WHY DID YOU GO? (CH - 3) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 3

"I nu chu ka call a, kan tlaivar tur thu ka hrilh ania, kan inah inphih harh phawt la, pum ruaka kal a ṭha lo ang," Zohera'n a tih chuan, "A hmel i hmu em?" zawitein ka ti a, "Hmu e," a tih rualin ka mittui a luang leh zung zung. 

"Lo kal rawh," tih pah chuan a bike dahna lam a pan a, ka tha te chu an zawi zo a ni ber, ngaihtuahna mumal neih pawh a har ka ti. Bike-a ka lawn tur chu ka ṭap leh rih a, rei dawn chu min nghak leh.

"Hetiang anih hi ka ring lo asin, lo hria ila chu a bulah ka awm reng tur ania, ka rilru a van na tak..." ka ti tlawk tlawk a, min hnem dan vak a hre lo. "A rang teh thut em a ni, tumah kan inring lawk lo," a ti a, an in lam pana kan tlan laite chuan mittui ka hru mawlh mawlh reng, insum a har a ni, inthiam lohna lian tak ka nei a, ka ngaihsak tawk lo hlein ka hre bawk.

Zohera te in kan va thlen chuan a nuin chawei min lo siam zung zung a, ka han kil ve tak nain engmah chu ka lem hleithei lo. "Ka ril pawh a ṭam chiah lo," tiin ka thawhsan a, Zohera nghah pahin an veranda-ah ka va ding a, ka phone-a kan thlalak te chu ka enkual a, hnuk a ulh ṭun reng.

"Jenus, puana tuam i duh em? Pangpar i duh zawk pawhin ka chahsak thei che ania," Zohera nuin a lo tih chuan, "Puan a awm chuan ka tuam zawk ang," tiin ka chhang a, a puan lei thar pathum hi a lo la chhuak a, ka duh min thlantir bawk a, ka thlan loh pakhat chu Zohera ken turin a fun sak bawk.

Kan chhuah chuan dar 9 a pel tawh a, kal pahin Veroi kan bia a, ani pawh a lo haw ve mek a, rei pawh kan inbe lo. Sangpuia te in kan va thlen chuan mi an lo ṭhu khat hmur tawh a, kawngka bulah ṭhutna pakhat chiah a lo awl a, "Pawnah kan ṭhu dawn nia," Zohera'n a tih chuan ka hnial bik lo. Kan puan ken dah turin kan lut zui a, Sangpuia ruang chu a chhungten an lo kil ṭhap a, pakhatin a biangah dawma a ṭah ngawih ngawih avangin a hmel chu ka va hmu thei lo. Zohera chuan kan puan ken chu a pe a, kal leh nghal mai a tum laiin kei erawh ka la ding tlat a, ka awm dan hriain min rawn pawt rang hle bawk. 

"Min lo zui rawh," a ti chu ka en mawl tawp a, chumi hnuah pawn lam panin min kai chhuak a, ka rilru chu a mang duk a ni ber. Kan ṭhutna bula ṭhute chu ka en kual leh ṭhin a, thaw a pik hluah hluah, ṭah ka chak a, ka ṭap ṭha ngam bawk si lo a, bawm tawta khung beh ang mai ka ni.

"Inneih kha a duh tak tak em, i bulah eng emaw a sawi em?" tia ka zawh chuan, "A duh ang, aman a sawi kha," tiin min chhang a, thawk pawh ka thaw ṭha thei lo, hetianga min kalsan hi a duh bik lo tih ka hria, min ngaihtuah chunga a kal ngei pawh ka ring, ka va han lainat tehlul e aw, min ngai tak chungin a kal awm si a, thih hlauhthawnawma a awm laikhan ka hming lamin a rum ve vawng vawng ang maw le.

Ka insum nasa lutuk chu ka khur titih, ka bula ṭhu lah chuan min rawn thlek leh ṭhin a, hnuai lam bihin ka ṭhu kun tlawk tlawk a,   zai riin thawm a luah hneh em avangin tuman ka ṭap ri chu an hre kher lo ang. A hmel hmuh ka chak a, va luha va kuah vawng vawng te pawh ka chak a, ka ngam ngang bawk si lo, nep ka intih zia chu aw, a hun hnuhnungah pawh heti hi ka ni a, nep ka inti ngawih ngawih a ni.

"Vuinaah kal leh i duh awm si a, rei lote tal muhil la a ṭha ang, naktukah Veroi a lo thleng tawh dawn bawk a," tiin dar 3 velah chuan Zoa'n haw a rawt a, "Ka muthilh theih pawh ka ring lo, awm tlang law law ila," ka tih chuan min hnial tlat, "Tih theih a awm tawh chuang hleinem, inah haw la, darkar hnih khat tal i va mu dawn nia," a ti a, a tho zui mai bawk.

Min va thlah hnuah ani chu a let leh a, ka bula awm chu a tan pawh a nuam dawn lo tih ka hrethiam ve a, a tuk lama kal leh tur chuan rilru ka siam a. Mahse, muthilh chu thil har tak a ni, chauin ngaihtuahna pawh chawmawlh viau mahsela chhin khat te mah ka chhing lo, khumah ṭhu chungin thlalak te ka en kual a, ka ṭap khawvar ṭhak bawk a, ka hmai te chu a bui luk mai.

Veroi'n min lo biak chuan dar 7 a pel tawh, "Chaw eikhamah ka lo sawm ang che, lo insiam rawh aw, pangpar kan dah ve dawn nia, ka lo siamkep ang che," a rawn ti zung zung a, Zohera a bia em ka zawh chuan, "Thlan laihna lamah a kal a, a hmunah kan inhmu mai ang," a ti a, a cham rei thei dawn em ka zawhna chu, "Exam chawlh lai ania, ka cham rih ang, i bulah ka awm reng dawn alawm, lungngai miah suh," a ti leh luam a, ka lawm ve takzet, mahnia ka tawrhchhuah theih pawh ka ring lo a ni.

Ka han insiam tur te chu tha tho mawlh lo, ka hmaihnawih te, ka tlereuh te, engkim chu Sangpuia min leisak vek a ni, a zungbun min pek te chu ka en ngawih ngawih a, ka â riai mai. A va han na vawng vawng tak em, heng incheina te hi eng atan nge ni tawh ang le, tu tan nge ka inchei tawh ang, engkim mai hian hlutna an nei tawh lo ni maiin ka hria.

Ka nu chuan ruang ka kil ve dawn em tih min lo zawt a, chhan dan pawh ka hre lo. "Veroi nen kan kal dun ang, kan lo haw har deuh ka ring," ka ti ngawt a, anni pawh vuinaa kal ve an tum a, an lo chhuah tlai deuh dawn avangin kalsan mai ka rilruk a, kal hma ka duh chhan pawh a ruang hmuhna remchang a awm ka beisei vang a ni ber.

Tukṭhuan pawh ei lo chuan ka insiam a, nizan aṭanga thil ka ei mumal loh vang aniang ka taksa chu a zawi ngawih ngawih. Ka pa lah chuan, "Mi zingah va ṭap vak suh aw, a nute mitmei ven a ṭha ania, ruang pawh va kil ve duh suh," a lo ti mawlh mawlh a, Sangpuia chhungten min duh loh thu hi a hre ve a, a lo inthlahrung ni ngei tur a ni.

"Ka insum theih leh theih loh a ni mai," ka tih laiin, "Miin an sawi sep sep mai ang che, mi hian thil an sawi rei peih teh ania, keini pawh i nu nen pawn velah kan ṭhu ang, amah Sangpuia a zahawm em a, kan kal lo thei si lo a, a nute vang hrim hrim hi chuan kal loh pawh a mawi mah zawk.." a ti chuar chuar a, chu lam chu ka ngaihtuah ve thei rih lo. Ka mipa hmangaih khan a hun hnuhnung berah hian min beisei dawn tih ka hria, ka hmel a hmu lo a nih chuan a hawihai ngawt ang, thlamuanga kal tura ka thlah ve ngei a ngai a, chu chu a tana ka tih theih hnuhnung ber a ni tawh.

Veroi a lo thleng a, a hmel ka hmuh chuan ka insum leh thei lo, ani pawhin min ṭahpui ve vawng vawng a, duhtawka ka han ṭap chu ka awm a nuam deuh huai mai. "Insum duh reng reng suh, a hun laihian ṭah bawrh bawrh mai tur, ka nu boral laikhan ka ṭap hleithei lo a, tun thleng hian ka la ṭahpui thung a, ṭah theih loh vangin rilru a na lo chuang bawk si lo, nang chu i ṭah theih chuan ṭap bawrh bawrh rawh," tiin min kuah ngawih ngawih a, ka mittui te chu min hruk sakin ka sam a chul hliau hliau bawk.

