WHY DID YOU GO? (CH - 4) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 4

"Meilum i ai duh em, an lo thlen hmain lo inti lum ve lawk la," Azoi'n a rawn ti a, zing ni chhuak tur lam thlir chuan ka la ding reng. Dar engzat nge ka zawh chuan a sana a bih zauh a, "Call girl an tih kha i hre ve em?" ka ti khawl a, "A ni lo ang, an rin thu mai mai anih kha," a ti a, keipawn ka ring lo, ka pa'n call girl a awmpui ang maw, khawvela thil awihawm loh ber a ni.

"I khur nasa lutuk, vawt i ti anih kha.." a tih laimek chuan min au ri ka hria a, pa Tluanga nupui nu Atei a ni. "Darkar khat hnu velah an lo thleng ang, in chhungah lo va awm rawh u," a rawn ti a, mi ṭhenkhat lo chhuakin an motor leh bike te an ti nung a, "Khaw pawnah an lo va hmuak dawn a, nang chu kal ve duh lo mai rawh aw," nu Atei bawk chuan a ti leh a. Kan awmna kawngpuiah chuan chhum a zing chuk a, motor tlan liam turte chu ka thlir vang vang a, rilru a fim lo takzet.

"Engati nge hetah hian kan awm a?" tia Azoi ka zawh chuan, "Kan chenna aṭangin thlanmual a hla lutuka, khuaa invui hi a ṭha zawk an ti anih kha, a school naupang te pawh an rawn tel ve ang," ti maiin min chhang a, mi an tam tehlul nen ka tan chuan  hmelhriat an tlem khawp mai. Ka thaw a ipik em em a, mi dang kianga awm chu nuam ka ti lo hle bawk. An rinhlelhna te, an ngaihṭhat lohna te chuan awm nuamin min awmtir thei lo. Zawhna an inzawt a, an rinthuin chhanna an siam a, tuarpuitu emaw, lainattu hmel ka hmu lo a ni.

"I nite chu i be ta em?" Azoi'n a tih chuan, "Ruang an lo zui ve ang," ka ti zawi ṭiak a, in chhung lam ka va hawi chuan in khatin mi an awm a, ṭap thawm erawh hriat tur a awm lo, a hrilhhaithlak takzet.

"Veranda-ah tal sawn va awm ang, din pawh i din ṭhat theih loh kha," tih pahin Azoi chuan min kuah phei a, kan ṭhutfel hnu lawkah nu Ṭhatei a lo chhuak a, "Mina, i nu Nguri bulah va awm daih ta che, ani pawh saw a ṭap reng mai, in nufain va inhnem dun rawh u," a rawn ti zung zung a. In chhung lam ka va thlek chuan nu Nguri chu pu Muana bulah bang nghengin a lo ṭhu a, pa Dinpuia nupui nu Mangaihi'n a lo be mawlh mawlh bawk a, a ṭap nasa aniang a mit a bui luk mai.

"Mi an tam em mai," ka tih chuan min hrethiam aniang engmah sawi tawh loin min luhsan a, rei lo teah lo chhuak lehin bawnghnute lum vat vat hi min rawn pe a, ka lo lak laite chuan ka kut a khur dar dar a,  Azoi'n min lo pui rang hle bawk.

"Tu tih nge ni ang le?" nu Ṭhatei kalsawn hnu chuan ka ti leh ngawt a, "Police-in an chhui chhuak vat mai ang," tih chhanna chuan min hnem hlawl lo.

"Hmeichhia kha tunge ni ang?"

"Engati nge ka pa nen an thih dun le?"

"Hotel-ah chuan eng nge an tih dun ang," zawhna ka zawt nghal mawlh mawlh. 

"A...nula kha maw, i pa thawhpui an tia," a rawn tih chuan phawk fein ka melh a, "Hetah hian maw, khuaah hian an thawk dun a maw?" ka ti nghal hlut a, a lo bu zauh.

"Nichin deuh khan an sawi ka hria, miss Veronicai a nia, a rawn thawhna pawh a la rei lutuk lo, pi Mathani sawidan chuan nula fel deuh a tia, 'An inngaizawng lo ang, chutianga ngaih theih turin an awm ngai lo,' a ti bawk a," tiin min hrilhfiah a.

"Mi dangin an hre ve em?" ka tih chuan, "Aw, an awmkhawmnaah sawn an sawi alawm, i nu Nguri pawh a awm, a rinhlelhna a nep phah deuh ang chu, ani pawh sawn a tuar lutuka, a khawngaihthlak ania," a ti leh luam a, in chhung lam chu ka va melh leh vang vang.

Rei vak loah ni a rawn lang a, chhum zing nasa lutuk pawh a zia tawh. Zingkar boruak chu a ngui ruai a, khaw ram ang maiin in te chu a inkhar ṭhuap hlawm a, engkim chuan lung a ti zingin thaw a pik mup reng. Sana chu ka bih leh ṭhin a, ka nghahhlelhna leh huphurhna chu a inzat thialin ka ring.

"Engati nge ka ṭah theih miah loh le?" zawi tea ka tih chuan, "I chiai rih em anih kha, a lo thlen hunah duhtawkin i la ṭah dawn nia," a ti mai a, ka chiai em pawh ka hre lo, engkim hi mumang ang vek a ni zawkin ka hria, awih a har ka ti.

Luite tui, thlamuang taka a kawnga luang ṭhin, thawk lehkhatah tuilianin a kuang a nawr chhiat ang mai ka ni. Hmabak thil te chu ka dawn thui ngam lo, ka mal tlat tih ka inhria, tu emaw lo kal sela 'I mumang mai mai a nih hi,' tiin min rawn hrilh sela ka ti a ni. 

School naupang an lo thleng a, pawn dum an rawn sin ṭhap hlawm a, an zirtirtuten kawnga an intlartir laichu ka thlir ve reng a,  ngaihtuahna a mang telh telh. Ka pa chu a lo haw mek a, rei loteah a lo thleng tawh ang, mite chuan engtin pawh sawi mahsela ka pa chu khawvela pa ṭha ber a ni. Mite rilrua zawhna ang kha chu ka inzawt ve tur a ni lo tiin ka inhrilh ru mawlh mawlh a, harsa ka van ti tehlul em. A chhan hriat ka duh, engvang nge tihte, tu tih nge tihte, ka pa dikzia lan theihna tur awm sela, mite zawhna te hi chhang thei ila, chutiang anih chuan ka rilru pawh a nuam deuh ngei ang.

Ka phone rawn ri chu ka bih vat a, ka ni call a ni, ka lak rual chuan khua an rawn luh tawh thu a rawn sawi a, chutih laiin in chhunga awm te pawh an lo chhuak sap sap a. Kawta kan dinkhawm laichuan nu Nguri chu an hnem laih laih a, ani chu a la ṭap hlawp hlawp reng. Azoi ban vuan chuan ka ding reng a, a khat tawkin ka chhungte chu ka va thlek leh ṭhin bawk. 

Chutia kawtkaia kan din laichuan motor horn a rawn ri a, kan piah kawi a motor rawn inzui duah duah chu ka va hmu nghal bawk a. Kan bul an lo thlen chuan chet ngaihna ka hre ta lo, ambulance lampana nu Nguri tlan phei chu pu Muana leh nu Ṭhatei'n an um zui a, school naupang hmeichhe ho chu an ṭap tliar tliar bawk. Kei chu pa thaw a hah up up a, thawk harsa khawpin ka lungphu chu a rawn muang a, ṭap tur pawhin tha ka nei lo, luhaiin ka tlu lo chauh mai.

Tu emaw hian ka darah a rawn vuan a, a hmel ka en chuan ni Rampari a ni. "Bawihi," tih leh min kuah a rual a, keipawh chuan ka lo pawm bet thlawp a, a awmah beiin thawk ka la vang vang a, zawite tak takin ka ṭap. "Ka van lainat tak che em aw, i pa tel loin engtin nge i awm ang, i vanduai lutuk hi a van pawi vawng vawng tak em,"a ti tlawk tlawk a, chutih laichuan ka pa ruang chu an lo zawn chhuak mek tawh.

"Lungngai miah suh aw, Pathian a awm alawm, i mal dawn reng reng lo ania," tih thu chuan min hnem rih mawlh lo.

In chhung lam kan pan laichuan ruang zawn luttute lo chhuak tur nen kan intawk a, Lawma ka hmu hlawl mai. Min en vang vang a, inbiakna hun erawh a awm lo, ka ni nen chuan kan kalpel a, ka pa ruang khuma an zalh chu ṭhutchilhin ka va kuah thlawp a, ring takin ka au a, ka ko mawlh mawlh. Mahse....ani chu a lo haw tak tak lo, a lo haw  leh tawh dawn lo, min kalsan hlen a, kumkhua atan a kal tawh a ni.

Mu leh mal ka nei meuh lo, a chang chuan hun chu a ding emaw tih turin engkim chu a chawl a, a changin min kalsan dawr dawr a, ka harh leh hlawl ṭhin bawk. Ka pa ruang chu mittui leh zawhna tam tak nen kan thlah liam a, a liamfel rualin zawhna a tam ting mai, chhan dan tur reng ka hre lo, mi rin thute chu awih duh lo mahila eng nge rina awih tur ka hre bik lo, ka rilru tina zualtu ber erawh ka hmu leh tawh ngai lo tur hi a ni. 

