DID YOU GO? (CH - 14) by Ahmangaihi violette khiangteWHY

DID YOU GO?

by Ahmangaihi violette khiangteWHY 

Chapter - 14

Zirtawpniah dawra ka awm laiin pi Lalpuii leh Jenusi an rawn lang hlawl a, bazar pahin nu Mangaihi dawrah thil an rawn dah anih hmel. "Duh leh hetah hian min lo nghak la, pangpar chi ka va lei lawk ange," pi Lalpuii'n a tih chuan Jenusi chu ka bulah a rawn ṭhu ve nghal a, pi Lalpuii chhuah rualin a rawn tawlh hnai sawt sawt.

"I pi hian a duat che em?" a tih chuan, "Eng atan nge i tih?" amah pawh em lem lo chuan ka ti a. "An chhungkaw pawisa hi a kawl vek ṭhin em ni?" ka zawhna chhang loin a ti leh daih a, "Ruksak i lo tum leh em ni a?" tiin ka zawt ve leh ngat.

"Teuh nang, pawisa a ngah hmel em a, i pu a dil bawk si lo a,"

"Chhungkaw nu ber a nia, a kawl ve bawk ang chu,"

"Pawisa tlemte chungchang ka sawi hleinem, khuaah hian in hmun lei tur a zawng alawm, i pa Tluanga te tan a tiin ka hria, nichin khan mi pakhat a zawt a," a tih chuan ka hrethiam zan lo.

"Pa Tluanga a in dang dawn a maw?" ka ti let hu a, "Ka hre bik lo, i pu Muana bula sawi lo turin min tia," a ti leh zat a, a ngaihna ka hre lo telh telh mai.

"Engmah ka hriatpui ve lo," 

"Naktukah i rawn haw hman tawh angem?" Ka va melh râwm a, "Ka buai em hi mawle," ka ti let hlak a, stock room aṭanga Muantei lo chhuk chu biaksan zui a, dawr piahah coffee ka va lamtir bawk.

"Naktukah chuan in rawn inkhawm dawn lo em ni?"

"Helamah kan inkhawm tawh alawm,"

"Anih engtikah nge i lo haw theih ang?"

"Ka hre bik lo, thil min lo hriatsak thei angem?" tiin ka zawt let a, "Eng thil nge?" a tih chuan, "Ka nu Nguri'n ka pa pawisa zawng zawng a kawl a, engzat nge anih ka hriatpui lo a," ka ti a, "Ka ṭhianpa khan hriat theih dan chu a hria ang, ka lo ngaihven tir dawn nia, i pa chuan i hmingin a dah lo em ni?" a ti zung zung a.

"Dah lo, 'Kan insem dawn nia' a tia, ka duham vang ni loin a zat hriat ve hrim hrim ka duh," min lo melh ran ran a, "I ṭhianpa chuan engtin nge a hriat theih anga?" ka ti zui leh a.

"I nu nen an inhre ṭha a," a tih chuan mak ka ti angreng, chutiang inhrilh duh tur khawp chuan an lo inpawh em mawni?

"I pi pawisa neih zat hriat lo tum la, i nu pawisa neih zat hriat kan lo tum ve ang?" inrintawk hmel fea a tih chuan nuih a za deuh, he nu hi a inti fing mah mah deuh a ni, hnathawk satliah ve mai a ni a, engkim hriat a tum bawk si a, a kawlhrawng hlein ka hre mai.

"Ka lo tum dawn nia," tiin ka chhang ta tho a. "I nu ṭhiante hriat ka duh bawk a, farm-a lo kal ṭhin hmeichhe pahnih leh mipa pahnih, nula naupangte pakhat an awm a, i hmu tawh ngai em?" a tih chhuan ka ngaihtuah let rauh rauh a, ka hmu tawh chuan ka hria, ka nu ṭhiante an ni em tih erawh ka chiang lo. Mahse, chutiang mi chu farm-a lo kal ṭhin chu an awm ngei mai a, pu Muana ṭhiante an ni turah ka lo ngai zawk kha ania.

"Ka hmu tawh maithei, an hmel chu ka la hria ang," ka tih chuan, "A ṭhat hlauh chu, Jda nen lo ngaihven ru aw, hotel leh a chhehvel aṭangin a hriat theih ka ring a, i lo khawhhmuh theih chuan a tihzia viau ang," a ti leh zung zung a.

"A mak thawt thawt, mi ina awm ka nih hi, zan dar 9 thlengin dawr kan hawng a, zan anih loh chuan chhuahna hun pawh ka nei hleinem," ka lo ti let hlak a.

"I hman hun angah a ni mai, ka ṭhianpa chu ka lo hrilh anga, nang pawh i chhuak ru thei tho ang chu," a ti leh zel a, "I ṭhianpa kha a rintlak ang maw?" ka tih chuan a nui var var.

"Ani aia rin ka nei lo," a ti vei nghat a, ka chhang tawh lem lo. Muantei lo let chuan coffee bakah balhla cake a rawn lei a, ka ngainat zawng anih loh vangin Jenusi chu pahnih ka pe a, ei mawlh mawlh pah chuan, "I nu hian nat rukna emaw, allergy emaw te a nei mial em?" a ti leh a, ka hre lo nasa mai.

Min zawh chhan ka zawh chuan, "Ka hrechiang duh deuh a, tunlai chu i pu nen pawh hian an inmil vak loin ka hria, i nu pawhin in lam nuam a ti vak lo aniang a chhuak zing," a ti leh luam a. "Damdawi a tia, pu Muana'n a hau ṭhinin ka hria, a ṭhiante kawm pawh a phal vak lo," ka ti ve mai a. "I nu hi a ngaihsak bikin i hre ve ṭhin em?" a tih leh chuan ka bu ve mai a, midang aichuan a hau zing a, a ngaihsak a, a duat bikna a tilang ṭhin bawk a, a unaute hi chuan an an thik lem pawhin ka hre lo, nu Nguri chu an duat em em vek maiin ka hria a, pa Tluanga leh pa Dinpuia phei chuan an hlau deuh emaw tih tur a ni ṭhin.

"Ka nu chu a chhuak zing viau em ni a?" 

"Nizanah pawh a chhuak ru, gate lama scooty a nawr chho lai ka hmu a, a lo haw chuan dar 2 a pel tawh," zangkhai deuh hian a ti a, "I va en thla nasa awm em em ve, i vil chawt reng hlawm em ni?" ka tih chuan a nui ringawt. 

"Hotel-ah em ni a kal leh a?" 

"Ni e, hmun dangah pawh a kal a, a kalna erawh ka hre bik lo," 

"I ṭhianpa khan a lo hrilh che em ni?" a bu nghat a, chu pa chu, 'Ka lo enthlaksak ang che' kha a ti ve a, ka bulah ni loin Jenusi bulah hlir a sawi leh si a, hetiang chuan a hre tlem ber ka ni leh pek dawn anih hi.

"A ṭhian dangte a hmu anih ka ring a, i pu phal loh thil eng emaw an tih ka ring bawk, an inkar tih chhiat kan duh chuan i nu thil tihsual kan hriat a pawimawh viau ang," a ti melh melh a, "Zawn vak a ngai tawh hleinem, damdawi a ti ru a, ngaihzawng dukdak lo deuh a nei bawk alawm," ti maiin ka lo chhang thung.

"A damdawi tih kha chu a ruk a ti a ni hleinem, i pu pawn a hre ve reng alawm, tun hma phei chuan a ngaihtuahsak zawk ṭhin, a ngaihzawng neih leh a awm khaw lo pawh hi an inkar tih chhiat nan chuan a tawk lo ang, a mimal sualna hi chu hauh leh zilhah an tlak mai dawn a, chu aia pawi thui deuh chu a tih ka beisei a, keimahni zawkin kan tih tir chawp mai a ngai dawn anih hi," a ti leh vang vang a, a ṭawng ring lo nain a thil sawi dan chuan minti ṭim ru er er.

"Wine ruk a, ka nu ruk anga lantir i tum a ni lawm ni?" ka tih chuan, "Ni e, i sawi dan aia ṭha lo deuh zawka tih a ngai dawn," a ti leh nghat a, chutiang thil liantham nisi awlsam tak anga a sawi mai ṭhin chu ka ngaihdan a ni vak lo, thil awl ai a ni dawn lo tih te chu hre ve tak ang maw?

Pi Lalpuii lo let leh chuan pangpar pot a rawn khai haw ṭeuh a, rei pawh ṭhu tawh loin bungbawr zet chuan an inzui chhuak a, an kal liam hnu chuan ka inngaihtuah buai nasa khawp mai. Ka pui duh dawn em tiin ka rilru a han buai deuh ṭhin naa ka tih makmawh niin ka hre ve tlat lawi a; mahse, puitu chauh emaw hman ṭangkai nih chu ka duh lo viau thung.

Lawma leh kha a ṭhianpate nen khan ṭangho chu kan ni mai dawn a, Jenusi a thu ber tih chu hriat sa a ni, midang zawng chu a duh duhin min tir kual a ni ber a, mipate pahnih lah hian an thu an awih duam duam maiin ka hria, anni anga awm ve chu ka duh hauh lo. Ka pui anga; mahse, ka puihna min dil vang ni loin hriat duh ka neih vang chauhin ka pui ang; mahse, ka duh dan chin bak chuan tha ka thawh dawn lo, min tlanchhiatsan lo ang tih ka hre tlat lo a, inthiarfihlim tur pawha kawng ka inzawn thiam ve a ngai dawn a ni.

Tlai thim dawnah nu Ṭhatei a lo chhuk a, apple pum hnih hi Muantei nena kan eiturin min rawn pe a, phone ena ka lo inngaihtuah mûk deuh avangin kan inbe meuh lo. Muantei chu a be bawrh bawrh a, min rawn biak ve chuan ka lo hawi â deuh hu ṭhin. "Customer awm laiin phone i lo khawihsan reng ang e," nui chunga a tih chuan ka dah ve mai a, a chhuah hnuah phone chu ka ban leh zat a, message chu ka han type ṭhin a, ka type ṭha zing viau tawh.

Mawihnai taka va biak hran a ngai lo, Jenusi tirhkah mai mai alawm a nih tiin, "Zanah i hman dawn em, saw tah khan min va hruai rawh," tih chu ka va thawn rawk a, a en mai loh vang chuan, "Kan inkhar hma dawn a, chanchin rawn sawi vat ang che," ka ti leh a,  Muantei chu field-a kalpui turin ka sawm zui bawk.

Darkar chanve hnu velah message chu a lo chhang a, "Dar engzatah?" tih tlawng a ni.

"Dar 8 ah," ka tih chuan, "Ok," tih hi a rawn thawn ve nghal a, ka chhang let tawh lo. Nu Ṭhatei ka han call a, "Muantei nen field-ah kan kal ve dawn a, dar 8 velah kan inkhar dawn ania, street food-in kan inhnawh puar mai ang," ka tih chuan, "Lo haw har suh u, Muantei pawn a chhungte hrilh rawh se, a pa a rawn phun leh palh ang, inhralhna pawisa ami 500 kha in pai dawn nia," a rawn ti a. Muantei pawn a chhungte a hrilh ve nghal a; mahse, a pa'n a lo phal lo nasa mai, "I nu a damsam lo a, i naute i awmpui a ngai, rawn haw tlang rawh," a rawn ti hmiah mai a, a han phur ve tawh tehlul nen, ka khawngaih reuh khawp mai.

