WHY DID YOU GO? (CH - 5) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 5

Ka hmaa in ding chu in var, lian leh nalh deuh mai a ni. Mi an awm tih hriat takin in chhung chu a êng a; mahse, kawngkhar ka han kik chuan min chhang an awm lo. Ka kik nawn leh a, ka nghah deuh vang vang hnuah pawh min chhawn tu an la awm chuang lo. Ka phone-a address ka ziahna chu ka han en nawn leh a, a dik ngei chuan ka hre si a, a vawi thumnan ka kik nawn leh.

"In awm em, ka pu, inah i awm em?" ka ti lang lang a, kik pangngai loin ka chum dawt dawt a, thawm a awm tain ka hria. Ka beng dawh hnai meuhin ka han ngaithla a, ke pen thawm a ni.

Rei vak loah chuan, "Tunge i nih?" aw thum dut hian a rawn ti a, a la rawn hawng duh hauh lo nia.

"Jenusi ka nia, biak lawk che ka va duh ve?" in chhunga mi chu a ngawi vang vang a, "In case chhui laia a tuartu chhungte lam aṭangin ka nia, zawhna zawh duh che tlem ka nei a, SP khan i address min lo hrilh a, nizanah ka call che kha," ka tih chuan, "Nizanah ka biak awm che ka hre lo," a rawn ti leh a.

"Nia, ka call i chhang thei lo a, ka lo kal ta mai anih hi," insum ru fe chuan ka ti a, dawhtheihna erawh a pan ru viau mai.

"SP chu i be mai zawk dawn em ni," a la rawn ti cheu a, ka ngei ta deuh chuan, "I hnena kal turin min tia, rei lote a ni mai, zawhna pahnih khat ka zawt che anga, ka kal leh nghal ang," ka ti pawr deuh hlar a, aw pawh ka ti nem thei tawh lo. 

A ngawih deuh vung vung hnuah chuan, "Ngawi lawk rawh," tiin a kalsawn thawm ka hre zui a, a rial rei lem lo thung.

Kawngka a rawn hawn rual chuan ka pen lut ve nghal a, a hnunglam ka hmu hmasa ber a, palian leh sa ṭha lam deuh, sam dum, lu um nalh angreng deuh mai a ni. Sitting room lam a pan chu ka zui ve zel a, kal pah chuan in chhung chu ka thlek kual a, a reh lutuk leh puana thil inkhuh a tam em vang chuan a rapawm lek lek a, chhungkuaa chenhona a ni lo tih a hriat hle bawk.

"Sawi nghal rawh le," a rawn tih chuan ka melh rang khawp a, sofa-ah bawp khawkherhin a lo ṭhu fel reng tawh a, mask dum a vuah a, a mitmeng a nelawm loh hle bawk. Ṭhutna min kawh hmu loh vang chuan han ṭhut ve mai tur nge ka hre lo, ṭi ru angreng deuh chuan ka ding a, sawi mai tur pawh ka bang bo deuh. Chutah, "I duh chuan ṭhu rawh," a lo ti thum dut a, zam ru deuh chuan a ep chiaha sofa puanvara inkhuh chungah chuan ka ṭhu a, ka ṭhutfel rual rual chuan, "Sawi rawh," a lo ti leh tlawng a, kei ang thoa dawhthei lo a nih hmel e.

"Mr.Know-a i ni ti raw?" ka ti hmasa leh te te a, a lo bu zauh.

"In thil chhui laia nula zawk kha ka ṭhiannu ania, a hmunah khan kan inhmuh tawh kha," a ngaihtuah let a ni maithei a mit a chhing deuh siar siar, "Ka hre chhuak thei lo," a ti teh tlat a.

"Nia, ka be hman ta lo che a; mahse, police ho nena in thil sawi kha ka lo hria a," ka tih chuan, "I ngaithla ru a va nih hmel zawk ve," nelawm loh fe hian a ti a, chik fahranin min en bawk.

"Ngaithla ru hran lo e, ka hriat duh tak zawk chu i thilsawi dan kha ania, 'Nula hi chu rilru lakpenna a ang, call girl a nih hmel loh, mipa hi a thi hmasa zawk anih hi,' i tih kha ka lo hria a, kha kha hriat chian ka duh?" pehhel lo tak chuan ka ti a, a hmel chu ka en chik tehlul nen a hmai a tuam tlat mai a, ka thil zawh chu a lawm nge, lawm lo hriat a har khawp mai.

"Mipa kha a thi hmasa zawk, nula kha call girl a ni em hriat a la ni lo, a inchei danah a ang lo deuh e tih chauh a la ni rih," a tih chuan, "Ka ṭhian a nia, ka hrechiang a, call girl chu a ni lo, pasal nei mai tur a ni zawk a, rinhlelh te an awm tawh em?" ka ti zung zung a, ka hmanhmawh tehlul nen ani erawh min chhang turin a inngaihtuah phawt a ngai aniang a ngawi leh vang vang tawh.

"A ngaihzawng pawh a ni lo, ka ṭhiannu kha a damlai hmu hnuhnung berte zinga mi ka nia, kha mi zan khan dar 9 velah an inah kan va thlah a.." ka tih leh chuan, "I hnenah thuruk a sawi ngam em?" a ti ve ta khauh a, thawk ka la deuh huai mai.

"Tehreng mai, engkim min hrilh ṭhin, inchhung khur buaina emaw, a ngaihzawng nena an inkar thlengin ka hriatpui ṭhin, a chhungte aipawhin ka hrechiang mai thei," dar a lo kan uk a, "Rawn tel ve tum i va ang ve," ngeiawm rawng kai deuh hian a ti a.

"Tum hran lo e; mahse, a chanchin hriatchian in duh chuan ka pui thei ber ang che u," ṭha deuh chuan ka ti leh a, beisei loh dan deuhin, "Eng nge i zawhna dang leh chu?" a lo ti teh daih a, zawhna chu ka ngah lutuk tlat a, ka lubur hi zawhna hlirin a khat zawk ang tih tur a ni.

"Eng emaw hriat in nei tawh em?"

"La nei lo,"

"Call girl a ni lo a, mipa kha a ngaihzawng a ni lo tih te chuan awmzia a nei thei em?"

"Nei em em lo,"

"A phone kha police-in an la a, hmuh chhuah an nei lo em ni?" a ṭhu ngil deuh hluai a, chutah ngunthluk zet hian min rawn melh a, "I dilchhut reuh hle mai, police-in an chhui mek a, thu thar an neih hunah an hrilh mai ang che u," a ti chang bawl a, chu chu ka nghah theih hlawl loh vanga hetianga kal hi ka ni.

"Police ho chu an muang lutuk alawm, hun an khawhral chhungin finfiahna a bo ṭeuh thei asin.." 

"Police ho chu i ring zo lo a ni maw?" a tih chuan, "Chu vang alawm ka lo kal," ka ti leh hlak a, kan in en ran ran a, ka insum deuh a ngaiin ka hria, ka hmaa ṭhu hian min hriatthiam loh hmel tlat.

"Miten a chanchin an sawi dan ang hi a ni lo a, inzuar ṭhin leh nula lepchiah a ni lo, drugs a khawih ngai lo a, ka ṭhiannu kha chu nula fel leh nungchang ṭha tak a ni," awki nem zawka ka tih leh chuan a bu ve nghat a, "Eng lo, a hmaa i thil chhui vel aṭangin ka lo hre tawh che a, ka nau hian a ngaisang lutuk che a, ka ṭhiannu case i buaipui tih ka hriat khan keipawn beiseina ka lo nei sang ve a.." nelawm thei ang bera ka tih laiin, "Infak a ngai lo, i zawh duh kha sawi leh rawh," a lo ti mai a, mi nelawm loh ve tak zawng a ni.

"I chhuichhuah theih i ring em?" ka tih chuan, "Maithei, kan tum mek alawm," a lo ti vut a, "Khawngaihin theihtawp min chhuahsak rawh aw, puih theihna che ka neih chuan..." ka sawi zawh hma hmain, "I puihna kan mamawh chuan kan lo bia ang che," a lo ti leh vat a, kal tawh se min ti hi a ang.

"Mr.Know-a i ni tak tak em?" ka'n ti ngawt a, ka zawhna chu a lawm zawng a ni chiah lo aniang, "Ka ang lo em ni," lawm lo awka zet hian a ti a, a hmai a tuam ṭhin tih bak chu a chanchin ka hre thui lo khawp mai, tv-ah takngial pawh a hmel ka la hmu ngai lo.

"Ang tho e, engati nge i hmai kha i tuam tlat a?" ka tih chuan, "Khawlaia min melh haw haw loh nan maw le," a ti leh nghat a, a fiamthu loh hmel viau bawk.

"Mahse, i mithmul awm dan aṭang khan ka hre thei tho ang che," ka ti leh chiah chu a ṭhu ngil hluai a, a rawn ding zui bawk a, phawk fea ka lo en laichuan dawhkana a phone dah chu a rawn ri a, min rawn melh leh zawk hnuah phone chu a va chhang a.

'Hello' pawh ti lo chuan, "Zawnga, min va tibuai ve," a va ti nghal thawr a, lehlama mi chu a rawn nui ni ngei tur a ni, "Ka uang vak lo ania, engtikah nge i lo let dawn, thil chhui tur a tam hi, " a ti leh a, a ṭawngkam chu a la chang bawl reng.

Chutah ring fahran hian, "Engvangin maw i fapa chu ka lo awm ngawt anga, i duh leh i kid te tir ta che," a ti vin chiam a, ka lam a rawn hawi vangin ka hawisawn rang viau bawk.

"Ka ti lo ang," zawi deuh zawkin a ti leh a, chumi hnuah, "Khaw vawt kha ka ngaina lo, thil chhui tur a tam, tualthahna a awm hi, i duh leh nau chu awm zawk la, ka lo ti thei alawm," a ti bul bul a, ka va hawi leh pawh chuan min lo la en reng.

"Inleng ka nei a," tiin lehlama mi chu a hrilh a, a lo zawt a ni ngei ang, "Hmeichhia a nia, kha nulai ṭhiannu kha a nih hmel," a ti zui a. Hawi sawn tawh loin ka en ve reng a, tu emaw Veroi hre ve tu a bia hi a ang a, a ṭhian bia a ang viau bawk a, ka lo ngaithla uluk hle bawk.

