WHY DID YOU GO? (CH - 7) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 7

Kan driver-in hotel man tlawm awmna min kawhhmuh chu veng laili taka awm nimahse, a panna kawng a chho thui viau mai. Kawngpui dung aṭang chuan kein ka chho ngar ngar a, tlangzawl thing tlem awmna ka han thleng a, in pahnih a sak dan pawh hlui ve lam tawh hi ka han hmu a, kawt zawl zau puiah chuan pangpar leh thlai niawm takte an ching a, thingkung par chi te awm a awm nual bawk.

Ka pan phei laichuan pa upa lam tawh, chempui kenga lo chhuak hi ka va hmu a, min rawn hmuh rual chuan a rawn hawi vang vang a, a dinna hulhliap chunga thil ziak intar chuan mit a la viau mai. Kal pah chuan 'Mikhualte rûn' tih intar chu ka thlek vang vang a, a bul ka va thlen chuan chik fe hian min lo en a. "Khawi lam aṭangin nge, riahna tur i zawng em ni?" a lo ti var a, a hmelah chuan pa ṭawngtam lo leh nelawm loh hmel tak hi a ni a, a ṭawngka chhuak erawh a pangngai viau thung.

"Aizawl aṭangin a nia, mikhual in thleng thei em?" ka tih chuan a bu zauh a, "In chhungah sawn hotunu a awm, lo va lut rawh," a ti a, "Rinmawi, hei mikhual kan nei ania," tiin in chhung lam ami chu a au zui bawk.

In chhung ka va luh chuan nu lian vak lo, thau lam deuh leh kum 60 bawr vel tur hi a lo awm a, kawrlum hma phel fual ṭha hnelh hnawlh hi a inbel a, eirawng a bawl a ni ang a che hnawk viau mai a, a thil kan rim pawh a nam chek chek mai. "Lo ṭhu rawh, Aizawl aṭangin maw?" tih pah chuan ṭhutna min lo kawhhmuh sawk sawk a, an ṭhutthlengte pawh chu thing hmanga siam hlui hmel tawh tak tak a ni hlawm.

"Ka chuanna driver-in in hotel hi min kawhmuh a," tih pah chuan ka ṭhu zui a, ka luggage a rawn thlek chuan ngaihdan a nei aniang, "Cham rei i tum em ni?" a ti nghal zat a, ngaihdan pawh ka la nei thiam chiah lo.

"Rei maithei, in luah tur ka hmuh hma zawng a ni mai,"

"Anih chu a, helamah hna i nei em ni?"

"Hmelhriat tlawh tur ka ni mah zawk a," ka ti leh a, "Tute nge ni a?" a rawn tih leh takah chuan dawt ka sawi thui deuh a ngaih hmel ta hle.

"A nupui hming kha ka theihnghilh daih, in khaw high school-ah hian a thawk ve a," 

"Tu nge ni ang aw, veng lailia awm si hi kan awmna a tlang deuh bawk nen mi ka hre lo ṭhin lutuk a, lo pem tharte phei chu hriat mumal pawh ka nei tawh lo, kei hi chu in lamah hian ka tawm chawt a," a chawhmeh chawh pah chuan a ti mawlh mawlh a, thil dang min zawh ka hlauh vangin zawhna ka lo zawt ve nghal a.

"Mikhual in ngah em?" a rawn hawi zuk a, "Nimin piah khan an haw chiah, hotel pangngai kan ni ve chiah lo a," a ti ta mai a, ka hre sual em mawni ka ti hman.

"Driver khan min kawhhmuh mai sia, hotel ni turah ka ngai asin..?"

"Tun hma chuan a ni ṭhin tho alawm, vengthlangah khuan hotel thar a tam tawh a, kan hnenah hi chuan an rawn kal ve vak tawh lo, in driver chu ka vahpa Engzuala a nih dawn chu," tiin min rawn nuih var var a, ka rilru a buai map mai. Thlen tho tur nge hmun dang pan leh mai tur ni ang aw ka ti rilru a, hotel changkang zawka thleng turin ka pawisa neih a beitham si a, a tlawm zawka innghah chu a ṭha mahin ka hria.

"Min thleng thei tho ang chu ti raw?" 

"Thei lutuk e, hotel dang anga nuam tak phei chu a ni lo a; mahse, mikhual kan duat ṭhin ania, inbualte i duh nghal em, tui ka lum dawn em ni?" a ti ta zung zung a, khawi hmun pawh nise a nuam emaw nuam lo emaw, mi ṭha tawn fuh hi a hlu ber zawk chu a ni.

"Zan lamah ka inbual ang, mut dawna inbual ka ching a, chaw ei hmain khawchhungte pawh zuk fan ka duh deuh.." ka tho nghal uaih a. "Engtin nge ka koh dawn che?" a rawn tih chuan, "Duhawmi ka nia," ti maiin ka chhang a, ka pindan tur min khawhmuh zui bawk.

Pindan zau angreng deuh mai hi a ni a, choka aṭang chuan sitting room zau deuh mai kal tlang a ngai a, pindan chhung pawh a hmanlai ruih thoin ka hria. In chungah chuan electric bulb pahnih leh fan a inkhai a, tukverh a tam angreng a, khum pawh pahnih a awm a, feet 3 khum ve ve a ni.

Ka en kual vut vut laichuan, "A ṭha i ti em, thil i va chik hmel reuh em?" tiin min lo nuih leh sen sen a, kei ka lo bu nghat thung.

Plug awmna min hrilh hnu chuan, "Thingpui ka lo siam ang," tiin a chhuak zui mai a, inbuala mut nghal mai pawh a chakawm viau nain rilru kam tu a tam si a, awm hahdam nghal thei ka ni lo. Ka pheikhawk ka thlak a, bata dawra ka lei puan pheikhawk bun nuam deuh chu ka inthawlh a, chumi hnuah tukverh parda chu ka va keua, ka hmazawn aṭang chuan ni tla tur sen phût chu a lang chiang hle a,  kawtzawla pangparte chu a lang vul viau mai bawk.

'Khaw nuam tak chu a nih dawn hi, a hmunhma pawh a nelawm phian alawm,' ka ti ru neuh neuh a, chutih rualin a mi chengte erawh hriat chian hmasak fe loh chuan ngaihdan siam a fuh lo hle ang, ngaihdan nei saa kal ka ni bawk a, ka rilrua a thawhdan a dik lo sa tlat a ni.

Phone ka charge hnua ka va let leh chuan thingpui a lo siam zo diam tawh a, chhangthawp leh kurtai nen min lo chhawp a, a thingpui min pek lah chu bawnghnute khar a lâng lup lup mai a, ngainat loh zawng a ni bawk nen a tuitang chiah lo. Tukverha dah pahin ka va leihbaw ṭhen a, zanriah kan ei har takah tiin chhangte pawh chu ka ei ve a, inneitunu chu eng eng emaw ka zawt luam bawk.

"In khuaah hian ruihtheihthil a hluar em, zan lamah vah chhuah te a him dawn em?" ka tih chuan, "Dar 9 vel thleng hi chu a hlauhawm loh ang, mi an la men lai ania, zan rei lamah hi chuan rui deuh deuh hi khawlaiah an tam ṭhin a, ruihhlo te hi han khap ve bawk mahse inkhap sen tak tak a ni lo. Tun hma deuh khan dry area te kan ni ve ṭhin a; mahse, khaw ṭhenawmah sawn zu zuar an tam em mai a, kan ṭhalaite hian an pan ve zel bawk si a, a buaithlak khawp mai. Khawtlang hruaituten zu chhia an in loh nan an mahni sak in mai an phal tawh a,  an ti fuh ngút a nge maw, a ti hluar mai maiin kei chuan ka hria a, tlangval naupang te tein zu an chhuang a, an zuar bawk a, hna thawk peih loa zu zuar pawh an awm nawk alawm," a ti duah a.

"Zu zuar an tam viau dawn a ni maw chu, anih leh ruihhlo dang, damdawi lampang te hi?" ka tih leh chuan, "Damdawi lam hi chu a thawm a awm rih lo khawp mai, chu aichuan kan khawmite zu siam, theitui um leh zufang ang chi hi a tam em em thung a," tiin min chhang a. "Siamna hmun deuh bik a awm nge, an mahni inah an siam mai ṭhin?" tia ka zawh chuan, "Mahnia sa ve mai hi an awm a, a zuar ṭhin ho hi chuan ram lamah te pawh an chuang hlawm a, theitui um leh a manto deuh ang hi chu khaw pawna farm lam siam chhuah saw a ni hlawm, anni siam saw chu a ṭha deuh a, a man to lo sela chuan an in duh fur ang, kohhran lam pawhin 'A ṭha tawk e' tia an dawr ṭhin kha an nia, hmun dangah te pawh an hralh chhuak nasa alawm, pawisa nei si lo in ve duh si ho vang hian zu chhia leh man tlawm hi a tam em em mai a ni," a ti barh barh a, farm chungchang chu han zawh thui deuh ka duh vangin dawhkan kil chuan ka va ṭhu hnai a, ani erawh chawhmeh siamin a buai hle thung.