Ka insiam a, ka hmai pawh ka chei ve luam a, thawmhnaw erawh ka han thlak peih tawh lem lo. Dar 8 rik hma hretin kan inkhar fel a, "Thil i ei tal dawn nia, nu Ṭhatei'n thil eina tur 500 min pe alawm," tiin ka chhuahpui a, ke a kan kal mai a vangin kan va thlen chuan dar 8 a pel tawh. Ar bawp pali, a naute nena an inkimin ka fun haw tir a, "Nangmaha kal chu nuam i ti awm lo mange," a tih chuan nghah ka neih thu ka hrilh duh lem lo. "Ka awm rei peih lo ang," ti maiin ka chhang a, kan inmangṭha zui bawk.

Ka phone ka en chuan missed call a lo awm vang a, message pakhat nen. "I hman tawh em?" tih a rawn thawn chu chhang loin ka call let a, a rawn chhang rang khawp mai.

"Khawiah nge i awm?" rang leh bul fahran hian a rawn ti a, "Street food zawrhnaah ka nghak mek che," ka tih zawh rualin a dah hmak.

Hetiang mize ngeng leh thinchhiat hmel deuh hi engtin nge Jenusi tirhkual tura a awm theih le? Inṭhian satliah an nih ka ring miah lo, he pa hi tu emaw tak chu a nih ka ring, a ngaihzawng em ni ang aw? Mahse, Lawma chungchang pawh a hre ve tho si a, a ngaihzawng chu nise hetianga a bialnu a awm hi a duh dawn em mawni?

Nge ni a, he hmeichhe fing phakar deuh hian engthil emaw hmangin a kar zawk ni ang aw? Pakhat lah hi undercover spy ang maiin hotel-ah te a awm a, report a pe thlap thlap bawk a, zanina ka ko chhuak pawh hi a pi khan a lo hre leh vek tawhin ka ring. 

"Hmarcha i duh belh em?" ka thil leina nuin a rawn tih chuan, "Sauce zawk kha min lo pekbelh," tih pahin ka paper plate chu ka va dawh a, tam tham deuh hi min lo pe a, "Hetah hian rawn ei la," tiin a bula ṭhutna chu min kawhmuh zui a, ril a ṭam ta deuh bawk nen momo te ka tihlum tir leh a, soup sa ver vawr nen pual el euhin ka ei a, thingpui in leh ka lo tum laitakin ka mi nghah chu a rawn lang hlawl.

Leather jaket dum a ha a, kekawr dum leh kutkawr dum nen, a dum thla zun mai. Ei tur ka ei zawhsan vek emaw ti hmel hi a pu a, "I ei ve phawt duh em?" ka tih lah chuan mi chhan pawh a tum lo, sir lam a pan a, ka awmna piah deuhah chuan a va ding a, a phone a phawrh zui mai danah report a pe dawn anih ka ring.

Kutte ka sil leh te te hnuah ka va pan phei a, a bul ka thlen rual chuan, "Kal nghal mai ang," a lo ti a, ka hnial lem lo. Mahse, kan han kal tur chu kan pan lam a inang lo ve ve. Ka lehhawi vut a, ani pawh a rawn inher ve nghal a, "Khawiah nge i kal dawn?" kan ti rual zawt a, phawk fein kan inen bawk.

"Mi hmuh tum kan nei a ni lawmni, Jenusi khan.."

"Awi a, chutiang ti turin ka rawn kal reng reng lo, field-ah ka kal dawn," ka ti chu nur fein min melh.

"I rawn kal ve dawn em?"

"Eng nge i tih dawn?"

"Mi intihlim ka en dawn," a ho a'n tih hmel khawp a, "I lo kal peih loh chuan let leh mahla a pawi lo," ka ti hmak a, a lawm loh hmel viau nain a phun zui bik lo a, ka kal chu min rawn zui ve mai bawk.

Ka hnungah muangchangin a rawn kal a,  ka sira mipa leh hmeichhe ṭhenkhat lo kalte chuan mi an rawn melh leh zauh ṭhin. Keimah chauha kal anga lan chu a nuam lo deuh a, hnunglam hawiin "Lo kal chak rawh," ka va ti thawr a, ṭha deuh chuan a rawn kal chak ve mai a, kan kal dun erawh kan ngawi dun chawrh chawrh. Kan la innel loh vang nge mawni a ṭawngmawh khawp mai, Jenusi bulah kha chuan a ṭawngmawh pawhin ka hre si lo a, keipawh mi a chhang ve luam zel kha ania, Jenusi a awm loh takah chuan a zia a dang hlein ka hria.

"Heih.." min rawn melh vat a, ka lo en ran a, ka ṭawng zui lem lo. Field sir kan zuk thlen chuan music an play dup dup a, a êng china kan din tawh vangin ka kalpuipa chu ka han thlek leh rih a, a landan chu ka mil zawng a ni lo, hmelhriatte ka hmu palh anga, tlangval dukdak lo deuh nena inzuiah min ngai ang tih te pawh a hlauhawm.

"I piercing kha dah bo teh," ka ti leh thawr. A mitko ami chu a han khawih zauh a, a samin a'n hliah ringawt pek a, "Khawi, ka lo ti ang," tih leh han ban ka rual a, "A ngai lo," tih pahin a inher nghat a, amahin a phelh dawn nge mawni?

A rawn inher leh chuan a lo la thla fel diam tawh, "Ti khan tizel tawh rawh," tiin ka lo nuih seih a, min chhan ngai a ti lo anih hmel, khik pawh a khi eih lo.

"Ka rawn koh chhan che chu titi dun phawt a ṭha ka tih vang ania, kan thil tih dan tur te, in lo ruahman dante pawh sawi hmasa ila ti raw?" ka han ti luam naa mi a en ngur ringawt. 

"Dawt inhrilh ka duh miah lo a, Jenusi pawhin a sawi chian tawh kha, ka duh duhin ka tir thei che a ti bawk, nang aia ka hriat tam zawk avangin ania ka puih dawn che, anni chuan farm lamah thil an thlitlai mek a, helamah an hriat duhte kan lo zawn khawm sak ve dawn tihna anih chu, tunah chuan ka nu Nguri awmdan hi kan enthla hmasa ber ang.." ka ti leh dap dap a, ka awki chu a thupe aw ve viau maithei, thuneitu zawk ka ni tih hriattir ka tum miau a ni.

"Tun aṭang chuan ka nu chungchang tawh phawt chu ka hnenah report ve zel tawh ang che, anih loha Jenusi chauh i hrilh a, kei min hrilh ve lo anih chuan ka pui lo ang che u," ka ti fiah leh fak a, a la ngawi reng chu ka lawm ta lo tawp mai.

"Engati nge min chhan loh a, i lei i lem em ni?" ka ti vin hlar a, thawk hluai pahin sir lam a melh a, ka lam a rawn hawi leh chuan  min ning hmel a puin ka hria.

"I duh nge duh lo, aw leh aihin min chhang mai rawh?" ka ti leh nghal zat.

"Duh e," a tih riah chuan phurna engmah a awm lo, a duh satliah a ang, thupek a nih vanga zawm tum ve mai chauh a nih hmel.

"A ṭhat chu, ka thil zawh che pawh dawt tel loin min chhang zel ang che, chuan...ka biak che a min chhan duh loh ang kha nei tawh miah suh, ṭha deuha ka puih che i duh chuan nangpawh puih nuam deuhin awm rawh.." ka ti leh nghat a, kal rawt mai ka tum tawh laiin, "Min puih ka ngai lo, Jenusi pui la a ni mai," a lo ti zauh pek a, ka pen uk tawh chu ka ding leh rang khawp mai.

"Eng nge i sawi awmzia?" ka ti let hû a.

"Jenusi'n i puihna a mamawh a, keipawh hi Jenusi puitu tho ka ni, Jenusi'n puih che a duh bawk.." a ti thum dut a, a rinawm hmel hrep mai ka ti...!

"Hey, in inngaizawng em ni a?"

"I ring em?"

"Ring deuh e, in awmdan hi a mak!"

"I ring dik lo anih chu," chik fein a mitah ka en a, an inngaizawng nge unau an ni zawk le, an ṭawngkamte lah hi a inang viau mai bawk si, an mizia hmek hmuk lah hi, a changin an nelawm der thiam leh em em a....hriatthiam an har ka ti!?

"Anih, eng nge in nih a?"

"Inngaizawng aia thuk zawk," a tih chuan ka nui ṭep. "In inhmangaih maw?" ka ti hluai chu min lo khap vut a, kan bul hnaia dingten min lo thlek nghal huang a, keipawh chu ka insum leh rang teh e.

"A ni em?" kal hnaih hrat paha ka tih chuan, "Aih," bung fe hian a ti a, ka lo nui chu min dawhthei vak tawh lo, "Kan kal dawn nge kan la titi dawn?" a ti zui a, "Kal pahin kan titi dawn nia," tiin ka la nuih var var.

Field chhunglam kan pan a, YMA hoin an jubilee lawmna tur tuak nana an buatsaih anih vangin mi an tam ve khawp a, nula tlangval leh naupang thlengin an awm a, kan piah hla deuh hlekah chuan concert an lo nei mek bawk. Dawr a awm thlih thluah a, mi thlai thar leh eitur chi hrang hrang YMa hminga an kharchhawn te an zuar a, pu Muana thei tui um leh thei rep te, a damdawi siamte pawh ka hmu nual a, a ruih theih chi chu an zuar lo anih hmel.

Ka bula kal chu ka thlek leh ṭhin a, nuam a tih loh hmel ber bur hle. Bracelet ka en pui lai pawh chuan a lo ding tum bur a, "Min lei la," tiin ka va fiam zauh. A dang ka en leh nghal mai a, pathum lai ka thlang a, a man pek ka han tum chu, "Engzat man nge?" a lo ti thum dut a, dawr nghaktuin a man a sawilai chuan ka lo en phawk khawp mai. Chutah, a wallet a phawrh a, pek a tum ta mai a, "Ka ti mai mai anih kha, a ngai tak tak lo," ka ti sawk sawk a; mahse, lawm loh hmel deuh chungin a pe lui thung.

"Awi, ka va inthlahrung leh si e," kan kalsawn hnua ka tih chuan hmui a petsawi duh lek. Ka va nek salh a, "Ka lawm e aw, pakhat hi i duh ve em, i duh thlang la," tih pahin ka barcelet lei pathum chu ka han khai kang a, "Duh lo," a ti a, a tawk leh der mai.

"I va han inhmuam ûp peih tak, nelawm deuh ten awm ve rawh, Jenusi aiin ka fel daih zawk ania," ka tih chuan a kiai ve suk a, chhaih chu a hrethiam ve tho anih hmel e, anih chuan..ka chhaih nek anga a ni mai alawm.

"Eng nge kan tih leh ang JD?"

"Mi intihlim i en dawn a ni lawm ni," 

"Mi intihlim en ringawt te chu, keini pawh intihlim ve ila.."

