WHY DID YOU GO? (CH - 15) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 15

Ka piancham apianga ruah a sur ziah hi chu ka ning ṭhin ngawt mai. Khawṭha hnuaiah pawh tih theih a tlem tehlul nen khawchhiat vangin ka chenpuite chuan hna an thawk thei lo a, Lawmsangpuia lah a pindanah a tawm tlat mai a, nikhat hlu tak kan khawhral leh ringawt dawnin ka hria.

Tukverh aṭanga ka zuk hawithlak chuan putara tuidawn siamṭha lai chu ka zuk hmu a, an veranda banah lawn kangin thei leh thei lo hian a ban a, a tifuh thei mai lo. Ka en reng laichuan a fapa a lo chhuak a, pui lem lo chuan putara che vel chu a lo thlir a, putara chuan eng emaw la turin a tir aniang in chhung lamah a let vat a. Mahse, a kal liam awrh tihah putara chu a inrap pial palh a, an veranda step-ah tak chuan a thal thla tawp mai a, kei pawh chu ka ṭhukang ve uaih a, a na viau aniang chu a kawng a dawm vang vang.

A nupui leh a fapa kha lo tlan chhuakin an rawn kaitho a, in chhung lamah bai suih suih chungin an inkuah lut a, rei vak loah naupang ho lo chhuakin pu Dinpuiate nupain an rawn zui chhuak bawk. Nihliap an khum far a, motor an la chhuak lai leh an tlan liam thleng chuan ka thlir a, ka ngaihtuahna chu puzzle remkim tur awm lo ang mai a ni, a pawimawh laitak a kim lo tih ka hria a, chu erawh wine awmna zawn hmuh aipawhin a harsa zawk awm e.

Choka aṭanga Lawmsanga nu lo phei ka hmuh chuan ka tho ve vat a, "Meilum ka va ai teh ang," tih pahin ka kalpel zui a, thukah chuan tuilumna ketli dum lianpui hi a lo inchhuang a, a meituah rem tawh lam chu ka va chhawm ṭha leh a. Chutia meialh en a ka ṭhut ngawt ngawt laichuan ngaihtuahna muhil a rawn harh zawk a ni ber.

Thuk sira bottle leh eng eng emaw inhung ho chu ka en kual a, khawnvar tui emaw thinner emaw, tui alh thei lam chu engmah hmuh tur a awm lo. Sarang chhia leh silipar zai sawm hi percel lian vak lo chhungah hian a lo awm ṭun a, chung chauh chu meichhem nana kan neih a nih hmel e. 

Vawk chaw chhumna inah khan khawnvartui bottle chanve vel chu a awm a; mahse, han ngaihtuah chian chuan a atthlak hlein ka hre bawk si. 'Inngaihtuah fim rawh, hei lo kawng dang hi i hre tur a ni' tiin mahni chu ka han inhrilh leh ṭhin. 'Finnaa malsawm i nih ngai chuan i ngaihtuahnate pawhin thil ṭha lam a hawi ngei ang, i thlarau hi a lo bawlhhlawh tak tak anih dawn hi, i pawisawi lo chunga hetiang tih hi a let tuar i hlau lawm ni?' tih angreng chu rilruah a rawn lut zut zut bawk a; mahse, mihring thinurna cho chhuak tur chuan thil ṭha lo tak tih a ngai ṭhin tih erawh ka chiang hle thung a, hei hi kawng awlsam leh nghah rei ngai lo ber tur chu a ni.

Mihring ve mai ka nihna a lo lang niin ka hria, ka ngaihtuahna a insual a, rilru a buai nuai nuai a, ka duhna leh ka hrehna a inzat reng awm e. Lung tizing zual turin ruah lah chu a tla cherh cherh reng a, signal a ṭhat loh vangin Zohera pawh ka la be thei lo a, min biak a tum em tih takngial pawh ka hre thei lo.

"Sikri chhem i duh em, meihawl kan la neih kha, ka chhem sak dawn che em ni?" pa Taia'n a rawn tih chuan, "A..ka va mu lum zawk ange," tih leh thawh ka rual a, ka pindan lam ka pan zui bawk. Pindana ka luhfel hnu lawkah chuan khuh kharh kharh thawm ka hria a, vawkpul hri rawn leng thut sela ka ti, anih loh pawhin ka bang piaha mu saw engtin emaw tak a awm a ṭul ngei ang.

"Jenus..," a rawn tih chuan ka lo chhawn ve vat a, "Minai chuan chanchin a rawn sawi tawh em?" a rawn ti thum dut a. "Sawi rih lo, signal a chiang lo a, ka call tlang thei tlat lo," ka tih chuan, "Current a awm lo a, a awm hma chu signal a ṭha lo ang," ti maiin min chhang a, wine chu thil pawimawh hmasa ber pawh a ni tawh lo, ka rilru kaptu hi a hrilhfiahna ka mamawh hmasa zawk a ni. 

 "Aizawlah khan Veroi nen inhmuh intum a tiraw?" ka tih chuan, "Aw, a hma pawhin ka hrilh tawh che kha, kan thil tih ṭhin kha tawpsan a duh a, police hnena report pawh a duh a, a thu hretu tur ka nia; chuvang ania Aizawlah khan kan cham; mahse, engmah kan sawifel hmain an boral ta sia, Minai pa nen khan an lo sawidun hman em ka hre lo, ani khan engkim a hre ve a, min thlawp viau bawk a," a tih chuan rilru a buai leh deuh.

"Inhmuh in tum zanah tak an boral a, nang chiah i him a," ringhlel ru fe chuan ka ti a, ani thung chuan, "Va thleng hman ila chuan ka thi ve maithei, ka va thlen khan an lo awm tawh lo a," a lo ti leh zat a, hei chu a hmain min hrilh tawh, amah vangah a ngai a, a inthiam lo a, min puih chhan pawh hi a ni.

"Nangpawh hi an hre ngei ang che, i him reng bikin ka ring lo," zawi deuh taka ka tih chuan min chhang loin a reh vang vang a, "In pathum zingah khan phatsantu an awm anih ka ring," ka tih leh pawh chuan a la ngawi reng.

"Sawi tur i nei lo em ni a?" vin angreng zeta ka tih leh chuan, "Tumah ka hrilh lo, Veronicai nen kha chuan thawk dun leh ṭang dun kan ni a, ani pawn a sawi chhuak bik lo ang, Minai pa kha a rawn tel ve tih pawh ka lo hre lawk lo a, i ṭhiannu kha a man chhuak a, ka chungchang pawh ani hnen aṭang khan a hria," a ti a, awih tur chin hriatthiam a har khawp mai, a thil sawi aichuan ngaihdan ka neih sa chu ka ring mah zawk a ni.

"Min ringhlel deuhin ka hria?" a rawn tih chuan bang lam ka hawi vat a, "I tih nisela chuan ka man chhuak ngei ngei ang che," nui aw lek lek hian ka ti a. "Nia, min man chhuak daih tawh ang," a ti ve mai a, chutih laichuan in chung light a rawn êng thut.

"A va tihzia e," tih leh thawh ka rual a, signal  ṭhatna sitting room lam ka pan vat a, rei pawh ka nghak lo, minute 5 vel a liam awrh tihah message ka dawng a, Zohera a ni. "I wine duh chu ka kawl tawh, a chanve a la awm," tih hi a lo thawn a, ka han chhiar zo chu ka phili deuh ruai mai. Pindanah ka tlan let vat a, bang ben pah chuan, "Wine chu kan nei e," ka va ti a, "E heu.." a tih ri leh a thochhuak thawm ka hre zui bawk.

Rei vak loah chuan ka pindanah a lo lut a, "Kal nghal i tum elo?" a tih laichuan ka lo insiam mawlh mawlh tawh. "Ruah han veleh ka kal ang," ka ti a, sana ka en chuan dar 10 a pel zawt a, a la hma viau mai.

"Nu Nguri hnen aṭang chuan em ni a?"

"Nih hmel," ka ti liampuat a; mahse, 'A chanve a la awm,' a rawn tih kha ka hrechhuak zawk. Zoherliana chuan han sawifiah deuh awm hi a nia, a lo in em lo ang chu maw!?

Zohera chu ka call a, a mu aniang chu a aw a chhang angreng a, a hritlang zawk nge mawni. "Ruah han deuhah ka lo kal ang, hotel-ah em ni i awm?" ka va ti zung zung a, "Aih, in lamah ka awm," tiin a ṭhianpa nena an in luah awmna a rawn sawi a, khawchhung la hrechiang lo chuan a sawi dan aṭang chuan ka hrethiam mai lo, veng hmawr lam daih a niin ka hria.

"Ka rawn pe thei tho che asin; mahse, zan lamah a ngai ang, ka nuamsam vak lo a," a tih chuan ka kal theih thu ka hrilh a, "Wine chu a ni chiang a maw, engtin nge i hriat?" tiin ka zawt zui a.

"A ni tih chu ka chiang viau e; mahse, a label-ah varak lem a awm lo, chuvang ania ka in ringawt ni," a ti zui hlak a, "Eng lem nge awm?" hrethiam lo zeta ka tih chuan, "Grape dum," a ti teh daih a, anih chuan miin an zawng tih hriain an thlak anih hmel.

