WHY DID YOU GO? (CH - 19) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 19

"Hna ka zawng ang i tih khan i ti mai mai ni turah ka lo ngai a, han kawh hmuh nachang che pawh ka lo hre hleinem, hman deuha ka zin rawn haw kha kan nu hian min lo hrilh a, min rawn tlawh leh thu a sawi pawh khan 'A va cham rei angreng ve, hna a zawng tak tak em mawni' ka lo la ti chauh a," zial pak khuk talh talh pahin pu Lianmawia'n a ti a.

"Sailo farm lamah ka hmelhriatte an awm a, hna min hmuh sak ve hlauh alawm," ka tih lai mekin pi Rini chuan thingpui leh a hmeh kurtai a rawn chhawp a, ka hmanhmawh deuh nain han sawi nghal mawlh mawlh chu a rem lo ru viau a ni.

"Pu Lala farm-ah maw, anni chuan hna an ngah viau tak ang chu," tih leh pahin pu Liana chuan thingpui chu a ban a, "Vawk kan enkawl a, tihtur chu a tam ṭhin khawp mai," ka ti chu min chhang lem lo, a thingpui chu a han lem khalh a, "I kal ve tawh em?" ka tih leh chuan a rawn hawi thuai a.

"Kal ve ṭhin tawh e, tun hma deuh kha chuan an huan thlang lamah khan sa kan chang ṭhin a, sava veh pawhin kan kal fo alawm, chunglai chuan ram pawh an la nei zau lo a, lui ral lehlam kha chu ram awl vek a la nia, tunah chuan ral lehlam mual pawh saw an ram a ni vek tawh, an inleitir ni pawhin ka hre lo, tlem lai deuha kan vc te khan an pe niin ka hria," a ti leh charh charh a.

"Ram an nei zau khawp mai, hlawhfa pawh an chhawr deuh reng," ka han tih chuan a bu deuh nghat a, "Khua aṭanga inhlawh tura kal hi an tam ṭhin alawm, Mami te tleirawl tir pawh kha inhlawhin a ṭhiante nen an va kal ṭhin a, thei a rawn hawn ṭeuh zel a, an serthlum te saw a lianin a thlûm tui a, a vanglai tak tak chuan khuaah an tiral seng lo a, an thawn chhuak ruih ruih ṭhin," a han ti leh dap dap a, ka chang chhuak ta bawka tiin thingpui no chu ka ban ve vata, a lam hawi pah chuan, "I fanu chuan grape te a sengpui ve hman em, an thlalak hlui ka en khan nula hoin an chil laite a awm hlawm a, a tel ve mial lo maw?" ka han ti nghal var a, annu zawk chuan, "Tel ve ṭhin e, nuam an ti lutuka inrinni tin hian an va kal a, an va inkhawm pah a, 'Thawhlawm min sem a, an khawn leh nghal a, pawisa thir kan kensa kan thlak a, min pek chu kan ak ru daih zel' a tia lawm," tiin a lo nui hak hak a, putara pawh chu a nui ve suk suk.

"Chung hunlai chu a rei tawh viau em, thlalak aṭang hian a hun lai bawr vel min hrilh thei mial lo maw?" tih pahin ka bag-a ka thlalak dah chu ka phawrh a, putar zawk chuan a lo bih thuai a, thlalak pakhat zawk a han en chuan, "Kawlhminga te pawh an la ṭhalai deuh a nih hi," tiin thlalak pakhat zawk chu a en leh a, "Hei Mami te ṭhianho pawh an tel ve alawm," tiin hmeichhe ṭhenkhat paikawng phura ding tlar te chu a kawk a," a fanu nia a sawi chu tleirawl er er chauh a la ni.

"Midang ho kha i hre hlawm em?" ka tih chuan a hriat ho chu a sawi diat diat a, annu pawh chuan a rawn bih ve a, putara aichuan hriat pawh a ngah zawk a, mipa naupang te pawh chu 'Chumi khami chu a nih dawn hi,' tiin an nu leh pate pawh a la sawi thei nual mai.

"He nu hi in hria em, ka thlen in nu khan 'Ka hmu zui tawh lo' a tia, in khaw mi a ni em?" tia ka kawh chu an han bih dun vang vang a, putar chuan en vung vung pah chuan ka thlen in nu hming chu min han zawt a, "Pi Vensangi a nia, a pasal chu Laltaia, farm-a an thawhna pawh a rei tawh," ka ti ve zung zung a.

"Farm lama cheng an nih chuan kan hriat zawng an ni lo ang, khaw chhunga cheng rei tawh te hi chu kan inhre ve zul hlawm a, anni saw chu an rawn chhuak khat em mai a, i sawi pawh chu kan khaw mi dik tak an ni lo nge mawni?" putar zawkin a tih laichuan, "Mami'n a hre mai thei a ni, a pawimawh em?" pitar chuan a lo ti bauh a, ka chhang tur chu ka inngaihtuah buai deuh.

"A pawimawh chuan nghak la, chawhmeh suak turin ka ko a, a lo chho ṭep ang," a ti leh zat a, sana ka han en leh te te a, ka nghak hmanin ka ring lo.

"Eng emaw thil tihruk i nei em ni, mi i zawng kual tlatin ka hre mai a?" pitari bawk chuan a ti leh.

"Ni e, i awmdan han chîk hian zawn nei i ang riau, henu hi i zawng em ni?" putara'n a tih ve leh takah chuan anni nena inkungkaih thil a awm hmel loh bawka tiin ka sawi ta hmiah a, ka pehhel viau thung.

"Tunlai chu an chhungkua saw an buai ru riau a, an nu ber pasal hmasa tlanbo ringawt kha thil hriatsual palh vang anih ka ring deuh a, he nu hian a pawngsual niin a puh a, ka hrechiang chak deuh alawm maw le," ka han ti chu mak an tih hmel khawp mai.

"Kha kha kan lo hre ve tak a sin, anih chuan i mi zawn chu Lalhmuaka fanu Ringzuali a nih dawn chu, thlalakah hi chuan a la lang naupang deuh em a ni, tunah chuan a upa tawh ang," pitar chuan a lo ti hlut. Thlalak pawh chu a rawn bih ṭha leh a, "A puan lukhum khum vang hian ka hai anih dawn hi, tun hma chuan zu an zuar ṭhin a, an harsa ve khawp mai, a pa boralna pawh a rei tawh, YMA in an ensan lai kha a nia, an in lah kha a tlu lek lek a, YMA pawh khan an khawngaih leh hnuhnawh aniang a hnu lawk khan an inte an sak ṭhatsak leh a," tih angreng chu min hrilh zui luam a.

"Khuaah hian a la awm em?" tia ka zawh chuan min chhang thei mai lo, "Kan pawn chhuak tam lo ta lutuka, la awm ve awm tak chu a ni, pasal a nei ta em kha le?" pitar chuan a ti vang vang a, putar zawk chuan an in awm ṭhinna te min lo hrilh ve bawk a, "Mami'n a hria ang," tih bawk chuan a tlip leh a, an fanu chu han zawh chian a chakawm khawp mai.

"Nu Mami chu a lo chho dawn tawh em, ka hmanhmawh angreng sia?" tiin pitar chu a han zawt a, "Phone sak rawh, telhawng pawh a laktheih reng tawh alawm," pitari'n a tih chuan putar chu a tho ṭuah ṭuah a, fridge chunga a phone dah chu va lain a hmet nghal mual mual a. Chutih laichuan pitar chu ka bulah a rawn ṭhu a, "Engtin chiah nge an buai a, Ringzuali chuan dawt a lo sawi nge ni?" tih pahin min en kar mai.

"Dawt a sawi niin ka hria, Pi Lalpuii pa khan a lo tham lungawi te pawh a ang, tun hnu hian an nupa saw an inringhlel a, an buai deuh nuai mai a, a pasal hmasa zawkin thawm a rawn nei ve leh bawk nen thudik zawn chhuah hi a ṭhain ka hre deuh a," nui chungin a ti a, a hrethiam zan lo tih ka hmu thiam a, ka sawi thui duh vak lo thung.

"A pasal hmasa chuan tihsual a lo nei leh si lo tihna em ni?"

"A ni maithei, pi Ringzuali kha pu Lala khan pawisa a pe tih chu ka hriatdan ania,"

"Tuna a pasal pawh chuan a hre ve bawk em?"

"Hre chiah lo aniang, a lo hre maithei bawk a, a pasal hlui zawk khan a hre ber ang," ka tih laimek chuan putar chuan phone a chhang a, "I nuin a siam zo tawh a, a lak theih tawh e, lo chho nghal mai rawh, hei be duh che em awm," a ti lung lung a, lehlam ami chuan a rawn zawt chiang aniang, "Ka sawi thiam niai nuai lo, aizawl lam nula ania, lo chho la, in inbe dawn nia, a nghak reng che," a tih leh hnuah phone chu a dah a, lo phei leh pah chuan, "Ringzuali'n dawt a lo sawi anih chuan i hnathawhna nu pasal hlui chuan a haw viau dawn anih chu, tuna a pasal pawm lai saw mi ṭha tak niin kan lo hria a, rin ang ngawt chu a va nih bik loh hmel ve," a rawn ti phei nuah nuah a, "Ani pawh sawn hriat chu a nei ve maithei, a fapain chhui chian deuh a duh a, chuvang ania ka rawn zawh che u ni," ka ti ve vat a, tu a fapa ber nge min zawh loh vangin ka sawi duh lo thung.

An fanu lo nghah pah chuan eng eng emaw kan sawi ho leh luam a, pi Ringzuali chanchin te pawh chu an hriat ang ang min hrilh a, "Zu a heh ve viauin ka hria, a pa khan a zuar reng ṭhin a, a in reng bawk a, a fapate pawh zu vangin an thi hlawm a, Ringzuali chu an naupang ber a ni a, he lai tlanga kan awm hnu hi chuan ka hre zui ta lo," tiin putar chuan min hrilh a. Pitar zawk chuan, "Nu hmelṭha pawh a ni lo asin, thubuai an neih tirh pawh khan mak tih a hlawh ve angreng a, ani zu rui reng bawk si kha chuan rin pawh a hlawh vak lo a, amaherawh chu farm lama chengte kha kan hre chiang lutuk hlawm lo a, a puh ber lah kha zu ngawivei ve tho niin an sawi a, an ruih laia che khawlo dun an nih te kan ring deuh a," pitar chuan a ti ve leh dap dap a, chulam chu thil pawimawh tak pawh a ni tawh lo a, an fanu zawk chuan ka thil hriat duh chu min hrilh theih ka ring.

