WHY DID YOU GO?
by Ahmangaihi violette khiangte
Chapter - 13
"Khawia min hruai nge i tum a, ka hman rei vak lo asin?" a zawhna chu chhang loin ka kal hlawk hlawk a.
"Jenus.." tih leh ka dara rawn nam a rual. Ka lehhawi a, ka melh rum titih chu nur fe hian min lo melh a, "Nichina nula kha headmaster fanu a nih kha," a ti zawi sup a.
"Ni e.." ka ti ringawt.
"Min hria anih kha," a tih leh pawh chuan, "Hria e," tih zawngin ka chhang a, a la meng nur khawp mai.
"Kan kalsan ringawt a?" a tih chuan, "Engmah a sawi dawn lo, kan lam ṭang a nih kha," ka tih chuan thawk a la hluai. A rawn pen hnai hrut a, "Lam ṭang kan nei lo," a ti chang bawl a, sawifiah tur kan ngah dun khawp ang.
"Min lo zui phawt teh, i thiltih dan hi i sawifiah ve phawt a ngai," tia ka kal chu min rawn zui mai lo, "Hmanhmawh rawh," ka zuk tih leh hnuah a rawn kal chho a, "I sawifiah hmasa ang," tih pahin min rawn kal pel a, ka umzui ve thuai bawk.
Tlang zawl kan han thlen chuan, "Hetah hian em ni i awm a?" a ti a, kan hmaa in ding chu a thlek vang vang a.
"Ni chiah lo, ka thlen tirha ka awmna anih hi,"
"Khawiah nge i awm?"
"Farm-ah," a rawn hawi rang nasa mai.
"Ka hrilh vek dawn che, lo kal rawh," tih leh in lam pana kal ka rual a, kan thlen phei hma deuh chuan pi Rinmawii a rawn chhuak hlawl a, Zohera chu a tawi deuh hrut a, "I dam maw ka pi?" ka ti chu pitar chuan min rawn nuihsang mai.
"Dam alawm, i la awm ve reng a ni maw, lo leng rawh u," a rawn ti lang lang a, "Hei ka ṭhianpa nen hian lenna tur kan hre lo a, kan rawn tei chho mai mai, ka pu a awm em?" ka ti nghal zung zung a.
"Nimin piah khan a zin a, naktuk lamah a lo haw chauh ang, lo va ṭhu lut rawh u, huanah anthur hnah ka zuk la lawk ange," a tih laiin veranda lam chu ka pan a, "Pawnah hian kan lo ṭhu ang," tiin Zohera chu ka hui sawk sawk a, Zohera lo kal phei chu pitar chuan a lo en chik viau mai.
"Ka rei lo ang, lo awm rawh u," ka lam hawia a rawn tih leh zet hnuah a kal a, "Fianrialah kan sawi thei mai lo em ni a?" ti bul bul chunga lo kal phei chu tawi tein ka lo nuih. Ka bulah chuan a rawn ṭhu a, 'Sawiṭan nghal rawh,' minti niawm tak hian min rawn thlek nghal bawk.
"Engtikah nge i lo thlen?" ka tih chuan, "I kal hnu lawkah khan," a ti a, "Engati nge engmah i rawn sawi loh?" ka ti leh zat a.
"Ka tum alawm," a ti ringawt.
"I tum miah loh kha, rawn hrechhuak lo ni ila min la hrilh miah lo ang," kan inen deuh vang vang.
"Engtin nge ka awmna i hriat a?" a tih chuan, "I bike ka hmu alawm," ka ti ve vat a, a hriatthiam loh hmel deuh.
"I awmna hotel-ah khan thil lam turin ka lo kal ṭhin, i bike kha midangin an khalh ka hmu a, mipa samsei, hang leh hmai chik deuh..."
"Engtin nge ka bike a ni tih i hriat?"
"A chahbia keychain inkhai aṭang khan maw le, Veroi nen kan leisak che kha a ni tih ka la hrereng alawm,"
"Hotel-a ka awm i ring nghal ringawt a maw?"
"Nghal ringawt lo e, tlaiah ka rawn call che kha,"
"Ka awmna ka hrilh chuang hleinem che," a tih chuan za lo fein ka nui a, "I awmna bula thawm aṭang khan ka hria, thingzai nawt ri leh secondhand sale thawm kha.." mit tizim raih hian min melh a, nichin mai khan min hmuh vanga lawm deuh angin a awm a, a lawm leh ta vak lo nge mawni. Zirtawpni tlai ka thil va lam tur khan a hmaa ka bike hmuh bawk kha ka hmu leh a, a khalhtu kha Zohera emaw tiin ka umzui a, hotel kawtah ka han nangching nghe nghe a, amah a ni lo thung. Mahse, a keychain ka hmuh takah kha chuan Zohera bike a ni tih ka chiang a, a kalhtu pawh kha a bike a ni em ka zawt bawk a, a ṭhianpa ta anih thu min hrilh kha chuan ka chiang hle tawh.
Farm ka thlen veleh ka call nghal a, a lo chhang ve tak nain a awmna a sawi duh tlat lo a, ka awmna min zawt chik leh thung. A tukah Puia chhuak tur zuiin nileng deuh thawin ka va chang a, ka call a chhang duh miah lo mai a, hotel counter-a ṭhu lah khan Zoherliana tih hming hriat a nei lo a, chuta ṭang chuan a hming a thup a nih ka ring ta bawk a, ka biak leh phawt a ngai tiin ka hawsan leh ta rih a, vawiin hian a beisei lohin ka va ṭhawng thut a ni ber.
"Zep buai duh tawh suh, dawt inhrilh a chi miah loh ang," ka ti khar khar chu min melh kur ringawt a, "Sawifiah ve la maw le," ka ti leh hlak.
"Bungrua i lak thu ka hriat hnu khan ka rawn zui che, school-ah pawh khan ka rawn kal a, i kal thu min lo hrilh a, i lo haw tawh an ti bawk a; mahse, i la awm tih ka hria. Ka zawng nasa teh che ania.."
"Engtin nge hotel-ah hian i awm ka hre duh?" ka lo ti zauh a, min melh no lo ṭhin khawp mai.
"Veroi thawhpui Kima te inah khan ka thleng a, ka haw dawn tukah an thawhpui dang hmeichhe pakhat kha a lo kal a, nu lian deuh, samkir, ngo deuh kha.." a tih chuan, "Miss Mathani a nih chu," ka lo ti vat a, a bu ve nghat nghat.
"Kha nu khan Veroi pawisa batu a awm a, a tam tham deuh avangin ṭhing turin min rawn ti a..."
"Tu nge chu chu..?"
"Pawisa chu sing 8 lai a lo nia, khatianga tam kha Veroi khan a neih ka ring lo; mahse, ka ngaihven ta tho a, zirtirtunu khan Anthony-a tih hmingpu damdawi vawrh ṭhin tlangval pakhat hi min lo kawhhmuh a..."
"Eng pawisa nge a lo sawi em?"
"Chu pa chuan pawisa kawl pawh a lo nei lo, 'Installment-in ka rul ang che u, ka intuak phawt ang' a lo tia.."
"Khawilam pawisa nge..?" Thawk a la hluai a, "Min sawi zawh tir ve phawt la maw le," a ti pawr hlur a, ka zawhna chhang se ka hrethiam ni mai tur, engmah hre loah mi a ngai aniang.
"Anih sawi zung zung rawh,"
"Hriat duh biktê i nei anih kha, min zawt mai teh," rum fein kan inmelh a, "Zawh tur che ka ngah ve tho ania," a la ti zui.
"Min zawh tur i ngah chuan engvangin nge min biak duh si loh?"
"Ka inthupna i rawn tichhe vek ang tih ka hlau maw le," a tih chuan za lo zetin ka nui, "Ka hlau fe zawk, i awm tih ka hriat hnuah pawh ka insum hram hram ania," ka ti chang rawt a, min hnialna tur a nei lo aniang a ngawi run mai.
"Anthony-a chu ṭhianah i siam a tiraw?" a lo bu nghat a, "Pawisa chu a rulh theih nan che i pui em ni?" ka tih pawh chuan min en kur ringawt. "Damdawi i zawrhpui a maw?" phawk fea ka tih chuan, "Deliver tu chauh," a ti a, a him chinah chuan a la awm ve hram a ang.
"Engtin nge i inrintir mai theih a?" dar a lo kan ak a, "A har hleinem," a tih laichuan ka lo en chik khawp a, a sawi dik velin ka ring, a landan pawh a tidanglam ve ngei tak alawm, eng eng emaw a beh nual lehnghal.
"Addict emaw min tia?"
"Keipawn i ang ka ti," ka ner khum sak a, a mitkoa a thil vuah chu ka va khawihsak dawn a, a thlesawn rang khawp mai.
