WHY DID YOU GO? (CH - 12) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 12

"Kar tharah chuan nu Ṭhatei te hnenah ka awm phei tawh ang," zanriah ei laia ka ti chu min melh ṭhap hlawm.

"I va hmanhmawh ve, a rawn tur che em ni?"

"I la damṭha si lo a, la awm hahdam zawk la,"

"Dawrah a lo chhawr viau mai ang che ange, hmanhmawh duh suh.." pa Dinpuia te nupa leh pu Muana'n an lo tih chuan, "Ka dam ṭha vek tawh, awm mai mai hi ka ning a, nu Ṭhatei pawn min lo nghakhlel ve tawh alawm," tiin ka chhang a, ka rilru ka siam fel tawh avangin a rang thei ang bera kal chu ka duh a ni, inngaihtuah buai leh thei niin ka inhre lo.

"Maṭhai chu kan be leh phawt dawn nia, i pindan turte an lo peih tawh em zawt hmasa phawt ila," pi Lalpuii'n a lo tih laiin, "I inthlahrung a ni lo maw?" pa Dinpuia'n a lo ti leh a. "Chutiang lam a ni lo, hna thawh ka duh a, hetah tih thiam vak ka nei bawk si lo a," ka ti leh mai a, ka nu Nguri chuan min en reng nain engmah han sawi a nei ve lem lo.

Zanriah eikham chuan a pindan lamah min ko phei a, "Engati nge ni a, i pa Tluanga vang em ni, nge mi dangin sawi an nei zawk?" tiin min zawt khauh a. "Farm-ah ka tawm reng a, ka ning ve deuh tawh alawm," ka ti chu a awih zan loin ka hria.

"Hmun danga kal i rilruk te a ni lo maw?" a ti leh a.

"Ka pa lung kan phun hma chu hmun danga kal ka tum rih lo, nu Ṭhatei dawr ka nghah pui anga, hlawh ka nei ve dawn bawk a, pawisate pawh ka khawl ve phawt ang," ka tih chuan, "Pawisa chu i nei alawm, i awm hrang dawn anih chuan ka pe ang che; mahse, i va hmanhmawh tut tut ve, Tluanga te pawh an la rawn haw mai dawn lo va..." a ti niah niah a, tho chhuakin dawhkana a phone dah chu a va la a, "I hman chawp chu i account-ah ka rawn transfer anga, a bak hi bank-ah kan tifel dawn nia, keiman ka va thlah ang che," a ti leh zung zung a, pawisa chu engzat nge zawh ka duh viau nain ka zawt hreh deuh a, ani pawn a sawi duh chiah loin ka hria.

"Min rawn loin engmah lo ti tawh suh aw, i nu ka nia, khuaah i va awm dawn lehnghal a, hmu pha lo che mahila ka rawn ngaihven reng dawn che ania, buaina i neih pawn min rawn hrilh hmasa zel ang che," a tih chuan ka aw ve thlap a, eng rilru pua rawn sawi nge a nih ka hre lo, tun thleng hian ka chunga a rilru put hmang hi chiang taka sawi a har ka ti a ni. Ka laichin hnai ber leh ka laka mawhphurhna latu a ni a, kan inkarah lah nufa inlaichinna tak tak a awm lo thung a, heng vangte pawh hian ka inthiarfihlim chu a ṭha ber zawkin ka hria.

Pi Lalpuii chuan nu Ṭhatei chu a bia a, "Pindan awl a awm reng, a duh duh hunah lo awm rawh se," a lo ti sam then a, hruai ka ngai dawn em a lo zawt bawk. Mahse, nu Nguri'n thawhṭanni lama min hruai tur thu a lo hrilh a, nu Ṭhatei chu a phur hmel khawp mai, "Dawr a nghak anga, hlawh te pawh a nei dawn a, kha laia awm aichuan nuam a ti hrim hrim ang," a lo ti siam siam a. 

Ka pindan lama ka chhuk hnu chuan ka insiam ṭan chu a ni der mai. Dar 8 chauh a la ri a, ka phone rawn ri leh ṭhin chu number hriat loh anih vangin ka chhang duh lo a, tute nge an nih chu rindan ka nei. Chung number ka save loh pahnih te chuan min rawn call tluk tluk a, ka puihna an mamawh anih loh vek chuan insawifiah an rawn tum anih ka ring. Puih chakna ka nei lo a, an insawifiahna phei chu ka hre chak lo lehzual, chutia an rawn call sek pawh chuan ka thin a tirim lek lek tawh.

Ka inbualsan a, ka zawh hnuah pawh ka bungruate rem felin ka ken duh angte chu ka pack ṭha a, thawmhnaw ṭhenkhat ka hak tam tawh lohte chu Azoi ta turin ka dah hrang hlawm a, Remi leh Biaki tan eng eng emaw ka dah nual bawk. Rei vak loah Remite ṭhian dun chu an lo chhuk a, an thil tur ka lo pek chuan min ngaih tur thu an sawi ve melh melh a, "Khuaa kan lo kal hunah kan lo tlawh ṭhin ang che, nang pawh inkhawm turin lo kal zeuh zeuh rawh aw," an tih chuan ka inngaihtuah deuh vang vang.

"Khuaa ka awm chuan kohhranah ka lawi ve tawh ang," ti nghatin ka chhang a, an inmelh ralh ralh a, min chhang zui lem lo thung.

"U Lawma chu kan lo spy sak char char ang che," Remi'n a lo ti zauh, ka ve melh nghal râwm a, "Kan lo report kim chang viau ang," a ti leh reuh a, han sawifiah chakna pawh ka nei lo. "A ngai tawh lo, kan inṭhen fel tawh," ka tih chuan zawhna an ngah tih ka hre reng, ka chhanna chu ka duhtawk viau thung a ni.

Min chhohsan hnu chuan ka phone-a Lawma nena kan thlalakte chu ka enkual a, ka en zawh apiang chu ka delete nghal zel bawk a, heng thil hi ka rilru chawhphurhnan te, inhnemnan te ka lo hmang ṭhin a, mahni ka inbum rei khawp mai, awm tura ka duh vangin a awm emaw ka ti ṭhin a, mahse...ka lo hrethiam reng reng lo a ni. Ka beiseinate, ka beidawnnate, keima insiam chawp vek zawk a ni, ani nena sawifel tur engmah a awm lo, chu chu na ti hle mahila keima lam chauh hi chinfel ngai a ni tih ka hria. Mahse, engatinge demna ka la neih tho le..?

Ka tukverh kik thawm chuan min kai harh zawk a, thawm dim fein tukverh thlanglam chu ka pan a, inbe thawm engmah a awm lo. Tukverh chu a rawn kik nawn leh a, rang deuhin parda chu ka hlim ve nghal a, a hmel ka han hmu chu ka lungchhe lek lek. Zaizir hian eng emaw a rawn sawi a, inngaihtuah buai map loin tukverh chu ka hawnsak ve nghal a, lo lut lo turin ka hrilh thung.

"I ṭha maw, i lo mu tawh em ni?" a tih chuan ka melh vang vang a, "Ṭha..." tih zawngin ka chhang a.

"Khawizu kha i in tawh lo ti raw?" Lu ka bu leh ringawt.

"A ṭhat chu, ngaihtuah chhuah nachang kan lo hre lawk lo a, i in tawh loh chuan i dam ve leh vat mai ang..." a aw chu a lawi angreng a, sawi hreh a nei tih ka hai lo.

"Min ngaihtuah suh u.." ka ti ve mai a, pangngai thei ang bera lan ka tum bawk.

"Tlaiah khan..." a han ngawi leh dat a, "A ho lutuk...sawi kher pawh a ngai lo," ka tih laichuan keipawh ka aw a dik bik lo, ka thin a tawt ṭun a, pangngai a har khawp mai.

"I haw leh nghal daih si a, ka awm a nuam lo deuh a..." a ti a, a inthlahrung awka chu tuna ka hriat chak loh ber a ni.

"Engati nge i awm a nawm loh a?" ka zawhna chu mak a ti deuh aniang min en vang vang phawt a, "Min hrilh mai tur alawm," ka ti leh rih a, min hrilh se ka tih tak tak vang erawh a ni lo, min hrilh emaw hrilh lo emaw ka tan a inang reng a ni.

"Thinrim suh aw, khatianga i hriat chhuah kha ka duh dan a ni miah lo a; mahse, i rawn hmu ta bawk si a..."

"Ka thinrim hleinem.."

"Min ngei lo maw?" Ka lo nui a, ani pawh tawi tein a nui ve a, kan innuih rei lo hle thung.

"Nangin min ngei ṭhin em?" ka tih chuan, "Teuh lo mai," tiin min chhang a, min chhang rang viau a ni.

"Min lo duh ve tak tak lo tih ka hre tawh," ka tih chuan, "Chutiang a ni lo.." a ti halh a, "Min duh a maw?" ka tih leh laia a hmel landanah chuan ka zawhna chhanna ka hmu thiam tain ka hria. A hma khan engtin nge ka hmuh thiam loh ṭhin le, kawng tam takin a tilang ṭhin a, engtin nge ka hriatthiam miah loh theih ni!?