Kan han nghak leh ren rawn a, a rawn lang har reuh khawp mai. Sana ka bih zauh zauh a, Zoherlina chu ka call bawk. Mahse, a chhang thei lo, Jeminai chhuak khan a va hmuh ngei ka ring a, ka han call ve leh bawk a, ani pawh chuan a chhang thei chuang lo. Zohera zawk chu message-in ka thlen tawh thu ka hrilh a,  ka hrilh lawk tawh bawk a pi Nguri chu a lo buaipui nghal mai ka ring a ni.

 

Minute 20 dawn a liam leh hnu chuan pawn lamah ṭawng thawm a rawn awm ta a, "Hetiang thingṭangte chu a tuah tlak tak tak si loh a, bawlhhlawh phur motor-a paih aite chuan hal mai zel rawh u," a rawn ti lut bawrh bawrh. Nu valai, hmaitlang ṭha deuh mai hi a rawn lut a, fa sen pawm lai a nei a ni ngei ang a taksa phu loin a awm bawr a lian a, a ke pen dan aṭang chuan nu taima leh zuan zang tak a ni ang tih a hriat theih.

"A va sen ṭha siah suah ve, hralh tur chu a awm dawn ta em?" tih pahin dawhkana chawhtawlh inhung chu a bih a, "Tun ṭum chu ka hralh lo ang, Maenga nuin a duh ve bawk a, i pa Zuala te pawh pek an ngai, siam leh hunah i zuar dawn nia," pitari'n a lo tih laichuan ka lam a rawn hawi a, "Nangmah em ni min be duh?" tiin min rawn zawt khauh.

"Lo ṭhu ve phawt teh, i tleirawl lai chanchin kan lo sawi ania,"  tiin putar chuan a lo hui sawk sawk a, "Teh daih chuan, eng thil nge ni a?" tih pahin an fanu chuan kan ṭhutna lam a rawn pan a, ka epah chuan lo ṭhuin chîk fahran hian min en a, ka ṭhu ngil ve thuai bawk.

"Sailo farm-a in kal ṭhin laia pawngsual thubuai kha a nia, tun hnu hian kan han ringhlel leh deuh a, engmah thuchiang phei chu a la awm lo, i hriatdan ka hre ve chak deuh a?" tiin pangngai thei ang ber chuan ka han zawt a, ka beisei loh thil ka sawi tih hriat takin a hamhaih hmel a, "A va rei tawh ve aw, ka hre tawh dawn em mawni?" a ti nuah nuah a, "I ngaihdan kha hrilh ve tawp mai rawh," a nuin a lo tih chuan a inngaihtuah deuh vang vang.

"Pi Ringzuali khan dawt a sawi duh maite i ring ve em?" ka han tih chuan, "Kha nu kha ka mi rin zawng a ni lo, hna kan thawh ho laipawh khan zu rim a nuam huam reng a, pa Biaka kha mi pawngsual duh tur chi niin kan hre lo, kan ṭhianho phei chu min duhsak a, kan hnathawhnaah te hian fiamthu a thawh a, a titi kan ngaithla ṭhap ṭhin. Pa rilru tluang leh rilru chhia pawh nei lo chi niin kan hria a, pawngsualtua an puh pawh khan kan ṭhianho chuan kan awih hleinem; mahse, a tlanbo ta daih sia, a lo pawngsual tak tak anih kan ring leh deuh a," tiin mi a chhang ve luam a.

"Anih, pi Ringzuali chuan engvanga puh nge anih i rin?" ka tih leh chuan, "A pawisa duh vang aniang chu, FIR pawh a thehlut duh hleinem, pawisain an inrem ringawt a, keini ni ila FIR kan thehlut ngei ngei ang, an harsa ve a, kutkem a nei an ti bawk a, a pawisa duh vang bak a nih ka ring lo," a ti barh barh a, a la dam em ka zawh chuan hriat chhuah a nei ni ngei tur a ni ka sirah a rawn ṭhu sawk sawk.

"La dam e maw le, khami hnu khan an awm thei tawh lutuk, in te an sa ṭha a, zu pawh an zuar leh tawh lo, farm neitupa khan pawisa a pe tam viau aniang tun thlengin a la awm nuam viau alawm, ka ngaihven zui vak lo a; mahse, nikum hmasa khan an veng lamah mitthi kan han ral a, an in pawh a lo ṭha lutuk, in chhung bungrua te phei chu keini aiin an nei changkang daih zawk ang chu, fa a nei lo a, pathlawi naupangtein a luhkhung a, chu pa fanu pakhat nen an khawsa ho a, eizawnna mumal an neih hmel si loh a, a mak ka ti angreng ania," a ti zui duah a, ngaihtuahna a buai ta map mai.

"A rei tawh si a, pawisa tam tham tak pawh lo pe ta sela tun thlenga la rin tham a ni dawn em mawni?" ka rilru hria niawm takin putar chuan a lo ti ve nuah nuah.

"Chu tak chu alawm mak ka tih, an in chhung bungrua kha ṭha tak mai ania, motor te pawh an nei alawm," a fanu chuan a ti leh ta zel a, kei chu ka duhtawk der mai. An in awmna chu ka zawt a, pawnah chhuakin khaw chhung lan theihna laiah chuan kan va ding dun a, min kawhmuhna lam chu venghmawr tlang lehlam daihah a ni. "Vengsang pan chhohna bulah i zawt chawp dawn nia, kawng chhak chin kha an veng chhung a ni tawh a, an lo hre vek ang," tiin min hrilh a, ka hmuh duh chhan chu dilchhut fein min zawt leh bawk.

"Kan pu fapain thil zawt chiang turin min tir a," ti maiin ka chhang a. "Pa Muana fapain maw?" a lo ti let haw a, ka bu ringawt.

"Pa Muana leh farm neitupa khan an lo bum reng te hi a lo nia nga, chutiang anih chuan pa Biaka chu ka lainat ngawt ang, an chhungkaw zinga kan nel ve ber a nia, keichu ka ring sual ve thei tak tak lo, in hrechhuak anih chuan min lo hrilh ve leh ngei ngei rawh," a ti mauh mai a, ka tlawh leh tur thuin ka chhang ve ta ngawt mai.

Kal mai ka tum tawh laichuan, "Enteh.." tih pahin a ban a rawn lek a, a banah chuan tatoo niawm tak thla de tir nge; thla ral lam tawh lem hi a lo chuang kalh a, "Pa Biaka'n kan ṭhianhoin min chhut sak a, ka pain min vuak phah alawm," tiin a nui hak hak a. 

"Pa fiamthu duh leh titi thiam deuh mai a nia, a ruih laiphei chuan kawm nuam tak a ni, a puzawn khan a hau reng naa a haw ṭha duh vak lo ṭhin a, keini pawh kha min hauh hlauin tih tur leh tih loh turte min hrilh ru zung zung ṭhin, tatoo chhut a thiam a, battery hlui hian compass hmawrin a chhu mai zel a, a ruih laia a tatoo neih dan te phei chu a nuihzatthlak lutuk, a ṭhianten a banah  chapal lem lian deuhin an chhutsak alawm, Wine phuahchawp te a thiam a, thei hmanga a siam ho phei chu a tui thei ania aw.." a sawi mawlh mawlh laichuan ka va kal hnai ruak a, "Wine a siam danglam ṭhin a maw?" phawk fea ka va tih vang chuan a ṭawng tawp ve chaih a. "Aw...bel lianpuiah a a um a, eng eng emaw thlai hnah leh pangpar hmangtein a sawngbawl a, tleirawl zu a tia, a ruih pawh a na vak lo, zufâng phei chu ka hriat tawhah a la siam thiam ber," zangkhai deuh hian a ti a, ka thil hriat zet chuan ka ngaihdan a thlak ta hlawk ti ila a dik ang, thil ṭhenkhat chu a danglam dawn khawp mai ka ti rilru a, phuba lakna nge ba rulhna tih chu zawhna awm thei tak a ni.

"Anih, a wine siamte chu an zuar ngai em?" 

"Ka hre miah lo, chunglai chuan grape wine kha an siam ṭan chauh a, an grape chin hmasa a thur vangin a chi thar an ching a, barrel lian deuh deuhah hian an um a, pa Biaka siam kan in ṭhin kha chu an in lama a um te a nia, ramhmul damdawi te pawh a siam ṭhin alawm, rul chuk damdawite, kawṭhalo leh hritlang, luna damdawite. 'Hmeichhe damdawi ka la siamsak dawn che u nia, enchhinnan rawn inpe ula, a free in in dawng char char ang,' te kha a ti fiam ṭhin a, a tlanbo hma deuh lawk khan hmeichhe damdawi chu a siam a; mahse, wine ruih theih chi a nih vang khan tuman kan in sak duh lo a," tiin min chhang a, "Chu wine chungchang chu a sawi chiang deuh lo em ni?" tiin kan zawt leh hram a. Ani chuan, "Rai theihna a tia, pasal nei laite ta tur a tia, pasal kan nei bawk si lo a, kan nuihpui mai mai a, 'I ṭhian ho chiahin in in chhin thei ang, midang bula in pawh a rem lo, a hlauhawm thei a, a thawh dan ka hre ringawt duh,' a ti bawk a, kan in duh tak lohah khan u Ringzuali te ṭhianho khan an in chhin a, a tukah pawh an dil leh nghe nghe, a tui a nih ka ring," a ti leh siam siam a.

"Varak lem chuanna wine bottle a ni em?" ka tih chuan a nih loh thuin min chhang thung.

"Tui bottle pangngaiah hian a dah hlawm a; mahse, varak i sawi takah chuan varak an vulh ṭhin asin, lem ziah te kha a ching a, a note-ah hian thil a ziak melh melh reng a, damdawi siam dante pawh a ziak ṭhin," a tih chuan ka rindan a rawn ti fiah zual ting mai.

"A wine siamdan te pawh a ziak ṭhin ang a?" ka tih laia ka endan chu mak a ti deuh a ni ang, "Pa Biaka chu a lo kir leh tawh em ni a, i hria em ni?" a ti ta khauh a, lu ka thing sawk sawk.