"Farm chuan khaw chhung mite tan an titlawm bik hran lo em ni?" 

"Tlawm bik lo e, sumdawnna a ni ve a. Mahse, a hmuna va kal chilh hi an tam a, chung ho chuan an lei tlawm theih ka ring, hnathawka va kal hi an tam reng reng a, zu changkang in theihna remchang tia inhlawh an tam ṭhin alawm, keipawh ka nulat laichuan huan samin ka inhlawh ve ṭhin, chung laichuan serthlum leh lukhuihthei tih  angreng kha an ngah khawp mai a, kan duhtawkin kan lo ṭhin alawm, ka fanute naupan deuh laipawh khan inrinniah hian thei lo turin an va kal a, an inkhawm nghal ṭhin a, inrinni tin hian an ṭhian hoin an va kal ṭhin," a ti leh siam siam a.

"Seventhday em ni an nih a?" ka tih chuan, "Ni e, kan khuaah hian an kohhran an tam lo a, farm aṭanga lo kal reng an peih lo te pawh aniang an mahni in lamah an inkhawm mai zel a, a fate khuaa awm ve te pawh hi inkhawm turin an la kal zel hlawmin ka hria," a ti leh luam a, midang mamawh vak loa khawsa an nih chuan inrelbawl dan neuh neuh pawh an ngah viau maithei a ni.

"An fate khuaa an awm tho chuan tinge an lo kal ve mai loh a, farm-a khawsa an tam viau em ni?" ka dil chhut a ti ta deuh aniang min rawn thlek zauh a, "A, hman aṭanga an tihdan ania, an inla hrang viau tak nain khawmite tan hian an luangchhuak tam ve teh asin, mi harsa deuh te hian an belbul a, englai pawh hian inhlawhna hi an nei reng a, anni chhungkaw ringa khawsa pawh an la awm nawk ang chu, kan khaw school te pawh hi an chhungkaw suma din a awm nual alawm," a ti leh ta zel a, chutiang anih chuan khawmite zah kai an ni dawn tih a chiang fu mai, zawhna zawt tur pawha fimkhur viau a ngai dawn anih hmel.

"Anih ka pi, hetah hian mi engzat nge cheng che u?" ka ti ta daih a. A chawhmeh a suan fel te te hnuah dawhkan kil chuan a rawn ṭhu ve a, "I pu nen chiah hi kan ni rih, kan fapa hi sipai a nia, a chhang chiah hmeichhia hi khulai kawngpui bul lawkah khuan pasal fanau neiin a awm bawk a, fa pathum an nei ve tawh," a ti sap sap a.

"In ṭhenawma in saw in ta tho nge?" ka tih chuan, "Ni lo e, kan in tho chu ania, kan hralh tawh a, nupa rek an awm ve, innei thar an nia," tiin min chhang a, chutih laichuan putar kha a lo lut a, bahhla thlar lian pui pui hi a rawn keng lut a, "A hmin ṭhenkhat savain a lo ei alawm maw le," tih pahin dawhkanah chuan a rawn dah a.

"Kan mikhual nu chuan nuam i ti meuh maw, Engzuala rawn tirh i va nih hmel ve..?" nui deuh chunga a rawn tih chuan, "A nih hi, amah pawh a rawn lang har lo tawp ang," pi Rinmawii'n a lo ti var a, an pa zawk chuan min lo enin, "I ril a ṭam tawh em, thingpuite kha i duh chuan lam mai zel la, i  tlangnel hma leh nuam i ti a ni mai, keini hi chu heti tawp hi kan nia, i pi lah a chak vak tawh lo a, mahnia i lo inbengvar mai te pawh a ṭha ang," a ti chuar chuar a.

"Thingpui ka lo in zo chiah a, ka ril pawh a ṭam lo," ka tih mai laiin, "Inbualte i duh lawm ni, choka bual in bak hi a dang kan nei hran lo a, tui te pawh a lum theih ania," a ti leh a, "Mut dawnah le, len chhuah te ka la duh a," ka tih chuan min rawn thlek vung vung a, "Eng tiin maw i lo kal?" tiin min zawt leh zat a.

"Ka hmelhriatte tlawh turin a ni deuh ber, pasal turte ka hmuh leh ka awm hlen ang chu.." ka ti fiamthu chu an nuih a za khawp mai.

"Ngawi tak rawh, kan zawng dawn nia, an awm em em ang," putara'n a tih laiin, "Kan Maenga te hi han duh hlauh la kan va ti ve," an nu chuan a lo ti bawk a. "Kan Lalengzuala te zawng, nupui pawh a ngaihsak lo ve, sumo khalh hian a la leng tar ṭhak ang," putar chuan a ti bul bul a, pitari'n a vahpa chu a lo chhan ve leh a, "A fel asin, a passenger te pawn an fak viau zel ania, zu te  in ṭhin lo sela chuan nula ṭha deuh te chu hmu ve tur a ni, amah pui hian a ngaihsak lo em alawm," a ti a, kan driver hmel kha mitthlaah a lo lang a, ka nuih a za deuh tlat.

Putar lah chuan, "A hmelṭha lo bei bui em alawm, a chhan dang vak a awm lo," a ti leh bauh a, kan nui kan nui mai.

Thim hlimah zanriah kan ei a, ka thlenin te nupa an fel bawk a, thlenin nuin eisiam a lo thiam fe mai bawk nen ka ei ve ṭeuh a, Sangpuia boral hnua tui taka chaw ka ei lehna hmasa ber a ni. An hmingte pawh ka hre ve tawh a, putara chu Lianmawia a ni a, tun hma chuan buh dengkhawl an nei ṭhin a, dawrte pawh an siam ṭhin awm tak a ni. He lai tlanga an awm hnu hian khualbuk an siam a, an khuaa hotel a awm tam hma chuan an lun ve viau a ni awm e.

Kal chhuak tura ka insiam lai chuan mipa ṭawng ri ka hria a, ka thlenin te nen chuan an innel viau aniang an nui leh hawk hawk ṭhin. Ka insiam zo ka va chhuah chuan kan driver kha a lo ni reng a, "I chhuak dawn elo, rawn rim che ka tum asin," a lo tifiamthu hlut a, "Dawra kal pahin ka zuk teihawi mai mai ang.." ka tih pawh chuan, "Rei suh aw, ka lo nghak ang che," a ti leh zel a, meizuk pahin kuhva a seh sen huam bawk.

Chhang tawh lem lo chuan ka chhuahsan a, pan tur ber pawh hre lem loin kawngpui lam ka pan thla tawp a, khawpui ang em chu ni pha lo mahse khaw changkang leh nuam ve tawk tak a ni. Dawr an lo la inhawng far a, ka thlen tirh khan motor aṭangin dawr lian ve deuh deuh kha ka hmu a, ka thil zawn an lo kawl takah tiin a awmna lam nia ka rin chu ka pan a, ka kawrlum iptea ka thil ah chu ka hre rauh rauh bawk.

Dawra pakhata ka va luh chuan theitui chi hrang hrang an lo kawl a, mizo siam tui hmel tak tak a tam khawp mai. Ka en lai chuan, "A thlum deuh i zawng em ni?" tiin dawr nghaktu chuan min lo zawt a, "A ruih theih em?" ka tih chuan, "Khalam ami ho kha chu in tam viau loh chuan ruih a har lutuk, chhak lam ami ho kha a strong," a lo ti zung zung a, a sawi ho chu grape leh kawlthei aṭanga siam te a ni hlawm a, ka en uluk viau nain ka zawn ang erawh ka hmu lo. Chutih laichuan, 'Pangpar lem awmna ho kha a tui ania, ruih a awl bawk," dawr nghaktu chuan a lo ti leh a, "Heng hi chu tui ka ti vak lo a," ka ti chu min awih hmel vak lo.

"A chi dang deuh in kawl lo em ni?" A ngawi run run a, a ruk deuha zawrh an neih ka rin vanga zawt ka ni. Mahse, "Heng bak a awm lo, i in vek tawh em ni a, a tui chin hlir alawm kan zawrh," a ti hmak a, a lawm loh hmel riau bawk.

"Hmun dangah ka va en chhin ange," tia kal mai ka tum chu, "Kan zawrh a inang vek, kan lakna pawh a inang alawm," a rawn ti zui leh hram a, ka chhang lem lo thung.

Dawr danga ka va enna ah pawh chuan a chi dang chu a vang khawp mai, ka kal hmasak berna khan an nei chikim ber zawk emaw tih tur a ni.

Dawr lian deuh pakhatah chuan pangpar lem awmna chi hlir kha an lo kawl a, grape aṭanga siamah te pawh pangpar lem chu a chuang hlawm a, dawr danga zawlaidi leh wine chi dang an kawl ang kha an kawl ve lo thung a, hmun khat ami chauh an zuar anih hmel. Dawr nghaktunu lah chuan, "I tem chhin duh em?" a lo ti var a, ka châk lem lo nain ka duh thu ka hrilh a, dawhkan hnuai aṭanga bottle hawnsa a rawn phawrh chu dispo cup-ah a thli chhuak a, a rim aṭang pawhin a strong tih a hriat theih.

