WHY DID YOU GO? (CH - 11) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 11

"Hei ṭhiannu, eng nge i tih dawn a?" tia ka koh chu Biaki nge Remi zawk ka hre lo.

"Min ti phu dawn alawm, insuk ka zar dawn a," tiin min lo nuih let var a, an in sir lam a pan vangin ka zui ve thuai bawk.

"Khawiah nge i zar dawn?"

"Tanky chungah khuan,"

"Ka lo pui ang che, i va insu tlai ve,"

"Nia, u Minai'n suk tur a lo chiah a, a sawi har lutuka a ro hman tawh kher lo ang," tih pahin kan thlanga tanky lianpui lam chu a pan a. "Aman a su ve ngai lo em ni a?" ka tih chuan a nuih a zat hmel deuh.

"Su vak ngai nang, hetiang thil velah hi chuan kan awl hneh lutuk. Mahse, a zun huh hi chu su ve ṭhin se ka ti khawp mai, nula ve si zun a cheh ziah lehnghal a, a ti mak tak tak a ni," a ti bal bal a, eng nge a awmzia ni ngai, kan Ṭhamawli chuan zun a la cheh ṭhin a maw!? Mak awm ve!

"A va tuihnai lo ve, tun ang kum tawha zun han cheh chuh.." a bucket khai lai chu ka zuk bih a, bedsheet a niin ka hria.

"A damlo leh tawh aniang, tunah pawh a mu leh reng tawh.." 

"Engtin nge a awm a?"

"Ka hrethiam bik lo, a tho â hian zun a cheh ziah a," hrethiam lo fein ka melh a, mi pawh en ve lem lo chuan tanky banga thir leilawnah a lawn kai a, zawh duh ka la neih vangin ka zui ve zel bawk.

"In chhungah a inti lal ve deuh nge?" tia ka zawh chuan, "Inti lal hran lo e, a fel ve lutuk; mahse, an duat a, hrethiam mai em?" tih pahin min rawn nuih ruh ruh a, "Mahse, u Lawma hrilh suh aw, a hriat chi a ni miah lo ania," a ti leh sur sur a, ka bu ve mai bawk.

Insuk chu ka zar pui a, "I fel e, i hman chuan lo leng ve zeuh zeuh ṭhin rawh, zanah in mu hma ṭhin em ni a, inah i tawm chawt zela, Remi nen kawm tur kan nei ngai si lo a, nizan pawh kan lo leng chak lutuk a," a ti leh siam siam a, "Kan mu hma ṭhin," bung fea ka ti chu min rawn melh rang khawp mai.

"Zing kharah tih tur a tam ṭhin a," ka ti ve leh vat a, a hrethiam ve khawpin ka hria.

"Saw laia nula saw in kawm ngai lo em ni?"

"Tu maw, u Azoi maw?" ka lo bu zauh a.

"Ani chu a upa tawh lutuk, bakah u Minai nen an inkawm a,"

"A lo leng ngai lo em ni?"

"Leng ve ngai tho, kan inkawm ngai lo, u Minai ṭhian a nih vang hian min chhiahhlawh chei ve deuh a, mi tirh kual a ching bawk sia kan ngaina ve vak lo, nangpawh fimkhur rawh aw, mi hêk a hrat teh mai ania," a ti zui duah a, "Ka bulah chuan a fel asin," ka tih chuan, "U Lawma nau i nih vang a niang, an innel alawm," a ti leh mai a, a sawi thui lo viau chungin ka hriat duh erawh ka hre ta tho mai.

Kan let leh lamah chuan, "Zanah chuan lo leng ula, serṭawk kan bawl dawn nia," tiin ka sawm a, "Remi ka lo hrilh ang," a ti a, a phur hmel viau bawk.

Kawt zawl kan thlen chuan Lawmsanga lo chhuk ka han hmu a, ka kalpuinu chu kalsanin kan pan ve nghal a, "Lo chho suh, khutah kan chhuk dawn nia," a rawn ti lang lang a. Ka bul a rawn a thlen rual chuan, "Vak den den suh ka tih che kha, hetiang  chuan an mit i la mai ang," a ti a, ka chhang lem lo.

"Khawiah nge inkal dun a?" 

"Insuk ka zar pui, Jeminai chu a damlo anih hmel," Phawk fein min lo en a.

"Engtin nge a sawi a?" tiin min zawt zui a.

"A mu a ti, chuan a nice vak lo a, i hriat tawh tho kha.." râng ralh hian min rawn melh.

"Zun a cheh a maw?" a ti hu a, ka ner nang ringawt.

"Engati ziah nge mawni le?"

"Rilru lam buaina a ang, a mak pawh ka ti vak lo," ti maiin ka chhang a.

"Ahma khan thil eng emaw dik lo a awm anih chu i ti bawk sia,"

"Ka rindan a nia, amah han belhchian hi chuan i rilru buaina neih pawh a awm viau alawm," ka chhan dan chuan a ti lawm chiah lo nge ni min en vang vang a.

"Tlaiah saw laia kan lenna nulate inah khan va leng leh ila," ka ti chu a meng nur khawp mai.

"Tinge Azoi chu i ngaihven em em a, i rin ang kha chu a ni lo ang, a rilru a ṭha viau asin, Minai tan phei chuan a ṭhian neih chhun a nia," a ti luam a, "Ka duh dan ang takin thil ti lo sela chuan a fing tih kan hre miah lo ang, ka hint pek chhete kha a hrethiam rang lutuk, nang aichuan a pute thawhpui dan pawh a thiam zawk chu a nih hi," ka lo ti nghat a.

"Ṭhian an nia, khang te chu a hrilh ve leh bawk ang chu, ka chungchang pawh an sawi dun fo a, min hmuh thute chu a hrilh dawn tih chiang sa a nia," a tih chuan ding meuhin ka en a, ani pawh chu a ding ve thuai a.

"A hrilh dan zawk kha ania ka hriat duh chu, Jeminai'n tunge ka nih a rawn ngaihven ta chiah a, kha kha alawm ka tum," a lo nui hawk a, "Min hrilh tir nghal mai nila chuan hetiang hian in inhaw lo anga, in inthurual thei zawk tur a nia, a kual zawngin i ti mai mai a nih kha," a ti vei khauh a, ani pawh hi a thluak aiin a hmel a ṭha zawk fe ang tih tur chi tho a ni.

"Midang hnen aṭangin thu a hre tam tawh, amah ngeiin a hriat chhuah hian kawngro a su dawn tih ka chiang," ka kal chu min lo zui ve thuai a, min chhang tawh lem lo thung. Jeminai kha tunge ka nih min hre turin ka duh a, kha a ṭhiannu khan ka duh dan ang takin min tihsak bawk a, chu chuan hrilhfiah tam tak a nei, hypnosis an tih laikhan a awm ve tih Lawmsanga'n min hrilh aṭang khan ka ringhlel ṭan tawh a, thil fel lo a awm anih chuan a hre dawn chiang a, a ṭhiannu bula engmah a sawi loh danah an inṭhianṭhatna aiin hnathawk leh a pu inlaichinna a nghet zawk tih a chiang bawk. Ka hint pek lah kha a han hrethiam khawp a, ka ring sual hauh lo, mawl hmel takin a lang naa helai hmuna hnathawk zingah chuan a fing ber zawkin ka hria.

"Nula pahnih kha zanah an lo leng dawn ania," 

"I lo sawm em ni a, kawm tam loh a ṭha zawk asin,"

"Anni pahnih deal dan te chu ka hre ve lutuk, sawi hreh vak an nei lo a, kan thil hriat duh kan zawt thei dawn alawm,"

"Minai a damloh chuan chahbi chu engtin nge ni ta ang, Remite pahnih chu tih tir i tun a ni lo maw, an rin tlak miah loh ang, thil zep thei chi an ni lo," 

"Ka hria ka hria, i bialnu chu kan ngaichang dawn nia.." 

"Mahse..." a lo tih vang chuan ka va melh a, "A hma pawh khan a mumal lo rei angreng a," a ti a, a rilru a buai hmel hle bawk.

"Anih chuan tihdan dang kan ngaihtuah dawn nia," ka ti ve vat a.

"Kan lut ru thei chuan ka ring a, ventilation kha a sang deuh nain leilawn pawh kan dawh thei tho a, Minai tel loa tih mai pawh a pawi chuang lo," a ti leh lawi a, chu aia awlsam chu ka hria a; mahse, beidawn tawpa tih chi chauh a ni.

Vawk in kan zuk tifai a, kawlbahra hnah leh lamkhuang hnahte kan pe a, lamkhuang hnah kan pek chhan ka zawh chuan, "An rulhut hlo ve a nia," a ti a, vawk chungchang min hrilh luam bawk. "Ran ṭawp an ni lo, mihring hian kan enkawl dan a dik lo zawk a, an ek te nena inchiahpiah turin bawmah kan khung bettlat a, chuvang ania an ṭawp chauh ni, vawk chanchin ka zirnaah phei chuan ui ai pawhin an fing zawk daih asin," a ti sap sap a.

"Nang chu ui ang i nia, i bialnu khi zawhte.." ka ti chu min rawn melh vut a, a ner nang bawk.

"Engvangin maw...?" 

"Ui ang i nih nachhan chu i puten an duat vak lo che a, i laka an rilru i hre chung pawh a i kalsan duh miah lo hi a nia,"

"Anih Minai chu....?"

"An duat vang chauhin ani khi a awm ve thung a, zawhte ang chiah a ni mai..." a lo hawi chu a rawn nui ruh ruh. "Chutiang kan nih chuan eng nge i nih ve ang?" a ti vei nghat a, ka inngaihtuah deuh vang vang.

