WHY DID YOU GO? (CH - 16) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 16

"U Mina, kha kha games a mi?" tih pahin Tluangtluanga'n ka phone a rawn bih a, "Ni lo, i ziak zo tawh em ni?" ka tih chuan a ṭhu ṭha leh vat a, a zahve pawh a lo la ziak lo. A u zawk erawh chuan a lo la ziak malh malh a, an homework an ti zo tawh a, ziah mawi kan inzirtir a, lo nghah pahin apple te ka lo velsak a, phone ka khawih leh ṭhin bawk.

"Ka mut a chhuak tawh e.." Tluangtluanga'n a tih chuan, "Dar 9 pawh a la ri hleinem, kha kha i zawh veleh i mu dawn nia," ka ti a, nin hmel deuh chung chuan a ziah zawm veleh mai bawk. Chutih lai chuan Celine dioni a rawn zai thut a, phone chu ka ban rang khawp mai. Mahse, nu Ṭhatei a lo ni a, speaker on-in phone chu ka chhang a. 'Kartawpa rawn chhuah kan dil a, ka in-chekup ve nghal law law ang keipawh, naupang an fel em?" a rawn ti lang lang a, an fel thu ka sawi laiin a fate pawn an rawn chhang ve zat zat a, an homework an tih zawh tawh thute, ka tiffin siamsak a tui thute an lo hrilh ve melh melh a, an nu pawh a lungawi ve hlein ka hria.

"Eng nge i pai tir a?" a rawn tih chuan, "Frozen food leh thei ka paitir a, chaw pawh an rawn ei zo ve ve a, an ṭhianten an eipui ve aniang," ka ti mai a. "Tiffin pai ṭhat kha nuam an ti ve ṭhin ania, nu ho pawh hi kan inel ve deuh a, naktuk zingah parents group-a ka post turin a thla lo la rawh aw," a rawn ti a, nuih a za duh angreng. 

Nu Ṭhatei kan biak zawh chuan rei vak lo an ziak leh a, apple te an ei zawh hnuah an ha ka nawhtir a, an mutna ka va siamsak bawk. An mu tur chu pi Zaii'n a rawn ṭawngṭaisak a, ka phone khawih an chak viau naa ka khawihtir duh lem lo. Dar 10 rik hma hian an muhil tlangpui a, pa Makima hian zan rei tak thlenga an men a phal ngai lo a, chutiang bawkin an thawhtlai pawh a phal lo a, a kai tho ngei ngei ṭhin.

An muthilh hnu chuan an tiffin siamna turin alu ka va chhum lawk a, pi Zaii erawh tv enin a la ṭhut ngheh hmel khawp mai. Message dang ka dawn loh vangin Azoi message chu ka chhang a, "Nu Ṭhatei te lo haw hunah ka rawn haw ve zawk ang," tiin ka va hrilh a. "I lo kal dawnah lo sawi rawh, thil chah duh che ka nei dawn ania," a rawn ti pawh chu ka aw ve leh mai. Mi rawn biak zauh zauh a ching a, tun hma ang erawh chuan kan inbe zing ta lo, keimah zawk hian ka be tîm tlat a, ani thung chuan mi a ngai der thiam viau thung.

Jda'n message a en duh miah lo mai chuan rilru a tibuai, nimin aṭangin biak ka tum tawh a, ka message a en loh thu thuhran call takngial pawh a chhang thei lo a, min pehhel nia ka ngaih vangin ka lawm lo viau tawh. Hetianga mipa an awm hi mak ka ti hran lo a, mipa tamtak hi chuan hmeichhe laka an duh an hmuh hnuah an thlauhthla lehnghal mai ṭhin tih ka hria a, chutiang hmeichhia ni ve tur chuan ka inngai phal meuh lo thung. Mipa dang ang nih a lo tum anih pawhin kei hi chu hmeichhe dang ang ka ni lo ang tih rilru ka pu nghet hmiah a, rilru tihnat loh hram ka tum bawk.

Dar 12 pelhah ka mu ve chauh a, mut hmunah chuan ka inngaihtuah buai khawp mai. Engahmah ngai lo angin awm zui ve ta ila a mi ngaihdan tur chu ka hrethiam ve rûak a, ka rilru puthmang ang hi lantir chhunzawm zel ta ila engtin nge a lo ngaih ang, hmeichhe sihhnip leh lepchhiah anga ngaih ka ni tawh zawkin ka ring a, duhthlan tur ka nei chaurau hle a ni.

Engtiang pawhin min lo ngai dawn sela chân tur dang ka nei tawh lo a, thil thleng tawh pawh siamṭhat theih a ni hek lo. Hmaichhanah ka sawipui anga, a bak chu a mi chhan danin a hril chho zel turah ka ngai. Ka duh tih ka pha thei lo a, ani pawh khan a chiang tawk hlein ka hre bawk a, inthiam lohna chhete tal a neih ve erawh ka beisei, min hnungchhawn a duh anih pawhin ka laka a inchhuan viau erawh ka remti bik lo ang.

Ka tho tlai deuh a, hmanhmawh fein naupang tiffin tur ka siam a, tukṭhuan pawh ei loin ka va thlah bawk. Ka haw leh chuan pi Zaii'n chaw a lo ei tawh a, vawiin chu Muantei dawr ka nghah pui ang ka tih rilruk laiin Jenusi message ka dawng hlawl. "Lawmsanga nen kan lo kal dawn a, a ngaiah khan inhmu khâwm lawk ang u," tih hi a rawn thawn a, dawra chhuk ka tum uk tawh chu ka insiam leh sawk sawk a, dar 12 bawra an lo thlen dawn vangin Muantei chu  Tluangtluanga lo va lam turin ka ti a, a u zawk erawh a bang tlai deuh ṭhin a, ka va hruai hmanin ka ring.

Min lo call leh hun pawh nghak tawh loin kan inhmuhna tur hmun lam chu ka pan a, ka va thlen chuan dar 12 a la ri lo deuh. "Ka ṭhiante an lo kal dawn a, pali kan ni ang," tiin dawhkan pakhat chu ka hauh a, customer tam lai a ni naa tumah an rawn ṭhuttir bik lo. Sana chu ka bih leh ṭhin a, dar 12 pelh hnuah pawh an la rawn lang mai si lo a, dawr neitute pawh chuan min rawn thlek zauh zauh tawh. Ka mangang ta deuh chuan Jenusi ka va call a, "Kan lo kal mek, kan lo thleng har tawh lo ang," a rawn ti a, chutih laia kawngkhar lam ka va hawi chu phone ka dah rang khawp mai.

Jda chu zawi hmel fahran hian a rawn pen lut a, hoodie sen duk a ha a, lukhum a khum bawk a, nidang anga a inchei loh vang nge ni a sual hmel loh sawtin ka hria. Ka en reng laichuan min rawn melh fuh ve chat a, a ding mar deuh at a, dawhkan dang a melh zui bawk. Mahse, tumah midang la rawn thleng hek lo ka lam bawk chu a rawn hawi leh a, a rawn ṭhu chak vak lo tih chu a chiang reng.

Mit lasawn duh loa ka en reng siah chuan phur loh hmel fahran hian a rawn phei a, ka bulah pawh rawn ṭhu duh loin ka epah chuan a ṭhu a, mi pawh a melh ṭha duh vak lo, a awmdan chu min zah deuh emaw tih mai tur a ni, chutiang rilru chu a put ka ring lem lo a, min pehhel a duh vang zawk anih ka ring. "Midang an la rawn thleng nange?" a tih pawh chuan chhang loin ka lo en ngar a, a rawn hawi chuan min en phawk deuh.

"Jenusi'n a lo bia che em?" a ti zawi sup a, a phone a phawrh zui a, call a tum a ni maithei.

"Engati nge ka call i chhan duh loh a?" ka tih  chuan a che chu a tawp chaih a, min en pahin a phone chu dawhkanah a dahthla riai riai bawk.

"Ka nuamsam vak lo a," a'n ti ngawt pek a, Jenusi nen chuan an inbe tho si.

"Anih chu.....ka message pawh i hmu lo em ni?"

"I mu tawh em tih vel kha maw?" A ner sak a, a ngaih hoh hmel khawp mai.

"Inbia ang ka tih kha," chang khel khawla ka tih chuan, "Eng nge kan sawi anga?" a ti sam leh mai a, min tihdan chu ka duhdan a ni lo tawp mai, puitling kan ni a, heti mai mai intih hi ka duh lo, thil engmah thleng lo anga awm a tum anih ber hi.

"Hmanzan thil kha kan sawidun a ngai alawm, biak theih loha awm nghal ringawt kha eng nge a awmzia?" Ka vin angreng khawp a, eng emaw sawi ngei sela ka duh vang a ni, a duh leh chhuanlam siamin pha kual mahse pawi ka ti hek lo.

"Ka ruih em kha, khatiangte chu i hrethiam ve turah ka ngai asin," a ti a, tukverh thlang lam a hawi zui daih a, dawhkan chunga a kut erawh a ti che det det a, a awmdan chu ka hrethiam rang khawp mai.

"I ruih vanga thilthleng palh angah ngai se min duh a ni maw?" 

"Ka tihpalh anih kha, ka thiam loh tih ka pawm thlap," a ti chu ka helh bawrh bawrh.

"I thiam loh nia i ngai anih chuan engah nge i ngawih reng si a..?" min rawn en ran ran a, "Ngaihdam ka dil thei mai lo che em ni?" a ti teh thlawt a, thawk ka lo la hawk..

"Ngaihdam indilna chi a ni em ni, anih leh ka lo awmdan kha engtin nge ni ve dawn..?" ka ti chu min chhan dan tur a hre lo nge nur zet hian min melh a, a rilru a buai hmel viau bawk.

"Min chhang duh lo law law rawh, i zawngchhang lo tih chu a hriatreng alawm," tia za lo fea ka nui chu min en chik ngang mai. 

"I zawngchhang em ni?" a lo ti khauh a, kan inen ran ran.

"Ka ngaihtuah tluk tluk che," zawi tein ka ti a, ka tîm ru viau nain a hmuh laia zam emaw, tîm hmel lantir chu ka duh lo.

"Hmeichhe lerh leh lepchiah deuh anga awm kha chu tum duh suh," a ti mauh mai a, eng rilru nge maw a put ni!?

"Hmeichhe lerh leh lepchiah ka nia lawm, vawikhatte pawh ka hnar loh che kha.." ka tih laiin, "Kha chu ka thiam loh ka tih kha.." a ti leh a.

"Mahse, kei chuan ka ngaihtuah zui reng, vawikhat chauh thleng turin ka ngai ve hleinem..." A ban a rawn phar uaih, "Khatiang khan awm vel duh suh, ka thiam loh ka tih pawha i pawm si loh chuan i thiam lohah ka ngai ang," a ti a, ka hrethiam hauh lo.

Chutah, ka mitah tak min rawn en chungin, "Lerh hmel deuhin i awm a, awlsam leh zuamawm tak anga i awm vang vek anih kha," a ti leh ta mai a, "Engtin maw min sawi a?" ka tih laia ka aw chu zawi tak a ni.

Lawm loh hmel fahran hian min en a, "Ka hmuhdan che anih chu, khatiang mi ni turah khan ka ngai che a, chuvanga mutpui mai che pawh ka ni, i virgin tih min hrilh ni la chu..." a ngawi zui daih a, thawk a la deuh ham ham bawk.

"Ka virgin tih hria la min mutpui dawn lo i tihna em ni?"

