WHY DID YOU GO? (CH - 17) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 17

"Vawk pakhat a thi leh tawh," pa Taia lo hawin a rawn ti chu kan lo melh ṭhap hlawm.

"A va mak ṭhin ve aw, niminah pakhat in phum zo hlawt a," titu chu Lawmsanga nu a ni.

"A hri a leng em mawni le?" Lawmsanga'n a tih chuan, "Khuaah chuan hrileng a awm awm ka hre lo, ka va be hlawm tawh a, a lian ber a ni lehnghal a, zirtawpa hralh tur a ni tawh asin maw le," tih pahin pa Taia chuan a iptepui a dah a, pawnah chhuakin Lawmsanga a rawn au zui a. 

"Kan phum nghal mai a ngai ang, pu Muanate bawngtuthlawh zuk la la, pi Lalpuii pawh i hrilh dawn nia, ka lo zuk chhuak ang," a tih chuan Lawmsanga chu a tho ve nghal a, keipawh chu ka tho rang khawp mai.

Pa Taia zawk chu zui ka tum uk a; mahse, Lawmsanga'n min lo au a, "Suahdur hi keng thla rawh, bawngtuthlawh chu ka zuk lam lawk ange," a tih vangin ka lo nghak a, "A hri a leng anih chuan a buaithlak ngawt ang, hman kumah pawh 23 lai an thi a," tih pahin suahdur chu min rawn pe a, putara te in lam a pan chu muangchangin ka zui bawk.

Lut ve duh lem loin veranda-ah ka lo nghak a, an ṭawng thawm chu ka ngaichang ran a, rei vak loah pitari a rawn ang hlak hlak mai. "Vawksa te hi in ei peih lutuka, khua a mi hriat chian mang loh sa te hi in lei leh ngawt zel a, chaw nawi inpe leh ṭhin bawk si, a hri kai in la lut a ni hrim hrim, kan inhrilh zin tawh tehlul nen hian i pa em em hi chu, pakhat thi pawh cheng tam man ania asin, niminah lah pahnih an thi tawh bawk, hri a ni em em ang.." a ti hluk hluk a.

"A dang damlo an awm em?" pu Dinpuia'n a tih chuan, "Ka hre miah lo, nimin lam ami pawh kha damlo ang pawhin an awm hran lo," tiin Lawmsanga'n a lo chhang a.

"In chik lo mai mai aniang, kartin vawi hnih tal bual rawh u ka tih kha, in ngaihsak ṭhat loh vang aniang chu, a damlo an awm em zuk en chhuak vek rawh," pitar chuan a ti leh hlar a, Lawmsanga chuan a chhang zui tawh lo thung.

"Store room chahbi chu kawngka bulah khan a inkhai kha, thuk deuhah phum ang che u, an inkai darh leh anih chuan a pawi khawp ang, manganthlak pafa lutuk.." pitari'n a tih hnu rei vak loah Lawmsanga chu chahbi keng chungin a lo chhuak a, "Min lo la nghak elo?" a ti chu ka chhang lem lo.

Veranda sira store room lam chu a pan a, chutih laichuan pitari chu a la phun hlak hlak reng. "An enkawl ṭha peih tak tak lo anih ber hi, midang chhawr daih ila a ṭha ang, hman kumah lah khati zat kha an ti thi a, vawksa ei tawh lo tur pawh ka ti vawi tam, a rukin an va lei leh hram zel a, anni vanga ka insenthlawnna man hi a sang lutuk, an sum bawm a tibuai lo emaw hi an ti nge mawni.." a tih bawrh bawrh laiin, "Midang chhawr rawh ka ti fo che alawm, hlawh i pe tam si, anni chhung chhawr aichuan tlangval taima deuh pahnih khat chhawr la, hlawh sang deuh pawh a ngai hran hleinem, thawk duh an tam alawm," a fapa chuan a lo ti ve bal bal a. Lawmsanga chuan a la hre pha ve a ni chêk ang hmanrua nena a lo let leh chu a hmel a ngui khawp a, mi pawh be loin min rawn kalpel a, kan inzui phei pawh chu kan inbe mai lo.

Kawng peng kan thleng dawn ṭep tihah chuan, "A ang nasa viau dawn anih kha," a ti zawi sup a, "Nia.." ka tih chuan min rawn melh zauh.

"Engzat nge i mamawh a?" a ti khauh mai a, ka lo en ran ran.

"Eng maw?" hrethiam lo awka zeta ka tih laiin, "Engzat nge tihhlum i tum?" a ti fiah leh fak a, kan inbum lo tih chu a chiang viau mai.

"A ngai tam lo ang?" 

"Engzat?"

"Ka hre lo.."

"Eng nge i pek, chakai kha em ni?"

"Aw, thil dang pawh ka pawlh,"

"Min hrilh hmasak tur alawm," a ti chang bawl a, a lawm loh hmel viau bawk.

"I thinrim em?" ka han ti chu, "I tih chhan ka hre duh?" a lo ti let hluk a, a inthiam leh vak lo nge ni, "Sawifiah hmasa ṭhin la," zaidam deuh zawk hian a ti leh a, han sawi duah tur pawh a awm lem lo, "Nupa kar buaina a awm ka ring a," ka ti a, a hrethiam ve maiin ka ring.

"Pu Muana chuan engmah a ti lo ang, tun hma pawhin a ngawi mai zel alawm," beisei sang lo tih hriat zet hian a ti a, keichuan eng emaw tak a thlen ka beisei a ni.

"A fapa i nia, eng emaw chu a sawi ve ang chu," tiin ka chhang leh mai a.

"Serh leh sang i nei miah lo anih hi, ran chunga hetianga tih tur a ni hleinem, kan hna a nia, duat takin kan enkawl ve asin, puih che ka duh naa hetiang thil kher hi chu ka duh dan a ni ve lo," a tih chuan ka hnial duh lem lo, min khap dawn tih ka hriatsa vanga hrilh hmasa lo kha ka ni miau a.

"Engtin nge ka tih a ni tih i hriat theih a?" tia ka zawh chuan, "I chakai thuruk kha ka hmu alawm," a ti ve mai a, ka lo nui chu min nuih let eih lo.

Ka zuk thlen chuan a pain min lo ko thuai a, vawk lian ber a ni tih lam ka lo ngaihtuah lem lo a, han zawn sawn pawh a buaithlak angreng khawp mai. "A piah ber a mi pawh saw a mu reng mai saw," tiin pa Taia chuan min lo kawhhmuh a, Lawmsanga chuan min lo melh leh run run tawh.

"I pi chuan eng nge a lo sawi a?" pa Taia a ni.

"A phun.." ti maiin pakhat chuan a chhang a.

"A va lawm lo leh dawn ve, hrileng te hi kan thiam loh vekah hian a ngai zel mai a, a ṭawngkam chauh hian vawk hi a vulh thiam bawk si a," ti bal bal chungin pa Taia chu vawk in chhungah a lut a, Lawmsanga pawh chuan a va pui ve vat a, kan vawk thi lah chu a lian khawp a, a zawn chhuah pawh a har khawp mai. 

"I lumthla mai teh ang, kawlbahra hmun thlang deuhah khuan kan phum dawn nia," tiin vawk in sir awlah chuan an mut a, an han lum chu vawk in dang an lo ri ve chuah chuah a, an ralkhel deuh nge mawni. Hmanraw keng chungin an pafa chu ka zui ve zel a, "Duhawmi'n lai rawh se," Lawmsanga'n a lo ti chu ka melh phawk viau a ni.

A fiamthu lo nge mawni a nui duh hlek lo mai a, "Ka'n lai ange," tih leh bawngtuthlawh chu ban ka rual. Mahse, pa Taia'n min lo laksak vut. "Nanga tih chi a ni lo," tiin a lai zui mawlh mawlh a, Lawmsanga lam ka va hawi chuan a lo khi suk.

An pafa chuan an inlaih chhawk a, "Phûm loin rêp zawk mai ta che, i kum khat tla aniang chu," tiin Lawmsanga chuan a pa chu a fiam a, "A hrikai te chu ei chi a ni hleinem," a pa'n a tih chuan, "Hri a kai pawh ka ring lo e a, a uiawm alawm," a ti a, a ṭawng pah chuan min rawn melh leh zauh ṭhin.

"An rawn enfiah phawt loh chuan a dang pawh khi hralh ngam an ni lo ang, i pi Lalpuii chu hmuh a va peihawm loh ve, zanin chu ka leng bo daih dawn em mawni," tiin pa Taia chu a nui ve ruh ruh a, a ruk tak chuan hrehawm a tih viau ka ring. 

"A sawi laiin ngawi reng ila a ni mai, a inang  lungawi ve leh mai ang," Lawmsanga'n a lo ti ve leh khauh a, "I kal lai chuan hotupa a awm em?" pa Taia'n a lo ti leh a.

"Ka hmu lo, a fapa a awm," Lawmsanga'n a tih chuan, "A nu a fuihpawrh leh dawn anih chu, khipa lah khian a ngaimawh em em tawh mai si che a," a pa chuan a lo ti zauh. A ṭawngsual a inti deuh nge ni min rawn melh zuk a, ka lo nui heu thung.

"A ho lutuk, kumin bak kan awm tawh dawn hleinem," Lawmsanga'n a lo tih chuan, "Nang berin awm i duh tawh loh miau chuan i nu nen hi chuan kan thlawp zel dawn che a; mahse, a buaithlak chho viau maithei a ni," tiin a pa chuan a chhang a, "Hmun dangah pawh hna thawh tur a tam alawm, ka nu bak enkawl ngai kan nei hleinem," Lawmsanga'n a tih chuan ngaihtuahna a lo kal thui duh viau a ni.

An laih chhung zawng chuan ka ṭhutchilh a, "Lo awm sawn rawh," an tih loh leh, "Lo han chho rawh," an ti sek a, thosi leh thomitchhaih a tam bawk nen an laih zawh hnu chuan ka chhohsan ta daih a, an phûm chhung chu a rei tawh lem lo. 