"I dilchhut angreng sia i hriat duh hmel em a," a ti ve leh mai a, ka zawhna pawh chu min chhang zui a, "Zu kha a rui deuh reng a, a theihnghilh leh mai ṭhin aniang thil chhinchhiah a peih lutuk, a chang phei chuan ramhmul damdawi min lakpui a, 'Nimin khan eng nge ka hriat thar kha aw,' tia han ngaihtuah let leh chiam te a ching a, a ipteah hian lehkhathem leh pen a ak reng ṭhin," a ti sap sap a. Mi fing laktlak loh tak leh, mi sual fing pakhar takte inkar kan buaipui niin ka hria, thawnthu ngaihnawm leh chingchivet tak a ni.

Chutih laichuan pitar khan min rawn au, "Telhawng hi hawn ve ta che," a rawn ti lang lang a, "Ngawi rawh, hawn lo ang, kalna tur dang ka la nei nual a," tiin ka chhang a, nu Mami bulah chuan, "Ka kal phawt ang, nidangah kan la inkawm leh dawn nia," ka ti zui a. "Pa Biaka chanchin chu min hrilh theihnghilh suh aw, u Ringzuali i biak dante pawh ka hre leh chak ania, min lo tlawh leh ngei ngei ang che," a ti ve leh a, ka aw e deuh zung zung tawh.

Ka kalsan hnu chuan phone ka phawrh a, Zoherliana call emaw message engmah ka la dawng lo. Hotel lam ka pan nghal a, ka zuk thlen chuan counter-a ṭhu nula khan min lo chhawn a, "I pi i rawn zui em ni?" a lo tih vang chuan nu Nguri chu a thleng tawh tih ka hrethiam a, "Pi Julie a awm em?" tiin ka zawt ta thung.

"A chhuak lawk a, a lo let har lo ang," a tih vangin ka chhuahsan leh vat a, kal hla duh loin a thlang maia waiting shed-ah chuan ka zuk nghak a, rei vak loah bike pakhat hi a rawn tlan chho a, Anthonya kha a ni. Hotel chhunga a luh hnu chuan ka phone bawk chu ka bih leh a, ka message pawh a la en lo a, a laklawh viau nge mawni ka ti rilru a, ngaihṭhat lohna pawh ka nei lem lo.

Rei dawn ka ṭhut hnu chuan tum loh dan deuhin thil a kal ta tlat. Hotel aṭanga rawn inzui chhuakte ka hmuh rual chuan ka ṭhu ṭha vat a, Zohera tel loa Anthonya leh nu Nguri ka hmu dun chu ka hrethiam ta chiah lo. Rei vak loah chuan min rawn tlanpel a, an inphur liam chu ding meuhin ka thlir zui a, Zohera chu a chhungah a la awm zawk nge mawni..?

Phone ka bih rual chiah chuan message ka dawng a, Zoherliana number aṭangin a ni. Mizoṭawng kim thlapin a rawn ziak leh tawh a, message rawn thawntu pawh rin dan ka nei thiam, Zoa'n a type kim biai ngai lo, thatchhe takin a short cut theih zawng zawng chu a short cut ṭhin, min chhangtu chu Jeminai a nih hmel e.

Hotel-a a awm thu a rawn sawi a, tunah Zoa bulah a awm a, a phone lah a khawihsak thei bawk si a, ka ṭhiana chuan hotel-a a awmpui ka ring lo tawp mai, an in luah lamah an awm dun a ni ngei ang, tun ang dinhmuna hotel-a hruai duh tur khawpin Zoa chu a â bik lo ang. Ka tho vut a, tum anga thil a kal lo ta rau rau anih chuan ka thil hriat thar chu han chian phawt a ṭhain ka hria a, beisei ang diak diaka thil a kal ngai lo erawh ka ning hle ṭhin mai. Kan Julieti chuan ruahmanna ṭha zawk a nei turah ka ngai a, in tur sek hi ka tan pawh a hahthlak lam a ni.

Pi Ringzuali te veng lam ka pan laichuan phone call ka dawng a, Zohera a nih ka rin laiin Bawiha zawk a ni. "Ka lo haw thei ṭep i ti ringawt a, ka nuin i lo haw hun tur a hre duh ania," a rawn ti lang lang. "Ka la thei lo deuh, hruai ka ngai dawn lo, keimahin ka lo haw mai ang, lo chiai suh u," ka ti zung zung a, "Kan chiai lo, ka pa zawk hi alawm, tunlai chu zing aṭangin a in a, a hah, damdawiina hruai mai a ngai, a irhfiak a reh hleithei si lo, a buaithlak anih hi," a rawn ti pawr khawp a, "Nangman hruai mai ta che, ka nu a buai em kha, lo inbuaipui rawh u," ka tih chuan, "Ka thinrim duh alawm," a rawn ti pawr leh hlur a, an hahthlak ṭhin. Ka pa zuin hi han huain han ngaihsak duh lo dawn ila a khawngaihthlak ve tho bawk si a, na a sawi hlek hi chuan kan chhung buai leh ṭhin a, ka pa phei hi chu a pangchang angreng a, ngaihthah ngawt theih a ni ngai lo.

"Jection te a ngai ang, a taksa a chak loh chuan drip te in lo khai dawn nia, pantop jection te pawh lo la rawh u, nangman lo va hruai rawh, tlangval i nih tawh kha," tiin ka nau chu ka han chah ve luam a, "Aw," bak hluka a tih hnuah phone a dah a, kan inbe tam lem lo a, kan inbiak chhun hi chuan ka pa chungchang bak kan sawi meuh lo. Pawisa an neih vak ka ring lo a, engmah pawh sawi lem loin ka nu account-ah ka neih ang ang chu ka thawn nghal a, ka battery chu a lo sen phut tawh. Lawma message lo awm chu ka hawng nghal a, ka haw hun tur min lo zawt hi a lo ni a, Puia haw tur kha ka zui ringawt a, a let leh tawhin ka ring lo a, Lawma chu Zohera ka inthlahtir loh chuan auto ka la mai tur thuin ka chhang ta bawk.

Vengsang lam ka thlen chuan khua a tlai ruih tawh a, kal pahin mi zawh tur ka zawng chho a, ka mi zawh ve te lah chuan, "Chho zel rawh, a la hla," ti maiin min chhang hlawm a, ka chho thui tawh khawp mai. Tlangzawl ka han thlen hnuah nu pakhat ka zawt leh a, a sawi kual nuai mai a, kawng peng a la tam hmel hle bawk.

Rei fe ka inzawn buai leh hnu chuan dawr pakhatah ka zawt leh a, pi Ringzuali te kawmchhak mai a lo ni a, an in min kawhhmuh chu a fal deuh nain a chung aṭang pawh chuan in lian leh ṭha ve tawk tak a ni. Sana han en leh tuma ka phone ka han phawrh chuan a lo eng thei tawh hlek lo. Hmanhmawh zetin kawtzawl awmna lam pan chuan ka chhuk a, a reh ṭha reih rawih khawp mai. Ka hmaa in ding chu ka han thlek vang vang a, tualah chuan motor ke hniak a awm phei zui a, an garage pawh ka va hmu nghal a, scooty leh car lian lem lo tak hi a ding a, motor hniak ka hmuh erawh a ke a len hmel deuh.

Ka kal phei zel a, in lam ka pan laichuan tukverh zawna mipa ṭhu chu ka va hmu pha, a tukkhum lam min chhawn zawngin a ṭhu a, zial a zu tih pawh ka va hmu thei. Chutia ka kal hnaih laichuan nula pakhat, kei aichuan a naupang deuh ang tihtur hi a rawn chhuak hlawl a, min hmu chu min rawn en deuh vang vang.

"In awm maw, bahkhawr ka rawn zawng a, khi laia dawr neitunu khian min lo kawhhmuh a," ka ti phei lang lang a, chutih laichuan tukverh zawna ṭhu pawh kha a rawn hawi ve a, kum 50 bawr vel, sa ṭha lam deuh a ni.

"Saw lai tuizem bulah sawn a awm ang," tiin nula chuan an in sir lam chu a kawk zauh a, kal pahin in chhung chu ka han thlek thuak a,  a chhung pawh a nawm hmel viau mai.

Tuizem bul aṭang chuan ka hmuh theih chin chu ka en kual thuak thuak a, an in chu an sakna a rei hmel tawh a, in hnuaia ban ril lawr te pawh a hlui hmel viau tawh. Bahkhawr ka pawh mawlh mawlh laichuan ṭawng thawm ka hria a, rei vak loah in neitupa kha a rawn chhuak a, min rawn enzui a tum ni ngei tur a ni ka lam pan chuan a rawn kal a. "Lak tur a awm em?" a rawn ti chu nuisang chungin ka lo en. 

"A lian vak lo a, ka duh tam lem lo," tih pah chuan ka lak zawm mawlh mawlh a, a hla aṭang kha chuan in neitupa chu sa ṭha lam deuh niin ka hria a, han en hnaih chuan a vung a ang zawk mah a ni. A dul a kiar a, a biang a puarin a mawng a zuih lek lek a, zu a in nasa ve hle tih a hriat theih.

"Eng tur nge ni a?" min rawn lakpui a tum nge ni a rawn kun hniam a, tuizem sira ṭo te chu a rawn pawt ve mawlh mawlh a, "Baia thlak tur," tiin ka chhang ve mai bawk.

"Ka va hmu ngai lo che ve, kan veng mi i ni lo em ni?" tih leh a thil ken laichu min pek pek a rual a, "Ṭhiante inah chaw ka rawn ei a, khi lai lawkah khian," ka'n han ti leh thawr a, a awih aniang a bu deuh nghat a, mi pawh a en zui lem lo.

"Kawmthlang lamah khuan a lian deuh chu a awm ang," a tih chuan ka ding nghal vut a, "A ni maw, ka zuk en teh ang," tih leh kal ka rual. Ka chhuk chu min rawn zui ve ta zel a, pawi ka ti lem lo khawp mai.

Huan lamah chuan thlai an lo ching nual a, a thlang deuhah balhla kung te pawh a awm a, bahkhawr leh pudina tih angreng a tam viau mai. "Huan in va nei nuam ve, in in awmna lai hi a reh nuam bawk si," tih pah chuan ka va melh zauh a, "Chuti maw," tih zawngin min chhang a.

"In veng hi ka rawn kal khât lutuka, ka rin aiin a lo nuam daih," ka'n ti leh hram a, ka lam rawn hawi pah chuan, "Kawng chhuk chho a tam nain kan in hmun hi a rem hlawm asin, huan te hi kan nei fur hlawm a, veng thlangah rawn chhuk zen hi kan peih si lo a, dam chuan kumin chu thlai ka ching ang keipawh, ka damsam lo deuh reng hian alawm min tibuai ṭhin," a ti ve nuah nuah a.

