WHY DID YOU GO?
by Ahmangaihi violette khiangte
Chapter - 18
"He khua hi nuam i ti viau em?" ka hmaa ṭhuin a tih chuan, "Aih, eng atan nge min zawh?" tiin ka en let ran a.
"I nuin pawisa a pek hunah che chuan engtia awm zel nge i tum ang?" a ti leh a.
"Engmah ruahman ka nei lo," tia ka chhang chu min en deuh vang vang.
"Nang zawk, farm-ah sawn i awm zui dawn em?"
"Ka awm chhan i hriat kha, ka haw leh vat ang chu,"
"I haw hreh deuh tawh ka ring mai mai,"
"Engvangin maw?"
"Lungleng deuh te pawh an awm hmel a," nui chunga ka tih chuan a nui ve eih lo. "
"Awm chhan tlak i ti leh vak si lo a ni maw?" ka tih pawh chuan nui loin min la en ngar a, eng nge maw a ngaihtuah ni?
"I chhungten an lo bia che em?" ka bula ṭhuin a tih chuan, "Be zeuh zeuh," ti maiin a chhang a, "I biak khat chuan a ṭha lo ang, hostel-a awmah an ngaih che kha," ka bula ṭhu bawk chuan a ti leh a, ka lo nui chu min rawn melh ve ve.
"In awmdan hi a nuihzatthlak e, in chhungte in bum tihna em ni a?"
"I thil kha ei mai mai rawh," ka bula ṭhu chuan a lo ti hmuk. Thil ei mawlh mawlh pah chuan ka hmaa ṭhu chu ka va melh a, a thil ei a tui vak lo aniang a fianin a hawlh kual a hawlh kual a, sa a dah hrang ka hmuh rualin ka plate-a sa chu ka suak a, ka bula ṭhu chu ka va pe nghal a, "Nangman ei ta che," a tih chuan chhang loin ka va suah mawlh mawlh.
Hma lam ka va hawi leh chuan min lo en ve chiah a, "Pawisa ka neih chuan keipawh aizawl lamah awm ka tum," ka ti a, zawhna ngah hmel deuh siin engmah min zawt lo.
"Aizawlah chuan bialpa i nei em?" ka ti chu a rawn nui ve ta hram a, "Nei e.." tiin min la chhang ta zui a, ka rindan vel a ni, Lawma hi hman ṭangkai atan bak a ti lo, a duh ang ti turin a thlem thlu a, a duh a tih zawh hnua kalsan leh mai a tum anih dawn hi.
"I bum ve tho em ni a?" ka ti chu a duh vak lo aniang, "Bum lo," a ti chang bawl a, chutih rualin ka bula ṭhu chuan min rawn tlawh zauh.
"I awmdan a hre miah lo nge?" ka'n ti leh hram a.
"Hre maithei.." ti maiin min chhang a, min chhang ṭha duh vak lo tih ka hria, ka zawhna ki a man thiam te pawh a ni ang.
"Hria se chu a rawn hruai duh ang che a, nang lah.." ka bula ṭhu chuan min rawn nghawk leh zauh a, chutih laiin Jenusi chuan, "A hre lo ang, aizawlah a awm lo," a lo ti ve zat a. "Khawiah nge a awm?" ka tih rualin ka bula ṭhu chuan dawhkanah a no a nghat ri chawrh a, ka lam a rawn hawi chu phawk fein ka lo melh.
"A ho lutuk," Jenusi'n a lo tih chuan, "Sawi sual ka nei em ni a?" ka lo ti let hu a, Jenusi lam chu ka melh bawk.
"International pawnah a awm," a lo ti teh tlawng a, eng nge a awmzia ni ngai?
"A thi tawh em ni a?"
"Eng atan nge i tih?" ka bula ṭhu chuan a lo ti hluk.
"Eng nge maw min vin vak kher le?" tih pah chuan mitmeiin ka hau mawlh mawlh. "Ei zo ula, kal vat ang u," a ti zui a, chutih laiin kan hmaa ṭhu pawh chuan a fian a dah zui a, "Ka la ei dawn," ka tih chuan min chhang lo. Lawm lo ru deuh chuan ka ei zawm a, ka hmanhmawh duh lem lo. Ngawi renga min nghah an tum nge ni an ṭawng lo ve ve a, an phone an khawih lai chu ka thlek leh zauh ṭhin.
"Thingpui ka chah dawn, in duh ve em?" ka tih chuan, "Kei chu ka duh lo," Jenusi zawkin a lo ti a, ka bula ṭhu chuan thlang lam a hawi daih.
Thingpui chu ka chah a, games kelh pahin hmanhmawh lo fe chuan ka in a, an duh chen chen ngawi rawh se ka ti mai, mi an care tehchiam lo bawk a, ka tih chu ka tih ka ti ve tlat ang. Mahse, Jenusi zawk chu a hmanhmawh deuh aniang a rawn ṭhu ngil hluai a, "Ka awm rei hman lo a," a tih rual rual chuan, "A ni maw, chuti chu kal mai rawh, i puten an lo hau palh ang che," ka lo ti leh zung zung a, a duhzawng ka sawi emaw tih tur hian a rawn nui heu mai.
"Anih ka kalsan ang che u aw?" tiin ka bula ṭhu chu a va bia a, pakhat zawk chu a lo bu nghat. "I lo kal theih dawn chuan lo sawi hma la, kan lo inring ang," ka lam hawia a tih chuan ka lo bu ve mai a, a kal chu ka en zui vang vang bawk. A han kalliam chu boruak a veng hawk mai hian ka hria, min uap run mai a, hah a tidam hlawl lo.
"Zoherlian.." ka lam a rawn hawi rualin a banah ka lo sik nawk nawk, rang deuh hian ka kut a rawn man a, lo thin thlak pahin bang kil lamah ka nam phei rawk rawk a. "Eng nge i hriat a?" a rawn ti chu thip fein ka lo melh.
"Ti nge a bulah kher khan min vin a?"
"I dilchhut em anih kha, a hmel aṭang khan a sawi chak lo tihte i hmu ve lo em ni," nui chunga a tih laiin, "Sawi chak lo pawh nise ka zawt a ni mai, ani pawn kan sawi chak loh min zawt ve fo tho alawm.." A rawn tawlh hnai zui a, "Min en dan kha hriat a nei tawh chiang mai," a la ti chhek chhek a, ka lo ner nang ringawt.
"Hrilh vat rawh, in bula awmdan tur hriat a har em mai, a mitmei ven reng te hi ka duh lo ania, i ex emaw tih mai tur alawm.."
"Naupan lai aṭanga ṭhian kan ni zawk, ka bestfriend nen an inngaizawng ṭhin," a tih chuan mak ka ti angreng.
"A bialpa chu a thi tawh tak tak em ni, international pawnah a awm tih kha eng nge a awmzia?"
"Nikum khan a boral, i pa leh Veroi thih hma lawk khan.."
"E he...a la rei loh tehreng nen, engtin nge Lawma a chhai leh nghal theih zawk le?"
"A chhai lo, a mipa zawkin a ngaizawng anih kha, Jenusi hi hriatthiam tum rawh, hrehawm a tih vangin rilru lakpenna tur a zawng ve anih hi.."
"I va han ṭan em em, a bulah hetiang hian min ṭan ve awm der si lo.." Min rawn melh vang vang a, thawk a la deuh ham ham.
"Ṭan ngai i ni em ni, hmelma pawh in nih loh hi," a ti a, hrethiam tura beisei chi pawh a ang lo, sawifiah lo hi ka tan a finthlak khawp ang.
"Ṭhian in nia..in inngaipawimawh tih pawh ka hre ve tho a.....mahse..duat loh bik nih ka duh hleinem.." Min rawn melh a, a nui suk suk.
"Ka duat lo bik che pawhin ka va hre lo ve,"
"Duat lo bik.."
"Ka duat ve ve che u.."
"Duat zawk ka duh.."
"Ka bialnu i nia, ani ka ṭhian, lungawi lohna tur i neih loh chu.."
"A hmuh laiin min duat ngam chuang hleinem,"
"Ngam lo a? I hre sual anih chu, a la hun lo ka tih tawh kha.."
"Hun lo i tih chhan chu eng nge ni a, engtik nge a hun chu..?"
"Thil pawimawh kan tih hi maw le, kan serious a ngai alawm.."
"Ka tukverha i rawn luh hma khan chu chu ngaihtuah ta che," A lo nui hawk a, "Min nuih suh," ka tih rualin ka kut a rawn ban a, "Engtia duat nge i duh?" a tih chuan, "Min vin tawh lo la a ni mai," tum bur chungin ka ti a, "Ei duh i la nei em, i duh chuan chah leh rawh," nelawm fea a tih laiin ka la tum bur thung.
Min rawn ṭhuthnaih pahin hnung lamah ka sam a khawih neuh neuh a, "I va rimtui ve," a tih chuan ka va melh ralh, ka sam hmawr chu a la kang a, a han hnim vang vang a, "Hei hi tih kir chawp em ni?" tiin min zawt a.
"Um, a kawi sa a, ka tihkir belh," ka tih chuan, "A mawi," a ti zawi leh sup a, min rawn melh laia a mitmeng chu a mawi dangdai viau bawk.
"Hetiang hian midang awm lai pawhin ti ve ṭhin tho la, nuam te pawh ka ti ve dawn asin," ka tih leh chuan, "Ka la ti dawn alawm," ti maiin min chhang a, ka ngei leh deuh thut chuan ka sam a khawih lai chu ka pawtthla hmak a, "Ka tan dawn," ka ti ta ngawt.
"A ngai lo," rang fe hian a rawn ti a, "Bul deuhin ka tan ang," ka ti leh kher.
"A sei hi a mawi alawm," tih pah chuan a rawn khawih leh a, "Samtawi i ngaina zawk," ka ti chu min ner khum nang mai.
"Eng nge, ka sawi dik lo em ni?"
"Engmah i hre lo,"
"Eng nge ka hriat loh chu?"
"I sam sei hi a mawi ka ti,"
"Hmmp.."