"Aw, dawn teuh lo mai, hman zan kha chu inhrikthlakna chauh a ni.." Ka nui tawp, han chhân ngaihna pawh ka hre ta lo, a inhrikthlakna chauh maw ka lo nih a!?

"Chuvang chu ania ka thiam loh anga ka pawm, a rui zawk ka ni bawk a.." a tih leh chuan, "Mahse, ka tan chuan vawikhatna i nia.." ka lo ti zawi sep a, ṭawng leh ka tum laiin "Ka hria," a lo ti bul hmuk.

"I tan chuan engmah a ni chuang lo a ni maw?" ka tih leh laichuan chhungrilah ka na vawng vawng mai.

"Chutiang zawngin ka sawi loh kha," a ti leh bawl a, "Hetianga min tih duh hi ka ring miah lo," tiin ka melh tlawk tlawk.

"I duh chuan min haw mai rawh, ka hnial buai dawn lo che,"

"Ka haw lo ang che, ka duh vang che a hnar lo che ka nia lawm, inhrikthlak i duh leh hunah pawh min rawn pan dawn nia," tiin ka han nui lui a, ka rilru puthmang chu ka la thup ve fan a, ani erawh a meng buai nak thung.

"Khatianga i awm kha a ngai lo, engmah lo angin ka ngai lo bawk," a tih chuan ka hrethiam leh ta lo. 

"Hmanzana thil thlen chhan kha chu ka ruih vang leh ka zuam vang che a ni ka tih kha," a tih zawm leh a.

"Anih tunah eng nge?" ka tih chuan a ngawi ren rawn a, a rilru a buai viau aniang dawhkan chungah a kutṭang a ti che zeuh zeuh reng.

"I lo va han sual em em," ka tih rualin a che chu a tawp chat a, "Nang pawh," a ti ringawt.

"Engvangin nge sual min tih ve ngawt a?"

"Min bum alawm,"

"Ka bum che a maw?"

"Inthiam lohna ka neih zui pawh hi ka ring hleinem, mi lah chu i lo duh tak tak lehnghal a," a ti nuah nuah a, ka en reng lai chuan a rawn kun hnai a, "Midang hrilh miah lo ang che, anih loh chuan engmah thleng lo angin ka awm ang," a ti a, min ti hamhaih angreng khawp mai.

"Midang ngaihdan chu eng atan mah ka ti ve lo," ka tih chuan, "Ka ti alawm keiman, sawi lo la a ni mai, ka thu awih la i tifuh zawk ang, ka thu awih lo hmeichhia ka duh miah lo ania," a ti leh khar khar a, chu chuan kan inkarah eng nge awmzia a neih pawh ka hre ve lo.

"Kan pahnih chungchang chauh sawi rawh, mi ngaihdan kha engahmah ka ngai lo aw.." 

"Kan pahnih chungchang anih chu ka sawi, midang bulah min ngaizawng emaw, min duh angin awm miah lo bawk ang che, chutiang i thei dawn lo anih chuan chhete pawhin ka ngaihsak dawn lo che ania.." a ti leh a, ka hrethiam ta chiah, hepa mai mai hi aw.....

"Anih chuan..." a lo bu zauh a, chumi hnuah dawhkan melhin a kun zui reng a, "Min duh tak tak lo anih kha," a ti chu a rawn hawi chhuak leh rang khawp mai.

"Induhna hman pawh a awm em ni, sex kan hmang dun nghal ringawt a, kan mizia pawh kan inhre ṭan dawn chauh anih hi, ka hming dik tak pawh i hre miah lo lehnghal," a ti hluk hluk a, "I hming pum eng nge?" ka lo ti ve zat.

"Nakinah ka la hrilh ang che," ti maiin min chhang a, waiter koin lemon ice tea a chah a, ka duh ve em min zawt bawk.

"Duh lo," tia ka chhan hnu chuan waiter chu a kal leh mai a, Jda chu dawhkanah chungah a rawn bawk thlawr a, kawmthlang huan lam melh chungin a ngawi leh rauh rauh tawh. A lua ka va kuk chu ka kut a lo man chawt a, "Engtin chuan nge kan awm dawn a?" ka tih chuan a rawn tho ṭual ṭual.

"Mi pawi kan khawih pawh a ni chuang lo a, i duh dan ang chuan kan awm dawn nia," tiin a han ner zui sak a, ka lo nuih chuan min nuih ve lek lek a; mahse, a nui ṭha duh vak lo.

"Ka thu awih viau ang che," a tih chuan ka lo  bu ve sawk sawk.

"Nang zawng hnar i har anih hi, i hmelṭha tel kher bawk si a.." Dar a kan ak a, ka lo nui chhuak hak. "Mahse, zep tur ka tih kha aw, Jenusi bulah ngat phei chuan inmelh vak pawh a chi loh ang, duh tut tut tur chein min beisei lo bawk la, thil dang ngaihtuah tur ka ngah teh mai ania, tunah phei chuan hmeichhia buaipui thei ka ni miah lo zawk a, khawngaihthlak viau ni lo la chu ka buai duh miah lo ang," a ti leh nghat nghat a, a awmdan chu a lai deuh ṭutin ka hria.

"Tlem chuan min duh ve tho ti raw..?" ka ti chu a lo chek hlak a.

"Kan la hre mai dawn alawm, lo hmanhmawh suh; mahse, eng lo..." a ngawih laichuan a mitah ka lo en ran a, a hmui a han pet fuat a, a rawn kun hnai zui bawk. 

"Ka peih zen zen dawn lo ania, rilru hahna tur thil pai hi ka ngah ve a, min beisei reng lo la ka duh, eng emaw chang chauhin kan ti ang," a ti mauh mai a, tui ka in laitak a lo ni bawk nen ka hak nghal bawrh bawrh.

"Awi awi...chutiang te.." sawi pawh zahthlak hian..

"Chutiang zawngin ka beisei hlek lo che aw.." Ka ṭawng ring khawp mai, ani lah chuan min lo khap vut a, kun hniam turin min ti bawk.

"Ṭawng zawi rawh," a tih laiin, "Min ngaihdan kha ka duh miah lo ania," ka lo ti ve khar khar.

"Anih eng nge i duh a?" a ti chu thawhlawka dawhkan tauhtir bur mai ka chak a, ka inhumruh ṭun mai.

"Eng nge duh tura min lo ngaih a?"

"I zawngchhang vang a ni lawm ni,"

"Hmelphak, ka lerh tih chu ka pawm thei, mi hurherh ka ni kher lo aw, ka duhna che hi a tenawm i ti em ni?" Rum lutukin hnai feah ka melh. A'n nui deuh hak a, "I duh chu sawi mai teh," a ti zui a. A lu chu nem sawnin ka ṭhu ngil at a, a ṭhut ṭhat hma chu engmah ka sawi duh lo. A han ṭhu ṭha a, min en chungin mitko a san deuh ar a, ka thutak hmel ta deuh nge ni ka ṭawng hun a nghak ve ran a, ka ngaihtuahna chu a vir mup mup mai hian ka hria.

"Ka duh chu nangmah kha i ni, inngaihzawn tak tak ka duh, i bialnu ka ni anga, ka bialpa i ni bawk ang," chiang leh fiah fek fawka ka tih laichuan min en ran a, eng emaw a sawi ve ka rin laiin a ngawi tlat, chet pawh a che eih lo zawk a ni.

"Thil tak tak ka duh, kan bul ṭandan dik lo viau mahse, ka ngaihdan leh i ngaihdan kha chu a inpersan khawp mai, keichuan min duh tak tak turin ka duh che," ka ti leh nghat a.

"Vawilehkhata induh nghal mai theih a ni hleinem, dawhthei ve deuh la maw le" a'n ti leh hram a, "I tum dawn alawm, sex vang ringawta inlaichinna siam te chu eng nge a hlutna awm ang, i ngaihzawng angin min en la, min biak pawhin i ngaihzawng anga min biak ka duh, min en pawhin i bialnu angin min en tawh la, ka biak che pawhin ka bialpa ka bia a, ka en chein ka bialpa ka en tih pawh hre tel bawk la.." thawk a'n lo la leh hluai pek a, 'I duhthawh lutuk' minti hmel hi a puin ka hria.

"Engtin nge khatiang ringawt te duh tura min ngaih theih a?" ka tih chuan, "I sawi danah kha chuan ania lawm," a lo ti zawi sup a, em em hian...

"A awmang lo em mai a, min duh tak tak ka beisei tih ka sawi tumna anih kha, bakah...ka vawikhatna a nia, a nuam viau turah i ngai em mawni le, i zei loh tehreng nen..." a rawn ṭhu ngil hluai chu phawk fein ka lo en. "I sawi i sawi a, a tenawm zo vek dawn alawm le," ka ti leh chu a han duh loh hmel khawp a, "I thil duh kha chu ka pawm vek thei; mahse, zei lo tih tel lo khan," a lo ti vei nghat a, sawi belh leh pawh a zahthlak tawh.

Dawhkanah chuan a kiu a rawn nghat leh te te a, chutah nui lek lek chungin min en a, "Chutianga awm kan tum dawn anih chuan ka thu i awih viau a ngai ang, ka rilru hi hneh a har viau maithei a ni, i awmdanah hian duh loh deuh deuh ka nei lehnghal a.." tiin a han meng rum zui a, kei chu ka lo meng tal tapin ka ring.

"Mipa bula awmdan i thiam tawk lo a, nelawm i tum vang nge ka hre lo, i zuamawm a, i lerh hmel em em bawk, chutiang chu ka bialnu landan turin ka duh miah lo ang," a ti nghat nghat a, chutiangah chuan harsatna pakhat mah ka nei lo, keichuan ngaihzawng pakhat, ka engkim nitur pakhat chiah ka duh a ni.

"Ka lerhsan lo ang che, nangpawn min lerhsan bik lo la," 

"Lerh te chu sawi teh suh, ngaihzawng neih ka peih loh laitak zawk a ni,"

"Min duh ve deuh vang a ni thei em?" nui chunga ka tih chuan, "I ring em?" a lo ti zauh a.

"Ring ve deuh e," ka tih mai laiin, "Engmah i hre lo," ti hmakin min chhang a, ngei thut thut a awl dawnin ka hria, a ṭawngkam leh mizia ve reng zawk nge mawni? 

Eng emaw sawi leh ka tum laitak chuan kawngkaa Jenusi leh Lawmsangpuia rawn inzuilut ka va hmu a, Lawma a hawi kual laiin Jenusi chuan min rawn nuihsang mai. Lawma chu a nghawk zauh a, chumi hnuah kan ṭhutna lam an rawn pan a.

"In awmna a rei tawh em, i nu thil tur kan va lam hmasa a," tih pahin Jenusi chu ka bulah a rawn ṭhu a, Lawma pawh Jda bulah a ṭhu ve nghal a, "I damṭha em?" a rawn tih chuan ka lo bu zauh. 

"Kan rei hman lo a, eitur chah nghal mai ang u aw," tiin Jenusi chuan menu a bih kual thuak thuak a, ka ei duh min rawn zawh avangin ka enpui a, kan en chhung zawng chuan kan epa ṭhu te chu an ṭawng lo a, Jda phei chuan thlang lam a hawi ngar ngar a, Lawma'n a phone a khawih thung.

"Eng nge in ei ve dawn?" Jenusi'n a va tih chuan, "Ka ei duh i hriat kha," tiin Jda'n a lo chhang a, Lawma zawk chu a duh a thlantir a, Jda ei duh Jenusi'n a ziah sak lai chu ka lo en ve reng bawk.