"I eng nge na a?" ka tih chuan, "Ka nerve a ṭha lo rei tawh," a ti ve vat a, a zuin nasat vang a nih hmel.

"Ran te in vulh lo a ni, vawk leh ar vulh nan a rem em mai," ka tih chuan a lo nui tut tut a, "Kan vulh ṭhin alawm; mahse, a chaw zawn hi a buaithlak lutuka, ka nula lah khian lehkha a la zir a, kannu lah rin theih tak tak a ni lo a," a ti ve leh luam a.

"Engzat nge cheng che u a?" tiin ka lo zawt leh vat.

"Kan nupa leh kan fanu nen pathum kan ni mai,"

"In fanu chu khawdangah em ni a zir?"

"Aw, aizawl lamah college a kal a, ripans-ah khuan a nia, a hautak khawp mai,"

"Anih chu maw le, in pem duh si lo em ni?" 

"Pem duh bik nang," a ti mai a, "Helamah hna nghet in nei nge?" ka tih leh chuan lu a thing nar nar a, an eizawn dan chu han zawh ka chak viau nain ka dilchhut lutuk dawnin ka hria, ka bahkhawr lak lah chu a tam mah mah tawh a, tawi khawmuan ka duh vangin pudina chu lak a phal leh phal loh te ka han zawt leh a, a lo phal nasa mai a, ka la zui mawlh mawlh.

Thil zawh leh tur ka ngaihtuah lai tak chuan, "Tikhan lo la rawh, ka chhohsan ang che," a ti ta mai a, lo hnial ṭalh chi a ni lo.

"Ka lo chho nghal dawn keipawh, tlem ka'n lak belh lawk," tiin pudina chu ka pawt sawk sawk a, a kal liam hnu chuan ka chho ve nghal thuai a, an ina luh kher chu a ni ka la duh ni. Chawei an siam niin ka hria, khua chu a thim chulh tawh a, ka haw a hun hle tawh. Kawngka ka va kik chuan nutling aw hian min lo chhang a, ka han hawng chu min lo melh hû hlawm.

"Tui ka lo in lawk," tiin ka'n nui lui deuh sang a, "Lo in rawh," an nula bawk chuan tiin filter lam min kawhhmuh a, an nu ber chuan mi a en zui lem lo naa kei erawh chuan ka en chîk viau a ni. Pi Lalpuii aichuan a naupang zawk tih ka hre tawh a; mahse, a lang upa zawk viau lawi a, a sam te chu a ṭuak var vuk mai. A inchei ṭawp angreng a, an in pawh chu bungrua an neih ṭhat ang aiin a felfai lo a, ui rim leh zu ṭhing rim a nam deuh huam a ni. Tui in paha ka va hawi laichuan in neitunu chawei siam chu a kal pai deuh khet khet a, ruih a nei tih ka hai lo, an fanu pawh chuan a ngaithei vak lo aniang a nu plate ken lai chu a chhuh rawk a, "Lo ṭhu mai mai teh," a ti deuh hlak a, in neitupa a rawn hawi avangin ka hawi sawn rang viau bawk.

"Tute inah maw chaw i ei dawn?" a rawn tih chuan ka inher hma hmain ka'n nui lui leh sang a, a lam hawia nuih pah chuan, "Ka ṭhiannu te inah, ka kal mai ang aw, hei hi an lo la nghak a, ka lawm lutuk ania," ka ti nghal sawk sawk a, min biak leh hman hlauin ka chhuak rawk rawk a ni ber.

Kawngkhar chu nghet thei ang berin ka khar a, kawt zawl chanve vel zet chu ring thei ang berin ka pen phei bawk. Chumi hnu chuan ka'n ding leh deuh vang vang a, min rawn en zui lo niin ka hria. Chutah, thawm dim thei ang ber chuan ka pen phei leh ṭhem ṭhem a, an kawngkhar bul ka thlen laichuan ka thaw mang meuh lo. Eng emaw an sawi chu ka hre hman thuak a, "Zawt chiang rawh, a tu zawk zawk pawh zawt la a pawi hleinem, an pahnih khan hrilh ve ve zawk la," ti tu chu in neitupa a ni.

"U Muana rawn sawi a ni sia, amah hrilh a ṭha zawk ang," in neitunuin a tih laiin, "Annu kha a pawk daih zawk alawm, a la hriat miah loh thil i hrilh phei chuan pawisa a dil tam theih ang," mipa aw chuan a ti leh a, ka man deuh riai ruaiin ka hria. Mahse, hriatthiam loh ka nei tlat.

"Engtin nge ka va sawi ang?" pi Ringzuali'n a tih leh chuan beng dawh hnai meuhin ka ngaithla a, "I nula sawi kha a lo kal va ti tawp rawh," an pa chuan a lo ti a, ngaihsam tih hriat fe mai chuan, "Pitar pawh chu zep nei loin hrilh vek la, lungte pakhatin sava pahnih i vawm thla mai dawn alawm, dawt i sawi dawn pawh a ni hleinem," a lo ti zuah zuah a, kei chu ka lo ṭhen sawk, a tu zawk hi nge tiin rilru ka lo seng buai kha a nia, 'A tu ve ve pawh' tih chhanna ka hmu ta thung a, ka ṭhelh thui hman ṭep a ni.

"U Muana hi chu pawisa dil pawh a nuam tawh lo, an nu hnenah ka sawi vek tawh bawk si a, ka hrilh anga engmah ka dil lo ang, U Lalpuii a hausa tho alawm, Tluangtei pawisa ken tur tlem azawng leh vawk note dil ila a ṭha ang," a tih leh laia pi Ringzuali aw chu rui phur aw a ni. "Ei mai mai teh u, birthday lawmnaah kal ka ngai ka tih kha," an nulain a lo tih takah chuan an phul leh hlut a, an sawi zui ta lo bawk nen keipawh chu ka inher a, rilru buai deuh chungin an compound chu ka chhuahsan ta bawk.

Khua chu a thim fel tawh a, ka phone lah a thi hmiah tawh mai si a, Lawmsanga te chhung chu an lo buai tawh ngawtin ka ring. Let leh chi ka ni angem tih mawlh chuan rilru a kap a, pu Muana chuan mi a ringhlel tih a chiang vek tawh a, min lo en thla reng tawh anih ka ring. Helai hi ka thleng dawn tih hriain ka kal tur thu pawh a lo hrilh lawk diam a, Lawma'n min puih theih chu ring mahila a pa chungchanga thil hi hre ta se ka lam a ṭang duh angem tih chu ka buaina a ni, ka bum hmasa anih loh chuan min phatsan duh maithei.

Auto hman tur ka hmuh mai loh vangin kein kawn lam ka pan a, tum loh deuhin dawr pakhatah pi Julie ka va hmu hlawl. Min lo hmu hmasa a, hnung lam aṭangin min rawn au lauh. "I pi i rawn hruai dawn em ni?" tia min zawh chuan ka hrethiam zan lo. "A la haw lo em ni?" ka ti let hû a. "Hotel-ah a la awm reng, a rui nawi deuh a," a tih chuan tunge awmpui ka zawt leh a, "Anthonya," tiin min chhang a, Zohera chu hotel-ah a kal lo anih hmel.

"Thil sawi dun lawk teh ang," tiin min kalpui dawt dawt a, "Wine chu i nei dawn hnai tawh em, engtia rawn lak nge i tum, engzat vel nge awm thei dawn?" tih angreng chu min zawt luam a, ka neih vat tur thu bak chu engmah ka sawi thei rih lo, ka nei thei dawn em tih pawh ka chiang tawh lo hle a, chu erawh ka hrilh duh lo thung.

"Nu Nguri chu a chatthla em?" beisei nei fea ka tih chuan, "Han en ila," tiin hotel lamah min chhohpui a, lut duh loin pawnah ka lo nghak thung. A han rei reuh khawp a, darkar chanve dawn chu ka nghak awm e. A rawn chhuak leh lah chuan, "A ṭawng bawrh bawrh a, haw a la tum lo aniang, kan nau pakhat a nghak deuh tlat a," a rawn ti a, Jeminai kuta innghah mai loh chu duhthlan tur dang a awm lo. Kal mai tuma ka inher tawh laichuan car pakhat lo tlan chho ka zuk hmu a, hmanhmawh lutukin hotel chhung lam ka pan rawk rawk. Counter-a dawhkan phenah chuan ka va biru a, pi Julie chuan a lo hrethiam ve mai aniang ka sira chair-ah chuan a rawn ṭhu a, pu Muana lo lut chu a lo be zung zung.

"Khawiah nge a awm?" bung fea pu Muana'n a tih chuan, "Ka'n koh tir ange lo nghak rawh, amaha scooty khalh haw a hreh deuh a," tiin pi Julie chuan awki dam diai hian a chhang a, a naute zing ami koin nu Nguri chu a pa lo thlen tawh thu hrilh turin a ti zui bawk.

Pu Muana chu a kalsawnin ka hria, chutih laichuan ka bula ding chu a rawn hawi a, "An awm rei lo ang," a rawn ti sur sur a, kawngka lam a melh vangin pu Muana chu kawngka bulah a ding a nih hmel.

Rei vak loah chuan a ṭawng thawm ka hre leh a, "Nguri ngaihzawng chu tu maw ni a?" nelawm loh fahran hian a rawn ti leh. "Ngaihzawng han tih tlak pawh a ni chiah lo, a lo len changa card a kelhpui ṭhin a ni mah zawk," pi Julie chuan a ti leh mai a, pakhat chuan a awih vak lo aniang, "Ka hre ve reng alawm maw le," a lo ti let hluk a, chutih laichuan midang ke pen thawm a rawn awm a, "Hruai ka ngai hleinem, engah nge i lo kal duh kher," ti tu chu nu Nguri a ni.

"Sana en ta che, haw loh hun a ni tawh em ni?" a pain a tih pawh chuan, "Ka duh hunah ka rawn haw ve mai ang chu, i lo khu ruai zel mai," tham lo zet hian a ti a, pi Julie chu a be zui bawk.

Rei an inbe lo a, garage-a scooty a dah thu a hrilh a, "A lam tur ka rawn tir mai ang, lo awm rih rawh se," a tih hnuah an pafa chuan an inzui chhuak a, pu Muana chu a fanu lam tur chauha lo kal anih hmel e.

