WHY DID YOU GO? (CH - 20) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 20

"Kal ringawt suh, thinrimna tur engmah a awm loh kha, kan sawi zo tawh," ka hmaa rawn din pahin a ti a, "Inhnial buai ka peih lo, min lo dang lo zawk teh," tiin ka lo melh rum hle thung. Kha nu khan ka huat atan a ti tih ka chiang, kan inngaizawng tih a hria a, ka thîk tura awm a tum tih pawh ka hai lo, a ṭhianpa hian kei aiin a ngaipawimawh zawk a, a thu thua a tih kawi theihzia min hmuhtir a tum tih a chiang reng.

"Thil sawi ho turte pawh kan neih kha," ka hma ding chuan a ti leh a, ka bana rawn vawn mai a tum chu ka lo nam sawn rawk.

"Engmah sawi tur a awm lo, in pahnih khan zuk sawi dun rawh u," ka ti hmak a, auto lo tlan ka hmuh rualin ban ka phar vat. Mahse, Zoherliana pui chu ka hmaah a rawn ding leh a, ka auto phar din ûk tawh chu kal turin a'n hui zui a, ka thinrim tawh chuan khawlai ka pawisa tawh lo, "Ka haw dawn ka tih kha, ka sawi i hrethiam lo em ni? engmah sawi tur ka nei tawh lo," ka ti vîn hlar a, thawk a la hluai.

"Hrilh tur che ka nei alawm, dawhthei ve deuh teh aw," 

"Hmuh pawh ka hmu peih tawh lo che u, in duh duh danin in awm rawh u, ka ning," ka inher rualin ka banah a rawn man a, an in pan thlakna step lamah chuan min pawt phei dâwr dâwr a, ka ṭang ve nain min pawt kal dawt dawt thung.

"Min thlah rawh Zoherlian, ka rawn chhuk tawh dawn lo," a banah ka chûm a, ka kut a chelhna chu phelh ka tum bawk. "Ṭán theihin awm ve ṭhin teh," a ti zui hluk a, a thil sawi chu ka helh ngang mai. "I ṭán ka ngai lo e, i duh leh kha nu kha zuk ṭan rawh," tih leh step-a ṭhut ka rual a, a ban chu ka uai lui tlat bawk a, min pawt kal thei ta lo chuan ka hmaah dingin min chhuk en run tawh.

"I ngaih ang kha engmah a awm lo, kan chungchang a hriatthiam loh te ka hrilhfiah a nih kha," a ti chu rum theihtawpin ka melh a, "Eng nge a lo sawi ve tur awm a, a thu thua awm i duh chuan zuk awm rawh," tiin ke ka lek kang uaih; mahse, ka tlawh fuh hmain ka chawnah a rawn man a, "Thlah rawh," tia ka ke han lakthlak ka tum chu a chelh nghet sauh.

"Tunah chuan nangmah chiahin i hrethiam lo tawh, Jenusi pawh ka inngaizawng tih ka hrilh tawh a, hetianga i lo awm hi a zahthlak zawk ania," a'n ti zui a, min puh ringawt anih chu.

"I zah chuan engah nge min rawn um zui?'

"Ka um zui loh chein, hrethiam hek lo che,"

"Eng nge hriatthiam tur awm a, khu nu khuan thil a hre vek, i bulah hre lo angin a awm a, ka thîk turin a awm kual vel a nih kha.."

"Chu tak chu alawm i hriatthiam loh, a ni lo zawngin ngai zel mahta che,"

"Eng nge a ni lo zawnga ka ngaih chu, ka mitin ka hmu a, ka hre ve reng alawm,"

"Engmah i hre lo,"

"Aw.. ka hre loah ngai ang, min thlah rawh ka kal dawn.." ka tal thut a, tum loh deuhin a malpuiah ka tlawh fuh a, hnung zawnga a tlu mai tur chu a kekawr kawngah ka va man rawk rawk.

"Min va pawt lêt leh rang si ve," tih pah chuan a rawn ding ṭha a, a nui deuh suk a, ka nuih a za ve eih lo.

"Pawt lo che ila chuan tukkhum sawh dawpin i tlu ang chu," Ka darah a rawn vuan zui a, step-a min nem ṭhut leh pah chuan, "Hetah hian titi dun lawk ang, ka sawi zawh hnuah i kal duh chuan i kal dawn nia," aw ki dam leh zawi ruih hian a ti a, lungawi lo ru deuh chuan ka ṭhu a, ka rilru damna tur thil a sawi lo anih chuan ka kalsan nimai loin ka tawpsan ang, amah pawh hian a duh a thlan ve tawh a ngai a ni mai tiin ka inhumruh a, a ṭawng hun ngaichangin ka en ran bawk.

"Jenusi khan a tihsual vanga inkawp kan ni emaw a tia, kan nih lohzia ka hrilhfiah anih kha," a ti chu ka hrethiam map lo.

"Eng tihsual a ni?" ka lo ti he haw a, ka lam hawia rawn ṭhut rem sauh sauh pah chuan ka mitah min en let kal a. "I pindana ka lo luh zan khan ka rui a, kan wine zawn ang kha ka in alawm," a ti ta mai a, ka hamhaih chuan sawi mai tur pawh ka hre lo, ka hau chungin ka melh a, rilru a buai map mai!?

"Khami zan khan i nu kha min hmu turin a lo kal a, ka hnathawhna nu khan wine kha a duh vangin a bula awm a, kawm turin min ti a, anihna takah chuan tawktarhah min hmang tihna anih chu, i pa pawisa hnutchhiah zat kha hriatsak che ka duh vangin ka awmfal pui a, wine kha a rawn keng tih ka hre lo, hotel neitunu khan kan inkarah eng emaw thleng turin a duh a, chuvang chuan keipawh min hrilh duh lo a, ka hriat lohin min tal awhtir a lo tum reng kha a lo nia, chuan.... ka in palh a, ka hriat chhuah chuan ka lo in nual hman tawh...ka lo kaldawn khan ka rilru pawh a buai deuh a; mahse, khatianga awmpui che tumsaa lo kal chu ka ni bik lo ania, i lo ngaisual a nge, ka inthunun theih ka ring a; mahse, tum angin ka awm bik ta chiah lo a ni, a chhan chu..." Ban ka lo phar hluai.

"Ngawi tawh teh...engmah ka hrethiam lo ania, eng nge a awmzia, i rui a, kan awmdun a, kha kha ka hrethiam lo reng reng lo, wine mak deuh kha i in a, i insum theih loh phah tihna ania, chuan...englai chu nge ka hriatthiam loh, ni lo....lawk...Jenusi chuan eng nge a lo hriatthiam loh?" ka rilru buai ang chiahin ka ṭawng pawh chu a buai nuai, min ṭhawng ve bawk em a ni.

"Jenusi pawn i nu hmanga wine kha kan neih theih a beisei ve tho a.."

"Chu te chu ka hre reng alawm, ka nu ruk anga lantir pawh a tum kha. Mahse, eng nge kan inkara a lo inrawlh chhan chu?" Ka ṭawng ring deuh chu min lo khap vut a, zawite hian.."Wine kha ka in tih a hre bik lo,  tunah chuan a hre vek tawh a, a inthiam lo bawk a, amah vangah a ngai a ni ber, keipawn a tir chuan inthiam lohna ka nei alawm..." a ti zawi leh sup a.

"A thiam loh chu a ni em?" ka tih laia ka hlauhthawn zia chu aw, ka thiam loh ni zawk mahsela pawi ka ti lo; mahse, Jenusi thiam loh anga ngaih chu ka duh lo takzet.

"Kan pahnih inkar alawm, ka rawn pan lo thei che a, nangpawn min hnar thei a; mahse, kan ti lo ve ve a, kan pahnih inkar chiah a ni," a tih chuan thawk ka la huai huai.

"Anih chuan a thiam loh a nih loh thu i hrilh lo em ni?" 

"Hrilh e, nichin mai khan ka hrilh," thutak hmel zet hian a ti a, chu chu ka duh dan tak a ni; mahse...lung a la dam kim zan lo thung.

"I rilru diktakin min chhang ang che aw, wine i ruih vanga khatianga awmdun kha ni mahila min duh tak tak tiraw, inthiam lohna i neih vanga min kawp i ni em le?" ka ti ban charh a, ka chhungrilah chuan hlauhthawnna liantak a awm a, Jenusi inthiam lohna aipawhin ani inthiam loh vanga inkawp kan nih hi ka hlau zawk daih a ni.

"Ka duh loh thil engmah ka ti lo," a ti tlawng mai a, a chhanna chu ka la duhkhawp lo hle thung.

"Mahse, a tir kha chuan min biak ṭhat duh loh kha..?"

"Aw...kha chu a hlimchhawn ania, ka awmdanin zir hek lo, i tan khan a fair lo hlein ka hria alawm," a tih laia a hmel chu chîk fêin ka en a, min nuih rual chuan tawitein ka nuih let bawk.

"Anih i inchhir em?" ka tih chuan lu a thing vut a, "Teuh lo mai," fiah zet hian a ti a, ka thinrimna chu chawp leh chilhin a reh duak thei, ka lai deuh ṭut lehnghal a, nui lo turin ka la insum ve hle thung.

"Keipawh ka inchhir lo," ka ti chiah chu ka kut a rawn vuan chawt.

"Kan inchhir lo ve ve anih chu," a ti a, ka kut tuai rauh rauh pah chuan min rawn ṭhut hnaih sauh a. "Buaina engmah a awm tawh lo," a tih chuan awm a nuam ve huai hman; mahse, Jenusi bawk kha rilruah a rawn lang a, ka lung a la awi thei lo reng reng.

"A tir khan sawi vek la chuan hetiang hian ka awm miah lo ang, Jenusi pawn a thiam lohah a lo ngaihphah a, nangmah vang vek a ni, kan sawi dun tur Jenusi nen in sawi dun zel a, heng thilte phei chu a lo buai vena tur a awm tawh lo a, i hrilh chiang meuh maw..?" tiin ka'n zawt ṭha leh. "Hrilh chiang lutuk tlat, a hrethiam vek," a ti sam et a, chuti anih chuan buaina kan nei lo a ni mai.

"I lungawi tawh em?" a rawn tih vang chuan kan tum lui bâr a, min thlêk chungin a lo nui ruh ruh a, ka melh ṭha duh vak lo.

"Sawi la.." tih pahin ka darah a rawn nek salh.

"A bulah i awmdan thlak tawh lo la a ni mai, ka duhdan i hriat vek kha," amah pawh melh duh loh chuan thlanglam ka hawi daih a, ka kut a hmer nghet sauh sauh a, min la en reng bawk.