"A chanve i in a maw?" min chhang lo.

"Dawp kher ngai suh," ka ti chang bawl a, "Ka inthiarfihlim san, a thawh dan chu ka hrilh kher lo ang che, i hriat duh chuan rawn tem ve mai rawh," a lo ti hluk hluk a, ka thaw huai a, ka nuih a za deuh bawk. 

Kan inbiak zawh hnu chuan Lawmsanga chu putara te ina lo zuk leng turin ka ti a, "Tukinah a inti silawng deuh a, i lo zuk titi pui dawn nia, a fapate indan tur chungchang kha sawipui tum la, zan laia nu Nguri chhuak i hmuh thu i sawi tel zauh dawn nia, Minai lo thlen hma chu engmah kan la ti thei chuang lo," ka ti zung zung a. "Anni indan chungchang chu a pawimawh em ni?" a tih chuan, "Aw, a rilru ka hre duh, annu zawk khuan a rukin in hmun leisak a tum a, eng thil emaw inmung chu a awmin ka hria," ka ti leh dap dap a, a hmel landanah chuan a hreh deuh emaw tih tur a ni.

"Engati nge a?" tia ka zawh lah chuan, "An chhungkaw thil zawh vak hi a mawi lo deuh a?" ti maiin min chhang a, "Zawt chawt lo la, titi kar lakah zawt zauh la a ni mai," ka lo ti sam et thung. 

"Wine chu i lo hawn dawn em?" a tih chuan, "Dawn e, a label an thlak anih hmel a, an dahna hmun pawh an sawn maithei a ni," ka ti a, Jeminai a awm anih chuan kan hmu har tawhin ka ring lo, rin aiin kan nu Nguri a lo che chhuak hma leh reuh si a, kan hetih takah chuan hun khawral vak theih pawh a ni tawh lo ang.

Ruah han hun ka nghak leh te te a, dar 11 pelhah a han ve thei ta hram a, putara te in lam pan chuan Lawmsanga nen kan inzuithla thuai bawk. An veranda-ah chuan an nula pahnih khan aieng chi niawm tak hi an lo thian a, "I va nalh ve, i leng dawn em ni?" tiin min lo be luam a, "Thil lei lawk a ngai a," tiin min biak leh hma chuan ka luhsan zui a.

Kan va lut chu inneituin phawk fe hian min lo melh a, Lawmsanga chu a en deuh bikin ka hria. "Ka pi, nu Nguri a awm em?" ka tih chuan, "A awm reng kha, a pindan lamah aniang," tih pahin sitting room lama Lawmsanga kal chu a thlek zui a, "Vawiin chu hna an thawk thei dawn lo a ni maw, a pa khan vawk in thawm ṭhat te kha a rawn sawi si a, khua a ṭhat chuan thingphel zuk pu chho sela a va ṭha ve," a ti bal bal a, Lawmsanga pawh chuan a la hre phain ka ring.

"Khuaah thil lei ngai ka nei a, a scooty hman ka va duh e," ka ti chu, "Va zawt chhin la," ti maiin min chhang a, sitting room lam ka pan laichuan putara leh Lawmsanga chu an lo inṭhutchilh a, Lawmsanga chuan a intihnat dante a lo zawt a, putara'n a lo hrilh ve mawlh mawlh a, a ngum ruh a lo sawh niawm tak a ni.

Nu Nguri pindan awmna ka zawh chuan, "Eng atan nge i tih a?" tih pahin min kawhhmuh a, "A scooty hman lawk ka duh a," tia kal mai ka tum chu, "Va hmang rawh, filter chungah khan chahbi a awm ang, i pi bulah helmet awmna zawt la," a lo ti nghal var a, huai taka ka ti mai, dil a ngai lo hlauh.

Pitar chuan an pa ṭawng thawm a hriat vangin helmet awmna min lo hrilh vat a, "Thil min chah duh in nei em?" tiin ka han zawt leh rih a. Chhangthawp leh pum damdawi min lo chah a, "A mum rawn lei suh, a tui, nachhawkna tel chi i lo lei dawn nia," tiin pawisa min pe zui a, ka kal dawn chuan sitting room lam ami te pawh an la inbe mawlh mawlh a, tuidawn siam ṭhat a ngaih thu vel a ni an sawi ni.

Kawng a nal a, ka tlan muang deuh bawk nen dar 12 pelhah ka thleng a, Zohera muhil ka va call tho leh a, biak pawh a nuam vak lo, "Lo tlan phei zel la, anganwadi 3 awmna bul zawt la, a bul chiaha inhnuaiah a ni mai," tiin phone a dah hmiah a, eitur ka leisak lo tawp dawn em mawni, ber bur hian a...

Mahse, engmah a la ei ka rin loh vangin thingpui dawrah eng eng emaw chu ka lei nual tho a, in tur leh mini cake te pawh ka lei tel a, ka piancham a ni a, ka han leisak zawk hlauh a, kum dangah chuan Sangpuia'n min lawmsak ziah ṭhin, cake ka dawng ziah a, zanriah min ei chhuahpui ziah ṭhin kha ania, ka ngai zual hle mai.

Jeminai dawr nghahna zawn ka thlen chuan ka ding a, ka va thlek chuan a thawhpuinu kha counter-ah a lo ṭhu a, amah erawh hmuh tur a awm lo. Accident an tawh thu kha a rawn sawi a, min ti khawlhkham zo ta vek lehnghal a, Zohera'n thu thar a rawn nei zui mai bawk nen rawn thei vat sela ka duh khawp mai, zan khat chauh emaw, chhun lamah pawh a awm chuan kan tih theih mai ka ring a ni.

Kan kalna tur veng ka va thlen chuan dawrteah anganwadi 3 awmna chu ka zawt a, kawng kawiin a hliah vangin a lo hmuh phak loh chiah chiah a, in pawl veranda zau deuh nei kawtah Zohera bike pawh a lo ding vung mai. In hnuai panna step-ah chuan ka chhuk thla nghal a, an kawt chu a lo thim deuh ruih a, hnawng rim a nam a, kawngka bula an bawlhhlawh bawm dah chu a khat ṭha viau bawk.

Kawngkhar chu ka kik karh karh a, min chhang eih lo. Ka han pawh deuh chuan a rawn kau nghal mai a, ka bih leh te te hnuah ka lut a, ka thim ruih, tukverh thlang lam aṭanga êng lo lut bak chu êng dang a awm lo. "Zobawih.." tih leh dawhkan lam pan ka rual a, a muhil nge ni thawm a la rawn nei lo reng reng.

'Amahin a awm em mawni le?' ti neuh neuh chung chuan pindan lam chu ka pan a, an choka lam pawh a ruak ka tih tawh tehlul nen pindan phei chu a ruak lehzual, khum lianpui pakhat hi a inhung a, secondhand zawrh lai niawm tak hian chhak lamah thawmhnaw a inkhai dul a, khum bulah thing hmanga siam chair hlai deuh a awm a, a bak chu bungraw dang a awm lo. Zoherliana lah chu boxer nen bawkkhup zawngin a lo mu ngût a, engtin nge bawkkhup zawng hian a muthilh theih ṭhin ni?

"Harh rawh.." tih pahin a mawngah ka va beng ri thlawp.

Phawk fe hian min rawn en a, a tho â deuh nge mawni. Chutah, "I va lo thleng har ve," tiin a inkhuh ṭha zui a, a hnungah ka va beng ri leh dawm.

"Ana Lalduhawm," a ti pawr hlur a, "Rawn tho rawh," tih leh a puansin chu pawh hlim ka rual a. A thim bawk nen a khum thlang lama parda chu ka zuk hlim a, tukverh pawh ka hawng nghal a, a uap lutuk pawh a zia deuh. "A vawt ania," tih pahin a hnung chu a hiat sat sat a, ka kal hnaih laichuan a hnung sen deuh ṭiak chu ka hmu a, ka benna vang chu a nih hmel loh, hiah pilhna te pawh a ang; mahse, a awmna lai vang chuan ama inhiah pilhna anih ka ring miah lo.

"Nizanah hmeichhia i awmpui a ni maw?" tih pahin ka zuk thlek thut. A rawn meng ve kawk a, hnai set sawta ka lo bih chu ka hmai a rawn hup nawk nawk mai!

"Zoherlian, khawi maw.." tih leh a kut man ka rual a, a hnung va thlek leh ka tum chu khumah min pawt ṭhu hnawk a, ka mal chungah a rawn bawk zui a.

"I mutpui em ni a?" pawr fea ka tih laiin, "Khatiang pitar ka khawih duh i ring em ni?" kei aimaha pawr chuan a ti a, a hnung chu ka thlek leh ringawt. "I hnungah hian hamna ang deuh a awm.." ka ti leh chu a rawn che sawt sawt. Ka kut a rawn ban a, a luah a han nghat deuh kher a, "Chul rawh," a ti!?

"Eng nge maw i hriat chu le?" tih pah chuan ka chulsak ve mai a, "Ka chau, haw ka chak tawh," a ti zawi ruih a, han chhan mai dan pawh ka hre lo.

Ka ngawih reng laichuan, "Haw tawh mai ang," a ti leh a.