Kan haw dawnah pi Lalpuii te nufa chu nu Mangaihi hoin an lo chhuk a, vawk dangte chu an rawn en kual a, pakhat damlo a lo la awm bawk nen pitari chu a han ang leh nek a, "In rawp viau anih chuan talh mai tur, hmun danga mi va lei ruk zawk zawk kha sim hmak tawh ang che, khuaah pawh hian va kal zen suh u, hri in rawn hawn anih mai mai hi," tiin pa Taia a phun khum hrep a, a fapa lah chuan, "In tluang lo laklawh riau, midang kuta dah tawh mai chi nge mawni," a lo ti ve bal bal a, tuman kan chhang lem lo a, pa Taia ṭawng tum leh ṭhin lah Lawmsanga'n mitmeiin a va khap zel a, pitari lah a ang hlâwk angreng si a, awm a nuam fahran bik lo chu a ni.

"Tlai lamah an rawn enfiah ang, hri an kai anih chuan min khuahkhirh leh dawn a, a note pawh an rawn la thei hlawm lo ang," tih angreng pitari'n a sawi laichuan ka message tone a lo ri a, ka en chuan Zoherliana a ni.

"Vawiinah i lo kal dawn em?" a rawn ti a, nizan khan ka hrilh reng emaw ka tia, a theihnghilh leh hman nge mawni.

"Lo kawl rawh, chaw te kha lo pe ṭha la," ka va ti chu a rawn chhang let leh zat a, "Engtin nge ka la tawh tih i hriat?" a rawn ti let heh a, "Nizanah la tura i kal thu i sawi kha?" ka tih lah chuan, "Kan inbia maw?" tih hi a rawn thawn let a, ka hrethiam zan lo.

Pa Taia'n min rawn koh avangin phone chu ka ak ṭha sawk sawk a, midang chu kawng lampanin an lo kal hlawm tawh a, pa Taia chu zui ve nghal mai ka tum laiin Lawmsanga'n min rawn pawt ding chawt. "An rualin ka chho peih lo," a lo ti tlawng a, ka peih bik lo bawk a, ka han nghak ve leh rih.

An kal liam ta maw tihah kan chho ve chauh a, khuaa kal ka ngaih thu leh miss Mathani uite chungchangte chu ka hrilh zung zung a, "A fuh ang maw, kha nu kha i ṭhiannu nen khan an inzui ve reng naa i ṭhiannu pawh khan a ring vak loin ka hria, thil a hriatpui viau pawh ka ring lo," a ti bul bul a. "Jeminai thil lo sawi danah khan eng emaw hriat chu a neih ka ring, ka biak hnuhnun ber ṭum khan zep a neiin ka hre tlat a, hlauh a nei bawk a, a thil hlauh talte chu a sawi thei ang chu," ka tih chuan lo kal ve a duh thu a sawi a, chu erawh a fuhin ka ring lo.

"Khuaa kan inzui dun fo chuan a ṭha lo zawk ang, keimahin ka kal anga, ka lo let leh vat zawk dawn nia," ka ti a, "Chhunah hian kal la, zan lamah chuan kan lenthlak a ngaih ka ring," a tih chuan rilru ka buai ve deuh. 

Mahse, kawt zawl kan han thleng chu Jeminai nuin an veranda aṭangin min rawn au a, "I buai em, ka tir lawk duh che?" a rawn ti hlauh mai a, a tihzia ngang mai.

"Buai lo e, khuaah kal a ngai em ni?" a lam pan pah chuan ka ti phei lang lang.

"Aw, thil va lei lawk.." A lutin min rawn hui sawk sawk a, ka va tlan phei chu a bul ka thlen rualin, "Nakin deuhah i kal dawn nia," tih pahin scooty chahbi min pe a, "Ka mu daih dawn a, tlaiah ka lo la mai ang, hei hi ka ṭhiannu hnenah khan lo pe rawh," a ti zui a, a ṭawng zawi khawp mai.

"Eng nge a?" tih pahin polythene chhung ami chu ka zuk bih a, wine bottle hi a lo awm a, ka hamhaih deuh.

"Thakthing wine anih kha, mi ta tur, ka ṭhiannu khan a lo hrethiam mai ang," a ti leh sur sur a, "Chhunah i kal dawn nia," tiin min luhsan zui a. Let pahin bottle chu ka thlek a, kan wine ropui kha em ni ang ka ti ru neuh neuh.

In ka thlen hnuah Lawmsanga nen kan en dun a, wine sen a ni a, kan wine kawl nen erawh a rawng a inang lo hle a, Lawmsanga lah chuan, "Hetiang chu hmanah pawh ka hmu tawh, kum 10 vel an um tawh a nia, thakthing rim a nam alawm, tu emaw a duhsak deuh tan a thawn aniang," a ti mai si a, han hawn chhin chi lah a ni mang si lo.

"Thil dang daih, i pa khan farm hi chhuahsan a duh ve tho em ni?"

"A duh reng ṭhin alawm; mahse, ba kan nei miau a, pi Lalpuii te nufa zia a dan tak aṭang khan ka pa Taia hi chuan pu Muana hnaiha awm tawh loh mai hi a duh a; mahse, pu Muana hian min chhuahtir duh tlat lo a ni, ka nu bulah chuan, 'A chanpual tur ka la siamfel dawn, ka boral hunah pawh ka rokhawmtu tur a ni ang,' a lo ti pek a, ka nu hian beisei a nei ve tlat alawm maw le," a ti ve luam a.

"Pa Taia'n engtin nge a ngaih?" tia ka zawhna chu, "Ani chuan sawi nawi a nei vak lo; mahse, damdawi chungchanga ka inrawlh dan a hriat hnu khan a rilru a tisak ve ta deuh a, pu Muana lakah pawh hian a lawm tawh lo," tiin min chhang a.

"A duat viau chein ka hria," ka ti chu tawitein min nuih.

Chhun lamah chuan chhuak turin ka insiam a, Lawmsangate pafa erawh vawk in lamah an chhuk thla leh a, chawlhni anih vangin mi lo kal an awm nual bawk. Kawt aṭanga ka zuk hawi thlak chuan mipa ṭhenkhat leh pu Muana chu an veranda-ah an ṭhukhawm a, an hmuh laia ka chhuak anih chuan zawhna min zawh ngei ka ring a, han kal chhuah nghal mai theih pawh a ni lo.

Dar 12 pelh hretah chuan huan lam panin an inzui chhuak ta hlawm a, wine an in dawn a nih ka ring. Kei pawh chu ka chhuak ve vat a, Zohera pawh chu ka be tawh lem lo a, mi a lo beisei tho chuan ka ring. Khaw lam pana ka tlan lai chuan eng eng emaw ka ngaihtuah kual a, nizan khan Zoherliana kha ka be ngei mai a, message pawh a rawn chhang thlap a, engvanga rawn bangbo leh viau nge maw a nih le? Nizana ka biak kha amah a ni lo em mawni. Ka rilruah chuan Anthony-a kha a rawn lang a, a thurual pui anih chuan a fuh lo khawp ang le..

Hotel ka va thlen chuan a neitunu kha a lo awm a, mi a hre tawh bawk a min hmuh rualin min lo nuihsang mai. "Thil min lo thawn a," tih pah chuan ka thilken chu ka pe a, phur hmel deuh hian a phawrh zui a. "Eng wine nge ni a, ka in lah chu a han phal lo khawp a, ka lo thleng ru daih dawn em mawni," tiin a nui deuh hak hak a.

"Thakthing wine a nih kha, a upa viau maithei," ka lo ti zauh chu min rawn melh vut.

"A ni maw, kum engzat nge a nih a?"

"Ka hre bik chiah lo; mahse, a cial viau ang.." 

"Hetiangte chu mite pawh rawn duhsak ve awm, a neitupa turin a rawn lam loh chuan ka in daih ang," a ti nuah nuah a, tu ta tur nge hriat ka chak ta tlat, Zoherliana a nih mai te pawh ka ring deuh a ni.

"A duhsak viau aniang hetiang wine te a thawn sia, tuta tur nge mawni le?" nui var var a ka tih chuan, "Kan ṭhianpa maw le, MLA bial fang a rawn zui dawn a, min rawn tlawh hman kher ange maw," a ti ta daih a, ka ngaih ang chu ka ni lo tawp mai.

"E...helaia a ṭhiante ta tur emaw ka lo tia, a lo uipui dawn dawn a," ka tih chuan, "Wine te mai mai chu ui thei a ni hleinem, ani pawn a dawng let lawih zel alawm, kan ṭhian zinga thil phal ber ta tur anih hi," a ti leh luam a, "A bialpa a nih te ka lo ring asin le," ka ti chu a nuih a za khawp mai.

"Teuh nang, ani te chu a upa tawh, i pi Nguri te chuan amah aia naupang alawm a duh tawh le," a ti a, a mizia chu ka han chîk viau naa hriatthiam a har rih khawp mai, ka hmuh chinah chuan nu fiamthu duh, mahni ṭanghma hai thiam tak leh, rilru zau hek hawk chi a niin ka hria.

"An wine siam hi i tem ve nual tawh em, tui tih deuh bik te i nei em?" ka tih chuan, "Ka tem kim ve tawh viau chuan ka hria; mahse, pu Muanthanga hian chi hrang hrang a siam a, ka hre kim lo maithei a ni, ka in tawhah chuan strawberry kha tui ka la ti ber mai," a ti leh luam a, "Kei chu ka in thei lo a, ka neih leh hunah ka la rawn kensak dawn che nia,"  ka han ti zauh a, "Tak tak maw, ka va lawm dawn ve," a ti ve hlut a, kei ka lo bu zauh thung.

"Hnathawk ho hian duh duha in in an phal ṭhin em ni?" a tih chuan, "Kan in peih vak lo a, kan duh leh duh loh a ni mai, a hmuna awmchilh ho chuan kan in ṭha peih lo," ka han ti ve leh luam a.

"Anih chuan min lo ken zel rawh, kan duh lutuk alawm ani wine siam te chu, a leite pawh ka lei duh reng ania, hralh ruk tur i neih chuan ka lo lei zel ang," a ti ta mai a, ka lo phur sarh tawh mai. 

"Ka nei vat maithei, duh bik i nei em?" tiin ka va kun hnai zui a, "Mahse, nu Nguri hriat lohin," ka ti sar sar a, ani lah chuan, "Duh loh ka nei hleinem, a ruih theih chi ho ngei kha ka duh.." a lo ti ve sur sur a, "I phone number min pe rawh, a thlalak ka lo thawn dawn che nia," tiin a number ka han dil zui a, phur fe maiin min lo pe a, number ka lak zawh chuan duh bik a neih leh neih loh chu ka han zawt leh hram a.