"Ka peih lo,"

"Hlim i peih lo amaw, awm ang lo em mai a, a thatchhiat thlak lutuk..." ka melh rum khâ khâ a, ka lam a rawn hawi chuan a mood a dik ve deuh tawhin ka hria, nuih insum hmel a pu tawh. 

"Anih chuan hawh..tei kual vel mai mai ang, thil zawh duh che ka ngah alawm," tiin ka hui sawk sawk a, puak zo kan ka va lei leh te te hnuah field sir lam ka panpui a, ka thil ei chu eitir ve ka han tum a, a lo duh leh pek lo. 

"Anih maw JD..." min rawn melh vat a, "JD tih hi eng tihna nge ni a?" ka tih chuan, "Jude," tiin min chhang a, "Ava mawi reuh ve, Jude tiin ka ko tawh ang che, ka celebrity crush pawh Jude law ania," ka lo ti duah a, chutih laia min melh dan chu â mintih hmel khawp mai; mahse, a indaidanna bang hi ka ṭhiat dawn khawp mai tiin ka inhrilh ru sauh sauh a, hepa hian ka puih mamawh inti lo mahse, kei chu min pui khawp ang.

"Ka hman rei lo ania," a tih pawh chuan, "A la hma hi," tih pahin ka kal lui zel a, ka bul a rawn thlen leh rual chuan, "Enteh.." ka lo ti thuai a, min en rang ve khawp mai.

"Jenusi hi eng ang mi nge a nih kha, ka hmuhdan chuan a inla boss reuh a, a nelawm nge nelawm loh pawh ka hrethiam lo, han rin burte hi a har ka ti.." ka ti tlang rawt a, ka hmuh dan a ni miau a, haw mahse pawi pawh ka ti lem lo.

A sawifiah ve ka rin laiin, "I hre dik anih chu," a ti sam mai a, ka duh khawp lo ngang mai.

"Aw.....kei aite chuan i hrechiang zawk fe ang chu, rin theih tur chi a ni em tihte min hrilh ve la, amah puiin thil hlauhawm deuh ka tih a ngai dawn asin," ka tih leh takah chuan a ding zui a, lei lam bihin a han ngawi deuh ren rawn a, a lo hawi chhuak leh pawh chu ka lo en ran a.

"I ngaih anga sual leh phakar chu a ni lo, a ep zawngin awm lo la a ṭha a ni mai," tiin min chhang a, "A mizia alawm ka zawh che, a ep zawng awm a ṭhat loh dan te pawh ka hre thei dawn alawm," ka ti leh hram a.

"Jenusi chuan mi dik leh dik lo a thliar ve vak lo, a mi ngaihhlutte tan chuan engpawh tih a huam a, a mi ngaihhlut lohte lakah pawh chutiang tho chu. Amah a indah pawimawh ngai lo, a chhiatpui rak tur thil pawh nise a mi ngaihhlut tan chuan tih hreh a nei lo ang," a ti nghet charh a, dawt a sawi hmel loh a, a ringtawk hle tih a hriat theih bawk.

"Anih ka ring, tualthah pawh a hreh ka ring lo," ka ner zui sak a, "Hreh lo ang," a lo ti ve zat a, "Mi bum pawh.." ka tih chuan a bu leh nghat.

"A ṭhianṭha leh amah puitute pawh a bum fo ang a..?" ka tih leh chuan, "Maithei, a ṭul phawt chuan a ti mai ang, a thil tum tawh chu tuman kan dang thei ngai lo anih hi," a ti ve leh a. "Nang pawh a bum mai duh lo ang che maw, nang lah hian i ring bur anih hmel a, a hmang ṭangkai ringawt che a ni thei asin.." ka ti leh chu min melh rum ul mai.

"Thil ni thei ania, ka sawi ve mai mai anih kha.." nui chunga ka tih chuan a lawm loh zawng ka sawi aniang a nui eih lo. Ka mitah chiang fahran hian min en a, "Eng dawt pawh min hrilh mahsela ka tan pawina a nei lo.." a ti hmak mai a, a ring vak bik lo nge mawni le?

"Pawi i ti lo tak tak a maw..."

"Ti lo, ka tan engmah a ni lo.." a ngawi dat a, "Mahse, dawt chu min hrilh lo se ka duh," a ti leh lawi a, ka hrethiam map lo.

"Eng nge a awmzia ni ngai?'

"A thil sawi chuan ka tan pawimawhna a nei lo a, dawt min hrilh duhna rilru tur zawk chu ania ka duh loh," a tih chuan ka man thiam ta chiah.

"A bum che chuan i rilru a na viau dawn anih chu.." nui chung chuan meinei zetin ka melh a, ani erawh a la thutak run thung.

"Kei chu min bum lo ang," a ti leh khawl a.

"Engvangin maw, a ṭul a tih hunah chuan a bum em em ang che, tunah pawh hian hrilh ve duh loh che a ngah viau maithei asin.." a lo nui sak a, hrethiam lo fea ka en laichuan, "Min bum lo ang, kei chu a mi ngaihhlut ka nia," a ti vei nghat a, 'Nang chu i ni ve lo,' min ti hi a angin ka hria.

"I pawimawh viau a nih chuan a eng nge i nih a?"

"A ṭhian," ti maiin min chhang a, "I ngaizawng deuh tlatin ka hria," ka ti chu a duh lo khawp mai.

"Mipa leh hmeichhe inkarah hian inngaihzawnna chiah a awm ngai lo, Jenusi nen chuan chu aia inlaichinna nghet zawk kan nei.." a ti leh reuh a, immmm...a rilru lakpen a har hmel ka ti, engtin nge ka kawihhran theih ang aw... tihdan ṭha zawk ka ngaihtuah a ngai dawn anih hi.

"Nangmah ang ṭhian hi ka duh ve ngawt mai," ka ti zawi sep a, "Jenusi ang nih i chak zawkin ka hria," a lo ti pek a, ka huat tawk a tling ngang mai. "Eng nge a nih vak, a ṭhiante tirh kual bak a thiam em ni, i ngaih ang hian a ngai ve tak tak che pawhin ka ring lo, kei nen chuan kan danglam lutuk, keichuan ṭhinte ka ngaihlu, ṭhianṭha nei ila chuan..." min lo en run bawk nen ka sawi loh tur tur ka sawiin ka hria. "Min ngainep a ni maw, Jenusi ka tluk lohna a awm em ni, a hmelṭha vak pawh a ni lo a," tiin ka tum zui bar a, ka eitur ken lai chu pein ka kalsan zui bawk. 

Ka va hawi leh chuan a lo kal ve mek a, ka va nuih var var. "Thlahrang i hlau em?" ring leng lawnga ka va ti chu hriatthiam loh hmel fein min en a, "Lo kal rawh, haunted house-ah sawn va kal ve chhin ang," tiin ka hui sawk sawk a, a lo kal muan em avang chuan ka va let a, a va pawt nghal dawr dawr.

"Nangmahin kal rawh,"

"Aw..i lo kal ve ang chu....mahni te chuan ka hlau alawm,"

"Ka kal duh lo,"

"I hlau em ni?"

"Hlau lo,"

"I hlau chiang mai, i va pa lo tak.." ka nui hak hak a, ani erawh kan kalna tur lam hawiin a ner nang a, ka pawt lui zel thung.

Counter-ah ticket kan va lei a, kan kal dan tur leh a chhuahna lam te min lo hrilh a, "I bialpa chuan a hlau a ni maw?" hmeichhe pakhatin a lo ti zauh. Jd-a lah chu a lo ner nung a, "Hlau suh ka chhan ang che," tih pahin ka va nghawk salh a, pawisa ka pek fel hnu chuan ka kai lut dawr dawr. A ṭang deuh ṭung a, "Ka hnungah i lo kal dawn nia, ka kut hi thlah miah lo la," tih pahin a kut chu ka humsak a, nghet fein ka kai bawk.

"Min thlah teh," a ti chu ka ngaihsak duh lem lo, ka chelh nghet sauh sauh zawk a ni.

A chhung chu a lo thim deuh ruih a, kan hma lamah chuan dul deuhin a êng ve riai ruai a, eng eng emaw milem mak pui pui leh ruhro lem te, maimawm ril ang tak tak te a awm nuai a, music rapawm deuh an lo play bawk nen ka tirilah min ṭham a, ka ṭi nghal dui mai.

"Jude..."

"Jude...i hlau em?"

"Ka hrilh dawn lo che," a lo ti bul hmuk.

"Kei chu a râp," ka ti zo hman ṭawk ka sira milem emaw ka tih chu a rawn rak thut a, keipawh ka rak ve chiam. Mahse, mihring joker costume ha mai mai hi a lo ni a, min lo nuih vur vur mai.

Kan hmaah chuan kawng pahnih puanzar inzarna a lo awm a, khawi lamah nge kan kal dawn ka zawh chuan, "I duh duhnaah kal rawh," a ti mai a, puanzar sen lam ka pan zui a, a kut chu a rawn pawt deuh a, "Min thlah suh," tih pahin ka chelh nghet leh sauh a, a ti lui bik lo.

Puanzar chhung kan va lut chiah chu nui her her thawm hi kan hria a, a rim pawh a uih deuh hukin ka hria. Chutah, vei lam sir ka va melh chu hmai chuar sam var ka va hmu thut, "Wrong turn a nih saw.." tih leh tlan ka rual a, ka kalpuipa chu ka tlanpui dawr dawr. Kan va thlan pheinaah lah chuan Zombie hoin min lo ban suau suau a, ka rak phei tuar tuar reng. 

Puanzar pawl kan va thlen chuan kan ding a, thawk ka la hlawp hlawp a, ka thinphu chu rang zawih zawih tak a ni. Ani pawh chu a hah ve deuh aniang a khup dawmin a ner nang a, nuam ka ti tawh lo bawk a, "Chhuak ang," ka ti ta ngawt.

"Kha lamah khan chhuahna a awm," a tih chuan ka ding leh vat a, "Ka kut i hum thlan tawh ania," a rawn tih rualin ka thlah vat a, a kut lehlam ban ka rual bawk. "Hlau miah suh aw," tih pah chuan ka chelh nghet sauh sauh a, min chhan loh vangin ka kalpui zui a. Pen tam pawh kan pen hman lo, ka hmaah tak chuan lu bung a rawn tla tawp mai a, ka tlan leh rang khawp mai. Kawngkhar pakhat ka va hawn leh chuan chhuatah hian thlahrang pakhat a rawn vakphei zawt zawt a, ka hma lamah tlanna awm hek lo ka chiai der a, tlan let dawnin kan hnungah kawr var ha a lo ding run tawh. "Hei..." tih chiah ka sawi thei, ka mit sulh sulh a, ka tha a zawi vek...

"A va ho e aw.." a tih ri leh, "Kal sawn teh," tia tu emaw a hau ri chu ka hria, min pawm kang lawp a, chhuata lo vak phei ka hmuh pa kha kan kalpel a, "Engtin nge a awm a?" a rawn tih chuan ka harh deuh kawk. "Ka ṭha ania, khawi ka chhuk ang," ka ti nghal sawk sawk a, "Ka peih tawh lo," a lo ti pawr hlur a, min dahthla loin min kalpui hlawk hlawk thung.

