WHY DID YOU GO? (CH - 6) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 6

I hear footsteps slowly walking,

As they gently walk across a lonely floor,

And a voice is softly saying,

Darling, this will be goodbye forevermore.

'Ka mumangah i lo kal a, ka hmuh apiang che hian min mangṭhana thu i sawi ṭhin a, a taka i sawi loh vangin i rilru a nuam lo em ni le? Min ngai ve a ni ang ti raw? Pa, kei zawk hian ka ngai takzet che a ni.'

Ni engzat nge liam ta, ka khawvel zimteah chuan ka hun zawng zawng ka hmang ral a, ngaihtuahna a fim deuh chang chuan chhuah pawh ka duh ṭhin a; mahse, hlauhthawnna ka nei tlat ṭhin. Mi dang hmuha talbuai te, mualpho te ka hlau a, ka chenpuite hmel hmuh takngial pawh chu zahthlak a tling a, inthlahrunna hlirin ka khat bawk.

Nu Nguri hnenah chuan ka ni chah mai ka duh thu ka hrilh a, a ṭul chuan zui haw mai pawh a ṭhain ka hria. Nu Nguri chuan min hnial lem lo a; mahse, midang chuan min ṭawng thlamuan a, "I lusun vangin i taksa a chak lo anih dawn kha, damdawite i ei anga i ṭha leh thuai mai ang," an ti hlawm a, pu Muana'n ramhmul damdawi min siamsakin ei tur ṭha chitin reng min pe a, min duat em em vek a ni.

Kar kalta mai aṭang khan thawh at ka ching a, ka muhil emaw ka tih laiin ka lo kal kual viau ṭhin a ni awm e. Keimah tak hi chuan vawikhat chiah ka la hria a, chumi ṭum chuan zanlaiah chokaah ka lo ding reng a, pi Lalpuii lo thoin ka pindan lamah min hruai thla a, a hnuah pawh ka thawh at thu an sawi fo mai. A chang chuan sitting room-a thil awmte hi ka lo sam hnawk viau ṭhin a, kawngkhar hawnga pawna lo va chhuah te pawh ka ching niawm tak a ni.

Ven ka ngai an tih tak vangin kan nula pakhat chu ka pindanah an rawn riah tir ve a, a tir chuan kan inrem viau a; mahse, mi a ngaina ta lo riau a, ka biak pawhin min chhang ṭha duh ta vak lo. A hnuah a ṭhiannu Biaki'n min hrilh leh a, Remi chuan min lo hlau niawm tak a ni, "I kawchhungah ramhuai a lut anih a ring a, in chungah riah a dil alawm," tiin min hrilh a, a damdawi min pek ka ei duh loh vangin a lawm lo hle bawk.

"Min buaipui turin Azoi ko ula, a peih chuan min riahpui mai sela," pi Lalpuii bulah ka ti ta ngawt a. Mahse, Azoi chuan a hritlan vangin min riahpui thei lawk lo. Pa Dinpuia fapa Lalruatpuia lah chuan, "Thawh at i hlauh chuan i ke emaw i kut kha thlung mai la, i thawh at laichuan i phelh thiam miah lo ang," tiin thu min lo rawn ve a, han ngaihtuah chian chuan a ṭha dawn hlein ka hria.

Chumi zan kan mu tur chu Remi'n ka mutna a siam a, khum bula ka hrui sam lai chu min rawn melh leh zauh ṭhin a, min hlau tih ka hriat tawh avangin nuam ka ti bik lo khawp mai. "I duh chuan in chungah riak rawh, hrui hian ka inveng thei mai ang," ka tih chuan, "I phelh thei lutuk khatiang te chu, kawngkhar pawh i hawng ziah alawm, i thawh at chuan mi dang daih i ni ṭhin, a changin thil eng emaw i zawng vak vak a, i chak bawk si a chelhbeh theih pawh i ni ngai lo," a ti bal bal a, "Suih takin ka suih mai dawn alawm," ka la ti ve fan a, amah chu ka inphuar tir nghe nghe a. Mahse, chumi zan ber kher chu ka muhil thei lo reng reng mai a, ka mut loh chuan harsatna ka nei lo niin ka hria.

A zan lehah pawh ka kut phuar chungin ka mu leh a, chutiang chuan zan thum lai ka ti a, buaina engmah ka nei lo. Muthilh loh reng chu taksain a tlin leh ta lo a, luhai leh luak chhuak te ka nei a, pu Muana'n ramhmul damdawi min siamsak leh ta bawk. "Kanna par leh a zung aṭanga siam a nia, i mut dawn apiangin i in dawn nia," a ti a, a tui loh em avangin in a har khawp mai.

Ka muhil ka harh chuan sava hram ri ka hria a, eng thil emaw hi ka chungah a rawn lawn niin ka hre bawk. Ka meng chhuak hlawl a, thil rim chhe lutuk hian hnar a rawn verh nghal a, ka mutna ka han en chuan khumah ka lo mu tawh awzawng lo, varak dil a ni. Chirh chungah berh em emin ka lo mu hi a lo ni a, ka pindan aṭanga hnai te mah nise engtin nge ka thlen phei theih zawk ni?

Tuk pumin ka inbual a, riahpui ka neih loh zan a ni bawk a, tumah mi dangin an hre ve lo. Eng eng emaw ka ngaihtuah kual a, hetianga ka awm chhan hi a awm ngeiin ka ring bawk. Ka thil ei leh inah fel lo a awm em tih chu ka ngaihtuah nasa khawp a, ka damdawi ei te chu ka ringhlel thul. Pu Muana ramhmul damdawi kha ka ngeih lo a ni thei mai angem, taksa chau a chhawk a, nachhawkna ang deuhin ka hmang a; mahse, ka in apiangin ka mu nghet mah mah ṭhin a, ka thawh at chhan pawh a ni thei dawnin ka hria.

Tlaia pu Muana ka zawh chuan, "Kei pawn ka in a, mi dang pawhin an in ṭhin alawm, i mut ṭhat theih loh vang zawkin ania ka pek che, i thawh at te a zia phah ka lo ring asin," tiin min chhang a, nu Nguri leh pa Tluanga pawn an lo in ve a, engmah insawiselna an nei ve lo thung a, ka hrethiam ta chiah lo.

"I ngaih a ṭhat loh chuan chawl rih la, duh leh sleeping pills te ei ve mai ta che," pa Tluanga nupuiin a lo ti a, keipawn ei rih loh chu a ngaiin ka hria, ka awmdan chu zir chian ka duh a, engmah hi ei rih lo ila ka ngeih loh pawh ka hriat theih ka ring.

Zantirah Azoi a lo kal a, a thawmhnaw hakthlak pathum vel kengin min rawn riahpui a, ani kianga awm chu thla a muang ve sawng sawng mai. Zan rei deuh thlengin kan ti ti a, Lawma chungchang te pawh kan sawi dun luam a, Lawma chu farm-ah a awm rih lo niawm tak a ni. "Hmanniah a chhuak tur nen kan inhmu a, khuaa a cham rih tur thu a sawi a, i pu Muanate dawr thar tur an sa dawn a nih hmel," a ti sap sap a, ka chungchang an sawi em tih ka zawh chuan an sawi loh thuin min chhang a, chhete tal pawha min ngaihsak lo chuan rilru a ti na ve riau a ni.

Azoi a muthilh bawrh bawrh laiin kei chu ka meng reng a, a khat tawkin ka phone-a sana chu ka en leh ṭhin. Varak thawm leh thli thawt zawnga thingkung insawi ri te chu ka ngaithla reng a, a khat tawkin in chung lamah ui a bauh leh ṭhin bawk a,  ngaihtuahna a vak kual nasa bawk nen khua a har tlawk tlawk mai. 

Nunna leh thihnaah hian khawi hi nge hahdamthlak zawk ang tih te ka ngaihtuah a, ka nundan ka han chhut chuan awmze nei loa nung mawl tawp hi ka intehkhin ber, dila varakte ai pawh sawn ka nun chu a mawlmang zawkin ka hria.

Hma hun ka ngaihtuah a, engtin nge ka awm zel anga, eng nge ka tih ve tak ang tiin ka inzawt a, helai farm-ah hian ka nunpum hi ka hmangral mai angem? Pasal te ka la nei ve angem? Engtin nge ei ka zawn anga, engtiangin nge damchhung nite hi ka hman liam ang? Ngaihtuahna a buai a, hmachhawp leh ruahman engmah ka nei lo chuan bei a ti dawng hle bawk. Heti ringawt zawng a dik lo, ka inthinharh a, ka tan emaw mi dang tan pawha eng emaw tal ka tih ve a ngai ang, taksa a damlo anih pawhin rilru hrisel neih ka tum tlat tur a ni tiin ka inngaihtuah fim hram hram a, damlo anga inngaih miah loh chu a pawimawh dawn hlein ka hre bawk.

