WHY DID YOU GO? (CH - 9) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 9

'Thiamna leh finna lama mi chungchuang, a ramin hmelmate thuruk haichhuak tura a tirh spy te hi engvanga phansantu ni leh ṭhin nge an nih i hria em Duhawm? A chhan chu an intahluhna hmunah khan anmahni ngei an inhloh ṭhin a ni. An nihna an theihnghilh a, an luh thuk tawh lutuk avangin an awmdan chu an nihna tak emaw an ti tawh mai ṭhin, chu chu mihring te leh zawhte te inanna a ni, i dai chin tur hrechiang la, ramri inkham la, lut thuk lutuk lo ang che,' tih hi Mr.Know-a hnen aṭangin message ka dawng a.

Zawhte chuan ngaihsaktu leh duattu a hmuhna hmun apiangah a inbengbel mai ṭhin a, kan danglamna pawh a ni, kei chuan heng thilte hi ka zawng lo a, ka mamawh hek lo, ka tana ti ka ni lo a, engkim hi Veroi tan vek a ni, thih hnu piah lama thlamuanna a neih theih nan...a hmel ka mitthla chang apianga a lungngai hmel kan hmuh ṭhin hi tawp tawh sela ka duh a ni.

Inrinni chawhnuah min hruai turin Lawmsangpuia lo kal a, kan kal dan tur a ruahman zung zung a, luggage pakhat chauh ka nei chu mak a ti deuhin ka hria. Ka luggage a hawng lai chu ka lo en reng a, "Hmanrua i nei lo a ni maw?" a ti zawi sup a, tualthat tura kal tum ni turah min ngai nge maw ni. 

"Ka hmuh theih apiang ka hmang ṭangkai mai ang," ka tih chuan min en vung vung a, min chhang lo chuan ka luggage chu a zip ṭha leh thuai a.

"Ka chhungte chuan an hre tawh a, engmah an zawt lo ang che, thil pakhatah min pui ve bawk la ka duh dawn a," a tih chuan, "Phût i neih chu ka ring sa reng alawm," ti maiin ka chhang a, thil harsa deuh a phût chuan ka hnial ang la tih rilruk laiin, "Inngaihzawn der ka duh," a ti tawl mai a, min ti hamhaih khawp mai.

"Engvangin maw?" 

"Hmeichhe pakhat a awm a, ka ex a nia," 

"Chutiang ngaihven hman ka ni hleinem.." lawm lo lek leka ka tih chuan, "I tan pawh a pawimawh alawm, Headmaster fanu kha nia," a ti a, ka beisei loh lam daih a ni, thil ṭha nge anih a, thil ṭha lo tih chu rilruah a rawn lut zat a, an inhnaih viau anih chuan a ṭhatna a awm ngei ka ring.

"Chu chuan engtin nge a puih dawn che a?"

"A chhungte nena ṭhen hrang ka duh a, a rang thei ang berin kal bo sela ka duh bawk,"

"I lo tum tawh zawk a ni maw?" ka ti chu a dik a ni ngei thawk a'n la hluai a.

"A la ṭhen ve thei lo che a ni em?" ka tih chuan a bu nghat a, amah pawh hian a la duh a nih ngei dawn hi, buaina thleng tur a hria a, tuar ve lo turin a duh bawk a, ka thil tum dan nen erawh a inpersan thui khawp ang le.

"I ex chu ka hmuh ve phawt a ngai, a pa chungchang ania hriat ka tum," 

"Engmah hriat a nei ve lo, an bum nasa lutuk tawh zawk...tunah pawh pawngsual niin a inngai a, tual a thah phah lo chauh bawk a, a tuartu zingah a tel ve mek alawm,"

"Ka hmuh phawt loh chuan engmah ka awih dawn lo, mi thilsawi hi ka ring ve vak lo a, nangpawh ka ring lo che..." a mitah ka en kal a, tih ngaihna a hriat loh hmel viau mai.

"Min ring emaw ka tia," zawi deuh taka a tih chuan, "Ring lo," ka ti bawl a, dar a kan uk a, ka luggage chu lain a chhuak zui bawk.

Kawngpui ka thlen thlak chuan auto a lo phar tawh a, luggage chu kan inkarah dahin a sir ve veah kan ṭhu a, ka phone-a sana ka en chuan dar 2 a lo ri der tawh. 

"Veronicai chhungte chuan eng nge an lo sawi?" 

"Eng vak mah,"

"Bungrua kan hralhna te kha i pe lo em ni?" ka va melh zawk a, "Tlem chu ka pe," ti maiin ka chhang a, a chhan a hrethiam ve tho aniang min zawt zui lo.

Kan tlan chhuah hnu chuan kan ngawi dun reng a, zawhna a ngah tih chu ka hria a, engkim han hrilh erawh a ṭha lo deuhin ka hria, ka sawi ang tak khan ka ring lo a ni, he thila Veroi hnukluttu a nih hmel a, damdawi hlan kualtu a ni bawk a, rin bur chi ah ka ngai lo.

Rei dawn a ngawih hnu chuan, "Buaina dang a awm em ni a?" a rawn ti leh khauh a,  lu ka bu ringawt.

"Eng thil nge a?"

"Ka ṭhianpa ka be thei lo a,"

"I bialpa maw?"

"Ni lo, ka ṭhian neih chhun a nia, ka awm loh hlanin a lo zin bo daih a, ka awm a tinuam lo deuh hlek maw le," Min chhang loin a ngawi ve ta vang vang a, khua kan pelh thlengin kan inbe leh ta lo. A lam ka va hawi chuan inngaihtuah mûk hmel fe hian a  ṭhu a, a zam hmel deuh bawkin ka hria.

"Engatinge i chhungte chuan min puih ve a?" ka va ti chu min rawn melh vut a, thil a rawn ti fel awlsam angreng lutuk a, awih pawh a har lek lek zawk.

"Ka thil tih ṭhin hi an hria a, ka bansan an duh alawm. Mahse, an hlauthawng a," a ti a, "An bitum che tih i chiang tak tak em?" ka tih chuan a bu nghat mai a, hei tak hi a nia min puih chhan chu. Khami zan khan amah emaw tiin Headmaster kha an thatah a ngai a, inthiam lohna a nei tih pawh hai rual a ni lo, a fanu a la duh ruk ngawih ngawih laka a buaina pawh hi a nih ngei ka ring.

"I bialnu chu.." ka ti hman zuau a, lu a thing ka hmuh rualin ka tawp leh vat a, "In lamah kan sawi zawn dawn nia," tih pahin driver chu a melh bawk a, a fimkhur reuh khawp mai. Inṭanpui tawn e ti loin inrintawnna kan han nei chaurau khawp a, ani'n min hman ṭangkai a tum a, keiin hman ṭangkai ka tum bawk a, kan chungchang ve veah zawhna kan ngah dun viau chungin kan inchhang thui ngam lo hle bawk a, engtia inthurual thei mai nge maw ka nih zawk ni, duhthlan tur dang nei lo ve ve kan nih vang te pawh a ni ang.

"Engtin nge ka koh ang che?"

"Jenus emaw Duhawm tiin min ko dawn nia,"

"Lawma emaw Sangpui tiin min ko a," ka melh vang vang a, "Lawma tiin ka ko ang che," ka ti hmuk a, ka hawisawn thuai bawk.

"I wine sawi kha eng lem nge a awm i tih khah?" a rawn tih chuan ka bag ka zen vat a, wine bottle-a lehkha inbel chu ka phawrh a, a en uluk viau mai.

"Vawikhat chu ka hmu tawhin ka hria, ka hrechhuak thei mai lo, sawtah chuan a awm i ring em ni a?" zawhna ngah hmel deuha min en chungin a ti a, "A rinhlelhawm tawh viau alawm," tih ngawtin ka chhang thung. Veroi nena inzawmna a neih dan te, wine siam ṭhin farm nena an lo inkaihhnawih dante chhut chuan saw lai hmuna a awm loh chhan tur a vang viau tawh zawk a ni.

"I bialnu chu kan kaltir hmasa thei lo maithei a ni.." ka han ti chu a hriatthiam loh hmel khawp mai. A lamah chuan ka thle hnai a, ani pawhin a beng a lo dawh ve vat a, "Kan kal theih lohna hmunah a kal thei a, ka hriat lohte pawh a hre thei ang, nangman i biak a, a rilru i hneh viau a fuh zawk ka ring, wine bottle hi min zawn hmuhsak theih phei chuan a ṭha viau ang," ka ti a, a pawm loh hmel hle.