"Zoa'n, 'A ṭap chak lutuk a, mi zinga a ṭah ka hlau bawk si a, ka hnem thiam bawk si lo' a tia, nizanah pawh khan ruang kilpui che a duh ve lutuk a, Sangpuia nuin a lo ngaithei lo ang che tih a hlau ve bawk si a," a ti sap sap a, Zohera bulah kha chuan ka insum nasa lutuka, ka boruak tawnin a zir lo bawk nen inveng ranin ka awm a, Veroi kiangah erawh hah a dam sawng sawng. Min hrethiam em em a, min tuarpuiin min ṭahpui hial a, ka tan chuan min hnem tura Angel lo thleng ang mai a ni.

Vui hun chu dar 11 a ni a, dar 10 ah kan va thleng fel der tawh. Veroi chuan rose dum bawr lian deuh hi min lo ken sak a, chumi pawm chunga in chhung ka va lut tur chu min lo en ṭhap hlawm a, ka pangpar ken chuan an mit a la viau aniang. Sangpuia ruang kila a nu leh a nutei teho lo ṭhu chu melh duh loin amah ngawt chu ka en a, a hmel chuan lung a ti dam lo takzet. A dang bel a, a hmui a dukin a dam lo tih a hriat ngawih ngawih. 

A awm chungah pangpar chu ka va dah a, ka insum nasat luatah engmah ka sawi thei lo. "I va fel ve," aw ṭham ṭuaua a nutei'n a lo tih laichuan ka mittui a rawn far zawih zawih. Thei leh thei loin Sangpuia chu ka va ban a, a biang vawt thler chu rei lote tak tak ka va dek a, chu chu a taksa ka deh hnuhnun berna tur a ni ta.

Mittui nena ka kalsan laichuan ka hminga min ko ri hi ka bengah a rawn ri tluk tluk a, ka va lehhawi leh nghe nghe. "Lo kal rawh, ṭhutna pawh a awm si lo," tih pahin Veroi'n ka ban a rawn vuan a, pawn kan chhuah ruala an thlalak tar ka hmu chiah chu ka tliak hnawk a ni ber, ka ṭap chhuak hawk a, hmui hup chungin ka insut hlawp hlawp.

An ṭhenawmte inah lutin an bathroom-ah rei deuh ka va ṭap a, Veroi'n pawn lamah min lo nghak thung. Ka duhtawka ka ṭah hnua ka va chhuah chuan, "Veranda-ah sawn ṭhu ve ang," ka ti a, va luh leh pawh ka hreh tawh a ni.

"Zoa pawh a lo thleng tawh, a chhungah a lut mek a," a tih chuan kan awmna hrilh mai turin ka ti a, chair la chhuakin veranda-ah chuan kan va ṭhu dun a, kan ṭhutna aṭang chuan Sangpuia te kawtkai chu a lang chiang viau mai. Mi an kal tam angreng a, uitu leh ngaihlutu a ngah viau aniang ṭhenawm te kawt leh in chhung nen an khat hmur a, tlangval fel tak, veng chhung leh kohhran tana mi ṭangkai tak a ni bawk a, hetianga thlah hi a phu ve hlein ka hria.

Zohera lo thleng phei chu, "Engati nge thlan laihnaah i kal a?" ka lo ti thuai a.

Ani lah chuan, "A hmun chhe laiah an phum ka hlau alawm maw le," tiin min lo chhang a, a patea hi an YMA president a ni a, hmun ṭhalai deuha phum a lo dilsak niawm tak a ni.

"Zoa, Jenusi hi ruang kil pui dan dap teh," Veroi'n a tih chuan, "Mi ṭahna bulah ka awm duh hleinem, va ṭhut ve reng te chu i duh em ni, an lo melh leh hrek hrek che anga, i rilru a na leh mai mai ang," a lo ti bul bul a, "Ṭhutna pawh a awm chuan loh kha," ka ti ve tak nain a ruang kil chu ka chak takzet, a kut vawn te, a bianga dawm leh te, kuah chunga ṭah te pawh ka chak, 'Mangṭha' tih takngial pawh ka la sawi hman lo...

Kan pathum chuan kan ṭhu ho a, anni pahnih chu eng eng emaw sawiin an titi pah a, kei erawh ka ṭhu ngawi tlawk tlawk. Zohera lah chu a nuin a lo zawng a, mi a rawn koh tir a, ruang kil turin a duh anih hmel. Ani lah chu a kal duh der lo a, "A hmel ka hmu tawh," tiin a ṭhu nghet tlat.

Vui zawh hnu chuan thla lakpui turin kuang an rawn zawn chhuak a, kan ṭhutna aṭanga ding meuhin kan lo thlir a, chutih laia nu pathum lo phei te thilsawi chuan beng a verh khawp mai. "A bialnu chuan ṭap purin pangpar a lo dah ve an tia, ruang a kil ve lo niawm tak a ni, Sangpuia chhungte nen an inti ṭha vak lo a, a kil ve ngam lo aniang," a sira kal chuan a ti a,  Veroi'n min lo kheuh zauh zauh.

Chutih laimek chuan, "Muansangpuia ṭhiante'n lakpui tur," tih thu hi an lo puang a, "Kal ang u," Zohera'n a tih chuan Veroi'n a lo hnial rang khawp mai, "Va kal rawh," ka lo tih ve mai avangin Zohera chuan min kalsan a. Sangpuia chuan ṭhian pawh a ngah viau a, dinna an inchan meuh lo. Mittui hru zauh zauh chungin an thlala chu ka thlir a, ka ṭah nasat vangin ka lu te chu a na ut ut tawh a, luak a chhuakin lu a hai chulh mai.

"Thlanah kan kal ve dawn em?" tia ka ṭhiannuin min zawh chuan ka la aw ve zel a, a thi tih hi ka tan chuan pawm a la har em a, a liam tawh tih ka pawm theih nan a tawp thlenga zui ka duh a ni.

Mi hnungah kalin muangchangin thlan lam kan pan a, Zohera hmun thlan chu kawngbul mai langsar lai tak hi a ni a, kan bula kal te pawhin, "Hmun a va chang ṭha ve aw, thlanglama an phum ka ring ania," an lo ti ve hlawm a. A kuang an thlak laichuan thlan ko chhak lama kan din vangin a lang chiang khawp mai, rei erawh ka en ngam lo, Veroi hnungah mittui ka hru sawk sawk a, a chhungte ṭap thawm chuan min vel ṭha ṭhin bawk.

Kan ṭawngṭai zo a, midang an haw hnuah pawh keini chu kan la awm khawtlaia, tu mitmei mah veng loin ka ṭap ve thei ta. A ruang an zalhna thlan bulah chuan ṭhuin a hming ka lam a, 'Mangṭha aw' tiin ka ṭap vawng vawng a, min chhawn tur reng a awm lo. Ka arsi lian, ka Jupiter chu a liam a, a lo kir leh tawh ngai dawn lo, a hlimthla chu van sanga arsi te kiangah a awm tawh dawn a, ka chelh leh ka khawih phak loha sangah.   

'I awmna chu ka tan a van sang dawn em, ka ke te'n zahngaihna nei lo lei an rap si a, i kianga hahchawlh chu chak ṭhin mahila ka tan chuan a sang em a ni,"

Ni a liam a, zanthim pawh khaw engin a rawn zui a, nitin hian a na zual telh telh ṭhin. A tel lo khawvel chuan mawina a nei lo a, phurna emaw, tha thona tur reng a awm lo, khawharnate, lungngaihnate chu ka ṭhian an ni a, mittui ten min hnem leh ṭhin. Ṭhian te kianga ka awm laichuan ka nui a; mahse, ka mal em em tho si, awm ve sela tia ka duhthusam hi engtikah tak tawp ang maw...?

Inrinnia ka dawr kal haw chu Veroi te inah ka va peng kawi a, Veroi te unau zinga upa ber u Manuni'n pawn veranda-ah wheelchair-a ṭhu chungin lehkhabu a lo chhiar a, min hmuh chuan min lo be ve hlut.

"Chaw te lo ei rawh, intihhlim i mamawh tlat, i theih phei chuan lo riak daih la, anih loh pawhin Veroi hi riahpui tur chein sawm ta che," a lo ti luam a, Veroi awmna ka zawh chuan, "In chhungah a awm, Zohera pawh a awm kha," a lo ti a.