"Tho la, eitur ka rawn keng ṭeuh ania," tia han pawh thawh mai ka tum chu a mu nghet tlat a, ka mal chunga a bawh tlat avangin ka che sawn thei bik lo.

"I dam ṭha lo em ni?" tih pahin a chal ka dawm sak a, a lum deuh a, pangtilum pangngai mai a niin ka hre thung.

"Thlan rim i nam bawk si, eitur ka siam chhungin lo va inbual rawh," min chhang loin a la mu lui ngar a, "Chawhmeh leisa te in nei em, vawiin chu nilengin ka hman a, eirawng ka bawlsak dawn che nia," ka tih leh pawh chuan a la ngawi ngal a, ka zuk thlek leh ringawt ṭhin.

"Zoa..."

"Haw ang i tih hma chu ka tho dawn lo," ka nuih ta ringawt a, naupang chhia ang hlauh a ni.

"Kan haw thei ṭep tawh,"

"Engtikah?"

"Ka hre lo; mahse, kan haw thei vat ang,"

"A ṭhat chu, he khua hi ka ning hluah hluah tawh.." 

"Vawiin hi eng ni nge i hria em?" ka tih chuan, " Eng ni nge?" a lo ti thum dut a, "Ka birthday ania," a tih chuan a rawn inlet vat a, min rawn melh chho kar bawk.

"I lung a leng em?" a ti reuh a, "Aw," tih pahin tukverh lam ka melh vang vang.

"Eng nge ka leisak ang che?" a tih chuan za lo zetin ka nui.

"I duh sawi la, phone thar te i duh em, nge thawmhnaw...?"

"Chutiang ka mamawh lo, tho la thil va ei ang," ka tih chuan han pawh luih vak pawh a ngai tawh lo, a tho sawt sawt a, "Ka'n inha lawk ange," a tih vangin ka chhuahsan zui a. Choka lam aṭang chuan, "Wine chu khawiah nge i dah?" tiin ka va au lang lang. "Ka rawn la dawn," a ti ve mai bawk a, a lo phei hma chuan ka ei tur ken te chu ka phawrh zung zung a, plate lah chu an han nei tlem khawp a, bungbel pawh an nei mang lo, an neih chhun erawh a mawi ve phian hlawm.

"Hetiang wine hlauhawm deuh hi eng rilru puin nge maw an siam le, a siamtu chu a rilru a tenawm khawp ang," tih pahin a thil ken chu a rawn lek a, a lo ban rang khawp mai.

"Hmeichhe tan phei chuan in ve mai mai chi a ni lo ang, a ruih dan a mak em mai, rilru a fim kur bawk si, tha pawh a tizawi miah lo, min chawk tho zawkin ka hria.." a ti bal bal a, chhang loin a label inbel chu ka en vang vang a, grape nge black currant lem ka hre thei lo, grape lem chu a ang viau a, a te deuhin ka hre bawk si a, a lem a tet vang nge, thei dang daih tih chu hriat a har deuh. Chu zawng aichuan an thlak chhan leh an thlakna thil hian awmzia a nei em tih chuan rilru a tibuai zawk a, ingredient thar em ni ang tih pawh zawhna awm thei tak a ni.

"Ka lo mitthla dan chuan a bur var, a wine pawh a var lam emaw a paw deuh ni turah ka lo ngai a," ka ti mai a, grape wine a ni tih hre chungin mitthlaa ka hmuh dan a ni miau a ni.

"Zu chhe mi angin i mitthla anih chu, hei chu genuine a nih ve mai mai hi," ka han melh chuan mitko a san ralh a, "Engtin nge a thawh?" ka tih chuan a hnar a han tuai zauh a, a nui deuh suk suk.

"A thawh laiin ka bulah awm la chu ka it maithei che," ner nang hian a ti a, "Chutiang em em chuan a thawk a maw?" ka lo ti he haw chu min chek khum hlak. "I hrethiam ve lo ang, tem ve miah lo la a ṭha a ni mai," a ti a, min ti hre chak deuh tlat. A chhin chu ka hawng rawk rawk a, han hnim ka tum chu a lo pawt let rang khawp mai.

"I zak lawm ni, ka sawi mawlh mawlh a," pawr fahrana a tih laiin, "Aw, ka bulah i awm tho alawm maw le," tih leh in ka rual a, chhe te tak tak chauh ka lem a, a rim pawh a na vak lo, a hiar deuh a awm a, tobacco rim a nam sek a, a thur leh a thlum deuh a tel a, a kha sek bawkin ka hria; mahse, lem hnuah a thlum veng veng thung.

"A va tui reuh ve.." 

"A chanve chu in la tupawh i melh tai ang," a ti chu ringhlel fein ka va melh a, "Tu pawh maw, hmeichhia i awmpui chiang lutuk," tiin ka han dawp leh rih.

"Inah i lo in palh ang, tlangval bulah i awm lehnghal, hei chu kawl lo mai rawh," tih pahin a rawn la let rawk a, "Nang zawk kha kawl chi i ni lo, Lawmsanga'n a hmu ve duh lawm," tiin ka la let leh a, a lam ka hawi leh chu min lo melh run run.

"Midang awm laiin in lo ang che, ka hrechhuak a nih vaih chuan ka rawn pawt chhuak nghal dawn che ania," a ti leh pek a, a thu takin mi lah chu a han melh rum em em khawp a, eng nge maw a hriat vak vak ni!?

Ngawirengin eitur chu a lamah ka nawr phei a, wine bottle chu lain ka bag-ah ka khung bawk a, a chhang ei chu tui a ti vak lo aniang cake a ban a, "I zai dawn lo ti raw?" tih pah chuan a fianin a suak a, a rin aiin a tui aniang a suak nawn mawlh mawlh mai. A sira a phone lo êng chu a bih zauh a, message a dawng a ni maithei; mahse, en zui lo chuan a khup a, a ei zawm leh mai bawk.

"Eng nge kan tih leh dawn, wine ruk chhuah chiah a ngai tawh ti raw?" a rawn tih chuan, "Wine ruk hi chu a tawp ber atan a nia; mahse, thil ken tel a ngah lutuka, tunah hi chuan Veroi kut a thlen dan ka ngaihtuah mek, a tlachawpa ngaihtuah lehna hun pawh a awm tawh lo," rilru buai deuha ka ti chu min lo en ran a.

"Tualthahna tam tak hi chu pawikhawihna hmun leh an ruang awm dan aṭang tein an chhui mai ṭhin a, kan thil chhui ve dan hi chu a khawlhkham em a ni, police te angin kan duh lai lai kan en thei lo a, kan rinhlelh zawng pawh kan dawp thei lo anih hi," ka ti leh luam a, "Rinhlelh dang i nei em ni?" a tih chuan ka bu nghat a, 'Tunge?' tiin min zawt zui zat a.

"A bul aṭangin ṭan ṭhat leh a ngai a; mahse, hun a awm tawh lo, ka rinhlelh hian ka ruahmanna a hre hnem tawh lutuk,"

"Kan lam ṭang em ni?" phawk fea a tih chuan, "Tu lam mah a ṭang lo, tu zawk nge min puih dawn pawh ka hre lo, chu tak chuan ka rilru a tibuai," ka ti leh halh a, tunge a nih min zawt nawn leh a, a hming ka han sawi tur chu ka tim ru khawp mai.

"Kan pali zinga pakhat, i la hmuh loh hi," ka tih chuan a meng tal tap. "A rintlak i ti sia?" a ti zui a, "A chhan a zirin a rin tlak thei a, a rin tlak loh thei bawk a, a chhan tak hi ka la hre thei lo; mahse, zep ruk a nei a, eng emaw thil tum a nei bawk a, min kalh dawn lo niawm tak chuan a lang bawk a, ka hriatthiam loh dan chu puzzle piece tawp ber awm lo ang vel a ni," ka ti duah a, ka thilsawi dan chu keimah ngei pawhin a buaichuar ka ti, Zohera phei chuan a hrethiam lo viau ta ve ang.

"I rinhlelh chhan chu eng nge ni?" 

"Veroi hnen aṭangin damdawi a la ṭhin a, bansan an duh a; mahse, hlauh an neih vangin a ruka police hnena report an tum a, an thil tum hi tualthattu ten an hria a, hepa hian amah thah an tum a, a ni lo zawkin a tuar angin ka bulah chuan a sawi a, chu laiah chuan a dik thei tawh lo. Chutiang ngaihdan a nei anih chuan hlau emaw, tlan chhe tur a nia; mahse, ruang kha a zui haw leh nghal a, farm a chhuahsan miah lo bawk,"

"A thurualpuite a phatsan tihna a ni maw?" 

"A ni lo thei leh tlat chu chu, a che fuh tawk lo a, man chhuah an nih vangin a tawp rih a ang. Chuan, kei nen kan intawng a, ka kut hmanga rul kua zen a tum ta niin ka hria. Han ngaihtuah ve teh Zoa, i tana mi hlauhawm nisi, an kianga i him leh tlat si na chu eng ang hmun nge ni ta ang? An khawih na dawn lo tih a chiang em em a, chuvang chuan tlan chhiat pawh a tum buai duh lo a..."

"An lam ṭang a nih vang anih chu.." a tih chuan ka ngaihtuahna nen a inpersan hle a ni.