"Ani chu chutianga inrawlh chi a ni lo, a rilru pawh a fim lo a, an duh duh danin an tikual thei, chuvang chuan kal hrang vat sela a ṭha zawk," a ti bur mai a, ngaih dan nghet tak a lo nei sa tawh a nih hmel. A hre tlem zawk chuan ka aw ve phawt mai a ngai si a, mi puihna beisei vak lohte pawh a ṭha zawk maithei a ni.

Kawngpui ding lama kan pen tak avangin ka ṭhu ngil thuai a, ngun deuhin ka tlanna tur kawng chu ka thlir a, metal road a ni lo naa kawng a mamin a zau ṭha khawp mai, an ram chin a ni tawh a ni ang kawng sirah te chuan thing phun thar a tam a, thingkung lian deuhah te chuan rawng var an tat phei far a, teak thing a tam em em bawk.

"Kan thleng ṭep em ni?" ka tih chuan, "Thleng ṭep e," driver chuan a lo ti zauh a, minute 5 chuang hret chu kan tlan lehin ka hria, thing hmun kan tlan pel a, a lo eng ut a ni ber. Nimbu huan kan tlanpel zar zar a, rei vak loah kan hma zawnah chuan Cement hmanga siam ban, a chung kual pup hi a lo awm a, 'Sailo Farm' tih a chuang kalh a, kan hmaa thir gate lianpui awm chu a lo inhawng sa ruau bawk.

"Khaw chhung naupang an lo kal aniang," ka bula miin a tih chuan ka chhang lo, ka hawi kual nasa khawp mai, an in chu serthlum lung leh lakhuih thei bakah theikung chi hrang hrangin a hual a, zawl zau deuh lampana kan tlan thlak laichuan a sira in ding mawlh chuan mit a la a, a in chu a ropui viau pawh a ni lo, a lian tih a fuh mah ang, in bul velah pangpar a vul chêk chûk a, an veranda zau deuhah chuan naupang an lo awm laih laih bawk.

"Thirsakawr a va tam ve, khaw naupang an lo kal nasa ṭhin a ni maw?" driver pawh chuan a ti bul bul a, veranda kawtah chuan thirsakawr sawm dawn hi a inhunga, farm reh tak chu a nih hmel loh.

Kawt zawla kan zuk din laichuan veranda lama naupang awm ho chu an lo hawi ṭhap a, "U Lawm, i zin a mi? Khawiah nge i kal a?" ṭhenkhat chuan an lo ti sap sap a, a chhuk hnuhnung zawka ṭangin kan chuan man te ka pe fel a, driver chuan min letsan leh mai bawk a.

Ka beisei ang aiin a nawm hmel daih mai, ka lo ral hriat dan a fuh lo bawk a, ramhnuai reh reih rawih leh in hrân hmel tak bakah a mi chengte pawh ṭihbaiawm hmel tak pu turah ka lo ruat deuh aniang, ka tum dan nen chuan inpersan tak a ni. Ka hawi kual thuak hnu chuan veranda lam chu ka va thlek vang vang a, naupang zinga hmeichhe pakhat lo awm chuan min lo en reng tih ka va hmu a, a hmelhriat a hmu chunga a rawn biak miah loh danah kan nula sawi kha a nih mai hmel.

"Amah saw a ni em?" tia ka bul ami ka zawh chuan, "Aw, ti rawh chho nghal ang," tih leh kal a rual a, ka luggage khai chung chuan chhak lam tlang zawla in ding pakhat chu a pan a, ka zui ve thuai bawk. 

An in pan chhohna step-ah chuan cubic lung an rem chho zui a, an in chu thing hmanga sak a ni. Leikapui niawm tak chu in sirah a lo awm a, mai tai leh maipawl tih angreng a awm ṭeuh a, min hmehpui tluk tluk maite pawh a hlauhawm angreng. Kan thawm hriain a nu a lo chhuak vat a, nu cher rik riak, zan tam riak a pai lo ang tih tur hi a ni a, a fel a ni ang; min hmuh rualin min rawn nuih var var a.

"Ka pa a lo haw tawh em?" Lawmsanga'n a tih chuan a nu chu a beng a ṭha lo tih ka hrethiam nghal a, "Vawk chaw chhum turin a kal leh chiah," tih pahin a nu chuan min rawn chibai zui a, an in chhung lamah kan inzui lut ta bawk. Thingtlang in pangngai tak a ni, a zau a, chhuat lah chu cement-a zut niin a tle hun mai a, thlasikah chuan a vawt duh dawn hlein ka hria.

"Helamah hian i pindan tur a awm," tia Lawmsanga kal chu ka zui ve zel a, pindan te fel ren rawn, tukverh pakhat chauh nei a ni a, khum bak chu engmah thil dang a awm lo. "I thawmhnaw khaina tur kan siam dawn nia," a tih hnuah tukverh a va hawng a, an in hnung a lo lang iar a, bean kung leh tomato kung tih angreng a awm a, bahkhawr a tam khawp mai.

"A te i ti em, pindan chuang kan nei lo a, ka pindan ka hleh ṭhen che anih hi," a nui hmel ka hmuh vawikhatna anih vang nge ni ka hamhaih deuh.

"A piah saw i pindan maw?" tih leh bang lam pan ka rual a, ka thil zawn a lo hrethiam rang khawp a, "Ka en thla lo ang che," a ti ri chu a nelawm vak lo.

"Chuti maw, i bialnu chu a hmelṭhat kha,"

"I ril a ṭam em?"

"Ṭam lo, ei rawngbawl leh sekrek khawih vel ka tih a ngai dawn em?"

"Ei rawngbawl chu a ngai lo ang, i inthlahrun dan a zirin i che dawn nia," kan inen ran a, chutih laichuan a nu kha a lo dâk dêk dêk a, "I nu hming hi min la hrilh lo ania," ka tih chuan, "Vensangi, ka pa chu Pa Tai tiin i ko dawn nia," a ti a, a nu lam hawi chuan, "Thingpui siam a ngai lo, a ril a ṭam lo," a'n ti lauh a, a nu lah chu a la nuisang reng.

"I inbual duh em, zema tui saw a lum púrh a, inbual nan a tawk khawp ang," ka lam hawi a rawn tih chuan, "Ka hahchawl phawt ang aw," ring fein ka ti let a, Lawmsanga lo nui deuh chu ka va hmu hman.

"Engtin nge i hriat a?"

"A har hleinem," ka tih mai laiin, "Vawk te chu zuk en pui rawh," a nu chuan a lo ti sawk sawk a, "Vawk chaw chhum i zir nghal duh em?" Lawmsanga'n a ti chu ka melh no vak lo. Nui ruh ruh chungin min chhuahsan a, a chhuah fel hnuah kawngka ka kalh sawk sawk a, pindan chu ka han en chiang leh rih a, khuma puan phah te pawh a fai em ka en thlap a, suk thar chu a nih hmel. Ka han mu chu ka sil ve ṭhumin ka hria, in chung ceiling chu ka en vang vang a, silpauline vut buak rawng lek lek hi a ni a, tui farna hnu niawm tak hi a awm a, dawithiam hmunphiah chunga thlawk lai lem ang deuh hian a râng bawk.

Lawmsanga khan vawk chaw chhum kha a sawi zing riau a, ka hna ve ber tura mi an dilsak kha a ni bawk a, nakina ka tih tur tho tho chu hun khawhral vak loh a ṭha zawk ang. Ka tho a, ka thawmhnaw hakthlak leh towel nena ka va chhuah laichuan an nufain  dawhkan an lo kil a, ka rin ang chiah chiah kha a ni, Lawmsanga nu chuan mai tai a lo vel mek a, pakhat lah chuan maipawl phel phawk hi a lo inchhawp a, chempui a lo lek vû bawk.

"I inbual duh tawh em ni?" a lo ti var a.

"Aw, khawnge bual in?" ka tih chuan pawn lama a awm thu min hrilh a, ka chhuak chu min lo zui ve nghal bawk. "Tui ka rawn pipe ang, lo va chang rawh," tiin an tuizem awmna lam a pan a, bual in chu a lian viau nain zana zung tura thawh a peihawm loh khawp ang.