"Grape sial deuh aṭanga siam anih hi, an zawngchhang thei teh mai ania," tih pah chuan min rawn pe a. Chhete chu ka han lem a, a thlum dep dep a, a hiar deuh bawk a, a rim erawh a ngai, zu rim hi ka ngaina lo a, kaa a cham phei hi chuan rimchhia ka ti em em ṭhin, ka pa rim te pawh minti hrechhuak deuh.

"A rimtui bik lo maw?" dawr nghaktuin a tih chuan, "A danglamna vak pawh ka hre lo," ti maiin ka chhang a, min nuih kar kar pah chuan a chhin ṭha leh a, "I in ngai lo anih kha, i in ngai loh chuan a danglamna i hre lo ang, ka chhungte siam hi chu a tui fal nalh, a man pawh a tlawm thei lo," a ti nghat nghat a, chhang lo chuan a bottle hmaa thil inbel chu ngun leh zualin ka zuk bih a, "Hei hi eng pangpar nge?" tiin a tlanga pangpar lem tereuhte chu ka kawk a, ani pawn a rawn thlek rang khawp mai.

"Awi, a hming ka theihnghilh daih, an thil siam chhuah hoah hian an dah vek a, pangpar vang deuh anih hi, a hrisel teh ania, damdawi hrang hrang siamnan te pawh an hmang alawm, wine-a an telhna ho hi a hrisel bik ania aw," a ti a, a hming lah chu a han theihnghilh chiang khawp a, "Kawlthei par a ni lo maw?" ka tih lah chuan, "Ni lo, chutianga thei par ang a ni lo, ram dang aṭanga a bik takah an chah luh anih hi," a ti leh zel a, a hrechhuak thei lo chuan, "Eng nge ni kha le, ka lei hmawr chuan a hria," a ti leh ṭhin a, a nuihzatthlak angreng.

Thil dang ka en laichuan mipa pahnih hi an lo lut a, percel an rawn dah niin ka hria, dawr neitu chuan a lo be sawk sawk a, keichuan sanitary pad leh sampoo te ka lo la khawm a, sana ka en chuan let a hun tawhin ka hria, zanin chu vak kual vak lo ila a ṭha ang, ka chau ve deuh bawk nen mut mai te pawh ka duh tawh. Chutih laichuan ka phone a lo ri a, ka lak chhuah rualin a tawp leh daih lawi a; mahse, Zohera nu call a nih vangin thil pawimawh a awm anih ka ring.

Call let ka tum laitak chuan, "Sangpui.." tih ri ka hria a, ka lehhawi rang khawp mai.

"I pute wine bottle-a pangpar lem hi eng nge a hming khah?" tia dawr neituin a zawh chu mipa sang leh ngo lam, sam dum hlap mai a ni. "Kanna anih kha," tiin a lo chhang a, aw ki hniam leh thum deuh dut mai a nei a, a sir zawnga a landan chu ka lo en chik viau bawk. Chutah, dawr neitunu chuan ka lam a rawn hawi a, "Kanna alawm, ka hre chhuak chiah, pangpar satliah a ni lo, kanna hi chu damdawi ṭha lutuk mai anih hi," a rawn ti lang lang a, counter hmaa ding pahnih pawh chu an rawn hawi ve nghal a. 'Sangpui' tiin nichin khan a ko a, an hming a inan mai bakah an san zawng leh an landante chu a inang riauin ka hria. Muansangpuia a an na zawk tak erawh a mitmeng dam thlup leh a pawisawi lo hmel chu a ni, Veroi kha chuan 'Hmel khawngaihthlak,' tiin a sawi ṭhin.

"Hnathawk thar em ni?" tiin pakhat zawk chuan a lo zawt a, "Ni lo e, customer a nih saw," dawr neitunu chuan a ti mai a, an inbe zui luam a, thil lakkhawm pah chuan ka va melh leh zauh ṭhin bawk.

"In sa zo ṭep tawh sia, farm lamah i awm leh chawt dawn a ni maw?" tih ri chuan beng a verh rang khawp mai. Ka kal hnai hret hret a, an ṭawng thawm chu ka ngaithla ran tawh.

"Kar leh lamah chuan kan zo thei tawh mai ang, sapthei zamna siam kan ngai dawn a, hna dang pawh a tam leh viau tawh ang," a sang zawkin a tih laiin, "Serthlum lawh zawh a ngai dawn a tih kha, kan la khawih thei mai lo ang," pakhat zawk chuan a lo ti a, dawr neitu chuan, "Kan rawn pui hman mang si lo che u a, inrinniah kan chhungin kan rawn lo ve ang, naupang hoin serthlum lawh te chu nuam an tia lawm," a lo ti seuh seuh a.

An lampana ka va kal chu mipa pahnihte chuan dinna min lo kian thuai a, "Ka van hmu ngai lo che ve, lo awm thar em ni i nih?" dawr neitu chuan a lo ti leh zung zung.

"Ni deuh tho," tih pahin percel chu ka thlek a, pickle bur niawm tak tak hi a awm a, a rim pawh masala rim te a nam.

"Minai a dam ṭha em?" tiin dawr neitu chuan mipate chu a zawt leh a, "Dam ṭha ang," ti maiin a sang zawk chuan a chhang a, chuta ka han melh chu min lo melh ve chiah a, a mit a la sawn rang viau thung.

"Kan inah lo han chho ula, ka rawn inkhar har lo ang," dawr neituin a tih hnu chuan an inzui chhuak nghal a, ka thil leiman te ka pek fel hnuah kei pawh ka chhuak ve mai a, dawr sirah chuan ding leh rihin ka inngaihtuah muk khawp mai. Farm an sawi kha ka farm hriat ngei kha anih ka ring nghet hmiah a, dawr neitunu lah khan 'Ka chhungte' tiin a sawi bawk a, nichina lo kal pahnih kha farm neitute chhung tho em mawni dawn le, an nih loh vek pawhin farm-a khawsa chu an nih hmel. Anih chuan ka bul ṭanna tur chu he hmun hi anih mai hmel e, hmalak dan tur erawh ngun zawka ngaihtuah a ngai dawn a ni.

Haw pahin Zohera nu chu ka call a, a chhang thei leh tawh lo. Ka thlenin ka han thlen chuan driver kha a lo awm tawh lo a, pi Rini chuan, "Maenga khan a awm reng a, 'A lo haw har em mai, tlangval a rim aniang,' a tia, a chhuak deuh chiah, tunlai chu a lâng ṭhin a, a mu hma duh aniang," a lo ti bal bal a, "Kei pawh ka chau deuh a, mut hma ka duh," ka tih chuan tui lum a awm thu a lo sawi a, thil dang ti khawtlai tawh loin ka inbual a, tui sa ver vawra han inbual chu taksa sil pawh a reh ve huaiin ka hria.

Ka inbual zawh hnua phone ka en chuan missed call a lo awm leh hman a, Zohera nu bawk a ni. Ka mutfel zet hnuaah ka call let a, a lo chhang ta thuai a. "I call ka hmu a, i chhang leh thei si lo a.." ka tih chuan, "Nia, hei damdawiinah kan awm a, Zoa pa nau hi ICU a awm alawm maw le," a rawn ti a, a serious deuh aniang a ṭawngdan pawh a dik zan lo.

"A va zia lo ve aw, a eng na nge?" ka tih chuan, "Lung lam ṭha lo ania, a damlohna pawh a rei tawh, i ṭhianpa hi ka be tlang thei miah lo mai a, a awmna te i hre mial em, zinga a chhuak kha a la rawn haw lo reng reng?" a rawn ti leh zung zung a, a ngaihna ka hre lo khawp mai.

"Ruatfela te i be tawh em, an inkhel a ni lo maw?" ka tih chuan, "Ruatfela chu ka zawn tir mek a, khawiah nge maw a awm ni, a patea a thi ṭep a, a pute pawhin an lam an lam tawh," a rawn ti vang vang a, ka ṭhiana chu thlanah a awm em mawni ka ti rilru neuh neuh a, ka sawi chhuak lem lo thung.

"Tunlai chu kan inbe tlem lutuka," ka tih leh chuan, "A buaithlak khawp mai, Veroi boral hnu hian a zia hi a dang lutuka, a pa pawhin tihngaihna a hre tawh lo anih hi, a rui reng mai bawk si a, hmeichhe ṭhenkhat lah hian an rawn zar peih khawp a, nizanah pawh tu emawin a rawn ko chhuak a, ngaihzawng te hi a nei leh tawh nge ka hre lo, zan tlai deuh deuhah hian a rawn haw a, lo ngaihven deuh rawh aw, ani hi chu hetianga awm thei a ni miah lo ania," a ti luam a, kei tehlul hian engtin nge ka han buaipui theih ang ni, ka thute chu engahmah a ngai dawn lo tih chiang sa a ni.