Chhun lamah ka muhil bawrh bawrh a, ka mut hlain Azoi'n ka thawmhnaw bal te a lo su a, ka pindan pawh a lo ti fai vuk mai. Chhun thingpui la tura a kal hlain ka lo inphihharh a, ka chhungte thawm a reh lutuk chu mak ka ti deuh. Azoi lo chhuk chu ka lo zawt a, "Vawk a chhuak a, Lawma pain a um a, sanga dil lamah a tlanthla sia an zuk en pui anih kha," a ti a, ka bula lo ṭhut pah chuan, "Lawma pa hi engtia rei nge hetah hian a thawh tawh le?" a ti phawng a, ka hriat loh lam tak a ni.

"A nu hi chu a thawhna a rei tawh an tia, a nulat lai aṭangin pi Lalpuii te awmpui a nia, Lawma pa hi an hnathawk chhawr ve tho a ni bawk a, Lawma kum ngaihtuah chuan an awm rei ve tawh khawp ang,"

"Lawma hian lehkha a thiam thei vak lo em mawni?" a tih leh chuan ka nui ringawt a, "Helaia awm reng ringawt tur chuan a uiawm alawm," a ti leh a, ka ngaihtuah ve neuh neuh ṭhin, an hlawh a ṭha viau pawhin ka ring si lo a, eizawnna dang pawh buaipui loa farm an enkawl chawt hi mak ka ti ṭhin a, Lawma pawh ka zawt tawh nghe nghe.

"Pu Muanate pawisa hi an ba tam viauin a sawi a, a nu enkawlnan an bat belh zel aniang," ka tih chuan a ner nak a, "Lawma tal hi chuan hna dang te ngaihtuah awm," a ti leh zauh a, ka ngaihdan ve chiah a ni. Tlangval fel leh taima tak a ni a, a hmelṭhat bakah a nungchang a ṭha em em bawk a, eng emaw tal ni ve thei tur chu a ni. Chutih rualin hriatthiamna ka nei ve tho a, a nu leh pa a ngaihtuah vang anih ka ring, a pa ke bai a ni a, a nu lah heti mai hi a ni bawk a, a kalsan thei lo anih pawhin a awm viau mai. Ani aichuan kei zawk hi mak tih tur ka ni ang, helaiah hian awm chhan engmah ka nei tawh lo a, chuti chungin ka la awm ve ngat ngat mai a, inngaihtuah fe chu ka ngai a ni.

Azoi chuan kar khat min riah pui a, a awm chhung chuan thawh at emaw, buaina engmah dang ka nei lo a, zan lamah muhil lo mah ila chhunah ka muhil thei ṭhin a, ka taksa chau leh lu na ber bur te pawh a ziaawm viau tawh. Min hawsan ni chuan ka mut dan thlak ka duh vangin chhun lamah ka muhil duh ta lo a, nilengin pi Lalpuii nen sawhthing chi kan zai a, chumi pahin kan titi luam bawk.

Lawmate chhungkaw chanchin ka zawh chuan, "A nu hi a fahrah khawp mai a, ka pa khan a lainat a, kan hnena awm turin a la a, a lo awmtirh chuan kan chhangchhe si a, awmpui dang kan nei si lo a, ka fate pawh hi min pawm tleipui vek alawm. Sawn kha a pai ta nawlh a, kan dawp khan a sawi duh si lo a, ka pain a sawi duh loh chuan chhuahtirah a vau a, mi ina nau pawm thu awm hek lo. Mahse, Lawma pa zawk hi a rawn inpuang ta a, a tir chuan ka pa khan a han duhpui lo khawp a, pasal a nei dawn anih chuan mi ṭha ve deuh te kha a lo duhpui niawm tak a ni. Engmah pawh kan sawipui tak tak hmain a lo inru leh ta daih a,  an lo kir leh chuan Lawma hi kum 3 mi vel a ni tawh, ka pa khan a shool kalna te pawh a tum sak vek a, la dam sela chuan college te pawh a kaltir duh hial ka ring, Lawma nu pawh hian ka pa kha chu a ngai ve ṭhin, a thlan chei te hi a ngaipawimawh thei khawp a, a pa ang riakah a ngai ve alawm," a ti dap dap a.

"In ram hi nangmahni ta zawk em ni a?" ka tih chuan, "Ni e, i pu Muanate hi chu khawchhak lam chhuak alawm an nih, a pa kha sipai a ni ṭhin a, burma-ah nupui neiin a awm ta daih a, a pa leh ka pa hi tette aṭanga inkawm ṭhin an ni a, a pa kha a fel vak lo a, a fate tumah ngeih a nei lo a, i pu pawh hi a hnawhchhuah vanga kan hnena lo awm ta a nia, kan inneih hnuah an inti ṭha ve leh chauh alawm, keini hi chu mi tluk luhna ngang hi kan nia, ka pa kha a ṭha em a, mi harsate tan khan a inhawng thei zel a, kan hnathawk chhawr te pawhin an ngaina ṭhin teh asin," a ti leh luam a.

"I pa chuan zirna a ngaisang vak lo em ni, tumah hi sawrkar hnathawk in awm bawk si lo a," ka tih chuan a nuih a za deuh. "Ngaisang ve bawk e; mahse, kuthna thawh hi a ngaisang zawk mah a, kan ram a zau si a, ka pa kha a kut a hmuiin buh leh bal a ngah thei khawp a, huan thlai leh thei kan chinte lah kha an ṭha em em zel a, a vanglai tak tak phei chuan khawpui aṭangin an rawn phur ruih ruih zel alawm, radio-ah te pawh an kawm zing mai, a lar ve hat ṭhin asin," a ti leh a, a pa chanchin sawi chu nuam a tih hmel hle hian ka hria.

"Pu Muana pawh hi a taima ve anih hi, i pa nge pu Muana hi hlawk zawk ang le?" ka tih chuan, "I pu Muana hi a hlawk mah zawk ang, ka pa kha chuan man to zawka han siam dan kha a thiam ve lo a, i pu hi chuan a tih dan a hre riau a, a theitui um ringawt pawh hi a hralh chhuak hnem asin, foreign aṭangin thlai chi ṭha leh man to zawk te a la lut a, a ram hmul damdawi te pawh hi an hre lar ve tawh khawp ania, khuaah pawh sawn mi zah a kai ve tawh a, VC ho pawn an ti chhe ngam hleinem, an party-a lut tur te hian an sawm sek hlawm a, a ṭhenin vc-a ding turin an sawm bawk a, a faten an phal lo mai mai alawm," a ti leh siam siam a. 

Khaw chhung miten pu Muanate chhung an hmuh dan chu ka hre tawh a, an ngaisangin an zah em em hlawm a, inhlawhna leh pawisa dila rawn kal tawk pawh awm reng ṭhin. Ka pa thawhna school pawh hi pu Muana hoa din a ni nghe nghe a, khuaa kan kal chang pawhin an lo be ṭha hlawm viau zel a, a fate leh a tute thleng hian mi chung en an ni vein ka hria, an khuaah na na na hi chuan hre lo pawh an awm lo ang tih tur a ni.

Naupang school bang an lo haw a, Duhsaka ṭhiante an lo tel bawk nen kawtzawlah ball an pet a, an thawm an ṭha khawp mai. Eirel hun laichuan ka mut a chhuak tawh khawp mai a, ka insum lui ve tlat a, a khat tawkin ka ham leh bai bai ṭhin. Zanriah eikhamah pawh in hnuaia chhuk duh mai loin tv hmaah ka ṭhu ve reng a, an dawr tur chungchang an sawi ho a, "Ka lo nghak dawn em ni?" ka tih chuan min en phawk hlawm khawp mai.

"I dam ṭhat hunah le?" pu Muana'n a tih mai laiin pa Dinpuia nupuiin, "Naupang hruai ziah ka ngai tho a, keiman nghak ila a remchang ber ang," a lo ti ve khauh a, keia nghah aichuan an duh zawk a ni ang an thlawp hmel viau hlawm.

Mu tura ka chhuk dawn chuan, "Damdawi chu i ei duh tawh lo maw?" tiin pu Muana'n min zawt a, "Ka ei rih lo ang, ka muhil thei maiin ka ring," ka ti a, damdawi dang ka ei laite pawh ei rih loh ka tum a ni. In hnuaia ka chhuk hnuah Azoi'n min lo bia a, "Zun i cheh ṭhin em ni?" a rawn ti phawng a, khawi aṭanga a hriat nge ka zawh chuan Biaki leh Remi ten an lo hrilh a ni awm e.

"Ka lo riah laikhan zun i cheh awm ka hre si lo a, i thawh at ṭhin thu chauh kha ka lo hria a, i lo damlo viau em mawni, buaina i neih chuan ka rawn riahpui leh dawn che nia," a ti luam a, ka mut a chhuah deuh tawh avangin rei tak pawh kan inbe lo.