"Anih chuan chhuk ila," a tia, a tho zui mai bawk nen ka tho ve sawk sawk a; mahse, ka hreh ru khawp mai, pindanah khan lo sawi zawhpui vek ila ṭha tur ania, ka titau nghal mai bawk si a, zuk lan leh chu a zahthlak ka ti, min ngainep dawn hlein ka hria.

"Aa...ka haw rih phawt mai ang, zanah kan inhmu dawn tho a, nu Mangaihi dawrah pa Dinpuia'n min nghak bawk si..."

"Hetia i kal ringawt chuan mak an ti lutuk ang, kan thil tih dan turte pawh kan sawi ho dawn alawm," tiin min pawt lui tlat a, ka hnial hreh bawk si, ka lut leh hreh tawh bawk si, ka awmdan chu laklawh ru tak a ni.

Chutah, kawngka bul kan thlen hma deuh chuan an rawn hawng hlawl a, Jenusi a rawn lang nghal zat. "Eitur kan siam zo ania, lo lut vat rawh u," tih zawng a sawi a, mi pawh en ve lem loin a lut lehnghal a, a awmzia pawh ka hre lo, a hre lo der dawn a ang ka ti!

"A hrethiam vek ka tih kha," ka hma a kal chuan zangkhai deuh hian a rawn ti a, a kuta min hui hnuah in chhung lam a pan zui a, ka um titih. Kan va luh chuan dawhkan kilin an lo ṭhu a, Zohera ṭhianpa chuan min lo nuihsâng a, Jenusi erawh min hnungchhawn zawnga ṭhuin thingpui a in a, kan thawmah pawh a rawn hawi lem lo. Zohera chuan pindana ṭhutthleng min va laksak a, ani chu ka ṭhutna bulah a ding thung a, "Ka ril a ṭam lo," ka ti chung pawhin min hnawn lui tlat.

"Alu chop ka ngaina lo asin," ti chungin tlem chu ka tem a, ka ei bang chu Zohera ka pe zui a, ei pah chuan Jenusi chu, "Chhuah i hmanhmawh em?" tiin a zawt bawk.

"Tlai lamah a ni mai, bazar vak pawh a ngai lo ang," tiin zangkhai deuh hian a lo chhang a, ka lam rawn hawiin, "Chhang dang i duh em, biscuit a awm," a tih zawm zat a, lu ka thing leh ringawt.

"Zoa, a ei tur han leisak la," a tih leh chuan, "A ngai lo, thingpui hi a tawk," ka lo ti ve vat a, min en deuh vang vang nain engmah sawi zui a nei lem lo. Zohera leh a ṭhianpa chu an inbia a, a ṭhianpa chu a kal chhuak dawn niawm tak a ni. "Chaw ka ei nghal daih maithei, min lo chhumkep duh suh u," tiin a ṭhianpa chuan a hrilh a, hepa lah hi inah a awm tlem hmel khawp a, nizan te khan an pahnih chauhin an lo awm tawh zawk em mawni? An awmfal dun tur anga ngaihtuah chuan awm a nuam chiah lo, an inkar lah hi 'Ṭhian kan ni' tih bakin an sawi duh si lo a, ṭhian ringawt an ang chuang bawk si lo, ṭhian pawh lo nise, hmeichhia leh mipa awmfal reng chu a fuh dawn loin ka hria.

Thingpui kan in zawh hnu chuan Jenusi chuan a sengfel zung zung a, Zohera ṭhianpa pawh insiamin a kalchhuak zui a. Mahse, kawngpui a thlen hnuah Zohera a rawn au a, a bike a nung thei lo anih hmel. "Ka han enpui ange, lo inkawm rawh u," nui ruh ruh chunga tih pahin Jenusi chu a mitmei a, kei erawh mit min rawn siai zauh mai.

A kal chhuah hnu chuan tih tur a han vang khawp a, Jenusi chuan thleng a sil a, kei chu dawhkan kilin ka ṭhu ngawi reng. A thleng sil lai chu ka va thlek leh zauh ṭhin a, eng emaw chu a ngaihtuah ru ve rauh rauhin ka ring. A zo fel chu a rawn kal phei rualin a lo ṭhu ngil at a, ka lo en ran bawk. Ani pawh chuan phâwk lek lek hian min en a, sawi tur dang hre hek lo, "Chahbi chu ka la tawh, nizanah a chahthlak laiin ka la a, a bo tih pawh a la hre lo," ka'n ti thawr a, a sawi duh zawng ka sawi fuh ngang mai. "A ṭhat hlauh chu," tih leh ka bula rawn ṭhut a rual a, a kut huhte chu a kekawrah a tat hul sawk sawk a, "I ṭhiannu chu i be tawh em?" tiin min zawt leh zat.

"Ka haw hunah ka bia ang, bawnghnute sawr turin a lo kal daih a, ka be hman rih lo,"

"Um, a bulah chuan hotel-a kan hralh tur thu i sawi dawn nia," a ti a, thawh leh mai a tum. Rang deuh chuan ka lo pawt ṭhu a, "Thil sawi duh ka la nei," ka ti khawl a, a ṭhu ṭha rang khawp mai.

"Ka lo luh hma khan in thilsawi kha ka hre hman a, chuvang chuan ka thinrim deuh thut anih kha...pindanah in awm rei bawk si a...a lawmawm bik loh bawk nen.." ka ti bah niai a, pawi ka tih thu han sawi em chu ka hreh a ni. Ani lah chuan, "A pawi lo," a lo ti teh tlawng a, ngaihdam ka dil emaw a ti nge ni!?

"Tih sual pawh ka nei hran chuang hleinem, in awmdan kha a mawi lo zawk a, ka bula in sawi theih reng a rukin in sawi ṭhin a, ka lo ngai dik lo cheu pawh kha awm ve deuh mai ania," ka ti hmak hmak a, a nui lek lek hmel ka hmuh chuan ka ngei hle.

"A bialnu ka ni tih i hre reng a, khatianga pindana i ko hrang kha ka tan a ngeiawm bawk, ka thîk atan i ti emaw tih mai tur alawm," ka'n ti leh nghat a. Chutah, "Sawifiah a ngai hleinem, a ho lutuk, ka hrethiam vek alawm," a lo ti leh pek a, em em hian a.

"Ka insawifiah lo aw, ka zilhhau che anih chu," ka ti chang ta bawl mai. A mitmeng chu a lian deuh kawk hian ka hria; mahse, a nui leh vat a, "Ka lo fimkhur tawh dawn nia," ngaihsam hmel zet hian a ti a, dar ka lo kan âk ringawt. A tho zui mai dawn emaw ka tih laiin a ṭhu rem sauh sauh a, ka lamah a rawn inher bawk nen ka lo en ve ran a,  min en dan chu ka hrethiam lo hle. 

Eng tak chu sawi ang maw ka tih laimek chuan, "Zohera hi ka ngaizawng lo ania," a ti khauh a.

"Ka hre reng alawm," ka tih chuan, "I hriat chuan i thîk turin ka awm ngai lo tih pawh i hria ang chu ti raw?" a ti leh a, a nuisâng reng nain a nui hmel chuan mi rap deuh tlat.

"Mahse, min thîk tho bawk si a, ka hrilh tlang rawt ang che, Zohera hian nang ang hi a duh, kei min ring lo anih pawhin amah hi i ring mai ang chu, i bialpa ania i rin ngam loh chuan i tan a hrehawm mai mai ang," A nui tawh lo a, a thutak hmel tawhin lawm lohna nei te pawh a ang lek lek. A thilsawi aichuan a rilru puthmang tur chuan ngaihtuahna a tibuai zawk a, zawhna a rawn lut zut zut a ni ber.

"Ka thîk hran lo che, min phatsan tur anga ngaihtuahna nei pawh ka ni lo, a ngaihzawng ka ni tih i hre chunga min en dan hi ka duh lo a ni tawp mai," ka ti ve sak a, min palzam ka duh lo miau a, ka inti ngeng lui ve a ni mah ang chu.

"I bialpa hian hre lo turin min duh tlat si alawm maw le, ka hriat avangin engmah a danglam chuang hleinem, ka en dan che pawh a ngai reng alawm.." 

"Min en dan chu eng nge?"

"I zawhna chu eng nge a awmzia?"

"I hre zawk daih ang chu maw le?" kan inen ran a, tuna min en dan hi alawm ka ngainat theih loh chu, kawngkal laia kawngsira lo awm palh ve ang mai hian min en a, an thil chhuia an mi tawn ve satliah ang chauh hi ka niin ka hria.

"I chungchangah sawi tur ka nei lo, Zoherlian chungchang chu ka sawi ang kha a ni mai, ṭhian kan ni a, i tana hnawksak ka ni lo tih i hre dawn nia.." a tih chuan chhaihkawlh ka chak tlat. 

"I duh lo tih i chiang tak tak maw?" en ran chung chuan ka ti a, a lawm loh hmel khawp mai. "Ka ṭhian a nih hi, ka nuṭa ang chiahin ka en bawk, i hmangaih dan leh ka hmangaih dan chu a inang lo viau ang," a ti chang rap a, "Chutiang ka awih lo, amah ka ringhlel lo, nangmah hi ka ringhlel zawk che," ka ti leh hram. Thawk a'n la ham ham a, a nuih a za nge a thinrim pawh ka hrethiam ta chiah lo. Chutih laichuan Zohera a rawn lut a, kan serious hmel deuh nge mawni, "Eng nge in sawi a?" ngaihṭhat loh hmel fê hian a rawn ti a, Jenusi chu a ngawi reng.

Lo nuih pah chuan, "Jenusi hi a mipa duhzawng ka lo zawt mai mai?" ka ti nghal var a, Zohera chu a nui suk.

"Sang deuh, ngo leh zaidam a ti em?" lo phei paha Zohera'n a tih chuan, "Duhzawng ka nei lo," ka bula ṭhu chuan a lo ti zauh a. A mala va bensak thawk pah chuan, "Min hrilh mai mai teh, hmeichhia te chuan duhzawng kan nei vek alawm, ka hre chak a nia," ka'n ti leh hlut a, min melh danah chuan min ngei tih ka hre reng.

"Kei chu min duat deuhtu leh mipa mawhphurhna hlen zo tak ka duh, hmel landan chu pakhatna ania, landana mi hîp ve eih lo chu mizia enganga ṭha pawh nise ka duh thei mai lo ang, chutiang ang chuan duhzawng i nei ve tur a ni, patil te i nih ngawt loh chuan mipa duhzawng i nei hrim hrim ang," ka tih chuan ka bula Zohera lo ding chu a melh zauh a, chutah ka lam lo hawiin heti hian min chhang ta reuh a.

