WHY DID YOU GO? (CH - 8) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 8

Thawhṭanni tukah tukṭhuan kan ei laiin pu Muana'n khuaa kalpuiah min sawm a, "Vawiinah chhuar an siam dawn a, a chhung han chei dan tur pawh i hre deuh ang, Maṭhaite pawh kan va tlawh kawi dawn nia," a tih laiin, "I pate school-ah va kal ka tum asin, a bungrua tlem lak tur a awm a," nu Nguri'n a lo ti ve bawk a. "Kan kal ho dawn nia," pu Muana'n a lo ti tak nain school-a va kal chu ka chak lo ru khawp mai.

Tukṭhuan eikhamah ka insiam nghal a, ka mamawh lei ngaite chu phone note-ah ka chhinchhiah a, ka pawisa kawl ve tlemte chu ka keng chhuak bawk. Ni a sa angreng a, pu Muana car-in nu Nguri ho chuan kan inzui chhuak a, car chhung lum uap churh nen dang a ro huam reng a, mut ka kham loh vang nge ni lu a rit luk mai bawk.

"Maṭhai dawrah ka lo nghak ang che u, va rei lutuk lo ula," tiin pu Muana chuan nu Ṭhatei dawrah min chhuksan a, nu Nguri'n car a kalh thiam avangin kan pahnih chuan school lam kan pan zui a, kan va thlen chuan dar 9 a pel awrh a, class an la ṭan lo nge ni zirlai naupangho chu tukverhah an lo dak huang hlawm.

Zirtirtute chuan min lo lawm thiam khawp mai, nu Nguri chu an lo be bawrh bawrh a, thingpui kan duh leh duh lohte min lo zawt a, "Ka in ngai lo," nu Nguri'n a tih vang chuan keipawn ka duh loh thuin ka chhang a, ka pa dawhkan leh pawhdawh vela thil awmte chu ka la khawm zung zung bawk.

Nu Nguri chu a titi tui deuh avangin pawna ka chhuah rih tur thu ka hrilh a, chumi hnuah tualzawl piah deuha thingkung awmna lam chu ka pan a. Ka kal hmasak ber ṭumte pawh rilruah a rawn thar ve ruai a, ka pahoa an ṭhutna siamah ngei mai chuan ka ṭhu a, lung a leng duh takzet a ni.

Chutia daihlim hnuaia ka ṭhut veng veng laichuan school naupangho ṭawng thawm ka hria a, ka sir lam ka va hawi chuan tukverh hnung lam aṭangin mipa leh hmeichhe naupang ṭhenkhat hian min lo thlir tih ka va hmu a, ka hawisawn leh rang viau thung.

"Headmaster fanu a nih saw," an tih ri te, "A vun a nalh lutuk, a taksaah ser a nei lo an ti," tih angreng sawia an inbe ri chu ka hre pha a, ka kawrfual hakin a khuh china ka ke an zaina ser chu a lan hlauin ka khuh ṭha ve sawk sawk a, an ṭawng thawm chu hre lo ang hmakin ka awm bawk.

Mipa naupang phawk zual deuh pakhat chuan, "Ehemm," a rawn ti leh ṭhin a, ka va hawi rual chuan, "Malsawmzuala a nih kha," pakhatin lo tiin an ṭhu pil vat hlawm a, an nui dar dar mai.

Rei vak lo ka ṭhut leh hnuah nu Nguri a lo chhuak a, "Kal ang hmiang, i puin rei min lo ti lutuk ang," a rawn ti lang lang a, car lam a pan chu ka zui ve nghal bawk. Kan let leh lamah chuan eng eng emaw min sawipui ve luam a, "Khuaah hian kal ve zeuh zeuh rawh, Atei nen dawrte pawh in la nghak dun dawn nia," a tih chuan ka beisei loh lam daih a ni.

Ka rilru hria niawm tak chuan, "I nite an belh tlak vak bawk si lo a, tibuai lo zawk mahla a pawi lo, nangpawn heta awm i duh deuhin ka hria," a tih zawm leh zat a. "Tih tur kan neih chuan pawi ka ti lo," tia ka chhang chu min rawn melh rang hle.

"Lawmsangpuia kha chu ka duhpui lo che ania, heta i awm chuan ka fanu anga i awm reng a ngai ang, ka thu awih la, i fel chuan ka duat viau ang che. Mahse, Lawma te ang mai mai i kawp chuan ka tan pawh a zahthlak ang, kan hnathawk ve mai a nia, i tan a hniam mah mah bawk, i milpui deuh chauh ngaihzawn i tum dawn nia," a tih laia a awki chu a nelawm loh khawp a, thurawn min pe pawh a ang meuh lo, thu min pe a ang zawk mah.

"Dawr ka nghah dawn chuan ka awmchilh dawn nge farm aṭangin ka kal ang?"

"Ka hre nang, farm aṭanga kal pawh thil harsa a ni hleinem, scooty te pawhin i kal thei alawm, Atei nen pawh in inphur thei ang chu, naupang school kal rual pawhin i kal thei a," 

"Engtikah nge an peih dawn a?"

"An sa zo thuak tawh a, kar thar velah chuan bungrua a lak theih ang,"

"Eng dawr tur nge?"

"I pu chuan kan thilsiam ho zawrh nan a tia, cheese leh khawizu te pawh zawrh tham kan nei ve tawh alawm, chhang leh thil dangte pawh hmun dang ami in la ve ang chu," ti maiin min chhang a, a ngawih deuh vang vang hnu chuan, "Fel deuha i awm a ngai ania aw, i lakah mawhphurhna zawng zawng ka la dawn a, pasal ka nei leh te anih loh phei chuan ka neihchhun i ni ringawt dawn a, ka thu i awih phawt chuan i la nihlawh viau ang," a ti leh charh charh a, han hrehna emaw phurna engmah ka nei lo a, ka tihtur ka koa ruatsa ang maiin ka pawm a ni ber.

Nu Ṭhatei dawr kan thlen chuan kawtah pu Muana a lo ṭhu vung a, a makpa nen zial zuk pahin an lo titi tui khawp mai. "Ka rawn phei ve lo ang, ka ṭhiannu damlo tlawh pah ka duh a," nu Nguri'n a ti chu pu Muana chuan a hnial lem lo. "Ti rawh, i kal dawn ang hmiang," tih leh rawn thawh a rual a, car-a ka lut leh tur chu, "Mina, in haw hmain lo peng leh ru aw," dawr chhung aṭangin nu Ṭhatei'n a rawn ti lang lang bawk.

Kan tlan chhuah leh hnu chuan ka zam ru angreng khawp mai, Lawma a awm ve dawn tih ka hriat vang a ni. Ka bia ang nge be lo ang, engtin nge a hmuhah ka awm ang tih angrengin ngaihtuahna a luah a, nelawm taka awm chu ka duh lem lo, min ngainep zual mai mai dawn tih lah ka chiang a, hnathawk leh a pi anga awm a duh bawka chutianga awm mai chu a fuhin ka hria. Mipain hmeichhe laka a hlawhchhuah ṭhin ang kha keichuan min dil miah lo chungin ka pe ṭhin a, a hlutna a hre pha miah lo aniang. Mahse, tunah chuan a hriat ve a hun tawh, chu mai ni loin inchhir bawk sela ka duh a ni.

Kan thlen chuan Puia leh mipa dang pahnih hi an lo awm a, chhuar an lo siam mek a, pu Muana'n Lawma awmna a zawh chuan, "Thingzai a phel tir, a lo let ṭep ang, dawhkan hi kan siam dawn nge hmun dangah insiam tir dawn?" Puia'n a lo ti zung zung a, "Kan order dawn nia, dawhkan chu a hmanhmawhthlak loh," pu Muana'n a tih chuan, "Kan mistiri te hian an khawih thei asin," Puia bawk chuan a ti leh a, a chep deuh avangin kei chu kawngka bulah ka ding a, pu Muana lah chuan a va pui ve sawk sawk a, kan rei duh dawn riauin ka hria.

"Thingpui lo thlitsak rawh," pu Muana'n a rawn tih chuan flask ami chu ka lo thlitsak a, in pahin eng eng emaw an sawi ho a, Puia chuan min lo melh leh zauh ṭhin.

Lawma lo thlengin min hmu thut chu a hamhaih deuhin ka hria, chik fahranin ka lo en a, ka be lem lo thung. "Thingpui i duh ve em?" pu Muana'n a lo tih chuan a duh thuin a chhang a, kei chu ka che chang duh mai lo. "Mina, han thlitsak ta che," pu Muana'n a rawn tih leh pawh chuan pawn lam hawiin phone ka bih tlat a, ka va hawi leh chuan Lawma chuan a lo inthlit mek a, ka lam a rawn hawi rualin ka inher leh nghat a, pawnah ka chhuak zui bawk.

"Eng dawr atan nge i tih deuh a?" Puia'n a tih ri chu ka hre pha a, pu Muana chuan, "Kan neih ang ang kan zuar mai ang chu, wine aṭanga sarep thlengin a ni mai, zawrh tur kan ngah alawm, Lawma nen vawk in talh ṭhin anga, zirtawpniah in va kalpui ṭhin ang chu ka tia," a lo ti luam a, "Tu nge nghak dawn a?" titu chu Lawma a ni.