"A lem inbel aṭangin ka lo thlang ang," a tih chuan, "Pangpar leh thei lem deuh hlir a nia, a ṭhenah chuan sava lem te pawh a awmin ka hria," ka ti a, a hmel danglam deuh ka hmuh chuan ka en chîk viau a ni.

"Sava lem awm chu ka la in miah lo," a lo ti let hu a, "A tam lo, pu Muana siam danglam te a ni hlawm a, ṭhenkhat phei chu zawrh atan a ti loin ka hria," tiin ka chhang ve zat.

"Anih, varak lem awmna i hmu tawh em?" a tih chuan pawn lam hawiin ka han inngaihtuah der zet a, "Ka hmu tawh chuan ka hria," ka tih rualin ka ban a rawn vuan chat a.

"Kha kha a tui ka tih ber a nia, i lo la thei angem?" a ti leh zat a.

"Ka hre lo le, tun hnai hi chuan a siam tawh lo nge ka hmuh lohna a rei leh deuh tawh a, ka lo zawng chhin ang," ka nui pah sang a, a phur hmel tawh ngang mai.

"Lo zawng rawh, an wine siamnaa i pui ṭhin em ni, a siam laite i hmuh tawh em, a thil pawlh te pawh i hria ang a?" a ti sawk sawk a, "Pui chiah lo; mahse, ka la thei tho alawm," tia ka chhang chu a lungawi tawk aniang a nuisang mai. Ka thil hawn tur min pek hnu chuan kal mai ka tum a, ani lah chu a rawn tho sawk sawk a, pawn thlengin min rawn zui ve leh a. 

"Midang hnenah hralh miah suh aw, i lak theih ang ang kha ka duh vek ania, varak lem awmna phei kha chu ka ngam to viau maithei," a ti leh zung zung a. "Midang ka zawrh ngam teuh lo, nangpawn i zep tlat a ngai ania," tiin ka han chah ve bawk a, ka kalsan hnu chuan ngaihtuahna a vak kual zut zut. Kha nu khan wine siam dan lam kha a ngaihven riauin ka hre mai a, min zawt thui lo nain kei ang hnena a zawhna kha a mak riau a ni.

Zohera in luah ka va thlen chuan kawtah a bike a lo inhung a, a ke hnung lam ka va thlek chuan a lo huh hliam a, a la ro loh danah a hawna a la rei lo a nih hmel. Hmanhmawh lem lo zet chuan ka pan thla a, kawngka ka kik chu min rawn chhang mai lo. A han au lauh a, chutih rualin ke pen thawm ka hria a, a thawm aṭang chuan ke pahnih pen thawm a ang lo riau a, midang an awm ve niin ka hria.

Ka beng dawh hnaiin ka han ngaithla ren rawn a, bathroom inhawng thawm te, phun sur sur thawmte ka hre nawk. Rei vak loah ka lam pana a lo kal thawm ka hre zui a, kawngka a rawn hawng chu mu tho chauh hi a ang a; mahse, mu tho chu anih hmel loh, a thawlak a rang mah mah tlat.

"I mu em ni?" ka ti chu a han aw rang khawp a, dawt chanve chu min hrilh phawt mai.

"Ui chu khawnge?"

"Dawhkan hnuaiah sawn, a muhil," a kawhna lam chu ka hawi vat a, uite var hmul buk deuh hi dawhkan hnuaiah a lo bawk a,  "A va hmelṭha reuh ve, ka rin aiin a te daih," tih pahin ka va ṭhutchilh a, bathroom lam chu ka thlek pah zauh bawk a, tu emaw chu a biru chiang a ni.

"Engtin maw i tih dawn?"  

"Anni ang rual, pasal fanau nei lo ho hian ui hi an ngaina a, a pasal leh fa ve ai anih hi," ti maiin ka chhang a, bathroom lam melh zauh paha ka han en chuan thawk a lo la hluai. Mahse, a ṭawng leh hmain zai play thawm a rawn awm thut a, pindan lam aṭangin a ni thung. Zoherliana kal chu ka zui ve nghal a, khum chunga phone chu a va la rawk rawk a, a hmet tawp nghal hmak a, a phone ken lai chu a ta a ni lo tih ka chiang fu.

"Tu phone nge?"

"Ka nula tawmpui ta anih hi," Mauh mai ṭhin a.

"Khawiah nge, i biruk tir em ni?" 

"Aw, lo chhuak lo ang che," tih leh inher a rual a, zui ve leh mai ka tum laiin pindan kawngkhar a khar hmak a, rei vak loah lo let lehin ka chhuak tur chu min rawn nam let rawk rawk a, a tihdan chu ho ka ti angreng, engah nge maw ka hmuh a'n phal loh ngawt le!?

"Tunge i tawmpui a, khawi maw.. ka'n lo en chhin teh ang.." nui chunga ka tih laiin kawngkhar a khar ri ṭhuai mai. "I hriat a ṭul lo, pindana kan awm chhung hian a chhuak dawn," a ti chang bawl a, a awmdan chu a mak, a hlauthawng deuh tein ka hria.

"Ka hriat zawng em ni a?" zawitea ka tih chuan lu a thing vut a, "Ṭhiani, i kal thei ania," tiin a'n au zui a, hepa takzet hi chu..

"Ka en dawn..." Ka che nghal vut; mahse, kawngkhar ka hawn hmain min rawn man hman a, "Khawi maw min thlah teh, ka hmu chak alawm," ka tih pawh chuan min kuah bet tlat a, hnung lam aṭanga min kuah a ni bawk nen ka tal chhuak thei hlek lo.

"Tunge ka hre duh alawm, ka hau dawn lo," ka tih lah chuan, "Nakinah ka hrilh ang che," a ti deuh tlat a, hmeichhe chungchang a zep ngai si lo a, engati teh tlat nge mawni, buaina a tawk angin a lang lem si lo a, ka hrethiam lo hle ringawt.

Chutah, kawngkhar inhlap ri ṭhuai thawm a rawn awm a, "A kal tawh chu," tih leh tal ka rual a, min la thlah duh mai lo. "Engmah thilsual ka ti lo ania aw," tih pahin min rawn thlek a, inthlahrung hmel a pu chu ka duh miah lo, thil ṭha lo rim a nam tlat.

"Tu nge ni a?" ka ti leh nghat a, min thlah vut pah chuan, "Nula ka tawmpui a ni ve mai a, eng nge i buai vak, mipa ka nia, ka tawmpui ve bawk ang chu.." a'n ti hluk hluk reuh a, ka awih hlawl lo. Hmeichhe duh tak a nei anih loh chuan a tun dinhmun nen thil theih loh tluk a ni, chu nu chu tupawh nise ka ṭhiana hian kal thui a huam tih a hriat reng.

"Ngaihzawng neih te chu a pawi hleinem, ka buai lo, thil sual i ti pawh anih loh chu.." pangngai thei ang berin ka han nuih a, ani erawh a nui lem lo, chu ai maha inthiam lo hmel a la pu tlat chu a ni ka hriatthiam loh chu.

"I sawi duh hunah kan sawi dawn nia, lo phei phawt teh," tiin ka chhuahsan zui a, min lo zui ve nghal thuai a. Dawhkan lam ka pan laichuan kan uite ruk pawh a rawn harh ve tawh a, uite ka hmuh tawhah chuan a duhawm ber pawl anih ka ring. 

"Phone call hmangin kan ti dawn nia, hlauh neisa a nia, a tih a har vak lo ang, nangman i bia anga.." tiin ka phone ka phawrh zui a, "Eng nge ka sawi ang?" a tih chuan, "Veroi ai awh tura i duh thu i hrilh dawn nia, a uite kan kawl tih pawh hrilh la, kan thu a awih loh chuan Veroi chan ang a chang ang," ka tih chuan a bu nghat nghat.

Miss Mathani number chu Zohera phone aṭangin kan call a, a rawn chhang har zek a, a chhang tawh dawn lo emaw tih tawh hnuah thophang aw zet hian a rawn chhang a, Zohera chu speaker on turin ka hrilh zui bawk.

Speaker a on rual chuan uite chu ka pawm kang lawp a, a hnungah ka han chum awk mai a, Zoa pawh a lo phu uih. Uite a bauh rual chuan, "Hello, hello...kha kha Lady a ni em, hello..." a rawn ti nghal chul a, Zoa chu ka va mitmei a, a phone chu a han kun hnaih sauh sauh a, "I ui a nih hi," tiin a aw thum sa chu a han ti thum lui bawk a, ani hi chu zei leh thlup ṭhin.

"Khawiah nge in lo hmuh a, ka va han lawm em em, kan lo mangang hman lutuk alawm...ka nu.." tiin lehlam ami chuan midang a ko nghal a, "Ngawi la, ka thil sawi ngaithla rawh," Zohera'n a tih rualin thawm chu a reh hmak.

"Mi dang bul aṭang khan kal hrang rawh," 

"Tunge i nih a?"

"I hriat a ngai lo, i awm hrang tawh em?"

"Aw, pindanah ka awm mek,"

"A nih chu, kan mamawh che avangin i ui hi kan that lo ang; mahse, ka sawi apiang aw tiin min chhang ang che," a han ti leh nghat a, "Eng nge a awmzia?" lehlama miin a rawn tih chuan zaizirin sawi tur ka lo hrilh mawlh mawlh.

"Veronicai aiawh turin kan duh che, i thei dawn em?"

"Tunge i nih, engtin nge ka number i neih?"

"A mei kha tan rawh.." ka lam hawiin Zoa'n a rawn ti hluk, "Ngawih rawh ngawih rawh...engtin mah ti suh u, ka hrethiam alawm," lehlam ami chuan a rawn ti leh chul a, 'Ka hrethiam alawm,' tih thu chuan beng a verh nghal viau mai.

"I hrethiam chiang a maw?" Zoa bawk a ni.

"Aw, eng ber nge tih ngai dawn a?"

"A eng ber nge i rin a, i hrethiam a ni lawm ni?" Zoa aw chu chang bel bawl tak a ni.

"Damdawi kawl kha chu ka thei ve angem ka hre lo, chhungte nena khawsa kan nia," a tih chuan Zoa chuan min rawn melh vat a, ka hrilh hnuah, "Wine zawk," a ti zawi sup a, lehlama mi chu a thawm a reh dâk mai.