"Tumah hi duhthusam an awm hleinem, keimah ka inhrechiang a, ka duhthusam ka zawng ngai lo; mahse, keimaha a duhthusam hmutu chu ka duh let theih mai ka ring. A tawi zawngin, min mamawhna nei ni sela, a bak chu Zoherliana te ang hi a ni mai," a tih laia a awka chhuak chu a fiah ṭha fek fawk khawp mai. Ka sira ding chu ka melh vat a, a lo ner nang.

"Zoherliana ang maw i duh?" ka tih laichuan Jenusi chu a tho vut a, "Ni e, Zoa hi hmeichhe ho duhthusam a ni faivek alawm," a ti leh khawl a, "Khawnge i wallet, keimahin ka va bazar teh ang, vawiin chu ka kawm peih tlat lo che, zanina lam chu lo sawidun rawh u, nangni in titi a rual deuh," tiin kut a dawh zui a, Zohera chuan rang deuhin a wallet a phawrh a, chu nu lah chuan pawisa a la chhuak a, wallet chu pe letin kawngkhar lam a pan nal nal a, ka melh rum tih pawh a hre lo tawp ang.

"A tilui anih kha?"

"A uang a nih zawk kha, la thutak duh suh,"

"Infiam hmel kan pu em ni?"

"Nichin kha chuan pu e.." a tia, min rawn thlek leh zet hnuah, "In inhau em ni?" a ti ta chauh a, sawi pawh ka chak nek lo.

"Engati nge i pawisate kha a lak ringawta?" hrethiam lo leh lungawi lo fea ka tih chuan,  "Thawmhnaw hakthlak a nei lo a, a va lei dawn anih kha," a ti leh tlawng a, "Chungte chu keipawn ka rawn kensak thei reng alawm, a duhte chuan mite pawh rawn chah ve ang hmiang..." tiin ka melh tlawk tlawk a, hepa hian a hmang ṭangkai mai mai tih a inhrethiam lo anih hi.

"Zanin chungchang chu sawi phawt teh ang, dar engzat velah nge lak in tum ang?" tih pahin ka tho tur chu min nem ṭhu sawk sawk a, ka bula chair ruakah chuan a rawn ṭhu ve nghal a. "Lawma inpeih hun a ni mai, Azoi sawm turin min ti ringawt a, sawm pawh ka la sawm lo, a duh kher lo maithei a ni," tih pahin a jacket ipte ka zen a, a wallet ka en chuan pawisa chu tlem a lo la awm a, "Engzat nge a lak a?" tiin ka zawt zui a.

"Ka ah zat ka hre miah lo, a hman ban chuan min pe leh mai dawn alawm," a ti sam leh et a, a â reuh ka ti, inren emaw han ui ve nachang pawh a hre lo chu ania, hetiangte chuan a châwm a ni ringawt.

"Khatiangin laktir ringawt tawh suh, a rul leh ngai che em?"

"Hahh..ka puktir hleinem,"

"Engkim i leisak vek zel tihna em ni a?"

"A va buaithlak e aw, ṭhian karah ui tur engmah a awm hleinem, ani pawn ka tan ui a nei ngai lo va," a ti leh chu ka melh ran ran a, "Eng nge a ui loh chu?" ka ti bawl. Ka ngaihtuah a lo hrethiam aniang, "I rilru tak hi chuh," tih pahin ka chalah a rawn kuk fawk a, "Zoherlian.." tih leh ka chal dawm ka rual.

"Jenusi hi ngaithei rawh, ka bestfriend a nih hi aw.." a ti a, a la nui mai mai.

"Min ngaithei turin hrilh zawk rawh, i bialnu angin min en ve rawh se," ka tih chuan, "Ka hrilh dawn nia," a ti sam leh et a, a la nui suk suk reng.

Sana ka en chuan duh aiin ka awm rei tawh, pa Dinpuia pawn a tihtur a tih zawh tawh ka ring a, min lo call ṭep tawh bawkin ka ring. "Ka lêt a hun tawh a, chhuahna tur i nei em?" tiin ka bula ṭhu chu ka han zawt a, "Nei tawh nang, Jenusi kha bazar pui ka tum a, amahin a kal daih kha.." a ti a, ka lo ner deuh chu, "Thlah i ngai em ni?" tiin min zawt zui a.

"Ngai lo, auto ka la mai ang, Lawma'n zantir lama tih a rilruk a, nangni pawh chaw ei hma ula, dar 7 velah chuan lo thlenphei tum rawh u, engin nge in lo kal ang?" ka ti zung zung a, "Car hman tur chu ka hria a, ka la be fel lo, taxi leh auto hman chu kan thiltih hre ve tu an awm belh mai mai dawn a, car hawh a ṭha ber," a ti ve luam a, helam chu an lo buaipui turah ka dah ve tawp a, keini chuan a lakchhuah bak kan ti dawn lo bawk a, lo ngaihtuah hah vak pawh ka peih lo, chu aichuan tualthattu kan hriatchhuah dan tur lam chuan rilru a kap zawk daih a ni.

"Jenusi khan inman chuahtir a ngai a tia, pi Lalpuii'n hrechhuak sela a duh bawk a, Azoi pa chungchangte kha a rawn sawi luam a, ka pa hi pi Lalpuii te nena inthurual angah a ngai deuhin ka hria, i bulah engtin nge a sawi?" dilchhut fêa ka tih chuan, "I pa hi kan rinhlelh pawl pathumnaah hian a tel veah a ngai a, engmah phei chu kan la hrechiang bik lo, i ṭhiannu pa leh i pa kha an inngaina viau em ni?" tiin min zawt lêt a.

"Ngaina ve e, Azoi te in hi a lenna ber a nia; mahse, ka pa chu engtin nge a rinhlelh zingah a dah theih a?" hrethiam lo fêin ka ti ve leh.

"I ṭhiannu pa leh pi Lalpuii pasal kha ṭhian inkawmngeih tak an ni e a tia lawm," a tih chuan rilru a buai map. "Mahse, ka pa chuan pu Muana hi a ngaina lutuk asin, pi Lalpuii aichuan pu Muana lam a ṭang ti ula a awihawm daih zawk ang," ka ti halh a, ka hrethiam lo hle mai, ka pa kha tum nei saa farm-a awm veah an ngai niin ka hria.

"I pa leh pu Muana chu an inṭhianṭha vak lo aniang, i pa khan pu Muana thil pawimawh a ru chhuak tlat a, kha a thil ruk lah kha pitari pasal hlui ta niawm tak a ni. Jenusi chuan a neitu dik takin a ruk chhuahtir angah a ngai alawm," a tih chuan phawk fêin ka en a, "Anih chuan tualthattu chu pu Muana em ni?" ka ti nghal hlut.

"A ni maithei, kan hre thuai turah ngai ang, hriat ka chak zawk chu i pa kha an thurualpui angah kan ngai mek a, engtia inthurual chho nge an nih i rin ve, farm-a a awm hnuah nge, farm-a a awm hmaa inthurual sa an nih i ring zawk?" tiin min zawt a, a thil min zawh chu han ngaihruat dan pawh ka thiam lo, hostel-a ka awm laiin ka pa chu farm-ah a lo khawsa tawh a, a hnaah a buaiin midang thu thua awm hman a ni lo a, thil ru tur leh lek phei chuan nupui a neiin ka ring lo, kei min hruai lut bawk a, hetiang dinhmuna min dah a min kalsan leh tur hian eng thil sual mah a ti duhin ka ring lo a ni.

"Ka pa chu a lo tel ve anih pawhin an bum emaw, an tal awhtir aniang," ka ti zawi sep a, ka rilru chu a buai nuai reng, thil ṭha lo deuh kan hrechhuak dawn nia ngaihnate ka nei a, ka hlauthawng ru hle bawk.

"Ka pa chuan lo thurualpui pawh nisela eng atan nge a thurualpui ang, kan mamawh tawk chu a thawkchhuak reng a, pawisa a khawl tam tawk bawk a, lo vaubet pawh ni tehreng sela engtin emaw taka danglamna a neih ngei ka ring, bakah...thil sual tiduh chi a niin ka hre lo, ama tawka Pathian ṭih em em ṭhin mi a nia, ka nu Nguri nun pawh kha a khalh ngil ni zawkin ka hria. Farm saw chhuahsan a duh ngai lo a, kan in dang ve dawn em ka zawh pawh khan, 'Khawchhunga awm aichuan he laiah hian in kan sa ve dawn nia' a ti ṭhin a, eng emaw tihruk a neiin ka ring thei lo, thil ru tura farm-a a awm chu ka ring lo bur a ni," tiin ka hmaa ṭhu chu ka en vang vang a, ka rilru a na tih a hria nge ni ka kut a rawn ban a, a hmer vang vang bawk.

"Dinhmun hlauhawmah a awm tih pawh a inhre lo ang, ni losela chuan a thil ruksakte kiangah min hnutchhiah duh dawn lo," ka ti leh sep a, min chhang lo naa min hriatthiam hmel viau thung. "Tu emaw thuruk a hriat vang te pawh a ni zawk maithei asin," ka tih leh chuan, "I rilru ti hah suh, i pa chuan engpawh lo tisela hetianga thih hi a phu lo, Veroi pawh khan a phu lo, tualthattu chu kan zawng hmu anga, a phu tawk hremna a hmu ngei ang," nghet charh hian a ti a, ka samah a rawn chul zui a, ngaihtuahna a vak thui khawp mai.

Ka pa khan tu pawi nge a sawi ang aw? Tu emaw haw em em tu chu an awm ngei a, engvang nge ni ang, he zawhna hi vawi tam ka inzawt tawh, tumah lah chu rinhlelh ngaihna ka hre si lo, Jesusi thil rindan lah chu ni thei pawhin ka hre lo a, ka pa hi misual anga a ngai dawn anih chuan fiahna ṭha tawk tak ka duh, a thihdan mah heti a nih tawh laiin a hming hliau zui tur chu ka ngai ngam mawlh lo, pa ṭha leh fel tak anga hriatreng ka duh a ni.

Pa Dinpuia'n min rawn call a, "Ka hman dawn tawh," a rawn tih vangin ka thlen har loh tur thu ka hrilh a, Muantei te ina leng tur angin ka insawi si a, nu Ṭhatei a lo va bia ang tih pawh ka hlau deuh. Auto kan hmuh mai loh vangin Zohera chuan min va thlah a, dawr thlen hma kawng kawiah ka din tir thung. "Chanchin lo sawi zel rawh, ka lo ngaichang ang che," a tih hnuah min letsan a, vawiin hi chawlhni a ni a, Jenusi chu khawiah tak bazar ang maw, a thinrim vanga chhuak tau anih te ka'n ring ringawt a, chawlhnia dawr inhawng ṭhin pawh a hre dawn em mawni, ṭha te tein min bia sela chuan ka hrilh ni mai tur.