"Veroi chungchang chu hriatbelh i nei tawh em?" Ka ti chu min melh vung vung a, "Ka hriat ang hi hria la chuan i inchhir ve maithei a ni," a ti mauh mai a, a duh loh zawng a hria tih a chiang reng mai.
"Eng nge i hriat a?"
"Damdawi a khawih a, a zuar bawk a..." engtin ka ngaih hriat tum niawm tak hian min rawn thlek a, "Ka hre tawh alawm," ka lo ti zawi sep a, "Thildang eng nge a zawrh i la hre duh em?" a tih chuan ka chhang tawh lo.
"Amah a inzuar," a ti leh khawl a, a ṭawng pawh a sehchilh rap.
"Tu nge hrilh che?"
"Ka hre vek tawh, damdawi kha chu inzawrh a bansan hnua a tih chauh a ni,"
"Mi ka aṭanga i hriat em ni?"
"Min min hrilh ka ngai lo, a hmunah ka awmchilh a, nula lo kal ṭhin ho thil tih dan hi ka hria, ka mittin ka hmu bawk.." mit ka chhing sawk a, thawk ka la ham ham bawk.
"I beidawng ve rawih rawih lo maw, khatiang hmeichhia kha nupuia neih ka lo tum ṭhin a nia, min bum chiang khawp mai," beidawn hmel zet hian a ti a, han sawi mai tur pawh ka hre tawh lo.
"A chungchang buaipui pawh hi a ṭulin ka hre tawh lo, nangpawn duhtawk tawh rawh," a ti leh a.
"Anih engati nge i la awm reng si?" ka ti chu maktih hmel deuhin min rawn en a, keiin zawhna ngah fein ka lo en let bawk.
"I la awm vang maw le, awm tlat lo la chu ka haw daih tawh ang," a tih chuan ka hrethiam zan lo.
"Keimah vangin maw i awm a?" ka ti let hu a, a lo bu nghat thung.
"I tan a pawimawh tlat si alawm, he laiah hian Veroi ka chân tawh a, nang pawh ka chân leh maithei che a..." a ti zawi ruih a, "Nangmah kha inngaihtuah zawk ta che, an man chhuah che chuan thil dang pawh chân tur i ngah dawn asin," kawt zawl lam hawia a ṭhu chu a darah ka va hmer a, "I duh loh thil engmah ti suh, i nu leh pa pawn an hrethiam lo ang che, police-in an man che anih phei chuan in chhungkaw tan a pawi thei ania.." ka ti leh sap sap a.
"He khuaah hi chuan nang bak chân tur ka nei tawh lo, kan pahnihin kan haw dun dawn nia," a tih ri chu a zawi sep sawp hle. "Mahse, i tih dan hi chu a hlauhawm leh lutuka," ka tih chuan min rawn melh zawk a, "I lawm tho kha," ti nghatin min chhang a. Ka lawm tehmeuh mai, a rilru tina thar leh ṭhin thil, hriat nawn emaw hriat belh leh pawh a duh tawh loh thil a ni a, Veroi lakah phei chuan a lungawi lo hle tawh, chuti chung chuan min puih a inhuam a, nuam a ti miah lo chungin a la tuar ve hram hram a, ka khawngaih takzet a ni.
"I sawi ve hun?" a tih chuan ka ṭhu ṭha vat a, ani pawh ka lam hawiin a rawn inher rem a; mahse, pitari huan kal lo let chuan, "Lo ṭhu lut rawh u, thingpui kan in dawn nia," a rawn tih hlut avangin ka ngawi leh rih. Rei lo te kan va ṭhu lut a, Zohera chuan nuam a ti vak lo aniang a sana a en zing khawp mai. Pitari lah chu a ti ti siam siam a, chaw eiah te mi a sawm a, ka bula ṭhuin kal a rawt hnuah pawh mi a be khawtlai leh zel a, darkar chanve dawn chu kan ṭhu awm e.
Kan chhuah hnu chuan kawt aṭanga hla vak loa thingbuk hnuaiah chuan kan ding dun a, ka thil buaipuite pawh chu ka hrilh ve luam a, varak lem chuanna wine bottle ka hrilh chuan mak a ti ve khawp mai. "Veroi khan a in a, wine mak danglam tak angin a sawi bawk a, hei hi a thih chhan nen inzawmna a neiin ka hria, headmaster te farm hian wine an siam chhuak a, he kan wine sawilai hi an siam anih ngei ka ring bawk, hotel-ah i hmu tawh mial em?" ka tih chuan a inngaihtuah let rauh rauh a.
"A hlu viau em?" tiin min zawt teh nawlh a.
"A hlu viau aniang hmuh tur pawh a awm lo, an thukru niin ka hre bawk.." a rawn inher vut a, "A ni dawn em chu ka chiang lo a; mahse, ka hnathawhna nu hian headmaster nupui lak aṭanga beisei chu a nei a, chumi dil chhuah nana min tawktarh a tum bawk a, wine chu a ni maithei, a ṭhian pakhat hnenah, 'A pain min pe duh lo anih pawhin neih dan kawng dang ka hria, a formula kan neih chuan wine dang pawh hi kan siam danglam vek thei ang,' a tih hi ka hre fuh tawh a, an hotel-ah hian wine chu an rawn supply ṭhin," a tih chuan ka ngaihbel ve deuh a, hriatthiam loh erawh ka la ngah deuh.
"Tawktarha hman che a tum tih chu eng nge a awmzia?"
"Ka hrethiam bik lo, kha nu khan min ngaihmelh deuh tlat a lawm maw le, pi Julie lah khan, 'Be ṭha suh, i induh khum dawn nia' ti chungin a hmuha inlan fo turin min ti leh lawi a, a tihdan hi ka hrethiam chiah lo," a ti nuah nuah a, "A mit la turin a duh che a, awlsam taka neih theih loh ni turin a duh bawk che a nih chu, pi Nguri chuan a thlem ṭhin che em?" ka tih chuan lu a thing rang khawp mai.
"Thlem lo; mahse, ka hnathawhna nu chuan min thlem dawn tih chu a sawi," a tih leh takah chuan ka chiang ta kuar, tawktarh chu a lo nih ngei hi, a thil man tum nen pawh a inmil thlap alawm, a tih kual dan erawh tenawm tak a ni.
"Zoa, Veroi thih zana in ina kan awm laikhan..." ka zawt tim leh angreng khawp a, ani lah chuan ngunthluk zet hian min lo en a.
"Eng lo, sawi hreh lo la..." ka ti leh rih a, min chhang lem lo.
"In mu dun em?" ka tih chu a meng nur khawp mai.
"In mu dun chiah lo anih pawhin chutiang rawngkai chuan in awm dun em?"
A han meng kual deuh ralh a, "Ka hrilh dawn lo che," a ti teh tlawng a.
"A pawimawh alawm, sawi tawp mai teh, ka hrilhfiah nghal dawn che nia," ka tih pawh chuan, "Khami zan khan chhimbal a zâm em tih maw i hriat duh a," a ti a, za lo fein a nui bawk.
"Veroi kha ka la mutpui lo,"
"Mahse, eng emaw chu intih ṭhin kha?"
"Lalduhawm, i thil min zawh hi ṭhiante hriat ve a ṭul hleinem," a ti fiah fak a, a lawm ta vak lo.
"Thil pawimawh a ni ka tih kha....wine chungchang nen a inzawm alawm, Veroi taksa ah danglam a awm a, chumi tih fiahtur chuan..." ka sawi zawh hma hma chuan "Aw.." a lo ti vut a, ka ṭawng tawp chaih a, "Aw tih chu...eng tihna?" ka'n ti leh hram a.
"I mak mange, ka phelh theih chin chu ka phelh, a tawk em?" ram zet hian a ti a, a la tawk teuh lo.
"A ruh lang rawtin ka'n sawi mai ange, Veroi kha a chi chhuak tur khawpin i siam em?" rum uluk fe mai hian min melh a, rapthlak min tih hmel hlein ka hre mai.
"A taksa an enfiah khan a chi a chhuak an ti," ka ti leh ta zel a, ka sawi frank deuh bawk aniang a hmui a petruh ṭun tawh.
"Chhang rawh," ka ti chu lehlam min hawisan hmak a, "Zoa, engkim kan inhrilh a ngai.." ka ti deuh vang vang.
Min chhang duh dawn lo emaw ka tih tawh hnuah, "Chutiang tihna hun pawh kan neih loh kha, midang nena an thiltih anih chu," tiin min rawn chhang ta khauh a, anih chuan a hriat duh loh ka hriat belh tir leh anih hmel.
"Tihpalh aw Zo, i rilru a na ngawt ang," a rawn inher ṭha leh a; mahse, kawng thlang lam hawiin a ding a, "Hmeichhe dukdak lo vanga rilru nat ka tum lo, minti chawmawlh vek tawh," a ti chhuak halh a, a tlawmthlak a ti a, na anga awm pawh a zak tih ka hai lo; mahse, a chhungril na chu a hmuhhmaih theih si loh a ni.