Dar 10 pelh hretah ka phone dahin ka muhil zui mai a, ka mu nghet vak lo nain ka harh hleithei lo thung. Inbe thawm niawm tak hi ka mang hriat riai ruai a, hmeichhia leh mipa aw a niin ka hria. Inhau emaw inhnial hi an ang a, pindan kawngkhar thawm niawm tak te pawh ka hria a, ka muthilh zui leh mai avangin chiang taka hriat erawh ka nei lo.

A tuk lam pawh ka tho nuam viau a, nilengin pi Lalpuii nen pangpar huan kan tifai a, ka chau deuh bawk nen zanriah eikham veleh ka mu nghal a. Zan lai a pel velin ka ring, ṭawng thawm bawk chu ka hre leh a, ka harh chiang angreng viau bawk.

Pindan khawngkhar chu a rawn inhawng a, han thawh nghal mai ka tum laichuan hmeichhe ṭawng thawm ka hre zui a, pa Tluanga nupui aw a ni. "I mak ka ti, hetianga i awm fo dawn anih chuan ka pa ka hrilh tawh ngei ngei ang, uire nen danglamna in nei lo ania, i fanu rual i atchilh a nih hi aw, ngaihzawng i nei ṭhin pawh tih tawh laiin Minai berkher i han it tlat mai hi chu ka haider thei lo ania, kan chhungkaw zinga mi a nih hi," a ti hlak hlak a, ka thawh tum pawh chu mit ka chhing leh vat a, chutih laichuan pindan chhungah an lo lut tawh.

"Kal rawh, lo buai ve teivet suh ka tih kha, ka muhil thei em ka ngaihven ringawt alawm mawle," pa Tluanga aw chu ka hre hnai viau mai.

"A awihawm loh em mai, i bihthla lai pawh ka hmu zing lutuk, zan laiah i zuk bih duk duk reng alawm," 

"I bengchheng, i tiharh anga sin," 

"Kaih thawh i duh loh chuan rawn chho rawh, mi dangin an hriat teh che chuan a zahthlak dawn ania," an ṭawng zawi ta deuh a, an chhuak nghal mai lo thung.

"Ka lo chho ang, kal hmasa rawh," pa Tluanga'n a tih chuan, "Eng nge tih i tum, khawih te kha i tum ange?" an nu chuan a ti khar khar a, ka lo ip ru chawih chawih tawh.

"I zak lawm ni, chutiang mi ka ni lo e," an inpawt deuhin ka hria.

"I rawn chho lo anih chuan ka pa ka hrilh tak tak dawn ania," nu Atei'n a ti leh a, "I hrilh anih chuan Hriata nena in awm dan kha ka sawi ve ang, i chhuak nal nal mai tur asin," pa Tluanga'n a lo ti thung a, ka thil hriat chu mak ka ti, Hriata leh nu Atei maw? Chu zawng aichuan pa Tluanga awmdan chu mak ka ti bawk.

"Kan inbiak lohna a rei tawh lutuk, ka insiamṭha tawh ka ti mawlh mawlh a, nang i heti leh a, hetiang chuan a buaithlak ang aw.." 

"Ṭawng tawh lo khan chho rawh, ka rei dawn lo," pa Tluanga chuan a ti leh a, "I khawih vaih chuan ka ngawi miah lo ang," a tih leh zet hnuah nu Atei chu a kalsawn a, step-a a pen chho thawm erawh ka hre lo, pindan pawnah chuan a ding a nih ka ring.

Chutih laiin ka bula awm zawk chu a rawn kun hnai a, ka sam a rawn hui laichuan thawk ka ip tlat a, a kuta ka biang a rawn deh chuan men mai tur em mawni ka ti rilru hman a, ka hlauh vangin ka meng ngam mai lo. "Ven ngai reng mai, hetiang chuan zan pawh min ti mu ṭha thei hleinem," a ti bul bul a, a thil sawi chu ka hrethiam hauh lo.

Ka puansin chu a rawn pawt a, rawn mut ve a tum em mawni ka tih rilruk laichuan ka chawn a rawn dek a, a chul niin ka hria, "I van nalh tak em.." a ti zawi leh sup a, min thlek tih ka hriat vangin chet pawh ka che ngam lo. Mahse, engmah tizui loin puan min rawn sin ṭhattir a, chumi hnuah ka biangah a rawn chul leh a, a kalsawn ta bawk. Pindan kawngkhar a khar rual chuan thawk ka la kawk a, ka ṭhu chhuak rang khawp mai.

An ṭawng thawm chu ka ngaithla reng a, "Engtin nge i tih?" an nu chuan an lo ti khar khar a, "Puan ka sin ṭhat tir, ka khawih duh i ring em mawni?" pakhat chuan a ti ve hlak a.

"Han khawih na teh, ka nasa khawp ang, i duh chuan ngaihzawng nei la pawi ka ti lo, Minai hi chu khawih hlek lo ang che, i fate pawn an ten dawn che tih hre tawp rawh," tih angreng a ri nawk nawk mai. "Ka fanu angin alawm maw ka en le, i ngaihdan a mak em mai," pa Tluanga'n a tih ri leh step-a an pen chho thawm ka hre zui a, an ṭawng ri pawh a hla tial tial a, thawm ka hriat theih loh thleng chuan ka che chang lo.

A reh tlawk tlawk hnu chuan ka tho chhuak a, pindan kawngkhar chu ka va kalh sawk sawk a, ka mut dawn khan ka kalh ve thlapin ka hre si a, engtin nge a lo hawn theih le, ka hrethiam lo ngang mai. A pawn lam aṭangin a rawn hawng ti dawn ila pawn lam aṭanga hawn mai theih chi a ni si lo a, thira hawlhkalh chi a nih vangin pawn lam aṭanga an hawn chu a rinawm loh. 

A sira bang vel chu ka en kual a, pawn lam pawh ka va en thlap, chutah console table hnung lam ka va thlek chuan kuttum leng vel hi kua a lo awm reng a, in chhung lamah chuan wall paper-in a hliah vangin a lo hmuh theih loh hi a lo ni a, a rawn zenna lamah wallpaper tlang chu a lo ṭet deuh nghe nghe a, ka rilru tibuaitu tak zawk chu engtia tam nge a lo kal tawh ang tih a ni. Thil hre mumal loa ka awm laite khan a lo kal fo angem, engvang nge tih lam aichuan engtin nge min tih ṭhin tih zawk chu rilru tibuaitu a ni. Min lo khawih tawh angem ti tein ka inzawt thul, ngaihtuahna a buai nuai mai a, keia rilru fim lo leh nikhaw hre mumal lo khan engmah hriat ka nei dawn der si lo. Ka ngaihtuah thui zel a, hlauhthawnna ka ngah telh telh. Ka awmdan ka han ngaihtuah let phei chuan rinhlelhnain ka khat a, duh loh pui pui ngaihtuah pawh awl tak a ni. 

Ka damloh laia thil thleng ka hriat ang ang chu ka ngaihtuah kir a, engkim chu ka chiang lo ruai mai a, ka damloh ṭan hma ngaihtuahin khati tak maia ka buai kha a mak ka ti. Damdawia min hrai an awm a ni angem tih te, damlo tak tak ni loin hrai ruih ka ni anga, chu chu remchangah lain tu emaw a rawn che ṭhin angem tih angreng chu ka ngaihtuah chhuak zut zut. Thawk leh khata khatiang khan ka awm thut a, tunah lah heti khawp hian ka fim leh lawi a, eng emaw tak chu a awm chiang alawm!?

Ramhmul damdawi kha ka rilruah a rawn awm a, kha bak kha puh tur ka hre lo. Mahse, mak ka tih chu pu Muana ramhmul damdawi kha ka damloh hrep tawh hnuah ka in ṭan chauh a ni si a, a inṭanna a ni lo em mawni tih theih tur a ni lawi a, ngaihtuahna a buai telh telh mai.

A pawimawh ta ber zawk chu fimkhur a ngai hle dawn a ni, damlo leh chi ka ni tawh hauh lo, ngaihtuahna fim ka neih a, ka inven thiam viau a ngai tawh, ka chenpui zinga miin ka lakah rilru mak tak a pu a, ka tan a him lo thei tih chu ka hrechiang hle bawk. 

Eng emaw hriat chhuah tur a awm takah tiin ka diary te ka keu let a, ka hriat chin bak chu ka ziak der si lo a, ka awmdan ṭhin tal hria ila a zia deuh tur, ka thiltih leh ka sawi emaw mi dang nena kan inbiak dan takngial pawh hriat loh ka ngah lutuk tlat a ni.

Khawvar lamah darkar khat vel chu ka chhing sek a, ka thawh chuan tumah thochhuak pawh an la awm lo. Azoi a thawh tawh takah tiin an in lam ka pan a; mahse, an lo la inkhar ṭhiap a, kaitho duh loin ka let leh ta rih a. Kawtzawl ka va thlen chuan Lawma te kawngkhar inhawng ka han hmu a, a nu a tho tawh aniang a khuh thawm ka hre bawk a, amah awm sela ka ti kher mai, titi pui tur ka duh a ni.