Pawn kan va thlen chuan kan hma chiah a chhuak nula pakhat chu a lo ṭap hlawp hlawp a, duty ho chuan an lo nuih dar dar hlawm. "In hlau em?" tiin pakhat chuan min lo zawt a, "Hlau lutuk, ka thidang dawn alawm," ka tih laiin, "Aih," ka bula mi chuan a lo ti pek a, phawk fein ka han melh.

"Nia, i hlauh loh hmel bik," nula pakhatin a lo tih laichuan, "A lem hlawm em mai," a ti leh nghat a, a thlan pawh a tla ve eih lo, keichu ka mittui te a hnam pur ania.

"Engtin mah i awm ve nange?" phawk fea ka tih leh pawh chuan, "An costume a chhe em mai," a tia, hlau aichuan ning hmel a pu mah zawk.

"Naktuk zanah lo kal leh ru aw, kan thlahrang ho kha kan upgrade vek dawn ania, naktuk zanah chuan a den tawh viau ang," tlangval pakhatin a lo ti chu chhan pawh ka chhang peih lo, "Jude, kal ang" tih leh kal ka rual a, ka sil urh maiin ka hria, ka kal nawn leh tawh lo chiang khawp ang.

Field sir kan thlen chuan, "Ka haw a ngai tawh," hnung lam aṭangin a rawn ti a, "Kan haw dawn nia, min va thlah la.." ka inher rualin ka nui hak, a chhip samah chuan maimawm ril a lo kai nuan a, "Bawmtawt aṭanga pawh chhuah i va ang ve," tih pahin ka pan phei a, dingdihlip meuhin ka han thenfaisak a, a lo kun hniam nen chuan kan inmelh hnai viau mai. Hnai takah chuan a hmel chu a ṭha hliah hliah ti ila a dik ang, a hnar ngul a nalhin a mitmeng a thuk raih a, a hmui ro lek lek chu a lo liak hnawm zauh bawk nen keimah zawk chu a lai ru rauh rauh thei.

Inherin ka kalsan leh vat a, ka awmdan chu a lo hrethiam nge ni min rawn be lo reng reng. Kawngpui kan thlen thlengin kan inbe lo a, a bike dahna bul kan thlen pawh chuan ka ṭawng chhuak mai lo. Bike a tihnun hmain a phone a bih zauh a, chutah ka lam rawn hawiin, "Tunge, Liantluanga?" a rawn ti a, ka hamhaih angreng.

"Tinge a, pa Tluanga em ni?" ka tih chuan, "Jenusi a nia, 'Karlehah pu Liantluangate an  rawn haw dawn,' a tia, hmanhmawh turin min duh," a tih chuan ka rilru a buai nasa mai.

"An awm laichuan ka duh lo," a ti teh thlawt a, ngaihtuah zawng ringawt pawhin ka awm a tinuam lo.

"Engati nge..?" 

"Ka duh lo a ni tawp mai," thinrima sawi pawh ka nih loh laiin, "Tih i va har ve maw le, i puihna a dil chhan che hi a tan chauh a ni hleinem, i pa pawh a tel ve hi," a rawn ti vin hlur a, chutia min vin ringawt chu ka han hrethiam lo khawp a, ka hnuk a ulh nghal ṭun..

"Engmah i hre lo aw.." ka ti tham ṭuak a, a mittui a rawn hnam ṭiam ṭiam.

"Eng nge maw i hriat le?" tiin min la melh rum ul a, ka thin a tawt ut ut a, ṭah chiam mai ka duh.

"Ka pui dawn lo che u ka tih loh kha, min hrethiam ve ta che u.." ka inher vut a, hnung lam hawi chuan ka inhru mawlh mawlh a, a pen rawn pen hnai tih ka hria. Ka hnungah chuan ka ding a, ka inher leh rualin hnai zetah min rawn bih a, "Tu nge chu pa chu?" a ti zawi ruih a, zawhna ngah hmel fein min en bawk.

"Ka nu Nguri û a nia..min....pawngsual a tum a," ka ti chhuak halh a, ka aw chu a lawi rût mai.

A ding mar hluai a, eng emaw a sawi ve ka beisei tehlul nen, "Ka thlah ang che," tih zawng a sawi a, a bike-ah a lawn zui thuai bawk. Ka va kal hnai pawh chu min melh lem lo, tumah hian min hrethiam lo niin ka hria, ka dinhmunah an la ding ve ngai lo a, ka rilru tur hi an ngaihtuah thiam phak lo a ni. 

Bike-ah chuan ka ṭhu kai a, a tlan chhuah hmaa a dar ka va vuan chu min rawn thlek leh vat a, "Min hrethiam ru.." ka ti ta ngawt a, ani chu a ngawi deuh vang vang.

Ka kut ka laksawn hnu chuan, "Hrehawm ti suh, i lam ṭang kan nia lawm," a lo ti a, chhan dan ka thiam lo, a thusawi erawh chuan min hnem ve takzet, lamṭang chu tun dinhmuna ka mamawh ber a ni.

A tlan chhuah hnu chuan kan inbe leh ta lo a, kan dawr kawt kan thlen hnuah, "Jenusi chu ka lo hrilh ang, tihdan dang a awm ka ring," a ti leh a, min hrethiam ang taka ṭawngkam a nei chu ka lawm tawk viau a ni. Ka mangṭha hnuah ka kalsan a, in ka han luh chuan ka chenpuite chu an lo mu vek tawh. Kawngka ka kalh a, inbual loin ka va intifai thuak a, ka han mu te chu ngaihtuahna a buai map reng.

He pa Jude tih hmingpu leh Jenusi ṭhian ni bawk hi midang anga en ka duh lo, ka lama ṭang turin ka duh a ni. Amah chauh ni loin Jenusi hman ṭangkai leh a tih kual mai mai chauh ka nih lohnan an team-ah hian hlutna ka neih ve a ngai bawk. Jenusi tana hlu tur chuan a mi ngaihhlut tak hi inphennan ka mamawh tih pawh ka hai lo. Ka rilruah chuan ngaihtuahna ṭha lo pui pui a awm a, ka tana ṭha tura ka kawihher thiam erawh chuan ka dinhmun a ṭha sawt thung ang.

Ka phone chu ka ban a, "Muttui aw," tih hi ka va thawn a, engtin nge a lo ngaih ang tiin thin a phu dup dup. Minute 10 vel hnuah message chu a lo en a, min chhang let miah lo chuan rilru a tina ringawt lehnghal a, ka beisei sang deuh em mawni le?

Inrinni chu dawrah kan buai nileng a,  bungrua a lo thlen vangin nu Ṭhatei a rawn ṭhu a, Muantei nen stock room kan chingfel a, customer tam ni a ni bawk nen zan lamah pawh kan la inrem buai khawp mai. Dar 9 pelhah kan inkhar a, haw veleh inbualin ka mu nghal hmak a, Azoi message ka dawng tih loh chu message dang emaw, call engmah ka dawng lo. Chanchin hriat ka chak viau a, zawt hmasatu nih erawh ka hreh ve tumhrang a, ka ṭangkai lohzia ka hre thar a ni hawt mai.

Chawlhniah chuan pa Dinpuia te pafa an lo kal a, a fapa teberin ice cream ei a chak vangin dawr ka zuk hawn sak bawk. Pa Dinpuia chu nu Ṭhatei'n pa Tluanga chanchin a lo zawt a, "An lo haw dawn a; mahse, an nu khan indan a rawt niawm tak a ni, Atei leh Mangaihi an intithiam vak lo a, Atei chhungte lamin indang turin a lo fuihpawrh aniang," tiin a chhang a. "Tluanga'n a duh ve mai em ni a, ani te chu inpui chang tur ania sin," nu Ṭhatei'n a tih chuan, "Duh aniang chu," tih pahin pa Dinpuia chuan min rawn melh ralh a, keimah vang em mawni tiin ka ngaihtuah ve neuh neuh.

An haw tur kan thlah laia pa Dinpuia ṭawngkamah chuan ani pawhin indan chu a thlawp viauin ka hria. "Atei awmdanah hian ka pa pawh a lungawi bik lo a, chhungkaw boruak a tichhe zing leh lutuka, Tluanga lah a mawl si, an nupa vangin kan inhau fo a, inpui chang chi pawh an ni lo," ngaihsam hmel fein a ti a, nu Ṭhatei chuan a chhang zui lem lo. Mahse, an kal hnu chuan, "I pa Dinpuia pawh hi an nuin a fuihpawrh ve thoin ka ring, Mangaihi hi a phakar ru ve riau a, Atei hi chu a ti phawr phawr nain a rilru a tluang daih zawk, Mangaihi fin hi a chelh lo leh lutuka, â phuang zel lo sela chuan inpui chang turin ka duh zawk asin maw le," a ti nuah nuah a.

"Pa Dinpuia hi a fel zawk daihin ka lo hria asin," ka tih chuan, "Dina te chu a ṭawngkam bak a ṭha lo, a unaute pawh min huphurh ṭhum reng alawm, hman deuh khan i nu Makimi ten ka pa rama in sak an dil a, Dinpuia'n a lo phal si lo a, an inhauh phah hrep tawh alawm; mahse, i pu Muana'n a saktir ta tho a, ka pa hi chuan kan unau tan hian ui a nei lo, ka nu lah hian i pa Dinpuia a ṭan hlur a, an nupa thu thu hian a awm a, ka pa saw awm lo sela chuan kan inngeih lo hlawm ngawtin ka ring," a ti leh duah a, pi Lalpuii'n pa Tluangate in hmun tur a zawnsak thu Jenusi sawi kha ka hre chhuak rauh rauh mai. 

"Nu Atei aichuan nu Mangaihi chu a taima zawk a, a ṭangkai bawk si a, ka pi leh pu pawh sawn an duat ve deuh chuan ka hria," ka tih chuan, "A fing em alawm ani chu, ka nu leh pa saw a ti thiam khawp a, ka nu phei saw chuan ṭan tak a ni, a fanute aipawhin a ṭan zawk daih ang chu, Nguri awm lo sela chuan kan inpuiah sawn Ramngaihi a lal ber ang, i nu saw fing ve deuh se, Ramngaihi huangtau lutuk loh nan sawn rintlak deuh ṭhin se ka ti ngawt mai," a ti leh luam a. Nu Mangaihi chuan ka nu Nguri chu a hlau der thiamin a duat thiam khawp a, ka nu Nguri hi a induh deuh bar thung a, an inhnial ve deuh changte hian nu Mangaihi zawk hi ka lo ṭan ru ṭhin, chuvang chuan nu Ṭhatei thilsawi dan pawh chu ka hrethiam zan lo a ni.

"Ka nu sawn pasal a neih loh chuan pa Dinpuiate saw an indang ve dawn lo em ni?" ka tih chuan, "Mipa fain inpui an chang ṭhin alawm, i nuin pasal a neih loh chuan Ramngaihi thuhnuaiah a la awm ang, ka nu leh pa an boral hunah phei chuan saw nu saw a la tawrhhlelhawm viau maithei, chuvangin i nu saw fuih ve ṭhin rawh, ka pa hian an dam lai hian ro te pawh sem fel vek se a fuh ang, Tluangate an indang dawn anih phei chuan nakina buaina tur mai mai ania, hmeichhe lam hi chu engmah tihsak kan ngai tawh lo a, i nu saw a ni mai a, Tluanga leh Dinpuia nen an pathum hian sem fel sela, an ram enkawl chin turte pawh lehkhain ziak fel thlap thei sela a ṭha," a ti leh barh barh a.