"Wine chuan danglamna a nei em ni?" pangngai deuh hian a rawn ti leh a, rilru fim a la pu thei zel chu ka lawm ru ve khawp mai.
"Tisa chakna kaitho thei tura siam a nih hmel, Veroi khan a in a, headmaster hnen aṭanga a neih nge chu ka hre lo, a thawh dan ka hre chiang bik lo a, ka zawn hmuh hunah chiah ka chiang thei ang.."
"I hmuh hunah chuan engtin nge tih i tum?" a lo ti let khauh.
"Ka hre mai lo, chu chu i awmna lam aṭanga zawn chhuah a har lo ang, i sawi danah chuan neih chak ngawih ngawihtu an awm anih hmel a, i lo ngaihven deuh a ngai dawn anih chu..." ka thilsawi awmzia chu a hrethiam rang khawp a, "Eng nge ka tih ngai dawn i hria ang chu ti raw?" a ti leh zat a.
"Umm.."
"A ṭangkaina pawh ka hre ve lo keichuan, wine aṭanga tualthattu hriat tum chu a awm ang lo em mai," a ti hluk hluk a, "Wine aṭang ni loin wine neitu zawk kha lo ngaihven rawh, ka tih theih chin a tawp rih a, thil hriat belh i neih hunah tihdan tur chu ka hre mai ang," ka tih chuan min ring ngam chiah lo nge ni min en leh renrawn a.
"Engkim kan inhrilh dawn em?" a tih chuan ka aw rang viau a ni.
"Nia, i tana mi pawimawh chu i bum ngai lo," a ti vei nghat a, zawhna nei hmel a pu thung.
"Nangpawn min bum ngai hleinem," a ṭhen sak a, "I hre lo," a ti deuh hmak a.
"Ka bum che i hlau anih kha, ka ṭhian neih chhun i nia; ka bum lo ang che,"
"Ka hre chuang lo," a lo ti leh vut.
"A mak, ka tana mi pawimawh ka bum ngai lo," ka pawr tawh khawp mai.
"A pawimawh lo ho chu i theih chen chen i bum ziah alawm," a ti a. Awi...he pa hian min hrechiang mah mah deuh chu a ni.
"Enteh maw...kan thiltih laia ka rin ber tur i nih hi, a thil sawi engpawh rin tlaka ka ngaih zel tur chu nangmah chiah i ni, i lo tel ve takah phei chuan i chungah ka innghat dawn, chuan...ka tana mi pawimawh ka bum theih loh tur pawh nangmah i nia, nangpawn min ring ve tur a ni, kan pahnih chiah kan nih tawh hi," a darah ka va vuan a, "Min hmang ṭangkai miah lo ang che," a lo tih chuan lu ka thing rang khawp mai.
"Ka sawi awmzia chu, min hmang ṭangkai thei a; mahse, inthiam lohna i neih loh ka duh dawn lo ania," a ti leh rih a, a va hahthlak...
"Kan inpuitawn ang, ka veng che anga, nangpawn min veng ve ang.."
"Chu chu alawm ka sawi tum," a lo ti leh reuh a, sawi thiam lo bawk si.
"Wine bottle an thuhrukna ka lo zawng anga, nangin pi Nguri hnen aṭangin eng nge a nih a, engtin nge an tih ṭhin hriat i lo tum anga, Veroi nen inzawmna a neih dan emaw, a pasal nena a inzawm dan te pawh hriat i lo tum dawn nia, ka zawnna lam aṭang hi chuan hmu pawh ni ila thil awmzia hi a chiang thei dawn lo, pi Nguri aṭang hian a awlsam ber rih.." ka ti leh luam a, ka han sawi awlsam viau nain Zohera ko erawh a rit khawp mai, engtia rei nge hun a duh dawn lah a hriat der si loh a, keimah zawk chuan ka huphurh pui lek lek a ni.
"He wine hi duh chhan dang i nei ti raw?" a tih chuan ka pha lo, ka rilruah hian tualthattu zawn chhuah ringawt bak pawh thildang a la awm miau a ni.
"I thlarau a bawlhhlawh lutuk," a tih pawh chuan ka nui ringawt. A tir aṭang khan hriatbelh ringawt hi ka thil tum a ni ngai lo, chutiang ringawt titur chuan ka sual mah mah tlat. Phuba lak ka duh a, a inhnamhnawih tawh phawt chu hremna an hmuh theih zawng zawng hmuhtir ka duh a ni, chu chu Veroi laka ka bat niin ka hria.
"Vawiina nula lo kal chungchang kha i la sawi lo ania," a tih chuan ka hrechhuak ve leh chauh. "Jeminai a nih kha, tunge ka nih a hria a, vawiin aṭangin nangpawh a hre tawh che, tun hnai mai aṭang khan thil a hrethiam ve ṭan a, tunah chuan a rilru a buai rih viau ang, eng emaw amaha tih tum pawh a nei maithei; mahse, kan chungchang hi chu engmah a sawi lo ang, kan thil tum hi a tana pawi engmah a awm lo a," ka ti luam a; mahse, ka thilsawi tawp lam erawh chuan ngaihtuahna a ti buai deuh. Lawmsanga vang khan a rilru a hel deuh tlat mai a, Lawmsanga ka hnar thei lo hi a buaithlakna laitak a ni bawk. A mipa zawkin a hmangaih chuang lo a, thil ṭha lo lutuk pawh a ni chuang lo ang tiin ka inhrilh ve tak naa duhthlan tur dang awm se chu hetiang hi ka ti duh lo ang, kawng awlsam ka zawn ve a ngai tlat si a ni.
"Min pui thei ang chu.." Zohera'n a tih pawh chuan ka hnial a, "Ani inpuihtir chu a chi loh," ka ti tlang rawt a.
"A rintlak hmel viauin ka hria asin, a pa chungchang a ni ve a?" a tih chuan, "A rintlak a; mahse, a chak lo mah mah a, kan ven a ngai deuh reng zawk, mi mawl hlawmtawp chu a ni bik lo a, a la inhaichawp leh lutuk hi a buaithlak deuh a, a fimkhur thiam lo bawk, a bialpa ka chhuahsak emaw a tih vangin mi a ngei deuh bawk a," ka ti duah a, ka duh aiin ka sawi thui pek a, zawhna ka dawng nghal zat.
"A bialpa ka chhuhsak emaw a ti..a?"
"Farm-a min ṭanpuitu ber hi a bialpa a nia, a mipa zawk hi chuan a ṭhen felna a rei tawh niin a sawi a, Minai hi a move on thei lo alawm maw le.." ka tih leh pawh chuan zawhna nei hmel a la pu cheu.
"Kan inngaizawng lo ania," ka ti khawl a, awih lo hmel a pu miah lo chu a mak zawk angreng.
"Aman a ngaizawng che em ni a?" a tih chuan dar ka kan ak a, "Ka sawi zui peih lo," a tih chuan ka nui sak. "Kal ang," tih leh a bana pawh ka rual a, kal pah chuan ka zilh thla mawlh mawlh a, "Damdawi ti miah suh ang che, rui emaw rilru fim loa awm thei i ni lo ania, police emaw khawtlang hruaitu lam emaw tan rinhlelh kai theiin awm miah suh, kan duh ang diak diaka thil a thleng ta lo anih pawhin tal awh loh kha a pawimawh ber a ni, farm lamah chuan venthawn ngai a tam lo a, i awmna hi chu tu lakah pawh fimkhur a ngai ania, i lemchan dan lah a pawi khawih zawngin a ni bawk si a," tih angreng chu ka hrilh luam a, a phone call chhang zat zat tawh turin ka ti bawk.
"Engtin nge an koh che a?" tia ka zawh chuan a nui ruh ruh a.
"Ka koh ve mai che a ngai dawn a," ka ti leh a, ka lama rawn thlek pah chuan, "JD," a ti heh mai a, "Eng nge a awmzia?" ka tih chuan, "Jude," tiin min chhang a, Sangpuia ui hming a ni.
Ka scooty dahna kan thlen hnuah ka mangṭha a, ka thlen veleh a ka biak tur thu ka hrilh bawk. Ani chu hotel lamah a kal a, kei pawh farm lamah ka let leh nal nal a, a lo tlai deuh tawh bawk nen farm ka thlen chuan khua a lo thim chhulh tawh. Lawmsanga'n gate chhakah min lo nghak a, "Kal vat rawh, i va rei em em ve," a lo ti hlut a, ka chhuk ve sawk sawk.
Hmanhmawh deuh chuan gate lamah ka tlan thla a, kawtah chuan tumah ka hmu lo. In lam ka pan nghal a, kawt zawl ka thlen rualin scooty lo tlan thawm ka hria a, pu Dinpuia pawh a rawn chhuak rang khawp mai. Scooty ka hman duh vangin Lawmsanga ka lakchhuah tir a, khuaa a ṭhianpa Puia damlo kan tur angin a insawi a, ka thang chhung zawng khan gate chhakah min lo nghak a, ka tum aiin ka rei leh ta si a, a lawm lo ngawtin ka ring.