"I va hlau ve, in inhre ṭha viau turah ka ngai asin," a rawn tih chuan ka chhang lem lo. "Wine kha zawng ve an awm, tute nge an nih i rin?" ka han tih chuan a meng tal tap a,  va ṭhuthnaih sauh pah chuan, "A siamdan an zawng bawk," ka tih zawm leh a.

"Engtin nge i hriat, farm-ah lo kal an awm em ni?" a ti phawk hru a.

"Aih, mi sawi ruk ka hria a, hmannia an makpa thihna pawh kha he wine siamdan vang hi niin an sawi a," ka tih leh chuan a thil hriatsa hrilh hi ka ang ta deuhin ka hria, a nui lo a, a inngaihtuah ngun hmel khawp mai.

"Nguri pasal khan tute emaw hnenah hralh a tum tih chu ka hria a , nula nen khan an inthurual bawk a, kan hnenah min pe mai sela chuan an heti lo tur," a ti chhuak halh a. 

"In indawr tawh em ni?" lu a bu zauh. "Headmaster nen chuan maw?" tiin ka lo zawt leh.

"Aih, nula zawk kha kan nau ania," a ti ta a, "Engtia in nau nge?" ka tih laia ka aw chu a zawi hle a ni.

"Naute han tihah kan mi chhawr lai a ni mah, ka ṭhiannu min hmelhriattir a nia, Headmaster Roliana nen khan an innela, a lo hmin theih nana ngaizawng der turin ka ti alawm, rin aiin kha nula khan pawisa a lo duh a, ka tifuh ta vak lo a ni," a ti hlak hlak a. "Pawisa pe tam thei deuh tu tur hriat an nei a ni maw?" ka tih chuan, "Anih pawh aniang, wine chungchang hre ve tu ka hmelhriatte hi chu an nih loh hmel viau a, a hretu dang an awm anih ka ring, Roliana khan aizawl lamah eng eng emaw chu a ti ru ṭhin a, kan nula pawh kha a thlem thlu a ni ber, farm aṭangin a siamdan kha a ru chhuak a, Nguri pa hian a hrechhuakin a umzui anih te ka ring bawk a," a ti leh luam a.

"Wine chu engtiang chiahin nge a thawh a, engvanga inchuh nge in nih?" ka tih chuan nuihza deuh hmel a pu.

"Damdawi ṭha deuh mai ania, hmannia i lo ken kha chu siam danglam hnu anih kha, ka in hmasak ṭuma a tui dan nen pawh a inang tawh lo. Nguri pa khan fa nei thei lo nu pathum teah enchhinna a nei a, thla tam pawh a ral hmain nau an pai a, hmeichhe thi hul tawhte pawn an ngeih khawp mai, tisa chakna a chawk tho thei ti ila i hrethiam ber ang. Mahse, hmannia min pek kha chu siam danglam a ni tawh a, a thawhdan a dang daih, damdawi anga hman chi pawh a ni chiah tawh lo," nui pat pat chungin a ti a, "I la duh tho bawk sia?" hrethiam lo fea ka tih chuan, "Ka duh zual sauh, a lêtin a thawk chak alawm," a ti sam et a, a ni ngei ang, a mamawhna kha damdawi atan a ni lo miau a.

A naute chu thingpui la turin a tir a, ka awmdan tur ka la ngaihtuah buai deuh bawk nen ka ṭhu ve leh rih a, rilṭam pawh ka lo hre chang meuh lo a ni. Kan titi laichuan a hnena hnathawk turin mi a sawm mawlh mawlh a, "Wine i lak hnu chuan i tan awm reng a chi loh ang, hetah lo thawk la, anih loh pawhin aizawla ka u hotel-ah i thawk dawn nia, ka dilsak ang che," a ti siam siam a, ka nuihsan mai mai thung.

"Farm-ah te chuan i hlawh a tam awm si lo, pawisa thawhchhuah dan hlawk deuh deuh ka hria a nia," Ka lo nui hak a, "Inzawrh ka tum lo," ka tih chuan a ner ve sak.

"MR hna i thawk duh em tih ka tum zawk a,"  a ti chu hrethiam lo fein ka melh a, "Company damdawi ṭhate i semkual anga,  chumi pah chuan thil dang pawh i chalai thei alawm, silai leh damdawi.." ka lo meng deuh kawk mai. "I lo ngaihtuah dawn nia, i zeihawi em a i thawh chi a nih ka ring," a ti zui a, ka thil ngaihven zawng anih loh vang aniang han sawi zui vak tur pawh ka hre lo.

Veroi chungchang chu ka zawt leh a, "Nu Nguri pasal nen khan an inngaizawng tak tak a ni lo maw?" ka ti a, eng emaw sawi belh tur a neih ka rin vang a ni.

"Ngaizawng lo ang, kan nulaté kha chuan pawisa chiah alawm a ngaihtuah, ngaihzawng a nei bawk a; mahse, 'Ka dam rei ka ring lo a, ka thih hma hian ka chhungte tan pawisa tam deuh thawhchhuah ka duh,' a ti ṭhin a, a cancer em mawni te ka ti mai mai, damdawi a khawih ve nasa a, a mum han bar ringawt kha a duhtawk si lo a, a ban velah inchiuna hnuhma a awm a hlauh vangin a keah kan vihsak ṭhin alawm," a ti zui duah a, han zawh belh zel pawh ka chak tawh lo, Veroi chungchang hi chu hriat belh tawh lo mai ka duh a ni.

Hotel aṭanga ka chhuah chuan dar 8 a la ri lo deuh. Auto lain Zohera in luah lam ka pan a; mahse, ka va thlen chuan kawngka a lo inkalh ṭhiap a, hotel-ah a awm lo tih ka hriat vangin a lo let har lo turah ka ngai a, kawngkhar bulah chuan ṭhuin ka nghak ta rih. Ka nghak rei khawp mai, call turin ka phone lah chu a nung thei eih si lo. Tlangveng lama ka thlen in hluite kha ka pan mai dawn em mawni ka ti ru neuh neuh a; mahse, Zohera nghah chu a ṭha zawkin ka hria, thil sawi dun ngai a tam lutuk tlat.

Chutia kawngkhar nghenga ka ṭhu chu ka lo muthlu zui daih mai a, bike thawmah ka harh hlawl. Rei loah step-a lo pen thla thawm ka hria a, ka ding fel chiah tihah Zoherliana a rawn lang hlawl a, ka lo thawk huai laiin a rawn kal thawr thawr a, "Engvangin nge i biak theih loh?" a rawn ti vin hlur.

"Ka battery a low a, a thi daih alawm,"

"Mawl em em lutuk, dar 11 a rik tawh hi i hria em?"

"Min zawng kual em ni a?"

"Zawng ang chu mawle, khawpum hi vawi thum vel ka tlan chhuak tih hre rawh, farm-ah i haw bawk si lo," 

"Vawiin chu tum angin ka awm thei lo alawm, keipawn ka nghak rei lutuk che," 

"I phone thih hma te pawhin chanchin sawi ve tur alawm," a'n ti leh hram a, chumi hnuah kawngkhar chu a hawng a, kan inzui lut pawh chu min la melh rum khâ khâ reng.

"Thil hriat chhuah ka nei nual.." ka ti chu min zawh a chak loh hmel khawp mai.

"I hre chak vak nange?" phawk lek leka ka tih chuan, "Sawi rawh," a lo ti bawl a, ka phone phawrin, "Tinung phawt teh ang, khawiah nge i charger?" tih leh pindan lam pan ka rual a. Khum sir chair-a a charger dah chu va hman ka tum ve ngawt a, iphone charger a lo ni si, ka charger ka keng der mai si lo. Chutih laichuan phone a hmang thawm ka hria a, ka va let leh rawk rawk.

"Ka hmu tawh, ka zawn chhungin kan in luahah a lo va kal alawm," a tih laichuan, "Lawma hrilh turin lo ti rawh, zanin ka haw hman dawn lo, a bak chu ka hrilhfiah mai ang, lo mangang suh se," ka lo ti ve zung zung a, Zohera lah chuan, "Pakhat kha lo hrilh ve rawh," tih tlawng a sawi a, a duhtawk em em ringawt.

"Fimkhur rawh aw, an man chhuak che ange," a tih leh vang chuan, "Chahbi chu a la em ni?" ka lo ti hlut a, chupa pui chu a inher vei hmak a, "Kan sawi ho leh dawn nia," tiin phone a dah zui daih mai.

Ka lam a rawn hawi chu zawhna ngah zet hian ka lo en. "Chahbi chu a la dawn, vawiina i thil tih chu sawi phawt teh, i awmdan hi a lawmawm vak loh ania, " a ti vin leh khar khar a, kan thiltih laia buaina siamtu zawk hi ka angin ka hria, a mi endan vang chuan ka vui ru hle zawk a ni.

"Sawi ta che.." Thawk ka lo la hluai. 

"Chahbi chu a la dawn anih chuan ka tel loa in tih a ngai maithei," 

"Eng nge a awmzia?"

"Rinhlelh ka nia, pu Muana sawn min enthla mek, a nupui pawh sawn min hre thuai ang,"

"Ka rindan vel anih chu, chuvang em ni i haw loh?"

"Ni e, ka chhuahsan nghal pawh a ngai maithei, Jeminai leh Lawmsanga'n min pui zel thei anih chuan heta ṭangin tihdan tur ka hrilh mai a ngai ang," 

"I inthiarfihlim san ringawt dawn a maw, eng nge i thil hriat thar chu ni a?" a tih chuan ka ṭawng mai lo, ka en vang vang a, a thil sawi hmasak dan chu ka helh deuh tlat.

"Farm chhuahsan turin min duh a ni lawm ni?" lawmlo awka ka tilang duh lo naa ka lawm zan lo thung.

"Thil tih tur in neih vangin Jeminai pawh i ko haw a, i awm loh chuan buaina an tawk thei asin, anni ringawt chu i ring ngam dawn em ni?" a tih chuan awmze dang a nei tlat tawh, Minai a ngaihtuah tih a haitheih loh a, hriatthiam sak pawh a ṭul tih ka hria.

"Tihdan tur ka hre mai ang, kha lam kha chu ngaihtuah hah suh, vawiina ka thil hriat chu farm neitute nupa chungchang a nia, pawl thumna ka tihte kha pi Lalpuii leh a pasal hlui an nih hmel, wine kan neih hnua kan kohchhuah dan tur pawh ka hre tawh.." tih pahin dawhkan lam ka pan a, stool chu lain ka ṭhu zui a, muangchanga a rawn ṭhu chu ka lo en ran bawk.