A chahfel hnu chuan thlanglam hawia Jda ṭhu chu a va thlek dek dek a, tui bottle-a va nawr a tum laichuan ka'n ko thut mai a, Jda chu a rawn hawi rang khawp mai. "A titau hman a ni maw?" Jenusi'n a ti chu rum fein a rawn melh a, Jenusi'n a lo nuihsang thung.

"Aizawl lama hotel neitu kha a lo kal leh dawn hnai em lo hriat tum rawh aw, tun aṭang chuan demand tute lam kan enthlak a ngai dawn a, Jda kutah kan innghat rih, Minai'n an hmel a hre vek a, hmanzana lo kal pa leh a nula rawn hruai pawh kha tute nge an nih hriat chian a ṭha ang, i hnathawhna nu saw dawp chhuah dan a awm ka ring a," Jenusi chuan a ti zung zung a, ka lam lo hawiin, "I pa thawhpuinu miss Mathani kha lo kawm nel deuh bawk la, Veroi leh i pa chungchang i zawt dawn nia," a ti zui bawk a, a tihdan ngai tein kan tihtur min hrilh leh ṭan der a, hna semtuah a inngai deuh tawhin ka hria.

"Eng nge in tih ve dawn a?" ka tih chuan, "Chhungkaw thil rel fel ngai a awm nual mai," tih pahin Lawma a va melh zauh a, Lawma chuan a chhang lem lo.

"Anthonya khan hriat a neih nual ka ring a, kha chu Zoa...." a ṭawngsual nge ni a ngawi dat a, "Anthonya chu Jda leh Minai ten lo buaipui bawk se, khaw lama thil tih ngai chu in buaipui turah ka dah deuh tawp mai, hmun hnihah kan inṭhen thei dawna a tihzia, kan tan helama lo kal zen a rem si lo a, inhmuh khawm pawh hi kan nei zen zen thei dawn lo a, phone hmangin chanchin kan inhrilh zung zung dawn nia, Lawmsanga nu leh pa kan hmin a ngai bawk a, pu Muana hi engtin nge kan tih dawn kan la ngaihtuah a ngai bawk a," Jenusi'n a tih leh laichuan, "Kha pa kha a tel ve loh ka ring lo, a siamchhuaktu a nia, a tel ve em em ang, rinhlelh an nih hnuah inthup a tum mai mai anih ka ring," Jda'n a lo ti a. 

Chutih laia, "Kan la hre mai dawn alawm," Lawma'n a lo ti chu a va melh rum titih a, kan mipate pahnih chu an inngeih vak dawn lo a ang.

"Khalam kha chu sawi rih lo ang u, kan pitari hian thil tihruk a nei tlatin ka hria, nimin khan grape huanah thil a zawnglai niawm tak ka hmu a, 'Hmanrua ka zawng' a ti tak nain ka va hmuhna chhek inah khan hmanrua engmah an dah lo a, ka va luh laitak phei kha chuan wine barrell a lo hawng kual a," Jenusi'n a tih leh chuan, "Rinhlelh loh pawh i nei tawh mang hleinem le, pi Lalpuii te chuan hna a thawhpui ve ziah alawm, pu Muana wine buaipui reng hi a ning lutuk zawk," ka lo ti zung zung a, ka thilsawi chu a ngaithla lo nge mawni, "Wine kha lo zawng ve nita se a awmna a hre lo tihna anih hmel a, hre ta se engtia tih nge a duh ang tihlam te ka lo ngaihtuah mai mai a, an nupa kar pawh hi a fel chiah loin ka hria, zep ruk an nei ve ve anih hmel tlat, " a tih zawm leh luam a.

"In hmun chungchang kha anih chuan an pa tibuai loin a lei ve thei a, râwn kher a ngai a ti lo pawh a ni thei," Lawma'n a tih chuan, "A pasal hmasa kha engtia tlanbo ringawt nge maw a nih le, i nu lah khan a fel thu leh a fate a duat thu a sawi bawk si a, a fate rawn hmu loa lehkha a rawn thawn ṭhin a ti te kha a mak dangdai riau, a tlanbo tak tak anih chuan a awmna an hriat emaw, a chanchin an hriat a duh lo ngei anga, an sawi ang tak tak hi nisela chuan a fate a rawn biak zui zel ka ring bawk a," a ti leh nghat nghat a, "A tlanbo i ring lo em ni?" Jda'n a tih chuan a inngaihtuah deuh vang vang.

"Nu Ṭhatei chuan lehkha a rawn thawn ṭhin tih chu a sawi tawh," ka lo ti ve zauh chu, "A awmna a hria em?" Jenusi'n a lo ti vat a, lu ka thing ringawt.

"Thil rutuin lehkha a thawn a, a tlanbosan a fate a rawn ngaihtuah ang takin a lang bawk a, pawisa vang chauha tlanbo a nih hmel bawk si a.." a tih chuan tuman kan chhang lo.

"A la dam anih chuan a fate hi a rawn ngaihven ruk reng ka ring, he pa chanchin hi ka hrechiang chak khawp mai," a tih chuan, "Kan thil buaipui nen a inhlat lutuk, chung thleng thlengin hriat tum suh," Jda'n a lo ti hluk. "Ngawi rawh, eng emaw hi a awmin ka hria alawm, ka ngaih a ṭha lo deuh tlat," pakhat chuan a ti leh a, "Veroi nen inzawmna a neih loh chuan anni chhungkaw thil buaipui lo la a ṭha zawk ang, a khamawm ṭan teh ania," a tih leh laia Jda aw chu a chang bul a, anni pawh hi engkimah an thu a rual bik lo a ang.

"A thih tawh i ring deuh em ni a?" Lawma'n a lo tih chuan Jenusi lam kan hawi ṭhap a, dawhkan melh chungin a lo inngaihtuah mûk khawp mai.

"Ka hre bik lo, a lehkhathawn chu engtik ami nge hriat a chakawm, i nu Ṭhatei chu i lo zawt dawn em niang?" tiin ka lam a rawn hawi thut.

"A pawimawhna a awm dawn em ni a?" ka lo ti a, "A thi tawh nge a la dam tih hriat ka duh deuh a," a ti ve mai bawk a, ka zawhsak tur thuin ka chhang ve bawk.

"Lo thi tawh ta se..?" lo titu chu Lawma a ni.

"Ngaihdan pawh ka nei thiam rih chiah lo, pu Muana hian hriat a nei maithei, nangman tih dan i hriat ka ring, i ṭangkaina lam tak aniang," tiin Lawma chu a han nuih deuh sang a, Lawma pawh a nui ve suk. Hetiang hi a ni maw a mipa lêm dan ka lo ti rilru a, mipa rilru hneh chu a lo thiam ru nek anih dawn hi, hei bakah hian eng thil dangin nge a tih lawm ṭhin ang le, a han fak hlek pawhin a ti nui nghal mai thei chu ania.

Kan eitur chah a lo thleng a, eipahin Jenusi ṭawng kan ngaithla a ni ber. Pu Muanate chhungkaw ho mizia min zawt a, Lawma nen kan hriat ang angin kan chhang a, kan ṭawng kar lakah Jda chu sa a va pe leh zauh ṭhin bawk a, Jda chu a lawm hmel em tiin ka lo chîk ṭhin a, a nuih loh vangin ka hrethiam lo viau thung. Mahse, Jenusi'n Lawma a han biak deuh chuan nin hmel deuh hian a awm ṭhin a, a thîk deuh em mawni ka ti rilru hial mai. Kei lah chuan Jda sa a pe ṭhin chu ka lo ning ve em em a, Lawm pawh chuan a mitmei deuh rengin ka hria.

Thil kan ei zawh hnu chuan kan tihtur chu a sawi nawn leh dap dap a, "Ka hmanhmawh tawh," ka tih vangin rei kan ṭhu zui tawh lo. Kan thil eiman lah chu Jda'n a pe vek a, han pek ṭhen ve ka tum lahin, "A ngai lo, a nei alawm," Jenusi'n a lo ti hmiah a, Jda chuan lungawi lo hmel a pu lo naa ka lo lungawi loh pui deuh. Jenusi hian a hman ṭangkai theih ang ang a hmang zel maiin ka hria, ṭhiante neih eisak ṭhin chi a ni zawk nge mawni?

Pawn kan chhuah hnu chuan anni pahnih chu scooty-ah an chuang a, "Ka sawi kha hre reng ang che, thil eng emaw a awm anih chuan ka rawn la chhuak nghal dawn che ania," tia Jda'n Jenusi a bia chu ka hrethiam zan lo. Pakhat zawk chuan, "Min ngaihtuah suh, nangmah kha i lo inenkawl ṭha dawn nia," tiin a lo chhang a, "Anih aw Mina," tia Lawma'n ban a rawn vai chu tawitein ka nuih let a, an tlan chhuah hnu chuan thawk ka la hluai ringawt.

"Thlah i ngai lo ti raw?" rawn titu chu ka han melh rum leh zat a, min thlah tura tih hma hma chuan a...

"Ngai lo mai rawh se.." Ka tih rualin kal nghal mai a tum a, ka ko ding leh rih.

"Zanah lo kal la, titi dun mai mai ang, inhriatchian nan titi dun kan ngai," A lo bu nghat a, "Ka rawn hruai chhuak dawn che nge, ka luhchilh dawn che," a tih chuan ka nui hak.

"Inluhchilh chu ka duh tawh lo," A rawn kal hrat a, lo kun deuh pah chuan, "Ka rawn hruai dawn che nia," a ti a, ka biak leh hmain a kal nal nal bawk. 

Auto lain dawr lam ka pan a, ka va thlen chuan customer an lo awm a, counter-ah Tluangtluanga'n Muantei phone a lo khawih mial mial a. "A pi a awm tho sia, i dah chho nghal mai zawk lo a ni," ka tih chuan, "A khua a har ka ring ka ring deuh a, an ṭhenawm naupangte an awm bawk si lo a," a lo ti var a, Tluangtluanga chu tiffin a ei zo em tihte zawtin ka be luam a, a homework ka ensak bawk.

Customer chhuah hnu chuan inah ka chhohpui a, inthlak pahin a nu kan bia a, nu Ṭhatei chuan inrinnia an lo haw tur thu a rawn sawi chiang thei tawh a, hruaiturin pa Dinpuia leh pu Muana an kal dawn niawm tak a ni. "Bawihate unau kha duh leh lo kal ve sela," a rawn ti bawk a, dawr bungraw lak ngaite min zawt luam a, rei tak erawh kan inbe lem lo. Kan inbiak zawh hnu chuan dawrah ka chhukpui leh a, a û hruai turin ka chhuahsan leh thung.

Tlai lamah chuan ṭhenawm naupang an lo leng a, sitting room-ah toys an khal a, keini pi Zaii nen eirawng kan bawl dun a, a khat tawkin ka phone chu ka en leh ṭhin. Va biak chu ka chak viau a, sawi tur erawh ka hre lo hle, kan inbiak dante ka ngaihtuah let a, mahni tein ka nui leh ringawt ṭhin a, tunah chuan ani pawhin min ngaihtuah ve tawh ngeiin ka ring. Inthiarfihlim kha a tum viau naa min duhna a nei ve tho tih erawh ka hria, kan inhmuh hma khan a rilru a seng buai ve hle anih hmel a, engahmah ngai lo anga awm a han tum naa chutiang ringawtin mi a ngai bik lo tih pawh a awmdanah khan a chiang a, ka duh thu tlangtaka ka sawi hnu khan a rilru a siamfel thei chauh anih hmel.