"Biak ka lo tum dawn nia," ka tih mai laiin, "En teh maw Jenus," a rawn ti sar sar a, ka chhan leh hnu chuan, "Ka'n kalsawn lawk ange," a ti a, a reh deuh vang vang bawk.

A hnu deuhah chuan, "Jenus, i la dah lo maw?" a rawn ti leh a, "Aw, ka hre thei che," ka lo ti let thuai a. 

"Zoa hi chu hetianga awm thei hi a ni lo, a mawhphurhna hi a sang lutuk a, kan neih chhun liau liau hi a ni ve bawk si a. Tunah a patea heti hi a nia, a boral vaih anih phei chuan Zoa leh a pa hi an thlah zinga mipa awmchhun an ni tawh dawn a, a pate unau hi mipa an tlem a, a pa leh a patea hi an ni mai a, an farnu la dam chhun lahin ram dangah pasal nei tawh a, a patea hi a boral anih chuan Zoa hi a pu rokhawmtu tur a ni tawh dawn a, mi dang bulah phei chuan a awm dan hi sawi ngam a ni lo, amah lah hian a hrethiam der si lo a, rilru hi a ti hah tak tak a ni, nangpawn lo hrilh ve la, a nungchang hi siam tum teh ang u, kan ṭan tlan a ngai, kan en liam mai mai chuan a pu hian rokhawmtu tur a nei lo mai ang, hetiang zawng hian nangpawn lo fuih ve sauh sauh teh," a rawn ti duah a, a aw ṭang chuan a beidawng tawh zawk em mawni tih mai tur a ni.

"Ka lo tum dawn nia," ka ti ve tak naa han tih vak dan pawh ka hre bik lo. Kan inbiak zawh hnu chuan ka call a, a tlang thei lo a, ka awmna a hla bawk nen a tih theih nei tlem ber ka ni zawkin ka hria.

Ka muhil chu khawvar hma deuhin ka harh a, ka harh chian em avangin han muthilh leh mai theih pawh a ni tawh lo. Rei deuh chu ka mu meng reng a, ngaihtuahna ka kawm a ni ber. Vawiin lam chu Veroi in luah va hmu ila, inneitute pawh biak a ngaiin ka hria, a bungrua ka lak chhuah theih hma chu luahman te pawh ka pek a ngai dawn a, pawisa a ral duak duak lohnan eng emaw tih ka ngai ngei bawk ang. 

Khaw var rual chuan ka tho chhuak a, pawnah chhuakin khaw chhung lang thei chin te chu ka thlir kual pah bawk a, ka awmna tlang zawl aṭang chuan thui tak thleng a chhuk thlir theih a, khaw dung sei angreng tak a ni. Eng emaw chen ka din hnu chuan kawngkhar hawng thawm a rawn awm a, thlenin pa lo chhuak chuan min hmu mai lo aniang bawlhlawh bawm a va la rawk rawk a, dar a rawn ri zui ral ral bawk a. "Puih i ngai em?" ka va ti thut chu a rawn hawi phawk viau mai.

"E, i la muhil bawrh bawrh ang chu ka lo tia sin, i va tho hma ve, i mu lum thei lo em ni?" a lo ti var a, "Ka mutui lutuk, bawlhhlawh i paih dawn em ni?" ka tih chuan, "Helamah an rawn tlan chho ngai lo a, kawngah zuk dah a ngai ṭhin a," a ti a. "Ka lo pui ang che," ka ti chu min hnial bik lo. Hnawmbawm pakhat chu ka va khaisak a, kawng thlang lamah kan inzui thla hnak hnak a.

Kawngpui kan zuk thlen chuan mi dang pawh an lo awm nual a, pu Liana chu tunge ka nih te an lo zawt a, ani lah chuan, "Ka fanu thuhruk a nih hi, ka tlangval fa," uang fe mai hian a ti a, a fiamthu tih hrethiamin midang pawh chu an nui mai mai hlawm. Kan bawlhlawh paih zo kan let leh lamah chuan high school awmna ka zawt a, veng tawntirh lamah a lo awm a ni awm e.

"Khaw luh tirh maiah khan, ding lamah a peng a lo awm ang, mual dung chhirin i kal anga, in pahnih thum vel chu a thlen hmain a awm kha," a ti sam et a, eng nge ka tih dawn min zawt lem lo.

Thingpui min lum sak a, in pahin kan titi dun luam a, ka chanchin min zawh avangin dawt ka sawi tam khawp mai. "Thuziak mi ka nia, khaw hrang hrang fan kuala thu ziah hi ka nuam tihzawng a nia," tih angreng ka sawi chu a awih hmel khawp a, "Ka chanchinte i ziak duh em, tlangval lai chanchin ngaihnawm deuh deuh ka nei ve ania," tiin a nui leh huk huk ṭhin. Pi Rini lo thawh hnuah eirawng kan bawl ho a, thlenin pa chuan a sakhi sarep dahṭhat a rawn phawrh a, saum leh hmaichapui te nen a bawl phuan suah a, a chhum chu ka ei ve tawh a, hetianga siam erawh ka vawikhat eina a ni.

"Kal chhuah i tum a maw, i ṭhiante chu i va hmu dawn em ni?" tia pi Rini'n min zawh chuan, "Aw, vawiin chu high school lamah ka va kal a nge, khaw fan pah a ni mai," ka ti sam mai a, "A hla a sin," a ti nain kea kal chu  ka duh mah a, veivah nana pawisa sen tur pawh ka nei chiah lo a ni, ka inren a ngai tlat.

Tukṭhuan eikhama ka chhuah chuan dar 10 a la ri lo. Veng hmawr lam pan chuan ka kal hlawk hlawk a, chhun lamah chuan mi veivak an tam a, min lo melh hrek hrek tawk pawh an awm. Zan lama ka dawr kalna te pawh kha ka pel phei hlawm a, farm chungchang ka va hriatna dawr pawh ka va thlek leh zuai a, nizana dawr nghaktu erawh ka hmu tawh lo. Mipa pakhat hian a lo nghak a, customer an awm laih laih bawk a, ka lut tawh lem lo thung.

Ka kal thui viau hnuah pawh High school peng chu ka hmu mai lo, khaw tawp ka thleng dawn tawh tihah chuan pa pakhat ka zawt a, "E khai, i rawn pel thui lutuk tawh, kawi thum vel let leh rawh, a pengah chuan YMA sign board a lo intar ang," a lo ti hem mai a, ka let thui leh angreng khawp mai.

Sign board ka va hmuhna chu kawi thumnaah chiah chiah a ni, ding lama kawng peng chu ka zawh a, thui pawh ka thlen hmain phul awmna field zau deuh hi ka va hmu a, an hmang ngai lo em mawni tih turin phul ṭo te pawh chu ngal chen dawn te a ni hlawm. Khawchung maia awm si ah chuan an va bei hnim ve ka ti rilru a, kawngpeng lah chu pathum lai a lo la awm zui a, kalna ber tur pawh ka hre ta lo.

Pu Liana khan, 'Mual dung chhirin kal rawh' a ti ringawt a, mual dung chhir dan pawh ka hre der lo mai.

Chutia pan lam tur hre lo a ka hawi ka hawi laichuan hla deuh hleka nu pakhat nau paw chunga lo kal hi ka va hmu ta hlauh a, ka awmna lam kawng a rawn zawh vang chuan ka lo nghak ta rih a, ei tur zuar a nih hmel. Ka bul a lo thlen hma deuh chuan, "Momo ka nei asin, min dawr ta che," a rawn ti lang lang a, a hmelhriat hmu ang maiin min rawn nuihsang bawk.

"Ka puar rih em mai," tih pah chuan ka nuih let ve a, ka bul a lo thlen rual chuan, "School lamah i zuar dawn em?" ka ti nghal thawr bawk a. "Ka va thleng phak lo deuh ang, sawng laiah sawn ka zo hman ṭhin a," a tih chuan, "Ka lo zui ang che, school awmna ka chiang lo deuh a, min kawhhmuh rawh aw," ka ti leh zung zung a. "Kawng peng dang a awm tawh lo, hemi kawng hi zawh zel la i thleng mai ang, saw lai deuh lawkah sawn a awm," tia a kal chu ka zui ve ta nghal a; mahse, thil a zawrh vangin a peng leh rang viau thung. Ka nghah zel chu ka rei mah mah dawnin ka hria a, kawng peng dang a awm lo tih bawk avangin ka kalsan leh ta zawk a. Thui tak pawh ka kal lo, school dar ri ka hre thuai a, an school chu thingkungin a lo hliah deuh avangin ral aṭanga hmuh a lo har mai mai zawk a ni.

Phur angreng deuha school compound ka va thleng chuan a lo reh angreng fu mai, class an la mek anih hmel. Tualzawlah chuan ka han ding leh ren rawn a, office niawm tak chu ka va hmu zui a, 'Hei hi maw nitina i kal ṭhinna office chu, ṭhian ṭha te pawh i nei turah ngai ang, i chanchin an sawi dan te pawh hriat ka va tum ange,' tia mahni inbe mawlh mawlh chungin ka pan phei a, ka thlen hma deuh chuan mi pakhat lo chhuak ka va hmu bawk a, min rawn thlek deuh vung vung hnuah office-ah chuan a lut leh nghal mai a, tukverh inhawng aṭang chuan mi pathum pali vel an awmin ka hria.