"Wine maw?"

"Aw.." a thil rawn sawi chu ngaichang turin ka lo hrilh a, chuvanga chhang thui ngam lo a ni ber.

"Formula chu in nei tawh a ni lawm ni, kan Head khan a kawl ka tih kha, in hmu lo zawk em ni?" a rawn ti ta zung zung a, rilru tihbuaina hman a awm lo, Zoa chu ka va ṭhuthnaih sawk sawk a, ani pawh chuan beng a lo dawh hnai khawp mai.

"Kan hmu lo, dawt min hrilh a nih hmel," Zoa'n a tih chuan, "A teuh lo lutuk, an en dun lai pawh ka hmu alawm, Veroi pawn a kawl lo em ni?" a rawn ti leh zat a, "Kawl lo," tih tlawngin Zoa chuan a chhang a.

"Anih chuan ka hre tawh bik lo, in la turah ka ngai asin," a rawn ti vang vang.

"Nang hi i rin tlak miah lo, dawt pakhat pawh min hrilh anih chuan an chan ang kha i chan tur a ni mai," 

"Dawt ka sawi miah lo tak tak alawm, ka hriat ang ang chu ka hrilh vek tawh che u, Julie bulah pawh ka sawi vek tawh kha, engati nge hriat nei turah min ngaih tlat le, Veroi khan engmah min hrilh ṭha duh hleinem, ka thil mamawh a neih vanga inkawm chauh kan ni ka tih mawlh mawlh kha, customer ve tho ka nih hi," a rawn ti duah pek a, Zoa'n min rawn en leh chuan a ngaihna ka hre ta bik chiah lo.

"A tawk mai," ka ti ta ngawt a, lehlam ami lah chuan, "Tu ber nge ka biak, thu ngai hlir min zawt bawk si a, engmah ka hre tawh lo tak tak ania," a la rawn ti ṭawk ṭawk a, "Thu ngai hlir kan zawt lo che," Zoa'n a tih chuan ka lo khap rang khawp mai.

Mahse, lehlam a mi chuan beisei loh deuh thil a rawn sawi a, "Veroi khan formula kha hralh a duh a, head khan a remti lo a, an inhnial a, in hmuh loh chuan a hralh hman a ni maithei," a tih chuan rilru a buai map tawh.

"Tu hnenah nge a hralh?" Zoa'n a tih chuan, "Ka hre bik hleinem," a rawn ti leh a, phone dah tura ka tih laiin Zoa chu a rilru a buai ve deuh aniang a la dah mai lo. "Ka uite chu khawngaihin min lo pe let teh u, keichuan hriat engmah ka nei tawh lo, kan head fanu lahin min zawt ve chhen a, ka thawhpuiten min ringhlel bawk si, ka hriat chin pawh hi theihnghilh daih ka duh zawk ania," a rawn ti tlawk tlawk a, Zoa chuan engtin tak chhang leh ang maw ka tih laiin, "Formula kawltu chu lo hriat chhuah tum ang che," a ti chang rap a, phone a dah zui bawk.

Kan inen chu thawk kan la dun hawk a ni ber. Ngaihtuahna a bîng mup a, han phuahkhawm dawnin a chingchi vet nuai mai bawk si, eng laiah emaw hmaih lian deuh kan nei a ni. Mahse, an thil duh tak erawh a chiang ta a, wine mai a ni lo, a siamdan formula inchuh an awm anih hmel. Tuten nge hre ve hlawm ang aw, hotel neitu kha chuan a hre chiang khawp ang.

"Wine formula vangin an thi anih chu?" Zoherliana a ni, zawhna ngah hmel zetin min en bawk.

"Khawiah nge a awm ang aw, 'Zawhna ngai hlir min zawt' a rawn tih kha, an la zawng anih hmel,"

"Nia, pi Julie hming a rawn sawi bawk kha,"

"Pi Julie chuan a nei lo, pawl hnih an awm a ang!" phawk fein kan inen a, "Farm lam," a tih chuan, "Pawl thum pawh a ni maithei," rilru buai zetin ka ti a, rinhlelh tur ka dap ruai bawk.

"Lawmsangpuia'n min hrilh kim loh a la nei a ni ngei ang," ka ti chu, "Khapa kha mi rintlak a ni lo ka tih kha, mi hlauhawm pawh a ni zawk thei, tualthattu a ni lo ang tih pawh a hriat hleinem," a lo ti hlur a, thil awm lo hmuh ka tum tlat nge, thil awm reng hmuh loh ka tum lui zawk le, misual anga ka ngai thei miah lo hi mahni pawh ka inhrethiam lo a ni.

"I la ring lui tlat dawn em ni a?" a tih leh pawh chuan rilru ka la siam fel thei lo.

"Hotel-ah kal la, Anthonya kha lo va ngaihven rawh aw, ka kir leh nghal mai a ngai," tiin ka uite pawm lai chu ka hlan sawk sawk a, "A wine tak zawk chu kan mamawh leh lo tihna em ni?" a rawn tih vang chuan ka han ding leh rih.

"Mamawh e, ka inhrilh leh vat dawn nia," tiin ka chhuahsan zui a, farm lam panin ka inkhalh let leh nal nal bawk.

Ka va thlen chuan kawtah pitari kha a lo awm a, kawng dawm meuh hian min lo en a, garage-a ka lut turte chu ka min en zui rengin ka hria. Ka han indah fel a, ka va chhuah leh laipawh chuan a lo la ding reng a, min biak duhna a nei nge mawni?

Mahse, min rawn biak hmain an pa a lo chhuak hlauh a, pitari chu a rawn ko a, in chhung lamah chuan mi an awm nual aniang an ṭawng ri mam mam bawk. Pitari hawisawn rual chuan hmanhmawh deuhin in lam ka pan a, ka thil hawn pawh chu ka la khai chho ve zel a, Lawmsanga pa lo chhuak tur nen kawngka bulah kan intawk hlawl..

"Eng nge ni a?" a rawn tih chuan, "Nu Nguri thil," tih leh kal pelh ka rual a, Lawmsangpuia chu ka han zawng nghal bawk a, a pindanah a awm miah lo. 

"Khawiah nge Lawma hi a kal a?" ka va tih chuan, "Iptepui nen a chhuah kha," tiin a nuin min lo chhang a, huan lamah a kal niawm tak a ni.

Ka inthlakfel leh zet hnuah in hnunglamah ka va kal a, eng eng emaw ka ngaihtuah kual a ni ber. Miss Mathani sawi kha a dikah ngai ta ila formula chu an la chhuak tihna a ni thei anga, a lachhuak theitu chu Headmaster leh Lawmsanga chauh an ni, a tu zawk zawk pawh hian lo la chhuak ni sela Veroi a tel ve tih hretu an awm ngei mai a, chuvanga miss Mathani hi tel ve ta a ni bawk ang. Pathum zinga pahnihte an boral a, formula lah chu a bo anih hmel a, Lawmsanga hian a kawl theihna chance a sang viau mai, a umzui tute hi farm lam an nih chuan Lawmsanga hi a tel ve tih pawh an hre ngei anga, chu laiah tak chuan ngaihdan ka siam fel thei lo. Lawmsanga a tel ve tih hre miah lo tute an nih chuan ngaihdan dang a awm thei tlat a, hepa him bik chhan hi a pa vang a tih ngawt theih loh.

Kha hotel neitunu kha a meizanghlaptu ber a ni thei ang em, wine hi lo pe ta ila tih angreng te ka ngaihtuah kai zel a, a dik lo lam ka pan erawh ka hlau khawp mai, hei hi chu ngun zawka ngaihtuah leh a ngaiin ka hria, pawl khat an nih loh chuan thil a buai zual thei dawn tlat a ni. Thawk ka'n la ham ham a, ka rilru chu a inkhap buai tulh tulh mai hian ka hria, ka hmanhmawh a, ka phili ruai a ni ber, chutih rualin rilru fim taka tih ngai thil a ni tih ka hre ve reng a, mahni inrintawk a har ṭhin khawp mai, tu emaw ngaihdan ṭha zawk min pe thei awmse ka ti takzet.

Ka message tone a lo ri a, Zoherliana chuan uite kha kan la mamawh em tih min rawn zawt a. "I pe let dawn nia, inhmuh tir lo la," tiin ka chhang a. Hotel-a a riah phei tur thu a rawn sawi bak chu kan inbe zui ta lo. In chhunga ka luh hnu rei vak loah Lawmsanga a rawn thleng a, a pa thangkam a lo zuk en niawm tak a ni.

"Vawk en tur an rawn kal tawh em?" tia a nu a zawh laichuan ka lo ko sawk sawk a, ka pindanah kan inzui lut a, engmah pawh ka sawi hma chuan miss Mathani chungchang chu min zawt nghal a, "Hriat a nei tam lo, tute emaw tan Veroi a enthla tih zawng ka hria," ti maiin ka chhang a.

"Hotel neitunu sawn wine kan hralh ruk theih a beisei a, duh bik pawh a nei thlap," ka tih chuan, "A duh tur chu a hriat reng alawm, i theih tur thu i hrilh em ni?" a ti sam et a, a tir aṭanga ka tinzawn sa tih a hrethiam anih hmel.

"Wine chauh ni lo hi duh dang a neiin ka hria a," ka ti chu hriatthiam loh hmel deuh hian min en a, "A siamdan ka hria em tihte min zawt a," tiin ka la pehhel ve khawp a, a ngaihdan hriat tumin ka en chîk viau bawk.

"Engtin nge chungte i hre tura a ngaih theih a, a siamtupa hian a damdawi siamdan takngial pawh midang a hrilh duh hleinem," a tih chuan, "Chu tak chu, a siamdan hi an thil duh ni ta se," tiin a mita ka en kal a, a rilru a buai hmel viau mai.

"A siamdan chu an hre duh ngei ang, siamsa ringawt chu an duh khawp dawn lo, farm-ah an lo kal ṭhin a, a siamtupa an hrechiang bawk a, an beidawng a va ang ve," a tih lai chuan engmah hre lo tak tak hi a ang a, ka ringhlel sual ta deuhin ka hria.

"An beidawn hnuah midang hnen aṭanga hriat dan an zawng a ni maithei,"

"Tuman an hre lo ang, u Nguri pawn hriat a nei lo chu a ni phawt a," a ti ve leh zat a.