"A pasal hlui chu a la dam em ni?" a ti zawi sup a, "Ka beisei," ka tih chuan a ner nang.

"Mahse, pawl thumnaah hian pitar saw a tel tih ka chiang," ka ti leh a, min en ran mai.

"A pasal hlui pu Biakliana kha wine siamtu a nia, damdawi leh wine siam thiam tak a ni a, a thil siamdan te chu ziakin a dah ṭhin bawk. Tuna farm neitupa pu Muana sawn a thiam thil chu a chhuhsak niin a lang a, pu Biakliana lehkhabu hi an inchuh a ang. A puzawn nen khan a inthurual ṭhin niin ka hre bawk a, tichuan pi Lalpuii pasal kha dik lo taka puhin farm aṭangin an um chhuak a, a dinhmun chu pu Muana sawn a chang zui ta bawk a, an puh dan i hre duh em?" a lo bu zauh a, a lam hawiin ka ṭhu rem sawt sawt.

"An hnathawk hmeichhe pakhatin pu Biakliana chu pawngsualtuah a puh a, pi Lalpuii pa khan pawisain a ti lungawi zui a; mahse, chu chu pu Biaklianate nupa kar tihchhiat nan leh pi Lalpuii rilru tihhel nana an hmanrua chauh a ni. Tichuan an nupa kar pawh chu a ṭha lo zui ta reng a, pu Biakliana a tlanbo hnuah pu Muana nen an innei leh ta bawk..." a chal a ti chuar tap a, a ngaihtuah ve nasa khawp mai. 

"A haw viau dawn anih hmel bawk si a," a tih chuan kut ka'n beng thut pek a, a lo phu zuk. "Eng nge?" ban charh hian a ti a, ka lo nui sak thung.

"A tir chuan a haw ngei ang, chuvanga pasal dang nei leh thei mai pawh anih ka ring. A pasal pahnihna nen saw fate pawh an nei dun a, nupa pangngai tak an ni chho a; mahse, chumi hnu chuan thil thleng dang a awm leh a, pi Lalpuii sawn a pa leh a pasalin an bum tih a hrechhuak taa, a pasal hlui puh chhetu hmeichhia kha a be bawk a, tuna a pasal pawmlai saw a huat phah ta em em a ni, lehkhathawn pawh a fate tan a ziah nghe nghe kha, a pasal hlui nen pawh an inbe pawp ngeiin ka ring." 

"A kual nuai mai, chu hmeichhia chuan thudik a lo hrilh ve mai tihna em ni a?" a tih chuan, "Teuh nang, pawisain a lei maw le, a pasalin pawisa hmanga a dawt sawi kha pawisa hmang bawkin a lei let leh tihna anih chu," A hrethiam ta aniang a ner sak a, "Chu nu chu vawiin khan i hmu a ni maw?" a ti zui a, ka lo bu ve zauh.

"Anih leh tualthattu chu tunge ni thei ta ang?" 

"Tunge ni lo thei ang tih lam ka lo ngaihtuah zawk a,"

"Tunge ni lo theia i hriat chu?"

"Hotel lam saw, an chet dan a mawlmang lutuk a, kei ang pawh min ring ngam mai a, lamṭang an duhtui lem lo. Ṭhianṭha in ei tum ru reng ang deuh hi an ni mai, a pawl thumna ka tihte nen hian an inhre pawh lo a ang bawk. Mahse, inzawmna pakhat chu an nei a, miss Mathani kha.."

"Nitak, pawl thumnate nen khan an inbe pawp ṭhin kha ania.." a lo ti ve vat a, "Mahse, Headmaster pawh khan a hre ve tho maithei, formula kha tute emaw hnena pek an tum kha a nia," ka ti leh a, "Anih Veroi ve hi?" a tih chuan ka sawi tim ru khawp mai.

"Hotel lam tana thawk a ni a, pawisa tam zawkna lamah a peng ta anih hmel," ka aw chu zawi sep sawp tak a ni.

"Farm lam leh pitari ex te lam chu rinhlelh ber an ni tawh a ni maw, a tu zawk nge i rin zawk?" tiin min zawt leh a, ka sawi mai thei lo, "Rindan nghet neih a la har khawp mai, wine chu ru phawt ila ka hrechhuak theiin ka ring?" ka ti a, midang hriat a rem rih loh thu ka hrilh zui bawk.

"Wine chu engtia tih nge i tum?" a tih leh chuan, "Kan ru tih an hriat a ngai dawn a, chumi hma chuan tlanchhiat inringa kan awm a ngai ang," ka ti a, a hmel ka han en chian chuan a ngaihdan a ni vak loin ka hria. "Keiniin kan ru dawn si lo a?" a ti ta reng a, chu a zawhna chu chhan ka duh rih lo, ngun zawka ngaihtuah leh phawt ka duh a ni.

Chaw ka la ei lo ka tih vangin artui min han leisak a, plate khat lawihin a han lei. Chaw chhumsa pawh a lo awm lo a, cooker-a chaw ṭhing awm chu zinga an chhum anih ka'n ring ringawt a, a lo nih loh palh chuan ka ei hreh ve tingtang dawn si a, ka zawt duh lem lo. "Ei ve leh la?" ka tih chuan lu min thinsanin pindan lamah a lut a, a va awm ta reng a, a khat tawkin a thawm ka hre leh ṭhin.

Chaw ka ei mawlh mawlh laia a lo chhuak chuan, "Khumah mu la, ṭhutthlengah hian ka mu mai ang," a rawn ti a, mawihawihah "A hrehawm lo ang maw, ka lo mu zawk dawn em ni," te chu ka han ti ve bawk a, ka hnial lo hle thung.

"Zingah ka ṭhianpa a lo haw dawn a, eirawngbawl hmanin i tho dawn nia," a tih chuan ka nuih ringawt, chawhmeh leisa lah chu alu leh artui chiah an nei a, engtin nge maw a lo khawsak ṭhin ni.

Tawngchham deuh hian an ṭhutthleng neih chhunah chuan a mu a, puan a sin hlun a, phone a khawih mial mial bawk. "I patea chu eng nge a an tawh?" ka tih chuan, "A zia rih, damdawiin aṭangin an chhuak tawh," a ti ve mai a. "I nuin a ngaihtuah tawh ngawt ang che a," ka ti chu min chhang lem lo, mi biak lai nei niawm tak chuan a phone a la hmet melh melh reng.

Dawhkan ka thawhsan laichuan, "Ruatfela a captain tawh a, kei chu min ban fel der," a rawn ti phawng a. "Team dang i zawm mai dawn alawm, sawm tu che i ngah a ni lawm ni?" ka ti chu min chhang leh tawh lo. Ka va kal hnaih lai pawh chuan a phone ngawt a bih a, "Minai kha biak ka duh asin," ka ti chu a rawn hawi rang khawp mai.

"Eng atan nge i tih?"

"Naktuk zan atan lo inring se ka duh a, a theih chuan chhunah lo chhuak bawk sela,"

"Be rawh," tih pahin a phone a rawn lek a, "Message khan hrilh mai rawh," tiin pindan lam ka pan san a, ka va luh chuan ka mutna tur a lo siam fel diam tawh. Current ka off a, ka mu nghal hlun a, pawn lamah chuan thla a êng iar a, a rehin a khawhar thlak reuh khawp mai.

A khattawkin Zohera chu ka va be leh ṭhin a, pu Biakliana wine siamtu a lo ni daih chu mak ka tih thu ka hrilh a, ani chuan, "Ama thilsiam chhuah ngei nisi, a siamdan inziahna a zawng chu a mak zawk daih alawm," tiin min rawn chhang a, chu chuan ngaihtuahna a ti kal thui khawp mai. Pu Lianmawia fanuin min hrilh laipawh khan mak ka ti deuh a, a hriatna a ṭha vak lo nge ni tihte chu rilruah a awm a, pu Liana fanu lah khan fel a tiin a fak em em mai bawk kha a ni a, tualthattu nge mi pawisawi lo, midang sual rah tuartu a nih zawk ang tih chu zawhna lian tak a ni.

Ka muhil chu mipa ṭawng lung lung thawmah ka harh hlawl. Ka ṭhut chhuah rual chuan, "I bialnu dang a ni lo maw, nang hi lerh loh hmel deuhin i awm a, 'Hmeichhe cher ka duh lo' te i ti vel a, ahmaa mi pawh kha a cher leh hle si," mipa aw hian a ti bul bul a, rei vak loah pindan kawngkhar inhawng thawm ka hria a, min rawn thlek niin ka hria. Ka muhil der tlat a, "A va chhiat loh hmel reuh e," zawi tea a tih ri chu ka hre pha.

Chumi hnu chuan percel chungchang an sawi a, "VIP motor-ah a thawn theih dawn a,  kar leh lamah a tiin ka hria," tih angreng te, nizan lama nula pakhat OD an buaipui thute a ṭhianpa chuan a sawi bawrh bawrh a, rei vak loah Zohera a lo lut a, min rawn koh rual rualin ka ṭhu chhuak bawk. 

"Ka ṭhianpa a lo thleng tawh," 

 "Chahbi chu a la tawh em?" 

"La tawh,"

"Han call teh ka lo bia ang," ka ti chu chîk fe hian min en a, min hnial lo chuan a phone chu min rawn pe a, Jeminai number ka zawng chu ka hmu mai lo. "Engtin nge i save?" tiin ka han zawt leh rih. 

"Call list-ah khan en rawh, a tawpah 204 a awm," tiin a inher a, ka biak dan a hre leh duh si aniang a rawn inher leh vut. Ka bula a lo ṭhut laichuan phone ri chu ka ngaithla ran a, rei dawn a rik hnuah thophang aw zet hian a rawn chhang a, a la mu niawm tak a ni.

"Lawmsanga lo bia la, zaninah kan la chhuak dawn a, midang kha lo buaipui rawh se, nang chuan i ṭhiannu Azoi kha i lo sawm dawn nia, i chhungten min rinhlelh tawh avangin kei chu ka lo kal thei lo, gate chhakah khan kan lo nghak cheu anga, kan inhlan chhawng dawn nia," ka ti zung zung a, "I ti awmang lo em mai," a rawn ti thawr.

"Lawma chuan midang rilru a lo lakpen a ngai alawm, amah pawh ka hrilh dawn," ka tih leh laimek chuan, "Azoi a rintlak loh, pu Muana uite ania sin," a rawn ti bak hlar a, ka ring lem lo thung. 