Bucket lah chu a han tam em em khawp a, washing machine hlui hmel deuh hi chhak lam bang kilah a awm a, a bang chanve hnuai lam cement a nih laiin a chanve chung lam erawh rangva a ni a, kaw neuh neuh a awm nual bawk. Tui pipe pawh ngaihsak mai lo chuan in chhung lamah ka let a, Lawmsanga nu chu chemte leh lighter ka va dil a, an kawngka luhna bula pheikhawk bawm ka va hai chuan chhe deuh deuh a tam khawp mai. 

"Eng nge i tih a?" ka hnung lam aṭanga a rawn tih chuan ka chhang lo, ka hai mawlh mawlh a, silipar ke artui pan deuh tawh chu lek pahin, "In la duh em?" ka ti a, a ner danah an duh tawh lo a ni ang. Ka chan sawm nghal mawlh mawlh a, ani pawh chuan engmah min zawt tawh lem loin min lo thlir ve reng a, bual in lam ka pan pawh chu min lo zui ve zel bawk. Silipar chhia chu ka hliau sawr te te a, rangva kua chu ka hnawh phui hmak hmak a, kaw riat lai chu ka hnawh a, a dang a awm tawh loin ka hria. 

"Ngaih ngam deuha awm tum ve teh," a lam ka hawi laia a lo tih chuan tawi tein ka nuih a, "Damdawi tawlh hi a hlawk an ti emaw ka tia, ka rin anga hlawk a ni lo nge," ka ti chu a duh vak lo. "Ka zuar lo, a phur kualtu chauh ka ni," a lo ti hmuk a, lighter ka pek lai pawh chuan min en ngur a, sawi zui vak pawh ka chak chuang lo. A chhuah hnu chuan kawngka chu ka kalh sawk sawk a, rin aiin tui chu a lo lum a, ka ren lo viau bawk.

Inbual pah chuan eng eng emaw ka ngaihtuah kual a, Lawmsangpuia khan Veroi hnen aṭangin damdawi a la ṭhin tih a sawi a, he farm nena an indawr tawn dan pawh chutiang chu a ni. Khawi aṭangin nge Veroi hnenah a thlen a hre lo a, a hnathawhna ten an tir a, a va la mai a, a tir phei chuan eng thil nge a nih a hre lo niin a sawi bawk a, chutiang a nih chuan he lai hmuna awm lo inrawlh ve an awm tih a chiang a, farm neitute hian an hre ngei bawk ang.

Mr.Know-a khan an thlai chinte belchiang deuh turin min ti bawk a, huan zau tak anih vangin thil thuhruk an neih a ring a nih hmel a, he tlangval hian min hrilh chin bak pawh hi sawi tur a la neih ṭeuh ka ring, a damdawi lakte kha engtin nge a kal kual leh ṭhin pawh a hre miah lo kha a nia, a thil hre tlem lutuk hi a ṭangkai loh phah viau nain ka chhawr theih phah dawn lawi a, a hriat chakna hi kei min puih a duhna chhan dang a ni bawkin ka hria.

Ka inbual zawh chuan a lo tlai lek lek tawh. "Vawk inah ka kal dawn," a lo tih vangin ka sam pawh khuih lo chuan ka zui a, an vawk in awmna lah chu a lo hla zek a, a kawng erawh a nuam viau zel. Kal pahin an hnathawh dan te ka zawt a, vawk chaw chhum chu a pain a ti tlangpui a, a hman changin a pui ṭhin a, ani erawh a ṭul ṭul thawktu a ni awm e. 

"Vawk chaw lak leh chante i tih pui anga, a chaw chhum hi chu i tihpui vak pawh a ngai lo ang, chaw pek hi chu a hahthlak hmel nain a nuam ve phian a nia, kawlbahra hmun a awm a, thingfanghma rah leh mai leh malpawl te nen kan pe ṭhin a, an chaw chu huanah hian a tam mai, a chang chuan balhla kungte pawh kan la ṭhin a," tih angreng chu min hrilh ve luam a, "Huan fan kual pahin a lak theih dawn chu," ka lo ti sam et a.

"I la fang dawn nia, grape huan lam phei saw chu mi pawn an rawn tlawh fo a, thlalak nan an rawn hmang ṭhin alawm," a tih chuan, "Kal phal loh hmun a awm em?" ka lo ti zauh a, min rawn melh rang viau a ni.

"Kal phal loh hmun chu a tam mai,"

"Chutia law?"

"Hnathawk tan chuan a kal theih, grape wine an dahna hmun leh khuai an khawina hmun te khu mi tlawh an phal lo a, a chhan chu khuai an hlauhawm a, wine bottle lo lak ruk chingte an awm ṭhin bawk a, sangha dil pawh tunah chuan mi dang kal an phal tawh lo, ramhmul damdawi chi hrang hrang awmna hmun a awm bawk a, chu lai phei chu hlawhfain an thlawhpui ngai lo, pu Muana chauhin a thlo fai ṭhin, a thlai chinte hre loa an tihchhiat ṭhin vang a nia, i ngaih ang em em chu a awm kher lo maithei a ni," a ti leh duah a.

"An thlai chinte i hre vek na nge?" ka tih chuan dar a kan ak mai. "A tam zawk chu ka hria a, ka hriat loh pawh a tam viau ang, hnim emaw kan tih sam fai an phal loh a awm ṭeuh alawm, mak leh deuh pakhat a awm bawk.." a rawn hawi a, ka lo en phawk deuh aniang chu, "I beng a vir hle mai," tiin min nuih suk a.

"Eng nge?" ka tih chuan, "Pu Muana hian damdawi siam hi a tuipui a, wine te hi eng tin tin emaw a khawih danglam ṭhin a, a chhuah tui viau zel a, i wine zawn pawh kha a siam a nih theihna lai chu a awm a; mahse, ani hi chuan zawrh tur hian a ti tlangpui a, sumdawng mi ve tak mai hi a nia, a zawrh chhuah si loh wine chu eng atan nge a siam ang, ka hrethiam lo deuh maw le.." a tih chuan ka chhang lem lo, ka lo ngaihtuah thui viau tawh a, eng atan nge tih lam aichuan engtin a thawh tih zawk a ni ka buaina chu, a thawh dan hre tur chuan kan hmuh phawt a ngai a, he pa siam hi anih tak tak chuan farm-ah hian a awm ngei ngei dawn a, thil dang zawng aia hriat ṭul pawh a ni.

"Mak ka tih zawk tak chu, nikum kum tir lam aṭang khan mi ṭhenkhat lo kal ṭhin an awm a, drugs dealer an nih ka ring deuh a, nutling leh patling ṭhriau ṭhuau tawh an ni hlawm. Ka en thla deuh ṭhin a; mahse, damdawi lam aichuan wine an ngaihven zawk a, wine test tura lo kal satliah chu an niin ka hre lo..." a ti a, a sawi lai pawh chuan a rilru a buai hmel viau mai. 

"Rin dan i nei em?" ka tih chuan min en vang vang phawt a, chumi hnu chuan ka beisei loh deuh thil a rawn sawi. "Chuta lo kal nu pahnih chu hotel neitu an nia, nula naupangte rawn hruai an nei ṭhin bawk. Hmeichhe inzawrhna lam an buaipui anih ka ring, an hotel-a va kal a, va hrechiang turin hun ka la nei lo a.." a tih chuan rilruah zawhna a rawn lut zut zut mai.

"I hre tlem bawk si.." ka lawm lo ringawt pek a, ka inhumruh titih.

"Ka hre tam tawh lutuka, ka rilru a buai zo anih zawk hi," a tih chuan ka chhang buai peih lo. 

"Nula naupangte chu eng atan nge an rawn hruai i hria em?

"Wine an tem kual tir a, wine ṭha leh tui chu a hre khawp mai,"

"Hmeichhe inzuar a nih i ring a ni maw?"

"A ni tih ka chiang?"

"Engtin nge i chian theih?"

"Ka chhui ve bawk alawm, khuaah sawn hmelhriat ka nei nual a, call girl chu an tam mai, an hmel en a i rin loh deuh deuh an ni hlawm ang, chung ho chuan agent an nei a, hotel leh driver hman bik pawh an nei, an incheina thlengin an tum sak ṭhin," kan inen ran a, a rilrua thil awm zawng zawng chu ṭham chhuah mai theih nise ka ti, ka thurualpuipa hi ka duhkhawp lo takzet a ni.