Engtiang mi pawh lo ni sela, eng thil pawh tiin pa ṭha ber pawh ni lo mahsela, ka pa kha ka tan a awm reng ṭhin. Khawvela ka neih chhun ka pa, ka tan chauha pa a ni, ka thlamuanna, ka himna leh ka hlimna, ka engkim takmeuh a ni, ka nuna thil hlu ber ka chan a, chu aia na thei tur dang a awm lo.

Ka nite nupa chu khuaah nu Ṭhatei te inah an innghat a, keipawh farm lamah haw loin an kiangah ka la awm ve rih a, pu Muanate chhung erawh nu Nguri leh pa Dinpuia tel loin an haw phei tawh a, zan an va riak a, chaw erawh an ei lem lo a, naupang an awm bawk nen kan deldul deuh a, inleng kan la neih chhung chu khuaa awm turin min ti bawk. 

Ka ni chuan min lainat ngang aniang an bula awm turin min sawm a, a pasal pa Liana pawhin min sawm ngawrh viau mai. Mahse, ka nu Nguri'n a lo hnial tlat a, "Ani chu ka fanu a ni tawh alawm, a pa awm tawh lo mah se, ka fanu a la ni tho a, engkim ka ngaihtuahsak ang," a ti charh charh a, pa Dinpuia pawn a lo remti bik lo, "Kan chhungkaw fanu a nia, a pi leh pute pawhin an remti lo ang, nuam a tih tak loh leh a rawn kal anga, a peih chen chen chu kan hnenah awm rih rawh se," a lo ti ve luam a, ni Rampari lawm hmel chu ka hrethiam khawp mai.

Ka nite hi chhungkaw khawsak nuam an ni hran lo a, an pa hi sipai pension niin fa 5 an nei a, an fate hi an buaithlak angreng a, in dang tawh kir leh te an awm bawk avangin an chhangchhe angreng a, han fin ve ringawt chi an niin ka hre lo. Ka ni mizia ka hre chiang a, a chang hian han fel hluak ṭhin mahsela, a tuk fuh loh ṭumah erawh a tawrhhlelhawm ṭhin khawp a, ka pa angin a rilru a tluang ve lo bawk. Ka pa nen pawh khan an inmil hleithei lo a, eng emaw chen chu inbe mang loin an lo awm tawh zawk a, kei nen phei hi chuan kan inbiak lohna a rei viau tawh. Mahse, tun ang huna min ngaihven tura a lo kal hi ka lawm a, a duh tak tak em hre lo mahila a bula awm tura min sawm pawh hi ka lawm tawk em em a ni.

Rei pawh awm loin ka nite nupa chuan min hawsan leh ta thuai a, an haw ni tlaia chuan police niawm tak pathum hi an lo kal a, chung mite chu ruang lo thlen zan pawh khan ka hmu tawh a, ka chhungte chuan an lo hre viau tawh. "A fanu hi biak kan duh a," tiin pakhat chuan min rawn en a, pahnih chu kum 40 bawr vel an ni a, police form an ha lem lo, a sang ber erawh chuan a hmai a tuam bakah cap a khum a, "Thil tlem kan zawt ang che," a tih laia a aw aṭang chuan a la upa lo ang tih a rin theih.

Nu Ṭhatei te in chung pindanah kan inzui chho a, pa pahnihte chuan zawhna min zawt mawlh mawlh mai. 'I pa khan tun hnaiah inhauhpui emaw, inhnialpui a nei em? Phone a hmang zing em? In a chhuahsan zing em? Rilru hahna a neiin i hria em? A nupui chhungte nena an boruak eng nge?' tih angreng te a ni hlawm.

An zawhna apiang chu ṭha deuhin ka chhang a, engmah rinhlelh tur a awm lo, ka pa khan tumah inhauhpui a neih ka hre lo a, kan chhungte pawh hi a lakah kha chuan an ṭha em em vekin ka hria a, amah pawn nuam a ti a, a hlim hle bawkin ka hria. Khuaah hian a kal zing a, hna kal tur leh mamawh lam tein a kal tlangpui a, khaw dangah erawh a zin meuh lo, tun ṭum pawh school thila office dawr a ngaih vanga kal a ni nghe nghe.

Zawhna kan inchhan mawlh mawlh laichuan an zinga pakhat chu ka hnung lamah a ding a, engmah a sawi ve lo. Hnung lama a awm tlat avang chuan ka va lehhawi leh ṭhin a, ngaihṭha lo deuhin ka va melh bawk. Ka va en leh laichuan lighter a talh ri chhek chhek a, a hmai a tuam vang nge ni mi rap deuh tlat a, kan boruak tawn vang te pawh a ni maithei.

"Tinge a hmai a tuam tlat a?" tia ka hmaa ṭhu ka zawh chuan, "A hmelchhe lutuk aniang, police puitu a nih ve mai mai saw.." ti maiin min chhang a, ka en leh pawh chuan chupa chuan min en lem lo a, kan thil sawi chu ngaithla ang pawhin a lang lo.

"I nuhrawn nen hian tun hmain buaina an lo nei tawh em?" pakhatin a tih leh chuan lu ka thing vat a, vawikhatmah an inhauh awm ka la hre lo a ni.

"Anih leh, i pa hian ngaihzawng a neih i ring em, a bula nula ruang a awm vang khan zawhna awm thei tak a nia?" pakhat zawk chuan a lo ti leh a, chu chu kei pawhin mak ka tih tak kha a ni.

"Khanu kha ka pa thawhpui an tia, an thawhpui dangte pawn an ringhlel lo asin, mi ho hian call girl emaw, ka pa ngaihzawng angin an sawi a; mahse, ka pa khan ngaihzawng a neih ka ring lo, a nupui nen hian an hlim viauin ka hria," ka ti ve duah a, an awih leh awih loh ka hrethiam lo, ka thilsawi chu an chhinchhiah a, a dang min zawt leh zung zung a, eng emaw an khawn khawm ni berin ka hria.

Zawhna ka chhan leh laimek chuan, "Ani kha chuan engmah a hre lo ang, thil hre tlem ber aniang," ka hnung lam ami chuan a lo ti khauh a, kan va melh nghal ṭhap a.

"Farm-ah chuan va kal ula, hnathawk ho chu va be rawh u, school lama a thawhpuite pawh in be tel dawn nia, he khuaah hi chuan ka ṭangkai vak dawn lo, hmeichhia kha ka lo zuk ngaihven zawk ang," ngaihsam hmel deuh hian a ti a.

"Min telpui zel ang chu.." pakhatin a lo tih chuan, "Ka thei lo ka tih tawh kha, kar khat chhung chiah ka hman dawn," a lo ti bawl a, "Nula kha a rinhlelhawm loh i ti a ni lawm ni?" pakhat zawk chuan a lo ti leh.

"Rinhlelhawm ṭan chiah," ti maiin hmaituama chuan a chhang leh a, a mitmeng aṭang chuan a nui deuhin ka hria.

"Call girl a nih i ring ve em?" 

"Call girl ni tur chuan a inchei lo deuh, awm hmun kawr nen customer a neih ka ring lo," hmaituam chuan a ti a.

"Anih inngaizawng an nih i ring em? Phone call-a an inbiakna a tam a, pawisa te pawh kha?" ka hmaa ṭhu chuan a ti ve leh a.

"A ruala thah chu an ni lo, mipa thisen kha bedsheet-ah a tlang loa, a ro tawh bawk a, nula thisen kha a la thara, bed sheet-ah a tlang bawk a, mipa zawk kha chu hmun danga thah a ni, a ruang an dah hnuah nula kha an that chauh a nih hmel," a tih chuan phawk fein ka lo melh a, ka lam a rawn hawi chuan ka lo ṭim ru er er.

"Inngaizawng an ni emaw, ni lo emaw, hmelma inang chu an nei anih hmel, chutiang anih loh chuan nula kha rilru lakpenna mai mai aniang," a ti leh nghat a, ka hmaa ṭhute lam ka hawi chuan mak ti hmel bak hmuh tur a awm lo.

"Pawisa kha rinhlelh i nei em?" pakhatin a tih leh chuan, "Minister hnen aṭanga an dawn anih kha, a pu hnenah nula khan a pe dawn niawm tak a ni," a ti a, ka lo inrawlh ve vat. 

"Ka pa kha head master a nia, school thila office dawr turin a kal alawm, nula kha a thawhpui a ni bawk a," ka tih chuan, "Kan hria alawm Bawihi," hmaituam chuan a lo ti a. Chutah, ka hmaa ṭhute lam chu hawiin, "Sumdawnna dang a khawih em hriat in tum dawn nia, farm-a in va kal hunah chuan an eizawnna lam te pawh zawh chian a ṭha ang, an hnathawkte kawm bawk rawh u," a tih zawm leh zat a, chutih laiin phone ka lo phawrh sawk sawk.

"Farm-ah chuan ka awm dawn a, in number ka lo la ang.." ka tih chuan min en ran hlawm a, "Hriat belh inneih chuan min lo hrilh ula, a fanu neih chhun ka nia," ka ti leh a, pakhat chuan ka phone chu rawn banin a number a type a, ka save nghal thuai bawk.

"I pa sum neih zat i hria em?" ka hnunga miin a rawn tih chuan ka bo map mai.

"I hre lo a ni maw, a thih vanga hlawkna tel tur tunge?" a ti leh zel a.