In chungah lut mai loin veranda-ah ka ṭhu rih a, ka ngaihtuahna chawl lo lutuk chu ka hahpui a ni ber e. Thil hriatchhuah ngai pawimawh tak ka neiin ka inhria, ka damloh chhan leh ka dam leh chhan pawh a rawn tifiah thei dawn tlatin ka hria a, thil tam zawk chu ka chenpuite hian an hre ngei bawk anga, tu nge zawh chi ang tiin ka inkhap buai viau bawk.

Rei vak loah pu Muana a lo tho a, veranda-a ka lo ṭhu min hmuh chuan, "I mutui thei nange?" a lo ti var a, "Ka hmu hma em a, ka harh hma phah anih hi," ka tih chuan min chhang tawh lem lo. Chokaah a phei a, a va che ri rak rak a, rei lo teah thingpui no nen a rawn chhuak a, min lo siam kep thlap mai.

"Thawh hma hi a ṭha, a hrisel zawk," tih pahin a thingpui no chu a lem khalh a, ka in duh dawn em mawni ka ti rilru a, ei leh in tur te hi ka ṭih deuh tlat tawh. "A sa em mai ka va ti dai ange," tiin chokaah ka luhsan a, thingpui pawh chu ka va leihbaw vek a, ka noah chuan tuisa thli khatin veranda lamah bawk chuan ka phei leh a, kawngka bula din pahin pu Muana ṭhu chu ka melh leh zauh ṭhin.

"I mut ṭhat theih chuan i dam tawh dawn tihna a ni mai ang a?" a rawn ti phawng a, ka lo ka hau.

"Nia, ka mu thei angreng tawh, i damdawi kha ka ngeih vak lo khan ka hria a; mahse, ka damloh ṭan dan kha ka hrethiam lo, a tir khan mut theih loh pawh ka nei ngai si lo a," ka ti niah niah a, ka pa boral hlimchhawn khan ka mu thei lo ngei mai a; mahse, a hnuah pawh khan ka pangngai chho viau a, khatia ka awm thut chhan kha chu thil dang a awm ka ring tlat.

"I vitamin te kha i ngeih lo nge mawni, damdawi inhal te hi a awm ve ṭhin a," a tih chuan ka ngaihtuah ve neuh neuh a, pum damdawi leh vitamin ei neuh neuh hi ka ngah a, ka pa khan min leisak peih khawp a, ka damloh laipawh khan supplement te nen chi nga lai ei ka nei a, pu Muana thilsawi pawh chu thil ni thei tak a ni.

"A ni ve maithei, calcium leh supplement tih angreng ka ei nual a, inhal deuh a awm aniang," a lo bu nghat nghat a, "I ke chu a la na ṭhin em, exer i la ngai ta si lo a, i zia tawh chuan zingah te hian kal kual ṭhin ta che," tih pahin ka ke chu a rawn thlek a, "A na tawh pawhin ka hre lo, ka damloh chhung khan a lo dam hman vek a, engtin nge ka enkawl ni, ka hun hmandan pawh ka theihnghilh vek," ka ti nang nang a, ani pawh a lo ner  ve nung a.

"I tho â zing lutuk kha chu damdawiina hruai che ka duh rum rum a, ka damdawi siam pawh kha i ngeih ka ring asin maw le," a ti ve nuah nuah a.

"I damdawi kha mi dangin an ṭhatpui em?" ka tih chuan, "Ṭha chu an tih ve khawp kha, mi a ti harhvang a, taksa chau leh lunaah te hian a ṭha riau a, rilru hah damdawiah te pawh a ṭha viau a sin, nangpawh i rilru lam atan ania ka pek che, i lusun hi i natpui ni maiin ka hria a," a ti chuar chuar a, chutih laiin a no ruak chu ka lo laksak vat a. 

Chokaa ka luh hnua ka va let leh chuan zial a lo zu hlat hlat tawh. "Ka pu, ka thawh at laikhan engtin nge ka awm ṭhin, pangngai hmel deuhin ka lang nge, mi â ang deuhin ka awm?" ka ti ta ngawt a, mi a ngaihtuah tak taka ka hriat vanga zawt ka ni.

"I pangngai chiah lo chu a ni, biak pawhin thil i sawi mumal thei vak lo, a changin sava te i zawng chiam chiam a, bengchheng i ngaithei lo em em bawk a, i thawk a pik deuh aniang i pindanah i awm ṭha peih lo bawk a, a changin 'Ramhuai ṭawngthawm ka hria' te i tia, i pa i hmuh thu i sawi zing viau bawk," a tih chuan, "Ṭawng thawm ka hria maw?" phawk fein ka lo ti let a.

"I sawidan chu a nia lawm, i pi lah chuan 'A pa thlarauin a lo tlawh aniang,' a tia," tiin a nui kur kur a, kei chuan ngaihdan dang daih ka nei, nizan ang kha a nih ka ring tlat, ka muthilh laia min tlawh fo tu an awm a ni.

"Han hre chhuak thei tal ila ṭha tur, hriatna hloh ang mai hian ka awm a, ka hriat mang loh chhung kha a rei bawk si,"

"Hriat chhuah loh kha a ṭha zawk daih ang chu," a lo tih chuan mak ti lek lekin ka en a, "Engati maw, kan nun dan hriat loh te chu..." phawk fea ka tih chuan, "I naupangchhia angreng em mai a," a tih chuan ka hrethiam ve nghal a, ka zun cheh a sawina a ni.

"A ni tho a; mahse, ka damloh chhan hriat ka duh deuh maw le," ka ti leh halh a, "Thil theihnghilh hriat dan chu ka hria a, ka pa khan sipaia a ṭan laiin thil bo zawn nan leh mi thubuai remnan an hmang ṭhin a tia, kan khuaah pawh khan a ti ve fo a, min zirtir ve alawm, vawikhat chu ka ti ve chhin tawh," a tih chuan ka hrethiam zan lo.

"Engtin maw, ka van hrethiam lo," ka ti let hu a.

"Dawi ang deuh hi a nia, bawlhlo emaw phei chu a ngai lem lo, zel ang deuh hian an awm a, an thil hmuh an hriat mai theih loh ang te hi an hrechhuak veleh nawlh ṭhin a," a tih chuan ka ngaihven rang khawp mai.

"Engtin nge an tih ṭhin a?" ka ti sawk sawk a, chutah a ṭhi awrh lai kross lem lianpui chu a rawn phawrh a, "Hei hi han en teh," tiin kross chu ka hmai zawnah a rawn khai kang a, a then kual a then kual a. "I en reng anga, i ngaihtuahna i ti fim anga, i muhil siai siai anga, i ngaihtuahna harh chungin i thil tawn te i chhui let thei mai ang, chutiang chu an tih dan chu a nia, i pi hi ka tihsak tawh a, a chemkawm tihbo pawh kan hmu ve ngat asin," a ti a, amah chu a nuih a za deuhin ka hria.

"Ti ve chhin ila," ka tih chuan a rawn nui hawk hawk.

"Thil hriatchhuah te ka neih ve takah, min tihsak chhin teh," ka tih leh chuan, "I han ti chhin dawn ila," tih pahin a tawlhphei a, a bulah chuan ka ṭhu ve nghal a. 

"Locket hi ngun takin en rawh aw," tiin a ṭhi chu ka rawn khai kang a, a then na lam apianga en zel turin min ti a, ka en kual sek a, mut chhuak awm pawhin ka awm lo.

"Engtia rei nge en ngai a?" ka tih chuan, "Ṭawng loin i rilru kha sawrbing la, i thil en lai chiah hi ngaihtuah la, thil dang engmah ngaihtuah suh," a tih chuan ka han tum leh ngial a, awmzia a nei thei lo reng reng.

"A va thawk lo ve maw le," amah pawh chuan a ti ve bul bul a, vawi thum lai ka tih ṭhat hnuah pawh engtin mah ka awm thei lo.

"Theitui in chungin a zia deuh angem aw?" a tih chuan, "Ruih te chu a chi nang," ka lo ti ve vat a, "I rui dawn hleinem, chhe te i in hlek anga, a thawk thei deuh maithei a ni," a  tih chuan ka la awih vak lo a, tih chhin ngei ka duh bawk si avangin ka rilru pawh a buai deuh.

"Azoi awm ve se," ka ti ta ngawt a, "A la tho lo ang, a lo thawh hunah i ko phei dawn nia," a ti ve mai a, rui viau pawh ni ila Azoi a awm ve chuan a pawi lo ang, hriatpuitu neih chu a ṭha bawkin ka hria.

Pi Lalpuii eirel puih ka tum a; mahse, Biaki leh Remi ten min chet khalh zung zung a, an tih tur ka lo tih chang lah hian nu Nguri'n a hau peih si a, ka che ve pawh hi an lawm vak loin ka hre ṭhin. Pa Tluanga lah chuan mi a han be ṭha khawp a, ka be tui thei tawh hlek lo. Nu Atei lahin min en leh hrek hrek ṭhin a,  nizan thil ka hriat hnuah hi chuan an nupa ka hmuh dan pawh a dang zo tawh a, an fanute pawh ka be sawm peih meuh lo a ni.