"Ka pu hian pawisa a khawl ṭeuh lo maw?" tia ka zawh chuan, "A khawl ṭeuh ang, ka nu pawh hian a vawk vulhna aṭang hian a lakluh nual ka ring, vawk bik saw ka nu chan ania, an hralhna leh a note man zawng zawng saw ka nu kutah a lut a, a chaw leh vawk enkawlna thilah chuan i pu pawn a pui ngai lo, pa Taia te chhungkaw hlawh pawh hi i pi pek vek alawm; mahse, ka nu pawisa neih zat hi ka hre thei lo reng reng, min hrilh duh lo a, a inren bawk si a, pawisa dil chhuah te hi a har tak tak a ni," lawm lo awka zet hian a ti leh a, thil dang zawh leh ka tum laichuan, "Ramngaihi sawn a dil chhuak keuh keuh zel mai a, a chéng hi a man khawpa ani sawn, a fa dangte a pek phal loh chang pawhi Ramngaihi te nupa saw chuan an dil chhuak thei zel, mamawh ka neih hi chuan ka pa bak saw ka dil peih lo," a ti leh hlak a.

"Ka pi chuan duat bik a nei tih ka lo hre ngai miah lo," ka tih chuan a nuih a za deuhin ka hria.

"Biak tlawn ngai chi hi a nia ka nu hi chu, a tih tawh loh lamah chuan nek luih a har lutuk, i nu Makimi phei chuan uikawm a ti lutuka, a rawn vui zing ania aw, 'Ka nu hi kan nuhrawn a ni zawk lo maw?' te hi a rawn tifiam thu ṭhin, kan pahrawn zawkin min ngaihsak daih zawk sia.." a ṭawng bawrh bawrh laichuan phawk fein ka lo en a, "Pu Muana hi in pahrawn a ni maw?" ka lo ti he haw a. "I la hre nange?" a rawn ti ve let ve hlut a, ka vawikhat hriatna a ni, tuman a thawi pawha an sawi awm ka la hre lo.

"Ka hre miah lo, a van mak em em?" ka tih chuan, "A awm ve tho alawm, ka pa sawn min duat hlawm em a, Nguri a duat ber nain kan unau hi chu tumah min en hrang ngai lo, kan fate thlengin a la rawn ngaihsak zawk a, vuina tur kan nei lo leh lutuka, a fa bik pawh kan thik ngam hleinem," a ti leh zel a, "Tunge a fa bik chu?" phawk fea ka tih chuan, "I nu saw maw le, i nu pian hmain kan pa ve te chu a tlanbo daih alawm," a ti a, ka rilru chu a buai ru map map khawp mai.

"Pu Muana saw in pa a ni emaw ka ti char char a, anih inpa chu in hmu leh tawh lo em ni?" a lo bu nghat a, "Lehkha chu min rawn thawn ṭhin, Aizawlah nupui a neiin ka hria, fate an neih thute chu kan hria a, kan la hmu leh lo," a ti mai a. "Pu Muana chu ka rin aiin a fel," ka tih chuan, "Min hringtu zawk emaw tih tur alawm ti raw, kan pa tak ni zawk se ka ti ṭhin alawm keipawn," a ti sam leh et a, chutiang anih chuan pu Muana chu pahrawn fel tak niin ka hria, chhungkua a ngaihsak a, a huikhawm hneh em em bawk a, a fate leh a makpate thlengin an zah a, pa namai lo tak chu a ni.

Zan inkhawm kal hmain Jenusi chu ka text ta hram a, nu Ṭhatei thil min hrilhte ka va hrilh chhawng a ni ber. Min rawn chhan mai loh vangin ka inkhawm san a, inkhawm ban hnua phone ka en chuan a message a lo awm vang tawh. "Ka hre tawh alawm," tih zawng hi a rawn thawn lehta nghal a, engtin nge maw a lo hriat leh hman tawh ni, mi te pawh han hrilh ve awm hi a nia, thil dang dang pawh a la zep ṭunin ka ring.

A message chu ka chhang lo a, eng emaw a rawn sawi ka rin laia min chhang tawi lutuk chu ka lawm meuh lo. Pa Tluanga chanchin te pawh chu rawn sawi ve leh awm tak a sin mawle. Jda nen khan an sawi dun leh tawh ngei chu ka ring a, kan awm dan tur takngial pawh a rawn sawi lo chu ka ngei tawk a tling leh hle tawh.

Jda chu call ka tum zuau a. Mahse, ka puihna mamawhtu zawk an nih laia lo va zawh hmasak chu ka hreh tlat, a tlawmthlak ka ti. Heti hian ngaihsak lo awm takin awm ila, an duh leh min rawn sawm ṭha leh zawk rawh se tiin ka call duh ta lo. Mut hmunah erawh ka la inngaihtuah buai khawp a, eng thil nge an hriatbelh tawh ang tih ngawt chuan rilru a luah a, ka tel loa an tih pawh ka hlau ru mah tawh, ka pa chungchang a ni miau a, ka tel ve ngei chu a ngai a ni.

Mood fuh lo deuh chungin thawhṭanni tukah dawr ka hawng a, pa Tluangate lo haw an la rawn pengkawi zui a; mahse, dawr chhungah chuan nu Atei chiah a lo lut a, ei tur a lak hnuah in chung lamah a chho ve leh mai bawk a, pa Tluanga hmel erawh ka hmu ve lo thung. Tlaia nu Ṭhatei lo chhuk chuan an haw tawh thu a rawn sawi a, "I phei ve duh em?" tiin min zawt bawk a, zan lamah va len phei an tum niawm tak a ni.

"Duh hran lo, in ka lo nghak dawn nia," ka ti mai a, "Kal hma kan duh dawn si a, dawr pawh in khar hma mai dawn nia," tiin Muantei chu riak turin a sawm a; mahse, a nu a damloh vangin a lo thei bik lo a, "Chuti anih chuan dar 6 ah inkhar mai dawn nia," nu Ṭhatei chuan a ti ta hlauh a, Muantei nen chuan kan lawm dun khawp mai.

Ka phone chu a khat tawkin ka bih leh ṭhin, 'Ka tel loa in tih theih a hnu' ka ti ru rauh rauh a, lung a awi lo hle a ni. Dar 6 rik rualin kan inkhar nghal a, in chunga ka han chhoh chuan chaw an lo eikham chiah a, ka kil zui ve mai bawk. Naupang ho leng chhuak tur chu an phur hle a, pa Makima erawh chuan a nu a ngaihtuah deuh a, "Kan lo haw hma chu lo mutsan suh aw, tv on sak la, ṭhutpui reng pawh a ngai chuang lo ang," tiin min chah a, chaw ei thleng ka sil laichuan an chhuak fel diam tawh. 

Ka pi Zaii chuan hnai feah tv a en a, inbe lem loin sitting room-ah ka ṭhutpui ve reng a, vai film a en a, amah tein a phun a phun reuh a, a changin misualpa chu a kawk ang sawk sawk a, nuih a ti za reuh khawp mai. Chutia phone en paha ka ṭhut mai mai laichuan Jenusi message ka dawng leh nawlh a, ka hawng rang viau bawk.

"Tunkar chhung chu kan nghak dawn nia, kartawpah zin leh an tum," tih hi a lo thawn a, ka thaw huaiin ka hria. "Indan chungchang an sawi i hria em?" tih ka va thawn chu, "Hre lo, ka ngaihven mek," tih zawngin min chhang a, dawt a sawi em pawh ka hre lo. Message thawn leh tuma ka type lai mekin a dang a rawn thawn leh a, "I nuin chhuah a tum a, ka ṭhianpa khan a lo bia ang che, lo ngaichang rawh," a rawn ti a, "Aw le, engtin nge a chhuak dawn tih i hriat a?" tih ka va thawn hnu chuan a reh vang vang a, a dar zat ka va zawh leh pawh chuan min chhang tawh lo, a en lo hrim hrim zawk a ni.

Jda min lo biak hun chu ka nghak ngat ngat a, nu Ṭhatei te leng an lo haw hnuah pawh engmah a la rawn sawi lo a, mutsan daih chu ni theiin ka hre bawk si lo, dar 11 a pelh hnuah pawh chanchin engmah ka la hriat loh vang chuan ka va be hmasa leh ta nge nge. 

"Jenusi'n ka nu a lo chhuak dawn a ti," tih zawng chu ka va thawn a, rei vak loah lo chhangin, "A rawn thleng tawh," tih ringawt hi min rawn thawn a, insum a har ṭhin khawp mai.

"Eng nge a rawn tih, sawifiah ve deuh ṭhin ta che?" lawm lo fein chu message chu ka thawn leh a, minute 10 vel a liam hnuah, "Tlangval a tawmpui mek," a rawn ti leh tlawng a, tih ve tur ka nei lo anih ka ring.

"Engtin nge a lo chhuak dawn tih jenusi khan a hriat a?" tih chu ka va thawn leh hram a, chu pawh chu "Ka hrilh," tih ngawtin a rawn chhang a, "Anih tak chu," ka tih hnuah ka mu nghal hmak a, ka thinrim chu ka sa deuh pup pupin ka hria.

Ka muhil thei lo chu ka inlet sek a, ka phone chu lukham hnuaiah ka han thawlh ve bawk a, ka la chhuak zing leh viau lawi a, helhkam nei runin ka awm. Celine dion-i a rawn zai chuan dar 12 vel chiah chiah a ni, rang deuhin call chu ka chhang a, "Thlalak ka lo thawn dawn che a, i hriat zawng an ni em lo en rawh," a rawn ti zawi sup a, phone dah lo chuan a thlalak lo thawn chu ka en ve nghal a, "A fiah lo em mai, hei aia chiangin lo la teh," ka tih chuan min chhang mai lo. Rei lo teah thlalak dang a lo thawn leh a, pa pakhat lukawlh tel tul deuh hi a ni a, ka hmuh tawh hnu ngei a ni. 

"Farm-ah a lo kal tawh, tunge ni a?" ka tih chuan, "Hotel leh dawr a nei, i nu ṭhian a nih kha," a rawn ti a, eng nge an tih ka zawh chuan zu an in ho thuin min chhang a, "Wine chungchang pawh khapa khan a hre ve ang?" ka ti zauh chu a rawn ngaihven rang khawp a. "Jenusi wine zawn kha maw, engtin nge i hriat?" rang fahrana a tih chuan, "Sawi thui angai, hmaichhanah kan sawi dawn nia," ka ti a, "Thlalak dang ka lo thawn leh," a tih vangin a message chu ka en leh vat a, chu thlalak ka han hmuh chuan ka hrechhuak thar uar uar mai.