"Rul em ni ang aw?"

"Aih.." lu ka thing a.

"Bâk maw?" a lamah ka ve thle nghat a.

"Sihal i nih chu, ar man tur zawng sihal fing phakar deuh, i sa seh tur i veh mek bawk alawm ti raw," a ti a, a nui kar kar a, vawk ek ka hawlhna tianga ka va tin chu a tlan chhe rang khawp mai.

Tlai lamah khua a dur khup khup a, thli a thaw leh vuk vuk ṭhin a, zanriah pawh kan ei har lo. Zanriah eikham hnu maiah chuan thli na zet a rawn thawk a, ruah a sur zui mai bawk nen kan mu hma hlawm khawp mai. Current lah chu a thim hmak a, ka pindan tukverh insawi ri chuan ngaih a ti ngam lo a, rangva in chung hnuaia mu ka ni bawk nen a bengchhengin ka awm thiam meuh lo a ni. 

Tlema ruah sur a han deuh hnu chuan ka tho chhuak ṭhem ṭhem a, sitting room tukverh parda keua ka va hawithlak chuan putara te in êng ka zuk hmu a, eng thil emawni tak hian min mawlh a, ka thlir rei khawp mai. Gate awmna kawng leh kan awmna tlang lam aṭanga tuihawk luang chu kawtzawlah a li lung a, veranda light in a chhun phak chin chu a lang paw riai mai bawk a, lung a ti leng deuh tein ka hria.

Chutia ka thlir reng laichuan thawm ka hria a, ka lehhawi rualin Lawmsanga pindan inhawng leh a lo chhuak chu ka va hmu zui a, a thim avangin a ruangam chiah ka hmu thei thung. "I muhil thei nange?" zawi deuh taka a rawn tih chuan, "I muhil tawh emaw ka tia," ka lo ti ve vat a.

Ka bulah chuan rawn ṭhuin parda chu a rawn bih ve a, "Naktuk chu hna a tam dawn hle mai," a ti zawi sup a, chuta ka lam a lo hawi nen chuan kan inmelh hnai viau bawk.

"Vawt i ti lo em ni?" 

"Ti e..." tih pahin ka ṭhu ṭha sawk sawk a, min en tawh loin tukverh lam bawk chu a bih leh a, "I ngaihtuah deuh em ni a?" ka ti chu min rawn melh leh rang khawp mai.

"Minai maw...ngaihtuah hran lo e?"

"Ka awih lo,"

"Nangmah zawk kha khawhar i va ang ve a?" a nui deuh suk a, "Ka khua te chu a har reng ṭhin alawm," ka tih laia ka aw chu a zawi sep sawp viau mai.

"Tunge i ngaih a?"

"Tu emaw, min kalsan tawhtu a nia,"

"A va zia lo ve.." a ti mai a, ka chhang tawh lem lo.

Rei dawn a ngawih hnu chuan, "Theihnghilh tum zawk rawh, kan duh dan ang vekin thil a kal thei lo anih hi, kan chunga tla apiang kan pawm thiam hi a ṭha ber ania," a ti zawi sup a, ka chhan hma chuan a tho nulh a, chokaah bati a va chhi eng a, a lo phei leh thuai bawk.

"I nundanah hian i lungawi mai zel em ni?" ka lo ti chu a hrethiam vak lo a ang.

Mahse, fel fai deuhin min chhang a, "Awmzia nei dawn sela chuan lungawi loh chu ka duh alawm," a tih laia a awki chu a dam ruih a, a thutak hmel viau bawk.

"Nang i lungawi em?"

"Aih.."

"A ṭhiannu vangin maw?"

"Chu chauh chu nise ka ti; thlir dan mak deuh deuh hi ka nei a, kan nun hi a hlut tehlul nen a chang hi chuan a holam riauin ka hre ṭhin, hringnun hi lusunna chauh a niin ka hria.." ka ti sap sap a, a lam ka hawi chuan min lo en chik khawp mai.

"Lusunna nia i ngaih chuan a dik tho alawm, tupawh hian tu emaw tak chu kan la sun vek dawn a," a ti ve khauh a. "Mi i sun ve tawh em ni?" tia ka zawh chuan min chhang mai lo. Rei dawn a ngawih hnuah, "Ka sûn em ka chiang lo; mahse, lusun ang deuh tho ka ni," a ti chhuak halh a.

"Eng nge a awmzia?" tawite hian min nuih a, "Ka khua a har ṭhin a," a ti a, a sawi thui duh lo tih ka hrethiam a, a bialnu nena an inkar a nih ka ring.

"Va mu lum leh tawh rawh, i hritlang palh ange," a tih hnuah min thawhsan a, bati chu lain ka pindan lam ka pan ve thuai a, muthilh erawh a har khawp mai. Khawvar lamah ka chhing ve chauh a, ka thawh ve meuh chuan an lo chhuak bo diak tawh.

Hmanhmawh deuhin ka inphih fai a, kawt zawla ka zuk chhuk chuan Remite ṭhian dunin tual an lo phiat fai a, ka chhungte an hmu em ka zawh chuan, "Pa Taia te nupa chu vawk in lamah an kal a, u Lawm chu ka pu leh pa Dinpuia nen grape huan lamah an kal, a zamna chhia an siam ṭha dawnin ka hria," Remi'n a lo ti zung zung a, chutih laia veranda lam ka va hawi chu Jeminai lo ding reng ka va hmu a, ka thlek vang vang bawk.

Kawrlum hma phel, a khup chena fual hi a ha a, vawt tih hmel deuh hian a inkuangkuah hlun a, a sam leh a hmel landanah chuan a tho chauh anih hmel. Kutin ka hui zauh a, min en reng tak nain a che chang lo a, a awmdan chu min hmu lo emaw, min hre lo emaw tih mai tur a ni.

"Ko duh suh, nichinah pawh kan biaa min chhang lo reng reng," pakhatin a lo tih chuan ka va thlek ṭha leh ngat a, a lo kalsawn tawh a, ṭhutthleng emaw ni hi a keng a, veranda aṭang chhukin a thil ken chu leiah a zuk dah ringawt a, amah lah chuan a thlek vung vung a, a awmdan a mak angreng.

"A mood a fuh vak lo em ni a?" 

"Aniang, a lo thawh aṭangin a la ṭawng lo reng reng, sawti sawn amahin eng eng emaw a khawih kual a, a tei a tei ringawt,"

"Biaki en teh, a tho â leh tawh a ang, kei chu ka hlau thei e..." Remi'n a tih chuan, "I dawih e a, a lo chhuah peih te chuan a zia deuh aniang," pakhat chuan a ti mai a.

"Dawih lam a ni lo, a awmdan hi a mak alawm, ramhuai pai a ang ka ti tlat," tiin pakhat zawk chuan a hnial a, an inhnial bap bap naa keipawn ka hmuh dan ve tho a ni, eng emaw tibuaitu nei a ang, tho â pangngai a niin ka hre lo.

"Saw tiang sawn a awm fo em ni a?" ka tih chuan, "Awm ngun mai, a chang chuan a ṭha leh vek a, tisawn a awm leh thut ṭhin," Remi'n a lo ti vat a.

"Damdawiinah an kal lo em ni?" ka tih chuan, "Hman deuh khan an kal a, doctor chuan rilru lam a tia, a pa vang aniang," Biaki'n a tih laiin, "A pa thla te a hmu ṭhin," Remi'n a lo ti phawk hru a, chutih laichuan Jeminai chu veranda lamah a let a, a samah chuan thil a kai nge mawni a inpawt nasa khawp mai. Mahse, rei loteah pitar kha a lo chhuak a, an inkai lut dawt dawt a, chumi hnu chuan a rawn chhuak leh tawh lo.

Dar 9 rik dawnah ka chenpui te chu an lo haw a, Lawmsangaa lo lut chu a pindan lamah ka zui ve nghal a, "I bialnu chuan min laksak theih ka ring lo," ka ti chu a hamhaih hmel khawp mai.

"Engati nge a, i bia em ni?" a ti hlut a.

"Aih; mahse, a awmdan khu a mak riau, ngaihsak deuh la a ṭha ang,"

"A va buaithlak ṭhin e aw, engtin nge ka zuk tih ang, a nu khuan ka kal hnaih deuh hlek pawhin min melh dan a dik lo nghal zel a nia.." 

"Hman zan ang khan zuk kal ru leh mai rawh," ka ti chu min en vung vung a, min hnial a tum dawn emaw ka tih laiin, "Zanah a ni mai," a ti a, ka hnial bik lo.

Nizan lam thli tleh khan huan thlai leh thil dangte a ti chhe nual a, chhun lam chu keini pawh sapthei zamna siam ṭhain kan buai a, a ṭhenin balhla kung tlute an lo buaipui ve bawk a, kan buai mam mam viau a ni. Chhun chawlh laia ka phone ka en chuan Zoherliana missed call a lo awm a, ka call let ve nghal a; mahse, midang daihin an lo chhang a, Zohera awmna ka zawh lah chuan, "Chutiang ka hre ngai lo, i rawn tisual aniang," a lo ti mai si a, ka hrethiam lo khawp mai.

Hmeichhe ho chu a haw hmasaah kan ṭang a, in ka thlen veleh ka inbual nghal a, ka inbual zo kawta ka va din vang vang laichuan farm neitute kawmthlang lam zawla Jeminai ding chu ka zuk hmu a, an kawmthlang zawla thingkung lianpui lam hawi chuan a ding a, eng nge a tih ni rei dawn chu a che sawn lo.