"A phurawm sawt anih chu, uirena thil mai mai aichuan hetiang case liantham khawih hi a nuam zawk alawm," a tih chuan ka lo helh ru khawp a, la hre chiang viau lo mahila mi te fak ang em em hi chu a niin ka hre lo, ka lo beisei sang deuh pawh a ni maithei, a nelawm loh em vang te pawh a ni mahna.

A mizia âwm ka ngaihtuah a, hetiang in ruakah amah chauhin a awm a, engkim hi luah lai ni lo ang maiin a inkhuh hlun hlawm a, a thawmhnaw hak aṭang pawhin mahni ina awm chu a ang chiah lo. Dawhkanah chuan eitur online-a chah mai chi pack-na a awm a, eirawng a bawl lo tihna a nih hmel, anih chuan mikhual a nih ka ring. A hmai a tuam a, miin an hriat a duh loh vang hrim hrim anih loh chuan lem a chang tihna a ni thei, Mr.Know-a lem chang a ni mai angem tih chu ka rilrua lo awm hmasa ber a ni.

Chutih laichuan, "Ka lo ti dawn nia, dah rawh," tih leh phone dah a rual a, a ṭawngdan ṭhin aṭang chuan mi thinram ve tak leh dawhthei lo ve tak tih a hriat theih a,  a taksa pianhmang aṭang chuan sportman a nih loh vek chuan taksa uluk tak a nih ka ring, a insawizawi ṭha viau bawk ang.

Ka epa a lo ṭhut leh rual chuan, "Zawhna tlem ka zawt ang che," a ti a, a hma aichuan a aw pawh a nelawm deuh tawh.

"I ṭhiannu chuan tun hnaiah inhauhpui a nei em, a bialpa nen an inkar emaw, an chhungkaw lamah buaina a awm em?" thutak deuh hian a ti a, ka lo lawm ru khawp mai.

"Aw, a bialpa nen tak chuan buaina an nei lo, a boral zan khan tlai lamah a u nen an inhnial a, Veroi khan pawisa a ngah angreng a, a u khan a ringhlel deuh a, an indawp deuh anih hmel," ka tih laichuan ka rilruah thil dang daih a awm a, sawi tlang râwt mai a ṭhain ka hria.

"Zirtirtu a nia, a hlawh chu a tam lo a, khawi aṭangin nge pawisa lakluhna dang a neih i hria em?" a tih chuan ngaihdan ka nei thiam lo, "A inkhawl thu chu a sawi a, thil ni thei ve tho a nia; mahse, tun hnaiah khan thil thar a lei nual a, in chhung bungrua leh a naute phone man to a leisak a, chu chu a uin a rinhlelh chhan pawh ania," ka ti leh a, a inzuar anga a ngaih erawh ka hlau ru khawp mai, thil hriat chian ka duh viau nain ka duh loh thil ka hrechhuak ang tih erawh ka hlauthawng a ni.

"A bialpa nen chuan an ṭha tih i chiang a maw?" a tih laia a aw ah chuan rinhlelhna a lang.

"Chiang e, inneih an tum ve mek a, Veroi khan eng emaw chu min hrilh a nei a, kei chauhin ka hriatpui bawk a," tiin hman zana a thil min hrilh kha ka sawi chhuak a.

"Pawngsual tawkin a inhria a, engmah a hre chhuak thei tawh lo a, a taksa awm danah a inringhlel a, ka zawt chik viau chung pawhin sawi theih vak a nei lo," tiin Veroi thil min hrilh dan te chu ka han hrilh chhawng ve a. "A hmu hmasa bertu chu a ringhlel lo em ni?" a tih chuan, "Rinhlelh tur a hre lo a, keichuan kha pa kha ka ringhlel," ka ti a, a lo bu ve nghat nghat. Dawhkana a phone chu a melh leh zauh ṭhin a, kan inbiakna chu a record niin ka hria.

"Mipa zawk nen khan school khatah an thawk dun niin ka hria a, chutih anih chuan pawikhawihtu hi an pahnih hnaih taka awm a ni thei, i ṭhiannu chuan damdawi emaw ruihhlo khawih a nei em?" a tih leh chuan chiang takin ka chhang thei lo.

"Khaw hranah a awm a, ka hriat chinah hi chuan ruih a neih awm ka hre lo a, a u kha chuan a ringhlel a. Mahse, Veroi khan wine lam a hre riau a, a in ṭhin a ni maithei," ka tih leh chuan a thil hriat duh tak ka sawi aniang, "Wine maw..?" a lo ti hluai a, "Tikhan lo awm rawh," a ti a, a tho zui mai bawk. 

In chung panna kailawnah hmanhmawh deuhin a chho a, a thil lak tum chu a zawng chawp nge mawni a rei reuh khawp mai. A thang hlan chuan dawhkana a phone dah chu a lo ri a, a ri rei angreng si a, tho kangin ka va thlek dek dek a, tu emaw 'A' tih hnen aṭangin a ni. Ka en reng laichuan a ri zo a, kalsawn mai ka tum laiin a lo ri nawn leh a, ka chhan sak ta ringawt.

Engmah pawh ka sawi hma chuan, "Kid ka nei ngai lo, nangman alawm kid chu nei ṭhin, manic man inti ho kha i kid an ni lawm ni," nuihza aw deuh hian a rawn ti a, mipa la upa lo tih hriat tak aw a ni.

"Voice record chu i lo thawn dawn nia, i hmai kha tuam tlat ang che, tumah i hmel hmuh tir suh...Over." a rawn ti a, ka ngawih reng vang chuan, "Over," a rawn ti nawn leh a, sipai inbiak dan em mawni ka ti rilru neuh neuh.

"A hre thei lo em mawni le?" a tih leh takah chuan, "Mr.Know-a chu in chungah thil la turin a kal lawk," ka lo ti vat a, lehlam ami chu a ngawi nghal daih a. Mahse, rei vak lo hnuah, "Mr.Know-a chu 'Nau awm la a ṭha zawk ang, i duh deuh pawh a awm ve dawn' tiin i lo hrilh dawn nia," nui aw lek lek hian a rawn ti a, "Aw le," tia ka chhan hnuah phone a dah zui bawk.

Ka ṭhu fel leh deuh chiah tihah Mr.Know-a chu a lo chhuk a, bottle pakhat hi a rawn keng thla a, "Hetiang bottle hi i hmu tawh em?" tih leh ka lama rawn lek a rual a, ka han en chian chuan zu rim a nam deuh. Ka ner deuh nak a, "Wine bottle anih kha, i ṭhiannu in ṭhin a ni em?" a ti leh a.

"Ka la hmu ngai lo," tih pah chuan a chhin leh bottle mawng te chu ka thlek kual a, engmah thil inziak hmuh tur a awm lo. Ka rilru hria niawm tak hian, "Kan pawtthla a, hmun dangah a awm rih, varak lem a chuanga, a siamtu hriat a ni lo, dawrah zawrh chhuah a ni lo a, khawi aṭanga chawk luh nge tih a hriat loh," a lo ti leh zung zung a, anih chuan Veroi'n wine chungchang min hrilh ṭuma a sawi kha a ni maithei.

"Veroi khan wine pakhat magic ang tia sawi chu a nei a, a tui lutuk a ti bawk a.."

"Khawi ami nge a sawi em?" a tih chuan lu ka thing vat a.

"A awmna khaw lamah em ni a hmuh?" a tih leh chuan, "Anih ka ring, helaiah chuan hmuh tur a awm lo, dawrah an zuar lo niin a sawi," ka ti leh a, thil phurawm tak hria niawm hian a mitmeng a danglam a, "A ṭhat chu," tiin a bu nghat nghat mai.

"Thil dang min zawh duh i la nei em?" ka tih chuan, "Nei rih mai lo, i phone number ka lo la ang," tiin a phone a ban a, ka number chu ka type sak a, "Chanchin min lo hrilh rawh aw, ka lo ngaichang ang che," ka ti a, min aw lem loin ka kal tur chu min lo zui a, pawn kan thlen hnuah, "A bialpa kha eng ang mi nge?" tiin min zawt leh a.

"Zohera chu a ṭawngtam vak lo, tunah phei chuan biak a har khawp mai, Veroi boral hi a tuar lutuk a, biak in tum tawh em?" tiin ka zawt let a, "Police ho chuan an be tawh," ti maiin min chhang a, ka kal hun pawh nghak lem loin a inher a, kawngkhar a khar thlengin ka la ding thung. Thil engmah hriat belh lo mahila rilru chu a nuam deuh huai a, tunah rih chuan Zohera ka ngaihven a ṭhain ka hria, a tuar thiam lo zual a, thil ṭha lo a tih duh mai te pawh ka hlau a ni.

Phone ka en chuan ka nu missed call a lo awm a, Bawiha hnenah ka kalna ka hrilh tho bawka tiin ka call let duh lo a. Zohera te veng ka thlen chuan khua a dur ruih tawh. A nu a lo awm a, min hmu chu a lo lawm khawp mai. "A room-ah a awm, an coach nen an inhau aniang a practice zo rawn haw kha a chho tlang nghal a, biak ṭawng lah hi a har khawp a, a zuin vanga inhau an ni leh ang, nimin a gym kalnaah lah mi nen an insual bawk, zantin hian a chhuak a, a haw tlai thei bawk si a, a pa nen kan awm a nuam thei lo," a lo ti nghal mawlh mawlh a.

"Ka han chho dawn asin," ka tih chuan, "Eitur keng chho rawh, thil pawh a ei mumal lo," tih pahin thingpui a thli zui a, chhang leh apple tih angreng nen min kenchhoh tir a, a room ka han thlen chuan ruah a sur ṭan tawh a, kawngka ka kik thawm pawh a hre mai lo.

"Zoa, i muhil em ni?" tiin ka au a, min chhan mai loh vang chuan kawngkhar chu ka chum ri bur a, rei vak loah a rawn hawng a, a muhil ka kaitho a nih hmel. Min hmuh chuan, "Nang elo?" tih zawng a sawi a, inherin a lut lehnghal mai a, ka thil kensak pawh chu lak a tum chuang lo. A dawhkanah chuan ka va dah a, ani erawh tukverh bulah dingin veranda pawn lam chu a thlir a, a bulah dinga ka va thlek chuan damlo chau tak hi a angin ka hria, a khabe hmul a zuah a, a lu a buk em em bawk a, a pawr fap ti ila a dik mah ang chu.