Naupang school kal tur an chhuah hnu chuan in chhung chu a reh leh ruih tawh. Ka chhungte lah huan sam turin an insiam a, hnathawk tura lo kal ho nen kawtah ṭhuin thingpui te an in leh te te a, Azoi pawh a rawn thleng hma khawp mai. Ka pi chuan tih tur a lo hrilh zung zung a, vawiin chu cheese an siam dawn anih hmel e.

"Thil tih tur kan nei ania aw," ka va tih chuan zawhna ngah hmel deuh hian min melh a. "Nakinah ka hrilh ang che, pu Muana hoin a nia," ka ti a, "Samṭuak pawh lam anih chuan ka hman miah lo ania, i pu sam hi chu dum sak daih rawh u, a ṭuak pawh sen a ni tawh lo," a lo ti hmak hmak a, "Chutiang a ni lo, min dawi mu dawn," ka ti chu min rawn melh phawk khawp mai.

"Thil theihnghilhte hriatchhuah dan a nia, ka tih chhin laiin ka bulah lo awm ve la ka duh a," ka tih chuan, "I va ho roh e aw, i pu lah hi thil mak deuh deuh hi a thiam a," a tiin a nui kur kur a, chumi hnuah pi Lalpuii nen bawnghnute la turin bucket nen an chhuak dun a, pawna ka va chhuah ve chuan hnathawk tur ho pawh an lo kal liam diak tawh.

Huan aṭanga pu Muana a lo let chuan dar 12 a pel tawh a, "Thingpui in a hun viau mai, tui vawt nen zuk pe rawh u," tiin kan nulate chu a tir a, ka pi leh Azoi pawh an la buai dun khawp mai.

"I kal leh nghal dawn em?" tia pu Muana ka zawh chuan, "Kal leh awm tak, thingpui ka'n in phawt ange," tiin a pheikhawk a phelh mawlh mawlh a, a chem a tat zui bawk a, Azoi awm laia tih ka duh vangin chhun lama tih mai chu a ṭhain ka hria.

"Engtikah nge kan tih ang?" ka va tih leh chuan, "Eng maw?" a lo ti hu a, "In dawi mut kha.." ka tih chuan, "E, ka lo theihnghilh hman alawm, theitui pawh kan va kawl mai lo ve," a ti nuah nuah a. Chutah, rawn tho chhuakin belbawm a va hai a, container pakhat hi rawn phawrhin, "Hei hi kan hmang mai dawn nia, rim te pawh a nei lo zawk alawm, pum pawn a haw lo zawk," a ti zui a, ka va en chuan eng emawni hnah ro, rép ro niawm tak hi a lo awm a, eng nge ka zawh chuan Kanna hnah zûk tura an siam a ni awm e.

"A ruih theih maw?" ka ti he haw a. "Ganja ang deuh a nia, vawi hnih thum i fawp lek dawn nia," a ti sam et a. Kan thil tih tur pi Lalpuii kan hrilh chuan, "A hlauhawm em mai, a tak angin kan hmu let zut zut mai a, ka ti duh tawh reng reng lo, thlahrangin min zui te pawh a hlauhawm," a lo ti bal bal a, "I chemkawm tihbo pawh i dahna i hriat thlap kha," tiin ka pu chuan a nuih mai mai thung.

Azoi ho chuan ka pindan lamah kan inzuithla a, ka bang awng kha pu Muana chu ka hmuhtir a, "Kawngka kalhna hi ban phak rengah a awm bawk si a, min hnawh sak daih rawh," pangngai deuhin ka ti a, amah lah chuan a han hriatthiam loh hmel khawp a, "Tu tihchhiat nge mawni, Duhsaka te kuthlei a ni leh pek ang, wall paper an bel hnan ringawt lehnghal a, a beltu pawhin siam ṭhat ve phawt awm asin maw le," a ti nuah nuah a, "Tlaiah kan thawm ṭha dawn nia," a ti bawk a, rilru pawh a nuam ve ta deuh.

Ka thil zuk tur chu a zial mawlh mawlh a, kei chu khumah ṭhuin ka lo inring tawh khawp mai. Azoi pawh ka bulah a lo ṭhu ve ran a, "Min hmuh chuan min be ngei ngei ang che, ka lang ṭha em tihte kha lo chik rawh aw," a ti fiam zurh zurh a, "Ka ṭawng ang ti raw, tv vela an ti lai ka hmuh chuan an ṭawng ṭhin a," tia pu Muana ka zawh chuan, "I thil hmuh ang ang i sawi dawn nia," a ti sam then a. Azoi chu, "Ka thil sawi lo chhin chhiah vek rawh, ka zawt leh dawn che ania," ka ti ve bawk a, a lo phur tawh khawp mai.

Zial ṭan sa min rawn pek chu ka han hip kawk a, a ru leh lutuka ka khuh nghal bawrh bawrh. A zuk dan tur min hrilh hnu chuan tlem te tein ka hip lut a, "A khute kha in ur tir rawh," a ti nain ka mit a ti thip zel mai a, a fawp ṭha sek sek ringawt.

"Eng aṭangin nge i ngaihtuah let ang?" pu Muana'n a tih chuan ka han inngaihtuah vang vang a, ka thil hriat chian hnuhnun ber kha ka mumang nge a tak pawh ka hre lo. Lawma ka rilruah a rawn lang a, kha mi zan leh a tuk zinga ka thil tawn inpersan tak si kha, a karah khan thil tam tak a thleng hman anih kha, kha mi hma lam kha chu chiang takin ka la hre vek a, kha zan kha a tak nge a lem tih ka hriat phawt a ngai a ni.

Ka thil zuk chu a thawk chak fu mai, duh aia ka ruih ka hlauh vangin a zahve pawh ka zu lo. Ka pek let hnu chuan pu Muana chu ka hmaah a rawn ṭhu a, "En rawh le," tih pahin a ṭhi bawk kha a rawn lek chhuak leh a. Ka taksa zawi riai riai leh ka ngaituahna fim lutuk chu chiang takin ka hre thei, a eng emaw tih nawm phian a, hah a dam huaiin a hriat bawk. Rei vak loah ka khawhmuh a rawn dang a, a thim tial tial a, ka muhil ni maiin ka hria.

"Eng emaw hmuh i nei em, i awmna laite i sawi thei em?" pu Muana aw a ni.

Ka mit chu ka meng a, a thim mup ringawt. "Engmah ka hmu lo," ka ti zawh rual deuh thaw chuan a rawn eng riai riai a, chhun khaw eng a ni lo, zan a ni. Kawtzawla thirban dinga light inkhai ka va hmu a, ka han hawi kual chuan thla pawh a lo eng ruih a, ka ṭhutna chu in chung veranda a ni. Ka kutah chuan chhangthawm butter rim nam vat vat hi ka keng a, ka mumangah ka awm nge mawni, hei chu a tak nge mumang ka hre hauh lo!?

"Thawm eng emaw tal te i hre lo em ni?" pu Muana'n a tih leh chuan ka han ngaithla deuh vang vang a, eng thawm mah ka hre lo. Ka hawi kual a, thla eng no nghalh mai leh boruak vawt te, thli thaw heuh heuh leh thawm reh ruih te chu ka vawikhat tawnna a ni lo, deja vu an sawi ang deuh hi a ni.

Chutah, kawngkhar inhawng ri niawm tak hi ka hre zui a, "Ke pen thawm ka hria," ka tih rual chuan, "Tu nge ni a?" pu Muana'n a lo ti thuai a, "Ka hre lo," tih pah chuan Lawma te in lam ka han hawi a, khami zan kha a ni, ka hmuh dan pawh a ngai ang chiah.

"Lawmsangpuia," ka ti zawi sep a, ka ṭhutna aṭang chuan ka tho zui bawk.

"Huan lamah a kal a, a hmanhmawh hmel khawp mai, a hnungah ka zui a, min hmu miah lo, ka kal chak ve thei lo, ka ke hi a la khawng tlat,"

"Lawma chu eng atan nge i zui a?"

"Ka hre lo le, thil tih ruk nei a ang ka ti deuh, amah hi hriatchian ka chak ṭhin a," 

"I duh viau a ni maw?"

"Ka duh alawm,"

"A duh ve che em?"

"Min duh tih chu ka hria; mahse, hlauh a ngah em a ni?"

"I la zui em ni?"

"Aw, a ding mek, a rawn let leh dawn tlat mai, thing kung phenah ka biru a, min kalpel chiah e, grape huan lam thawm kha a ngaihven dawn niin ka hria, keipawn thawm chu ka hre thei,"

"I kal ve em ni?"

"Aw, mahse, Lawma kha ka hmaah a kal reng sia, ka hmu tawh miah lo, chhek inah sawn a lut niin ka hria, mi thawm ka hria a, zai an play ri pawh ka hria, 'He stopped loving her today' tih hla kha,"

"George jones-a hla maw?"