"Kha nu kha ka hria, lukawlha leh pu Muanate nen chhek inah ka hmu tawh, ngawi rawh aw, ka'n ngaihtuah let a nge, midang pawh an awm.." ka ti zung zung a, "Midang pawh an awm alawm, an thla ka lo la ang," a tih hnuah phone a dah daih a, ka call leh zat thung.

A rawn chhan rual chuan, "Heti mai mai hian min hmang suh u, phone aṭangin engmah ka rawn sawi tawh dawn lo," ka ti nghal khar khar a, "I lo chhuak thei em ni?" a ti chu aw rang tak ka ni. 

"Kawngah lo awm rawh," tiin phone a dah leh mai a, kei pawh chu ka tho chhuak ve vat a, pindan aṭanga ka chhuah chuan in chhung chu a reh ṭhuap tawh. Pa Makima hnar bur bur thawm ka hriat vangin midang pawh an mu nghet viau anih hi ka ti rilru a. Hmanhmawh deuh chuan ka pindanah ka let leh nghal a, kawngka ka kalh fel a, thawm dim thei ang berin tukverhah ka chhuak bawk.

Chhak lam kawngpuiah ka lo han nghak a, zan rei anih tawh vangin motor tlan hmuh tur a awm meuh lo. Jda chu ka call a, a chhang thei miah lo mai a, kei lah chu ka hmanhmawh luatah kawrlum pawh ka ha der lo mai a, ka let leh chhunga a lo thlen hman ka ring bawk si. Call leh ka tum laitak chuan bike lo tlan thawm ka hria a, a bike thawm aṭang chuan ka chiang viau mai. Ban ka lo vai a, ka hmaah a rawn ding mai dawn emaw ka tih laiin a inher leh te te a, chhak lam kawngsira a han ding chu ka melh rum lek lek.

"Hmanhmawh ve ta che," ti chung chuan ka pan phei a, "A chhungah a luh chi loh ang, i nu pawh a la awm a, pawnah kan lo nghak dawn nia," a tih chuan ka chhang lo, ka ṭhut fel hnuah a tlan chhuak vut a, a tlan chak lutuk chu thaw a chham lo chauh. A han vawt em em lehnghal a, kawng kawiah a awn dui zel bawk nen ṭhu nghet tur chuan tha neih zawng zawng hman a ngai a, hlau anga lan erawh ka duh hauh lo.

Hotel kawng peng kan va thlen hnuah bike chu a tiding a, "Waiting shed-ah khian kan nghak dawn nia," a tih chuan ka chho nghal hlawk hlawk. Waiting shed aṭang chuan hotel kawt êng chu chiang takin a lang thei a, phone-a ka thlalak dawn chu ka bih zui bawk a, an hmel han hmuh leh takah chuan ka la hrechiang khawp mai, an thil sawi leh an awmdan pawh ka la hria, ka la mitthla thei vek a ni.

"An lo chhuak har tawh lo ang?" Jda lo chhuakin a tih chuan, "A ṭhat chu, awm rei vak chi pawh a ni lo ang," tih pahin ka inkuangkuah hlun a, a lo hrethiam aniang chu a jacket a phelh a, min rawn pe ringawt.

"A ngai lo, kawrlum dang i neih bik loh kha," ka tih chuan, "Ka la thei reng alawm," a ti mai si a, jacket chu ban leh rang tak ka ni. Ka han hak chuan a lum veng veng a, a rim a nem chem chem bawk. Ka piaha a ṭhu chu ka va melh ran ran a, zial a lo zu mek a, min en loin hotel lam a hawi thung.

"Engti turin nge ka nu chu a lo kal a?"

"Hmeichhe pakhat Aizawl aṭangin a lo kal a, chumi hmu tur chuan anih hmel," tih pahin a phone a phawrh a, ka lamah rawn kal hnaiin thlalak awm hmasa ber chu min rawn hmuh a, "He nu hi chhek inah khan ka hmu," ka ti nghal thawr a, ka chiang ngang mai, a nui har har laite pawh kha ka la mitthla thei.

"Engtin nge i hmuh a, tute nen nge?" A tih chuan, "Lukawlhpa kha a awm a, pu Muana leh mipa pakhat nen, thlalaka nula pawh kha a tel, wine chungchang an sawi a, pu Muana khan test a duh thu a sawi bawk a, kum 50 chin chunglama test a duh a, chuan Aizawl nu hi wine pakhat a tem tir a, an titi laiin nula kha store room te aṭangin a rawn chhuak hlawl a, 'Phuar bet rawh u' he aizawl nu hian a lo tia," ka sawi fiah tawk lo nge ni a ner nung a, "Jenusi'n a hre ve em?" tiin min zawt khauh.

"Hria e, ka hrilh tawh alawm, min hypnotize vangin ka thil hriat a mumal lo lutuka; mahse, an hmel ka hmuh hian ka chiang," ka ti leh nghat a.

"Phone aṭanga sawi theih vek anih chu, zaninah engmah tih theih a awm chuang hleinem," a ti chu ka lo melh rum titih. "Thil zep in nei lohnan ka rawn kal ve zel tawh ang," ka ti let nghat a, dar a kan uk ringawt.

Chutah ka bulah chuan a rawn ṭhu a, "Engati nge an hypnotize che a?" a tih chuan ka hrilh duh dawn em mawni ka ti rilru a. Mahse, hepa rinna hi ka neih ngei a ngai, Jenusi hrilh loh thil hrilh hi ka tan chance ṭha lutuk a ni bawk.

"Khami zana ka enthlak laikhan tu emawin nikhaw hre lo khawpin min vua a, a hnua thil thleng chu ka hre mumal tawh lo, ka damlo zui chiam a, thil theihnghilh leh hriat mumal loh ka ngah em avangin pu Muana ka in hypnotize tir a, chumi ṭum chuan pawngsual ka nih thu min lo hrilh a.." tiin thilthlen dan leh a hnuah khawizu vang anih thu kan hriat leh dante chu ka hrilh ve luam a, ka sawi chhung zawng chuan a ṭawng lo.

"Pawngsual ka ni emaw ka tih laikhan ka rilru a na lutuka, thih daih maite kha ka chak ṭhin; mahse, an fapa nupui uirenapa mantir an duh vangin min lo hmang ṭangkai lek kha a lo nia, thil awmzia ka hriat hnuah pawh ka rilru chu a la na tho mai.." ka ti sap sap a, a lam ka va hawi chuan mûk fe hian min lo en a, a hrethiam chiah lo em mawni ka tih rilruk laiin, "Veroi kha an hypnotize ve em mawni le?" a lo ti teh daih a, ka hrethiam hauh lo.

"Tinge ani chu?" 

"Pawngsual emaw a inti ve tho a," a ti zawi sup a, a rilru a buai hmel viau bawk.

"Chu nu chu i ṭhian ve tho em ni?" ka tih chuan min chhang loin min en reng ringawt. "Jenusi ṭhian ve ve in ni tak, keichuan ka hrechiang ve vak lo, ka pa nen khan eng inzawmna nge an neih ang le?" ka ti vang vang a, "Chu chu ka hre chak keipawn," a ti ve bauh a.

"Kan hre thuai turah ngai ang, keichuan an inngaihzawn ka ring lo, ka pa kha chutiang mi chu a ni lo, in ṭhiannu pawh kha a ni bik lo ang," tiin ka han hnem ve naa, "Hriat belh vak pawh ka chak lo," tiin min lo chhang thung.

"Keipawn ka chak lo; mahse, a ngai miau sia, rilru tihrehawm zual tur mai mai a ni nain thudik hriat loh hi a hrehawm bawk si a, ka pa ka hriatreng dan tur anih vangin ka hlau deuh bawk a," ka tih chuan min rawn thlek leh vang vang tawh.

"Hlau suh, i tuar ve thei mai ang," a ti chu ka pawm khawp mai, "Nia tiraw, chhel a ngai anih hi," tiin ka nuih var var a, chutih laichuan ṭawng thawm a rawn awm a, ka bula ṭhu chu a rawn tawlh hnai thuai bawk.

Kan awmna chu a thim deuh avangin min rawn hmu chiang thei kher lo ang, anni erawh an lang chiang viau a ni. Ka nu Nguri chu lukawlha nen khan an rawn inzui chhuak a, "Ka pa be rawh u, keichuan tih ngaihna ka hre lo, ka thu ve lo em a ni," tiin a rawn nui chhuak bâwk bâwk a, rei lote an indinchilh leh hnuah lukawlha chu nula naupan hmel deuh nen khan motor-ah an lut dun a, Aizawl nu erawh ka nu Nguri nen inbiain an la ding dun thung. Nu nguri chuan eng emaw present niawm tak hi a khai bawr ṭun a, "Ka haw hmain la rawn leng leh rawh," Aizawl nuin a tih hnu chuan ka nu Nguri chu bike pakhatah a chuang a, a khalhtu chu a bialpa kha a nih ka ring.

"Mipa pakhat leh hmeichhe pakhat an la kim lo, khi nu khi hotel-ah khian a thleng em ni?" ka tih chuan, "Aw, ka hnathawhna pi Julie û a nih khi, Aizawlah hotel dang an nei a," a lo ti zawi sup a, "Anih, ka nu phurtu kha tunge?" ka tih chuan, "Anthony-a" ti maiin min chhang a, an inṭhianṭha em ka zawh chuan a lo bu zauh.

"A bank balance a lo hre thei angem?" ka ti chu a rawn hawi phawk deuh a, "A phone aṭangin a hriat theih ka ring, anih loh pawhin i ṭhianpa chu a hrilh hreh ka ring lo, a ruih hunah emaw a pawisa neih zat lo zawh tir teh," ka ti leh zung zung a, "Tihdan ka lo ngaihtuah dawn nia, Anthony-a chu pawisa chungchangah a rintlak loh," a ti mauh mai a, engtin nge a tih ang ka zawt leh zat.

"I nu khian min ngaizawng alawm, hrai ruih i pawi tih loh chuan ka lo zawt dawn nia," a ti leh hem mai a, chuzawng ka beisei loh lam daih a ni.

"A ngaizawng che a maw, bialpa a nei bawk sia..?" ka hrethiam pha meuh lo a ni.

"A bialpa kha a tuipui vak tawh lo aniang," ka nui ro halh a, "A awm tho mai, i hmelṭhat zawk vang anih pawh ka ring," ka ti a, ka ner zui nang bawk.

"A hmanhmawh thlak em?" a tih chuan, "Hmanhmawhthlak hran loh e, i hriat theih hun hun a ni mai; mahse, an man chhuah hma cheuin aw," ka ti ve mai a, "Tunkar chhungin hriat ka lo tum dawn nia," a tih chuan lawm ru ve tak ka ni.

"Ka puih ve hma chein min pui nasa tawh sia, ka lawm e aw," min rawn melh vut a, "Ka pui hleinem che," a tih chuan ka chhang buai peih lo, Jesnusi zawk a pui tih ka hria, kei min puiah a inngai lo bawk.

Kal mai a rawt a, a tho zui mai bawk nen ka zui ve thuai a, street light zawnah min nghakin a lo ding leh thung. "Tun aṭang chuan ka ringhlel tawh lo ang che," nuisanga ka ti chu mak tih hmel deuh hian min en a, "Min lo ringhlel ṭhin elo?" a ti bul hmuk a.