"Atei khan a hauh deuh a, Ngurpuii leh Mangaihi pawh an awm alawm, Minai pawn a nghak thei ang, ani ram hna thawk thiam lo ber a nia, a tih theih zawng tak aniang chu.." pu Muana chuan a ti leh luam a, "Hetah a la awm reng dawn elo?" Puia'n a lo tih chuan, "Ani te chu kan tunu a nia lawm, hmun dangah a awm kan phal hleinem," a ti sam leh et a, chumi hnu chuan thil dang an sawi zawm a, hna an thawk zui leh mai bawk a, ka lut pawh chu tuman min ngaihsak lem lo.

"Bazar ka ngai a, ka lo va kal kual lawk dawn asin," pu Muana bula ka tih chuan, "Eng nge i lei dawn?" a lo ti he haw a. "Mamawh ka nei nual mai," tia kal nghal mai ka tum chu, "Hei, Puia hi inkalpui tir rawh," a lo ti vut a, "A ngai lo, keimahin ka kal mai ang," ka tih laiin Puia pek chuan, "Lawma hi sawm rawh, perek in rawn lei nghal dawn nia," a lo ti sawk sawk a, Lawma pawh a rawn hawi phawk deuh.

"Va kalpui rawh, khuaah a kal khat em mai a, a inzawng buai lutuk palh ang," pu Muana'n a lo tih chuan hnial ka tum leh zet a; mahse, Lawma chuan a thil ken lai dahin a phone a ban a, ngawirengin a chhuak zui a, ka chhuak hmasa lo chu ka inchhir angreng, ka awmdan tur zawka ka duh dan ang hlirin a awm a, ka la hmakhalh hleithei lo.

Ka chhuak tur chu pu Muana'n min lo ko ding leh rih a, pawisa min pe hlauh mai. "Eitur lam chu Maṭhai dawrah i lei dawn nia," a ti zui a, ka chhang lem lo. Kawngka pawn maia Lawma lo ding chu ka kalpel thuak a, auto ka phar zui bawk a. "Nangmah chauh em ni?" driver-in a tih laichuan ka ṭhu fel tawh. Lawmsangpuia chu a rawn ṭhu lut ve rawk rawk a, tlansan chu a hlau ve khawp aniang.

"Khawi lamah nge kan kal dawn?" tiin driver chuan a rawn thlek a, kei chu ka ngawireng. Ka bula ṭhu chuan thawk a'n la deuh hluai a, "Ka hre lo," a ti teh tlawng a.

"Tlan tawp rawh," ka tih takah chuan driver pawh chu a tlan chhuak ve nghal a, ka bula ṭhu chuan min rawn thlek tih ka hria, sir deuhah ṭhuin pawn lam ka hawi tlat a, a ṭawng leh tawh lo a, keiin biak ka tum bik lo. Tu ngawi thei thei kan ti hi a ang ber.

Thui ve fe kan tlan hnuah thawmhnaw zawrhna dawr lian ve deuh kawtah ka dintir a, chuan man ka pek fel hnuah ka chhuk sawk sawk a, dawr chhunga kan inzuiluh hnu pawh chuan kan la inbe ta chuang lo. Thawmhnaw ka en kual a, a ngawi thei khawp mai, ka kalkualpui viau chung pawhin zawhna pakhatte mah min zawt lo. Mawza ka thlan laichuan mipa mawza chu a lo en ve a, a en laklawh laiin ka kalsan leh daih a; mahse, ka bul a rawn thleng leh rang viau thung.

Ka bula a rawn ding fel chiah chu ka inher vut a, pen nga vel ka pen sawn tih a ka inher leh chu phawk fahranin min lo en a, ka inngaihtuah deuh vang vang. Ṭawng a tum hman zuau tihah ka kalpel a, pawn lam ka pan nal nal bawk. Footpath-a ka hawi kual lai chuan kawngka bulah a ding a, a nin hmel viau tawh. Engmah pawh hrilh lo chuan kawngpui lam ka pan thla a, "Mina.." a rawn tih ri chu ka hria a, ka hre lo der tlat thung.

Kawngpui ka kan sawk sawk a, makeup zawrhna dawrah ka lut ta daih a, kawng a rawn kan lai chu darthlalang aṭangin ka va hmu reng a, tun ṭum chu a rawn lut ta lo. Kawngka pawn lamah min lo nghak a, ka hmanhmawh lo khawp mai. Lipstick te, nail polish te ka enkual a, dawr nghaktu nula a lo fel bawk nen titi pahin kan thlang dun a, khawmuang lui ka ni bawk a thil dang dang chu ka enkual zel a, pawna awm pawh chuan rei min ti ta deuh aniang a rawn dak leh ṭhin.

"I ṭhianpa chu lo ṭhu lut sela," dawr nghaktuin a tih chuan, "Ti sawn lo awm rawh se," ti maiin ka chhang a. Mahse, dawr nghaktu chuan a khawngaih deuh nge ni a ko a, Lawma lo lut chu ṭhutna a lo kawhmuh thuai bawk. 

A ṭhufel deuh chiah tihah chuan, "Lawmsang, mawza dawrah khan va let leh lawk teh, a senno leh a var pahnih ve ve i lo lei dawn nia," tih leh pawisa pek ka rual a, a hamhaih leh ning hmel inpawlh chu ka hmuh hmaih lo. Mahse, ngawirengin pawisa chu a la a, a kal ve leh mai bawk a, a han dawhtheih dan em em chu ka ngei lek lek zawk a ni.

"I bialpa a ni nange?" Lawma chhuahfel hnua dawr nghaktuin a tih chuan, "Kan awmpui a nih kha," ngaihsam fe hian ka ti a, ka rilru tak chuan chutianga ka sawi chu ka inthiam lo leh deuh a, dawr nghaktu erawh a nui rah rah a, "A hmelṭha reuh sia, inngaizawng in ni turah ka lo ngai alawm," a ti a, "Khatiang hmelṭha i tih chuan amah ang deuh deuh kan vulh ṭeuh mai," ka ti chu a nuih a za khawp mai.

Lawma lo let leh chu hmanhmawh deuhin a rawn lut a, ka lipstick inhnawih rawng chu lar a ni deuh nge ni min en chik khawp a, han sawi zui erawh a nei lem hlei lo a, a mawza lei min pek pah chuan, "I la rei dawn em?" a ti zawi sup a, chhang loin a thil min pek chu ka lo la a, pawisa nawi chu pek let pahin, "Tips ah ka pe ang che," tiin ka hmehbel chawt chawt.

"A ngai lo," a lo tih laiin, "Ka la en dawn, sawtah sawn lo va ṭhu rawh," thu pe aw zet hian ka ti leh a, inher ka tum leh chiah chu ka banah a rawn man a, ka melh chho deuh hu a. "Tips a ngai lo," tih pah chuan pawisa chu min rawn pe let a, "Nang tak hi chu," tia ka lo nui lui leh chu a hriatthiam loh hmel viau tawh.

"Coffee in in duh em?" dawr nghaktuin a tih chuan, "Keiman ka lo in ang, anni chu seventhday an nia, thingpui pangngai an in duh lo," ka lo tih khalh zung zung a, Lawma lam ka va hawi chuan phone a lo bih mek a, thil dang ngaihsak anga a awm chu ka ngaithei lo.

"Lawmsang, bialnute i nei ve a ni lawm ni, lipstick hi thlansak la, ka lo lei ve ang," ka va ti chu min rawn en vang vang. Ka ngeiawm chhuahin, "Thlang rawh, perfume emaw i duh ber hi a ni mai," ka ti leh ngat a, pawn lam hawi paha a kiai suk bak chu chhanna ka dawng leh pek lo.

"Mipa perfume te pawh kan nei ṭha asin," hrethiam lo fe hian dawr nghaktu chuan a lo ti a, "Inkahna hun pawh a nei chuang lo ang," ti maiin ka chhang a, min hnungchhawn zawnga ṭhu chu ka va en vang vang bawk.

Ka han inthiam lo deuh dawn a; mahse, hei hi a duh dan alawm tiin ka inthiam chawp leh vat a, hetiang hian awm lo sela bazar dun te chu a nawm dawn tehlul nen, amah lellul vang vek saw a ni. Coffee in pahin ka thil lei ho chu a man ka pe fel a, ka dawr hnem vangin nula chuan skincare tester min pe bawk a, a fel reuh khawp mai. Lawma bula ka va kal chuan a lo ding vat a, engmah sawi tawh loin ka thil khai lai chu ka pe a, ka kalchhuak zui bawk.

Kawngpui kan tuma ka din laichuan ka bulah lo dingin kawngpui lam a melh vang vang a, "I duhtawk tawh em ni?" tiin min zawt a, a lam ka hawi chu kan in en hnai viau a ni. Hrehawm ti hmel emaw, hlim hmel a pu lo a, engmah thleng lo ang maiin a landan chu a la ngai reng, heti ngawt lo deuh hian, a nin thu emaw a duh loh zawng a nih thu emaw te sawi sela ka ti...

"Duh tawk lo,"

"Eng nge i la en dawn?"

"Ka hre lo, min zui zel la a ni mai," 

"Ka zui zel che alawm hei,"

"Phun lo khan, tum bura inzui hi ka duh lo ania," ka ang deuh hlak hlak a, ani erawh a ṭawng dam dup reng lawi a, thinrim chhan tur ka zawng a ni ber e.