Eirel zawh hnu chuan ka inhmakhua ṭan a, thim hlimah chawei ka rawt a, ka che deuh zung zung a ni ber e. Zanriah eikham veleh naupang homework ka tihpui a, zanin chu thil dang pawh tihtir loin an homework an tih zawh chuan tv an en a, a la hma deuh bawk nen chhuatte ka nawt ve leh a, naupang mut hmain ka va inbual diam bawk. Dar engzatah nge a lo kal dawn a sawi lo a, zan tlaia a lo kal chauh ka ring a ni. Pi Zaii lah chuan a tute tv en zawh hun a chang ve reng a, naupang chu mu turin a ti sek bawk a, naupang pawn an ning aniang ka pindan aṭanga ka va chhuah leh chuan an pindanah an lo lut fel tawh.

Dar 10 a pel zawt chauh a, a la hma khawp mai. Pitari mut hun nghah pahin khumah ka mu mai mai a, min lo biak hun ka chang a ni mah ang chu. Ani lah chu a reh tlawk tlawk a, a lo ṭhulh leh daih ang tih chu ka hlau angreng. A lo kal hun tur rawn sawi nachang a hre der lo a, va biak dawn lahin a hmaa ka message te pawh a la en si lo a, ka be hreh ve tlat tawh, chutih laiin Azoi message ka dawng mawlh mawlh a, a pangpar leh vawiin lama a jam siam thlalakte min lo thawn a, ṭawngkam hnih khat bakin ka chhang let lo thung.

Tv thawm a reh chuan dar 11 a pel tawh a, pi Zaii chu a mu ve tawh dawn aniang chu ka tih laiin choka leh sitting room-ah chuan a tei kual sek a, a mu har reuh khawp mai, zan danga a mut hma ṭhin tehlul nen. 

Ka nghahna lamah keimah zawk chu ka lo muhil daih hi a lo ni a, zan lai pelhah Celine dioni zaiin min ṭham harh hlawl mai. Ka harh lah chu ka han harh chiang khawp a, phone ka en chuan dar 1 a lo ri lek lek tawh. Midang call chu nise ka chhangin ka ring lo; mahse, min call tu chu ka nghak rei lutuk tlat a ni.

"Hello.." ka tih rualin, "Kawngah ka awm," a rawn ti thum dut a, parda ka va keu chuan chhak lam kawngpuia a ding chu ka han hmu nghal a, "Hmanhmawh la," a rawn tih chuan ka tho ve sawk sawk. Insiam lawk diama muhil ka ni a, ka thawmhnaw chu thlak a ngai lem lo; mahse, ka makeup erawh a fuh lo hle tawh. "Min lo nghak lawk rawh, i rei lutuka ka lo muhil hman alawm," ka ti zung zung a, min chhang lem lo thung.

Thawmdim deuhin choka lamah ka phei a, ha ka va nawt sawt sawt a, chumi hnuah ka sam khuihin lipgloss ka inhnawih a, perfume ka han inkap te chu thawm ka dim khawp mai. Tukverh ka hawn laichuan bike aṭangin a lo chhuk tawh a, a zial zuk êng de va va chu thim zingah a langchiang hle bawk. Ka chhuak ru lai leh tukverh ka khar laite chu min lo thlir ve rengin ka hria. Muangchangin ka pan chho a, a bul ka thlen rualin, "I va rei em em ve?" ka'n ti nghal thawr a, a inchei dan mawlh chuan mit a la.

"Khawi aṭangin nge i lo kal a?" ka tih leh laiin a bike lam a pan a, "Hna ka thawk," ti maiin min chhang a, a mood a ṭha vak lo emaw tih tur a ni.

Bike-a ka va lawn tur lah chu chîk fahran hian min lo en a, "Eng nge?" phawk fea ka tih laiin, "Khawia kal nge i duh a?" zawi deuh tak hian a ti a, chu lam chu ka lo ngaihtuah thleng lo reng reng.

"Ka hre nang, khawiah nge kan kal ang?" Thawk a'n la deuh halh a, "Chuang phawt teh," a tih takah chuan ka ṭhu kai ve sawk sawk.

Chak fêin a tlan chhuak a, veng tawn tirh lam a pan a, zan boruak reh leh vawt reih rawih hnuaiah khaw chhung kan tlanpel zar zar a, enghelh nei lo eng lêkin rilru a hahdam a, thaw a veng huai huai bawk. A kawnga vawn pah chuan, "I theihnghilh emaw ka lo ti hman alawm," ka ti lang lang a, "Ka buai deuh a," tiin min chhang leh mai a, a hnunga han bei chu ka chak viau naa ka insum ve tlat rih a, eng nge kan sawi dun ang tih mawlh chuan rilru a luah a ni.

Khaw pawn kan thlen hnu chuan culvert niawm tak bulah hian a ding a, kan dinna bul maiah chuan tlakdal atana siam niawm tak cement chhun pawn hi a awm a, a chhak  hla vak loah chuan in niawm taka êng va va hi a awm bawk a, a kawtah chuan motor te pawh a dingin ka hria. 

"Khi lai hi eng hmun nge ni a?" tih leh chhuk ka rual a.

"Vai camp anih khi, kawng siam ho," tih pahin a bike chu a hung ṭha zui a, kan awmna lai chu kawi zau lai a ni a, a thim deuh avangin a nelawm tehchiam lo.

"Ninja i va ang ve?" tih pahin tlakdal chungah chuan ka va ṭhu a, "Hna ka thawk alawm," tiin a jacket ipte a zen a, eng emaw hi a rawn phawrh a, chewing gum a niin ka hria.

Ka han khawih zuau a, "Ka ṭhial peih lo," ka ti leh rih a, ani chuan kheh ri rak rak.

"Pangpar rim i va nam ve," tih paha a lo ṭhu chu ka lo nuih var var.

"I lo kal har lutuka, ka lo chhuak duh tawh lo ṭep a ni,"

"Ka awih lo e a,"

"Engah nge i awih loh ngawt, ka mutui hman lutuk alawm,"

"Jeans kekawr nen khan maw?"

"Rawn kal lo la chu......ka ngei ngawt ang che," A nuiin ka hria. Ka va thlek a, a thim leh lutuka a nui hmel pawh a hmuh chian theih loh.

"Eng nge?" a lo ti vut a, "Engmah," tiin ka ṭhu ṭha leh vat a.

"Sawi mai la, zan a rei tawh hi..." tih leh pah chuan zial a ṭan a, "Thil ka zawt char char dawn che," ka tih chuan min chhang lem lo.

"I hmingpum chu eng maw?" ka ti hmasa ber a, "A tawpah ka hrilh ang che," a tih laia a aw chu a nui aw lek lek.

"Aizawl khua i ni tiraw?"

"Umm.."

"Nu leh pa i la nei em?"

"Um.."

"Anih, unaute?"

"Aih.."

"Eng hna nge i thawh ṭhin?"

"Hna ka nei lo," 

"I nu leh pa ten an la chawm che em ni?"

"Ni mai ang chu," 

"Bialnu i ngah tawh em?" ka tih chuan a ngawi daih a, ka va en chuan zial a lo fawp vang vang a, chutah ka lam rawn hawiin, "Ngah lo," a ti zawi sup a, ka lawm ru ngang mai.

"Keipawn ka la ngah lo," nui chunga ka tih laiin, "Ka awih lo," a lo ti bawl a, ka nui tawp hmak.

"Engah nge i awih loh ngawt, min hriatchian bik miah loh kha aw," ka ti khar khar a.

"Hrechiang bik lo e," a ti leh mai a, zawhna min zawh ve pawh a tum lo em mawni.

"Min hrechiang la chuan min ngaihdan a dang viau ang," 

"Chuti maw," tih pahin min rawn ṭhuthnaih a, "Farm-a awm saw i bialpa hlui tih ka lo hre tawh a," a tih laia a awki chu mi deu lam rawng a kaiin ka hria.

"Tunge hrilh che a?" tiin ka han zawt ve bawk a, Jenusi a ni ang tih chu a chiang reng.

"Ka chhui che alawm," tiin min chhang thung a, tak tak han ni se ka ti.

"Lawma nen chuan rei lote chiah kan inngaizawng hman," 

"I ṭhen nge, a ṭhen che?" 

"A ho em mai a, chutiang ka sawi peih lo, i duh leh i ṭhiannu chu zawt mai rawh," Ka awki ah chuan ka lawm vak lo tih a hriat ka ring. 

"A duh ang i pek loh vang aniang a," a ti chu ka han helh khawp a, rum fein ka va melh.

"Awm pawh kan awmfal dun ngai lo, i ngaih ang kha kan ni lo e aw," ka ti let hlak a.

"Awmfal dun ta ula.." a lo tih chuan chhan ngaihna ka hre lo, ka ngaihtuah loh lam hlir a ni a lo ngaihtuah ni.

"Ka sawi ve mai mai anih kha," tiin a han nui zui a, a nuih a zat loh hmel khawp mai.

"Awmfal vanga che nikhua lo turah min ngai anih kha, i bula ka awmdan hi i la hrethiam lo tih a chiang reng.." ka sawi zawh rualin ka lamah a rawn inher a, "Ka ngaihzawng hlui aikhan ka duh zawk che tih vel kha sawi tum duh suh, eng atan mah ka ti ve lo ania," a ti leh khawl a, hepa rilru put hmang hi hriatthiam a har ka ti.

"Anih eng nge ka sawi dawn a?"

"Lo mudun lo ta ila, emaw....midang bulah lo kal ta zawk ila..anih loh pawhin mipa dang lo mutpui zawk ta la.." thawk ka la hak a, eng zawhna nge maw ni ngai le?

"Nangmah kher lo ni lo ta la tihah maw i buai a, a ho ka ti lutuk, ka mipa mutpui chu tupawh nise ka duh ngawih ngawih chiah a ni ang chu, nang ni lo pawh ni la chupa chu ka duh viau ang.." tiin lehlam ka hawisan hmak.

"Chu, kei lo pawh i duh thei mai dawn anih chu.." a tih chuan ka chhang mai lo, a hmuh loh lamah ka inhumruh viau a ni.

"Mi tu emaw i lo nghah laiin ka rawn lang palh anih dawn hi," a ti zui leh zat a, a nui aw lek lek bawk.

"Nangmah i nih vanga thleng zawk anih kha misualpa, i duh duh dan khan ngai rawh, i duh leh min kalsan daih thei alawm..." a lam pawh hawi duh loin ka inpetruh ṭun mai.

"Kalsan ta che ila mipa dang i chhâi leh nghal angem?" a rawn ti pek a, ka sa zak.

"Tehreng mai, mi lerh leh lepchiah ka nia lawm le, engvangin nge mipa dang chu ka chhâi loh..." ka darah a rawn man chawt a, min kuai her sawk a ni ber.

"Mipa chu i va mamawh awm ve a," a tih laia a aw chu a chang rap, a thinrim chhan erawh ka hrethiam chiah lo.

"Mamawh e..kei ang mi lerh leh.." ka sawi zawh hmain a rawn kun thut a, ka chal a rawn tauh ri bawp mai a, ka lo 'aiah' chiam...