"Ka thlen hnu rei vak loah khan Jeminai nen kan intibuai nghal a, a bialnu hlui a nia, a chhan angreng a, he nu hian min pui thei dawn ka tih pawh khan ka hman ṭangkai a phal lo a, ka sawi chhuah ṭum chuan mak ka tih deuh thil a sawi a..." hrethiam lo fea min melh laichuan 'Keimah hi min hmang zawk rawh,' Lawmsanga'n a tih lai kha ka ngaihtuah let rauh rauh.

"Minai aiin a ṭangkai zawk tih a inhria a, thil pawi pawh thleng dawn sela ani kha chuan a hlau ve tlat lo, a pute chhungkuaah hian ngaithei lotu leh ngaina lotu a nei a, chuvangin a pawh ṭha duh meuh lo bawk a, ka ngaihdanah chuan a pute hi tla chhia se a duhin ka hria. Mahse, ṭhenkhat chauhin tuar se a ti anih hmel, chu chu ka bula zep a neih chhan anih ka ring,"

"Misual lainatna ngah deuh angin maw i ngaih a?" a tih chuan lu ka thing vat a, "Misual tiin a la koh theih loh, kan tan phei chuan misual a ni lo, kan ticket a nih ve hi, inchhui rukna hun kan nei si lo a, ka dawp nghal mai a ngai dawnin ka hria.." ka sawi zawh rualin ka dar a rawn beng zawt.

"Engmah i ti tawh dawn lo, i thawmhnaw va siam la, rawn chhuak nghal ang che," a ti teh daih a, eng nge maw a hriat leh tak chu!

"Kan la haw thei lo ka tih kha..."

"Tualthattu zawn chhuah aiin phuba lak i duhna a lian daih zawk, rawn chhuak la, tihdan kan ngaihtuah ṭha dawn nia, drugs leh wine aṭang pawh hian an kan kaina khawp chu kan hre tawh," a ti hmiah mai a, chutiang zawnga tih chu ka duh ve hauh lo.

"Kan man tir ringawt dawn teuh lo mai, phuba kan la a nih chuan kan tih chhan an hriat ve a ngai, chutiang ringawtte duh ila an huan saw ka hal ral vek tawh ang chu, mi dik lo laka thilsual ka tih lohnan ka insum hram hram zawk anih hi, phuba chu a tisualtu chauhin a tuar ang," ka ti ve nghat a, ka thinrim deuh bawk nen ka ṭawng pawh a sehchilh nak a, beidawn hmel deuha min entu chu rei pawh ka melh duh lo.

"Detective emaw i inti tawh anih hi," za lo zet hian a nui a, ka va en pawh chuan min lo melh rum ṭha khawp mai.

"Titu tur dang awm sela chuan ka ti miah lo ang.." zawi tea ka tih laiin, "I lusunna aṭanga a lakpen vang chein nuam i ti laklawh anih kha, fing leh rem hre taka awm hi nuam i ti ṭhin alawm.." a ti chu nur fein ka melh, eng chungchang nge maw sawi a tum le?

"Ka laka lawm lohna nei i va ang ve a?" ka aw chu a pawr tawh khawp mai.

"Nei chiang e, mahni inngaihtuah miah loa Veroi i buaipui hi ka duh lo, a phû pawhin ka hre lo.." a ti leh khawl a, he thilah hi chuan kan rilru hi a inhmu ngai dawn lo, hei chu Veroi nena kan inṭhianṭhatna kar a ni a, Zohera tan chuan a hla lutuk tawh.

"Ka inngaihtuah ve bawk ania aw, ka him lo nia ka hriat chuan ka hrilh che anga, a tlan pawh ka rawn tlan chhuak..." 

"Anih kei ve.." a lo tih vang chuan ka en ren rawn a, "Min ngaihtuah ve em?" a ti leh tlawng a, a inpetruh ṭun mai bawk nen han chhan dan tur ka van khawp mai, vawiin chu a mizia a dang riau a, rilru natna a nei deuh nge mawni, a zuau riau maiin ka hria.

"Kan hmanhmawh ka ngai ka tih vang khan i lo chiai deuh a ni maw..?" ka ti chu min chhang lo, min en reng ringawt.

"I rilru ti hah suh, ka inman tir dawn hleinem, school-a kan kal laia buaina ka neih pawhin ka tuar ai tuar tur ka neih ziah kha.." tiin ka nuihsang a, lungawi hmel a la pu thei chuang lo.

Ka fian ken laichuan cake chu ka suak a, va barh ka tum chu a hawisawn hmak a, "Ka mu dawn," tih leh thawh a rual bawk. "Min rawn thlah ve phawt la, keipawh ka haw nghal mai ang," tiin ka au zui a, a reh vung vung hnuah, "Ka hman nileng i ti a ni lawm ni," a rawn ti leh lawi a, pindan kawngkhar bul aṭanga ka va en chuan mu chungin phone a lo khawih a, min hmuh rualin lehlam a hawi leh hmiah.

"Eirawng chu bawl duh suh," a tih chuan ka chhang mai lo, min rawn melh leh vut a, "I duh leh haw rawh," a ti leh tawl a, ka melh rum titih.

"Min kawm peih bawk si lo a.." 

"Ka duh chu ka sawi zo vek tawh, sawi duh i la nei em ni?" lawm lo awka zet hian a ti a, "Nei lo," ka tih zawh rualin puanin a inkhuh hmak a, ka nuih a ti za angreng.

A titau deuh tlata ka hriat vang chuan ka haw san mai bik lo a, an inte tihfai sakin a thawmhnaw suk turte ka va enkual a, a thawmhnaw khai ka va enkual laichuan min rawn thlek ṭhin a, min be lem lo thung. Denim Jacket pakhat chu huh deuh hian a lo khai a, "Hengte chu nisaah pho tur alawm, a hmuar vek mai tur asin," tih pahin thlanglam tukverha hrui inzamah chuan ka va zar sak a, chair-a a kekawr dah pawh chu a huh thoin ka hria, chhuatah tui farna a awm a, ka khawih chuan a la hnawng khawp mai.

"Nizanah ruah i do a ni maw?"

"Sual tamtak ka do," 

"A va nan huh nasa awm che ve,"

"Eng nge ka tih i rin?"

"Eng nge i tih a?"

"Engmah," A puansin chu ka va pawt a, a lo pawt bet ve tlat a, nuihsanin a kekawr chu ka va zar leh rih a, thawmhnaw dang chu suk turin ka la chhuak bawk.

Ka insuk zawh chuan a lo muhil hman a, ka kaitho duh ta lem lo. Dar 3 rik dawnah ka inkhalh chhuak a, pitari thil min chah ka lei hnuah dawr pakhatah sazu tur ka va lei tel a, Jeminai dawrah pawh pengkawi tawh loin ka inkhalh haw zui a, farm ka thlen chuan dar 4 a la ri lo deuh. Scooty chu a berh deuh avangin sil ka rilruk a, putara te inah ka thil lei dah pahin a phuhna tur an nei em ka va zawt a, an lo nei si lo a,  pitarin sampoo leh nawhfe lianpui hi min lo pe a, an kawt tuizem bulah chuan ka sil a, ka bei rei khawp mai.

In ka han thlen chuan Lawmsanga ka hmu miah lo, a nu eirawngbawl chu ka va zawt a, "A vawk chaw pe a la rawn let lo," a tih vangin ka chhuk ve nghal a, ka zuk thlen chuan tumah ka hmu lo, vawk chaw chhumna in lah chu a lo inkalh thlap a, vawk ho lah chu an puar hmel hlawm tawh khawp a, hmun dangah a kal daih em mawni ka tih rilruk laiin a khuh kharh thawm ka hria a, thawm lo chhuahna chu tanky hnung lam aṭangin a ni.

Thawm dim fein ka pan phei a, ka va bih laichuan tanky bang ngheng hian zial a lo zu a, "Hei.." ka va ti thut, a'n han phu nasa em em khawp a, ka inthiam lo leh angreng.

"Engtikah nge i lo let a, ka rawn call dawn chiah che a.." a phone chu a rawn lek pah zauh a, "A rei tawh, scooty ka sil a, i zo tawh em ni?" ka tih chuan, "Zo diam tawh, thil chu i rawn hawn em?" a ti a, ina ka dah thu ka hrilh chuan chhoh nghal mai a rawt a, kal pahin putara nen an inbiak dan te ka zawt ve a.

"Nu Nguri chu a hau aniang tlaiah khan an inhau thawm ka hria a, a nuam duh vak lo khawp mai, pi Lalpuii lah khian ka thilsawi lai khan a hre ve kur a, min ngei viau ang," a ti nuah nuah a, "I awm rei em?" ka tih chuan, "Awm rei lem lo, an nuin tih tur a rawn sawi reng a, hna thawk loa awm ringawt nan khua a ṭha leh bawk si alawm.." tiin min rawn nuih zui a.

"Wine kan hmu ta a...?" a tih laia a mitmengah chuan zawhna a lang.

"Ka pawm e," ka tih rualin a ding dat.

"Tak tak maw?" a awih vak lo aniang min en chîk khawp mai.

"Tak tak e," ti maiin ka chhang a.