"I thilsawi chu a dik a nih chuan wine special tak an mamawh tihna a ni anga, varak lem chuanna wine pawh chu a ni maithei, hmeichhe inzuar ho tana siam a nih chuan tisa châkna pe thei thil emaw taksa tilum hma em em chi, a hranpa takin an siamtir a nih ka ring, chuvang chuan langsar taka hmuh tur a awm lo a, a bottle-ah pawh tute siam nge tih hriat theihna tur an dah lo a, a inmil thlap alawm, ka ṭhiannu khan a tem ve tawh a, 'Magic ang maiin a thawk' a tia," chutih lai chuan Mr.Know-a thilsawi kha ka hrechhuak rauh rauh a, Veroi kha a thih hma khan a chî a chhuah thu a sawi a, a tir kha chuan Zohera nena awm dun zo chauh an nih vangin ka ngaihdan a phir a, tunah chuan ngaihdan pakhat pawm tlak zawk a awm ta a; mahse, chu lah chu ka duh loh dan zawk a ni lehta nghal a.

"Anih chuan wine dahna chhek inah khan kan zawng dawn em niang?" a tih chuan a awmna ka lo zawt vat a, "Kan in thlang lama kawngah khan vei lamah, grape hmunah chuan chhek in a awm nual a; mahse, wine barrel a tam lutuk, bottle-a siamsa pawh a awm ṭeuh, ka kal fo a, varak lem awmna kha ka hmu ngai lo, ka hmu tawh nia ka inhriat pawh kha a bur ruak chauh a nia, call girl pakhat kan enthlakna hmunah," a ti leh rih a, mi in an tlawh an phal anih chuan langsar taka an dah chu a rinawm loh a; mahse, a awm hlat vak erawh ka ring lo.

"Eng tikah nge kan zawn ang?" ka tih chuan a ner nung a.

"I hmanhmawh mah mah ania aw, engkim tih nghal vek tum suh, tette aṭanga helaia awm hi ka nia, heti chunga hriat loh ka ngahzia hi en ta che, an sumdawnna zawng zawng pawh ka hriat miah loh hi," a lo ti bal bal a, ka helhhawlh deuh a nih hmel, rinhlelhawma ka awm lohnan ka dawhtheih hram hram a ngai a ni.

"THEIH THUAI SE..." za lo zetin ka nuih a, min en run ringawt.

"Jeminai chungchang kha.." a rawn tih chuan, "E, ni tak...inngaihzawn der kha a ṭul pawhin ka hre lo, kan duh huna chhuahtir theih dan ka hria alawm; mahse, la awm ve rih rawh se, kan hriat theih lohte min hriatsak turin kan la mamawh dawn," ka lo ti zung zung a; mahse, ka thil sawi chu a duh vak lo a ang.

"Hman ṭangkai tum suh, Minai chuan engmah hriat a nei lo, a ni hman liam dan takngial pawh an theihngilh tir nghal zel asin," hrethiam lo fein ka melh a, "A hma khan pawngsual angin a inngai i tia, eng nge a awmzia?" ka ti zui zat a.

"Thawkkhat lai khan a damlo a, a pa boral hnu rei vak loah khan a nia, a tho â ṭhin a, zun te a cheh a, mi â ang ruaiin a awm. I hmuh loh chuan i hrethiam lo ang, a dam hnuah pu Muana hian a hypnotize-a, a thil theihnghilhte a hriat chhuah leh nana ti an nia; mahse, dawt vek a ni, pu Muana khan.."

"Ngawi teh," tih pahin kut ka lo phar hluai.

"Dawt vek i tih chhan chu sawi hmasa rawh,"

"A chhan chu pawngsual a tawh zan khan ka awm, Hriata khan a khawih lo a, in lampana a pu chho pawh a hnungah ka zui ru a, a kalsan lai thlengin ka hmu," a ṭawng chu a sehchilh rap a, a mitmeng aṭang chuan dawt a sawi loh hmel viau bawk.

"Hypnosis chu a dik lo zawngin a kal a ni maw?" ka tih chuan, "Ni e, Minai thil hmuhte kha a hypnotize tuin a duh ang takin a hmuhtir zawk a ni, Hriata chungah pawh chutiang tho chuan a ti, ka ṭhianpa khan pawngsualtu angin a inngai a, a inthiam lo lutuka kha ka khawngaih a sin, Minai lahin thil tak tak emaw tiin a tuar na em em bawk a.." a mitah ka lo en reng a, a rilru a na ve hle aniang a mit pawh a sen ram a, mi beidawng deuh hi a ang, tu emaw lungngai hmel min ti hrechuak lehnghal a.

"A....i thilsawi aṭang khan zawh duh che ka nei nual," a lo bu zauh a, min zawt rawh ti niawm tak hian min melh a, thil hriat hmaih te tham tak pawh hian ngaihdan hi a ti buai thei tlat zel a, ani lah hian a sawi kim chang lo thei em em bawk.

"Chumi zan chuan engthil nge i tih, thil tih ruk i nei nge, thil tih ruk an nei?"

"E..aw...nu pahnih leh pa pahnih an lo kal a, nula naupangte nen khan, nghakuai chiahna te an lo keng a, ka rinhlelh sa an nih vangin en thlak ka tum maw le, zan riak tura lo kal an nia, a tir chuan dil lamah puan in an kaih dawn anih ka ring a; zan laiah thlitlai turin ka kal alawm. Grape huan lamah zawk thawm ka hria a, Jeminai khan min zui tih ka hre lo reng reng, a hnung lawka ka awm laiin chhek in kha a rawn bihthla a, an ṭawng te pawh a hre pha ang, chutih laiin Hriata khan a rawn hmu leh ta si a, ka birukna aṭangin ka chhuak hman ṭep  a ni. Hriata'n pu Muana a va ko chhuak a, nikhaw hre loa Minai awm kha hruai haw turin a ti a, ka zui vangin engmah ka hre ta bik lo," a ti zuai deuh ruih a, ban ka lo phar leh zauh.

"Engvangin nge hypnosis chu a dik loh chhan ni ang, nula chuan thil hriat a nei hman a ni lo maw?" ka tih chuan, "Maithei, a bihthlaa, hmuh a nei pawh a ni maithei," a ti a, a sawi chiang ngam chiah lo thung.

"Chhan dang pawh a awm maithei a ni," ka tih chuan hrethiam lo hmel leh zawhna nghah tih hriat tak hian min en a, "Nula chuan a theihnghilh i ti si a, a hypnotize laikhan chhan dang pawh a siamsak thei a, a duh duh danin a hriattir thei bawk a, thil tisualtu ni miah lo tisualtua a siam chu a mak deuhin ka hria, nula lama buaina a lo nih loh theih dan a awm tlat a ni," ka ti a, keimah pawh chuan ka chiang chiah bik lo.

"Hriata vang a nih i ring a maw?" 

"Ka hre lo le, chhan dang awm thei ka ngaihtuah mai mai ania, i ṭhianpa chu eng ang mi nge ni?" tiin ka zawt let a, "A fel bik vak lo, ruihhlo a duh ve a, a chhungte nen an inti ṭha vak lo bawk, farm-a a rawn khawsakna pawh kum khat zen zawn chauh a ni, a rilru chu a ṭha phian a, a hmel pawh a chhe lo, nula han tih kual velah hi chuan kan tluk lo khawp mai, chuan...." a han nui tawi tuk a, "Kan pu fapa naupang zawk nupui nen hian eng emaw a awm deuh a," a ti zawi sup a, a zahpui deuh nge ni a awmdan chuan nuihte pawh a ti za deuh.

"Huat chhan chu a neih hmel hle mai," ka tih chuan a han inngaihtuah leh vang vang a, "An chhungkua hian mualpho chu an hlau khawp mai," a ti zui nghat a, eng thil dang nge an hlauh ang aw, an hlauh chu an chak lohna siam theitu a ni a, hriat ṭul dang pawimawh tak a ni.

Ṭawng leh tuma ka ang zuau chu ka ban a rawn vuat chawt a, "Hawi chho miah suh, Jeminai'n min en mek," a ti ta mai a, "Tih chu i la duh ṭalh elo?" ka lo ti hu.