Ka va lut chu min lo en ṭhap a, "Miss Mathani a awm mial em?" ka han ti hmasa te te a, a hming ka hriat ve chhun kha a ni a, Veroi nen an inbiak dan ka chhiar aṭang pawh khan a inpawh viauin ka hria.

"Class a la lawk a, a zo har lo ang, lo nghak rawh," mipa pakhatin a lo tih chuan ṭhutna tur ka melh nghal a, dawhkan tinah chuan chair a inhung naa va pan thawr chu a mawi mang lo.

"He tah lo ṭhu rawh, miss Mathani ṭhutnaah hian," hmeichhe pakhatin a lo tih chuan ka pan rang khawp mai. Ka ṭhutfel hnu pawh chuan min lo la en reng hlawm a, ka hnaih bera ṭhu hmeichhia chuan, "Eng lam nge ni a, an chhungte em ni?" tiin min lo zawt a.

"Ni hran lo e, Aizawl lam aṭanga lo kal ka nia, miss Veronicai chhungte lam zawk," pangngai deuh taka ka tih laichuan an rawn hawi phawk ta khawp a, mipa awmchhun pawh chuan a phone khawih lai a dah rang viau a ni.

"Veroi chhungte maw, in lo lang har kan ti hman lutuk alawm, khawi lo inchibai ang," tiin mipa chu a lo tho a, kum 40 bawr vel, sa ṭha lam deuh leh hmel pawh pangngai tak a ni. Hmeichhe pahnih awm ve pawh chuan min lo chibai ve nghal a, "Miss Zuali ka nia, ani hi Miss Tluangi a nih hi," a naupan hmel zawkin a tih laichuan mipa awm chhun khan, "Min sawi ve law law la," tiin a lo nui hui a.

"Sir Kima a nih hi," nulain a tih leh pawh chuan a la khi hui reng.

"Thu thar deuh te a awm tawh em, Veroi in luahnate khan min zawt leh ṭhin a," miss Tluangi'n a tih chuan, "Awm rih lo, a bungruate ngaihven tura lo kal chu ka nia, he lamah thuthar a awm zawk te ka lo ring asin, Headmaster te lam pawn engmah an la hre bik nange?" ka ti ve hlut a, an hmel aṭang chuan ka zawhna chhanna chu a lang reng mai.

"A mangan thlak ngawt mai, police lah hi an che muang angreng bawk si a, hma lak dan vak hi an hre lo nge mawni, a zuzi ringawt ang tih pawh a hlauhawm tawh," miss Tluangi'n a ti leh a, "Veroi chu kan ngai teh asin, a class pawh ka laksak rih a, a aiawh an rawn dah leh mai bawk si lo a, headmaster kan nei bawk si lo," ka bula ṭhu chuan a lo ti ve bal bal a, dawhkan hmaa ding pawh a inngaihtuah muk hmel viau mai.

"Kei aichuan in kiangah a khawsa tam zawk a, han rinhlelh deuh emaw, a awmdanah mak han tih turte in nei lo maw?" ka tih chuan engmah an hriat loh thu an sawi sap sap a, "Zu te a lo in ṭhin mial em?" tiin ka zawt leh tawl a, ka en kual laichuan sawi hreh deuh chu an nei hlawm niin ka hria.

"Min hrilh tawp rawh u, rinhlelh tur eih pawh kan hre si lo a, kan ngaihdan thawhkhawm ila hriat te pawh kan neih belh maithei ania," ka tih leh laia an inmelh kual chu ka hmu reng a, a mipa ber chu an en deuhin ka hre bawk.

"A boral zan khan a rui e an tia," tih pahin mipa ding chu ka va melh a, amah ka zawt bik tih a hrethiam aniang, "A...chaw eikhawm changa han in ve zeuh chu kan nei hlawm a, rui bur bur ang phei chu kan ni lo, zu pangngai pawh ni loin wine ṭha deuh chi te ania kan in ṭhin, zu in ṭhin tia sawi tur chiah pawh a ni lem lo maw le," a lo ti nuah nuah a, chu chu keipawn ka rindan ve tho a ni.

"Ngaihzawng te a nei mial em, han sawi ve zauh chu a nei a, in lo hriatpui em?" ka tih chuan, "Awi, ngaihzawng chu a nei a, chhun chawlh lai hian a be ve ziah a, kan khua ami a ni loin ka hria," ka bula ṭhu chuan a lo ti vat a. "Primary teacher nen khan an ni ve hman lo maw?" mipain a lo tih chuan, "Khapa te kha chu a duh lo lutuk," ka bula mi chuan a lo ti leh vat a.

"Tu nge chu pa chu?" ka tih chuan, "Robert-a a nia, primary teacher, tlem lai deuh khan Veroi hi a ngaizawng ve ṭhin a; mahse, Veroi kha chuan a message pawh a chhang ṭha duh lo," ka bula mi chuan a lo ti zung zung a. "A rinhlelhawm thei em?" ka tih chuan, "Rinhlelh tur chi ni pawhin ka hre lo, Roberta chu a fel angreng a, kohhranah pawh inhmang deuh mai, nungchang ṭha deuh hi a nia, mi han tibuai emaw han zar buai vak chi pawh a ni lo, a zakzum bawk a, Veroi zawk khan a bawl lek lek ṭhin," mipain a lo tih chuan ngaihdan dang deuh ka nei a, hepa hian Veroi a hriat chian hmel riauin ka hria.

"Mahse, rin loh tak te pawh hi an lo ni ve thei tho asin," ka ti leh hram a, ngaihdan an nei vak lo aniang min chhang lem lo.

"Tu nge hman deuha naupang hoin an chhaih ṭhin kha, kha pa pawh khan a ngaizawng an ti tlat, venglaiah sawn dawr an nei a, a hming ka hre leh tawh lo," miss Zuali'n a tih laiin, "Nunpuia maw, nupui a nei daih tawh alawm," mipa bawk chuan a lo ti leh a. "Veroi chu a luck ve alawm, ngaihzawngtu an awm nual ang; mahse, hetianga ema che duh tur chu rin dan pawh ka nei thiam lo," miss Tluangi'n a ti ve bawk a, ka duh ang chhanna ka dawng meuh lo. 

"A ngaihzawng chungchang chu a sawi ngai miah lo em ni?" ka tih leh pawh chuan, "Bialpa ka nei chu a tia, a bak chu ka hriatpui lo reng reng, amah ngaizawngtute  a hnarna pawh a ni ve maithei," tiin mipa chuan min chhang a, ka ngaihdan pawh a dang leh ta deuh, ani pawh hian ka rin ang em em chuan a hre thui lo anih hmel.

Rin dan ka thlak kual zut zut laichuan, "Kei chu miss Veroi lam aichuan Headmaster lam zawk hi a fel lo anih ka ring," a rawn ti ta khauh a, chu chuan beng a verh khawp mai.

"Eng nge i rin chhan?" ka lo ti thuai a, mi dang chu a ngaichang aniang a va melh hmasa te te phawt a, miss Tluangi'n, "Anih zawk ka ring alawm keipawn, a nupui chhungte saw an rinhlelhawm ka ti, khuaah an rawn kal khat bawk si a, thil tih ruk neuh neuh te hi an neih ka ring tlat," a lo tih chuan sawi ngam niin a hria aniang chu dawhkanah a rawn ṭhu zui a, "Ruihhlo an zawrh ruk ka ring deuh a, Headmaster hian a report emaw ni ta se tiin ka lo ngaihruat mai mai a," a rawn ti sar sar a.

"Chutiang ni tase, Veroi an thah ve chhan hi eng nge niang," miss Zuali'n a tih chuan, "Veroi hian inrawlhna a nei ve a ni maithei, anih loh pawhin Headmaster nen an inhmuh lai takin misualte hi an che pawh a ni thei a, an thah chhanah hrim hrim hi chu Headmaster vang anih ka ring hmiah," sir Kima'n a tih chuan hmeichhe pahnih pawh an rilru a buai hmel nak a.

"Miss Mathani kha chuan Veroi hian pawisa a nei thei lutuk a tia, a ring bik vak lo chu anih hmel kha.." miss Tluangi'n a ti chu ka bula hmeichhe ṭhu chuan a lo mitmei zauh a, "A, mahse..Veroi kha chu nula inrenthiam deuh a ni ve a, a inkhawl ṭen chu ka ring," a ti leh rih a, ka bulah chuan sawi hreh chin an neih avangin han sawipui vak pawh a har dawnin a lang.