"Ka ring tawh che," tia ka nuih var var laiin a lo ner nak, "Ka awih lo," a ti leh nghat a. "Awih rawh, nunna thapa i bike khalha ka chuan ngam danah ka ring hle che tihna a ni mai," ka tih chuan a khi ve suk a, a nui hmel chu ka lo en reng a, hepa hi misual a ni loin ka hria, dawt min hrilh lo a, ka zawh chin apiang chu ṭha deuhin min chhang a, min puitura ka tih pawhin min hnial chuang lo, ka chungchang ka sawi pawh khan min khawngaih tih ka hre thei.

Kan haw lamah chuan a khalh chak ta vak lo a, keimah vang a niin ka hria. "A vawt viau lo maw, kawrlum hak nachang ka lo hre lo a," ka va tih chuan, "A pawi lo," a ti mai a, kawng kawia a awn rualin a kawngah ka va vuan chawt. Kan tlan ngil leh hnu pawh chuan ka thlah tawh lo a, engmah a sawi loh danah a haw bik loin ka hria. 

Ka chhuk dawnah chuan, "Kal rawh, ka lo en ang che," a ti ve thlap a, a jacket ka pek hnuah ka mangṭha a, ka kal hnu pawh chuan a la tlan chhuak lo. Tukverh bul ka thlen hnua ka han hawi chhoh chuan a lo la ding reng a, min la rawn thlir mek a ni. Ban ka han vai a, min rawn vai let hnuah a tlan chhuak zui a, lawm lohna tur hlir ka tawn zat zat laiin ani zawngin min ti lawm veng veng a ni, ani ang ṭhian hi pakhat tal nei ila ka nun hi a awlsam zawk ngeiin ka ring, a atthlak viau naa Jenusi chu ka awt ta hlein ka hria..!

Ka mut hnu chuan phone ka en leh ṭhin a, sana chuan dar 1 a pel va va tawh. Eng emaw va zawh leh ka chak a; mahse, sawi tur engmah ka hre lo. Ka insum a, ka be lo a, ka rilruah erawh a awm reng, a thlalak lo thawn te pawh chu ka en leh ṭhin a, thlalak ami te ka hmuh duh vang erawh a ni tawh lo, chhan dang a awm a ni.

Ni hnih chhung tawp chu thawm an rawn nei zui lo a, Jda chu sawi loh Jenusi takngial pawhin min rawn be lo. Nilaini chuan ka insum zoin chanchin ka va zawt a, an pahnihin message ka thawn ve ve a, Jda zawkin a lo chhang hmasa a, "Chanchin ka la hre bik lo, i nu pawh a lo kal lo a; mahse, naktukah Jenusi chu a lo kal ang," a rawn ti ve luam a.

"Eng nge a lo tih dawn?" tia ka va zawh chuan, "Ka hre bik lo," ti maiin min chhang a, chutih laia Jenusi message lo thleng chu, "Naktukah ka lo kal ang, dawrah ka rawn hmu ang che," tih a ni a, ka chhang lo thung.

Jda bawk chu ka reply leh a, "A lo kal chuan titi pahin thil ei ho ang u hmiang, lo sawm la," ka va ti a, "Lo inbe rawh u," a ti teh tlawng a, "Nangman be rawh," ka va ti chu min chhang tawh lo. 

Zana ka inkhar hma deuhin Jenusi chuan min rawn call leh a, "Naktukah i chhuak thei dawn em ni?" a rawn ti a, kan Jda chuan ka sawi angin a lo ti ni ngei tur a ni.

"Thei mai ang, chhunah thil eiin chhuak ila, ka treat dawn che u nia," ka tih laia ka aw chu a nelawm ve viauin ka hria.

"A va phurawm ve," a ti ve mai a, dar 12 vela a lo thlen tur thu sawiin a hman rei loh tur a sawi bawk a, ka hman rei dawn dik lo a, a pawi ka ti lem lo.

Ka mu hma a, ka tho hma viau bawk. Dar 7 velah dawr ka zuk hawng a, Muantei dar 9 ah a lo thleng a, chhuna ka chhuah lawk tur thu ka lo hrilh nghal a, eng nge ka tih dawn min zawt ve zat. "Ṭhiante nen thil kan ei chhuak dawn a, ka lo hawn dawn che nia," ka ti chu a phur ve khawp mai. 

Jenusi'n min lo call chuan dar 12 a pel hret a, an awmna chu ka awmna aṭangin a hla deuh hret a, auto ka lak a ngaih hmel, "Pi Mangaihi'n min hmuh ka hlau deuh a, ka rawn thleng phei lo mai ang," a tih laichuan Jda ṭawng thawm ka hria a, "Duhawm, ka ril a ṭam tawh ania," a ti ri chuan nuih a ti za deuh, tum bur chunga a sawi ka ring.

"Ka lo thleng har lo ang," tih leh phone dah ka rual a, ka inchei ṭha mawlh mawlh a, ka chhuah rualin auto ka hmu remchang hlauh lehnghal a, ka thleng phei rang khawp mai. Jenusi ka call chuan an awmna a lo sawi nghal a, kawngpui chhak lama in chung restaurant bathlara a ding ka han hmu thuai bawk. 

Ka han thlen chhoh chuan Jda chuan phone a lo hmet mual mual a, ka va ṭhu ve pawh chu min en lem lo. An pahnih chuan ka epah an ṭhu a, pakhat zawkin menu a bih laiin Jenusi chuan a thil ruahman dan a sawi zung zung a, "Inrinniah i pa Tluanga te an kal leh dawn a, inrinniah lo haw la a ṭha ang, chawlhni zanah luh ka tum anga, a theih loh tak leh i cham rih pawh a ngai maithei, i chhungte bulah chhuanlam ṭha deuh i lo siam dawn nia," ka tih chuan ka aw e vel mai mai a ni, thil har pawh a ni hran lo a, ka nu Nguri ka chhuanlam mai a ni ang chu.

Jda chuan a thil ei duh chu Jenusi a hrilh a, Jenusi chuan a lo ziak nghal mawlh mawlh a, "Soup hi i duh leh lo ange aw, pá a tel ka ring," Jenusi'n a tih chuan, "I siam ka ei duh loh chhan chu a hân lutuk ṭhin vang ania, heta mi hi chu ka ei thei ang," pakhat chuan alo ti nghat a, "A vel tak che hian," ti chungin pakhat chuan a ziak ve mai bawk a, a ziah zawh hnua min rawn pek chuan ka ril a ṭam lo bawk nen sandwitch chiah ka chah a, Muantei te turin beef roll leh chow ka chah tel bawk. 

"I dar chu a na em ni a, nichin aṭang khan i tuai i tuai mai?" Jda'n a tih chuan ka va melh ve vat a, chutah...Jenusi dar chu a han hmehsak zui a, "I tar tawh anih hi," tiin a nui pah suk suk a, pakhat lah chuan a hmehna lai tur a lo hrilh zung zung.

"Eng nge farm-ah chuan an thawh tir che a, i cher bawk si, chaw an pe ṭha lo che em ni?" Jda'n a tih chuan, "Ka rilru hah vang anih hi, ka awm mai mai pawh hian ka thluakin hna a thawk reng alawm," Jesusi'n a lo ti a, Jda a nuih laiin ka lo ner lek lek, inngaizawng ang maiin an awm a, ka awm ve tih pawh an ngaihsak tawh lo.

"Lo chhuak zeuh zeuh la a ṭha ang," Jda bawk a ni.

"Tinge, eitur tui deuh deuh min lei dawn em ni?" 

"Tunah pawh hei ka lei dawn reng che hi,"

"Aaa..vawiin te chu Minai'n min treat dawn alawm," ka lam an rawn hawi rual zawt a, dar ka lo kan ak ringawt.

"Pawisa i nei em ni?" chupa chuan min be ve ta hram e.

"Nei e," ka ti mai a, "A hausa alawm," Jenusi'n a tih pawh chuan ka nui mai mai.

"Pawisa sawi takah chuan i nu chu a hausak hmel khawp mai, bike thar min leisak pawh a hreh lem lo," Jda'n a lo ti zauh a, Jenusi zawk chuan a lo melh haw a..

"A ṭan der elo?" phur hmel fahrana Jensui'n a tih chuan pakhat chu a lo bu zauh.

"A pawisa neih zat chu i hre thei ta em?" ka tih chuan lu a thing thung a, "Lo nghak rawh," ti maiin min chhang a.

"I pi pawh chu i awm hunah biak tum la a ṭha ang," Jenusi'n a tih chuan "A hun lo thleng phawt rawh se, ka nu hian pawisa a hman zawh hmain ka hriat a ngai, a pawimawh hmasa zawk," ka ti deuh nghat a, min hnial hmel a pu lem lo.

"Mamte, vei lam kha hmetna deuh teh," tiin a han thle rem zui a, pakhat lah chuan ṭhu kang meuhin a hmehsak a, "Ngik eih suh Lalduhawm, a tenawm," Jda'n a tih chuan Jenusi chu a nui chhuak hawk hawk a, hetiang hian a nui ve ṭhin tih pawh ka lo hre lo.

"A tenawm i tih pawh ka ring lo e a," tiin a han fiam zui a, "Khumah chuan tenawm loh maithei; mi nazawng chu a tenawm" pakhat chuan a lo ti ve khauh a, "I thilsawi kha a tenawm zawk," tiin an han inhnial leh rih bawk a, ka hmu hne ṭan der tawh.

"Inngaizawng inang ka ti, van aṭanga lo tla thla dun ang maia inhmeh alawm in nih le," ner nang chunga ka tih chuan an inena, an nui ve ve a, an tih dan chu ka ei hlawl lo. Engvangin nge maw ka lo chhuahpui kher ni, phone aṭanga sawi kha a tawk reng zawk asin maw le.

Kan ei tur chah a lo thleng a, titi pahin an ei a, Jda lah chuan a plate-a sa chu a suah ngheuh ngheuh a, a soup te pawh chu a share ve zel a, kei erawh thil ei chungin ka ṭhu ngawi ran thung. Muantei eitur ka pack fel tir hnu chuan kal nghal mai ka tum a, "La awm rawh, kan chhuak rual dawn nia," Jenusi'n a lo tih vang chuan lawm lo ru zetin ka ṭhu leh rih a.

"Lawma a dam ṭha maw?" ka tih chuan, "Ṭha e," a ti mai a, a bak chu a sawi zui duh lo.

An ei zawh hnua kan chhuah chuan Jda chu ka bulah a lo kal hnai a, "I zarah kan puar hle mai," zawi supa tih pahin tawi fahran hian min nuih a, "Min la leisak ve ang chu," ka tih chuan a bu zauh.

Kalna tur dang an neih hmel avangin ka let san nal nal a, ka va thleng chu Muantei a lo phur tehlul nen kei erawh ka tha a tho tawh lo. Ṭhuthmunah ka ngaihtuah zui a, anni pahnih kha an inngaizawng nge ṭhian tak tak an nih vang tih ngawt chuan rilru a luah a, ka hrethiam thei lo reng reng. 