Lawmsanga lo haw lah chu a khua a rawn sik haw hluah a, zanriah pawh ei peih loin a mu zawi reng a, a va inbual peih ṭawk a ni ber. Zan hmasa ang bawkin current kan nei lo leh a, thli a thaw leh vuk vuk tawh. Tukverh aṭanga van lam ka han thlir chuan arsi an lang ve iar a, ruah sur hnai mai tur a awm loin ka hria. Bang chhan aṭangin Lawmsanga chu ka va au a, "I zia deuh em?" ka va tih chuan, "Ka khawsik chu a reh a, ka vawt tih a reh thei lo," a lo ti tham ṭuak a, a hritlang a nih hmel viau mai.

"Ka kal dawn ania," min chhang mai lo.

Ka tho zui a, thawmhnaw lum hain ka sam ṭawn tham mang loh chu ka ṭawn mawlh mawlh a, ka pen thawm a rin lohnan puan pheikhawk a chhuat pawh rubber hmanga siam chu ka bun a, a lo chhuah rukna thing hmun lam aṭang khan kal ila, tukverh aṭanga ka biak theih mai ka ring a ni.

"Fimkhur rawh aw, i lut thei anih pawhin chahbi chu han la miah suh ang che, Minai biak tum la, thil dang engmah ti rih suh," leh lam amiin a lo tih chuan, "Ka thlithlai ringawt ang, chahbi lak ka tum lo," ka ti ve mai a, chahbi tel loa kan tih a ngai tih chu ka chiang viau tawh, tun dinhmunah chuan Ṭhamawli hi kan buaipui phawt a ngai, thil a hre ve laklawh tawh a, a sawi chhuah mai te pawh a hlauhawm.

Step lam aṭanga kal loin in hnung lam huan lamah ka chhuk thla a, a ko a san deuh avangin fimkhur a ngai khawp mai. Ko ah chuan kawng a awm ve bawk a, ruah sur vangin a lei a banin a nal khawp a, hmuhphiah kung vuana ka han chhuk lah chu kut a lo at deuh nge ni ka kutphah chu a thip vawt vawt a, thi erawh a thi em lo.

Serthlum hmun zawl ka thleng thla a, chuta ṭang chuan in lam kawngah ka let leh hret a, kawng thlang lam ka pan laichuan hla deuh hleka in hnuai pindan êng chu a lang thei a, a pan pheina tur kawng erawh a thim mup. Hnim lah chu a han sang hlawm khawp a, khuara tui tling leh chirh dup a tam si a, kal a har ngang mai. Ka phone light hmangin rah tur ka zawng chawp a, thli a thaw ri vuk vuk reng bawk nen zan boruak chu a nelawm tehchiam lo, hlauh phei zawng ka hlau lo a, rul rah palh chu ka hlauh ber a nih ka ring.

Zawl fai deuh chin ka va thlen chuan ka pheikhawk berh chu phulah ka tat fai thuak thuak a, kawngka chu ka va hmu tak nain a pindan luhna kawngka a ang lo riau a, a tukverh êng lo chhuahna nen pawh a inhlat viau a ni. Hmanhmawh deuh in sir lam ka pan a, thawm nei lo thei ang berin tukverh lam chu ka pan phei ṭhem ṭhem a, ka va thlen chuan a lo inkalh a, parda a inzar bawk avangin a chung a hmuh theih loh a, a thawm ri eih pawh hriat tur a awm lo, a muhil a ni ngat mai. 

Ka kik karh karh a, thawm ka hre zui a, tukverh piah deuh chu khum zawn anih hmel. Ka kal hnaih leh hret a, tile bang a nih vangin thawm a ring duh angreng a, ring taka han kik ngam a ni lo. Vawi thum ka va kik hnu chuan a che thawm ka hre leh a, "Jemina...keimah Jenusi.." ka ti chu min chhang hauh lo, chutih rualin a tho chhuak niawm tak thawm ka hre lawi a, rei vak loah pindan kawngkhar a hawng thawm ka hria a, ka awmna lam a hre lo zawk nge ni.

Rang deuh chuan tukverh lamah ka phei leh a, ka kik leh dawn chiah tih ah a pen thawm bawk ka hre leh a, ka lama a lo kal avangin tukverh chu ka han kik ri karh a, parda chhan aṭang chuan a hlimthla pawh ka hmu thei tawh. Chutah, parda a rawn hlim pawp a, min rawn thlek hu...

Hnai tawkah hian a rawn kun a, chiang fahran hian min rawn en a, a sam a thurin a dâng lep mai bawk nen a ṭihbaiawm lek lek!

"Lo hawng rawh," zai zir meuha ka tih pawh chuan min en vung vung ringawt a, ka sir leh hnung lam te chu a rawn thlek kual bawk a, Lawma a zawng anih ringin "Keimah chauhin ka lo kal," ka ti thuai a, ka thil sawi chu hrethiam awm pawhin a lang chuang lo.

Chutah, a inher vut a, a kalsawn leh ta daih a, kawngka a hawng thawm leh a pen thawm ka hre thuai a, in chung lamah a chho nge mawni. Han letsan leh ringawt chu dika ka hriat loh vangin ka han nghak leh rih a, a rei reuh khawp mai. 

Chutia ka nghah laichuan tukverh chunga ventilation kau deuh chu ka han hmu fuh a, hmanhmawh deuh chuan ka dinna aṭangin ka chhuk a, ka piah hla vak loa mau tlawn chu lain ventilation lam ka pan a, ka han hawlh chuan a sak lem lo, rah chhan ka nei anih chuan ka ban phak ka ring.

Eng emaw han dawh mai tur chu ka melh kual a, a vang nek. Thingbung ka hmuh te lah chu a mawih tawh hlawm a, Lawmsanga chu awm sela kan hawng thei ni mai tur. Beidawng rilru deuha tukverh lam ka pan leh laichuan lei an dawh zawlna niawm taka an lungrem chu ka va hmu fuh ta hlauh a, idea ka nei ta.

Cubic lung a ni a, a ritin laksawn a har ngang mai. Mahse, cement-a char a nih loh vangin ka la thei ta tho a, pakhat te tein ka thiar phei a, ventilation zawnah chuan ka va hung a, pathum ka chherchhuan hnu chuan ka han ban pha tawh. A chung lam kalhna chu ka hawng thei ta phawt a; mahse, hnuai lamah a lo la inkalh tlat mai a, a tih ngaihna chai a awm lo, ka lawn anih chuan tukverh chu ka ti keh emaw a ni ngei ang.

Parda chu keuin pindan chu ka thlek kual a, tv tereuhte leh sofa mi pahnih ṭhutna leng hi a awm a, bang chhak lam cement-a zut ah chuan wallpaper mawi deuh hi a inbel bawk a, a dawhkan leh closet te pawh a mawi viau a, a khum lah chu a zau ṭhain a puanthuahte pawh man a tam ang tih a hriat theih a, a tawi zawngin a khawsa nuam ve tawk tih a hmuh theih.

Mahse, a pindan chhuat leh dawhkan chung erawh a hnawk a ni. A hnawk mai pawh a ni lo a ṭawp. Balhla eina kawr te chu chhuatah a thal phung a, dawhkan chungah lah chuan   bottle ruak leh hmawmsawm eina kawr a tam a, a bula bawlhlawhbawm erawh a ruak hmel viau lawi a, mak ka tih leh deuh chu plate leh no ruak a tam em em chu a ni. A khum bul side table chungah chuan eitur chi hrang hrang a awm a, a lukham chungah diaper bawm a awm vang bawk a, chu chuan ngaihtuahna a tithui hret. Anih chuan a awmdan a hrethiam tihna anih hmel a, invenna chang leh fimkhur nachang a hria tihna a ni.

Parda lehlam ka va keu chuan tukverh piah zawk ami chu hnuailam a inkalh lo tih ka va hmu a, ka chhuk rang khawp mai. Ka lungrem chu tukverh lehlam zawnah ka va dah sawk sawk a, ventilation aṭang chuan harsa lo tein ka hawng thei ta a, ka lut thei chu lawm ve rauh rauh tak ka ni. Pindan chhung ka thlek kual leh te te hnuah kawngkhar lam ka pan a, a thawm ngaithlain beng ka chhi hmasa te te a, chutia bang leh beng insi reng chunga thawm ka ngaihthlak laichuan ka chal zawna kaw tereuhte, kutzungte pawh tiat lo tur hi ka hmu ta a, mi bithlak a ching kan buaipui a nih hmel e.

Ke pen thawm niawm tak ka hre zui a, pawn lamah chuan hla vak loah step a awm tih a hriat theih. Phun bul bul thawm ka hriat leh takah chuan tunge a nih ka hai lo. Rang deuhin kawngkhar chu ka hawng a, pawn lam light chu a lo êng dul ruih a, ka piah lawka thing hmanga siam leilawn chu ka va hmu bawk. 

Ka pan phei ṭhem ṭhem a, chutih rualin ke pen thawm chu a awm ve reng bawk a, a kal muang hle thung. Inlan duh mai loin ka va dak hmasa a, ka thil hmuh chuan min tiphu chiam pek. Step-ah chuan a ke lam bih chungin a lo ding kun ngur a, a kutin step vawn ban chu a vuan bet ṭung bawk a, a ding bu lûk lûk mai.