Ka va luh chuan an reh ṭhiap mai, an inah ka kal khat deuh ta bawk nen ka kal hnuhnun ber aikhan an lo tuai hnum tawh a, sofa thar leh tv thar te an lo nei a, a lo chei nuam tawh hle bawk. "Vero..." tia ka koh chuan pindan lam aṭangin min lo chhang a, "I lo kal elo? Dawrah i kal lo em ni?" a rawn ti lang lang a, Zohera a awm ve tih ka hriat vangin ka lut duh mai lo.

"I mu em ni?" ka tih chuan, "Mu lo e," a ti a, a thawm sat sat reng.

"Zoa a awm em ni a?" ka ti leh a, chutih laichuan kawngkhar a rawn hawng a, khuma Zohera mu chu ka va hmu hman thuak a, Veroi lah chu mu tho tih hriat takin a sam a thur a, khaw en lai leh a u awm ve reng laia an awmdan chu mak ka ti angreng.

"Tinge a?" phawk fea ka tih chuan, "Ka nuamsam lo a tia, zing aṭangin a rawn mu tawh," nui tat tat chungin a ti a, "A va awm ang lo," ka ti chu min chhang zui lem lo. "Thingpui ka'n lum ang aw," tiin Zohera chu a au zui a, "Helamah lo mu phei rawh," a va ti a, Zohera pawh chu a rawn tho ve ṭuah ṭuah. 

Boxer leh tawnzau nen ke lawngin a rawn chhuak phei a, ka lo en dan a hmuh chuan a ner nang a, ka zawt buai duh ting tang lo. "Chhungte mitmei te veng ve ula maw le.." ka ti tawl a, anni chu an nui mai mai chauh.

"Hetianga in awm dawn chuan innei law law rawh u.." 

"Dik chiah," Zohera'n a tih laiin, "Engtin mah kan awm lo e aw," Veroi'n a lo ti zauh a, ka awih chiah lo chu a ni.

"Innei chuang loa hetianga awm hi a fuh lo, mualpho a awl ania..." ka tih leh pawh chuan, "Engtin mah kan awm hleinem, a muhil renga, rei lote ka va mu ve ringawt alawm," ka ṭhiannu chuan a la ti ve fan a, Zohera chuan a pawm ve vak lo aniang a ner a ner a, an inkar hi hriatthiam a har ka ti ṭhin.

"Nula leh tlangval khuma mut dun te chu.."  sawi pawh ka sawi zawh hmain, "Ka la virgin e aw.." ka ṭhiannu chuan a lo ti leh. Zohera lah chuan thawk a lo la hluai a, ka lam a rawn hawi rualin a mitko a san rulh a, "Kan ti lo.." a ti tlawng. Ka ner sak a, chu veleh, "Mahse, kan kal thui tawh, inneih a ngai," a'n tih zawm leh zat a, eng a tihna nge mawni!?

"Kan mu dun chuang hleinem..." Veroi chu a lawm vak loin ka hria.

"Sex hmang tak tak lo mahila eng emaw chu ka tih tho kha.." Zohera a ni. Ka thaw hawk a, an inmelh rum lai chu chik zetin ka en bawk.

"Zoherlian, min tih zah i tum em ni a?"

"Jenusi a nih hi, a bulah engmah i zep loh kha,"

"Kan inkar engkim a hre lo aw," pawr fea Veroi'n a tih chuan, "Engkim ka hre lo maw?" ka lo ti ve zauh a, ka ṭhiannu chu a inthlahrung leh deuh nge ni min rawn nuih tawi tak a, "Kan mu dun lo tak tak ania," a ti leh a.

"Mahse, in kal thui tawh chuan innei rawh u, in insum zo lo thuai ang," ka ti chu Zohera'n min lo thlawp khawp mai. "Sawipui rawh, a kal leh hmaa sawifel ka duh ania," a lo ti zung zung a, Veroi'n a rawn chhan leh pawh chuan, "Kan innei lo anih chuan kan inṭhen ang," a ti hmiah mai a, an inhau thinrim ta ringawt.

"Nang hian min duh tak tak pawhin ka hre lo, pasal atan min duh loh chuan engati nge min ngaihzawn?" Zohera'n a tih laiin, "Duh lo che ila ka ngaizawng lo ang che, ka la inpeih lo ka tih mawlh mawlh kha, min duh tak tak anih chuan min nghak ve thei tur alawm," pakhat chuan a ti ve thung a. He thilah hi chuan Zohera hi ka thiam zawk mah ṭhin, innei sela buaina tur an neiin ka hre lo, Veroi lah mi hausa ina lawi tur a ni a, Zohera chhungte an fel em em bawk a, a hrehawm dawn loh hlein ka hria.

"Ka attention chiah hi i duh.." Zohera'n a ti chu Veroi chuan a han haw khawp a, "Mipa zawkin chutiang han sawi, nangpawn eng nge min neih i duh em em chhan, i insum peih tawh loh vang bak anih loh kha," a lo ti let ve pang pang a, a thingpui chhuan pawh a ngaihsak meuh tawh lo. Keimah zawk chuan ka va suan a, no la chhuakin ka siam zui mawlh mawlh a, an la inhnial nasa khawp mai.

"Sex vanga nei duh cheah min ngai a maw, kum engzah nge kan inkawp tawh, vawikhat pawh ka la nawr lui ngai che em ni?" Zohera'n a tih chuan ṭawng ring lo turin ka lo khap a, an ṭawng zawi ve tak nain an boruak chu a la ṭang ṭha viau a ni.

"Mipain inneih in duh chung chung tur chhan dang ka hre lo, upa tak pawh i la ni hleinem..."

"Engtin nge chutiang rilru chu i put theih zawk le, sex ringawt duh ila min nei duh lotu hi ka nghak reng lo ang che,"

"Chutianga ngaih theih tur chuan i sawi tawh kha aw, i insum theih loh apiangin inneih i rawt alawm.."

"Kan mu dun tawh awm ang ziazang a, ka insum thei a, i la virgin hi maw le..."

"Hnial lo che ila chuan..." Zohera'n a lo pawt chat a, "Ka rilru tak hian ka duh ngai lo, ka hmangaih che avangin ka insum tih hre ve rawh.." a lo ti vin hlur a, an inhauh dan chu ngaihthlak pawh a nuam lo, u Manuni pawhin a lo hre pha ang tih a hlauhawm.

"I insum dan ve kha a, i duhkhawp ka pe tho che alawm.." Veroi'n a tih chuan ka lo inpetruh ṭun, Zohera pawn chhan ngaihna a hre ta lo aniang thawk a la hawk a. "Ka haw dawn, inhnial ka peih tawh lo," tih leh pindan lam pan a rual a, Veroi lo hawi chu ka lo melh no vak bik lo.

"Nakinah ka hrilh vek ang che," tiin pindan lam a pan ve leh a, thingpui lah chu ka siam kep ve bawk a, an in dawn loin ka hria.

An va inhnial leh bawrh bawrh a, "Vawikhatmah kan ti tawh lo ang, hetiang vang chauha nei duh tur chea mi i ngai dawn anih chuan fawh pawh ka fawp tawh lo ang che.." tih angreng a ri nawk.

"Min fawp tawh lo ang maw? I chiang chiah a maw?" Veroi a ni, a cho ar ar khawp mai.

"Fawp tawh lo ang, min ngaihdan kha lo thlak hmak rawh," thawm a ri khat khat a, an insual emaw tih mai tur a ni. "Kha min chhan let tho si kha.." tih riin a zui a, ka hrethiam map lo, an â ka ti hle ringawt.

"I sual hle mai," Zohera'n a tih ri ka hre leh a, rei vak loah a jacket ha ṭha mawlh mawlh chungin a lo chhuak a, "Thingpui i in dawn em?" ka tih chuan melh pawh min melh eih lo, "Lo zilh rawh," a ti a, a chhuak zui nal nal bawk.

"Eng nge in awmzia?" pindan kawngka aṭanga Veroi lo dak chu ka melh rum titih a, ani lah chu a la nui mai mai. "Kan inhau lo ania," tiin a lut zui a, ka va luh ve chuan khumah a lo bawk a, nuam chu a tibik chiah lo aniang.

"Thingpui ka siam tawh asin..."

"Kan inngeih lo angreng sia, innei ta ila kan inneih rei theih i ring em?" 

"Ka hre nang, inchhai derna emaw, inrunluihna thil te anih loh a, in induh tak tak te anih chuan theih awm tak a nia.." 