"Ih maw, kan pahnih hian love story lungrun leh lungchhiatthlak deuh kan nei emaw ka tia, induh tawn em em chunga rem thei lo ang kha kan ni emaw ka tia..." ka aw chu a lawi a, ka insum nasa ngang mai.

"Mina..." a ti zawi sup a.

"Eng emaw vanga rem thei lo, a ruka inhmangaih em em ang kha kan ni turah ka lo ngai a; mahse, kan lo ni miah lo.." ka mittui a rawn hnam ṭiam ṭiam a, ani pawh chuan hrehawm a ti aniang min en ve tlawk tlawk.

"Tihpalh aw, keima thiam loh vek a ni.." a tih chu ka pawm lo takzet, a thiam loh a awm lo, ka dem chhan pawh a zep tlat vang zawk a ni.

"Ngaihdam min dil suh...i duh apiang i hmangaih thei bik hleinem..." ka ti leh rih a, a kut a rawn lek ka hmuh chuan ka lo chelh rang khawp mai, nghet zetin ka hmer a, ka kun rualin ka mittui a rawn far fap a, "Pawi ka ti lutuk.." a tih ri chu zawi tak a ni.

"Min hmangaih ve loh vang hian ka dem miah lo che; mahse, engmah sawi loa kan pahniha min bum erawh ka dem che, a tak awm lo min suangtuah tir a, beisei chin tawk pawh ka hre lo a nih hi. Darthlalang aṭanga siam leilawn kan zawh dunah ka ngai a, ka kianga i kal anih chuan ka thleng chhuak thei ang ka ti ṭhin a, eng anga buaina leh harsatna pawh tawk mahila ka bula i awm chuan ka ti fan zel a; mahse, i awm ngai lo a ni," a na ngawih ngawih, kan  inhmangaihna thawnthu emaw ka tih kha engmah a awm lo, hmangaihna a awm lo a, ani pawh a awm chuang lo, keimah chauh ka ni.

"Lo hawi teh..." a ti naa ka en duh lo, a kut chu ka hmer vawng vawng a, a kut lehlama min rawn vawn rual chuan ka insut fap fap a, a hmuh laia ṭah ka duh loh tehlul nen....

"Min khawngaih vang em ni a?" insum ṭeuh chunga ka tih chuan, "Ka hre lo, hetiang hian ka awm dawn tih ka hre lo alawm, min haw mah la a pawi lo ania, ka hrethiam lutuk che..." a hmel chu ka en a, chuveleh ka biang a rawn dawm a, ka mittui luang chu min tuaihul sak bawk.

"Hetianga i awm hi ka duh lo asin," a ti zawi leh sup a, dawt a sawi ka ring lo; mahse, a nat loh phah si lo a ni.

"Ka ninawm ṭhin ngawt ang tiraw?" Lu a thing a, "Dawt sawi teh suh.." ka ti tham leh ṭuak a.

"Ning lo, i ninawm ngai reng reng lo.." a ti nghet charh a, chu thu chu ka hriat tura a duh thil nge a nih a, a rilru diktak ka hre lo a, hriat loh chu a ṭhat zawk pawh ka ring.

"Mina, ka mawl lutuk vang vek a ni, nangmah ang hmeichhiain min duh kha a lawmawm lutuka, duh loh chhan tur che pawh a awm lo a, ka rilru duhzawng leh ka thinlung duhzawng ka hrethiam ngai lo, i hmelṭha a, i fel em em bawk a, chuvang chuan ania ka hnar loh che. Mahse maw, lo chhunzawm zel ta ila i tan hian ka ṭha dawn loin ka hria a, kei aia ṭha hi i phu bawk. I pa a boral hnu phei hi chuan ka inringtawk lo zual a, i tana ṭha turah ngai zawk rawh aw...." ngenngawl zet hian min en a, ka laka thil a ngen ve meuh chuan duhtlan tur ka nei ta lo.

A kut chu ka thlah riai riai a, "Ka ṭha leh mai ang ti raw?," zawi tea ka tih chuan, "I ṭha leh mai ang, nakinah chuan i la hlimpui zawk maithei a ni," a lo ti zawi ruih a, "Kal tawh rawh, midangin an lo hmu ang che," ka tih chuan a kal mai lo, min en vang vang a, ka lo inhruhul sawk sawk thung.

"I thinlung duhzawng chu ani kha em ni?"

Min chhang loin min en reng, "Ka hre tho, sawi duh suh.." ka ti leh lawi a. Hmeichhiain a mipa duhtak a en dan angin kha nula kha a en ṭhin a, a bula ka awmdan ang khan a bulah chuan a awm ngei ang, ka laka a pek chhuah theih loh pawh ani hnenah chuan a hlan ngei ka ring, tunah chuan a rilru duhzawng leh a thinlung duhzawng a hre hrang tawh alawm, ka kalbo dawn vang hian an thawven huai pawh ka ring a ni.

"Jenusi nen chuan thildang ngaihtuah tur kan ngah lutuka, i rin ang chu kan ni lo maithei a ni.." a tih chuan ka inngaihtuah fim zawk a; vawiin tlaia ka kal chhan kha ka hrechhuak a ni. Hrilh ka han tum zet a; mahse, ka rilru chuan hrilh a remti lo aniang thil ṭha ka tihsak dawn tih inhre reng chungin ka ngawi ta zawk a, ka puihna an mamawh lo tiin ka inhrilh bawk. 

Min mangṭha hnua a kal chu ka thlir zui reng a, ka ngaihtuahna a buai khawp mai. Tukverh ka kalh hnu thleng chuan ka la inngaihtuah buai a, engkim hi keima buaina anga ka lak thiam a, midanga innghah loh ka zir a ngai ta a, lam ṭang ka nei lo tih ka chiang em em tawh. Tunah chuan mahnia kawng ka inhai kuak a, midang ngaihthah pawh ka thiam a ṭul tawh ang, a chang chuan kan thinlung thusawite ngaihthaha, kan rilruin a min hrilh hi a pawm tlak zawk chang a awm ṭhin, chân tur engmah ka nei lo a, ka thinlung hi midangin an duh dana an tih ka phal hek lo, tunah chuan min tina theitu awmchhun chu keimah chiah ka ni tawh dawn a ni.

Dar 2 a pelh thlengin ka muhil thei lo, ka pa thlalak pakhat chu ka en a, chu chu Aizawla a zin hma lawka kan lakdun a ni nghe nghe. A kawr hak chu police hoin an lo ken kha a ni a, kha zirtirtunu ina an va hmuh kha a ni bawk. 

A hak hnuhnun ber leh aizawla a kal ni inkarah khan ni tam a tla hman lo a, inrinnia kan inkhawm khan a rawn ha chhuak a, ka thlalak en pawh chu khami ni a mi kha a ni. Inkhawmnaah leh school a kal changin a ha ṭhin a, khatih laikhan school an chawl tawh a, aizawlah khan keng chu nise kha nula inah khan a awm dawn lo bawk a, miss Zuali ka va zawt ta ngawt kha ania. Miss Zuali thil min hrilh aṭang chuan dik lo a awm tih ka hre ta a, Veronicai an khaw lama a haw ni a rawn sawi nen a inmil thei tlat lo, ka pa zin hma daihin ani chu a haw tawh a, ka pa khan a in luaha a kawr va hnutchhiahna hun a nei miah lo tihna a ni.

Chutiang anih chuan he inah hian a hnutchhiah dawn tih a chiang a, tu emaw chuan kha nula in luahah khan a va dah chawp zawk a nih hmel. Heng ka thil hriat te hi Lawma te pahnih kha han hrilh ka tum a, chuvanga han kal pawh ka ni nghe nghe a; mahse, ka beisei loh lutuk thil ka han hmuh vang khan ka hrilh ta lo thung. 

Thil dang pawh hrilh tur ka la nei a, ka pindan piah maiah sawn store room nge ka hre lo; pindan a kawngkhar pawh tala lianpuia inkalh a awm a, tunge lut ṭhin hriat tumin ka kawngkhar pawh ka verh nghe nghe a, ka damloh zui tak avangin hriat belh erawh ka nei ta lo. 

Ka damloh chhan kha khawizu an ti a, min pe tu awm lo mahse kha khawizu bawm kha ka la dawn tih hrechiang em em tu erawh an awm ngei ang, a chhan chu ka thlan fo ṭhin glass bottle, a chhin pawh thir hmanga kaih beh chi a ni a, a hawn a awlsam vang leh a chhin a ngheh ṭhat avangin bur dang ka thlang ngai lo, khawizu kha ka ei tura dah liau liau a niin ka hria.

Ka pa kawr vangin ka nu Nguri ka ringhlel a, khawizu vangin pu Muana ka ringhlel bawk. Mahse, khawizu lo buaipuia, a bura lo thun leh thlap thlap ṭhintu erawh pi Lalpuii a ni lawi a, khuaa kal zing em em pa Dinpuia hi ka pa kawr dah thei tur niin ka la ringhlel cheu bawk a, pa Tluangate nupa lah ka tana rin ngam ziazang an ni lo. He inah hian rin theih tumah ka nei ta lo a ni ber, ka inla hrang nghal thei lo a, chutianga ka awm anih chuan ka chunga thil thleng thei pawh ka rinzawn thiam ve ruak tawh. Chuvangin hnai lutuk lo leh hla lo tea ka awm a ngai a, chutiang chuan thil awmzia pawh ka hre thui thei zawkin ka ring, tichuan ka mamawh hunah ka kal hnaih thei anga, tlanchhe tur pawhin hun remchang ka nei thei bawk ang. 