"Mahse, ka neihsak theih chu a beisei tho si a," ka tih chuan, "Aw, kha tak kha ania mak ka tih, ruk chhuah theih maiah a ngai anih dawn chu," a ti nghat a.

"Ruk theih a ni tih a hresa zawk a ni thei angem?" ka tih chuan a inngaihtuah vang vang a, "A thil pawlh ho chu a chhinchhiah ka ring, damdawi a siamdan pawh a ziak ṭhin a, wine tam tak a siam a, ziaka a dah chu a rinawm," a ti ve leh khauh a, kan thu a inhmu ṭan ta viau mai.

"Farm-a khawsa te hnen aṭang bakin an nei thei dawn lo tih an hria a, tu emaw tak hi chu an thlem ngei anga," ka ṭawnglai chu min lo pawtchat a, "Ngawi lawk aw, an ti daih tawh zawkin ka hria," tih pahin khum lamah min nawr phei a, "Minai pa kha.." a tih chuan phawk fein ka melh.

"A siamdan a hria em ni?" ka tih chuan, "Damdawi siamdan zawk kha a buaipui a, pu Muana hian endikna paltlang thlap a, tam zawk hralh theih a duh vangin a tihtir alawm, Aizawl lamah te pawh a kensak ṭhin a, wine siamdan pawh a hre maithei," a ti ban charh a, a ṭawng danah chuan a chiang ngam lo tih a hriat theih.

"Lo ru ta se..." ka lo ti zauh chu min rawn en vut a, "A thattu chu a la chiang chuang hleinem, tinzawn nghal ringawt lo la, thurualpui pawh a lo nei thei asin," a ti halh a, ka tinzawn nghal ngawt bik pawh a ni lo, thil ni thei a tam em a ni.

"Thurualpui lo nei ta se, engvangin nge an thah ang?"

"Ka bo hle mai, lo ru ta se engati nge ka hriat ve loh, Veronicai a tel ve bawk si a, ani nen kha chuan engkim kan inhrilhin ka hria, wine kha a sample atan ru turin min ti a, a siamdan lam chu vawikhatmah min zawt lo, a tir aṭangin Minai pa nen khan an lo inthurual zawk anih ka ring ta riau mai, kan tum dan pawh a inang lo tih chu a chiang tawh, engtia tih nge maw an tum le?" a ti nuah nuah a, kei aimah chuan a buai zawk a ang.

"Ka'n ring chhin ange, Minai pa leh Veroi chuan wine siamdan an neiah ngai ila, lehlamah nang an thurualpui che a; mahse, anni chuan tum dan dang an lo nei a, hralh an tum anih loh chuan tu emaw hnena pek an tum ngei ang. Mahse, thah an ni a, wine siamdan erawh hotel neitunu khan a la hre lo a, an nei lo tihna a ni. Khami zana tualthattute khan an nei em tih kan hre ta lo a, an nei lo anih chuan pawi khawihtute hi pawl khat an ni thei a, an nei anih chuan pawl hnih an ni thei, zawhna pakhat leh chu hralh emaw hlan chhawn tum ni ta se tu hnenah nge tih a ni?" Ka hmaa ṭhu chu a'n ṭhu ngil deuh hluai a, ka va en lai pawh chuan min lo en ve reng a, "Pawl hnih an awm anih ka ring," a ti ve khauh mai.

"Eng nge i rin chhan?"

"A chhan chu pawl khat hian ka tel ve tih an hria a, ruk nise chuan kei hi min ringhlel dawn a, an hmu lo anih phei chuan ka kawl an ring ngei ang. Mahse, pawl hnih an nih chuan mi pahnihten min thurualpui loh vangin ka hming a ri tel lo a, chuvanga la dam bik pawh ka ni thei.." tiin dar a kan ak a, tunah chuan ka ring thei tih ka chiang ta, thil tam tak hria se ka ti nge ti lo pawh ka hrethiam ta chiah lo, tunah tak hi chuan a hre tlem hi ka lawm zawk mah a ni.

"Anih pawl thum awm ta se?" ka ti leh chu zawhna ngah hmel deuh hian min en a. "Miss Mathani kha hotel neitunu te lam a nia, Veroi enthla turin an ti a, formula an nei lo bawk a, farm lam hi chuan nang an hria che a, hre ve lo tu che leh formula an kawl em tih kan hriat lohte hi an la awm thei alawm.." ka tih chuan a meng buai nak.

"A sawrzim theih dawn chiah anih chu.." a tih rualin ka lo bu ve vat a, "Tute nge ni ang aw?" tiin a han ngaihtuah leh vang vang a, "I pa i biak a ngai," ka tih chuan a hrethiam aniang min hnial lo. Khumah chuan a han mu ringawt pek a, hnathawh kawr a la ha bawk si, "Mu ringawt suh, i bal," tih leh pawh thawh ka rual a, "Rilru buai lai laia.." tih pahin a tho ve mai bawk a. "Ngaihtuah char char ang che, i thurawn ka mamawh dawn ania," tih pahin ka nam chhuak rawk rawk.

Kawngka ka khar hnu chuan Zohera chu message ka thawn a, "Lawmsangpuia chu a felfai vek, rinhlelh tur a awm lo," tiin ka va hrilh ve leh thlap a.

Lawmsanga nu eirel ka va pui a, chawhchhi min dentir a, ka den zawhah a rawn khawrh mawlh mawlh a, "I la suak bang ania," ka ti ri chu a hre lo nge mawni in chhungah a lut nal nal a, ṭhum khat vel a suah ban chu ka hai khawk a, a sum chawpa va chawi luh mai ka tum laiin a rawn chhuak leh lawi a, thlengah chaw a rawn keng khu vat vat mai.

"Han deng leh rawh," tih pah chuan min hui sawk sawk a, a chaw rawn ken chu sumah a dah a, nui vur vur chunga a let leh chu hrethiam lo fein ka melh. Sum ka en vung vung laichuan Lawmsanga inbual zo a rawn chhuak a, "E khai a, naupangchhia ve," tih pahin min kalpel zui a, ka den laia pa Taia lo haw lah chuan min rawn nuih ruh ruh.

Mahse, ka chhawchhi buhpawlh den chu a lo hmuitui phian mai, zanriah pawh ka ei tui phian a, pa Taia lah chuan "Englo lenna anih kha aw, i ei vak vak mai a," tiin min fiam a, "Eng lenna?" ka tih chuan a sawi duh si lo, Lawmsanga nen chuan min nuih min nuih a, pek ve ka tum lah chuan an duh der lo a.

Zoherliana chuan ka message a la chhang miah lo a, a en ve reng naa a sawi peih zawng a ni lo nge mawni. Dar 7 pelh hret a ni a, ka chhungte chu putara te ina len thlak an tum a, ka kal ve dawn em min zawh chuan ka chak loh thuin ka chhang a, "Ani chu lo awm rawh se," Lawmsanga'n a lo ti vangin mi dang pawh chuan min sawm zui bik lo. A nu leh pate chhuah hnu chuam, "Hauh kan zuk tuar zo law law ange," a ti vei nghat a, "Chhel deuh khan.." tia ka chhang chu nur fein min melh a, ka lo nuihsang thung.

Khumah mu chungin eng eng emaw ka ngaihtuah kual a, Zoherliana chu hotel-ah a awm tawh ngeiin ka ring. Uite chu a dah tawh em tih takngial pawh a rawn sawi lo a, ani hi ngaihzawng a lo nei tak tak em mawni le?

Ka han ngaihtuah let neuh neuh a, a hmeichhe awmpui kha zan hmasa lama ka message rawn chhangtu kha a ni mai angem tihte chu rilruah a rawn awm a, a phone pawh khawih theitu leh a in luaha a hruai mai duh hmeichhia chu tu nge ni ta ang. He khuaah hian hriat a la ngah lo a, kan boruak heti nuai anih laia a kawp duh chu a hmelṭha tawk hle bawkin ka ring. Ka lak aṭangin a hum deuh tlat mai lehnghal a, Zoherliana'n ka hriat a phal loh hmeichhia chu......ka rinhlelh hi chu a ni em lo ang chu maw...!?

Ngawi teh, lo ni ta se...

Khai aw...ani tih ka chiang, thil dang ka lo ngaihtuah vangin ka mangnghilh palh a ni. Kha phone ringtone aṭang pawh khan hre daih tawh tur ka nia sin, celine dioni ngaisangtu leh a pindan bangah pawh a poster tartu chu Jeminai a ni...Zoherliana takzet chu aw..

An lo inngaizawng tihna em ni, ka va luh laia Zohera hmel landan lah kha, a dik thei lo, inngaizawng nghal thei an niin ka hre lo, a tu ve ve pawh hian chhan ṭha tawk nei lo chuan an ti duh lo tawp ang... mahse, Zoa hi chu hmeichhe lakah a nem hma ngei anga, a khawhar lai leh hnemtu a mamawh lai a ni a, Jeminai lah chutiang tho chu. Mahse, a va rang mah mah dawn ve, khuma awmdun tur khawpin an lo inpawh hman dawn em ni?

Ka inngaihtuah buai fe hnuah Jeminai chu message ka thawn a, han dawp ka tum laiin a rawn inpuang awlsam angreng khawp mai. A sawi dawt duh lo naa Zoa chu 'Zoherliana' tih ngatin a rawn sawi a, a hming dik tak a hrilh mai danah Zohera rilru pawh a hriatthiam theih viau a ni. Mahse, Jeminai erawh a ṭawngkam aṭangin a buaina a la neih hmel viau lawi a, mimal thil anga kalpui a duh tak tak lo tih pawh ka chiang.

Zohera hi a hnuklut ve mai nge ni ang tih chu ka ngaihtuah neuh neuh. Keimah vang anih chuan hei hi a kawng ṭha ber a ni, ka tana a pawimawh viau laiin a tan erawh a atthlak hle thung, a hrethiam thei tak tak dawn lo niin ka hria, engati nge maw hetiang rilru hi a put tlat mai le? Ani hi chu tih vak ngaihna a awm lo, Zohera zawk chuan a ni ka rilru tibuai ni.