Nu Mangaihi dawr ka va thlen chuan pa Dinpuia chu a lo la buai khawp mai. Ka va lut chu, "Han phiat thuak thuak la, ka rem bang hi chu naktukah i nu Mangaihi'n a lo chingfel ve tawh mai ang," a lo ti zung zung a, hnial buai loin hmunphiah ka ban ve nghal a, ka phiah laiin zial a lo zu a, pawn lam hawiin a ding bawk.

"Tuna mi kha Lawma nau a va ang ve," a rawn tih chuan ka va lehhawi zawk a, kawngkaah chuan pen chhuakin a thlir zui vung vung mai.

"Tu maw?" tih pah ka va kal chhuak chuan bike tlan liam chu ka va hmu thuak a, "Ka hmu sual aniang, kan nula kha a ang riauin ka hria a," a ti nuah nuah a, a nih ngei ka ring.

"I zo tawh em ni?"

"Aw, ka'n rût lawk ange," tiin ka bawlhhlawh phiahkhawm chu ka va rût leh zung zung a, ka inpeih hnu chuan dawr kan kalh fel a, farm lam panin kan let leh ta bawk. Dawr inhawng chu hmuh tur a bar pawh a awm lo, 'Vawiin anga bazar tum reng reng,' ka ti ru neuh neuh a, hak tur a nei lo erawh ka lainat ve deuh. Zohera chu message ka va thawn a, online-a thawmhnaw zuar, in lama kawl ṭhinte address ka va hrilh a, ti ṭha ka inti ve hle a ni, hetianga ka fel pawh hi ka lo inring lo a, thluakburliani chuan fel min ti ve duh kher a nge maw.

Farm kan thlen chuan inthlak lem loin Azoi te in lam ka pan nghal a; mahse, an kawngka a lo inkhar ṭhiap. Azoi chu ka call a, "Bawng inah kan awm daih, i peih chuan bawnghnute min lo pack pui teh, naktuka i nu Mangaihi ken tur ania," a rawn ti lang lang a, ka kal tur thu ka hrilh hnuah phone chu ka titawp a, bawng in awmna lamah ka chhuk thla ve nghal a. Ka thlen hma chuan ka sawm dan tur ka ngaihtuah lâwk a, man chhuah tura ti kan ni bawk a, pehhel awm loin ka sawi hmiah mai aniang chu, a pa a awm leh a ṭha hlei hlei a ni mai.

Ka zuk thlen chuan Azoi pa ka zuk hmu hmasa a, kawt zawla dawhkan hlaipuiah hian mai tai a lo sat phel rum a, carrot leh alu te nen a lo inchhawp hnawk khawp mai. "Bawng chaw tur em ni?" ka va tih chuan, "Anih hi, an ei tui i ti viau lo maw?" nui ṭhû hian a ti a, "Ei tui khawp mai, luang te kha i sat ṭhin sia, khatiang chuan an va hautak awm ve," ka va ti ve hlut.

"Thlai ei chi chu tlem chauh an awm, vulh rei tur an ni lo a, an sa pawh a tui bik asin, a man pawh a dang nen chuan a inang lo, aizawl lama miten talh turin an rawn hauh lawk ṭhin a," a ti leh luam a, chutih laichuan Azoi'n min rawn au lang lang. "Ka va pack pui a nge, ka puih a phût riau," nui chunga ka tih chuan, "I va fel ṭhin tak e aw, zanah pack mai rawh ka tia, in lama hawn chu a rit sak a ti tlat anih kha," a ti a, chhang tawh lem loin ka kalsan ta bawk.

"Inah hawn mai tur ania, pack zawhah khai haw i ngai dawn tho alawm," ka va ti chu, "I hawn nghal ang chu le," tiin a lo nui tet tet a,  "Ka lo kal dawn tih pawh i hre tawp si lo," tih pahin sarang chu ka ban ve nghal a, ani'n a suahna tur no min lo pe thuai bawk. A tihdan turte chu min lo hrilh a, "Ka thiam," ti chungin ka ti baw leh ṭhin.

"Ka tihdan hi en rawh," tiin a thun zung zung a, a ṭuan a rangin a hnehsawh ngang mai, engtin nge a hmawr te chu a bâwk zung zung theih ni, a herh kual thuak ni mai hian a lang a, a bâwk nghet viau zel bawk si.

"Ka lo thun anga, i bâwk dawn nia," ka tih chuan a aw ve mai a, a thun chu a har lem lo, ka thun zawh apiang chu a lo bâwk a, ka sarang hman tur min lo pe zung zung bawk a, kan tichak ve khawp mai. Sawina hun remchang tak a ni bawk a tiin ka han inring el awl a, "Thil min rûk pui rawh," ka'n ti tawl mai a, min rawn en heu...

"Zanah thil rûk chhuah ka ngai a, min puih ngei ngei a ngai.." ka tih leh chuan a mitmeng a buai nak.

"Tuma hriat ve chi a ni lo ania, thil pawimawh deuh ka ru dawn.." ka tih leh chuan, "Eng nge..?" nuihza aw lek lek hian a ti a, "Pu Muana wine," ka tih chuan awih lo deuh hmel a pu a. "Ka uang lo ania, a wine thuhruk kha ka ru dawn," ka'n ti leh zat a, a hrethiam ta aniang, "Eng atan nge i tih, i in ngai lo a ni lawm ni?" a ti phawk ta hrû a, a ṭawng zawi viau bawk.

"Ka in tur a ni lo, thil chhuinan ka mamawh alawm," ka tih chuan, "Eng thil chhui nan maw?" a ti ve leh zat a, "Ka pa thihdan chhui nan, he wine vanga thi hi a nia, wine hi mi tute emawin an zawng alawm," ka tih chuan â tih hmel deuhin min en.

"Nu Nguri ṭhiannute hotel pawh sawn an lei duh a, anni lo pawh saw ngaihventu an awm, wine hi an inchuhin ka'n hria," 

"Kan hria a?" a lo ti khauh a, ka îp nghal ṭun, ka ṭawngsual em ka hre lo, keimah leh keimah chu ka inzawt ru a, Jenusi thil sawi chian loh vang vek a ni. Mahse, man chhuah a duh bawka ka tisual lo turah ka ngai.

"Thurualpui ka nei alawm, wine chu min rûk chhuahpui phawt la, ka la hrilhfiah vek ang che, i pawimawh lutuk ania, mahniin ka ti thei lo, thiar chhuah a ngai dawn, a tam tham viau maithei,"

"Awi awi, ngawi rih teh, i mak zung zung lutuk," tih pahin kut a rawn phar hluai.

"Min pui ngei ngei rawh aw, ka pa thihna nen a inzawm a nia, ka pa khan a siamdan pawh a ru chhuak an tia, he wine vanga thi a ni tih kan chiang tawh," 

"Khawi aṭangin nge chung thil chu i hriat, miin dâwt an hrilh che a ni lo maw?" a tih chuan lu ka thing vut a, "Ka pa kha wine siamdan an hriat duh vangin an that alawm,  dik tak chuan maw, pi Lalpuii pasal kha a la dam niin ka hria, ka pa kha a bum pawh a ni maithei," ka ṭawng zawi bawk a, ani pawh a rawn kun hnai ve sawt sawt.

"Pa Biaka a la dam maw, i hmu em ni?" a tih chuan, "Hmu lo; mahse, pi Lalpuii nen hian an inbiak rûk ṭhin ka ring," ka ti leh zat a, a la hrethiam lo aniang min en run run a.

"Rindan vek ala nia; mahse, wine hian thil dik tak min hrilh thei ang, min rûk pui phawt mai rawh, min man chhuak anih pawhin keiman ka tuar vek ang, nang chu i fihlim chiang bal dawn, a thawi pawhin i hming a ri ve lo ang," ka ti leh zung zung a, ka ti hamhaih deuh bawk nen, "Awi a,.." a ti leh hluai ṭhin a, "Min pui rawh aw, nang bak min pui tura sawm ngam ka nei lo," ka han tih te chuan hreh hmel zetin min en a, "A chi loh e, i ti hlauhawm lutuk alawm," a ti a, a ner nûng reng bawk.

"Keiman ka tuar vek dawn alawm, ka pa thihdan hi ka hriat ngei ngei a ngai, hei bak hi hriat theih dan dang a awm lo, hre chhuak tura min duh ve anih chuan min pui tawp mai teh," Ka ngenngawl sawt khawp a, ani pawh chuan min hnial hreh tih ka hria, a hmelah a lang reng tlat a ni.

"Engtin chuan nge ka puih che anga?" a rawn ti chiah chu, "Gate chhakah bottle min thiar pui anga a ni mai," ka lo ti vat a, "Khawi aṭanga thiar tur nge?" tiin min zawt leh.

"Ka pindan lam aṭangin, lakhuih hmunah kan kal chhoh a ngai dawn,"

"Awi, kawng mumal a awm bawk si lo, engzat nge thiar ngai dawn?"

"Ka hre rih lo, a awm zawng zawng aniang,"

"I ti awm ang lo lutuk, kan thawmah an hre nghal ang,"

"Puitu kan nei dawn alawm," ka tih chuan a ṭawng leh tum lai chu a tawp chaih a, "Tu maw?" a ti phâwk leh hrû a. "Lawma'n min pui dawn, kan inthurual vek, an rilru a lo la peng anga, thawm bengchheng a lo siam laiin keini'n kan lo thiar chhuak ang," ka tih laia min en dan chu rapthlak minti deuh te pawh a ang.

"Gate chhaka han dah chhoh tawp a ni mai, a bak chu engmah titurin ka phut tawh lo ang che, kan ru tih an hriat hunah pawh i hming a ri ve dawn lo ka tih kha," tiin ka'n hrilh zawm leh zat a, "Lawma nen chuan in ṭha leh tawh em ni?" tiin min lo zawt teh daih a, keimah zawk chu ka hamhaih titih.

"Teh nang?"

"Eng nge in awmzia ni a?"

"Kan inkarah engmah a awm tawh lo. Mahse, ka pa chungchangah hian min puih a duh a, pi Lalpuii pasal hlui leh pu Muana indona thil a ang bawk nen, Lawma chungchang kha chu i hre vek tawh ti raw?" ka tih chuan a lo bu nghat a.

"A pa thilte chu a ru duh tak tak ang maw?" ngaihṭha zan lo aw ka hria a, ka lo bu sawk sawk thung.

"Pu Muana tana ṭha zawk tur pawh a ni thei a, Lawma chu a rintlak, a pa hian thil ṭha lo pawh tise a chhan lo ang, ka bulah a intiam tawh alawm," a ngaihṭhatnan ka'n ti ve sasawia, eng intiamna mah kan nei lo thung; mahse, min puih a tum a, a sawi anga a awm ka ring ve tawp mai a ni.