"Ka phun hleinem, khawiah nge kan kal leh dawn?" a tih chuan thawk ka la hak a, ka inher ringawt a, kalna tur ka hre tawh lo.

"Min lo zui rawh," ka ti zawi sep a, footpath-a ka kal chu min lo zui ve thuai bawk a, ka ngaihtuahna chu ka mang duk mai hian ka hria, ka awm a nuam hauh lo.

Dawr kan pel thla zel a, ka ke pawh a na lek lek tawh, muang te tea ka kal laiin ka  hnungah kei aia muang fein a lo kal a, "Lo kal chak rawh," ka han ti chu ka bul a lo thleng rang ngang mai. Kal chak turin ka ti ve rawk a, keimah zawk chuan ka um titih reng a, ka tlin lo, ka nin tawpah kal muang turin ka ti leh a, vawiin hi Lawmsangpuia'n ka thu a la awih ber ṭum anih ka ring.

"Beng verh ka duh a, parlour zawng ang," ka tih chuan, "Tlereuh ka ngaina lo i ti emaw ka tia," a lo ti zauh a, a lo la hre ve reng anih hmel.

"Vawiin aṭangin ka ngaina," ka tih chuan a awih lem loin ka hria, a khi suk ringawt.

"I pu dawr thlen hma deuhah khan a awm," a tih vangin auto kan la a, kan let leh vang vang a, ka ril a ṭam viau tawh nain thil ei dun thei dinhmunah pawh kan ding chiah lo. Kan dawr kalna tur chu in chung step lawn ngai a ni a, kan han luh chuan customer an lo nei lo a, Lawma lah chu an lo hre khawp a, a lu meh ṭhinna dawr anih hmel e.

Bengverh ka duh thu ka hrilh chuan, "A beh nghal theih chi i duh em?" tiin min zawt a, ka hnial lem lo. Kan han verh chuan ka hlauh ang aiin a na lo lehnghal a, a bet tereuhte hi ka beh nghal a, ka inhmeh ve viauin ka hria. "Bengbeh kual chi pawh i inhmeh dawn anih hi, i nghawng a tawi lo a, i khabe kual a nalh bawk si a, eng ang chi pawh i inhmeh vek ang," tia dawr nghaktuten min fak laichuan Lawma chu ka va thlek a, chanchinbu a lo bih daih pek a, ka ngei tawk a tling leh hle tawh.

"Verh belh rawh, lehlam lehlamah hian pali ve ve ka duh," ka ti chu dawr neitu chuan min en phawk hu a.

"I duh tak tak a maw?" a tih leh laichuan Lawmsanga chu a rawn hawi a, lo en ran pah chuan "Duh e," ka ti leh nghat a, chutih laia min lo en dan chu hmuh a nuam takzet, a lawm lo a ni, ka lakah a lawm lo, a hmel leh a mitmengah chuan chiang takin a hmuh theih.

Mahse. Engmah a sawi lo.

Kan beng an verh leh chuan na ka han ti tawh khawp a, ka beng aimahin ka rilru a na zawkin ka hria. Ka mittui a hnam ṭiam ṭiam a, an verh zawh hnua mawi ka tih leh tih loh min zawh pawh chuan ka chhang ṭha tawh meuh lo. Darthlalangah chuan ka en ve thuak a, chumi hnuah a man ka pe a, ka chhuak nal nal bawk.

Step tawpa corridor thim lai ka zuk thlen chuan bang nghengin ka ding a, mittui ka hru mawlh mawlh a. Eng nge ka la beisei cheu le, he mihring hi ka tihnat zawh rual a ni lo, ka haw em em chung hian engtinge ka la natpui fo mai le..!?

Rei vak loah step-a rawn pen thla thawm ka hria a, inhruhulin ka samte chu ka tuai ṭha thuak thuak a, ke pen thawm chu a rawn hmanhmawh khawp mai. Corridor a rawn thlen ruala min hmu thut chu a hamhaih hmel khawp a, chumi hnuah chik deuh hian min en zui a, ka pen sawn tur pawh min pawt let rang viau a ni.

"I ṭap elo?" a tih laia a awri mawlh chu, heng a aw thuk raih ṭhin te, a pianthiamna leh a hmelṭhatnate, a mize cool leh min hip em em ṭhintute hian alawm min tibeidawnga, min tina leh ṭhin ni.

"Ṭap lo,"

"Ṭap i va ang ve!?"

"Ṭap e.." ka aw chu a zawi ṭiak a.

"A na viau em ni a?" a ti leh chu ka en mawl tawp tawh.

"Pali verh a ngai hleinem, pakhat kha duhtawk mai tur alawm," ka beng chu a rawn thlek zui a, "Ka lo en chhin," tih pahin ka sam a rawn hui kiang bawk a, ka insehruh nasa khawp mai, a kutin ka beng a rawn tawh laichuan ka insum ve fan fan a; mahse, ka mittui a rawn hnam ṭiam ṭiam lawi a, kalsan nghal mai loh chu tih theih dang ka nei lo, ka mualpho mai mai dawn a ni.

Pu Muana dawr sakna kha a hlat tawh loh avangin kein kan inzui haw a, "Nachhawkna i duh dawn em, damdawi dawr kan thleng ṭep a nia," a rawn tih chuan  ka duh loh thuin ka chhang a, "I khuate a sik mai ang tih a hlauhawm," a tih leh chuan ka chhang tawh lem lo. Rei loteah kan thleng a, nu Nguri a lo awm ve reng tawh.

Chutia Lawma nena kan inzui haw chu mak tih hmel lek lek hian min lo en a; mahse, Lawma thil khai a hmuh vang aniang engmah a sawi nawi lo a, "I lo va phei ang," a tih chuan ka hnial bik lo. Rei awm tawh loin nu Ṭhatei dawr lamah kan phei a, eitur leh eng eng emaw ka la nual a, a man pawh nu Nguri'n a pe vek a, "Pocket money i la nei em," tiin min zawt bawk a, ka neih zat ka sawi hnuah cheng sangnga lai min pe a, nu Ṭhatei'n ka pi leh naupang thil tur min hawntir nual bawk nen kan bawr ta khawp mai.

Pu Muana lo let hnu chuan kan haw ta vang vang a, vawksa zawrh chungchang sawi dunin an inhnial kawngtluan a, kei erawh ka ṭhu ngawi chawrh chawrh thung. In kan thlen pawh chuan ka pindan lamah ka chhuk nghal a, ngaihtuahnaah thil dang a lut meuh lo a ni. Ka inngaihtuah lungpuam laklawh chu ka lung a leng thar hle mai a, ka pa thlalakte enin ka insup leh hlawp hlawp ṭhin.

Ni a liam ve bek bek a, dawr pawh an sa zo tawh a, pu Muana'n nu Atei aiin nu Mangaihi a ring zawk a, anni pahnih lahin dawr nghah an lo duh ve ve si a, an inhnial buai deuh bawk nen in chhung boruak a ṭha meuh lo a, an fate school kal tur pawh a ruala hruai tawh loin a hran ve vein an hruai ta zel a, chaw ei laia titi pawh an nei hleithei lo. Lawma lo haw lah chu sapthei zamna tur  siamin a buai nitin a, kan inhmuh fuh chang lahin be hmasatu nih ka duh lo a, inbe loin kan inpel fo mai. 

Chawlhniah Puia nen khuaah an kal ṭhin tih Azoi'n min hrilh a, "Nula rim an nei anih ka ring, an rawn len ṭum pawhin hmeichhe hming an sawi ri zauh tawh, tu bialnu zawk nge ka hre lo naa chawlhnia an va kal hian an hmu ṭhin tlatin ka hria," tih angreng min hrilh chuan rilru a tibuai khawp a, lo hrechiang turin ka ti va tak naaa engmah thu chiang a hre zui mai lo a, "Khuaah an leng leh tawh," tih thu erawh min hrilh zing viau thung.

Ni khat chu pi Lalpuii nen leiṭha la tura kan kal ṭumin Puia'n min lo zui a, fiamthu deuh takin ka lo zawt a, "Keimah ka ni lo ania aw, nula rim pawh kan ni chiah lo," ti maiin min chhang a, "Anih eng nge in tih ṭhin a?" ka ti leh erawh mi a chhang ṭha duh lo khawp a, "I ngaih ang chu a ni lo, Lawma zawt mai rawh, ka sawi thiam ve nei nuai lo, thil eng eng emaw hian a rilru hi a tibuai a, vei te hi a ngah leh lutuka, hepa hian thuruk a ngah ngawt ang, a ṭawng mawh si a, dawp deuh rawh," tih angrengin min chhang nawi khawp a, "Ngaihzawng a nei em ni?" tia ka zawhna erawh rin thiam theih tur deuh hian min chhang a, "A nei chiah pawhin ka hre lo, hmeichhe bem vel hi a timi vak lo aniang," a tih vang chuan tu emaw duh deuh leh ngaihven lai a nei anih ka ring.

Zan lamah hian ka meng rei ṭhin a, a dawih vang leh ka fimkhur vang a ni ber. Ka pindan kawngka bula awng kha pu Muana'n min pin sak tawh chungin ngaihngama mut a har a, mi dang muthilh hma chu ka muhil thei ngai lo a, dar 3 hi chu ka thleng deuh ziah a tih theih. 