"Ka hrethiam lo, farm aṭang hian chhuak se ka duh ber, atana ṭha tur ka ngaihtuah vang ania," a tih chuan ka nui hul hak a, "Ka sawi tawh kha aw, keichuan la awm sela ka duh, tawktarh atan ka duh alawm," ka ti chu a duh lo ngang mai, "A teuh lo lutuk, i duh chuan min hmang zawk mai rawh," a ti hluk a, ka hrethiam lo hmel a rawn hmuh chuan, "Ṭhu lawk ang," tih leh min pawh a rual a, min thlirtu lam hnungchhawn zawng chuan insi lek lek hian kan ṭhu a, ka va thlek laichuan kawng thlang lam a melh daih a, "Ṭhianah kan siam thei lo ania, rei deuh awm thei pawh a ni tawh lo, Pa Liantluanga lo haw hmaa a kal a ṭha ang," a ti bul bul a, ka chhang lem lo thung.

Chu tih laichuan ka thlanglam kawngah pa pakhat hi a rawn lang hlawl a, chu veleh ka bula ṭhu chu a tho nghal a, "Sangpui, e..in lo kal dawn lo emaw ka tia," a rawn ti lauh a, "Chhuk ang, a hmun te hmu ve hrim hrim rawh," tia Lawmsanga kal chu ka zui ve thuai bawk.

Vawk chu an lo ngah khawp mai, an vawk chhaw chhumna hmun te min hmuh a, a pa lah chuan min a lo be ṭha khawp a, bai suih suih chungin vawk in min enkual pui a, a ke chu a insei hleih deuh anih hmel e. "Naktukah vawk chaw kan chhum anga, a chaw laksa a la tam a, kar tharah chiah lak a ngai ang," tih pahin vawk in thlang lama kawlbahra hmun te pawh min kawhhmuh a, dawl kung pawh a tam khawp mai a, a chaw lamah chuan buaina an neih loh hmel khawp mai.

Kan let leh lamah ka hming min zawt chauh a, "Jenus.Lalduhawmi ka nia" ka tih chuan, "Duhi kan ti mai che a ni ang chu, kei chu min pa mai rawh aw," a lo ti sam then a, pa fel leh ṭawng duh angreng tak a ni.

In kan thlen chuan sa rim a nam chek chek a, Lawmsanga nuin arsa a lo chhum hi a lo ni a, "Chaw kan eihma anga, in puiah kan zuk leng thla dawn nia, i inhmelhriattir ve phawt loh chuan a dik lo ang, nula an nei ve nual a, i kawm rual tak takte pawh an awm ania, " a lo ti siam siam a, a sawi danah kan lenna turte chuan awmpui pahnih fel deuh deuh an nei a ni awm e.

Lawmsanga a inbual leh te te hnuah zanriah kan ei a, a chhungte bula min lo sawi dan pawh a hriat ta viau mai. "Bawiha hi an tir zel mai si a, thil ṭha lo deuh a lo tih phah a, in man chhuak a nih pawhin ani hming hi chu ri ve lo sela, police puitu chu ngaihhnathiamna pawh a awm ṭhin a ni lawm ni," Lawmsanga pain a tih chuan ka piaha ṭhu chu ka va melh zawk a, a sawifel rang ka ti viau kha ania, police anga min sawi hi chu ka beisei loh lam daih a ni.

Ka chaw eikham chuan pawn bathlarah ha ka va nawt a, ka awmna aṭang chuan puberte in leh a chhehvel chu a lang chiang viau mai. Veranda step-a hmeichhe naupang pahnih ice cream ei lai chu ka en reng a, Lawmsanga lo chhuak thawm ka hre bawk. "Naupang engzah nge awm a?" amah pawh en lem lo chuan ka ti a,  "Paruk, mipa naupang pali leh hmeichhe naupang pahnih," a tih laimek chuan mipa naupang pakhat a lo chhuak a, a farnu pakhat ice cream eia ṭhu mai mai lai chu a nam bu deuh lawp a, hmeichhe naupang chuan a pi a au lang lang a, "A chimawm a nia, Duhsaka a nih khu," ka bula miin a lo ti ve zat bawk.

Kam ṭhuah turin ka luhsan a, chumi hnuah ka pindan lampanin kawr lum ka va ha a, ka inpeih chu a ni der a, anni pawh an insiam rei lem lo. Tualzawl lampana kan inzui thlak laichuan naupangho kha an awm tawh lo a, veranda-ah nu pakhat a lo ṭhu thung a, an in lam kan pan lai chuan a lo hawi ve reng a, Lawmsanga lo kal hnai chu tunge a nih ka lo zawt a, "Headmaster nupui," a tih chuan ka en chik viau mai. Nulian lam, la upa lo tak a nih hmel a, a khua a har viau a nih hmel, phone-ah zai a play a, a thle zawi ngiai bawk a, ruih nei te pawh a ang deuh.

"Ngurpui, chaw in eikham tawh hlawm em?" pa Taia'n a tih chuan a zial zuk lai a fawp de vât vât a, "An insengfel mekin ka hria, kha kha in nula thar chu em ni a?" a lo ti var a, "A nih hi," pa Taia'n a tih leh chuan ka lam rawn hawiin, "Va lut rawh u, ka'n zu zo lawk ange," a ti a, a ṭhutna aṭanga thoin veranda thim lam a pan a, kan luhsan ta thung.

In chhung chu a zau ṭha khawp mai, pitar pakhat hian min lo chhawn a, nula pahnih hi chaw eina sengfelin an lo buai hmel hle bawk a, sitting room lamah chuan midang an awm a, naupang ṭawng barh barh thawm pawh hriattur a awm. "Vawiinah maw i lo thlen?" pitarin a lo tih chuan, "Aw, ka rawn thleng tlai deuh a," ka ti ve vat a, "I va hmelṭha reuh ve, ram hnate i thawk thiam ve ang maw?" tiin a nui var var a, chutih laia sitting room aṭanga lo chhuak chu in neitupa a nih mai hmel.

"Kan nula pawh a lo thleng tawh a ni maw, khawi ka lo chibai teh ang che," a kut a rawn phar nghal a, ka lo ban ve thuai bawk. Min en chik angreng a, pangngai thei ang bera lan ka tum a, nui hmel han put erawh a har deuh a ni.

"Khawiah nge Nguri kha?"

"Veranda lamah khan em mawni le," an nu chuan a ti a.

"He lamah lo ṭhu phei ula," tiin in neitupa chuan sitting room lam a pan a, "Ka lo va chhuak dawn asin," Lawmsanga'n a lo ti chu hnial ka tum deuh uk a; mahse, a pa zawkin min lo hnial khalh a. "Vak bo tawh suh, zanin chu leng chhuak rih lo rawh," a tih chuan a hnial zui bik lo. Tv hmaa naupang ṭhu ho chu an bengchhen deuh avangin in neitupa chuan lehkha zir turin a ti hlawm a, peih loh hmel deuhin an kal hlawm a, rei vak loah pakhat hi pindan aṭangin a rawn chhuak a, min hmu chu a hamhaih hmel deuhin ka hria.

"Taia te nula thar chu a nih hi, vawiinah a lo thleng a ni awm e," in neitupain a tih chuan, "Chutia law, ka rin aiin a la naupan hmel daih mai a," nelawm deuh hian a ti a, ka epa chair-ah chuan rawn ṭhuin a hawi kual thuak a, Lawmsanga chu a ngaithei vak lo emaw tih tur hian a rawn melh a, Lawmsanga erawh chuan a phone a bih daih thung.

"Eng ber maw a tih dawn a, kan chhawr tur ang deuh khan in inbiain ka hria?" pa Taia lam hawia a tih chuan, "Nia, ka chhungkaw member angin hlawh pawh a hranpaa pek a ngai lo kan ti kha ania, vawk min enkawlpui ang chu," pa Taia'n a tih chuan, "Huansam leh eng eng emaw inhlawhna tur chu a awm tho ang, hna kan ngah dawn chauh alawm," ka epa ṭhu chuan a ti leh zat a, min en duh em avang chuan ka tan pawh melh loh a har a, kan mit a intawng fuh thei viau bawk.

"Eng chen nge lehkha i zir, thiam thil bik te i nei em?" putara'n a rawn tih chuan college ka chhuah loh thu leh aizawl lama lehkha ka zir ṭhin thu ka hrilh a, "Engati nge i zawh loh a?" a tih chuan sum lam harsatna kan neih vang anih thuin ka chhang a, dawt ka sawi hran lo, college kha ka rap ve hman zuai a, ka nu damloin hna engmah a thawh theih tak loh vangin ka bansan leh ta kha a nia, a dam hnuah ka nu khan zir zawm leh turin min ti fo a, ka zir rei thei dawn chuanga ka hriat loh vangin ka zawm duh tawh lo thung.