A insawifel thei aniang garage lamah a inkhalhlut a, pindana ka luh hnu rei vak loah a ṭawng thawm leh a pain a lo be ri ka hria a, ka pindan kawngkhar kik thawm ka hre thuai bawk. Ka va hawn laichuan ka thil ken chu a rawn melh vat a, "Hei hi wine dahna chhek in kawtah khan zuk dah la, a tala i chhu chhe bawk dawn nia," tih leh ka thilken chu pek ka rual a, a hriatthiam loh hmel khawp mai.
"Alarm anih kha, kan zawn chhuah theih loh chuan kan inkawhhmuhtir mai a ngai," tiin beidawn tawp atan ka khek a nih thu ka hrilh a, "A fuh loh chuan mi an ringhlel thei ania," a ti zawi sup a, "Keini aia rinhlelh tur an awm ka ring," ti maiin ka chhang a.
"Tunge i va hmuh?" tia a lo lut chuan fim zetin min melh a, "Min puitu," tih bak chu ka sawi thui duh lo.
"Minti hlauthawng ṭhin em mai, puih che chu ka duh lutuka; mahse, i tih dan hi chu ka hrethiam thei lo, buaina i tawh ka hlau ania," a ti bal bal a, khua a thim deuh ruih tawh bawk nen a lo mangang hman viau anih ka ring.
"Hlauthawng suh, tihdan ka hria alawm," tia ka han nuih chu ka banah a rawn vuan chawt. A lamah min pawt hnai zui a, eng emaw sawi leh a tum chu a hmuiah ka lo fawp zauh, "Ka ril aṭam," tih leh kalsawn ka rual a, pindan ka chhuahsan thleng chuan a che chang lo. Rei vak loah a lo chhuak a, chaw ei ka siam chu min rawn pui ve nghal a, ka va melh apianga a lo nui ṭhin chu nuih let loh har tak a ni.
Zohera hnenah ka thlen tawh chu message-in ka hrilh a, "I pi pawh a la awm," tih zawngin min rawn chhang a.
Zanriah kan han kil chu ka bula ṭhu chuan mi a duh sak mah mah a, ka tum aia tam ka ei phah leh ṭhin. Kan chaw eikham kawta kan din dun laichuan, "Min chhang tawh tihna a ni em?" tiin min zawt mauh mai a, "Ka la inngaihtuah dawn, ka rilru a la buai lutuk, kan thilzawn kan hmuh hnuah ka chhang ang che," ka tih chuan, "Min chhan dan tur ka hre lawk thei em?" a ti leh zat a, a uang tih ka hria.
"Aw ka tih i ring em?" nuisanga ka tih laiin, "Ka ring chiah lo, a ruka min hawsan i tumin ka hria," a lo ti reuh a, in chhung lam ka va melh chuan tuman min hmu lo. A kut chu ka va ban ṭhem ṭhem a, "Ka hawn dawn che nia," ka ti chu a nuih a za khawp mai.
"Min ru haw dawn a maw?" ka lo bu nghat a, "Chelh che ka lo tum asin," a ti ve thung a, "Min duat dan a zirin ka cham hreh lo ang," ka tih lai takin a pa a lo chhuak thut. Rang deuhin a kut chu ka thlah a, pa Taia lah chuan min han en phawk khawp a, "Nangni pahnih hi a.." ti bal bal chungin kawmthlang lam kawngah a chhuk a, Lawmsang nen chuan kan inena, kan nui leh ringawt ṭhin.
"Phone ka va hmang lawk ange," tiin ka luhsan a, pindan ka thlen hnuah Zohera ka call nghal a, "A lo haw tawh, a chhuah dawnah khan kan inbe zawk a, 'Han intuai hnum deuh la chu i hmelṭha zual dawn maw le' min tih kha," ei loh hmel fe hian a rawn ti a, hahthlak hlawm hian.
"I balh hmel em alawm Zoa, thlem thluk ngai i neih kha," ka tih chuan a duh loh ve khawp a, "Heti chung pawh hian min it ngawih ngawih chu anih hi, vawikhat lek pawh mitmei hmuh ila chuan ka uipui ang lek a ni ang chu," a rawn ti vei nghat a, "Ka ṭan der ania, hmanhmawh ang che," tia ka tur chu a rawn pawr nasa.
"Ka inpeih hun nghak ve ta che, hetianga i tih hi ka ring reng a, i ṭanpuite lam ngaihchanna chang hre ve ṭhin rawh," a rawn ti hluk hluk. "Hun i nei dawn tho alawm, helamah pawh chanchin ngaihchan leh rih phawt a ngai dawn," ka ti chung pawhin, "Thil tihpui che hi chu a hahthlak, i thu thuin ka awm dawn lo ania, ka pawimawhna i hriat loh chuan ka pui dawn lo che, ka awm chhan ni mahla i thupek ka zawm vek dawn lo," a rawn ti zui leh hram a, a ti dawn tho tih ka hriat vangin ka hnial duh lem lo.
Phone a dah hmak a; mahse, minute 10 hnu velah message a lo thawn a, "Tunkar bak a ngai lo ang," tih tlawng a ni.
Dar 8 dawna Lawmsanga lo lut chuan, "Pi Nguri chu a lo thleng tawh, ka kal dawn ania, i lo kal ve duh em?" a rawn ti a, ka chauh deuh thu ka sawi chuan, "Lo mu mai rawh, ka rei lo ang," a ti ve leh mai a, a pindan tukverh aṭang chuan a chhuak niin ka hria.
A zuk thang rei lem lo, pindan lehlama a thawm ka hriat rual chuan, "Khawiah nge i dah?" ka va ti sar sar a, "A chhungah, thil zawn nei anga a lan theihnan bottle pathum vel chu ka ti keh a, naktukah chuan hlawhfa te nen kan kal dawn a, midang chu nimbu lo turin an kal leh ang," a rawn ti a, lung a awi viau a ni. Ngaihtuahna erawh a luah rauh rauh reng a, naktuka thil awmdan tur hisap chungin ka meng rei khawp mai.
Zingkarah vawk chaw ka pekpui a, chhun lamah a chaw ka chhumpui leh a, tlai lam erawh ka awlthawng viau. Kawtkaiah chuan ṭhuin thlanglam chu ka thlir dauh dauh reng a, Lawmsanga leh hnathawk ho lo haw lai pawh chu ka zuk hmu a, putara te kawtah eng eng emaw sawiin an nui leh dar dar ṭhin. Rei vak loah chuan in chhung lamah an inzuilut a, midang an lo chhuah leh hnuah pawh Lawmsanga chu a la rawn chhuak ve mai lo. Ka nghak rei reuh khawp mai, minute 20 chuang zet a liam hnuah headmaster nupui kha a lo chhuak a, thinrim hmel fahran hian huan lam a pan a, eng emaw a keng bawkin ka hria.
Lawmsanga lo chhuak ka hmuh chuan ka ding ve vat a, kawtzawl a lo thlen chuan lu a rawn thing ringawt. "Eng nge chanchin?" tia ka zawh lah chuan, "A awm lo tih a chiang lutuk, nu Nguri kha an hau hrep ringawt a, a kalh ṭha turin a kalmek, varak lem awmna pawh kha pu Muana ka pe a, a la tawp," a ti a, ka rilru a buai ve map mai, nizana ka thil dah tir naah kha chuan a awm lo tih ka chiang tawh a, chhek in dang zawk kha ka rinhlelh chu a ni; mahse, engati nge an phili miah loh, chu tak chu a ni ka hriatthiam loh chu!?
Zohera ka call-a "Mi inbiakna i hriat rukah khan 'A pain min pe phal lo mahse' an ti tiraw?" tiin ka va zawt nawn leh ngat a, a sawi chiang thei fu mai a, anih chuan nu Nguri an ringhlel lo tihna a nia, chhan dang awm leh thei pawh a la awm...
Zanriah ei tura ka lut zawk tih loh chu kawtah ka ṭhu deuh ngar ngar. Lawmsangpuiate pafa lah chuan min rawn ko leh ṭhin a, "I lung a leng em ni?" an tih loh leh, "I nuamsam lo em ni?" an rawn ti thul, ka ning hle tawh, lungleng tur chuan ka ngaihtuahna a buai mah mah a ni.
Zan lamah pawh boruak chu a reh duk mai, in aṭang chuan rawn chhuak an awm meuh lo a, a lo chhuak chhun te pawh veranda thleng chauh an rawn chhuak hlawm. Dar 2 pelhah ka mu ve hram a, zing khawvar rualin ka tho leh vat a, in chhung tukverh aṭangin ka thlir tawh thung. Lawmsanga lo thoin thingpui min rawn siam a, "I mu tlem a ni maw, i mitmeng a dik lo, i damlo mai tur asin," a rawn ti luam a, ka bulah lo ṭhuin min be leh ṭhin a, ka chhang tawi ṭhin khawp mai.