"I ṭha maw?" ka ti chu, "Ṭha lo.." tiin min chhang a, zawh ngai lo pawha chiang sa reng a ni.

"I mu ṭha thei lo em ni?" min rawn melh zawk a, a mitko duk leh mitkhur tla dawk te, a mithnuai val te pawh chu a langsar hle a, ṭah chak ngawih ngawih hmel a pu bawk.

"Engtin nge i awm ve?" a tih chuan ka melh vang vang a, engtin nge ka awm hi ka sawi thei bik lo, nunphung a danglam zo a ni ber, engkim hi a chuai a, nitin hi a khawharthlak em em reng a ni.

"Police te ka bia a, chanchin ka ngaihven deuh reng, Veroi chhungte i va tlawh tawh em?" 

"Eng nge ka va tih ang, ka va hnem dawn em ni?" 

"Mahnia tuar tlawk tlawk aichuan a ṭha zawk alawm," za lo zet hian a lo nui a, "Ka chak lo," a ti teh thlawt a, ka dem hran lo, kei ngei pawn harsa ka ti.

"Thlanah i kal ṭhin em?" ka tih leh chuan min chhang loin a ngawi ngul a, "Lo kal teh," tih leh pawh ka rual a, a khum lam ka panpui a, khumah chuan ṭhuttirin kei ka ding a, mi pawh a en rei duh lo.

"Veroi leh kha pa kha a ruala thah an ni lo ania," ka han ti dek dek chu, "Engati nge hmun khatah an awm si, khatianga hmuh an nih te chuan rinhlelh tur dang a awm hleinem," a lo ti vin hlur a, ka duh lo tawp mai.

"Zoherlian, nangpawh hian i ringhlel em ni, mi zawng zawngin lo ring pawh nise nang kher hi chuan hetianga ring tur hi i ni hleinem," ka ti vin chiam a, hrethiam ve bawk mahila hetiang rilru hi pu lo turin ka duh.

"Rinhlelh ka duh bik lo; mahse, eng nge rina; rin loh tur pawh ka hre tawh lo, ngaihtuah loh ka tum lahin ka thei bawk si lo.." beidawng awka zet hian a ti a, thawh 

mai a tum chu ka lo nem ṭhu leh rih.

"A na ve thlawt a ni.." a tih leh laichuan a mit a sen rum a, a bula ka ṭhut rualin ka darah a lu a rawn nghat a, "Ka ngai lutuk hi ka thi mai dawn tein ka hre ṭhin, a chang chuan inawhhlum daih te ka duh a, engtia nun tur nge pawh ka hre tawh lo," a ti zawi ruih a, inhnem tur kan awm lo, chhungrilah kan tuar dun tlawk tlawk a ni ber.

"Sangpuia'n min boralsan khan thih ve daih kha ka chak ṭhin a, a tel lo chuan damchhunga hrehawm reng renga awm tawh turah ka inngai a, ngaihzawng dang ka neih leh theih tawh pawh ka ring lo. Mahse maw Zoa, kan dam a ngai, kan thih si loh chuan kan dam a ngai a ni mai, tih theih engmah a awm lo, dam ila, tuar tawp mai teh ang.." thawk ka la vang vang a, Zoa sam chu chulin ka inpetruh ṭeuh bawk.

"Tuar tawp ngai hi alawm hrehawm, engmah ka ti thei lo, phurna pawh ka nei tawh lo."

"I nuin a lo sawi a, i intichhe zo vek ang tih ka hlau, rilru lakpen i ngai ania aw.." 

"Engtin nge ka tih chuan ang...?" ka chet sawn rualin a ṭhu ṭha ve vat a, "Thil hrilh tur che ka nei a," a ti chu a ngaihven lo khawp mai, khumah chuan a zangthal duai a, "Khawiah pawh hian a hmel ka hmu reng mai," tih pahin ceiling lam chu a melh vung vung a, ka han hawi chhoh chuan sticker inbel kara Veroi nena an thlalak intar chu ka han hmu a, eng emaw chen chu kan thlir dun.

"Lo tho la, thil pawimawh sawi ang?" pawh thawh mai ka tum chu a lo ṭang tlat a, "Ti khan sawi rawh," a ti deuh tlat a.

"Veroi chu engtianga thi pawh nise sawi theih emaw tih theih vak kan nei lo; mahse, a chhan hi kan hriat ngei ngei a ngai, rinhlelhawm tak tak a tam a, a chhuitute pawh ka bia a, anni pawn hma an sawnin ka hria, kan pahnih hian lo pui ve ila, hetia lo nghah tawp aichuan kan theih ang anga lo ngaihven ve a ṭhain ka hria a.." ka sawi laichuan mu chungin min lo melh reng a, a bengkhawn zawng ka sawi lo emaw tih tur hian a ngawi ngul a, a awmdan chu a hahthlak hluah hluah.

"Ka thil rinhlelh chu Veroi min hrilh a nia, a chiang vak lo naa pawngsual tawk niin a inhria a.." vawilehkhatah a rawn ṭhu chhuak hlawl a. "Engtin a?" nur fea min melh pahin a ti a, "Pawngsual a tawkin a hria a; mahse, a chiang lo," ka ti nawn leh a, min melh dan chu a thinrim nge, a awih lo pawh ka hrethiam chiah lo.

"A chiang lo tih chu eng tihna nge?" a rawn ti vin hlur a, a thinrim ringawt mai.

"Nikhaw hre loin a awm, an hrai rui nge tih pawh a hre lo, a harh hnuah khawihtu an awm niin a hria a, tu nge a hre bawk si lo a..amah pawh a rilru..." ka darah a rawn ṭham nawk a, "Chu chu tinge tunah min hrilh chauh a, engah nge ani pawh chuan a zep? Tinge engmah ka hriat ve loh?" a tia a, dawhtheihna tlachham lutukin min sawi pah nawk nawk.

"A hrilh ngam lo che alawm,"

"Nangpawh a hrilh che hi..."

"Hun rei tak hnuah keipawn ka hria, inbengdai la, fim deuhin awm teh,"

"An pawngsual em ni?" a hmel chu khawngaihthlak tak a ni, chhang lo chuan ka dar a hmerna chu ka pawhthlak sak a, "Tunge a nih?" a lo ti chang leh rap a. 

"Chu chu kan hriatchhuah a ngai, Veroi sawi kha ka ring a, hetianga a boral chhan nen pawh hian inzawmna a nei maithei, hrechiang tur chuan a hnathawhna khuaah khan kan han kal a ngai ang," 

"Engati nge a zep a, engkim a sawi ṭhin emaw ka tia, tinge chu chu ka hriat loh?" a lo ti tlawk tlawk a, a ngaihtuahnaah hian thil pakhat bak a dah thei lo ni maiin ka hria.

"Chu aia pawimawh chu a tam ania aw.." ka tih pawh chuan, "Pawngsual tawk pawh nise tinge ka bulah a zep a?" a ti leh a, min zawt ni chiah pawhin ka hre lo, amah a inzawt hi a ang a, a fim lo riauin ka hre bawk.

"I neih duh loh mai a hlau alawm," tia ka chhang chu ka tifuh vak lo, "Engati nge hetiang hian a awm, ngaihzawng satliah ka ni em ni, zawh theih bawk si loh, engmah ka hriat ve hmain tinge a thih?" a ti bawrh bawrh tawh mai a, a tho chhuak lah chuan a khum sira chair inhung chu a pal thlu rawp a, tun thawh pawh a tum chuang lo. A rawn hawi leh chu a nu bulh maiin ka hria!?

"Lo ṭhu teh, tih dan tur kan sawi a ngai ania, mahni chuan hmalak a har a, i puih ka ngai," ka lo ti sawk sawk a, a chal dawm chungin a inngaihtuah nasa khawp mai.

"Engtin nge a hriat loh theih a, engmah a chiang lo tih ngawt chu, a zep zawk aniang," a rawn hawi chhuak thut a, "I dawp lo em ni?" a ti leh khawl a, chhan pawh ka chhan hma chuan, "Min hrilh loh i la nei?" a ti zui a, ṭha taka sawipui a har a ni.

"Ka hriat chin chu ka kha zawng kha a ni, rinhlelh tur pawh heta ṭang chuan hriat a har, an khuaah khan han kal ila a thawhpui te kan han be dawn nia," ka ti a, chutah ka bulah lo ṭhuin, "Police-in an hre tawh em?" a ti a, ka lo bu ve zauh, mr.Knowa khan a hrilh mai ka ring.

"Engtikah nge kan kal ang?" a tih chuan ka thaw huai tawh. 

"Pawisa ka nei lo a, lo ngaihtuah la," ka tih chuan, "Naktukah ka lo nei ang, kan kal nghal dawn nia," a ti a, keiin a tuk leh lama kal ka rawt ve thung, chawlh ka lak theih loh pawhin ban mai ka rilruk a, Zohera erawh ka hrilh duh lem lo.

Ka nuin min lo call leh a, ka rei ta deuh bawk nen haw ka rilruk a, Zohera chu chaw eitur leh rilru ti hah lo turin ka chah ve mawlh mawlh a, ka haw tur chu pawn kawngpui thlengin min lo zui chhuak a, ka kal hma chuan pawisa a neih theih dan tur chu ka zawt leh te te bawk. "Pawisa chu buaina a awm lo ang," ti maiin min chhang a, a chhungte bulah chuan Veroi bungrua kan lak tur thu hrilh mai turin ka ti a, a aw leh thlap hnuah ka hawsan a.

In ka thlen chuan ka nu chu a lo buai khawp mai. "Ar lak ka ngai a, eirawng lo bawl rawh," tiin a chhuak nghal a, inthlak tura pindan ka luh hnu lawkah Bawiha a lo lut a, ka kalna chanchin min lo zawt a. "Mr.Know chu i hmu em, engtin nge a lo chhan che?" tih angreng a ni.

"A hmel ka hmu lo, hriat belh vak pawh an la nei bik lo," ti maiin ka chhang a.