"Mipa tan chuan samsei hnap mai han kuah hi a nuam.." a kutin min rawn hui a, ka va thlek hnaih laichuan ka beng bulah zawite hian, "Min tizauthau tlat," a lo ti reuh a, a nem thle sawk mai.
"Min va duat bik chuang lo ve," tih paha a rawn nui chu, "I phu tawk chiah," ka lo tihsan a, ka tho chu min rawn zui rang viau bawk. Counter lam ka pan a; mahse, ka thlenphei rualin ka bulah a lo ding a, wallet ka phawrh laiin a lo pe fel der. "Hausa deuh ang hian i awm a, hnathawh pawh i nei si lo," chhuah pahin ka ti niah niah a, "Ka châwm zawh loh che i hlau elo?" tih paha min kalpel chu ka en vang vang a, engtin emaw ka awm, min châwm lam a lo ngaihtuah thleng tawh em ni ngai, kha kha eng nge awmzia?
Pawn ka va thlen rualin a banah ka va vuan sawt sawt. "Thil min leipui rawh," tiin min hnial hma chuan ka kalpui dawt dawt a, a hman aniang min hnial lo hlauh mai.
Thawmhnaw dawrah ka luhpui a, a nin ka hlauh tehlul nen a lo thlek kual ve duk duk a, hak chhin pawh ka tum lem loh laiin, 'Ha chhin rawh," a lo ti bawk a, ka ha chhin ta nual mai. "Eng nge a an?" ka tih apiang chuan frank deuh deuhin min chhang ṭhin a.
"Inhmeh lo"
"A nalh lo,"
"Pitar kawr a ang," tih angrenga min chhang ṭhin chu dawr nghaktu chuan a ngei hmel ṭhin khawp mai.
"I sawisel veka, lak tur ka hre dawn hleinem," ka tih chuan a ṭhutna aṭangin a rawn tho a, thawmhnaw khai chu a va en kual a, a rawn lakchhuah chu kawrfual a awm leh ban lace a chei a ni. Nuihza ru deuh chungin ka va ha chhin a, ka ha tawk chiah mai a, ka va chhuak chu min lo thlek uluk viau a ni.
"Khawi maw hnunglam?" a'n ti vei nghat a, ka inher hnu chuan, "I duh em?" a rawn ti leh reuh a, amah zawk chuan a duh niin ka hria.
A man chu min peksak a tum a, "A ngai lo, ka nei alawm," tiin ka ṭang ve tlat.
Dawr aṭanga kan chhuah hnu chuan jeans dawrah ka luhpui leh a, eng emaw zat chu ka ha chhin leh a, amah chu ka zawt zel bawk a, thawmhnaw nalh chu rin aiin a hre phian. A duh khirh angreng a, ka inhmeh a tih zawng erawh, "A ṭhat kha," a ti ve mai zel a, torn jeans te chu hak a phal loh ka rin laiin min hnial miah lo a, bazar pui a nuam zek.
A man pek ka phal lo chu a hrethiam lo deuh aniang, kan chhuah hnuah, "Eng atan nge min hruai, leisak i duh bawk si lo?" tiin min zawt a, "Bazar dun ka duh alawm," tia ka chhang chu mak ti hmel a pu deuh.
Dar 2 rik dawnah dawr ka thleng phei a, ani chu dawr kawta min thlah hnuah lo lut loin a inkhalh chhuak leh nghal a, ka luh hnu rei vak loah nu Ṭhatei a lo chhuk bawk. "I va rei reuh ve, eng nge i lei a?" tih pahin ka thawmhnaw lei te chu a rawn en a, dar 10 velah khan bazar tura insawiin ka chhuak tawh a, Zoherliana koh chhuah ka tum kha, "Ka la mu, min rawn kaitho rawh," a tih vangin ka va kal hmasa a, Jenusi'n a lo call hma kha chuan a khumah inkuah rialin kan mu a, kan pahnih chauha kan awmlai hi chuan inngaizawng dik tak kan ni tawhin ka hria, midang kan mamawh lo a, kan hlim dun bawk a, tuna kan buaina chu Jenusi chauh a ni tawh, a hrilh hunah chuan a fel duakin ka ring.
Eirawng bawl tura nu Ṭhatei a chhoh leh hnu chuan ka nu Nguri ka va bia a, "I dam ṭha vak lo em ni, i va lo chhuak khat ve, min lo tlawh ngai bawk si lo?" ka va ti luam a, "Dam ṭha e, tunlai chu inah ka tawm a, kar lehah ka lo tlawh ang che," a ti chauh mai a, ka ngaih thu han sawi em chu ni theiin ka hre lo.
"I cher riauin ka hria, i chaw ei te a tui maw?" ka han ti leh rih a, "Ka ṭha vek alawm, in chhung boruak hi a nuam lo deuh a, ka lo kal hunah chuan ka rawn riak nghal maithei," a la ti zui a, zan hnih bawr châm a ngaih dawn chuan chhuanlam ka mamawh si, damlo thut se han tih mai te pawh awl tak a ni.
"In chhung boruak chu engati nge?" ka tih chuan, "A hahthlak khawp mai, i nu Ṭhai te phei chu engmah kan la hrilh lo, an duh leh midangin hrilh mai rawh se ka tia, nangmah chiah ka hrilh ang che," a rawn ti hmasa te te a.
"Eng nge ni a?" ka tih leh chuan ka beisei loh lutuk thil a rawn sawi.
"Lawmsangpuia khi ka pa sâwn a lo ni reng alawm, i pi leh i pa Dinpuia chuan an lo hre daih tawh a, a mak ka ti asin aw, i pi lah chuan a hriatna a lo rei tawh mai a, i pu nen an inkhei fek fek reng a, i pa Dinpuia lah hi ro sem chungchangah a buaia, sawi pawh a sawi ho theih loh," a ti hluk hluk a, ka hamhaih chuan sawi mai tur ka hre lo, ka beisei phak bak a ni.
"Hman zanah an inhnial phah hrep a, kut inthlakte an tum uaih uaih mai, i pu lah hian a runluih deuh tlat a, ngawih tum pawhin a ngawih theih bik loh, pa hrang nih tawh nak alaiin unau dang ka han nei leh ania, Laldina te unau hian kei pawh hi min huphurh tawh maithei a ni," a ti leh duah a, a aw aṭang pawh chuan a rilru a hah hmel viau a ni.
"Lawma chuan a hre ve tawh em?" tia ka zawh chuan, "Hre daih tawh e maw le, hetia midangin kan han hriat takah chuan a ti aniang i pu hian a duhsak thar thut bawk a, tukinah pawh bike leisak a tum thu a sawi pek kha," a ti zui hlak a, "Ka lo haw zuai dawn em ni?" ka tih leh chuan, "Lo haw duh suh, nuam i ti lo ang," a ti hmiah mai a, a buaithlak angreng.
"Ka pu chuan tinge a zep reng le, zep hlen a tum nge, midang pawh chuan engtin nge an hriat theih a?" tiin ka han zawt leh hram a.
"An hriat chhuah dan ka hre bik lo, tunlai hian vawk an ti thi zeuh zeuh a, chumi chungchanga an inhnial chu maw le, i pi âng kha i puin a ngaithei lo a, Lawmsangpuia a lo chhan pek a, i pa Dinpuia thinrimin a rawn sawi chhuak hmiah hmiah mai, he pa reng reng pawh hian eng nge a hriat ni, ka pa pawh a zah duh tawh lo.." a ti leh luam a, an boruak chu a hahthlak dawn hle maiin ka hria, pa Dinpuia'n Lawma a lo ngaithei lo viau pawh kha hetiang a lo hriat vang anih ngei dawn hi.
"Mina, i pa pawh khan a lo hre ve tawh a ni maithei.." a rawn tih chuan ka hrethiam zan lo. "Ka pa'n a hria maw, a va mak awm ve?" ka lo ti let hu a.
"A hre tlatin ka hria, 'Lawma hi midang angin ngai thei lo ve suh,' min ti ṭhin alawm, amah khan a ngainaa, in inkawp thu a hriat pawh khan, 'Inkawp chi an ni lo ang, nakinah a buaithlak dawnin ka hria' a ti a, chuvang ania a duhpui loh che, kan hnathawk anih vangah ka lo ngai a, ka pa sâwn a ni tih a lo hre reng tawh anih ka ring," a ti leh luam a, ngaihdan ka nei thiam lo, rilru a buai map a, engtin nge an tih zui dawn pawh hriatthiam a har a, an la buai zui dawn hlein ka hria.
"Ka pa chuan hria se hrilh ve awm tak che ania,"
"Ani te chuan engmah a sawi duh nang, hetiang hian kan buai dawn tih a hrethiam vek ang chu. Ka pa hian a hrilh anih te ka ring deuh a, aizawla in hmun a leitir te kha Lawma tana a lei anih ka ring ta tlat.." a tih chuan ka han zawhfiah leh zat a.
"Hman deuh khan i pu nen hian eng emaw buaipui an nei a, ka ringhlel khan i pa thil ka check kual a, chu mi ṭum chuan ram leina lehkha ka hmu alawm, ka pa hminga awm chu ania; mahse, mi dangin an hre ve lem si lo a, Lawmsanga pek a tum anih ka ring ta riau, a fapa anih chuan a ruka eng emaw tak a tihsak chu ka ring, a thlahthlam dawn lo nasa mai si a, ka nu laka a zep erawh a tifuh lo khawp mai, a hrilh hmain a lo hre lehnghal a, kan heti pawh hi ka pa thiam loh vek a ni," a ti leh dap dap a.
"Lawma chuan i bulah sawi te a nei ve em?" ka tih chuan, "Kan la inbe lo, biak pawh ka chak rih lo, sawi tur pawh ka hre teuh nang, ka nau a lo ni ang tih kha hre hek lo, mi pawh a ngaina bik chiam loin ka hria," a ti leh halh a, an inkar hre ve tu ka ni bawk a, inngainat thut chu a har khawp ang le.