"Zan reiah em ni lak i tum a?" a ti leh a, "Zan tirah a ngai dawn," ka tih chuan hlauthawng hmel a pu leh..

"Zantirah a him zawk, in chung lama an buai laiin kan ti dawn nia, zan reiah chuan thawm a ring hma dawn a, Lawma a chet laiin duhtawkin kan lo che ve thei ang," tiin ka'n hrilhfiah leh a, "Ka hming sawi lang ve miah lo ang che u, Lawma pawh chu hrilh rawh," a tih chuan 'aw' rang tak ka ni. "Tel ve lo ang hmak i ni ang," tiin ka nuih var var.

"Engtin nge tualthattu chu in hriat theih ang?" tia a zawhna chu chhan ngaihna ka hre lo hle. "Aa....wine hi a rawn ngaihven..dawn aniang chu... a rawn ngaihven lo thei nang, a zawng du du sia lawm.." ka ti nawi niai a, ka ṭawng bah khawp mai.

"Tuin maw zawng du du?" a ti lehta nghal a, a dilchhut hrep, hriatchian loh nak alaichuan hrilhfiah dan pawh ka thiam dawn em mawni, ṭawng sual a hlauhawm bawk si.

"Chu chu alawm hriat kan tum, tunge rawn zawng kan hriat duh vangin kan ru dawn..." ka sawi zawh rualin pen thawm a rawn awm a, kawngka lam kan hawi rualin khuh ri kan hre zui a, rei vak loah Azoi pa chu a rawn khuh lut bawrh bawrh. "I awm a na si, lo va haw mai rawh, Minai nen kan rawn khai haw mai ang," Azoi chuan a lo ti vat a. "Ka nghak law law ang che, in zo ṭep tawh a ni lawmni," tiin a pa chuan kan thil khawih laichu a rawn en a, "A va la tam ve," a tih hnuah bawng an dahna lam a pan a, ka va hawi laichuan chaw a pe a, bawng te chu a be bawrh bawrh mai.

"I pa men laiin i lo chhuak thei angem?" tiin Azoi chu ka zawt ru sar sar a, "Theih te chu thei e.." a ti ban charh a, kei chu ka thaw huai tawh.

Ka zun chhuak deuh chu pawnah ka va dâk a, zun in awm ang engmah ka hmu lo. "Khawiah nge in zun ṭhin?" tia Azoi ka va zawh chuan, "Zun in a awm i ring em mawni, i duhna laiah khan va zung tawp rawh," a lo ti hem mai a, "Tui awm lohnaah ka zung thiam hleinem," ka tih lah chuan a tui bottle min rawn pe leh thawr. 

Ner nâng chung chuan ka kalchhuak a, hmun ual au laia han zun tawp chu ka hreh khawp mai. Ka khawr hak a tawi bakah kawr lum emaw han inhliahna tur engmah ka nei si lo. Ka tei kual ka tei kual hnu chuan  bawng ek an phona thlang lama an thingṭang chheh khawm chu ka zuk hmu a, a phena chuan a zun theih dawnin ka hria. 

Tîm leh khawr deuh chungin ka kal thla a; mahse, thing chhehkhawm bul ka zuk thlen chuan ka duh aiin a lo awih a, han ṭhuttun pawh a rem zan lo. A thlang leh deuha zawlah chuan thingkung lianpui hi a ding a, chu lam chu ka pan leh ta zawk a; mahse, ka thleng thla ṭep tihah Azoi pain min rawn au thut!

"Khawiah nge kal i tum, rawn chho vat rawh," vin fahran hian a rawn ti a, ka phu deuh bawk nen ka hawi phawk khawp mai, ka inher rualin ka bottle ken lah chu ka tilum daih mai a, "Awi, ka thlauh daihhhh.." tih pahin a lum lai chu ka en reng ringawt. 

"A uiawm loh, a awih si, i lum hmain rawn chho vat rawh," ka chhak a miin a rawn tih leh chuan, "A ding dawnin ka hria," tih pahin ka han hawi chho a, chutih laichuan thlang lama thawm ri ṭhak chu ka hria a, ka lehhawi rang viau bawk.

Bottle chu ka zuk thlêk a, eng thilah emaw hian a tâng nge mawni a kang vû a, han en chian deuh chuan chelh kawhtu eng emaw a awm tih ka hmu thei. "A baw vek em mawni, a pawp aniang a?" tih paha zuk chhuk leh mai ka tum chu chhak lam aṭangin a rawn ri thla sawt sawt. Ka han hawi chhoh chuan, "Kawng mumal a awm lo a, thing zum a tam si i chesual ange, keiman bottle chu ka lo chhar mai ang, han chho rawh," a rawn ti thla nuah nuah a, a awih deuh bawk nen ka hnial bik lo. "Zunna tur ka zawng a," tih pah chuan ka chho ve mai a, "Bawng in sirah khan va zung tawp rawh, tuman an rawn hmu lo ang che," a ti chu ka chhang lem lo, a kal thla pawh chu enzui tawh loin ka chhohsan a, bawng in sir lam ka pan ta bawk. 

Ka hawi kual leh zet hnuah ngaihngam lo fe chuan ka zung a, kawnga rawn chhuk awm sela chu ka lang chiang viauin ka ring a ni. Mahse, tumah rawn chhuk ka hmu bik lo a, ka zun zawh hnuah Azoi pa chu a rawn lang ve leh chiah bawk a, tui bottle pawh a rawn keng chho a, a thuk ru deuh ṭutin ka hre mai.

"A keh em ni?" ka tih chuan, "Aw, thing zumah a lo tâng a," ti maiin min chhang a, bawng inah a lut zui bawk a. Ka va luh laichuan Azoi chu a lo la buai khawp a, a pa erawh chuan haw mai a tum aniang a insiam niin ka hria.

"Rei suh u aw, eirawngte ka lo han bawl ange," kan lam pan paha a rawn tih laichuan, "I kal hmain tui pipe chu va zawm lawk la," Azoi'n a lo ti a, "Ni dawn tak e, ka theihnghilh leh hman chu a," tiin a pa chuan a iptepui chu bangah a tar ṭha leh rih a, pawnah chhuakin an tui pipe chu a va buaipui zui a, rei vak loah Azoi chu a rawn au lauh. "A ṭawnna tur rubber rawn la teh, hmanraw dahnaah khan hlaisa a awm ang," a tih chuan Azoi a che ve vat a, an hmanraw dahna a va hai rawk rawk a, hmanhmawh fêin a tlanchhuak bawk. 

Ka va thlek dûk dûk a, an pafa chuan pipe ṭawnin an buai dun khawp mai. Hun ka nei tih hriain Azoi pa iptepui banna lam chu ka pan nghal a, ka han zen chuan bottle kha a lo awm ngei a, a ruak hiau thung. A pawp chiang khawp mai, engvanga bottle chhia te ak duh nge maw anih le, eng atan nge a tih ang le ka tih rilruk neuh neuh laichuan mak tih deuh ka nei a, chu bottle pawp dan inang thlap chu a ni, hmun li velah a pawp a, thil hriam takin a chhun pawp tih a chiang reng a, ther emaw a awm lo a, a pawp lai pawh chu rualrem lo taka pawp a ni lo, thil pianze nei, thir emaw thing hriam tak hnuhma anih ka ring.

Thang a zuk delh per nge mawni? A tâng khan ka hre reng a, eng thang nge maw ni dawn le, a mak tih bak chu ka hrethiam thui lo khawp mai. An thawm ka hriat leh takah chuan bottle chu ka khung ṭha sawk sawk a, an lo luh chuan bawnghnute ka lo pack mek a, Azoi pa pawh chuan a ipte akin min hawsan ta thuai bawk.

"Grape wine chu tute maw kan pek ngai dawn a?" Azoi chuan a rawn ti ṭha leh a, "Ka thurualpuite, police rawn tirh an nia, nangpawn min pui anih chuan thil ṭha i ti ve a ni mai," ka ti var a, hniak phawi hlek loa dawt sawi te chu ka thiam ve lutuk tlat.

A awih aniang chu, "An la chhuin nasa awm hle mai a," a ti zawi sep a, a thil pack sa lo rem ṭhat mawlh mawlh pah chuan, "Ka lo call veleh che i lo kal nghal mai dawn nia, chaw pawh ei hma deuh ula, kan rei lo ang," ka ti liampuat a, "Eirawngbawl vak a ngai lo ang, ka pa khan chaw a lo chhum chuan kan ei thei a ni mai, thiar chhuah te a ngaih chuan ka inbual hmasa lo mai ang," a ti a, ka hmanhmawh deuh avangin ka tur zui bawk.

Bawnghnute chu kan khai haw dun a, haw kawngah pawh eng eng emaw min zawt luam a, ka thil hriat zawng zawng erawh ka hrilh duh lo, Wine chungchang pawh chu 'Wine pangngai a ni lo a, damdawi mak deuh a nia," tiin ka hrilh a, pi Lalpuii pasal leh ka pa chungchang min zawt chîk hle bawk.

"Pi Lalpuii pasal kha dâwta puh a lo nia, Pi Lalpuii hian a hrechhuak tawh a, pu Muana pawh hian a hre ru vek tawh, ka pa khan pi Lalpuii pasal kha a la dam tih a hre ve anih ka ring," ka han tih te chuan, "A thil hriat vanga thi a nih i ring em ni?" a lo ti ve hlut a, "A ni maithei, pu Muana hian wine hi neih a tum anga, pi Lalpuii pasal khan a phal lo anga, an that ta anihte ka ring a," tiin ka hrilh ve zel a, "Pu Muana pawh a rinhlelhawm tho anih chu; mahse, i pa leh pu Muana chu an inngaina hle si a," tiin a hriatthiam loh hmel khawp a, Wine kan lak chhuah chu a ṭangkai dawn thu ka hrilh leh duah a, farm kan thlen tak avangin kan sawi thui hman ta lo.

Kan bawnghnute hawn chu deep freezer-ah pi Lalpuii'n min dah tir a, nu Mangaihi'n min rawn pui ve nghe nghe. Azoi chu rei awm tawh loin a haw nghal a, keipawh ka pindan lamah ka chhuk a, Lawma ka call zui bawk.

"Chawei kham veleh che nghal mai ang u, Azoi pawn min rawn pui dawn," ka tih chuan, "Jenusi ka be zo chiah, an lo chhuak har lo ang anni pawh, Azoi chuan engtin nge a lo chhan che?" tiin min rawn zawt a, kan inbiak dan te chu ka hrilh ve luam. "Min lo ngaichang dawn nia, in chaw eikhamah chuan i pindanah lo inring sa ula, thawm in hriat veleh in lo ti zung zung dawn nia," a ti a, eng tin nge an rilru lakpen a tum ka lo zawt veleh a, "Buaina ka zuk siam chu a ngai dawn a, kan ri hlut ang," a ti ringawt a, a thil tih tur chu ka huphurhpui angreng khawp mai.