"An hrechhuak thei dawnin a hria em, rinhlelh tal a nei tawh ang chu?" a tih chuan, "I ngaih ang em em a thil hre thei chu a ni bik lo aniang, pa thinchhia leh nelawm loh deuh mai a nia, keini ang thoin engmah a hre lo," ka ti leh mai a, "Ka van hmu ve chak e, zawh chhuah dan i thiam lo aniang," a la ti cheu a, ka chhang zui tawh lo thung.

Zanriah kan ei tlai deuh a, kan inpeih fel hnua Zohera ka va biak chuan pawisa a neih tawh thu min lo hrilh a, "Engzah nge i neih, pawisa hmanga dawp ngai te pawh an awm maithei ania," ka tih lah chuan, "Ka nei ṭeuh," a ti mai si a, a pawisa faia lo nei turin ka hrilh leh a, min hnial bik lo. Kan tum dan chuan chawhnu lamah kan chhuak anga, zanah kan thleng tawk vel anga, cham a ngaih leh kan cham ang tih bak chu ruahmanna han siam theih vak a awm rih lo.

Ka muhil mang meuh lo, zingkar hma deuhah ka tho a, ka nu bulah chuan Zohera nen kan zin dun lawk tur thu chu ka hrilh a, a chhan min zawt chik viau nain sawi vek chu ṭhain ka hre lo a, Veroi boral hnu phei kha chuan hlauhthawn a pui a ngah a, zana mahnia dawr kal te hi a phal tawh lo a, Veroi thih chhan ka ngaihven dan a hria anih chuan min khap mai ka ring a ni.

"A bungrua kan han ngaihven ang, a chhungte an kal hman si lo a, u Manuni'n han la mai turin min ti a," tiin ka nu chu ka hrilh a, "Zohera nen anih chuan a pawi loh chu, i ni i dil tawh reng reng em?" a tih chuan, "Chawhma ka va kal anga, ka dil nghal mai ang," ka ti leh a, ka kal chhuah hmain ka insiam lawk diam bawk.

Kan buai ni tak a ni a, dawr ka thlen tirh aṭangin min lo tir kual char char a, ka phone pawh ka en hman meuh lo. Ka ni ka han dil lah chu a lo remti lo khawp mai a, ka tilui ve tlat thung. Ka hlawh khawlsa ka dil pawh chuan, "Thla tawpah law law," a ti deuh tlat a, "Ka mamawh lutuk a sin, a zahve tal min pe la," ka ti ve ta zel a, "In cham rei nang," tiin 2000 chauh min pe phal a, ka lawm lo ru khawp mai. 

Ka kalsawn hnuah a pasal bulah min lo rel zui kher a, "Mi dang chhawr daih ka duh, chhungte inchhawr hi chu a hahthlak tlat, thu a awih ṭha duh si lo, a duh duh hunah a kal chhuak bawk a, a nu hnena sawi leh a ngai a ni," a lo ti leh pek a, ka thawhpuiten min hrilh laichuan ka nui mai mai a, engmah sawi tawh loin ka chhuahsan zui a.

Phone ka en chuan u Manuni missed call pathum lai a lo awm. Ka call let vat a, "Phone i chhang har lutuka, Zohera ka call ta mai anih kha, Matei phone kha an en zo tawh aniang Police lamin an lo call a, Zohera'n a va lam tawh ang," a rawn ti a, chanchin dang sawi an nei em ka zawh chuan an neih loh thu a sawi a, Zohera'n phone a kawl chuan a ṭha maiin ka hria, kan mamawh ngei pawh ka ring.

Zoa chu ka call zui a, thlana a awm thu a lo sawi a, phone chu a la lam lo anih ka ring. "Ka lo kal ve dawn nge, hna aṭangin ka rawn let mek asin," ka tih chuan, "I duh leh rawn tlawh ve lawk la, heta ṭangin kan kal thei alawm," a lo ti sam et a, a rui aw deuhin ka hria.

Ka taxi driver hnenah chuan ina ka bungrua lak ka ngaih thu leh thlan lama ka hman leh nghal tur thu ka hrilh a, fare lah chu a han to khawp a, ka pawisa neih chhun chuan min daih rei dawn lo hlein ka hria. In ka va thlen chuan tumah an awm lo, ka bag ka laa, taxi chuan Veroi te veng thlanmual lam ka pan leh a, ka va thlen chuan Zoa motor pawh a lo ding a, sana chuan dar 1 a lo kawk va tawh.

Ka bag chu motor bulah chuan dahin Veroi thlan lam chu ka pan thla a, hla deuh aṭang chuan Zohera ṭhu chu ka zuk hmu nghal bawk a, pangpar a kensak anih hmel. Ka thawm a hre miah lo aniang min hmuh rual chuan phawk fein min lo melh a, ṭhutna min lo kawhmuh thuai bawk. 

"Beer i lo in pui elo?" ka tih chuan, "A in ve duh ngai lo, ka in chuan min hau ziah," tiin a nui suk suk a, a pangpar dah chu ka va thlek a, Rose par senno buk ṭha zet mai a ni.

"A va mawi ve," ka tih chuan, "Thil dang mamawh a nei tawh bawk si lo a," zawi ruih hian a ti a, chhan dan pawh ka thiam lo.

"U Manuni'n phone a lam theih thu a lo sawi a," ka tih chuan a jacket a zen a, phone chu a rawn phawrh nghal a, "En hmasa rawh," tih paha min rawn pek chuan ka la rang khawp mai. A wallpaper-a Veroi thlalak chu ka en vawng vawng a, a hmel ṭhain a ngaihawm tak zet, a nui hmel te, a mitmeng te, a aw rite pawh ka bengah a la cham reng.

Chutih laichuan Zohera chu thlan bulah a va ṭhu hnai a, chhangtu awm lo chu a titipui mawlh mawlh a, min hnungchhawn zawnga a ṭhut vangin ka lo en ve reng a, a insum nasa hlein ka hria. "Nangmah vang hian kan nun phung hi a buai zo anih hi, Jenusi hian a ngai che a, keichuan pawi ka ti em em thung...ka inchhir takzet," a tih laia a aw te chuan hnuk a ti ulh ve ṭun mai.

"Vero, i awm lo chu sawi tur kan hre lo, i chhirna leh tawrhpuina bak a leng lo a ni ber, i u pawhin 'Lo inhau lo ila,' a ti ve vawng vawng mai a, kan vai hian kan inchhir a ni, heti maia kan inmangṭha hi kan ring lo a, kan tana i hlutzia hi i hre ve em ang chu, i tel lo chuan engmah hi pangngai a awm tawh lo, nangmah vanga nung ve chauh hi ka lo ni em mawni zawk le..?" a ti bul bul a, a khat tawkin a beer ken lai chu a lem leh ṭhin bawk.

"Mite chuan engtin pawh lo sawi che sela, keichuan ka ngaihdan che a danglam ve lo ang, ka tan chuan khawvela hmeichhe thianghlim ber i ni, chu chu hre reng ang che..." mittui ka lo hruk mawlh mawlh laichuan a rawn hawi a, "Rawn thlah ve rawh, kan thil tihtum te pawh kha hrilh ve la," tawitea min nuih pahin a rawn ti a, sawi ve vak tur pawh ka hre lo. Chuti chung chuan a bulah ka va ṭhu hnai a, "Mamte,..." ka ti a, ka aw a lawi nghal der mai.

Zohera chuan ka hnungah a rawn beng thek thek a, "I Mamtei nen hian i thih chhan hi hriat kan tum ang, kan thlahthlam miah lo ang che," a lo ti a, kei ka lo bu ve sawk sawk.

A thil in lai chu thlanglamah a vawm thla rawk a, "Motor-ah mut a chhuak palh ang," tih pahin a rawn ṭhurem a, "Phone chu en ila," a ti zui leh zat a, ka pek chuan wallpaper ami chu a en kán thei bik lo, a bih ngar ngar a, a kutzungpui chuan a tuai a tuai a, dawhthei takin ka lo nghak ve bawk.

A hmeh sawn hnu chuan whatsapp kan en hmasa ber a, "Thil delete hi a thatchhe ve a," a tih chuan ka lo nui hak a, Zohera chat chu a lo pin vang a, a ṭhiante leh a naute nena an inbiakna bakah number hrang hrang a tam khawp mai. Kan inbiakna pawh kan en thuak a, a thawhpuite awm ang kan zawn avangin kan en thuak thuak a ni ber. Zoa'n a tuai thlak thuak thuak laichuan, "Headmaster tih kha en lawk teh," ka lo ti vut a, "Putar kha a ni lawm ni," tih pah chuan a tuai let leh a, chat kan han en chu an lo inbe zing viau aniang message a tlar thla dul a, video call leh call-a inbiaknate pawh a awm nual mai.

"An inbe nasa hle mai a," a tih chuan ka chhang lo, message chu a chhiar a, keipawn hnai deuhah ka va bih pui a. Mahse le, tam pawh kan chhiar hmain thil awmdan chu a chiang kuar kuar tawh, kan hamhaih a, kan hrilhhaiin, sawi tur pawh kan hre lo, zawhna inzawh kan hlau aniang kan ngawidun tlawk tlawk mai a, thil tisual ta ang maiin Zohera lakah chuan ka inthlahrung bawk.

"Zoa..." ka han ti chiah chu, "A tawk e," a lo ti bawl a, phone chu ka kutah a rawn hmet bet chawt chawt a, min thawhsanin kawng lam a pan nal nal mai.

"Lo ding teh," tih leh um ka rual a, chutah rawn inher thutin a rawn pen thla leh hlawk hlawk a, min rawn kalpel vut. Ka enlai reng chuan thlana a pangpar dah kha a la lawk a, leiah a vaw ṭil hmiah hmiah mai a, bengdaih dan ka hre lo, a chungril so bulh bulh chu a hmel leh chetziaah a lang chiang em a ni, bengdaih aichuan inhrikthlakna tur a mamawh.