"Mahse, i thisen zawm dik tak a ni sia, intibuai deuh ta sela engtin nge ni ang?" Chu thu ka zawh lai chuan ka tim ru viau mai. Ani lah chuan, "Chutak chu alawm, ka dinhmun an ti laklawh lutuk, Laldinpuia lahin i pu lakah sual a chhuah ngar ngar a, ka lo chhan ve a ngai ṭhin bawk si, i pi lahin i pu lamṭangah mi a ngai a, ka kham tak tak a ni, thisen angzawnga inthliar an duh nge mawni, ṭul lo lutuk," a ti zui bawrh bawrh a, haw chu a chakawm loh duh ngang mai; mahse, ka haw tho chu a ngaih hmel a, dawr kalsana va cham rih tur chuan chhuan lam ṭha tawk tak ka mamawh dawn a ni.
"I rilru tihah lo la, lo inenkawl ṭha rawh aw," tiin kan inbiakna chu ka titawp a, phone ka dah hnu chuan ka inngaihtuah neuh neuh. Lawma'n a hria anih chuan Jenusi chuan a hre dawn chiang sa a, engati nge vawiin khan engmah a sawi loh le, Zoherliana takngial pawh hrilh a tum lo anih hmel. He nu hi thawkho vek kan ni chungin zep a nei ṭun reng a, Zoherliana nen hian tirh kual atan chauh min ti ni maiin ka hria, a ṭhianpain a han rin tehlul nen, engkim takmeuh a hnenah a thlen ṭhin anih laiin....
Zoherliana ka va call nghal a, a lo chhan rual rual chuan, "Jenusi'n a lo bia che em?" ka va ti thawr a, "Be nang, engati nge?" ngaihṭhat loh hmel deuh hian a rawn ti a, an inhrilh daih tawh anga, keimah chauh min hrilh lo anih te ka ring leh deuh.
"Tunlai hian farm lam chhungkua te an buai tih i hria em, engmah a rawn sawi lo em ni?"
"Vawk thi kha maw, rawn sawi nial nual tawh e, an buai nana ti alawm a nih,"
"Jenusi tih vek maw ni a?"
"Ni deuh ber e, an inhauh phah chuan a ṭha mai alawm, ṭang rual ṭhap ṭhap lo se kan duh bawk si a, tinge vawk chu i lo ui deuh em ni?" a tih chuan thawk ka la vang vang.
"An buai chuan a ṭha in ti ringawt a, in mak e, Lawma pawh chuan a lo remti ve mai em ni?" ka tih chuan, "Kan lam a ṭang tihna a ni mai alawm," a tisam leh et a, ka hrethiam hlawm lo, Jenusi thil tih apiang lo thlawp hi kan tihtur em mawni, thil ṭha a ti em pawh kan chiang si lo, hlawkna a awm lo anih phei chuan a ho duh khawp ang le.
"Anih, Lawma hi pu Muana sawn a ni tih i hria em?"
"Hria e," Mai mai chuan aw....
"Engtin, engtikah nge i hriat, engtin tih kha chu sawi a ngai lo, engtikah nge a hrilh che?" pawr fea ka tih chuan, "Hmanni deuh khan," a lo ti sam then a, nimin mai pawh ni loin hmanniah maw ni a...!
"Anih tak chu, min hrilh ve ṭulin in hre lo tihna a ni maw?"
"Chutiang zawngin ka lo ngaihtuah lo reng reng, a ṭul chin chu ka hrilh zel che alawm," a ti leh tlawng a, ka lawm hauh lo.
"Min hrilh lo turin a ti leh pek che em ni?"
"Ti hran nang,"
"E..min hrilh lo tura tih che a ngah lutuka, a tur ve rengah i ngai tawh anih dawn chu,"
"I va ho e aw.." a nui aw lek lek a, thil ho mai mai pawh ka sawi loh nen, ka thinrim chuan phone chu ka dah hmak a, ka insenruh ṭun mai. Hetiang zawnga min ti dawn anih chuan keimahin ka ti ve tawh ang, ṭan rualpui ka nei tak tak lo, ka pa chungchang a ni bawk a, mahnia ka zawn chhuah a ngai tihna a ni mai, an duh leh an ṭhiannu buaina chu ngaihven sela, keiin ka pa ka ngaihven thung ang, kan ṭan ho theih miau loh chuan chu chu tihdan ṭha ber a ni.
Ruah a tlak sek avangin kan inkhar hmaa, in chunga ka han chhoh chuan nu Ṭhatei leh pi Zaii'n tv an lo en a, naupang erawh pa Makima mutna lamah an nui ri hak hak a, sana chuan dar 9 a kawk va tawh. "Bai kha a tui em?" nu Ṭhatei'n a tih chuan, "Tui e, i rawt siam kha tui kan ti lutuk," ti pahin tiffin ka va sil rawk rawk a, "I inbualna tur tui ka lum tawh kha aw," a rawn tih chuan ka chhang lem lo. Thil dang ti khawtlai loin ka va inbuala, nu Ṭhatei chu biak ka duh vangin ka hmanhmawh viau bawk.
Ka inpeihfel hnuah sitting room-ah chuan ka va ṭhu ve a, nu Ṭhatei chuan bungraw lak ngai min lo zawt zung zung. Kan titi kar lakah chuan, "Wine kan zuar tawh dawn lo em ni, lo zawng an awm ṭhin a?" tiin ka zawt a, lu thin nar nar pah hian, "I pa Makima'n zawrh a hreh tlat alawm maw le, kan hralh chak tehlul nen, mi dang pawhin a zuar tho si a, a ho tak tak a ni," a ti nui nui a.
Naupang mut a hun tawh bawk nen pehhel thui duh loin, "Dawr i siam dawn hian i nuten an pui che em?" tiin ka zawt phawng.
Ani chuan, "Pui ve e, pawisa min puk tir a, thla tin tlem tlemin ka rul a, ka rul zo diam tawh, i pi lah chuan mi han ngaihdam ṭhen pawh a nei lo, cheng khat mah bang awm loin ka rul alawm," a ti a. "I pa tak kha a hausa ve tho em?" ka tih leh chuan a ner deuh lek lek.
"Ka hre lo reng reng, lehkha min thawn hnu khan a chin kan hre zui tawh lo, a hmel pawh ka chiang tawh lo, a thlalak ka hmuh lohna pawh a rei tawh a, ani pawn mi a theihnghilh zo tawh aniang," a ti a, thinrim hmel phei chu a pu lem lo.
"Engtikah nge lehkha chu a lo thawn che a?"
"A rei tawh, pasal ka neih hma daih tawh khan.."
"Eng nge a rawn sawi a?"
"A dam ṭhat thu leh a ngaihtuahawm loh thu te a rawn sawi a, ngaihdam te min rawn dil bawk a, a hnuhnung berah kha chuan kan unaua min ngaihzia thute, farm a chhuahsan a inchhir thute a tel a, a lehkhathawn ho kha u Makimi'n a dah ṭha reng a, a tibo fai vek alawm, thil fun nan a hmang nge mawni, a tihbo dan pawh a hre lo, han kawl reng pawh ka duh nen, ka ui tak tak a ni," a ti leh dap dap a.
"I ngai ve ṭhin em?" ka tih chuan a nui ringawt.
"I haw tawh loin ka hria?" ka tih chuan, "A tir chuan ka haw ṭhin a; mahse, lehkha te min lo thawn hnu kha chuan ka haw tawh lem lo, a nupui fanaute kiangah a hlim lo anih ka ring a, ka khawngaih ve deuh alawm maw le, nun nuam takin a nung zui lo aniang..." a'n han ti vang vang a, a awki aṭang pawh chuan dawt a sawi loin ka hria.
"Lo rethei viau ta se i pui duh angem?"
"Ka hre lo le, a retheih chu ka ring hran lo, ka pu pawisa tam deuh a tlanbo pui an tia, ka pu khan a damloh phah hrep lehnghal a, a tam viau anih ka ring. Mahse, puih ngai khawpa a awm anih chuan pa te na na na chu ngaihthah a har ve ang," awki dam diai hian a ti a.
"Midangin engtin nge an ngaih ve hlawm?" ka tih chuan, "Makimi chuan a zawng chiam tawh; mahse, ka nuin a hau a, lo haw leh duh pawh nise pa dang kan nei tawh a, ani lahin min hmangaih em em a, min enkawl seiliantu te a ni bawk nen ka pa chungchang ngaihven vak pawh a dik tawh bik lo. Laldina leh Tluanga hi chuan a la dam em tih tal hriat an duh a, ka nu hi an la zawt ṭhinin ka hria," a ti leh charh charh a.
"Anni pawn an ngaidam ve tawh aniang a?" ka ti leh chu dilchhut min ti deuh nge ni min rawn thlek vut mai.
"A...a inchhir thute kan han hriat hnu kha chuan a dan chu a dang ve deuh tawh alawm," a ti a, a sawi zawm leh hmain naupang an rawn chhuak a, an mut a chhuak tawh anih hmel e. Nu Ṭhatei chuan an ha te a va nawh tir hnuah an pindan lamah a hruai a, an rawn chhuak tawh mai lo. Keipawh chuan ka pindan lam ka pan ve nghal a, khumah ka mu deuh chiah tihah message ka dawng a; mahse, ka beisei loh zawk hnen aṭangin a ni.
Ka thil tih a lo hria emaw tih mai tur hian, "Lehkhathawn chungchang chu engtin nge?" a rawn ti leh hmanhmawh tawh.
"A kawl lo," tih zawngin ka chhang a, message dang a rawn thawn leh zat.
"Engtik a mi nge tih leh, englam hawi nge inziak tih chiah ka hre duh," tih hi a rawn thawn a, engvanga hre duh nge anih lam chu rawn sawi a tum lo.
"Ka hriat hunah ka hrilh ang che," tiin ka chhang ve leh hram a, "Hmanhmawhin aw," a ti leh erawh ka chhang tawh lo chiang hle. 'Min hrilh chuan ka hrilh let ang che, i zep chuan keipawn ka zep ve ang, i tih ang apiangin i dawng let ang, kan inrul a ni mai,' ka ti ru neuh neuh a, tunge hmasawnna nei chak zawk kan en aniang chu. Game master a intih chuan kei chu player luhlul tak ka ni ang, master pawhin thunun theih loh player chu an nei châwk alawm maw le.