"Vawk chaw zuk pe ila?" Lawmsanga pain a lo tih chuan, "Ka nuam lo a, Lawma nen kal mai rawh u," ka lo ti hmiah a, an pafa chuan min thlek vang vang a; mahse, Lawmsanga'n ka awmdan a hrethiam miau a, a pa chu a kalpui thuai bawk.
Tukṭhuan pawh ka eichak loh thu sawiin kawt lamah ka ṭhu chhuak leh a, pu Dinpuia te chhungkaw inkhalh chhuak tur ka zuk hmu a. Chutih laichuan hnathawk ho an lo thleng ṭan tawh a, rei vak lo an din khawtlai hnuah huan lam an pan a, ṭhenkhat la awm te chuan pu Muana hoin gate chhaklam an pan a, an nula pahnih lo chhuak leh veranda-a an ṭhu chu ka hmuh chhun a ni leh mai.
Zohera lah chuan chanchin min rawn zawt sek, engmah chhanna ka la nei si lo, "I tih tur lo ti mawp mawp rawh, inah a awm reng ania, ko chhuak la a ṭha ang," ka va ti chu min rawn chhang let tawh lo. Mahse, rei loteah nu Nguri a lo chhuak a, a scooty la chhuakin gate lamah a tlan chho nal nal a, a tlan liam deuh awrh tihah pu Muana a lo chhuk ve leh bawk. An veranda-ah chuan ṭhuin a phone a hmet mial mial a, an nu lo chhuak nen pawh chuan inbe loin an inpel mai a, thil a pangngai viau mai.
Mahse....ka hrethiam tain ka hria. Tuman an wine dahṭhatna chhek in lam an pan lo a, rinhlelh nei awm ang pawhin an awm lo a, anih chuan kan wine zawn chu an in chhungah khuan a awm a ni.
In chhung ka luh chuan Lawmsangpuia nuin kawlbahra a lo chhum hluah a, "Thingpui i in dawn nge chaw i ei dawn?" a lo ti var a, "Ka va inbual phawt ange," ring leng lawnga ka tih hnuah ka pindan lam ka pan a, ka lu chu a hai deuh chhulh a, ka mit a kham urh bawk. Inbual tura ka chhuah leh laichuan gate lampana putara kal chho chu ka hmu leh a, englai pawhin in nghaktu an nei a, a ruka luh chu a har dawn hlein ka hria. Mahse, a zawnna hmun tur a chiang ta erawh chuan thaw a ti veng ve huai a, chutih rualin a lakchhuah dan tur erawh chuan ngaihtuahna a tibuai viau thung.
Tui vawtin ka va inbual sawk sawk a, ka inbual rei loh tehlul nen vawt ka ti ngang mai. Ka inthlak fel hnuah pawh kawrlumte ka ha a, thingpui sa ver vawr leh kawlbahra chhum la lum vat vat chu ka va ei a, ka thil ei lai pawh chuan ka khur bauh bauh reng a, ka khua a sik dawnin ka hria. Dar 2 bawra ka va mu chu tlai thim dawnah ka harh chauh a, ka chenpuite chuan chaw an lo ei mek tawh.
"I mu tui lutuk kan kaitho duh lo che anih kha, lo kil ve nghal rawh," Lawmsanga pain a tih chuan chaw chakna pawh ka nei lo, nachhawkna ka dil a, "I nuamsam lo elo, i hritlang em ni?" Lawmsanga'n a lo ti vat a, ka hritlan awm ka hre lo a, ka chauh tawngkhawng vang anih ka ring.
Damdawi ka ei hnu chuan ka pindan lamah bawk ka kir leh a, ka phone ka han en chuan Zoher missed call leh message a lo awm a, ka call let thuai bawk. "Biak i va har ve, eng nge chanchin?" a rawn ti nghal thawr a, ka zawh tum zawk tak a ni.
"An in chhunga luh a ngaih hmel, an in chhung khawi emaw laiah khuan a awm, a tihdan tur ka ngaihtuah dawn chauh,"
"A buaithlak mai mai, an man chhuak palh ang che, min pe theitu a awm reng alawm," a tih chuan vawiin lam chanchin ka lo zawt ve vat a.
"Eng vak mah a thleng lo, Anthony-a ka koh chhuah tir a, tlai thlengin card kan deng ho a, ka nula ṭhutpui nen an inhnial zing hle ringawt, a rawn thinrim haw lenghalin ka hria.." a rawn ti zung zung a, hetiang chuan hun kan khawhral dawn tlat.
"Farm awmna i hria em?" ka tih chuan a hriat thuin min chhang a, a kawng awmdan te ka lo hrilh ve luam a, "Ka rawn chhuak anga, kawngah kan intawk dawn nia, tunah lo kal nghal mai rawh," ka ti leh sawk sawk a, ka insiam zui mai bawk.
Ka hritlang dawn tak tak nge mawni ka awmnuam lo a reh thei lo, ka nachhawkna eikhan mi chu a chhawk ngei mai a, ka lu erawh a la rit luk reng. Pheikhawk hrui suih tuma ka han kun chu ka hnar a rawn thi ta mai a, rang deuhin ka lukham hnuaia rawmawl chu ka ban a, "E khai aw.." rawn ti thawmah chuan ka lehhawi rang khawp mai.
"I hnar a thi elo?" tih leh rawn luh a rual a.
"Ka hritlang deuh aniang," tih pahin ka lo inhru mawlh mawlh, a thi tam lem lo a, Lawmsanga erawh a mangan hmel viau thung.
Ka pang rawn deh pah chuan, "Eng nge tih i tum, kal chhuah i tum em ni?" tiin min zawt a. "Khuaah kal lawk ka ngai, min lam turin ka ṭhianpa a lo kal mek a, ka rei deuh maithei," ka ti chu a ngaihdan a nih loh hmel khawp mai.
"I dam loh hi, naktukah kal mai rawh, eng thil pawimawh nge awm a?" a ti sawk sawk a, "Ka lo let hunah ka hrilh ang che," ka tih chuan min melh rum deuh. "Minai va hmuh lawk ka ngai a," ka ti leh ta nge nge a, rin ang ngeiin "Ka lo kal ve ang," a ti ta chiah a, ka duh lo tawp mai.
"Kan pahniha min hmuh chuan a fuh lo zawk ang,"
"A fuh lohna tur a awm lo, a hrethiam vek alawm, nangmaha kal chu a ṭha lo,"
"Engtin nge maw min kalpui ang le, midang hriat loha thil ti kan nih hi, ka ṭhianpa chuan min lo lam anga, min rawn thlah leh mai ang," tiin ka tho zui a, chhuah nghal mai ka tum chu ka banah a rawn vuan a, "Eng atan nge Minai chu?" a ti leh rih a.
"Wine chu an in chhungah khuan a awm, Jeminai pawn a hre tawh.." ka ti chu a meng buai nak.
"A hria amaw, engati nge engmah a sawi loh a?"
"Nangmah vang maw le, i lakah a lawm lo alawm,"
"A ni lo ang, ka biak pawhin chutiang lam engmah a sawi lo.."
"Anih chuan min pui duh turah ngai ang," ka ti ram hmak a, "Phone-in kan be thei tho asin, va kal kher a ngai em ni?" a tih leh pawh chuan ka melh no vak tawh lo, "I thusawi awih duam duam ṭhin kha la ni sela chuan engmah a zep lo ang tih ring tawp rawh, ni lo sela chuan keipawn thlem turin ka ti ang che," ka ti hmiah a, tunah chuan thil dang hmanga kan thlem a ngai a, a rin theih tura kan awm a ngai bawk.
"I awmdan hi a mak ka ti, Minai rilru nat chhan i hria a; mahse, min dem deuh tlatin ka hria...?" Min en deuh vang vang a, "Dem teh nang.." ka'n ti ngawt a; mahse, khatiang thil kha ti lo sela chuan a awlsam zawk ngei ang.
"Min duh miah lo ti raw?" a rawn ti leh a, "Chutiang sawi hun pawh a nih loh hi, ka la inngaihtuah dawn chauh," ka tihsan mai thung a, ka kut laksawn ka han tum chu a lo chelh nghet khawp mai. Chutah, a rawn kun hniam a, "Min bum i tum ange?" a ti ta mai a, rei lote chhung chu ka ngaihtuahna a buai map a ni.
"Min lo mutsan suh aw," tih paha a bianga han fawh ka tum chu ka hmuiah a rawn fawp chawt a, ka tim leh angreng khawp mai. Ka biang tawn tawnah a rawn dawm a, duhthawh angreng deuh hian min fawp a, ka dawh mawl tawp a ni ber.