Zan khat chu pa Tluanga lo chhuk thawm niawm tak hi ka hria a, amah a ni tih ka chiang lo nain amah bak zan reia lo chhuk duh tur awm ka hre lo a, a pen thawm ka hriat rualin ka lo ngaichang ran bawk. Ka pindan kawngka pawn lamah chuan eng emaw chen a ding a, min ngaithla ru emaw tih mai tur a ni. Rei dawn a din hnu chuan a kalsawn leh mai a, chu bak chu a thawm ka hre leh ta lo vang vang a, zan dangah pawh a lo chhuk leh ngai tawh lo, a sim dawn anih ka ring.

"Mina, i nuin dawr nghah ve i duh thu a sawi a; mahse, Atei leh Mangaihi hian an chuh ve tlat si a, an fate school kal buaipui an ngai tho bawk nen an pahnihin va nghak dun mai sela ti raw?" tia pi Lalpuii'n min zawh chuan ka lo thlawp khawp a. "Kei chu min vengthawng suh u, he lamah pawh tih tur a tam tho a," ka ti ve mai a, "I nu Ṭhatei dawr i va nghahpui zawk daih dawn nge ni, amah ka lo bia anga, nau a pai leh tawh a, puitu chu a mamawh thuai ka ring," a tih pawh chuan hnialna ka nei hran lo. 

"Azoi hi lo phei a tum em le?" ka tih chuan, "A pa kha a nuamsam lo a kha, vawiin chu hlawhfa hoin bawng chaw va la mai sela a ṭha ang," a ti a, Azoi pa chu ka va kan dawn em mawni ka tih rilruk laimekin Lawma nu a rawn lang hlawl a. 

"U Pui, pig fat hi a zo dawn hnai a, ni hnih thum tla chiah a awm leh tawh, Lawma te khuaah an kal a, ka chah mai dawn asin," a rawn ti lut bawrh bawrh a, pi Lalpuii chuan an lakna ṭhin dawr a phone nghal a, keiin Lawma nu chu ka lo be ve sawk sawk a.

"Vawk note kha an lian tawh em, a nú engzat nge awm?" tih angreng ka zawh chuan, "Chaw an heh lutuka, kan kawlbahra hnah a rem rih sia, pangbal hnah kan chhum pawlha an duh vak lo, a nu chu 8 an awm, a chhul lak vek chi aniang, a pui vulh ṭeuh chu a hahthlak em mai," a lo ti ve luam a, pi Lalpuii chu buhfai chah belh turin a ti zui bawk a, a beng a chhet deuh avangin biak rin deuh a ngai ṭhin.

Phone a hman zawh hnu chuan pi Lalpuii nen an titi a, "Kan nau pakhat hi kan hnenah lo awm ve mai se kan tia, vawk min enkawlpui anga, hnathawk angin in chhawr ve thei mai lo maw, kan pa chhungte lam a nia, hna a nei lo a, mi rawn belh a tum deuh nain aw kan la pawh chiah lo a, in chhawr duh chuan kan hnenah a awm mai anga, in chhung chet leh vawk chaw chhumte min pui pah bawk anga," Lawma nu chuan a ti luam a. 

"Hmeichhia nge mipa?" ka lo ti chu pi Lalpuii pawn min lo melh zawk. Lawma nuin, "Nula a nia, in inrual vel maithei," a tih chuan, "Kan pa ka lo râwn ange, in nupa in ṭharai lo angreng si a, puitu pawh in mamawh viau tak alawm," tiin pi Lalpuii'n a lo chhang a.

Pu Muana hnathawk lo haw chu an lo sawipui nghal a, "Lo awm rawh se; mahse, hlawh hranpa kan pe lo anga, in hlawh kan ti sang deuh anga, in lo pe ve mai anga," tiin rem an ruat a. Lawma nu chhuah hnu chuan, "An pa chhungte a tia, khawi lam ami nge mawni dawn le, a chhungte chu manipur-ah an awm a ti khan ka hre sia," pi Lalpuii'n a ti nuah nuah a, pu Muana chuan a chhang zui lem lo.

Tlaiah Azoi te inah chuan ka va phei a, a pa chu hritlang khawsikin a lo man a, ka va len lai pawh chuan pindanah a mu reng a, a khuh hnawk angreng khawp mai. "Lawmaten awmpui nula an nei dawn, an chhungte a nia," tiin Lawma nu thilsawi ka hriat ang ang chu ka hrilh a, "An chhungte a sawi ngai si lo a, hmeichhia a nih chuan a tihzia hlauh chu, ṭhian thar kan nei dawn a ni mai alawm," a lo ti sam et a, kei erawh ka phur ve vak lo thung.

Ka phur loh sa naka laichuan ka haw lamah Lawma leh Puia lo haw ka va nang fuh a, buhfai bag leh eng eng emaw hi chhek inah an lo thiar lut mek a, an buai bawk nen ka be lo ang ka tih laiin Puia'n min lo au a, "I pi lo hrilh rawh aw, buhfai hi hetah kan dah nghal mai ania," a rawn ti a, lu ka bu ringawt. 

Ina ka va luh hnu lawkah current a rawn thim a, "Lawma kha va ko teh, kan inverter hi lo en lawk teh se," pi Lalpuii'n a tih vang chuan phur lo fein ka tho a, pawna ka va chhuah laichuan hmuh tur an awm lo. Mahse, ka kal hnaih deuh chuan an ṭawng thawm niawm tak chu ka hria a, chhek inah an inremfel anih ka ring.

Ka kal hnai zel a, lut ta mai lo chuan an ṭawng chu ka ngaithla a, tu emaw chungchang an sawi a, ka chungchang erawh a ni lo. "A hmelṭha ka ti, a nelawm loh deuh nain a fel ka ring tlat, thil zep ṭit ṭet a nei bawk si lo a," Puia'n a ti ri ka hria a, "Zep a ngah viau ang, en ang ngawt a ni lo, i rin loh ang deuh pawh a ni maithei," Lawma'n a tih ri ka hre leh a, luh mai ka tum tawh laia Puia thil sawi vang chuan ka ding leh rih.

"In inngaizawng ringawt ange, in chen dun chuan inngainat a awl dawn ania," Puia'n a tih chuan ka hrethiam ta lo khawp mai.

"Thil tihsak ka bat vang mai mai alawm, lo ngaizawng miah suh, ka farnu angin a rawn awm dawn a, ka duhpui dawn miah lo che," nui aw deuha Lawma'n a tih leh chuan ka hrethiam ta riai ruai a, an hnena lo awm tur nula chungchang a nih mai hmel. Mahse, a va mak ve, an chhungte ni lo angin a sawi a, a nu sawi dan nen kha chuan a dang viau a ni.

"I farnu a ni dawn bawk a, ka rawn rim ziah ang, nangmah zawk hian i buaipui riauin ka hria ania, Minai a awm ve reng hi aw.." Puia chu a nui kur kur a, "He nu hi engati nge a la awm reng le, nuam a tih tawh pawh ka ring lo ania," a tih zawm leh zat a, Lawma ṭawng ri erawh ka hre tawh lo.

"Ngaihzawng nei la chuan a awm rei duh lo maithei," titu chu Puia bawk a ni.

"A beidawng ve ṭep tawh ang," Lawma'n a tih ri ka hriat leh takah chuan ka inher vut a, ka let leh nal nal bawk. 

"An la buai a, nakinah a lo kal mai ang," tia pi Lalpuii ka hrilh hnuah ka pindan lam ka pan nghal a, ka thinrim vang a ni ngei ang ka sa bulh bulh a, ka inhumruh leh ringawt ṭhin. Chu nu chu tu teh hrep nge maw a nih le, Lawma'n thil tih sak a ba tih te kha eng nge a awmzia ni ngai, hmeichhe lakah a lo inhawng viau a maw, ka lakah hian ba a nei loin a inhre bik em mawni?

Minute 10 vel a liam hnuah Lawma ṭawng thawm bawk chu ka hre leh a, sitting room-ah pi Lalpuii nen an inbia a, rei vak loah pi Lalpuii'n min lo au lang lang bawk. Ka han chhoh chuan Lawma chu a lo la awm a, electric bulb a lo thlak dawn mek a, pi Lalpuii'n a lo dinchilh ran bawk. Engmah sawi loin ka kalpel a, pu Muana bulah dawhkan kilin ka va ṭhu a, an bulb thlak zo lo phei leh pawh chu ka lo en reng a, min melh eih lo.

Mahse, kawngka a chhuah dawn ṭepah chuan a rawn hawi a, "Chakai i ei duh em?" a rawn ti ve teh khiah a. Ka chhungte hian chakai an ei ngai lo a, Lawma pa hian huan mawnga luiah aiawt a chiah ṭhin a, ka pa damlai pawh khan min rawn suah ve fo ṭhin.

"Duh lo mai," tia ka chhang chu a awih vak lo nge ni min en ren rawn a, phone ka bihsan hnuah a chhuak hna hna a. Azoi'n a han suak aniang chawei kan siam dawn ṭepah Lawma te in aṭanga a lo chhuk ka han hmu a, ka be lem lo thung.