"Tihah chuan headmaster chhungte pawh hi mi chuan an fak teh asin, mirethei tana an inhawn ziate an sawi fo mai, an farm-a va inhlawh ṭhin ho phei chuan an fak hlawm lutuk, hmannia kan inleng te pawn an thilphal ziate an sawi nasa alawm," miss Zuali'n a tih laiin, "Kan school pawh hi kan head nupui pu hoa din a nia lawm," sir Kima'n a lo ti ve a, eng emaw han zawh belh leh mai ka tum laiin, "Dar vuak a lo hun reng anih hi," tiin sir Kima chu a tho zui a, veranda-ah va chhuakin dar a va vaw ri bawl a, naupang ho thawm a ri nghal mam mam a, rei vak loah zirtirtu dang an lo lut bawk.

"Inleng kan nei elo?" pa pakhatin a rawn tih laiin, "Thil i zuar em ni?" pakhatin a lo ti ve bawk a, a hnung bera lo kal chu miss Mathani a nih ngei ka ring.

"Hei, Veroi chhungte lamin min rawn tlawh anih hi," sir Kima'n a tih chuan, "Chutia law, a u em ni i nih?" tih pahin min rawn chibai hlawm a, miss Mathani lam ka va hawi chuan min lo en chik khawp a, a hriatthiam loh hmel viau bawk.

"A u chu ka ni mai ang chu, laizawn anga inen kan nia," ka tih chuan, "Mak ka ti reng a, a u kha a zeng tih a sawi bawk sia," tih pahin miss Mathani chuan min rawn chibai ve a. "Eng emaw hriat in nei tawh em?" tiin lo lut thar pakhat chuan min lo zawt leh a, "Engmah han hriat thar pawh a awm lo," ti maiin ka chhang a, miss Zuali chu thingpui lum turin a ti zui a, miss Mathani chuan a chair-a ka ṭhut vangin stool a va la a, ka bulah chuan a rawn ṭhu ve mai bawk a, ka lo en chik em avang chuan a awm a nuam lo deuhin ka hria. 

A inchei dan chuan ka mit a la deuh a, a upat hmel tawh ang aiin a la inchei nalh angreng a, an thawhpuite zingah pawh a hmelṭha ber a, a sam pawh chu pianpui kir ni loin tih kir chawp a ni, lan dan ngaipawimawh tak a nih hmel. A mitmeng aṭang chuan han lem ve thei mai hmel a pu bawk a, zung bun a bun loh danah nula senior a nih loh chuan nuthlawi a nih ka ring.

"I damṭha maw, Veroi khan i hming hi a sawi zing a, ka rin aiin i la nula daih mai," tiin ka han nuih var var a, min nuih let pah chuan, "Ka sun lutuka ka tar bâwih bâwih maiin ka hria, ka nau anga ka en ve a nia, a boral aṭangin mut pawh ka la mu ṭha thei hleinem," a ti ve luam a, han mu ṭha thei lo hmel phei chu a pu lem pawhin ka hre lo.

"Naupang ho hi an chiai ve lutuka, keini pawh minti ralkhel alawm, zan chhuah te kan khap a, kan thawhpui pahnih a rualin an boral bawk si a, a hlimchhawn phei kha chuan kan mangang teh asin," thingpui lum pahin miss Zuali'n a lo ti leh luam a, mi dang pawhin a hlimchhawna an awmdan te leh a ṭhawn ziate an lo sawizawm ve barh barh a, a ṭhenin Veroi bungruate engtin nge kan tih dawn min lo zawt bawk.

"A in luahah ka la kal lo a, a theih ang ang chu helaia tihral dan dap mai a ṭha ang," ka tih chuan, "A fridge kha ka lei duh ania, tlawm tea i phal chuan ka lo hauh ange," lo lut thar pa pakhat khan a lo ti zauh a, "A dawhkan leh long chair te pawh kha a hralh vek theih ang chu," tih angreng an sawi zui leh a, miss Mathani'n, "A pangparte kha a la nun ṭhat chuan ka lo la dawn nia," a lo ti bawk a, a tumah chu aw ka pawh lem lo a, zawh duh ka ngah vangin ka tawt ru ṭun mai bawk.

"Thil sawipui duh che ka ngah mai," miss Mathani bula ka va ti zauh chu phawk lek lek hian min lo en a, "Nakinah kan sawi dawn nia," tiin miss Zuali hnenah thingpui thlum a duh loh thu a hrilh zui a, an thawhpuite lakah hian an inveng run hlawm maiin ka hria, ṭawngkam chhehsual an hlau em em bawk a, a hmaa tlang deuha an sawi ang khan ka biak hmasak te pawh chuan an sawi ngam meuh tawh lo. An rinhlelh deuh an han sawi leh pawh chuan, "Kan khaw mi pawh an ni kher lo maithei," te an ti leh hlawm a, ngaihdan thuhmun an nei hlawm lo anih loh vek chuan an inhlau tawn anih ka ring.

Thingpui kan in laichuan an office chu ka thlek kual a, engkim chu a pangngai thlup mai a, mit la deuh thil pawh a awm lo. Pa upa lam pahnih lah chuan Veroi chu hahipin an lo fak a, a fel thu leh naupangin an ngainat ber a nih thu vel a ni a, a thawhpuite lakah chuan a lo tlatlum viau anih hmel. "Headmaster nen khan an innel em?" tia ka zawhna pawh, "Veroi chu kan nel vek alawm, headmaster phei kha chuan fanu ang maiin a en a, chawlh a dilte hian sawi nawi a nei ve ngai lo, mi dang min hauhna angah pawh ani chu a hrethiam viau zel a, a naupang ber a ni bawk a, kan duat rawn hrim hrim a," tiin min chhang a, an inngaizawng em tih chu zawh chu an ni loh hmel riau a, zawt pawh ni ila min chhan dan tur chu a chiang rengin ka hre mai.

Thingpui in zawh chuan ṭhenkhat chu class la turin an chhuak hlawm a, kei pawh chuan haw mai ka duh thu sawiin miss Mathani chu Veroi in luah awmna ka zawt a, pawn thlengin min lo zui chhuak bawk. Kan awm fal hnu chuan ka zawh duh kha ka zawt ta tawl a, ka lo hria chu mak a tih hmel khawp mai.

"A rei tawh asin, miss Zuali nen chauh kan hriatpui a, amah khan a sawi chiang thei mang si lo a, han tih vak ngaihna pawh kan hre lo," a ti ve hlut a, "Khami ni khan tu tu nge kal ve che u?" ka tih chuan, "Kei leh miss Zuali bakah sir Ṭanpui kan nia, headmaster te huan kawngah khan thing kan phun a," a ti a, sir Ṭanpuia a tih chu an zinga upat hmel ber, pa tawi leh cher lam deuh kha a ni a, a upa ber bawkin ka ring.

"Veroi khan Headmaster chu naupang ho nen mau an sat a tia, sir Ṭanpuia chu khawiah nge a awm ve?" 

"Awi a, ani te chu kan bulah a awm reng alawm, rinhlelhawm chi a ni lo, nupui hlau leh mi ngurchuai lutuk a nih saw, kan thawhpuite lam aichuan huana hnathawka inhlawh ho kha an nih duh hmel zawkin ka hria," a ti sar sar a, kan ṭawng thawm mi dangin an hriat a hlau aniang a ṭawng zawi viau bawk.

"Hnathawk chu an tam viau em, lo be ṭha deuhtu emaw te an awm lo maw?" ka tih leh chuan, "Tuman an lo biak pawh ka hre lo, kan awm ho reng a, tui sem nula ho kha ser kan vel laiin an lo kal ve a, mipa phei chu kan bulah an lo kal lo hrim hrim," a ti leh luam a, "In a awm hnai lo em ni?" ka tih chuan, "Hnai lutuk lo, school aṭanga kal kan nih vangin headmaster pawh khan an inah a tlang bik lo a, Veroi awm dan vang khan tlaiah a haw ve chauh bawk a," tiin min hrilh leh a, a sawi ping leh lutuk chu mak ka ti lek lek zawk a ni.

"Anih, a hmu hmasa bertu kha i hria ti raw?" ka ti takah chuan, "Ni tak," a ti deuh hluai a, "Kha pa khan, 'Motor kawngka inhawngin a lo mu' a tia, Veroi pawh khan a ringhlel alawm; mahse, Lawmsangpuia kha chu a fel an ti riau asin, headmaster hnena kan zawh pawh khan a lo fak angreng a, zu pawh a in ngai lo niin a sawi a, amah Veroi berin a sawi chiang thei lo khan a ti buai vek," a ti sap sap a, "An thihna nen a inzawm theiin ka hria a, lo ngaihtuah ngun deuh teh aw," ka tih chuan a hriatthiam loh hmel khawp mai.

"Headmaster te lam hi i ringhlel ve deuh em ni?" a ti khauh mai a.

"Ve e, i ring ve zawk em ni?" ka ti ve vat a.

"Ka hre lo, lo sawi ve vak hi ka duh lo a, kei chu ka hlau tlat, ka ṭawng sual palh ang tihte hi ka hlau ania," a ti bal bal a, a hmelah pawh a hlau tih chu a hriat theih.