Lawma hian eng chin nge a hriatpui ang le? Damdawi la turin an tir ṭhin tih kha min hrilh chhun a ni a, varak lem awmna wine leh ka pa thihdanah fel lo awmin a hre bawk a, an nula awmpui nen khian an hrechhuak thei tak tak angem? Ka hriat loh eng nge hriat an la neih ang aw, chu zawng aia ka rilru tibuaitu chu zep ruk an nei angem tih zawk hi a ni. Min mamawh vangin ṭul an tih chin min hrilh a ni thei a, anih loh pawhin an hriat chhun ang ang min hrilh thei bawk, ka laka rilru chhia pu duh tura ngaih chu har ka ti, ngaih loh hram pawh ka duh a ni, a mizia ka hriatdan nen pawh a inpersan lutukin ka hria, a ruka thilsual han ti duh chi niin ka hre thei lo. 

Mahse, Jenusi hi chu a mizia engmah ka hre lo, ka chîk ve viau chung pawhin ngaihdan ka siam fel thei lo, mi dik nge, mi lem zawk a nih ang le?

Chawlhniah chuan Azoi te inah ka va leng a, khuaa ka awm tur thu ka va hrilh a, "I awm loh chuan ka khua a va har dawn ve, kawm tur ka nei tawh dawn lo anih chu," a ti ve luam a, Lawma ka hrilh tawh em min zawt bawk. "Nangman i lo hrilh mai aniang chu, kei aichuan in in close zawk alawm," ka tih chuan, "Tun hma ang kan ni tawh lo, in inṭhen aṭang khan ka mil vak tawh lo a, ka kawm tui thei tawh lo," a lo ti hlak hlak a, ka nuih a za deuh. Ka hmakhua a ngaih tak tak vang leh min ṭan vanga ngai awm tak ka ni a; mahse, a ni lo tih ka chiang si a, ani lakah pawh hian inthiarfihlim vat chu ka ngai a ni. Chân tur ka nei lo tih ka hriat chhuah aṭang khan ṭhianṭha ka nei lo tih ka hre tawh a, ka ṭhian nia ka ngaih hi min bum nasa bertu a ni lo ang tih pawh a sawi theih loh.

"Hei hi ka lo kensak che a," tiin a tana ka thil dah ho kha ka pe a, a lawm ve hmel khawp mai, thawmhnaw ka la hak lohte pawh a awm nual a, ka pheikhawk mawi a tih deuh pawh ka dah tel a, keichuan ka ba ka tlakah ka inngai, ka khawhar min hnem ṭhin a, hun rei lote chhunga ka ṭhianṭha anga a awm vanga ka thilpek a ni ber.

"Khuaa ka lo kal hunah thil eiturin kan la chhuak dun dawn nia," a tih pawh chuan ka aw ve thlap a, tunah chuan a vertherna leh a phakarnate hi ka hmang ṭangkai ve tawh ang, thawk palai nih a duh bawk a, a duh ang takin a awm tawh ang tih chu ka rilrua a thawh dan a ni.

Ka haw lam chu gate thlang lawkah jenusi nen kan intawk hlawl mai. Min hmuh rual chuan a ding deuh dat a, a lampana ka kal chu chik fe hian min lo en bawk. "Khawiah nge i kal dawn?" tiin be hmasatu ah ka ṭang a, "I kalna ah tho khan, i zia zel maw?" a lo ti let var a, min en danah erawh ngaihṭha zan lo hmel a pu a, keiin ka lo nuih let sang thung.

"Ka ṭha tawh lutuk, in zarah ka dam var tawh,"

"Nia, i ṭhat hmel tawh khawp mai, khuaah i awm tawh dawn tih an lo sawi a," Remi leh Biaki an nih ka ring, he nu hian ka chanchin a lo ngaihven hle anih hmel.

"Um, farm-a tawm reng hi chu ka ning deuh tawh a," ka ti mai a.

"Keimahni vang khan i lo..." 

"A teuh lo, nangni vanga farm ka chhuahsan chhan tur a awm hleinem, engahmah ka ngai lo.." min chhang loin ka mitah min en kal a, "Min ngaihdan kha ka duh miah lo," a rawn ti teh tawl a! "Engtin nge ka ngaih che?" ka tih chuan, "I bialpa vanga rawn kal ka ni lo tih chu i hriat vek kha, thil eng emaw min hrilh loh i nei bawkin ka hria," a ti a, zawhna nei hmel a pu bawk.

"Eng thil maw?"

"Hlauh i nei em ni?"

"Eng nge ka hlauh anga?"

"Ka hre lo, tlan chhe tur te pawh i ang ka ti deuh?" ka nui ringawt, a fing tih ka hria a, a rilru a ṭha nge ṭha lo erawh ka hre lo, a ṭan lam tan erawh a inhuam thui dawn tih chu ka chiang.

"Hlauh nei hmel ka pu em ni a?" nui chunga ka tih chuan a lo bu zauh a, ka awih lo, min dâwp a tum a ni ngat mai.

"Tumah hlauh tur ka neih pawh ka hre lo," ka ti leh hram a, ka beisei loh dan deuhin min lo chhang thung.

"Anih chuan eng nge i en thlak, i pindan kawngkhar i verh kha ka hmu a, thil hriat ruk i nei em ni?" a tih chuan ka hamhaih khawp mai. "Ka pindanah i lo lut ru elo?" ka ti hlut a, pha hmel ka hmu lo.

"Hmuh i nei em?" a ti zui leh nnghat a.

"Ka nei lo nge mawni?" ka ti chu a awih loh hmel khawp mai.

"Eng emaw chu hriat i nei a ni, i sawi duh loh chhan pawh ka hre maithei..mahse, i rilruah thil dang i dah len lutuk chuan ka pui thei miah lo ang che," zawite chang zet si hian a ti a, "Ka huat vang che a thil zep tura min ngaih chuan i ring dik lo anih chu," ka ti ve nghat a.

"I pa chungchang kan buaipui tih theihnghilh suh," a rawn ti chang leh fak.

"Ka pa vanga lo kal chu i nih chiah loh kha," kan inen ran a, "Tel ve lo angah i inngai a ni maw?"  a ti khar khar a, "Ka tel ve lo," ka ti chu a lawm loh hmel ngang mai.

"Hlauh nachang i hriat aṭang khan i tel ve tih i hrethiam daih tawh, i lamṭang leh ṭang lo i hriat hran loh vangin i rilru a buai zawk anih kha, keini chu min ring thei ania, i lam ṭang kan nih hi," a tih laia a hmel chu ka hrethiam lo, dawt sawi hmel a pu lo a; mahse, ka lam ṭang duh tur niin ka hre lo, min mamawh vang bak a ni dawn lo tih pawh ka hria.

"Awm bo tur chuan min duh viau si kha," tiin ka en let kal a, Lawma nena an thil sawi kha ka la hrechiang khawp mai. Ani pawh chuan a pha bik lo, "Duh e, i fimkhur tawk loh vang ania; mahse, zep ruk nei tur i ni lo asin," a ti leh a, ka thil zep hi a hre tawh zawk nge mawni le!?

"Ka hriat zawng zawng chu ka hrilh vek che u, in wine zawn chu hmu ula, misual chu zawng hmu vat zawk ula a ni mai,"

"Wine chungchang chu em ni i zep?"

"Ka zawn pui che u tih i hriat reng kha,"

"Hria e; mahse, i zep chin kha chu ka hre lo," eng emaw chu ka sawi tho tho a ngai dawn a ang.

"Ka hriat chhun chu wine lam anih chuan pu Muana hian a hre ber ang, a siam chhuah vek a nia, danglam deuh deuha siam pawh a nei ṭhin, rinhlelh tur in zawng anih chuan amah aniang," ka ti duah a, thil thar hria angin a awm lo reng reng. Fim zet hian min en a, min hnial a tum lo a ang viau bawk.

"Eng nge a dang i hriat duh a, an awmpui ang chauh ka nia, engkim min hrilh hleinem, hna ka thawk ve ngai lo a, engmah ka hriatpui lo.." lawm loh hmel fea ka tih laiin, "Khuaah chuan tihtur i nei em ni?" a lo ti teh daih a, ka chhan duh loh thil min zawh tur a hre nek.

"Dawr ka nghak dawn maw le," ka ti pawr hlar a, a awih nge awih lo pawh a hriat theih loh. 

"Tu dawr nge?" Thawk ka lo la hak a, ka melh no vak tawh lo.

"I pu fate dawr," a nui lek lek chu ka hrethiam lo, eng nge maw a hriat reuh ni.

"Chaw in ei tawh dawnin ka hria, i piin a zawng che," a ti leh daih lawi a. Chutah, a rawn pen hnai a, min kal pelh pah chuan, "I tlanchhia emaw ka tia lawm," a ti a, min hnungchhawn zawnga a kal chu ka en ta reng ringawt.