"Min duh tak tak lo tih ka hre reng ania, phût luihna tel loin ka sawm bawk che aw, i duh chuan min hnar thei bawk ania," a tih laia a aw chu a dam thlup, a hmelah pawh dawt a sawi lo tih a hriat hliah hliah a ni.

"Ka duh che ka ti hleinem, min duh a, ka lo pawm tihna anih chu.." nui chunga ka ti chu a hrethiam vak lo a ang.

"Hnual ringawt suh," ka tifiamthu hlut a, a nui hmel chu a hamhaih hmel viau mai.

"Ka duh tak tak che ania," a ti zawi leh sup a, ka lo bu ve nghat nghat.

"I pawm ringawt a...?" a ti leh a, ka rindan chuan hepa hian aw emaw, aih emaw, chhanna mumal tak pek a duhin ka hria, ka aw anih loh chuan hnar dawt a duh anih hmel.

"Ka pawmsak che a, i lawm vak bawk si lo a,  hnar i duh zawk em ni?" uang fea ka tih leh chuan, "Teh nang, ka lawm tho a; mahse, a va laklawh ve.." a ti a, a nui ve lek lek.

"A laklawhna a awm em ni, han inngaihzawn hluaina hun pawh a awm lo a, kan buai bawk si.." ka riat nawi khawp a, ka ngaihtuahna erawh a fim kur a, ani erawh a rilru a buai hmel viau thung.

"I pawm ringawt tak tak a maw?" a tih rualin ka bu sawk sawk a, a meng nur deuh chu tawi tein ka nuih. "Anih eng nge i tih ve dawn?" a tih chuan nuih a za viau tawh. Mahse, ka insum ve tlat a, "Min duh a, ka pawm a, a bak eng nge, duh let kher ka phût lo i tih kha," zangkhai zet hian ka ti a, a lungawi chiah lo tih chu ka hre reng. "Khua a thim mai dawn," tih leh kal ka rual a, a hmuh loh lamah ka nuih a za ru hle a ni.

In kan thlen chuan wine chu a entir nghal a, a thlek kual a thlek kual hnuah bottle-a thil inbel chu a pawtthla hlawk a, a hnuaiah chuan lehkha inbel pawhthlak fai loh hi a lo la kai nuan a, "An thupna mai mai anih hi," a ti a, a chhin chu hawngin a hnim chhin bawk.

"I ṭhianpa chuan a i em ni?" a tih chuan ka bu zauh a, "Engtin nge a awm a sawi em?" a ti zui leh a.

"Zu anga ruih bur bur chi a ni lo, tha pawh a ti zawi lo a, mi a chawk tho zawk mah a tia," ka tih chuan inngaihtuah mûk deuh hmel a pu a, a awmdan chu ka lo en ve reng bawk.

"Eng atana siam nge anih hi rindan pahnih ka nei a," a tih chuan ka hrethiam zan lo.

"Tuna kan ngaih ang hi a hmanna tur lo ni lo ta se, damdawi emaw dik taka hmana ṭangkai thei tak lo ni ta zawk se.." a tih chuan rilru a buai ve map.

"Pu Muana khan hotel-a pek a duh lo a, a thukru ta daih a, an hman dan tur a hriat vanga phal leh lo a ni thei," awih zan lo chunga ka ti chu a lo pawm hmel khawp mai.

"A fate hian an hriatpui a, a bo anih chuan an buai dawn hle anih chu," 

"Khawih theitu pawh a fate chauh an ni rih," a lo ti ve zat a, "Mahse, damdawi atana siam anih chu i ring tak tak em ni?" ka ti leh rih a.

"Damdawi siam hi a tuipui a, ramhmul damdawi ngaisang ho hian an râwn fo a, doctor tam tak aia ring zawk leh a damdawi ngeih inti zawk pawh an awm nual mai, he wine pawh hi a mamawh te tana damdawi tura a siam anih ka ring deuh a," a tih chuan thil ni thei ve tho chu a ni; mahse, kei chuan thil dang daih ka lo ngaihtuah thung.

"Zaninah kan lut chhin dawn nia, kan luh theih dan tur zuk thlithlai ringawt ila a ṭha ang," ka ti chu a lo hnial rang khawp a, "Minai a awm loh hi, ani tel loa zuk luh tum chu a chi loh ang, min man chuan chhuanlam tur kan nei dawn lo," a ti sawk sawk a, "Luh rukna tur ka hria alawm, min man lo ang," ti maiin ka chhang a, a nuin chawei a peih tawh thu a rawn sawi avangin kan chhuak thuai bawk.

Zanriah chu ka ei mang meuh lo, chakai ka eichak thu sawi pahin ka chaw chu ka hmet kual a, ka chawhmeh suah sa pawh Lawmsanga nu ka pe zui a, "Tunlai chu chakai cher lai ania; mahse, chutia i eichak chuan naktuk zanah ka zuk chhit dawn nia," pa Taia'n a lo ti ta hlauh a.

Lawmsanga chaw eikham chu a ṭhianpain a rawn call a, Azoi te inah a leng niawm tak a ni. "Kan kal har dawn lo, hmun dangah leng suh," ka tih vangin a ṭhianpa chu a nawmsam loh thu a hrilh a, keiin a lighter hawh ka lo dil thung.

Thlengte ka sil zawh hnu chuan pawn veranda-ah ka va ṭhu renrawn a, Lawmsanga pa chu a ṭhiante in ar huan lama leng turin a chhuak a, a nuin dawhkanah mei a zial bawk a, Lawmsanga erawh sitting room-ah a la ṭhu reng a, min rawn be leh zauh ṭhin. Ka han nghak deuh a, a pindan lam a pan rualin ka tho sawk sawk. Chahbi ka va lak hnuah hmanhmawh fein vawk in lam ka pana, ka zuk thlen chuan a thim ṭha khawp mai.

Vawk chaw chhumna in chu ka hawng a, khawnvar tui awm chhun chu chhuat leh bang velah chuan ka leih kual a, kang ral vek turin ka duh hran lo bawk a, a tawk chauhin ka hria, electric wire awmna zawn aṭang chuan ka dep kai a, chumi hnuah hmanhmawh deuhin kawngka chu ka kalh leh a, thui tak pawh ka thleng hman lo thil kang rim ka hre ṭan der a, ka zuk lehhawi chuan in chhung chu a lo eng va va tawh.

Lawmsanga lo chhuak leh ka let leh lam chu kawtah kan intawk hlawl a, phawk fein min en. "Inring rawh, kan kal ṭep," ka tih laiin, "Khawiah nge i kal?" a lo ti a, ka chhan hmain current a rawn thim thut. 

"Thil kang hmui rim i hre ve em?" a tih chuan, "Aw, ka tih ania, an rilru lakpen nan vawk chaw chhumna in kha ka hal a, an buaipui chhungin kan lo zuk lut dawn nia," ka ti a, in chhung lam ka pan chu min rawn zui rang viau a ni.

"Pawnah khan lo va awm rawh," ka tih chuan a let leh rih a, ka phone ka va la a, ka pheikhawk pawh ka thlak nghal a, ka va chhuah leh chuan kang rim chu a nam chûk tawh a, vawk in lam pawh a êng pup tawh.

"Khungte han hal reng reng, vawk in a kâng kai ang tih a hlauhawm lutuk, a tuartu tur kan ni dawn asin," a lo ti hluk hluk a, chung zawng zawng chu ka ngaihtuah thleng ve vek a, hmanhmawh ngai viau losela chuan kawng dang ka zawng ngei ang.

"Thil kang rim in hre ve em?" Lawmsanga nuin a rawn tih laichuan putara te kawngkhar a rawn inhawng ve zat a, Biaki leh pu Dinpuia te nupa an rawn chhuak a, an hawi kual nasa khawp mai. Pi Mangaihi chuan vawk in lam a kawk a, chu veleh pu Dinpuia chu a rawn tlan chhuak nghal a, an nu chuan a zui thuai bawk. 

"Rei lo te chiah hun kan nei dawn ania, keimahin ka zuk lut mai dawn em ni," ka tih chuan, "A chi loh, an lo chhuah kim veleh kan kal dawn nia, an buai chhungin kan let leh hman ang," tih leh inher a rual a, a nu bulah chuan, "Kan awmna an zawh che chuan 'Artui la turin an kal' i ti dawn nia," a va ti a, a nu lah chuan, "I pa a kal reng alawm," a lo ti let heh a, "Tichuan sawi la a ni mai," pakhat chuan a tipawr deuh hlur a, a lungawi chiah lo anih hmel.

Rei vak loah chuan pi Nguri leh a nu an lo chhuak a, pu Dinpuia nupui lo tlan let chuan "Bucket rawn keng rawh u, vawk chaw chhumna in a kang," a rawn ti lang lang a, midang pawh chu an tlan let leh a, bucket nen an che buai khawp mai. Naupang ho pawh an rawn chhuak ve sap sap a, tunah chuan putara chiah chu inah a awm tawhin ka hria, a ngum a sawh vangin a che chhuak thei lo ngei bawk ang.