"I pa a ni sia, nuam lo tihna te i nei lo ang maw?" ka tih chuan, "Ani ka be dawn hleinem, ani aia bengchheng tur zawk a awm alawm," a rawn ti a, pa Dinpuia tih thinrim a tum anih hmel.

"Kan rei deuh maithei ania, kan inpeih fel hunah ka rawn call che anga, i lo hrethiam mai dawn nia," tiin signal kan inpek dan tur te ka hrilh a, ani pawn phone ngaichang turin min hrilh ve bawk. Phone dah mai ka tum tawh laichuan, "Lawk," a rawn ti leh rih a, "Eng nge?" ka tih chuan min chhang mai lo.

"Lawma.."

"I pi chu gate lamah a chho mek, Azoi te in lamah a kal dawn anih hmel," a rawn ti a, kan thangkam chu a per fuh hmel ta khawp mai.

"An inhrilh dawn anih chu, kan tum ang thlap," 

"A rawn let hunah chuan a en dan che a dang tawh khawp ang, fimkhur viau rawh aw,"

"An thil zawn lai ve tho anih chuan kan lakchhuah chu a duh zawk daih ang, a pasal hlui hnenah a hrilh nghal ka ring," 

"Nia, beisei ang, in luh hunah chuan thil dang pawh en kual la, lehkhabu emaw thil ṭangkai tur ang chi pawh a awm maithei, thla te lak i lo tum dawn nia," a tih chuan wine siamdan inziahna kha a ni tih ka hrethiam a, ka tih tur thuin ka chhang ve bawk.

"Enteh Lawma, Azoi pa hi pawl thumnaah a tel ve ang tih ka lo ring pha lo reng reng,"

"Keipawn ka ring bik hleinem; mahse, pu Muana nen an inngaina vak lo a, pi Lalpuii lam a ṭang chu a awm viau tho, pi Lalpuii pasal nen ṭhian an lo ni bawk si a, pi Lalpuii thu thua awm tur chi chu a nia lawm," a rawn ti ve luam.

"A mizia te hi a mak ka ti vek tawh, bawng in ah ka zuk kal ve a, a duh lohnaah chuan a thin pawh a chhia, a hlauhawm hmel riau tein ka hre tawh," ka tih zawm a, min vin ringawt kha ka la hrethiam thei lo, pa zaidam tak leh ṭawngmawh tak niin ka hria a, keiphei chuan ka ngaina em em a, khatiangin a thinchhia tih ka la hre ngai lo a ni.

Lawma pawh chuan, "A khirh tih ka hriatna a rei tawh, puih ka tum te hian a duh ngai hleinem, min lo hre daih tawh anga, pu Muana a ngainat loh vangin min lo hnimhnai vak duh lo anih te ka ring asin," a ti ve leh luam a, chu pawh chu thil ni thei tak a ni.

"Huanah hian thang a kam ṭhin em mawn ni le?" ka tih chuan, "Eng thang maw?" a lo ti ve zat a.

"Ka hre bik lo, thang a kam ṭhinin ka hria a, thir hriam deuh chi, thang lian deuh anih ka ring, " 

"Savawm thang aniang,"

"A ni maithei, bawng in thlangah khan thang ang deuh ka hmu a, ka rah palh a hlau nge ni min rawn vin chiam pek a,"

"E, leia phum chi te pawh an kam ṭhin alawm, keini pawn vawk in thlangah kan kam ve nual, ramsa hian rawn khawih an tum ṭhin a, hman deuhah pawh khan sakei kan awk nawlh tawh alawm," a tih chuan ka hrethiam ve ta chiah, an bawng venna thang a nih hmel e, ka zuk awk ang tihte pawh ka hlau leh hnuhnawh khawp a, Azoi pa awmdan te pawh ka hrethiam leh ta viau mai.

Ka inbiak zawh chuan ka inbual leh te tea, ka zawh hnuah ka thawmhnaw leh thil pawimawhte chu bag-ah ka khung khawm a, tlanbo inpeih sain ka awm a ni ber. Ka rilru ang a lo pu ve tho aniang Zoherliana message ka dawn chu, "Tlanchhiat a ngaih takin lo inring lawk ve rawh," tih hi a ni a, ka nuih a za deuh.

"Min tlanpui dawn em ni?" fiamthua ka va ti chu rei loteah a rawn chhang a, "Hnutchhiah chu i hlauh viau ka ring," tih zawng a ni.

"Min sawm tihna em ni?" ka va ti nawn leh kher.

Mahse, message chu a rawn chhang ta mai lo a, a en lo hrim hrim zawk a, an buai deuh anih ka ring. Ka inpeih fel hnuah in chung lamah ka chho a, pi Lalpuii pawh a lo let tawh. Ka nu Nguri chu a nuamsam lo aniang, "A rawn thawh peih chuan chaw ei dawn ang u, pum ruaka nachhawkna ei fo pawh a ṭha lo," tiin pu Muana'n kaitho turin min ti a. Mahse, kai tho tura ka va luh chuan khumah a lo let bâm mai.

"Nu, chaw kan ei dawn asin," ka ti chu min chhang eih lo, che loin bang kil lam a hawi ngar a, a muhil lo tih ka hre thung.

"I eng nge nuam lo a?" Min la chhang duh lo, va kun hnaiin a chal va dehsak ka tum a; mahse, ka va tawh rualin a lo vai sawk. "Ka ei dawn lo, rawn lut sek lo teh u, ka muhil duh," a ti pawr hlur a, biak zui zel pawh a chakawm loh. 

Ngawireng chuan ka kalsawn a, pindan kawngkhar ka hawn laichuan pu Muana lo kal phei ka va hmu a, "A rawn tho duh nange?" a ti chu ṭawngkaa chhang loin lu ka bu zauh a, a lawm loh hmel viau mai.

"A titau vel em ni, khaw lo em em lutuk," tih pah chuan min rawn kalpel a, midang chuan chaw ei an siam mek a, puitling ho chu choka lamah an awm vek a, tuman min rawn ngaihsak lem lo. Mahse, sitting room-ah Duhsaka te unau erawh an rawn hawi hrek hrek a, "Chaw va la ula, tv en pahin in ei dawn nia," ka tih chuan an tho ve sap sap.

Kalsawn mai lo chuan pindan kawngka bulah chuan ka ding a, pu Muana phun hluk hluk thawm chu ka hria. "Hauh hleka titau bûr reng mai, mu ringawt lo khan a zawn te pawh zawng ta che, i kalna hmunah te pawh chuan va en leh rawh, khawi khawiah nge i tei kual pawh ka hre reng reng hleinem, i vak tam leh lutuka, i kalna pawh i hre seng lo anih kha," vin angreng zeta a tih laiin, "Ka nuamsam lo ka tih kha maw le, ka chau anih hi, khatiang chahbi mai mai a tala thlak la a ni mai alawm," pakhat chuan a lo ti pawr hlur a.

"I nuam ang, i inthlahrun vang mai mai anih zawk kha," ti tu chu pu Muana a ni, a la lungawi loh hmel hle bawk.

"Min kawltir ania, ka thiam loh a awm lo, bo palh thei ania, a bo palh a ni mai, tala thlak harsa pawh ni hlei lo, nilengin min phun khuma, nin chin ka nei ve ania aw," ka nu Nguri chuan a ti leh hlak hlak.

"Nin chin ka nei te i tih, ka nin chin i pelhna a rei tawh, mi chhang zuah zuah reng lo khan i thil tihbo chu zawng ringawt rawh," 

"Mi nuam lo pawh chu i va hmu thei lo ve a, ka chau a, thawh pawh ka tho thei lo anih hi,"

"I damdawi chak suffer mai mai anih kha, i duhnaah chuan i kal dawr dawr peih alawm,"

"Awi...i kham awm ngawih ngawih e.....min ngaihsak loh anih chuan lo lut zen lo zawk teh," 

"Tho rawh, chaw te va ei la, zanah kan va zawng ṭha dawn nia,"

"Ka nuam lo ka tih kha, khawiah mah ka chhuak peih lo, i mak em em lutuk,"

"Tho ringawt la a ni mai.." pu Muana aw chu a vin ṭhak a, choka lam thawm pawh a reh dûkin ka hria. Chutih laichuan ring fahran hian, "Ka tho leusêt lo ange, mu hlum ṭhak dawn pawh ni ila ka rawn tho chuang lo ang," pakhat chuan ti fiak ṭhak a, pu Muana phun hluk riin a zui bawk. Rei vak loah pi Lalpuii a lo phei a, "An inhau leh tawh elo?" a rawn tih chuan chhan dan ka hre lo, "A tho peih lo aniang," tih pahin choka lam ka pansan a, pindanah chuan a va lut ve tain ka hria.

Chawei dawhkan ka va kil chu pa Dinpuia'n artui chhum min lo pe vat a, a pawl hi ka duh tih a hria a, midang pawh hian a pawl kher hi min pe ṭhin. "I nu hi aizawlah in zuk hruai dawn em mawni le?" a rawn tih chuan ka hamhaih deuh.

"Inentir turin maw?"

"Aw, i pi khan camping-ah lut ve se a tia, inentir a ngai hrim hrim bawk a, a nghei thuai anih loh chuan a thi vat ang, sawtianga awmtir ringawt chi a ni lo, hetah chuan i pu sawn a khawngaih zel bawk si a, an buaithlak pafa em mai," tiin a han ner zui sak a, chaw a bar zawm mawlh mawlh.

"Ka kal ve kher a ngai dawn em ni?" ka tih leh chuan, "I pi ringawt chu a ngaihtuahawm, a zin khât si a, chinchang a hre lo ang," a ti leh mai a; mahse, Lalpuii lo let chuan a rawn hre hman a, "Aizawlah bona tur a awm lo, ka be fel vek tawh, home siteiiii pawh ka zawt chiang tawh, keimahin ka kalpui thei vek, Minai chu a nu Ṭhatei nau neih a hnai tawh a, khawiah mah kal thei a ni lo," a rawn ti phei bawrh bawrh a, a zin ngai pawhin ka hre si lo a, an ngaihtuahawm ka ti.

"Ka hruai hreh hran lo asin, nu Ṭhatei chu Muantei a awm tho a, a ngaihtuahawm lo ang, helamin in lo buaipui thei tho bawk a," ka han ti chu mi a rawn hnial leh rang khawp a, "I buaipui chi a ni lo, khauh deuh taka tih a ngai, in thute chu engahmah a ngai teuh lo em mai," a lo ti hmiah a, han hnial zel chi a ni lo. Kei chuan kal duh chhan dang ka nei a, helaia awm reng thei ni a ka inhriat loh vang a ni, ka tlat hran angai thuai dawn a, hun remchang ka dap ṭan a ni ber.