"Keimah ka niang; mahse, pawisa lam chu engmah ka hriatpui lo," ka tih laichuan ka ngaih a ṭha lo hle tawh.

"A nupui kha chik deuh a fuh ang," tiin midang chu a hrilh leh a, ngaihtuahna a buai duh khawp mai. Ka pa khan a hlawhte kha a hmang mang lo tih ka hria, helaiah hian engkim kan nei a, chhungkaw hausa tak te kiangah awmin duh duh kan lam mai a, ka pa kha a inkhawl zelin ka hria a, a account-a pawisa awm zat erawh ka hriat pui lo. Ngaihdan neih thiam a har khawp mai, ka pa hlawh it tur an awm awm ka hre lo a, a chhan pawh mahnia pawisa nei tak vek an nih vang a ni, nu Nguri leh lek phei chuan a it ka ring lo.

"Anih hmeichhia zawk kha eng nge i hmuh dan?" pakhatin a tih chuan hmaituampa chu a inngaihtuah vung vung a. "Ka la hrethiam chiah lo, mipa zawk hi buaina a ni lo thei a, hmeichhia zawk hi a nih chuan mipa zawk hi rilru lakpenna a ni thei bawk. Mahse, an that hmasa tlat a, chu chu a rinawm loh chhan a ni leh thung a..." tiin a lu a hiat nauh nauh a.

"Min zawn chhuahsak ngei ngei rawh u aw, mite hian rin thuin thil an sawi a, dik lo deuha ka pa an ngai tur hi a hrehawm ka ti lutuk..." ka tih chuan, "Kan theihtawp kan chhuah dawn alawm," ka hmaa ṭhu chuan a lo ti vat a, rilru a dam ve huai huai mai.

"E taka..." ka hnung ami chuan a rawn ti leh hluai. Ka va lehhawi chuan a bag aṭangin eng emaw hi a rawn phawrh a, "Hmeichhia kha a chi a chhuak a, pawngsualna hnuhma a awm lo thung a, a rui niin ka hria. Pindanah khan he milem awmna bottle hi a lo awm a," tiin lehkhathem hi a rawn lek chhuak a, ka hmaa ṭhute chu pein, "Bottle-a inbel anih kha," tiin a hrilh bawk.

"Sava lem chiah a awm, damdawi nge zu ni ang," an lo tih chuan, "Zu mawle, a rim kha wine rim a nam, ram dang siam wine anih loh chuan a bik taka siam aniang, in kalna tur farm sawn wine an siam ṭhin an ti a, hei hi an hria em in zawt dawn nia," a ti leh zung zung a, mi pahnih te chuan an en chik khawp mai.

Ka va bih ve dek dek a, chu veleh pakhat chuan min lo hmuh vat a, "Sava lem anih hmel," a tih laiin varak lem a ang riauin ka hria. "Eng sava nge ni ang?" ka tih chuan min chhang thei lo, "Ka la hmu ngai miah lo," an ti ve ve a, chutih laiin hnunglam ami bawk khan, "Varak anih kha," a lo ti zawi sup a, a chian hmel viau bawk.

"Mahse, farm siam chhuah bottle-ah chuan varak lem a awm hleinem, pangpar lem hlir a awm asin..." ka tih chuan min chhang an awm lo.

"I pa khan zu a in ṭhin em?" ka hnung ami chuan a lo ti teh daih a, "Aih, kei pawh in lo turin min ti ṭhin," ka ti a, ka hrechiang khawp mai, ka pa khan lakhuihthei um te pawh kha in tam a phal ngai lo.

"A pain in a phal lo anih chu," tiin hmaituama chuan a thawhpuite chu a hrilh leh kher a, "Zu tawlh ruk lam anih i ring em ni?" tiin an lo zawt a. "Ka hre nang, a pa'n in a phal loh chuan chhan a nei tihna a ni mai," a ti nghat a, pakhat zawk chu a lo nui suk.

"Tunge mahni fanute zu in phalsak ang, hetiang chu mimawl ber pawn a rin thiam theih alawm," a ti a, a ṭhianpa pawh a lo nui ve ruh ruh a.

"A hriat chian em vanga in tir phal lo a ni thei, an farm siam chhuah a nih theihna a tam sawt," hmaituama chuan a lo ti leh khauh a, a ṭhiante pawh chu an nui tawh bik lo.

"Wine hi kan chhui ber tur tihna a ni maw?' pakhatin a tih leh chuan hmaituama chuan, "Rilru lakpenna a ang viau maithei a; mahse, nula khan a in vangin kan ngaihthah thei lo ang. Ka rindan hi a dik anih chuan châkna tichhuak awlsam tak tura siam anih ka ring, nula kha dar 9 velah a ṭhianten an inah an thlah a, dar 10 pelh hnu lawkah a ruang hmuh a ni a, hun a tla tam lo, a inkarah thil a thleng ṭeuh hman a, hun tlemte chhunga ruih awlsam em em tur leh mi chawkphur thei tur wine a in anih hmel," a ti nghat nghat a, a thil sawi chu a rin thu angin a sawinaa a hriatchian hmel em em zel thung a, chhanna duh ngawih ngawih ka nih vang nge mawni ka ring nghal em em zel bawk.

"Farm-ah chuan lo kal la, wine te chu ka lo hmuhtir ang che, an siamna hmun pawh a awm nghal asin, barrel tam tak a awm a, i enkual dawn nia..." ka tih chuan hmaituama chuan lu min thin khum a, "Kei chu ka hman dawn lo," a ti teh tlat a.

"Engati nge, nangman i chhui dawn lo em ni?"

"Aw, anni khan an chhui ang.."

"Tinge i tel ve dawn loh a?" a lo nui kuk a, "Police ka ni ve lo a," ti maiin min chhang a, "I pui thei tho lo em ni?" tiin ka zawt leh. A hriat hmel bik em a, midang pahnih lahin a ngaihdan an zawt zel bawk si a, min chhuisak se ka ti hle tawh.

"Tun ṭum chu ka thei tlat lo, ka fapa a thi ṭep a," a tih chuan ka hnual rawih mai. 

"Kan awm alawm, i pa thattu chu kan zawng chhuak em em ang," ka hmaa ṭhuin a lo tih chuan ka bu ve mai a, hnung lam a mi bawk chu ka va thlek leh a, an duhtawk zui aniang an tho nghal mai bawk.

Pindan aṭanga kan inzui thlak laichuan hmaituama chu ka hnungah a kal a, ka dar a rawn kheuh zauh mai. Ka han hawi chhoh laichuan a ding chhawt a, keipawh chu ka pen chho veleh nghal a, "Hmeichhe thinrim deuh pakhatin a rawn biak che ka ring," a lo ti teh daih a, minti hamhaih angreng.

"Tu maw?" phawk fea ka tih chuan, "I la hre mai ang, a zawhna te ṭha deuhin lo chhang la, a pui thei ang che, eng eng emaw chu i hriat phah thei maithei," tiin dar a kan ak a, ka hrethiam mang lo, tumah chutiang tur chi pawh hriat ka nei lo, ka ṭhiante ka ngaihtuah kual a, hostel-a ka kawm ve ṭhin te kha em mawni dawn le; mahse, hmeichhe thinrim deuh a ti bawk si a, ka hrethiam lo telh telh mai.

"Buai lo la ka van ti tak, i hrechuak thei mai dawnin ka hria," ka tih chuan mit tizim raih hian min melh a. "Hriatchhuah i duh chuan tu pawh hi ringhlel vek rawh, i hnaiha awm apiang i ringhlel dawn nia," a ti a, chutih laichuan a ṭhian pakhat khan an rawn au a, "Chhuansang..." a rawn tih chuan hmaituama chu a lo chek hlak a, "Ka hrilh zin nen," a ti halh a, a hminga koh chu a duh vak lo aniang.

"Diktak chuan maw, ka lo beidawng hman lutuk a, ka pa hi a chhan pawh kan hriat lohin a boral ringawt a, kan hre lo hlen mai dawnin ka hre hman a, in lo kal hi ka lawm lutuk, in chhuichhuak ang tih ka beisei tlat tawh ania.." ka ti ve duah a, ka rilru hah leh tawt lutuk kha beiseina min rawn pe a ni ber, ka tan chuan mak tih tur tam viau mahsela, eng emaw tak a awm tih chu ka rindan a ni.

"Enteh.." a lo tih chuan ka en rang khawp mai.

"Hmangaihnate, lainatnate, khawngaihnate. A ṭha lam hi chu ngah em em tur ania. Mahse, thil ṭha tak ni si, ngah chi miah loh hi a awm a, chu chu beiseina hi a ni, tlemte neih chu a pawi lo, ngah lutuk loh a ṭha, a hlauhawm thei a ni," nghet charh hian a ti a, midangin an lo koh leh avangin min kalpel nghal sawk sawk a, pa Dinpuia'n lo biain pawn thleng a va thlah a, kawngka aṭanga ka va thlek chuan farm lama an kal tur thu an sawi a, pa Dinpuia pawh chu lo awm turin an ti a, an inmangṭha zui bawk.

Mut hmunah chuan ka inngaihtuah nasa khawp mai. Ka pa khan a damlai khan lungngai hmel emaw, buai rukna nei hmel a pu em tih te ka ngaihtuah let a, pa hlim thei tak leh zaidam em em mai a ni a, rilru hah hmel takngial pawh a pu ngaiin ka hre lo. Hmaituama leh a police ṭhiante thil sawi khan ngaihtuahna a tibuai ngang mai. Farm hi an ringhlel ni berin a lang a, ruihhlo lama sumdawng angin an ngai anih hmel bawk a, chutiang anih chuan ka pa hi a keng kualtu angin an ngai tihna anih mai hmel.