A lo let leh chuan, "Kan haw ang," tih zawng sawiin min kalpel leh a, a kal chak bawk a kawng ka han thlen chuan car chhungah a lo ṭhu fel der tawh. Ka bag chu ngawirengin ka hlang a, a bula ka ṭhut luh laipawh chuan engmah a sawi lo. "Kan haw ringawt dawn amaw?" tiin ka zawt leh hram a, a lo nui hawk. A hmel chu hmuh pawh ka chak lo, pawn lam ka melh ngar a, "A thih chhan pawh hriat i duh tawh lo tihna maw?" tiin ka zawt leh kher a.

"I hmuh ve vek kha, min phatsana, kha putar kha a ngaizawng asin, keiin inneihpuia ka sawm laikhan, zan tlaiah kha putar kha a hmu fo a ni lawm ni?" a ti a, thinchhe zet hian steering a chum a, "Vawikhat pawh ka la mutpui loh laiin kha putar khan nawmchen nan a hmang anih hrep kha," a rawn ti leh sak, mit chhing chungin lehlam ka la hawi ngar ngar a, ka taksa ṭang nasa lutuk chu ka insum luat vang a ni.

"A thih chhan chu ka tan eng nge a pawimawhna, tinge min zawh a, ka rilru a na asin, min thihsan hi nge min phatsanna hi na zawk i hre duh em?" a ṭap tih ka hai lo, keipawh ka ṭap a, kan ṭap ri erawh inhriattir kan duh lo ve ve lawi a, hetiang tur hi a ni lo asin maw le.

"Min chhang teh, i ṭhiannu tan khan eng nge inhuam loh ka neih, min en hrang bik lo la, i ṭhian angin ka rilru tur hi han ngaihtuah ve teh, a duh apiang ka leisak a, a awh hlek tawh chu ka leisak ziah a, a tan ui ka neih lohzia pawh i hriat kha, nuamsa takin ka awmtir thei a, a damchhunga enkawl a, a chhungte pawh enkawlsak ka duh, engati nge, min hrilh ta che, kha putarin a pek ang kha ka pe thei loin a ring em ni, pawisa a mamawh anih chuan engah nge min hrilh mai loh?" ka darah a rawn nam dawt a, ka inher laichuan mittui tla phungin min lo en a, a inpetruh ṭun bawk.

"Ka hre bik lo, amah chiahin a hria alawm,"  ka ti tham ṭuak a, "Anih chuan a bulah kal a, ka zawh a ngai anih chu," a ti chang leh rap a, hetiang rilru a put hi alawm ka duh loh leh ka hlauh em em chu ni.

"Intihhlum kha vawikhatmah ngaihtuah tawh suh, Veroi chu a thi tawh, a phatsan che anih pawhin a duhthlan a ni a, a tawp dan i hmu a, nun nuamin a awm bik lo tih i hriat tawh hi. Ka ṭhian i nih angin ka hrilh ang che, tunah chuan nangmah chiah inngaihtuah la, i bialnu thihna hi i tan tawrhna tur a awm lo, phatsantu che angin hria la, i duh chuan hua la, sun pawh sun duh tawh suh, inthiam lohna nei tawh lo la, tunah chuan hei dem tur i neih tawh hi..." ka ti bawrh bawrh a, ka aw te chu a sehchilh lek lek. 

Ka thilsawi chu a beisei ang a ni bik lo aniang min en tlawk tlawk a, a lung a dam bik lo tih ka hria. "Ka sun tawh lo anga maw?" a tih chuan ka bu nghat nghat a, ka mittui a luang zung zung lawi a, "Ka tan nge a tan zawk i tih?" a tih chuan chhanna ka nei lo.

"A lam i ṭang reng ṭhin alawm," a tih laia min demna awka chu hriat a nuam lo takzet.

"I tan leh a tan, nangpawh ka ṭhian i nia lawm, in pahnih chungah hian pawi ka ti ngawih ngawih, Sangpuia pawh khan pawi a ti ngawt ang," ṭah aw ṭeuh chungin ka ti a, vawiin hian awm ve sela chuan kei aiin sawi tur a hre zawk anga, eng nge kan mamawh pawh min hrilh thei ang maw le, a tih ziah dan khan, kei lah hian a ai ka awh zo hlawl si lo.

"I hrethiam lo anih kha Jenus, Veroi tan khan tu pawh ni mahila keichuan ka thinlung zawng zawngin ka hmangaih a, min phatsan leh min thihsan hi ka tan chuan nat lehzualna chauh anih hi, amah chauh ka sun lo, amah ka hriatrengna hi ka sun tel asin, hetianga hriatreng hi ka duh lo a ni," pawn lam a hawi tlat a, tih ngaihna ka hriat loh vangin a darah ka va chul leh ringawt ṭhin.

Rei deuh inbe loa kan ṭhut hnuah kan haw a, kan kawta ka chhuk dawn pawh chuan engmah a sawi lo, ka han ngaichang deuh a, a ngawi ngul mai bawk si a, he thil hi chu keimaha ka tih mai a ngai dawnin ka hria. "Min mamawhna i neih chuan min lo call mai dawn nia," tia ka hrilh hnuah ka kalsan a, ani pawh a tlanchhuak rang khawp mai.

Ka chhungte chuan ka kal leh lo chu a chhan min zawt a, "Zohera a hman leh lo thut a," tiin ka chhang a. Zanriah eikham hlim aṭangin Veroi phone chu ka en kual a, u Manuni bulah kawl rih ka va dil bawk a, "Ka pa phone hi a ṭha tawh lo lutuka, a hmanah kan duh viau a; mahse, kawl rih mai rawh, i hman zawhah i lo dah dawn nia," a lo ti a, ka kawl rei loh tur thu ka hrilh ve bawk.

Message aṭanga a landanah chuan tlai an office banah leh zanah an inhmu ṭhin tih a chiang a, Veroi inah anih hmel viau bawk. A thawhpui Mathani tih hmingpuin a rinhlelh thu te an sawi a, fimkhur tura an intih thu te a ni nawk a, a tam zawk chu Veroi'n pawisa a dilna ni hlawm a, Headmaster chuan a pawisa faiin a pe ṭhin a nih hmel, a inah kala a pek tur thu a sawi tlangpui a, Veroi chu a ngaihsakin a duat hmel viau bawk.

An awmdan chu thil danga han zeldin dan pawh ka thiam ta meuh lo, hetiang anih takah chuan anni pahnih inkar dah ṭhaa an thih chhan zawk hi hriat a ngai tih chu ka rilru a ni. Veroi lam chu a felfai a, hetiang thila rinhlelh tur hnai ber a chhungte leh a bialpa an fihlim a, chuti anih chuan Headmaster lam aṭanga buaina awm thei ngaihven a ṭul ang, an thih chhan pawh hi he putar hi a nih ngei ka ring.

Ni hnih chhung hnaah ka kal lo a, inah awmin ngaihtuahna ka kawm a ni ber. Zohera lah chu a reh hmiah mai a, call ka tum ṭhin a, biak ka duh viau laiin sawi tur hlawl ka hre lo. Veroi hna thawhnaa kal chu ka la duh fan a, ka rilru a inkhap buai ṭhin khawp mai. Police lam lahin chanchin thar an nei lo a, u Manuni te chhung pawhin beisei an nei sang bik lo.

Mahse, nikhat chu dawra ka awm laiin u Manuni'n min lo call a, police-in Veroi in an enfiahnaah thil hmuh an nei a ni awm e. Veroi chuan ruihhlo chikhat a lo zu ṭhin a, a inah putara kawr te pawh an hmu a, an inngaizawng ngei tih fiahna a awm thu te a rawn sawi a, ka hriat loh thuthar engmah a awm lo thung. Mahse, u Manuni thilsawi chu mak ka ti deuh a, putara chhungte chuan, "Kan mualpho zual mai mai dawn a, a nupui leh faten hrehawm an ti bawk si a," tiin case tih tawp mai an duh a ni awm e.

"Police lamin an remti em ni?" tia ka zawh chuan, "Tualthahna ania, an chhui zel ang, keini chuan misual hi man ngei kan duh alawm," tiin min chhang a, kan inbiak hnu hian Veroi phone pawh ka va dah let a, an rilru a nat tam loh nan Putara nena an inbiakna erawh ka delete sak thung. Urlawk zanah Zohera nen leng turin min sawm a, Zohera pawh u Manuni chuan a va bia a ni awm e. 

Mahse, urlawk zana ka va kal chuan Zohera hmel hmuh tur a awm lo a, ar te kan puiin dar 10 thleng chu ka leng ve a, Bawiha'n min lo lam avangin ka hawsan hma a, Christmas vuak vet chhung chu inah ka tawm chawrh chawrh reng. Ngaihtuahna ka sen nasat luatah ka muhil thei lo a, chaw pawh ka ei hleithei meuh lo. Ka nu chuan mi a ngaihtuah khawp a, Sangpuia ka sun vangah a la ngai bawk a, min duatin min ngaihsak thar hle bawk.

Ka pa nen rem an lo ruat a, "Eng emaw zir leh rawh, anih loh pawhin ram dangah te inhlawh turin kal chhuak la, boruak dang va hip la a ṭha ang," tiin thu min rawn a, eng thil mah hian min ti phur lo a, han tih chak leh kal chakna pawh ka nei chuang lo, tih duh pakhat chiah ka nei a, chu chu Veroi awmna khuaa han kal a, thil hriatbelh tur emaw, ngaihṭhat loh zualna tur han zawn a ni. 

Mr.Know-a ka va be leh ta ngawt a, case dang an lo nei a ni awm e. An ngaihthah ringawt dawna ka hriat vangin a chenna hmunah ka va kal a, hrilhlawk loa kal ka ni bawk a, an inring lo lai ka va phawk a ni ber. Mi pa pathum hi an lo awm a, amah mr.Know a ber lah chuan mi a lo lawm lo khawp mai a, "Police kutah a awm tawh, khawih tawh lo turin min ti a, keini chuan thil dang kan buaipui tawh," a lo ti hluk hluk a, tun hnai maiah khan adventure club pakhatah tualthahna a thleng a, chu case chu an la anih hmel.

"Headmaster te khaw lamah khan hriat belh in nei em ka hre duh a?" ka tih pawh chuan, "Kan hriat ang chu police ten an hre vek," a lo ti leh hlur a, "Police chuan inngaizawng angin an ngai a, ka ring ve reng reng lo," ka ti chu min melh rum khawp mai.