Pu Muana chuan a kaitho zo ngang lo aniang tum deuh bur chung hian a rawn phei a, "Saw nu saw TNT-ah zuk dah ula a ṭha ang," a rawn ti nghal tawl a, pa Dinpuia a lo khi suk. Dawhkan kila pu Muana a lo ṭhut laipawh chuan a lo la nui ruh ruh a, pu Muana chuan thîp fe mai hian a rawn melh a, nu Mangaihi erawh chuan an pa chu khap a chak hmel khawp mai. 

"Tunkarah ka hruai ang, speaker pawh ka  be tawh a, a camping center bulah home siteiii pawh a awm a, ṭhiannu Thanchhungi fate pawn min lo buaipui thei ang," pi Lalpuii'n a lo ti leh zung zung.

"Kan pahnihin kan zuk hruai dawn nia," pu Muana'n a tih chuan, "Pahnih kal kher a ngai lo, ka kalpui thei reng alawm maw le, hna ka ngah i tia ni lawm ni?" Pitar chuan a lo ti leh vat a, "Nidanga kal duh ngai der si lo, eng nge maw i hriat teh thut chu?" melh run run paha pu Muana'n a tih chuan, "I hriat ve kher a ngai lo," pitar chuan a ti deuh hmak a, pu Muana chuan a melh rum ul mai.

"Thil hre lo turah min ngai suh aw..." a han ti khar khar a, "I zeldin thu mai mai khan mi ringhlel tei vet lo mai rawh," pitari'n a ti ve leh zat a, "A tar a tar hian lerh ṭhat leh i'n han tum vel em mawni," putar chuan deusawh hmel zet hian a ti a, chutah...pa Dinpuia a lo inrawlh ve zat.

"In ninawm zozai ania, mi dangte pawh hi min hmaizah ve deuh ṭhin teh u, awm dun hleka in ngur reng mai, chaw ei pawh in ti tui nek lo," a lo ti ram hmak a, a tho zui hmiah bawk.

Ngawirengin chaw kan ei ta hlawm a, a khat tawkin pu Muana chu a ṭhu ngil leh hluai ṭhin. Chaw kan ei tui lo tlang aniang kan kham thuai hlawm a, kan nulate pahnih thleng sengfel pawh chu pui lem loin veranda lam ka pan a, ṭhut paha ka phone ka han en chuan Zoherliana message a lo awm vang tawh.

"Sawm ta che ila engtin nge min chhan ang?" tih a ni.

"I hriat duh chuan min han sawm chhin la," tih ka thawn a, a lo en nghal vat a, ka za deuh ruai. A rawn typing laichuan ka thinphu te chu a rang dawt dawt a, ka ṭhu hle hle thei lo. Ka tho vut a, kawt zawlah chuan chhukin tuizem bulah ka va ṭhu tung ut a, a message lo thleng tur chu ka chang ran bawk.

"Kan thiltih hi kan zawh chuan kan haw a ngai dawn a, nangpawh kha laiah khan i awm duh tawh kherin ka ring lo a, eng nge tih zel i tum ang?" a'n han pehhel reuh khawp a, a rilru te chu rawn bun ruak law law se ṭha mai tur.

"Ka hre lo le, ka lo ngaihtuah ve mek a, he khua hi chhuahsan ka duh maithei a ni," tiin ka chhang a, a rawn sawi tlang tawh ngei ka beisei.

"Chhungte dang i nei em?" a rawn ti leh te te a, ka dawh thei meuh tawh lo.

"Nei e, min ngaihsak hran lem lo," ka ti tawl a. A rawn typing leh.

"I nu chhungte nge i pa chhungte?"

"A pahnihin, Aizawlah an awm hlawm a, kan inbe khât,"

"I va mal ve, nangmaha tla fal tur chuan i la naupang asin," a message ka hmuh chuan ka nui ru tet tet.

"Nia, ka mal, ka fahrah hringnun anih ve hi," Ka message chu enin ngaihtuahna a seng vel aniang a rawn chhang mai lo a, eng nge a ngaihtuah ang tiin rilru ka lo seng buai ve hle bawk.

Rei vak loah chuan a rawn chhang leh a, a message chuan ka hnuk a ti ulh ṭep, "I mal tawh hleinem, ka awm alawm," tih hi a rawn thawn a, "I awm reng angem, thu min tiam theih chuan khawiah pawh ka zui hreh lo ang che," Rilru leh tih takzetin chu message chu ka thawn a, hlauhthawnna ka nei lo, beiseina sang tak ka nei zawk a ni.

Chhanna ka dawn leh chu hetiang hi a ni, "Chhungkua tak tak i nei lo anih kha, tupawn chhiat ṭhata min tuam hlawm tur chhungte tak tak kan neih a ngai, damloh leh harsatna i tawh changa tluk luhna turte pawh i la mamawh dawn a, i mamawh chu ka lo ni ang, lo inngaihtuah la, i duh chuan min zui dawn nia," tih thu chu sawmna ka dawn tawh azawnga duhawm ber anih ka ring.

"Hmaichhanah sawi ṭha leh ang aw,"

"Kan sawi ṭha dawn nia,"

"Ka hnar lo che ania aw,"

"Aw le,"

"Chuan, ka lawm lutuk ania,"

A message ka nghah leh laitak chuan kawngkhar inhawng thawm ka hria a, tuizemin min hliah avangin tunge lo chhuak ka hmu thei lo a, phone chu ka bih leh thuai bawk. Mahse, ṭawng thawm ka hriat vang chuan phone chu ka hmet thim vat a, pi Lalpuii niin ka hria. Ka va thlek dêk dêk a, pa Dinpuia nen an ni.

"Amah i be tawh em ni?" zawi deuh taka pa Dinpuia'n a tih chuan, "Be chiah lo; mahse, aizawl ka kal chuan hmuh ngei ka tum ang," tiin a nu chuan a chhang a, tu chungchang nge maw an sawi ni?

"Tinge maw min biak duh miah loh le, ṭha takin mi te pawh rawn be ve mai sela ni tur,"

"Kan boruakin a zir bik lo a, hriatthiam ve a ngai, kei lah pasal pawm lai nei ka nia, ka hmuh chuan titi pui ka tum ang, Makimi pawh ka hrilh luam a, ani phei chuan hmuh a chak khawp a, Tluangate damdawiin awm thu pawh i pa Chama'n a hrilh tawh a, a va ngaihven ve maithei a ni," pitar chuan a ti sap sap a, a pasal hlui chungchang an sawi tih chu a chiang ta hle.

"Pa Chama chuan engtik nge a biak hnuhnun ber?" tiin pa Dinpuia chuan a zawt leh a, "Kar hmasa lawk khan, a hrisel ṭha vak lo a ti lehnghal a, a nupui ṭhen tak lah khan a ngaihsak zui lo niawm tak a ni," pitar chuan a ti a, a ṭawng tawp lamah chuan lawm lo awka a langin ka hria.

"Pasal i nei ve tlat bawk si a, min rawn pan duh chu a rinawm loh, kan putara ber bur lah hi a pawngpawrh tual tual mai a, engtia tih chi nge mawni," tia pa Dinpuia lo ṭawng leh pawh chu a nelawm bik vak lo.

"A duhkhawp kan pe lo anih chuan a luhlul khawp ang, a zia chu ka hre chiang alawm, i pu ât man kan la chawi zel rih anih hi," pitar chuan a ti leh bal bal.

"Kan zingah chuan ka pa'n a tuar nasa ber, aizawlah chuan zuk kal vat la a ṭha ang, thil tih fel zung zung a ngai tawh, ṭha deuhin zuk sawipui la, he lam chu keiman ka lo buaipui vek ang, a ta ni lopui pek kha kei chu ka tum ve lo ania, ka pa pawh hrilh nghal la, inthlahrung vak duh suh se," pa Dinpuia chu a ṭawng ring lo nain a thinrim lek lek hian ka hre mai. "Chhungkuaa sawi ho phawt a ngai, Tluanga pawn engmah lo ti rih lo turin a chah lawm lawm che kha, i farnute pawh kan râwn ve phawt ang," khauh deuh tak hian pitar chuan a ti a, pa Dinpuia chuan luh mai a tum aniang, "Insum hram hram ang che, thil tih vut vut chi a ni lo," pitar chuan a ti zui leh a, kawngkhar hawng thawm ka hre zui bawk. 

Pi Lalpuii pawh chu a lut ve leh nghal mai a, kei erawh ka ṭhutna ngaiah ka la ṭhu reng. Hetiang hi a lo ni maw pawl thumnate thil tihdan chu ka ti ru neuh neuh a, ka pa khan heng vel hi a lo hre chhuak anga, a ṭawng chhuah hlauin an that ta a ni ngei ang. Anih loh pawhin ka pa kha an thil duh ru chhuak turin an ti anga, an bum tihna pawh a ni thei. Nge ni a, an duh loh zawnga a awm vang zawk ni ang le!?

Azoi ka va call a, "Ka hman ṭep, thleng ka sil zawhah ka lo phei ang," a rawn ti nghal var a, a pain eng nge a tih ka zawh chuan, "In hnuaiah a sazupui ho a kawm leh tawh," tiin min chhang a, Azoi pa hian sazupui leh sazu var chi te a vulh a, a buaipui peih khawp a, ṭhutchilh pahin a be mawlh mawlh ṭhin.

Kawta ka lo nghah tur thu hrilhin kan inbiakna ka titawp a, Zohera ka call zui bawk a, a rawn chhang rang khawp mai. "Kan lo chhuak tawh e, kan lo thleng har vak lo ang," a rawn tih chuan ka phur ve lek lekin ka hria. "In lo thlen hunah lo sawi rawh u," ka ti ve vat a, "Fimkhur rawh aw," a rawn ti te chu hriat a nuam hliah hliah. Ṭawng leh ka tum laitakin Jenusi'n phone a rawn chhang a, "Lawmsanga ngaichang la, thawm i hriat hma chu lo che rih suh, i ngaichang loa nangmaha i che anih chuan a tan a buaithlak dawn ania," a rawn ti nghal phawr phawr.

"Lawma nen tihdan tur kan sawi fel vek tawh, in awmna turah khan a hun takah lo awm ula a ni mai," ka ti chang ve fawl a, "Kan lo awm ang, chanchin kan lo hrilh leh ang che," a rawn ti sam et a, a awki pawh a san ve duh lo.

"Ka dah dawn ania," ka tih chuan, "Thil a kal dik hmel amaw?" a rawn ti leh a, min ringhlel deuh em mawni! 

"Kal dik loh i ring em ni, ka tibuai ṭhin ni awm taka," ka ti let hlak a, "I fel ṭhin e," a rawn ri vei fahran, ka helh viau nain inhnial ka peih bik lo a, call chu ka titawp zui bawk.