"Ngawi mai mai rawh.." zawi sup hian a ti a, "Mahse, nangmah ka duh che," tiin ka chhang lui leh hram a, ka hmui zawnah thawk a la ham ham mai. Tim ru deuh chungin a biang ka han tawk a, ka kut a lo hum leh chawt a, kan hmui chu a insi lek lek tawh.

"Dawt ka sawi anih kha..mipa dang chu ka duh miah lo.." ngenngawl zeta ka tih chuan, "Ka hria.." a ti zawi leh sup a, kan han fawp chu min chhang ṭha duh meuh lo. Chuti chung chuan a la inla hrang bik lo a, hmui insi deuh thaw chungin thawk kan la dun leh halh ṭhin a, chhungrila ka zam ruk zia chu aw....a hrethiam phak pawhin ka ring lo.

"Midang nei turin min duh zawk em ni?" ka aw chu zawi tak a ni.

"I ring em?"

"Ka hre lo, i awmdan hi ka hrethiam lo,"

"Anih chuan hre rawh, mipa dang i lo kawp anih chuan ka pawt sawm vek duh ang che,"    a ti chang bul a, a aw riah khâkna lang mahse, chu thu chuan min fan ngawih ngawih thung. A biang tawn tawnah chuan ka dawm a, "Nangmah chiah..'' ka ti zawi leh sep a. Chuveleh ka tukkhumah rawn dawmin min fawp a, a duhthawh ta viau mai...

A kut leh lam chuan ka kawr nghawng chu ka darah a hui liam a, ka nghawng leh awmah chuan a fawp kual a, a thaw lak a na sawtin a sosang hle tih ka hre thei. Ka kawr chhung a rawn zen a, ka kawrhnuai chhanah chuan ka hnute hmur chu a rawn hmet hrual a, ka sa pup pup a, thawk a rang em em bawk. A sama ka lo ṭham chu a duh vak lo aniang dim lo fe hmuiah a rawn fawp leh a, chutih ruala ka hnute a rawn ṭham chu a na angreng. Thawm ka chhuah hak a, a nui ri ka hre zui bawk. 

"Min dim ve la..." pangchang aw zeta ka tih laiin, "Min dim bik em ni, hman zan khan ka hnung i ham pilh hrep asin," a ti a, ka lo nui ve hak.

"I thinrim miah loh kha," 

"Thinrim lo," tih pawhin min fawp leh mawlh mawlh a, "I inchhir lo ti raw?" ka tih pawh chuan, "Ka inchhir i ring em ni," tih pahin amah si chet chuan min pawt hnai zui a, min kuah a tum emaw ka tih laiin ka beng bulah thawk a la halh a, a hmuia ka beng a rawn nul kual leh chiah chu ka ip chawih chawih mai. Min chawh thawh a tum anih ngai chuan a hlawhtling chiang hle a ni, ka thinphu lah chu a mumal loin thawk pawh a har a, rilru a nu bulh a ni ber. 

A rawn hawi chhuak leh chu a hmuiah ka lo fawp chawt a; mahse, a lei a rawn hman avangin ka chhang let thiam meuh lo. A kut lah chuan tihtur a han hre khawp a, ka kawr chhung a zen loh leh ka mal a chul a, ka kekawr kilhna a rawn khawih leh thuak ṭhin. 

Rawn zen mai a tum chu a khawih pha ṭep tihah a kut ka lo man chawt a, ka tawlhsawn rang khawp mai. A hmel chu ka hmu chiang thei lo naa a hamhaih tih erawh ka hria. A rawn tawlh hnaih leh rualin a hmuiah ka lo hup a, "Aih.." ka ti chang bawl a, "Engati nge?" zawi tea tih pahin ka hmuiah a rawn fawp leh zauh.

"Kan titi dun ang kan tih kha.." ka tih chuan, "I sawi zo tawh emaw ka tia sin," tiin a nui a,   ka kawr nghawng a rawn siamṭha zui bawk a, chumi hnuah ka sam a rawn hui ṭha thuak thuak a, a thawk la ri chu a la ring khawp mai. A chet dan chu ka lo en reng a, a hmui huh ka va tuai sak pawh chuan a dawh hle hle a, a rilru puthmang erawh ka la chiang lo hle thung.

"I bulah chiah hetiang hian ka la awm ania," thutak fea ka tih chuan, "Ka hria alawm," a lo ti ve vat a, kan awmna thim lutuk mawlh chu a pawi ka ti, a sawi laia a hmel landan chu ka hmu chak a ni.

"Nang pawh ka bulah chiah hetiang hian awm rawh aw...?" chu thu ka sawi lai chuan hlauhthawnna ka nei a, ani hian min kalsan mai angem, hmeichhe dang bulah hetiang hian a khawsa ṭhin angem tiin zawhna ka inzawt ruai mai.

Mahse, ka beisei loh dan deuhin min lo chhang a, "Ka ta i ni tawh, nula zalen angin inngai tawh lo ang che," a tih laia a rilru chu ka hre lo nain a aw erawh thupek ang maia khauh a ni.

"Nang pawh ka ta i ni ve ang?" 

"Ni e," tih pahin ka kut a rawn ban a, a hmuiah a chuktuah a, a fawp vang vang a. Khawvel hi ka ta nita maiin ka hria, ka hlimna chuan van a tawng mai lo ang maw ka ti...mi nghah ka nei em tih chu ka hre lo; mahse, min pantu erawh ani chauh hi a ni.

Kan haw leh lamah chuan a kawngah kuahin a hnungah ka bei hle hle a, khaw vawt pawhin rilru a la peng tawh meuh lo, a luam nuam lutuk tlat. Ka kut chu ka suih nghet sauh sauh a, mi â ang maiin ka nui leh ṭhin. 'Nula zalen ka ni tawh lo,' tiin ka inhrilh ru rauh rauh a, zalen chu tun dinhmuna ka thil thlakhlelh loh ber anih ka ring.

Kan inbul kan thlen chuan phur lo fein ka chhuk a, ani lah chuan min mangṭha nghal ringawt. "A lawmawm loh ania," tiin ka'n tum zui bar a, a nui mai mai thung.

"Kal rawh, ka lo en liam ang che," a tih pawh chuan ka melhrum zet hnuah ka inhersan a, "Hei.." a rawn tih chuan ka lehhawi rang khawp mai. "I message lo en rawh," tih pahin a phone a rawn lek zauh. Ka phone chu ka bih ve nghal a, engmah message ka dawng lo, a lam ka va hawi chuan a phone a lo hmet mawlh mawlh a, chumi hnuah ban a rawn vai a, ka message tone a rawn ri ve zat.

A tlan chhuak chu ka en zui vawng vawng a, chumi hnua ka phone ka han bih chuan, "Zoherliana," tih ringawt hi a lo thawn a, he hming hi ka hre tawh, anih chuan ka bialpa hming chu Zoherliana a nih hmel, a inhmeh kher mai; mahse, no taka lam dan avang dawn hlein kan hria, Jude tih kha a mawi daih zawk asin maw le, ka'n nui chhuak thut pek a, 'Zoherlian' tih chu thinrim laia inkohna awm a ni.

Inrinniah nu Ṭhatei te hruai turin pu Muanate pafa an lo kal a, naupang an kal ve dawn a, keipawh min sawm ve tak naaa pi Zaii lo awmpui a ṭha zawka ka hriat vangin ka hnial thung. An kal hnu chuan ka pindanah ka lut a, miss Zuali call-in a thawhpuinu number chu ka dil a, eng atan nge ka tih min lo zawt hmasa te te a, "Pangpar chungchang ania, a kumhlun chi thlana phun turte a lo neih takah ka zawt teh ang," ti maiin ka chhang a. "Tunlai chu a biak tlak vak loh a sin, school pawh a rawn kal mumal lo," a tih chuan ka hrethiam zan lo.

"A lem ve ṭhin a, rui chunga lokal te a ching a, thawhpuiten an hau alawm maw le, tunlai tak hi chuan a aiah a nau a rawn kaltir a," a ti leh a, "Ka be hrim hrim ange," ka tih vangin number chu min lo pe ve mai bawk.

Kan inbiak zawh hnu chuan ka call nghal a, "Jeminai ka nia," tia ka han insawi chu, "Eng nge ni, ka buai rih ania," a rawn ti pawr khawp a, a aw chu a rui aw viau mai.

"Hmuh lawk che ka va duh ve, zawh duh che ka nei a," ka tih pawh chuan, "Bazar turin ka chhuak dawn chiah, nidangah ti mai ang aw," a ti leh zung zung a, "I hman chuan zanah pawh ka lo kal thei alawm, in in awmna min lo hrilh la," tiin ka zawt lui leh hram a, hmuh ngei ka tum tih a hrethiam ta aniang, "Kan inah chuan lo kal a ngai lo, min lo call la ka rawn chhuak zawk mai ang," a ti ve leh a, khuaa ka awm thu leh nu Ṭhatei dawr ka nghah thute ka hrilh a, "Haw pahin ka rawn peng kawi dawn nia," a ti a, phone a dah zui mai bawk.

A rawn kal har angreng a, keiin dawrah ka lo nghak ve reng a, dar 3 pelh thleng pawha a la rawn thlen loh vang chuan ka va call sek. A phone chu a han chhang thei lo em em khawp a, ka ning ta deuh chuan message bawkin, "Zanah in inah kan lo kal mai ang," ka va ti leh ta ngawt a, chumi hnu rei vak loah chuan min rawn call let a, "Ka phone ka lo silent daih a, kan rawn kal thei ṭep e," awki damthluam hian a rawn ti a, an ina kal a hlauh vang ni berin ka hria.

"Ka hman rei vak tawh lo a, lo hmanhmawh rawh aw, ka lo nghak ang che," tiin phone ka dah a, Muantei chu in leng ka neih tur thu hrilhin counter-ah lo ṭhu rih turin ka ti bawk. Minute 20 vel a liam hnuaa a rawn thleng chu dawr hnung lamah ka lo ko phei nghal a, a bazar tak tak lo aniang engmah rawn ken pawh a nei lo, a sam chu a huh deuh a, a su zo chiah aniang, an in aṭanga lo kal a ni tih pawh a hriatthiam theih.

"Englam nge min zawh duh a?" tih pahin ka chair kawhmuh lam chu a pan a, dawr hnung kila ka ṭhutpui chu mak a tih hmel deuh.

"Ka pai'n a thawhpuite zinga a kawmngeih ber i nia, i hriatchian ber pawh ka ring a, miss Veroi nena an inkarte kha i hriatpui em, ka nu nena an inngaihzawn lai aṭangin i lo hre tawh bawk a, i hriat ang ang min lo hrilh teh?" tiin bul ka ṭan nghal thawr.

"Awi a, sawi vak tur pawh ka hre lo, i pa kha chu a hmelte a ṭha a, a rawn awmtirh lai phei kha chuan a la pathlawi a, ngaihmelhtu pawh a ngah ve a: mahse, a rawn awm aṭanga rei loteah i nu nen khan an inngaizawng a, inkhawmna aṭanga inhmelhriat an niin ka hria," a ti a, a bag zenin cigarette a phawrh a, "Ka zu mai dawn asin," tiin min rawn melh zauh. Zu rim a nam awm ka hre lo a, a mitmeng erawh a dik zan lo, rim nei lo chi a rui a ang.