"A ni mai thei, a chhungah ka lut lo, chhek in chhak aṭangin ka bih dawn mek a...

ka hmu che.." 

"Min hmu maw, Lawma chu i hmu ve em?"

"Aih, a awm ve lo, midang pali an awm, hmeichhia pawh an awm, zu in in a, in ṭawng bawrh bawrh mai,"

"Eng nge kan sawi i hre thei em?"

"Hre thei lo, zai in play ring lutuka,"

"I la en reng em ni a, Lawma chu a lo lut em, i zawng kual lo em ni?"

"Mina..." a tih leh lai chuan ka awmna chu su dulh dulh mai hian ka hria, ka dar a na ngut ngut a, "Tu emawin hetah hian min vit," tiin ka dar chu ka dawm vang vang a, "Tunge ni?" a tih ri chu ka hre vuai vuai chauh a ni.

"Hriata a nih hiiii..."

Lawma leh Puiate ṭhianpa Hriatzuala kha a ni, kei chu ka zawi hnawk a, min chelhbeh hnuah a darah min bang leh hnawk a, min kalpui laichuan ka han au chhuak ve bawk a, zai play thawm vangin ka aw chu an hre thei lo a ni. Khawi lam nge min pan pui ka hre lo, hnim a pal phei ri leh a ke pen thawm chu ka hria a, ka mit chu men ka han tum ṭhinnaa ka ti hleithei meuh lo. 

"Chhek in chhak lamah min kalpui a, inte a awm; mahse, tumah an awm lo.." ka thawk a rawn rang chawpchilh a, "Min mut ania, a kawr a phelh," ka tih laichuan hlauhthawnna hlirin ka khat, "Heih, ka duh lo a nia, he mi sual hian min phelh a tum, min rawn chhan ta che u.." ka ti chul tawh mai. 

Mahse, tumah an lo kal lo, mi tenawma chuan ka thawmhnaw a phelh a, min chul kualin tenawm takin min sawngbawl a ni. Mumang pawha ka la man ngai loh ka thil tawn vang chuan ka ṭap vawng vawng. Chu mi rapthlakpa chuan ka taksaah thil tenawm a rawn thun a, ka sual let ve chung pawhin ka hneh lo, a duhtawkin min ching let a ni ber. 

"Harh rawh, harh rawh.." tih ri chu ka bengah a ri tluk tluk a, ka harh hleithei lo. Ka rilru natzia chu aw... 

Chumi hnu chuan eng thil emawni hian min jection-a, ka thawmhnawa min rawn khuh ṭhat leh hnuah a kalchhuak ta bawk. Mahse, rei lo teah a lo kir leh a, thawmhnaw te chu min haktir lehin min pawm chhuak a, kawnga min chhohpui lai chu ka hriat hnuhnun ber a ni. 

Ka ṭap chhuak hlawp hlawp a, ka mit ka han meng chu Azoi'n min rawn kuah thlawp a, kan han ṭap dun chu kan ṭap thawm hriain pi Lalpuii an rawn tlan thla thuai bawk. "Khami zan khan kawt zawlah sawn i lo mu reng a, i ke vanga tlusualah kan ngai che alawm, a tuk aṭang khan i chiang ta lo riau bawk a, kan doctor rawn lah khan i luah thliam engmah i neih loh thu a sawi a, i rilru lam a ni e a tih vangin damdawiin lam pawh kan pan ta lo a ni," tiin pu Muana'n min lo hrilhfiah a, kei chu ka â riai mai, eng thil nge maw ka han hriatchhuah tak hi le, hre lo tawp zawk ila ka van ti em? A rapthlak lutuka, ngaihtuah let pawh ka ngam tawh lo, heti baka na hi chu a awm leh thei tawhin ka ring lo a ni.

Azoi chuan tlai thlengin min awmpui a, ka pindanah kan awm dun chawt a, kei chu a khat tawkin ka ṭap leh ringawt ṭhin. Ka chhungte chuan in chung lamah thil an sawi ho a, thingpui min pe tura Remi lo chhuk chuan Puia an koh thu leh Hriata an zawn tir thu te a rawn sawi a, pa Dinpuia phei chu a thinrim viau a ni awm e. 

Nu Nguri chuan, "Hriatzuala nen chuan in inhre ṭha hrim hrim em, i be ngai em?" tih angreng min rawn zawt a, a fala kan la inbiak loh thu leh a ṭhiante nen kan inbiak laia ka hmuh ve ṭhin thu te ka hrilh a, mimal taka inhre ṭha kan ni lem lo, kan inhmu ve fo a, farm-a hnathawk, hmelhriat satliah ang chauh a ni.

Tlai thim dawn ṭepah in chunglam chu an ri hlut a, chanchin hre turin Azoi ka tir chho a,  minute 10 dawn chu a han thang. A lo chhuk leh chuan, "I pa Dinpuia te unau leh pu Muana an kalchhuak a, Hriata chu u Ṭhatei te inah a awm reng tawh," a rawn ti zung zung a, "Police an man tir nghal dawn aniang a?" ka tih chuan, "Anih ka ring, Puia khan 'A lo kal duh si lo a, nangmahni lo kal mai rawh u' a rawn tia," tiin min hrilh bawk a. "Lawma a awm ve angem le?" ka tih chuan min chhang lo. Tunah hian ka bulah awm sela, min hnem lo anih pawhin min ṭawng thlamuan sela ka ti, ka ngai zual takzet.

Zanriah ei tura pi Lalpuii'n min lo koh chuan ka ei chak loh thu ka lo hrilh a; mahse, Azoi'n ka tel loin a ei duh tlat si lo a, kan han kil pui ve leh hram a. Chaw ka han bar tur te chu ka tha a khur ru nasa lutuka, lem pawh ka lem hleithei lo. Dawhkan kil chuan ka ṭhu ngawih ngawih a, kan awmdan vang chuan anni pawn an eitui thei bik lo aniang, an kham hma hlawm khawp mai. 

Ka pi Lalpuii chuan min hnem ve melh melh reng a, "An lo thlen hmain zuk mu daih rawh, i pa Dinpuia khan dawp chhuah zet loha police hnena pek a tum lo anih hmel kha, helaia rawn hruai loin tan tir nghal zawk sela ni mai tur," tiin Azoi chu min riahpui nghal mai turin a ti a. Chutih laichuan kan in chu a reh ṭhuap a, naupang ho an awm lo diak chu mak ka ti deuh.

"Naupang ho kha khuaah an kal ve em ni?" tia ka pi ka zawh chuan, "I nu Atei'n a hruai anih kha, naktuk tlaiah chiah an lo haw ang," a lo ti mai a, ka ngaih a ṭha zan lo nain naupang awm lo chu a ṭha zawkin ka hria.

In hnuaia kan chhuk hnuah Azoi chu ka zawt a, "Engtia tih nge an tum le, thil eng emaw deuh chu tih an tumin ka hria?" ngaihṭha lo fea ka tih chuan, "An dawp dawn chu a tih kha, an sawisa dawn tihna a ni mai, a inpuanna an neih ve chu a ngai dawn alawm. Mahse, helaiah rawn hruai kher loin khuaah te pawh a dawp theih reng a sin maw le, rawva deuha chet an tum te pawh a ang alawm," a ti ve nuah nuah a, thil awmdan leh ka thil hriat te chuan ka thauah min man deuh tlat a, ka hlauthawng ru et et reng.

"Azo, Lawma emaw Puia biak han tum teh," 

A phone a phawrh a, "Puia ka'n bia ange," tiin a call zui a. Rei vak loah Puia chuan a lo chhang a, "An lo let chiah, keini pawh kan lo chhuak ve nghal dawn, Lawma pawh a rawn haw dawn hei.." a rawn ti lang lang a, ka lawm ru khawp mai, a awm ve ringawt pawh ka thlamuanpuiin ka ring a ni.

"Hriata chuan a lo duh leh mai nge, an rawn hruai lui?" tia Azoi'n a zawh chuan, "A duh lo chung an hruai lui a, a pha nasa alawm, i pa Dinpuia khan a beng nawk nawk a, Minai khan a chiang viau em ni, Lawma nen hian kan hre chiang lutuk lo a, Hriata'n hetiang thilte a ti duh dawn em mawni le?" a rawn tih chuan phone chu ka lo ban zuau a; mahse, min pe mai lo chuan Puia chu a chhang leh a. 

"Minai chuan a hmel pawh a hmu alawm, a hre chhuak vek tawh," a ti a, phone chu min rawn pe zui bawk. "Puia," ka tih chuan min chhang mai lo, an inbe thawm niawm tak hi ka hria a, rei vak loah Lawma aw ka hria a.

"Engtin nge i hriat a?" thum duta a rawn tih chuan ka ngawi deuh vang vang phawt.

"Lo haw rawh, engatinge i awm bo reng a,"  ka ti tham ṭuak a, ka ṭap titih der mai.