Ngaihzawng la serious chi, a zawng zawnga inpe chi a ni a, a duh anih chuan ka dang thei hauh lo ang. Ka hriat a duh loh chhan pawh ka hrethiam tain ka hria, inthiam lo hmel kha a pu tlat a, engah nge maw keite min venthawn duh le, ka lawmpui em em dawn tih a hre lo anih hi, ka tan ṭangkaiin han mamawh viau ṭhin mahila ani hi chu buaina lak aṭanga hla takah hian awm thei sela ka ti a ni, nun pangngai nei sela, hmeichhe ṭha tak tawngin hlim em em se ka duh, unau ang maiin kan ṭhanglian a, chuvang ania Veroi vanga a tuar hi pawi ka tih em em ni, ka hnem thei lo a, ṭhian ka nih anga ka tih tur pawh ka hlen zo lo hlein ka hria. 

Ka thlenin te chhungkaw leng chu an rei reuh khawp mai, sana ka en chhen a, zan rei tawh lamah pawh an la rawn haw mai lo. Lawmsanga chu message ka thawn a, a en thei reng reng lo mai a, ka va tho chhuak ta ngawt. Pawn kawtzawl aṭang chuan ka zuk thlir a, kawngkhar inhawng chu ka zuk hmu a, verandaa ṭhutna êngin a chhun phak chinah chuan nu Nguri niawm tak a ṭhu a, mi dang hmel hmuh tur a awm lo. 

Rei vak loah nu Nguri chu a lut a, a rawn chhuak lehta lo vang vang a, ngaih ṭha thei tawh mawlh hek lo, ka kawrlum ka va ha sawk sawk a, putara te in lam pan chuan ka chhuk ve nghal a, an kawt zawl ka thlen chuan inhau thawm niawm tak ka hria, patling thinrim inhau bawrh bawrh thawm a ni.

"Vawikhatmah hi awka vin pawhin ka la chhang ngai lo che, kan zahder vang che hian kan hlau che emaw ti reng reng suh, in leh ram zawng zawng hi ka nu ta vek anih hi, i thua i tih theih pakhatmah a awm lo, ka pu khan thurochhiah a nei lo, engkim hi ka nu ta vek, i sâwn hian chan tur a nei lo, kan thisen zawm pawh a ni lo," titu chu pa Dinpuia a ni.

"Kei awm lo ila eng fakau nge nei tura i lo inngaih a, i puin a hnutchhiah kha eng teh ual a ni hleinem, serthlum leh lakhuihthei hmun bak hi chu ka siam len vek anih hi, kei awm lo ila eikhawp pawh i thlo chhuak dawn em ni," tiin pu Muana'n a lo chhang ve bawng bawng a, "I ram a ni chuang lo, a ram neitu ta a ni tih hre rawh," pakhat chuan a ti pawr leh hlur a. "Ramte hi ka vah zau, i pu ram chin chu balhhla hmun thleng chauh khu a ni, ka enkawl hnua vc hnena ka dil anih khu," pu Muana'n a ti ve leh a, "Ee..chutiang chuan kan ti dawn a maw, i ngam phawt chuan han ti la, kan hre mai dawn alawm," pa Dinpuia'n a ti leh tun tun a, an ṭawng kar lakah chuan pitari'n, "Duhtawk tawh rawh u," a lo ti ve sek bawk a, an boruak a rih hmel khawp mai.

Verandaah chuan ka ding reng a, an inhau thawm chu a reh mai lo. "Naktukah engkim kan tifel ang, kan pa angin document zawng zawngah i hming kan dah che a, kan khing let thei chiang khawp mai che," tia pa Dinpuia a ṭan laiin, "Cheng khat pawh ka pe lo ang che, i unaute an chang vek ang," tiin pu Muana'n a chhang thung a, "Thannguri hi ka huphurh emaw i tia nge?" pa Dinpuia'n a tih chuan nu Nguri a lo ṭawng ve nghal a, "In sawi rei tawh lutuk, ka hming lam ve sek pawh kha a ṭul lo," a lo ti pawr hlar a, "Engah nge kan lam loh ang che, kan thisen kai leh dan ang taka rokhawm theitu i ni alawm maw le, he pa hi chuan engmah chan tur a nei lo, Tluanga nena kan chan ai pek a tum vang anih hi i pa hian helaia a awm tir reng, min bum theih a inrin vang anih mai mai hi," pa Dinpuia'n a lo ti leh hluk hluk a.

"A hriat chhuah aṭangin huphurhna hlirin a lo khat tawh zawk anih kha, engmah ka tihsak pawh ni hlei lo, a duh duh kha sawi rawh se, thei ve tawka a inngaih chua aman thawk vek tawh rawh se," pu Muana'n a lo ti leh khur khur. "Ka thawk mawlh ang, i duh leh i fapa hi hruai la, tlanbo daih mah ula pawi kan ti therte lo," tia chhangtu chu a thinrim luatah a aw a khur lek lek.

"Ka va han tlanbo awm lo e aw, ka in leh ka ram, ka farm anih hi, mi zah lo viau lo mai rawh, tu nge enkawl seilian che i theihnghilh ange.." pu Muana'n a lo ti ve leh a, "Min enkawl seiliantu chu ka nu," pawr fahrana pa Dinpuia'n a tih leh chuan, "Hmeithai fa pali nei enkawltu chu keimah ka ni aw, pencil hmawr i ei mai mai laiin i pa chu a tlanbo daih tawh, a thi daih tawh nghe nghe ang.." pu Muana'n a ti vin ve ṭhak a, an ri deuh phat.

"Mi rawn khawih te i tum ngam elo, lo kal teh dek, ka'n lo chhu thlu tawp teh ang che," tih riin a zui a, "I duh phawt chuan min chhu ta che, min chhu rawh..nang kha lo inrawlh ve suh, i lo dan pawh kha a ṭul lo, a duh chu rawn ti rawh se, lo kal ta che putar.." tih angreng ri nawk nawk karah chuan midangin an lo khap ve chul bawk a, Lawmsanga pa ṭawng thawm pawh ka hria.

"Heti zawng hi chuan ti lo hram teh ang u, a zia lo lutuk em mai.." a ti ve bal bal a, an ngaihsak hmel loh hle thung.

"Nang putar kha awm lo ka pa chu a lo haw leh em em ang, ka nu thluak i suksak a, i fin kherek vang vek anih hi pa nei loa kan awm, ka pa lo haw leh i hlau a, a lehkha min thawnte pawh i lo thukruk duh hial a ni lawm ni," pa Dinpuia'n a tih chuan putara chu a sa leh phat. "Vawikhatmah a rawn ngaihsak ngai lo che u, a lehkha rawn thawn te kha chu sawi pawh sawi duh suh, i nu ziah chawp anih kha, ka chhui chhuak vek tawh, i pa awmna chu amah kha zawt ta che...a tlanbo chhan pawh a hrechiang khawp ang chu," a lo ti let nek a, ka ṭhu mai mai thei tawh lo, luh ve chi lah a ni mang si lo a, ka hriat chak lutuk thil an sawi bawk nen kawngkhar bulah ka ding ran tawh.

"Lehkhathawn engmah ka ziak lo e, a fate a rawn thawn anih kha," pitari'n a tih chuan, "Aw haw haw...ka hre lo emaw i tia law, post master hnenah ka zawt dap alawm mawle, i faten a tlanbo chhan an zawh che apiangin lehkhathawn an dawng zuizat zel a nilawm ni. Laldinpui, i pa kha tuman a chin an hre zui lo, khawi aṭangin nge huan enkawlna tur pawisa kan neiha i rin, i nu sum neih dan kha zawt chiang rawh, i pu pawisa kha a kal hla reng reng hleinem, a huanah hian a luang ral leh vek alawm.." pu Muana'n a tih leh takah chuan thawm chu a reh ta dak a, "Eng nge a sawi chu a awmzia?" tih ri chu a zawi viau tawh.

"Min puh letna tur a zawng kual mai mai anih kha, a fa thuhruk kan hrechhuak bawk si a, mi rilru suk thiam lutuk anih saw, in bumtir reng reng suh," pitar chuan a lo ti hlak hlak a, za lo fahrana putara nui riin a zui bawk.

"I nu khan a awmna chu a hria ang chu, a lo haw leh thei em te han zawt ta che, a lo haw leh thei anih phawt chuan ka khum ka lo kian dawn nia," tham lo zet hian putara'n a ti leh a, chhangtu an awm mai lo.

"Huante hi lai la, i pa chu i hmu maithei asin," putara chuan a ti leh nghat a, chutih laichuan "Duhtawk em em teh," Lawmsanga'n a lo tih ri ka hria.

"Saw zawng chhepa sawn ka pa thatah a ngai che anih saw," ring fahranin pa Dinpuia'n a ti leh a, "A la dam reng alawm maw le, a rilru tenawm a rawn phawrh mai mai anih saw, mi vau letna tur nei hek lo, dawt dawta min puhna tur a zawng kual anih saw," pitar chuan a ti ve tan tan a, "I ṭawngkam kha fimkhur rawh aw," pa Dinpuia'n a ti leh khar khar, an inmelh rum hlawm nge ni an ṭawng leh mai lo, luh ve chu ka han chak khawp a, hriatbelh chakna nen ka lo inhumruh ṭun mai.

An ngawih deuh vang vang hnu chuan, "I pasal chu a la dam anih chuan engah nge a biruk reng, a pawisa ruksakpa pawh a thihna a rei tawh alawm maw le..." hla deuh aṭangin putara'n a rawn ti leh lang lang a.

"A rawn inlan i hlauh vangin ka bulah i inhrosa khur khur reng a ni lawm ni, lo kal se chu i duhâm vang ringawt pawhin i vaw hlum duh ang chu.." pitari'n a tih chuan rilru a han buai ru khawp a, a tu zawk chuan nge dawt sawi ka hre thei lo, nupa inringhlel ṭawngkam satliah nge, thikthu vang nge tih chu hriat har tak a ni.

"He heh..a ni tak ang, tunge dawih zawk chu a hriat mai alawm, kei awm lo ila chu a bum nawn leh daih tawh ang che," putara'n a tih leh takah phei chuan ngaihdan bulfuk tak pawh ka nei tawh lo, putara thilsawi dan chu thil hrechiang lo, hriat chak ve si ṭawngkam hi a ang mahin ka hre tawh.