"Thingtlanga khawsa i ni si lo a, a nuam i ti meuh ang maw?" putara'n a tih leh chuan, "Khawpuiah pawh mi in hnuaiah khawsak harsa deuh chunga seilian ka nia, a ṭul ṭul ka thawk thei ang," ka ti ve vat a, a nui deuh hui tawh. 

In neitunu lo phei chuan chawhtawlh teah serthlum a rawn chawi phei a, "A tang rah ania, a thlum khawp mai," tih pahin ka hmaah a rawn chhawp a, "Khawmaw, min lo ban teh," putara'n a rawn tih chuan ka lo pe ve thuai a, Lawmsanga nu pawn a kheh nghal mawlh mawlh.

"I pa Taia te chhung nen hi chuan chhungkhat ang deuh hian kan awm a, mamawh engkim kan inban tawn mai zel a, hnathawk dang ang pawhin kan en lo ania anni chhung hi chu, nangpawh kan nau angin awm la, inthlahrung miah suh aw," serthlum kheh pahin putara chuan min rawn thlek a, "In huan hi ka rin ai daihin a zau," tiin ka lo nuih let var var a, pa nelawm leh pangngai hmel tak hi a ni a, fin hmel deuh emaw phakar hmel tak a nih ka rin laiin a ṭawngte chu a damthluam a, en mai chuan eng mizia nge a put tak tak hriat a har khawp mai.

"Kan vah loh chinah pawh hian ram kan la nei zau teh asin, kan enkawl zawh bak hi kan ti tawh a, tun hma angin ka thawk hleithei ta lo bawk nen thil dang tih belh zel theih pawh a ni tawh lo, kan eikhawp hi chu kan la thar ve thei zel a, hahdam deuh zawka pawisa lakluh dante kan dap tawh anih hi," a ti charh charh a, Lawmsanga pa chuan vawk chungchang a lo sawipui zui a, karleh lam zirtawpniah pathum an hralh dawn niawm tak a ni.

An titi luam a, thingpuite in pahin keipawh chu an huan chungchangte min hrilh pah a, "I chhungte hi chuan vawk an enkawl ber a, bawng enkawltu kan nei bawk a, ar leh kelte pawh khuti lamah khuan kan vulh a, nupa rekin an enkawl a," tih angreng a sawi laichuan ngaihtuahna a lo vak kual ve hle a, zawhna zawh tur lah chu ka ngah.

"Chhungkua in tam hmel si loha, a hautak viau lo maw?" ka tih chuan, "Hautak tehreng mai, hlawhfa chhawr loh lai kan nei meuh lo, ka puzawn a boral tirh khan loan hmangin bul ka ṭan ṭha a, ka fate pawh thil dang tia an pen kawi ka remti lo a, beidawn rum rum changte pawh a awm ve ṭhin alawm, huan siam hi chu teirei peih a ngai khawp mai," a ti leh dap dap a, chutih laia Headmaster nupui lo lut chu a lo ko thuai a, "Ka fanu naupang ber a nih hi, ani saw ka fapa u zawk a nia, a chhang hi damdawiinah a la awm mek a, ka fanu dangte hi khuaah pasal neiin an awm bawk a," tiin min hrilh a, headmaster nupui chu ṭhu tura a tih laiin a kalsawn leh daih a, putara pawh chuan a en zui vung vung a, an boruak a fuh lutuk lo a ang.

"Engtin maw kan koh dawn che?" ka epa ṭhu a ni. 

"Duhawmi ka nia," 

"Lehkhate i thiam thei em, naupangho hi i zirpui thei mial lo maw?" a thil min zawh chu chhán mai dan ka hre lo, "Minai a awm alawm," in neitunu khan a lo ti zauh a.

"Nula kan nei ve tak asin, i nu Ngurpuii fanu hi a nia, in inrual vel maithei a ni," putara'n a rawn tih chuan ka piaha ṭhu chu ka va mitmei a, "A mu tawh em ni?" putara'n a tih leh chuan, "A nuamsam chiah lo a nih kha, Maṭhai lah chuan engtikah nge a lo awm phei dawn a rawn ti sek a, a duh hun huna phei turin ka ti naa a hreh deuhin ka hria," in neitunu khan a lo ti a, Lawmsanga ka va melh chuan danglam engmah ka hmu lo a, a hre sa a nih hmel.

Rei tawk fang kan ṭhut hnu chuan Lawmsanga'n haw a rawt a, "Naktuk zingah artui zuk la ang aw, duh leh kan nula pawh kha lo kal ve sela, huan fan pah a ni mai alawm," putara'n a tih chuan ka lawm ru ngang mai. "Thawh hma a ngai dawn anih chu," Lawmsanga'n a tih chuan, "Dar 6 velah a pawi lo, tunlai chu ka tha na a chhuak a, zing thawh ka harsat riau," putar chuan a ti a, kan haw tur chu veranda thlengin min lo zui bawk a, pa Taia nen an inbiak khawtlai leh rih avangin kan kalsan ta bawk.

"I bialnu kha a awm ve lo a?" ka tih chuan, "In hnuaiah a awm a nih kha," ti maiin min chhang a.

"Headmaster nupui kha a dik loh hmel riau," ka tih leh pawh chuan, "Eng emaw a rui a nih kha," a ti leh zat a, "Damdawi la tura tir ṭhintu che kha a ni em?" ka tih chuan, "Ni lo, pu Muana min laktir a nia, ani pawh khan a hriatpui tho ang, pitar pawh khan a hria a, a hre lo der thung a," tiin min chhang a. A la lut a, a chhuah leh dan lam a hre tawh lawi si lo a, ngaihtuahna a tibuai angreng khawp mai.

"Eng nge an chhungkua chu i hmuh dan?" tia min zawh chuan, "An pangngai hmel mah mah," ka lo ti tawl a, "Chu chu a ṭha nge ṭha lo?" tiin min zawt leh a.

"An pangngai hmel lutuk kha a makna lai tak,"

"Mak tih i la ngah dawn chauh anih chu,"

"Naupang lehkha zirtir kha ka ti zawk dawn em mawni le?" ka ti chu a lo nui huk.

"Ka thiam i ring nange?"

"Ring e; mahse, nang aia zir sang an kawl alawm," ka ner nang a, kan Ṭhamawli chu min khaikhin vel em mawni.

"Ka thiam thei viau asin, ka zir ve laichuan topper ka ni ziah ṭhin," a nui leh mai a, "Kan IQ a in san hleih viau ang, nang chuan a rim i hriat reng tawh pawh a awmna i hre thei lo ania, thil hi han chik deuh ṭhin ni la chuan heti lutuka bangbo tur hi kan ni lo," ka ti chho mawlh mawlh a.

"Min zilh i tum elo?" tih paha a rawn inher chu ka melh chho haw mai.

"Zilh i duh em ni?" ka tih chuan, "Duh miah nang," a ti bul hmuk a, a inher leh nghat chu tawi tein ka nuih. 

Ina kan luh hnua ka phone ka en chuan Zohera message a lo awm a, rang fahrana ka hawn laiin thu awmze nei em mah a awm lo, a delh sual palh nge mawni. Ka call nghal a, a tlang thei miah lo lehnghal a, ka sawi nawi theih awm lo mah se sawi tur ka ngah tawh khawp ang, duh lo eng ang mahsela ani hi chu zilh deuh a ngai dawn.

Lawmsanga pa lo chho chuan, "An fel hmel viau nain zuk tlawhpawh lutuk loh tur aw, chhungkua angin kan awm an ti naa an duh hun teah lo chuan mi an pawh tak tak lo ania, a changin biak an nuam viau a, a changin hmelhriat loh ang mai hi an ni leh ṭhin a, pawh theih tak tak si loh hian an awm thiam ania, an biak che chuan ṭha deuhin chhang la, an mit tikham zawnga awm loh a fuh ang," tih angreng chu min hrilh ve mawlh mawlh a, "I bialnu ka mamawh chhan anih chu," tiin Lawmsanga ka va hrilh zauh.

Nu berin mut mai a rawt tawh vangin kan pindan lam kan pan a, ka muhil thei dawn lo tawpin ka hria. Ka pindan piah ami lah chu a thawm a hreh hmak a, a muhil nghal mai nge mawni. 