Muthilh ka tum ngiala, ka muhil thei hlek lo. Lehkhathawn chungchang chu ka ngaihtuah leh ṭhin a, engvanga Jenusi khan hre chak em em nge maw a nih le? Nu Ṭhatei te pa hian pawimawhna a nei chu a ni phawt anga, eng nge a pawimawhna ni ang aw...? Zoherliana'n a hriat ka ring tlat...
Ka call nghal a, a la chhang thei lo zui a, phone ka dah tau kha engahmah a ngai lo em mawni, a bialnuin thinrimin phone a dah tau a, a han reh zui vang vang mai chu ania, he pa rilru hneh tur hian tuna ka awmdan hi a tawk dawn lo a ang khawp mai, tihdan dang ka ngaihtuah a ngai a ni...
Lawm lo fea phone ka dah chu ka dah fel rualin a rawn ri leh lawi a, rang fein ka chhang bawk. "I va meng rei ve?" a rawn ti thum dut a, ka lo ner nang.
"Tinge i ngawih reng a?" a tih chuan, "Tinge min biak loh, biak hmasak ngaia awm kha nuam i tia mi?" tiin ka chhang pawr khawp a, a rawn nuiin ka hria.
"Zoher..."
"Jemina.."
"ZOHERLIAN.."
"Jemina...."
"Ka hmingpum pawh i hre ve lo,"
"Min hrilh a hun tawh khawp mai, ka hrilhna che a rei tawh," zawi leh fiah angreng zet hian a ti a, thawk ka la ham ham..
"I hre duh tak tak em?"
"Duh..."
"Jemina Lalnunfeli, a mawi em?" a nui leh pek a, "Sawi tawp suh," ka tih rual deuh thaw chuan, "I mawi vel vek," a lo ti zawi sup a, ka thinrimna chu hrui ang nita se a laia pawh chah hmawk ang vel a ni, ka dam huai thei nia!
"Anih, min ngai em?" lawm awka ka la tilang duh lo, thlem ka phut ve tlat.
"Ngai mek..." a tih chuan ka nui sak a, ka insum leh vat thung.
"Ka awih lo e a.."
"I awih a ngai, inti hreawm duh suh," zangkhai zet hian a rawn ti a, han chhân mai dan tur ka hre lo.
Ka inngaihtuah rauh rauh laichuan, "Sawi duh i la nei em, ka haw dawn chiah a?" a rawn ti leh a, ka sawi tur hre lo chuan, "Ka ril a ṭam," ka'n ti ngawt pek a.
"Tho la, chokaah eitur va zawng ta che,"
"Eitur tui pawh a awm lo,"
"In dawrah a tam kha....."
"Ka chhuk peih hleinem," ka pangchang aw vang chu nge ni a nui hawk a, "Eng nge i duh, ka rawn leisak dawn che nia," a ti chu ka beisei lo hle a ni! Ka tho vut a, "Tunah maw, a tlai tawh sia.." ka'n ti ṭha leh rih a, a nawm zia chu aw...
"Street food zuar an la awm ka ring, eng nge i duh ang?" Ka hmel a rawn hmu thei lo chu lawmawm tak a ni, keipawh chu ka inngei zawk...
"Ka hre lo, i duh duh a ni mai.." ka aw te chu titau aw nen chuan inhlat tawh tak a ni.
"Aw le, ka rawn thleng har lo ang," a tih hnuah phon a dah a, ka tukverh parda chu ka keu sawk sawk a, ka'n nghak ṭan nghal ringawt bawk a, mahnia nuih vur vur a awl, thlahrang pawhin min hmu sela min nuihpui duh hialin ka ring a ni...
Minute 15 vel chauh ka nghak a, ka chhoh a ngai angem aw ka tih laiin a rawn chhuk a, tukverh bul a lo thleng chu ka lo nuih deuh var var. "Ar thla leh sausage ania, a bawp an lo nei tawh lo," tih pahin a thil rawn lei chu min pe a, han hawn nghal tuma ka kun chu ka chal a rawn fawp zauh.
Ka hawi chho chu tawite hian min lo nuih a, "Lawmthu sawi pawh i tum nange?" a ti bul nghat a, a tûm hmelṭha nek. Chhang buai lo chuan mit chhingin hmui ka'n ti pawrh zui a; mahse, min rawn fawp mai lo. Ngaihṭha lo deuh a ka men leh laichuan hnai set sawtah hian min lo en a, a nui mawi hle bawk.
"Ka lawm e aw.."
"Keipawh le,"
"Nang aia nasain ka lawm e aw.."
"Aw le.." a sawi zawh rualin a hmuiah ka va chuk zeuh a, a lungawi ve khawpin ka hria.
"Muttui le," tia kal mai a tum chu a banah ka lo man chawt a, "Lawk," tim ru fein ka ti zui a, zawhna nei hmel a pu nain a rawn inher ṭha ve leh mai bawk a, min en chik viau thung.
"Lehkhathawn chungchang kha hriat i nei em, nichin deuh tawh khan Jenusi nen kan inbia a, a rawn hmanhmawh hmel sia, a pawimawh viau em ni?" ban deuh tak hian ka ti a, inngaihtuah buai deuh hmel a puin ka hria.
"Pitar pasal kha a ngaihven khawp mai, a ringhlel anih ka ring.."
"Engti zawngin maw?"
"Lehkhathawn kha pitar ziah chawp anih thu chu min hrilh a,"
"Maw, a fate lehkhathawn dawn kha pi Lalpuii ziah chawp vek maw?" miss Mathani thilsawi kha ka ngaihtuah chhuak zui a, dawt min hrilh lo tih ka chiang ta chiah, chuti anih chuan pu Muana leh ka pa khan an hre ve tawh maithei a ni.
"Pitar ziah chawp anih chuan a pasal kha a thi tawh anih ka ring, Jenusi hian a ringhlel sual ngai meuh lo, eng emaw tak chu a awm ang?"
"Ngawi teh, pi Lalpuii hian eng emaw thup a nei tihna em ni ang?"
"Kan rindan chu ania, a pasal tlanbo kha a that lo ang tih pawh a sawi theih loh," tiin dar a kán ak a, eng ngaihdan nge maw ni ngai le, min ti ṭim sung sung thei!
"I hriat belh theih chuan Jenusi i hrilh vat dawn nia, thil hote pawh hi a ṭangkai ṭhin ania," tih pahin ka lu a rawn chul a, "Muttui," a tih leh chuan ka bu ringawt. Kawng lampana a kal chu ka en zui vawng vawng a, ka thil hriat chu rin a har ka ti; mahse, rin loh ngawt chi pawh a ni chuang lo, tumah saw rin ngam an ni lo miau a, ka tihtur ka ngaihtuahin ka thauah min man deuh tlat lehnghal..!
Pi Lalpuii ziah chawp tih a hriat tawh chuan eng nge maw hriat belh a la duh cheu le? Lehkhathawna thil inziak lah a fate a ngaihthu leh a inchhir thu vel anih hmel a, a ziaktu pi Lalpuii a nih daih si chuan a ṭangkaina tur pawh ka hre tehchiam lo, a inziak aimah chuan a ziaktu zawk chu a pawimawh zawk daih ang chu.
Pi Lalpuii ziah anih chuan a pasal chu a la dam tiin a sawi theih loh a, Zoherliana sawi kha a rinawm ta riau a ni. A pasal chu thatin khawiah emaw a ruang a dah bo anga, a tlanbo angin a sawite pawh a ni thei a, pu Muana nena an tih dun pawh a ni thei, an inngaihzawn vangin an that te lo nita se...aaa..ka hrethiam teh nuai lo e..
Mahse, pi Lalpuii pasal thih dan hi eng vanga chhui nge kan nih le? Ka pate thihna nen inzawmna a nei em mawni? Jenusi hian thil hi a chhui kual vak vak a, thil ṭul lo lo chhui hian kan lo buai vak ang tih pawh a hlauhawm, tunah pawh lehkhathawnah eng nge inziak tihte ania a buaipui ni, hetiang chuan a rei mai mai dawnin ka hria.
Zirtawpniah ka nu Nguri'n a lo kal tur thu a rawn sawi a, "Chhunah ka lo kal a, ka riah theih pawh ka ring lo, i puin thil min chah a, ka let leh nghal a ngai ang," a rawn tih chuan zui haw a rem dawn khawpin ka hria. Kan inbiak zawh hnuah in chungah ka chho a, nu Ṭhatei bulah, "Vawiinah ka nu a rawn kal dawn a, ka zui haw ve mai dawn asin, sunday ka cham anga, nikhat chiah ka chawl ang," tiin ka han dil a, "A pawi hran lo a; mahse, inrinni ber kher chu a va fuh lo ve maw le," a tih chuan ka inthlahrung ve reng mai.
Mahse, pa Makima'n "Naupang chu ka awmpui thei alawm, a haw khat si a a lungte pawh a leng ve tawh ang, farm-ah nghaktu a nei an ti tlatin ka hria," uang fe hian a rawn ti a, Lawma nena kan inkar kha an lo hre ve ni ngei tur a ni.
"Anih chuan va haw mai rawh, inrinni chu ka lo zuk ṭhutpui ange, i nu chu a rawn leng hman dawn em?" nu Ṭhatei chuan a ti ve leh a, "Ka hre bik lo, ka rei hman lo a tia, a rawn leng kher ange maw," ka ti a, ka pindan lam pan ka tum chu, "Farm ami kha chu a hmelṭha nain a neih tlak ka va ring lo e, i nu pawh khan a tuipui lo chein ka hria," a rawn ti zui a, "An ti mai mai anih kha, chutiang engmah a awm lo," tih pah chuan pindan lam ka pan a, ka va insiam sawk sawk.
Ka bag nen dawrah ka zuk inchhawp thla a, ka nu Nguri chu ka call nghal bawk a; mahse, phone a chhang thei lo. Min lo call ve leh mai ringin ka call nawn duh ta lo a, naktuk lama an buai lutuk loh nan tih tur ṭul ka ti zung zing bawk. Phone ka va en leh chuan Jenusi message a lo awm a, "I nu a rawn kal," tih zawng a ni.