Ruih a nei em mawni ka ti rilru a, a awmdan hi hrai ruih a ang ka ti. Han pan chhoh tuma ka pen hman uk tihah a rawn ding mar thut a, let leh rang tak ka ni. A rawn pen thla chhut chhut a, a lu a hai anih hmel ta viau mai. Step tawp a rawn thlen ruala min hmu chu mak ti awm pawhin a awm lo, a kutin min rawn ban a, ka banah a rawn chelh a, a pindan lam a pan zui zat a; mahse, a luh hma chuan rawn hawi let lehin, "An thi vek tawh," zawi sep sawp tak mai hian a ti a, kei chu ka lo meng phawk hruin ka ring.

"Tu te maw thi?" 

A lo nui sen sen a, "Keiman lungin ka chhu a, a sawm vek..." a ti leh reuh a, he nu hian eng thil nge maw a sawi hi le!?

Pindana a lut chu ka zui rang khawp mai. Khuma a ṭhu chu ka va pan rawk rawk a, "Hei, i awmdan a va mak ve, tunge lunga i chhut chu..?" tih pahin a darah ka va sawi a, a lo ngaithei lo, ka kut chu a rawn vuan a, min paihthlaksak hmak a, min melhrum khâ khâ bawk.

"Tute maw thi...?" 

"Chakai kha, hetah pawh an awm ang," tih leh a khuma lawn a rual a, a lukham te chu a va hai sawk sawk a, "A hnuaiah an awm," tih pah chuan a bed sheet te chu a hlim kual a, a awmdan chu a pangngai lo tih piah lam daih a ni. Zu rim a nam lo a, damdawi rui emaw rilru buai a ang zawk mah.

Han tih vak ngaihna ka hre lo, "Eng maw i zawn?" ka tih lahin, "Chakai a tam lutuk," tih hlirin mi a chhang a, a khawngaihthlak zawk khawp mai. Ka en reng lai chuan a kut a hup thawk a, "Pakhat ka man e," tih pahin min rawn nuih leh var var a, chutih laia a hmui duk deuh ka hmuh chuan ka va bih hnai vat a, "Tur i ei em mawni," tih paha ka han khawih chuan a lo dawh hle hle. Ka mitah min en kal a, a mitmeng erawh a phi chial a, a meng â deuh riai bawk.

A eitur inchhawp te chu ka en kual a, plate te pawh chu ka hnim kual dan dan a, bowl tea thil tuiril lam hring deuh lek lek chu ramhmul damdawi a niin ka hria. "An hrai rui che a ni maw?" ka ti vang vang a, ani erawh a la nui var var reng. "Khawimaw i kuttin kha ka lo en?" tia a kut va ban ka tum chu a lo duh awzawng lo, a chakai man ka chhuh a hlau a ni awm e.

"Ka ta anih hi," tih pahin min inhersan nghat a, va en luih ka tum pawhin a kuna a lo inhliah ve tlat a, a en sak theih der loh.

A khum hnuai ka zuk bih chuan wine bottle niawm tak hi ka va hmu a, "E khai aw.." ka ti hlut chu ka hnungah a rawn chum ri dawm mai. "I bengchheng..." a ti vin hlar a, thawm dim turin ka lo ti ve sawk sawk.

Phur fahrana bottle ka lakchhuah chuan ka beisei ang engmah ka hmu lo, wine bottle pangngai mai a ni, varak lem chuanna kha a nih ka lo ring hman a; mahse, bottle-ah chuan pangpar lem a chuang a, varak lem engmah a awm lo. Mahse, chu pangpar chu ka hmu tawhin ka hria, bottle-ah ni loin huan khawi lai emaw ah hian ka hmu tawh chiang a ni.

Thli a thaw na sawt khawp a, ruah hmi a tla ṭan der bawk nen ka chhohsan rih mai a ngai a, sana ka en pawh chuan dar 1 a lo ri dawn thuak tawh. "Ka kal dawn ania aw, tukverh saw i lo kalh thei angem..?" ka va tih chuan min chhang lem lo, "Lo tuar hram hram phawt teh," ka'n ti leh ngawt a, min ngaihsak loin a chakai ngawt chu a buaipui a, a dang pawh man belh leh a tum a ang. 

Tukverh aṭang bawk chuan ka chhuak a, ka lung lak te ka dah fel leh hnuah hmanhmawh deuhin huan lam ka pan a, kal lam laiin let leh lam chu kal a harsa zawk mah a ni, ka ko lawnna lah kha a lo nal tawh khawp a, vawi thum zet chu ka tawlh thla nghe nghe a, ka invawnna hmunphiah kung vangin ka kut a pilh phung bawk. 

Ka intihfai hnua ka mu chu ngaihtuahna a vak kual nasa ngang mai, Lawmsanga lah chu hrilh duh ka ngah tehlul nen ka biak pawhin min chhang thei lo. Ka muhil lo tluan zak a, khawvar veleh tho chhuakin veranda-ah ka va ṭhu a, thil ka ngaihtuah let a ni ber ang chu. Lawmsanga nu lo tho chuan thingpui min lo siamkepin ka bulah a lo ṭhu ve reng a, he lai hmuna an awm ṭan dan te ka lo zawt a, tleirawlte a nih aṭangin a lo awm tawh a nih hmel e.

Serṭawk te kan kheh dun a, "Heti hian ni saah kan pho ro anga, rei deuh thlengin a dahṭhat theih alawm," a ti siam siam a, pa Taia nen an inngaihzawn laite a sawi pah a, "Min lo rim ngam chiah si lo a, serṭawk min pe tur hian a lo kal ṭhin a, u Lalpuii pa, ka pu khan mi a duhpui lo lutuka, ka han raino te kha Lawma pa thiam lohah a puh fai vek a, an inhnawt chhuak lo chauh zel," tih angreng chu nuisang chungin min hrilh a. 

"Hetah nau i hring em ni?" ka tih chuan, "Hring hman lo, Lawma thla 7 a nih lai hian kan tlan ru daih a, helaia han hrin chi pawh a ni lo, u Lalpuii te an chhangchhe ve si a, ka raipuar kha ka hrisel lo a, eng ka ti ṭha thei tawh si lo a," tiin min chhang a.

"In lo let leh chuan an lo pawm ve leh mai che u em ni?" ka tih chuan, "Ni mai e, kalna tur dang kan nei si lo a, manipur lamah kan awm nuam vak lo bawk nen he laia inbenbel hi ka duh a, ani'n min lo mamawh ve tho bawk a," a ti leh sap sap a.

"Lawma hi engtin nge school a kal ṭhin?" tia ka zawh leh chuan, "Ka pu khan a tute rualin a hruai ve mai zel, a boral hnu kha chuan a harsa angreng a, rei pawh a zir thei ta lo chu a nih hi.." a ti halh a, "In in hi an mahni khuan an sak sak che u em ni?" tia ka zawhna min chhan dan chu ka beisei loh lam daih a ni.

"Ahma chuan u Lalpuii te chenna a ni ṭhin a, a pasal a tlanbo hnu khan inpui an fin leh a, hna thawk ho riahna a ni ṭhin a, kan let leh laikhan a lo ruak remchang a, kan luah zui ta alawm," a tih chuan ngaihtuahna a buai map.

"Pasal hmasa a nei elo?" ka ti hu a.

"Nei e, i pu Muana nena an fa chu Nguri chauh hi alawm, Dinpuia te unau hi a pasal hmasa nena an fate an nia, Nguri pawh a pain a duat fal bik hi, an unau ah chuan a lal teh mai ania," a ti leh duah a. Chutah, mak ka tih deuh a rawn sawi zawm leh a. "U Lalpuii pasal hmasa kha zu heh deuh mai ania, an pawisa zawng zawng ru chhuakin a tlan bo a, an zawng nasa teh asin, chung laichuan i pu Muana pawh hi an hnenah a cheng ve tawh a, an pa tlanbo aṭanga kum khat awrh a liam hnuah an innei alawm," a ti dap dap a, an chhungkua chu ka rin aiin an hnawk daih mai. An unau zinga headmaster nupui ngo vur bik leh a hmelṭha bik em em kha mak ka ti reng a, an lo hetih vang lek a nih dawn hi.

Lawmsanga a lo thawh chuan dar 7 a pel tawh, "Thil sawi tur ka ngah ania," tiin in hnung lamah ka ko phei a, "Vawiin chu chawlh la mai rawh," ka ti nghal thawr a.

"Chawlh em em pawh ka ngai lo, ka khua a sik loh chuan ka thawk thei reng alawm," a lo ti let heh a, "Chawlh chu dil rawh, huanah thil zawn ngai kan nei, Jeminai chu ramhmul damdawi an pek vang a niin ka hria, wine bottle-a pangpar lem kha huan khawi lai emaw ah khuan ka hmu tawh a, i hnim tûr ei nen khan kan zuk zawn a ngai," ka ti zung zung a, hamhaih hmel fein min en a. "Kanna chu an chinna hmun ka hria alawm, Minai chu engtin chiah nge a awm?" a ti zui zat a, ka hmuhdan ka han hrilh chuan a rilru a buai hmel khawp mai.

"Tu tih nge le, engvanga ti nge a nih ang, Minai hi damdawi en chhin nan an hmang a ni lo maw?" a ti nuah nuah.

"A ni maithei, Jeminai pindan kawngkharah khan awng a lo awm a, tu emaw chu hlauh a nei chiang a ni,"

"An bihthla ṭhin a maw?" 

"Aih, aman a bihthla..." a hriatthiam loh hmel viau mai.

"Awng a awm i tia, engtin nge aman a bihthla tih i hriat theih a?" a lo ti he haw a, "Lo en la.." tih leh kal ka rual a, chokaah perek leh tuboh ka va la a, ka pindan lam ka pan zui a, min lo zui ve thuai bawk.