Kan inbe zui lo leh ta reng a, inrinni tuka Jenusi'n min lo text chu kan inbiak leh hmasak ber a ni. "I pa Tluangate an chhuak chiah," tih hi a lo thawn a, "Naktuk lamah ka lo tum ang," ka tih chuan min hnial dawn lo aniang a rawn chhang let tawh lo a, ka buai tih a hrethiam te pawh a ni mahna.

Dar 3 velah hmanhmawh deuhin nu Ṭhatei a rawn chhuk a, "I pa Kima bike-in a rawn accident a, a ke pawh a ti che hleithei lo, damdawiinah kan va tlanpui nghal a ngai dawn," a rawn ti ta mai a, dawr pawisa chu a rawn la rawk rawk. A chho chu ka zui ve nghal a, ṭhenawmte pafain pa Makima chu an lo buaipui a, nu Ṭhatei'n an thawmhnaw ken tur a va siam zung zung bawk. An kal dawn chuan nu Ṭhatei'n min rawn ko a, "Dawr chu khar mai rawh u, ka nu leh naupang hi lo awmpui rawh," a ti a, ṭhenawm tlangvalin a hruai dawn anih hmel.

Muantei'n "Ka lo awm mai ang," a tih vangin dawr chu kan khar mai bik lo a, eirawng te ka bawl kep a, naupang an fel bawk avangin han buai chuk pawh kan nei lem lo. Nu Ṭhatei'n min lo biak chuan an admit thu leh a mal ruh a tliah thu a rawn sawi a, mi a ngaihtuah viau mai bawk a, "Muantei kha kan ko phei mai dawn em ni?" a tih chuan ngai ka ti lem lo thung. Ka pi leh naupang ho pawh chu thil awmzia ka hrilh a, zan lamah pawh an homework te ka tih pui a, dar 9 ah hi chuan an mu tawh mai ṭhin a, kan pitar pawh zanin chu a mu hma khawp mai. 

Ka mengrei ṭhang bawk nen eng eng emaw tiin zan rei thlengin ka meng a, ka insu a, in chhung ka tifai diam bawk a, ka mut chuan dar 1 a pel tawh. Sunday school kaikim an duh vangin naupang ho ka hruai a, inkhawm ban hnuah pu Muanate nupa leh an tute an rawn lengphei bawk a, naupang inhmu khawm chu a ri teng tung a, an haw hnuah erawh a reh ruih thung. Jenusi pawh chanchin ka hrilh a, "A va pawi ve," tih bak chu a rawn sawi zui lo.

Mahse, zan lamah Jda message ka dawng a, "I nu a lo kal dawn a, i thil duh chu hriat ka lo tum dawn nia," a rawn ti a, "Fimkhur deuh khan aw, a ringhlel palh che ange," tiin ka chah ve thlap a. 

Min lo biak leh hun nghakin ka mu mai lo, tih tur ṭulte ka tih zawh hnuah ka inbual a, ka zawh meuh chuan dar 12 a lo ri hnai leh tawh. Sitting room-ah ka va ṭhu ren rawn a, ka phone lah chu a reh vung vung a, ka khawhar deuh chuan earphone vuahin zai ka ngaithla leh ringawt ṭhin. 

"Eng nge chanchin?" tih ka zawhna message chu a la en thei lo a, ruah lah chu a tla cherh cherh a, ka nu pawh a haw tawhin ka ring. A hre thei lo aniang tia mutsan ka tum tawh hnuah a rawn call hlawl. 

"I la meng em?" a rawn ti a, a aw chu a dik lo deuhin ka hria.

"Meng e, chanchin i lo sawi har lutuka ka mu hman ṭep," ka tih chuan, "Kawngpuiah ka awm," a rawn ti hem mai a, hmanhmawh deuh chuan ka pindan lam ka pan a, tukverh aṭanga ka han thlek chuan a bike ding chu ka han hmu a, "Phone a huh zo dawn," a tih ri ka hre zui bawk. A bike aṭang chuan a chhuk a, a rawn kal thla nghal hlawk hlawk a, tukverh chu ka hawng rang khawp mai.

"Engtizia nge ruah te i do a?" a lo thlen rual chuan ka lo ti hlut. 

"Nuai 42 anih chu," a lo ti teh daih a, ka hrethiam map lo.

"I pa pawisa chu nuai 42, ka huh ania," tih leh rawn luh a rual a, towel ka va laksak ve nghal bawk a, a inhruk lai chuan a meng sen deuh rûmin ka hria. 

"A hmang nual tawh ang, a tira a hnutchhiah chu nuai 42 a nia, i chhungten an hriatpui lo, an bulah chuan tlem tham takin a sawi anih hmel," a ti chu ka lo en ran a, "I rui em ni?" a tih chuan a bu ringawt.

"Ka nu chu a haw tawh em?" 

"Anthony-a kutah ka kalsan, zanin chu a zia lo khawp mai, inring tur ka nia sin maw le," a ti a, a ṭawng dante chu a dik zan lo.

"Eng thil nge thleng a?" 

"A..Eng lo ania," tih pahin a lu a tuai vut a, "Ka haw vat a ngai," tih leh tukverh lam pan a rual a, ka pawt let rang khawp mai. "Ruah a sur hi, han deuh rawh se," ka sawi zawh rualin ka kut chu a phihthla hlawk a, bang ngheng chuan a ding a, thawk a la ham ham bawk.

"I va han inhnem awm em em?" ka tih chuan, "Teuh lo, ka inmang lo; mahse, a hrehawm, kha mi tenawm nu mai mai kha.." a ti hluk hluk a. "Engtin emaw a ti che em ni?" tia ka va pan hnaih laichuan hlauhthawnna ka nei, eng eng ka hlauh ber pawh ka hre lo. Jda chu ka va thlek chiang a, "I ṭha meuh maw Jude?" ka va ti chu min lo en ran a, ka thawmhnaw hak chu a rawn melhin ka hria. Mutkawr pante ka ha a, kawr hnuai ka ha miah lo lehnghal a, a rawn hmu fuh tih hriain ka kawrchung zawk chu ka pawt ṭha rawk rawk.

"Min hlau suh," a tih chuan, "Ka hlau lo che," ka ti ve vat a, a rawn kal hnai chu ka lo en ran bawk. A mitmeng mawi fahran chuan ka mitah tak min en a, chutah ka hmaah rawn dingin a kut a rawn lek kang a, ka biang a rawn dawm rual chuan thawk a la deuh halh a, ka hlau lem lo, a awmdan chu mak ka ti zawk mah a ni!

"Min vaw thlu tawp mai rawh," a tih chuan ka nuih ta ngawt. 

"I va nawi tak, in tam lo ti ve si..jenusi'n hmu che sela chu..." sawi pawh ka sawi zo hman lo a rawn kun thut a, min rawn fawp chawt mai. A bana ka vawn rualin ka kawngah a rawn man chawt a, a taksa thlawp zaihin min pawt hnai zui a, kan nam rualin min thlah leh vut thung.

"Eng nge i awmzia?" hamhaih fea ka tih chuan, "Tihpalh," a ti zawi sup a, "Min duh em ni a?" ka tih chuan min chhang lo. A inher vut a, chhuah a tum emaw ka tih tawh laiin tukverh a va khar a, a lo let leh chu a rawn hmanhmawh hmel khawp mai. 

"Duh e," tih leh min rawn fawh a rual a, ka ṭang ve tak nain min fawp lui bawrh bawrh a, a kutin min chul kual ruai bawk. "Duhtawk teh, i rui anih kha," ka tih pawh chuan, "Ka thei lo anih hi," a ti teh thlawt a. Ka biang tawn tawnah rawn dawmin ngenngawl lutuk hian min fawp zui a, a thawk la ri te chuan thluakna ti nu but thei. Ngaihtuahna fim ka hmang thei bik miah lo, a mi tawhna apiang chu a danglamin ka hria, ka han chhan let ve takah phei chuan a uar sauh a, ka kawrte chu hnawk a ti lutuk tawh tlat.

"Inbe phawt ang," tiin a hnungah ka chum dat dat a, "Nakinah," tih leh ka nghawnga rawn fawh a rual a, "I huh lutuk.." ka lo ti chul a, chuveleh khumah min nam thlu rawk a, a inphelh zui sawt sawt a, ka tho tur chu min rawn bawh bet rang viau a ni. "Jude..," ka tih chuan a che chu a tawp ve chat a, a biang chu ṭi ru deuh chungin ka han dawm a, thawk a la la halh halh reng. 

"Sawi vat rawh," dawhthei lo fe hian a ti a, sawi tur pawh ka hre lo, ka hamhaih a, ka hlauthawng a, ka chhungrilah erawh hlimna ka nei, ka awmdan chu ka sawi thiam bik lo a ni. 

"A mak tehthut em a," ka tih chuan min chhang lo, a inbengkang a, chumi hnuah ka kawr a rawn hlim chho hrawk a, ṭawng lehna hun a awm tawh lo, a che zui mawlh mawlh a ni ber. A duhthawh a, a hmanhmawhin a dawhthei lo hle bawk. Ṭawng ka tum apiangin ka hmui a rawn khar nghal zel a, ka hnar phal bik lo, ka rilru chuan hnar turin min hrilh ngei mai a; mahse, ka chungril ami zawk hian a phal lo a ni.

A duh anga a chet chu ka phalsak a; mahse, a tawp dawna a thilsawi erawh ka hrethiam lo khawp mai, "Tihpalh," ka beng bulah a rawn ti zawi sup a, ka sira chuan let thlain mit a chhing vang vang bawk. Rei deuh chu kan inbe lo a, ka va thlek chuan a mit a la chhing reng a, a muhil nge pawh ka hre lo. Ka koh chuan min chhang lo a, "I riak thei lo ania," ka ti erawh, "Khawvar hmain ka haw ang," tiin min chhang a, ka lam lo hawiin min rawn kuah zui bawk.

A muthilh hnu chuan ka va intifai a, ka mut leh hnuah pawh a muhil hmel chu ka en reng a, inchhirna ka nei angem tiin ka inzawt a, chutiang chu engmah ka neih awm ka hre lo. Tlangval hmelṭha tak a ni, a felin ka ngainat zawng tak a ni bawk, dawt min hrilh ngai lo a, ka duh min tihsak mai zel bawk a, a ṭhian Jenusi laka a awmdan ka ngaihtuahin beisei ka nei sang khawp mai, a  ṭhian tan pawh heti taka a inpek theih chuan a hmeichhe hmangaih tan chuan eng chiah nge a huam ang, chu hmeichhe vannei chu nih ka duh a ni. A biang chu ka chul riak riak a, mahniin ka nui leh ringawt ṭhin.

'I engkim hi min pe vek ang che,' tih pah chuan a biangah ka fawp zauh a, puan ka sin ṭhattir laipawh chuan a la mutui khawp mai.

Ka mu meng reng a, muthilh ka tum loh tehlul nen ka harh leh chuan khua a lo var tawh. Ka mutna sir chu a lo ruak huai a, engtik laiin nge a chhuah reng ka hre lo, a thawm takngial pawh hre lo khawpin ka mu tui anih hmel. Ka phone chu ka en vat a, message engmah a hnutchhiah lo, ka call chuan a ri ve tak nain a chhang thei lo a, hotel-ah a va mu ṭha leh anih ka ring.

End of chapter - 14