"Ka hria alawm," tia ka chhang chu, "Varak lem awmna wine kha a la chhuak thei a, a tihdan i hriat a ngai," tiin a rawn chhang let a, chutia ani'n a la chhuak thei anih chuan a harsat dawn loh tawp chu ka ti rilru a, ka kal hmaa Zoherliana hmuh ka rilruk bawk, engmah sawi loa kalsan chu a fuh loin ka hriaa, Jenusi erawh ka hrilh duh lem lo thung.
Muantei bulah ka chhuah lawk tur thu hrilhin Zoherliana te veng lam ka pan a, ka va thlen chuan kawngka a lo inkalh ṭhiap a, ka kik fe hnuah pawh a thawm engmah ka hre lo. Ka call a, a chhang thei hlek lo mai a, call nawn leh ka tum laiin in chhung lamah chuan thawm ka hre thut, pindan kawngkhar inhawng thawm a ni.
Rang deuhin kawngkhar chu ka kik leh a, "Ka lo kal," rawn ti tu chu Zoherliana aw a ang lo. Rei loah a rawn hawng a, min hmu chu kei aimahin a phawk zawk!
"Tu nge i nih?" ka tih laiin, "Nang zawk?" a ti let haw a, "Jda a awm em?" ka tih chuan hre chhuak thut niawm tak hian min en a, "Nangmah hi em ni?" a ti leh he haw mai.
"A awm lo em ni?" ka tih chuan a lo nui khi sung....
"A bialnu thar kha i ni ti raw...ka ṭhiana chu leh.."" Chhan dan pawh ka hre lo, ani lah chuan min han en chik khawp a, a mawl ka ti angreng.
"Phone a chhang thei lo a.." ka tih chuan, "Aw, nichin deuh khan hotel-ah a phei a, va um zui rawh, nu pakhat lerh deuhin a beisei ania," a ti chu hrethiam lo fein ka melh.
"Amah i zawt dawn nia, i bialpa hi i ven ṭhat viau a ngai, anih loh chuan nuthlawi hausa deuh lakah a inveng zo lo mai ang,"
"Nuthlawi hausa a?"
"Kan thawhna hotel neitunu ṭhian a nia, i bialpa hi thilpek atan an inpe ṭep tawh.."
"Tunge chu nu chu..?"
"Hausa deuh mai maw le, sailo farm an tih hi i hre ngai em?" a tih chuan ka hamhaih ngang mai. "Hria e," phawk fea melh chungin ka ti a, ani lah chuan, "Chuta mi chu a nia, nichin deuh khan a rawn call a, a kal chhuak deuh chiah anih kha, in rawn inpel maithei," a ti lehta zel a, sailo farm-a nuthlawi hausa chu ka nu Nguri chiah a ni, chu chu ka chiang hle a; mahse, hriatthiam loh ka ngah hle thung.
"Chu nu chuan Jda a ngaizawng a maw, i bialnu angin a sawi sia?"
"Ka bialnu hlui alawm, kan inṭhen tawh, tunah i bialpa a chhai mek," awlsam zetin a ti leh a, kei chu ka bing mup mai, ka hamhaih a, ka thinrim deuh tein ka hria.
"Biak ka'n tum leh phawt ange.." tiin ka kalsan a, auto chan pahin Zoherliana chu ka call tluk tluk a, a chhang thei si lo. Chutih laichuan auto pakhat hi ka hmaah a rawn ding a, ṭhut luh pahin ka nu Nguri zawk chu ka call a, "I lo thleng tawh em?" ka tih laia ka aw chu a vin lek lek.
"Thleng tawh e, ka ṭhiannu ka tlawh lawk," a rawn tih chuan, "Ka nghak reng tawh che, i rualin ka lo haw ve dawn, min lo hruai dawn nge ka lo pan dawn che," ka ti sawk sawk a, "A la hma alawm," a rawn tih rual deuh thaw chuan, "Ka lo pan mai ang che, khawiah nge i awm?" ka tih zawm leh zat a, ṭawng nawk nawk thawm ka hria.
"I nu Mangaihi dawrah lo awm rawh, ka rawn phei har lo ang," a ti ve ta hram a, "Rei suh aw, ka pum a nuam lo ania," tiin ka'n chah zui hram. Dawr ka thlen chuan ṭhut pawh ka ṭhu tawh lo, ka bag ka va la sawk sawk a, Muantei chu ka kal tawh thu lo sawi mai turin ka chah a, nu Mangaihi dawr lam ka pan nal nal bawk.
Nu Mangaihi dawr ka thlen hnuah ka call leh nghal a, "Ka awm tawh," ka va ti thawr. "I hmanhmawh sek sek e," a ti naa, "Ka pum a na alawm," ka ti ve tlat a, "Ka lo phei dawn," tiin phone a dah hmak. Nu Mangaihi lah chuan zawhna min lo zawt sek a, "Kartawp ka rawn hmang lawk dawn," ti maiin ka chhang a, ka pum a na ka ti kha a hriat vangin nimbu tuite min lo thlitsak a, min be seuh seuh reng.
Kan titi laichuan Zoherliana'n min lo call a, "Phone ka lo en lo a, eng nge ni ta?" zangkhai deuha a tih laiin, "Message lo en rawh," tih leh phone dah ka rual a, "Ka nuin a ngaizawng che em ni?" tiin ka va zawt khawl.
A rawn chhang let nghal a, "Tu nge hrilh che?" tih a ni.
"Anthonya'n, thu dik a ni em?"
"Min zawh chin chu dik e,"
"Ka zawh loh chin che a la awm em ni?"
"Awm lo, keichuan a fanu ka ngaizawng,"
"Engmah in inkarah a awm lo chiah maw?"
"Awm lo e," tih a rawn thawn ka chhiar chu ka thaw huai mai, ka nu Nguri lakah erawh ka lawm lo takzet.
"Ka ring ang che," tiin Zoherliana chu ka chhang let a, "Zawhna dang i la nei em?" a rawn tih chuan, "Nei lo," tih chauh chu ka thawn a, engmah a rawn sawi zui ta lo. Minute 20 vel a liam leh hnua ka nu Nguri lo thleng chu biak pawh ka be ṭha peih meuh lo a ni. Damdawi ka ei em tihte min zawt a, bul deuh deuhin ka chhang a, haw ka tum chhan pawh, "Ka chawl chak a," ti ngatin ka chhang a, a duh aiin ka haw hma pui aniang chu haw kawngah pawh kan inbe meuh lo.
Farm kan va thlen chuan a lo reh ruih mai. Biaki leh Remi hmel ka hmu lo a, pi Lalpuii chiahin in a lo nghak a, pu Muana chu Azoi pa nen an kal chhuak a ni awm e. Thingpuite ka inzawh hnuah ka pindan lam ka pan a, ka kalsan ngai ngaiin a lo la awm a, chhuat berh deuh erawh a mak ka ti viau, mi lut an awm anih ka'n ring ringawt a, tukverh lam ka va en chuan a lo inkalh thlap lawi a, ka hrethiam chiah lo. Ka chhoh leh hma chuan wine dahna nia ka rin pindan kha ka va endik leh te te a, a kalhna tala a len viau laiin a chahbi rawlh luhna erawh a te viau lawi a, chahbi phek ni loin a mum chi a hmang anih hmel.
In chunga ka han chho chu Jenusi lo lut tur nen kan intawk hlawl mai. A mitmeng a buai nak a, zawhna min zawt hmel a pu bawk. Be lem lo chuan pawn lam ka pan a, rei vak loah bucket khai chungin a lo chhuak a, "Sangha in man elo?" tia ka zawh laiin, "Eng nge i lo tih?" bul fahran hian a ti a, ka nuih ringawt.
"Engmah i rawn sawi bawk si lo," a tih leh chuan, "I hmanhmawh a ni lawm ni, ka rawn haw thei hi i lawm viau ka ring zawk ania," ka ti sam et a, a hmelah chuan lawm hmel ka hmu lo.
"Rawn sawi lawk turin ka tih che kha," huhh...min hau ringawt nia...
"Kartawpah ka tih kha i hre lo em ni?"
"I ṭhulh fo vangin alawm rawn sawi lawk tura ka tih che,"
"Hun remchang ka hmuh hmasak berah ka rawn kal anih hi, i duh dan tea min awmtir kha tum suh, i kid kan ni lo,"
"Sawi lawk la chuan kan lo inbuatsaih tur ania," zawi sep sawp hian a ti a, min melh rum titih a, a mitmeng chuan min hau a ni ber..
"Tikhan inbuatsaih nghal mai ta che.." ka ti ve nghat a, ka melh no tehchiam bik lo.
"I ti buaithlak ṭhin hle mai, i cham a ngai ang," Chhan leh ka tum laitakin pi Lalpuii a lo chhuak a, chu veleh Jenusi chu a kalsawn nghal a, an in lam pan pah chuan phone-in tu emaw a bia a, Zoherliana a va hrilh dawn nge mawni?
Ka phone ngaichangin veranda-ah chuan ka ṭhu a. Mahse, rei deuh ka ṭhut hnuah pawh eng message leh call mah ka dawng lo. Remite ṭhiandun lo haw lah chuan min rawn be hlut, an thei hawnte chu thlangraah an bun a, theipui ang deuh sen tek mai hi a ni a, theipui chu a ni chiah loin ka hria, a thlum reuh khawp mai.
In chhunga ka luh leh hnu lawka pu Muana hnathawk pawh a rawn haw a, pi Lalpuii chuan a be miah lo mai a, amah pu Muana pawh chuan mak tihna a nei lem lo aniang a inbualna turte a inlum chawp a, Biaki chu a hnathawh kawr su turin a tir bawk. "Sangha i ei chak em?" tia min rawn zawh chuan, "A chhumin ka ei chak," ka ti ve mai a, chutih laichuan pi Lalpuii chu a la ngawi reng. Pu Muana chuan a va thlek vang vang a, sangha chhum tur chuan a ti ngam lo nge ni amah bawk chuan a va buaipui a, Remi'n a lo pui ve naa an awmdanah chuan venthawn nei hi an ang a, an ṭawng tlem dun viau bawk.