"Ka nu nen khan an inhauh ngai ka hre lo a; mahse, tun hnu hian ka nu zawk hian a lerhsan ṭhin niin ka hria a, ka pa pawh kha miss Veroi nen khan eng emaw chu a awm ve tho anih hmel a, ngaihzawng an nei ru ve ve ṭhin nge mawni?" ka ti leh chu zial pak khu hlat hlat chungin min rawn melh a, "I nu chungchang chu engmah ka hre lo; mahse, Veroi kha chu i pa khan a duhsak fal a, an haw na lam a inan avangin tlai banah pawh an inphur haw fo mai, lo kal rual chang pawh an ngah," a ti sam leh mai a, ka rin aitak chuan thil a sawi ṭha duh a, zawh dan tawk thiam erawh a ngaih hmel.

"Damdawiina ka awm laikhan chaw in eikhawm ti raw?" A lo bu zauh a, "Khawiah nge in eikhawm a?" ka tih chuan, "Veroi in luahah ania, i pa kha chu a haw hma a, chaw eikham khan a haw nghal maiin ka hria," a ti zung zung a, a hmuh loh laiin ka lo ner nak.

"Ṭum khat chu ka pa phone ka khawih laiin miss Veroi message ka hmu a, zana leng turin a rawn sawm a," ka ti leh chu min rawn en phawk khawp mai. "A ni maw?" a ti he haw a, a mitmeng chu a mak angreng, dawt sawi hmel a puin ka hria.

"An inngaizawng tih chu i hre lo tak tak em ni?" ka ti leh nghat a.

"Awi, inngaizawng an ni lo ka tih kha, i pa kha chuan a ngaizawng deuh maithei; mahse, Veroi khan a duh hleinem, ani te chuan pawisa chiah alawm a duh, mipa lakah pawisa bak duh a nei lo," a ti ta hmiah hmiah a, ka va ṭhuthnaih laipawh chuan a zial chu a fawp ṭha sek sek tawh.

"Mahse, ani kha inzuar ṭhin angin an sawi a, ka pa khan a lo dawr ve maithei asin,"

"Aa..i pa kha chutiang ti chi a ni lo, thil dang vang zawkin alawm.."

"Engthil dang nge ni ang, zanah te an inhmuh ruk chhan tur dang a awm dawn em ni?"

"Veroi kha damdawi tawlhru ho nen an thawk tlang a, i pa khan a hrechhuak anih kha, midang bulah pawh ka sawi tho a, ka hrilh ve dawt ang che, a sim loh chuan i pa khan report a tum a, kei thlengin min vau, ka inrawlh ve turah a ngai tlat a, keichuan Veroi hnen aṭang bak khan engmah ka hre ve lo," a ti chu awih a har angreng, hetiang thil hre sia inrawlh lo anga a insawi chu hriatthiam a har, inrawlh miah lo hnena miss Veroi'n a hrilh duh chu a awm ang lo viau bawk, a thuruk tawpkhawk a ni awm si a.

"Ka pa khan Aizawlah khan tihtur pawimawh a nei hrim hrim em, miss Veroi hmuh tuma kal te hi a lo ni mial lo maw?" ka tih leh chuan, "Chu lam chu ka hre miah lo; mahse, an kal hma deuh kha chuan inhnialna chu an nei ngei mai a, office-ah pawh an inbe ṭha meuh lo a, an inbiakna ka hriat chhunah chuan i pa khan tu emaw ring lo turin a ti a, 'An ṭangrual dawn lo, hepa hi tunge a nih an hre tawh, i thurualpui anih chuan nangpawn i tuar ve thei,' vin deuh khan a tia, office-ah an pahnih chauha an awmlai ania, ka va luh vangin engmah an sawi zui tawh lo," a ti a, ka thil sawi leh a thilsawi dan chu a inpersan hlein ka hria, tu chungchang nge an sawi a, tute nge inthuruala; inthurual lo chu ni dawn le, han ngaihruat dan pawh ka thiam meuh lo a ni.

"Chuan i pa leh a puzawn saw an inkawmngeih viauin ka hria, khuaa an rawn kal dun hi ka hmu leh nawlh ṭhin a, nikhat phei chu post office-ah ka hmu dun a,  chumi ṭum chuan thil pawimawh deuh an tiin ka hria," a tih chuan, "Eng nge an lo tih a?" ka lo ti let vat a, a inngaihtuah deuh vang vang.

"A puzawn zawk khan lehkhathawn chungchang a zawt chiang a, 'In hnen aṭanga chhuak a ni lo maw?' a ti a, post master khan 'Stamp inbel danah kha chuan a ni thei lo, seal pawh a kai si lo, in lehkha dawn reng reng chu i kutah chiah alawm ka hlan ṭhin,' tiin a lo chhang a," a tih chuan hriatchhuah ka nei, Jenusi khan lehkhathawn chungchang a ngaihven mek anih kha..

"Thil dang hriat i la nei em?" ka tih chuan, "Aih, i pa khan min rawn hmu a, kan inbe luam a, eng nge an tih ka zawh khan, 'Kan lehkhathawn dawnna kan zawt chiang mai mai anih hi' a ti ringawt a, ka hmanhmawh ve tho avangin kan inbe rei lo," a ti a, chutih laia a phone lo ri chu phun hluk hluk chungin a chhang a, "Ka rei dawn lo ka tih kha, khawiah mah ka kal kawi lo," a'n ti vin deuh ṭhat a, kei erawh ka rilru a buai viau mai.

"Ka hawsan leh mai dawn che, ka awm loh chuan ka chhungte hi an mawng a za ruai reng a, rei tak chhuak thei pawh ka ni lo," a tih chuan han chelh luih ka duh viau a, chelh theih hmel a pu mang si lo a, duhkhawp lo deuh chungin ka zui chhuak ta bawk.

"Ka rawn be leh maithei che ania," a kal dawna ka ti chu min nuih tawi khawp mai. 

Dawra ka luh leh hnu chuan ka ṭhutna ngai bawk ka pan a, kan inbiak dante chu ka han ngaihtuah let a, kha nu khan damdawi a khawih ve tih ka chiang viau a ni. Anih loh chuan miss Veroi thil tih ruk ṭhin kha a hre hauh lo ang. Chaw an eikhawm zan khan ka pa kha a haw hma miah lo a, ka han call lai pawhin miss Veroi'n a lo chhang kha a nia, zanriah eikham hlim mai a ni lo. Anih chuan kha nu khan dawt a sawi em ni ang aw, nge nia ka pa kha midang haw hnuah a let leh zawk ni ang le, chutiang anih chuan miss Mathani hriat loh a tam hlein ka ring, engkim an hriattir lo pawh thil awmang tak tho chu a ni, ka pa kha pa fimkhur thei tak a ni miau a.

Lehkhathawn chungchang kha eng nge ni ve ta ang le? Ka pa leh pu Muana thil buaipui chu Jenusi sawi kha lo ni ta se, pi Lalpuii pasal lehkhathawn kha anih hmel a, eng vanga buaipui nge an nih ang aw...? An ringhlel tih chu a chiang a, engtiang zawngin nge an rinhlelh ang? Post offfice aṭanga chhuak anih si loh chuan siam chhawp tihna nge mawni dawn le? 

Ka rilru tibuaitu tak zawk chu ka pa leh pu Muana chu an ni. Pu Muana chu rinhlelh kai ber niin a lang si a, ka pa khan engkim a lo hriatpui tihna a ni thei angem? Heng wine leh damdawi kaihnawihah hian a lo inrawlh ve em mawni dawn le? Ngaihtuahna a buai nuai a, rilru a hah tet tet, ka pa kha pawi sawi lo ni loin, thil tisualtute nena thawk tlang an ni ang tih ka hlau a ni, ka hriat chinah lah a fihlim lo telh telhin a lang si a, a tihsual chauh hi kan chhuichhuak mai ang tihte ka hlau a, awm a nuam thei mawlh lo.

Dar 6 pelah nu Ṭhatei te chu an lo thleng a, pu Muanate pafa pawh eirawng kan bawl kep avangin chaw an ei ve nghal a, ṭhenawmte an lo leng bawk nen kan ri le lu a, pa Makima pawh rin aitakin a ṭha. Ṭhutthlengah a mutna tur kan siam a, a fate lah chuan an ngaiin an ṭhutchilh chawt reng a, amah pawn nuam a tih hmel viau mai. 

Pu Muana te haw tur ka thlah laichuan ka nu chanchin ka zawt a, "A rawn tlawh ngai lo che em ni, khuaah a rawn kal fo si a?" a lo ti let khauh a, "A damsam loh hmel em a, ka ngaihtuah deuh maw le," tiin ka chhang ve mai a, ka theih veleha ka riah phei tur thu ka hrilh bawk.

An kal liam hnu chuan Jenusi ka call a, miss Mathani nen kan inbiak dante chu ka hrilh zung zung a, "Dawt min hrilh em ka hre lo, damdawiina ka awm laia ka han call khan ka pa phone kha miss Veroi khan a lo chhang a, miss Mathani kha chuan ka pa chu zanriah eikhamah a haw a tia, ka pa kha a lêt leh nge ka hre lo," ka tih chuan, "A inkawkalh nuai mai a, tihdan dang kan zawng dawn nia," pangngai deuh hian a rawn ti a, lehkhathawn chungchang chu sawi ka han tum zuau a; mahse, engmah ka la hrechiang si lo a, ka pa an ngaihdan a dik lo ringawt dawna ka hriat vangin ka sawi duh ta lo a, ka hriatchian deuh phawt a ngaiin ka hria.

"Nu Ṭhatei chu biak ka lo tum ang, chanchin ka lo hrilh leh ang che," ka tih hnuah kan inbiakna ka ti tawp a. In chhunga ka va luh leh chuan inleng an la awm a, nu Ṭhatei chu han biak fal thei a ni rih lo. Zoherliana biak tumin pindan lamah ka luhsan ta rih a; mahse, ka va call chuan busy a inti tlat a, rei dawn chu ka nghak.

Call leh ka tum laitakin amah zawkin a lo call a, "Phone i va hmang rei ve, zaninah i lo chhuak phei dawn em?" ka ti nghal var a, "Jenusi'n min lo be zo chiah a, zanin chu tihtur ka nei dawn," a tih chuan ka thil hrilh chungchang kha an sawidun anih ka ring ringawt.

"Nichin deuh lawk khan kan inbia alawm, eng nge a rawn sawi a?" 

"Uite var ru turin min tia, eng atan nge maw a tih ni," a rawn ti bauh a.

"Tu ui nge?" ka tih chuan, "I pa thawhpui pakhat kha a nia, samkir nulian deuh kha," a tih chuan miss Mathani ngei a ni.

"Eng atan nge a tih a?"

"Ka hre bik miah lo, 'Lo va ru chhuak la, i lo kawl rih dawn nia' a ti ringawt a," 

"Engtin nge ui a nei tih a hriat a, an inhriat ṭhat viau pawh ka lo ring hleinem," ka tih chuan, "Ka zawt alawm keipawn, a kawra ui hmul kai aṭangin a hria a ni awm e, tihṭhaih a tum anih loh chuan dâwp a tum aniang," a ti bal bal a, a aw aṭang chuan a phur vak lo niin ka hria.

"Kalpui i ngai em?" ka ti chu, "I chhuak thei dawn em ni, zantira kal a ngai dawn asin," a lo ti ve mai a, "An in awmna pawh i hre awm si lo a?" ka tih chuan sir Kima va zawh mai a tum thu a sawi a, "Dawr khar hmain ka lo kalpui dawn che nia, miss Zuali ka lo zawt zawk ang, nang chu an hriat chhuah che a hlauhawm," ka ti zung zung a, min hnial ka rin laiin min hnial lo hlauh.