Ka muhil thei lo chuan Lawma biak ka tum a, a phone chu switch off a la inti tlat a, ka chanchin pawh a rawn ngaihven miah lo anih ka ring. Eng nge ka an tih tal chu min zawh ve ka ring asin le...!

Azoi message ka thawn a, a mu tawh aniang a chhang thei lo. Ka ṭhian dangte biak tur ka ngaihtuah kual a, ka ngaihtuah chhuah ve te lah chu hun rei tak ka biak tawh loh te an ni hlawm a, ṭhian tia sawi tur ka lo neih tlem ziate ka hre chhuak kuar kuar a, hnemtu ka mamawh lai pawhin ka chanchin ngaihvena betu takngial pawh ka nei lo chu a ni a, engtin nge hetianga ka lo khawsak theih zawk ni?

Zingkar hma deuhah ka tho a, ka thawh laichuan an la mu vek hlawm a, nu Ṭhatei a lo thawh chuan thingpui ka lo lum zo diam tawh. "Vawiinah i haw ve nghal dawn em?" zangkhai deuh hian a rawn ti a, "Haw ang," ka tih laichuan ka epah lo ṭhuin thingpui a thli a, a chau ve deuh aniang mut kham lo hmel a pu a, kan chhiat tawh vangin dawr a khar rei tawh a, a dawr hi khuaa dawr lian ber anih vangin a chan hnem dawn hlein ka hria.

"Nangpawn dawr hawng tawh rawh, ka hman changin ka rawn pui ṭhin dawn che nia," ka tih chuan min rawn nuihsang a.

"Chawlhniah i pa thlan kan tlawh dawn nia, pangpar te kan va dah anga, a phun chi te pawh ka lo ngaihtuah ang," a ti sap sap a.

Dar 7 pelhah midang an lo tho a, tukṭhuan te kan eikham chuan dar 8 a pel tawh. Kan insiam a, nu Nguri nen haw hmasaah kan ṭang a, nu Ṭhatei pasalin min va thlah bawk.  Ka thlen rualin Lawma ka zawng a, a pa chiah ka hmu a, Lawm chu hnathawk dangte nen ramah an kal a nih hmel. "Ka pi chu a dam ṭha tawh em?" tia Lawma pa ka zawh chuan, "Zai a ngai maithei, thla leh lamah an kal leh ang, zan lam hi a mu ṭha thei lo deuha," tiin min chhang a.

"Lawma hi ka be tlang thei miah lo a?" ka tih leh chuan, "E, a phone a tibo a," rang deuh hian a ti a, a hmel landan chu a danglam riauin ka hria, dawt sawi a ang ka ti.

Kawta kan indinchilh laimek chuan pa Dinpuia te an lo thleng a, "Lo lut lawk teh," tiin min rawn au a, ka zui ve nghal mai bawk.

In chhung kan va luh chuan mi dang a ko khawm a, sitting room-ah kan ṭhu ṭhap a, "Vawiinah police an lo kal leh dawn a, vawiin chu tuman hna thawk lo mai rawh u, zawhna min zawt leh hlawmin ka ring a, kan hriat ang ang kan sawi mai dawn nia," a ti zung zung a.

"Min ringhlel deuhin ka hria," nu Nguri'n a lo ti zauh chu kan melh ṭhap hlawm.

"An dilchhut mai mai anih kha, hetiangah chuan an chenpui te hi rinhlelhawm kan ni ve ṭhin a, kan eizawnna thlengin an rawn hre chiang duh a, ka pa leh keiman kan chhang anga, nangni chuan lo sawi ve lo mai rawh u, an zawhna ṭha deuhin kan chhang anga, an awm rei lo ang, an kal leh thuai mai ang," pa Dinpuia'n a ti leh zung zung a, police ho chu an ngaina vak lo a nih ka ring.

"Tun hnaiah kan inhau em tihte min zawt a, lo inhau ta ila mi an ringhlel dawn tihna anih hmel, Aizawlah a zuk tualthi a, kei helaiah a chanchin ngaihven reng rengin ka awm a, ka hriat chhun pawh nula pakhat nen hotel room-ah an thi dun tih zawng ania," nu Nguri'n a tih leh laichuan a aw a ṭial ruan a, ka va en chuan a mittui a lo hru zauh zauh a, a inpetruh fan fan bawk.

"Nizana police hoin an sawi dan chuan school fund an buaipui dun an tia, inngaizawng an nih ka ring lo," ka tih chuan min lo en leh ṭhap. "Nula khan awmhmun thawmhnaw a inbel a, thlalakah pawh kan hmuh hlawm kha, 'A ngaihzawng hmu tur chuan a inchei lo mah mah,' an tia," ka tih zawm leh a, ngaihdan an nei thiam ve deuh aniang min hnial an awm lo.

"A thawhpui a nia, eng emaw thila inhmuh chu a awm lutuk alawm. Mahse, a ruala thah an ni hi chhan eng emaw tak a awm ang," pa Tluanga'n a tih chuan rilru a buai leh map a, mi dang pawh chuan chu zawhna chu an pai ve ṭheuhin ka hria.

Rin dan an sawi tliar tliar a, "Tu emaw, mi thil tithei deuh pawi an sawi em mawni dawn le?" pu Muana pawn a ti ve vang vang a, a ngaihna kan hre lo tlang a ni.

"Nizanah khan wine chungchang min zawt a," ka tih chuan min en phawk hlawm khawp a.

"Wine bottle, varak lem chuanna a nia," ka ti leh a.

"Kan wine bottle-ah chuan pangpar hlir alawm awm, varak lem kan dah hleinem," nu Nguri'n a lo ti ve vat.

"Nia, keipawn ka la hmu ngai lo, an lo kal chuan min zawh leh ka ring, wine bottle te pawh an en duh maithei a ni," tiin pu Muana lam ka va hawi a, chal chuar nung chung hian min lo melh ve a, "Wine danglam deuh a ni an tia," ka tih laichuan a lo bu nghat nghat.

"Ka zuk enpui dawn nia; mahse, i pa khan zu lam chi engmah a in ngai lo a, eng nge a awmzia ni ang?" a lo ti let hu a. "A bula an nula hmuh zawk khan a in an tia?" ka tih chuan an lo thawm hlut. "Keini lam nen inkaihhnawihna a neih loh chu," ṭhenkhatin an tih laiin, "Min rinhlelhna tur an zawng kual anih hi, min burbun an tum tlat," mi dangin an lo ti bawk a, an sawi zui bawrh bawrh mai.

Naupang school kal tur an inpeih tawh avangin an tho sap sap a, kei leh pu Muana erawh kan la ṭhu dun reng a, kan inbe lem lo. Thawh mai ka tum laichuan, "I pa khan zu a in ngai lo ania," a lo ti khauh a, kei pawn ka chiang khawp mai, theitui um te pawh a in ve ngai lo a, a hrisel loh thu a sawi ziah ṭhin.

"Nia, wine kha chu nula zawkin alawm in," ka tih chuan, "Mahse, varak lem awmna wine bottle kha ka hmu ve tawh asin," a lo ti a, a hmelah chuan mak tihna a lang bawk.

"Khawiah nge i hmuh a?"

"I pa te office-ah, tlem chu ka tem ve a, a tui khawp mai, a ang deuh tur pawh siam ve ka rilruk a, hmeichhe tan pawh in nuam tak a ni kha wine kha chu," a ti charh charh a. "Anih chuan an office staff hoin an hriat dawn chu, police hnenah kan lo hrilh dawn nia," ka tih chuan, "Ni e," a ti ve mai a, ka kalsawn hnua ka ngaihtuah let leh chuan ka pa te office-ah eng nge a va tih ang tiin ka inzawt rilru a. Ka pa nen khan an inngaina khawp a, khuaah pawh an inzui dun fo a, kal pahin a va tlawh ve nge mawni dawn le?

Ka inbual zo khuma ka ṭhut laimek chuan motor thawm ka hria a, police ho chu an lo thleng tawh anih ka ring. Hmanhmawh deuh chuan ka inthlak a, ka han chhoh chuan tumah ka han hmu lo. Mahse, pawna ka va chhuah chuan kawtah an lo ding khawm laih a. Hmaituama pawh kha a lo tel ve a, sunglass vuahin a hmai a tuam leh tawh a, langsar deuhin lukhum parh a khum bawk.

Ka va pan laichuan ka lam an lo hawi a, "I lo kal ve dawn lo emaw ka tia?" tia ka va biak pa chuan min lo chibai thuai a, "Dar 11 a kal tur ka nia, ka kal hmain ka lo kal ve lawk anih hi," a ti a, "A lum i ti lo em ni?" ka tih chuan min chhang lem lo.

"Wine kan dahna chu khulaiah deuh khuan ania," pa Dinpuia'n a tih chuan, 

"Hnathawk ho chu han ko khawm teh u," tih pahin police ho chuan an zui nghal a. Kal ve mai ka tum chu nu Nguri'n, "I ke a nat kha, i tlu sual ang, inah lo va awm rawh," a lo ti khauh a, amah zawk chuan a zui thung a, veranda lam ka pan leh hna hna bawk.