Chumi zan pawh chuan zan riah eikham hnu lawkah Puia nen bike-in an inkhalh chhuak leh a, an lo haw thawm pawh ka hre reng a, an leng rei khawp mai, sana pawhin dar 12 a kawk va va tawh.

An nula awmpui tur lah chu an sawi thawm a awm leh ta lo vang vang a, kar hnih zen zawn a liam hnuah Lawma pa lo lengin a sawi leh chauh a, nula chu aizawl lamah a kal leh phawt a ni awm e. Pu Muana'n engtia an chhung nge a nih a zawh chuan, "Ka pi tunu a nia, a fa bik laka a tunu, a nu boral hnuah mi a rawn zawng a," tiin a chhang a, Lawma sawi dan nen chuan a la inang lo ta fo mai.

Ruahtui tlak hmaa huan thlawh zawh an duh vangin ka chhungte chuan nitin hlawhfa nen hna an thawk a, pi Lalpuii nen kan kal ve ṭhin a, thlaite tuh pahin theihmu ṭangte kan phun belh bawk a, ni a sat vangin a chauhthlak ve ṭhin hle a ni. 

Huan an sam zawh hnu chuan nu Mangaihi leh nu Atei pawn dawr an nghak ve ta a, an grape tui rei tak tak an um tawh te pawh an phawrh hlawm a, in lamah an kawl nual avangin duhtawka in tur a awm ṭhin a, nu Nguri lah chuan zantin deuh thaw a in a, zanriah eikham hi chuan a pindanah a tawm chawt a, a rawn chhuah leh hi chuan a meng sen rum tawh ṭhin.

Tlai khat chu chaw kan ei laiin pu Muana'n a hau a, "Hnathawk awm laiin i rui hlauh ange, kan eizawnna ania, eng nge a an hriat nana han tem zeuh hi chu a pawi hran lo a, chuti ni loa eng emaw hleka in zen kha a ṭha lo ang, kan Pathian thu pawm dan nen pawh a inmawi lo," tih ang zawngin a zilh a, "Vawksa pawh i ei tho alawm," nu Nguri'n a lo ti chu pu Muana chuan a duh lo hle a, an inhnial zui chiam a, dawra vawksa rep zawrhte pawh an sawi kai zel a, a fate lamin vawksa zawrh an duh loh laiin pu Muana thung chuan 'Sumdawnna alawm' tiin a ṭang ve tlat a, chumi tuk aṭang chuan pu Muana leh nu Nguri chu a inbe tlem ta khawp a, nu Nguri chu a titau deuhin ka hre bawk.

Tukṭhuan eihma aṭang chuan phunnawina tur a zawng a, khawizu awm lote chu a an pui hlak hlak a, "Tlaiah kan la dawn nia, lak hun a awm alawm," pa Dinpuia'n a lo tih pawh chuan, "Damdawiah ka hmang a, ka nghei ngai lo tih in hrereng alawm, hmanniah pawh Tluanga ka chah mawlh mawlh a, thusawi hi in ngaipawimawh lo lutuk," tiin a vin hlak hlak a, pa Dinpuia ning deuh chuan veranda lamah a chhuahsan nal nal a. Nu Nguri chuan a la duhtawk thei mai lo Remi leh Biaki lamah a ṭuan a, a chet fel loh thute, zanah phone an khawih rei vanga an thawh tlai thute sawiin a ankhum leh a, anni pahnih lah chuan dêk pawh an ti ngam lo, tih tur an zawng nghal chung mai a ni.

Chaw ei dawn ṭepah chuan grape wine bottle pakhat nen a pindan lamah a lut ta hram a, "Eisan tur, lung a ti zing em mai, a lusun khawhar phunchiarah ngaihsak rawh u," pu Muana'n a lo ti hmiah a, chaw kan eisan ta bawk.

"Tlai lamah khawizu chu in zuk laksak dawn nia," pi Lalpuii'n a tih chuan pa Dinpuia'n a lak tur thu a sawi a, "Khawite bawm kha chu khawih suh u, a zu ei tura kan khawi a ni lo ania," pu Muana'n a tih chuan, "Eng atan nge a?" pa Tluanga fanu lian zawkin a lo ti hu a, a pu chuan, "Thlai leh pangparte tan maw le," tiin a chhang a, an khuai khawina hmun hi ka la hmu lo a, an ngah viau tih erawh ka hria, khuai hlau chi ka nih vangin kal tinah pawh ka tin ngai lo a ni.

Chhun lamah chuan veranda chhuat phah leh step te chu steel brush hmangin kan tifai a, Remi leh Biaki'n an bawh fai apiang chu ka lo phiat ṭhin a, an zawh hnuah tuiin kan tleuh a, veranda chhin chu kan nawt ro leh thlap bawk a, a zau deuh bawk nen kan hah ve khawp mai. "In hah em mai, ka'n duat ang che u," tiin pu Muana'n lakhuihthei um min lo chhawp hluah a, a ruih theih loh avangin puar el euhin kan hawp hlawm a, a thlum tui viau nain lei a thip duh viau thung.

A pindan aṭanga nu Nguri a lo chhuah chuan eirel hun a ni tawh, "Khawnge ka pa kha," tiin Biaki a zawt a, "Huanah khuan, varak a en aniang," ti maiin a lo chhang a. Chutah, ka lam rawn hawi lehin, "Khawnge i pa Dinpuia?" tiin min zawt leh a, zing lama an huan sam an lo la haw loh thu ka hrilh a, an lungawi hmel vak lo. A pindan lamah a let leh a, rei lo teah sam ṭawn ṭha mawlh mawlh chungin a lo chhuak a, "Insiam rawh, khawizu kan la dawn," tih leh store room lam pan a rual a, kan nulate nen chuan kan inen hrek hrek a, a ngaihna kan hre chiah lo.

"A rawn vin leh vak hmain va insiam rawh," Remi'n a lo tih takah chuan store room lam chu ka pan ve thuai a, ka va luh chuan hnathawh kawr a lo inbel zo diam tawh a, "Kutkawr i nei em?" tih pahin ka jacket hak tur min lo pe thuai bawk.

"I la thiam em ni?" inthlak paha ka tih chuan, "Thiam loh tur thu a awm hleinem," a ti sam et a, a rui deuh phual mai bawk nen   rilru a nuam zan lo chu a ni.

"I nghawng kha phui deuhin zip la, chhuar hnuaia rubber boot khu i bun dawn nia," a tih hnuah min chhuahsan a, boot chu ka zuk la chhuak a, ka tan chuan a lian deuh a, bun pawh a nuam vak lo. Mahse, ka kekawr hak a fual ṭhat avangin ka rap thlep ṭeuh tho a, a him viau thoin ka hria.

Nu Nguri chuan chempui leh chemte lian deuh pahnih a ak a, ken tur ka hriat loh vangin chemte lian vak lo chu ka pai ve ṭat a, bucket nen a hnungah ka zui ve ta hnak hnak a, kan chhuak dun chu kan nulate pahnih pawhin min rawn thlir ve dauh dauh. "A hla em?" um paha ka tih chuan, "Balhla huan thlang lamah daih khan, hmeichhe tih chi pawh a ni lo, mi an ngaihsak lo em mai a, mahnia inbuaipui a ngai anih hi," a lo ti bal bal a, ka hmaah chuan a pen hlawk hlawk mai a, a kal zawng chuan a thil hak chu a ri hruap hruap reng.

"I pa kha chu la dam se min laksak mai tur ania, pasal nei loa len tar ka hlauh chhan chu hei hi alawm, unaupate hi chu e an ṭangkai lo lutuka, nupui an neih hnu phei hi chuan an rilruah kan awm tawh lo reng reng," 

"An nupui te lah hi an han mawl dun khawp a, an thatchhe bawk si, an huan sam peih loin dawr nghahte an inchuh ania, nutling pahnihin dawr tereuhte an va nghak a, hetiang aichuan a nghak tur chhawr ila, anniin huanah hna thawk sela kan hlawk zawk ang, mi thatchhe tlanbo angah bak ka ngai lo e," a ti barh barh a. Ka ngawi reng chu min lo thlek zawk a, "I lo nel viau ange aw, nang nen hi chuan an hmelma ang vel kan nih hi, i bulah hian mite an lo rel ngam ngawt ange, chutiang an sawi ngamna turin lo awm hlek suh ang che," a ti leh duah a, chhan dan pawh ka thiam chiah lo, ngawi reng chuan ka zui a, hnathawk ṭhenkhatte haw tur pawh kan tawk a, min lo biak sap sap laiin nu Nguri chuan a chhang si lo a, an biak loh zawk chuan ka lo chhang leh ṭhin.

Balhla huan kan pel thla ṭep tihah pa Dinpuia lo chho lam nen kan intawk hlawl a, "Eng nge tih in tum a?" phawk fein a lo ti a. "Khawizu kan la dawn anih hi, mi laksak tum hek lo che u, kan lak mai loh chuan naktuk zinga in tur pawh ka nei tawh hleinem," nu Nguri'n a lo ti leh hmarh hmarh. 