"In hnung lam aṭangin kal ang," Lawmsanga'n a rawn tih laiin, "A hla em mai, min hmuh hmain chhuk ang," tih leh a bana pawh ka rual a, step-ah chuan ka tlan thlakpui hlawk hlawk a, kawt zawl kan pel ṭep tihah chuan kawngkhar a rawn inhawng thut, chuvelah Lawmsanga chuan min pawt ṭhu hnawk a, putara rawn bai chhuak suih suih chu ka va hmu thei. 

Ka hmui a hupna chu ka phih thla a, kal turin ka signal zui a, an lungrem ko asan deuh vangin a chhuk hmasak a ngai miau a ni. "Fimkhur rawh," tih paha a ban a rawn phar chu ka zuk pawm thlawp a ni ber. "Kawngkhar saw chu a inkalh ang," a tih laiin, "Thlang lamah sawn, ventilation aṭangin tukverh a hawn theih," tih leh kal ka rual a, ventilation lam pawh pan hmasa lo chuan cubic lung ka va la hmasa a, chutih laiin ani chu tukverh bulah a lo ding reng tawh.

A ke bula lung ka va dah rual chuan a tih tur a hai bik lo, a sang ṭha bawk a, awlsam zetin tukverh chunglam kalhna chu a hawng a; mahse, a hnuai lamah a la inkalh tlat, a lehlam chu ka en tir leh a, chupawh chu hnuai lamah a inkalh tho a, "Ka dar hi rap mai rawh," ka ti chu a duh lo nasa mai.

"Lêt zawk ang, hei chu Minai awm hunah kan ti thei vek, tunah engmah kan la thei dawn chuang lo," tia rawn chhuk mai a tum chu ka hnungah ka lo dawm a, "Ruahmanna kan siam a ngai alawm, Minai tel loa kan tih pawh a ngai maithei, va thlithlai hrim hrim rawh," ka ti lui tlat a, a la hreh hmel hle. 

Kei lah chuan, "Hun a tam lo ania aw, hmanhmawh rawh," tiin ka lo tur a, "Thlithlai kher a ngai em mawni le," ti chung chuan a lawn ve ta tho a, ka dar a rawn rap chu na ve ngat ngat tak a ni, amah lah chuan "A na em?" hlauthawng fein a rawn ti a, "Lawn vat rawh," tih bakin ka chhang lo. 

Harsa deuh chuan a lut thei hram a, "Tikhan lo awm rawh," a rawn tih hnuah kawngkhar a hawng thawm ka hria. Chu veleh ka bula  lung chu chharin varak awmna dil lam chu ka vawm ri dawp a, varak hoin thawm an rawn nei nghal chuah chuah. 

In chung lam tukverh inhawng thawm ka hre zui a, bangah ka beh tlat avangin min rawn hmu thei lo thung. "Khatah khan tunge awm a?" tih ri chu a ring ṭha khawp mai. In chhung lam a mi pawh chuan a rawn hre pha aniang rang lutuk hian a rawn let a, tukverh rawn hawn a tum chu ka lo nam bet tlat thung. 

"Awm sawn rawh, i dal a nia.." a rawn tih laichuan step-a lo chhuk thawm a awm tawh a, a pen muang bawk si, pakhat lah chuan tukverh lehlam zawk a pan a, chu pawh rang lutukin chu ka va dang leh a, "Jenus..!" a tih ri chu hriat nuam tak a ni lo, ka chet dan chuan a ṭhawng hlein ka ring.

Thim zingah chuan a ding khawng ta reng a, han biruk emaw pawh a tum tawh lo, min en reng tih ka hria a, keipawh chu ka che chang bik lo. Chutah, pindan kawngkhar a rawn intheh hawng rawk a, Lawmsanga a inher rualin bang lamah ka tawlhsawn ve nghal a, putara aw ka hre zui zat.

"I nih ka ring reng a, i lo la tum ngat ngat a ni maw, hrilh fin theih reng reng loh mai..khawnge i ngal kha ka'n khawng tliak teh ang," putara'n a tih chher chher laiin Lawmsangpuia chu a ngawi ṭhiap a, tianga invaw thawm niawm tak hi a awm zui a, ka thin chu a phu ve dawt dawt. 

"Tu ah nge i inngaih, ka in chhunga rawn lut ru tur hian tu nge i nih a, i va han kawlhrawng sawt ve maw le..." tiang hlap ri a ri leh ṭhak a, Lawmsanga thawm ka la hre ve lo.

"I chanpual i duh anih chuan police min man tir kha tum hlek tawh suh, kei bak ṭanpuitu i neih loh hi hre ta che, i nu ang chauha mawl i nih hi.." putara'n a tih leh chuan a rawn ṭawng ve ta hram a, "I fapain min thah a tum, engkim a hre vek tawh," a ti chang rap a, chu tak chu a ni ka lo nghah chu.

"Tuin nge thah tum che?" putar aw chu a ṭeng ṭha viau mai.

"I fapa Laldinpuia khian maw le, aizawlah khan min umzui turin mi a rawn tir tih ka hre vek tawh, i nupui rawn tirh a ni nghe nghe ang," Lawmsanga'n a tih chuan, "Dawt dawt anih chu, hria nise an sawi daih tawh ang," putara'n a lo ti a, a aw erawh a vin lutuk ta lo.

"Hre lo se engvangin nge min huat ang?" Lawmsanga'n a tih chuan, "Hetiang hian khawsa fo lo la a hriat pawh an hre lo ang, fimkhur rawh ka ti vawitam che alawm," tiin putara chu a vin ṭha leh tawh khawp a, "Min kaltir zawk la i buai lo ang," pawr fahrana Lawmsanga a ti chu inhlap riin a zui leh zat a, a na viau aniang Lawmsanga thawm ka hria a.

"Min kaltir hma chu ka do reng che anga a ni mai," a tih ri chu a zawi viau tawh.

"Engah nge at i so reng a bengtulul, ka thisen kai i nih hi hreta che, ka fa tak ni lo te tan hei leh chen hi ka thawkin i ring em ni?"   Putara'n a tih ri ka hria chu ka lo inhumruh  chiam, ka ring sual lo chiang ta hle mai, ka hrethiam har lutuk chu ka indem mah zawk, a bul aṭang khan lo hria ila kan heti tehnuai lo tur hi ania.

"I fa angin nang hian min en ngai lo e," tih ri chu, "I pian danin zir hek lo, awm lo tur i rawn awm a, i tih loh tur i ti zui mawlh mawlh bawk anih hi," tiin putara'n a lo chhang a, pafa inkar buai tak an nih hmel.

"Tun chinah hetiang hian khawsa tawh hlek suh, i nu enkawl ṭha la, nungchang ṭha deuhin awm ringawt rawh, i pi thin i ti ur anih chuan ka chhan reng thei dawn lo che ania," Lawmsanga nui hawk thawm ka hre zui a, ka ngaithla chik khawp mai.

"I nupui leh i fate hlau hian i la tar thi dawn anih hi, ka pa angin ka en ngai bik lo che, min phatsantu ang bakin ka hre ngai lo bawk che," chu aw chu a sehchilh rap a, an ngawi dun vang vang bawk.

"Ka kal dawn," Lawmsanga'n a tih chuan, "Wine kha em ni i zawn?" putara'n a lo ti vut a, "Wine chu min pe rawh," Lawmsanga'n a lo ti let hluk. "Police hnena ken i tum anih kha," putara'n a tih laiin in chung lamah thawm a rawn awm a, "Ka pa," rawn titu chu pi Nguri niin ka hria. Hmanhmawh deuhin huan sir lam ka pan a, tlan pahin Zohera ka call bawk.

A rawn chhan rual chuan, "I lo kal a ngai, kawngah kan intawk dawn nia, Lawmsanga hi putara fapa a lo ni reng alawm," ka ti sawk sawk a, "Tunah khawiah nge i awm?" a tih laichuan hnung lamah thawm ka hria. "Ka rawn chhuak ania, hmanhmawh rawh," tiin lakhuihthei hmun lam ka pan rawk rawk a, Zohera thil rawn sawi chu ka hre mumal tawh lo.  

"I lo kal nghal em?" ka tih chuan, "Kal e, i phone kha keng reng la, min lo ngaichang dawn nia," a lo ti ve thuai a, chutih laia "Lo ding teh," tih ri ka hria chu ka tlan chak sauh sauh.

Ka hma lam chu lakhuihthei hmun hlir a ni a, gate ka thleng hman dawn lo tih chu ka chiang viau a ni. Chuti chung chuan ka tlan lui zel a, chho zawnga tlan chu a har ngang mai, "Khawiah nge kal i tum?" a rawn tih pawh chuan ka lehhawi duh lo. Thaw hlawp hlawp chunga ka tlan chu thinzungah ka inchhuih thlu tawp mai a, ka ke rek chu a na ngut ngut. 

"Eng nge maw i hriat le..?" tih pah chuan min rawn pawt tho lawp a, ka ding nghet lo chuan a kawr awmah ka ṭham a, ka tlu tur chu min lo chelh ve bawk nen terrace-ah ka let thla dun hual mai.

"I na em?" tih paha min rawn ban leh a tum chu a kut ka lo vai sawn lawp a, "Mi daw heh i nih hi," ka vin chiam a, ka darah vuanin min rawn sawi nawk nawk.