Darkar khat dawn an zuk thang a, an lo chhoh leh chuan pi Lalpuii nen veranda-ah kan lo nghak a, "Ganja in ching em?" Hmaituama'n a tih ri chu ka hre pha.

"Ching lo e, engati nge?" pa Dinpuia'n a tih chuan Hmaituama chuan a chhang lo. 

"Hei hi chhek in sirah khan ka hmu a?" tih pahin hnimhnah emaw ni hi pa Dinpuia a pe a, chutih laichuan kan bul an lo thleng chawpchilh a. Pa Dinpuia chuan a hnim ken chu en pahin, "Damdawi anih hi," a ti sam mai a, "Eng damdawi nge?" tiin pakhat chuan a lo zawt leh.

"Kanna anih kha, damdawi ṭha deuh mai ania, taksa hah lutuk leh mut ṭhat theih loh changte hian a ṭangkai ṭhin asin," lo titu chu pu Muana a ni.

"Wine-ah khan in telh em?" Hmaituama'n a tih chuan, "Ṭhenkhatah chauh khan, a ruih ve theih a, dawidim telh lohna ang chi ah khan kan telh a, alcohol aiin a thawk nep zawk," pu Muana'n a lo ti leh a, Hmaituama chuan pa Dinpuia thil ken chu laksak lehin a han hnim vang vang a, "A va ṭhat hmel ve," a ti zawi sup a, chutah an hmuh lai reng chuan a ei a, a chhak leh rang viau thung. 

"A hela ei tur a ni hleinem," tiin pu Muana a lo nui hawk hawk a, "Tobacco chikhat em ni?" Hmaituama chuan a ti leh a.

"In ang ve deuh e, kanna hi chu ganja nen a inzul mah zawk, ganja aichuan a hrisel zawk daih ania," pu Muana'n  a tih leh chuan zawhna nei hmel a pu tawh lem lo.

"Thingpui lo in ta che u," pi Lalpuii'n a lo ti ve hlut a, an lo hnial bik lo a, sitting room-ah ṭhuin an titi bawrh bawrh hlawm. Farm chungchang te, ka pa chanchin te, kan chhungkaw chanchin te an zawt hlawm a, hnathawk an chhawr dan te leh, an sumdawnna thilte nen lam an zawt chik khawp mai. 

Choka aṭang chuan an ṭawng chu ka ngaithla ve reng a, a khat tawkin Hmaituama chu a rawn hawi leh ṭhin a, sana a en zauh zauh reng bawk. Thingpui no ruak la tura Remi kal chu Hmaituama chuan a rawn zui ve nghal a, min biak a duh aniang ka lam a rawn pan a, ka lo en chik viau mai.

"I pa thawhna school-ah chuan kan kal a?" tih pahin ka bula chair-ah chuan a rawn ṭhu a, ka hmel aṭang chuan zawhna ka zawt tih a hriatthiam mai ka ring.

"Hman deuh khan kha nula inah khan chaw an eikhawm a, i pa pawh a tel ve a," tih pahin min rawn en a, ka hrechhuak thei mai lo, chaw eikhawm chu an nei ṭhin a, eng hun ami ber kha nge a sawi ka hre lo a ni.

"Chuan engtin..?"

"An inhnial lai chu an thawhpui nula pakhatin a hmu a.."

"Engthilah nge an inhnial a?" ka tih chuan, "Nula kha a thinrim hle tih a sawi a, i pa khan ngaihdam a dil bawk, inngaizawng ang mai an ni a tia," a thilsawi chu ka awih lo ngang mai.

"Chutiang a ni lo ang, a awihawm loh lutuk.." ka tih chuan, "Awihawm loh te hi a tak a lo ni ve chawk ania, nula inah khan kan lut a, mipa kamis kan hmu bawk a..." a sawi laimek chuan sitting room lamah thawm a ri hlut a, nu Nguri a ni.

"Minai pa kawr anih hi, nikum christmas dawna ka leisak ania, hei hi nula in luahah a lo awm a maw..?" a tih chuan tho rang tak ka ni. Sitting room ka va thlen chuan nu Nguri kawr ken lai chu ka va laksak nghal a, a mak ngei mai, ka pa ta ngei a ni, engthil nge maw thleng le?

"An inngaizawng anih hmel?" police pakhatin a lo tih chuan nu Nguri chu a tho vut a, an pindan lam panin kawngkhar a khar ri nghal bur a, midang chu an ngawi ṭhap hlawm. Kamis chu ka en leh ṭhin a, a rimte chu ka han hnim a, phat rual lohin ka pa ta ngei a ni.

"Mahse, ka pa chu a riak chhuak ngai lo asin, engtin nge hei hi in va hmuh ngawt theih le?" ka ti tham ṭuak a, ka ṭah a chhuak hluah hluah.

"An thawhpuite chuan kal loh rual chang an nei ṭhin an tia.." police pakhatin a tih leh chuan thawk ka la hawk a, choka luhna bula Hmaituama ding chu ka va melh vang vang. "Thingpui ka va in ve lawk ange," tih pahin veranda thlang lam a pan a, rang fein ka zui ve nghal a, ka va chhuah laichuan min hnungchhawn rang khawp mai.

"An inngaizawng tak tak em?"

"Ka hre lo le, a lan dan chu ania,"

"A chiang tak tak lo ti raw...?

"Nula kha pasal nei mai tur ania, tlangval hmelṭha deuh mai a ni, i pate ang pa upa tawh laka a rinawm lohsan chu a mak viau alawm, keichuan rin dan mak deuh ka nei a.." a ti a, thingpui in paha mi a chhang leh hnunglam min chhawn tlat chu ka ngai thei lo. A hmaah chuan ka va ding a, a hmel chu ka hmu hman thuak a, a khuh ṭha rang viau bawk.

"Eng nge i rin dan mak deuh chu..?"

"An inngaizawng tih aichuan a la tenawm zawk a," a ti mauh mai a, a sawi dan ki chu a ngeiawm lek lek.

"Chu chu eng nge?" ka ti fiah leh fak a.

"I pa khan a blackmail ṭhin anga, a mutpui fo anih ka ring," a ti chu ka helh ngang mai. Ka nam rawk a, a thingpui no pawh a thlauh keh rawp a, "I va zakthei lo ve, ka pa khan tumah a blackmail ngai lo tih hre rawh, puh thluk dan tur in zawng anih hi," thinrim luatah ka aw chu a khur dar dar. Heng ho hian an chhui chhuak thei lo a, an rin thu hi an thutak cheibawl mai mai niin ka hria, a tih chianna tur an zawng chawp a, rin dan an neih sa chu an zeldin a, ka pa an hmehbel zel bawk.

"Rin dan dang pawh ka la nei asin," kal mai ka tum tawh laichuan a lo ti leh a, rum lutukin ka melh tawh.

"Nichina i pu chhuan em em pangpar ang deuh kha...nula inah chuan a hnah ro kan hmu a, i pa pek a ni mai thei, zuk tura siam a ni.." a ti leh ta zel a, eng nge awiha, awih loh tur pawh ka thliar thei tawh lo.

"I pa khan a blackmail lo anih chuan a dawr ṭhin a ni thei bawk, nula chhungte khan tun hnaiah pawisa a nei thei riauin an sawi a, in chhung bungrua leh phone tharte pawh a lei thar a, a hlawh nen chuan a inmil chiah lo..." a sawi pah chuan ka hnunglam a melh vut a, "A dawr ṭhin á ni?" hnung lam aṭanga lo titu chu nu Nguri a ni. Ka va hawi chuan rum zet hian Hmaituama chu a rawn melh a, "An inngaizawng nge, kha nu kha Ks a ni zawk?" a ti vin nghal hlar a, "Nu..." ka lo ti pawh chu min rawn melh tur viau mai.

"Ks tih nghal mai chu a fuh lo ang, pawisa pek chhan tur dang pawh a nei thei alawm, i pasal kha pa fel tak ania, nula rethei a ṭanpui pawh a ni thei tho.." Hmaituama'n rang fea a lo ti chu ka melh hrawk a, "I va fing ve, thil i hre thei hle mai.." ka ti hriam hrak a, a lo nui lehnghalin ka hria.

"Enteh ka pu, i chhungte an nih loh vangin a nuihzatthlak i ti a ni mai thei; mahse, hei hi ka pa ka hriatreng dan tawh tur anih hi aw.." min en loin nu Nguri lam a hawi daih a. "In beisei ang chu a ni kher lo maithei a ni, mi dik lo hailanna anih chang a awm ṭhin a, in hriatthiam a ngai," a ti zawi sup a, nu Nguri pawn ka rilru ang tho a pu aniang, "Chhui tawh lo zawk mah ula pawi ka ti lo," a lo ti hmak a, a kalsawn nal nal bawk.

"Nangin chhui tawh loh chu i duh ve tho em?" a rawn tih chuan, "I pa nita se hetianga ngaih hi i duh bik angem?" ka lo ti leh hlar a, ka rilru tak chuan hriat belh chakna ka nei tawh lo, ka hriat chin pawh hian min ti na tam tawk tawh a ni.

"I pa kawr kan hmuhchhuah vanga ngaihdan awm thei ka hrilh mai che anih kha, kawr kha awm lo sela chuan in case tawp dan hi a dang viau ang," a ti teh daih a.