Miss Zuali chu message-in ka va zawt a, rei pawh nghah ngai loin min rawn chhang a, "I lo lengphei anih chuan kan inah lo kal ve rawh, Mathani te in piah lawkah kan awm," a ti luam a, "Ka lo tum dawn nia," tiin ka chhang ve mai bawk.

Phone ka lo khawih mawlh mawlh laiin nu Ṭhatei a rawn lut hlawl a, "Mut mai i tum em ni?" a rawn tih chuan, "A la hma alawm, Muantei ka zuk inkharpui ang," tih leh thawh ka rual a, pindan aṭanga ka va chhuah chuan inlengte pawh an lo haw tawh a, pa Makima pawh an pindan lamah an lo sawn phei diam tawh. "I lo chhoh hunah kawngka leh tukverh i rawn kalhṭha mai dawn nia aw, zuk inhawng rei vak lo ula," nu Ṭhatei'n a tih chuan ka thil zawh tum kha sawi ka tum ut ut a; mahse, a rem tehchiam lo a ni, a ngaih ka tihṭhat loh mai te pawh ka hlau deuh.

Dawra ka chhuk chuan dar 9 a pel tawh a, Muantei lah chu a lo muthlu lup lup tawh. Ka lua ka va khawih lah chu a han phu nasa em em khawp a, a meng bial pawp pawp mai. "I duh leh va haw tawh la, ka rawn khar mai ang," tiin ka nuihsang a, "Dar 9 a lo ti tawh anih hi," a ti a, a tho ve mai bawk a, a insiam laite chuan a la ham bai bai reng.

"I la hawng dawn em ni?" a kal tur chuan a rawn ti leh a.

"Rei lote ka'n ṭhu lawk ange, naktukah hotunuin a rawn en fel awm si a, kan inhralhna ka lo tifel ang," tiin ka chhang a, ba a ziahnate a sawi leh hnuah a chhuak zui bawk. Zoherliana nghah pahin pawisa ka remfel a, bungrua kan lakna leh ba kan dawn zat te ka ziak fel zung zung bawk a, thil lak ngai ka hriat ang ang chu lehkhaah ka ziak thla bawk a, a khat tawkin sana ka bih zauh zauh reng.

Rei vak loah Celine dioni a rawn zai a, tlar khat pawh a sak hmain phone chu ka chhang a, "Kawngah ka awm," a rawn ti thum dút. 

"Dawrah ka awm, lo tlan thla rawh," ka tih chuan phone a dah hmak a, hotel lam aṭangin a lo kal em mawni.

Pawn ka chhuah rualin a bike rawn tlan thla chu ka va hmu nghal a, ban ka lo phar vah a, zanin chu a inchei miah lo, tshirt dum, cargo pants dum leh slide dum, mawza var nen, a inhmeh phian zel mai. "I hman nghal em?" tih pahin a rawn hawi a, "Shutter hi min lo pawh pui rawh," tiin ka lo hui leh sawk sawk. Chahbi ka va lak chhungin dawr kawtah a lo ding hman tawh a, Muantei nen zuang meuha ka han pawhthlak ṭhin kha ani chuan a ban pharin a han pawt thla awlsam khawp a, a ban te lah chu a sekin thahrui a han ngah hmel hle a, a mipa hliah hliah maiin ka hria.

"Mi ui duatlai han ruk ringawt mai chu, a ṭangkai viau anih loh chuan a ho ngawt ang," tih pahin shutter chu ka kalhṭha mawlh mawlh.

"Thil pawimawh deuh a hria aniang," a lo ti mai a, din pahin ka va melh ralh a, Jenusi sawi apiang hi a pawimawh vek anih hmel hi, zawhna nei lo leh hnial buai loa tih zel turah a ngai deuh nge mawni!?

An mut hman kan hlau bawk nen chak deuhin kan tlan chhuak a, hnung lam aṭangin an in awmna lai ka lo hrilh ve zung zung. An in chhungah kan lut dawn em tih ka zawh chuan a nuih a han za khawp a, "Thil ru tur kan nih hi maw le, kan va kal zana thil bo an neih chuan min ringhlel nghal dawn asin," a ti a, a nui hawk hawk.

"Anih engtin nge kan ruk theih anga?"

"Kan va thlithlai anga, a bak chu keimah pawhin ka ti mai ang," a ti sam et a. "Chutiangte chu ka lo kal ve kher pawh a ngaih loh chu.." ka tih chuan, "Ngai nang, i lo kal ve chak aniang chu ka ti, tel ve zel i duh a ni lawm ni," a tih chuan hnung lamah ka lo nui var var. A kawngah ka va kuah hlan a, "Min ngai em?" pangchang aw fein ka ti a, "Ka hrilh lo ang che," a tih rualin ka thlah leh hmak.

Mahse, a kut lehlamin min rawn ban a, a hnung sichetin min pawt hnai a, ka kut chu a kawngah a dah bawk a, kuah te chu a duh reng si a, min ngai lo awm ang takin a han awm vel bawk a, a ruk tak chuan min vei tih ka hre reng, inlak pa viau zel a ngai em mawni..

Kan va thlen chuan dar 10 a la ri lo, an tukverh a la inhawng a, an inbul dawrah pawh tutute emaw an la titi bawrh bawrh a, dawra piah deuhah chuan bike kan hung a, a sira step-ah chuan kan inzui chho nghal bawk. An kawm chhak kawng aṭanga kan zuk thlir chuan ui chaw pekna thleng niawm tak pahnih hi an veranda-ah a lo awm a, an ui erawh hmuh tur a awm lo.

"In chhunga lut lo chuan lak a har awm e," ka tih nui nui laiin an gate kalhna chu a ti ri a, ui a rawn bauh rang khawp mai. Rei vak loah ui var tereuhte hi a rawn tlan chhuak a, veranda-ah chuan a mei a hem vat vat a, kan awmna lam chu a rawn thlir bawk a, chutih laiin ka bula mi chuan eng emaw hi a ipte aṭangin a rawn phawrh a, arsa a niin kan hria, lehkhaah a fun a, a phelh mawlh mawlh hnuah veranda lamah chuan a vawm thla zauh a, ui chuan rawn pan a tum laiin takin in chhung lam thawm a rawn awm a, "Lady, lo lut rawh.." ti ri a ni.

Zoherliana chuan thawmdim fahranin gate chu a hawng a, uite lah chuan a rawn en ve kar a, a rawn pan ngam mai lo aniang. "Lo kal teh.." zawi tea tih pahin a sa kenlai chu a han lek kang a, a kut lehlamin a hui zauh zauh bawk a; mahse, uite chu a inher a, in chhungah a lut ta daih a, pakhat lah chuan tih ngaihna hre lo deuhin a thlir vung vung mai a, ka nui ṭep a ni.

"Bike bulah khan lo zuk awm rawh, ka rei lo ang," a rawn tih chuan, "Nidangah ti mai rawh, a hmanhmawh thlak vak hleinem," ka ti mai a, "Naktukah Jenusi a lo kal dawn a," a tih chuan ka ner nang.  A kekawr iptea a phone ah chu a tla ṭep a, ka zuk laksak  chuan min en a, engmah a sawi lem lo. Chutih laichuan uite kha a rawn tlan chhuak leh a, ka bula ṭhu chuan "Kal rawh," tih leh min nam a rual a, hnial loin ka kalsan ta nal nal.

A bike dahna bul maia step-ah ka lo zuk ṭhu a, an inthlem chhuak thei mai lo aniang ka nghak rei reuh khawp mai. A phone chu a lock lem lo a, ka enkual thuak thuak a, message a delete taima viau aniang ka biakna pawh hmuh tur a awm lo. A gallery-ah lah chuan thlalak sawm bawr chiah a awm a, basketball team thlalak leh hman zana a thlalak min rawn thawnte kha an ni a, basketball a khel ṭhin ang tih ngaihna reng ka hre lo.

Chutia a thlalak ka lo bih veng veng laichuan message a rawn thleng nawlh a, JDuhawmi tih hnena aṭangin a ni a, Jenusi a ni tih ka hria. Message chu ka en vat a, "Zaninah i la thei angem?" tih tlawng a ni.

"Ka tum mek," tiin message chu ka chhang let a, a rawn typing zui a, a thil rawn thawn leh ka chhiar chu ka inhumruh ṭun mai. "I lak theih chuan kan pahnihin kan ti dawn nia, Minai kha engmah lo hrilh rih suh, a pa chungchang a ni dawn a, a hriat chi lohte pawh a awm maithei," a rawn ti pek a, hei leh chen ka puih hnua mi a la thlim duh chu ka lawm lo hle a ni.

"Aw.." tih chiah ka thawn let a, "Zan lamah aw, a ngaiah khan ka lo nghak ang che," a ti erawh ka chhang tawh lo. A reh tak vang vangah chuan a chat chu ka delete daih a, rei loteah pen thawm ka hre zui a, ka han hawi chho chu ka phâwk angreng, a rawn la thei tak tak, a uite pawm lah chuan saruh a khel mial mial a, a awm ṭha duh viau lehnghal. 

"Lo pawm rawh, i kut lehlam khan hei hi eitir la, a bauh hmain tlan daih ang," tih leh min rawn pek a rual a, ka lo pawm ve sawk sawk. Rem leh rem loin saruh chu ka eitir a, bike-a kan chuan hnu pawh chuan a la khel mial mial a, kan han tlan chhuak chuan dawr lam pawh kan pan tawh lo, veng hmawr lamah kan tlan phei vuk vuk tawh.

"Khawiah nge kan kal dawn?" ka tih chuan, "Ka inah kan va dah anga, ka thlah lehnghal dawn che nia," a ti a, in a luah tih ka hre ve leh chiah.

Rei vak loah a in luah awmna zawn kan thleng a, "Ka ṭhianpa a awm a, lo chhuk ve lo mai rawh," tiin uite chu a la vut a, rei tak pawh a zuk thang lo, a lo let leh chuan kawrlum a rawn ha tawh a, a phone min dil zui bawk a, ka han pek chuan a en kual thuak a, engmah sawi loin a ak leh mai bawk.

"Naktuk chawlhni ania, inkhawm banah chhuak dun ang hmiang," tih pahin a bike khalh lai chu ka va thlek a, "Jenusi a lo kal chuan ka hman ka ring lo," a lo ti leh pek a, pakhatin 'Zanah' a tia, awm ve lo turin min duh ve ve anih hmel a; mahse, ka tel lo chuan engmah an ti lo tawp ang.

Dawr kawt kan thleng chu, "Tui deuhin mu rawh aw," tih zawng a sawi a, min tlansan nal nal a, lungawi a har ṭhin teh e. A rilrua pawimawh ber ka la ni lo tih chu ka chiang khawp mai, kei aichuan Jenusi a pawimawh zawk tih pawh ka chiang, duhthlan ngai nise min thlangin ka ring lo, ka la hneh tawk lo te pawh a ni mahna.

Chawlhni chu chawhma chiah ka inkhawm a, haw pahin Zoherliana chu ka call a, "Min lo hruai rawh," ka va ti thawr a, "Ka hman rih lo, zanah ka rawn hruai ang che," a ti nain ka nghah tur thu ka hrilh lui ve ngat a, min chhan hmain phone ka dah hmiah bawk.