Chahbi khan ka rilru a luah deuh bawk nen an chahbi tarna bang lam chu ka hawi leh ṭhin. Chahbi mum chu lianpui pakhat a awm a, a lian mah mah deuhin ka hria a, pawn chhuah paha ka va thlek pawh chuan in hnuai room chahbi chu ni theiin ka hre lo. A bak chahbi mum chi ka hmu si lo a, rilru a buai map mai.
Khawiah nge an dah ang aw? Jenusi khan ka nu Nguri'n a lakchhuah theih thu kha a sawi a, ani hian a lo kawl reng em mawni dawn le?
Rang deuhin nu Nguri pindan lam ka pan a, ka va luh chuan khumah a lo mu hlun a, a muhil niin ka hria. Thawm dim fe chuan a side table leh pawhdawh te chu ka va en kual a, damdawi mum tereuh te te hi a lo kawl nual. Ka thil hmuh pakhat phei chu container bawm tereuhte a ni a, a chhungah chuan thil phut eng lam deuh hi a awm a, tam tham a ni lem lo, a bawmah chuan engmah inziak a awm lo a, ruih chi tho anih hmel e.
Chahbi zawnga ka hai mawlh mawlh laichuan a rawn rum leh hak ṭhin a, na a nei nge a ṭawngvai zawk hi, a riat niah niah reng bawk. Dim tein a pang chu ka va khawih a, a lum deuh vet vet naa ka hrethiam zan lo thung. Mahse, a hmai zartu sam ka han hui kiang chiah chu ka tum loh deuh ka hmu. A nghawnga a thil awrh chu chahbi a niin ka hria! Ka han bih nghal vut a, gold rawng kross lem niawm tak hi a ni a, a hmawrah chuan zia eng emaw a awm a, chu chuan chahbi hmawr a ang viau a ni. Ṭhi locket atan chuan a lian lam mah a; mahse, a pianhmang leh a len zawng chu ka thil zawn nen a inmil hlein ka hria.
Han pawtthlak ngawt chu thil tih chi niin ka hre lo, a rawn harh huna a hmuh loh chuan a zawng ngei anga, in hnuai chahbi a lo nih ngat phei chuan ka ti ralkhel dawn lutuk tlat. Dim fahran chuan ka zuk la kang a, ka phone camera chuan a thla ka la a, puante ka sin ṭhattir leh hnuah ka chhuahsan leh ta thuai a. Jenusi ka hrilh angem tiin ka han inngaihtuah buai leh zet, eng kawngzawng pawhin khu pindan chu kan hawn a ngai tih chu ka hre ve a, chumi hma chuan a tih zui dan tur hriat ve phawt ka duh a ni.
"Puih in ngai em?" chokaa ka va lutin ka tih chuan, "Ngai lo e, ka bawl zo ṭep," tiin pi Lalpuiin min lo chhang a, pu Muana erawh a inbual mek thung. Remi salad siam chu ka va ṭhutchilh a, "Khuaah in va rawn kal ngai lo ve a," ka tih chuan, "Kan buai thei lutuka, hlawh kan lak huna lo kal chu kan tum a, thla tawpah emaw thla thar veleh kan lo kal dawn," a ti ve siam siam a, "Lo sawi ula, kan bazar ho dawn nia," ka ti chu a phur ve khawp mai.
Pa Dinpuia lo hawin min rawn hmuh chuan, "Engati teh thut nge, nangmahin em ni i lo haw?" tiin min zawt a, "Ka nu lo kal ka rawn zui haw a, chawlhni ka rawn cham ang," ka ti ṭha ve mai a, "I pa Makima chu a ṭha zel maw, hna kan ṭul deuha kan rawn tlawh leh hman mai si lo a," tih pahin ka bulah chuan a rawn ṭhu a, a pheikhawk a phelh zui mawlh mawlh.
"A zia zel, ka nu hi ka ngaihtuah deuh a, tunlai chu a nuamsam vak loin ka hria," ka tih chuan, "I nu hi a pangngai lo telh telh mai, chhuak harh tura tih chi a ni mang si lo, inah lah a heti reng mai a," a tih laia a awki ah chuan lawm lo awka a lang a, "Inentir chi nge mawni?" ka ti chu a ngaih hoh hmel viau bawk. "A thil tih ṭhin hi sim sela a ṭha mai ang," tih pahin a tho zui a, bathroom va hawn a tum chu a lo inkalh vangin a phun zui hluk a, an pindan lam a pan nal nal mai.
Rei vak loah a lo chhuak leh a, a thawmhnaw leh towel te kengin pawn lamah a chhuak a, ka va thlek zui laichuan tuikhur lam a pan a, tuikhur kawng aṭanga Lawma lo chho pawh chu ka va hmu. Lawma chuan a kalpel mai a; mahse, pa Dinpuia a ko nge mawni ding meuhin a lehhawi a, eng emaw an sawi dun a, Lawma a kalsawn hnuah pawh pa Dinpuia chuan a en zui vung vung a, ral aṭang pawhin an inkar chu a rin thiam theih ruak a ni.
Naupang an lo haw pawh chuan ṭum dang an ang lo, puitling boruak an hrethiam aniang an ngawichawi hlawm khawp a, Duhsaka phei chu an pindan lamah a tawm chawt a, a naute pawh tv hmaah an ṭhu ngawi reng. Nu Mangaihi chuan chaw a eihma tir a, hmeichhe ho chu pangngai taka kan inbiak laiin pu Muana leh pa Dinpuia erawh an ṭawng ve meuh lo thung. Chaw pawh an eikham thuai hlawm a, nu Nguri chaw eikham lah chu a pindanah ngawt a tap a, ka va lut chu a dawhkan hnawk thian turin min lo tir a, ka then zawh hnuah pawh ka la awm reng.
Ka pa bungrua te ka hai a, a lo remfel ang reng khawp mai. "Lo la ti ral suh aw, a hnawk i tih chuan ka pindanah i dahthla mai dawn nia," ka han ti chu, "Hnawk loa kha a ngai ngaiin ka la dah hlawm kha, suk pawh ka la su phal hlawm hleinem, ka ngaih changin a la chhuak ziah alawm," tiin min chhang a, mipa dang kianga a khawsak dan ka hre tawh bawk nen ka awih lem lo.
Tui bottle ka va laksak leh hnuah veranda lam ka pan a, ka ṭhu fel chiah tiha ka phone rawn ri chu Jenusi call a ni. Tlang lam ka han hawi hmasa te te a, phone pawh chhang lem lo chuan ka tho a, an awmna lam chu ka pan nghal bawk. Step tawpah min lo nghak ran a, ka han thleng chho chu, "He lamah lo kal rawh," tih pahin min hui a, an in hnung lam min pan pui a.
"Mahnia thil tih ruk neih kha a fuh dawn lo ania, i lak chhuah hnuah i buai tho ang," a'n ti nghal thawr pek a, min lo ringhlel ve hle anih hmel.
"Eng nge ka tih ruk?"
"Lo kal thut chhan chu i nei alawm, eng emaw ti harh zawk tu che a awmin ka hria, hriat belh i nei em ni a?"
"Hriat engmah ka neih loh vanga lo kal zawk ka nia, ka bialpa bula ka pa chungchang i sawidan kha ka hre duh, miss Mathani uite chungchang aṭang khan..?"
"I pa chungchang chu thuchiang engmah kan la hre lo," thawk ka la hak a, awih turin min ngai em mawni.
"Anih wine chu kan lakchhuah hunah engtia tih nge i tum?"
"Kan hralh ang, a lei duh tuin min nghak reng tawh," a tih chuan ka rin loh dan daih a ni. "Hralh i tum a maw?" ka ti pawr hlur a, "Tum e, wine ringawt a ni tawh lo, kan ruk tum ve hi chu min rin theih nana ṭangkai tur chauh a ni, wine siamdan zawk kan neih a ngai tawh," a ti zui zat a, ka bo map mai.
"Thil hi min hrilh chiang deuh ṭhin teh aw, ka hriatthiam loh chuan engtin nge pawimawh leh ṭangkai tur chu ka hmuh theih i rin le, zep ṭhen i neih zelte chuan engtin nge kan inpuih thei ang ni?" dawhthei lo zetin ka ti a, "Rin thu mai mai a la tam alawm, in rilru a buai lohnan a pawimawh leh ka chian ngam chin chiah ka hrilh che u," a ti ve tlat a, ka awih leh awih loh chu ka thu thu anih mai dawn chu.
"Chahbi chu ka nu Nguri'n a kawl?" ka tih chuan mak ti awm pawhin a awm lo, "I hmu tawh em?" a ti sam et a, "Hmu e, a awrh," ka tih pawh chuan, "Gold rawng a ni em?" a lo ti leh khauh a, engtin nge a lo hriat zung zung theih zawk le?
"Ni e, i hmu tawh em ni?"
"Keichuan la hmu lo e, i nu chuan a kawr chhungah a awrh daih alawm; mahse, a tala kha a danglam deuh a," tiin min chhang a, "Tala chu i hmu tawh a maw, ka pindanah i lut leh em ni?" ka tih laiin, "Keimah ka lut," hnung lam aṭangin a rawn ti a, ka lehhawi chuan ka hnungah Lawma a lo ding reng tawh.
"I lak theih i ring em?" ti leh tu chu Jeminai a ni.
"A muthilh hlante chuan lak theih e; mahse, a hre chhuak rang viau ang," ka ti ve vat a.
"Anih chuan hmun danga a tih bo a ngai dawn anih chu," a ti a, Lawma lam a melh bawk. Kan inkarah Lawma chu a rawn ding a, "Tih dan i hria em ni?" tiin Jenusi chu a melh ran a, "Ka ṭhianpa khan a la thei ang," Jenusi'n a tih chu ka lo inrawlh rang khawp mai.