Sawi tur hre lo zeta ka en laichuan min rawn kal hnaihin, "Eng emaw tal hriat chhuah tum rawh, thil ṭangkai tak hriat i neih a ngai, second tlem te chhunga thil thleng pawhin heng zawng zawng hi a ti danglam thei," a ti leh nghat a, engmah hi ka hrethiam phak ve tawh lo, ka beisei ang thil engmah ka hmu dawn loin ka hre tawh.

Police pakhat zawk kha a lo kal a, "Eng thil nge maw i lo hrilh le?" lawm lo deuh hian a rawn ti a, Hmaituama lah chuan, "Tikhan ka chawl thei tawh em?" a lo ti bawl thung a.

"Thei e, i kal vang vang thei," pawr angreng zeta police-in a tih chuan Hmaituama chuan dar a kan ak a, "A ṭhat chu," tiin a kalsawn zui a.

"Khapa kha eng nge a awmzia ni a?" tia ka bula ding ka zawh chuan, "A nuar anih kha," ti maiin min chhang a, "A thil sawi kha dawt em ni?" ka ti leh thuai a, "Ni lo e, a sawi dik lo khat khawp mai," a ti leh lawi bawk si a, awih tur chin pawh ka hre tawh lo, ka ring lo hle ringawt tawh.

An haw hnu chuan nu Nguri chu pindanah a tawm reng a, pa Dinpuia'n a va biak pawh chuan a lo thinrim hlur mai. A ang hlak hlak thawm chu sitting room aṭangin a hriat theih a, a thilsawi chuan rilru a tina zual hle bawk. "Min uiresan ṭhin tih a chiang reng tawh, engmah hriatbelh ka duh tawh lo, case pawh kha titawp vat ang che u, kan chhungkaw mualpho zualna mai mai tur a ni," a ti bawrh bawrh a, pa Dinpuia'n "A chhan pawh kan la hriat chian loh hi, la chhui zel phawt rawh se," a tih pawh chuan, "A ṭulna a awm tawh lo, mi nuihzat kan hlawh mai mai dawn, ka tan pawh a zahthlak," a ti bur a, an inhnial zui bawrh bawrh.

Ka thaw pik lutuk chu pawnah ka va chhuak a, Azoi te ina kal ka tum uk a, kawng chanve ka thlen hnuah ka ding leh rih a, rei deuh chu thingbuk hnuaiah ka inngaihtuah a, mittui ka hru zauh zauh reng. Naupang ho hruai tura nu Mangaihi lo chhuak chuan min rawn hmu a, "I piin a zawn che kha, ni a sa bawk si, zuk mu hahdam mai mai rawh," damthluam hian a rawn ti a, thil chah duh ka nei em min zawt bawk.

"Nei lo e," tiin ka chhuk san a, in ka zuk thlen dawn ṭepah chuan huan lam aṭanga hnathawk ho lo chho chu ka va hmu a, Lawma leh Puia pawh an tel ve nghe nghe. Ding meuha ka lo thlir laichuan min rawn hmu ve aniang an rawn hawi vang vang a; mahse, min biak a la tum lo aniang Lawma chuan an in lam a pan nghal a, an kawt a thlen thleng chuan ka la kalsawn lo, a che chu nidang a ang lo riau a, a kut a tina anih hmel.

"Mina, i pindan ka lo tifai ang, bed sheet thar ka rawn dah dawn nia," in chhung ka luh rualin Biaki'n a lo ti zung zung. Chutih laichuan nu Nguri a lo chhuak a, "Nula a nih kha, a pindan chu aman enkawl ve ang hmiang," a rawn ti hlak a, mi pawh a en duh eih lo.

"Tinge le?" Biaki'n a tih chuan, "Ka hre bik lo," ka ti zawi sep a, ngawirengin ka pindan lamah ka chhuk a, zanriah ei hun hma chu ka chho leh ta lo.

Remi'n min lo koh chuan chaw ka ei chak loh thu hrilhin mut leh mai ka tum a, "Rawn chho rawh, a bika thil tihsak ngai reng suh," nu Nguri'n a rawn ti leh ṭhak a, ka pa chanchin a hriat vang khan ka lakah a lawm lo niin ka hria a, hnial loa a thu awih mai chu ṭhain ka hre bawk.

Chaw chu ka han kilpui a, ka ei hleithei meuh lo, ka pa chungchang an sawi vang chuan thaw a pik zual em em bawk. Ka pa chu uire ang hmiahin an ngai hlawm a, nula pawh kha 'A bialnu' tih hlirin an sawi a, "A bialnu hmu tura kal te hi a lo ni mai angem?" an han tih te chuan ka lo inpetruh leh chiam ṭhin a, hnuk a ulh ru ṭeuh reng.

Zanriah eikhama in hnuaia chhuk leh mai ka tum chu, "Lo lut lawk teh," nu Nguri'n a rawn ti a, an pindan lamah ka zuilut ve nghal a. 

"I pa pawisa khawl hi kan insem a ngai," a ti thawr mai a, ka beisei loh lam daih a ni.

"Eng zat nge a?" 

"Diktak chuan engkim hi ka hming vekin a dah a; mahse, chan i neih ve loh chu ka tan pawh a mawi lo, a inzatin kan insem dawn nia," a ti leh a, a awki ah chuan a lungawi lo tih a lang hle bawk. Ka ding ngawi reng chu min rawn en a, chhan dan vak pawh ka hre lo. 

"Mi sawi kan kai nasa a, i pa uire vangin  khawngaih leh nuihzatte pawh ka hlawh a, khuaah phei chuan ka kal ngam rih mai lo ang, nangpawn in hi chhuahsan rih lo la, ka bula i awm hian mi min en dan pawh a zia phah deuh mahna," a ti leh nghat a. Ka hrethiam viau nain rilru erawh a hnual rawih rawih a ni. A hma kha chuan a pasal duhtak fanu ka nih vangin a fanu ang chiahin min en a, a bula awm turin min duh bawk a, tuna a bula awm tura min duh chhan erawh a dang ta viau mai.

"I nite bula awm i duh leh kum thar lamah i awm mai dawn nia," a tih chuan hnialna ka nei lo, "Aw le.." tih zawngin ka chhang a, min melh dan mawlh chuan awm a tinuam lo, min ngei ngawih ngawih tawh maiin ka hria, a rilru natna ka belhchhah te pawh a ni ang, ka pa a haw ta lutuk erawh a pawi ka ti, a ngaih ang thil hi a awm lo ang tih rinna ka la nei tlat a, a tihchianna tur engmah ka hre bawk si lo.

Pindana ka chhuk hnuah damdawi ka ei a, puan hnuaiah ka ṭap ru tlawk tlawk a, ka muhil thei bawk si lo chu ka chau hluah hluah tawh. Khawizu tui han in mai ka tum chu ka nei tawh lo tih ka hre chhuak leh chauh a, in chungah ka flask keng chungin la han chho a, thawm dim fea choka lam ka pan laiin pa Dinpuia ka va hmu hlawl a, dawhkan kilin thingpui a lo in mek a ni.

"I la muhil nange?" a tih chuan, "Ka muhil thei lo a, tuilum ka'n chhuang lawk ange," ka ti ve mai a, gas-a tui ka chhuan laichuan ka khawizu bur ruak dawhkana ka dah kha a lo en a, "I va ei zo chak ve.." tiin min rawn nuih var var a.

"A la awm em, ka ngeih ve deuhin ka hria," ka tih chuan, "Naktukah i pute an kal dawn alawm, i chah dawn nia, lak hun a awm nual ang," tiin a lehkhabu chhiar lai a bih zui a, ka be tawh lem lo. 

Tuilum kenga ka kal leh mai tur chu min lo koin, "I nu kha hriatthiam tum rawh aw, i lakah a lungawi lo ngam ve tihna anih kha, a haw miah lo che ania," thutak deuh hian a rawn ti a, "Ka hrethiam alawm; mahse, ka pa case kha in titawp dawn em ni?" ka tih chuan lu a thing mat mat a.

"Kan duh loh deuh thil kan hriat phah dawn anih pawhin keichuan chhuichhuah ngei a ṭha ka tia, mi sual hrem loha a awm aichuan keini chu a nih tur ang kan ni tawh alawm ti raw.." za vak lo hian a ṭhen a, kei ka lo bu nghat thung.

"Lehkha zir zawm leh te i chak em, i duh phawt chuan sawi hreh lo la, engkim ka ngaihtuahsak dawn che nia," a tih laia a aw ri chuan min thlamuan ve sawtin ka hria, ka pa minti ngai zual hle bawk.

"Ka la hre lo..." zawitea ka tih chuan, "Hna thawh i duh pawhin i nu Ṭhatei ten dawr nghak tur an duh reng a, ina awm mai mai i nin chuan kan dilsak dawn che nia," a ti leh a, min nuih vangin tawitein ka nuih let a, chuta a thil rawn sawi leh chuan hnuk a ti ulh lek lek.

"Nang chu kan hnenah awm reng la, heta ṭangin pasalte pawh i la nei dawn nia, mi hrang anga inngaihnate i lo nei ngawt ange, kan chhungkaw mi dik tak i nih kha aw, i pa awm tawh lo mah se, kei ka awm a, i pa angin min en la, i mamawh apiang ka hnenah thlen la, ka ngaihtuahsak zel dawn che nia," a ti dap dap a, hetiang thu hriat hi ka lo mamawh ngawih ngawih aniang ka ṭahpui lo chauh a ni.