"I thiam ngawt em mawni, vawikhatte mah lak pawh i la la ngai hleinem," 

"Ka hawng anga, ka la mai dawn alawm, duh leh min zûk vung lêk lûk ang hmiang," tih pahin nu Nguri chuan a kalpel hmak a, nui hui chungin pa Dinpuia chuan min lo en a, "A va buaithlak ṭhin, khu lam ami chu a zûk a na asin, pakhat zûk pawh a na fe ang aw," tiin nu Nguri kal thla chu a au zui bawk.

"Lukhum in keng bawk si lo," ti chung chuan kan hnungah min lo zui ve leh a, a lo kal ve takah chuan ka ngaih pawh a ṭha ve deuh. "Engah nge maw a duh tut tut le, a awm changa ei ṭha duh mang si lo," ti bul bul chungin ka hnungah a lo kal a, "A rui em mawni?" a tih chuan ka la ngawi reng, "I nu hi chu a hahthlak ve ṭhin khawp mai ti raw Mina, a thinrim a kaltluan laklawh hi chuan min tibuai nuai zel mai, i pa khan engtin nge a bengdaih theih mai zel le," a ti nuah nuah a, ka nuih a za angreng.

Balhla huan kan pelh hnu chuan zawl zau angreng deuh hi a lo awm a, rose kung leh pangpar dang kung ro lek lek tawh a tam khawp mai. Khuai bawm pawh a lo awm far a, nu Nguri'n pakhat a lo dinchilh ran bawk. "Hawng ringawt suh, keiman ka lo en ang," pa Dinpuia'n a tih chuan rang deuhin a lo let a, a la ngam tak tak lo anih hmel. 

Fimkhur fahrana pa Dinpuia'n a hawng lai chu kan lo thlir dun ran a, bawm pakhat a chhin leh hnuah a dangte chu a va en kual a,  "Helam chu a la hun chiah lo anih dawn hi, saw lai ami kha va en teh ang, Mina...nang chu hetah lo awm rawh, lukhum i keng bawk si lo," tih pahin nu Nguri chu a rawn hui a, ani lah chu ka bucket ken lai min chhuhsakin a kal nulh a, ka hah deuh bawk nen lo nghah chu ka hnial bik lo. Kan piah deuha theihai kung lam chu ka pan a, phone khawih pahin ka lo nghak ta rih a, thla te ka la a, rei deuh thleng chu an inhnial ri pawh ka hre pha.

Chutia rei dawn ka nghah tawh laichuan faifuk hlarh hlarh thawm hi ka hria a, khawi lam aṭanga lo chhuak nge hriat tumin ka tho thuai a, chhak lam aṭanga lo kal a niin ka hria. Ka lo thlek deuh vang vang laichuan pa Tluanga a rawn lang hlawl a, min hmu chu mak a tih hmel viau bawk.

"Eng nge hetah i tih a?" a rawn ti hlut, a thawmhnaw hak aṭang chuan khawizu lak a tum ve tho anih hmel.

"Khawizu kan la dawn a?" ka ti mai a, "Tu nen?" a tih chuan pa Dinpuia leh nu Nguri'n an lak mek thu ka hrilh a, "Ti nge i zui ve loh?" tih pahin min rawn kalpel a, khuai bawm lam a pan zui bawk a, a la faifuk rat rat reng a, a hla sak chu ka hriat hnu a ang viau mai a, ka hrechhuak thei mai lo thung.

"Eu, kan khuai te chu an va thatchhe awm ve," a tih chuan ka va pan hnai ve vat a, "Eng khuai nge an nih i rin?" tih pahin min lo hui sawk sawk. Ka va bih dawn laitak chuan an rawn thlawk chhuak huk mai a, a chhin leh rang khawp mai. Khuai pakhat ka kuta rawn fu chu thinthlak mai ka tum a, ka jacket hak a lo thawl bawk nen ka thin rualin ka kawr ban chhungah a thlawk lut daih mai a, ka hlau lutuk chu ka rak chel chul mai.

"Engati nge, engati nge?" a lo ti ve chul a, "A kawrah a lut," tih pahin jacket chu ka phelh rawk rawk a, khuai dang an lo thlawk reng bawk nen thingkung lamah ka tlan phei a, ka jacket hak chu phelhin thingkungah chuan ka vaw nawk nawk.

"A zûk che em?" tih pah chuan ka dar bul chetah a rawn kun hniam a, "Aih," tih leh tawlhsawn ka rual a, a ṭawng zawnga a rim chu zu rim tih ka hriat vangin ka awm a nuam hauh lo, jacket chu ka ha leh sawk sawk a; mahse, ka zih fel hma chuan ka nghawng a rawn tuai thuak a, "Khawi maw helaia sen hi," tih pahin hnai feah min rawn thlek bawk.

"Tinge a?" thawk ip ngar ngar chunga ka tih laichuan, "A thip em?" tih pahin a hiat zauh a, a thak deuh chauh ka hria. "Thosi sehna aniang," tia zih phui mai ka tum chu, "I hnute a lang dawn," tih pahin ka awm a rawn khawih leh kher a, "Heih.." ka ti pawr hlar a.

 "Sorry, a bial mawi em a," tiin a nui kur kur a, ka ngei lutuk chuan rum fein ka melh a, ani lah chuan ka awm a lo la melh ngar ngar thung a, inhersanin ka zip ṭha mawlh mawlh.

"Mina..."

"Eng nge?" 

"Lawma nen hian inla inngaizawng em?"

"Eng atan nge i tih a?" Amah pawh en duh loh chuan lehlam hawiin ka ding tlat a, a rawn ding hnai lutuk chuan awm a ti nuam lo zual a, haw nal nal mai tur nge ni ka ti rum rum.

"In la nih chuan ṭhen daih rawh," ka va melh rawm a, "I hrechiang lo mai mai anih kha, Hriata kha a ṭan teh mai asin, kan dáwp zan pawh khan i lam a ṭang reng reng hleinem," a ti chu awih tur nge awih loh tur pawh ka hre lo, eng rilru pua rawn sawi nge maw a nih reng reng chu!?

"I lo buai a ngai lo, kan inṭhen daih tawh," ka ti ram hmak a. "Anih, bialpa dang i nei em?" a ti leh zat a, ka chhang buai peih lo. "Ka lo han haw dawn kei chu," tia kal mai ka tum a, ka banah a rawn vuan chawt.

"Min va ngei hmel ve, engtin emaw ka ti che pawh a ni si lo va," lawm loh hmel fe hian a ti a, "I awmdan kha ka hre vek e aw," pawr fein ka ti let a, "Engtin nge ka awm a, eng nge i hriat vek chu?" a tih chuan rum theitawpin ka melh a, a kut chu ka thing thla hmiah bawk.

"Eng maw i hriat vek?"

"Ka pindanah i lo lut ṭhin, ka muthilh laiin i lo kal tih ka hre vek," 

"A ni maw?" a nui hawk hawk a, min rawn ban leh zuau a, ka tawlh hla vat thung.

"Eng nge ka lo kal chuan ka tih a?" A hmelah chuan zam hmel emaw, inthlahrung hmel pakhat mah ka hmu lo. 

"Eng nge i tih chu i hrechiang daih zawk ang?" ka tih zawh rual rualin min rawn din hnaih a, ka hmai bul chetah, "Hrechiang e," a rawn ti thum bul a, pawisak nei hmel a put loh vang chuan ka hlau tawh khawp a, ka ṭim ru er er. Han chet sawn ka tum lah chu ka darah a rawn vuan chawt a, min fawh a tum ta mai a, kei tal chhuah tumin ka ṭang ve fat fat a, kan inphih buai viau a ni.

"Min thlah rawh, ka nu ka hrilh dawn ania aw.." tia ka vau na chu engah mah a ngai lo, "Tu nge awih ang che, Hriatzuala'n a tih lai che pawh i hriat miah loh kha," min tihkhum hmiah a, min kuah betin nghet lutuk hian min pawm a, ka ke bak chu ka chet thei ta lo. Chuti chung chuan ka la tal ve fat fat a, ani lah chuan min kuah nghet telh telh."Tal tal suh, ka awmdan hre vekin i ngawi reng a, pawi i tih tak tak loh vang anih kha," a ti chu ka tha a na ngang mai.

"Ka sawi dawn chiang ania aw, ka hrilh vek dawn..min thlah nghal rawh, ka nu ka au dawn ania.." ka aw chu a khur nasa khawp a, au pawh ni ila ka au ring thei pawhin ka ring lo.

"Engtin mah ka ti hleinem che, ka en ringawt ṭhin che alawm, i hnute bial nalh deuh hi ka khawih chakna a rei tawh lutuk,"  ka beng bulah a ti sur sur a, a thawk la ri te chu a rapthlakin a tenawm hluah hluah.

"Min thlah teh," ṭap deuh ṭuaua ka tih pawh chuan, "Min duh ve mai la, ka bialnuah lo ṭang la, kan nute chu buaina a awm miah lo asin," zawi tein a rawn ti leh a, chutih laichuan ka kekawr iptea ka chemte ah kha ka hre chhuak zawk a; mahse, ka ban pha lo, ka ban ka ti che hleithei lo a, la chhuak tur chuan chhete tala ka chet theih a ngai.