"Kan lo thleng har lo ang, Jemina...i thil hriat kha i chiang em, min hrilhfiah teh, i hresual palh anih chuan pawisawi loin jail atan phah thei dawn ania," a rawn ti leh a, min ngaihtuahna ṭawngkam emaw thlamuanna thu sawi loa chutiang a sawi chuan rilru a ti na vawng vawng.

"I ṭhianpa khan..." ka sawi zawm thei lo, mittui ka hru sawk sawk a, insawifiah tur nia ka inhriat loh vangin ka lungawi lo a, ka rilru a na ngawih ngawih a ni.

"Min ring lo a ni maw, Hriata chiah i ngaihtuah..." ka tih laichuan, "Chutiang a ni lo, nangmah kha i ṭha em tih ka hre lo alawm, thil i hresual nge tih pawh a chiang si lo a," a rawn ti leh a, min hnem lo lutuk chu ka thin a rim lek lek tawh.

"Ka hmu alawm, a hmel kha ka hmu, grape huana i kal zan khan ka zui che a, chhek in chhakah khan Hriata khan min hruai anih kha, damdawi in min..." 

"Chhung chu engtin nge i hriat?" A rawn tih leh vang chuan ka sawi zawm lo, a aw chu a vin lek lek a, min ring lo tih chu a chiang viau tawh.

"Pu Muana a dawi mu a, an chhui let leh vek alawm," Azoi'n a rawn ti ve thuai a, Lawma chu a ngawi deuh vang vang.

"A hypnotize che a ni maw..." a rawn ti zuai raih a, "Khawiah nge i lo awm, ka rawn zawng che tih i hria em?" ka lo ti pawr ve hlur a, ani chu a ngawi leh vang vang tawh.

"Lawmsangpui.."

"Farm-ah awm tawh suh ka tih mawlh mawlh kha, i chhungte tak tak pawh an nih loh kha, ka thu awih la chuan khatiang kha a thleng lo ang," thinrim takzet aw a ni.

"Engah nge i rawn mawhpuh ringawt a, a tuartu a nih hi hre ta che," Azoi'n a lo tih chuan, "Chutiang a ni lo, khatiang a thlen kha ka hlauh vang zawk a ni, tunah i ṭha em Jemina?" a rawn ti ṭha leh a, min ngaihtuahna aw ka hre ve ta chu ka hnuk a lo ulh leh ṭun a, ka han ṭawng tur te chu ka khur dar dar mai.

"Ka ṭha lo lutuk, lo thleng vat rawh.." ṭap ṭiau chunga ka tih chuan, "Kan rei lo ang, ka lo be leh vat ang che," a ti a, Azoi chu, "Lo kalsan miah suh, kan lo chhuak nghal dawn," tiin a hrilh bawk.

Midang lo thlen hun nghakin khumah kan ṭhu reng a, keichuan phone lo rik leh hun ka ngaihchang a, ngaihtuahna a kal thui em em mai bawk. "He laia awm hi ka duh tawh lo," ka ti chhuak phawng a, Azoi pawn min lo thlawp khawp mai. "Lawma hi sawm la, khaw chhungah emaw awm daih rawh u, i tan pawh farm hi chu a ṭihbaiawm tawh lutuk alawm, i chhungte pawn an hrethiam lutuk ang che," a ti ve mawlh mawlh a.

"Lawma'n a duh i ring em?" ka tih chuan, "Hmin kan tum dawn nia, i chunga thil thleng vang hian ani pawn a duh mai ka ring, a duh ve takzet che anih chuan a hnial che ka ring lo," a ti leh sap sap a, khawi hmun pawh nise Lawma bul anih chuan pawi ka ti lo. Mahse, a duh ka rinna aiin ka rin lohna chu a tam zawk a, tunah phei hi chuan inrintawkna ka nei lo, min duh takzet em tih pawh ka chiang lo a, ka beisei sang ngam lo a ni.

Darkar khat dawn kan nghah hnu chuan motor thawm kan hre ta a, Azoi nen chuan in hnuai kawt zawl lamah chhuakin leirawhchan kar aṭangin kan han bih a, pu Muanate pafa ho leh Hriatzuala chu chiang takin an hmuh theih. Nu Nguri chuan engthil emaw hi a sawi a, chumi hnuah pa Dinpuia'n Hriatzuala chu generator dahna in lamah a nam lut dawt dawt a, pu Muana'n a zui lut ve bawk a, pa Tluanga leh nu Nguri erawh pawnah an ding thung. Pi Lalpuii va chhuak chu nu Nguri'n a lo tir let leh aniang chhek inah pawh lut loin pi Lalpuii chu a lo kir leh a, chutih laichuan Azoi phone a rawn ri ve chiah bawk.

"An lo thleng tawh em?" rawn ti tu chu Puia zawk a ni.

"Thleng chiah, generator dahna inah khan an inzuilut a," Azoi'n a tih chuan, "An thleng tawh, generator dahnaah an luhpui anih chu," Puia'n a ti ve nghal a, Lawma a hrilh anih hmel.

"A va zia lo e aw, lo va thleng hmasa ila ṭha tur," Lawma'n a tih ri chu ka hre pha.

"In awm hnai lo em ni?" Puia'n a rawn ti leh a, "Veranda hnuaia lungrem kar aṭang khan kan bih a," Azoi'n a tih chuan, "Kal duh suh u, Minai kha a pindanah awmpui daih rawh," Lawma'n a lo ti zung zung a, khawi lai nge an lo thlen tawh ka zawh chuan farm peng an lo thlen ṭep tawh thu a rawn sawi a, minute 5 hnu velah chuan an lo thlen ve mai ka ring. 

Chhek inah chuan an la awm ta ngar ngar a, an ṭawng thawm pawh hriat tur a awm meuh lo, pa Dinpuia chu a lo chhuak zawk a, nu Nguri bulah eng emaw sawiin a lut leh nghal a. Rei vak loah Puia bike pawh a rawn thleng a, pa Tluanga leh Lawma inbe lai chu an ṭawng hriat ka chak khawp mai. Chumi hnu chuan Lawma chu a va lut ve a, rei angreng deuh hi a va awm a, a chhuak leh chu nu Nguri leh pa Tluanga ten an lo bia a, eng thil nge an sawi ni an awm danah chuan inhnial an ang a, nu Nguri phei chu a thinrim hmel hle tawh. 

Azoi phone a lo rik leh laichuan Puia leh Lawma chu kawtzawl lamah an lo phei mek a, kan awmna lam chu an rawn hawi bawk. "A ṭha vek e aw, an dâwp a, a inpuang tawh, naktukah police-in an rawn la ang, Lawma te inah kan chho dawn a, midang mut hunah inhmuh kan tum dawn nia," Puia'n a rawn ti zung zung a.

"Engtin nge a sawi?" ka tih laiin, "An sawisa em?" Azoi'n a lo ti ve bawk a. Mahse, Puia phone chu chhuhsakin Lawma zawkin min lo chhang a.

"Hlau tawh suh aw, i ṭha leh mai ang, tih dan kan ngaihtuah dawn nia, thlamuang taka awm tum rawh," nelawm leh awki dam dap hian a rawn ti a, "Let tawh suh aw, awm ve reng tawh rawh," ka lo ti ve sawk sawk.

"Hetah ka riak ang, lo la meng la, nakin deuhah kan lo chhuk ang, tukverh lamah kan lo kal dawn nia," a tih hnuah phone a dah zui a, engmah pawh ka sawi leh hman tawh lo. Chumi hnu chuan keini pawh chu pindan lamah kan let a, sana ka en chuan dar 10 a pel zawt chauh a, nghah rei a la ngai dawn khawp mai. Lawma vangin thla a han muang ve deuh tawh naa awm erawh a nuam thei tak tak lo.

Khumah mu chunga kan lo titi mawlh mawlh laiin pu Muana leh pa Dinpuia an lo chhuk a, "I muhil thei angem, in chunga lo riah te i duh em?" pu Muana'n a rawn ti a. "Azoi a awm tho a, a ngai lo ang, ka muthilh theih mai ka ring," ka tih laichuan pa Dinpuia chu a lo kal hnai a, "Inentir i duh em?" a rawn ti khauh mai a, chhan ngaihna ka hre lo, ka hlauthawng leh ringawt tawh.

Ka rilru hria niawm tak chuan, "Thi i nei tawh em?" a rawn ti zui a, Azoi ka melh nghal ruai mai.

"Kan inentir dawn nia, insawiselna i neih chuan sawi mai zel rawh aw, thlamuang taka awm tum la, hlauh tur engmah a awm tawh lo ania, i duh chuan i nu Nguri pindanah pawh i riak thei ang," a ti leh luam a, chutih laichuan nu Nguri ṭawng thawm ka hria a, step-ah a rawn chhuk thla mek bawk.

"Minai hi naktukah inentir turin hruai ta che," pu Muana'n a lo ti nghal var a, nu Nguri chuan min rawn melh vang vang. "Nau a pai em ni?" tiin pa Dinpuia lam a melh a, tumah rengin kan chhang lo.