"Aw le, muttui aw," tiin ka mangṭha a, in hnuaia ka chhuk laichuan mittui ka hru thla mawlh mawlh a, zawhna ka inzawt nasa viau bawk. Ka pa khan engtia awm turin nge min duh ang aw, he hmun hi chhuahsana tla hrang turin min duh angem, nge ni a helaiah hian awm a, a chhungte thlazar hnuaia awm tur hian min duh zawk ang. Ka nu Nguri kha chu a rilru na azia hunah a pangngai leh mai ka ring a, min huat tak tak loh pawh ka beisei, min duat em em ṭhin a, heti maia a inthlak chu ka ring lo, chhuak tura min tilui anih ngawt loh chuan an kianga awm hi ka duh dan a ni, ka pa duhdan pawh anih ka ring.

Inrinnia kan inkhawm bang chu Azoi te in lamah ka leng phei a, tum loh deuhin Lawma te ṭhiandun an rawn lang ve hlawl a. "I ke chu eng nge a an?" tiin min lo be hmasa a, dawhkan kilin ka ep chiahah a rawn ṭhu bawk.

"Ka zia tawh lutuk, i kut chu engati nge a?" tih pahin a kut tuamna chu ka lo thlek vat a, "Ka tipelh a, hnathawhnaah," ti maiin min chhang a, sawi tur ka hriat loh vangin a nu chanchin ka zawt leh a.

"Thla tharah kan kal leh ang, tunah chuan a zia rih," a tih laia a hmel chu a lungngaih hmel hlein ka hria.

Puia chuan Azoi chu a mitmei zuk zuk a, rei lo teah pawnah an va inzui chhuak daih a, Lawma nena chauha kan han ṭhu dun chu boruak a dangin min uap run mai hian ka hria. Ka en leh ṭhin a, ani lah a ṭhu ngawi reng a, a ṭawng hma chu ka ṭawng duh tawh bik lo.

Rei dawn kan ngawih hnu chuan, "I pa chu a pawi ngawt mai," a rawn ti ve ta hram a, ka lo thaw huai ringawt.

"Pawi i ti tak tak em?" a lam hawi paha ka tih chuan, "Ti tehlul mai, i tuar na ngawt ang," a ti zawi sup a, a lo hawi nen chuan kan mit a intawng chiang hle bawk.

"Engvanga thi nge a nih i rin ve?"

"Ka hre lo le, mi sawi dan ang kha chu a ni kher lo ang," thawk ka la hawk a, ka mittui a rawn hnam leh nghal ngawt.

"Min va hrilh har ve.." aw tham ṭuaka ka tih chuan, "Tih palh aw," tih zawngin min chhang a, min hnemtua ṭan hi a duh lo ni berin ka hre tawh, a inla hrang tlat a, min pehhel lui viau bawk.

"Engtin nge i awm zel ang?" tia a zawhna chu chhan mai dan ka hre lo, "Kalna tur ka hre chuang lo a," ka ti tawl a.

"I nite bulah i kal thei alawm," a tih chuan ka en leh tlawk tlawk.

"Kal se min ti em ni?"

"I pa a awm tawh si lo a, heta awm i la duh em ni?"

"Duh loh chhan tur ka nei hleinem, anih nang ve, i dam chhunga he laia awm hi i duh em ni?" ka tih chuan min enin a ngawi ran a, "Khawiah emaw kal bo daih ila," ka tih pawh chuan a la ngawi reng.

"Ka ti mai mai anih kha, nang chuan min duh lo a, ka hrethiam vek alawm," nui chunga ka tih laichuan nuih a za lo takzet.

"Hetah hian awm lo la ka duh khawp mai, i nite bula awm chu i tan a ṭha ber ang, kan thisen zawmpui te bula awm hi a ṭha ber a," tia min hnarna ṭawngkam chu natpui loh hram ka tum a; a harsa thlawt a ni.

"Ngaihzawng dang i nei em ni?" pangngai tak anga lan tum chuan ka ti leh a, lu min thinsan thung a, awm a tih nawm phah chuang lo.

"Anih, engati nge a?" ka rilru chuan ngaihdan a nei, min duh lo hle anih ka ring tawh.

"Farm hi kan hna ania, eizawnna dang kan nei hleinem, ka nu enkawlnan pawisa kan ba bawk a, helaia kan awm hi a ngai alawm," a ti dam dap a, ka beisei anga thu khá engmah a sawi lo.

"Vawikhat tal min ngaihtuah ve ngai em?" ka tih laia ka aw chu a lawi rut a, ka ṭah aw ṭun bawk.

"Ngai e.." ka mitah tak min en chungin a ti a, ka inrin hmain ka mittui a rawn far fap a, ka hawisawn rang khawp mai.

"Engtin nge kan awm ang, hmelhriat hlui angin nge, inhre ngai lo angin kan awm ang?" ka zawhna chuan a rilru a tina ve nge mawni min en tlawk tlawk a, chumi hnuah tukverh lam a hawi zui a, ka lak aṭanga mit a lasawn ringawt pawh chu ka natpui zel mai. A banah ka va vuan chawt a, "Heta awm ka duh chhan i nia sin, min hnem ve ta che..." ka ti zawi ṭiak a, chu veleh na zet hian ka ban a rawn hmer a, minti hrilhhai lek lek a ni.

"Hetiang hian awm tawh suh, nangmah vanga buaina nei thei ka ni lo, hmelhriat hlui ang emaw, hriat ngai loh anga awm chu ka duh ve ve, pawi tihna ka nei lo.." a ti fiah fuk mai a, sawi tur engmah ka nei ta lo, ka kut thlahin a tho zui a, ka en mawl tawp tawh. 

He pa lakah hian inhnemna ka beisei a, a ang chhungah thlamuanna neih ka chak a, ka thil la kawl zinga hlu ber niin ka hre bawk. Mahse, a ni lo, a lak aṭang hian beisei loh tur ka beisei a, ka tana awm ngai lo kha awm emaw ka lo ti a, pawi ka tih ber erawh tumah ka nei ta lo tih pawm a ngai ta hi a ni.

Pawna ka va chhuah chuan tuizem bulah an lo ding a, "Ka va haw ange," Azoi lam hawia ka tih chuan, "Ka lo thlah ang che," a ti ve nghal mai a, "A ngai lo, muangchangin ka kal ang, inleng i neih kha," tia Lawma te ṭhiandun lam ka hawi chuan min lo en ve reng a, an inthlahrung emaw tih mai tur hmel an pu a, ka en rei duh lem lo.

Azoi chuan gate bul thleng min va thlah a, Lawma nena kan inbiak dante pawh min zawt a, "Kan tawp tawh," tih zawngin ka chhang a, "Ka lo sawipui ve ang," ka ti nain ka hnial ve tlat a, pawm thiam ka tum ang tiin rilru ka siam bawk.

Zanriah kil loin pindanah ka tawm chawt a, ṭum dangah chuan zanriah ka kil peih loh pawhin ei tur eng eng emaw hi min lo pe mai ṭhin a, tun ṭum chu tumah an rawn chhuk lo a, mahniin ka mu chawrh chawrh reng. Zing karah Remi lo kalin khawizu bur khat ṭha deuh leh nimbu tui min rawn pe a, ka tuilum dahna chu lain min han tihkhah sak bawk a, ka chhungte chuan ka lusun vang anih an ring a, min tihbuai an duh lo niin a sawi bawk.

Thawhṭanni tlai thlengin chaw ka ei lo a, zan lamah erawh ka ril a ṭam tak em avangin ka han chho a, dar 11 a rik tawh vangin an mu vek tawh hlawm. Chhangthawp leh butter laa chhuk leh mai ka tum laichuan kawngkapui inkalh lo chu ka va hmu a, meng an la awm anih ka ring.

Thawm dim deuhin ka va hawng a, pawn ka va en chuan tumah ka hmu lo, thla a lo eng ruih a, kawtzawl reh ruih chu a lang mawi em em bawk a, boruak a vawt tawh bawk nen intihharh pahin ka va chhuak a, veranda ṭhutthlengah ṭhuin chhang chu ka keih mawlh mawlh bawk a, Azoi chu a muhil tawh aniang message a chhang thei lo.

Chutia ka ṭhut reng laichuan thawm ka hria a, ke pen hlawk hlawk thawm a ni. Lawma te in lam ka han hawi vat a, amah nge a pa zawk ka hre lo, mipa pakhat hi a lo chhuk thla a, hmanhmawh deuha huan lam a pan lai chu ka thlir reng a, amah ni ngeiin ka hria. Ka tiang chu banin ka tho ve vat a, thla a eng tho bawk nen va en zui ka tum a; mahse, a penna kawng ber ka hre lo, huan panna chu kawng pathum a awm a, tuikawng an siam tih ka hriat vangin dil awmna lam kawngah chuan a kal ka'n ring ngawt a, kawng zau ber a ni reng reng bawk.

Zawl awmna tawp ka va thlen chuan chhuka a kal thla chu ka zuk hmu leh a, a light pawh a eng va va mai. Chutih laichuan generator thawm niawm tak hi a rawn awm a, chu veleh ka mi zui pawh chu a rawn inher ve nghal a, a lo let leh ka zuk hmuh chuan thingkung phenah ka biru ve vat a, rei dawn chu ka nghak. Ka bul a lo thlen laichuan a kal chak em avangin min hmu lo a, grape huan awmna lam kawngah a kal ta daih a, ka zui leh dawn em tiin ka inngaihtuah buai viau mai.