He nu hi ka mihring hriatthiam loh ber chi a ni, min ngaina nge min hua tih takngial pawh hriat a har ka ti, dawt a sawi leh sawi loh phei chu hriat a har leh zual. A mizia pawh hi ka hrethiam lo, a nuih hian a hlim vang a tih theih miah loh a, thinrim hmel takin thu pawm awl tak a sawi leh ṭhin bawk a, rin tlaka ka ngaih loh laiin thil ṭha min tih sak a, hnaih theih tak tak lohin a awm leh lawi bawk a, eng ang mi pawh nise ani ang hi chu mamawh loh tum ila a ṭha zawkin ka hria, lamṭang atan pawh a mi ṭha a ni lo ang, a hlauhawm zawk hialin ka hria.

In ka thlen hnu lawkah zanriah kan ei a, pi Lalpuii'n ka insiam tawh em tih min zawh chuan ka thawmhnaw leh mamawh zual chiah ka ken tur thuin ka chhang a, "An mahni tibuai loin i mamawh apiang i rawn lam dawn nia, Maṭhai saw a inti lal ve viau nain fa mo mai a nia, midang mitmei ven ve a ṭha ber ang," a ti dap dap a, "Kuminah lung kan phun angem?" nu Nguri'n a lo ti chu kan melh ṭhap hlawm.

"Phun i duh deuh tawh em ni a?" pa Dinpuia'n a tih chuan, "Phun ngai tho te chu phun hma pawh a pawi hleinem," nu Nguri'n a tih laiin, "A hmanhmawh thlak loh, an case pawh a la kal zel a, ngaichang phawt ang," pu Muana'n a lo ti thung a, tuman an hnial zui lo.

Zanriah eikham chuan ka pindanah ka chhuk lehnghal a, dar 12 thleng dawn chu khumah mu chungin phone ka khawih a, in chung lam thawm ka ngaichang a ni ber. Thawm a reh fel ta maw tihah chuan ka tho chhuak ṭhem ṭhem a, ka pindan piaha store room niawm tak lam chu ka pan a, a bang chu chemtea han kher kuak mai ka tuma; a har fat mai. Ka pindan bang plywood ang kha an lo ni lo a, ka kher kuak chin aṭanga chhut chuan kutphah ai pawhin a chhah zawk ang tih tur a ni.

Wine tih vel angreng hi chu a pawimawh ber pawh a nih ka ring lo, hmu chhuak pawh ni ila engtin nge ka tih chuan ang tiin ka inzawt ru neuh neuh a, a mihringate zawk hi a ni man chhuah ṭul chu. Heng hi chu Lawmsangpui te pahnih khan buaipui mai mai rawh se tiin ka duhtawk der. Ka va mu leh hlun a, kha nu bawk kha ka ngaihtuah chhuak leh ṭhin.

Ka ring duh angem, rin tlak a ni angem?

Rin chu ka duh; mahse, ka ring bawk si lo.

A mizia ka hriatthiam loh lutuk vang hi em mawni rin harsa ka tih em em chhan hi le?

Han nelawm deuhin ka tan pawha biak nuam leh fel deuh tein awm ve nisela chuan ka ngaina anga, a rin pawh ka ring thei deuh tur hi a nia. A ṭawngkam bul leh mi a dawp nghal ringawt zel te, min ringhlel taka zawhna min zawt reng leh thil a inti hre lutuk te hian min ti lawm lo vel vek. Lawma duh awm takin a awm a, ka bulah engmah a sawi leh duh lawi lo a, engmah hi a la serious pawhin ka hre lo, a ṭhiannu chunga thil thleng vangin a thinrim hlur ringawt a, midang hi chu min ngai pawimawh lo hle maiin ka hria.

A thinrim laia a rapthlak zia kha ka hrechhuak rauh rauh a, Lawma kha lo kal lo ta se min rek hlum duh mai dawnin ka hria.

Ka ring tlat, ka sawi chhuah aichuan min thah pawh pawi a tih loh thu a sawi ngei kha, ka thinrim ber lai pawhin ani anga pawisak nei lo leh butut kha chu ka ni ngai lo.....ngawi teh,..!?

Hmanah khan, police Hmaituama khan 'Hmeichhe thinrim deuh pakhat' tiin tu emaw chungchang a sawi a, he Jenusi hi em ni ang. 'A zawhna ṭha deuhin lo chhang rawh' te kha a ti lehnghal a, an rawn tir tihna nge maw ni le? 

Khang police ho khan ka pa kha mi tenawm tak angin an ngai a, Hmaituama phei kha chuan zirtirtunu blackmail-a mutpui duh hialah min chhuahsak kha a nia, ka haw hlawm ngawt mai. Khatiang rilru kha pu hlawm lo nisela chuan hmasawnna te pawh an nei daih tawh tur. Ka pa kawr an rawn ken lah kha an ngaihdan hmangin an thutak cheibawl a, an mahni vangin ka pa ka ngaihdan pawh a dik lo hman ṭhelh, police nep lutuk khan engmah hriat an nei lo, case chinfel thuai an duh vangin engmah pawh an chîk zui lo chu a nih hi.

Sihal ú ruah ruah thawm a rawn awm a, pawn lamah lah chuan thla a êng no reih a, varak awmna dil tereuhte pawh chu a lang mawi khawp mai. Ka thlir vawng vawng a, ka pa nena varak chaw kan pek dun laite mitthlaah a rawn lang a, helai ka thlen tirha nuam ka tihzia leh a hmun pawh mawi ka tihzia te kha ka hre chhuak uar uar mai. Lawma ka tawng a, tlangval ṭawngmawh leh taima zet khan ka mit a la nghal a, min biak ve changa ka hlim ṭhin ziate kha aw....ka laka a hawihhawmna te, a ṭawngkam ṭhate vang khan mipa dang ang tho ni turah ka ngai a, ka inringtawk em em ṭhin, min duh lo turin ka ring ngai lo, min bum ka ti ngei mai a, keimah hi ka lo inbum let der zawk a ni.

Zing lamah chuan vana arsi pawh an khat pharh tawh a, fanu anga ka luhna in chu mikhual anga ka chhuahsan hun a thleng ta a, ka pa nena kan sulhnu erawh kalsan har ka la ti ve fan a ni. Khawvar dawna ka muhil chu dar 8 tlangah ka harh ve leh chauh a, ka chhungte chuan chaw ei an lo peih diam tawh. Pi Lalpuii'n ka chawhmeh duhzawng hlir a lo siam a, pickle leh thei rep eng eng emaw chu ka ken turin a lo siam nual bawk.

"Ka lo kal ve ang ka ti deuh a; mahse, tukin chu ka kawng na a rawn chhuak leh a, i nu a kal dawn tho bawk a kei chu ka rawn tel ve lo mai dawn nia," a ti bal bal a, pu Muana erawh a lo kal ve dawn niawm tak a ni. 

Tukṭhuan kan ei laia Azoi lo kal chuan bawnghnute kurtai min rawn ken ṭeuh mai. "Nizana ka siam ania, tun ṭum chu a sak deuh hlek a, butter ka telh tlem vang aniang," tih pahin a polythene khai chu min pe a, zinga a message lo awm kha ka chhang lo a, min rawn thlah a tum anih hmel.

Dar 10 velah chuan kal turin kan inpeih tawh a, pu Muana'n motor a hruk fai hauh hauh laichuan veranda-ah kan lo ding a, Lawma leh Jenusi vawk in lam aṭanga an lo chho pawh ka va hmu reng a, mi an rawn thlir ve tak naa ka melh duh lem lo. Step-a an inzui chhoh veleh ka en leh lawi a, ka chungchang an sawi dun ngei pawh ka ring.

"I pi chuan eng nge a ken tir che a?" kan tlan chhuah hnua nu Nguri'n a tih chuan, "Theite um leh balhla rep te, theihai pickle te...a awm nual mai.." tih pahin phone ka khawih mial mial a, "Hmawmsawm tui deuh deuh a tam tehreng nen, khuaah te chuan in ei ṭha duh awm lo em mai," a ti chu ka chhang zui lem lo.

Pu Muana bulah chuan lenkawi a tum thu a sawi a, a lo aw ve mai ka rin laiin, "A ṭul lo, i ṭhiannu kha tlawh fo suh," a lo ti hmak mai a, nu Nguri ka va melh chuan a tum deuh burin ka hria.

Nu Mangaihi dawr nghahna lamah kan ding hmasa a, nimbu tui sawr an ken belhte chu an dah a, nu Ṭhatei te in lam kan pan ta bawk. Kan va thlen chuan a pasal nu nen an lo awm a, pitar pawh chuan ṭha deuhin min lo chhawn a, pu Muana lahin 'I sam i dum a, i lang naupang sawt alawm, nula emaw tih i awl dawn riau mai," tiin a fiam hlut a, pitar pawh chu a nui ve hawk hawk.

Ka pindan tur kan han en a, an in hi in chung lamin kawngpui chhak lam a han an a, a hnuaiin kawng hnuai a an leh a, ka pindan tukverh aṭang chuan kawngpui leh kawtzawl te a lang thei a, midang mutna pindan nen a inhlat bawk nen han sawiselna tur eih a awm lo. Khum zau deuh an lo dah a, thawmhnaw khaina erawh banga chhuar fit sa an dah thung a, coushion chair pahnih leh dawhkan te a awm bawk. 