A duhtawk hnu chuan, "Tunge i ṭhianpa chu?" tiin min zawt leh a, "JD-a a nia, khuaa ka hmelhriat," ti maiin ka chhang a, "Ni dangah chuan Puia kan ko tawh dawn nia," lawm lo awka zeta a ti chu ka chhang zui lo. Pawn lamah kan inzui chhuak a, sana ka en chuan darkar chanve aliam tawh a, a lo thleng ṭepin ka ring.
"Min lo zui suh," ka tih vangin kawt thleng chauh min thlah a; mahse, gate ka pelh dawn thlengin an kawtah chuan a la ding a, min la rawn thlir reng. Ban ka han vai a, rang deuhin min lo vai let a, lut tura ka zaizir chu a hrethiam lo aniang a la che sawn lo a, ka hmanhmawh tawh avangin ka kalsan ta bawk.
Thla a en deuh avangin kawng kal a har lo a, thinghmun pawh ka thleng har lem lo. A him chin a ni tawh thoa tiin Zohera chu nghah mai ka rilruk a, engmah a rawn sawi loh danah a rawn chhuak nghal ni turah ka ngai bawk. Minute 20 dawn chu ka nghakin ka hria, bike lo tlan thawm ka hria a, kawnglaiah tak chuan dingin ka lo thlir a, a head light in min rawn chhun vu mai.
"Kan lut ru dawn a maw?" lo chhuk paha a rawn ti chu a darah ka lo beng thawk.
"Dawn lo, mi hmuh tur kan nei a, tlan let leh nghal mai rawh,"
"Eng a, inah a awm i ti sia, kan la dawn lo em ni?"
"Kan ru anih chuan kan inpuang tihna a ni mai, a mawhphurtu tur midang kan neih a ngai,"
"Tu nge chu chu?"
"Headmaster fanu kha,"
"Nghak deuh ila chuan a nupui zawk pawn min pe thei asin,"
"Ani kut aṭanga i neih chuan i tan a hlauhawm lutuk ang, beiseitu dang an awm ve kha," a bike-ah a lawn zui a, a inher rem leh te te hnuah keipawh ka ṭhu kai ve nghal a.
"Engati nge i rilru i thlak leh a?" a rawn ti leh hlawl.
"Thil rinhlelh dang ka nei a," ka tih chuan min rawn thlek hu a, "Nakinah ka la hrilhfiah vek ang che, tunah chuan ka la chiang thei lo," ka ti a, ka chiang lo tak tak reng bawk.
A tlan chhuah hnu chuan kan inbe lo vang vang a, ka inngaihtuah buai a ni ber. "Lalduhawm," a rawn tih chuan ka lo phu zawk lehnghal.
"Tuna i ngaihtuah lai kha ka hre ve duh?"
"Min ngei phah lo ang tih sawi hmasa la,"
"Sawi mai teh," a ti pawr hlur a, "I thinrim lo ang maw?" Ka ti leh chu "I hre lo," a ti leh hmuk a, nakinah a la hre dawn tho a, zep buai a ngai loin ka hria.
"Farm-a min hruailuttupate inah hian ka cheng mek a, headmaster fanu bialpa kha,"
"Ngaizawngtu che kha maw?"
"Umm, Sangpuia min hriatchhuahtir ṭhin a, min pui nasa bawk si a, inthiam lohna ka nei deuh alawm maw le.."
"I duh anih chu.."
"Ka duh pawhin ka hre lo, ka hmang ṭangkai zawk a..."
"I rilru a nawm loh phah anih chuan i duh tihna anih chu, inthlemthluk tir lo la a ṭha viau ang," tawi tein ka nui a, nuih erawh a za lo viau a ni. Lawmsangpuia rilru put hmang hian min tibuai leh tlat ṭhin, min ngaizawng ang tih rin ngaihna ka lo hre lo a, ka fimkhur tawk loh vangah ka ngai hmiah bawk. Chutih rualin ka tan chuan remchang tak a ni lawi a, min pui satliah mai ni loin ka duhdan angin ka ti kawi thei tawh a; mahse, a rilru tih nat ka hlau leh tlat lawi a, venthawn tur ka neih belh ti ila a dik ber ang chu.
"I khawhar vang mai mai anih dawn kha," Zohera'n a ti chu ka ring thlap, Sangpuia nen inanna neia ka hre tlat pawh hi Sangpuia ka ngaih em vang anih ka ring. Thil dangin ka rilru a la peng a, ka ngaihtuahna a chawl meuh lo chung pawhin khawhar rukna ka nei reng ṭhin, ka kianga awm hnai ber lakah ka rilru ka lo tinem deuh pawh a ni mahna.
"Zoa, midang hmangaih i nei leh theiin i ring em?" ka tih chuan, "Theih ka tum," a ti hmiah mai a, a awm tho mai, inthiam lohna nei miah loin ani chuan midang a nei leh thei ngei ang, ani nena kan dinhmun chu a inang lo lutuk tlat a ni.
"Min zawh chhan ka hria ania, nula chu ka kawp kual nasa lutuk; mahse, kan Veronicai hian ka hmeichhe ngainatna a ti reh vek tawh, engtin nge rin pawh ka rin ngam tawh ang, a tam zawk hi chu zu leh pawisaa thlem theih vek an nia.." a ti hlak hlak a, Veroi chanchin chhe lam sawi kai a ngai leh ṭhin nen ka sawi zawm duh lem lo a, ani pawn a sawi thui bik lo.
Khua kan va thlen chuan Jeminai dawr nghahna lam kan pan nghal a, dar 9 a la ri lo bawk a a la inkhar bikin ka ring lo. Zohera lah chuan, "Midang inpuih tir loh hi ṭha zawk asin," a ti leh ṭhin a, keimahnia kan tih ve theih mai a ring a ni.
Dawr kawt kan va thlen chuan an lo inkhar dawn chiah a, an hnathawk nge mawni hmeichhe pakhat nen an lo awm a, Zohera nena kan va lut chu min lo en phawk khawp mai. "Rei lote ka lo be lawk dawn che," ka va ti chu hriatthiam har zet hian min en a, Zohera chu melhin ka lam a rawn hawi leh te te bawk. Chutah, min chhang ṭha ve mai tura ka ngaih tawh laiin, "Kalna tur kan nei a, tunah chuan kan hman rih lo," a ti ta reuh a, ka beisei aiin a khirh dawn a ang.
"Khawiah nge in kal dawn?" ka tih chuan a ṭhiannu zawkin min lo chhang a, "Street food kan va ei dawn a," a tih laia Jeminai'n a lo mitmei chu ka hmu a, "Kan lo kal ve ang," ka ti pawh chu min rawn melh tur viau a ni.
"Anih chuan kal vat ang u, field-ah carnival kan chhim pah dawn nia," tia a ṭhiannu kal mai tum chu a ko ding leh rih a, ka lam rawn hawi chuan, "Eng nge i duh a, hetah sawi mai rawh," a tih leh lawi a, "Kal pahin kan sawi dawn nia," ka ti chu a duh loh hmel khawp mai.
Kawngka bula Zohera ding chu a va en leh a, "Tu nge sawpa saw?" a tih laia ka rilru puthmang chu sawichhuah chi a ni lo tawp ang.
"Ka ṭhianpa a nia, min pui turin a lo kal a, nangpawh a puih che kha," ka ti nghal zung zung.
"Thil min rawn dil tum in va ang ve?" tiin min melh kha kha a, "Tum deuh tho," tia ka lo nui chu min nuih let eih lo, chutih laia Zohera'n, "I hriat duh zawng tak aniang," a lo ti zauh chu a va thlek leh vat a, "Ka nu kha a lo kal leh em?" tiin a zawt ve nghal a.
"Kal e, i duh chuan ka lo enthlak sak dawn che nia," Zohera'n a tih chuan a ner nang. ka lam a rawn hawi a, "I duh chu sawi phawt teh?" a ti leh nghat a.
"Wine awmna kha i hria ti raw?"
"Hre lo," min chhang rang khawp mai.
"An in chhungah khan a awm," ka tih laia a mitmeng chu ka lo chik khawp a, ka hre sual lo tih a chiang reng. "Engtin nge i hriat?" a tih laia a awki ah pawh chuan ka sawi dik tih ka chiang viau a ni.
"Ka hriat dan chu a pawimawh lo, min rukpui thei angem?" ka ti tlang rawt a, "Teuh lo mai, khuaah ka awm daih hi, thil ruk te chu ka duh lo hrim hrim," a lo ti hmarh hmarh a, min melh rum hle bawk.
"Zan khat lek rawn haw la, i tukverh min hawnsak la a ni mai,"
"Awi awi, i ngai awlsam reuh ka ti, tlala lianpuiin an kalh a, a bang pawh a chhah lutuk, i lut thei chuang lo ang," a ti zui leh zat a, "Inhnuaiah a awm a ni maw?" ka lo ti chu phawk fein min en.