"Min ring ngai lo a, ka ring bik lo che; mahse, i lam ṭang ka ni tih hre rawh, engvangin nge khatiang kha i tih, puih che ka tum tih i hre lo em ni?" a tih chuan chhete pawhin ka ring tawh lo. 

"Min thlah rawh, min that pawh ni la i him chuang lo ang, ka ṭhianpa hnenah engkim ka hrilh tawh," min sawi leh nawk a, "I â lutuk, mi hlauhawm ka ni lo," sehchilh zet hian a ti a.

"Veroi kha i that em?" ka tih laia ka aw chu lawi tak a ni, thinrim luatah ka khur ru dar dar bawk.

"Chutiang ti duh turah chuan min ngai a maw, tu nge ka nih i hriat tawh hi, i fing a ni lawm ni, i ngaihtuahna hmang ta che," tih pahin ka bekah a rawn dawm a, "Misual ka ni lo, tual ka la that ngai lo bawk, kan thil sawi dan aṭang khan i hrethiam tawh lo em ni, kan duh a inang a, chuvanga pui che ka nia lawm," a ti pawr hlur a. "I thil sawi hi awih tur chin pawh ka hre tawh lo e," ka tih chuan thawk a la hluai.

"Min ring thei tawh ang, engkim i hre vek tawh, ka hmel hi ngun deuhin han en la, i hre thei em em ang, mi landan i chhiar thiam em kha," a tih chuan chhan ngaihna pawh ka hre lo, "Min ringhlel tih kha ka hai ngai hleinem, ka puih chhan che chu i puihna ka mamawh ve tho vang a ni," zaidam zawka a tih chuan ka inthlahdul riai riai a, ka rilru erawh a la inkhâp buai viau thung.

"I sawifiah deuh thei em, hriatthiam loh ka ngah teh ania," ka ti a, lawm lo awka ka la tilang viau a ni.

"Ka sawifiah vek ang; mahse, inah aw," tih leh thawh a rual a, min rawn kaih a tum chu ka ban tim ru khawp mai. "Ti rawh, kal vat ang," tih pah chuan ka kut a rawn ban a, ka han din chuan ka ke rek a na ngut ngut a, rilru a buai  em em bawk.  "Inah ka zui nghal dawn lo che, i sawifiah phawt a ngai," tiin ka han kalsan lui leh ngat a, "Khawiah nge kal i tum?" a rawn tih chuan ka chhang lo.

Gate lam pan chuan ka bai chho suih suih a, kawng pangngai chu kan chhak hla lo teah a awm tawh. Ka zuk lehhawi chuan a rawn kal ve zel a, thil awmzia la hre chiang lo viau chung chuan mi hlauhawm a nih erawh ka ring ta lo, ka chunga rilru chhia pu nisela chuan chet lakna hun a ngah lutuk tlat a ni. Awlsam taka ka bum theih danah ka rinna aiin a mi rinna a nasa zawk tih pawh a hriatthiam theih a, kan inrem leh thei anih chuan thil a fel duak thei dawnin ka hria, a insawifiahna pawh ngaihthlak ngei ka duh a ni.

Gate kan thlen chuan ding khawmuang loin thing hmun lam ka pan a, nimbu huan awmna zawn kan kal chhung zawng chu min be loin min la rawn zui ve zel a, thing hmun kan thlen ruala ka ding chu min rawn um pha thuai bawk. Ka phone ka en a, kan nghah deuh a la ngai dawn tih ka hriat vangin ka han ṭhu rem te te a, ka ke chu a hit deuh mup tawh.

"Hetah hian kan awm reng thei lo ania, i thil hal vang khan min zawng dawn asin," a tih chuan, "I sawifel thei mai ang," tih zawngin ka chhang a, ka bula a lo ṭhu pawh chu ka melh duh lo lui a, lehlam ka hawi deuh ngar a, a phone light ti êngin ka ke chu a rawn khawih a, "A pelh a nih dawn hi," a tih pawh chuan ka chhang lem lo.

Zawi te te hian a hmet a, a na deuh nain thawm ka chhuah duh miah lo a, "A na viau em?" a tih pawh chuan ka inhumruh hle ringawt.

"Ka pa a nih thu sawi kha thil nuam a ni lo a, keipawh hian pawm hleihtheih loh chang ka la nei a, nangmah ang thoin ka ringhlel ve a; mahse, ka pa a ni miau bawk si, venhim ka tum vang a ni lo a nia, thil sual a ti anih chuan tuar ngei sela ka duh ang, mahsela a fihlim em tih hriat phawt ka duh vang a ni, min hrethiam dawn nia aw.." a aw chu a zawi khawp a, a inthiam loh hmel viau bawk.

"In pafa chungchang sawi chu duhtawk la, Veroi nena in thil tum aṭang khan sawi ṭan rawh, damdawi ringawt kha inbuaina a ni thei lo, dawt pakhat pawh min hrilh leh anih chuan.." tiin ka lo vin khar khar.

"Damdawi kha chu kan inhriat ṭan dan a nia, a tir chuan hotel neitu pi Julie hnuaiah khan a thawk a, Aizawl lamah te pawh a ken thlaksak ṭhin. Mahse, Minai pa khan a man chhuak a, a hna thlenga a tawrh theih dawn avangin bansan a duh ta a, chu chu a thawhpuiten an remti si lo a, a talawk zui ta a ni. Ka puih tur thu ka hrilh a, puih pawh ka tum tak tak a, ani'n hotel lamah thil eng eng emaw min lo hriatsak ṭhin a, chuta ṭang chuan he wine chungchang hi kan hre thei ta a. I ṭhiannu kha i rin aiin a inrawlh thuk ang, hotel leh damdawi leh hmeichhe hmanga an sumdawnnate kha a hnen aṭanga ka hriat vek a ni...." sawi tim nei tih hriat takin a aw chu a zuih ral a, "Call girl a ni tih chu ka hria alawm, damdawi a ti ve tih pawh ka hria," ka tih chuan a phawk deuhin a hria, a thim vangin a hmel chu ka hmu chiang thei lo.

"Aizawlah khan report tura kal ka nia, Wine pawh kha ka ruk chhuah anih kha, i ṭhiannu kutah khan ka hlan nghe nghe a; mahse, i ṭhiannu khan ka sawi angin engmah a ti lo. Ka biak hnuhnun ber ṭum chuan 'Kan thil tih tum an hre vek, kan in awmna pawh an hre tawh,' tiin a hlauthawng khawp mai a, inhmuha sawidun ka duh thu ka hrilh a, hmuh tumin vawihnih lai chu ka nghak thlawn. Min be duh ta miah lo a, a hnu lawka khan ka be tlang thei lo zui a, Minai pa a lo kal tih ka hriat leh an thih thu ka hriat kha a inrual deuh thaw a ni, tlai lamah u Nguri hian min lo bia a, Minai pa a lo zin thu leh a biak theih loh thu a rawn sawi a, min rawn bia em tihte min zawt a, chumi zan chuan an thih thu ka hre zui a....wine vanga thi an nih chuan tihsual lian tak ka nei a ni, keima lakchhuah a ni a, i ṭhiannu kuta hlantu ka ni bawk..." 

"Engati nge Veroi kutah kher chuan i hlan a, nangman i ti thei reng lo em ni?" ka lawm lo awka chu a hai bik lo ang, ka ṭhiannu a hmangṭangkai tih a pha anih vaih chuan ka lo ti rilru hman a; mahse, min chhanna erawh ka beisei loh lam daih a ni.

"A chhan chu ka pa siam a nia, he farm hi chhe vek se, an chhungkua hi darh vek se tih chu ka duh ngei a; mahse, ka pa a ni miau si alawm, thil kalsual a awm kha ka beisei lo em a, min umzuitu pawh ka pa hi a nih ka ring a, han hlauhna kha ka nei lo a ni ber,"

"Tualthattu chu hria i va ang ta ve?" ka ti nghal hlut a, ka ṭhuthnaih deuh rawk rawk.

"Chiang takin ka hre lo; mahse, a supply tute lamah ni loin a demand tute lam aṭang zawkin a ni tih chu ka hria, an supply na tur chu i hriat tawh kha," ban charh hian a ti a.

"Anih chuan i mimal thil vang ringawtin hetah hian min hruailut a ni maw?" ka lo ti leh khar khar a, han thawkpui hluai tur thil engmah ka hre lo, thaw a tipik hluah hluah zawk a ni.

"Ni bik lo; mahse, heta ṭang hian inṭan turin ka duh tih chu ka pha lo ang, i tan pawh a him zawk a, tel ve ka duh bawk a, bul ṭanna tur dik taka ka hruai loh che avangin min hrethiam dawn nia, i tir aṭang khan hotel kha kawhmuh tur che ka ni a; mahse, helai hi i rawn thlen loh mai kha ka hlau a ni," a ti leh luam a. Han dem vek thei pawh ka ni bik lo, keipawh khan he hmun hi ka tinzawn nghal ve tho a, he khua ka thlen hma aṭangin ngaihdan nghet deuh ka nei sa kha a nia, hotel min kawh hmuh pawh nise he hmun hi ka pan hmasak tho ka ring. A thil sawi pawh chu a dik tho mai, hotel chu ka tan a him lo thei a, farm hi duhthlan tur ṭha zawk a la ni thoin ka hria, thil hriat chian a har vanga hun kan duh rei deuh e tih lohah chuan...