"I tv kha i kawl leh duh em?" nu Nguri'n a tih chuan, "Ka en ngai chuang lo," ti maiin ka chhang a, "An tukverh chu bar pawh an dah si lo a, a him dawn em mawni, heng laiah rukru an tam awm si a, kalh theihnghilh miah suh ang che, " a ti zui nuah nuah a, a phone lo ri chu chhan pahin a chhuak nal nal bawk.

Choka lamah a va bia a, a ṭawng thawm hriat tumin ka phei ve vat a, partition phen aṭanga ka ngaihthlak laichuan a nui har har mai. "Ka pa tel loin ka la rawn kal zawk ang, lo hrilh rawh, mi naran ka ni hleinem, a hmeichhe kawp ṭhinte ang ka ni dawn hlek lo ania, pawisa te chu tunge kei aia nei tur awm ang ni," tih angreng a sawi chuan rilru a tibuai map mai. Mipa chungchang a sawi niin ka hria a, pawisa a sawi tel danah thil lei tum a nei nge mawni?

"Tunge a ṭhianpa hmelṭha deuh kha?" tia a zawh hnu chuan, "Kha pa kha a lei theih ve tho em?" a ti zui a, ka hrethiam map lo, mipa inzuar dawr a tum zawk nge ni?

A nui leh awr awr a, "A pa reuh riau, heng hote chuan pawisa bak duh an nei tak tak hleinem...an thlem theih vek alawm," a ti leh a, lehlama mi ṭawng chu ngaithlain a nui leh ṭhin.

"Kha chu ka hriatpui ve lo, ka pa nena in sawi angai ang, tunlai chu ka lakah pawh a inlafekfawn thar a, khuaa kal pawh a phal meuh lo; mahse hei, ka fanu a awm tawh dawn a, ka rawn tlawh zeuh zeuh thei tawh ang, chawlhni chu lo kal ka tum dawn nia, Anthony-a chu lo hrilh rawh, nilengin lo hman rawh se," a ti leh luam a, pa Mafaka nu kha a lo kal vangin phone chu a dah rang viau bawk. Keipawh chu ka chhuak ve nghal a, ka kurtai ken chu pa Mafaka nu hnenah chuan, "Ka lo kensak che a," tiin ka pe a, thingpui te a lum nghal a, pu Muana lo chhoh hnuah titi pahin kan in a, pa Mafaka nuin kohhran chungchang a rawn sawi laichuan ka tim ru khawp mai.

Mahse, pu Muana chuan dam dap hian a chhang a, "Kan eizawnna lam hi min khak fo a, kei hi chu adventist kohhranah hian ka tui vak lo bawk nen hetia awm mai hi ka duh zawk mah a, Maṭhai te nufa chu ka khap hran hleinem, helaiah lawi turin ka ti reng a, nuam a ti bik lo aniang," a ti luam a. "Kan kohhranah te hian rawn lawi ve tawh mai se, naupang lah hian an ṭhiante kianga inkhawm an chak ve si a, chhungkua kohhran inang loa lawi hi chu a buaithlak riau a ni," pitarin a tih pawh chuan, "A ni ngawt tak mai, a nu bia sela, an chhangchhe tawh bawk nen rem chu a ti ve tho chuan ka ring a," tiin a chhang leh mai a; mahse, pitar kalsawn hnu chuan, "A hneawm reuh hle mai kan pitari chu," a ti zui hlak a, kei lah chu, "An kohhrana lawi ve kher a ngai lo ania," tiin min hrilh a, ka chhang lem lo nain duhdan ka nei ve a, inthunun tir chu ka tum lo hle tawh.

"Lenkawi i phal loh chuan haw har lo ang," nu Nguri'n a ti pawh chu a melh no vak lo. "I awmdan chingcheng hi ka ning riau tawh ania," a ti khar khar a. "Ka kal i duh loh te chuan nangman tihdan ngaihtuah la a ni mai alawm," nu Nguri'n a ti let hlak a, "Ka thu i zawm duh loh chuan damdawiinah ka dah dawn che ania," pu Muana a tih chuan nu Nguri chu a ngawi ran mai, an ṭawng zawi angreng a, phone bih chungin ka ngaithla ran thung.

Pitar kha rei vak loah a lo let leh a, "Mafaka chu lu a meh tir nghal nge mawni," a rawn ti phei bal bal a, "Nghah kher pawh kan tum lo, hnathawh tur kan la nei bawk si a, kan va let leh phawt mai ange aw u Zai,"  pu Muana'n a lo ti zung zung a, "Chuti tur em ni, in va leng rei awm lo ve," pitarin a tih chuan, "Kan lo leng zut tawh maithei a ni," tiin pu Muana bawkin a chhang a, chumi hnu chuan dawr lamah kan inzui thla a, rei pawh an awm tawh lem lo.

An haw hnu chuan ka han inremfel a, chawhnu lamah nu Ṭhatei chu dawr ka zuk nghahpui a, thil man leh stock an dahna te, inziahfel dan leh pawisa chinfel dan turte, khawpui lam aṭanga bungrua lo thleng an lak dan te min hrilh luam a, "Nula pakhat ka chhawr tel dawn a, nang chu counter-ah hian i ṭhu chawt anga, order lak leh pawisa chinfel vel hi i ti anga, customer lo biak thiam te pawh a ngai ṭhin ania. Kan nau lo thawk tur chu i pa Mafaka cousin fanu a nia, nang aiin a naupang deuh a, a taima khawp an tia, dawr tihfai leh customer buaipui vel chu i tihtir vek dawn nia," a ti siam siam a.

Customer hlun an ngah em ka zawh chuan, "Ngah ve e, tlema hausak hmel deuh hi chu bat pawh phal mai tur, vawikhat an lo kala pawisa rawn hmang ṭeuh leh rintlak hmel deuh ho ang hnenah khan a bat theih thu i hrilh ṭhin dawn nia, hausa ho chu an inchei dan leh an hawiherah an hriat lutuk," a ti leh luam a, mi hausa ho tlawn a ngai dawn anih hmel ka ti.

Zan dar 9 pelh thleng kan inhawng a, zanriah pawh dawrah tiffin min lo pe mai a, zan lamah an nupain min lo nghahpui bawk a, kan titi tui phian a, ka rin aiin nuam ka ti dawnin ka hria. Pa Mafaka lah chu a han fel em em khawp a, an fate pawh amah ngawtin a buaipui anih hmel, naupang lo chhuk pawhin pa Mafaka hlir an rawn bel a, ina kan chhoh hnuah pawh an ha te a nawhpui a, an mutur te pawh chu thawnthu a hrilh bawkin ka hria. 

Khuaa ka riah vawikhatna a ni a, ka muthilh theih ka rin loh laiin ka mutui ngang mai. Dar 7 velah nu Ṭhatei'n min lo kai tho a, keimahin dawr ka zuk hawng a, customer an tlem a, a harsa lem lo. Ka thawhpui tur pawh dar 9 dawnah a lo thleng a, tleirawlte, ria leh sang ir er hi a ni a, a hmai a bawl nasa deuh e tih loah chuan a hmelṭha reuh a, a ṭuan lah chu a han rang ṭha khawp a, tih tur a hre bawk si a, lo ṭhut mai mai bik chu thil mawi pawh a ni lo.

Chawhma lamah chuan dawr kan tifai dun a, thil man te kan chhinchiah bawk a, kan thil neih pawh a tam zawk chu ka hre ve tawh. Mahse, hriat kim a har khawp mai. Chhunah eitur min pe turin nu Ṭhatei a lo chhuk a, "Stock room-a thil phawrh loh awm te hre chiang ula, zing lamah chhuar ruak in hnawh khat anga, tihfai lam hi chu hna a zo thei lo, nitin hrukfai reng a ngai a, in hman changin hru mai rawh u, lane khat ang te hi nikhat hnahah te nei ula, a tukah lane dang in ti leh mai anga," tiin a awlsam dan min hrilh a, "Muantei chu a taimak hmel em?" tiin min rawn zawt ru sur sur.

"Taima lutuk..." ka tih chuan, "Nang aiin a hlawh tlem daih ania, "Nang chu manager tur i nia, tir hreh reng reng suh," a ti a, meinei zet hian mit min siai zauh zauh mai.

Chutiang chuan kar kan hmang liam a, Muantei chu ṭawng duh tak ni lo mahse, mi rilru tluang leh fel thawkhat tak a niin ka hria. Customer lo biak duah hi a thiam lo a, a zui kual leh ringawt ṭhin a, a ṭhen chuan an ngaithei chiah lo. Chuvangin keimah zawk chuan lo chhawn zel a fuhin ka hria a, ka lo biak luam hnuah, "Lo va en kual rawh u, puih in ngai em?" tiin ka zawt hmasa ta ziah a, a ṭhen chuan puih an duh a, a ṭhen chuan enkual te te an duh a, zui tura ka tih chiahin Muantei chu kal turin ka hrilh bawk, hetiang hian a hah loh phah deuhin ka hria.