"Aw....i hre tak tak lo a ni maw, awii..nangnu hi...min bum i rawn tum!?" a ti leh rih a, chutih laichuan a ṭhiannu kha a lo inrawlh a, "Kan hmanhmawh loh chuan ka tlai.." tih chiah a sawi hman, Zohera'n pawn lamah a nam chhuak dawr dawr a, kawngka dalin a ding hmiah bawk.
"Chahbi a awm ang, kan la thei anih chuan a ṭangkai dawn teh mai ania, tunah hian midang pawhin neih an tum ve mek a, an neih hmaa kan neih khalh loh chuan i pa leh ka ṭhiannu thihdan kan hre thei lo maithei," hriatthiam loh hmel zet hian min en a, "I pa pawn a hre ve vek ania, an thiltih ruk a hriat vanga that pawh an ni maithei," a zui leh nghat a, thawk a la hluai tawh.
"Hriat hmasak duh ka nei ve.." a tih chuan ka lo bu zauh a; mahse, kei min en loin Zoherliana lam a hawi thung.
"Ka nu kha a hmain a uire tawh em?" a tih chuan Zoa chu ka melh ve vat a, a chhang thiam lo ang tih ka hlau ru khawp mai.
Mahse, inngaihtuah buai hmel pu eih lo hian Jeminai chu a en a, "Hotel neitunu nen khan an inkawmna a rei tawh, i nu kha drugs addict a ni tih min hrilh a, a nulat lai aṭang daih tawhin. Anthony-an i pa damlai aṭanga an inkawp tawh thu a sawi bawk," tiin a lo chhang a, Jeminai chu a men deuh pur a, a rilru a na hle aniang a inher vut a, dawhkan tlang a vuan ngar ngar bawk. Zohera chu ka va melh a, a tih ngaihna a hre bik lo aniang dar a lo kan ak a, han hnem dan pawh ka thiam bik lo.
"Nu Nguri vang vek a niang, ka pa kawr pawh kha zirtirtunu inah a va dah tir a ni ngei ngei ang..." insut hlawp hlawp chunga a tih chuan ka va thlek rang khawp mai.
"Eng nge i sawi kha..?" ka tih chuan a rawn inher a, a mit a sen rum.
"Veroi inah i nu a kal em ni?"
"Aih, ka hre lo, police ho khan ka pa kawr an lo keng a, zirtirtunu ina an hmuh niin an sawi a, an inngaizawng niin an ring bawk a. Mahse, ka pa khan a kawr kha a hnutchhiah lo, Aizawla a kal hma lawk khan a la ha a, chutih laichuan zirtirtunu kha chu Aizawlah a awm daih tawh, a thawhpuinu ka zawt a, chhiat an tawh vangin a haw hma tih min lo hrilh a, ka pa khan a kawr kha Aizawlah keng ni sela chuan police ho khan zirtirtinu inah kan an hmu dawn lo a, kan in aṭangin midangin an va dah chawp zawk aniang, nu Nguri a nih ka ring," a ti tham ṭuak a, anih chuan Anthony-a umzui a ngai dawn lo anih hmel viau mai. Mahse, a la chiang thei tak tak lo, rilru tibuai tawk lek a la ni rih.
"Enteh maw, tunah chuan tu ber nge hriat a la har lutuk, an vai hian an inthurual a ang bawk si a, kan ṭhen darh vek loh chuan kan hre thei mai lo ang, an chhungkua hi inngeih lo leh inthurual thei miah loa kan awmtir phawt an ngai, chuvang chuan i puihna kan mamawh tak tak ania," ka ti a, ka ngenngawl lutukin ka hria; mahse, ka mamawh em a tin a ni.
"Hriat chu keipawn ka duh alawm; mahse, in thil tum dan hi chu a hlauhawm lutuk, ka ngam lo, kei chu ka hlau teh mai ania aw..." a ti vang vang a, ka ti chiai ve deuh bawk a ni.
"In rei e...kan tlai ange.." pawn lam aṭanga a rawn tih chuan "Kal phawt ang u, kal pahin tihdan tur kan sawi ho dawn nia," nelawm thei ang berin ka ti a, min hnial tawh bik lo. A ṭhiannu nena dawr an khar laichuan Zohera chu hla deuh hlekah ka kalpui a, "A duh i ring em?" a tih chuan ngaihdan ka la nei thiam lo.
"Zobawih, kei chu min ngaina lo a, min ring lo bawk; mahse, nang chu a ring thei ang che, a ngaina bawk che," ka ti zawi sep a, an dinna lam chu ka en vang vang bawk.
"A ti lehta ringawt..." bul zeta a tih chuan, "Tumah rin chhan tur a nei lo a, inhnemna a duh viau ang, a rin theih nena inthurual chu a duh mai ka ring," ka ti leh a, min rawn thlek naa ka en lem lo.
"A chang leh a nu i tia, tunah saw saw..."
"Ngaizawng der rawh ka ti hleinem che, min pui turin a rilru hneh tum rawh..." min chhang loin a ngawi ta reng a, "Zaninah aw.." ka tih pawh chuan hma lam hawiin a la ngawi ngul a, a tihdan tur a ngaihtuah anih ka ring. "Kan kal dawn ania," an rawn tih chuan nuisang chungin ka pan phei a, muangchang fahrana Zohera lo kal chu ka va tur bawk.
Kan hmaa kal te pahnih chu an inbe ru sar sar a, va um phak ka tum chu Zohera'n min lo pawt let sawk a, "Engtin maw ka tih dawn a?" lawm lo awka zeta tiin ka banah a chelh bet ṭung mai.
"A nu chungchang i hriatpui a, a ngaihven zawng sihhmuh dan pawh i thiam kha.." ka tih chuan, "Vawikhat chiah kan la inhmu aw, ka nelawm vak miah lo ania.." a ti a, ka han thlek hu...
"Eng nge khatia mi en vak a?" Lungawi lo fea a tih chuan, "Hmeichhe laka i confi lo hmel ka la hmu lo a," ka ti mai a, a nui hul hak mai.
"A khawngaihthlak hmel em mai, kan sawm dawn anih chuan sawm tak tak a ṭha ang," a ti leh reuh a, "A tuartu ve tho ania lawm, tualthattu a ni hleinem," ka tih chuan a lo bu nghat nghat.
"Kei leh Lawmsanga chu min thurualpui duh ka ring lo a, a buaithlak deuh anih pawhin i dawhthei hram hram dawn nia, a no deuh a, a rilru pawh a chhe lo, a tluang mah mah maithei; mahse, ka sawi ang kha a ni mai, tumah han rin ngam tur tak tak a nei lo a, a maltlat angreng a, a khua a har viau bawk ang.." ka ti leh luam a.
"Engtia khawhar maw, hriat nuam lo deuh deuh kan hrilh a la ngai dawn asin," a tih chuan, "In dinhmun a inang thuak, Veroi bialpa i ni tih a la hre lo a; mahse, nang aia hrethiam tur an awm lo," ka ti leh a, a hrethiam thawkhat aniang zawhna min zawt tawh lo.
Kan va umphak rual chuan, "I ṭhianpa hi Zoherliana maw?" Jeminai'n a lo ti var a, Zohera chu ka va melh ralh a, Jeminai'n a va en rual chuan, "Aih.." a lo ti bul hmuk a, chu pa reuh chu...
"JD tiin kan ko ṭhin.." ka tih leh takah chuan, "Thil zawh duh che ka la nei ania," tiin Minai chuan a va nuih var var a, chutiangah te chuan Zohera chuan nuih ve awm tak a ni a, a nachang a hre leh pek lo a ni.
"Zawt hmiah hmiah rawh, tirh duhna i neih pawn i tir zel dawn nia, hotel-ah kha chuan va kal ve tawh lo la, nang chu a him chinah i awm a ngai a, a bak chu kan lo ti vek mai ang," zawitein a beng bulah ka va ti a, min ring vak lo nge ni a ner deuhin ka hria.
"Thil chu la thei ta ila engtin nge in tih ang?" ka beng bula a rawn tih chuan, "I nu ruk angin kan lantir ang," ka lo ti sam et a, phawk fein min en.
"A sawi lawk vak theih loh a, an mahni lam awmdan a zira chet hi a fuh ber, misual chu an hnunga um tur.." ka nui chu tawitei min nuih let a, a rilru erawh hriat a la har hle.
Streetfood zawrhna kan va thleng a, Zohera pawisa ka dil chu anni ṭhian dun chuan min lo en kar a, "Min treat dawn, in duh duh ei rawh u," ka lo ti sawk sawk a, a ṭhiannu zawk chu a phur ngang mai. Arsa an lei a, Zohera pawh chu a bawp lian ṭha deuh an lo lam kep a, ka bawngsa ei tur ka va hem tir laia Jeminai leh Zohera inbia chu ka va thlek leh ṭhin.