Amah bawk chuan, "A damloh laikhan a period alawm, a hre mu mal vak lo ang, Remi'n a buaipui chawt a," a ti leh ta hlauh a, ka lo thaw huai huai mai, ṭah te pawh a chhuak lek lek zawk a ni.

"Duh leh kan inentir dawn nia," a ti ta tho a, hnialna ka nei lem lo, inentir chu ka mamawh hrim hrim a, Azoi chu lo kal ve turin ka sawm nghal bawk.

Hriatzuala thilsawi te pawh chu min hrilh ve a, ka hmuh dan ang kha thil thlen dan chu a ni. Kha mi zan khan a rui hle a, pu Muanate grape wine dahna inah tlai aṭangin a lo in tawh a ni awm a, chhek in pana ka kal lai kha kawng chhak aṭangin min lo hmu reng a ni awm e. Min jection na damdawi kha morphine a ni a, khuaah a pa damdawi zuar a ni a, ruih nan a kawl reng ṭhin tihte min hrilh bawk a, tlem a tlemah over dose vangin ka thi lo chauh a ni.

Lawmate ṭhian dun an lo kal chuan dar 12 a pel tawh, midang an mut tawh vangin lut turin ka sawm a; mahse, an duh tlat lo. Tukverh pawn lamah an ding a, kan ṭhiante pahnih an awm ve bawk nen duh ang pawh ka sawipui thei meuh lo a ni. Mahse, Azoi a lo bengvar hlauh a, min lo sawisak zung zung mai. "Farm hi chhuahsan daih teh u, Minai hi hruai la, khuaah emaw awmpui mai la a ṭha ang, atan farm-a awm hi a nuam tawh dawn lo, a rilruah a thar reng tawh dawn a, chhuahsan hi a tan a ṭha ber," a tih laia Lawma hmel ka va en chik chuan a ngaihdan hriat a har hle.

"I nu leh pate pawh sawipui chhin la, khua aṭang pawhin hetah hna in rawn thawk thei tho alawm," a tih leh pawh chuan Lawma chu a la ngawi reng a, "Pawisa chu ka nei a, in luah man ka tum theih ka ring" ka lo ti ve bawk a, ka pa pawisa min hnutchhiah kha a zahve ka chan tur a ni a; mahse, nu Nguri'n a la kawl thung.

A ngawih vang vang hnu chuan, "I nite i be tawh em?" a rawn ti teh daih a, ka biak loh thu ka sawi lah chuan, "Bia la, an hnena awm a ṭha ber ang," tiin min chhang a, beisei tur ka neih lohzia ka hre thar awn awn mai a ni.

Azoi lah chuan, "Kalbo zawk se i duh a ni maw, Minai hi i lo chhaih kual lek anih hi, neih duhna rilru tak tak pawh i pu lo," a lo ti hlak hlak a, "Amah chiah a inngaihtuah thei bik lo alawm," Puia'n a lo tih pawh chuan, "Amah bak a inngaihtuah lo chu anih hi," Azoi'n a ti leh hlar a, keichuan Lawma ngawt chu ka en a, beisei pakhat chiah ka nei tawh.

"Hetah awm i duh chuan a pawi ka ti chuang lo," tiin ka beisei neih chhun chu inthlahrung tak chungin ka hrilh leh a, a bula awm chu ka duh ber a ni, khawi hmun pawh nise amah nen anih chuan hrehawm ka ti ngai lo ang, a hrehawm anih pawhin ka tuar thei zelin ka ring.

Ka han inthlahrun ve tehlul nen a mi chhanna chuan min ti hnual rawih rawih thung. "Heta i awm loh hi a ṭha ber, chhungte i la nei a, an hnenah awm zawk rawh, hetah chuan mikhual ang bakin i awm tawh dawn lo," a ti mauh mai si a, ka duhthusam leh ruahmanna ka neih ve te chu a vaw chhe zo leh ta.

A tuk zingah Hriatzuala chu Police-in an rawn la a, kei pawh thu min zawt ve a; mahse, Hriatzuala a inpuan miau avangin zawhna an nei tam lo khawp mai. Motor-a Hriatzuala lut tur lah chuan min rawn melh ṭawk ṭawk a, "Ka tihpalh aw, pawi ka ti lutuk, ka ruih vang vek a ni, khatiang mi kha ka ni lo asin, a pawi ka ti ngawih ngawih ania aw," a ti tlawk tlawk mai a, a hmai a vung lêk lûk a, a ṭap deuh pur bawk nen rei pawh ka en duh lo. Motor-a a ṭhut hnuah pawh, "Min ngaidam hram rawh aw," a la rawn ti cheu a; mahse, keimah aṭang chuan ngaihdamna chhuak tur engmah a awm lo, ka ngaihtuahna a chawmawlh a, thawk a pikin ka chau hluah hluah bawk.

Tukṭhuan eikham hnua han insiam mai ka tum chu ka period leh ta hlauh mai a, ngaih a ṭha viau tawh a ni. Inentir turin nu Nguri nen kan kal a, vitamin leh rilru hah zual changa ei tur chi thil te min lo chawh a, farm-a kan let leh chuan Lawma te ṭhiandun pawh an lo la awm a, vawk in sain an lo buai viau anih hmel. Kan inhmuhfuh chang hian ka han be ve ṭhin naa mi a be ṭha duh vak loin ka hria, ka zawh chin min chhangin a kal leh nghal daih ṭhin a, min ngei deuh emaw tih mai tur a ni.  

Vawk in an sak zawh hnu chuan khuaah pu Muana dawr tur bawk kha a va buaipui leh a, nitin a kal chhuak a, a chang chuan a riak ṭhin bawk a, Farm-ah chuan a awm khat khawp mai. Phone thar a nei tawh a, a number ngai kha a hmang tawh lo aniang ka be tlang thei ngai lo a, ani lahin min lo biak a tum hek lo.

Chutiang chuan thla kan hmang liam a, kei chu inah ka tawm chawt a, a changin pi Lalpuii hnathawk ka pui a, a pangparte ka enkawlpui a, ka nun nguai leh khawhar pawh a hnem ve deuh ṭhin. Azoi chu a lo beidawng viau aniang, "A sawi ang khan i nite bulah chuan kal daih mai rawh, a tih dan che hi ka duh lo em mai," a ti leh ṭhin a, ka luhlul nge ka â takzet zawk ni; kalsan chu ka la hreh ve fan a, amah hmu phain ka la awm tal alawm tiin ngaihtuahna ka la nei cheu mai.

Inrinni tlai khat chu Azoi te inah ka va leng a, ka beisei loh deuh thil a lo sawi a, "Niminah khuaah Lawma nen kan inhmu a, i chungchang ka sawipui a, a ṭawngkam a ngeiawm angreng lutuka, ka hmu tuitang lo zo tawh, 'In be ṭha tawh ula,' ka ti dek dek kha, 'Kalbo turin hrilh zawk la a fuh ang, awm reng mahse engmah kan ni tawh dawn lo, a awm sawn ka awm a tinuam lo zawk,' a lo ti teh nek a, ani akara i duh hi lawm viau zawk awm a nia sin maw le, ka hmuh leh pawhin ka be peih tawh lo ang," a ti hmarh hmarh, keichuan sawi tur ka hre lo, ka chhungril thuk taka nâ chu ka hre thei a, up beh ka tum fan fan ringawt mai a ni.

A lo haw hun ka ngaichang reng a; mahse, ka hriat loh hian a lo haw a, a kal leh hnuah chauh te a lo haw tih ka hre leh ṭhin a, tlaia veranda-a ka lo nghah chang lahin a lo haw loh ṭum a ni ziah bawk a, ka chang chhuak thei meuh lo. 

Mahse, zirtawpni tlaikhat chu veranda-a ka chhuah rualin gate aṭanga a rawn kalthla ka han hmu a, zawhte note var hi a rawn pawm thla a, min rawn hmu ve niin ka hria. 

Ka bul a lo thlen hma chuan biak inring fein step-a ka lo ding a; mahse, ka lo nuih var var laichuan min en miah loin min rawn kalpel a, chutih lai angrenga a laka thinur chu ka neih awm ka la hre lo.

Min tihdan hi ka haw ngawih ngawih a ni, ka duhna a ngainep te, ka duhna zahve pawha min duh let thei lo te, a  ṭawngkam ṭha tlemte chauh pawh ka lawmpui ṭhin laia min be duh lo te, ral aṭanga thlir ringawt pawh ka hlimpui ṭhin laia min en duh lo te. Ka laka a khawsak dan engkim chu ka haw ngawih ngawih a, keimah ngei pawh hi ka inhua, he mihring, ka hmangaihna engah mah ngai duh loa min hawisantu ka thlah thei lo hi ka inhaw takzet. 

'Hetianga awm hi i duh a maw? Anih leh le, ka hmangaihna che hian i tan awmzia a neih si loh chuan, ka huatna zawk hi han tem ta che,' 

Chu chu ka rilrua a thawhdan a ni.

End of chapter - 6