Ka pindan kawngkhar chu ka han chhu awng a, "Han en teh," ka tih chuan a bih ve mai a.

"Perek chhuahna hmawra a ther lai kha i hmu em?"

"Hmu e.."

"Pawn lam aṭanga i rawn verh anih chuan a ther kha chhunglamah a awm ang, Jeminai kawngkhar ami kha a pawn lamah a ther a, chhung lam aṭanga verh a ni," ka tih chuan a bu ve nghat nghat a. Mahse, tunge a bihthlak a, eng vang nge tih chu zawhna a ni leh ta, kan wine bottle zawn pawh chawlh rih a, kan nulai hi kan buaipui hmasak ngei a ngai, hetiang chuan a daih rei lo tawp ang.

Ka rilru hria niawm tak chuan, "Minai hi ṭanpui hmasak a ngai, hetiang chuan a dik dawn lo," a lo ti ve vat a, "Chawlh chu la rawh, hmannia kan kalna hmunah khan zuk kal teh ang, i buai laia i awmdan leh a awmdan kha a inang riau a, an thil pek ang i ei fuh a nih ka ring," ka tih chuan, "Ka nu khan tawtawrawt par a nih chu, tûr a nei alawm a tia," a ti ve leh a, a tui kha a hring deuh a, tawtawrawt par aichuan a hnah pawh a nih zawk ka ring.

Lawmsanga chu a pain chawlh a zuk dilsak a, an lo phal ve mai bawk a. Chaw eikhamah kan kal nghal mai ang chu ka tih laiin an nula Biaki kha a rawn lang hlawl. "Pi Nguri'n lo chhuk lawk rawh se a ti che," a rawn ti ta mai a, "Keimah maw..?" ka lo ti let hu a, "Engthil nge ni a?" Lawmsanga pain a lo tih chuan a hriat bik loh thuin a chhang a, a let leh nghal mai bawk.

"Nizanah i kal tih an hria em ni ang?"

"Ka hre lo le, an hriat chu ka ring chiah lo,"

"An lo hria anih chuan Minai chhuak ka hmu a i ti mai dawn nia, chhuanlam dang chu an awih lo ang," Lawmsanga'n a tih chuan ka ngawi rauh rauh, min lo chik viau tawh zawk em mawni tihtein ka ngaihtuah a, awm a nuam zan lo.

Phur lo deuha ka chhuk chu veranda-ah min lo nghak a, kawt zawl ka thlen chuan min lo hui zauh zauh tawh. A bul ka va thleng chu, "Scooty i khalh thiam em?" a lo ti teh daih a, amah lah chu a thlan hluam a, a damlo emaw tih tur a ni.

"Khalh thiam e..." ka tih chuan, "A tihzia hlauh chu, Lawma tirh ka tum a, a pa khan a damlo a ti sia, khuaah min va kal sak lawk mai rawh," a ti zung zung a.

"Eng nge tih ngai a?" ka tih laichuan a rawn kun hnaia a, zawite hian "Ka ṭhiannu thil ka chah a, KM hotel-ah i va lam dawn nia, ka hrilh anga an lo hre mai ang che," a tih chuan ngaihdan ka lo nei hmanhmawh a, ka chak fahran lo khawp mai.

"Eng thil nge ni?" ka tih chuan, "Hriat a ngai lo, va lam tawp la a ni mai," a ti bul nghat a, han zawh buai leh chi a ni tawh lo.

In chhungah a va lut a, chahbi min rawn pek pahin, "Garage-ah sawn a awm, rei lutuk suh aw, ka chhungten i kalna an zawh che chuan sampoo ka leisak i ti dawn nia, hei hian lo lei rawh," tiin pawisa min pe tel a.

"Eng sampoo nge ka lei ang?" ka ti leh chu min nin hmel tawh ngang mai.

"I duh duh kha rawn lei rawh, rei miah suh ang che," a ti hmak tawh mai a, ka chhang zui tawh bik lo. Scooty chu ka va la chhuak a, tlang lam ka han hawi chuan Lawmsanga'n an kawt aṭangin min lo thlir reng a, ban ka han vai ringawt.

Ka tlan chhuah hnu, gate ka pel fel awrh tihah Lawmsanga chuan min lo call a, "Eng nge i tih dawn?" a rawn ti a. "Hotel-ah thil lam turin min tia, KM hotel-ah," ti maiin ka chhang a.

"Damdawi a nih chu," a tih chuan min ṭhawng lem lo.

"Hetiang tho hian nangpawh an tir che ti raw?"

"Ni e, vawikhat i laksak chuan a la tir fo ang che, khua i thlen hunah mask lei la, tumah i hmel hmuh tir suh aw, i tang fuh lo thei ania, fimkhur viau rawh.." tiin min chah ve luam a. Duh lem lo chung pawh hian sual kawng zawh hi a lo har dawn lo khawpin ka hria, kei chu heti mai hi ka ni a, Veroi khan engtin nge bul aṭan ve ang le aw, ngaihtuah a ti thui khawp mai.

Khua ka thlen chuan dar 10 a pel tawh a, ka kalna tur hotel chu a awmna ka hriat loh vangin ka zawng chawp a, mi pathum lai chu ka zawt hman. Kawngpui dunga awm a lo ni lo a, tlak lamah kawngpui aṭang pen chhoh ngai hla lo teah a ni. Building chhawng thum a ni a, an khuaah chuan a ṭha ve ber pawl a nih ka ring. A bul maia dawrah chuan sampoo lei pahin mask ka va lei a, tlangval pahnih lo ṭhu chuan, "I hmelṭha i khuhbo vek a," tiin min lo chhaih a, ka chhuah hnuah "Call girl aniang," pakhatin a ti zauh ri chu ka hre pha a, ka hawilet duh lem lo. 

Hotel lam chu ka pan a, ka va lut dek dek chu nu pakhat hian min lo hui zauh zauh a, engtin nge min lo hriat nghal mai theih ni. "Nguri thil tur chu em ni?" a tih chuan ka bu ve mai a, eng emaw sarang duma fun, cellotape-a char ṭup hi min lo pe a, "Bag pawh i lo keng nange?" a ti he haw mai a, han ah bona takngial pawh ka nei lo. Chutah, kan piah lam dawhkana ṭhu nula chu a au a, "Thil khaina lo pe rawh," tiin a hrilh zui a, nula chuan shopping bag lehkha hmanga siam lianpui hi min lo pe a, ka sampoo lei nen chuan ka dah a, ka chhuahsan leh nal nal bawk.

Ka thlen in hluite han tlawh ka duh viau nain Lawmsanga nen kan tihtur kha ka hre rauh rauh a, tawi khawmuang loin ka let leh nghal a, ka va thleng chu kawtah min lo nghak ran mai. "I va rei em em ve," a lo ti pawr hlur lehnghal a, ka thilpek erawh a lawm hmel viau, "Pawisa kir kha chu nei rawh," tiin a pawisa bang chu min pe bawk a, hnial pawh ka hnial buai peih lo. 

Ina ka chhoh leh chuan Lawmsanga chu hnahthawh kawr nen a lo insiam diam tawh. "Engati nge khang te i hak duh, hna kan thawk dawn pawh a ni hleinem," ka ti liampuat a, "Thosi a tam, kawrban tlawn ha rawh," tiin pindana ka lut chu min rawn au zui a. Jacket zangkhai deuh ka va ha a, pheikhawk ka bun leh hnu chuan ka inpeih fel a ni der.

Step lamah chhuk loin nizan lama ka kalnaah khan kan inzui thla a, kopanga kan chhuk tur chu ka huphurh tawh khawp mai. Ani chu a kal hmasaah aṭang a, "Lo la chhuk suh," a tih vangin ka nghak ve rih a, a chhuk fel hnu chuan a ban a rawn phar ringawt.

"Eng nge a?" nui chunga ka tih chuan, "Lo kal rawh le.." ti zawi sup a, ka en deuh vang vang.

"Hlau suh.."

"Ka hlau lo, nizanah pawh ka kal alawm, helaia hmunphiah kung hian ka ut a at pilh hrup mai.." tih leh chhuk ka rual a, "I chaw bar lai khan ka hmu daih tawh," a ti chu ka chhang lem lo. A bul ka thleng ṭep tawh tihah chuan ka rahna a pial thut mai a, ka thleng thla tur chu min lo man rang khawp mai. Min chawi thla nawlh a, ka thinphu rang dup dup chu tlak ka hlauh vang a ni lo, a rawn chet dan vang zawk a ni. Chutah, mawi fahran hian min rawn nuih a, ka hawisawn rang ngang mai. 

"Kal hmasa rawh," a tih vangin ka kal hmasa a, "Fimkhur rawh i tlu ange," a rawn tih te chuan ka ngawi ran tawh.

"Eng nge i ngaihtuah a?" a tih chuan, "I bialnu," ti maiin ka chhang a.

"Bialnu hlui a nia," a tih ri chuan awmzia a nei deuhin ka hria.

"In la induh tho alawm," 

"Minai chu ka farnu angin ka en zawk alawm,"

"A'n pha vel a, farnu anga en te tunge ngaizawng ngai,"

"I hrethiam ve lo ang, a tir kha chuan i ngaih ang kha kan ni tho a; mahse, rei lo te chauh a nia.." kan ngawi dun vang vang a, thui fe kan kal hnuah, "Ngaihzawng neih changa an vei reng ṭhin ang hian ka la awm ve ngai lo, ka hmangaih loh vang a ni angem?" a rawn ti mauh mai a, he pa hian a ngaihsak tawk lo khan ka hre reng a ni.