"Putara khan i chet dan engkim a hria a, wine pawh hi lo ru ta ila i tihah a ngai ngei dawn a, engkim hre chunga ka laka i thup hi ka hrethiam lo, a mawhphurtu tur zawk i nih hmel a..?" rilru buai ru zet chunga ka tih chuan, "Amah zawk hian a rilru a thlakin ka hre tlat a ni, chu chu a nia a tisual tih fiahna awm se ka duh chhan chu, wine hi a hralh chhuak miah lo a, an test zawh vek tawh hnuah a thawhpuite nen an inrem leh lo niin ka hria, ka bulah chuan, 'Ka thilsiam te hi a mamawh tak tak te tan chauh a ka siam a ni, nawmchenna kaihhnawih thil atana ka siam a ni lo,' tiin a sawi a, a thukru ta hmiah bawk a, a hma kha chuan awlsam tein ka ru chhuak a, i lo kal hma kha chuan a awmna ka hre thei miah lo," a ti leh dap dap a, a pa a ni bawk a, fihlim turin a duh dawn tih chu chiangsa a ni, haw ru viau mahsela huatna rilru chauh chu a pa lakah hian a pu lo tih ka hria, chu erawh ka tan buaina a tling hle ang le....

"Ka ring thei dawn che em tih ka chiang lo telh telh mai.." ka lo ti zauh chu min rawn thlek ve vut a, "Ih e,  min ring thei lo anih pawhin min mamawhna i neih phawt chuan ka pui ang che. Mahse, ka duh dan chu i hriat vek kha, nang chuan a tih sual emaw, manna tur thil i zawng char char a, keichuan a fihlim thei hram lo maw tiin thil nihna tak tak hmuh ka tum thung, anihna takah chuan kan duh chu a inang alawm, kan zawn chhan a inang lo mai a ni, dal tumna che ka nei lo, i thil duh ang hi i hmu a nih phei chuan engmah tih theih ka nei lo tihna a ni mai.." a ti a, thawk a la deuh ham ham bawk.

"I mimal thil ka zawt tawh ang che?" ka tih leh laitak chuan bike lo tlan thawm ka hre chawp chilh a, rei pawh nghah a ngai lo, kawiah a rawn lang thuai a, a rawn tlan chak khawp mai.

"I ṭhian chu em ni a?" ka bula miin a tih chuan ka tho ve thuai a, hma lam ka va hawi chuan a rawn chhuk niin ka hria, light-in min chhun avangin ka meng hleithei lo. "Zoa.." tih leh a lam pan a rual a, a rawn tlan phei thut chu ka lo melh hman ṭawk a ni, engmah pawh ka sawi hmain ka hnunga ding chu a va ṭham nghal rawk rawk.

Thei leh thei lo chuan a kawr hnungah ka va pawt a, han pawh hran chu khawilam keimah zawk chu min hnuk kal dawr dawr. "Tu phiangsen maw i lo nih a, a khawih che em Duhawm?" tih pah chuan a nam kal dawt dawt a, hnung zawnga Lawmsanga tawlh let chu a tlu lo chauh.

"Duhtawk phawt teh, kan lo sawifel..." tih chiah ka sawi hman, Lawmsanga rawn ding rem leh chuan Zohera awmah a rawn ṭham ve chawt a, "Zawhna pangngai chiah ka chhang ṭhin ania aw ṭhiana, i kut ti hlei vak lo la a ṭha zawk ang," a ti khar khar a, Zohera'n a kut tum a lo lek uaih, chuveleh ka va man chawt a, an inkarah ka tlazep nghal bawk a, "Awm sawn rawh u," tih pahin ban ka phar hluai mai.

"Ṭha deuhin kan sawi ang, inbengdai ula, han ṭhu phawt teh u.." ka ti chu min chhang lo a, an ṭhu lo ve ve bawk.

"Zoherlian..." ka va ti chu, "Sawi vat vat rawh," a lo ti let hlur a, ka piaha Lawmsanga ding chu a en ngar ngar mai.

"Thil hriatsual palh a awm a," tia Zoa lam ka hawi chuan, "Tuin nge hriatsual?" a lo ti leh hluk a, han sawi pawh chu ka chak lo a ni.

"Lawmsang, lo ngawi rih la, ka ṭhianpa hi ka'n hrilhfiah phawt ange," ka ti leh rih a, Lawmsanga chuan min hnial lem lo. Zohera chu a bike lamah ka pawt phei dawt dawt a, ka theih ang tawk chuan ka han hrilhfiah ve bawk a; mahse, a hrethiam thei meuh lo a ni. "Nichin lawkah hlauhlawpin min rawn call a, tunah hriatsual i ti leh ringawt a, ani lah saw farm neitupa fapa a lo ni leh daih a, a dik lo reng reng, hetiang chuan a ṭha lo, helaiah hian awm tawh lo la a ṭha ber," a ti hmak mai a, ka tel loa let chu a tum lo hle.

"Thil zawh duh ka la nei alawm, dik taka min chhang vek anih chuan ka tan hlauh tur a awm lo ang, ani sawn kan hriat loh a hre hnem lutuk, Minai aipawhin kan tan a ṭangkai thei zawk ang," a beng bulah ka tih laichuan Lawmsanga chu a lo hawi ve reng a, bike head light vang chuan min rawn hmuh chian vak erawh ka ring lo.

"Awmchilh tawh lo la ka duh tak tak ania, awm nuamin min awmtir thei hleinem, sawpa saw ka rin zawng pawh a ni ve lo, in lo inthurual miah lo lehnghal a," tiin Zohera chuan min la hnial ve fan a, "Risk lak a ngai anih ber hi, lo kal phawt teh," tih paha Lawmsanga lam ka pan chu min rawn zui rang khawp mai.

"Tu tuin nge sailo chungkaw mi i ni tih hre ve awm?" ka va tih chuan, "Sailo thlah ka ni ve lo," a lo ti khauh a, a ni dawn tak e.

"Midangin an hre ve che em?" ka tih leh chuan, "U Dinpuia hian a hria tih chu ka chiang, a nu pawh hian a hria ang, min ngaithei vak lo a, ka hriat ve hma daihin an lo hre tawh zawk ang," a ti a, engtin nge a hriat ka lo zawt leh zat.

"Hman deuh tawh khan rulin min chuk a, ka damlo reng a, chumi ṭum chuan pu Muana hian min rawn kan a, ka nu leh pa nen an inbe thawm aṭangin ka hria a, a hnuah ka nu ka zawt alawm..." a ti a, sawichiang deuh tura ka tih vangin min hrilhfiah luam a, a sawi danah chuan pu Muana leh pi Lalpuii te inneih hma hian a nu leh pu Muana hi an inngaizawng ṭhin niawm tak a ni.

"Ka nu chuan 'Kan inngaizawng tih kha tuman an hre lo a, Lalpuii pa khan Muana hi fapa ang chiahin a en a, a duhsak em em bawk a, ani lahin an rosum a hnar thei bik lo a,' tiin a sawi a, kei erawh rei deuh an inneih hnuah, fa pawh an neih dun hnuah ka piang a, he kan wine anchhedawng hi ka pianchhan a nih hmel," a ṭawng tawp lam chu a chang bawl a, a aw chu a sehchilh hle bawk.

"I nu chu a hrai rui em ni a?" ka tih chuan, "Ka hre vek bik lo, 'Ka ruih laia ka thil tih sual i ni' min tia lawm, wine chungchanga kan inhnial ṭumin, 'He thil hi i lo awm ve chhan a nih hi' tiin a sawi bawk a, chuvang ania he wine hi ka huat em em ni," a ti leh hluk a, Zohera ka va melh chuan a nuih a za deuhin ka hria, engmah phei chu a sawi lo a, Lawmsanga erawh a rilru a na deuh nge ni a ngawi zui vang vang a, han zawh thui zel pawh chu a nuam tawh chiah lo.

"Anih min ruk chhuahpui dawn tak tak em?" ka ti chu, "I duh phawt chuan," tiin min chhang a, "Ka tih zui dan turah buaina i nei lo ang maw?" tiin ka zawt leh ngat.

"Ka hrilh tawh che kha, a fihlim thei anih chuan fihlim sela ka duh, thil dik a ti anih chuan tuar ve lo turin ka duh bawk," fiah fek fawk hian a ti a, chutah chuan harsatna ka neih ka ring lo; mahse, ka hrechiang hmasa phawt ang, chuvangin engmah ka tiam thei lo a ni.

Zoherliana haw tir ka tum chu a han lawm lo em em khawp a, "Ngai kan awh leh anih hi, kan thil tum pawh kan la ṭhulh lo," tiin ka tilui ve tlat a. "Engpawh i chungah thleng se mawh ka phur lo ang, i luhlul bawk a, i duh ang chuan ti rawh," a tih hnuah lawm lo fein a bike lam a pan a, a tlan chhuah hma chuan Lawmsanga chu, "Min bum leh anih chuan zawhna ka zawt buai tawh lo ang che," tiin a han vau zui hram bawk a, Lawmsanga chuan engtin mah a chhang lo thung.

End of chapter - 15