Thil tih ruk a nei tlatin ka hria a, tun ang zan dar 12 dawn tawha a awmdan chu a mak tih loh chi a ni lo. Hlauthawng ru deuh chuan ka zui leh a, thui pawh ka kal lo ang tihah grape hmun ka va thleng a, thawm lo chhuahna in pawh ka va hmu thei a, chhek in a lo eng va va bawk. Kal hnaih deuh chuan mi an awm tih hriat takin ṭawng thawm a ri nak nak a, pahnih khat mai chu an awm lo a ang. 

Ka pan hnai zel a, thla a en em avangin light han hman pawh a ngai lem lo. Lawma chu a mit a ṭha vak lo aniang ti rilru chung chuan chhek in lam chu ka pan phei zel a, va luh ngawt chu ṭha lo deuha ka hriat vangin chhak lamah ka hel a, ka tiang pawh chu hawl tawh loin ka keng a, ke pen erawh a sawt lo khawp mai. 

Chhek in chhak lam bang awng aṭanga ka zuk bih chuan pu Muana leh mipa pahnih bakah hmeichhe pahnih hi an lo awm a, meizial zuin an titi bawrh bawrh a. Dawhkanah chuan wine bottle leh pawisa te, playin card te an inchhawp a, ṭhian inkawm khawm hi an angin ka hria. Lawma ka zawng deuh a, ka hmu miah lo chu mak ka ti, he lam hi a pan tih kha ka chiang viau si a.

Chutih laichuan pu Muana chuan pawisa chu hmeichhe pakhat hnenah chuan a pe a, hmeichhia chuan a bag-ah a dah nghal vat a, wine an thlit laichuan hmeichhia chu a hlauthawng deuh aniang, "Min khawih miah suh ang che u," a lo ti khar khar a, "A thawh dan min hmuhtir ringawt ang," tih pahin pu Muana'n no a lo pe a, hmeichhia chuan hreh hmel deuh hian a in a, a rin aiin a tui nge ni thlit belh turin a ti leh a, no thum zet chu a in.

Minute 5 vel a liam awrh ang tihah hmeichhia chu a rui ta khawp a, "Ka sahal deuhin ka hria," tih pahin a kawrlum a phelh sawk sawk a, a kut kuangkuahin a inhup leh chhawih chawih ṭhin a, "A va nuam reuh ve," tiin a nui ham ham bawk. Chutia ka en reng laichuan thawm dang a rawn awm a, pindan lehlam aṭangin hmeichhe pakhat hi a rawn tlan chhuak hlawl mai.

"Phuar bet ta che u," hmeichhe pakhat chuan a ti vin ṭhak a, chu veleh mipa pahnih chu thoin hmeichhe rawn tlan chhuak; din pawh ding ṭha thei loa pai deuh khat khat chu an va hnuk lut leh a, hmeichhia chu vawikhatte mah a au thawm hriat tur a awm lo. Mak ka tih zia chu aw, zawhna hlirin ka khat....?

"Tikhan a hralh chhuah theih tawh ang ti raw?" hmeichhe pakhatin a tih chuan, "Kum upa lam deuha en chhin chu ka la duh khawp mai, kum 50 chunglam ni thei se la a fuh ang," pu Muana'n a lo ti a, chutih laia ka dar na zawk chu ka hria.

Ka harh hlawl a, thlan hluamin khumah ka lo mu a, tukverh lam ka va hawi chuan khua a lo eng ut a, ka phone sana chuan dar 10 a lo kawk va tawh a, han thawh mai ka tum chu ka dar ana ngut ngut mai, ka delh sual anih loh chuan ka herh anih ka ring. Ka mumang chu ka ngaihtuah let a, ka hmu fiah lutuk chu a mak ka ti, a tak ang mai a ni.

Hmanhmawh deuhin ka tho a, in chungah chuan pi Lalpuii leh pa Tluanga nupuiin pangpar an lo khawi mek a, min hmuh rual chuan chaw ka ei dawn em min lo zawt thuai bawk. "Ka ril a ṭam lo," tih leh pawn lam pan ka rual a, kawt ka va thlen chuan mumang ni theiin ka hre lo, ka kalna kawng lam chu ka thlir vang vang a, a tak ni ngeiin ka hria. 

Vawk farm awmna lam aṭanga Lawma lo chho ka va hmu zui a, ka pan phei nghal hlawk hlawk. "I ke chu a dam tawh em ni?" a lo ti var a, ka ke lam ka melh ve vut a, tiang ka hawl lo tih ka hre chiah. Ka han per leh ngawt a, a la na deuh nain tawrh hrehawm khawp engmah na ka hre lo.

"A dam thut mai..!" a ngaihna hre lo zeta ka tih chuan, "I tho â leh tawh em ni a?" a lo ti let hu a, phawk fein ka melh.

"I hmai chu engati nge?" ka tih chuan amah zawk chuan mak tih hmel deuhin min en a, "Christmas laia ka tihnat kha," a ti mauh mai a, eng nge a awmzia ni ngai.

"Chritmas lai ami a?" 

"I tho â leh tawh anih kha, inentir teh..." a makti hmel chuan min ti hrilhhai zawk khawp a, han sawi mai tur pawh ka hre lo. Chutah, min rawn kal hnaihin min thlek kual a, "Jemina, i ṭha lo telh telh mai," a ti zawi ruih a, "Ti nge a?" zawi tea tiin a mitah ka en ran a, "Hei, zun i cheh leh tawh anih hi.." a ti ta mai a, ka kekawr ka zuk en chuan a lo huh dup.

"A ni lo, tui ka tibua aniang?" ka tawlh hnung nghal rawk rawk a, ka kekawr huh ka khawih chuan zun ka cheh tih ka hre chawpchilh a, Lawma chu melh pawh ka melh ṭha ngam tawh lo. Hmanhmawh deuhin in lamah ka tlan let a, in chhung ka lut chu pi Lalpuii'n min lo chelhbet rang khawp mai. "Hlau suh, hlau suh.." tih pahin ka banah a lo vuan chawt a, "Eng lo, hei hi..ka kekawr hi a lo...ka zuk tifai ange aw..." ka ti bah nawk nawk a, min biakna pawh chhang tawh loin pindanah ka chhuk a, ka khum leh pindan rimchhe lutuk chu ka hrethiam lo takzet.

Ka thawmhnaw te chu chhuatah an thal phung a, thil ei ruahna plate leh nepnawi eina kawr vel chu dawhkanah a thal rum bawk a, sofa-ah te chu puan thuah suk loh a vum thur bawk. Hlauhnain ka tirilah min ṭham a, ka kekawr pawh thlak ta mai lo chuan khumah ka va ṭhu leh rih. Eng nge maw a awmzia le, ka mumang mai mai anih ka ring, mumang chhawng ka nei a ni maithei!?

Ka side table-a calendar chu ka la vut a, pena a thai bial te chu a ngaihna ka hre map lo, ka phone ka ban a, ni zat ka han en chuan january thla a lo liam ṭep tawh hi a lo ni a, nikhaw hre loin ka awm em mawni le, ka hriat miah loa hun liam ṭeuh chu a ngaihna ka hre lo takzet! Ka diary ka hrechhuak zawk a, lukham hnuai ka en chuan a awm miah lo mai a, ka indap buai nasa mai.

Rei deuh ka zawn hnuah ka mattress hnuaiah ka hmu ta hlauh a, nitin ka ziak ṭhin kha ania, ka ziah tawp lam ka han en chuan kar khatah vawi hnih thum chauhte ka lo ziak a, ka hawrawp chu a chhiain ka ziak thui hlawm em em bawk a, ka chhiar chu ka rilru a na vawng vawng.

Doctor ka hmuh thu te, depression ka neih nasat thute, ka mut a chhuah reng vanga ka chauh thute a ni. Ka ziah hnuhnun berah chuan, ka haihawt vanga ka rilru a buai thu leh theihnghilh ka ngah lutuk vanga ka chiai ziate a lo awm a, zun ka cheh fo thu pawh ka ziak tel nghe nghe a, nu Nguri'n min hauh phah niawm tak a ni. Engmah chu hriat ka nei lo, diary ka ziah lai takngial pawh chu ka hre lo a, ka thil ziah aṭang chuan tuna ka awmdan pawh hi ka theihnghilh leh thuai dawn anih hmel. 

Ka ṭap chhuak hlawp hlawp a, ka hlau lutuk chu ka hlur hlawk hlawk. Ka damlo tih ka hria, thi dawnin ka inhre bawk. Ṭap chung chuan ka thawmhnaw ka thlak a, ka bed sheet te chu ka thlak zung zung bawk a, ka chet pah chuan ka ṭap vawng vawng reng. In chung lama ṭawng thawm ka hriat lah chu aw, "Zun a cheh leh tawh a, a lo chho mai lo ang, eitur zuk dahsak rawh u," pa Tluang nupuiin a tih ri a ni.

"A zun huh khu a khawl hnem tawh lutuk a, pi Nguri'n 'Aman su rawh se' a ti ringawt a, suk nachang a hre bawk si lo a, ka suksak leh mai dawn," ti tu chu Remi niin ka hria. Sofa chunga ka puan thuah dah ho chu ka ve en chiang a, a vai chuan a hing fai vek, engatinge hetia ka awm le, hei hi ka khawsak dan maw ni a, mihring nun dan tur pawh a ni em ni?

End of chapter - 4