"I hmangaih thu chu i hrilh ve tho a ni lawm ni?" ka tih san mai laiin, "Hrilh lo," a lo ti leh bawl a, a hmuh loh lamah ka ner nak.

"Lawm lo pawh nise ka dem ta lo..." ka han lehhawi chuan a lo nui suk a, "Hetianga awm hi ka duh bik hleinem," a ti ve mai bawk a.

"A hmelṭha a, a duh em em bawk che a, engati nge i hmangaih mai loh a?" ka tih chuan, "Chutiang anih vang chuan ka hnar thei lo a, a buaithlak dawn tih chu ka hre reng; mahse, kei aia ṭha zawk a phuin ka hria," a ti a.

"I inngai hniam mai mai a nih chu, i phu lohna a awm bik hleinem, hmangaihna chuan dinhmun te chu a chawk cham vek mai an tia lawm," ka ti ve duah a. "Ka bialnu a nih lai khan ka tihlim ngai lo a, keipawh ka hlim chuang lo, innei tura ka inngaihtuah chang phei chuan ka huphurh ṭhin," a ti leh ta zel a, "I hmangaih lo anih chu," tih bak chhan dan dang ka hre tawh lo.

Ani lah chuan, "Anih ka ring," a ti ve hmiah bawk a, kan thilsawi chu a mimal thil lutuk tain ka hria, ka hriat ṭul thil ni pawhin ka hre chiah lo. "I hnah lakte kha i la hre vek thei angem?" tiin ka zawt ta daih a, "A har tawh awm e, hmu pawh ni ila engtin nge kan tih ang," a tih chuan han tih vak dan ka hre bik lo, Jeminai bulah ei loh tur tih kan hrilh theih phah chuan a ṭha a ni mai ang.

Kan thlen thlak chuan khuai an lo thlawk fua fua a, "An va tam ve, an rau em ni hei.." ka ti chul a, va lehhawi ka tum chu a jacket-in min rawn khuh hlun. "I luah an zuk che chuan i sam a ṭuak mai ang," tiin a nui kur kur a, min kalpelin a hmaa kan ṭhutna lam kha a pan a, ka zui ve thuai bawk.

"Heng lai sir vela hnim hi chu a ni chiang mai a, tawtawrawt par hi chu ka khawih lo, a hnah hi chu ka la maithei," ti nuah nuah chungin a enkual a. "I nu khan tûr a nei a ti si a," tih paha tawtawrawt par hnah va ban ka tum chu ka kut a lo vuan chawt. "I â ve huih palh ang," tiin amah zawk chuan a va thliak a, a kutin a nuai sawm a, ka lama a rawn ken hnaih rualin ka lo hnim ve vat a, a rim aṭang chuan a ni pawhin ka hre lo.

"Hnim vak vak suh,"

"Tinge, ka at i hlau em ni?"

"Hlau ang chu.."

" Lo â ta ila engtin nge min tih ang?"

"Ka pu haw ang che.." ka nui hawk hawk. "Ka kalsan ve daih ang che i ti dawn emaw ka tia," ka tih chuan, "Nang ang ka ni hleinem, kei chuan ka ngaihsak ang che; mahse, phuba chu ka la maithei," a ti vei nghat a.

"Engtin nge phuba chu i lak anga?" hnimhnah dang pawh mawlh mawlh pah chuan min rawn thlek a, "I hre duh lo ang," a ti leh reuh a, min ti hre chak zawk mah e a.

"Min put laia min thlauh i rilruk a ni maw.." 

"Chu aia ṭha daih chu a nia ka ngaihtuah,"

"Eng thil ngeee?"

"I va hre chak ve, beisei i nei a ni lo maw?" a ti chu ka helh ngang mai, "Eng thil nge ka beisei anga, awm ang lo hian..." a rawn ding vut a, a hnim ken chu a nuai sawm bawrh bawrh a, ka hmai zawna a kut a rawn dah laichuan ka mitah chiang fahran hian min en a, minti lai dawn dawn mai.

"Tiang khan min en suh.." tih pahin a thil ken chu ka hnim a, a rim a na lutuka rei pawh ka hnim duh lo. A hmel ka han en chuan a awmdan ngairengin min lo la en a, mit la sawn duh loin ka en lui ve ta ngat a. 

"Eng nge a?"

"Engmah," tih pahin lu a thing a, ka hrethiam lo.

"Tinge min en reng si?" lawm lo awka deuha ka tih chuan, "Ka hre bik lo," a ti zawi sup a, chuti chung chuan min la en reng.

"Awm i tinuam lo ania aw..." ka ti ta ngawt. A nui deuh suk a, "Sorry," a tih ri chu ring lo tak a ni. Kalsawn ka tum uk tawh chu ka inher rem leh rih a, min lo la en reng bawk nen, "I sawi duh chu sawi mai teh," ka ti ta ngawt a, min duh thu a sawi anih chuan ka hnar nghal ang ka tih rilruk laiin, "Ka hriattirh che kha chuan i sual hmel lutuk a," a lo ti teh daih a, min tihamhaih khanglang...

"Fel minti ta em ni a?" pawr fea ka tih chuan, "Ti em em lo," a ti leh lawi bawk si, hriatthiam a har nek.

"I sawi awmzia pawh ka hre lo e a," tih leh kalsan ka rual a, kan chhak deuha hnim te chu ka han en kual a, ani pawn hnim dang a lo la khawm ve mek a, a khat tawkin ka zuk thlek leh ṭhin. He pa hian ngaihzawng pakhat chiah a la nei em mawni le, a duh tak nen inngaizawng sela a la na ngawtin ka ring a ni.

A rawn hawi thut a, ka hawisawn rang khawp mai. Ka zuk hawi thlak leh chuan a nui suk suk a, a sir zawnga a landan mawlh chuan Sangpuia min hriatchhuah tir leh ṭhin, an che zia te, an fiamthu thawh dan te, an lawm loh changa an awmdan thlengin, mihrang ni siah chuan inang fuh ve tak an ni, an bula han awm changa boruak dam dup ṭhin te hi thil mak ve tak zawng a ni.

Kan let leh lamah chuan grape huan lamah kan kal a, kanna hmun a tih chu chhek in chhak ber sirah a lo awm a, an ching tam khawp mai, "Hmun dangah pawh a la awm," tih pah chuan a tih dan ngai tein a nuai sawm leh a, a rim chu a inang ta deuh. Mahse, Jeminai damdawiah kha chuan thil thur leh hiar deuh rimte a nam tel a, eng eng emaw pawlh khawm anih ka ring.

"Hei hi a nih dawn hi," ka tih chuan, "Mahse, hei hi chu damdawi hrang hrang siamnan an hmang a, tûr a ni lo asin," a lo ti khauh a, kan sawi fak theih loh chuan a damdawi ei tawh lo tura tih mai a ṭhain ka hria. 

"Mahse, engati nge maw in awm dan kha a inan em em le?"

"Thluak tibuai chi thil angah chuan a thawh dan inang te pawh a awm aniang chu, Kanna hi tûr a ni tih erawh a dik lo deuh ang," a ti nuah nuah a, "Damdawi siam chawp ei tawh lo turin i hrilh dawn nia," ka ti chu min chhang tawh lem lo.

Kan haw hnu lawkah a pa vawk chaw chhumpui turin a kal a, kei ka pheikhawk bal su turin tuikhur lamah ka kal thung. Darkar chanve dawn hnua ka chhoh leh chuan in aṭanga Jeminai lo chhuak ka va hmu a, ani pawn min rawn hmu ve nghal a, ka lam a rawn pan avangin ka lo en chik viau mai. Ka bul a rawn thlen hma chuan, "Khawiah nge Lawma?" a rawn ti lauh a, a pangngai hmel leh viau tawh.

"Vawk chaw an chhum, i va ṭhat hmel tawh ve?" min chhang loin a rawn kalphei hlawk hlawk a, ka bul a lo thlen ruala "I zia deuh em ni?" ka tih chuan lu a thing sawk sawk.

"Zia lo, ka ṭha lo lutuk, inentir tura kal mai te kan tum a; mahse hei...tukin chu ka tho nuam.." a ti a, a hmel erawh a dâng lep a, a mit a bui em em bawk.

"Nizanah kan inhmuh kha i la hria em?"

"Engtikah maw?"

"Aa...a ho lutuk, i khua te a sik em, engtin chiah nge i awm?" ka ti ta daih a.

"Ka khua a sik ngai lo, luak chhuak leh luhai ka nei ṭhin a; ka ril a ṭam bawk sia, engmah ka la ei lo a.." ner nang chungin vawk in kawng lam a thlek a, "Chahbi kha in la duh em?" tiin min zawt bawk.

"Tunah chuan ngai rih lo, i ril a ṭam chuan thil va ei ta che.."

"Engmah ka ei ngam rih lo, ka thil ngeih loh ka hre lo a..." a tih chuan ka khawngaih angreng.

"Ramhmul damdawi kha engmah ei tawh suh," ka ti chu mak tih hmel deuh hian min en a, "Engtin nge ka ei tih i hriat?" tiin min zawt zui a.

"Ka hre ve tawp, damdawi chu ei tawh lo la, thil dang chu a ei ngam ka ring," a chhanna duh anih ringin chu thu chu ka sawi ve tawp mai a ni.