"Pasal neih hi ka chak hlawl lo a ni, Zoa kher hi ni lo phei sela chu ka inngaihtuah buai pawh ka ring lo..." a ti niah niah a, sawi ve vak tur pawh ka hre lo.

"Mipa hi chuan sex vangte hian inneih hi an duh nghal mai ṭhin a, han innei ta ila, kan beisei angin hlim dun ta si lo ila, a chan chhe zawk ka ni dawn chiang a..." muangchanga rawn thawh pahin a ti a, "Ka hna te hi ka thawk zui thei kher pawhin ka ring lo, khaw hrana awm chu a duh lo chiang sa...huphurh chhan ka ngah mai, kum hnih khat tal chu liam leh phawt se ka duh maw le..." a ti leh vang vang a, chhanna beisei deuhin min en bawk.

"Thurawn tur che ka hre lo, keichuan lu ka sun mek a, ka dinhmun aṭanga ka thurawn theih chhun che chu i theih laihian a tam thei ang ber a bulah hun hmang rawh tih a ni mai," tiin ka nuih tawi tak a. "Ka hnem thiam lo ve ngawt mai che, ka buaina hlir ka la sawipui zui che a, sorry aw..." tia ka ban a rawn vawn chuan ka nui ve taknaa, ka hlim lo takzet.

"Tlaiah chaw lo ei la, zan ka lo riak phei ve thung ang," a ti a, lo riak sela ka duh ve tho avangin ka hnial bik lo. Ka nu ka va call a, "Ar la turin ka kal daih a, lo phei har suh u," a lo ti sam et a, ka pa erawh ka be tawh lem lo.

Thingpui in pahin eirawng kan bawl dun a, u Mununi lo luh hnuah pawh kan titi bawrh bawrh. U Manuni hian ruh lam natna chikhat a vei vangin tleirawlte a nih aṭangin a zeng a, an unau hi hmeichhia hlir niin a upa ber a ni nghe nghe. U Manuni chuan a depression neih chung changte min hrilh ve luam a, "I chan ka ngaihtuah hian i tuar nat dan tur hi ka hrethiam ve lutuka, ka ṭawngṭaipui ve reng che ania. Sangpuia chu ka ui ngawt mai, in han inhmeh tehlul nen, midang pawh tawng leh la i khaikhin fo tawh awm si a," a ti sap sap a, mi dang tawng leh tur hian vawikhat mah ngaihtuahna ka la nei ngai lo.

Sangpuia ni lo mipa dang hi ka hmangaih leh thei angem le tiin ka han inzawt a, dam chhunga ka hmangaih ngei ka ring a, chu ngaihtuahna chuan hlauhthawnna min pe a, rilru a na thar leh zual. Amah chauh kha ka hmangaih reng anga, mi dang tumah ka hmangaih theih tawh loh pawh ka hlau a ni.

Veroi naute pahnih, Mercy leh Dawngdawngi school kal an lo haw a, Mercy hian class 12 a zir mek a, Dawngdawngi hian class 11 a zir ve thung. Lehkha an thiam thei khawp a, Mercy phei hi chu pakhatna a ni ziah ṭhin. An lo haw pawh chu inthlakin home work an ti nghal a, an fel unau khawp mai, anni vang hi ania Veroi pawn pasal neih a hreh em em ni, a nau te hian lehkha an zir puitlin theih loh a hlau a, an pa ber pa Sanga hlawh ringawt hi chuan in luah man leh an ei in a daih ṭawk a, Veroi hlawh hi an lehkha zir theih chhan ti ila a sual lo ang.

Pa Sanga lo haw chuan sangha a lo hawn a, kan chhum leh te te hnuah zanriah kan kil ho a, chaw ei a tui loh vangin tam pawh ka ei lo. Ka chaw eikham sitting room-a ka ṭhutlai chuan an titi ho a, Mercy te field trip neih tur thu a ni. "Pawisa nei lo deuha kal chu ka chak lo, miss bulah pawh ka kal lo maithei ka tia, mi dang chuan kal an tum vek," Mercyi'n a tih chuan, "I kal dawn nia, i pai tur chu a awm mai ang, bazar vak a ngai hleinem," tiin ka ṭhiannu chuan a chhang a, "Anih chuan ka in report ve dawn em ni?" a nauin a tih leh chuan in report turin a hrilh leh a.

"Phone thar min leisak bawk sia, pawisa ka hmang hnem bik e," tiin Mercy chu a inthlahrung ve khawp mai. "Kan hnathawhna bill kan lak theih chuan tlem chu ka pai belh thei ang che," pa Sanga'n a tih chuan engzat nge lak tur a neih u Manuni'n a lo zawt a, "Cheng sangriat vel," tiin a pa chuan a chhang a, pa Sanga hian mistiri a zui ve ṭhin a, team angin an thawk a, hna chu an nei ve deuh reng a, a hrisel loh vangin a chawl zing hle thung.

Dar 8 dawnah kan in lamah kan phei a, ka nu leh pa chuan dawhkanah ar an lo puah a, ka nauin thleng a lo sil bawk a, ka awm loh hi chuan a ti ve mai zel a, thil dangah laktlak em em lo mah se, tirh hi a hnial ngai lo a, a fel ve ṭhin khawp mai.

"I ni a lo peng kawi a," ka nuin a tih chuan, "Eng nge a lo tih?" tiin ka zawt vat a, ka rin ang ngeiin min lo rel leh tawh. "Pasal sun ang maiin a awm a, inngaihtuah harh rawh se a tih kha.." a tih laia ka nu aw chu lawm lo awka a ni. "Engtin nge i chhan?" ka tih chuan, "Pasal sun ang ania lawm, chaw pawh a ei thei hleinem ka tia," a ti ve mai a, ka nu hi chuan min hrethiam viau a, ṭum dangah pawh ka ni in min sawisel chang hi chuan min chhan ziah ṭhin a, ka ni nen hian an inngeih meuh lo bawk.

Veroi nen chuan khumah movie kan en dun a, rilru lakpen nan movie en ka ching a, hetiang hian ngaihtuahna kawm lo turin ka inveng ve ṭhin. Veroi chuan hmuhnawm a ti vak lo aniang a phone a en deuh reng a, Zohera nen an inbia a nih ka ring.

"Ka ril a ṭam.." a tih chuan dar 11 a ri ṭep tawh.

"Chaw va bar la..." ka tih mai laiin, "Dawrah kal ang, saw lai dawr kha a la inhawng angem?" a lo ti a, an hawng rei ṭhin tih chu ka hria a; mahse, a tlai mah mah tawh chu a ni.

"Eng nge i lei duh a?"

"Ka hre lo, chips leh cold drinks vel..."

"Duh leh va en chhin ila, an khar tawh maithei a ni," tiin ka tho zui a, ani pawh a rawn tho ve nghal a, kan in piah kawng kawi aṭanga kan va thlek chuan dawr chu a lo la inhawng hlauh. 

Eng eng emaw kamram vel a lei ṭeuh a, kan ei seng pawhin ka ring lo, "Ka lo thawh ve ang," ka tih lah chuan min hnial tlat a, cheng za chu ka pe lui tho a; mahse, chu pawh chu ka inrin loh laiin ka kawrlum ipteah a rawn thun leh a, "Hlawh tam zawk ka nih hi," tiin a nui var var bawk.

Pawisa a pek dawn laichuan kan hnunga naupang lawm sticker ho chu ka lo en kual a, Veroi'n a bag-a pawisa kir a thun leh tur chu ka va hmu hman thuak a, a purse chhungah chuan 500 note hlir hi a awm a, a bag pawh a puar ṭha khawp mai.

"I va hausa ve.." ka va ti zauh.

"Hlawh ka la alawm; ka nei ka tih kha.."

"Anih chuan ice cream saw min lei la.."

"Va la rawh, min lo lak kep la," zangkhai deuh hian a ti a, nui vur vur chungin ka va la a, Veroi chu hetiang hi a ni, a thil phal a, ka tan leh lek phei chuan ui a nei ngai lo.

Ice cream ka thlan laichuan chhuara bottle ho chu a rawn thlek kual a, "Muttui nan in mai mai ila.." a rawn ti ru sar sar.

"Champwine khi maw, a tui ka ti lo.."

"Rice wine khi i duh em?" a kawk vah a, ka la in ngai miah lo a, hetiang grape juice leh zufang tih angreng hi ka ngainat zawng a ni lo a, mi vir lo chi tihtakah cold drinks te hi ka ngaina ve miah lo a, Sangpuia kha chuan a duh viau a, cold drinks a in laiin mazaa emaw, frooty te min leisak mai ṭhin kha ania, ka hrechhuak rauh rauh mai.