Min sawm lo chungin ka ṭhu lui ve tlat a, mi pakhat awm ve chuan min khawngaih aniang, "I tan a pawimawh viau a ni maw, a tir aṭang khan i phi buai riau mai," dam thluam hian a ti a, ka ṭhian ṭha ber a nih thu ka lo hrilh a, an hriat tawh tho chu ka ring.

"Veroi khan bialpa nghet a nei a, tlangval hmelṭha leh amah duat em em tu a nia,  inneih pawh an tum a, a mipa lam hi mi awmthei tak chhungkua an ni bawk. Putar kha pawisa vanga kawp niin a lang a, chu lai tak chu ka hrethiam lo, a bialpa hi a hausa a, putar khan a chak lohna eng emaw a hria anih ngawt loh chuan a bialpa a phatsan duh hi thil mak ve deuh ania, chhan eng emaw tak a awm ka ring, an thih danah hian Veroi lam a nih loh hmel bawk a, an inkar chu engpawh lo nisela, putara lam aṭanga pawikhawihna anih ka ring bawk," ka ti dap dap a, mr.Know-a ṭhianpa chuan min en chik khawp mai.

"Hmeichhia hi chuan thil hi an zeldin nasa thei ania," lo ti zauh tu chu kan melh ṭhap a, "Kawngkhar bulah lo va ding rawh," mr.Know-an a tih chuan, "Engati maw?" a lo ti let hu a.

"He nu pawn min zawn chhuah theih chuan mi dang pawh an lo kal thei, inven kan ngai," mr.Knowa bawk chuan a ti leh a, chupa pawh chu a tho vut a, a kal chhuah hnuah ka hmaa ṭhute pahnih chu an inen a, pakhat zawk chuan a mitmei hmangin a hau a, pakhat zawk chu a lungawi vak lo.

"File kha han la teh, he nu hian a buaipui thei ang," pakhatin a tih chuan mr.Know-a chu a lawm loh hmel khawp mai a, "Hmeichhia a nih hi, engmah a hre tak tak lo, ka kutah dah rawh ka tih kha," a lo ti hluk hluk a, "Tih tur dang i nei alawm," pakhat chuan a ti mai a, min rawn melh rum leh zet hnuah mr.Knowa chu a tho a, an awmdan han en chuan ka hmaa ṭhu mek chu thuneitu ber a ang a, mr.Knowa hi a thu ber lo em mawni ka ti rilru neuh neuh.

"Sawi ṭan rawh le, i ṭhiannu khan pawngsual tawk angin a inhria i ti a tiraw?" a rawn tih chuan a kal hmasaka ka thil sawi kha a lo hria anih hmel viau mai.

"Aw, an school hoin thing an phun ṭumin a nia, a lu a hai thut a, motor-ah a mu a, a harh leh chuan damdawiinah a awm tawh," a lo bu nghat nghat a, "Tu nge va hmu?" tiin min zawt leh a.

"A hriat ngai a ni lo, hnathawk pakhat a nia, chupa chuan motor kawngkhar a inhawng a ti bawk a, ka ṭhiannu kha chuan a khar a inti thung a," 

"Chupa chu i ringhlel em?"

"Rinhlelhawm ber ania lawm, a thawhpuite pawh an rinhlelhawm tho,"

"Ni e, a bula awm hnai zawng zawng chu rinhlelh tur vek an ni; mahse, a chang hi chuan rinhlelhawm loh ber te hi pawi khawihtu an ni ve leh ṭhin bawk a," a ti a, a nui deuhin ka hria, mask a vuah tlat a, mr.Knowa aichuan a ṭawngkam a nelawm thung a, a aw chu ka hriat hnu a ang viau bawk.

"Veroi awmna khuah khan han chhui ula thil a chiang hma zawkin ka ring," ka tih chuan, "Kal i tum a ni lawm ni?" a lo ti khauh a, engtin nge kal ka tum tih a hriat ni?

"Engtin nge i hriat?"

"I beidawng mai dawn lo tih ka hria alawm, khi khuaah khian chhanna i hmuh i inring bawk a," a ti leh mai a.

"I ring ve em?" ka tih chuan, "Ring e," tih zawngin min chhang leh a, "Anih chuan engati nge in chhui chian loh?" ka ti tawl a, min rawn en phawk deuh.

"Nangmah hi mr.Know-a i ni tih ka hre tawh," ka tih chuan a nui huk a, "Engati maw?" tiin min zawt a. 

"Mr.Know chu thil chhui thiam tak an tia, pakhat kha chu a dawhthei loin a thin a ram a, thil sawi a ngaithla ṭha duh lo hle bawk. Nang chuan min chik a, ka thilsawi apiang hi i ngaihtuah zui tih ka hre thei, thil chhui thiam chu nangmah hi i ni tih a chiang," a mitah tak en chunga ka tih chuan a nui kur kur mai.

"Anih pawna chhuak ta kha tu nge ni ve?" a tih chuan, "I ṭhian tu emaw, i hna chungchang hre ve tura i duh lo aniang, bum awl deuh leh mi fel deuh a nih loh chuan mi kamtam deuh pawh aniang chu," ka ti a, a nui leh hawk hawk a, chutih laiin mr.Knowa pakhat zawk kha thil keng chungin a lo chhuk thla a, ka hmaa ṭhu chu a rawn en phawk khawp mai a, kei erawh min la melh tur viau thung.

Ka hmaa ṭhu chuan, "He pa hi han en vang vang la, eng vanga thinchhia leh dawh thei lo em em nge a nih i rin le?" tiin min zawt teh daih a, pakhat chu a lawm vak lo. "Ṭawng tam suh," a lo ti hluk a, a file ken lai chu a ṭhu zawk hnenah chuan a pe zui a, a ṭhut ve hnu chuan ka va melh vang vang a, ka hmaa ṭhu chuan, "Ngun deuh khan ngaihtuah la, a mizia i hmuh dan min han hrilh teh?" a lo ti leh a, sawi phawng phawng turin min duh anih hmel.

"Mi ngaihsakna dawng tam lo leh ngaihven duh ṭhin tak, tette aṭanga khawharna nei ṭhin a nih ka ring," 

"Eng nge i rin chhan?" ka hmaa ṭhu bawk a ni.

"Hetiang ho hian mi ngaihven an duh em em laiin an inveng ran a, nat an hlauh vangin miin an ngainat loh nan sual an chhuah ṭhin. Chuan, a ngaisang maithei che," ka mi sawi pa chu a lo thaw hawk a, pakhat erawh a nuih a za viau.

"Engvangin maw ka ngaihsan anga, vawikhatmah he pa hi ka la ngaisang ngai lo," a lo ti pawr hlur a. "Dawt i sawi thiam lo em mai," pakhatin a lo ti zauh chu, "Ve ringawta che, nep viau lo la ka puihna i mamawh lo ang," a ti leh hluk a, pakhat chu a nui mai mai thung.

"Dawt i sawi thiam hle mai," ka lo ti ve chu min rawn melh rum nasa leh tawh mai. 

"Ni mai rawh se, dawt sawi thiam lo nih kha a duh lo em mai," ka hmaa ṭhu chuan a lo ti leh a, a nui kur kur reng a, a ṭhianpa erawh a mithmul a pir danah a lungawi lo tih a hriat reng.

"Engvangin maw ka ngaihsan ang?" a rawn tih chuan, "A lakah i dawhthei bik a, i duh loh zawng pawh a sawi anih chuan vawihnih tal i ngaihtuah ṭhin ka ring," pehhel deuhin ka ti a, tlang deuha sawi aichuan a ṭhat zawk ka ring.

"A ni em ni?" ka hmaa ṭhuin a tih chuan, "Ni lo," a lo ti bawl a, pakhat chuan a chhang zui lem lo, a file ken lai chu a keu a, ka lo en chik ve viau bawk.

"Hei, Naui.." a lam ka hawi vat a, "Hepa hi ka ngaisang hlek lo ania," a lo ti leh a, a la na deuh aniang.

"I ngaihsan loh chuan i ngaina aniang?" ka ti ve mai a, chu pawh chu a lo la duh chuang lo, "Ka ngaina awzawng lo, ka mi ngaihtheih loh ber chi alawm a nih le?" a bula ṭhu melh pah chuan a ti a. "Kei lo ṭhian i neih loh kha, i ṭhian neih chhun sawi chhe suh," ka hmaa ṭhu zawk chuan a lo tihsan a. Mize inang lo tak inkawm hi ka hmu ṭhin, mize inang tak inkawm te aiin an inmamawhna a sang a, an inṭhian ṭhatna a thuk viau ṭhin bawk.

Chutih laichuan pawna awm kha a rawn lut a, "Ka thingpui ka keng hleinem," tih pahin dawhkana thingpui chu a rawn ban a, file chu a rawn thlek pah dek dek a, "Ba min lo ṭhing elo?" a rawn ti heu mai.

"Maw..?" phawk fea ka lo tih chuan, "Account-ah kan thun mai zel alawm, tinge maw hetia in rawn tih fo le," a ti pawr hlur a, mr.Knowa pakhat zawk khan, "Mi an lo lut ange, va kal leh vat rawh," a lo ti ve zat a, an inmelh no vak lo. Thingpui kengtu pa chuan ka hmaa ṭhu hnenah chuan, "Thla tawpah ka pe mai ang, pawisa ka la dah lut hleinem," a ti a. "Order ka la alawm," tiin pakhat chuan a chhang a, thingpui kengtu pawh chu a kalsawn ve mai bawk a, an hmai an tuam kher chu ka hrethiam lo, hmu pawh ni ila eng nge maw ka tih vak chuan ang le!?

Lehkha pakhat hi min rawn pe a, "Farm pakhat chungchang ka ziahna nia, i ngaihven dawn nia, a bikin an wine siam leh an thlai chinte chik deuh a fuh ang, hnathawk mize mak deuh deuh an ngah a, nang pawh an chhawr duh maithei che," a tih chuan ka hrethiam zan lo.

"Veroi case nen eng nge a inzawmna?" ka tih chuan, "I hmuh hunah i hre mai ang, wine i ngaihven a ni lawmni?" a ti leh a, anih chuan kha magic wine kha he farm siam hi tihna em ni ang?

"An hnenah ka thawk anga maw?"