Farm lam aṭanga thu a dawn vang nge ni inrinni chuan inah an awm ṭhap a, keini pawn dawr kan hawng a, kan buai nileng ve hle a ni. Zan lamah chuan tleirawl hmelṭha deuh deuh hian wine an rawn lei a, pu Muana wine siam chu ka rin aiin a luck daih. An chhuah hnuah Muantei chuan pawn thlengin a va en zui a, a lo lut leh chu a rawn nui vur vur a, eng nge a nuih ka lo zawh chuan, "Car-ah an lut, car changkang deuhah," a ti a, ka hrethiam zan lo.

"An fawr dawn aniang," ka tih mai laiin, "A khalhtu kha ka hria, khitah..BDO office ami ania, mi pa lehnghal, hmeichhe ho kha call girl an nih ka ring," a ti reuh a, "A ni maw...an va uiawm em em," ka ti hlut a, "Nia, school naupang an niang, higher kal rual lek an nih kha, an thak hma ania aw," a ti a, a ner nang mai.

"Heng laiah call girl an awm pawh ka lo ring hleinem," 

"Awi a, an tam lutuk, khawpawnah an spot nasa thei alawm, zinga kan tlan te hian kekawrte leh condom te kan hmu ṭhin," a ti a, a ṭawng zawnga a hmel awmdan chu a nuihzatthlak angreng.

"Mipa hi an mak e, nupui nei reng chungin hmeichhia an han kawp duh ṭhin ania, an nupuite hi an hmangaih hlawl lo aniang," ka ti deuh vang vang.

"Mipa chauh an ni teuh lo, hmeichhe ṭhenkhat pawh hian mipa an dawr ve ṭhin tho ania aw.." a tih chuan mak ka ti leh pek.

"Mipa inzuar pawh an awm tho a maw, aizawl velah chuan an awm ṭhin tih ka hre tho a, a van mak em em.." a rawn ṭhu hnai sawt sawt a, "Pasal kham lo leh hur herh deuh deuh an tam em alawm, ka ten tawp..." a ti a, keipawn ka ten, hmeichhe inzuar pawh tih tawh nak alaiin....

"Awi...damdawite hi a hluar ngawt lo maw...?" 

"Hluar e, an man zeuh zeuh reng alawm, addict an tam lutuk.." a ti leh ta zel a, khaw nuam leh thianghlim tak anga ka ngaih hi a lo ṭawp ru zek a nih dawn hi, farm-ah ka tawm reng bawk a, ka lo hre chiang lo hle a nih hmel.

Dar 9 rik hma deuhin pa Mafaka a lo chhuk a, "Mina, inkhar daih tawh rawh u, zan dangah pawh dar 9 pelh thleng thleng chu hawn duh loh tur, inrinni phei chu mi an tam si a, a chauhthlak duh dawn em mai," a rawn ti zung zung a, Muantei chu "Ka va thlah dawn che nia," tiin a hrilh bawk.

Ka haw chho chu ka inbual nghal a, nu Ṭhatei fapa te pahnih pawh an lo la meng a, ka inbual zo chu min lo au lauh, "U Mina, i thei kan ei a," a lian zawkin a lo tih chuan ka va ensak a, pi Lalpuii thei rep min ken tir kha an lo ei chu niin.

"A tui em?" ka tih chuan, "Tui lutuk," tiin a nu lam hawi a, "Min hau lo anu," a ti leh reuh a, a nu nen kan nuih a za khawp mai. 

Ka pindana ka luh hnu lawkah ka nu Nguri'n min lo call a, "Naktukah ka lo leng phei dawn a, thil min rawn chah duh te i nei em?" a rawn tih chuan chhah tur ka neih awm pawh ka hre lo.

"Engmah chah duh pawh ka nei lo," ka ti mai a, "Inkhawm i tum em?" a rawn ti leh zat.

"Chawhma chu ka inkhawm ve ang," 

"Anih chuan chawhnu lamah ka lo kal ang," tiin phone a dah zui a, ka chau deuh bawk nen ka muhil hma khawp mai. Chawlhni tuk a nih vang nge ni tuman min kaitho lo a, ka thawh ve meuh chuan chaw ei an lo peih fel diam tawh. Inkhawm ka tum em min zawh chuan anmahni ka zui tur thuin ka chhang a, pa Mafaka nu a lo lawm khawp a, "Ṭhalaiah te inhmang ve rawh aw, in kohhranah i inkhawm duh ka lo ring a, hmun khatah kan inkhawm ho thei dawn anih chu," a ti siam siam a, kohhran lamah hi chuan ka buai lo khawp mai, eng kohhran pawh hi Pathian nung kohhran anih chuan lawina tlakah ka ngai a, hostel-a seilian ka nih vangin ei leh inah phuartu ka nei meuh lo bawk a, ka tan chuan a awlsam em em vek a ni.

Chawhma kan han inkhawm a, khuaa Baptist kohhran lian ber an ni bawk a inkhawm pawh an ṭhahnem khawp mai. Sunday school erawh ka kal ve ta lo a, ka chhungte erawh an kal thung. In ka va thlen chuan nu Nguri chu kan dawr kawtah a lo ding vang tawh mai a, a lo thleng deuh chiah a ni awm e.

In chhung kan lut deuh chiah tihah phone call a dawng a, bathroom lam pan pahin phone chu a chhang a, ka va kal hnaih laichuan hman zana a mi sawi chungchang bawk kha a sawi lehin ka hria. "Min lo nghak rawh se, ka rawn thleng har dawn lo, a thil tur pawh ka rawn keng," a ti a, a vin deuh lek lek. Dawhkana a bag dah ka va en chuan wine bottle pathum hi a lo ak a, ngaihzawng a nei a nih ka ring nghet hmiah tawh.

Rei vak loa a lo chhuak chuan, "Lipstick min lo pe lawk teh," a rawn ti a, hmanhmawh deuh chuan ka pindan ami ka va la a, "A va senno ve ka inhmeh ve dawn em mawni," ti chungin a inhnawih mawlh mawlh.

"I inhmeh kha.." ka ti chu, "Tak tak maw?" a lo ti hu a, a sam te chu a han tuai ṭha zui a, nu valai tak, fa nei lo leh pian nalh ve tawk tak a ni bawk a, a hmel a ṭhain a vunin a chawi lehzel bawk nen ani hi a nalh em em rengin ka hria.

"Khawiah nge i kal dawn?" tia ka zawh chuan, "Ka ṭhiannu te inah ka kal dawn a, Maṭhai bulah chuan lo sawi suh, i pu hian len vah vak a phal lo a, a lo va report leh pek ang, ka hman leh tlai lamah ka rawn kawi dawn nia, ka lo kal lo anih chuan ka haw tlang a ni mai," a ti zung zung a, min tlawh tura lo kal chu a ni lo tawp ang, a rawn chhuanlam zawk a nih ka ring.

A chhuah hnu chuan ka awm a nuam nei ta hauh lo, tukverh aṭanga ka zuk thlek lah chuan footpath-ah dingin a sam a la chul ṭha mawlh mawlh a, ani hi en zui loh chi a ni dawn loin ka hria, ka pa nen an inneih lai aṭangin a lo heti tawh angem tih zawhna ka nei a, chu zawhna chhanna chuan zawhna dang tam tak chhanna min pe thei dawn bawkin ka hria.

Hmanhmawh deuhin ka va inthlak a, tukverh aṭanga ka zuk thlek leh chuan auto-in a lo tlan chhuak ve chiah a, keipawh chu kal chhuak rang tak a ni. Ka vanneih a siamin auto dang ka hmu nghal hlauh a, kan kalna tur hre hek lo, "I hmaa tlan te saw zui tawp rawh," tiin driver chu ka hrilh a, min zawt buai lem lo chuan a zui ve mai bawk. Ka hmanhmawh luatah duh aiin ka inha thehlep angreng a, kawrbah chungah cardigan fual hnelh hnawlh ka ha a, ka kekawr pawh chu a tight lam hret a ni.

Khaw chhungah kan phei zar zar a, rei dawn kan tlan hnu chuan kan hmaa auto chu ding lam sira kawngah a tlan chho a, chuta ṭang chuan thui kan tlan tawh lo. Building lian deuh kawtah hian kan auto zui chu a lo ding a, ka nu Nguri chhuk lai pawh chu ka han hmu pha. Waiting shed-in min hliah deuh avangin a rawn hlawi thla chuan min hmu lo niin ka hria. Ka driver lah chuan, "Huiha...!" a lo ti teh hluai a, ka chuan man ka pek fel hnua ka kalna tur ka han en chuan KM hotel tih a lo intar kuau a, mak ka ti angreng.

Hmanhmawh deuha ka kal chho chu hmeichhe pakhat ruih hmel zet hian min rawn su her lawih, "Kawng en ta che," a ti zawmah lehnghal, ngaihsak zui duh map loin hotel luhna lam chu ka pan a, nu Nguri kal phei chu ka zui hlawk hlawk a. 

"Khawiah nge i kal dawn?" lo titu nula chu ka va melh zawk.