"Ka inpui peih che pawh ka ring lo.." a tih leh laimek chuan bottle pakhat chu a thlek vang vang a, "Zawlaidi anih khi..." nui chunga ka tih laiin, "Zawlaidi dang ka in tawh asin, magic tak tak nei ania, khitiang khi chu a ni lo, ka in chu a tui lutuk, helaiah chuan leitur pawh a awm lo ang.." a lo ti luam a, "Grape wine tho maw...?" ka tih chuan a bu nghat nghat.

"Grape tui chi aṭanga siam ania, grape mu nei lo chi, mizoramah chuan a thar awmchhun an nih ka ring,"

"A ruih theih em?" a lam hawi paha ka tih chuan a ner nang a, kei min en loin chhuar lam chu a la en reng bawk.

"Ruih a awl khawp mai, magic a nei tak tak, no khat lek in pawhin kan danglam vek thei.." a ti halh a, "Chutiang te chu dawra zawrh chi pawh anih loh chu.." ka tihsak a.

"Dawrah chuan an zuar lo ang....mi zawng zawngin an lei thei lo ang.." a tih leh chuan ka chhang tawh lem lo, ka ice cream ken lai chu pek pahin ka kalsan a, aman a pek laiin dawr kawtah ka lo va nghak a, zan a rei deuh ta bawk nen kawtthler chu a reh ruih a, boruak a dai nuam viau bawk. Van lamah chuan arsi an de sep sep a, hla deuhah ka arsi pawh a eng ve va va a, Sangpuia khan 'Zinglam arsi' tiin a sawi kher ṭhin a, 'Zan arsi tho alawm,' ka tih pawh khan min hnial tlat ṭhin.

"I la ta na nge..?" tiin a lo chhuak chu ka lo zawt a, lu a thing nar nar a. 

"I in ve peih bawk si lo a..."

"A tui lo em alawm..."

"Nia tiraw, a tui lah a hlauhawm bawk si..."

"I in nual tawh a ni maw, ka rin aiin i hriat hmel tlat," kal paha ka tih chuan, "Ka tem hlek ringawt, sample test-na ang deuh ania, a siamtuten a taste leh taksaa a thawh dante an hre duh ṭhin a, bottle khat pawh a to viau ang," ice cream ei pah chuan a ti melh melh a, grape wine chungchang ka sawi laiin ani chuan thil dang daih a sawiin ka hria.

"Eng maw a hming?" ka hmaa a kal chu a rawn lehhawi vut a, "Zawlaidi maw le; mahse, an zuar chhuak dawn anih chuan hming dang an puttir ang, Zoa nen kan inneih dawnah ka lo hawn anga, ka la tem tir ve ang che.." a nui zui kar kar a, "In inneih har hmel em mai," ka tih chuan a nui ring sauh. Rilru mumal pawh hi a pu lo, a changin inneih a duh a, a zam leh ṭhin bawk si a, amah hian a inhnial ni berin ka hria.

"Mamte..." a rawn ti teh hluai a, dar kan ak chunga ka en laichuan thutak hmel fein min lo melh a, thil sawi hreh nei a ang hle bawk.

"Sangpuia nen khan in mu dun tawh em?" a tih chuan ka hamhaih angreng.

"Teh daih a..?" ka nui hak a, "Ti nge min zawh?" a nuih ve loh vang chuan ka ti leh a.

"Min hrilh la, ka hrilh ve ang che..." a awki chuan ka awm a tinuam lo nghal ringawt mai.

"Thuruk i nei em ni a?" ka ti halh a, street light hnuaiah ding chungin kan inmelh ran bawk.

"Sawi hmasa phawt rawh, anih loh chuan ka sawi ngam lo ang.." a aw chu a zawi viau, a thil sawi dan lah chuan ngaih a ti ṭha lo telh telh a, sawi tura min tih lah chu...

"Eng maw ka sawi ang?" bul fea ka tih chuan, "In mu dun tawh em?" a lo ti leh zat a, thawk ka la deuh hluai.

"Tumah ka hrilh lo ang.." a tih chuan ka nui ta ringawt a, a bulah hian engmah sawi hreh leh zep ka nei ngai lo, chu chu amah pawh hian a chiang hle zawk ang chu.

"La mu dun lo.." a lo thaw huai a, thawveng sawt aichuan lungngai hmel a pu lek lek thung.

"Mu dun ila chu ka hrilh daih tawh ang che.." ka sawi lai mek chuan ngaihtuahnaah thil dang a lo awm a, Sangpuia nen khan fa te lo nei dun hman ta ila tih angreng a ni, thil a danglam phah dawn hlein ka hria.

"Nia, ka hre daih tawh ang.." a lo tih rual chuan, "Nangni, zep miah loin sawi rawh," ka lo ti ve vat a, ka darah min rawn kuahin min kalpui zui a, a ice cream eilai chu ka lo en ran ran.

"Zoa nen chuan kan insum thei alawm, kal thui deuh hlek chang chu a awm a; mahse, inneih hmaa sex hman ka duh loh vangin min nawr lui ngai lo, he lamah hi chuan ka fak ve teh ania," a ti sap sap a, "Tlaiah khan i puh chhiat viau si kha.." ka tih chuan a nui hak hak.

"Tih thinrim hi a nuam alawm; mahse, ani pawn a haw tak tak lo," a ti mai a, "Mamte, mipa hian chapona an ngah ania, a duh em vang chein i ṭawngkam kha a haw phal lo mai mai aniang; mahse, a rilru chu a na ru viau thei, i ti lutuk ange aw..." ka ti vang vang a, ka ngaihdan dik tak pawh a ni. Zohera'n a duh hluah hluah tih hi a hre ve a, Veroi hi an inkara thu neitu zawk ti ila a dik mah ang chu.

"Zoa chu a la virgin a; mahse, kei chu ka chiang lo.." a tih chuan ka bo map mai.

"Ka chiang lo tih chu eng nge a awmzia?" ka lo ti he haw a, min melh eih lo.

"Ka hriatna ka hloh a.." te chu a la titak deuh deuh a, min ti hrilhhai zawk.

"I kawp em ni a?"

"Teuh nang a,"

"Ka chiang lo i tih kha han sawifiah teh,"

"Ka sawi dawn alawm," tiin a ice cream eilai chu kawng thlangah a vawm thla rawk a, ka en reng laichuan ka lam lo hawiin a nui sen sen a, a mitmeng erawh a dik zan lo, thil zep a nei tih a hriat hliah hliah.

"Sawi rawh.." chiang fek fawka ka tih chuan, "Nikhaw hre loin ka awm a, doctor te chuan ka bp a normal lo an tia; mahse, nikhaw hre loa ka awm laikhan min khawih an awmin ka hre tlat a, engmah ka hrechhuak thei tawh bawk si lo a..." a ti zuai raih a, a chhan min zawt ni awm hrimin min en bawk.

"I rui em ni?" ka tih chuan, "Rui lo," rang fahranin a lo ti a, ka hrethiam lo tawp mai.

"I chiang chiah a maw?"

"Chiang lo, ruih chu ka nei lo tih ka chiang; mahse, ka harh hnu khan thil dik lo deuh hi a thlenga hriatna ka nei,"

"An pawngsual chein i hria a maw?" ka tih lah chuan, "Ka ringhlel ringawt," tiin min lo chhang a, thil serious lutuk anih laiin a chiang nial lo angreng si a, ngaihdan ka nei thiam lo takzet.

"I bulah tu nge awm a?" ka tih chuan, "Naupang ho leh zirtirtu ho an nia, hnatlannaah ka pum nawm loh vangin ka mu zal a, chhun ania, ka harh leh chuan damdawiinah ka lo awm tawh, darkar 3 vel chu engmah hre loin ka awm an ti," rilru buai hmel deuh hian a ti a, engtika thleng nge ka zawh chuan kumtir lam daih a nih thu a sawi a, a rei viau tawh lehnghal.

"An hrai rui che em ni ang?" tia ka zawhna chu a rin loh thuin min chhang a, "Thei bawl te kan ei a, naupang ho nen kan eikhawm laih laih a, ka nuamsam lo kha motor-ah ka han mu rih a," a ti leh a, "Khawiah nge in awm," ka tih chuan "Ramah...thing kan phunnaah," ti maiin min chhang a.