"Nia, engkim ei hlauh vek chu a ṭha chuang lo, chahbi chu in mamawh lo maw?" a ti leh a, "Tihdan dang a awm mai ang, nangmah kha inbuaipui zawk rawh," ka tih laia ka aw chu a nelawm ve hlein ka hria.

"Lawma bulah ka ṭha tawh tih i lo hrilh dawn nia, a number ka nei tawh lo a, dil che chu ka duh chiah si lo a; mahse, ka duh tih lo hrilh rawh aw.." a zak nge ni a nui deuh lek lek a, ka hrilh tur thuin ka chhang ve mai bawk.

"Bye..." a tih hnuah a let leh nghal mai a, keipawh in lamah ka chho a, ka kut pilh lah chu ka insuk vangin a thip zual a, dettol te ka hnawih ṭha leh rih. Lawmsanga te pafa an lo haw chuan eirel a hun dawn tawh a, pa Taia hi a che peih khawp a, an nu eirawngbawl te hi a pui ve surh surh zel a, ka tan hian tih tur a tam lo ṭhin khawp mai. 

Inrinni chuan khua aṭangin mi an lo kal nual a, putara te chhung ho pawh inkhawmin an zai ṭhap ṭhap mai a, Lawmsanga nu leh pa pawh an zuk tel ve nghe nghe. Tlaiah Remi leh Biaki an lo leng a, kan nulai chu a mu nileng anih hmel. "Niminah ṭha deuhin a rawn tho a, a pindan te pawh a ti fai vek a, tukinah zun a cheh leh.." Biaki'n a tih chuan Lawmsanga'n min rawn mitmei vat a, ka hrethiam chiah bik lo, ei tawh lo tur khan ka hrilh ngei mai a, a ei lui zel em mawni dawn le?

"Eng damdawi nge an pek ṭhin?" tia nula pahnihte ka zawh chuan, "U Minai chuan damdawi a ngah mai, amah chuan ramhmul damdawi a ngeih loin a inhria a, keini pawn kan tem ve chhin tawh a, engtin mah kan awm lo, amah pu Muana pawn a ei fo sia, nu Atei leh nu Nguri pawn insawiselna an nei chuang lo," Remi'n a lo ti luam a. Ramhmul damdawi chu rinhlelh kai ber a ni chungin ni lo zawk ta se tiin ngaihtuahna ka nei a, thil dang a awm em mawni ka ti rilru neuh neuh.

 

Ni a liam ve bek bek a, vawk chaw lak, a chhum, a chaw pek, bual leh eng eng emaw tih tur a tam ṭhin a, hna a chattlak meuh lo, keipawh chuan ngaiah ka nei ve ta derin ka hria. Lawmsanga chu nimbu lo turin hlawhfate nen an inzui chhuak nitina, zan lamah a ṭhianpa Puia a lo leng a, a changin khuaah te an va kal ṭhin bawk a, engmah hriat belh nei loin hun kan khawhral a ni ber e. Chutih laiin ka nulai erawh hmuh tur a awm meuh lo, a pindanah a tawm chawt a, a la pangngai leh lo tih chu a chanchin kan hriat chhun a ni rih.

Zan khat chu Lawmsanga nen kan zuk kal leh a, tukverh kan kik rualin min lo chhawn vat a; mahse, tukverh min hawn duh lo thung. "Ka hmuh tlak rih loh, ka awm hnawk lutuk," a ti deuh tlat a, han biak lumlam theih vak pawh a ni lo. "Damdawi kha i la ei em ni?" tia Lawmsanga'n a zawh chuan, "Ei tawh lo, pum damdawi leh vitamin chiah ka ei tawh," tiin a rawn chhang a, "Min ngaihtuah suh u, ka ṭha leh mai ang, naktukah ka lo chho dawn nia," a tih vangin kan haw san leh ta bawk. Mahse, a tuk nilengin a rawn lang lo a, zan lamah pawh a hmel hmuh tur a awm chuang lo.

A tuk thumna velah inentir tura an kal thu Remi hnen aṭangin kan hria a, a ṭhiannu Azoi leh a pi nen an kal a ni awm e. Headmaster nupui lah chuan mi a tir ta sek mai a, a vawi linaah phei chuan hlawh te min siamsak a, a pe chhuaktu lam hriat chian ka duh vangin pawi tihna em em pawh ka nei tawh lo. Ka va kal chang chuan nula pathum hi an lo awm ve ṭhin a, ka chhang rual vel, hmel pawh chhe lem lo tak an ni hlawm, an pangngai hmel fu reuh a, Lawmsanga'n "Call girl an niang," a ti tak naa an hmel aṭang chuan rin thiam har tak a ni.

Ṭum khat ka kal leh tur chu gate chhakah Lawmsanga'n min lo nghak a, "Nangmaha i kal ziah hi a ṭha lo, ka kalpui ṭhin tawh ang che," a ti teh tlat a, mahni a kal aichuan tiin ka hnial bik lo va, kan va thlen pawh chuan hotel-a ka luh ve a phal lo a, a thlang dawr kawtah ka lo nghak a, amahin a han lam a, a rawn chhuak leh rang khawp mai. 

Kan tlan chhuak leh ṭep tihah bike pakhat hi chak deuhin a rawn tlan a, a bike chu ka hriat hnu a an em avangin ka thlek zui a, hotel kawta a din thleng chuan ka thlir a, a helmet a pelh chuan amah a ni theiin ka hre lo, a tukkhum lam chauh ka hmu a, a sam a buk deuh a, a tukkhumah a ṭawn bawk a, a inchei danah pawh Zohera chu a ang lo viau a ni. 

"I hmelhriat em ni?" Lawmsanga'n a tih chuan, "Ni lo, a bike zawk kha ania ka en," ti maiin ka chhang a, chutih laichuan mipa chu hotel chhungah a lut fel tawh.

In kan thlen hnuah Zoa chu ka call a, hmeichhiain a rawn chhang ta thung. "Zohera a awm em?" ka tih chuan, "Tu nge Zohera?" a lo ti let hu a, "Phone neitu hi ka lo bia ang," ka tih pawh chuan, "A muhil tawh, tunge i nih?" a rawn ti pawr hlar a, han insawi pawh ni ila min hre dawn chuang lo tiin phone ka dah hmak a, Zoherliana chu ngaihtuah vak lo zawk ila a ṭha maiin ka hria.

"Maite chhum i ei chak em, ka mai thar rang saw chhum tham a ni tawhin ka hria," a tih vangin zing kharah Lawma nu nen a chuktuah huanah kan va kal a, maite sei zit zet hi pathum a lo awm a, "A va zâm lo ve, a kung a tet nen a rah a lian bawk sia, mai pangngai a ni lo em ni," ka tih chuan, "Mai thar rang a nih hi," tih pahin a par pakhat chu a lo a, a par dangah a va tat kual a, a awmzia ka zawh chuan, "A rah theih nan hetia tih hi a ngai ve ṭhin a, a pa chi leh a nu chi a awm ang hi a ni mai, thlai leh pangparte pawh hi khuai hian a chi hi an pu kual ṭhin a, khuai hi an ṭangkai teh asin, khuai vang hian..." ngaihthlak pawh ka ngaithla zo hman lo, in lam panin ka tlan phei hlawk hlawk a, a pindan aṭanga Lawmsanga lo chhuak tur chu ka va nam lut rawk rawk.

"Ka hre tawh, khawizu kha anih kha....pangpar tur nei an bawm a, khawizu siam nan an hmang a, chuta chuan khawizu tur nei a rawn chhuak..." hrilhhai hmel fe hian min en a, ka thil sawi chu a hrethiam map lo a ang.

"Tawtawrawt par hmuna khuaite khan a par kha an bawm luih luih kha, Jeminai pindanah khan khawizu ka hmu, i awmdan leh Jeminai awmdan kha a inang viau bawk,  a thawk rei lo a, chuvangin a rawn harhfim leh ṭhin a; mahse, a in apiangin khatiang khan a awm ang, khawizu tur nei a in anih dawn kha.." ka tih takah chuan a meng deuh kawk a, "Chutiang ngaihtuah nachang ka lo hre miah lo," a ti ve hlut a, keipawn ka hre bik lo, midang pawh hian an hre lo nge mawni dawn le?

"Kan hrilh vat a ngai,"

"Keiman ka hrilh ang, a ei chhan hriat a ngai, ka duh angin i zawt leh dawn lo," ka ti zung zung a, "I zuk kal ringawt dawn em ni a?" a tih chuan, "Ka leng dawn maw le, ṭhian te pawh ka neih ve kha.." ka ti a, a nuih a za khawp mai.

Putara te kawt zawlah chuan mipa naupang pahnihin ball an lo pet a, hmeichhe naupang pakhat hian cycle a lo khalh bawk a, veranda-ah putara chuan mei a lo zu hlat hlat bawk. "I va tho hma ṭhin ve," a lo ti var a, "Nang deuh alawm, artui lak a ngai leh tawh em?" ka ti let ve vat a.

"Niminah mi dang ka laktir a, eitur in duh chuan zuk la ve rawh, i duh leh dila kal tur te pawh chah mai la, Lawma pa pawh a kal thla fo alawm," a ti chuar chuar a, kawngkaa Biaki lo dak chuan, "Lo lut rawh," a ti tak nain ka ding leh rih.

"A kawng khu a hnim reuh lutuka, khuai an tam bawk si a, ka kal ngam vak lo kei chu..." engtin tak min chhang ang maw ka tih rilruk laiin, "A hnim em mawni, khawi lamah nge in kal a?" a ti a, min en phawk viau bawk.