"Mikhual an lawm vak lo, zui kual reng i duh loh chuan awmchilh tawp mai rawh,"

"Hna ka han dil tawp dawn em ni?"

"Ka hre nang, tihdan i dap ve tawh mai ang chu," a ti sam et a, ngaihtuahna a buai duh khawp mai. "Hnathawk ho an tham theih mai ang," pakhat zawkin a lo tih chuan, "Nula hmelṭha deuh tan chuan tham ngai loin tihdan a awm ang?" ka hmaa ṭhu chuan a ti leh a, a lehkha min pek ka en chuan milem leh eng eng emaw hi a inthai nuai a, kawng lem ang tak tak te a awm a, hriatthiam a har angreng.

"Hriatthiam a va har ve" ka tih laiin, "Amah pawh hian a hrethiam tak tak lo," pakhat chuan a lo ti zauh a, ka hmaa ṭhu erawh a ngawi reng. Ka va en takah chuan, "A chung lam aṭang khan en rawh, a inkungkaih kual dan leh rinhlelhawm ho ka dah lan kha," a ti a, Veroi lem niawm tak zawnah chuan milem pathum a awm a, ex a inthai diat diat bawk a, putara zawnah chuan ex pakhat chiah a awm thung.

"Lehlama ex hi tunge?" ka tih chuan, "A fanu," a ti mai a, "Ex a va tlem ve," ka tih leh chuan, "I thai ve mai dawn nia," tiin min chhang a.

"Phur lutuk suh aw, lu i sun a, i rilruah thildang a awm miah lo, i pawlawh phah hlauh ange, i awmchilh dawn anih chuan hmanhmawh lo la, i duh dan taka a tawp theih hunah min lo be dawn nia," tih pahin a rawn tho a, lehkha them lian vak lo hi min rawn pe zui a, ka han en chuan varak lem hi a lo awm a, wine bottle ami anih thu a sawi bawk.

"I ring nghal mai hi a mak ka ti deuh riau, thil tum dang i nei a ni lo maw?" pakhat zawkin a lo tih chuan ka rilrua zawhna awm ve tho a ni, a chhanna beisei zetin ka en nghal a, ani pawhin min lo en ve reng a.

"Ruang kan va hmuh zan khan kan inhmuh tawh kha," a ti ta chiah a, ka ring sual lo, hepa ngei hi a ni Mr.Know-a chu.

"I thil sawi kha ka la hria, Veroi kha a thi hnuhnung zawk i ti a, mi zawng zawngin hmeichhe inzuar emaw an tih laiin nang chuan, 'A ni lo ang,' i ti bawk a, khami hnu aṭang khan vawikhatmah ka la ringhlel leh lo," a mitah tak en chunga ka tih chuan a bu ve zauh a, "Min ring hle mai," a ti chu a fiam thu nge ka hre lo.

"Ring e, chuvang ania ka lo kal,"

"Kei chuan ka ringhlel che a, rei vak lo chu ka en thla che," a tih laia a mit ka en chuan a nui tih ka hre thei.

"Anih min ring tawh em ni a?" ka tih chuan, "Ni hmiang, inrawlh i tum tho si a," tiin dar a kan ak a, chutih laiin pakhat zawk chu a lo inrawlh a, "Hmeichhia te han rin, ṭah bak an thiam em mawni," a lo ti kher a, ka chhang lo nain ka helh ru khawp mai. 

"Kal tawh mai rawh," mr.Knowa'n a tih vang chuan ka tho zui a, kawngkhar ka thlen dawn chuan min lo ko leh a, "Duhawm," tih ngatin min lo, ka hmingpum a hria a, min lo hrechiang hle tawh a nih hmel.

"Police hoin inrawlh lo turin min ti a; mahse, ral aṭang chuan ka pui thei maithei che, a theih chuan.." a rawn ti a, "Ka lo bia ang che, i number ka nei alawm," ka tih laiin, "Ka number zawk anih kha i neih," pakhat chuan a lo ti hluk a.

"Buaina i tawh chuan ani hi i hrilh dawn nia, a lo pui ang che," ti tu chu mr.Know-a dik tak zawk a ni. "Aw le," ka tih mai laiin, "Hmeichhia nena hetiang buaipui ka peih lo, a atthlak em mai a," pakhat chuan a lo ti leh hmuk a, mi sual ve tak chu a nih dawn hi ka ti rilru a, chhang loin ka chhuak zui bawk.

Veranda-a ka chhuak chu an ṭhianpa pakhat kha a lo la ding a, zial a lo zu khu luai luai a, ka kal phei chu min en chik viau nain min be lem lo a, keipawn ka kalpel ve mai bawk. Ka pel fel deuh chiah chu a inher leh vut a, phawk lek leka min lo en chu ka ner khum sak a, a hrethiam lo tih a hmelah a lang reng.

"An thil pawimawh an sawi apiangin pawnah an tir chhuak ṭhin che a ni maw, a tu zawk sawn nge ngaithei lo che a," ka ti a, min chhan hmain ka inher a, ka kal nal nal bawk. Thui pawh ka kal hmaa ka va lehhawi leh chuan hmanhmawh deuha in chhunga a lut lai chu ka va hmu a, an inhauh buai ngei ka beisei.

Zan dar 9 a pel awrh a, Zohera chuan call a chhang leh thei tawh lo. Message ka hnutchhiah a, "Khuaah khan ka han kal dawn a, i duh chuan min lo zui ve dawn nia," tih hi ka thawn a, a hnu darkar khat velah chuan a en a, min chhang let lo thung a, a rilru a kir laklawh anih ka ring, kei angin a chhan hriat kher pawh ṭul a ti tawh lo a ni ang.

Mamawhna ka ngah khawp mai a, he thila inrawlh ve tura ka duh bakah a pawisa ka mamawh a, va dil ngawt chu dikin ka hre bawk si lo. Puk ka dil mai dawn em mawni tiin ka ngaihtuah a, ani inla hrang chung chung va tihbuai chu dikin ka hre leh lo a, ruahmanna dang ka siam ta bawk.

A tuk tlaia Veroi te ina ka va kal chuan a pa leh u Muanpuii an lo awm a, "Zin chhuak thei in awm si lo a, Veroi bungrua chu ka han ngaihven ange, a theih theih ka ti ral bawk anga," tiin ka rawn a. "I hman chuan a tihzia khawp ang, a in luahna ten min lo tur nasa tawh a," an lo ti ve hlauh mai a, ka chhungte bulah erawh chhuanlam dang ka siam a ngai thung ang.

Ka nu bulah chuan ram danga hnathawk tura training nei tur angin ka insawi a, hostel-a awm a ngaih dawn thu ka hrilh bawk a, ahmain thu min lo rawn tawh bawka a lo phal khawp mai. Ka pa erawh chuan mi a ngaihtuah deuh a, "In aṭangin a tih theih loh em ni, mahnia tlafal chi pawh i ni lo asin," a ti nuah nuah a, "Mahniin ka awm dawn lo, awm ve dang an tam dawn alawm, ka hmelhriat te pawh an awm," ka ti a, eng lam nge min zawt chik khawp mai.

"Thla rei lote ka training anga, foreign-a damlo enkawl turin interview te ka nei ang, ram danga kal ka duh a, hetiang hian a awlsam ber," tiin ka hrilhfiah a, ka ni dawra thawk nula pakhat khan hetiang lam ti tur hian hna a bansan a, a hnen aṭanga ka hriat vek a ni. Ka chhungte lamah chuan buaina ka nei ta lo phawt a, pawisa bawk chu buaina a ni leh ta a, ka nu lahin min paitir tam thei si lo a, neih dan kawng ka hriat chhun chu ka ni hnenah ka hlawh khawl sa dil a ni. 

Zing dar 9 velah dawr ka va thleng phei a, an lo la inhawng lo nain an lo buai khawp mai. Ka ni chuan pawisa nawi a lo chhiar mawlh mawlh a, ka ban dawn thu ka va hrilh chu phawk fein min lo en a, "Engati nge, i nuin a hria em?" a ti he haw a.

"Aw, thil zir turin min tia, ram danga hnathawh ka tum," ka ti chu a han ngaihsan loh hmel khawp a, "Lehkha pawh i zir sang lo a, mi chhiahhlawha ṭan bak i thawh chi a awm nang, i awmna a fuh loh phei chuan a hrehawm dawn ania, rei lotea lo haw leh ka hre nual mai," a ti hmak hmak a, ka sawifiah peih loh vangin ka chhang zui duh lo.

"Thla thum hlawh ka la lak loh kha min pe la," ka han ti dek dek chu, "I pain pawisa min dil reng a, ka pe zo vek tawh zawk ang chu," a lo ti let hlar a, "Ka pain a dil che chu ka hlawh a ni lo ang," ka ti ve tlat a.

A phun a phun hnuah, "Kha," tiin 500 tlang pali hi min rawn pe a, "A va tlem ve, thla thum lai ka la tawh hleinem," ka tih pawh chuan, "I pa zawt mai rawh," tih zawngin min chhang a, thawh lawka ash tray-a vawm tak chu ka nap a, ka insum hram hram a ni.

Ka kal chhuak tur pawh chu, "Duh duh hunah pawisa min dil a, i nu sawn a khawl ru ṭeuhin a nia ka rin," min la tihkhum hlak hlak a, ka kal chhuak chu ka lungawi lo ngang mai.

In ka thlen hnuah ka thawmhnaw ka siam a, hralh tur chu ka zawng viau nain thil hlu ka neih chhun te chu Sangpuia min leisak te an ni hlawm a, ken pawh ka ken phal loh tur chi hlir a ni. Mahni ka infuih a, 'Pawisak i neih tlem poh leh thil chu a awlsam a ni mai' tih chu ka rilrua a thawhdan a ni. 

Darthlalang hmaah dingin ka inen vang vang a, ka bakcheh ken laichuan ka sam ka kawng chena sei chu ka han tin a, mawi ti em em tu kha a awm tawh lo a, ka landan chu engtihna mah a ni tawh lo ti chungin ka dar chenah ka tan hmawk a. Dawrah kalin sam dumna ka va lei a, mahniin ka inhnawih a, a kai rual viauin ka hria. Tun hma kha chuan ka sam rawng hi a uk emaw, a sen lam a ni reng ṭhin a, sam dum hi ka pu ngai meuh lo, heti hi chuan Sangpuia meuh pawhin danglam min tih ka ring a ni.