"Engtin nge i inrinhlelh dan?" ka tih leh chuan, "Ka lo period thut a; mahse, ṭum dang ang lo takin tlem chauh a awm, ka na ṭhum a, ka period vangah ka ngai deuh a, a reh lehnghal mai bawk si a, chuan a hnu karkhat hnuah ka period leh a," a tih laia a hmelah chuan hlauthawng hmel a hmuh theih a, kei tak pawh chu ka hlauthawng.

"Tinge engmah i sawi loh, doctor te inentir ta che.?." ka ti vin chiam mai.

"Ka inentir nawn leh alawm, engmah ka hre tawh bawk si lo a..." a ti vang vang a, a tih ngaihna pawh ka hre lo.

"Haw phawt ang," tiin ka pawt kal dawr dawr a, in kan thlen hnuah khumah ka ṭhutpui sauh sauh a, "Inngaihtuah chiang rawh, i thil ei leh in te ngaihtuah let la, i thawhpui te emaw, i bula awm reng te an awm em?" tiin ka zawt mawlh mawlh a, a inngaihtuah let ve nasa a, a buai telh telh thung.

"Hmeichhe naupang ho khan min zui chawt a, miss Mathani leh miss Zuali te nen thil kan ei ho a, ngawi rawh...chumi hma chuan hnathawk hmeichhe pakhat hian tui a rawn sem a, miss Zuali nen kan in dun.." ka lo pawt chat a, "Hnathawk chu tunge?" tiin ka zawt a.

"Kan thingphunna bulah khan hnathawk an awm ve a, inhlawh an nia, ram neitute pawh an awm, awm an tam mai.." a ti nuah nuah a.

"Anih leh tu motor-ah nge i mut?" ka tih chuan, "Kan school-in sumo kan hmang a, car lo keng pawh an awm nual a, ka mutna kha chu kan head master te ta ania; mahse, ani chu mipa naupang ho nen mau satin an kal daih a, a chahbi pawh miss Mathani hnen aṭanga ka lak ania.." tiin min chhang a, chutiang anih chuan hnathawk zinga mi emaw a thawhpui mipa tu emaw takin an zui anih ka ring.

"Enteh Mamte, thil thlen hnuah chuan a hma zawng aia be ṭha che emaw, pehhel zel tu che an awm em?" tia ka zawh chuan a inngaihtuah vang vang.

"Staff ho chuan min be ṭha vek ṭhin a, danglam an awm pawh ka hre lo,"

"Anih, tuin nge nikhaw hre loa i awm chu rawn hmu che..?" 

"Mi pakhat, tlangval la upa vak lo, Zohera te rual vel hi a nia, kawngka inhawngin ka lo mu a ti bawk a, min rawn en chian khan ka dik lo tih a hria a, midang a ko nghal niin a sawi a.." a tih chuan, "Tunge chupa chu a hming i hria em, a hnuah i hmu zui leh em?" ka lo ti sawk sawk a.

"Lawma tiin an ko, a hming pum pawh ka hre lo, ka hmu zui leh tawh lo bawk a," a tih chuan ngaihtuahna a buai map. Veroi hi khawih a ni tak tak anih chuan a hmu hmasa bertu chu rinhlelawm ber a ni. A hrechiang lo lutuk leh damdawiin an thlen hnua a harh chauh chuan ngaihruat thiam a ti har a, a sawifiah thiam lo bawk nen ka tan pawh rin dan neih a har khawp mai.

"Midang tumah i hrilh lo em ni?"

"Miss Mathani bulah ka sawi a, 'Chutiang thlenna hman a awm lo ang, i kal hnu lawkah tlangval khan min lo au a, kan lo chho ve nghal alawm,' a tia, mi dang bulah chuan ka sawi ngam lo, sex i hman tawh chuan a danglamna i hriat ka rin vang ania ka zawh che..." a ti zuai raih a, hriat lah chu ka nei mang bawk si lo.

"Pawngsual ka nih i ring em?" a tih chuan ka en tlawk tlawk, a men puai puai a, a rilru a na tih ka hria. A kut chu vawn sakin ka hmer vang vang a, "Lungngai suh," tih bak chu sawi tur ka hre lo.

"Zoa nen kan la ti dun miah lo a, ka hrilh ngam bawk si lo, tunah inneih a duh tawh a, ka virgin lo anih chuan a hre nghal dawn asin..." a ṭap titih der mai.

"Zoa chu kan hrilh dawn nia, chutiang zawngin ngaihtuah mah ta che, a hmangaih zia che i hriat ve reng kha, ani pawn a hrethiam lutuk ang.."

"A hrethiam dawn teuh lo, a thikthu a chhe lutuk, min ringhlel nghal ang.." chu chu ka rindan ve tho a ni, tunlai chu Zohera hi a thikthu a chhe khawp mai, inneih chungchang an sawi hnu phei hi chuan an inhau zinga, a hrethiam maiin ka ring lo..

"A hrethiam lo anih pawhin hrilh tho chu a ṭha, i hrilh miah loha i virgin lo tih a hria anih chuan hei aihian i chan a chhe zawk thei a, a lo hrethiam duh lo anih leh..." tiin ka ngawi zui a, hrethiam tura beisei phawt a ngai, a bak tih theih a awm chuang lo a ni.

"Inneih chu ka duh ve reng asin, mawhphurhna ka ngah lutuka, chhawktu te hi ka thlahlel ve ngawih ngawih. Mahse, Zoa hi ka hlau bawk si a, hetiang vang hian min ṭhen ta se ka intihlum duh hial ang," a sawi lai chuan a darah ka lo ben sak zawt.

"Thiam lohna i nei lo tih hria la, hetiang vanga a ṭhen che anih phei chuan a thiam lo hle zawk ang, engkim hrilh la, aman thutlukna chu a siam mai dawn alawm," ka ti a, a la hreh ngang mai, a rilru buai ṭhin dan tur zia chu aw. Zohera lah chuan nei duh lo leh ngaihzawng atan bak duh lo angin a ngai a, pakhat lahin chhuanlam a siam zel a, mahni inthiamnana a puh let dan lah kha, sawipui mai chi em mawni dawn le?

Kan mut hnuah pawh chhuanlam siam dan tur hrang hrang a ngaihtuah kual a, "Hmeichhia kan inang vek lo a, thi a chhuak vek ngai lo ti ila a awih i ring em?" tih te min zawt leh ṭhin a, keichuan hrilh tlang mai sela a ṭhain ka hria. Kan kawppuite hnena zep ngai kan neih hi ṭha ka ti ve lo a, mi dangin min hrethiam lo anih pawhin min hmangaihtu chuan min hrethiam ang tih hi ka ngaihdan a ni.

A hrilh ta lo aniang ni thum a liam hnuah pawh engmah chanchin a rawn sawi lo a, kei dawrah ka kal a, Veroi chu pawn chhuak loin inah a tawm chawt a, Zohera lah basketball tournament a awm dawn vangin a practice nitin a, an inbe ṭha leh tawh tih zawng chu ka hriat chhun a ni.

Zirtawp tlaia Veroi lo kal chuan bazar puiah min lo sawm a, ka niin ban hma min phalsak loh avangin rei deuh min nghak a, kan ban chuan dar 5 a pel tawh. Mc-ah kan han kal dun a, Mercy tan luggage a leisak a, Zohera tan a bike-a vuah tur keychain te pawh a lei a, kan pahnih tan bracelet inang 'soulmate' tih inziahna hi a lei bawk a, keiin ice cream ka lei ve bawk.

"I bula awm hi a nuam ber mai, ka zâng huai te hian ka hre ṭhin, thil ka hrilh vek tawh bawk che a, ka nuam veng veng tawh," ice cream ei pah chuan a ti siam siam a, vawiin chu a nui duh khawp mai. Kal kual pahin secondhand te ka thing a, "Chaw ka lo ei anga; mahse, ka riak lo ang," a tih vangin ka pa ka va hrilh a, chaw phei chu a lo chhum hmin diam tawh.

"Zoa chu a mood a ṭha leh tawh maw..?" taxi aṭanga kan chhuk hnuah ka zawt a, "Ṭha e, chawlhniah an inah chaw ka ei dawn a, inneih chungchang pawh kan sawi ka ring, a nuin min lo sawm a," a ti a, a rilru a siam fel a nih hmel khawp mai.

"Engtin nge ni ta?" tia ka zawh chuan, "I hriat kha," a ti mai a, "I hrilh dawn em ni?" tiin ka zawt leh.