"Lawmsang," bang chu ka kik ri karh karh a, "Eng nge?" a rawn ti thum dut.

"Veroi nen inhmuh in tum tih kha Headmaster khan engtin nge a lo hriat?"

"Ka hre bik lo, i ṭhiannu khan a hrilh aniang,"

"Nang aichuan thil an sawi dun tam zawk a ni maw?"

"An inhmu ru fo alawm," 

"Nangmah emaw an ti nia i hriat chhan kha ka hrethiam lo ania, he laia mi tu emaw hi i ringhlel bawk si a, huat chhan tur che an nei em ni?" 

"Ka hre lo, he mite bak hian ka tel ve tih an hre hleinem,"

"Ni ta se, nang chu an hnathawk,, an kutke ber i nia, engvangin nge thi tura an duh ang che?"

"Han ring chhin teh?"

"Ka ring chhin mek alawm, nang lah hi hlau angin i awm mang si lo a, helaiah lungmuang deuhin i la awm a, he laia miin thah tum ta che sela an hai mai theih danah che mi an tir chhawng tihna a ni a, ka ngaihtuah neuh neuh hian thil zep i nei anih ka ring tlat?"

"Eng nge ka zep ang, ka hriat loh thil ka zep thei dawn em ni?" Chhang loin ka ngawi rauh rauh a, "Eng emaw chu a awm a ni," ka ti leh halh a, min chhang tawh lo thung.

Dar 12 pelh hnuah pawh ka ngaihtuahna chu a la chawl thei lo. Ka ngaihtuah nasat poh leh a buaichuar. Mr.Know-a message kha ka ngaihtuah let a, zawhte leh mihringte inanna a ti kha a nia, Lawmsanga hi zawhte a ni ve thei mai angem?

Ka pindan kawngkhar kik thawmah ka harh hlawl a, "Dar 6 a ri ṭep," pawn lam aṭang chuan a rawn ti thum dut a, ka tho rang khawp mai.

Putara chuan an kawtah min lo nghak vang tawh a, percel tel khawm hi a lo khai a, artui  dahna tur anih hmel. "A plate kha a la awm nualin ka hria a, khuaa i kal leh hunah rawn hawn belh la a ṭha ang," tiin Lawmsanga chu a hrilh a, "Ka hnungah lo kal rawh, Lawma'n hnung dawl rawh se," a tih vangin ka zui ve thuai bawk. Kal pah chuan an huan te chu min kawhhmuh pah a, eng nge an nihte min hrilhfiah zel a, thingthupui leh chingit kungte chu ka la hmu ngai lo a, ka rin ai daihin a kung a lian. 

"Saw saw persimmon kung ania, a rah thei lo reng reng mai, plum hi chu nakum lamah chuan an rah ve thei tawh ang," tih angreng sawiin a ṭawng chawl meuh lo. A huan thlai vel chuan a ngaihtuahna a luah lian hle tih a hriat theih a, suahsual rawng han bawl tura rinhlelh pawh a har dawnin ka hria.

Grape huan kan thlen chuan Lawmsanga chu ka va thlek leh ṭhin a, min en kur chungin engmah a sawi ngai lo. Chhek in pathum lai a awm a, pakhat phei chu lian tak a ni. "Grape seng hunah chuan khua a mite an lo kal ṭhin a, kan picnic luih luih zel asin," ka hmaa kalin a rawn tih chuan, "Engtikah nge kan seng theih ang?" ka lo ti var a, "A la sen chauh alawm, grape wine i in ngai em?" tiin min zawt zui a.

"In ngai lo," ka ti mai a, "Kan siam hi ka tem tir dawn che ania, i zawng chhang ang tih phei chu a hlauhawm mange," tiin a nui kur kur a, zawhna han zawh leh mai ka tum laiin ka hnunga kal chuan ka sam a rawn pawt zauh a, ka ṭawng zui ta bik lo.

An ar vulhna hmun chu tlang zawl thengthaw nuam deuh a ni. Ar lah chu an han ngah khawp a, ram ar te pawh an awm a, an boiler dahna in phei chu lian tak mai a ni. A enkawltu nupa te chuan thingpuite min lo lum sak a, kan in zawh hnuah artui kan la ho a, percel thum lai kan la khat a. Putara chuan, "Dila kal lawk ka duh si a, min lo han hawsan mai rawh u, Lawma'n percel pakhat hi pu chho sela, Duhi'n in ta tur hi khai haw bawk sela," tiin artui chu mau hmanga siam basket-ah min dah sak a, min pe hnem ngang mai.

Kan haw lam chu kan kal chak meuh lo, artui kan khai ve ve a, tihkeh palh ka hlauh vangin kei phei chu ka kal muang khawp a, ka hmaa kal chuan min nghak deuh reng. Grape hmun kan thlen hma deuh chuan, "Short cut-ah kal daih ang," tiin min pen pui a, kan kalna kawng lah chu kawng a chho reuh khawp a, short cut kawng nuam lo tak a ni.

"Min bo pui a nge aw?" ka ti khar khar a, "Ka hre bel lutuk, ka mit pawh del se ka bo lo ang," a ti vei nghat a. Mahse, kawng peng a awm lo chuan khawi zawk nge zawh tur a ngaihtuah leh phawt ṭhin a, a inthup ve viau nain a hre bel lo tih chu hai theih a ni lo.

"Khuai bu a awm a ni ngei ngei ang," tia ka hawi kual vut vut lai chuan, "Kan thleng ṭep, khuai khawina lamah kan kal alawm," a lo ti sam et a, "An rau ange aw, ka haw teh ania," ka tih pawh chuan, "Bawm an nei alawm, an hlauhawm loh," ti maiin min chhang a, chho kal a thei si a, a pen hlawk bawk si, ka hah lutuk chu ka thlan bawrh bawrh tawh.

"Chawl lawk ang,"

"Zawlah kan chawl dawn nia," 

"Tunah chawl ila, zawlah kan chawl dawn lo nia"

"Lo kal mai mai rawh, exer anih kha," hnung lam aṭang chuan ka han melh rum ngawt a, khuai thlawk ka hmuh vangin ka um leh rang viau thung.

Ka phun leh hman ṭep tihah zawl kan thleng a, ani lah pui chuan, "Khuai bawm a van tlem ta ve, a hmaa kan kalna kha a ni miah lo," a la ti chhek chhek mai a, "Kawng i bo em ni?" ka tih lah chuan, "Hei, kawngte chu a awm reng hi," a ti a, a nui mai mai. A thil put lai dahin khuai bawm a va en a, chutih laichuan ka lo ṭhu der der a, a thawm ka hriat ruala ka va hawi chuan a kut a lo tuai vut vut.

"A zûk che elo?"

"Khawipui an nih hi," tih leh min hnungchhawn a rual a, ka ngaihsak peih lem lo.

"Pangpar hi khuai chaw atan em ni?" ring leng lawnga ka tih chuan, "Aniang, khuai an khawina hmunah chuan pangpar an ching ṭeuh zel," a ti a, a kut chu a na bawk aniang a la kalsawn thei lo. An huan dang a fai em em laiin an khuai khawina hmun chu a hnim khawp mai, tawtawrawt par leh hnah zam chi a tam khawp a, an sam peih tawh loh vanga an kalsan daih te pawh a ang.

"Ti nge maw an sam ve loh le, an hluihlawn deuh nge mawni," tih paha a rawn phei chu a meng nur nang mai. "A dangah a la awm em ni?" ka tih chuan, "A la tam mai, balhla huan thlangah pawh bawm an dah ṭeuh a, he lai ami hi a hlat deuh vangin an hluihlawn aniang," a ti nuah nuah a, a percel ban tur chu a kut a lo sen ṭul a, a vung ngei ngei ang le.

"Chawl ve phawt rawh," ka tih chuan min hnial loin ka chhakah a han ṭhu a, "Hmana khuaiin min zuk ṭum chuan pu Muana'n hnim hnah a hrual a, min bel sak a, a zia huai huai a, kha kha eng hnim nge mawni," tih pahin a sir vela hnim chu a thliak ngheuh ngheuh a, a kutin a hrual tui a, a han bel ve tak naa a na a zia phah vak lo aniang a dang dang a zawng kual a, a hmuh loh lamah ka lo nuih tet tet.