Minute 10 bawr chauh ka nghak ang, chak deuh hian a rawn inkhalh phei a, ka bula a rawn din rual chuan, "Jenusi chu a lo thleng tawh em?" ka lo ti nghal thawr. "Nizanah message min lo thawn a, i lo chhang a ni maw?" a tih chuan phat buai chi a ni tawh lo. "Chhang e," ka ti ve nghat a, "Rawn lawn rawh," a tih rualin ka lawn sawk sawk.

"A lo kal dawn em?" ka tih leh chuan, "Zanah ka va hruai ang," a ti chang bawl a, a tlan chhuak zui a, a lungawi lo viau aniang kan tlan chhung zawng chu a ṭawng lo. 

A in luah kan va thlen chuan a lo reh ṭhuap a, ka hawi nasa viau mai. "Tumah an awm lo," tih pahin min rawn kalpel a, pindan lam a pan chu ka zui thuai bawk. Mahse, lut loin ka va dak ringawt a, "I ṭhian nen chuan in luah dun em ni?" tiin a phone charge lai chu ka va thlek dek dek a, "Um, ani chu hotel-ah a riak tam zawk a," a ti ve mai a.

"I ril a ṭam em?" tih paha a lo let chu ka chhang lem lo, midang an awm lo bawka tiin ka puan bih chu ka phelh a, "Kekawr i duh em?" a lo ti ve vat a; mahse, a hnuaiah ka ha ve thlap. "Ngai lo mai," tih pahin bathroom lam ka pan san a, gas a ti alh thawm ka hre zui zat a, thingpui a chhuang dawn anih ka ring.

Ka va chhuak leh chu chapal lian deuh hi min lo pe a, "Ka ke a na tawh lutuk," tih pahin ka bun ve sawk sawk. "I ril a ṭam tawh em?" tih leh pahin chîk fahran hian min rawn en a, "Min hauh i chak hmel," ka lo ti daih thung.

"Jenusi lakah hian buaina i nei em ni?" a tih chuan lu ka thing rang khawp mai.

"Message kha i delete a, engmah i sawi bawk si lo a?" a ti thum leh dut a, tunah chuan ka zep tawh lo ang, ka awmdanah a lang reng tho alawm maw le.

"Kei aiin i ngaipawimawh zawk a, min ngaihsak lo bikin ka hria alawm," ka tih chuan a lo nui suk.

"I thîk a maw?"

"Thîk e.."

"Hetianga i awm chuan a hre chhuak mai ang, mi â a ni lo ania, fimkhur tur ka tih kha,"

"Anih chuan thîk ngai loin awm rawh," min chhang loin ka ke chu a rawn thlek a, a melh chho hret hret tih pawh ka hmu a, ka kekawr bul hak chu nge ka mal zawk chu a rawn melh ka hre lo, "I va inhmeh ve," a ti zawi sup a, chuta min rawn en leh chuan a mitmeng a dang viau tawh, a thil ngaihtuah pawh ka hrethiamin ka hria.

Min rawn pan a, engmah pawh ka sawi leh hmain min pawmkang lawp a, pindan lam min pan pui laichuan ka zam ru ve kher mai. A khumah chuan min nghat riai riai a, min fawp chungin ka mal a chul kual a, thawk ka la leh hak ṭhin bak chu thawm ka chhuah lo, a mi fawhna ril ruih chuan chhungrilah min fan a, ka duhtawk thei bik lo a ni ber...

Mahse, thui pawh kan kal hmain kawngkhar kik thawm a rawn awm a, "Zobawih.." a rawn ti lang lang. 

Zoherliana lah chu a han tho rang khawp a, "Biru rawh," tih leh choka lama min pawh phei a rual a, bathroom-ah min nam lut rawk rawk. "Ka puan leh bag te kha.." ka tih rualin kawngkhar a khar hmak a, rei loteah rawn hawng lehin ka bag leh pheikhawk min rawn pe a, ka puan phei chu a vawmin ania a rawn vawm luh ni!

Rei vak loah kawngkhar hawng thawm leh Jenusi ṭawng ri ka hre zui a, ui awmna a zawt niin ka hria. "Dawhkan hnuaiah sawn a muhil," tiin Zoherliana chuan a chhang a, "A va hmelṭha reuh ve, ka rin aiin a te daih," Jenusi'n a tih ri chu a ring lem lo.

"Engtin maw i tih dawn?" pakhatin a tih chuan, "Anni ang rual, pasal fanau nei lo ho hian ui hi an ngaina a, a pasal leh fa ve ai anih hi," ti maiin pakhat chuan a chhang a, chutih laichuan ka phone a rawn ri thut, phone lah chu khumah ka kalsan daih pek a, ke pen thawm chuan pindan lam a panin ka hria. 

"Tu phone nge?" Jenusi'n a tih ri chu a hla ta viau a, pindanah a zui lut anih hmel.

"Ka nula tawmpui ta anih hi," Zoherliana lah chuan a lo ti mai si a, ka lo ip ru deuh.

"Khawiah nge, i biruk tir em ni?" 

"Aw, lo chhuak lo ang che," Zoherliana'n a tih ri chu pen thawm bawkin a zui a. Mahse, bathroom kawngkhar a rawn hawng dawn emaw ka tih laiin a let leh daih. 

"Tunge i tawmpui a, khawi maw.. ka'n lo en chhin teh ang.." Jenusi a ti ri leh a nui ri ka hre zui a; mahse, kawngkhar khar ri bur thawm ka hria a, "I hriat a ṭul lo, pindana kan awm chhung hian a chhuak dawn," Zoherliana a lo ti chang bawl a, rei vak loah min rawn au a, "Ṭhiani, i kal thei ania," a rawn tih chuan ka sa pup pup mai.

Kawngkhar ka hawn laichuan an inpawt buai niawm tak thawm ka hria a, "Tunge ka hre duh alawm, ka hau dawn lo," zawi tea Jenusi'n a tih ri chu ka hre pha a, ka thinrim vang nge ni ka han che muang em em khawp a. Ka phone lah chu dawhkanah a lo dah tawp a, va inlan chu ka duh ut ut. 

"Nakinah ka la hrilh ang che," Zoherliana'n a tih leh takah chuan lawm lo fein in chu ka chhuah san a, kawngkhar pawh chu ri dawp khawpin ka khar a, hmanhmawh fein kawngpui lam ka pan bawk. Auto ka han hmu nghal hlauh a, in lam panin ka hawsan ta nal nal a, kawngtluan chuan ka inhumruh a ni ber.

In ka thlen chuan ka chhungte chu an la bang lo a, inthlakin ka va inbual sawk sawk a, anni pahnih khan ka chungchang an sawi dun ngei ka ring. Ka inbual zawh hnu chuan khumah mu chungin ka phone chu ka ngaichang reng a, an reh rei khawp mai. Ka chhungte lo haw hnu pawh chuan ka tho chhuak mai lo, thingpui in turin min rawn ko a, "Ka ril a ṭam lo, ka muhil dawn," tiin ka inkhuh ṭha sauh sauh.

Message ka dawn chuan tlai a ni tawh, Zoherliana hnen aṭangin a ni. "Jenusi bulah lo la sawi suh, keiman ka sawi ang," tih te hi a rawn thawn a, chupa chuan a lo la zep cheu anih hmel.

"Engvangin nge i hrilh mai loh a?" ka tih chuan, "Kan sawi dun phawt a ngai, thil eng emaw a awm a," a rawn ti a, ka call rang khawp mai.

Chuta a thil min rawn hrilh chuan min tihrilhhai viau a ni, "Wine kha ka in palh a, chuvang ania khatianga ka awmpui che, Jenusi'n a hria anih chuan ama thiam lohah a ngai dawn a, hrilh chi a la ni lo ang, heng thil zawh hnuah hian kan hrilh chauh dawn nia," a ti a, "Min duh a ni lawm ni?" tia ka zawhna lah chu, "Duh e," tiin min chhang lawi bawk si, engmah chu ka hrethiam lo, ka thinrim telh telh a ni ber.

"Mimal thil anih hi Zoherlian, kan thil tih nen kaihkawp a ngai hleinem, min ngaizawng turin a phalna lak i ngai em ni?" Ka aw chu a sehchilh rap a, ka insum viau bawk.

"Phalna lak lam a ni lo, keini chungchang vanga buai loh a ṭha zawk, kan pahnih tel lo pawhin buaina tur a tam lutuk, kan inkar chu dah ṭha rih ang," a la rawn ti tak deuh deuh a, "I duh duh danin tirawh," tiin phone chu ka dah hmak.

Mi lah chu a rawn call nawn duh hlek lo a, ka be tawh bik lo ang tiin ka insehruh a, ka engtih tha mah a tho tawh lo, kan kal thui tawh zia ka han ngaihtuah a, heti ringawta han tawp leh tur chuan ka ngaingam bik si lo, ka rilru a na nge ka thinrim pawh ka hrethiam lo hial, chutih rualin Jenusi vang mai mai tawp erawh ka duh lo khawp mai, hei chu Zoherliana nena kan inkar a ni a, ani thuneihna tur niin ka hre lo.

Zanriah pawh ei loin pindanah ka tawm chawt a, pi Zaii chu a inkhawm dawn a, midang inkhawm tur an awm loh vangin keipawh ka mu nghal mai a. Zoherliana chu a reh zankhua dawn aniang dar 9 pelh hnuah pawh engmah a la rawn sawi leh lo. Ka rilṭam deuh chuan thei ka va ei a, pindana ka let leh chuan message ka lo dawng a, Zoherliana ni loin Jenusi a ni thung.

A message lah chu!

"Vawiin ami kha i ni ti raw?" a rawn ti nghal thawr mai a, engtin nge a hriat leh pek ni!

"Hrilh ngai loa i hriat chuan a ṭhat chu," tiin ka chhang ve hmiah a, engtin tak ngai ang maw ka tih laiin, "Eng nge i tih a?" a rawn ti let heh a, zawhna a ngah khawp ang le.

"I ṭhianpa kha va zawt mai la," 

"Nangman sawifiah rawh," a message chu enin thawk ka la hak a, 'I zawhna apiang chhang nghal zel turin min ngai em ni a,' ka ti ru neuh neuh.

"I hriat ve ngai lo chi aniang, Zoherliana'n ṭul a tih chuan a hrilh mai ang che," tih ka thawn chu a rawn chhang let mai lo. Ka nghah deuh vang vang hnu chuan message dang a rawn thawn leh a, "Ka hrethiam ania, Zoa hi i duh em ni?" a la rawn ti chhek chhek a, a fin tehlul nen, min zawh chhan dang a nei zawkin ka hria.

"Lo ngaihven vak suh, hei chu Zoherliana nena kan inkar ania, mimal thil anih hi, i tan a pawimawh lo," ka ti let hmak a.

"Ka tan a pawimawh, i duh tak tak em tih pawh hriat ka duh, tlang deuhin min hrilh zawk rawh, ka bulah sawi hreh tur a awm lo," a rawn ti duah a, ve ngei hian a, sawi hreh chu kan ngah dun khawp alawm, Lawma nena an chungchangah khan sawifiah engmah a nei bik lo a, engvangin nge maw ka han hrilh zel bik ang le!?

A message chu ka chhang duh ta lo a, darkar khat hnu vela a rawn thawn lehah chuan, "Game i lo play anih chuan master ka ni tih i hre dawn nia," tih hi a rawn thawn a, ka helh ngang mai. "I hre mai dawn alawm," tiin message chu ka chhang ve leh a, a reh ta hmiah bawk.

End of chapter - 16