"Aih, sawi chiang thei ila chuan ka hrilh vek ang; mahse, engmah ka sawichiang thei lo a, thil thlen dan tak tak pawh ka hre lo, min ringhlel anih leh doctor rawn sela, doctor ten thil ni thei anih thu an lo hrilh mai dawn alawm," a ti a, a sawi lai chuan zam leh hlauthawng hmel a pu lo, a thutluknaah a chiang hlein ka hria.

"Anih chuan a ṭha alawm," ka ti ve mai a, dawr zawn kan thlen chuan thil lei a rawt leh a, kan inzui lut leh rih a; mahse, chocolate chiah a lei. Chocolate chu chi hrang hrang a la a, "I va duhthawh ve," ka tih chuan nui chungin, "Thil thlum ei hian rilru a hlim ve deuh alawm," tiin min chhang a, ngaihtuahna a tibuai leh nak ṭhin.

In kan thlen hnuah Zohera chu a bia a, "Jenusi te inah chaw ka ei a, min lo hruai rawh aw, luggage te ka lei a, scooty emaw car i lo keng mai dawn nia," a ti a, Zoa chuan engtin nge a lo chhan ni, "Kan la eikhawm dawn nia, tum loh deuhin ka ei thut alawm," a ti leh a, a inbiak zawha ka zawh chuan, "Min thlim a tia, chaw eikhawm a chak aniang, kar leh hian an inkhel dawn a, kan en ve dawn nia," a ti zung zung a, hnathawh chauh deuh hi chuan zanlam chhuah hi ka peih ṭhin lo a, a hun a lo thlen phawt loh chuan engmah ka sawi lawk duh lo, ka peih leh ka va en pui ve ang ka ti rilru chauh a ni.

Chaw eikham veleh ka nu nen ar kan puah dun a, Veroi pawh Zohera nghakin a la ṭhu ve reng a, ka pa'n youtube-ah special report a ngaithla a, a ngaihnawm deuh aniang ṭawng loin kan ngaithla ṭhap hlawm. Mipa pakhat inawkhlum a awm a, an han chhuichianna chuan a nupui bialpain a lo rek hlum a, a nupui nen inthurualin inawkhlum ang takin an lo lantir a ni awm e. An chhuichhuah dan report chu a ni a, police ṭhenkhat an kawm bawk a, tunlai chu case lar deuh deuh a tam khawp mai.

"Mr.Know-a bawkin a chhuichhuak leh tawh, hepa hi police ho hian hna nghet pe tawp rawh se," Bawiha'n a tih chuan, "Engtin nge a hriat chhuah dan tak kha?" tiin ka nuin ka lo zawt a.

"A nupui perfume rim leh a pasal ṭhianpa rim kha a in ang a, mr.Know-a khian a ringhlel alawm, a rim hriatna ṭhatzia chu e, ani awm lo se an dawp chhuak miah lo ang," Bawiha chuan a lo ti zat zat a, hman deuh pawh khan he Mr.Know-a ti maia an sawi hian tleirawl pakhat thih dan a chhui chhuak a, chuta ṭang chuan police ho hian an thawhpui chawt a, tuman a hmel an hre lo, a inthup tlat a, a lar phah em em thung.

Dar 8 dawnah Zohera chu a lo thleng a, a inkhel zo a lo tlang niawm tak a ni, "Arsa in lei ve duh em?" ka nuin a lo ti a, Zohera chuan kg 3 lai a leisak a, ka nu chuan a thlate a belh a, "Chaw lo la ei dun rawh u," a ti zui bawk a. Rei pawh an awm lo, an haw hnu chuan kei pawh ka inbual a, ka chauh deuh avangin ka mu nghal bawk.

Chawlhnia Veroi nen kan inbiak chuan inneih an tum thu leh kar thar lamah Zohera ten palai an tirh tur thu a rawn sawi a, "Christmas hmaa tih in tum a ni maw?" ka tih chuan, "Aw, Zoa hi a hmanhmawh lutuk, Sangpuia boral thut vang kha aniang, a sun ve lutuk a," a rawn ti a, kan inbiak zawh hnu chuan lung a leng vawng vawng mai. 

Tlai eirawngbawl ka zawh hnuah ka insiam sawk sawk a, taxi lain Sangpuia thlan lam ka pan a, ka va thlen chuan dar 4 vel a ni. A thlana pangpar ro tawh te chu ka thian fai a,  "Kan ṭhiante an innei dawn asin, awm ve la chuan an kiangah kan ding dun awm si a tiraw, awm ve la chuan ka mal bik lo anga, anni pawh an hlim zual ngei ang," tiin a hming intar chu enin ka be mawlh mawlh a, ka va inbunruak ve a ni ber ang chu.

Ka haw lamah u Manuni'n min lo call a, a thil min rawn zawh chu a mak angreng, "I ṭhiannu hian ruih a nei ṭhin tlatin ka hria, i hriatpui mial em?" a rawn ti a, eng tizia nge mawni!?

A rinhlelh chhan ka zawh chuan, "Tunlai chu a awmdan hi a mak riau a, chhunah hian 'Office dawr ka ngai,' tiin a chhuak leh ṭhin bawk a, niminah a purse ka check sak a, pawisa a ak ṭeuh mai a, thil ṭha lo a ti tlatin ka hria.." a ti a, amah zawt chiang mai tura ka tih chuan, "Ngawi rawh, ka la enthla phawt dawn," tiin min lo chhang a, rilru a tibuai ve nak mai.

"A hlawh a tam lo tih i hriat kha, hmanni lawkah sofa thar a rawn lei a, a nau phone thar a leisak bawk a, Mercy field trip kalna tur a neih thu a sawi bawk kha, eng eng emaw leinan hian pawisa a nei riau zel a, a dik thei lo..." tih angreng a rawn sawi laichuan Veroi purse-a pawisa kha ka mitthlaah a rawn lang a, ka rinhlelh phal loh vang nge ni, a inkhawl ve te pawh aniang ka ti rilru a, thil engkim min hrilh a, eng emaw ti sela chu min hrilh leh mai ka ring a ni.

 

In ka thlen hnuah Veroi chu message ka va thawn a, a rawn chhang har khawp mai. "Naktuk tlaiah chaw eikhawm ila," tih ka va thawn chu zan dar 9 velah a lo chhang a, in a thleng chiah a nih hmel.

"Inneih thil hi sawifel phawt ila, a lawmna a ni pah mai alawm," tih hi a lo thawn a, ka va call chuan a busy a, min lo call let ve mai ka rin laiin a lo call mang si lo a, kan inbe ta rih lo.

Thawhṭanniah dawra ka awm laiin a lo call a, "Naktuk zanah palai an lo kal dawn," a rawn ti a, lo riah phei a tum bawk. Kan inbiak zawh hnu lawkah Zohera'n a lo call ve leh a, "Ka pain in ṭhiannu lusun laia inneih lo rel chu a tia, ka lo ngaihtuah chhuak miah lo a," a rawn ti bul bul a, "Khai a, chutiang lam lungkham suh u, ka phurpui lutuk che u alawm, in inzui rei ve tawh bawk a, inneih thuai a ṭha, kei chu min vengthawng reng reng suh u," ka ti ve luam a, han sawi zui vak tur pawh a hre lo. "I fel ṭhin e.." tiin phone a dah zui mai a, Zohera mizia hi chu hrechiang lo tan chuan nelawm han tih tur hi a ni ngai lo, tette aṭanga inkawm kan nih vang hian ka hrechiang em a, kan lakah a sual ngai lo a, mi ṭhenkhat hi chuan sual an ti fo mai. An inkhelhnaah pawh a thinchhiat lutuk vangin an buai fo a, hrem pawh a tawk zing. Hetiang mizia a nei chung hian Veroi lakah erawh a nem leh em em lawi a, mipa dang nena insual an tum ut ut chang pawhin Veroi a va inrawlh tawh chuan a zia a dang hlawk zel a, inkawp tur hliah hliah an niin ka hria.

A tuk zanah palai chu an kal a, december ni 18 a innei turin thu an titlu a, hemi ni hi Sangpuia nena kan anniversary a ni nghe nghe. Veroi a lo riak phei a, a mizia chu ka chik viau naa engmah danglamna a neih awm pawh ka hre lo. "Inneih senso lamah buaina a awm em?" tia ka zawh chuan, "Awm lo e, hetiang ni atan leh damloh thil vel a awm thut takah tiin pawisa ka khawl ve a," tiin min chhang a, ka beisei anga min chhan vang aniang rilru pawh a nuam ve huai a, u Manuni thil sawi erawh ka hrilh duh lem lo, chhungkuaa an sawifel turah ka ngai.