"Kha....khuai bawm awmna lamah khan, a hnim lutuk alawm, in sam hmaih nge in hluihlawn zawk ni," ka ti leh zat a.

"E..khu lam kawngte chu a chhuk chho lutuk alawm, grape huan lamah kalta che u, a thui zawk naa a kawng a nuam daih zawk , khu lai khu chu thlai chin nan a lei a ṭha lo deuh a, a thlang lam a min duh bawk si a, thlai nghet chin nan a tlak loh, khuai bawm te pawh khu lak thlak daih a ngai, tuna an zu khu la leh ila hmun dangah ka sawn daih ang," a ti bal bal a.

"Lawma'n a en khan a zu pawh a awm vak loin ka hria," ka tih chuan, "Hmanni lawkah ka la a, a hmasa phei chu ka lak hmain an mahniin an lo ei zo vek alawm, i nu Nguri te nufa hian khawizu an duh khawp a, an eiah ka zuk laksak mai mai, tam phei chu a awm lo," a ti leh ta zel a, ka rin a ang lo deuh ta tlat, han rinhlelh ṭalh chu ka duh a, a sawi fel thliam mai bawk si a, amah Jeminai ka zawh leh phawt a ngai a ni.

In chhunga ka va luh chuan chhangban ka ei duh em min lo zawt hlawm a, "Duh lem lo, Minai a tho tawh em, an lo haw hnuah ka la hmu miah lo a, ka rawn kan ang chu ka tia," ka va ti luam a, "A la mu nge ni, zuk kai tho pah rawh," putara nupuiin a lo tih chuan phur deuhin sitting room lamah ka phei a, step-a ka chhuk laichuan thawm ka hria a, a tho tawh anih hmel.

"Mina, i tho tawh em?" A pindan kawngka chu ka kik karh khar a, "Lawk aw.." zangkhai deuh hian a rawn ti a, rei vak loah a pen thawm ka hria, a rawn hawng chiah chu perfume rim a nam rum rum. A pindan chung chu perfume rim hlirin a khat a, ka kal hmasak ṭum ang lo takin a fai vuk mai a, a biak tlak dawn khawp hi ka ti rilru a.

"Eng nge ni a?" a lo ti he haw mai.

"Ka lo kan dawn che,"

"Teh thut a, Lawma'n a lo tir che em ni?" 

"Keima thuin ka lo kal maw le, i damloh chhan kha ka rawn hrilh dawn che a," a mitmeng chu a buai nak a, a insiam ṭha leh vat thung.

"Damdawi kha chu ka ei tawh ngai lo," a tih chuan, "Khawizu zawk kha a nia," ka ti ve zat a, a hrethiam lo tih a hmelah a hriat theih.

"Tawtawrawt par bawmtu khuai bawm ami a lo nih dawn kha, i in regu em?" 

"In regu e, ka ka hi a tui lo ṭhin a, sweet ka ei loh chuan khawizu hi ka in mai zel a, a hrisel zawk bawka khawizu chu ka in tam zawk....a ni tak tak dawn em ni?" zawhna ngah hmel fahran hian min en a, "Ni e, tawtawrawt par khan tûr a nei a, a thawh dan chu i awm dan ang kha a ni mai, i in loh chang leh i in changa i awmdanah khan han chhut la, anih loh pawhin han nghei chhin la a hriat theih mai ka ring," ka ti dap dap a, a khum lam panin side table-a khawizu chu a va la a, "Hei hi ania," tih leh min rawn pek a rual a. Ka han hnim chhin a, khawizu rim bak chu han danglam a awm pawh ka hre lem lo.

"Mahse..ka nu leh midang pawhin an ei ve tho sia.." a tih chuan, "Tu pek che nge?" ka ti vat a, "Tuman min pe lo, chhuarah bawm tam deuh an dah a, ka duh duh ka la mai zel," a tih chuan ka down rawih, Putara kha han puhthluk ka tum tehlul nen a.

"Anih chuan mi dangin an hrai lo che a, i ei fuh lo palh anih chu," ka lawm lo deuh ngawt a, ti ho chu ka inti ve tho mai.

"Midang khi engtin mah an awm ve bawk si lo a," hrethiam lo fea a tih leh chuan, "Zu tam deuh an nei lo alawm, i vanduai palh anih kha," ka ti leh hmuk a, min en chungin a ner ve nung a, "Ka ei tawh miah lo ang, ka lo ei zo ṭep tawh lehnghal a," a ti ṭuau a, a ṭah a chhuak ringawt em mawni.

"I ṭha leh vat mai ang, a chhan kan hre tawh bawk a, i dam tawh mai ang tikhan.." ka tih chuan a bu ve nghat nghat.

"Ka lawm lutuk ania aw, lo sawi lo nila chuan ka la ei reng awm sia, ka rilru lam a dik lo emaw ka ti hman a," a tih laia a mittui tling chu ka en rei duh lo, "Ka han haw phawt ang, lo dam zel rawh," tia kal mai ka tum chu, "La leng rih la, i va hmanhmawh ve, tih tur i nei em ni?" a ti sawk sawk a, "I pindan a rimtui lutuka, ka pum a ti no," tiin ka chhuahsan nal nal. In chung ka thlen chuan thawk ka la kawk a, engtin nge maw a awm theih zawk le, ka hnarah a cham rengin ka hria, ka luak te a ti chhuak, vawk inah zuk kal ila a reh duh deuh ang.

Lawmsanga pa vawk chaw pe ka zuk pui a, "Tukin chu i va phur turh turh ve, i mang a ṭha deuh em ni?" a tih chuan, "Ka mumang pawh ka hre lo, vawk hi i talh ru ngam em?" ka tifiamthu a, a nui hawk hawk.

"Vawksa i ei chak em ni a?" a tih chuan ka chak thu leh ka ei lohna a rei tawh thu ka sawi zawt zawt a, "Kan lei dawn nia, kan pute chhungin an ei ngai si lo a, keini pawn kan ei khat alawm, i nu Veni'n a ei duh tlat lo a, Lawma lah hian a ngeih der lo a, pu Muanthanga nen ar huanah kan zuk ei ru ṭhin alawm," tiin a nui kur kur a.

"Lawmsanga chu engtin nge a awm ṭhin a?" tia ka zawh chuan, "Ka thak ṭhin e a tia," a ti pek a, kan tlangvala chu vanduai ka ti ngang mai, vawksa ei theih loh te zawng ka hlauh zawng tak a ni ang chu.

Chhun lamah Lawmsanga nu leh pa chu dilah an kal a, an ṭhiante nupa ar huana awmte nen khan aiawt an en ho a, eirel dawnah Lawmsanga rawn call-in chaw an ei nghal tur thu an rawn sawi a. Lawmsanga nen titi pahin ei kan rel dun a, khawizu chung chang mawlh khan kan rilru a la luah a ni. 

"Tum reng vanga miin an eitir a nih i ring a, thu dik i hriat hnuah a lo ni leh si lo a, i han lawm lo ringawt ania, i va sual tak," tiin min nuih min nuih mai.

"Ka lawm lo pawh a ni lo, lo nise chu kan nulai hi kan thiarfihlim thei mai tur a nia, chhan ṭha deuh awm thei tur awm lehta si lo kha ka ui alawm," ka tih pawh chuan a nui kur kur a, kei ka tum bur thung.

"Mahse, i ti ṭha lutuk ania, Minai pawh a lawm ngawt ang, a ngaina sawt chein ka ring," a tih chuan tawi tein ka va nuih.

"Pa Liantluanga te an lo haw ṭep a, Minai chu a awm rei tawh ka ring lo," a tih leh chuan, "A ṭhat chu; venthawn nei miah loin kan che thei a ni mai; mahse, i khua a har lo ang maw," tih pahin ka va melh ralh a, a nui duh eih lo.

"A ngaihawm viau ang," a ti ve leh lawi a, hepa hian a duh leh duh loh pawh a chiang lo anih dawn hi ka ti rilru.

"Khuaa a awm dawn tho chuan free deuhin i va rim thei tawh ang chu.." mitmeiin ka va chhaih zui a, a nuih a za vak lo nge ni min rawn en vang vang a. "Phone number pawh inpe ṭha leh tawh rawh u, a beisei viau ania.." ka ti leh chu a rawn tho vut.

Ka lamah a rawn ding hnai a, hnai teah min melh chhuk run mai a, a huat thu ka sawi nge mawni ka tih laiin, "Min chhaih tawh lo la, ka hrilh vek tawh che kha, i hriatthiam ve ka ring asin le.." a ti zawi sup a, "Mahse, nang pawh hian i la duh deuh..." ka sawi zo hman lo min rawn fawp thut mai.

A tawp leh vat a, ka hamhaih luatah chet sawn nachang pawh ka hre lo, ka hau chungin ka melh a, ṭawng ka tum chu min ṭawng khalh leh zat a. "I thinrim lo ti raw?" a tih chuan chhan dan ka hre lo, thawklehkhatah ka chhah mup mai hian ka hria, chutah min rawn fawp nawn leh sak a, a duhthawh ta bawk nen a awmah ka nam chawt chawt a, chutih rualin kawngkhar a rawn inkhar ri dawp. 

Ke pen hlawk hlawk thawmin a zui a, Lawmsanga nen chuan rang lutukin kan tlan chhuak ve nghal a, pawn kan va thlen chuan tudang a ni lo, Jeminai a ni. Step-ah a tlan thla hlawk hlawk a, an in lam a pan lai chu kan thlir mawl tawp a, kan inen a, sawi tur kan hre lo ve ve, a pawi erawh kan tih ve ve ka ring.

End of chapter - 11