"Nupui fanau neiin a hlim lutuk, a chin kan hriat lohna pawh a rei tawh, tun ataka rawn sawi chhuah kha a ṭul fahran lo e, ani aiin i tenawm fe lehnghal," pitar chuan a lo ti let nek a, "I rilru kha alawm tenawm chu le, i fate heti khawpin ka duata, ka ngaihsak em em reng a, Lawmsanga i han ngaihtheih loh dan hi chu, a chhia zawng zawng i puh thlazen mai a, thil rua i puh loh leh kei min puhna i zawng thul, ka hnuaiah pawh thawhtir duh loin i vawk i enkawl tir a, an hlawh tihsan ka rawt lahin i lawm hek lo, heti chung hian hnawhchhuahah i la vau fo mai bawk a..." putar chuan a ti leh tun tun a, pa Dinpuia lo ṭawng leh chu a inbengdai ta deuhin ka hria.

"I duh phawt chuan i fapa chu chhanin a thlavang hauh rawh a pawi kan ti lo; mahse, kan ram leh ro chungchangah erawh a rawn tel ve a thiang lo ang, nangpawn i pualin engmah i nei bik lo, kan chhungkaw thil a nih hi hria ang che, i sâwn hian chan tur a nei lo ang," a ti nghat nghat a, Lawmsanga a rawn ṭawng ve ta chiah.

"In chhungkaw mi ka ni lo, nih pawh ka tum ngai lo, hnathawk tur chu zawng ula, keini chu kan chhuak ang," a lo ti hmiah mai.

"Lo ṭawng teivet suh," putara'n a lo ti chang bawl a, "He hmunah hian ka awm chak viau hleinem, chhuah ka duhna a rei lutuk tawh.." tiin Lawmsanga'n a chhang ve leh a.

"Engah nge chuti si i chhuah daih mai loh, tuin nge khapbet che a?" pa Dinpuia'n a lo tih chuan Lawmsanga chuan a chhang dawn lo nge ni a ṭawng thawm ka hre lo. Rei vak loah chuan, "Haw ang u, he laia awm reng chi pawh kan nih loh hi," a tih ri ka hria a, ke pen thawm ka hre zui bawk. "He pa ngel ngul lah hi.." pitari'n a tih leh laichuan kawngkhar lam an rawn pan niin ka hria. Ka inher vut a, kawt zawl lamah ka tlan phei hlawk hlawk a, chhohsan loin step bul thim laiah ka lo nghak thung.

Rei vak loah an rawn inzui chhuak a, Lawmsanga nu leh pa chu an lo kal hmasa a, Lawmsanga erawh putara'n a rawn koh vangin veranda-ah a la ding thung a, pa Taia te nupa chuan an han nghak leh rih. Mahse, putara te pafa chuan eng emaw sawi dun ngai an nei ni ngei tur a ni chhek in lamah an inzui phei a, pa Taia te nupa chuan an rawn kalsan ve thuai bawk a, ka bul an rawn thlen chuan han sawi mai tur pawh ka hre lo.

"I muhil daih tawh ang chu ka tia.." Lawmsanga pain a tih chuan, "Ka lo nghak che u a, in va rei ve.." ka lo ti var a, "Nia, a zia lo khawp mai, ti rawh..i haw ang u," tih leh step-a chhoh a rual a, "I nghak dawn em ni?" Lawmsanga nuin a tih chuan ka bu ringawt. Ani pawh chuan a fapate dinna lam chu a melh vang vang a; mahse, rei ding loin a pasal chu a zui chho a, kei erawh ka la ding ta rih a.

An inbe rei khawp mai, eng nge an sawi dun ang tih pawh hriatthiam a har, inhau angin an awm lo a, thim zingah an indinchilh a, an phun thawm takngial pawh ka hre pha lo. An rei tak emah chuan ṭhu chungin ka thlir a, chutih laichuan putara te kawngkhar chu a rawn inhawng a, pa Dinpuia kha a lo pen chhuak a, chhek in lam chu a va thlek thuak a, chutah, inherin kawngkhar a khar hmak mai.

Chumi hnu pawh chuan minute 20 vel zet chu an la inbia. Lawmsanga lo kal phei ka hmuh chuan ka ding ve vat a, min rawn hmu ve nghal mai bawk. "Chho ang.." a rawn ti chu chîk fêin ka lo en a, "Khitah kan sawi dawn nia," a tih leh laichuan putara thawm a rawn ti hlut. "Rawn hawng rang rawh u, anih loh chuan in nuamsa lo khawp ang," a ti lung lung a, Lawmsanga chuan a thawk a la hluai.

"Laldinpui, nangmah em ni a, he in hi ka sak anih hi hre rawh, nanga hnawhchhuah theih ka ti hlek lo ange.." tiin putar chu a au leh lung lung a, Lawmsanga kal tum chu ka pawt let rang khawp mai. 

Mahse, rei vak loah kawngkhar chu an rawn hawng a, lo hawngtu pawh a fanu a ni nghe nghe. Phun hluk hluk chungin putara chu a lut a, "A ngaihtuahawm lo ang maw?" Lawmsanga'n a tih chuan chhan dan ka hre lo. "Duh aiin thil a kal thui," a ti zawi leh sup a, "Pa ber a nia lawm, ngaihtuah suh," ka tih pawh chuan a la thlir reng. 

"Kal ang," tih leh pawh ka rual a, a banah chelhin ka kai chho dawt dawt. Kawt zawl kan han thlen chuan, "Pawnah inbe zawk ang, ka thawk a pik tlat," tiin in sir lam a pan a, ka hnial bik lo. In hnung thlai huan lamah chuan kan inzui phei zel a, theihai kung hnuaiah chuan dingin thawk a'n la leh ham ham phawt a, keiin ka lo nghakhlel hle thung.

"I duh ang thlap chu a niin ka hria; mahse, a nuam lem lo khawp mai," zawi deuh tak hian a ti a, sawi lo mahse a chiang reng tawh.

"Chhel deuhin aw.." ka ti chu min chhang lo. Ka lamah a rawn inher a, ka darah a rawn vuan ngawt a, a zawi bawk a; a ban chu a rit charh mai.

"Min lo ṭan vangin a chhungte nen an inhnial hrep a," a ti a.

"Ka lo hre hman nial nual, an thilsawi dan erawh ka man lo angreng," ka ti ve vat a.

"Pu Muana khan an inhnialna thupui thlak a tum vangin eng eng emaw a sawi nual a, lehkhathawn chungchangte pawh kha a sawi a, a tir kha chuan pi Lalpuii pasal kha a  thi tawh emaw ka ti hman a; mahse, nichina ka zawh kha chuan a sawi nawi leh khawp a," a ti nuah nuah a, ka ngaihthlak lai pawh khan a sawi nawi hle tawh zawkin ka hria.

"A thi nge a la dam a chiang lo a ni maw?" ka tih chuan, "Aw, hriat a chak hmel zawk mahin ka hria, 'Hmelma chu ka nei ngei a, ka hriat miah loha ka chhiatna duh hi chu an awm tih ka chiang a, he pa hi a la dam anih chuan ka rinhlelh ber a ni ang,' a ti a, a hlauthawng deuh bawkin ka hria," a ti leh halh a.

"A nupui a puh chhiat dan kha dawp chhuah a lo tum ṭhin dan anih dawn kha," ka tih chuan min chhang lo.

"Lehkhathawn kha a nupui siam chawp a ti bawk ti raw?" ka tih chuan, "Um, engvang nge mawni dawn le?" a ti leh vang vang a.

"Hmelma nei nia a inhriat chhan chu i zawt em?" 

"Zawt e, han sawi fak theih pawh a nei chuang lo, thil a hmehbel kual ve bawk a, pi Lalpuii pasal hlui hian a laka phuba la duh turah a ngai a ni ber, lehkhathawn te pawh kha a lo chhui tak tak a, annu ziah a lo ni leh daih lawi a.."

"An nupa kar hi a mak ka ti.." 

"Nia, annu leh a pasal hlui kha inbe ru ṭhinah a ngai alawm, annu lah chuan an rosum te kei min pek tumah a ngai a, a fate tan ṭan a khawh ru ve tlat bawk a, min hriat chhuahna a lo rei tawh a, an inhmuh thiam lohna pawh a rei tawh tihna anih chu, tumah rin ngam a nei lo a ang,"

"Kan thil buaipui nen hian inzawmna a nei thei angem aw..?" ka tih chuan, "Ka hre lo le, a mihringa te hi chu an inhre kual ṭhum hlawm a, an buaina hi a inzawm ange maw," a ti a, keipawh chuan ka ngaihtuah ve neuh neuh.

"Pi Lalpuii pasal hlui tlanbo chhan hi eng nge a nia i rin, i pa chuan eng emaw a hrilh tawh che em?" min lo melh vut a, "Zawhna chang ka lo hre miah lo, chu chu a pawimawh viau tak ang," a'n ti deuh hluai a. 

"Nia, kan hriat theih chuan a fiah kuarin ka ring, i pa a huat chhan turte pawh kan hre thei anga, a thil tih duh turte leh pi Lalpuii rilru turte pawh a chiang thei ang chu, i nu leh pa sawn hriat an nei angem?" ka ti zung zung a, "Ka nu sawn a hre maithei a ni," a ti ve zat a, han zawh nghal rum rum mai ka duh laiin, "Naktukah kan ti dawn nia, zanin chu a chauhthlak tawh em mai," a ti a, ka hnial bik lo.

"Ngaihdan dang min hrilh loh i nei em?" a tih chuan ka nui ṭep.

"Zep ka nei hleinem," ka tih mai laiin, "Mahse, ngaihdan pahnih thum i nei ziah sia," a ti zawi sup a, min hrechiang ve viau tawh a ni.

"He pa hi a la dam anih a, i pa a haw viau anih chuan a huat chhan tur awm ang chu a dinhmun luahtu a nih vang a ni thei a, engpawh nise lungawi lohna lian tak neiah ngai phawt ila, kan thil buaipui nen inzawmna a lo nei anih chuan wine formula duhtu hi a ni thei ang, pawl thum awm ta se ka tih kha i hria ang a, a pathumna tur hian a lam a hawi thei dawnin ka hria," ka tih chuan mak a ti deuh a ni maithei min en run run a, "Wine formula chu eng atan nge a tih ang?" a tih chuan chhanna ka nei bik lo.

"He thil hi an buaipui luai luai hi chu a mak ngawt mai, kan hriatthiam bak hi a la awm em mawni ka ti hial ṭhin," ka tih chuan kan rilru a inang aniang a lo bu nghat nghat.