Minute 20 dawn ka nghah hnuah Azoi chu a lo thleng a, "In hnuaiah chhuk nghal ang, midang pawh an inpeih ṭep tawh," tiin in chhung lamah ka luhpui a, kan va luh laichuan Biakite ṭhiandunin chhuat an lo nawt a, sitting room-ah naupangin lehkha an lo zir bawk a, nu Mangaihi'n a ṭhutpui laiin pa Dinpuia erawh dawhkan kilin a ṭhu run a, pu Muana chu an pindan lamah a awm anih hmel.

"Azo, zikhlum tereuh te te a awm ṭeuh mai, sazu chaw ah hawn rawh, ei tlak deuh deuh pawh a awm," Pi Lalpuii'n a lo ti sawk sawk a, "Ngawi rawh, ka la leng rei dawn, haw dawnah," tia Azoi'n a chhan vang chuan pi Lalpuii thawh tum uk tawh chu a ṭhu ṭha leh a. "Saiip bag vara mi zawk saw aw, pakhat ami saw chu ar chawah ken thlak tur," tiin pa Dinpuia chu naktuka ar huan lama zuk pe turin a hrilh zui a.

"Ka pindanah kan awm dawn ania, zanin chu min riahpui maithei, a peih chuan.." tih pahin Azoi chu ka va melh zauh.

"Riah em em te chu.." a ti hman awrh, "Ka ti mai mai, rei deuh i leng ang.." tiin ka'n nuih deuh sâng a, ka hui zauh hnuah sitting room lam ka pan zui a, "Thil pek tur che ka nei nual, pheikhawkte pawh a awm maithei," tih angreng sawi pahin in hnuai step lam ka pan tlang a, pangngai thei ang bera lan ka tumna mai a ni. "I tan hi chuan a thilphal maw le," nu Mangaihi'n a lo ti zauh a, "Kan bun tawk a inanga a tihzia tak tak a ni," tiin Azoi chuan a chhang a, a rawn chhuk pawh chu a rawn nui thla vur vur.

Ka pindan kan thlen chuan, "Lawma ka'n be lawk ange," tiin tukverh lam ka pan a, ka call zui a, chutih laichuan Azoi chu khumah a lo ṭhu awn diai a, ka thawmhnaw bawm lam a en bawk. Lawma'n phone a lo chhan chuan, "An lo kal mek a, keini chu kan inring reng tawh aw, nangmah kan lo ngaichang ang che, Jenusi te chu lo va be zui mai rawh," ka ti zung zung a, "Kan inbe zo chiah, nghak lawk ang," a lo ti ve vat a, ani pawh a inpeih viau tawh anih hmel.

"Engtin tak maw i rawn tih dawn?" ka tih chuan, "I pu pawisa min pek ka rawn dahlet pah ang chu," a ti a, ka beisei loh lam daih a ni.

"Chu ringawt chu maw?" 

"Ni lo ang, i hre thuai dawn alawm," a ti leh mai a, a inrintawk hmel em avang chuan ka zawt zui duh lem lo, lo ngaihchan tawp chu ka chanvo a nih rih.

Phone kan dah hnu chuan ka chahbi ruk kha ka phawrh a, Azoi chu kan tihdan turte ka hrilh a, "Pindan lehlamah sawn ania, khumah hian thiar phei ila, tukverh aṭanga thiar chhuah zung zung a rem ang," tiin ka khum pawh chu tukverh hnaih thei ang ber a hun sawn ka rawt a, min hnial loin min pui ve zung zung mai.

Zoherliana message ka dawn chuan darkar a tling leh hman ṭep a ni, bike-a lo kal an ni lo bawk a, an lo thleng har angreng. Azoi nen chuan thawm awm hun kan ngaichang ran a, Lawma chuan rei a rial tawh lo, in chung lama inhau thawm a rawn awm chiah chu kan tho rang khawp mai. Hmanhmawh deuhin ka pindan lehlam kan pan a, tala ka hawn laichuan in chung lama pa Dinpuia ṭawng lung lung thawm kan hria a, a thilsawi chu ka bengkhawn lem lo, a thinrim tih a hriat viau a ni.

Pindan chhung chu a thim mup a, a phui ṭha bawk a rim pawn hnar a verh zar mai. Thil um ṭawih rim leh hmuar rim te a namin ka hria. Kan phone light chuan kan ên kual thuak thuak a, chhuar inhung leh dawhkan tereuhte bula chair inhung ka va hmu a, chhuarah chuan wine bottle a awm bawk. Mahse, bottle chu 10 bawr vel bak a awm lo, ka va en chiang a, a label pawhthlak te an ni hlawm a, kan wine zawn chu a nih ngei ka ring. Dawhkan lam chu ka pan a, khawnvar hlui deuh tawh pakhat bulah chuan lehkhabu sei deuh deuh hi a awm a, a hluiin a bal hlawm hle bawk. Ka en enkual thuak thuak a, hmanlai thawnthu bu a niin ka hria, cowboy bu em mawni.

"Eng nge i zawn?" Azoi'n a rawn tih chuan, "Ka'n enkual lawk," tih pahin pawhdawh a awm leh awm loh ka zawng a, a pangah chuan engmah ka hmu lo. Mahse, dawhkan pang chu a chhung lamah thil dahna awm niawm tak hian a chhah a, a hawnna awm ang a awm chuang si lo chu ka buai deuh.

"Hei, an inhau tawh miah lo ania!" Azoi'n a rawn tih chuan ka ding mar vut a, in chung thâwm chu a reh ṭhuap. 

"Ti nge le, an zo der tihna em ni ang?" phâwk fein Azoi lam ka hawi a, "Thâwm a awm char char dawn i ti sia, Lawmsangpuia'n an rilru a lo la peng dawn a ni lawm ni?" a lo ti he haw a, a ngaihna ka hre bik lo. Hmanhmawh deuh chuan dawhkan chu ka zuk en leh a, lehkhabu ka han hnawl sawn rual chuan kawngkhar kawpza ang deuh hi dawhkan chungah chuan a lo awm a, a te khawp mai. A chung lam aṭanga hawn tur tih ka hrethiam nghal a, dawhkan chunga thil awm ho chu chhuatah ka dah thla rawk rawk a, dawhkan kil tawn tawnah chuan ka'n chawi kang lawp mai a, a inhawng ta huau mai.

Eng eng emaw a awm nual, thlalak hlui leh darthlalang bal deuh te, lemziahna lehkha zial te a ni hlawm. Ka hmanhmawh bawk nen ka en chik hman meuh lo a, thil pawimawh tur awm ang pawh ka hmu hran lo. Note bu pakhatah chuan milem nalh deuh deuh hi a inziak a, eng damdawi leh eng formula mah ka hmu lo thung.

'A awm tur a ni' tiin kan en nawn leh chiam a, engmah ka hmu chuang lo.

"La ila, chhuak vat teh ang," Azoi'n a rawn tih chuan ka thil haihnawk chu ka dah ṭha leh sawk sawk a, engmah lak loh aiah tiin note bu te chu ka la chhuak ta hram a, wine chu kan mamawh ber an ti bawka formula nei lo mahila kan che ṭha thoin ka hria. 

"Sawm 12 a awm,"

'Vawikhatah kan keng zo theiin ka ring," tia han lak ka tum laitak chuan ka phone ah lai chu a rawn nghawr dar dar. Lawma signal em mawni ti rilru chunga phone ka han en chuan Jenusi hming a lo lang va a, beisei loh ber ni mahse ka chhang rang viau thung.

"Chhuak vat rawh u," a rawn ti nghal ringawt.

"Thil dik lo a awm em ni?" zawi leh bangbo fêa ka tih chuan, "Thil a danglam vek, i ṭhiannu khan a ni lo zawk hnenah a hrilh, pu Muana'n kan thil tih a hria," a rawn ti ta mai a, Azoi bottle la thla lai chu ka va melh zawk.

"Lawma'n eng nge a lo sawi?" ka tih laia ka aw chu zawi tak a ni, ka hlauthawng ru khawp a, ka aw te chu a khur deuh.

"Thil a danglam vek, chhuak ula, sawi ho tur kan nei," a rawn ti leh a, "Kan chhuak nghal dawn, engmah lak a ngai lo maw?" ka ti leh hram a, "Ngai lo, a ṭangkai tawh lo," a tih chuan thawk ka la ham ham. 

"Chhuak fel vat ula, ka rawn be leh ang che," a tih leh laichuan Zohera aw ka hria a, "Mi an lo kal," a ti ri a ni. Phone chu a tawp zui a, keipawh chuan Azoi bottle lak sa chu ka va dah let rawk rawk a, "Chhuak ang," tiin kawngkhar lamah ka nam phei rawk rawk.

"Ka pindanah lo va awm rawh," tih pahin kawngkhar chu ka kalh ṭha zui a, thil awmdan chu ka hrethiam lo tawp mai. Azoi chuan a pa a hrilh anga, pi Lalpuii hnen a thleng tur a ni a; mahse, engtin nge pu Muana zawkin a lo hriat daih theih. Jenusi'n 'Thil a danglam vek' a tih kha eng nge a awmzia ni ang, han ngaihruat dan pawh ka thiam lo, buaina kan tawk dawn tlata hriatna ka nei lehnghal a, ka chiai ru deuh ruai.

Ka kalh fel hnu chuan phone ka en vat a, "Hlauthawng suh, engmah ti lo anga awm tawp a ni mai," tih zawng hi Zohera'n a lo thawn a, a awmzia ka la hrethiam chuang lo.

Ka call zui a, a rik rualin a hmet tawp nghal hmak mai a, a ngaihna ka hre lo lehzual. Ka pindana ka va lut lah chu Azoi'n thil awmzia min lo zawt chul a, "Kan ṭhulh thu an rawn sawi a, a bak ka hre lo," ti maiin ka chhang a, engmah hrilh belh chi niin ka hre tawh lo, amah vang liau luau hian kan hlawhchham anih hrep hi.

"Be rawh, a chhan te zawt la, engtin nge kan awm dawn te han zawt teh," a tih pawh chuan, "Min lo be mai ang," ka ti bul hmuk a, khumah ṭhuin phone chu ka chang ran bawk. Eng eng emaw ka ngaihtuah kual a, Lawmsangpuia khan min lo phatsan em mawni ka ti rum rum. Mahse, Jenusi khan pu Muana chuan hria pawh nise a pawi lo a ti khan ka hria a, engati nge thil a danglam vek anga a rawn sawi leh si le, thil danglam vek tur chu eng nge ni ta ang...!?

Jenusi chuan hriat chhuah a nei anih ngei ka ring!?

End of chapter - 20