"Engtin nge a lak theih anga, inhre ngai lo an ni miah lo ania aw, a ruksaka hriat chhuah a nih leh si chuan a pawi thui thei ania," ka ti sawk sawk a, "Ka hria alawm," a tih chuan a eng chu nge a hriat ka hre lo.
"Eng maw i hriat?" ka tih rualin ngaihtuah chhuah ka nei, heng thil hi he nu remruat bawk hi em ni ang? Ngawi teh...ka bialpa hi ka nu chhai tura a tawktarh a ni dawn tlatin ka hria!?
"I nu hian a ngaizawng hlauh mai a, chuvangin a kawr chhung zen sak chu a har lo ang, farm pawn lama a tihbo chuan nang pawh a ringhlel lo ang che," Ka thil hriat chuan nuih te pawh a ti za lek lek, ka ngaihdan a han nih loh mai mai zia chu aw, a sawi awlsam lutuk te chu ka ngei tawk a tling viau a ni.
"Chutiang ngai loin ka ti mai ang, a ruih laiin ka la thei alawm," ka ti deuh hmak a, "Inthiam lohna i la neih phah zawk i hlau lo em ni?" a'n ti ve ngei a, mi ngaihtuah awm ang ziazang chuan.
"I ṭhianpa chuan la zawk rawh se, a theih phei chuan naktuk zanah ti sela, wine chu la chhuak phawt teh ang u," Lawma'n a lo ti chu ka en haw mai. "Nang chu inrawlh tam lo la a pawi lo, i nu a ni ve bawk si a," dam thlap hian a ti zui a, a chhungte an ni tih hre chunga hetiang a ti duh hi ka hrethiam zan lo a ni; mahse, chhan ṭha tak erawh a neih ka ring.
"Midang la thei an awm ang, Zohera chu ka remti lo, ka nu nena khawsak dun tir i tum anih phei chuan ka duh lo tih ka sawi chiang nghal ni rawh se," An pahnih chuan min rawn en ve ve a, "Tu nge Zohera?" Lawma'n a tih laiin, "Kan ṭhianpa kha," Jenusi'n a lo ti thung a, Lawma chuan zawhna a ngah hmel viau mai.
"Mina..!?" a tih rual rual chuan, "Engmah min zawt tawh suh u, tihdan ka ngaihtuah ang, min lo ngaichang ula a ni mai," tih leh inher ka rual a; mahse, pen hnih khat chauh ka pen hman ang, "I lo kal thut chhan kha ka hre duh ania," Jenusi'n a rawn ti leh a, ka han ding leh rih.
"Eng nge awm tura i lo ngaih vak a?" tih pahin ka va melh ráwm a.
"Thil zep i la neiin ka hria?"
"Huh..zep i ngah ṭhin lutuka, mi pawh i ring hleithei tawh lo anih kha,"
"Lehkhathawn chungchang kha hriat belh a awm tawh em?" a tih chuan ning fein ka han ngaihtuah let a, "Ka hrilh kim vek che alawm," ka ti chu a duhkhawp loh hmel hle.
"Eng lam hawi nge tih tal i hre lo em ni?" a ti leh ta zel a, a pawimawh pawh ring lem lo chuan, "A inchhir thu leh a fate a ngaih thu vel," ka ti liam puat a, a rawn che vut a, min rawn kal hnaih nghal ruak mai!?
"Eng nge a!?"
"A inchhir thu maw?"
"Aw, chu chu a pawimawh em ni?"
"Pawimawh e, a dang i la hria em?"
"Farm-a lo let leh a chak thu te a ziak a tia, a bak chu a sawi lo.."
"Anih a sawi laiin a fanu chuan engtiangin nge a sawi, a thinrim nge, a lawm lo nge..?" a ti sawk sawk a, Lawma lo ding hnai chu en pahin, "A lawm lo pawhin ka hre lo, a pa a huatna pawh a zia phah niin a sawi alawm," ka ti halh a, Jenusi chuan a kut a rawn phar hluai tawh.
"I hrethiam ta em?" tiin Lawma chu a han be zui a, Lawma chuan a hriatthiam hmel viau laiin kei chu ka bo leh viau tawh, eng lai nge hriatthiam tur chu ni ang tih takngial pawh ka hre lo.
"Chu chu eng nge a awmzia?" tiin an pahnih chuan ka zawt a, ka melh tawn zak zak.
"Lehkhathawn kha pi Lalpuii ziak a nia, a ziah chhan hi ania kan hriat duh chu, a fate a bum niin a lang a; mahse, a faten a pasal an hriat dan tura a duh angin a ziak anih hmel, haw lo turin a duh tihna anih ber chu," Lawma'n a tih chuan rilru a buai map mai.
"A pasal kha pawisa rua tlanbo a ni a, a tlanbo hma khan hmeichhe pakhat a pawngsual vangin an nupa kar a chhe viau bawk. Mahse, chutiang lam rawng kai lehkha a ziak anih si chuan a pasal laka a rilru puthmang a thlak emaw a ni thei, anih loh vek pawhin a pasal thubuai kha dâwt a lo ni anga, a hrechhuak a ni thei bawk. Tichuan, a fate rilru a hel lohnan a lo buatsaih lâwk a, a pasal lo kir leh a beisei vang a ni em tih chu ka hre lo. Mahse, tuna a pasal lakah hian a hel ru viau thei tlat a ni," Jenusi'n a lo ti ve charh charh a, ka tan chuan thu thar vek a ni, lehkhathawna thil inziak kha a pawimawh ka ring miah lo a, an chhungkaw buaina lah chu a han thuk hmel em em mai bawk a, thil fel lo a tam dawn hlein ka hria.
"A la dam theihna chance a sang ta viau mai?" lo ti tu chu Lawma a ni.
"A lo inlan tawh zawk anih hmel," Jenusi'n a ti ve thung a, an pahnih an han inen ren rawn a, "Wine chu la chhuak teh ang, ka ṭhianpa chu ka lo hrilh anga, naktuk chhunah chahbi lo nei hman turin ka ti dawn nia," Jenusi'n a ti leh zung zung.
"Naktukah a, engtin chuan nge i tih tir dawn a?" pawr fein ka va ti.
"Lo lungngai suh, Zohera'n tihdan a hre lutuk ang, keini chuan kan lo nghak tawp mai dawn nia," tiin min chhang awlsam leh khawp a, hnial leh hram ka tum laiin ka phone a lo ri a, amah a ni.
Inherin phone chu ka chhang a, "Farm-ah i awm a ni maw, engmah sawi loin i lo kal daih a?" thatchhe aw zet hian a rawn ti a, a mu tawh anih ka ring. Ka hnunga mi te chu zaizirin ka kal tur thu ka hrilh a, kal pahin Zoherliana chu ka bia a, "Naktukah ka lo let leh zuai ang, i buai dawn em?" tiin ka zawt a.
"Chhunah chuan ka hman khawp ang," a tih chuan ka ngawi rauh rauh. "Jenusi nen in inbe fuh thei em?" nui aw lek lek hian a rawn ti leh a, kan awmdan hi naupang chhia a ti tlat a, keini kan han thutak ve ṭhin tehlul nen hian.
"Bia e, kan inbe zo deuh chiah, thil eng emaw ti tura a rawn tih che chuan...i hreh zawng chu hnial ve zel rawh aw.." ka'n ti ngawt pek a, "Engati maw?" a rawn tih chuan ka sawi hreh angreng.
"Chahbi ruk tir che a tum a, chu chu ka nu Nguri awrh lai hi a nia?" tim fea a tih laiin, "A har loh chu," a lo ti sam et a, "A har lo ang maw?" ka tih chuan a inngaihtuah buai ve chiah nge ni a ngawi rauh rauh mai.
"I hreh lo em ni?" ka'n ti leh a.
"A chakawm loh hle mai," zawi supa a rawn tih chuan ka khawngaih ru deuh. "Lo la dah suh aw," tiin in chhungah ka lut a, "Ka mu nghal mai dawn ania," tiin pi Lalpuii ka hrilh a, Remite ṭhiandunin thei bawl puiah min lo sawm naa zaizirin ka hnial a, ka pindan lam ka pan zui bawk.
"I chak loh chuan tilui duh suh, keipawn ka nu i hnaih chu ka duh bik lo, thil pawimawh tak pawh nimahse kan duh loh thleng thlenga kan tih a ngai hleinem tiraw, tihdan dang kan zawng mai dawn nia," ka ti dap dap a. "I hlauthawng nge i thîk deuh?" a tih chuan, "A pahnihin," ka ti vat a, a nui hawk mai.
"Hei, Jenusi chuan message a rawn thawn chiah e," a ti a. Eng eng a sawi ka lo zawt ve vat.
"Naktukah tlaiah min hmuh a duh anih hi," a ti zawi sup a, "Keipawh ka rawn tel ve ang," ka tih chuan min hnial lo. Min ngai ve deuh nge mawni rei dawn kan inbia a, ka thil hriat thar te chu hrilhin mak ka tihzia te ka sawi ve luam a, ani pawn a rindan te min hrilh ve bawk a, a tuk lama inhmu turin kan inmangṭha ta bawk.
Ka mu hma bawk a, ka tho hma khawp mai. Pu Muana nen zingkarah varak chaw kan zuk pe a, ka charger ka theihnghilh a, lam lawk ka ngaih thute pawh ka hrilh nghe nghe. "Lawma inhruai tir ta mai che," a ti naa keimah a ka kal theih thuin ka chhang ve tlat a, nu Makimi te an lo kal dawn a, an ruala let leh ka rilruk a ni.
Tukṭhuan eikham hnu lawkah nu Makimi te chu an lo thleng a, vawiin chu pu Muana'n thu a sawi lo a, nu Makimi'n bible chhiarnate neiin ṭawngṭai rual a rawt a, hla pahnih vel sain kan bang der mai. Dar 1 bawrah khaw lam panin kan inkhalh chhuak a, kan dawr kawtah ka inthlah tir ve zet a, an tlan liam hnuah auto lain Zoherliana awmna lam ka pan nal nal thung.