Ka basket-a artui chu a lian ber ka teh kual a, a rawng lah chu a han inang lo hlawm khawp a, a hring leh sen lek lek te a awm laiin a var lian pui pui a awm bawk a, bazarah zuar sela aizawl nu hoin an inchuh zo rang ngawtin ka ring a ni. Chutia ka inteh buai em em laichuan, "A va kha ve," tih pahin ka chhaka ṭhu chuan chil a lo chhak pharh pharh a, mi te a rawn chhak perin ka hria.

"I ṭawp lutuk.." ka tih veleh a tho nulh a, "Haw vat ang, ka kut a vun hmain," tih leh a percel put a rual a, a kal chak khawp mai.

Theihai kung leh khanghu hmun zau deuh awmna kan pelh hnuah kawng chho tlem kan kal leh a, khuai bawm awmnaah bawk kan lut leh a, a fai viau tawh thung. Ka hmaa kal chu a kal muang telh telh a, a rum deuh titihin ka hria. "Lawmsang, a na viau elo?" ka tih chuan min chhang lo. Ngawirengin a kal miah miah a, balhla huan awmna kawngchho kan thleng chu a ding ta tlat.

"Kal ta che," ka tih pawh chuan a kal mai lo, a percel chu a la thla a, leiah dahin a bih dûk dûk a, a awmdan chu ka hrethiam lo khawp mai. Ka va en hnaih chuan a hmui chu a lo duk deuh ruih a, hnim tûr nei eng emaw a ei fuh a ni ngei ang, a va zia lo mai mai.

"Kal thuai rawh, damdawi i ei vat a ngai dawn," tih leh pawh thawh ka rual a, a han ding te chu a hawi â deuh ruai tawh. 

"Awi a...i hlauhawm em mai!" Râng fahran hian min melh a, a kaw chhungah ramhuai a lut emaw tih mai tur hmel pu a, ka ṭih deuh riau a ni.

"Kal rawh," ka ti vin ṭhak a, kal lo chuan ka lamah a rawn pen thla chhut a, ka tawlh let rang hle. Mahse, a ding leh rih a, a kut na chu a tuai rauh rauh hnuah a inher vut a, a kal nal nal mai a, a percel pawh a ngaihsak tawh lo.

"Lawmsangpui...." a rawn lehhawi eih lo, "I va han khaw lo tak e aw, hnimhnah te ei reng reng, mawl chhechhuuu lutuk," ti hluk hluk chungin a percel chu ka khai a, a rit bawk si a, chhoa kalpui chu har ve tak a ni.

Thei leh thei loin kawng chho ka chhuahpui thei hram a, phul hmunah chuan ṭhuin thawk ka la vang vang a, chutih laichuan hnung lamah thawm ka hre thut. Ka va lehhawi nak chuan tho leh rang tak ka ni, Lawmsangpui chu kawngthlang lam aṭangin a rawn lang hlawl a, ban a phar du du bawk a, phengphehlep eng thlawk chu man a tum nge mawni, a um kual nasa mai.

Chutah, ka lam a rawn hawi leh thut a, min hre miah lo te pawh a ang. A phengphehlep um lah chu ka lamah a rawn thlawk phei lehta nghal a, a rawn tlan phei rualin ka bula lungtum chu ka chuh rawk rawk. Lo vawm chawrh ka tum tawh laiin phengphehlep nen chuan min inhersan leh a, ka vawm ta em lo.

Ka thil khai chu ka la sawk sawk a, hmanhmawh thei ang berin ka kalsan nal nal. Putarate in lan phakna ka thlen chuan veranda-a mi awm chu ka va hmu pha a, "Hei, in artui hi khawiahnge ka dah dawn?" tih pah chuan ka pan phei a, lo ding chhuak chu headmaster fanu kha a ni.

"Hetah lo dah rawh," a tih ri chu ka hria. Hmeichhe dang pahnih nen min lo thlir ṭhap a, ka thlen ruala pek ka tum chu a ban duh eih lo. "In chhungah va dah rawh," nelawm loh fe hian a ti a, min melh túr viau bawk. "Ka hah tawh asin," tih pah chuan veranda-ah ka inkhai chho a, "Tunge i hming?" a lo ti leh chu lehhawi meuhin ka en a, ka va han chhang chak lo mai mai.

"Jenusi..hetah hian ka dah mai dawn," tih leh percel chu dah ka rual a, "In chhungah va dah rawh ka tih kha," a lo ti leh nghat a, a ngeiawm zék.

Chhang tawh lem lo chuan in chhungah ka luhpui a, in neitunu kha a lo awm a, "Aw haw, nangmahin i lo khai haw elo, a rit awm si, i hah em?" a lo ti thuai thuai a, "Hah ve tho," tih pahin hmai ka hru mawlh mawlh.

"Tui vawt i in duh em?" a tih leh naa Chhurbura kha ngaihven a ngaiin ka hria a, "Duh lo mai, ka han haw chho ange, hei hi ka pu khan min pe a, basket hi ka lo dah leh ang," ka tih chuan, "I hahchawl ve phawt lo a ni, i thlan nasa bawk si, zingkarah i pu chuan a lo chhawr hrep mai che a, a va zia lo ve maw le, " a ti leh bal bal a, "A ho lutuk, chaw ei tui u aw," tiin ka chhuahsan a.

Verandaa ka va chhuak chu min lo en leh ran tawh. Kal pelh mai ka tum laiin, "Hei.." a rawn ti bawl a, ka ding dat a, a lam ka va hawi chuan, "Lawma eng nge i nih, an chhung i ni tak tak lo tih ka hria ania," a lo ti khauh mai a, engtin nge a lo hriat reuh chu ni?

"Ka ni alawm," nui chunga ka tih laiin, "I va lem tak, min bum lo ang," a ti leh nghat a, a hnunga hmeichhe pahnih te chu an lo nui tet tet a, he nu hi inhuattir chi a ni lo tih ka hria, ka tana mi ṭangkai lutuk tur a ni, ka inneltir ngei a ngai.

"Ka ni tak tak alawm, ka pa Taia lama an chhung ka nia," 

"Daw suh, ka thin i tih rim hmain kal vat la a ni mai," 

"Anih...u..." tih leh kal ka rual a, "A va zahtheih loh hmel tak," an tih ri chu ka hre pha, hawi let tawh loin in lam ka pan a, Lawma nu a lo awm a, "Nu ven, serthlum awmna zawlah khan Lawmsanga a awm, hnim tur nei a ei palh a, a â vek ania," ring leng lawnga ka tih chuan, "Eng hnim maw?" a lo ti let hu a.

"Ka hre bik lo, mi â ang deuhin a awm a, ka rawn kalsan tawp," 

"A va mak awm ve," tih leh chhuah a rual a, ka umzui uk a; mahse, a kal chak em avang leh kawt lama nulain a lo biak avangin ka ding leh rih a, kan Ṭhamawli chuan a zui bawk a; ka zui duh ta lem lo. 

Ka thak sep sep bawk nen inbual turin ka lut zui a, an lo haw thawmte pawh chu ka hre pha reng a, ka hmanhmawh phah lem lo. Ka inbual zo ka va chhuah chuan Lawmsanga chu kut vung burin a lo ṭhu a, a pangngai hmel viau tawh. Ṭhamawli chuan a kut chu a lo chhemsak heuh heuh a,  Lawmsanga lah chuan mi a han melh rum khawp a, vuivaina a ngah hmel khawp mai.

"Engati nge khatia i awm a?" ka tih chuan, "Tawtawrawt par a lo ei alawm maw le," a nuin a lo ti zauh a, "Tinge i kalsan ringawt a?" Ṭhamawli'n a lo ti ve hlar bawk a, insawifiahna tur ka nei lo, "A hlauhawm em alawm," ti maiin ka chhang a.

Pindanah ka va lut zuai a, ka chhuah leh chuan hmeichhe pakhat hi a lo lut ve chiah a, Ṭhamawli chu han titi pui ka duh tehlul nen, "I nuin a zawng che, khuaah kal a tum a?" tiin a rawn ko a, ani lah chu a han tho rang khawp a, "Lo leng leh rawh aw," ka ti chu min chhang loin a kal nal nal mai.

Lawmsangpuia chuan nilengin min be ṭha duh lo, chawhnu lamah a pa nen vawk chaw kan chhum dun a, kan haw dawnah a lo chhuk ve a, "Ka ring tawh lo ang che," min tih khum nghat a.

"Min lo ring ṭhin elo?" ka ti chu min melh tur viau a ni.

End of chapter - 9