"Ka bialnu i nih chuan a nuam dawn asin, ka duat viau ang che, i duh duh ka leisak che anga, nakinah phei chuan i la thu ber mai thei ania, engkim hi ka ta vek tur a nih hi aw, min duh la chuan..." ka nghawngah a rawn fawp zui a, "I rimte hi ka ngai tawh lutuk," tih pahin a thaw ri suk suk a, kei chu thawk pawh ka thaw tawh mang lo. Ka kut chuan rem leh rem loin a kawngah ka vuan a, mak a ti deuh aniang hamhaih hmel deuh hian min rawn thlek a, "Ih...ṭhu phawt ang, sawi..ṭha ang.." ka ti bah niai a, a meng buai deuh nain a phur tih a hriat theih.

Min thlah rual rual chuan ka kekawr ka zen a, "Rawn hnai suh," tih leh chemtea tin ka rual a, "Hmeli leh.." tih pahin min rawn hnaih nghal ruak. Chuveleh ka che ve vut a, ka va tawk chuan ka hria; mahse, thawk leh khatah hnung lamah min nam let rawp a, theihai kungah ka tukkhum ka va tauh ri dawp a, ka lu hit mup leh ka awn thla riai riai chu chiang takin ka hria, ka tha a zawi a, ka khawhmuh pawh a fiah lo nghal a, ka hmaa pa Tluanga ding chu ka hmu phe ruai mai bawk.

"Zawngi, min vit ania aw,...." ṭeng zeta a ti ri te, "Ka dulah min vit ania, ka thi anih chuan i chak lo khawp ang, Zawngi...mi lepchiah nu, thisen min chhuah khanglan chu le.." a ti bawrh bawrh ri te chu ka hre reng a, ka khaw hmuh a fiah loh em avang chuan ka en mawl tawp a, leiah a ṭhuin a pum a dawm ngawih ngawih mai.

"Eng nge thleng a, Jemina...!!!" tih ri vang chuan ka meng ṭawk ṭawk a, nu Nguri lo tlan phei chu ka va hmu nghal a, a hma aichuan ka khawhmuh chu a fiah tawh a, ka lu erawh a na ngut ngut, ka han inbengkang turte chu lu a hai chhulh mai a, din pawh ka ding hleithei lo.

"Lalliantluang, engtizia nge?" tih pahin nu Nguri chuan a unaupa tlusawp reng chu a va ṭhutchilh a, "Saw nu sawn, min vit...ka dulah hian.." sehchilh zet hian pa Tluanga'n a ti a, pa Dinpuia lo thleng lah chu a hamhaih hmel hle ringawt.

"Ding reng suh, hei hi lo buaipui rawh," nu Nguri'n a tih veleh pa Dinpuia chu a che ve nghal a, ka lam pana nu Nguri lo kal chu ka lo en tlawk tlawk thung. "Engtin nge i awm, i hliam ve em ni?" a tih laia a hlauthawng aw chuan ka hnuk a ti ulh ṭun mai. "Min sual a tum a," ka ti zawi ṭiak a, ka ṭap nghal hlawp hlawp.

"A va han zia lo," tih leh min kuah a rual a, "Na i nei em, khawi maw?" tiin min thlek ṭha leh rih.

"Hlau suh, hlau suh, engtin mah i awm loh hi hei, bang thuai rawh," a ti sawk sawk a, ka insum hleithei meuh lo.

"Tluanga hi a thi a put reng ania aw," pa Dinpuia'n a rawn tih chuan, "Chho vat ang u," tih leh min tun thawh a rual a, ka lu hai lutuk chu ka ding ngil hleithei lo. 

"Hnathawk ho kha an la awm angem?"

"An hlawh lak ni ania lawm, min la nghak ang," 

"An hriat chi a ni nang, tih dan ngaihtuah rawh,"

"Engtin nge maw ka'n tih ang le, damdawiina kal vat a ngaih hi...."

"Tih dan ngaihtuah rawh ka ti reng che alawm, an hriat vek i duh em ni?" an invin hluk hluk a, an tihdan chu ka hrethiam lo takzet. Thingkung nghenga ka ding chu min rawn melh ve ve a, "Mina, lo han chho rawh, ani hi chu kan rawn buaipui mai ang," nu Nguri'n a rawn ti a, ka che chang mai lo.

"Kal vat ta che maw le," a ti vin leh ṭhawt a, ka hamhaih leh phu nasa lutuk chu ka thinphu a rang dawt dawt mai. 

Kal mai tuma ka che chu, "Ding lawk teh," a rawn ti leh a, khur ru dar dar chunga ka lehhawi chu min rawn pan hnaiin ka dar tawn tawnah a rawn vuan a, "Tumah hrilh suh ang che, i sawi chuan a pawi zawk ang, sawi loh a ṭha ber, chuvangin ngawi hmiah la, engmah thleng lo angin awm rawh aw, hmanhmawh deuhin chho la, i pindanah i lo awm dawn nia, tumah be suh," a ti nghal mawlh mawlh a, pa Tluanga te lam ka va en chuan pa Dinpuia'n a lo pawm bet run a, a na ti chu a rum nasa tawh mai si a, a thi mai dawnin ka hria a, ka hlauthawng ruai bawk.

"Min chhang ta che," vin fahrana nu Nguri'n a tih chuan lu ka bu sawk sawk.

"Kal thuai rawh," tih leh min nam a rual a, hawi let tawh loin ka kal ve hlawk hlawk a, ka luhai leh taksa khur nasa lutuk vang chuan ka kal chak thei meuh lo. 

Kawng chhoa ka kal lai chuan vawi thum zet ka chawl a, ka kut lah chu a khur hlawk hlawk a, ka ṭap ri leh hlawp hlawp ṭhin. Miin min hmuh ka hlauh vangin ka insum ve ṭang ṭang a, ka mittui erawh dan sen a ni lo. Ngaihtuahna lah chu a fim em em mai thung a, inchhirna leh hlauhnain ka tirilah min fan bawk. Pa Tluanga kha thi ta se engtin nge ka awm ve ang, tual ka that tihna a ni dawn a, Jail-ah ka tang ngei ang, thi lo ta pawh nise ka lakah an thinrim dawn tih chu chiangsa a ni a, engtin nge min tih ang? Ka rilru chiai leh tih ngaihna hre lo chu ka ṭawngṭai ru mawlh mawlh a, ka hlauhna a nep phah der si lo, a hrehawm tih hian a sawifiah zo lo hial ang.

Kawng zawl chin ka han thlen chuan khup dawm chungin ka ding kun ngawih ngawih a, ka lungphu rang dup dup kha a rawn muang ta suai suai hian ka hria a, thawk lak a har hle tawh. Ka tha neih zawng zawng sawm khawmin ka la kal lui va fan a, kawt zawl lan theihna chin ka thlen chuan an in lam pana Lawma lo kal ka va hmu a, "Lawma..." tia ka au ri chu zawi tak a ni.

Ka lu a rawn hai zual a, ka pai phei nawk nawk tawh mai.

Kawng ka en loh lutuk nalamah thingzung ka chhuih leh ta nghal a, hma lamah ka bawk phek thlawrh a, ka han hawi leh chuan ding meuha Lawmsangpuia'n min lo thlir lai chu ka va hmu a, rei a ding lo, ka lam panin a rawn kal a, a hmanhmawh hle bawk.

"Jemina....!" a rawn kun hnaih rualin a kut ka lo ban a, min han tung tho chu a awmah ka bei thlawp a ni ber.

"Engtizia nge ni, ti nge i ṭah!?"

"Min pawngsual a tum...." 

"Tuin maw!?"

"Pa Tluanga, ka rawn kalsan a,"

"Chu pa mai mai chuh, huanah a awm em ni.." min thlah vutin kal nghal mai a tum a, ka pawt bet rang khawp mai.

"Kal suh, kal suh...min kalsan miah suh aw..." ṭap chungin ka uai bet ṭung a, chu veleh min rawn din hnaihin ka darah a rawn kuah a, "I na em, engtin nge a tih che?" tih pah chuan ka sam te chu a rawn chul thuak thuak a, ka tukkhum a khawih fuh rual chuan rang deuhin a thlek a, "Engtin nge a tih che a, i lu chu a va pawng nasa em em ve," a ti leh hlut a.

"Ka na lo, amah zawk kha a na ang, chemtein ka vit alawm, a thi mai thei," aw khur dar dar a ka ti chu phawk fein min en a; mahse, insiamṭha leh vatin ka kut chu nghet deuh hian a rawn vuan a, "I vit a maw?" tiin min zawt nawn leh a.

"A dulah ka vit,"

"A thi em?"

"Aih. Mahse, thisen a chhuak nasa lutuk,"

"Tunah huanah a la awm em ni?"

"Aw, nu Nguri leh pa Dinpuia'n an lo chhoh pui mek ang," Thaw huai hmel a pu a, "A ngaihtuahawm loh chu, lo kal rawh ka hruai haw ang che," tia min kalpui mai a tum a, ka pawt bet leh rang khawp mai.

"A chi lo, a thih chuan engtin nge ni ang, inah ka haw duh lo, hmun dangah kal ang," ka ti chul a, "Khawiah maw, engmah hre chiang loa kal bo chu a chi loh zawk asin," a tih laiin, "Tlanbo zawk ang, ka hlau alawm," ṭah aw takmeuhin ka ti a, min en vawng vawng a, a rilru a buai hmel hle a, mi pawh a chhang thei lawk lo.