"Tihdan tur chu ka hre mai thei, i pa hi a fihlimah ka ngai tihna ni loin puih dan ka hriat ka ring," 

"Eng nge a awmzia?"

"Wine kha kan lakchhuah a ngai, Jeminai kan mamawh ang," 

"Keimah min ringhlel dawn tho asin," 

"Ka rintir lo thei ang che, i tel loin kan ti dawn alawm,"

"Luh ruk chu a awlsam miah lo ang, lut thei pawh ni ula lak chhuah a har viau ang," 

"An rilru lakpen leh a ngai dawn a ni mai," ka ti chu a'n hlauhthawn hmel khawp a, "Pawikhawih zawng hian ti ziah lo teh, ran hrai hlumte kha, i chunga a tlak let te hi i hlau ve lo em mawni," a ti khar khar a, han chhan dan pawh ka hre lo, hlawhtlin loh hi ka hlau ta berin ka hria, ka chhunga thleng tura hlauh hi chu ka nei meuh lo a ni, thihna ka thlir dan a dang ta pawh a ni maithei.

Zingah eirel pahin Lawmsanga nen a nu chu kan zawt a, a thilsawi chu a mak angreng khawp mai. Lawmsang nu chuan heti hian a sawi a, "U Biakliana khan zu a in nasa a, a thatchhe bawk nen ka pu nen khan an inngeih lo a, ṭum khat phei chu ka pu khan kutkem neiah a puh nghe nghe, u Lalpuii hi chuan a pa thu hi a kawi a ngilin a awih mai ṭhin a, a pasal nen pawh khan a inhau zing, chung lai chu u Muanthanga lo awm tirh lai a nia, huan lamah ka pu kha a pui a, a taimain a hna a thiam si a, engkimah ka pu khan a ring a, u Biaka pawh khan a thik ve ṭhin khawp mai a, u Muana kha chu tupawh mai khan kan ngainat laiin u Biaka erawh  zungawl vei tih kha kan hriat dan a ni mai a, u Muana rawn awm hnuah phei chuan ka pu lakah khan a tlatlum lo tial tial a ni ber.

Ṭum khat chu hnathawk pakhat nen an insual a, u Biaka khan a hneh mang si lo a, u Muana leh a hnathawhpui pakhatin an lo pui a, an khawihna angreng a, chupa chuan police hnenah a report a. Mahse, ka pu khan  u Biaka kha a puhthlu hmiah a, u Muanate ṭhiandun kha chu a thawi pawhin an hming a sawi lang duh lo, khang vel hnu khan u Biaka kha a hel tial tial a, a tlanbo chhan tak erawh hmeichhe pakhat vang kha niin ka hria.

Serthlum lo tura lo kal ṭhin hmeichhe pakhat khan hrai ruia pawngsual angah a puh tlat mai a, case phei chu an file lem lo, ka pu khan pawisa pein ngaihdamte a dil a; mahse, u Lalpuiite nupa kar kha a buai ta angreng a, an inṭhen mai anga kan tih laiin a tlanbo ta daih a, ka pu thir thingrem ami pawisa zawng zawng a la chhuak bawk a, khang hunlai kha chuan nuai 2 kha chu tam tham tak mai ania, ka pu pawh kha a talbuai phah khawp asin.." a ti dap dap a.

"Hmeichhia chu a pawngsual tak tak in ring em, engtinge pawisaa an lungawi theih mai a?" ka tih chuan han rindan vak pawh a thiam lo. "Kan hriatpui chin kha a tlem em a, kha nu lah kha zu in ve thei mai chi a nia, pawisa a dawn khan a lungawi zui mai anih ka ring. Khami hnu khan u Muana chu hnathawk ho bula awm tawh loin ka pute inah a rawn awm ve a, u Lalpuii nen khan ka pu khan a sawirem an ni deuh ber, u Muana kha a kutke ber a ni tawh a," tiin min chhang a, an boruak chhe awlsam viau pawh hi inngaizawnga innei an nih loh vang a ni ngei ang. Ngaihdan mak deuh ka nei a, a awihawm loh deuha ka rin vangin ka zawt zui duh lem lo a, hriat thui deuh erawh a chakawm viau a ni.

Tukṭhuan eikhamah khua a kal turin ka insiam a, Lawmsanga chu a pa nen vawk chaw chhumna in sa turin an chhuak thung.   Ka wine dahṭhat chu bottle teah a chanve chauh ka thli chhuak a, kal inpeih atin kawtah nu Nguri lo chhuah hun ka va chang a, naupang school kal tur leh hnathawk inzui chhuak te chu ka thlir reng a, nu Nguri chu a rawn chhuak har khawp mai.

A tho har deuh aniang a lo chhuah chuan dar 10 a pel tawh. Veranda-ah lo chhuakin a inzimar ar ar a, hmanhmawh deuha ka chhuk thla chu min hmuh rualin ka lam a rawn pan ve nghal a, "Hei i thil chu, niminah inpekna hun a awm si lo a, thil pawh kha ka dah a nia, i ṭhiannuin a lo hrilh che em?" ka ti nghal zung zung a, "Hrilh e, i fel ṭhin e, Lawmsanga'n a hre ve lo tiraw?" a tih chuan ka bu zauh.

"I scooty ka hmang lawk duh, khuaah lei ngai ka nei a, niminah dawr a inhawng si lo a," ka tih chuan, "Hmang rawh, rei lo la, tunlai chu i pi sawn in chhungkua hi a mil vak lo che u a nia," ner nang hian a ti a, engmah dang sawi loin a let leh mai bawk.

Ka inkhalh chak angreng a, nidang zawng aiin ka thleng hmain ka hria. Hotel kawt ka thlen veleh Zohera ka call a, "Inah ka awm, ka lo kal ang," a lo tih chuan, "Ka lo chhuak lehnghal dawn, thil kan ei dawn nia," tiin kan inhmuh ṭhinna thingpui dawr lam lo pan mai turin ka hrilh a. Mahse, hotel ka va luh chuan pi Julie hmel hmuh tur a awm lo. Counter nghaktu nula hnenah chuan ka thilken chu ka pe a, "Ka lo be dawn tih lo hrilh mai rawh," tiin a kut ngeia hlan chhawng turin ka ti a, chumi hnuah Zohera nena kan inhmuhna tur lam chu ka pan nghal a.

Darkar chanve dawn chu ka nghak hmanin ka hria, call leh ka tum laitakin a rawn thleng a; mahse, zuitu a rawn nei tlat. Phawk angreng zeta ka lo en laichuan ka epah an rawn ṭhu a, Jeminai chu a nuisang reuh a, vawiin chu a inchei nalh khawp a, a rimtui ram ram viau bawk. "Kawngah kan rawn inhmu a," Zohera'n a tih laichuan, "Eng nge kan ei ang, thil i chah tawh em? Jude, eng nge i ei chak?" tiin Jeminai chuan no fahran hian Zohera chu a melh a, Zohera min rawn en dan chu a pha dui mai a, ka han nuih tak nain a nui ve lem lo.

"Tinge in ngawih reng a, Master Jenusi thupek kan dawng leh hmasa phawt dawn nge?" Jeminai'n a tih chuan han sawi mai tur ka hre lo, hmui ka seh neuh neuh ringawt.

"I chah tawh em?" Zohera a rawn tih chuan lu ka thing vat a, menu chu an lamah ka nawr phei zui a, Jeminai chuan a bih thuak chauh, Zohera chu a pe a, "Thlang rawh, i ei ang ang ka ei mai ang," a tih laia Zohera'n a melh dan chu ka lo en ve reng a, nuih a za dawn dawn mai, an mizia a inang lo viau naa eng emaw tih zawng takin an inhmeh.

"In tur ka va la lawk," tia Jeminai a thawh hnu chuan Zohera chu ka nuih ruh ruh a, min melh ṭha duh vak lo.

"Vawiin chu rim dang deuh ka hria," ka han ti erawh min rawn melh vut.

"Eng rim maw?"

"Ngaihzawng nei rim a nam?" nuichunga ka tih chuan, "Pangpar rim chu maw, kha nu thil inkah kha anih kha," tih pahin menu a bih zui a, a rawn hawi leh pawh chuan ka la nui reng.

"I va bui ve, i mu ṭha lo em ni?" a ti teh daih a, "Ṭha e, nang zawk?" ka tih chuan a bu ringawt.

"Thil min hrilh duh i nei em?" ka ti chu a hrethiam zan lo, "I neih zawk ka ring a?" a lo ti let heh a, "Nang pawn i nei lo em ni?" ka tih pawh chuan, "Uite chu ka dah tawh, an veng amiten an chhar ang," a ti leh êt a, Jeminai a let leh tawh bawk nen ka zawt zui duh ta lo.

Kan ṭhiani chu dawhkan bulah a rawn ding al a, "Jude, ka hawng thei lo," tih pahin a theitui bottle chu Zohera lamah a lek vah a, thawk hluai pahin Zohera chuan a lo bansak a, ka hrethiam lo der awm ta vel a ni ber.  Jeminai lo ṭhu lah chuan Zohera chu a be seuh seuh reng a, a theitui te chu a intir a, Zohera chuan a hnial hreh deuh tih pawh ka hria, theitui ngaina lo ve tak mai hi a ni a, a thlum lam phei hi chu soda drinks anih loh chuan a in meuh lo. Mahse, kan ṭhiani chuan a tihdan tawk a thiam hle aniang tui a tih thute pawh a hrilh ve thlap mai.

Eitur kan chahfel hnu chuan hotel-a ka thil tih leh Jeminai kan mamawh thute chu ka hrilh zung zung a, "Ka chhungte chu ka hrilh tawh a, tunkar tawpah ka hman ang," a lo ti fel thliam a. "Taxi emaw, auto i lo hmang thei angem?" tia Zohera ka zawh chuan, "A lo kal ve dawn maw, anih chuan a rualin ka haw lehnghal thei ang chu, rawn riah kher pawh a ngai nang," Jeminai'n a lo ti zung zung a, dawhkan hnuaiah an insik ru nge mawni an inmelh vut.

"Ni hnih khat i cham a ngai dawn," ka tih chuan, "I thu ber alawm Master," ti ngatin min chhang a. Hmmp.. Ni mai mai teh se, NGAIAH KA NEI THEI MAIIN KA RING. 

End of chapter - 17