Eitur kan lak zawh hnuah a thlang maia field lam lan pan a, Zohera chu eng nge an sawi ka va zawt ru sar sar a, a nuih danah ka chungchang an sawi tih ka chiang.
"A ngaina lo che," a ti tawl.
"Engtin nge min sawi?"
"Pawisa kha ka rul ṭhen ang che a tia,"
"Min sawidan chu maw le?"
"I inkawmna a rei tawh em, a rintlak ang maw a tia, zep ruk i neih a hlau, chuan i phakar hmel a ti deuh chein ka hria.." ka ner nang a, "I fel thut hi chuan i phakar hmel ṭhin alawm," a ti deuh kher a.
"A sawi duh zawng chu ka hre tawh," tiin min nuih ruh ruh mai.
"Min rel miah lo ang che," ka ti hlak a, "Nuam a ti tlat sia.." tih pahin min kalpel zui a, a rawn hawi leh pawh chu a la rawn nui cheu, Sangpuia leh Veroi tih loha min hrechiang bertu a ni bawk a, min relna tur chu a hre khawp ang...
Kan zuk thlen chuan mi haw lam nen kan intawk a, kan va lut tur chu duty ten an khar tawh thu an lo sawi a, "Naktuk zanah in lo kal leh dawn nia," an lo ti mai si a, sana ka en chuan a lo tlai viau tawh, ka haw leh a hun tawhin ka hria.
Engtik thleng nge an tih dawn Jeminai'n a zawh chuan, "Tunkar chhung," a lo ti a, "Zan dangah JDa hoin in kal leh dawn nia," ka lo ti ve chu min chhang hlawm lo. Zohera chu ka sik zauh a, "Naktuk zanah ka lo sawm ang che u," a ti thum ve dut a, nula pahnih chu an inena, engmah an sawi lo thung.
Kan let leh lamah chuan Jeminai chu ka va kal hnaih a, "Engtikah nge i lo haw theih ang?" ka ti dek dek chu, "Min lo ring ringawt suh, engmah ka la hre lo, ka inngaihtuah ve phawt dawn," a lo la ti pawr khawp a, zanin chuan kan inhmin hman dawn lo a ang khawp mai.
"Min lo hrilh hma rawh aw, kan lo ngaichang reng dawn che nia," ka ti leh hram a. A ṭhiannu pawh kan va thlahpui a, dawr lam pana kan let leh chuan a inngaihtuah buai mek aniang a ngawi rauh rauh reng. An dawr kan thlen hma deuh chuan Zohera chu a rawn kal hnaih a, "Farm-ah chuan i kal ve tawh em?" tiin a zawt a, Zoa chuan lu a thing ringawt.
"Jenusi bialpa i la hmu lo a ni maw?" a ti leh zat a, ka lo melh deuh haw...
"Bialpa a nei lo.." Zoa'n a tih laiin, "I va hre lo tak, kei aiin thil i hre tlem anih chu," tiin a han nuihzat ve ngei a, Zoa lo hawi chu ka mitmeiin ka lo hrilhfiah a, a hrethiam ve mai aniang, "Chu pa chu a hmelṭha em?" tiin a'n zawt ṭha ve leh a, pakhat lah chuan, "I hmuh hunah i hre mai ang," ti ngatin a lo chhang a, "Hmuh a va chakawm tawh ve," tia Zohera lo nui chu tawi tein ka nuih let a, Jeminai erawh a ner nang thung.
"I phone number ka lo la ang?" Zoa'n a tih leh chuan a pe ve mai a, "Dawra lo kal a rem ang ti raw?" Zoa'n a tih chuan a lo duh vak lo. "Pu Muana fate inah ka awm a, Jenusi ṭhian i nih chuan nakinah an man chhuak palh ang che, a ṭul chuan keimah ka rawn chhuak mai ang, i awmna pawh ka tho alawm," a ti a. "Hotel-ah lo kal suh, kan inzui an hmuh chuan kan pahnihin min ringhlel ang," pakhatin a lo ti ve bawk a, kan insawi rem ta anih ka ring.
Ka bulah erawh, "Ka theih dawn chuan ka rawn hrilh ang che," a la ti ve fan a, nuisang chunga lo aw bak chu tih theih ka nei ve rih lo.
Kan thlahfel hnuah keini pawh kan inphur chhuak ve leh nghal a, haw lam chu sawi tur kan ngah dun khawp mai. "A bialpa i chhuhsak vangin a ngei che anih kha," a ti hmiah mai a, keiin ka chhuhsak loh thu sawiin ka ṭang ve tlat.
"A mipa zawk hi a kir laklawh a ni, ka thlen ve hma daihin an lo inṭhen tawh, ka bulah chuan 'Ka hmangaih lo niin ka hria, ka tihlim lo a, keipawh ka hlim lo' a tia; mahse, a rilru nat a hlauin a vengthawng em em thung a, an inkar hi a thianghlim angreng," ka ti ve luam a.
"Ka hmangaih ang chiah chein a hmangaih ve anih dawn chu," a tih chuan, "A ni lo ang, anni chu an inngaizawng tlat," ka lo ti vat a.
"Anih chuan duh leh loh chhan ṭha deuh a nei aniang," a tih chuan ka rin dan chiah a ni, a rilru thlaktir hlawktu eng emaw a awm anih ka ring.
"Khanu hnar nan khan a lo ngaizawng lek che a ni lo maw?" a ti erawh ka ring chiah lo, Lawmsanga awmdan leh min en dan ṭhin te kha a tak a ni tih ka hria, ni lo sela chuan ka rilru a tibuai dawn lo tih ka chiang a ni.
"Min duh tak takin keichuan ka hria.."
"Anih nangin.." a lo ti vat a, "Ngaihzawng neih hi ka rilruah a awm lo, kan dinhmun pawhin a zir lo, bakah....Sangpuia lakah ka inthiam thei lo.." ka ti sap sap a. "Hmahmawh suh, a hun a la thleng mai ang," a ti chu ka pawm khawp mai. Hmangaihna te hi chu hetiang hi a nia lawm, ka duh hunah kher ni loin, kan mamawh lo emaw, kan inpeih lo emaw kan tih hunahte a lo thleng ṭhin, tu nge lo kal tur kan hre lo a, engtiangin nge a lo kaldawn pawh kan hre hek lo. Mahse, ka hriat loh laiin ka thinlung hian a lo pawm a, kan hriat ve meuh chuan thinlung ruak chu chhun khah a lo ni tawh ṭhin, mahni kan innawr emaw, lo inkhapbet eng ang mahila thinlung lam hian a duh chu a chiang em em ṭhin a ni, chutiang hun ṭha chu ka tawng leh thei ngem le?
"A vawt i ti em?" a rawn tih rual chuan a kawngah ka va kuah hlun a, a hnungah ka bei hle hle bawk.
"I ṭap ringawt elo?" tiin min rawn thlek deuh a, "Ṭahna hun pawh ka nei ngai lo," tih pahin a hnungah hmai ka phum sawk sawk.
Kan tlan chhung zawng chu kan inbe leh ta lo a, mi han hnem a, mi han fuih thiam chi a ni lo bawk nen ngawih chu Zoherliana tihdan a ni. A hmaa ka lo nghahnaah tho khan ka din tir a, ka mangṭha hnua kal mai ka tum chu "Kein ka lo thlah ang che," a ti a, ka hnial lem lo.
Gate bul thlengin min kalpui a, farm chu zan thla eng hnuaiah chuan a lang hnim reih a, Zoa pawn a thlir ve vang vang mai. "A hrehawm em?" tiin min zawt leh hlawl a, "Harsatna ka nei tih lohah chuan a hrehawm lo," ti maiin ka chhang a.
"I duhtawk veleh kan haw dawn nia, keichuan ka duhtawk tawh ka tih kha," a ti zawi sup a, "Kan haw vat dawn nia," tih zawngin ka chhang thung.
"I fimkhur loh vanga buaina i tawk anih chuan ka tih tur i hria ang chu ti raw?" a tih chuan awmzia a han nei thui khawp a, ka thil hlauh ber pawl anih ka ring.
"Engmah chutiang a thleng lo ang, i rilru i tihah suh," tih pahin a darah ka va kuah a, ani pawn min lo kuah let thuai a, rei awm loin ka kalsan ta bawk.
Tlangzawl ka thlen chuan van lam ka thlir vang vang a, ka mittui rawn luang chu ka tuai hul a, 'Min ngaidam rawh, nang chu van sanga arsi te kiangah i awm a, kei erawh zahngaihna nei lo leiah,' tiin ka phun chhuak sep a, kawngka inhawng thawm ka hriat rualin ka inher thuai bawk.
"Hey, i lo thlenna a rei tawh em?" rawn ti tu chu ka en vang vang a, a nui hmel chu a tak ngei a ni, a lem chu ni se ka rilru a tibuai hauh lo ang, ka chiang a ni.
End of chapter - 13
Comments
Post a Comment