"I ṭhian a nia, a pui duh mai ang che," ka tih pawh chuan, "A teuh lo em mai, ka ṭih nak alaiin, min man chhuah phah mai mai dawn," a ti leh hlak hlak a, "Sawm ringawt la a ni mai, nangmahin i ti vek duh zawk em ni?" ka ti pawr ve hlar a, Zohera lo kun hnai chu ka lo nam sawn rawk rawk.

"Min rawn vin khanglang suh aw," lehlam amiin a tih chuan ka han inbengdai leh rih.

"Min man chhuah a ngai a, Lawma nen chuan in tan hlauhawm a awm lo ang, Azoi kha a ṭangkai dawn, tu emaw hnena hrilh chhawng leh turin kan mamawh zawk," ka han ti dap dap a, ka han ṭawng dam ve tehlul nen, "Sawi chiang ta reng che," ṭeu zetin a rawn ti leh.

"Ka sawi chian chu..."

"Pu Muana hnenah a hrilh dawn a, min man chhuah chu eng nge a ṭangkaina tur awm?"

"Min man chhuak lo anih chuan awmzia a nei dawn hleinem, tu te emaw rawn chêt chhuah nana ru tur alawm kan nih,"

"Pu Muana'n a ringhlel che anih chuan keini pawh min hre vek tawh ang chu.."

"Kan tan hlauhawm se eng emaw a ti daih tawh ang, a fapa pawh a tel ve alawm, i ṭhiannu kha chuan a nupui zawk kha a hrilh dawn a, chu tak chu ania i sawm a ngaih chhan," ka sawi laichuan ka bula ṭhu chuan eng emaw rawn sawi a tum zuau a, ka kutin ka lo khap vut a, zawhna a ngah hmel tawh viau a ni.

Lehlam a mi chuan, "Azoi chuan pu Muana zawk a hrilh ang, pi Lalpuii a hrilh ka ring lo," a rawn ti leh a, sawifiah thui a ngai ṭhin lutuk hi a buaithlak a ni, a pa chanchin han hrilh duah lah chu a nuam bik si lo.

"Pi Lalpuii pasal hlui leh i ṭhiannu pa kha inṭhianṭha deuh an nia, pu Muana nen pawh an inpawh loh bik kha.." ka tih chuan a ngaihtuah ve nge ni a ngawi vang vang a, "Engtin nge i hriat?" a rawn tih laichuan mak ti aw ka hre tel.

"Ka hrethiam ve tawp, kan inhrilh ṭha leh dawn nia, Lawma number lo thawn lawk teh," tiin ka phone thih thute chu ka hrilh zung zung a, "Ka rawn chhuak dawn, hmaichhanah kan sawi ṭha dawn nia," a ti chu ka hnial duh lem lo, kan inbiak zawh hnu chuan Zohera'n zawhna min zawt mawlh mawlh mai.

"Azoi pa khan a banah tattoo a nei a, bawng lu lem, vawihnih chhut nawn a nia, mawi vak loa an chhutsak hnuah a siamṭhat nan an chhu nawn leh, kan len hmasak ber zan khan ka hmu tawh a, a rawng pawh a pawl a, battery hmanga chhut a ni, a chhut nawnna chu a hriau zum pawh a lian deuh. Pu Biakliana khan tattoo a chhu ṭhin tih ka hria a, Azoi pa nen khan ṭhian ṭha tak an nih hmel. Hnathawk saw laia chengve te a ngainat viau laiin pu Muana khan a kawm fal ve ngai lo bawk a, ar huana chaw an eikhawm chang pawhin ani kha chu a tel ve ngai lo, pi Lalpuii thil hriat chhuah leh theih dan ka han ngaihtuah hian hepa hi a pawimawh dawn hlein ka hre bawk, hun la nei deuh ila chu titi pui a ṭha asin maw le," ka ti deuh vang vang a. Zoa lah chuan, "I zeldin nasa lutuka, engmah ka hrethiam tawh lo," a ti teh thlawt a, keipawh hian hriatthiam har tih ka ngah lutuk tlat, thil awmdan nia kan ngaihte a inthlak leh thut thut zel si a, ka remkhawm sual ang tih pawh ka hlau khawp mai.

"Jeminai pa chungchang hi ka ngaihtuah mai mai a, pu Muana kutke ang takin a lang naa a thil pawimawh a ruksak leh bawk si a, chuta karah pu Muana hmelma nia langte nen inkungkaihna an nei zui a, a tir aṭanga pu Muana lam ṭang miah lo leh bum tum ran angin han ngaihtuah ve chhin teh. Azoi te pafa khan an fakin an ui em em a, a fanu damdawiina a awm pawhin Azoi kha a kalpui tir niawm tak a ni, an inkungkaih kual dan chu i hrethiam thei em? Tuna ka rindan hi lo dik ta se chuan Jeminai pa hi pawl thumna a ni dawn tihna anih chu," Engtin nge a ngaih hriat tumin ka en ran a, a rilru a buai hmel viau.

"Thah a nih chhan a la hriat chuang loh," a lo ti bawl a, chu erawh ngaihdan a tam rih lutuka han phul pui hlut theih chi pawh a la awm lo, wine hian min kawhhmuh thei hlauh sela a lawmawm khawp ang, kan beisei neih chhun a ni rih.

"Thil thlen dan azir hian a chiang thei chauh ṭhin a, lo ngaichang zel phawt mai rawh," ka ti ta ngawt a, phone ka en leh chuan Jeminai message a lo awm vang tawh. Lawmsanga number chu ka call nghal a, a rawn chhang rang khawp mai. Zawhna min rawn zawt nghal mawlh mawlh a, keipawh chuan ka thiam ang tawkin ka han hrilhfiah a, pi Lalpuii chungchang leh nimin lama pi Ringzuali ka hmuh dan chanchinte a ni, ani hi chuan min hnial buai vak hi a nei ngai lo, "Buaina siam turin min duh a ni maw?" a rawn ti nghal chat a, "An rilru lakpen a ni mai, thil sual ti rawh ka ti kher lo che ania," ka han ti ve luam a, a hrethiam hlein ka ring.

"Tihdan ka lo ngaihtuah dawn nia, an ringhlel tawh che anih chuan i lo haw loh chu a ṭha zawk ang, i bungrua hi engtin nge ni dawn?" a tih chuan, "Lo kawl rih mai rawh, hetah ka mamawh zualpui chu ka ngaihtuah thei mai ang," ka ti a, engtin nge ka awm lo chu chhuanlam a siam dawn ka zawt bawk.

"An hre tawh tho tho dawn che a, eng chhuanlam pawh siam ila an hmuh loh tura i awm kha a pawimawh ber, fimkhur viau ang che," a ti a, a aw aṭang chuan min ngaihtuah hle hian a hriat a, a hahdamthlak  angreng, a laka zep lah chu ka la nei ṭun a, hrilh theih pawh ka chak hle a ni, pu Muana hi a pa tih la hre lo ni ila chuan ka hrilh ngei ka ring.

Azoi chungchanga ka ruahman dan pawh chu ka han hrilh zawm a, "Pi Lalpuii nen chuan an inti ṭha viau alawm, i tifuh maithei. Mahse, chet tlai lutuk loh a ṭha ang, zan laiah hi chuan thawm a ring hma a, zantirah tih tum ang aw, i phone chu tihnun dan ngaihtuah rawh, chanchin kan inhrilh zung zung a ngai ang," a rawn ti ve duah a, charger leia ka chhuah tur thu ka hrilh hnuah kan inbiakna kan titawp a, Zohera chu chhuna min chhuah pui turin ka sawm zui bawk.

"Hetah i cheng dawn em ni?" a lo ti let hû a, "Khawiah nge cheng se min tih?" ka tih chuan dar a kan ûk a, min chhang lem lo.

"Thawmhnaw min lei phal angem?" 

"Lei a ngai ang chu, i hak lai bak i nei si lo va,"

"Ka lawm e aw," tiin ka'n nuih var var a, tawi tea min nuih let hnuah, "Eirawng va bawl rawh, ka tir char char dawn che," a'n ti zui nghat a, ka tho ve ta sawk sawk.

Anthonya khan min lo be hlut a, a dilchhutin zawhna a ngah ngang mai. Min lo hmu fo nge ni, "Ka hriat hnu i ang, khawiah emaw kan inhmu tawh lo maw?" a ti leh ṭhin a, "Ka hre lutuk che," ti maiin ka chhang a, min hmuhna a hrechhuak thei mai lo.

Thirbel lianah hlai deuhin artui ka kang a, ṭhenkhat ka chhum bawk a, Zohera'n vawksa rep a va lei leh avangin chaw kan ei har deuh thung. Tukṭhuan kan eifel hnu chuan kal chhuah mai ka rilruka; mahse, ka ṭhiana chuan a thawmhnaw bal suk tur a rawn la chhuak a, "Hna thawh hmaa hlawh lak loh tur," a ti deuh tlat a, pawisa ka hmansak dawn avangin ka tan hnial chi a ni lo.

Ka insuk zawh meuh chuan chawhnu lam a lo ni der tawh. Anthonya pawh chu chhuak loin a la awm ve reng a, "Thil tui deuh siam teh u, ril a ṭam leh tawh," a tih sek avangin alu chop siam ka rilruk a, chaw chhumna cooker-ah ka phit hluai mai. Titi pahin a pawlh turte kan siam a, alu pawh chu min khehpui ve thlap a, Anthonya chu tlangval ṭawng duh leh fiamthu thiam tak a ni, Veroi pawisa a bat dan te a sawi a, an card khelhnaah a hmang ral leh vek anih hmel.

"Min rulh a ngai ang," fiamthua ka tih chuan, "I ṭhianpa hian min ngaidam vek tawh," a ti sam et a, Zohera ka en chuan a lo nui ruh ruh.

Veroi ṭhian ve tho ka ni tih a hriat hnu chuan Veroi chu a han fak khawp a, "Damdawi khawih lo sela chuan nula fel deuh aniang, a rilru a ṭha a, a uikawm lo a, a hawihhawm bawk si," tih angreng a han sawi laichuan Zoa chu ka melh leh zauh ṭhin. Pakhat lah chuan Veroi luck thu te a sawi chho zel a, ka lo ip ru ṭhin khawp mai. Kan titi lakpen nan tiin "Kheh zo teh u, ka kut a na tawh," ka ti hlut a, Zoa lah chuan ka rilru a hrethiam aniang, "A sen vek tawh anih kha, tuiah va chiah rawh," a lo ti sawk sawk a, ka thawh hma hma chuan a tho a, no lianah tui a va suak a, dawhkanah min rawn chhawp sak a, ka zen laichu Anthonya chuan min lo melh kur.