Zohera'n an in lama chaw eikhawm a rawt vangin zirtawpni chuan ban hma ka dil a, dawr aṭanga ka chhuah chuan dar 4 a ri tawh. Veroi ka call a, "Lo va tlang rawh, ka la buai deuh hlek a, ka lo tlai deuh hret ang," a tih vangin ka kalsan a, Zohera te in ka thlen chuan ka nu leh pa an lo awm a, rei vak loah Zohera pawh gym aṭangin a rawn haw a. A inbual sawk sawk a, Veroi hruai turin a chhuak lehnghal a, keiin a nu eirawngbawl ka lo pui thung.

Zohera nu chuan Veroi fel an tih thu leh chhungkaw chawmtu a nih vanga an lainat thute a sawi siam siam a, "An inneih hunah chuan sumdawnna lam ngaihtuahsak ka duh a, a hna hi hlawh a tam si lo a, chhungkua kan tlem bawk nen awm ho vek ila kan duh bawk a, kan in hnuai khu dawrah chuan a remchang viau ang, englam nge a zawrh duh chu aman thlang mai sela.." ti sap sap a, ka ṭhianni chu a vannei dawn khawp mai.

Zohera hi a nu leh pa nen chauha cheng an ni a, a nu hi sawrkar officer a ni a, a pa lah contractor, thlahtu te aṭanga mi awmthei an ni a, ka fakna ber erawh tute tan pawha an ṭha em em ṭhin hi a ni. An ina kan len luh changte hian mi an lo be thuai thuai a, ei leh in turte an lo siam zung zung zel a, biak an nuamin an ṭawngkam a mawi bawk si a, an in hi kan chaw eikhawmna ber a ni bawk.

Ka ṭhiante pahnih chu an rei khawp mai, dar 6 pelhah pawh an la rawn thleng lo. Zohera nuin a va call lah chuan a chhang thei lo a, keiin Veroi ka call ve bawk a, a tumah mahin min chhang thei lo. Dar 7 rik dawn ṭepa Veroi'n a rawn call chuan, "Kan lo phei," tih zawng a rawn sawi a, ka ṭawng ve hmain phone a dah daih.

An lo thleng te chu an han ṭawng mawh dun khawp a, biak pawh an nuam lo. Veroi ka zawh chuan, "Ka u nen kan inhau a, Zoa'n a lo chhang ve alawm maw le," a ti a, puitling an awm ve avangin kan sawi thui lo. Mahse, chaw eikham hnu chuan an pahnihin ka zawt a, u Manuni chuan a lo dawp niawm tak a ni.

"I inzuar em min ti ringawt a, ka thinrimzia chu a, ka thawhrimzia leh chhungkaw tana ka ṭanzia a hre ve vek a, engti hmuhin nge maw min hmuh ni," a ti hlak hlak a, Zohera ngawi reng chu, "Tinge i inrawlh ve duh a?" ka ti tawl a, a lo nui suk ringawt.

"Ka u khan min puh chhe em alawm, Zoa'n 'Hrechiang loin an inpuh ngawt ngai lo' a lo ti kha a haw lutuk a, kal chhuah te kha a phal lo a, 'Va awm nghal ang che, lo haw duh tawh suh,' te min ti a, haw lo ila a thinrim leh hle awm si a," a ti hlak hlak a. "In innei lo ang a tih bawk kha," Zohera'n a lo ti ve zauh.

"Ka awm nghal tak tak dawn em mawni," nui chunga Veroi'n a tih chuan, "A pawi hleinem, ka khum a zau sa alawm," pakhat chuan a lo ti sam et a, an pahnih chuan inenin an nui an nui a, an ngai zam thiam khawp alawm tiin ka sawi zui duh lem lo.

Coffee in pahin in chung zawlah kan han ṭhu chho a, ṭawng loh karin an lo infawp leh hman ṭhin a, ngeiawm chhuaha ka va thlek lah chuan min an runluih a, khak pawh ka khak buai peih lo. Zohera nuin min rawn koh veleh ka chhuk san a, thei ka zuk ei ṭeuh a, chumi hnuah cake min eitir leh bawk nen ka puar khawp mai.

Ka ṭhiante an lo chhuk chuan dar 9 a ri dawn tawh, haw mai ka rawt a, zanin chu min runluih nuam an ti laklawh a, an han in ui der leh rih. "Veroi a awm nghal dawn sia, a thuam chhawmah ṭang la awm ve nghal mai rawh," Zoa'n a han tih te chuan a nu nuih a za khawp a, "Intikhawngaihthlak em mai, Jenusi hi ka duat ania, khawhar deuh ten in lo siam ange, duat viau rawh aw.." tiin ka thlavang a lo hauh der ve a, kan haw tur pawh kawt zawl thlengin min lo thlah nghe nghe.

Veroi te in a hnaih zawk vangin kan thlah hmasaa, kan va luhpui laichuan u Manuni chu a wheelchair-ah a lo ṭhu tum luau a, biak pawh an inbe lo. Rei awm loin kan chhuak lehnghal a, Veroi'n kawt zawl thlengin min lo thlah ve leh bawk a, "Muttui aw Mamte.." a rawn tih chuan Zoa'n a lo ei lo khawp mai. "Mamte Mamte hi in inti a, kei ve..Zoherlian in tia.." a lo ti bui bui a, "Zote tih i duh loh kha," a bialnuin a lo tih chuan, "Duh lo e, inmelh tawh suh u, a tawk," a ti bul hmuk a, a fiamthu ve nain a hmel hi chu thinrim tak tak a ang ṭhin. Ka ṭhiannu chu ban ka vai leh zauh hnuah kan inmangṭha a, Zoa chu enin ka nui ka nui mai. 

"Engati nge min nuih?" a rawn tih chuan, "In hlim lai hmuh hi a nuam em a?" ka ti mai a, ka lam a rawn hawi chuan a nui ve eih lo.

"I hlim lo hmel min hmuh lo la kan hlim a ni mai," a ti reuh a, a la tum bur reng.

In kan thlen chuan ka nuin thingpui a lo thlitsak nghal a, a hang tlawnga a pek vang chuan a in phai mawh khawp mai. Ka pa hoin Bawiha nen tv-ah inkhel an en a, ka pa'n ciragette a lo dil chuan ah lai a lo nei lo. "Ka va lei lawk ange," tih leh thawh a rual a, "Bawiha kha tir mai rawh," ka ti ve nain, "Ka kal mai ang," a tia, Bawiha lo tho uk tawh pawh a mu ṭha leh a.

Zohera lo let leh chuan eitur a rawn lei ṭeuh mai. Inkhel en pah chuan kan eiho a, kan entui laklawh a, ani pawh a ṭhu ta reng a, inkhel an zawh hnuah pawh ka nuin chemte a tah tir a, a tat thiam lo lutuk a, a tat te zo vek dawnin ka hria. Ka hmun phiat tur chu, "Ka phone a riin ka hria, lo phawrh lawk teh," a rawn ti a, "Veroi bak a ni lo ang," tih pah chuan a jacket ipte ami chu ka phawrhsak a, number hlang tawp a ni.

"Number hlang anih hi?"

"Lo chhang lawk," tih pahin kut a sil sawk sawk a, ka han chang chu..."Zoa.." patling aw hian a rawn ti a, Veroi pa niin ka hria.

"Keimah Jenusi zawk..." ka tih laiin, "Mambawihi a awm tawh lo," a rawn ti ta mai a, ka bo map.

"Khawiah nge a awm a?" zawitea ka tih chuan, "Sawtah, hotel-ah a thi an ti, a phone aṭangin min rawn call-a hei...a mu tawh emaw kan ti a...ah..a chhuah lai pawh ka hre lo..a room-ah a lo awm lo a.." a rawn ti bah nawk nawk a, a ṭah aw ṭuau bawk. 

Ka hmaa Zoherliana ding chu ka en mawl tawp a, phone ka pe chu a rawn ban rang khawp mai. Kei chu ka â deuh riaiin ka hria, awih ngaihna pawh ka hre lo, engtin nge a nih theih ang, kan thlahna pawh a la rei lo a,  nichin mai khan mu turin kan inmangṭha anih kha.

"Hello...keimah.." Zohera phone hmang lai chu ka en reng a, thawk lehkhatah a che vut, a chemte ken laichu dawhkanah a theh thla rawk a, a tlan chhuak zui a, "Zoher..lo ding teh," tiin ka um ve nghal bawk.

End of chapter - 3