Ka va thlen chuan a lo inbual zo chiah a, "I rawn tlai, thil ka eisan che," tiin dawhkana eitur chu min kawhhmuh nghal a, engmah pawh ka eichak lem lo.
"Jenusi'n a lo be leh tawh che em?" ka tih chuan, "Aih, in lo kal rual ka ring a," ti maiin min chhang a, min kal rualpui chu a tum lo aniang engmah a sawi bik lo.
"I lo kal dawn tih a hre lo aniang a?" a tih chuan, "Ka hrilh lem lo, tihian min rawn phâwk rawh se," Ka va melh pah zauh a, a lo nui suk suk mai.
"Hrilh tawh rawh aw,"
"A hre tawh alawm.."
"I hrilh tawh maw?"
"Aih. Mahse, a hre tawh, a hre lo der mai mai anih hi," a ti a, hrilh tho se ka la duh fan, ka sawi aṭang ringawta hre lo turin ka duh, a ṭhianpa hnen aṭanga a hriat ve ngei a ngai a ni.
"Hmanhmawh lo la, keiman ka va thlah dawn che nia," a tih chuan, "Ka nu chu engtin nge?" ka lo ti vat a, "Tlaiah a lo kal dawn," tih pahin pindan lam a pan a, ka zui rang khawp mai.
"Engtia tih nge i tum?"
"Zu ka inpui anga, a ruih hunah ka la mai ang chu.."
"I sawi awlsam sia, a lo buaithlak viau ange,"
"Ka kuah ringawt chu i phal ang ti raw?" tiin meinei zet hian min rawn nuih a, rum fein ka lo melh.
"A bak ka ti miah lo ang," a'n ti zui a, ka va han duh lo tak.
"Kuah ringawt chuan i la thei dawn em ni?"
"Tehreng mai, ka kut a rang alawm," tih pahin a kut a rawn lek zauh a, chumi hnuah nui ruh ruh chungin a kawr a va ha a, ka va kal hnai chu min en lem lo, a hnung lam aṭang chuan a kawngah ka va kuah a, a hnungah ka bei thlam a, ka kut a rawn khawih rual chuan ka kuah nghet sauh sauh.
"Keichuan hetiang titur hian ka duh miah lo che," ka aw chu zawi tak a ni.
"I nu a nih vangin maw?"
"Aih, ka bialpa i nih vang zawkin," a rawn inher a, lo kun hnaiin ka biangah a rawn dawm a, lungchim zetin min fawp bawk. A khum lamah chuan min pawt phei a, ka kawr hlim nghal mai a tum chu, "Kawngka va kalh phawt rawh," tih leh nam ka rual a, a nuih a za khawp mai. "Lo mu rawh," tih pah chuan a kal a, kawngkhar a va kalh ri rak rak a, a lo let leh chuan ka lo mu fel diam tawh.
Dar 3 pelhah ka muhil ka harh hlawl a, ka bula mu pawh a lo la mutui khawp mai. Ka phone ka en chuan missed call a lo awm a, Jenusi number aṭangin a ni. Zoherliana phone ka zawng nghal a, a lukham hnuaiah a lo delh bet tlat a, ka la chhuak tur chuan tihharh ka hlau ngang mai. Jenusi message pahnih a lo awm a, "Ka lo chhuak har deuh ang, Jeminai'n a lo bia che em?" tih leh, "Ka lo thleng tawh, khawiah nge i awm?" tih a ni, a rawn thawnna a la rei lo viau bawk.
Tu emaw number hriat loh hian message a hnutchhiah nual bawk a, "In hnuaiah ka lo awm ang," tih te, "Ka thleng tawh, i va rawn lang har ve," tih te a ni a, in hnuai chu hotel pindan thim deuh kha anih ka'n ring ringawt a, number chu ka phone-a number nen ka en mil bawk a, ka nu Nguri number ngei a ni.
Ka inngaihtuah buai ru khawp mai. Ka bula mu chu ka han thlek ṭhin a, ka phal thei ngang lo. Kuah ringawt tur pawhin ka duh lo a ni. Ka rilru ka siam sauh sauh a, Jenusi message chu chhangin, "Hotel-ah ka awm," ka va ti ta ngawt a, chumi hnuah ka nu Nguri chu ka chhang leh a, "Vawiin chu ka hman leh lo, Anthonya a awm ang," tih zawng chu ka thawn a, chahbi chu keimah ngeiin lak ka tum a ni, a nih nih kan ni tawh mai ang, khuaah a kal tho a, khuaah a tibo anga inngaih tir zawng a ni tawh mai.
"Call i dawng em ni?" a rawn ti thut, a phone chu ka'n thukru leh hnuhnawh a, mit nuai chat chat chunga rawn thawh a tum chu ka bawh thlu a ni ber.
"Hey, i chau lo em ni?" tih pahin min lo kuah hlun a, "Mu rih ang, tumah an lo kal dawn lo, kan ṭhulh dawn," ka tih chuan min chhang lo. A lukham hnuai a dap a, "Ka hrilh tawh, kan ṭhulh dawn.." ka ti leh chu ka pawr viau tawh.
"A rawn sawi em ni?"
"Ani rawn sawi a ngai lo, keiman ka tih chuan 'aw' ve mai la.."
"Chahbi chu in mamawh a ni lawm ni?" a ti bul nghat a, a phone bawk chu a han zawng leh a, thinrim bur chunga ka pe chu min nuih tawi khawp mai. A en hnu chuan min rawn melh run run a, lehlam ka hawisan hmak thung.
"Ka phone hi khawih tawh lo ang che," a rawn ti bawl.
"Aw, ka khawih tawh lo ang, nang pawn min khawih tawh lo ang che,"
"Jemina, kan inkar thil anih loh hi,"
Chhang loin ka ngawi hmiah a; mahse, rei a rial lo. A rawn tawlh hnai a, min rawn kuahin ka darah dimte hian a rawn fawp a, "Ka thinrim lo," a tih laia a aw chu a ril ruih.
"Kei chu ka thinrim," tih paha han tawlh hlat mai ka tum chu min kuah nghet nasa mai.
"Sual viau ṭhin lo teh," tih pah chuan min kuah nghet sauh sauh a, keipawh chu ka inthlah dul ve riai riai.
"Chahbi chu keiman ka la anga, khuaah a tibo a ni mai alawm, kan hman zawhah hotel-ah in lo chhar anga a tawk mai ang,"
"Khai aw, Jenusi aiin i fing daih mai a," a lo ti fiamthu hlut a, min hnial lo chu ka lawm ru ve hle a ni.
Dar 4 velah haw turin ka insiam a, min thlah a tum naa auto ka lak mai a fuhin ka hria. "I duh lo tak tak maw?" a tih pawh chuan, "I tan a buaithlak mai mai, a hmun thlengin auto ka hmang thei zawk," ka ti ve tlat a, chumi hnuah kawngpuiah auto chu kan han chang dun a, kan chang rei lem lo.
Ka kalsan dawn chuan, "Inah awm rawh aw, lo chhuak miah suh," tiin ka chhah leh hram a, dar a kán ak ringawt a, a chhuah loh ngei ka beisei.
Farm ka thlen chuan a tlai tawh angreng si a, ka inthlahrung ru khawp mai. Mahse, chhungkaw boruak vang aniang tuman zawhna min zawt lem lo a, ka nu Nguri lah chu a lo la haw lo anih hmel. Ka thlen hnu lawka pu Muana lo lut chuan, "I nu nen in rawn hmu nange?" tiin min zawt a, "Hmu miah lo, hmun dangah a kal aniang," ka tih chuan a call zui a, veranda-ah chhuakin a va hrawk khar khar.
Zanriah ei dawnah pawh ka nu Nguri chu a la rawn thleng lo, pu Muana chu chaw eikham veleh a inkhalh chhuak a, a va hruai dawn anih ka ring. Zoherliana nen message kan inthawn ve reng a, ani chu a chhuak lo a, ka haw hnu khan a muhil ṭha leh a, eirawng te a inbawl chawp a, lo bawlsak nachang ka hre lo chu a zia lo ka ti kher mai.
"Ni dangah chuan ka bawlsak tawh ang che, dal leh alu kan ka thiam lutuk, ka artui kan phei chu ei la i lei i lem maithei," tih angreng sawia message hote te kan inthawn laichuan Lawma'n min rawn call a, a phone call hi khawvela thil vang ka tih ber pawl kha a ni a, a rawn call ve tehnawlh chu ti rilru chungin ka chhang a.
"Jenusi'n a lo bia che em? A la rawn let miah lo a, a ṭhianpa kha lo zawt teh," a rawn tih chuan ka beisei loh lam daih a ni.
"Ka'n zawt ange?" tiin Zoherliana ka call ve nghal a, ani lah chuan, "Min rawn be leh miah lo, biak ka'n tum ange," a lo ti ve leh a, rei vak loah a call tlang theih loh thu min rawn hrilh a, keipawh chuan ka call tlang thei bik lo.
"Hotel-ah a kal a ni maithei, ka va ngaihven ange," Zoherliana'n a rawn tih leh chuan chanchin min hrilh leh turin ka chah a, in chung lamah chhoin veranda-ah ka lo han nghak ta bawk.
Zoherliana'n message ka dawn leh chu, "Hotel-ah a awm lo," tih zawng a ni. Ka awm a nuam ta vak lo, eng emaw thil a thleng ang tih hlauhthawnnain ka khat a, ka tihsualah a chan mai ka hlau a ni.
Dar 8 dawna pu Muana motor lo let lah chuan ka nu Nguri chauh a rawn phur haw a, Jenusi chanchin lo zawh chi lah an ni mang si lo. Inhau bawrh bawrh chunga an inzui lut pawh chu ngaihsak loin pawnah ka la ṭhu ta reng a, tun ang hun tawh a a la rawn let lo chu ka hrethiam lo takzet. Dar 9 a ri a, rei loah dar 10 a pel a, chanchin thar engmah a la awm lo, gate lam chu ka melh chhen tawh. Lawma pawh an kawtah a ding rei tawh viau a ni.
End of chapter - 18
😘😘😘🫶🏻
ReplyDelete