"Nu Nguri ka rawn zui.." ka tih chuan a nui deuh sang a, engmah a sawi zui loh vangin ka kalsan leh thuai a. Ka nu Nguri luhna lam nia ka hriatah chuan in hnuai chhukna step a lo awm a, thui pawh ka chhuk hmain corridor pakhat ka zuk pawh a, a hnuai lamah step a la awm a, corridor awmna lamah chuan nge a kal a, a chhuk zawk ka hre thei lo. Counter-a nula kha ka zawh theih takah tiin ka han let leh rih.

Counter ka va thlen hma deuh chuan mipa pakhat hian min rawn kalpel a, min rawn sut avangin a rawn hawi let nghe nghe a, "Sorry," a tih hnuah a inher leh thuai bawk. Counter-ah chuan nula leh nutling pakhat ti ila nu a ni em ka chiang lo, inchei vul deuh mai nu Nguri te ang rual vel tur hi an lo ding a, mipa kal phei chu an lo en haw a.

"Nguri kha a lo chhuk em?" pakhatin a tih ri chu ka hre pha.

"Anthony-a bulah a awm," mipain a tih chuan, "A rawn bia che em?" hmeichhia chuan a ti leh a, kei chu an mahni hlat deuh hlekah chuan ka ding a, ka luh tirha nula min lo betu khan min rawn en chik viau bawk.

"Bia e," mipain a tih chuan, "Lo be ṭha duh vak suh, induh khum ngai chi a nia.." hmeichhia chuan a ti a, "A hmuha inlan ziah turin min ti bawk sia, be ṭha suh i ti bawk sia," mipa chuan lawm vak lo awka hian a ti a, a hmeichhe biak chu a nui deuh vur vur.

"A ngaihven zawk ang che tikhan, hmelṭha a ti che a, i duh loh hmel poh leh a vei ang che, nakinah chuan a rawn thlem dawn che tih ka chiang, ka thil duh hmang ngeiin a rawn thlem ang che," tih pah chuan ka lam a rawn hawi zawk a, sir lam hawiin phone ka bih rang khawp mai.

"Anthony-a tih tir mai ta che," mipain a tih chuan, "I hmelṭha zawk si alawm maw le, Anthony-a te chu a ta sa ang a nia, nang chu a awh laimek i nia lawm. Enteh Mate, thil sem kual aiin a hlawk ka tih kha, tun ami phei hi chu i rin aiin a nep lo ang, i kum khat hlawh tur thlalak lekah i thawkchhuak thei dawn..." hmeichhia chuan a ti suam suam a, an inthlem deuhin ka hria.

"Eng nge a neih a?" Mipain bul fea a tih leh chuan, "Pawisa tam deuh maw le.." tiin pakhat chuan a chhang a. 

"Inzuar turin min ti amaw,?" mipa aw chu a chang rap mai.

"Ka tih loh chu, inthlem tir rawh ka ti ringawt, a rawn thlemna tur che thil kha ka duh a, chuvangin min pui tawp la a ni mai, zawhna i nei hmasa ziaha a ninawm lutuk, vawiinah i ride tawh em?" hmeichhe aw pawh chu a vin lek lek a, "Ride tawh, ka mu dawn ania, zanah chiah ka chhuak tawh ang," tih pahin mipa chu a rawn inher a, keipawh chu ka inher ve nghal a. "Massage i duh em..?" hmeichhiain a rawn tih ri chu ka la hre pha, ka hnunga lo kal chuan a chhang lo a, rei lo teah min lo kalpel lehin ahmaa ka luhna kawngkharah khan a lut a, nu Nguri awmna aṭanga lo kal a ni tih ka hriat vangin ka zui ve thuai bawk.

Step-ah a chhuk a, corridor-ah phei loin step dangah chhuk leh a, chulai step ka thlen chuan music play ri ka hria a, Britney spears zai a niin ka hria. Ka mi zui pa chu corridor êng dul reih ruihah chuan a kal phei a, kan inkar chu pen 10 velin a inhlat a, pindan kawngkhar pathum vel chu kan kal pel tawh. Va zawh thawr mai tur nge ni ka ti rilru a; mahse, tun maia ka nu Nguri chanchin an sawi danah kha chuan zawh chi niin ka hre lawi si lo. Chutah, pen nga vel chiah ka pen leh hman tihah chuan a rawn inher thut...!

"A rawn tir che em ni?" a ti bul nghat a, chhan mai dan ka hre lo chuan lu ka bu ringawt pek a, thawk a la hluai mai. A hmel chu 'Hmelṭha' tia sawi tur chi a ni, nichina hmeichhia khan a sawi sual lo viau a;mahse, a fel hmel lem loh, a mit hmul ṭona sirah chuan piercing pahnih a nei a, a hmuiah nen...a meng thim deuh khup a, a sam a thurin a inchei duhdah viau bawk.

"Kum engzah nge i nih?" a aw chu a thumin a la bul ṭha khawp mai.

"24..." ka ti chu min melh run a, chutah..a inher zet a; mahse, a rawn lehhawi leh rang viau thung.

"Hmeichhe cher ka duh lo ka tih mawlh mawlh kha, han chho la i pi bulah chuan 'A duhzawng ka ni lo' han ti rawh," a ti pek a, kei chu ka hrilhhai khawp... min han tih dan tehngawt chu ka helh ru viau lehnghal.

Ka melh ve ran a, chet sawn pawh ka tum lem lo, "A va mak e..!" dawhthei loh hmel zeta a rawn tih leh takah chuan, "Ka zui dawn lo che, kal rawh," ka ti ve nghat a, hriatthiam loh hmel fea min en leh hnuah a  inher ta hram a. Man piah deuh hret a pindan kawngkhar chu a va hawng a, a luh hma chuan min rawn thlek leh zet, a luh dawna a ner deuh suk pawh chu ka hmu a, min ngai dik lo hlein ka hria.

Kawngkhar a khar fel hnu chuan pindan kawngkhar ho chu ka thlek a, a mal te tein kawngkhar bulah chuan beng ka va chhi a, inbe thawm te chu ka hre pha tak nain music a ring angreng a, an ṭawng thawm engmah a hriat theih loh. Ka kal phei zel a, hmeichhe nui hawr hawr ri leh mipa ṭawng thawm niawm tak te ka hre hlawm a, pindan piah ber ka thlen chuan music pawh a zawi ta deuh. Chutah, nu Nguri aw niawm tak hi ka hria a, "A tui ber ber ka rawn kensak che alawm.." a ti ri ka hriat chuan amah a ni tih ka chiang viau tawh. 

Chutih laichuan ka phone a rawn ri dar dar a, han chhan mai ka tum chu tu emaw hian hnunglam aṭangin a rawn phih thla hlawk mai!?

Amah bawk kha a ni!

"Eng nge tih i tum a, mi en thlak i tum elo?" 

"Teuh lo, khawi lo la rawh.." phone ka va ban tur chu min lo nam let rawk. Ka phone chu a en a, phone call lah chu a hmet tawp hmak a, min rawn melh thip hlur mai.

"Tunge i nih?"

"Tumah..." ka phone chu ka va chhuh nghal rawk rawk.

"Anthony-a bialnu i ni maw?"

"A awihawm loh em mai a..." tia kalsan mai ka tum chu ka banah a rawn man a, "Hmeichhia kha i lo zui ti raw?" a ti ta mai a, engtin nge a hriat nghal theih le! Ka hlauthawng deuh lek lek a, talh chhuah ka tum nghal phat.

"Tunge i nih...?"

"Ka hrilh lo ang che,"

"Anih chuan mipa rual awmna pindanah ka thehlut dawn che ania, an lo pawtsawm vek ang che," a ti khar khar a, ka kut lah chu a han chelh nghet khawp a, phihthlak mai theih a ni lo.

"Hmela, min thlah vat rawh.."

"Enthlatu i nih hi...tu nge rawn tir che?" a ti chher chher a, a kapa pet sak mai ka tum chu ka ke a rawn pet hmasa pek a, vawikhatte pawh ka rák hman lo, ka hmui a rawn hup chawt a, hnung lamah min pawt letin pindan pakhatah min hnuklut dawr dawr mai. Tal chhuah tumin ka ṭang ve fat fat a, tha kan inngah hleih nasa mai si a, ṭhutthlenga min keuh thluk hma chu ka che thei lo a ni ber.

Min han keuh thlu chiah chu thawk ka la kawk...

"Anthony-a nge a hmeichhe awmpui kha i rawn zui?" Ka hmaa chair-ah chuan a rawn ṭhu zui a, kawngkhar lam ka melh ruai. Mahse, a lam ka va hawi leh chu chemtein min lo tin vang a, "Call girl i ni lo.." a tih chuan zawhna min zawt tih ka hria, chemte chuan ka biangah a rawn tin zui a, "Sawi rawh," a ti vin leh ṭhak a.

"Call girl ka ni lo," 

"Anih tunge i nih?"

"Tumah ka ni lo," thawk pawh thaw ṭha ngam lo chuan ka melh a, ka chhang dik lo tih ka hre chawpchilh.

"I biang hi ka zai dawn ania," a ti ta mai a, "Ngawi rawh, ngawi lawk rawh..." ka ti chul tawh mai, ka hlau lutuk chu ka aw te a khur titih.