A ngawih deuh vang vang hnu chuan, "Kan inah chho ang," tih leh min pawh a rual a, hnial buai bik loin ka zui ve ta zel a. Beiseina engmah ka nei tawh lo emaw ka tih hnuah pawh a lakah hi chuan beisei thar dang ka nei leh ṭhin, tun ang chiah hian a ni, ka chungah thil pawi engmah a thlen tir lo ang tih rinna lian tak ka nei a, min venhim a duh ngei pawh ka ring a ni.

An inah chuan a nu leh pa an lo awm a, kan han lut chu mak min lo tih hmel khawp a.  Lawma chu thil awmzia an lo zawt nghal mawlh mawlh a, ani pawn a hriat ang ang a hrilh a, "La chhuk rih suh se, hnathawk ho an awm ṭeuh mai, tihian lo nghak rih ang u," Lawma pain a lo ti a, chanchin ngaihven turin an nupa chuan an chhuk thla zui bawk a, Lawma erawh chuan min kalsan lo.

Ka bulah lo ṭhuin thil thlen dante min zawt a, kan inhnial dan leh ka pindana a lo luh ṭhin dante chu ka hrilh ve mawlh mawlh a, "Tinge chutiang hre chunga i ngawih renga?" tia min zawh chuan chhannna ka nei lo, thiam ka inti bik lo a, helaia awm ka duhna kha a lian em a tin a ni, hmun dang pan turin duhthlan tur ka nei chhe em em bawk a, chu zawng aichuan amah Lawma kalsan hi ka hreh ngawih ngawih a ni.

"Inphih harh rawh aw, mu rih la, chanchin an rawn sawi hma chu hetah i awm dawn nia," a ti a, tui in tur min laksak thuai bawk.

Ka hmaite chu ka va phih ve bawk a, ka tukkhum ka sawhna vang chuan han chet vel pawh a nuam lo hle a, ka thinphu lah chu a la mumal lo nasa mai bawk nen ka la khur ru der der reng. Lawma chuan an ṭhutthlengah mutna min siamsak a, nachhawkna min eitir bawk a, ka mut fel hnua a kalsawn turte chu min chhuahsan hlauin ka ko let zel a, "Hlau suh, khawiah mah ka kal dawn lo," a ti nain hlauhthawnna hlirin ka khat.

Darkar chanve vel a liam hnuah Lawma pa a lo chho a, pa Tluanga chu damdawi in an pan pui nghal thu a rawn sawi a, engtin nge an sawi tih Lawma'n a zawh chuan, "A tlusual a, thing bul zumah a inchhun palh angin an sawi a, Minai awmna pawh ka hrilh nghal mai, Dinpuia leh a nuin an kalpui a, Nguri a lo chho dawn," Lawma pa chuan a ti zung zung a, ka chhungte thilsawi dan chu ka beisei loh dan lutuk a ni.

"A tlusual angin an sawi maw, engati nge niang le?" tia Lawma ka zawh chuan, "A thiam lo hmasa zawk ania lawm, nangpawh an chhungkaw mi ve tho i nia, an thup duh che a ni ve maithei," rilru buai hmel deuh hian a ti a, Lawma pa thung chuan, "A thih leh thih loh a thu te pawh a la ni ang chu, tunah rih chuan thil awmdan tur hriat a har rih," nghet charh hian a ti a, keichuan ngaihdan ka nei thiam mang tawh lo.

Lawma'n min chhukpui a tum chuan ka la duh mai lo a. Mahse, rei vak lo hnuah nu Nguri leh pu Muana an lo chho a, pu Muana chuan pawi a tih thute sawiin a fapa chu ngaihdam te a dilsak luam a, hlauthawng lo turin min hrilh bawk. "Zanah i nu nen kan kal ve leh dawn a, i nu Atei bulah pawh engmah kan sawi lo a nia, 'A tlusual' tiin nangpawn sawi mai la, a boral anih phei chuan anni hriat ve chi a ni lo ang, eng em a ti loa dam ṭha taka a lo haw anih pawhin i tan hlauhthawn tur a awm lo ania aw, ani pawn engmah a ti zui tawh lo ang, ngaihṭha deuhin i awm dawn nia," a ti dap dap a. 

Nu Nguri chu ka bulah lo ṭhuin ka kut a rawn vuan a, "In pahnihin thiam loh in nei ve ve a, engmah sawi loh hi thil a fel dan ṭha ber a ni rih, chhungkua kan ni a, kan chhungkuaa kan sawifel mai hi a ngai a ni," tiin min hrilh a, a awka chhuakah chuan thu pe aw a lang lo a, ngenna ri a lang zawk mahin ka hria.

Chumi hnu chuan inah kan haw thla a, kei chu pindanah ka chhuk nghal a, zanriah pawh ka pindanah min rawn pe mai a, a tuk thlengin pindan ka chhuahsan leh tawh lo. Nu Atei leh a fate chu khuaah an phei tih Remi'n min hrilh a, a tuk tlaiah pa Dinpuia leh pu Muana an lo haw rual a, pa Tluanga chu pi Lalpuii leh nu Nguri'n an la awmpui thung. 

A chanchin an rawn sawi chuan zai nghal a ni a, a taksa pawimawh lai a hliam lo hlauh a, 'A ṭha leh mai ang,' tiin doctor ten an lo hrilh bawk a, a hliam awmdanah erawh doctor chuan zawhna a nei niawm tak a ni. Pa Dinpuia min hrilh leh danin doctor zawhna pawh chu pu Muana'n a lo chingfel diam tawh a, kei chuan ngawih tawp bak chu tih tur emaw, enghlelh tur ka nei ta lo a, ka chhungte chuan min vengthawngin min ngaihsak thiam viau naa rilru erawh a nuam thei tawh tak tak lo.

"Ka nite bulah ka kal mai dawn," ka ti chu pu Muana'n a remti lo khawp mai, "I niin a rawn ngaihven ngai si lo che a, i pa lah khan a damlai pawhin a fak vak bawk si lo a, an hnena awm aichuan duh leh Maṭhai te hnenah i awm phei mai dawn nia," a ti a, chumi zan chuan nu Ṭhatei call-in a va sawipui nghe nghe a, nu Ṭhatei lah chu a lo inhawng khawp mai a, pa Tluanga lo haw dawnah ka awm phei ang tiin rilru ka siam fel ta bawk.

Ni thum hnuah nu Nguri leh pi Lalpuii pawh an lo haw a, damdawiin lamah nu Atei a awm ve thung a, an la awm rei deuh dawn avangin naupang ho pawh nu Mangaihi kut zalah an tla a, kei erawh ka pawn chhuak meuh lo thung. 

Lawma pawn Azoi hnenah ka chanchin a lo zawt ṭhin niawm tak a ni. Azoi chuan heti hian min hrilh a, "Zanah a lo kal a, kan inhmu em tihte min lo zawt a, 'A nite hnena awm turin lo hmin tum rawh' a ti bawk a, a la duh che em tihte ka lo zawt ve a, min chhang ṭha duh vak lo. Mahse, Puia ka zawt leh tho a, 'Lawma chuan ngaihzawng deuh reuh a nei mek,' a tia, Aizawl lam nula niin a sawi bawk," lawm lo awka deuh hian a ti a, kalbo tura min duhna chu a la ngai reng anih hmel a, khuaa ka awm tur pawh hi hria se a lawm vakin ka ring lo, a hmuh phak loha awm turin min duh zawk a ni.

Azoi lo riah phei zanah Lawma chu ka call a, "Kal bo turin min duh tak tak em ni," ka ti tawl a, min chhan mai lo vang chuan, "Kan inkar rem dan hi i zawng ngai lo a, a rem loh dan hlir i zawng zawk ṭhin a, min duh tak tak ngai lo zawk ti raw?" ka ti leh nghat a, a chhanna erawh hre lo mahila pawi ka ti hauh lo ang.

Ani chuan, "A hun leh hmun dik lohah kan intawng a, a rem thei lo a ni," tiin min chhang a, keiin, "Hmun dik leh hun dik chu kan nghak thei lo em ni?" ka la ti ve fan a, "Mi dik lo i tawng alawm Jemina," tiin min la chhang beidawng fo mai. 

Ni thum vel chauh a liam hman, inrinni tlai a ni a, naupang thei lo tura lo kal te nen veranda-a kan lo ṭhut laiin gate-a autorickshaw lo tlan lut hi ka han hmu a, tualzawl an lo thlen thleng chuan chîk deuhin ka lo en a, ka lam hnaiha ṭhu chu Lawma a ni. 

Ka en reng laichuan Lawma chu a lo chhuk a, chhak lam aṭang chuan hmeichhe sam tawi pakhat hi a rawn chhuak ve nghal bawk a, luggage lian deuh a neih danah an hnena awm tur nula chu a nih ka ring. Lawma chuan a luggage chu a laksak a, chutih laiin hmeichhia chu a rawn hawi kual thuak a, nula ngo leh hmelṭha angreng deuh mai a ni a, a inchei danah pawh nula rethei tak a ang lo a, a sual hmelin a ngeiawm hmel hek lo, nui hmel a pu lo tih chauh a ni.

Chutia kan lo en ṭhap laichuan kan lam a lo hawi a, min rawn en vang vang a, min en dan chu a danglam riauin ka hria, min hre tawh ang maiin a ni min en ni!

End of chapter - 8