"Ka bulah chuan sawi hreh suh, keimah aṭang chuan engmah a chhuak lo ang," ka tih chuan, "An innel lutuk, thil han sawi ruk ser ser te hi an nei ṭhin a, an inngaizawng emaw ka ti lek lek ṭhin. Mahse, Veroi khan ngaihzawng a neih thu leh pasal a neih mai theih thu kha a sawi ṭhin a, headmaster pawh khan a hre ve tho a, inngaizawng pawh an ni lo mai thei, a ruk hi chuan kan ringhlel ru vek hlawm," a ti leh ta zel a, an rinhlelh chhanah chuan zawhna ka la nei cheu mai.

"Veroi kha a hlawh tlem ber a nia; mahse, thawmhnaw thar leh incheina neuh neuh kha a lei reng thei a, hmai hnawihte pawh a man to chi hlir a hmang ṭhin, an inah chaw kan eikhawm ṭum pawh khan ka rin aiin a lo khawsa nuam a, a hlawh ringawt chuan a tlin lo ang, a rawn thawh tirha a awmdan leh a boral hmaa a awmdan chu a inthlau ve hman alawm," a ti leh luam a. Zohera'n thil a thawn fo tih chu ka hria a, pawisa pawh a pek ṭhin ka ring a, miss Mathani ngaihdan pawh rinna chen chu ka nei a, ngaih sual loh ka duh lutuk vang nge ni han rinhlelh chu ka hreh tlat a, chuanlam ka dap a, keimah leh keimah chu ka inhrilhfiah ru leh hmanhmawh ṭhin.

"Lawma chu engtin nge ka hmuh theih ang?" ka tih chuan a ngaihna a han hre lo khawp a, "Mimal taka kan hriat a ni lo a, farm-a thawk a ni tih chiah kan hria, khuaah phei chuan ka la hmu ngai lo hrim hrim zawk, a hmel en phei chuan misual ni a rin theih chi pawh a ni lo, chuvang ania miss Zuali pawn a awih vak duh loh chhan ni..." a ṭawng tawp lam chu a zuih ral khawp a, "Eng nge a awmzia?" ka tih laia a mitmeng chu ka rinhlelh zawng tak a ni.

"Miss Zuali chuan Veroi kha a rui a nih a ring a, tuman an khawih tak tak a ring lo, huatah la lo la, damdawi a khawih anih a ring a, kei chuan ngaihdan pawh ka nei thiam ve vak lo.." a ti leh niah niah a. "Damdawi chu in ei dun ṭhin a ni lawm ni?" ka ti chu phawk fahran hian min melh a, "Ka hre vek alawm," ka tih leh phei chuan a zam hmel viau tawh.

"Eng lo ania, zu hi a in thei vak lo a, a rilru hah deuh chang khan ka pe ve ṭhin a..ah..a ei regu ve vak lo ani kha chuan.." a riat nawi khawp mai a, zep dang a la neih ngei ka ring. Veroi nen an inbiakna aṭang khan damdawi an ti ṭhin tih ka hre tawh a, pawisa chungchang te pawh an sawi dun a, henu hian eng eng emaw chu a sih hmuh ṭhin tih pawh a hriat theih a, engthil tak nge tih erawh an sawi lang lo thung, heng ka hriat vanga amah kher hi va zawng pawh ka ni.

"Tlang deuhin min hrilh vek rawh, anih loh chuan i tan pawh a hlauhawm thei ania, Veroi chunga thleng ang hi i chungah a thleng ve thei, tualthattu i hria anih phei chuan min hrilh ngei ngei ang che," vau deuh pah chuan ka sawiṭhaih a, zam chhe sa a ni bawk a a mitmeng pawh a dik meuh lo. "Ka hlau alawm keipawn, rinhlelh tur ka hre bawk si lo a, ka awm a nuam thei lo, ka thawhpuite bula awm pawh hi a hrehawm ka ti, tu emaw ber hi lo nita se, min huat ve mai te ka hlau a, hmun dangah phei chuan ka chhuak ngam tawh lo hrim hrim, rinhlelhawma awm ka hlau lutuk," a ti mawlh mawlh a, a ṭawng pah chuan a kut a tuai neuh neuh bawk a, a hlauh luatah a thilsawi pawh a hrechiang lo a ang.

"Engthilah maw an rinhlelh ang che?" ka tih chuan a ka hau mai.

"Rinhlelhawma awm i hlauh thu i sawi zawh chiah kha," ka ti leh zat a, a ang zuau a, a sawi duh leh chiah lo aniang, "Chutiang lam a ni lo, ka sawi awmzia zawk chu, mi pawisawi palh ka hlau a, an case chungchang hi sawi vak loh ka duh, misual hi kan hmelhriat pawh a lo ni thei a," a ti leh duah a, hetiang lo deuha indawr ni ila ka ti ngei mai, talhtum nena dâwp te pawh a chakawm zawk alawm maw le.

"Khawi aṭangin nge pawisa a neih ṭhin i hria ti raw?" Beidawn hmel fe hian min melh a, pha turin a insawi awk laklawh ve tawh si leh a sawi hreh bawk si chu a khawngaihthlak lek lek zawk a ni.

"In inbiakna chat te kha ka lo chhiar vek alawm," ka tih leh takah chuan thawk a han la ham ham a, chumi hnuah heti hian min chhang a. "Bungrua a kawl ṭhin a, motor-a lo thleng hi a va lam a, a in luah aṭangin mi dangin an lo la chhawng leh ṭhin," a ti ta a.

"Drugs maw?" ka tih chuan, "Ka hre lo; mahse, pawisa a hlawh ṭhin a, keipawn tih ve ka chak thu ka hrilh a, vawikhat chu hotel pakhatah min dah tir a, kha bak kha chu ka tinawn tawh lo, ani pawh khan bansan a duh a, a thawhpuite lamin an remti lo anih ka ring, bansan a tum hnu lawkah heti hian a boral leh ta sia, an inrem thei lo aniang," a ti niah niah a, chutiang ringawt chu thil thlen dan niin ka hre lo.

"Headmaster chhungte lam an nih i ring a ni lawm ni, a hmaa i thilsawi dan nen a va inpersan leh si ve," ka lo ti hlak a, ka dawhthei vak tawh lo.

"Aw, kha tak kha ania, kan head khan a lo hre ru a, a zilh bawk a, chuvang ania Veroi khan bansan a duh, a ti zel anih chuan headmaster khan report a tum alawm," a ti a, a hmelah chuan dawt sawi hmel a lang lo.  Mahse, ka va han lungawi lo tehreng, ka beisei angin engmah a awm lo, chu a hnekin hriat chhuah ka hlauh ruk ang thil hlir ka hre zawk a, ka ṭhiannu vang a ni tih pawm chu a har ka ti a ni.

"A thawhpuite chu i hria em?"

"Hre lo, Veroi chiah khan a hria, hotel-a ka va kal pawh khan dahna tur min hrilh a, pawisa min pe tute hmel pawh ka hmu lo," a ti mai si a, a bak chu han hriat belh tur engmah a awm lo a ang. Pawngsual thu lah chu ngaihdan neih thiam pawh a har tawh, ka ṭhiannu kha ka ring bur mai dawn nge tiin ka rilru a buai ve nak a, chu zawng aichuan tualthattu pawi khawih zawk hi rilruah lian zawk sela a ṭha tiin ka inhrilh bawk a, engtin pawn ka ṭhianni chu lo khawsa mahsela tualthattu sualna a nep phah lo va, Veroi lah a tuartu a nihna a bo hek lo, chu chu rilruah ka dah lian ber tur a ni ang.

"I phone number ka nei tawh a, ka rawn be leh ang che," tia ka hrilh hnuah ka kalsan a, ka haw lam chu ngaihtuahna a buai map a, ka lo inngaihtuah nasa deuh aniang ka hriat chhuah chuan thui fe ka lo kal hman tawh. 

Veroi in luah lam ka pan ding a, ka va inzawng chawp leh viau mai. Rin aitakin a in luah chu a lo lian a, rcc in hnuaiah, kawngpui chung maiah a ni. In neitunu lah chuan mi a lo lawm khawp a, "In lo kal har lutuka, kan lo mangang hman alawm, tinge hetah i rawn thlen mai loh, a inah pawh i thleng thei tho si a," a lo ti zung zung a, pitar kum 50 chuang tawh a nih ka ring.

"Tih tur neuh neuh ka la nei a, a luah man ka pe che anga min lo la nghak rih thei angem?" ka tih chuan beisei loh dan deuhin min chhang a, "In luah man chu thla 6 a pe lâwk a, a boral hma thla lawk khan ania, i duh chuan luahman chawi a ngai hran lo, kir leh zawk pawh i ngai anih chu," a ti mauh mai a, a hmuh loh lamah thawk ka la hluai ringawt. Rilruah zawhna a rawn lut zut zut a, lung a dam lo takzet a ni.

In chhunga luh ka duh vangin kan inzui thla a, ka han luh takah phei chuan ka ṭhiannu khawsak dan chu a fiah kuar kuar tawh mai. Sofa leh fridge la thar tak te, parda leh bungbel mawi tak tak te bakah air cooler leh tv lian ṭha zet te, chhuara eitur chi hrang hrang awm te nen, a khawsa nuam tih hai rual a ni lo. A eitur dahna chhuar te chu dawrte nimai awm hi a ni a, in tur leh noodle bakah chips chi hrang hrang a inrem khat dul mai.