"Anthony-a nge hmeichhia kha i rawn zui?" zawhna ngai bawk a ni, ka huaisenna zawng zawng nen a kut chu ka vuan a, "Ka hrilh dawn che, hei hi la sawn teh.." ka ti zawi ṭiak a, ṭha deuh chuan a la sawn ve mai bawk a, min endan erawh a nelawm loh viau thung.

"A fanu ka nia.."

"A fanu a, saw nu sawn pasal leh fa a nei lo... lawkin.....a fahrawn em ni?" a ti a, ka lo bu sawk sawk.

"Khawnge i pa?" a ti vin chiam, ka khabeah a rawn hmer zui a, "A thi tawh," ka tih rualin min thlah leh hlawk.

A ding vut a, a rawn inher leh chuan mak tih hmel deuh hian min en a, ka kawr chung chu ka lo pawt ṭha sawk sawk. "Engati nge i lo kal a?" a ti leh ri chu a dang ta hlakin ka hria, a vin lo a, lungawi lo awka a ang zawk mah a ni.

"Ka nu ka rawn zui.." tia ka chhang chu a hrethiam nge ni a ngawi run a, min la en reng thung.

"Ka nu sawn eng nge a tih a?" zawi ṭiaka ka tih chuan, "I hre duh a maw?" tiin a lo nui hawk a, aw tih nana ka lo bu zauh chu min en leh ren rawn hnuah, "Ka hrilh dawn lo che," a ti bul hmuk a, ka hmaa chair-ah chuan rawn ṭhu lehin a bawp a khawkherh zui a, ngaihtuah nei niawm takin min en bawk.

Ṭawng leh ka tum chiah chu min lo ṭawng khalh a, "I nu saw mi hur ania," a ti teh thlawt a, rindan ka neih tawh avangin min ṭhawng eih lo.

"A inzuar em ni?" ka ti chu a nuih a han za khawp a, "Ngaihzawng a nei maw?" ka tih pawh chuan min la nuih cheu.

"Mi hur dawrtu zawk ania," a ti a, chu pawh chu ka rin dan dang tho a ni.

"Anih chu.."

"Engtin nge i tih ang?"

"Engtin mah..."

"I nu tak a nih loh vang anih kha,"

"Engtik aṭangin nge a lo kal ṭhin?"

"Ka hrilh lo ang che," beidawng fein ka melh a, ani erawh a thutak hmel khawp mai.

"Ka hriat a ngai ania.." ka tih rual deuh thaw chuan, "Eng atan?" a lo ti ve zat a, he pa hian min hrilh thei; mahse, ka hlauthawng a ni, ka sawi loh tur ka sawi palh ka hlau.

Thle deuh bar chung hian min lo melh a, a thil tih tum nena inkaihhnawih lo thei dan berin ka chhang a, "Ka pa kha a uiresan em ka hre duh a," tiin.

"Uire ta se..?" a dilchhut nge, a sualthiam ve hrim hrim zawk ni?

"Ka pa kha thah a nia, chuvangin an nupa kar buaina chu a pawimawh alawm," engtin mah min chhang lo. "Police te pawn min zawt a, buaina an nei ngai loin ka hria a, an inhau lai takngial pawh ka la hmu ngai lo; mahse, ka nu hi hetiang hian a awm leh si a, 

...chuvang chuan...a pawi mawh lutuk..." ka ṭawng chu a bah niai mai.

"Engtik aṭangin nge a lo kal?" 

"Ka hre lo,"

"I hria ang, amah pawh i hria alawm,"

"Hetah hian vawikhatmah lo kal tawh suh ang che, i nu awmdan chu i hmuh ang saw a ni mai," a ti fiah fak a, min hrilh dawn lo anih hmel.

"Anih chuan ka kal tawh dawn ania..?" a bu zauh a. Mahse, ka din rualin a rawn ding ve zat. Phawk fea ka lo en laichuan, "Nangmaha i chhuak anih chuan an lo be dawn che, i nu pawhin a hria ang," a ti a, kawngkhar lam a pan zui bawk a, min puih a tum tihna em mawni!?

Corridor-a a kal chu ka zui ve zel a, "Lo kal chak rawh," a tih ri chu a nelawm loh viau nain ka kal hnaih ve sauh a, step tawp kan han thlen rual chuan ka darah min rawn kuah a, "Hawi chhuak suh," a ti zawi sup a, ka kun rang khawp mai. 

Counter awmna zawn kan thlen hma deuh chuan min en an awm tih ka hria, "Tunge?" rawn titu chu ka luhtirha min rawn betu kha a ni. "Ka hrilh duh che i ring em?" tiin ka kalpuipa chuan a chhang a, "Ring ang chu, tunge a?" nui lek lek hian hmeichhia chuan a rawn ti let a, lehlama ka hawi tlat avangin a hmel chu ka hmu thei lo.

"I ring dik lo anih chu," ka kalpuiin a tih rual chuan ka han melh zawk a, "Lo hawi suh," a lo tih vangin ka kun leh rang viau thung. A ṭawngkam chu mak ka ti deuh a, tu emaw min hriatchhuah tir vang a ni.

Pawn kan chhuah dawn ṭepah chuan, "Hmeichhe cher ka duh lo i ti vel a, a va khal si lo ve," hmeichhia chuan a rawn ti leh lang lang a, ka kalpuipa chuan a chhang tawh lem lo. Pawn kan thleng chu ka huaiveng huaiin ka hria, ka ngaihtuahna erawh a mang deuh duk a, ka ngawng deuh chhulh a ni.

"Ka lawm e aw.." ka ti chu min en map lo hian kawngpui lamah a kal thla mawp mawp a, ka umphak rual chuan, "Lawmthu sawi a ngai lo," a lo ti leh vut lawi a, a sual lutuk loin ka hria.

Kawngpui kan thlen rualin a hawi kual thuak thuak a, auto a zawng tih ka hrethiam nghal a, "Keimahin ka chang tawh mai ang," ka lo ti ve sawk sawk. 

"Nia, chang mai rawh," tia kal mai a tum chu, "Ṭhianpa.." ka ti leh rih a, a rawn inher chu ka lo nuihsang a, "Ka lawm tak tak ania," tiin lawmthu ka han hrilh nawn leh a, "Thil ṭha hmu i va ang ve," a ti leh daih mai.

"Ka nu kha maw?" ka ti zawi sep a, dar a kan ak a. "Ka rilru chu a na ve reng," ka tih pawh chuan, "Dawt sawi a ngai lo," ti ngatin min chhang a, a ṭawng danah hian tu emaw an deuh a nei, a ngainatawm hlawl loh a ni.

"Kal tawh rawh," ka tih laimek chuan auto a rawn tlan a, lo phar ka tum zuau a, a tlanchak leh lutuka ka phar hman lo, ka lo en tlai deuh bawk a ni.

Mahse, ka bula mi chu a rawn inher leh a, hla deuh taka auto pakhat lo tlan lam chu a thlir vang vang a. Chutih laichuan, "Nang kha.." pawr zeta tih ri ka hria! Kan inher rual zawt a, kan chhak lam waiting shed-a hmeichhe lo ding chu phawk fein ka en bawk. Ka kal lam pawh khan ka hmu tawh a, mask a vuah vangin Jenusi a ni tih ka hre miah lo. 

Hmanhmawh deuh hian a rawn pen thla hlawk hlawk a, "Mawl em em lutuk," a rawn tih te chuan ka hrethiam lo khawp mai, a rawn thinrim ve ringawt em mawni!

"Min rawn hrilh thei reng a ni lawm ni, engvangin nge i ngawih reng a?" a la rawn ti pawr hlur lehnghal a, a thu thua awm turah min ngai em mawni?

"Engah nge ka hrilh..." ka sawi zo hman lo eng emaw hi a rawn thlawh phei fua a, ka bula ding chalah a ri thlawrh, balhla kawrin a rawn vawm pek anih chu!

"I mawl em ni a?" kan bul a lo thlen ruala ka  ti chu, "Ka be lo che.." ka lo ti ṭeu hlar a, ka bula mi zawk chu a melh thip râwm bawk a, hemi te pahnih hi an inhria em ni a, eng nge an awmzia?

"Min hmu ta.." nui chunga ka kalpuipain a tih chuan hrethiam lo tak ka ni?!

"Ka thin i tirim.." Jenusi'n a tih laiin, "Keipawn ka ngai che," tih pahin a lo kuah hlun a, tal fat fat chunga Jenusi'n min rawn melh chu ka lo en mawl tawp!

"Ka lawm miah lo ania aw Thluakthawlpa.." Jenusi zawkin a tih laiin, "I hrehawm dawn anih chu," ti maiin pakhat chuan a chhang a, a la kuah bet reng bawk nen an inngaizawng em mawni ka ti ru neuh neuh a. "Hei...eng nge in awmzia?" ka va ti dek dek chu, "Min thlah teh Zoherlian.." Jenusi'n a lo ti vin ṭhak a, engati nge ka hrilhhai bik reng le....!?

Heng ho awmzia hi ka hre lo, tupawh hi an mak em em vek mai! He pa lah hi, tu teh hrep nge maw a nih le?

End of chapter - 12