiin Lawma chu ka zawt a, "Barrel awmna chahbi kha lo lak tum la," a tih chuan a hun tur ka zawt ve nghal a, "A theih chuan zaninah," tiin min chhang a, ka letsan leh mai bawk.

 

Nu Mangaihi'n wine a ken chhuah dawn vangin chaw eikhamah an kal chhuak a, an chahbi lak te pawh ka hmu thlap a, pu Muana chahbi ken pahnih zinga pakhat chu kan mamawh tak kha a ni ngei ang. An lo let leh hnuah pawh an hman leh duh thut takah tiin ka la lâwk ngam lo a, nilengin ka vei thung.

Tlai ka mu chu ka chhing sek ang ka tih laiin ka tlai thim hnuah ka harh chauh a, ka lu a haiin ka luak a chhuak em em mai bawk a, chaw pawh ka ei hleithei meuh lo. A la hma tho tiin khumah ka zuk mu leh a; mahse, ka harh leh meuh chuan khua a lo var ṭan tawh. Ka mutna lah chu a huh dup a, thil awmzia ka hriat rualin bual in la kan pan nghal a, ka va inbual laite chuan ka che hleithei meuh lo. 

Ka inbual a, ka inthlak a, ka puanthuah te pawh bathroom-a bucket-ah ka va chiah a, rei ka che thei lo, ka luhai vang bawk chuan khum lam ka pan leh ṭhin a, a khat tawkin ka harh leh hlawl ṭhin bawk a, eng emaw dik lo chu a awm a ni!?

End of chapter - 10