"Heng eitur vel hi in lak duh ka ring a, a chiat hman ka lo hlau lutuk alawm," in neitunuin a tih chuan ka chhang lo, ka ngaihtuahna a tawi turh a, ka tha a zawi zo a ni ber.

"Chahbi chu ka lo kawl mai dawn em ni, hotel-ah ka thleng a, ka rawn insawn duh ka ring," ka ti chu a lo phal khawp mai a, "Pawisa chu engtin nge kan tih ang, i haw dawnah kan sawifel mai dawn em ni?" a tih chuan, "A ṭha mai alawm," ka lo tihsak a, "Lo en kual rawh, thingpui i rawn in chho leh dawn nia," a tih hnuah min chhohsan a. A kal liam hnu chuan ṭhutthlengah ka ṭhu thla hnawk a, eng emaw chen chu ka che chang lo va, ka inngaihtuah lungpuam deuh tein ka hria.

'Ka ṭhian, hringnun hi engtiang chiaha nuam nge a nih theih a, engtiang taka holam nge a nih theih i hre tawh em, hei hi em ni kan thlakhlelh chu, dam chhung khawsak ngaihtuah hi kan damchhan em ni dawn le?' ka ti ru vawng vawng a, ka mittui a rawn luang thla ngiai ngiai mai. 

Hnuk ulh ṭun chungin a khum leh thawmhnaw dahna te chu ka va enkual a, 'Rei lote chhunga hlimna leh nawmsakna mai an nih hi, vawikhat tal inngaihtuah nawn la ka van ti em, kei emaw Zoa emaw pawh i rawn ngaihtuah lo em mawni le..' ka rilrua thil awm chuan min tina zual, hria ni ila chuan kan dang ngei ang, hetianga a nun hi kan phal lo anga, a la dam phah ngei bawkin ka ring.

In neitunuin "Thingpui lo in rawh, ka siam zo tawh," tia min rawn koh vangin ka inkalh ṭha sawk sawk a, in chhung ka han luh chuan a fanu pawh a lo awm a, Veroi chanchinte kan sawi ho luam a, a fel an ti khawp mai, fakna thu hlir an sawi a, min hnem lo viau mahsela chu tluka hriat nuam a awm chuang lo. A thuruk chu ka thuruk a ni a, a natna pawh ka natna a ni, chutiang bawkin a pawi khawihtu pawhin ka lakah pawi a khawih a, ka thutlukna pawh a la ngai reng, ka hriat chhuah hma chu ka bansan lo anga, hremna ka pek theih ang apiang ka pe bawk ang.

Ka thlen ina ka kir leh chuan ka inbual a, pi Rini bulah zan riah ka ei chak loh thu hrilhin pindanah ka tawm chawt a, ka ṭhiani chu ka sun ṭha leh a ni ber e. Vawikhattê mah ka chhing lo, a tuk lamah pawh ka inkhung chawrh chawrh a, ka awm dan chu ṭha ka ti lo viau chungin ka mamawhin ka hre ve tlat lawi a, ka zia leh mai ang tiin ka inhrilh bawk. 

Thlenin nu lah chuan min han ngaihtuah khawp a, chaw ka ei loh vangin an lo mangang fê hi a lo ni a, tlai lamah phei chuan vawksa rep te min chhumsak hluah a, ka tan ei loh chu thil mawi pawh a ni ta lo.   Zan riah kan kil laichuan ka ṭhiannu in luah lama ka insawn tur thu chu ka hrilh a, mi an ui der ve khawp mai. "Ka rawn leng ṭhin ang, ka la cham rih dawn alawm," ka ti ve thlap a, zan khat dang ka riah leh hnuah ka chhuahsan ta bawk.

Veroi ina ka luh zan chuan u Manuni ka zuk bia a, "Hralh theih ang ang i lo hralh dawn nia, bungrua phei kha chu hralh deuh vek rawh," a rawn ti mai a, eng eng nge a neih pawh a rawn hre si lo a, keiin hrilh chi ah ka ngai bik lo. An rilru a na thar mai mai dawnin ka hria a, ka zêp tam khawp mai.

In neitute an fel a, mi an rawn ngaihven peih ang reng a, chaw ei tur pawhin min sawm zing viau a ni. Eng nge ka tih hmasak leh ber ang tiin ka inngaihtuah buai khawp a, ka bul ṭanna tur nia ka hriat lah chu va tawngpawng luh mai chi a ni lo a, rawlrala che ṭhin ang hrima va luh ruk chu ni thei chiahin ka hre si lo, ngaihtuahna a buai leh map ṭhin.

Kar khat dawn chutianga ka awm hnu chuan thil danglam deuh hi ka hre ta a, dawra ka kal hlanin tu emaw hian in neitu hnenah miin an luah em tih leh tunge ka nihte a lo zawt niawm tak a ni. "Tlangval hmelṭha deuh mai a nia, i in êng hi a lo hmu a ni awm e, Aizawl lam mi i nih thu ka sawi khan a dilchhut deuh a, eng ti tura lo kal nge i nih te min zawt a," a ti a, a hmel landan ka zawh chuan, "Tlangval la upa lo tak a nia, ngo leh sang deuh a ni," a ti mai a, a fanu lah chuan, "Hman zana kawngpuia ding reng kha a ni lo maw, kan in lam hi a rawn thlir reng a," a lo ti ve hlut bawk a, an hriat ngai a nih loh hmel em avang chuan Veroi ngaihventu tu emaw tak chu an awm anih hmel.

A zan aṭang chuan light ka ti thim ta hmiah a, in neitunu hnenah chuan,"I hmuh leh chuan ka awm leh tawh loh thu i lo sawi dawn nia," tiin ka chah a. Mahse, ni thum vel chu engmah chanchin ka hre zui lo.

Tuk khat chu mr.Know-a hnenah message ka thawn a, ka thil hriat tharte pawh ka hrilh ve luam a, ka message a rawn chhanna chu a tawi khawp mai. "Tu nge tih lam aichuan eng vang nge tih zawk kha hriat tum rawh," tih zawng a ni.

Zanah chuan ka tihdan ngai tein kawngpuia mi veivak ka thlir a, parda phen aṭangin zan rei thlengin ka chang ṭhin a, a rawn lang leh mai si lo chu ka beidawng hman viau tawh. Farm neitu chhungte dawr lamah khan va kal leh mai a ṭhain ka hria. 

Mahse, inrinni tlaia ka va kal chuan an lo inkhar ṭhiap a, ka let leh lamah seventhday an nih thu kha ka hre leh hnuhnawh a, engkim hi ka chhinchhiah thlap thlap a ngai a ni, theihnghilh palh emaw hriat hmaih palh hlek neih pawh a fel lo thei dawn tlat.

Chawlhni zana ka va kal leh chuan mipa pakhat hian dawr a lo nghak a, ka kal hmasaka ka tihdan ngai thoin wine bawk chu ka en leh a, a chi dang an nei em ka zawh chuan, "A awm kim tawh lo a ni maithei, ka hriatpui ve vak lo a," ti maiin min chhang a, a ruih theih em ka zawh pawh chuan, "Ka in ve ngai loa, kan nuin a hre ber ang, a chhungte siam ania," a ti sam leh mai a, lei loin ka kal ve leh mai bawk.

Ka haw lamah chuan beisei loh deuh ka ti dawn nge, ka beisei ruk deuh ka ti zawk dawn ni, ka chán loh khanah ka va hmu nawlh a, mipa pakhat hi ka awmna in zawn kawngpuiah dingin ka in luah chu a lo thlir vang vang a, in neitunu sawi ngei kha a niin ka hria. Hmanhmawh deuh chuan ka pan phei a, chutah rawn inherin ka awmna lamah chuan a rawn phei ve nghal a, ka thlen hma deuh aṭang chuan ka hmuh hnu a ang riauin ka hria a, ka en chik em avang chuan ani pawhin min rawn melh chik khawp mai. 

Kan inkalpel thuak a, ka pel fel chiah tihah chuan ka hre chhuak leh thut. 

"Lawma.." tih leh inher ka rual a, ani pawh a ding ve chawt a, a rawn hawi chuan ka chiang ta khawp mai, dawra ka hmuh tawh ngei kha a ni, a hming pawh 'Sangpuia' a nih ve nghe nghe kha, miss Mathani khan 'Lawmsangpuia' tiin a sawi bawk a, he Sangpuia hi Lawmsangpuia a nih mai hmel.

"Min hria em ni?" hamhaih hmel fea a tih chuan, "Lawmsangpuia i ni ti raw?" ka ti chang rap a, a lo bu ve mai bawk a, kei ka lo thaw hawk thung.

"Tunge i nih a?" 

"Tunge i nih zawk?" ka ti let hlar a, mak min tih hmel viau laiin kei erawh ka thinrim hmel viauin ka ring.

End of chapter - 7