"Nangni pahnih hi ṭhian ringawt in ni thei lo, in induh chiang?" tih pahin min melh tawn zuk zuk mai.

"A awihawm loh em mai, a bestfriend hi ka bialpa asin," ka lo ti hlak a, "A ruka induh in ni tal ang," pakhat chuan a la ti ṭalh a, Zoa lah pek chuan, "A naupan deuh laichuan min star ṭhin a, school-ah pawh min zui kual reng zel, a ṭhiante bula insawitheihnan te min hmang ṭhin," a lo ti pek a, awih lo fein ka va melh.

"I daw e..." ka ti chu, "Anih kha, Sangpuia kha rawn bawhkan lo sela chu min ngaizawngin ka ring tlat," a'n la tizui a, a uang mai mai tih hre chungin ka ngei tawk a tling hle. "Min lo ngaih melh chiang lutuk,  kha i rilru i rawn puang ania, i ngaihbel danah a hriat, " nui chunga ka tih laichuan, "Saw tunge.." ka epa ṭhu chuan a rawn ti hlut a, Zoa nen chuan ka hawi rual zawt a ni ber. 

Jeminai chu ngawirengin a lo lut a, "Nangmahin em ni?" ka tih chuan, "Tu nge i beisei?" bul zet hian a ti a, Zoa chu lawm loh hmel fein a melh bawk.

"Phone i va chhang thei lo ve," tih pah chuan Zohera sirah a rawn ṭhu a, "Pindanah ka dah a," tiin pakhat chuan a chhang ve mai a, Anthonya chuan eng nge a lo ngaihtuah ni min rawn mitmei zuk zuk a, "Ka bazar pui zawk mai ang che," a ti lehta nghal a, ka duh reng reng lo.

"Nakinah kan inbe dawn nia," tia Jeminai ka han be ve lah chu, "Ka lo kalchhan lo che, Lawma nen kan sawifel tawh," a lo ti tawl a, Zoa'n a nghawk zauhin ka hria.

Anthonyan alu a rawt zawh hnu chuan ka va kang a, kan ṭhiana chuan min rawn dinchilhin a la titi mawlh mawlh reng. Chutih laiin Zohera te pahnih erawh zawi te tein an inbia a, an inhnial emaw tih mai tur a ni. "Nula saw i ṭhian ve tho a ni em, an inngaihzawnna a la rei lo ti raw, an nufain Jda hi an atchilh tlut mai," ka bula ding chuan a rawn ti sur sur a, ka chhang duh lem lo.

"A nu wine rawn ken a in zan khan a fanu zawk saw a mutpui daih aniang," a rawn ti chiah chu ka melh nghal haw a, "Eng a?" phawk fein ka ti bawk.

"A tir chuan a sawi duh lo a; mahse, tu emaw chu a mutpui tih ka hria, a inthiam loh thu a sawi alawm, ngaihzawng a nei thut bawk a; mahse, a fuh thlawt alawm tiraw saw, sawtianga hmelṭha te chu.." kan piah lam hawiin a ti leh a, kei chu ka â chhulh mai hian ka hria, Zohera te ṭhu dun chu ka va thlek a, a dik thei lo, thil ni thei pawh a ni dawn em ni ka ti rilru a; mahse, ngaihṭhat lohna ka nei ta tlat...

Khami zan aṭanga Zohera mize danglam thut te, Jeminai nena an inkar kal chak lutuk te, Zoherliana thu pehhel leh inthiam loh hmel taka a ṭawng dante...awi aw...hepa hian eng thil nge maw tia a inhriat le, engmah lah chu ka hre ve reng reng lo a... 

Ka apron chu ka phelh sawk sawk a, "Lo kang rawh," tih leh Anthonya chu pek ka rual a, "Ka thiam hleinem," a ti chu ka ngaihsak zui tawh lo. Zohera te ṭhutna lam chu ka pan vut a, "Min lo zui teh," tih pahin Zoa kawr hnungah ka va pawt sawk. 

Jeminai lo ṭawng tum chu, "Nang chu lo awm rawh," ka ti chang leh bawl a, Zohera hrethiam lo hmel chu zaizira ka hrilh leh hnuah pindan lam ka pan zui a, "Eng nge a hriat a?" Jeminai a tih ri chu ka hre reng, ka sa pup pup mai hian ka hria, ka thinrim nge ka lungchhia pawh ka hrethiam chiah lo.

Rei vak loah Zohera chu a rawn lut a, min en dan ka hmuh chuan sawi hmasak tur ka hre lo, thawk ka'n la hmasa zet a, inpehruh ṭun chungin ka melh tlawk tlawk. "Eng nge ni?" zawi leh ngaihṭhat loh hmel fahran hian a ti a, "Hetah lo ṭhu teh," tiin khum lam ka pan leh rih.

Engmah sawi buai lo chuan a rawn kal a, a ṭhutfel rual rual chuan, "Saw nu saw, wine vang khan i mutpui em ni?" ka ti tawl mai. A hamhaih hmel chu en pawh a nuam lo, a rawn ding chu ka lo en kal a, "A dik a ni maw, engvangin nge min hrilh loh?" ka tih laia ka aw chu a sehchilh lek lek.

"Hria la eng nge i tih chuan ang?" a ti zawi sup a, ka lo thaw hawk..

"Hre tur ka ni alawm Zoa..."

"Ka tihsual a nia, ka chingfel mai ang, i tan buaina a awm dawn lo,"

"Ka hau che emaw i ti em ni.." ka vin deuh chiam a, "Ṭawng ring vak suh," a tih chuan insum a har takzet.

"Hetiang hi a thleng dawn tih hria ila chuan ka tihtir miah lo ang che, engah nge min hrilh mai loh, a tirte khan sawi ni la chuan tihdan dangte pawh kan zawng mai dawn a, i zep rei lutuka, tunah ka hre ve leh chiah bawk si.." Beidawn hmel zet hian min en a, min chhan let tum hmel pawh a pu lo, keichuan a nun tichhiaa, a zalenna chhuhsak ang maiin ka inngai a ni.

"Keimah vang vek a ni, tun aṭang chuan buaina ka siam tawh lo ang che, ani pawh saw ka va hrilhfiah nghal ange," tia kal mai ka tum chu ka banah a rawn man a, min pawt let rawk a, lawm lo hmel ka hmu zui bawk.

"Engkim hi nangmah vanga ti ah min ngai suh, ngaihzawng ka nei tih i hriat kha, khami zana thil thleng kha chu chetsual palh a nia, tunah chuan ka duh reng vang a ni tawh," zawi leh fiah zet hian a ti a, ka hrethiam naa ka hriatthiam duh zawng a ni lo.

"I inthiam loh vang mai mai a nih kha, hetianga i awm chuan ka tan pawh a nuam lo ania," tiin ka melh ran a, ani pawh chuan ka mitah tak min en.

"Ka inthiam loh vang a ni lo, tunah chuan anih tur ang kan ni vek tawh, buaina kan nei lo a, nangpawn nei suh," a ti leh tlawng a, hepa hian eng chiah nge maw a duh le?

"Veroi bialpa i ni tih a hria em?"

"I sawi loh chuan a hre lo ang,"

"Ka sawi dawn alawm,"

"I sawi lo ang,"

"Zoherlian...!"

"Eng nge?"

"I duh tak tak a maw?"

"I mak, ka mimal nun a nia, hetianga i awm hian min tibuai tih hre rawh aw, nichina i awmdan te kha sawifiah leh a ngai dawn," Awi...Thawk a ti pik mup a ni ber, ka ṭah a chhuak a, ka rilru a na bawk...

"Hetianga awm turin ka phal hleinem che.." ka ti ta thlawt a, "Ngaihzawng neih i phal lo amaw?" a ti chu hrilhfiah dan pawh ka thiam lo. "I duh takzet a maw?" ka'n ti leh ngawt a, zawhna chhang lo chuan, "I ṭhiannu vanga indawm kun reng turah min ngai suh," a ti bul hmuk a, chu chu ka duh loh tawp thil a ni, Veroi vanga rilru na taka awm reng turin ka duh lo, ngaihzawng neiin hmangaih te pawh nei sela, hlim taka awmturin ka duh; mahse, tuna a awmdan hi  chu ka duh lo takzet, ka tihsual liau liau niin ka hria.

"I hmeichhe duhtak i tawng anih chuan khawvelah kei aia lawmpui che an awm lo ang, engtin nge chutiang rilru pu tur chuan min ngaih theih le?" ka rilru natna chu ka aw ah a lang hial mai, ka insum a, chuvanga ṭap lo mai chauh ka ni.

"Ka hria alawm, ka sawi ve mai mai anih kha," a ti naa rilru a dam phah lo.

"Duh pawh thlang thei loa ka siam che hi a pawi ka ti..." ka aw chu a lawi a, ka sawi zawm duh lo.

"Lo inthiam lo ve ringawt suh," a ti pawr hlur a, ka inthiam lo zual ting mai.

Chutah, lo kal hnaiin ka sirah a rawn ding a, "Ka duh alawm, a fela, a hmelṭha bawk a.." tiin a ngawi dat a, tawi tea min rawn nuih pah hian dar a kan âk a, "Englai pawhin ka bula awm a châk a, ka thu a awih em em bawk.." zawi deuh tak hian a tih zawm a, a mitmeng, a aw ri leh a nui hmel chu hrilhfiahna a ni.

"I lungawi tak tak em?" tiin ka'n zawt leh hram a, ka lam hawiin a rawn bu nghat a, thawk ka lo la huai huai...

"I thiam lohah ka ngai lo ania, nangpawn ka bialnu angin en tawh la, in haw suh u," thutak fe hian a ti zui a, chutih laichuan pindan kawngkhar an rawn kik a, "Kan lo chhuak dawn," Zoa'n a tih rual chuan a rawn nam hawng rawk.

"Ka haw dawn ania, ka rawn tibuai lo ang che u," a ti a, a chhuak leh nghal vut. Zohera chuan rang deuhin a umzui a, keipawh chu ka chhuak ve nghal a; mahse, veranda ka thlen chuan kawngpui an lo thleng hman tawh. "Zuk chhuk rawh, min rawn zui a ngai lo," Jeminai'n a tih ri chu ka hre pha a, ka tan han inrawlh chi a ni tawh lo a, mimal thil anga ka en liam a ngai tih ka hre bawk.

End of chapter - 19