Zantirah ngawirengin ka chhuak a, taxi lain ka kal tumna lam chu ka pan vang vang a, ka va thlen chuan mi veivak an la tam a; mahse, tumah min ngaihven awm ang an awm lo. Dawr chhak lam kawmkar lama ventilation chu a kalhna an la siam ṭha lo tih hriat tak hian a lo kau sa a, chuta ṭang chuan lutin choka chhuatah ka ṭum thla a, phone light pawh hmang duh loin ka indap phei a, counter ka va thlen hnuah ka ti eng chauh a, pawn lama thawm ka hriat vangin rei dawn chu ka nghak a, shutter zawnah chuan mi an awmin ka hria, zu rui kawngkal nge ka hre lo.

An kalsawn hnua pawhdawh hawn mai ka tum chu an lo kalh tlat a, ni danga kalh ṭha ngai hlei lo chuan a lo kalh ve teh tlat a, ka thinrim chuan ka pawt ri bur bur tawh. A che lawih a, a kau deuh nain a sak phian a, a hlui deuh vangin vawi 6 naah ka pawt hawng thei ta hram a, pawisa pawh a lo awm nual mai. 500 note zawng chu ka la a, sing chuang lai chu ni mah se, ka hlawh zat pawh a la daih lo a, inthiam lohna pawh ka nei lem lo, chu a hnekin a dah tlem lutuk chu ka thinrim mah zawk a, engthil mah hi lungawina tur a awm lo a ni.

Chair dawhin ventilation aṭang bawk chuan chhuah ka tum a, chhung lam aṭanga han lawn lian chu a har fat mai a, perek nge thingther ka hre lo, ka kawr ban ka tai ṭet hawk mai a, ka ban chu a thip vawt vawt lehnghal a, ka han lawnliam lah chu ka tla thum dawp a, ka insawh hnang lo chauh mai. 

Ṭhen chak chak chunga ka tho chu pen hnih khat bak ka pen hman lo tihah ka hminga min lo ri ka hre ta mai a, min kohna lam ka zuk hawi chuan bike bula mipa khat lo ding chu ka zuk hmu a, "Eng nge i tih a?" tih leh rawn chhoh a rual a, Zoherliana a ni, engtin nge min rawn hmuh theih le?

"Thil tiru i va ang ve?" a tih laichuan a lo kal hnai viau tawh.

"Eng nge i rawn tih ve zawk a?" kan indinchilh zui a, min en chik viau mai bawk.

"Rawn hmuh che ka tum a, i chhuak hmanhmawh em a ka rawn zui che," a aw ri ah chuan a ngaih a ṭha lo tih ka hria, min rinhlelh hmel viau bawk.

"I lo thlenna a rei tawh em?" 

"Aw, i hnungah ka lo tlan alawm," a ti a, anih chuan ka thil tih pawh a hre ngei ang, pawna min lo nghah ngawt danah.

"Eng nge i ah kha?"

"Ka hlawh.." tih leh ka bag chu hnung lama ah ka rual a.

"Pawisa i mamawh chuan min hrilh ta che," a ti chu ka helh ve khawp mai, "Hre loa min zawt i va ang ve," ka ti ve ngat a, thawk a la hluai.

"Dah leh la ka pe dawn che nia," a tih chuan ka ner sak.

"Dah ka ngai lo, ka thla thum hlawh an ba a, min pe duh lo alawm, ka ruk mai loh nakah," tih leh kal ka rual a, "Lo ding teh," tiin min rawn zui ve nghal a, a bike bulah chuan dingin, "Min va thlah teh," amah pawh en hlei lo chuan ka ti a, a lawm loh hmel khawp mai.

"Min thlah dawn nge taxi ka la dawn?"

"I awmdan hi a ṭha lo khawp mai, i khua a har a, rilru lakpenna tur i duh ngawih ngawih tih ka hria ania, thildang ngaihtuah te tum ve zawk rawh,"

"Nangmah ang hian maw, eng nge ka tih ve anga?"

"Kan thih loh chuan kan dam a ngai i tia ni lawm ni, nangmah zawk hi anih hi damlo,"  thawk ka lo la ham ham a, he pa hian engtianga awm turin nge min beisei le?

"Ka damlo, nang chu i dam leh mai thei. Mahse, keichuan dam ka tum lo, ka ṭhianṭha ber thih chhan hi ka hria anih loh chuan thih emaw, dam ka tum lo, i duh chuan min zui la, i duh loh leh helaiah hian rui thlekawiin i thinrimnate kha lo hrithla rawh," ka tihsan hmiah a, kal mai ka tum chu min lo pawt let rang khawp mai.

"Buaina i tawk ang tih ka hlau alawm, tualthattu anih hi i buaipui hi, tu nge a nih pawh i hre si lo, i hriat hmain i thi mai tur asin, police kutah dah zawk rawh," a ti sawk sawk a, a kut chu ka lo thing thla sawk a, "Min zui dawn loh chuan ka rilru thlak tum duh suh," ka ti chang fak a.

"I ṭhian ka nih angin ka sawi anih chu, thil dang emaw te ti la, khawiah emaw te zin chhuak mai rawh, pawisa ka pe ang che, i sam te kha engati nge khatianga i tih a?" tih hlut pahin ka sam a rawn khawih a, "Zoherlian," lawm vak loa ka tih laiin, "Rilru lam doctor ka hmuhpui ang che," a lo ti pek a, ka nam sawn rawk rawk.

"Doctor emaw, i pawisa ka mamawh lo, mi bulah engmah lo sawi lo la a ni mai," ka ti chang rap a, ṭawng leh tuma a rawn ang zuau chu inherin ka kalsan nal nal a, min rawn um zuia ka rin vangin ka kalchak hle bawk.

Mahse, rei vak loah ka zawnah a rawn tlan a, "Ding teh," a rawn tih chuan ka ding duh lo.

"Lo chuang rawh, ka va thlah ang che," a tih takah chuan ka ding chawt a, engmah pawh sawi loin a hnungah chuan ka va lawn rawk rawk a, "Police-in an chhui mai dawn alawm, kan lo buai a ngai hleinem," a ti leh rih a, inhnial hi ka peih lo takzet, ani nen ngat phei chuan.

"Tlan mai mai rawh,"

"Ti lo zawk teh, i rilru a na tih ka hrethiam alawm, Sangpuia boral aṭang khan i dik tawh lo, hetianga awm tur hian anni pawhin an duh lo ang che," a darah ka va beng zawt a, "Min zilh suh," ka ti ṭeu hlar a. "I dawhtheih loh sawt ziate hi a pangngai lo, nangmah hi i talbuai nuai tawh," a ti leh hram a, ka chhan tawh loh vang chuan a tlan chhuak zui a.

Kawng tluanin min thlem a ni ta ber, "Hna ka zawn sak ang che," a tih loh leh, "Thil eng emaw zir la, zir man ka tum sak dawn che nia," a ti thul, ka ngaihtuahna hi a hrethiam pha loin ka hria, ka rilru ang hi a pu ve lo chiang hle bawk.

Kan kawt kan thlen hnu chuan ka chhuk a, "Khuaah chuan kal ṭalh i tum em ni?" a ti leh a. "Aw, naktukah ka kal dawn," ka tih chuan a beidawn hmel khawp mai. "Zoa, Veroi kha engtiang pawhin lo nung ṭhin mah se, tu pawi pawh lo khawih mahsela, hetianga a chunga ti tur hi an ni lo, ka zawng chhuak anih chuan ka that ve duh hial maithei, chutiang khawp chuan ka thinur a, ka chunga thil thleng thei lam ka ngaihtuah lo, ka hriatchhuah vat theih nan i lo ṭawngṭai dawn nia," tih pahin a darah ka va beng dat a, "Mangṭha," tiin ka chhuksan zui a.

Mut hmunah u Muanpuii ka bia a, sumo counter te ka va zawt a, driver number te pawh min lo pe a, sumo pathum a service a, pakhat number chiah a nei thung a, a tlai deuh tawh nain driver chu ka call a, seat ka chang ve hlauh mai. Ticket ka tihfel hnu chuan mut ka tum ngial a, ka muhil thei hauh lo, ka thil ken tur te chu ka siam leh rih a, chumi hnuah mr.Know-a lehkha min pek kha ka bih a, a hmuna ka awmchilh theih chuan a awlsam phah dawn hlein ka hria.

Engtin nge ka tih ang aw, hmelhriat lah ka nei si lo, min hruailuttu tur ka dap chawp a ngai dawn tihna a ni a, Veroi'n hmelhriat a nei ange maw, nei ta se min lo pui duh a ngem, rintlak an ni angem, ngaihtuah tur tam tak a awm.

Zingah chuan tukṭhuan ka bar sawk sawk a, ka nu chuan min thlah a tum naa thlah ka ngaih loh thu ka hrilh a. In aṭanga ka chhuah chuan dar 9 a pel fel awrh a, jam-ah ka tan vangin ka thleng tlai viau mai. Ka chuanna tur sumo chu chhuak mai turin a lo inpeih tawh a, keimah chiah min lo nghak tawh anih hmel e.

Tukverh pawn lam chu ka thlir vang vang a, ral hla taka tlang chhumin a bawh var luk te chu ka thlir dauh dauh a, mitthlaah Sangpuia a rawn lang a, 'Min ngaidam rawh aw,' tih thu chu ka rilruah a awm reng, sûn pawh ka sûn rei hman lo a, ka ngaihtuahna a luah tlem hle tawh mai a; mahse, ani chu a hahdam tawh a, a thlarau pawh thlamuang takin a chawl tawh ngei ang. Veroi erawh chuan chutiang hahdamna chu a hmuh ve ka ring lo, amah thattu zalen taka a awm hi hrehawm a ti viau zawkin ka ring a, a rilru pawh a na ngei ang.

'Lo lungngai suh ka ṭhian, hahdamna chu ka zawn hmuh sak ang che, lo nghak fan fan rawh,' tiin a thla hmuh tur awm lo chu ka hrilh a, ka la dai ngai loh hmun lam chu ka pan zel bawk.

End of chapter - 5